میڈیائی فضاءمیں طالبان ‘مذاکرات‘ شہید‘نیٹو سپلائی ڈرون ‘جہاد اور امن جیسے عنوانات چھائے ہوئے ہیں۔خدا نہ کرے محرم الحرام کے ماہ میں کوئی سانحہ پیش آئے‘ اگر ایسا ہوا تو پھر لاشیں‘ خون اور آگ کے نظارے بھی ٹی وی سکرینوں پر چھا جائیں گے۔یہ بھی ممکن ہے کہ حکومت طالبان مذاکرات کے لئے کوئی ٹیم تشکیل پائے اور ہمارے اینکرپرسنز پورا مہینہ اسی پانی میں مدھانی ڈال کر بیٹھے رہیں۔ غرض یہ کہ ذرائع ابلاغ جنہیں عوام کا ترجمان ہونے کا دعویٰ ہے وہ چند مخصوص واقعات‘لوگوں اور گروہوں کے لئے ہی وقف رہے۔حکومت ایسے حالات میں بڑی مطمئن رہتی ہے۔اور بڑی خاموشی سے مہنگائی کے جن کے ہاتھ پاﺅں کھول دیتی ہے۔آئی۔ ایم۔ایف جیسے اداروں سے مذاکرات کامیاب ہوجاتے ہیں اور غریب کو مارنے کے تمام تیر بہدف نسخے بھی آزما لئے جاتے ہیں

۔اللہ جانے امریکہ کو حکیم اللہ محسود سے کوئی دشمنی تھی یا پاکستان کے عوام سے۔اچھا خاصا مہنگائی کے خلاف شورشرابا شروع ہوا تھا۔تحریک انصاف نے (چاہے بلدیاتی انتخابات میں بہتر نتائج کے لئے ہی سہی ‘مہنگائی کے خلاف تحریک چلانے کا اعلان تو کر ہی دیا تھا۔امید تھی کہ عوامی غیض وغضب کے مبینہ خوف سے شائد پٹرول اڑتالیس پیسے کی بجائے چار پانچ روپے سستا ہوجاتا لیکن امریکی ڈرون نے اس ملک کے عوام سے کونسا بدلہ لیا کہ راتوں رات فضاءہی بدل گئی۔غریب اپنی ترجمانی کے خواب ہی دیکھتے رہ گئے اور مہنگائی کی جگہ ”شہادت“ نے لے لی۔جوں ہی ذخیرہ اندوزوں اور ان کے سرپرست محکموں‘ افسروں اور باوسیلہ لوگوں نے ذرائع ابلاغ اور تحریک انصاف کو عوامی مسئلہ کی طرف سے غافل پایا‘مہنگائی کے میزائل برسانا شروع کردیئے۔پاکستان میں گراں فروشی اور عوام دشمنی کے ایسے ”ہنی مون پیریڈز“ سال میں کئی بار آتے ہیں‘بلکہ جب سے نون لیگ کی پژ مُردہ حکومت نے معاملات کو چھوا ہے‘مہنگائی ‘فحاشی کی طرح پھیلتی جارہی ہے اورفحاشی مہنگائی کی طرح اچھل کود کر رہی ہے۔خیال تھا اور میرا خیال نہیں عام آدمی کا خیال تھا کہ بے وقعت روپے کے ساتھ گوشت کا تصور ہی ختم کردینا چاہیے اور عید بقر کے علاوہ پورا سال ”ہندو“ بن جانا چاہیے۔اگر ایسا کریں گے تو چلیں دال ساگ ہی سہی‘پیٹ تو بھرتا ہی رہے گا۔لیکن مرض بڑھتا گیا جوں جوں دُعا کی کے مصداق یہ خواب بھی جوئے شیر لانے والا خواب ثابت ہوا۔دو تین دنوں میں مرچ‘ساگ اورپیاز ‘مرغی سے مہنگے کردیئے گئے۔روٹی نے آٹھ روپے سے چھلانگ لگائی اور دس تک جاپہنچی اور یہاں بھی رکی نہیں۔ مانسہرہ میں پندرہ روپے کی فروخت ہوئی اور روٹی کی یہ دوڑ جاری ہے۔غریب نے سوچا ہو گا کہ دو ٹماٹر لے کر چٹنی ہی بنا لیں گے لیکن ٹماٹر ایک سو ساٹھ سے لے کر دو سو روپے تک چلاگیا اور یوں چٹنی پیاز کا ”شاہانہ طرز ضیافت“ بھی صرف امراءکے لئے مختص ہوگیا۔”کیلا پچاس روپے درجن‘ ایک سوروپے کے دو درجن لے جاﺅ“ اتوار بازار میں ریڑھی بان کو یہ آواز لگاتے سن کر ہمارے ایک دوست اس کے قریب گئے اور ہاتھ باندھ کر اس سے کہا” ذرا آہستہ بولو۔ اگر حکومت کو پتہ چل گیا تو یہ بھی ہماری پہنچ سے دور چلا جائے گا“۔ بہرحال آجکل کیلا سستا ہے اور ہوسکتا ہے کہ جناب شہباز شریف لاہوریوں کو ہدایت کردیں کہ دال روٹی اور مرغ چھوڑو اور تین وقت کیلے کھایا کرو۔ آپ میاں برادران سے کچھ بھی توقع کرسکتے ہیں۔ڈرونز گرانے ہیںیا نہیں۔یہ جہادیوں اور فسادیوں کا معاملہ ہے۔امریکہ خود بھی بہت بڑا فسادی ملک ہے۔یہ اوپر والے طبقات اور تخت پاکستان پر قبضہ کے خواہش مندوں کے کھیل ہیں۔غریب آدمی کو اس جنگ سے صرف ”خوف“ ہی ملنا ہے۔ڈرون گرائیں یا نہ گرائیں‘لیکن ٹماٹر ضرور گرالیں۔

Click here to View Printed Statement

افغان آرمی چیف جنرل شیر محمد کریمی پاکستان پر الزام عائد کرچکے ہیں کہ افغان طالبان اسلام آباد کے کنٹرول میں ہیں۔پاکستان چاہے تو افغان جنگ کا خاتمہ چند ہفتوں میں ہوسکتا ہے۔پاکستان میں ڈرون حملے یوں ہی نہیں ہوتے بلکہ پاکستان نے پاکستانی طالبان کی فہرست امریکی حکام کے حوالے کی ہے جن کو امریکہ ڈرون حملوں کے ذریعے نشانہ بناتا ہے۔جنرل کریمی کے اس بیان کو پاکستان کیخلاف ایک ہمسایہ مسلم ملک کی طرف سے ایف آئی آر قرار دیا جاسکتا ہے۔ اس بیان میں چھپے ہوئے زہر کے اثرات جلد سامنے آنے شروع ہوجائیں گے۔ اس بیان سے یہ بات بھی کھل کر سامنے آرہی ہے کہ پاکستانی طالبان کی درپردہ نہیں بلکہ کھلے عام مدد افغان آرمی کی طرف سے جاری ہے۔مولوی فضل اللہ تو افغانستان کے صوبے نورستان میں ہی پائے جاتے ہیں۔خودکش حملہ آور اور ان کی تربیت کے تمام سراغ بھی افغان سرزمین سے ہی جڑتے ہیں۔

جنرل کریمی نے ڈرون حملوں کے حوالے سے پاکستانی عمل دخل کا شوشہ چھوڑ کر دراصل پاکستانی طالبانکی نہ صرف پیٹھ ٹھونکی ہے بلکہ انہیں پرتشدد کارروائیوں کے لئے جواز بھی گڑھ کردے دیا ہے۔یہ جانتے ہوئے بھی کہ اکثر ڈرون حملے حقانی نیٹ ورک سے منسلک رہنمائوں پر ہوتے ہیں اور افغان صدر حامد کرزئی کے بقول یہ حقانی نیٹ ورک پاکستان کے کنٹرول میں ہے ۔پھر بھی افغان حکومت تماشہ لگانے سے باز نہیں آئی۔اہل فکر و نظر بخوبی جانتے ہیں کہ افغان حکومت کے منہ میں بھارت کی زبان ہوتی ہے۔افغان نیشنل آرمی کی ”تربیت” بھارتی انسٹرکٹر کر رہے ہیں اور وہاں کی سڑکیں اور دیگر انفراسٹرکچر پر بھارت اربوں ڈالر خرچ کرچکا ہے۔دوحہ میں طالبان کے ساتھ مذاکرات کا ڈھنڈورا امریکہ پیٹتا رہتا ہے۔امریکیوں کو اپنی ایک لاکھ سے زائد فوج 2014ء تک افغان حدود سے باہر نکالنی ہے ۔کرزئی صاحب چاہتے ہیں کہ امریکی یہاں سے واپس نہ جائیں اور حامدکرزئی کی کرپٹ حکومت یوں ہی جلوہ گرہ رہے۔لیکن امریکیوں کو جناب کرزئی سے جو کام لینا تھا وہ لے چکے اب انہیں ”باعزت”واپسی چاہیے اور اس ”باعزت” واپسی کے لئے انہیں اصلی طالبان سے مذاکرات کی مجبوری ہے۔افغانستان کے چند بڑے شہر چھوڑ کر باقی ماندہ علاقے پر طالبانی پرچم لہراتے ہیں اور وہاں ملاں محمد عمر کا فرمان چلتا ہے۔امریکیوں کو علم ہے کہ جناب کرزئی کی نیشنل آرمی طالبان کے سامنے شائد چند ماہ بھی نہ نکال سکے اور یوںامریکہ پر یہ الزام آئے کہ اس نے افغانستان کو ایک بار پھر بے یارومددگار چھوڑ دیا ہے۔طالبان کون ہیں۔اب یہ بار بار دہرانے کی ضرورت نہیں ہے کہ تقریباً تمام پختون آبادی کی طالبان کو حمایت حاصل ہے۔ جب کابل میں کابل میں پختون دشمن لابیاں حکمران ہیں تو ظاہر ہے وہاں کی اکثریت پختون قوم کرزئی کو اپنا دشمن سمجھتی ہے۔یہی وجہ ہے کہ چالیس ممالک کی افواج ملکر بھی طالبان کا کچھ بگاڑ نہیں سکتیں اور طالبان جب چاہتے ہیں صدارتی محل پر ہلہ بول دیتے ہیں۔ امریکی بیس میں گھس کر تباہی مچا دیتے ہیں۔طالبان کو کنٹرول کرنا ایک لطیفہ ہی ہوسکتا ہے ۔ وہ افغانستان کے فرزند اور آزادی کے متوالے افغان ہیں۔ اگر ان کا کنٹرول پاکستان کے ہاتھ میں ہوتا تو افغانستان پر کبھی امریکی یلغار نہ ہوتی۔طالبان حکومت کے پاس پاکستان کی آئی ایس آئی کے لوگ ہی نہیں گئے’پاکستانی علماء کے وفود بھی گئے تھے کہ جناب اسامہ کو آپ ملک بدر کردیں تاکہ جنگ کی نوبت نہ آئے’ لیکن جناب ملاں عمر کا ایک ہی جواب تھا کہ وہ ہمارے مہمان ہیں اور ہم مہمان کو جانے کا نہیں کہہ سکتے ۔طالبان کسی کے کنٹرول میں نہیں۔ جناب کرزئی اور امریکہ کو بالآخر انہی طالبان سے مذاکرات کرکے اقتدار ان کے حوالے کرنا پڑے گا۔یہ کام آج نہیں تو کل ضرور ہوکر رہے گا۔

Click here to View Printed Statement

نفسیاتی مریض بنا دیا ہے۔ ہر وقت ہر شخص ایک ہی موضوع پر بحث کر رہا ہے۔کرم دین سے لیکرچیف جسٹس آف پاکستان تک اور ماسی بشیراں سے لے کر میاں محمد نوازشریف تک توانائی کے اس بحران کو حل کرنے کی تجاویز’پروگرام اور منصوبے پر بحث کر رہا ہے۔”اگر میاں نوازشریف نے لوڈشیڈنگ پر قابو پالیا تو اگلے پانچ سال حکومت کرسکیں گے ورنہ مڈٹرم الیکشن ناگزیر ہوجائیں گے”۔ ہارنے والی پارٹیاں برملا کہہ رہے ہیں کہ میاں برادران بجلی کہاں سے لائیں گے۔آٹھ دس ہزار میگاواٹ کی کمی کیسے پوری کریں گے۔ لہٰذا اپوزیشن پارٹیاں خم ٹھونک کر کھڑی ہیں۔جونہی اقتدار کی منتقلی مکمل ہوگی’جلسے جلوس شروع ہوجائیں گے۔

تحریک انصاف نے تو طے کر لیا ہے کہ اس نے اپنے ووٹروں کی ”احتجاجی کیفیت” کو ٹھنڈا نہیں ہونے دینا اور مڈٹرم الیکشن کروا کے رہیں گے۔بجلی نے آنا نہیں ‘لوڈشیڈنگ ختم نہیں ہونی۔ہر روز لاکھوں نئے کنکشن دیئے جارہے ہیں’آبادی بڑھتی جارہی ہے اور اگر انڈسٹری کی ڈیمانڈ پوری کی گئی تو ظاہر ہے کہ عام آدمی بجلی سے محروم ہی رہے گا ۔لہٰذا اپوزیشن کا کام بہت آسان ہے۔ابھی جون شروع ہوا ہے ۔اگست ستمبر تک گرمی زوروں پر رہے گی۔پہلے تین ماہ میں ہی (ن) لیگ کو ملک گیر احتجاج سے واسطہ پڑ سکتا ہے۔ملک میں تو بجلی ہے ہی نہیں۔آج اگر کالاباغ ڈیم بھی شروع ہوجائے تو تین چار سال اس کی تعمیر پر لگیں گے۔ تھرکول کا منصوبہ بھی کئی برس لے گا۔بجلی آئے تو کہاں سے آئے۔بجلی چوری’لائن لاسز’سرکولرڈیٹ’ یہ ساری لفظی کارروائیاں ہیں۔ریشمی بندوبست ہے۔لوگوں کی آنکھوں میں دھول جھونکنے کی واردات ہے۔ہمسایہ اور دوست ممالک ہماری اس مجبوری کو بخوبی جانتے ہیں۔ایران کی طرف سے پیشکش ہے۔اکانومی واچ کے صدر کی حیثیت سے راقم نے ایک ایرانی کمپنی کے عہدیدار سے ملاقات کی جس میں ایرانی عہدیدار نے پاکستان کی  بجلی کی ضرورت کو فی الفور پورا کرنے کی پیشکش کی۔ اخبارات میں اس خبر کو بڑی پذیرائی ملی۔جیسے تھلیسیمیا کے مریض کو کہیں سے خون ملنے کی امید پیدا ہو اور وہ خوش ہوجائے اسی طرح جوں ہی ہمیں کہیں سے ہلکا سا اشارہ ملتا ہے ہم خوش ہوجاتے ہیں کہ شائد ہماری اقتصادی زندگی پھر سے سستی بجلی تو نہیں دیں گے اور امریکی پابندیوں  کے ہوتے ہوئے نوازشریف حکومت یہ بجلی کیسے لے سکے گی۔بھارت والے واہگہ بارڈر کے ذریعے بجلی فروخت کرنا چاہتے ہیں لیکن وہ صرف پانچ سو میگاواٹ ہی دے سکیں گے۔چین کا معاملہ بڑا ہی مختلف ہے۔وہ بجلی کے شعبے میں شائد سرمایہ کاری کرنا چاہتا ہے لیکن سرمایہ کاری کے لئے کوئی منصوبہ بھی ہونا ضروری ہے۔منصوبہ تو ہے نہیں گنے کے پھوک کا منصوبہ کوئی ایسا منصوبہ نہیں جس میں چین جیسا ملک سرمایہ لگائے گا۔میاں نوازشریف کی حکومت زیادہ سے زیادہ یہ کرسکتی ہے کہ غیر اعلانیہ لوڈشیڈنگ ختم ہوجائے۔لیکن اگر اعلانیہ ہی اٹھارہ گھنٹے ہے تو پھر کیا فائدہ؟بہرحال یہ خواب کہ میاں نوازشریف کے حلف اٹھاتے ہی تاروں میں برقی رو دوڑنے لگے گی ‘پورا نہیں ہوسکتا اور شائد دو برس تک صورتحال میں کوئی خاطر خواہ تبدیلی بھی نہ آسکے۔ اس لئے میرا ذاتی خیال ہے کہ پی ٹی آئی کو صوبہ خیبرپختونخواہ میں جوناکامیاں ہونا ہیں انہیں چھپانے کے لئے پنجاب میں لوڈشیڈنگ کے خلاف مظاہرے کروا کے بڑی حد تک چھپایا جائے گا۔مجھ سے جب لوگ پوچھتے ہیں کہ ڈاکٹر صاحب اب تو میاں صاحب وزیراعظم بن گئے ہیں’ ”اب تو بجلی تو آئے گی نا”مجھے ان کی معصومیت پر ترس آتا ہے۔بجلی ہماری خواہشوں سے نہیں آئے گی یہ تو پیدا کرنی پڑتی ہے’اور اس کے پیدا کرنے کے لئے ہم نے صرف کرائے پرتھرمل پاور پلانٹس لگائے ہیں اور ان سفید ہاتھیوں کو فرنس آئل گیس کی خوراک چاہیے جسے اگر پورا کیا جائے تو باقی کاروبار حیات ٹھپ ہوجاتا ہے۔ اس لئے انیس بیس کے فرق سے بجلی کے یہی حالات دکھائی دے رہے ہیں۔

میں عمران خان کا حامی تھا اب نہیں رہا۔عمران نے انقلاب کا نعرہ لگایا۔”چور چوروں کا احتساب نہیں کرسکتے“”روایتی سیاست اور گھسے پٹے سیاستدان اس ملک کی تقدیر کیا بدلیں گے“۔”تحریک انصاف بالکل نئی ٹیم لے کر آئے گی“۔” اس نظام کو جڑ سے اکھاڑ پھینکے گے“ یہ سیاسی عہد و پیماں تھے جن کے سحر میں میرے جیسے بہت سے محب وطن اسیر ہوئے‘ عمران خان کی صورت میں ہمیں ایک مسیحا نظر آنے لگا۔ میں اور میرے ساتھیوں نے عمران کی ذات سے جڑی بہت سی منفی حقیقتوں‘کہانیوں اور تبصروں کو توجہ نہیں دی اور نئے پاکستان کی تعمیر کیلئے تبدیلی کے اس نشان کو دل ودماغ میں سجا لیا۔مجھے ذاتی طور پر پہلا دھچکا اس وقت لگا جب عمران خان نے پیپلزپارٹی کی قیادت سے روٹھ کر آنے والے شاہ محمود قریشی کو نہ صرف یہ کہ پارٹی میں شامل کیا بلکہ انہیں وائس چیئرمین بھی بنا ڈالا۔شاہ محمود قریشی جاگیردار ہیں یا نہیں لیکن حقیقت یہ ہے کہ وہ ایک گدی نشین ہیں

اور ہر سال اپنے ہزاروں مریدین کا ذہنی اور مذہبی استحصال کرتے ہیں۔ غریب غرباءسے ہر سال کروڑوں روپے وصول کرتے ہیں۔ان کی سیاسی اہمیت کی بنیاد بھی موروثیت ہے صرف اس کی شکل پیری مریدی ہے۔ ان کے ووٹروں کا ان سے ایک استحصالی رشتہ ہے۔عمران خان تو علامہ اقبالؒ کے فلسفے کو لیکر چلنے کا دعویٰ کر رہے تھے پھر کیا ہوا کہ عقیدت مندوں سے نیازیں اکٹھی کرنے والے اس قریشی پیر کو اپنی انقلابی جماعت کا وائس چیئرمین مقرر کر لیا۔ اگر شاہ محمود قریشی اور زرداری کے ٹولے کے درمیان ریمنڈ ڈیوس کے ایشو پر اختلاف نہ ہوتا اور اگر جناب گیلانی کی جگہ جناب قریشی کو وزیراعظم کی باری دے دی جاتی تو آج بھی اس شاہ کے منہ سے اپنے بادشاہ کے لئے پھول جھڑ رہے ہوتے اور یہی شاہ محمود قریشی ‘عمران خان اور تحریک انصاف کے کیخلاف شعلے اگل رہے ہوتے۔ذاتی مفادات کے سبب اپنی سابق پارٹی سے روٹھ جانے والے سیاستدان کو عمران خان نے کلین چٹ دے کر اپنے ساتھ شامل کر لیا ۔جعلی ڈگری والوں اور نیب زدگان کی پوری ٹیم اکٹھی کر لی۔ہاشمی سمیت یہ ساری وہ ٹیم ہے جو خود انتہا کی متکبر ہے‘عام آدمی کے ساتھ ہاتھ ملا کر دس بار دھوتے ہیں۔عمران نے اپنے نظریے کے باعث اپنے ساتھ ملنے والوں سے پہلی ناانصافی کی اور یوں یہ سلسلہ ایسا چلا کہ رکنے کا اب نام ہی نہیں لیتا۔سیاستدانوں کا ”دکھی گروپ“ اپنے لئے سکھ ڈھونڈنے تحریک انصاف میں شریک ہوچکا ہے۔عمران خان اس ”فیاضی“ کا جو ا ب دینے کی بجائے ”فرشتے تو ملیں گے نہیں“ کہہ کر نظریاتی کارکنوںکو ٹھنڈا کرنے کی کوشش کر رہے ہیں۔اگر آپ کے پاس ”فرشتے“ نہیں تو پھر باقی پارٹیوں کو ”شیطان“ ہونے کے طعنے کیوں دیتے رہے۔عمران خان نے دوسرا بڑا دھچکا ایم کیو ایم کی طرف دوستی کا ہاتھ بڑھا کر دیا۔ہم جب متحدہ قومی موومنٹ کے حق میں لکھ رہے تھے تو عمران کے حامی حلقے ہمیں ایسا کرنے سے روکتے تھے۔عمران خان جناب الطاف حسین کیخلاف لندن میں ثبوت لئے پھرتے رہے۔انہیں ماہ مئی والا خون خرابہ نہیں بھولتا تھا۔ لیکن اچانک ایسا کیا انقلاب آیا کہ ایم۔کیو ۔ایم ایک حقیقت لگنے لگی اور اب وہ نائن زیرو جانے کیلئے بیتاب نظر آتے ہیں۔آخر یہ دوغلا پن اور دھوکہ دہی کس کے حکم پر ہے۔اگر ایم کیو ایم حقیقت ہے جو کہ ہے‘تو پھر (ن) لیگ‘ پی پی پی اور دیگر سیاسی و مذہبی جماعتیں بھی حقیقتیں ہیں۔ تحریک انصاف نے اگر مفاہمت اور مصالحت کی سیاست کر نی ہے تو اس ملک کے معصوم نوجوان کب تک ”خان جی“کا جھریوں بھرا چہرہ دیکھتے رہیں گے ۔اورساٹھ سالہ ہیرو کو لوگ کیوں پوجیں گے؟جنون گروپ کب تک نئی نسل کو مجنوں بنائے رکھے گا؟لوگوں کو سب کچھ یاد آرہا ہے۔عمران خان کے اپنے بچے اپنے ننھیال میں پل رہے ہیں۔ ان کے رگ و پے میں یہودی رزق سرایت کر رہا ہے۔ عمران خان کو اسلامی ریاست کا ماڈل بھی انگلینڈ ہی دکھائی دیتا ہے۔ ان کو اچانک امریکی مظالم بھی بھول گئے ہیں۔ان کی حریت فکر کا دائرہ دھیرے دھیرے سمٹتا جارہا ہے۔وہ امریکیوں سے زیادہ اب ان کی مدد کرنے اور انہیں باعزت واپسی کا راستہ دینے کے فارمولے کو پروموٹ کرتے دکھائی دیتے ہیں۔ عمران خان نے لاہور میں جلسہ کرنے سے قبل واشنگٹن میں کن کن امو رپر امریکی عہدیداروں کو اعتماد میں لیا کسی کو خبر نہیں۔شاہ محمود قریشی کو بھی امریکہ بلایا گیا تھا۔ پھر معاملات طے پا گئے۔عمران کی تلخ زبان امریکہ کے حق میں شیریں ہوگئی۔عمران یعنی ہمارا خان بھی”حقیقت پسند“ ہوگیا۔یہ جان کر تیسرا بڑا دھچکا لگا کہ تحریک انصاف کی پروجیکشن اور لابنگ کیلئے پاکستان کے سب سے بڑے امریکہ نواز میڈیا گروپ کے ساتھ باقاعدہ ڈیل طے پا گئی ہے۔عمران خان کن ہاتھوں میں پھنستے جارہے ہیں؟ ان کو کس نے یرغمال بنانا شروع کردیا ہے؟ افسوس کہ عمران نے اپنے لاکھوں چاہنے والوں کے اعتماد اور پیار کیساتھ روایتی کھلواڑ شروع کردیا ہے۔تحریک انصاف معاشرے کو انصاف دینے کی بجائے ناانصافیوں کی آماجگاہ بن گئیہے۔

Click here to View Printed Statements

اسلام تو آیا ہی امن قائم کرنے کے لئے ہے۔ جو شخص‘گروہ ‘ ملک اور قوم ظلم کرے وہ ظالم ہے اور قرآن اورا سلام میں ظالم کے لئے انتہائی بلیغ اصطلاح ”باطل“ استعمال کی گئی ہے۔”جاءالحق وذحق الباطل“ کی نویدسناتے وقت قرآن نے مسلمانوں کو یہی درس دیا ہے کہ تم باطل کیخلاف دل ‘زبان اور ہاتھ سے جہاد کرو اور اللہ تعالیٰ کی نصرت تمہیں نصیب ہوجائے گی‘باطل بھاگ جائے گا‘ حق جیت جائے گا او ر امن قائم ہوجائے گا۔باطل قوتیں ہی ظالم قوتیں ہوتی ہیں۔غاصب اور قابض ۔ایسی سفاک قومیں جو دیگر کمزور قوموں پر قبضہ کر لیتی ہیں۔ ان کے مال مویشی‘ان کی عزت و آبرو کو لوٹ لیتی ہیں۔ ان کے گھر بار چھین لیتی ہیں۔ ان پر یلغار کرتی اور بستیوں کی بستیاں آگ لگا کر خاکستر کر ڈالتی ہیں۔ ایسی صورتحال میں قرآن اپنے ماننے والوں کو پکارتا ہے :۔” اور تمہیں کیا ہوگیا ہے کہ خدا کی راہ میں اور ان بے بس مردوں اور عورتوں اور بچوں کی خاطر نہیں لڑتے جو دعائیں کیا کرتے ہیں کہ اے پروردگار ہم کو اس شہر سے نکال کر کہیں اور لے جا کہ جس کے رہنے والے ظالم ہیں۔ اور اپنی طرف سے کسی کو ہمارا حامی بنا ۔ اور اپنی طرف سے کسی کو ہمارا مددگار مقرر فرما“۔(سورہ النساءآیت75)۔مسلمان دراصل نام ہی انسانوں کے اس گروہ کا ہے جو ظالم کا ہاتھ پکڑیں اور مظلوم کی مدد کو پہنچیں تاکہ معاشرے اور دنیا میں امن قائم ہوسکے۔امن ہر خیرپسند انسان کی پہلی اور آخری خواہش ہے۔امن ہر مذہب‘ دین اور عقیدے کا منتہائے مقصودہے۔امن انسانیت کی حتمی منزل ہے۔امن خوشحالی کاضامن ہے۔ امن کی دعا پیغمبروں نے مانگی ہے۔حضرت ابراہیم اور حضرت اسماعیل علیہ السلام جب کعبہ کی تعمیر فرما رہے تھے تو دعا مانگتے جارہے تھے کہ” اے بار الٰہی اس گھر کو امن کا گھر بنا دے“۔جہاں امن نہیں ہوتا وہاں سے خوشحالی‘سلامتی اطمینان‘سکون اور آسائش اٹھ جاتی ہے۔بدامنی میں مبتلا معاشرے عذاب الٰہی سے دوچار ہوتے ہیں۔کہا جاتا ہے کہ جن معاشروںمیں ظلم ہوتا ہے وہاں سے امن بھاگ جاتا ہے۔آپس میں جنگ و جدل شروع ہوجاتی ہے‘خانہ جنگیاںبستیاں اجاڑ دیتی ہیں۔ انسان انسان کو کاٹتے ہیں۔ ایسے معاشرے آپس کی جنگوں اور خون خرابے سے ایک دوسرے کو ختم کر لیتے ہیں۔ آج کل کراچی میں یہی کچھ ہورہا ہے۔ظہور اسلام سے قبل عرب معاشرہ بدامنی کا شکار تھا۔قبائل آپس میں دست وگربیان رہتے تھے۔امن اس خطے سے روٹھ گیاتھا اور انسانیت مدد کو پکار رہی تھی۔اسلام نے دس برس تک ظلم مٹانے والی جماعت کی تربیت کی‘ جماعت تیارہوئی اور ایک ریاست قائم کردی گئی۔ پھر ظالموں نے ‘باطل قوتوں نے ‘اپنی فطرت کے عین مطابق خیر کی اس ریاست ‘ اس قوت کو مٹا دینے کی کوشش کی ۔جنگ بدر‘جنگ احد‘جنگ خندق بپا ہوئیں۔اسلام نے شر کو مٹانے اور فتنہ کو ہمیشہ کے لئے ختم کردینے کے لئے جہاد بالسیف کا حکم دیا۔ قرآن کا حکم آیا” اور قتل کرو ان کو حتی کہ فتنہ ختم ہوجائے۔“ظلم کے قلعے مسمار ہوتے گئے۔حضرت علی مرتضیٰ فاتح خیبر ہوئے۔ظلم کا‘ فتنہ کا سب سے مضبوط قلعہ آپ کے ہاتھوں سے تاراج ہوا۔کیونکہ خود حضرت علی کرم اللہ وجہ ۔علیہ السلام نے فرمایا معاشرے کفر کے ساتھ رہ سکتے ہیں لیکن ظلم اور ناانصافی کے ساتھ نہیں رہ سکتے“۔جب تک فتنہ وفساد پیدا کرنے والی طاقتیں فساد پھیلاتی رہیں گی‘فتنے پنپتے رہیں گے۔تو پھر عالمی سطح پر امن قائم نہیں ہوسکتا۔ اگر یہ دنیا ایک گلوبل ویلج ہے تو پھر اس ”ویلج“ پر حاوی طاقتوں کو شر پھیلانے سے باز رہنا ہوگا۔ فساد برپا کرنے سے رکنا ہوگا۔اگر ایسا نہیں تو پھر امن کی بات کرنا دھوکہ ہے۔کیا یہ حقیقت نہیں ہے کہ اسرائیل نے امریکی اور مغربی طاقتوں کی آشیرباد سے مظلوم فلسطینیوں کے وطن پر نہ صرف قبضہ کر رکھا ہے بلکہ ان کو محاصرے میں لے کر نان و نفقہ تک پہنچنے نہیں دے رہے۔وہاں بچے دودھ کو ترستے ہیں۔ اگر اہل ترکی ان مظلوموں کی مدد کی بات کرتے ہیں ‘ان تک خالص انسانی ہمدردی کے جذبے سے سامان زیست پہنچانے کے لئے فلوٹیلاکارواں چلتا ہے تو اسرائیلی فوجیں انسانی ہمدردی کیلئے جانے والے اس امدادی قافلے پر گولیاں چلاتی اور مدد کو جانے والوں کو شہید کردیتی ہیں۔ کیا تمام انسانوں اور خصوصاً مسلمانوں پرفرض نہیں کہ وہ ان مظلوموں کی مدد کے لئے متحرک ہوں جن کے گھر بار پر قبضہ کر لیا گیا ہے۔کشمیر میں کیا ہورہا ہے۔ آج زبان بندی کی جارہی ہے کہ کشمیر کی آزادی کا ذکر نہ کریں۔ بھارتی فوجوں نے مظلوم کشمیریوں کے ایک لاکھ نوجوانوں کو شہید کردیا ہے۔ اقوام متحدہ اور انسانی حقوق کے تمام ادارے چیخ چیخ کر بتا رہے ہیں کہ کشمیر دنیا کی سب سے بڑی قتل گاہ بن گئی ہے۔ لیکن امریکہ جو کہ سب سے بڑی طاقت ہے وہی سب سے بڑا ظالم بھی ہے۔ اس نے ظلم میں بھارت کا ساتھ دیا ہے اسے اس خطے کا تھانیدار بنانے کا فیصلہ کیا ہے۔بتایئے کہ ایک کروڑ کشمیریوں پر ظلم ڈھا کر اس ساﺅتھ ایشیاءمیںامن کیسے قائم ہوسکتا ہےکہا جاتا ہے کہ عراق میں صدام حسین ظلم کرتا تھا‘امریکہ اسی ظالم صدام حسین کی آٹھ برس تک ایران کےخلاف پشت پناہی کر تا رہا۔ لیکن جب چھوٹے ظالم نے بڑے ظالم کے خلاف بغاوت کردی تو پھر بغداد کی اینٹ سے اینٹ بجا دی گئی۔آج وہاں ہر روز قتل ہوتے ہیں۔ہر روز دھماکے ہوتے ہیں۔ اور بہت ممکن ہے کہ پاکستان کی طرح یہ دھماکے بھی امریکی بلیک واٹرز والے خود ہی کروا رہے ہوں تاکہ ان کی ظالم فوجیں موجود رہ سکیں۔قرآن کا حکم ہے کہ مظلوموں کو ان ظالموں سے نجات دلانے کے لئے آگے بڑھیں تاکہ ظلم کا خاتمہ ہو اور امن قائم ہوسکے۔ جب تک فلسطین پر اسرائیل قابض ہے‘ جب تک عراق میں امریکی فوجیں موجود ہیں بتایئے کہ خطہ عرب میں امن کیسے قائم ہوسکتا ہے۔آخر ایسا امن کہاں سے لایا جائے جو ابوغریب جیل میں ڈھائے جانے والے مظالم کو بھلا دے۔!افغانستان میں پر قبضہ نہیں تو اور کیا ہے۔ آپ اور ہم سب امن کے خواہاں ہیں۔بتایئے آپ کے گھر پر بم مارا جائے۔ دیواریں تک جل جائیں اور راکھ کے ڈھیر پر بیٹھ کر ظالم آپ سے کہے بولو”امن ہوگیا“ یہ کیسے ممکن ہے صاحبان علم و دانش بتایئے یہ کیسے ممکن ہے۔ ہماری ذہنی غلامی کی حالت تو یہ ہے کہ ہم قابض فوجوں کو نیٹو فورسز کہتے ہیں قابض نہیں لکھتے۔ہم آزادی کی جدوجہد کرنے والے افغان مجاہدین کو دہشتگرد اور شرپسند لکھتے ہیں آزادی کے متوالے نہیں مانتے۔ دنیا کے سب سے غریب ملک افغانستان پر ڈیزی کٹربموں کی موسلادھار بارش کردی گئی ۔لیکن ہم امریکی فوجوں کا ہر اول دستہ بن گئے۔ ظالم کا ساتھ دینے والا مظلوم تو نہیں ہوسکتا۔ ظالم کا ساتھی بھی ظالم ہی ہوتا ہے۔ اور دو ظالم مل کر ظلم میں اضافہ کرسکتے ہیں‘رحم نہیں کھاسکتے۔ اس ظلم کیخلاف جو بولے وہ انتہا پسند ہے‘وہ دقیانویس ہے‘سانس لینے کا حق نہیں‘ زبان کھولنے کی اجازت نہیں۔!میں وضاحت کرتا چلوں کہ قابض فوجوں کیخلاف لڑنا اور ان سے آزادی حاصل کرنا انسانی حق ہے۔ اسلام ایسی تمام قوموں اور گروہوں کی کھلی حمایت کا اعلان کرتا ہے جن کے حقوق غصب کر لئے گئے ہوں۔لیکن وہ گروہ جو پاکستان کی دشمن طاقتوں کی شہ پر عام پاکستانیوں اور عام مسلمانوں پر حملے کرنے کے مرتکب ہورہے ہیں وہ بھی فسادیوں میںشمار ہوتے ہیں۔دارالحرب یہاں نہیں افغانستان میں ہے۔سچے مجاہدین اسلام کبھی ظالم ہو نہیں سکتے۔آج کی صورتحال میں امریکہ کے ظلم کی شکلیں بدل چکی ہیں۔حال ہی میں فاٹا کے سیکرٹری نے یہ انکشاف کرکے حیران کردیا کہ جب سے صوبہ خیبرپختونخواہ میں غیر ملکیوں کے داخلے بند کردیئے گئے ہیں خودکش حملوں میں کمی ہوگئی ہے۔ظالمان اورمجاہدین کے نام کو آپس میں مدغم کردیا گیا ہے۔ دھماکوں کی ذمہ داریاں قبول کرنے والے ”ترجمان“ بھی مشکوک ہیں۔شیعہ سنی اوربریلوی ‘دیوبندی کے درمیان اختلاف کو نفرت میں بدلنے والے اوراس نفرت کی بنیاد پر قتل گاہیں سجانے والوں کے پیچھے خفیہ ہاتھ اب بے نقاب ہوچکے ہیں۔ عالمی سطح کی طاغوتی طاقتیں چاہتی ہیں کہ امت مسلمہ متحدنہ ہوسکے‘مسلمانوں کے انتشار کا فائدہ نہ تو شیعہ کو ہے نہ سنی کو۔ آخر ہم ان طاقتوں کو ظالم کیوں نہیں کہتے جو اس افتراق اور انتشار کو ہوا دے رہی ہیں۔ظالم اور مظلوم فطرتی تقسیم ہے۔ جو بھی بالواسطہ یا بلاواسطہ طور پر ظلم کا ساتھ دے گاوہ امن کا دشمن اور قرآن کا مخالف ہے۔آج اگر ہم چاہتے ہیں کہ عالمی امن‘ اور علاقائی امن اور ہمارے ملک میںاور خطے میں امن ہو تو دنیا کو اور خاص طور پر مسلمانوں کو ایک بار پھر سے قرآن کے پیغام امن کو اپنا نصب العین بنانا ہوگا اور قرآن عالمی امن قائم کرنا چاہتا ہے‘ عالمی ظلم مٹا کر کیوں کہ ظلم اور امن ساتھ ساتھ نہیں چل سکتے!

ماہ صیام میں روزہ داروں کیلئے آسانیاں پیدا کی جانی چاہیں۔لیکن پاکستان میں اسی ماہ مقدس کے اندر لوٹ مار کا وہ سلسلہ جاری ہوتا ہے کہ روزہ دار پناہ ڈھونڈتے پھرتے ہیں‘الحذر! الحذر!کی صدائیں بلند ہوتی ہیں۔لوگ سوچتے رہتے ہیں کہ اے بار الٰہی رحمتوں کے اس مہینے میں ہم سے قصور کیا ہوا کہ کھانے پینے اور پہننے اوڑھنے والی عمومی چیزیں بھی پہنچ سے دور ہوگئی ہیں۔ہلال رمضان نمودار ہوا تو مبارکبادیںدیں‘”رمضان شریف مبارک ہو“۔متوسط گھرانے نے بجٹ بنایا۔ اور تمام تر احتیاطیں ملحوظِ خاطر رکھتے ہوئے فیصلہ کیا کہ اب کی بار سحر و افطار کے اوقات میں ہرگز فضول خرچی نہیں کرنی۔ اہل خانہ سے طویل مشاورت کے بعد طے پایا کہ میٹھا شربت بند‘کولڈ ڈرنکس بند‘صرف لیموں والی نمکین شکنجوین استعمال کی جائے گی۔ لیکن لیموںزخموں پر چھڑکنے کو دستیاب نہیں‘ جو ہے وہ پچاس ساٹھ روپے پاﺅ ہے‘گرمی اور حبس کے بعد اگر صرف نمکین اشکنجوین سے روزہ افطار کیا جائے تو کم از کم ساٹھ روپے کے لیموں چاہیں۔کھجور‘گوکہ اب عیاشی کے زمرے میں آتی ہے لیکن سنت رسول صلی اللہ علیہ وسلم جان کر خریدنے کا ارادہ کرلیں۔گٹھلی نما کھجور جس پر ”گودا“غریب کے جسم پر کھال کی مانند کسا ہوا ہوتا ہے وہ بھی دو سو روپے کلو ہے۔ پکوڑے پانی میں تو تلے نہیں جاتے اس کے لئے بہرحال کوئی روغن نما سیال درکار ہوتا ہے۔جس ملک میں ڈیزل سو روپے کلو ہو وہاں گھی کا تصور کر لیں۔ ایک عزیز جو ہر سال افطاری کا اہتمام کیا کرتا تھا اب کی بار اس نے سموسے بھجوا دیئے اور ساتھ کہلوا بھیجا کہ زحمت فرما کر تل خود لینا کہ گھر میں گھی ہے نہ گیس ‘ لیکن ثواب کمانے کی غرض سے اتنا ہی کر پایا ہوں۔آنکھیں ڈبڈبا گئیں کہ الٰہی ملک پاکستان میں اس قدر لاچاری۔!ایک برطانوی ادارے نے تحقیق کی ہے کہ پاکستان میں چالیس فیصد لوگ ایسے ہیں جن کو پوری خوراک میسر نہیں۔ ان میں سے تیس فیصد وہ ہیں جن کو کم خوراکی کے باعث مختلف بیماریاں لگ چکی ہیں اور ان میں پندرہ فیصد وہ ہیں جن کو اگر اب پوری خوراک مل بھی جائے تو ان کے پچکے ہوئے گال ‘سوکھی ہوئی ہڈیاں اور پھولے ہوئے پیٹ ٹھیک نہیں ہوسکتے۔ایک زرعی ملک میں خوراک تک نارسائی کا یہ عالم کسی اور ملک میں دکھائی نہیں دیتا۔ قحط ہے نہ زمینیں بنجر ہوئی ہیں۔ بارشیں ہوتی ہیں‘ فصلیں بوئی جاتی ہیںاناج اور غلہ وافر مقدار میں پیدا ہوتا ہے۔پھر بھی اس ملک کے آٹھ کروڑ لوگ پوری خوراک کو ترستے ہیں۔اسے بے برکتی کہتے ہیں۔حکمرانوںکی نیتیں جب ٹھیک نہ رہیں تو پھر بے برکتی پھیلتی ہے۔گودام بھرے ہیں لیکن پیٹ خالی ہیں۔ رمضان المبارک میں بدنیتیاں ننگا ناچ ناچتی ہیں اور افلاس قہقے لگاتا ہے۔غریب سہم جاتے ہیں ۔ایسی فضاءمیں آنکھ ٹی وی پر امراءکے سجے دستر خوانوں کو دیکھتی ہے اور حسد پیدا ہوتا ہے‘آنکھ کا روزہ ٹوٹ جاتا ہے۔کان دولت مندوں کے منصوبے سنتے ہیںاور طبعیت میں نفرت پیدا ہوتی ہے۔سماعت کا روزہ بکھر جاتا ہے۔ زبان قابو میں کب رہتی ہے۔جھوٹی عزت کی خاطر نئے کپڑے مانگتے بچوں کو ٹالنے کے لئے جھوٹ پر جھوٹ بولنا پڑتا ہے‘دل ہی دل میں اس نظام‘اس سماج کو گالیاں دینا پڑتی ہیں‘حکمرانوں کے لئے زبان بددعائیں کرتی ہے۔زبان کا روزہ ٹوٹ جاتا ہے۔ ایسے میں غریب کیا دعا کریں؟یہی کہ یا اللہ روضے واپس لے لے ‘تقویٰ کے تقاضے نبھائے نہیں جارہے۔جہاں رحمت بھی زحمت بن جائے وہاں نیکیوں کا تصور بھی بھیانک ہوجاتا ہے۔ عالم اسلام کے وہ ممالک خوش قسمت ہیں جہاں امراءسحر وافطار کے وقت بہترین خوراک کی طشتریاں بھرے لوگوں کو کھینچ کھینچ کر اپنی طرف بلاتے ہیں اور خود کھانا کھلاتے ہیں۔ پاکستان ساتویں ایٹمی طاقت ہے ‘ لیکن مہنگائی نے لوگوں کی خرید کی طاقت چھین لی ہے۔حکومت بھی سفاک‘ حکومتوں کے حاشیہ بردار بھی سفاک۔ ایسی مہنگائی کو ایمان شکن مہنگائی ہی کہیں گے!!

رجوع کرلینے پر کتنا خرچہ آتا ہے؟ زندگی تو گزر رہی ہے۔اس کے تمام لوازمات بھی کسی نہ کسی طور پر پورے ہورہے ہیں۔آخر انسان کو کبھی رک کر تھوڑی دیر ٹھہر کر اپنی منزل کا تعین کر لینا چاہیے۔اپنے سفر اور زادہ راہ کا جائزہ لے لینا چاہیے۔اگر کسی معاشرے کے افراد سدھر جائیں تو معاشرے کو سدھرنے سے کون روک سکتا ہے۔غریب آدمی سے اعلیٰ انسانی اخلاقیات کا تقاضا عبث ہے۔اسے تو شائد مجبوری ہو جھوٹ بولنے کی‘کام چوری کی۔ غیبت‘حسد اور بدکلامی ان لوگوں کامسئلہ ہی نہیں جنہیں پیٹ کا دوزخ بھرنے کے لئے اسی دنیاوی جہنم سے ایندھن اکٹھا کرنا ہے۔میں اور آپ جنہیں قدرت نے خطہ غربت کے قریب جانے سے روک رکھا ہے حالانکہ بہت سے ”متوسطین“ غریب ہونے کے مستحق ہیں۔اللہ نے ہمیں رذیل ہونے سے بچا رکھا ہے۔ورنہ جس ملک کے اندر دولت کی تقسیم انسانیت کی توہین بر مبنی فارمولے پر ہوتی ہو وہاں سفید پوشی کے چونچلے زیادہ دیرپا نہیں ہوا کرتے۔ ہم تو اعلیٰ اخلاقیات ‘انسانی اوصاف اور اسلامی اطوار بہ آسانی اپنا سکتے ہیں۔دنیا بھر کے ماہرین سماجیات اس بات پر متفق ہیں کہ مذہب‘ معاشرہ اور ریاست کے ارتقاءکا دارومدار مڈل کلاس طبقہ پر ہوتا ہے۔ پاکستان کے مڈل کلاسیوں کو اپنی اس پہچان سے دور بھاگنے کی بجائے اس کو اپنا فخر بنانا چاہیے۔ اُمراءجو معاشرے کا صرف اشاریہ ایک فیصد بھی نہیں ہیں انہیں اخلاقیات سے کوئی غرض وغائت نہیں ہوتی ۔ پاکستان کے بیس فیصدمتوسط طبقے کو ہی معاشرتی اقدار کا تحفظ کرنا ہے۔عمومی ہمہ ہمی میں اخلاقیات فرائض اور حقوق کا تصور ذہن کے بند دریچوں کے پیچھے دبکا رہنا ہے۔لیکن ماہ صیام ایک ایسا بابرکت مہینہ ہے کہ اگر کوئی شخص صرف نیت باندھ لے تو پھر اس ماہ مقدس میں پیدا ہونے والے ماحول کے سبب اعلیٰ اخلاقی اور انسانی قدروں کے احیاءکے لئے بہت آسانیاں پیدا ہوجاتی ہیں۔ منافع خور‘ذخیرہ اندوز اور ملاوٹیے روزہ داروں کے جذبہ عبادت کا خوب استحصال کرتے ہیں۔لیکن کیا ہم‘ہم پر اس لئے زور ہے کہ مذکورہ بالا گروہوں میں سے کسی نہ کسی کا بالواسطہ یا بلا واسطہ تعلق ہمارے ساتھ بھی جڑا ہوا ہے۔ اس لئے کہہ رہا ہوں کہ اگر ہم اس ماہ مقدس میں یہ فیصلہ کر لیں کہ ان ذخیرہ اندوزوں ‘گراں فروشوں اور ملاوٹیوں کو ان کے عمل بد سے روکنا ہے اور ان کو احسن انداز میں سچی بات سمجھانی ہے تو روزے کا ایک مقصد ”جھوٹ سے اجتناب“ پورا ہوجائے گا۔خود جھوٹ نہ بولنا ایک انتہائی صالح عمل ہے لیکن معاشرتی فلاح کا تقاضا ہے کہ ہم ان تمام گروہوں کو جھوٹ بولنے سے روکیں جن کے جھوٹ سے دیگر انسانوں کی معاشی‘معاشرتی اور سماجی حالت متاثر ہوتی ہے ۔اگر متوسط طبقے کا روزہ دار اپنی افطاری پر روزانہ ایک سو روپے خرچ کرتا ہے تو وہ اس روپے میں سے صرف پچیس روپے بچا کر کسی غریب آدمی کو اپنے ساتھ افطار میں شامل کرلے یا پورے مہینے کا حساب لگا کر اپنے ہمسائے میں کسی ضرورت مند کو رقم دے دے۔ اگر ہم بیس فیصد متوسطین (امیر اور غریب کے درمیان سماجی پل کا کردار ادا کرنے والے شہری)ایسے ایثار کا مظاہرہ کریں تو یقینا اُمراءکو بھی کچھ احساس ہوگا۔اور اس طرح کم از کم رمضان کے مہینے میں پاکستان کا کوئی ایسا شہری نہیں ہوگا جو محض غربت کی وجہ سے ہمارے جیسا کھانا نہ کھا سکے۔ اس طرح یہ مہینہ صرف خوشحال لوگوں کے لئے ہی نہیں غریب غرباءکے لئے بھی رحمتوں کا مہینہ ہی ثابت ہوگا۔کاروباری لوگوں کی کثیر تعداد عمرہ ادا کرنے جائے گی۔لاکھوں پاکستانی آخری عشرہ کعبة اللہ اور روضئہ رسول کے سائے تلے گزارتے ہیں۔بہت رقم درکار ہوتی ہے۔ اگر ہم میں سے وہ لوگ جنہوں نے گزشتہ برس عمرہ کر لیا ہے وہ یہ عہد کریں کہ اس بار عمرہ کا خرچہ بچا کر کسی ضرورت مند کو دینا ہے تاکہ اس کی بیٹی کا جہیز بن جائے یا اس کے بچے کی فیس جمع ہوجائے یا اس کے گھر آئندہ چھ ماہ کا راشن ہو‘یا ایسا کوئی ادارہ مضبوط ہو جو لوگوں کے لئے روزگار کا بندوبست کرے تو میرے قلیل دینی اور قرآنی علم کی رو سے ایسے متمول شخص سے اللہ اور اس کے رسول یقینی طور پر راضی ہوجائیں گے۔ ہمارے ٹی وی اینکرز بھی روزہ دار ہوتے ہیں۔ ان سے گزارش ہے کہ وہ کم از کم اس ماہ میں جھوٹ بولیں نہ بولنے دیں۔جائز کو جائز کہیں چاہے وہ جائز کسی سیاسی پارٹی سے منسلک ہو۔رمضان کے مہینے میں معاشرتی فلاح اور نجات کا عہد کرنا چاہیے۔ ہم سے ہر فرد کو اپنے حصے کے فلاحی مشن پر نکل کھڑا ہونا چاہیے۔ ہر طرف سے صدائے حیی علی الفلاح آرہی ہے۔!!

لوڈشیڈنگ کی طوالت بڑھتی جارہی ہے۔ بل ہےں بجلی نہیں اور جب بجلی کی بجائے بلبلا دینے والے بل موصول ہوتے ہیں تو بغاوت کرنے کو دل مجبور ہوجاتے ہیں۔ پھر ”لیسکو“ ہو یا ”آئیسکو“ مضبوط گیٹ بھی ٹوٹ گرتے ہیں‘ پولیس بے بس ہوجاتی ہے اور غضبناک نفرتوں کے سامنے کوئی دلیل ٹھہر نہیں پاتی۔

آبادی کی رفتار تیز تر ہے۔ بجلی کی پیداوار کے جو منصوبے چھ کروڑ صارفین کو سامنے رکھ کر بنائے گئے تھے وہ اٹھارہ کروڑ لوگوںکی ضروریات کیسے پوری کرسکتے ہیں؟ حکمرانوںنے سنجیدگی سے اس مسئلہ کی طرف توجہ ہی نہیں کی۔ جن مقتدر طبقات نے توانائی کے بحران پر قابو پانے کی پلاننگ کرنا تھی ان کے ہاں بجلی جاتی ہی نہیں۔ ان کے ایئرکنڈیشنڈ چلتے رہتے ہیں۔دیوہیکل جنریٹر چوبیس گھنٹے سٹینڈ بائی پوزیشن میں موجود ہیں۔ ادھر واپڈا والوں نے سوئچ آف کیا ادھر ڈیزل اور پٹرول پھونکنے والے جنریٹر بجلی اگلنا شروع کردیتے ہیں۔ بڑے لوگ صرف اتنا پوچھتے ہیں”جنریٹر سے ہے یا واپڈا سے؟ اور بس! یہ ہے ان کی کل پریشانی۔ باقی پریشانیاں صرف عوام اورفیکٹری مزدوروں کے حصے میں آتی ہیں۔ملک پہلے ہی قرضوں پر چل رہا ہے۔ صنعت وحرفت کا پہیہ چلے نہ چلے‘حکمرانوں کا پہیہ رکتا ہی نہیں!

تمام رکاوٹوں اور حوصلہ شکنیوں کے باوجود بعض ادارے اور افراد اپنے طور پر قومی خدمت کے منصوبوں کو کامیاب کر گزرتے ہیں۔پاکستان میں حکومتیں ناکام اور انفرادی طور پر کام کرنے والے پاکستانی اور ان کے ماتحت چلنے والے ادارے بڑے بڑے کارہائے نمایاں انجام دے رہے ہیں۔ یہ الگ بات کہ ذرائع ابلاغ کو ایسے تعمیری کاموں کی تشہیر کرنے کی فرصت ہی نہیں۔ یہ اصحاب یقین خود بھی پبلسٹی کی بیماری سے کوسوں دور ہیں اور بڑی خاموشی کے ساتھ کام میں مگن رہتے ہیں۔

فوجی فرٹیلائزر کمپنی یعنی ایف ایف سی اور توانائی کے متبادل ذرائع کی ترقی کیلئے کام کرنے والا بورڈ یعنی اے ای ڈی بی دو ایسے ادارے ہیں جن میں سے اوّل الذکر پرائیویٹ سیکٹر کا انتہائی معتبر نام ہے۔ موخرّالذکرسرکاری ادارہ ہے لیکن سرکاری کلچر سے ہٹ کر عمل اور نتیجہ پر یقین رکھنے والے کارکنوں کا مرکز ہے۔ ایف ایف سی کے بارے میں قارئین کو شائد علم نہ ہو کہ یہ ادارہ ہر سال قومی خزانے میں اربوں روپے کا ٹیکس جمع کراتا ہے ۔سمگلنگ کو روکنا تو حکومت کا کام ہے لیکن یہ ایف ایف سی ہی ہے جو ہمارے کھیت کھلیانوں کی ہریالی کو برقرار رکھتی ہے اور تمام دباﺅ برداشت کرتے ہوئے کھاد کی ضروریات پورا کرتی ہے۔ میرے دوست کالم نگار بیگ راج کہتے ہیں جب پاکستان کے ناکام صنعتی اداروں کے حالات پڑھ کر مایوس ہونے لگیں تو ایک بار ایف ایف سی کی سالانہ رپورٹ ضرور پڑھ لیا کریں یا ان کے کسی یونٹ کا دورہ کر لیا کریںانشاءاللہ پاکستان کے بارے میں پائی جانے والی مایوسی بڑی حد تک کم ہوجائے گی۔

ایف ایف سی اور اے ای ڈی بی نے باہمی اشتراک سے ناممکن کو ممکن کر دکھایا ہے۔پاکستان میںہوا سے بجلی پیدا کرنا انتہائی آسان کام ہے۔چاروں صوبوں میں ایسے ”ونڈ کوریڈوز“ہیں جہاںونڈٹربائین لگائے جائیں تو کامیابی کا تناسب سو فیصد ہوگا۔پاکستان میں سرمایہ کاری کے حالات سازگار ہیں لیکن اپنوں اور بیگانوں کا پروپیگنڈا غیر ملکی سرمایہ کاروں کو یہاں کا رخ کرنے نہیں دیتا جبکہ ہمارے سرکاری ادارے ہر وقت اس کوشش اور کھوج میں لگے رہتے ہیں کہ کسی نہ کسی طرح توانائی کے منصوبے غیر ملکی سرمایہ کاری یا قرضوں کے ذریعے ہی چلائے جائیں کہ ایسی سرمایہ کاری میں ”کک بیکس“ کے امکانات بڑھ جاتے ہیں۔ونڈ پاور پراجیکٹس متبادل توانائی کاآسان ذریعہ ہے لیکن خود حکومت بھی ایسے کسی منصوبے میں سرمایہ کاری نہیں کرپائی۔ متبادل انرجی بورڈ کے حکام خاموشی کے ساتھ کام کرتے رہے ۔انہوں نے آج سے چار سال قبل ایف ایف سی کو آمادہ کر لیا کہ وہ قومی نوعیت کے اس پروگرام میں پہل کریں۔بورڈ اس تمام عرصہ میں تنقید کے نشتر سہتا رہا۔ لیکن عارف علاﺅ الدین اور ان کی ٹیم نے اعصاب شکن ماحول میں بھی ہمت نہیں ہاری۔ آخر کار سرمایہ کاری کے تمام مراحل طے ہوئے اور ایف ایف سی نے ونڈ پراجیکٹ کے تمام تقاضے پورے کردیئے‘اے ای ڈی بی نے اس پراجیکٹ کے لئے گارنٹی فراہم کردی اور یوں 22جون کو ایک سو چھتیس ملین ڈالر کے اس منصوبے پر عملدرآمد کے معاہدے پر دستخط ہوگئے۔ اب یقین سے کہا جاسکتا ہے کہ تقریباً ایک سال بعد صوبہ سندھ کے ضلع ٹھٹھہ میںجھمپیر کے مقام پر ہوا کے ذریعے بجلی کی پیداوار شروع ہوجائے گی۔

جناب سید نوید قمر کی وزارت نے دیر نہیں لگائی۔جوں ہی انہیں اطلاع ملی کہ ایف ایف سی نے تمام شرائط پوری کردی ہیں ‘سید نوید قمر تمام مصروفیات چھوڑ کر متبادل توانائی کے ہیڈ آفس گئے اور دستخطوں کی تقریب میں شریک ہوئے۔ نوید قمر کیلئے یہ منصوبہ کسی نوید سے کم نہیں۔انہیں امید ہے کہ ایف ایف سی کے آنے کے بعد اب پاکستان کا پرائیویٹ سیکٹر آگے بڑھے گا اور کم از کم ایک ہزار میگا واٹ کے ونڈ پاور کے دیگر پراجیکٹ کے لئے بھی پرائیویٹ سیکٹر ہی سرمایہ فراہم کرد ے گا۔

نیپرا‘ نارڈیکس اور ڈیسکان سب مبارک باد کے مستحق ہیں اور سب سے بڑی مبارک ایف ایف سی کے ایم ڈی جناب جنرل (ر) عارف حیات صاحب کیلئے کہ انہوں نے قومی مفاد میں سرمایہ کاری کا فیصلہ کرکے اعتماد سازی کی فضاءکو بحال کردیا ہے۔ اب ہوا سے بجلی پیدا ہوگی اور بجلی سے ہوا۔ پنکھے چلیں گے اور ٹھٹھہ اور اردگرد کے لوگ موسم گرما کی حدّت کومات دے سکیں گے۔

دنیا پر غالب سرمایہ دارانہ نظام نے متوسط طبقہ کو نچوڑ کر رکھ دیاہے۔ روٹی‘ کپڑا اور مکان کی عدم دستیابی نے پہلی دنیا سمیت ساڑھے چھ ارب انسانوں کو بے چین کررکھا ہے۔ بنیادی ضرورتوں سے محروم لوگ یورپ کے ہوں ‘ امریکی ریاستوں میں بستے ہوں‘

افریقی ہوں‘ ایشیائی ہوں یا مشرق بعید میں مشقت کرتے ہوں اس دن کے منتظر ہیں جب دولت چند ہاتھوں سے نکل کر عوام الناس کی رگوں میںخون بن کر دوڑے گی اور ورکنگ کلاس کو ان کی کارکردگی اور صلاحیت کے مطابق معاوضے ملنا شروع ہوں گے۔ انسانی خوشحالی کی منزل اسی عہد میںحاصل ہوگی جس دور میں ارتکاز دولت کا شیطانی کھیل ختم ہوگا ورنہ امیر ملکوں کے اجلاسوں کے دوران ہزاروں اور لاکھوں لوگ مظاہرے کرتے رہیں گے جلاﺅ گھیراﺅ ہوتا رہے گا اور متوسط طبقہ خط غربت پر پہنچ کر کسی بڑے عالمی خونی انقلاب کا ایندھن بن جائے گا۔

پاکستان کی بڑی سیاسی جماعتوں میں پاکستان پیپلزپارٹی غریبوں کے نام پروجود میں آئی تھی۔آج کی پی پی پی میں غریبوں کی نمائندگی صرف گلی محلہ تک محدود ہوگئی ہے۔ ان کا کام صرف قطاروں میں لگ کر ذوالفقار علی بھٹو شہید اور محترمہ بے نظیر بھٹو شہید کے نام پر ووٹ ڈالنا رہ گیا ہے۔ پی پی پی کی حکومت بن گئی لیکن غریب اور متوسط طبقہ کی بڑے ایوانوںمیں موجودگی ایک خواب بن گیا۔ کراچی سے خیبر تک اور خضدار سے گلگت تک جتنے منتخب نمائندے وزراءاور مشیر منظر پر چھائے ہوئے ہیں ان میں نام کی حد تک بھی متوسط گروہ کی کوئی حیثیت نہیں ہے۔پارٹی قیادت سے لے کر حکومتی قیادت تک سب کے سب لوگ چند گھرانوں اور چند گروہوں کے لوگ ہیں۔یہی وجہ ہے کہ بے نظیر انکم سپورٹ پروگرام کے تحت اربوں روپے تقسیم کئے جانے کے باوجود غربت کی شرح میں روز بروز اضافہ ہورہا ہے اور معاشرے کی جان مڈل کلاس بے آس ہو کر رہ گئی ہے۔

پاکستان مسلم لیگ (ن)خودکو دوسری بڑی سیاسی جماعت تصور کرتی ہے لیکن پارٹی کی حالیہ تنظیم نو میں متوسط طبقے کے کسی شخص کوکوئی نمایاں پوزیشن نہیں دی گئی۔ ایک خاندان اور اس خاندان کے متموّل وفادار لوگوں کو ہی آگے لایا گیا ہے۔پنجاب میں اکثریت ان عہدیداروں کی ہے جو معروف معنوں میں شائد جاگیردار اور وڈیرے نہ ہوں لیکن دولت مندی اور سیاسی سوچ کے اعتبار سے ان کا شمار بحر صورت طبقہ اشرافیہ میںہی ہوتا ہے۔ حد یہ ہے کہ پنجاب مسلم لیگ (ن) کی باگ دوڑ جناب شہبازشریف کے سپرد کرکے انہیں چیف آرگنائزر مقررکر دیا گیا ہے۔ پوری سیاست ایک فیملی افیئر بن کر رہ گیا ہے ۔متوسط طبقہ اپنی استعداد اور تعداد کے حوالے سے روز بروز کم ہورہا ہے۔وہ لوگ جو اپنی سفید پوشی اور نیک سیرتی کے سبب اپنی ایک ساکھ اور پہچان رکھتے ہیں‘غربت کی اتھاہ گہرائیوںمیں گم ہورہے ہیں۔ معاشرتی توازن اور قومی ترقی کا ضامن یہ سفید پوش طبقہ معاشی مجبوریوں اور سیاسی محرومیوں کے سبب حکومتی اور ریاستی امور سے لاتعلق ہوتا جارہاہے۔

جہاں تک مذہبی سیاسی جماعتوں کا تعلق ہے۔ان کے نزدیک شائد انسانوں کا معاشی اور سماجی مسئلہ کوئی مسئلہ ہی نہیں ہوتا۔ ان کی سیاست کا محور چند غیر انسانی قسم کے اشوز ہوتے ہیں اور وہ جذباتی نعروں اور استحصالی نظریوں کی بنیاد پر تحریکیں اٹھاتے‘حکومتیں گراتے اور لوگوںکو ہیپناٹائز رکھتے ہیں۔اسلام اور قرآن کے حقیقی تقاضوں اور بشریت کے لئے خدا کی طرف سے جاری ہونے والے احکامات کی طرف رجوع ہی نہیں کرتے۔ عوام الناس کو صرف” گو امریکہ گو“ اور ”آ امریکہ آ“ کے گورکھ دھندے میں الجھائے رکھتے ہیں۔ انسان کی بنیادی ضرورتیں‘ معاشی اور تہذیبی ارتقاءکے مطالبے ان کے نزدیک غیر شرعی قرار پاتے ہیں۔ ان کے اسلام اور شریعت کی جھلک اہل سوات نے سزا کے طور پر بھگتی ہے۔حیرت انگریز المیہ یہ کہ ان جماعتوں کے سرگرم کارکنوں کا کثیر حصہ مڈل کلاسیوں پر ہی مشتمل ہوتا ہے۔ خدا جانے کب یہ جماعتیں اسلام کے معاشی نظام کی طرف توجہ دیں گے!

متحدہ قومی موومنٹ گزشتہ تیس برس سے متوسط طبقہ کی سیاست کر رہی ہے۔ اس سیاسی جماعت کی پہلی دہائی تشدد کا شکار رہی ہے لیکن گزشتہ بیس برس سے انہوں نے اقتدار کے ایوانوں میں قدم رکھا ہے۔ اسے حسن اتفاق کہیے یا پاکستان کی خوش قسمتی کہ متحدہ کا کارکن اور قائد دونوں کا تعلق غریب اور متوسط طبقہ سے ہے۔ متحدہ کے سیاسی انداز سے اختلاف کیا جاسکتا ہے لیکن اس کے سیاسی نظریے سے اس لئے اختلاف ممکن نہیں کہ انہوں نے ایوان ہائے اقتدار میں جن لوگوں کو نمائندگی کا حق دیاہے وہ وزارتیں اور مشاورتیں نبھانے کے باوجود وڈیرے اور جاگیردار نہ بن سکے۔آج بھی صوبہ سندھ کے اکثر حق پرست ایم پی اےز بسوں پر سفر کرتے اور ان کی میٹنگز کا مینیو چائے سموسے تک ہی محدود رہتا ہے۔

متحدہ نے اپنے سیاسی مزاج میں جاگیردارانہ اور سرمایہ دارانہ سوچ کو ابھی تک گھسنے نہیں دیا اور آج ان کی ہر لیول کی سیاسی قیادتیں کسی ایک خاندان یا کسی ایک علاقے یا گروہ تک محدود نہیں ہیں۔پارٹی اور عوامی خدمت کے لئے جو جس قدر متحرک ہے اسی قدر اس کی سیاسی حیثیت بھی تسلیم ہوتی ہے۔

کیا متحدہ اپنے اس سیاسی فلسفہ کو ملک بھر کے سفید پوش طبقوں کو متحرک کرنے کے لئے کار آمد بناسکے گی؟ کیا اس ملک کے مڈل کلاسیئے کبھی متحد ہوسکیں گے۔؟