انفاق فی سبیل اللہ سے مراد ضرورت مندوں‘ یتیموں اور بے سہارا لوگوں پر اللہ تعالیٰ کی خوشنودی کو مدنظر رکھتے ہوئے مال خرچ کرنا ہے۔قرآن حکیم میں متعدد مقامات پر مسلمانوں کو انفاق فی سبیل اللہ کا حکم دیا ہے کہ جو مال تمہاری چند روزہ زندگی میں تمہیں نصیب ہوا ہے اور جسے تم چھوڑ کر جانے والے ہو اسے اللہ تعالیٰ کے راستے میں خرچ کرکے آخرت کا سامان تیار کرو۔سورة الحدید میں ارشاد باری تعالیٰ ہے‘
”اللہ اور اس کے رسول صلی اللہ علیہ وآلہ وسلم پر ایمان لاﺅ اور اس (مال و دولت) میں سے خرچ کرو جس میں اس نے تمہیں اپنا نائب(امین) بنایا ہے“۔
اللہ کی رضا کے لئے ضرورتمندوں کی ضروریات کو پوراکرنا اور اس کے دیئے ہوئے مال سے خرچ کرنا انفاق فی سبیل اللہ کہلاتا ہے۔
خرچ کرنے کا انداز مختلف ہوسکتا ہے۔ ظاہری اور باطنی طور پر انفاق کرنے کا حکم ہےِ۔یہاں ایک باریک نکتہ سامنے آتا ہے کہ ظاہری طور پر انفاق کرنے یا انفاق کو ظاہر کرنے کی بھی کچھ شرائط ہیں۔آپ اگر ایک ہسپتال بنوا رہے ہیں تو یہ ظاہری انفاق ہے ۔اس سے کسی ضرورت مند کی عزت نفس مجروح ہونے کا اندیشہ نہیں ہے ۔ ایسے کسی فلاحی اور رفاعی پراجیکٹ کے حوالے سے اگر تشہیر کا پہلو نکل رہا ہے تو اس میں کوئی مضائقہ نہیں۔ لیکن اگر کسی بیوہ یا یتیم کی مدد ہورہی ہے اور کسی طرح کا امدادی سامان تقسیم کرنا ہو تو پھر فوٹو سیشن بہت ہی معیوب لگتا ہے۔ اسلامی معاشروں میں صدیوں سے ضرورتمندوں کی ضرورتیں پوری ہوتی رہی ہیں اور اکثر مخیر لوگ چُھپ چُھپا کر یہ مدد کر رہے ہوتے ہیں۔ ”لینے والے کو دینے والے ہاتھ کا پتہ نہ چلے“ اس احتیاط کا پورا پورا خیال رکھا جاتا ہے لیکن جب سے این جی اوز سامنے آئی ہیں اور نمائش کا کلچر فروغ پایا ہے تب سے ضرورت مندوں ‘ بیواﺅں اور یتیموں کو تشہیر کا سستا ذریعہ بنا لیا گیا ہے۔اخبارات دیکھیں‘ چینلز کے سامنے بیٹھ جائیں ہر طرف ایسی تصویروں اور رپورٹوں کی بھرمار ہوتی ہے۔آٹے کا تھیلہ دیتے وقت تصویر ‘گھی کا ڈبہ دیتے وقت تصویر‘ رقم کا لفافہ دیتے وقت تصویر۔غرض مقصد اپنی تصویر بنوانا اور ذاتی تشہیر کرنا ہے نہ کہ ضرورتمندوں کی دادرسی کرنا ہے۔ عزت نفس قدم قدم پر مجروح کی جاتی ہے۔ یہی وجہ ہے کہ سفید پوش ضرورت مند اپنی ضرورت کا اظہار ہی نہیں کرپاتے مبادا کے خیرات کرنے والے ہاتھ کیمرے لے کر گھروں میں گھس آئیں۔ روتی بچیوں کی تصویریں بنائیں اور بھوک سے نڈھال ماں کے بیانات ریکارڈ کریں۔
سب سے ظلم اس وقت ہوتا ہے جب ضرورت مندوں کی طرف سے مخیرخواتین و حضرات یا ادروں کا شکریہ ادا کیا جارہا ہوتا ہے۔ اسلام میں خیرات کے پیچھے صرف ایک ہی جذبہ کارفرما ہونا چاہیے اور وہ فقط اللہ تعالیٰ کی رضا اور خوشنودی ہے۔ جب مقصد اللہ کی رضا ہو تو پھر تشہیر کی ضرورت نہیں رہتی۔ وہ تو انسان کی شہ رگ سے بھی قریب تر ہے۔ اور وہ دلوں کے بھید جانتا اور نیتوں کو بھانپ لیتا ہے۔
جب میڈیا ایک کلچر کو فروغ دے رہا ہو تو بہت مشکل ہے کہ اس تصویری اور تشہیری عذاب سے معاشرے کو نجات دلائی جاسکے۔لیکن اب بھی ایسے صالح افراد اور نیک تنظیمیں موجود ہیں جو ضرورت مندوں کی ضرورتیں تو پورا کرتی ہیں لیکن ضرورت مندوں کا تماشا نہیں لگاتیں۔
ایک ایسا ہی قابل تقلید اور مظاہرہ پھالیہ میں منعقدہ مغل ویلفیئر کنونشن میں دیکھنے کو ملا۔ تنظیم مغلیہ پھالیہ کی دعوت پر مجھے بھی بلایا گیا تھا۔ ایک بڑے پنڈال کے عقب میں جہیز کا سامان‘ سلائی مشینیں اور بجلی کے پنکھے طویل قطار میں سجائے گئے تھے۔ بتایا گیا تھا کہ یہ سامان ضرورت مندوں میں تقسیم کیا جائے گا اور ضرورت مندوں میں زیادہ تر غریب اور بیوا خواتین شامل تھیں۔ کنونشن کے منتظمین نے مستحق افراد کی عزت نفس کا خیال رکھتے ہوئے یہ اہتمام کیا کہ اپنی سکروٹنی کمیٹی کے ذریعے ضرورت مندوں کا تعین پہلے سے کر لیا تھا۔ ان کی فہرست تیار تھی اور کیا چیز کس کو دینی ہے یہ بھی طے تھا۔ لیکن تنظیم کے سیکرٹری انفارمیشن مرزا قیصر فاروق نے بتایا کہ سامان کی تقسیم کی تصاویر نہیں بنیں گی۔ بلکہ فہرست میں درج نام بھی ظاہر نہیں کئے جائیں گے تاکہ کسی ضرورتمند کا دل نہ دُکھے۔
مجھے یقین ہے کہ تنظیم مغلیہ کے اس قدام سے لوگوں کے دلوں میں خیرات کرنے کا جذبہ مزید بڑھا ہوگا۔ اور جو شہرت تصویر کے ذریعے حاصل ہونی تھی اس سے کہیں زیادہ نیک نامی ملی ہے۔ اللہ سے دُعا ہے کہ ہمیں ظاہری نمائش سے بچائے تاکہ ہمیں انفاق فی سبیل اللہ کے حقیقی مقاصد حاصل ہوسکیں۔

قرآن پاک کی سُورة القصص میں بڑی تفصیل سے قارون کا قصہ بیان کیا گیا ہے۔ اس قصہ کا مقصد اسلام کے نظام مال و زر کی وضاحت کرنا ہے۔قارون مصر میں فرعون کا نمائندہ تھا جسے بنی اسرائیل قوم کو دبانے کے لئے بے بہا دولت دی گئی تھی۔ اُس کی دولت کا عالم یہ تھا کہ اس کے خزانے کی چابیاں اٹھانے کے لئے دس اونٹ درکار ہوتے تھے۔ دولت نے اسے انتہائی متکبر اور خودسر بنا دیا تھا۔ اس کی دولت کا چہارسوچرچا تھا۔ وہ مال و دولت کو خرچ کرنے کی بجائے اس میں اضافہ کرتا رہتا تھا۔ قارون کو سمجھایا گیا کہ وہ اپنی دولت جمع کرنے کی بجائے مساکین اور ضرورت مندوں پر خرچ کرے اور اس کے ذریعے اپنی آخرت سنوارے۔ لیکن قارونی نفسیات اس قدر غالب تھی کہ وہ اللہ‘ آخرت اور روزوجزا کا مذاق اُڑاتا اور ہوس زر میں مدہوش رہتا تھا۔
قرآن میں قارون کا عبرتناک انجام بتایا گیا ہے۔ وہ اپنے خزانے سمیت زمین میں دھنسا دیا گیا۔ اُس کی دولت اس کے کسی کام نہ آسکی۔ اس کا آقا فرعون بھی اسے بچا نہ سکا۔ جو لوگ قارون کے خزانوں سے مرعوب رہتے تھے وہ اس کا خوفناک انجام دیکھ کر شکر بجالائے کہ وہ کم از کم قارون بننے سے بچ گئے تھے۔
ہوس زر میں مبتلا ہر شخص قارون ہے۔ قارونی سوچ کے اسیر امراءکی تعداد بڑھتی جارہی ہے۔ جوں جوں دُنیا کی دولت میں اضافہ ہورہا ہے‘ قارونوں کی تعداد میں بھی اضافہ ہوگیا ہے۔ حالیہ تحقیقاتی رپورٹوں سے پتہ چلا ہے کہ سوئٹزرلینڈ کے بینکوں میں دُنیا بھر کے قارونوں کی دولت جمع ہے۔ پاکستانیوں کی بھی کثیر تعداد موجود ہے جن کی بے پناہ دولت کا انہیں خود بھی اندازہ نہیں ۔ پھر یہ رپورٹیں بھی سامنے آئیں کہ دُبئی میں بڑے بڑے قارونوں نے پراپرٹی کے اندر بھاری سرمایہ کاری کردی ہے۔ ملائشیا اور برطانیہ میں بھی ہوس زر کے مجسم مظاہرے دیکھنے کو ملے ہیں۔ دُنیا کے امیر ترین افراد کی سب سے بڑی تعداد امریکہ میں ہے جن کی دولت بینکوں میں پڑی ہے اور اس دولت کا نوح انسانی کو کوئی فائدہ نہیں ہے۔دُنیا کی چالیس فیصد آبادی خطہ غربت سے نیچے زندگی گذارنے پر مجبور ہے۔ دراصل زمینی وسائل سے پیدا ہونے والی دولت پر چند ہزار لوگوں نے قبضہ کر رکھا ہے ۔ ساڑھے نوسو ارب پتی لوگوں نے دُنیا کی ننانوے فیصد دولت پر قبضہ جما رکھا ہے۔ یہ وہ مال و زر ہے جو گردش میں نہیں آرہا اور انسانی معیشت کی رگوں سے خون نچوڑکر سٹور کر لیا گیا ہے۔ انسان بھوک‘قحط اور بیماریوں سے مر رہے ہیں اور جدید دور کے قارون اپنی دولت جمع کرنے اور گننے میں مصروف ہیں۔تکبّر نے ان کی گردنیں اکڑا رکھی ہیں اور انہیں دولت مندی کا گھمنڈ اپنی روش سے رُجوع کرنے نہیں دیتا۔
پاناما لیکس نے ہزاروں نئے قارونوں کی نشاندہی کر دی ہے۔ یہ تمام وہ انسان نما بھیڑیے ہیں جو دولت بچانے کے لئے آف شور کمپنیاں کھولتے ہیں۔ٹیکس سے بچنے کا مطلب ہی یہ ہے کہ دولت کا وہ معمولی سا حصہ جو عام انسانوں کی فلاح و بہبود کے لئے استعمال ہوتا ہے وہ حصہ بھی دبا لیا جائے۔ پاکستان میں اڑھائی سو ایسے افراد ہیں جن کا نام اس بدنام زمانہ فہرست میں شامل ہے۔شرم سے ڈوب مرنے کا مقام ہے۔ پاکستان میں ہر دوسرا شخص بھوک سے پریشان ہے۔ دوائی دارو تو دور کی بات دو وقت کی روٹی دستیاب نہیں ہے۔ لیکن ان اڑھائی سو لوگوں کو ایک ہی جنون ہے کہ وہ اپنی دولت کو مزید بڑھاتے جائیں۔ پاکستان سے پیسہ اکٹھا کریں اور بیرون ممالک قائم آف شور کمپنیوں میں ڈال کر مزید دولت مند بن جائیں۔ یہ ہیں ہمارے عہد کے جدید قارون۔ میاں نوازشریف کی دولت میں آج تک کمی نہیں ہوسکی۔ پاکستانی قوم نے اپنی آنکھوں سے دیکھا ہے کہ میاں برادران کی دولت میں بے پناہ اضافہ ہوچکا ہے۔ وہ ماڈل ٹاﺅن سے نکل کر رائے ونڈ محل میں منتقل ہوچکے ہیں۔اُن کا کاروبار پاکستان سے نکل کر سعودی عرب اور لندن تک پھیل چکا ہے۔ اور اس پھیلاﺅ کی کوئی انتہاءدکھائی نہیں دیتی۔ اگر اللہ کی دی ہوئی ہدایات کی روشنی میں دولت خرچ کی جائے تو دولت میں اچانک اور بے پناہ اضافہ ممکن ہی نہیں ۔لیکن آف شور کمپنیاں چیخ چیخ کر بتا رہی ہیں کہ یہ لوگ قارون کے پیروکار ہیں۔ اور ان کا انجام بھی قارون جیسا ہو کر رہے گا۔
قرآن پاک میں اللہ تعالیٰ نے فرمایا‘
”اور تم اس میں سے خرچ کرو جو رزق ہم نے تم کو دیا ہے اس سے پہلے کہ تم میں سے کسی کو موت آئے اورپھر وہ کہے کہ اے میرے رب تو نے مجھے کچھ مدت تک اور کیوں نہ مہلت دی کہ میں صدقہ کرتا اور صالح لوگوں میں ہوجاتا۔ اور اللہ ہرگز کسی کو مہلت نہ دے گا جب اس کی اجل آجائے گی۔ اور اللہ تمہارے اعمال سے باخبر ہے۔“(سورة المنافقون)
” بے شک قارون موسیٰؑ کی قوم میں سے تھا۔پھر اس نے ان پر ظلم کیا۔ اور ہم نے اس کو اس قدر خزانے دیئے تھے کہ بلاشبہ اس کی چابیاں طاقتور مردوں کی ایک جماعت کو تھکا دیتی تھیں۔ یاد کرو جب اس قوم نے اس سے کہا‘اترامت۔ بے شک اللہ اترانے والوں کو پسند نہیں کرتا۔ جو کچھ اللہ نے تجھے دیا ہے اس سے آخرت کا گھر تلاش کر۔ اور تو دنیا میں بھی اپنا حصہ مت بھول۔ اور لوگوں پر ایسے احسان کر جیسے اللہ نے تجھ پر احسان کیا ہے اور زمین میں فساد نہ کر۔اللہ فسادیوں کو پسند نہیں کرتا۔قارون بولا۔مجھے تو یہ مال میرے علم کی بنا پر دیا گیا ہے۔ کیا وہ نہیںجانتا تھا کہ بے شک اللہ نے اس سے پہلے بہت سے لوگ ہلاک کردیئے تھے جو قوت و مال میں اس سے زیادہ تھے۔ اور مجرموں سے ان کے گناہوں کے بارے میں نہیں پوچھا جاتا۔
پھر وہ (قارون) اپنے پورے کروفر کے ساتھ اپنی قوم کے سامنے نکلا تو جو طالب دنیا تھے کہنے لگے کاش ہمارے لئے بھی یہ سب کچھ ہوتا جو قارون کو دیا گیا ہے۔بلاشبہ یہ بڑے نصیبے والا ہے۔ اس پر اصحاب علم نے کہا۔افسوس تم پر۔ اس شخص کے لئے اللہ کا ثواب بہتر ہے جو ایمان لایا اور نیک عمل کئے اور یہ بات صبر کرنے والوں کو ہی سکھائی جاتی ہے۔ چنانچہ ہم نے اس کو اور اس کے گھر کو زمین میں دھنسا دیا۔ پھر کوئی جماعت اللہ کے مقابلے میں اس کی مدد نہ کرسکی اور نہ ہی وہ خود بدلہ لے سکااور جن لوگوں نے کل اس کے مرتبے کی تمنا کی تھی کہنے لگے ہائے شامت اللہ اپنے بندوں میں جس کے لئے چاہے رزق کشادہ اور جس کے لئے چاہے رزق تنگ کرتا ہے۔ اگر اللہ نے ہم پر احسان نہ کیا ہوتا تو یقینا ہم بھی دھنسا دیئے گئے ہوتے۔ہائے شامت‘ کافر فلاح نہیں پاسکتے۔“
بقول شاعر‘
اب وقت ہے پیچ و خم دستار کو بدلو
اخلاق کو عادات کو اطوار کو بدلو
بدلو گے تو بچ جاﺅ گے تم قہر خدا سے
اڑ جائیں گے یہ ریگ محل ورنہ ہوا سے
جو کچھ بھی ضرورت سے زیادہ ہے لٹا دو
ٹل جاتی ہےں آفات غریبوں کی دُعا سے

وزیراعظم میاں محمد نوازشریف عملاً پھٹ پڑے ہیں۔ نیب نے احتساب کا دائرہ وسیع کرتے ہوئے پنجاب حکومت کی طرف پنجے بڑھائے تو چیخیں نکل گئی ہیں۔ ایف آئی اے میں بھرتیوں کا سکینڈل’ رائے ونڈ روڈ کی تعمیر کا معمہ’گرین لائن ٹرین کا مُدّا اور پاک قطر ایل این جی معاہدے کا پھڈا۔اور پندرہ افسران کی گردن کے گرد پھندا۔ کیا کیا راز سامنے آرہے ہیں۔دو تہائی اکثریت والی حکومت کے وزیراعظم نے بھری محفل میں اپنی بے بسی کا رونا رویا۔ کہا کہ وہ نیب کے چیئرمین کو متعدد مرتبہ کہہ چکے ہیں کہ بیوروکریٹس کو حراساں نہ کیا جائے لیکن چوہدری قمر الزمان نے کوئی عمل درآمد نہیں کیا۔وزیراعظم نے یہ بھی بتا دیا کہ اگر چوہدری صاحب نے اپنے ”کارندوں” کو تنگ کرنے سے نہ روکا تو پھر حکومت قانونی بندوبست کرے گی۔ پنجاب کے وزیر قانون نے وزیراعظم کے مئوقف کی تائید کرتے ہوئے کہا ہے کہ بغیر کسی ثبوت کے کسی شخص کو نوے روز حراست میں رکھنا اور پھر اسے چھوڑ دینا انتہائی تکلیف دہ ہے۔ انہوں نے یہ بھی فرمایا ہے کہ نیب کو محض اس لئے کارروائی کی اجازت نہیں دی جاسکتی کہ پنجاب کو دوسرے صوبوں کے برابردکھایا جائے۔باخبر حلقوں کا کہنا ہے کہ پنجاب کے وزیر تعلیم نے بھی نیب کے خلاف کافی ”رون پٹن” کیا ہے۔اسی لئے وزیراعظم نے بہاولپور میں اس ایشو کوعوامی سطح پر اُٹھایا ہے۔
خیبرپختونخواہ حکومت نے نیب آرڈیننس میں من مانی ترامیم کروا لی ہیں۔اس ترمیم کے خلاف احتجاج کرتے ہوئے نیب کے صوبائی سربراہ جنرل حامد نے استعفیٰ دے دیا ہے۔انہوں نے مختلف ٹی وی پروگراموں میں الزام عائد کیا ہے کہ وزیراعلیٰ خٹک بھی کرپشن میں ملوث ہیں۔بہرحال اٹھارویں ترمیم کی ڈھال کی صورت میں جناب خٹک نے خود کو بچا لیا ہے۔ باقی صوبے بھی اپنے بچائو کے لئے ہاتھ پائوں مار رہے ہیں۔
صوبہ سندھ تو شروع دن سے ہی نیب کی ”وارداتوں” کے خلاف سراپا احتجاج ہے۔ جناب زرداری تو میاں نوازشریف کو متعدد بار میٹھی میٹھی دھمکیاں دے چُکے ہیں بلکہ خبردار بھی کرچکے ہیں۔ سندھ حکومت نے ایک آئینی ترمیم کے بعد بڑی حدّ تک اپنا تحفظ کر لیا ہے۔ ایف آئی اے کی گرفت ڈھیلی کرنے کی راہیں تلاش کی جارہی ہیں۔ ڈاکٹر عاصم کے حوالے سے زرداری صاحب کُھل کر سامنے آگئے ہیں۔
منظرکچھ اس طرح کا سامنے آرہا ہے کہ اگر چوہدری قمر الزمان وزیراعظم کی دھمکی سے مرعوب نہیں ہوتے تو پھر قومی اسمبلی میں آئینی ترمیم لائی جائے گی۔ یہ بھی ہوسکتا ہے کہ صدر مملکت اپنے پاکیزہ ہاتھوں سے کوئی صدارتی آرڈیننس جاری کردیں۔
تحریک انصاف بظاہر ایسی کسی ترمیم یا آرڈیننس کی مخالفت کرے گی لیکن عملاً کوئی رُکاوٹ نہیں ڈال سکے گی۔ ایم کیو ایم بھی شور تو مچائے گی لیکن نیب کو کنٹرول کرنے کے لئے ترمیم پاس ہونے دے گی۔پیپلزپارٹی کو اور کیا چاہیے۔ کرپشن کا ”تاج” تو اسی پارٹی کے سرسجایا گیا ہے۔ اُسے میاں صاحب نے خود یہ سنہری موقع فراہم کردیا ہے ۔ زرداری جس عذاب کی دہائی دے رہے تھے میاں صاحب نے اس کی گواہی دے دی ہے۔
ایک سوال اُبھرتا ہے اور بار بار ابھرتا ہے کہ آخر نیب کے چیئرمین اس قدر بہادر اور طاقتور کیسے ہوگئے ہیں۔اُن کے اندر اتنی بڑی قوت کہاں سے آگئی ہے کہ انہوں نے بڑے بڑے بیوروکریٹ کو خوفزدہ کردیا ہے۔انہوں نے حکومت وقت وہ بھی نواز شہباز کی حکومت سے پنجہ آزمائی شروع کردی ہے۔وہ ایماندار افسر کے طور پر مشہور ہیں۔ تمام پارٹیوں نے متفقہ طور پر انہیں نیب کے منصب اعلیٰ پر فائز کیا تھا وہ وزارت دفاع میں ڈیفنس سیکرٹری کے عہدے پر خدمات انجام دے چُکے ہیں۔ وہ ایک ریٹائرڈ میجر ہیں اور اکیسویں گریڈ کے بیوروکریٹ۔ وزارت دفاع کے سیکرٹری کی سیٹ جی ایچ کیو کی رضامندی کے بغیر حاصل نہیں کی جاسکتی۔کہیں ایسا تو نہیں کہ انہیں ”جی ایچ کیو” سے ہدایات لینے کی عادت ہی پڑ گئی ہو۔حکومت کو اصل صورتحال کا علم ہوگا۔ وزیراعظم نے یوں ہی عوام کے سامنے نیب کا ٹرائل نہیں کیا۔ یہ دھمکی صرف چوہدری قمر الزمان کو نہیں’ اشارہ کسی اور طرف بھی ہوسکتا ہے۔

اڑھائی سال ہوئے ہیں کوئی دن ایسا نہیں جس دن موجودہ حکمرانوں نے قرض کے حصول کی خواہش نہ کی ہو۔ اس خواہش بلکہ ہوس حصول قرض کا یہ نتیجہ نکلا ہے کہ اب یہ ملک سر تا پاﺅں قرض میں ڈوب چکا ہے۔67 ارب ڈالر کے قرضے ہمارے سروں پر لاد دیئے گئے ہیں۔ قرض پاکستانی قوم نے نہیں بلکہ حکمرانوں نے لیا ہے۔ ان حکمرانوں کا عوامی مینڈیٹ ایک مخصوص اقلیت کے ووٹ ہیں جنہیں میڈیا اور مال کے زور پر حاصل کیا جاتا ہے۔ پاکستان میں اہل ووٹروں کی کل تعداد تقریباً آٹھ کروڑ ہے جبکہ مسلم لیگ (ن) نے صرف ڈیڑھ کروڑ ووٹ لے کر حکومت بنا رکھی ہے۔اقلیتی ووٹوں سے منتخب ہونے والی حکومت بیس کروڑ پاکستانیوں کی قسمت کا فیصلہ کر رہی ہے۔ قرض کی کسی ڈیل میں عام پاکستانی کی رائے نہیں لی جاتی۔ پارلیمان میں موجود جماعتیں بھی حکومت سے نہیں پوچھتیں کہ آخر یہ دھڑا دھڑا قرض لینے کے پیچھے کونسی معاشی حکمت عملی ہے۔ اعدادوشمار بتاتے ہیں کہ ملک جوں جوں مقروض ہوتا جارہا ہے حکمران طبقہ کی ذاتی دولت میں اسی قدر اضافہ ہوتا جارہا ہے۔ فی کس کے حساب سے ہر پاکستانی سوا لاکھ روپے کا مقروض ہوچکا ہے جبکہ اشرافیہ کی دبئی‘ ملائشیائ‘ برطانیہ اور امریکہ میں جائیدادیں پھل پھول رہی ہیں۔ اسحاق ڈار جنہیں کبھی ”قرض اتارو ملک سنوارو“ کی مہم کا خالق قرار دیا جاتا تھا آج کل ایک ہی کام ہے کہ ”قرض لیتے جاﺅ۔ ملک ڈبوتے جاﺅ“ ۔ یوں محسوس ہوتا ہے کہ اسحاق ڈار اور عالمی مالیاتی اداروں کا پاکستان کے خلاف ایک گٹھ جوڑ ہے۔ اڑھائی سال بعد آنے والی حکومت نے یہ قرضے اتارنے ہیں اور قرضے اتارنے کا ایک ہی طریقہ ہے کہ عوام کے جسم پر موجود کپڑے تک اتار لئے جائیں۔
قرض دینا عالمی مالیاتی اداروں کا بزنس ہے ۔ ان کا کاروبار ہی یہی ہے کہ پاکستان جیسے حریص اور مانگت حکمرانوں کو اپنی شرائط پر قرض دیتے رہو اور یہ ملک جو کچھ کمائیں سود کی صورت میں وصول کرتے جاﺅ۔ اگر عوامی ردعمل بڑھے تو حکومتوں کے تختے اُلٹ جائیں گے۔اپنی پسند کا کوئی ”شوکت عزیز“ لا کر بٹھا دیا جائے اور اگر ملک پھر بھی قرض نہ اتار سکے تو اسے ڈیفالٹ قرار دے کر اس کے اثاثے اونے پونے داموں بیچ ڈالے جائیں۔ اس کے ذخائر پر دھاوا بولا جائے اور سود سمیت اپنے ”واجبات“ ہتھیا لئے جائیں۔
کہا جارہا ہے کہ ابھی ایشین ڈویلپمنٹ بینک اور آئی ایم ایف سمیت درجن بھر عالمی مالیاتی اداروں سے مزید قرض لینے کی تیاریاں ہورہی ہیں اور دو ہزار سترہ تک بیرونی و اندرونی قرضوں کاحجم ایک سو ارب ڈالر تک پہنچ جائے گا۔ اسحاق ڈار کے گلے میں ہار پہنائے جائیں جن کی معاشی دہشت گردی کے سبب یہ ملک اس حال کو پہنچ جائے گا۔
ایک اندازے کے مطابق سوئٹزرلینڈ کے بینکوں میں دو سو ارب ڈالر پڑے ہیں۔ اگر ان میں سے آدھی رقم بھی واپس لائی جائے تو پاکستان کا تمام قرض اتارا جاسکتا ہے۔ وزیر خزانہ نے ایک پریس کانفرنس میں اعلان فرمایا تھا کہ اب ان کا مشن یہ ناجائز رقم واپس لانا ہے۔ لیکن سوئٹزرلینڈ کی حکومت کو ایک خطہ تک نہیں لکھا جاسکا۔ زرداری تو یوں ہی بدنام ہیں۔ یہاں ہر نقاب کے پیچھے ایک زرداری چھپا ہوا ہے۔ایک دوسرے کے تحفظ کی رسم نبھائی جارہی ہے اور ذاتی خزانوں کو بھرنے کا مقابلہ شروع ہے۔
قومی خزانے میں پڑے مبیّنہ اکیس ارب ڈالر ایک دھوکہ ہے۔ یہ بھی قرض اور مانگے تانگے کی رقم ہے۔ یہ ہرگز پاکستان کے پیسے نہیں ہیں بلکہ الٹا ان اربوں ڈالر کے عوض ہر سال اربوں روپے سود دینا پڑ رہا ہے۔
جب پاکستانیوں نے یہ رقم لی نہیں تو پھر یہ ادا کیوں کریں۔ کوئی تو اٹھے جو تحریک چلائے اور رائے عام ہموار کرے۔ سول سوسائٹی آگے بڑھے اور اعلان کردے کہ وہ حکمرانوں کی طرف سے لیا ہوا قرضہ واپس نہیں کریں گے۔ مالیاتی اداروں نے پاکستانی قوم سے پوچھ کر یہ قرضے نہیں دیئے۔ جب قوم نے قرض لیا نہیں تو پھر واپس کیوں کرے۔ جن کو قرض دیا گیا ہے ان کی دولت بیرون ممالک بینکوں میں پڑی ہے۔ وہ جانیں اور حکمران طبقہ جانے۔
عوام کو مقروضی معیشت کی سزا کیوں دی جارہی ہے؟

رینجرز کو داد دینی چاہیے کہ انہوں نے بڑے بڑے ڈاکوئوں کی پکڑ دھکڑ شروع کر رکھی ہے اور اگر تفتیش اور تحقیق میں مار نہ کھا گئے تو عدالتوں کے ذریعے عبرتناک سزائوں کی نوید ہے۔ سفید پوش ڈاکوئوں کو پکڑنا مشکل کام ہے۔ اس کے لئے آپ ناکہ نہیں لگا سکتے’ ریڈ نہیں کرسکتے’پولیس مقابلہ نہیں کیا جاسکتا۔ سیاسی رعب داب میں لپٹے اور عزت مآب کی قلغیاں سجائے ان قومی ڈاکوئوں کی تعداد بھی بہت ہے اور ان کے بنتے ٹوٹتے اتحاد وفاقی اداروں کو بعض اوقات بے بس کر دیتے ہیں۔ لیکن سپہ سالار اعظم جناب جنرل راحیل شریف کی کمٹمنٹ پر قربان جانے کو جی چاہتا ہے کہ وہ اس مشکل ترین مہم میں مسلسل کامیابیاں حاصل کر رہے ہیں۔ ہماری دلی دُعا ہے کہ وہ خوشامدیوں سے بچ بچا کر قومی بقاء کے اس صالح عمل کو منطقی انجام تک پہنچا سکیں اور وارداتیوں کی ریشہ دوانبوں سے محفوظ رہیں۔
میں معروف اور دیکھے بھالے ڈاکوئوں کا تذکرہ کرنا چاہتا ہوں۔اخبارات کے اندر کرائم کارنرز ایسی خبروں سے بھرے پڑے ہیں جن سے ظاہر ہوتا ہے کہ عام اور پرامن شہریوں کی عمر بھر کی جمع پونجی لوٹنے والے ڈاکو کس قدر نڈر اور سفاک ہیں۔ رات اڑھائی بجے کے لگ بھگ ٹی وی چینلز پر متواتر ٹکّر اور تازہ ترین خبریں چل رہی ہوتی ہیں۔

سندھ میں دو ڈاکو مارے گئے۔ ساہیوال میں لوگوں نے ڈاکو پکڑ کر پولیس کے حوالے کردیا’پنڈی کے بنی چوک میں پچاس لاکھ کا ڈاکہ پڑ گیا۔ میڈیا ٹائون میں صبح آٹھ بجے ایک گھر کو لوٹ لیا گیا۔ آئی ٹین فور میں ایک ریٹائرڈ بریگیڈیئر کے گھر سے پچپن لاکھ روپے لوٹ لئے گئے۔ نیلور میں ڈاکو ایک گھر میں گھس گئے’ اہل خانہ کو یرغمال بنایا اور زیورات لوٹ کر فرار ہوگئے وغیرہ۔ ایسی درجنوں خبریں روزانہ ٹی وی چینلز اور اخبارات کے ذریعے موصول ہوتی ہیں لیکن یہ خبر کہیں پڑھنے کو نہیں ملتی کہ ضلعی انتظامیہ یا آئی جی پولیس نے کوئی ایسا ہنگامی اجلاس طلب کیا ہو جس میں ان مسلح ڈاکوئوں کی گرفتاری کا کوئی منصوبہ شروع کیا گیا ہو۔
وفاقی دارالحکومت کے کئی تھانوں میںفون کی سہولت موجود نہیں۔ اگر رات کو اطلاع دینی ہو کہ ڈاکو واردات کے لئے کسی گلی میں گھس گئے ہیں تو رابطہ قائم کرتے کرتے مظلوم انسان لُٹ جاتا ہے۔ وہ ایک بے بس شکار کی طرح ڈاکوئوں کے رحم و کرم پر ہوتا ہے۔ شہری سوچتے رہتے ہیں کہ مال اور جان کے تحفظ کے لئے اب کس کو پکاریں۔ پولیس کی ٹیمیں پورے اسلام آباد میں پھیلی ہیں لیکن ان کی آنکھوں کے سامنے ڈاکو چہل قدمی کرتے گزر جاتے ہیں۔
جڑواں شہروں میں رپورٹ ہونے والی وارداتوں میں سرقہ بالجبر’اسلحہ کی نوک پر مال و متاع سے محرومی اور بعض اوقات بے بسی کی موت جیسے واقعات شامل ہیں۔ڈاکوئوں کے لشکر اتر آئے ہیں۔ پولیس کو ایف آئی آر درج کرانے جائیں تو وہ ڈاکے کی جگہ لفظ چوری لکھ کر ٹال دیتے ہیں۔ پولیس میں بہت نیک لوگ ہیں۔لیکن عوام ان کی نیک نیتی کا کیا کریں۔ وہ تو لٹ رہے ہیں۔ بچے اور بچیاں خوف میں مبتلا ہو کر ذہنی توازن کھو بیٹھتی ہیں۔ اپنے گھر میں ۔ہاں جسے جنت کہا جاتا ہے ‘ وہی گھر ڈرانے لگتا ہے۔ کسی نے جہیز کے لئے کچھ بچا رکھا ہے’کسی نے بچے کی فیس جمع کرانی ہے۔ کسی نے بوڑھاپے کے لئے چند ہزار روپے جمع کر رکھے ہیں ۔گھر سے محفوظ جگہ کونسی ہوگی۔ لیکن افسوس کہ آج کل گھر ہی محفوظ نہیں رہے۔
شہری سوال کرتے ہیں کہ آخر تھانے والے ان منہ زور درندوں کو پکڑتے کیوں نہیں۔ وزیر داخلہ کہاں چُھپے بیٹھے ہیں۔ شہر اقتدار کو اس عذاب سے نجات کون دلائے گا۔ سائبر کرائم سیل موجود ہے’ جگہ جگہ ناکے لگے ہیں۔شہر کے داخلی اور خارجی راستوں پر کیمرے نصب کئے گئے ہیں پھر بھی عوام غیر محفوظ ہیں۔ ہر گھر کے سروے ہوتے ہیں۔کریہ داروں کا آڈٹ ہوچکا۔ آخر یہ ڈاکو کہاں سے آتے ہیں۔ کیا آسمان سے نازل ہورہے ہیں یا زمین سے پھوٹ رہے ہیں۔ ان پر قابو پانا کتنا مشکل ہے۔؟
عوام میں عدم تحفظ کا احساس پڑھتا جارہا ہے۔ یہ بھی کہا جارہا ہے کہ ڈاکو انتہائی تربیت یافتہ ہیں۔کوئی قفل’ کوئی دیوار’ کوئی گیٹ ان کے سامنے ٹھہر نہیں سکتا۔ یہ دستانہ پوش ہوتے ہیں۔نقاب اوڑھے ہوتے ہیں۔ جوگر پہنے ہوئے ہوتے ہیں۔ اکثر پشتو بھی بولتے ہیں۔ ان کی دہشت سے لوگ راتوں کو جاگتے ہیں۔ یہ سب کب تک ہوگا۔ خدارا ہر کام فوج پر مت ڈالو۔ گلی محلے اور گھر میں قیامت ڈھانے والے ان ڈاکوئوں سے نجات دلائو تاکہ عوام آپ کو اپنا نجات دہندہ کہہ سکے۔ اور ڈاکوئوں کو بھی یاد دلانا ضروری ہے کہ وہ ظلم سے باز آجائیں ۔قرآن پاک میں ارشاد ہوتا ہے۔
”اے ایمان والو ‘ایک دوسرے کے مال کو باطل طریقے سے مت کھائو ”
فرمان رسول اللہ صلی اللہ علیہ وآلہ وسلم ہے کہ’
”تمہارا خون’تمہار امال اور تمہاری آبرو ایک دوسرے پر اسی طرح حرام ہیں کہ جس طرح آج کا دن ‘یہ مہینہ اور اس شہر (مکہ)کی حرمت قائم ہے”۔(خطبہ حجة الوداع)۔

”اے مسلمانو! تمہیں کیا ہوگیا ہے کہ تم اللہ کے راستے میں کمزور مردوں’عورتوں اور بچوںکی خاطر نہیں لڑتے۔ جو کہتے ہیں کہ اے ہمارے رب! ہمیں اس بستی سے نکال کہ اس کے باشندے ظالم ہیں۔ اور ہمارے لئے اپنی طرف سے کوئی حمایتی بھیج۔اور ہمارے لئے اپنی طرف سے کوئی مددگار بھیج۔” (سورة النساء آیت نمبر75)
اجتماعی قبریں ان کے اجتماعی احساس کو بیدار نہ کر پائیں۔ ہانپتی’ بھاگتی’کٹتی اور بکھرتی عصمتیں ان کے اجتماعی دل کو موم نہ کرسکیں۔چھتوں’بالکونیوں اور درختوں کیساتھ لٹکتی لاشیں ان کے اجتماعی جسم میں جھر جھریاں پیدا نہ کرسکیں۔ نومولودوں کو وحشی قدموں نے دبوچ ڈالا۔ ننھے ہاتھوں کو سفاک درندوں نے کلہاڑوں کے ساتھ کاٹا’ مسکان بھرے چہروں کو بے رحمی کیساتھ اجاڑا گیا۔ کسی قوم نے آہ نہیں بھری’کسی بھی ملک نے چیخ نہ ماری۔ سات ارب انسان’ انسانی حقوق کی لاکھوں تنظیمیں’ ڈیڑھ ارب مسلمان’ سینکڑوں ممالک۔ دنیا کے منصف لاتعلق۔آخر نسل کشی کے اس بہیمانہ وارداتوں پر دنیا بولتی کیوں نہیں۔ صرف اس لئے کہ روہنگیہ لوگ مسلمان ہیں۔ صرف اس لئے کہ وہ کلمہ گو ہیں۔ صرف اس لئے کہ وہ اسلام کے پیروکار ہیں۔ ان کی زبانوں پر اللہ اکبر’ محمد رسول اللہ’ سبحان اللہ جیسے الفاظ ادا ہوتے ہیں۔
روہنگیا مسلمانوں پر میانمیر حکومت ‘سماج اور سیاست نے دل کھول کر ستم کئے۔ ایسا وحشتناک قتل عام تو امریکہ ‘ویت نام جنگ کے دوران بھی نہیں ہوا ہوگا۔ یہودیوں کو جرمنی نازیوں نے اس طرح اذیتناک طریقے سے ختم نہیں کیا ہوگا ۔کیا انسان اتنا سفاک ہوسکتا ہے ۔ سوشل میڈیا پر جو تصاویر آرہی ہیں۔ ایک بار دیکھ لیں تو پورا دن بے چینی میں گذرتا ہے۔جب یہ معصوم بچے سسکیاں لیتے ہوں گے تو کیا قاتل کے دل میں رحم نہیں آتا ہوگا۔ بدھ ازم کے پجاری اس قدر بے حس ہوگئے ہیں۔ ہم اپنے بچوں کو مہاتما بدھ کے بارے میں ہر اچھی بات بتاتے ہیں۔ بدھ ازم تو انسانی دکھوں کو کم کرنے کا درس دیتا ہے پھر یہ کیسے بدھسٹ ہیں جو بے بس انسانوں کو رحم مادر میں قتل کرنے سے بھی گریز نہیں کرتے۔
سوچتا ہوں کہ کیا میانمیر کوئی ایسی اقتصادی یا سیاسی قوت ہے کہ کوئی اس کا بازو مروڑنے پر تیار نہیں۔میانمیریا برما یہ تو ایک غریب سا ملک ہے۔ قرضوں کی معیشت ہے۔ اس کا حجم ایسا کہ اسے شائد عالمی برادری میں برابری کا حق ہی نہ ملے۔ یہ کوئی امریکہ’ روس ‘چین’ جاپان’ انگلینڈ۔ اس کی کیا حیثیت ہے۔ اگر کوئی ایک ملک بھی کھڑا ہوجائے اور وہ کہہ دے کہ اگر انسانیت کے خلاف ریاست کی سرپرستی میں ہونے والا یہ جرم بند نہ ہوا تو میانمیر کی اینٹ سے اینٹ بجا دی جائے گی۔ اگرا یسا کہہ دے ‘ کوئی عالمی طاقت دھمکی دے دے۔ اپنے مفادات کے لئے یہ ملک جنگیں چھیڑ لیتے ہیں۔ پراکسی وار کرواتے ہیں۔ لیکن میانمیر کے مسلمانوں کے لئے کوئی آواز کیوں نہیں اٹھاتا۔
کیا تھائی لینڈ کے بارڈر پر روہینگیا مسلمانوں کی اجتماعی قبریںنہیں ملیں۔ رونگھٹے کھڑے ہوجاتے ہیں۔ دل سے خون پھوٹنے لگتا ہے۔ جب سے میانمیر قائم ہے۔ مسلمانوں کے لئے وہاں بے وطنی ہے۔کہاں جائیں۔بنگلہ دیش والے مارتے ہیں۔ کوئی ملک اپنے ہاں پناہ دینے کے لئے تیار نہیں۔ کہاں جائیں۔ یہ زمین اللہ کی ہے۔ سب انسانوں کا مشترکہ اثاثہ ہے۔ پھر ان لاکھوں انسانوں کے حصے کی زمین کہاں گئی؟ او آئی سی نے وہی کیا جو وہ مسلم امہ کے مسائل کے حوالے سے کرتی آئی ہے۔ روہنگیا مسلمان نہ دولت مند’ نہ خوبصورت’ رنگ گورا نہ پیٹ میں اناج’ان کی عورتیں پردہ دار۔ ان کے ثقافتی طائفے بن نہیں سکتے’ یہ جینز پہن کر جسم کی نمائش کا فن نہیں جانتی۔ عالمی برادری کے سارے انسانی جذبے’سیاست اور شہوت کے گرد گھومتے ہیں۔ خدا جانے امریکہ کے انسانی حقوق کے ادارے کب جاگتے ہیں۔ اگر کوئی کتا بھوک سے مر رہا ہو اور اہل مغرب کو پتہ چل جائے تو وہ بسکٹوں اور برگروں کے ڈھیر لگا دیں۔ یہاں کھلے آسمان تلے’سمندر کے نمکین پانیوں میں ڈگمگاتی کشتیوں کے اندر انسانی بچے پانی کی بوند کو ترس رہے ہیں’ ایک نوالہ ان کی روح اور جسم کا رشتہ بحال کرسکتا ہے لیکن کمیونیکیشن کے اس جدید دور میں’ کوئی عالمی طاقت نوالا دینے کو تیار نہیں’کوئی امیر ملک پانی کی ایک بوتل پہنچانے پر آمادہ نہیں۔ تصویر تو یہاں بھی بن سکتی ہے۔ آپ کی انسان دوستی کا ڈھنڈورا تو یہاں بھی پیٹا جاسکتا ہے۔کیا آپ انتظار کر رہے ہیں کہ سمندر کی سطح پر لاشیں قطار اندر قطار تیرنے لگیں اور آپ ریسکیو کے ذریعے ان کو اکٹھا کریں اور بڑی سی تصویر بنوا لیں؟افسوس کہ عالمی ضمیر بحر ہند میں ڈوب گیا ہے۔
بدھسٹوں نے بہت بُری رسم ڈالی۔ مسلمانوں کی نسل کشی کا راستہ اختیار کرکے اپنے لئے دردناک مستقبل کا فیصلہ لکھ لیا۔ اب یہ ہوگا کہ مسلمان ہزار بار سوچیں گے کہ بدھسٹوں پر نگاہ رکھنی ہے۔ یہ مسلمانوں کے قاتل ہیں۔ یہ انسانیت کے دشمن ہیں۔اسلام فوبیا کے ماتحت اگر مسلمانوں کا قتل جائز ہے تو پھر بدھ فوبیا کی پیدائش کو کون روک سکتا ہے۔ ظلم کا حساب ہو کر رہے گا۔ یہ اللہ کا قانون ہے۔جیسا کہ سورة البروج میں ارشاد ہے’
”برجوں والے’آسمانوں کی قسم! اور اس دن کی جس کا وعدہ کیا گیا ہے۔اور حاضر ہونے والے کی اور حاضر کیے گئے کی۔ہلاک کیے گئے خندقوں والے۔(ان خندقوں میں)آگ تھی ایندھن والی۔جبکہ وہ ان خندقوں کے کنارے بیٹھے تھے۔ اور جو کچھ وہ مومنوں کے ساتھ کر رہے تھے’اسے دیکھ رہے تھے۔ اور انہیں ان (مومنوں)کا یہی کام برا معلوم ہوا کہ وہ اللہ غالب’قابل تعریف پر ایمان لائے تھے۔ وہ ذات کہ اسی کے لئے آسمانوں اور زمین کی بادشاہی ہے اور اللہ ہر چیز پر قادر ہے۔بے شک جنہوں نے مومن مردوں اور مومن عورتوں کو ستایا پھر توبہ نہ کی تو ان کے لیے جہنم کا عذاب ہے اور ان کے لیے جلانے والا عذاب ہے”۔

نااُمید ہونے کے لئے ہزاروں دلائل موجود ہیں۔ لیکن پُرامید رہنے کے لئے وجوہات تلاش کرنا پڑتی ہیں۔ پاکستان بیم ورجا کے اس دوراھے پر آگیا ہے کہ اب یہ ہمارے اوپر منحصر ہے کہ ہم پھر سے یاسیت میں ڈوب جائیں یا اپنے دماغ کو جھٹکا دیں اور امید کا ننھا سا دیا روشن کرکے آگے بڑھیں۔ یہ کہا نہیں جاسکتا کہ کب کوئی دہشتگرد کسی ہدف پر پہنچ کر خود کو اڑا دے اور میرا مﺅقف بھی ہوا میں اڑ جائے۔ لیکن ذرا ٹھہریئے۔ کیا یہ بہت بڑی اُمید افزاءبات نہیں ہے کہ گزشتہ تین ماہ کے اندر دہشت گردوں کا صفایا کرنے کے لئے عسکری اور سیاسی قوتوں نے کمال اتحاد اور یگانگت کا مظاہرہ کیا ہے۔سینکڑوں دہشت گرد پکڑے گئے ہزاروں انتہا پسندوں کے گرد گھیرا تنگ ہوا اور سپہ سالار اعظم اور ان کی ٹیم نے جس طرح افغانستان اور امریکہ کی حکومتوں کو دہشت گردی کے خلاف جنگ میں ان ممالک کی ذمہ داریوں کا احساس دلایا۔ یہ ہماری خارجہ پالیسی کے خلاف قابل فخر پہلو ہے ۔مشیر داخلہ نے بڑے اعتماد سے کہا ہے کہ سول اور ملٹری قیادت میں مکمل ہم آہنگی پائی جاتی ہے۔ استحکام پاکستان کیخلاف خطرے کی گھنٹی ہمیشہ سول ملٹری تعلقات میں دراڑ ہی رہی ہے۔اب یہ کہا جاسکتا ہے کہ پاکستان واضح سمت میں بڑی یکسوئی کیساتھ آگے بڑھ رہا ہے۔ ہمارے انتظامی اور امن وامان کے ذمہ دار اداروں ‘عسکری صلاحیت اور سیاسی سوجھ بوجھ میں بڑی تیزی کے ساتھ بہتری آئی ہے۔ اب عام آدمی پھر سے خوف کی چادر اتار کر احساس تحفظ سے سرشار ہورہا ہے۔

چنیوٹ کے نزدیک لوہے تانبے اور سونے کے ذخائر دریافت ہوئے ہیں۔ اگرچہ حزب اختلاف کے بعض رہنماﺅں نے مذاق اڑایا ہے ” کہ لوہار کو لوہا مل گیا“ اور چوہدری پرویز الٰہی صاحب نے بیان دیا کہ چنیوٹ کے ذخائر نندی پور پاور پراجیکٹ کی طرح ایک ” خواب“ ہی ثابت ہوگا ۔لیکن ملک کے نامور سائنسدانوں نے ان ذخائر کی دریافت کو حقیقت پر مبنی قرار دیا ہے۔ ان ذخائر کو پاکستان کیلئے تائید غیبی قرار دیا جارہا ہے۔ یہ بھی بتایا گیا ہے کہ تھرکول سے اس سال کے آخر میں بجلی کی پیداوار شروع ہوجائے گی۔
امید کی ایک بہت بڑی وجہ یہ ہے کہ جناب عمران خان نے اپنے صوبے میں تعمیری کاموں اور سیاسی تطہیر کے منصوبوں پر کام شروع کردیا ہے۔ بظاہر تو یہ بات غیر اہم سی لگتی ہے لیکن اگر خیبرپختونخواہ کی حکومت واقعتاً ایک ارب درخت لگا دیتی ہے تو آپ اندازہ لگا سکتے ہیں کہ دس سال کے اندر ماحول پر کتنے مثبت اثرات مرتب ہوں گے اور صوبہ کی معاشی حالت میں کس قدر بہتری آئے گی۔ صوبہ بلوچستان میں علیحدگی پسندوں کی تحریک فی الوقت دم توڑ چکی ہے۔ اور اس بات کو علیحدگی پسندوں کے حلقے بھی تسلیم کرتے ہیں۔ صوبہ کے وزیراعلیٰ نے اپنی سادہ طرز زندگی سے اپنے مخالفین کے منہ بند کردیئے ہیں اور وہاں کے بلدیاتی انتخابات کے نتیجے میں بننے والی شہری حکومتوں نے اپنے حلقوں میں کام شروع کردیا ہے۔ ابھی کل کی بات تھی کہ پاکستان کے اس صوبہ کے دارالحکومت کوئٹہ میں پاکستانی پرچم لہرانا یا یوم پاکستان منانا ایک مہیب خواب تھا۔لیکن اب نہ صرف وہاں کھلے عام یوم پاکستان منایا جاتا ہے بلکہ وہاں کے ہزاروں نوجوان افواج پاکستان میں کمیشن بھی حاصل کرچکے ہیں اور وہ دفاع وطن میں اپنی ذمہ داریاں نبھا رہے ہیں۔
کراچی میں بھتہ خوروں اور دہشت گردوں پر ہاتھ ڈالنا ایک دیوانے کا خیال دکھائی دیتا تھا۔ لیکن تمام تر سیاسی مخالفتوں‘دھمکیوں اور دھماکوں کے باوجود رینجرز اپنا کام کر رہے ہیں اور حال ہی میں کراچی کے اندر اعلیٰ سطحی اجلاس اس بات کی طرف واضح اشارہ ہے کہ وہاں ٹارگٹڈ آپریشن جاری رہے گا ۔”بندوق صرف ریاست کے پاس ہوگی“ یہ وہ منزل ہے جسے بالآخر پاکستان نے حاصل کرنا ہے اور یوں محسوس ہوتا ہے کہ مفاداتی گروہوں کی تھکاوٹ کا عمل شروع ہوگیا ہے ۔زیادہ تر روپوش ہوچکے ہیں جو بچے ہیں وہ یا تو مارے جارہے ہیں یا ابھی انہوں نے نئے بہروپ دھار لئے ہیں۔ اور قانون نافذ کرنے والے ”چیتے اور عقاب“ہر بہروپیئے کا چہرہ بے نقاب کرنے پر تیار بیٹھے ہیں۔
پنجاب میں دو ماہ قبل تک سٹریٹ کرائم انتہاﺅں کو چھو رہاتھا ۔گلی محلے میں دن دیہاڑے بندوق کی نوک پر عورتوں کے زیور چھینے جاتے تھے‘نقدی لوٹ لی جاتی تھی اور اغواءبرائے تاوان کی وارداتیں بھی زوروں پر تھیں۔ اب خبریں آرہی ہیں کہ ”سٹریٹ کرائم“ کے اس عذاب میں کمی آگئی ہے ۔پنجاب میں نو تعمیر شدہ قائداعظم سولر پارک نے کام شروع کردیا ہے۔ ملتان کا ایئرپورٹ بھی فعال ہوگیا ہے اور جنوبی پنجاب میں تعمیراتی اور روزگار پیدا کرنے والے منصوبے فائلوں سے نکل کر زمین پر شکل پانا شروع ہوگئے ہیں۔
ہمارے ایک وفاقی وزیر نے سعودی عرب کے حوالے سے ایک بے بنیاد بیان داغ دیا اور بعد میں اس بیان سے مکر گئے لیکن سچی بات یہ ہے کہ ان کے اس بیان کا حوالہ دے کر مخصوص لابی کے بعض کالم نویسوں ‘دانشوروں اور اینکروں نے آسمان سر پر اٹھا لیا تھا۔ یہ جانے بغیر کے پاکستان اور سعودی عرب کے تعلقات میں معمولی سے تلخی بھی نہ صرف پاکستان اور سعودی عرب کے لئے بلکہ پوری امت مسلمہ کے لئے خطرناک ہوگی۔ یہ تو قدرت نے فیصلہ دیا اور آج سعودی عرب شاہ سلیمان کی کمان میں ہے ۔آج کی سعودی حکومت پاکستان سے اتنی ہی محبت کرتی ہے جتنا کہ کوئی پاکستانی اپنے ملک سے محبت کرسکتا ہے ۔سعودی بادشاہ کی طرف سے پاکستان کے حکمرانوں کو اپنے ہاں بلانا اور بادشاہ کا ایئرپورٹ جا کر وزیراعظم پاکستان کا استقبال کرنا پاکستانیوں کے لئے بہت بڑی خوشخبری ہونا چاہیے۔ میرے پاس ایسی معلومات ہیں جن کی بنیاد پر میں کہہ سکتا ہوں کہ جلد ہی سعودی عرب کی طرف سے پاکستان میں بڑی سرمایہ کاری ہوگی اور سعودی عرب میں پاکستانیوں کے لئے ہمدردانہ ماحول پیدا ہوجائے گا۔عالمی امور میں ان دونوں ممالک کی باہمی مشاورت سے پاکستان کی اہمیت بڑھے گی۔
ایران کے ساتھ ”پائپ لائن “اور ”جند اللہ“ کے معاملات پر جو تلخیاں جنم پا رہی ہیں وہ بھی خوش اسلوبیوں میں تبدیل ہونے لگی ہیں اور جند اللہ کے سربراہ کی گرفتاری سے ایک بڑا ”بریک تھرو“ ہوا ہے ۔پاکستان کا ہمیشہ سے یہ موقف رہا ہے کہ ایٹمی مسئلہ پر ایران پر پابندیاں اسی معاملے کو بگاڑیں گی۔ یہ معاملہ بات چیت سے حل ہونا چاہیے۔ پاکستان کے اس موقف کی تائید ہورہی ہے ۔سعودی عرب نے بھی اپنے مﺅقف میں نرمی پیدا کر لی ہے اور اُمید یہی ہے کہ اپریل کے آخری ہفتے میں امریکہ کا ایران سے مجوزہ معاہدہ طے پاجائے گا اور پاکستان پر ایک برادر ہمسایہ ملک کی طرف سے شکوک وشبہات کا سلسلہ رک جائے گا۔
افغانستان میںکئی دیہائیوں کے بعد پاکستان کے مﺅقف کو سمجھنے والی حکومت برسراقتدارآئی ہے۔آج کا افغانستان اگر پاکستان دوست نہیں تو دشمن بھی نہیں ہے۔ خصوصاً دہشتگردانہ کارروائیوں کے حوالے سے کم از کم افغان صدر پوری طرح یکسو ہیں۔گوکہ وہاں ایک متوازن حکومت بھی چل رہی ہے جو پاکستان کی سابقہ پالیسیوں کے باعث اپنی سابقہ پالیسی پر کاربند ہے لیکن آرمی چیف کا کابل بار بار جانا خیروبرکت کا سبب بنے گا۔افغان طالبان کے حوالے سے بڑے مضبوط اور مثبت اشارے مل رہے ہیں ۔اگر مذاکرات ہوجاتے ہیں اور طالبان بھی حکومت میں کسی طور شامل ہوجاتے ہیں تو پھر افغانستان داخلی طور پر مستحکم ملک بن جائے گا اور پاکستان کو مغرب کی طرف سے درپیش مشکلات میں کمی آجائے گی۔
بھارتی سرکار کا بچپنا ابھی برقرار ہے۔ وہ جہاں اسلحہ کی دوڑ میں سرپٹ دوڑے جارہی ہے وہیں پاکستان مخالف کارروائیوں کو بھی ہوا دے رہی ہے۔ یہ پاکستان کے لئے ایک اعصابی حملہ ہے۔ اس حملے کا جواب بھی سفارتی سطح پر دیا جاسکتا ہے۔پاکستان نے اس محاذ پر کبھی بھی کوئی پیش رفت نہیں دکھائی۔ اور اب یہ آوازیں اٹھنا شروع ہوگئی ہیں کہ جس ملک کا کوئی مستقل وزیر خارجہ ہی نہ ہو اس کی وزارت خارجہ کیا کارکردگی دکھائے گی۔ پاکستان کے لئے آنے والے سال دو سال بڑے ہی قیمتی ہیں۔داخلی طور پر استحکام رہے گا۔آئی ڈی پیز واپس جارہے ہیں۔افغان مہاجرین کی واپسی کا عمل شروع ہے۔مذہبی طبقات کے ساتھ موافقت کی فضاءپیدا کرنے کی سر توڑ کوششیں ہورہی ہیں۔بجلی کی پیداوار‘ برآمدات میں اضافہ اور روزگار کی سکیمیں حکومت کی اولین ترجیح ہونی چاہیں۔پاکستان کی خوش بختی ہے کہ چین اس ملک میں بہت بڑی سرمایہ کاری کرنے جارہا ہے۔ بلوچستان کی ناعاقبت اندیش اسمبلی نے گوادر کاشغر روڈ کے معاملے میں بعض رکاوٹیں کھڑی کی ہیں۔لیکن میاں نوازشریف کی ایک صلاحیت کو دشمن بھی مانتے ہیں۔ وہ روٹھے ہوﺅں کو منانے کی خداداد صلاحیت سے مالا مال ہیں۔امید ہے کہ روٹ کے فروعی جھگڑے اس عظیم سرمایہ کاری کو روک نہیں پائےں گی۔
تُرکی پاکستان کا بلاشک وشبہ مخلص دوست ہے۔ تُرکی کے ترقیاتی تجربات سے پنجاب میں فائدہ اٹھایا جارہا ہے ۔بعض تجزیہ کار پاکستان اور تُرکی میں بڑھتی ہوئی قربتوں کیخلاف بھی شیطانی فلسفے سامنے لارہے ہیں۔اس وقت ترکوں پر شک کرنا پاکستان کے خلاف دشمنی کے مترادف ہوگا۔ حکومتی میڈیا منیجرز کی آزمائش ہے کہ وہ ایسے تمام میڈیائی حملہ آوروں سے ہوشیار رہیں اور انہیں ملاقات اور دلائل سے بے اثر کردیں۔
پاکستان کی قیمتی معدنیات کے بارے میں عالمی اداروں کی رپورٹس موجود ہیں۔پاکستان کے اسلحہ ساز ادارے کمال دکھا رہے ہیں۔ میزائل ٹیکنالوجی میں حیران کن ایجادات سامنے آرہی ہیں۔ قومی خزانے میں ہدف کے مطابق ڈالرز موجود ہیں۔زرمبادلہ کے ذخائر میں کمی کی بجائے اضافہ ہورہا ہے ۔روپے کی قیمت مستحکم ہے اور پٹرول کی قیمتوں میں کمی نے ملکی معیشت کو استحکام بخشا ہے ۔ عوامی ضرورت کی اشیاءکی قیمتوںمیں اگرچہ کوئی خاطر خواہ کمی تو نہیں ہوئی لیکن اضافہ بھی دیکھنے میں نہیں آیا۔ ایل۔ این۔ جی کی فراہمی سے ایندھن کی کمی پر قابو پانے میں مدد کی امید ہے۔
غرض تلاش کرنے سے ایسی ہزاروں نشانیاں موجود ہیں جن سے اُمید کا چراغ روشن ہورہا ہے۔ 23مارچ کو فوجی پریڈ ہمارے اس چراغ کو مزید روشن کردے گی۔

ہوسکتا ہے کہ نیت ٹھیک ہو۔لیکن اہلیت بہرحال نہیں ہے۔ حکمران قوم کو کوئی واضح جواب دینے کی بجائے ایک دوسرے پر الزامات لگا رہے ہیں۔ پٹرول بحران کے پیٹ سے بجلی بحران بھی باہر نکل آیا ہے۔ماہرین معیشت مشکل اصطلاحات کے ذریعے عوامی ذہنوں کو پراگندہ کر رہے ہیں۔پٹرول پمپوں پر عورتوں کے ہجوم‘ہاتھ میں بوتلیں ‘پہلو میں بچے۔ظلم کی ایک یہ شکل باقی رہ گئی تھی وہ تجربہ کاروں کے ہاتھوںدیکھنے کو مل گئی ہے۔پٹرول روٹی نہ سہی لیکن روٹی کمانے کا ذریعہ تو ہے۔پاکستان کے منظرنامے میں یہ نظارے بھی شامل ہوگئے کہ دولہا اپنی بارات گدھا گاڑیوں پر لےجاتے دیکھے گئے۔ شدید سردی کے عالم میں پٹرول کے انتظار میں کھلے آسمان تلے رات گزارنے کا تکلیف دہ تصور ہی رونگٹے کھڑا کردیتا ہے۔لیکن وزیر پٹرولیم‘ پی ایس او‘وزارت خزانہ سب کے سب وزیراعظم نوازشریف کی موجودگی میں ”میری ذمہ داری نہیں“ کی رٹ لگاتے سنائی دیئے۔ عوام فقیروں کی طرح خوار ہوتے رہے۔ اعصاب شل ہوگئے۔پاکستانیوں نے ایک بار پھر سوچنا شروع کردیا ہے کہ آیا یہ مُلک رہنے کے قابل بھی ہے یا نہیں۔ میڈیا پورے زور وشور سے چیخ رہا ہے۔حکمران جماعت کے وزراءشرمندگی محسوس کرتے ہیں۔ٹی وی پر آکر معذرت کرتے ہیں لیکن عوام کی تکالیف بڑھتی جارہی ہیں۔
وزیراعظم کے ترجمان جناب ڈاکٹر مصدق ملک بڑے ہی سمجھدار ‘ حوصلہ مند اورٹھنڈے مزاج کے شخص ہیں۔ایک معروف ٹی وی چینل کے پروڈیوسر رانا کاشف محمود نے راقم کو بھی اپنے پروگرام میں مدعو کیا ۔ میرا خیال تھا کہ ترجمان صاحب عُذر گناہ کی بجائے گناہ کا اقرار کرےں گے۔لیکن انہوں نے ناظرین کو معاشی جھمیلوں میں الجھانے کی کوشش کی۔مجھے پاکستان اکانومی واچ جیسا معتبر ادارہ چلاتے دس برس ہوچکے ہیں۔بڑے بڑے ماہرین اقتصادیات سے ملک کے معاشی نظام پر گفتگو ہوتی ہے۔میرا اپنی تعلیمی پس منظر اور تجربہ بھی معاشی شعبے سے متعلق ہے۔پاکستان کے نام نہاد اقتصادی ماہرین اقتصادی اصطلاحات‘ حقائق اور اشاریے بڑے دلکش انداز میں ترتیب دیتے ہیں۔لیکن عوام کو ان گورکھدھندوں سے کیا غرض ہے۔ غریب کے لئے چاند بھی روٹی کی شکل اختیار کر لیتا ہے۔میں نے عرض کی کہ حکمرانوں کی نیت ٹھیک نہیں اور جب نیت ٹھیک نہ ہو تو پھر اہلیت بھی کسی کام نہیں آتی۔ سیاسی اخلاق یہ نہیں کہ آپ لفظی ادب و آداب کا مظاہرہ کریں بلکہ اصل سیاسی آداب یہ ہیں کہ عوام کو تکلیف میں مبتلا کرنے والے افراد کو قرار واقعی سزا دی جائے اور وزارتوں کے سربراہ کو مثال قائم کرتے ہوئے اپنے عہدے سے اس وقت تک الگ ہوجانا چاہیے جب تک انکوائری میں اصل ذمہ داروں کا تعین نہیں ہوجاتا۔ محض جھوٹے بول کر وقت ٹالنے سے معاملات سُدھر نہیں سکتے۔بلکہ دھیرے دھیرے رہا سہا اعتماد بھی ختم ہوجاتا ۔ اور حکمران اور ان کے ترجمان منافق دکھائی دینے لگتے ہیں۔ حدیث مبارکہ میں منافق کی چار نشانیاں بتائی گئی ہیں۔جن میں سے تین یہ ہیں وہ جب بات کرے تو جھوٹ بولے‘ جب وعدہ کرے تو توڑ دے اور جب امانت رکھی جائے تو اس میں خیانت کرے۔ڈاکٹرمصدق ملک سے میں نے کہا کہ آپ بتا دیں کہ جن لوگوں میں یہ خامیاں پائی جائیں ان کے بارے میں لوگ کیا کہیں گے؟ اس پر ملک صاحب غصے میں آگئے اور کہنے لگے کہ آپ کو معیشت اور اقتصادیات کا علم ہی نہیں۔اور آپ قرآن اورا سلام کا سہارا لے کر موضوع سے ہٹ رہے ہیں۔
عرض کی کہ میں عوام کی معیشت کی بات کرتا ہوں کیونکہ حکمرانوں کی معیشت تو ہر سال بہتر ہوجاتی ہے ۔اسلام اور قرآن کی دی ہوئی ہدایات کی روشنی میں جو معاشی ذہن ترتیب پاتے ہیں وہی عوام الناس کی معیشت کو بہتر بنا سکتے ہیں۔اگر اللہ اور رسول کو نکال دیں تو باقی صرف لوٹ مار بچ جاتی ہے جو کہ جاری ہے۔آپ بتا دیں کہ پٹرول پمپوں پر ذلیل وخوار ہوتے عوام ایک دوسرے کو مرنے مارنے پر تُل گئے ہیں۔کیا ان کو اس ذہنی کیفیت تک پہنچانے والے دہشت گرد نہیں ہیں۔آپ تو سارے تجربہ کارلوگ ہیں اور یہ ظلم آپ کی تجربہ کاری کے سبب ہورہا ہے۔
ہلال احمر پاکستان کے چیئرمین ڈاکٹر سعید الٰہی ایک ٹی وی چینل پر پروگرام بھی کرتے ہیں ۔دوست ہیں اور محبت کرتے ہیں۔انہوں نے ”ڈی ایس این جی“ گاڑی بھجوا کر اسی موضوع پر لائیو کمنٹس لئے۔ میں نے عوام کی تشویش سے انہیں بھی آگاہ کردیا۔میرا مﺅقف ہے کہ پٹرول کے بحران نے حکومت کے گڈگورننس کے دعوﺅں کی قلعی کھول دی ہے۔ملک کے نصف سے زیادہ آبادی اور معیشت بحران سے بری طرح متاثر ہوئی ہے مگر حکومت اب بھی سنجیدہ نہیں۔

ایسا کبھی ہوا نہیں کہ دنیا سے شر مکمل طورپر ختم ہوگیا ہو۔انسان کے اندر شر کی قوتیں خیر کی طاقتوں سے ہمیشہ نبردآزما رہتی ہیں ۔آپ اسے حضرت انسان کی فطرت کہہ سکتے ہیں ۔ان شرانگیز طاقتوں کو آپ نیگیٹیو فورسز کا عنوان دے سکتے ہیں ۔قرآن انہیں شیطانی طاقتوں کا نام دیتا ہے ۔ہر منفی سوچ ،ہر تخریبی تصور ہر انسان دشمن منصوبہ ،ہرابلیسی حربہ چاہے اس کا محل وقوع انسان کی اپنی ذات ہو ،اس کا ماحول ہو،ملک ہویاسرزمین ہو ،شیطان ہی کی کارستانی قرار پائے گی۔ہوس لالچ،ظلم ،استبداد ،بدعنوانی ،بدامنی،بد عہدی ،بے وفائی ،دھوکہ دہی ،نوسر بازی ،بزدلی ،منافقت،ہیجان انگیزی ،خیانت،جھوٹ ،فراڈ ،بے ادبی ،فریب کاری ،بعض وعناد،انا پرستی ،چوری ،ڈاکہ زنی ،قتل وغارت اور وحشت وبربریت یہ تمام وہ بیماریاں ہیں جنہیں شیطان نے ایجاد کیا ہے اور وہ کمال ہوشیاری کیساتھ انسانی دل ودماغ میں ان کی پیوندکاری کرتا ہے اور انسان کو شرکے راستے پر ڈال دیتا ہے ۔تشکک اور بے یقینی ،مایوسی اور غفلت جیسے ہتھیاروں سے مسلح ہوکر شیطان جب حملہ آور ہوتا ہے تو بڑے بڑے پختہ عزم انسان ریت کا ڈھیر ہوجاتے ہیں ۔شیطان کا تصور ہر مذہب اور عقیدے کے پیروکاروں میں اپنے اپنے ناموں اور حوالوں سے موجود ہے ۔قرآن نے اس تصور کو بڑے بلیغ پیرائے میں بیان فرمایا ہے ۔”بے شک شیطان تمہارا کھلا دشمن ہے تم بھی اسے دشمن سمجھو“ حدیث نبوی ہے ‘
”شیطانی وسوسے تمہارے وجود میں خون کی طرح گردش کرتے ہیں “لیکن فطرت نے انسان کو شیطان کے مقابلے میں تنہاءنہیں چھوڑا ،یہ ہرگز نہیں کہ انسان شیطان کے مقابلے میں بے بس پیدا کیا گیا ہے ۔خالق نے انسان کو پیدا کرتے وقت پانچ چھ فٹ قد کے اس جسم کے اندر ہی وہ آلہ لگادیا ہے جو انسان کو قدم قدم پر آگاہ کرتا ہے کہ تم اب شیطانی قوت کے زیر اثر آرہے ہو۔جس طرح گاڑی اوورسپیڈ ہونے پر سرخ رنگ کی بتی اور آلارم بجنے شروع ہوجاتے ہیں اسی طرح انسان کے اندر ضمیر نام کا ایک آلارم بجنا شروع ہوجاتا ہے ۔غافل سے غافل انسان بھی یہ نہیں کہہ سکتا کہ اسے اچھائی اور برائی میں تمیز نہیں ہے ۔وہ جنگل میں رہتا ہو ۔یا بازاروں کے شورشرابے میں زندگی بسر کرتا ہو،حرف شناس ہویا ان پڑھ ۔رنگ ،نسل ،زبان اور عقیدے کی تفریق کے بغیر جوروح بھی لباس فطرت میں ڈھلی ہے اسے ضمیر کا آلہ لگاکر بھیجا گیا ہے ۔ارشاد ہوتا ہے ‘
”ہم نے انسان کو پیدا کیا اور جانتے ہیں اس کا نفس جن وسوسوں سے دو چار رہتا ہے ۔ہم تو اسکی رگ حیات (شاہ رگ )سے بھی قریب تر ہیں “
قرآن نے احسن تقویم کا ٹائٹل ہی انسان کو اسی لئے عطا کیا ہے کہ وہ واحد جاندار ہے جو اچھائی اور برائی میں تمیز کرسکتا ہے ۔ جس طرح شیطان منفی ہتھکنڈوں سے مسلح ہے اسی سطح انسان اپنے ضمیر کی زبردست طاقت سے مز ّین ہے ۔یہی وجہ ہے کہ ابتدائے آفرینش سے لیکر آج تک شر اور خیر باہم نبردآزما رہتے ہیں ۔ایسا کبھی ،کسی دور میں نہیں ہوا کہ شر غالب آجائے اور خیر کی قوت مفتوح ہوجائے ۔ایسا ہوتا تو انسانیت کا قافلہ بیچ راہ کے فنا ہوچکا ہوتا ۔آج ساڑھے چھ ارب انسانوں کا وجود اس بات کا ثبوت ہے کہ خیر کی طاقتیں مفقودنہیں بلکہ موجود ہیں ۔بقول اقبالؒ
ستیزہ کار رہا ہے ازل سے تا امروز
چراغ مصطفوی سے شرارِ بوا لہبی

معروف معنوں میں نظرء یہ پاکستان دو قومی نظرء یہ ہے جس کی بنیاد پر 1947ء میں ہندوستان کی تقسیم ہوئی اور پاکستان معرض وجود میں آگیا۔قائداعظمؒ انگریز سامراج اور ہندو اکثریت کو اپنی سالہا سال کی جدوجہد کے دوران یہ باور کراتے رہے کہ ہندوستان میں مسلمان اور ہندو دو قومیں ہیں جو تہذیبی‘مذہبی‘سیاسی اور تاریخی لحاظ سے بالکل مختلف ہیں ۔ہندوؤں نے مسلمانوں سے اپنی سدا بہار نفرت کے ذریعے بالآخر انگریزوں کو قائداعظمؒ کا مؤقف تسلیم کرنے پر آمادہ کردیا اور پاکستان کا قیام ممکن ہوگیا۔
دو قومی نظریہ نے ہی ثابت کیا کہ قومیں زبان‘رنگ اور نسل کے اعتبار سے ہی مختلف نہیں ہوتیں بلکہ مذہب کی بنیاد پر ان کی جداگانہ حیثیت قائم ہوتی ہے۔ اقبالؒ نے اسی طرف اشارہ کرتے ہوئے فرمایا تھا‘ قوم مذہب سے ہے مذہب جو نہیں تو کچھ بھی نہیں‘‘۔ہندوستان کے رہنے والوں کا رنگ ایک جیسا تھا‘ زبان ایک جیسی تھی اور شائد نسلی حوالے بھی ایک جیسے تھے۔ذات کے اعتبار سے ایک دوسرے کیساتھ جڑے ہوئے تھے لیکن مسلمان اللہ کے پیروکارجبکہ ہندوبت پرست۔ اگر تو اسلام کی جگہ کوئی اور مذہب ہوتا تو شائد معاملہ مختلف ہوتا لیکن اسلام کی تعلیمات مسلمانوں کو غیر مسلموں کی سماجی اور مذہبی برتری قبول کرنے سے روکتا ہے۔ یہ صحیح ہے کہ ہزار سال تک مسلمان اور ہندو مشترکہ طور پر اس خطے میں ز ندگی گذارتے رہے تھے لیکن یہ اسی صورت ممکن ہوا تھا کہ مسلمان اقلیت میں ہونے کے باوجود سیاسی اور مذہبی طور پر بالاتر تھے اور حکومت مسلمانوں کے پاس تھی۔ اسلام اپنے ماننے والوں کو اپنی ریاست قائم کرنے کا حکم دیتا ہے۔ یہ اسلام کا ہی سچاجذبہ تھا جس نے برصغیر کے مسلمانوں کو علیحدہ وطن کا مطالبہ کرنے پر اُبھارا۔ لہٰذا نظریہ پاکستان دراصل نظریہ اسلام ہی ہے۔
برصغیر میں اسلام کی اشاعت فتح مکہ کے فوری بعد سے ہی شروع ہوجاتی ہے۔ محمد بن قاسم کی آمد سے قبل بھی مسلمان مبلغین ہندوستان میں تبلیغ کی غرض سے آتے تھے اور ہندوستان کے باسی ان کی انسان دوستی سے متاثر ہو کر اسلام قبول کرتے رہے۔ ہندو مذہب کی تنگ نظری نے اسلام کی اشاعت میں کلیدی کردار ادا کیا ۔ بعد میں علماء کرام اور اولیاء اللہ نے بھی اسلام کی تبلیغ جاری رکھی۔
اسلام کی اشاعت اسلامی ا سکالرز اور مبلغین کی صحبت اور کردار کے مرہون منت رہی ہے ۔اچھامبلغ اچھا استاد ہی ہوتا ہے ۔ لیکن اُستاد اور مبلغ میں ایک باریک سافرق ہے۔مبلغ ہر سطح کے ذہنوں سے مخاطب ہوتا ہے لیکن اُستاد نئی نسلوں کے ذہن و قلب کو سنوارنے کا نازک فریضہ سرانجام دیتا ہے۔ اُستاد کو یہ اختیار ہے کہ وہ چاہے تو اپنے دائرہ کار میں آنے والے معصوم ذہنوں میں کانٹے بودے‘چاہے پھول اُگائے۔اُستاد چاہے تو انسانی ذہن کو الحاد سے آلود کردے یا خداپرستی سے آشنا کردے۔ یہ اُستاد ہی ہے جو عام سے انسان کو کامیابیوں کے اوج سریا تک پہنچاتا ہے۔
پاکستان میں یوں تو ماشاء اللہ ننانوے فیصد مسلمان ہیں اور یہ فرض بھی کر لیا جاتا ہے کہ چونکہ مسلمان ہیں اس لئے اسلام سے دوری ناممکن ہے اور جب تک اسلام سے جُڑے ہیں پاکستان سے جُڑے ہیں۔ لیکن کچھ تلخ حقائق اس معروضے کے خلاف جارہے ہیں۔ہمارے ہاں ایسے ادارے‘ سکول اور کالجز ہیں جہاں استاد نظریہ پاکستان کے خلاف تبلیغ کرتے ہیں۔ وہ اسلام بیزاری کے فلسفے کو آگے بڑھاتے ہیں۔ وہ قیام پاکستان کو غیر ضروری قرار دیتے ہیں۔ یہی وہ خطرہ ہے جس بھانپتے ہوئے لاہور اور اسلام آباد میں نظریہ پاکستان ٹرسٹ اور نظریہ پاکستان سنٹر کا قیام عمل میں لایا گیا۔محب وطن پاکستانی اپنے اساتذہ اکرام سے یہ توقع رکھتے ہیں کہ وہ اسلامی تعلیمات کو عام کرنے اور اسلامی تہذیب و آداب کو طلبہ و طالبات کے ذہنوں میں راسخ کرنے کے لئے اپنے سبجیکٹ کے ساتھ ساتھ نظریہ پاکستان کو اپنی ذمہ داری کے طور پر پڑھائیں گے۔بچوں کے دلوں میں خدا کی محبت اور اس کی ہی فرمانبرداری کے بیج بوئیں گے کیونکہ بقول شاعر‘
اللہ سے کرے دور تو تعلیم بھی فتنہ ‘املاک بھی اولاد بھی جاگیر بھی فتنہ
ناحق کے لئے اٹھے توشمشیر بھی فتنہ‘شمشیرہی کیا نعرہ تکبیربھی فتنہ
وہ طلباء و طالبات کو بار بار یہ احساس دلائیں گے کہ اگر دو قومی نظریہ نہ ہوتا تو پاکستان نہ ہوتا۔قائد نے ایک موقع پر فرمایا‘’’اگر ہم دنیا کو زیادہ محفوظ بنانا چاہتے ہیں تو ہمیں اصلاح کا کام افراد سے شروع کرنا پڑ ے گا‘‘۔ اگر پاکستان کوشورشوں سے بچانا ہے تو پھر اپنے قومی تشخص(اسلام) سے قربت اختیار کرنی ہوگی۔ملکوں اور قوموں کی مضبوط بنیادیں انسانی ذہنوں میں رکھی جاتی ہیں۔ یہ کٹھن کام ہے۔حالات ایسے ہیں کہ بچوں کی یکسوئی اور اعتماد ڈانواں ڈول ہوچکا ہے۔خود اساتذہ میڈیا سے متاثر ہورہے ہیں۔ یوں لگتا ہے کہ ہمارے پاؤں سے ہماری زمین کھینچی جارہی ہے۔ یہی وہ حالات ہیں جن میں استاد کا کردارابھرکر سامنے آتا ہے۔آپ توقع نہ کریں کہ اس فرض کے نبھانے سے آپ کو حکومت یا معاشرے کی طرف سے توصیفی الفاظ سننے کو ملیں گے۔لیکن یہ یاد رکھ لیں کہ اس کام کے کرنے سے آپ کے سٹوڈنٹس آگے بڑھیں گے۔ ان کے اندر ایک جذبہ بیدار ہوگا اور وہ کسی کاز کے ساتھ وہ منزلیں بھی طے کر لیں گے جو محض تعلیم برائے تعلیم کے ذریعے حاصل نہیں کرسکتے۔قائداعظمؒ نے فرمایا‘ معلم اور تعلیم کووطن سے محبت پیداکرنے کا ذریعہ ہونا چاہئے‘بقول شاعر‘
میں آدمی ہوں وطن کو نہ کس طرح چاہوں
عزیز رکھتی ہے چڑیا بھی کھونسلا اپنا

اثر ہوتا ہے ۔تقریروں اور تحریروں کا اثر ہوتا ہے۔ جب آپ بار بار لوگوں کو بتائیں کہ ”ملک مکمل طور پر آزاد نہیں ہے اور اس پر ”بادشاہت” نے قبضہ کر لیا ہے تو ان لفظوں کی معصوم انسانی ذہنوں میں خوفناک تصاویر بننا شروع ہوجاتی ہیں۔بادشاہ بڑا ظالم ہوگا۔ اپنے مخالفین کو اندھے کنویں میں ڈالوا دیتا ہوگا۔ جو بھی اختلاف کرے گا اسی وقت سرتن سے جُدا ہوجائے گا۔بادشاہ کی سینکڑوں باندیاں ہوں گی۔محل سرا میں گانے بجانے اور رقص و سرور کی محفلیں سجتی ہوں گی۔ کتنے جذبوں کا ارمان ہوتا ہوگا۔بادشاہ ہاتھی پر چڑھ کر شکار کو جاتا ہوگا اور اس کے سپاہی بے گناہ جانوروں کو پکڑ کر اس کے سامنے لاتے ہوں گے اور وہ گولی چلا دیتا ہوگا” ایسے ظالم بادشاہ کے خلاف جنگ کرنا جہاد ہے

اور ایک لیڈر اس جہاد پر نکل آیا ہے وہ اس وقت ”فرعون” کے خلاف ”موسیٰ” بن کر سامنے آگیا ہے۔قوم کو اب ”موسیٰ” کا ساتھ دینا ہے۔ چودہ اگست کو پاکستانی قوم کی ”چھینی گئی آزادی” اس ”فرعون” سے واپس لے لینی ہے۔چاہے اس کام میں جان چلی جائے۔ جب لیڈر خود گولی کھانے کا اعلان کر رہا ہے تو پھر پیچھے مت ہٹ جائو۔جوان جذبہ عہد کرتا ہے کہ میں ہر حال میں چودہ اگست کو ”لبیک یا موسیٰ” کہتا ہوا جائوں گا اوربادشاہ کے گلے میں رسی ڈال کر اسے ”شاہی تخت” سے نیچے گھسیٹ لائوں گا۔ اس طرح کے خواب آنا شروع ہوجاتے ہیں۔اس طرح کے خیالات جب جگہ پالیتے ہیں تو جذباتی نوجوانوں کی آنکھوں میں خون اتر آتا ہے۔ ہر طرح کی آزادی کے باوجود اسے اپنی ” غلامی” سے نفرت ہونے لگتی ہے۔ وہ خود کو خوددار قوم کا فرد سمجھ کر ”آزاد” ہوجانا چاہتا ہے۔گولیاں چلتی ہیں۔لاشیں گرتی ہیں اور اقتدار کے مہرے تبدیل ہوجاتے ہیں۔وزیراعظم نوازشریف کی جگہ وزیراعظم عمران خان کی تختیاں سج جاتی ہیں اور دو سال بعد ”آزاد” روحوں کو پھر خیال آتا ہے کہ وہ کس چالاکی کے ساتھ غلام بنا لئے گئے ہیں۔
غلامی۔ ہماری نئی نسلوں اور خصوصاً جناب عمران خان صاحب کے ووٹرز نے غلامی دیکھی ہی نہیں ۔غلامی دیکھنی ہے تو فلسطین اور کشمیر میں چلے جائیں آپ کو واقعی سمجھ آجائے گی کہ کیا آپ غلام ہیں یا آزاد۔ پانچ سال کی غلامی بے معنی سی بات ہے۔صدیوں کی غلامی کی بات کریں۔ نیلسن منڈیلا کی روح سے پوچھیں کہ آزادی اور غلامی میں فرق کتنا ہے۔
اصطلاحات بے معنی ہوجائیں تو پھر صرف ہیجان پیدا ہوتا ہے۔پاکستان کی بدقسمتی دیکھئے کہ مادر پدر آزادی کے باوجود بھی ایک پارٹی کے لوگ یہ یقین کرنے لگے ہیں کہ وہ آزاد نہیں ہیں۔یعنی اگر عمران خان صاحب وزیراعظم ہوں تو پھر یہ ملک آزاد ہے اور اسے حق ہے کہ وہ چودہ اگست کو جشن آزادی منا لے بصورت دیگر قوم ”بے غیرت” ہے اور اسے جشن آزادی منانے کی بجائے اپنی آزادی چھین لینی چاہیے!۔
کسی نے سچ کہا ہے کہ سیاست کے سینے میں دل نہیں ہوتا۔ اگر دل ہوتا تو مسلمانان ہند کی صدیوں پر پھیلی جدوجہد کے نتیجے میں 1947ء کو حاصل ہونے والے اس آزادی کو متنازعہ نہ بنایا جاتا۔ جو دن اس قوم کو متحد کرنے کے لئے بنا وہ بھی اس ظالم سیاست کے ہاتھوں انتشار کا دن بن گیا۔ ایسے ایسے نعرے’ اشتہارات اور تقاریر سننے اور دیکھنے کو ملیں کہ آنکھیں شرم سے جھک گئیں۔ اقتدار کی جنگ میں قائداعظم کے دیئے ہوئے یوم آزادی کا یوں مذاق اڑتے دیکھ کر دل بجھ گیا ہے۔ کیا کرسی اتنی اہم ہے کہ اس کے لئے ہم اپنے قومی وقار کے اس عظیم دن کو لڑائی جھگڑے کی نذر کریں ۔ عوام نے بددل ہونا ہی تھا۔ جس نے قومی جھنڈا لہرایا اسے پی ٹی آئی والوں نے حکومتی ہمنوا سمجھ کر نفرت کا اظہار کیا۔ لوگ سہم گئے۔ محتاط ہوگئے۔ جشن آزادی صرف سرکاری سطح تک محدود رہا۔ بی بی سی نے طنز کیا”’پٹھان کی طرح عمران خان بھی ایک کیفیت کا نام ہے”کاش کہ یہ کیفیت چودہ اگست کی بجائے دو چار دن پہلے یا بعد میں طاری ہوئی ہوتی۔!
پاکستان کا کوئی ایک دشمن ہے ۔ ہزاروں دشمن ہیں۔حکومت کے اندر ایسے ایسے لوگ ہیں جو ”بادشاہت” کا خاتمہ چاہتے ہیں ۔ان کو ”آمریت” والوں نے سہانے خواب دکھا رکھے ہیں۔ سات اگست کو ایک قومی روزنامہ میں شائع ہونے والی یہ خبر کہ عمران اور طاہر القادری کے پیچھے آئی ۔ایس۔آئی کے سابق سربراہ شجاع پاشا کا ہاتھ ہے تو پھر آزادی واقعی غلامی ہے۔
اس قوم نے جو آزادی ہزاروں’ لاکھوں انسانوں کی قربانیاں دے کر لی اور اس کی حفاظت کے لئے مسلح افواج آج بھی اپنی جانیں نثار کر رہے ہیں۔ اس آزادی کو نوجوانوں کے ذہنوں میں مشکوک مت کرو۔شوق سے اقتدار کی جنگ لڑیں کہ سیاست دان بنتا ہی اسی مقصد کے لئے ہے لیکن یہ وطن صرف آپ کا نہیں ہے۔ اس میں بیس کروڑ انسان رہتے ہیں ۔ اگر ان کی نظروں میں یہ آزادی مشکوک اور بے فائدہ ہوگئی تو پھر تم نے کس ملک کا وزیراعظم بننا ہے؟

 پاکستان کی بنیادوں میں تو ایسی کوئی کجی نہیں تھی۔اس کے بانیوں کا کردار انتہائی شفاف اور اُجلا تھا۔ کوئی ایک نام بتا دوجس نے دھونس’دھاندلی’زبردستی اور غیر جمہوری رویے کا مظاہرہ کیا ہو۔ بانی پاکستان کی اصول پسندی اور جمہوریت پسندی کی دُنیا معترف ہے۔محترمہ فاطمہ جناح کی زندگی بھی جمہوریت کی بالادستی کی جدوجہد میں گزری۔ اداروں کی مضبوطی اور پارلیمان کی بالادستی کے لئے قائد نے کتنی شدت کے ساتھ نصیحتیں کی تھیں۔ یہ دھرنے’پُرتشدد مظاہرے اور مُلکی اداروں کو للکارنے کا کلچر تو بعد کی پیداوار ہے۔سڑکوں پر آنا’راستے بند کردینا’دلیل کی بجائے طاقت کے زور پر اپنے مطالبات منوانا اور ”تڑیاں” لگانا کہ ”اگر مجھے بند کیا گیا تو میں پورا ملک بند کردوں گا” اور اپنے کارکنوں کو انگیخت کر نا کہ ”انقلابی جتھے پولیس والوں کے گھروں میں گھس جائیں اور پندرہ جانوں کا بدلہ پندرہ جانوں سے لیا جائے گا” یہ کونسے اصلاح پسند گروہ ہیں جو حکومت گرانے کے لئے اس ملک کی اینٹ سے اینٹ بجانے پر تُل گئے ہیں۔حکمرانوں کو اب پسینے آرہے ہیں ۔شروع میں ہی ”بندے دے پُتر” بن کر رہتے’ خواجہ آصف بھی نوری نت بنے ہوئے تھے۔ پوری فوج کو دھمکایا جارہا تھا۔”ہم دلیل والوں کے ساھ ہیں غلیل والوں کے ساتھ نہیں”۔اورپرویز رشید صاحب دبئی یاترا کرکے فوج اورآئی۔ایس۔آئی کے خلاف ایک میڈیا گروپ کی پیٹ تھپتپھاتے تھے۔کیا حاصل ہوا؟۔ وطن کے محافظوں کی رُسوائی کرنے والے چینل کو سپورٹ کرکے فوج کو کیا پیغام دیا گیا اور چند دنوں میں ہی ”جھاگ” کی طرح بیٹھ گئے۔ اتنی ہمت تھی تو پھر ”غلیل والوں” کے سامنے ڈٹ جاتے۔

راتوں کو معافیاں تلافیاں اور دن کو بڑھکیں۔فوج کی ترجمانی نہیں لیکن حقیقت یہ کہ ‘دن دے ویلے’ جیڑے لوکی تیرے عیب سناندے نیں۔راتیں کپڑا منہ تے لے کر تیرے کول جا بھیندے نیں۔ کچھ سمجھ نہیں آتا کہ اس ملک کے سیاستدانوں کا پرابلم کیا ہے۔جمہوری طور طریقوں سے انتخاب لڑنے والے اپنے مزاج کے اعتبار سے کس قدر آمریت پسند ہیں۔گردنوں میں موٹے موٹے سریے پھنسائے ہوئے میاں کی بجائے اللہ میاں بننے کی کوشش کرتے ہیں۔ عمران خان کس نئے پاکستان کی بات کر رہے ہیں۔دروغ گوئی کا بھی کوئی ڈھنگ ہوتا ہے۔ اگر 11مئی کو منتخب ہوئے والی حکومت جعلی ووٹوں کا نتیجہ ہے اور اگر عوام کا مینڈیٹ چرا لیا گیا ہے تو اس چوری کا جناب خان صاحب کو پہلے سے ہی ادراک تھا۔ پھر خیبرپختونخواہ میں جعلی حکومت بنانے کی کیا ضرورت تھی۔ صبر کر لیتے اور کہتے کہ نہیں جناب میں نہیں مانتا۔ الیکشن دوبارہ کرائے جائیں۔ اسمبلی کے پہلے اجلاس میں میاں نوازشریف کو مبارکبادیں اور اب صلواتیں۔ ایک سال میں آخر اس ملک کو کیا ہوگیا جو پچھلے 68برسوں میں نہیں ہوا۔اچانک ایک طوفان برپا کردینا اور بجلی ‘مہنگائی اور بے روزگاری کے ستائے عوام کا بچا کھچا سُکھ چین بھی چھین لینا کہاں کی اور کیسی تبدیلی ہے۔ ذات۔ ہاں ہر کسی کی ذات سب سے اول ہوگئی ہے۔ہر کوئی اپنی اپنی انا کے پنجرے میں گھات لگائے بیٹھا ہے۔لوگوں نے سُکھ کا سانس لیا تھا کہ چلیں اب پانچ برس تو سکون سے گذریں گے اور درمیان میں انتخابی عذاب میں مبتلا نہیں ہونا پڑے گا۔ لیکن یہ عوام بے بس ہیں۔ انقلابیوں اور نئے پاکستان کے معماروں کو تازہ خون چاہیے۔ان کے پاس جوانوں اور جنونیوںکے جتھے ہیں وہ انہیں بھڑکا کر اسلام آباد کو فتح کرسکتے ہیں ۔لاہور کو روند سکتے ہیں ۔ وہ اپنی فتح کے لئے ہر کسی کو شکست دے سکتے ہیں۔ بقول شاعر ان کی نفسیات اس طرح کی ہوگئی ہے کہ’ ایک دوسرے سے بچ کر نکلنا محال تھا ایک دوسرے کو روند کر آنا پڑا ہمیں اور اپنے دیئے کو چاند بتانے کے واسطے بستی کا ہر چراغ بجھانا پڑا ہمیں چودہ اگست کو کیا ہوگا؟ ہر زبان پر یہی سوال ہے۔انائیں انائوں سے ٹکرائیں گی۔ذاتی مفادات قومی مفادات کو دبوچ لیں گے’لاشیں گرانے والے تیار بیٹھے ہیں۔اگر نیک دل اور نرم مزاج لوگوں کی کوششیں کامیاب نہ ہوسکیں تو ”بوٹوں” کی آوازیں ایک بار پھر گونجیں گی۔ یہ کہانی یوں ہی چلتی رہے گی۔”سیاسی گنڈ کپ” جیلوں میں ہوں گے اور گولی والے ان کو ”ٹھڈے” مار رہے ہوں گے۔ سب اپنی اپنی اخلاقی اور سیاسی فتح کے مرثیے لکھیں گے۔ میرا ملک پھر خون کے آنسو روئے گا اور وہ بھی اپنی آزادی کے دن ! سنو! اس ملک نے آپ کو حکمران بنایا۔کسی کو صوبے کا اقتدار دیا کسی کو مرکز میں براجمان کرایا۔ سب ایک ہی کلاس کے لوگ ہو۔ سب اہل اقتدار ہو۔ عوام صرف اتنا چاہتے ہیں کہ اس ملک کی دنیا میں مزید بے عزتی مت کرو۔ اس مُلک کو معاف کردو! معاف کردو!