Click here to View Printed Statement

بھارت میں عورت ذات پر حملوں کی خبریں سُن سُن کر کان پک گئے تھے۔ہرصاحب دل اور ضمیر جب عصمت دری کی خبریں سنتا ہے تو خون کے آنسو روتا ہے۔ آدمیت جہاں ہے وہ شیطانیت کیخلاف آواز بلند کرتی ہے۔ حیوانوں کے غول کسی حوا زادی کی عصمت کی چادر بمبئی میں تار تار کریں یا کسی معصوم دوشیزہ پر انگلینڈ میں حملہ ہوجائے خون کھولتا اور دل مجرموں کو سرعام پھانسی لگتے دیکھنا چاہتا ہے۔اسلام نے تو درندوں کے معاشرے میں عورت کو تقدس کی چادر اوڑھانے کا انقلابی کارنامہ سرانجام دیا اور آج جب کہ ایمان کا درجہ قرون اولیٰ والا نہیں پھر بھی عورت کیخلاف ہر جرم اور زیادتی کو بحیثیت مجموعی مسلمان نفرت اور حقارت سے دیکھتے ہےں۔

مسلمان معاشروں میں سوائے چند مادرپدر آزاد خواتین اور ان کے دم قدم سے دندناتی ہوئی این جی اوز عورت کو حجاب‘شرم اور تقدس سے محروم کرنا چاہتی ہیں لیکن پوری امت اس بات پر متفق ہے کہ عورت ماں ‘ بہن‘ بیٹی‘بہو اور بیوی کے روپ میں مردوں کی نسبت کہیں زیادہ بارعب‘بااختیار اور قابل احترام ہستی ہے۔ ان مقدس رشتوں کو کوئی شیطان یا انسان کے روپ میں چھپا حیوان اگر روندنا چاہے تو اسلام نے ایسے ناسوروں کیلئے دنیا میں سخت ترین سزائیں رکھی ہیں اور قیامت میں ان کے لئے دہکتی ہوئی آگ ہے۔ہم مطمئن تھے کہ کم از کم پاکستان میںسوائے اکا دُکا واقعات کے معاشرہ عورت کے احترام کا غماض ہے۔بھارت میں چونکہ ریاست اور مذہب دونوں اس معاملے میں بہت کاہل ہیں اس لئے وہاں پے در پے ایسے واقعات کی سمجھ آسکتی ہے لیکن پاکستان میں اس طرح کے خوفناک اور مہیب مناظر سمجھ سے بالاتر ہیں۔ایک ایسا ملک جس میں ہر وقت اللہ‘ رسول کا نام لیا جاتا ہو‘ہر وقت قرآن کی تلاوت ہورہی ہوتی ہے اور عورت کے حقوق پر عمدہ قوانین موجود ہیں وہاں درندگی اور شیطنیت کا کھیل کیوں کر جاری ہے۔ننھی بچی کی چیخیںپاکستانیوں کے دل و دماغ میں آج بھی کچوکے لگا رہی ہیں ۔تصور کرکے ہی دماغ پھٹنے لگتا ہے۔ہر صاحب اولاد سمجھتا ہے جیسے اس کی وہ اپنی بیٹی ہے۔اسلام جہاں ایسے قبیح جرائم میں ملوث درندوں کو شدید ترین سزاﺅں کا حکم دیتا ہے وہاں وہ جرائم کی تشہیر کو بھی روکتا ہے۔ لیکن جب سے پاکستانی معاشرہ آزاد میڈیا کے ہاتھوں یرغمال بنا ہے ‘ دہرے عذاب نے گھیر لیا ہے۔ ہمارے ٹی وی چینلز نے اس پانچ سالہ معصومہ کو بھی نہیں بخشا۔ اس کے بدنصیب والدین کی تصویریں ‘اس نیم بے ہوش بچی کی تصویریں ‘ اس واقعہ کو جس طرح نمک مرچ لگا کر ‘ اس کی جزئیات کو ہماری آنکھوں میں اتارا ہے اسی سے یوں لگتا ہے کہ ہمارا اجتماعی شعور ہی گمراہ ہوگیا ہے۔ننھی مجروحہ سب کی بچی ہے۔اخبارات نے اپنی سرکولیشن بڑھانے کے لئے نہ صرف یہ کہ فرنٹ پیج پر اس غریب کی تصاویر شائع کیں بلکہ اسی سے ملتے جلتے حادثات کو ڈھونڈ ڈھونڈ کر نمایاں کیا۔ یہ کیسی لذت صحافت ہے جو شیطانوں کو گلیمرائز کرتی ہے۔یہ ٹی وی کیمرے‘یہ فوٹوگرافر‘یہ کرائم رپورٹرز کیا انہوں نے خدا کو جان نہیں دینی۔اگر ان کی سٹوری نہیں اٹھے گی تو کیا ہوگا‘یہ دنیا سے تو نہیں اٹھائے جارہے۔اللہ نہ کرے کل اپنی کوئی عزیزہ کسی شیطان کے ہتھے چڑھ جائے‘یا کوئی بدنصیب رشتہ دارعورت کسی دھندے میں پکڑی جائے تو کیا یہ سب کچھ ہوگا جو ایک غیرت مند خاندان کے ساتھ کیا گیا ہے۔وہ بچی جوان ہوگی تو اس کے پاس سوائے خودکشی کے کون سا راستہ چھوڑا گیا ہے۔خاکم بدہن! لمحہ بہ لمحہ رپورٹنگ نے مجرموںکو پولیس اور قانون نافذ کرنے والے اداروں کے ہر اقدام اور موومنٹ سے آگاہ رکھا۔ وہ یقیناً ٹی وی دیکھ کر اپنی پوزیشنیں تبدیل کرتے رہے ہوں گے۔عام ناظرین یہ سوچنے پر مجبور ہیں کہ آج کا ہمارا آزاد میڈیا مجرموں کے ساتھ ہے یا مظلوموں کاساتھی۔ ہر جرم ٹی وی سکرین پر دکھایا نہیں جاسکتا۔ امریکہ یورپ اور مبینہ مہذب ممالک میں ایسے جرائم کو اندر کے صفحات پر لے جاتے ہیں اور ایسی خبریں بچوں کے سونے کے بعدنشر کی جاتی ہیں۔لیکن یہاں تو بریکنگ نیوز کی دوڑ نے ہر اخلاقی حد پھلانگ دی ہے ۔سول سوسائٹی میں اگر کچھ بھی شرم ہے تو وہ اس منہ زور اور حیوانی قسم کے میڈیا کیخلاف صف آراءہوجائے ورنہ یہ ہر گھر میں گھس کر خوف اور دہشت پھیلا دے گا۔ لوگ اپنے بچوں سے اخبار چھپاتے پھرتے اور خبرناموں کے سوئچ تبدیل کرتے تھک گئے ہیں ۔کوئی ہے جو اس خوش رہنے والی قوم کو میڈیائی درندوں سے نجات دلائے۔اگر اپر دیر کی شہادتوں کی خبریں نہ آتیں تو ہم آج بھی اپنی بیٹی کے ساتھ ہونے والی درندگی کے مناظر دیکھ رہے ہوتے۔درندوں کو سزا ملنی چاہیے اور انہیں چیرپھاڑ کر رکھ دینا چاہیے۔ لیکن درندگی کے پروموٹرز کا بھی ہاتھ روکنا ضروری ہوگیا ہے۔اللہ پاک کا حکم ہے‘”نیکی اور پرہیز گاری کے کامو ں میں تعاون کرو اور برائی اور گناہ کے کاموں میں تعاون نہ کرو“

Click here to View Printed Statement

بڑے دِل گُردے کی بات ہے۔دہشتگردی نے کتنے گھر اُجاڑ دیئے۔کوئی مقام ایسا نہیں جہاں خون نہ بہایا گیا ہو۔خون بہانے والے کھل کر کھیلے اور آئندہ بھی شائد وہ غارت گری کی اسی راہ پر چلتے رہیں۔کوئی بھی ایسی سیاسی پارٹی نہیں جس کے جسد کو بموں اور گولیوں نے چھلنی نہ کیا ہو۔کوئی بڑی سیاسی شخصیت ایسی نہیں جسے بالواسطہ یا بلاواسطہ طور پر خوف میں مبتلا نہ کیاگیا ہو۔عام پاکستانی جلسے جلوس میں جانے سے پہلے کئی بار سوچتا رہا کہ وہ واپس آئے گا بھی یا نہیں۔انتخابات کی گہماگہمی اوربموں کی پوچھاڑ ساتھ ساتھ چلتی رہی۔بمبار ہارے نہ ہی عوام نے حوصلہ چھوڑا۔اتنے بڑے خطرات مُول لیکر اس انتخابی نظام میں لوگ آخر کیوں حصہ دار بنے۔

موت سامنے تھی پھر بھی جوشیلے نعرے’ پسینہ چھوڑتے ہاتھوں میں جھنڈے اور برتری حاصل کرنے کے لئے ڈنڈے لہراتے رہے۔جنون اور قارون سب کیوں جُتے رہے۔ماضی میں کسی بھی انتخاب میں ایسی شدید سیاسی تقسیم اور تھکا دینے والی سیاسی سرگرمیاں دیکھنے کو نہیں ملتیں۔یہ جانتے ہوئے بھی کہ جمہوریت نے سوائے مایوسیوں کے ہمیں کچھ نہیں دیا۔کرپشن’لوٹ مار اور خانہ جنگیاں۔یہ سب جمہوریت کا ہی تحفہ ہے۔ اس کے باوجود قوم نے مزید جمہوریت کو ہی اپنی منزل تصور کیا۔ ایسے حالات میں جبکہ ایک طرف شیخ الاسلام ڈاکٹر طاہر القادری نے ”کرپٹ نظام” سے لڑنا ہوگا۔ گیارہ مئی کو ”دھرنا ہوگا” کی پورے پاکستان میں وال چاکنگ کرائی۔ ایس ایم ایس اور فیس بُک کے ذریعے ووٹ نہ ڈالنے پر لوگوں کو آمادہ کیا۔دھرنے دیئے ‘لوگ پھر بھی ووٹ کی پرچی کو خوشحالی کا چیک سمجھ کر سنبھالتے رہے۔آخری نتیجہ جو بھی ہو ایک نتیجہ بہرحال برآمد ہوچُکا کہ پاکستانی عوام کی اکثریت جمہوریت کے علاوہ کسی اور نظام کی طرف راغب نہیں ہوسکی۔ طالبان کا ”امارت اسلامی” کا فلسفہ بھی پوری شدت کے ساتھ سامنے آیا اور آرہا ہے۔حزب التحریر کے لوگوں نے اپنے طور پر ”خلافت” کی طرف مراجعت پر بھرپور مہم چلائی اور چلا رکھی ہے۔لیکن ایک عام پاکستانی کو سمجھ نہیں آتی کہ پُرامن انتقال اقتدار کا دوسرا کونسا طریقہ ہوسکتاہے۔ہمیں قوم کی نفسیات کا تجزیہ کرتے وقت یہ بات بھی ذہن میں رکھنی چاہئے کہ اسلام کی طرف سے دیا جانے والا ”امرھم شوریٰ بینھم” کی تشریح بھی ووٹ یا رائے دیہی کے ذریعے ہی ممکن ہے۔ یہ صحیح ہے کہ پاکستان کے ستر فیصد نوجوان شرعی نظام کے حامی ہیں لیکن ان کے سامنے شرعی نظام کے نفاذ کا ذریعہ پارلیمان کے علاوہ کوئی نہیں۔حکمران چُننے کا اختیار ایک ایسا حق ہے جو صرف اور صرف ووٹ کے ذریعے ہی مل سکتا ہے۔ اور یہی حق لینے اور آزمانے کی خاطر پاکستانی قوم نے زخم برداشت کئے۔ لاشیں اٹھائیں ‘اغواء کی وارداتیں ہوئیں اور بالآخر پولنگ سٹیشنوں پر پہنچ گئے۔سچ یہ کہ لوگ خون کے دریا عبور کرکے پولنگ بُوتھ تک پہنچے۔جیتنے والی پارٹیوں کو حکومتیں بناتے وقت یہ ذہن میں رکھنا ہوگا کہ اگر اب کی بار بھی محض باری لینے کی نفسیات حاوی رہی اورعام آدمی کی زندگی میں کوئی مثبت تبدیلی نہ آسکی تو پھر غیر جمہوری فلسفے کو پروان چڑھنے سے دنیا کی کوئی طاقت روک نہ سکے گی۔اگر شیر اور بلے کا تکبرّکسی مضبوط اور مفید اتحاد کی راہ میں رکاوٹ بنا تو یہ قوم نہ شریف برادران کو معاف کرے گی اور نہ ہی اپنے قومی ہیرو سے مزید ہمدردی کرسکے گی۔دونوں پارٹیوں نے انتخابی مہم کے دوران تقریباً ایک جیسے پروگرام دیئے’ایک جیسے وعدے کئے۔(ن) لیگ کے پاس حکمرانی کا وسیع تجربہ ہے اور اس پارٹی نے واقعتا بڑے بڑے منصوبے مکمل کئے ہیں۔لیکن تحریک انصاف کے پاس ایک پُرجوش فورس ہے۔ اگر واقعتا یہ پارٹیاں نیا پاکستان بنانا چاہتی ہیں تو پھر ان کی آپس کی مخاصمت اس مُلک کو پھر سے اندھیروں میںدھکیل دے گی۔ یہ قوم بڑی حوصلہ مند ہے لیکن ذاتی مفادات کے تابع سیاسی قلابازیوں کو کبھی برداشت نہ کر پائے گی۔ووٹ اور اس نظام سے ہمیشہ کے لئے لاتعلق ہوجائے گی۔

Click here to View Printed Statement

وہ کس قدرمتکبر تھا’ خود اسے بھی اپنے تکبر کی حدود کا علم نہیں تھا۔اس کے منہ سے نکلا ہوا ہر لفظ قانون بن جاتا تھا۔ اس کے اشارہ ابرو سے مملکت میں ہلچل مچ جاتی تھی۔ وہ دن کے وقت طاقتور اور رات کے عالم میں انتہائی طاقتور ہوجاتا تھا۔سگار’کافی اور گلاس اس کا شوق تھے’ساغرومینا اس کے سامنے دست بستہ رہتے تھے۔ اس نے ریفرنڈم کرایا تو رجسٹرڈ ووٹوں سے بھی کہیں زیادہ ووٹ اس کے حق میں پڑتے تھے۔اس نے روشن خیالی کے نام پر ہر اچھے اور صالح خیال کا گلا گھونٹا۔

وہ کسی سے نہیں ڈرتا تھا۔ حتی کہ اسے کعبہ کی چھت پر چڑھنے سے بھی ڈرنہ لگا۔اسے سید زادہ ہونے کا دعویٰ تھا لیکن وہ لال مسجد میں محصور بچیوں پر دہکتے بارود کے گولے پھینکتا رہا لیکن اسے ڈر نہیں آیا۔ اس نے اپنے ہر مخالف کو تھرڈ ڈگری ٹریٹمنٹ کے ذریعے بے بس کرکے رکھ دیا تھا۔وہ اور اس کے ساتھ شامل جتھہ اس ملک کے سیاہ و سفید کا مالک بنا’ جی بھر کے لوٹتا رہا۔چیف جسٹس پر ہاتھ ڈالا’محسن پاکستان کو رسوا کیا۔ اس نے یہ ملک امریکیوں کے ہاتھوں گروی رکھا اور اپنے شب وروز جگماتا رہا۔12اکتوبر 1999ء کو اس نے پوری فوج کی طاقت کو اپنی ذات میںسمیٹا اور ایک منتخب وزیراعظم کو ہتھ کڑیاں لگاکر اٹک قلعہ میں مچھروں کے رحم و کرم پر چھوڑ دیا۔ وہ چالیں چلنے کا ماہر تھا اور بالآخر اپنی اسی مہارت کے ہاتھوں مات کھا کر قصر صدارت سے نکالا گیا۔ اس نے پوری قوم کا سودا کیا تھا اور اس کے بدلے اسے ڈھیروں ڈالر مل گئے تھے۔وہ بیرون ممالک عالمی وی آئی پی کے طور پر سفرکرتا اور امریکی دائرہ اثر میں آنے والے ممالک اس کو عظمت اور تکریم کے ساتھ اپنے ہاںمہمان بناتے رہے۔اس کی زندگی میں رونقیں اور رعنایاںجلوہ گر تھیں۔لیکن اسے کسی پل چین نہیں آرہا تھا۔اللہ تعالیٰ نے اس شاطر  شخص کے دل میں پھر سے مملکت اسلامیہ کا آمر مطلق بننے کی خواہش پیدا کردی۔ اس کو اس  کا ماضی ستانے لگا۔ وہ ایک بار پھر اقتدار کی مسند پر بیٹھنے کی آرزو لئے پاکستان آگیا۔ اور اٹھارہ کروڑ دکھے دلوں پر نمک پاشی کرنے لگا۔ اس نے ٹوئٹر اور فیس بک پر سراب آسارائے کو اپنی ہر دلعزیزی سمجھا اور دھوکے میں آگیا۔اس کا خیال تھا کہ وہ اسلام آباد ایئرپورٹ اترے گا تو عوام کا ٹھاٹھیں مارتا سمندر اس کے استقبال کے لئے نکل آئے گا۔یہ سچ کہ زرداری ٹولے نے عوام کی زندگیاں اجیرن کردی تھیں اور بہت سے لوگ موازنے کے طور پر مشرف کے دور حکومت کو شک کا فائدہ دے رہے تھے۔ لیکن پاکستانی قوم اس قدر بالغ النظر ہوچکی ہے کہ انہوں نے ہر برائی سے برآت کا اعلان  کر رکھا ہے۔انہوں نے مشرف کی ”ملک بچائو”مہم میں حصہ بننے کی بجائے اس قومی مجرم کو کیفرکردار تک پہنچانے کی آرزو جوان کی اور مشرف کو سیاسی طور پر تنہا کردیا۔وہ پارٹی کے ٹکٹ بانٹنا چاہتا تھا لیکن ٹکٹ لینے والا کوئی نہ تھا۔وہ جلسے کرنا چاہتا تھا لیکن موت کا خوف اسے باہر نکلنے نہ دیتا تھا۔ الیکشن ٹریبونل نے اسے نااہل قرار دے دیا اور سیاسی طور پر اس کا چیپٹر ہمیشہ کے لئے بندہوگیا۔پاکستان کی عدلیہ نے معجزے کر دکھائے۔ایک ایک جج افتخار چوہدری بن گیا اور پرویز مشرف کی ضمانت منسوخ کرتے وقت نہ کسی جج کے ماتھے پر پسینہ آیا نہ فیصلہ لکھتے وقت ہاتھ کپکپائے۔عبوری حکومت جو کہ اپنے اختیارات کے لحاظ سے انتہائی کمزور ہوتی ہے اس نے جب پاکستانی قوم کی اجتماعی سوچ کو بھانپ لیا تو وہ طاقتور ہوگئی اور عدلیہ کے فیصلوں پر عملدرآمد کا عہد کیا۔ابھی جنرل (ر) پرویز مشرف کے خلاف صرف ایک کیس کے حوالے سے کارروائی آگے بڑھی ہے۔مقدمات کی ایک طویل فہرست ہے اور جوں جوں وقت گزرے گا کارروائیاں بھی سخت تر ہوتی جائیں گی۔وہ شخص جو ”خدا” ہونے کا دعوے دار تھا آج اس کے طاقتور ترین مددگار بھی بے بس دکھائی دے رہے ہیں۔بلکہ ملک کے مقتدر حلقے قانون کی بالادستی کو تسلیم کرتے ہوئے دکھائی دے رہے ہیں۔کروڑوں روپے سے تعمیر شدہ فارم ہائوس اسی شہر میں موجود ہے لیکن اس کے مکین کو اس میںرہنا نصیب نہیں ۔ اس کی جائے پناہ پولیس لائینز ہے۔اور وہ بھی ایک ملزم بلکہ مجرم کی حیثیت سے ۔وہ سگار اب بھی پیتا ہوگا’شائد اسے ساغر و مینا بھی میسر ہوں لیکن اب اس کی راتوں کا سرور ہوا ہوچکا اسے رہ رہ کر اٹک قلعہ یاد آتا ہوگا۔ وہ خواب میں ڈر جاتا ہوگا۔ اس کا مستقبل قانون اور آئین کے باغی کی سزا سے جڑ گیا ہے۔اس نے اپنی تقدیر کو خود گلے لگا لیا ہے۔وہ کسی سے نہیں ڈرتا اور اس کا یہی تکبر اسے پاکستان کھینچ لایا ہے۔ جب سانپ کی موت آتی ہے تو وہ راستے پر آجاتا ہے۔اور راستے پر عدلیہ انصاف کا ترازوتھامے مجرموں کو سزا سنانے کے لئے مستعد کھڑی ہے!۔

Click here to View Printed Statement

ہم کاروبار اس لئے کرتے ہیں تاکہ منافع کما سکیں اور اپنی روزمرہ ضروریات کو پورا کرتے ہوئے بہتر سے بہتر معیار زندگی حاصل کرسکیں۔شائد ہی دنیا میں کوئی ایسا شخص ہو جوخسارے کے لئے کاروبار کرتا ہو۔اصل مسئلہ یہ نہیں کہ کاروبار سے منافع نہ کمایا جائے بلکہ منافع کا جذبہ ہی کاروبار یا تجارت کی کامیابی کا بنیادی سبب ہے۔ ایک حدیث مبارکہ ہے کہ اللہ تعالیٰ نے دولت کے دس حصوں میں سے نو حصے کاروبار یا تجارت میں رکھ دیئے ہیں۔ جو شخص کاروبار کرتا ہے وہ دراصل رب العالمین کی ربوبیت کے کارعظیم میں حصہ بھی ڈالتا ہے۔ارتکاز دولت کو ختم کرنے کا ذریعہ بھی کاروبار ہی ہے کہ اس عمل میں انسان اپنے لئے ہی نہیں بلکہ اپنے ساتھ چلنے والوں کے لئے بھی کماتا اور تگ و دو کرتا ہے۔

جائز اور ناجائز کاروبار کی تقسیم اس اصول پر قائم ہے کہ کیا منافع جائز حدود میں ہے اور کمائے گئے منافع میں سے اسلام کے طے کردہ اصولوں کے مطابق خرچ ہوا ہے یا نہیں۔ہر کاروباری آدمی بنیادی طور پر سرمایہ اور محنت کے مناسب امتزاج سے اشیاء کی پیداوار ممکن بناتا ہے۔بہترین سرمایہ کاری یہ ہے کہ سرمایہ ڈوبے نہ منافع کم ہو۔ پاکستان میں بہت سے ایسے زیرک کاروباری لوگ موجود ہیں جنہوں نے انتہائی کم سرمائے اور بے پناہ محنت کے بل بوتے پر ایسے پیداواری ادارے قائم کئے ہیں کہ وہ بہترین سرمایہ کاری کی ہر تعریف پر پورا اترتے ہیں۔پاکستان ویناسپتی مینوفیکچرایسوسی ایشن کے سابق چیئرمین ‘وحید گروپ آف کمپنیز کے مالک اور شفاف تجارت کے معتبر نام جناب شیخ عبدالوحید بھی ایسی ہی شخصیات میں شامل ہیں۔”پاکستان کی سب سے بڑی خدمت یہ ہے کہ بنکوں میں رقم رکھنے کی بجائے اسے گردش میں لایا جائے اور کاروباری ادارے اور پیداواری یونٹس لگائے جائیں تاکہ پاکستان کے مزدوروں’ کارکنوں اور ہنرمندوں کو روزگار ملے اور ملکی معیشت کا پہیہ پوری رفتار کے ساتھ گھومتا رہے۔ میرے لئے بھی بڑا آسان تھا کہ میں کوئی ملازمت وغیرہ کرتا اور اچھی تنخواہ لے کر اپنی اور فیملی کی ترقی تک محدود رہتا۔کاروبار کرنا کوئی آسان کام نہیں ہے اور پاکستان میں جہاںبجلی ہے نہ گیس’ قانون کے نام پر رشوت بٹورنے اور حوصلے توڑنے والوں کی تعداد ان گنت ہو’ایسے ملک میں کاروبار کرنے سے بھاگ جانا بہتر آپشن معلوم ہوتا ہے۔ ڈاکٹر صاحب میں نے ملک سے باہر کاروبار کرنے کی بجائے اسی سرزمین کو اپنا اوڑھنا بچھونا بنایا ہے اور خدا نے مجھے بہت ترقی دی۔”مجھے جناب شیخ عبدالوحید کے صادق جذبے کو دیکھ کر اور سن کر ایک خوشگوار حیرت ہوئی۔شیخ عبدالوحید تھوڑی دیر کے لئے رکے اور پھر کہنے لگے”’ڈاکٹر صاحب اگر اس ملک میں صرف ٹیکس اور پولیس کا نظام درست ہوجائے تو دیکھیں کس طرح لوگ سرمایہ کاری کی طرف پراعتماد طریقے سے بڑھتے ہیں۔کاروباری لوگوں کے بارے میں خواہ مخواہ کا ایک غلط تصور جڑ پکڑچکا ہے کہ لوگ ٹیکس نہیں دیتے۔حالانکہ حقیقت یہ ہے کہ ٹیکس دہندگان کے لئے کوئی سہولت ‘عزت کا کوئی ذریعہ یا کسی قسم کی کوئی رعایت ہے ہی نہیں’ہم ڈاکہ ڈال کر پیسہ نہیں کماتے بلکہ محنت اور اپنا سکون برباد کرکے رزق ہلال کماتے ہیں۔رزق ہلال کمانے والے کو اللہ اپنا دوست قرار دیتے ہیں لیکن ہمارے حکمران’ ذرائع ابلاغ اسے چور سمجھتے ہیں۔آپ کبھی اخبارات میں ٹیکس ریٹرن کے لئے شائع ہونے والے سی بی آر کے اشتہارات دیکھیں۔ایسی ایسی وارننگز دی جارہی ہوتی ہے کہ جیسے کاروباری حلقے اس فرض سے مکمل طور پر غفلت برت رہے ہوں۔ کیا وجہ ہے کہ ٹیکس کی وصولی کے لئے چھاپے مارنے پڑتے ہیں۔ صرف اس وجہ سے کہ لوگ ٹیکس دیتے وقت گھبراتے ہیں کہ اگر ایک بار ان کے ہتھے چڑھ گئے تو یہ زندگی بھر کی جمع پونجی لے کر بھی جان نہیں چھوڑیں گے۔””ڈاکٹر صاحب میں نے سوچا کہ اب میں خدمت خلق کے کاموں میں سرمایہ کاری کروں۔ اسلامی تعلیم وتربیت  اور نادار لوگوں کی صحت کیلئے ایک جامع منصوبے پر کام کر رہا ہوں۔اس سرمایہ کاری کا مجھے اس دنیا میں تو کوئی فائدہ نہیں ہوگا لیکن مجھے اللہ سے امید ہے کہ وہ آخر میں مجھے اس کے اجر سے نوازیں گے”۔شیخ عبدالوحید  صاحب کے جذبہ کو دیکھ کر مجھے قرآن کی وہ آیات یاد آئیں”’مَنْ ذَا الَّذِیْ یُقْرِضُ اللّٰہَ قَرْضًا حَسَنًا  فَیُضٰعِفَہ  لَہ  اَضْعَافًا  کَثِیْرَةً وَاللّٰہُ یَقْبِضُ وَیَبْصُطُ وَاِلَیْہِ  تُرْجَعُوْن””کون ہے جو اللہ پروردگار عالم کو قرض حسنہ دے کہ وہ اس کے بدلے اس کو کئی حصے زیادہ دے گا۔ اور اللہ ہی روزی کو تنگ وکشادہ کرتا ہے اور تم اسی کی طرف لوٹ جائو گے(پارہ ٢’سورہ البقرہ آیت ٢٤٥)۔” وَاَنْفِقُوْا خَیْرًا لِّاَنْفُسِکُمْ  وَمَنْ  یُّوْقَ  شُح  نَفْسِہ  فَاُولٰئِکَ  ھُمُ  الْمُفْلِحُوْنَ اِنْ تُقْرِضُوا اللّٰہَ  قَرْضًا حَسَنًا   یُّضٰعِفْہُ  لَکُمْ   وَیَغْفِرْلَکُمْ  وَاللّٰہُ  شَکُوْر” حَلِیْم” ”اگرتم اللہ کی راہ  میں خرچ کروگے تو یہ تمہارے ہی حق میں بہتر ہے اور جو شخص طبیعت کے بخل سے بچایا گیا تو ایسے ہی لوگ راہ پانے والے ہیں’ اور اگر تم اللہ کو قرض دو گے تو وہ تم کو اس کا دوچند دے گا اور اللہ قدرشناس اور بردبار ہے۔(پارہ ٢٨’سورہ التغابن آیت ٦١۔١٧)۔سرکارمدینہ صلی اللہ علیہ وآلہ وسلم کا ارشاد ہے”اللہ کی قسم وہ مومن نہیں’جوخود پیٹ بھر کر کھائے اور اس کاپڑوسی بھوکاسوئے”پاکستان میں بسنے والے صاحبان حیثیت کے بارے میں یہ تاثر درست ہے کہ وہ اللہ کی راہ میں دل کھول کر خرچ کرتے ہیں ‘بلکہ مجھے یہ کہنے دیجئے کہ پاکستان چیئرٹی کی مد میں رقوم خرچ کرنے والادنیا کا سب سے بڑا ملک ہے۔ضرورت اس امر کی ہے کہ جناب شیخ عبدالوحید جیسے جذبہ سے سرشار ہو کر ہم زیادہ سے زیادہ رفاعی اور اصلاحی اداروں کے قیام کی طرف متوجہ ہوں تاکہ فرد اور معاشرہ دونوں بیک وقت اصلاح اور فلاح کی منزل سے ہمکنار ہوسکیں۔قرآن کی روشنی میں یہی بہترین سرمایہ کاری ہے۔

Click here to View Printed Statement

ہمیںپی پی حکومت کا مشکور ہونا چاہیے کہ بانی پاکستان محمد علی جناح کی سالگرہ سرکاری طور پر منانے کا اہتمام ہوا ہے۔
گزشتہ 65 برسوں میں ہم نے اتنے قائد بنا لئے ہیں کہ اپنے اصل قائد کو بھول ہی گئے ہیں۔ بلکہ آمریتوں کے ادوار میں جان بوجھ کر قائداعظم کی سالگرہ اور برسیوں پر خاموشی اختیار کی گئی۔ پرویز مشرف کے دور میں آمریت کے کاسہّ لیس اورشاہ سے زیادہ شاہ کے وفاداروںنے پاکستان کے کرنسی نوٹوں سے بانی پاکستان کی تصویر ہٹا کر جنرل پرویز کی تصویر لگانے کا پورا منصوبہ بنالیا تھا۔ نمونے کے طور پر ایسے نوٹ تیار بھی ہوگئے تھے۔آج بھی قائداعظم کی ذات اور ان کے افکار کو متنازعہ بنانے کا ٹھیکہ لنڈا بازار کے دانشوروں کو دے دیا گیا ہے۔ ایسی ایسی بولیاں سنائی گئیں کہ کان پھٹنے کو آگئے ہیں۔ یوں محسوس ہوتا ہے کہ مسلمانان ہند نے یہ ملک مسلمانوں کے لئے نہیں بلکہ چند امریکی غلاموں کی ناجائز خواہشوں کی بارآوری کیلئے بنایا تھا۔
”پاکستان کا مطلب کیا لاالٰہ اللہ” والے نعرے کا تمسخر اڑایا جارہا ہے۔ اسلام کا حوالہ مٹانے کی ہر کوشش کی جارہی ہے۔ ایک گروپ نے امریکیوں کے اشارے پر ”اسلامی جمہوریہ پاکستان” میں سے اسلام کا لفظ حذف کرنے کی رٹ لگانا شروع کررکھی ہے۔ ان حالات کو دیکھتے ہوئے ہمارے دوست کالم نگار بیگ راج نے کہیں لکھ دیا ہے ”اگر آج قائداعظم زندہ ہوتے…” تو بگرام ایئربیس پر امریکیوں کی قید میں ہوتے”

قائداعظم کی تقاریر کے حوالے سے بیسیوں تقاریر کو ایک طرف رکھ کر کسی ایک تصویر کو اس کے سیاق و سباق سے کاٹ کر پیش کیا جاتا ہے اور ثابت کیا جاتا ہے کہ قائداعظم اس ملک کو ایک سیکولر یا بے دین ریاست بنانا چاہتے تھے۔راقم نے راولپنڈی میں قائم ایک معتبر تھنک ٹینک” تھنکرز فورم” میں ایسے ہی پھیلائے گئے تاثر کے خلاف دستاویزی ثبوتوں کا حوالہ دیکر عرض کی تھی کہ مانا کہ یہ پاکستان اسلام کیلئے نہیںمسلمانوں کے لئے بنایا گیا تھا۔ اگر یہ حقیقت سب تسلیم کرتے ہیں تو کوئی مسلمان بتائے کہ اس کا مذہب اور دین کیا ہے؟ ظاہر ہے اسلام ہے۔ پھر یہ ہٹ دھرمی کیسی؟ اسلام اور مسلمان لازم و ملزوم ہیں۔ اسلام کے بغیر مسلمان نہیں اور جو مسلمان ہے وہ اسلام کے بغیر مسلمان رہ نہیںسکتا۔
فکرو نظر کی ان بحثوں سے بچنے کا ایک راستہ یہ ہے کہ ہم یقین کر لیں کہ قائداعظم اس مملکت خداداد کو اسلام کے فلاحی نظام سے مزین کرنا چاہتے تھے ان کی منزل اسلامی فلاحی ریاست کا قیام تھا۔ اصل سوال یہ ہے کہ کیا ہم نے بحیثیت قوم’بحیثیت مسلمان اور بحیثیت انسان اپنے اس وطن کو حقیقی فلاحی ریاست بنانے کے لئے کوئی تگ و دو کی ہے۔”اسلامی” تو بڑی دور کی منزل ہے ‘ اس کی پہلی سیڑھی تو ایک فلاحی ریاست ہے جو قرآن و سنت کے لازوال اصولوں پر قائم ہو۔ کیا ہمسائے کے حقوق سے لیکر دولت کی منصفانہ تقسیم اور اختیارات کے عوامی حق تک کوئی پیش رفت ہوئی ہے۔
ہمیں آج پھر ایک بار سوچنا ہے کہ ہماری منزل کیا ہے اور منزل کا تعین بانی پاکستان نے ایک بار نہیں باربار’ہر تقریر اور ہر میٹنگ میں کیا تھا۔ ہمیںان سارے افکار کو منظر پر لانا ہے جن کو سن کر سمجھ کر ہمارے دل و دماغ اس وطن کو اسلامی فلاحی مملکت بنانے پر آمادہ ہوتے ہیں۔ ہمیں اسلام کا معاشی نظام ترتیب دینا ہے۔رسول پاک صلی اللہ علیہ وآلہ وسلم والا مدینہ نہ سہی کم از کم اس ماڈل کو نگاہوں میں رکھ کر آگے بڑھنا ہے۔ ہماری اس منزل کے حصول میں جہاں سے روشنی ملے لینی ہے’ جو مددگار ثابت ہو اس سے فکری مدد لینی ہے۔قائداعظم کو رول ماڈل کے طور پر عوام کے سامنے پیش کرنا ہے۔یہ ثابت کرنے کی بجائے کہ ہماری حکومت جو کام کر رہی ہے وہی قائداعظم چاہتے تھے۔قائداعظم کے ویژن کو بالا وبرتر رکھنا ہے۔نہ ملاں کا فساد اس ملک کو آگے لے جاسکتا ہے نہ ہی مغرب زدہ افکار اسے سنوار سکتے ہیں امت رسول ۖہاشمی کو قرآن و سنت کی روشنی میں ہی آگے بڑھایا جاسکتا ہے۔
میں قارئین کے ساتھ قائداعظم کی واحد تمناشیئرکرناچاہتا ہوں جس سے قائد کا وژن اور فلسفہ پاکستانیوں کے سامنے آئے گا’قائداعظم نے فرمایا:
”مسلمانو! میں نے دنیا کو بہت دیکھا۔ دولت’شہرت اور عیش وعشرت کے بہت لطف اٹھائے۔ اب میری زندگی کی واحد تمنا یہ ہے کہ مسلمانوں کو آزاد اور سربلند دیکھوں۔ میںچاہتا ہوں کہ جب مروں تو یہ یقین اور اطمینان لے کر مروں کہ میرا ضمیر اور میرا خدا گواہی دے رہا ہو کہ جناح نے اسلام سے خیانت اور غداری نہیں کی اور مسلمانوں کی آزادی ‘ تنظیم اور مدافعت میں اپنا فرض ادا کردیا۔میں آپ سے اس کی داد اور شہادت کا طلب گار نہیں ہوں۔ میں یہ چاہتا ہوں کہ مرتے دم میرا اپنا دل’میرا اپنا ایمان’ میرا اپنا ضمیر گواہی دے کہ جناح! تم نے واقعی مدافعتِ اسلام کا حق ادا کردیا۔جناح تم مسلمانوں کی تنظیم’اتحاد اور حمایت کا فرض بجالائے۔ میرا خدا یہ کہے کہ بے شک تم مسلمان پیدا ہوئے اور کفر کی طاقتوں کے غلبے میں علمِ اسلام کو سربلند رکھتے ہوئے مسلمان مرے”۔

Click here to View Printed Statement

”شوگر سے شوگر نہیں ہوتی۔انسانی جسم میں ایک خاص حد تک ہی شوگر جذب ہوسکتی ہے۔ اس قدرتی حد سے بڑھیں گے تو انسانی نظام ہضم خود بخودا کتاہٹ محسوس کرنے لگے گا۔ یہ محض ڈاکٹروں کا پراپیگنڈہ ہے کہ چینی کھانے سے شوگر کی بیماری لاحق ہوجاتی ہے۔ اس بیماری کے اسباب کچھ اور ہیں لیکن عوام کو بیوقوف بنانے کے لئے یہ سستاسا نسخہ گھڑلیا گیا ہے”۔
ملاقات شروع ہی ہوئی تھی کہ سکندر خان اپنے دبنگ لہجے میں شوگر انڈسٹری کو نقصان پہنچانے والے سرکاری اور غیر سرکاری اقدامات کا احاطہ کرنے لگے۔آل پاکستان شوگر ایسوسی ایشن کے سابق صدر اورخیبرپختونخواہ چیمبر آف کامرس اینڈ انڈسٹری کے سابق چیئرمین سکندر خان معروف صنعت کار گھرانے کے چشم وچراغ ہیں۔ انہوں نے پاکستان کے صنعت کاروں کے اندر حکمرانوں کے سامنے بات کرنے کا حوصلہ پیدا کیا ہے اور وہ قومی سطح کے متعدد فورموں پر صنعت کاروں کے مسائل اور پریشانیوں سے پالیسی ساز اداروں کے سربراہوں کو آگاہ کرتے رہتے ہیں۔

”ایک صنعت کار کے لئے بہت آسان ہے کہ وہ اپنے اثاثے سمیٹے اور باہر بھاگ جائے یا رقم بینک میں رکھ کر منافع کھائے۔ نہ لیبر کے جھنجھٹ نہ ایف بی آر اور دوسرے اداروں کی قہرمانیاں۔ اس ملک میں صنعت لگانا جان جوکھوں میں ڈالنے کے مترادف ہے۔ دنیا بھر میں ان لوگوں کو قدر کی نگاہ سے دیکھا جاتا ہے جو اپنا سرمایہ لگا کر روزگار کے لئے مواقع پیدا کرتے ہیں۔ پاکستان واحد ملک ہے جہاں روزگار دینے والے صنعت کاروں کو گالی دی جاتی ہے۔ سرکاری ادارے چھوڑیں عام آدمی کے ذہن میں میڈیا نے ایسا تاثر پیدا کردیا ہے کہ گویا یہ صنعت کار چور ہیں اور دونوں ہاتھوں سے ملکی وسائل کو لوٹ رہے ہیں”۔
سکندر خان کا دل دکھا ہوا تھا وہ بار بار مجھ سے پوچھتے تھے’
”ڈاکٹر صاحب آپ بتائیں کہ صنعت کار کہاں جائیں ۔مجھ سے کہا گیا کہ ٹیکس سے بچنے کے لئے ”چائے پانی” کا بندوبست کرو۔ میں نے صاف انکار کردیا اور کہاکہ جو بھی جائز ٹیکس بنے گا جمع کرائوں گا آپ لوگوں کو کچھ نہیں دوں گا۔ مجھ پر سو گنا زیادہ ٹیکس لگادیا گیا۔میں نے کیس کیا’عدالت میں گیا’ عرصہ دراز ہواکیس لڑ رہا ہوں’ جھکا نہیں ہوں اور نہ ہی جھکوں گا۔ میں نے طے کیا کہ اسی ملک میں رہوں گا اور حق کی آواز بلند کرتا رہوںگا”
سکندر خان کے والد گوجرانوالہ کے پٹھان ہیں۔ یعنی پٹھان ہیں لیکن گوجرانوالہ میںرہے۔والدہ ایرانی نژاد ہیں۔فارسی مادری زبان ہے۔کراچی میں بچپن گذرا۔ خاندان کے ہارون فیملی کے ساتھ قریبی تعلقات تھے۔فیض احمد فیض عبداللہ ہارون کے گھر آتے تو شعروسخن کی نشستیں جمتی تھیں۔ سکندر بھی ان محفلوںمیں تواتر کے ساتھ شریک ہوتے۔ خالصتاً انگریزی تعلیم میں پروان چڑھنے والے اس نوجوان کو فیض احمد فیض کا انداز ایسا بھایا کہ خود بھی مشق سخن شروع کردی۔ان کے پاس اپنے غیر مطبوعہ کلام کا ایک ذخیرہ جمع ہوگیا ہے۔فرقہ وارانہ دہشت گردی کے بطن سے جنم لینے والے اعصاب شکن احساسات نے سکندر کی سوچ اور بیان پر گہرے اثرات مرتب کئے ہیں۔ خوشحالی اور خوش نصیبی کے باوجود صنعت کار سکندر کو ملکی صورتحال لہو رلاتی ہے۔ وہ اپنے جذبات پر قابو نہیں رکھ پاتے۔ اور اپنے اندر کے سکندر کو شعروں کی صورت میں قرطاس پر رقم کردیتے ہیں۔ ان کے کلام کی اکثر تلمیحات اور استعارے فیض احمدفیض سے مستعارلئے ہوئے معلوم ہوتے ہیں۔ خیبرپختونخواہ کے عظیم سیاسی خاندان کے وارث ہیں’لیکن عملی سیاست سے کوسوں دور ہیں۔انگریزی ‘فارسی’ اردو اور پشتو پر عبور حاصل ہے۔
”ڈاکٹر صاحب آپ اکانومی واچ کے پلیٹ فارم سے ملکی معیشت کی بہتری کے لئے جہاد کر رہے ہیں ۔آپ اس ملک کے صنعت کار کو بجلی’ گیس نہیں دے سکتے اعتماد ہی دلوا دیں۔ یہ بجلی بھی پیدا کریں گے’ بے رزوگاری ختم کریں گے اور معیشت کے پہیے کو پھر سے رواں دواں کریں گے”۔
سکندر خان انتہائی متحرک اور کامیاب شخص ہیں۔خدا نے انہیں جس قدر مالی کامیابیوں سے نوازا اسی قدر انہیں انسان پروری اور غریب پرسی کا حوصلہ بھی دیا ہے۔
جناح سپر اسلام آباد میں اپنے دفتر میں بیٹھے وہ اپنی زندگی کا خاکہ بیان کر رہے تھے۔ سورج کی شعائیں ان کے دمکتے چہرے پر پڑ رہی تھیں۔ انہوں نے ملازم کو آواز دی۔ ملازم دوڑا ہوا اندر آیا۔ سکندر خان نے انتہائی دھیمے لہجے میں اس بزرگ ملازم کو کہا” بابا جی ذرا کھڑکی بند کردیجئے”۔ انکساری سکندر خان کی شخصیت میں ایک نگینے کی ماننددمکتی ہے۔
”میرے نانا مجھے زبردستی بس میں سوار کردیتے تھے حالانکہ گاڑیوں کی کمی نہ تھی۔وہ صرف اس لئے کہ میں عام آدمی کے ساتھ سفر کے دوران لوگوں کی مشکلات کا ادراک کرسکوں”
اپنے دوست ملک اظہر اور بیگ راج کے ہمراہ سکندر خان کے دفتر سے باہر آئے ۔ہم تینوں کو ایک ہی تشویش تھی کہ اگر سکندر خان جیسے سچے اور محب وطن صنعت کاروں نے بھی تنگ آکر یہ ملک چھوڑ دیا تو ہماری معیشت کا کیا بنے گا؟

Click here to View Printed Statement

JANG LAHORE IQRA PAGE

کہا جاتا ہے کہ دور جاہلیت میں عورت اللہ تعالیٰ کی مظلوم مخلوق تھی۔معاشرے میں اسے سخت حقارت کی نظر سے دیکھا جاتا تھا۔ طرح طرح کے توہمات اس کی ذات کے ساتھ وابستہ کئے جاتے تھے۔گھروں میں باندیوں سے بدترسلوک اس کا مقدر تھا۔ سوسائٹی میں رائے مشورے اور تنقید و احتساب کا حق اسے قطعاً نہ تھا۔ بیویوں کی تعداد پر کوئی پابندی عائد نہ تھی۔وراثت میں بھی اس کا حصہ نہ تھا۔زندگی کے کسی شعبے میں بھی اس کی شہادت قابل قبول نہ تھی۔ حد تو یہ ہے کہ پیدا ہوتے ہی عورت کو زندہ قبر میں گاڑھ دیا جاتا تھا۔

آج کا دور دور جاہلیت نہیں بلکہ دور تہذیب وترقی کہلاتا ہے۔یہ اندھیروں کا نہیں روشنیوں کا زمانہ ہے۔ حقوق کی پامالی نہیں بلکہ حقوق کی تحصیل و بحالی آج کا موضوع بحث ہے’غلامی کا دور ختم ہوا’اب آزادی کا زمانہ ہے۔عورت اب ملکی انتخابات میں حصہ لے سکتی ہے’ووٹ دے سکتی ہے’ اعلیٰ سے اعلیٰ تعلیم حاصل کرسکتی ہے’چھوٹے دفتر سے لے کر بڑے سے بڑے کارخانوں اور فیکٹریوں تک کے دروازے اس کے لئے کھلے ہیں۔شہادت’ رائے’مشورہ’ تنقید احتساب اور وراثت کے تمام حقوق اسے آج آئینی طور پر حاصل ہیں۔کھیل کود کے میدان میں بھی اسے اپنے جوہر دکھانے کی آزادی حاصل ہے۔یہاں تک کہ بعض ملکوں کی سربراہی میں بھی اسے عملاً حاصل ہے لیکن افسوس مجموعی طور پر عورت جتنی مظلوم کل تھی اتنی ہی آج بھی ہے۔
عورت کے لئے دور جاہلیت ابھی مکمل طور پر ختم نہیں ہوا۔آج کی آزادی کئی غلامیوں کو اپنے جلو میں لے آئی ہے۔اس وقت بھی اس کے حقوق بحال کم اور ماپال زیادہ کئے جارہے ہیں۔آخرت سے بے خوف والدین کل بھی اپنی بیٹیوں کو جائیداد میں شرعی حصے سے محروم رکھتے تھے اور آج بھی محروم رکھتے ہیں۔پہلے کی طرح آج کل بھی اس کی پیدائش پر ناخوشی کا اظہار کیا جاتا ہے اور سب سے بڑا ظلم اس دور میں جو روا رکھا جاتا ہے وہ ہے تجارت کے فروغ کے لئے نسوانیت کا بے دریغ استعمال۔میری نظر میں یہ ظلم ایک ایسا ظلم ہے کہ جس نے موجودہ زمانے کی نام نہاد آزادیوں’مراعات’حقوق ہمدردیوں کو قطعاً بے معنی بنا کر رکھ دیا ہے۔
جب میں کسی دکان پر شوگرل یا شاپ گرل کو جوتے یا کپڑے بیچتے ہوئے دیکھتا ہوں تو اس کی مظلومی پر آبدیدہ ہوجاتا ہوں۔یہ عورت کے جسمانی حسن اور اس کی نسوانی کشش کا کھلا استحصال ہے۔یہ عہدہ اسے اس اخلاقی بنیاد پر نہیں ملتا کہ وہ بیروزگار ہے یا معاشی طور پر بے یارومددگار ہے یا تعلیم اس عہدہ سے متعلق ہے بلکہ محض اس تجارتی بناء پر ملتا ہے کہ اس کی موجودگی گاہکوں کی کشش کا باعث بنے گی اور اس طرح مالکان کی دکان چمکے گی۔
عورت کا وہ مقدس جسم کہ جو سوائے شوہر کے کسی دوسرے شخص کے سامنے بے لباس نہیں کیاجاسکتا اور جس کو چھونے کی یہاں تک حرمت ہے کہ عورت اپنے جسم کو چھونے والے یا چھونے کی کوشش کرنے والے مرد کو قانوناً ہلاک کرسکتی ہے۔آج اسے بلاتامل فلمی سکرین پر نیم برہنہ کیا جارہا ہے اور محض چند سکوں کا لالچ دے کر اس سے وہ تمام کردار کروائے جارہے ہیں جو عورت عام حالات میں کبھی برداشت نہیں کرسکتی ۔ناقص کہانی’بے کیف مکالموں’گھسی پٹی موسیقی اور بے روح منظر نامے جیسے عیوب پر عورت کے جسم کا پردہ ڈالاجارہا ہے’ فلم میں جو کچھ عورت آج کرتی ہے وہ اس کی زندگی کا سب سے بڑا المیہ اور اس کی حیات کی سب سے بڑی غلامی ہے۔
آج نئی تہذیب کے جدید تقاضوں نے عورت کی نیم برہنہ تصویر کو ہر بوتل’ڈبے’پیکٹ’اخبار ‘رسالہ اور کتاب کے اوراق پر ناگزیر بنا دیا ہے۔یہ عورت کی نسائیت اور اس کی عظمت کے تقدس کی ہر طرح کھلی پامالی ہے’صنعت کار خواہ سائیکل’سکوٹر اور کار سے متعلق ہو یا اس کا تعلق ادویات’جفت سازی اور پان بیڑی سگریٹ فروخت کرنے والے ادارے سے ہو وہ اپنی صنعت اور تجارت کے لئے عورت کے نیم برہنہ جسم کو استعمال کرنا اپنے لئے فرض تصور کرتا ہے۔اگر پنسل ‘دوات’کاپی وغیرہ عمدہ کوالٹی کی ہے تو اس پرکسی عمدہ نوجوان حسین وجمیل خاتون کی تصویر طبع ہونا ضروری ہے۔یہ سب کچھ عورت کی تذلیل اور اس کی سخت توہین ہے۔
عورت کے معاشرتی کردار میں تقدس اور پاکیزگی کو ملحوظ رکھا جائے۔ اس کا جسم تجارتی مقاصد کی خاطر تخلیق نہیں کیا گیاہے۔قدرت نے عورت میں شرم و حیا کے احساسات مٹنے اور مٹانے کے لئے نہیں پیدا فرمائے بلکہ قدرت نے ان کی تخلیق کے ذریعہ عورت کی عفت مابی کا سامان فراہم کیا ہے جو روزی کا لالچ دے کر عورت کو اس کی فطری شرم وحیا سے محروم کرتا ہے یا اس کی شان سے گرے ہوئے امور کی انجام دہی کے لئے بروئے کار لاتا ہے ‘وہ عورت کا سب سے بڑا دشمن ہے ‘ اسے جلد یا بدیرمٹنا ہی چاہئے اورا س کی جگہ ایک صالح اور عورت دوست معاشرے قائم ہونا چاہیے۔

تینوں چیف متفقہ طور پر قوم کو یقین دلا چکے ہیں کہ انتخابات ہر حال میں ہو کر رہیں گے۔ چیف جسٹس نے فرمایا ہے کہ لوگ ایسے خواب بھی دیکھنا چھوڑ دیں جن میں انتخابات کے التواء کے حوالے سے کوئی جھلک ہو۔آرمی چیف نے فوجی لب ولہجے کی قطعیت کے ساتھ ایک بار پھر واضع کردیا ہے کہ قوم جس طرح کے چاہے نمائندے منتخب کرے’فوج جمہوریت کا ساتھ دے گی۔ چیف الیکشن کمیشن کے دفتر کی رونقیں بحال ہوچکی ہیں اور وہ کراچی میں غیر لسانی بنیادوں پر انتخابی حلقہ بندیوں میں پھر سے مصروف ہوگئے ہیں۔تینوں چیف کی متواتر یقین دہانیوں کے بعد محترم طاہر القادری کی طرف سے انتخاب کے انعقاد کو حقیقت کے طور پر قبول کر لیاگیا ہے

اور وہ اب اس انتخاب کو پاکستان کی بہتری کا آخری انتخاب قرار دے کر تازہ سیاسی صف بندیوں کے اشارے دے چکے اوراب میڈیکل چیک اپ کے لئے اپنے دوسرے دیس سدھارنے والے ہیں۔جناب عمران خان نے بھی انٹرپارٹی الیکشن کے مرحلے کوتیز تر کردیا ہے اور اب امیدواروں کے ناموں پر غور وخوض جاری ہے۔ کہا جارہا ہے کہ جناب عمران خان نے ایک خفیہ فہرست تیار کر رکھی ہے جسے وہ انتخابات کی تاریخ کا اعلان ہونے سے پہلے منظر عام پر نہیں لائیں گے مباداکہ ناانصافیوں کے خلاف انٹر اپارٹی لانگ مارچ ہی نہ شروع ہوجائیں۔پاکستان مسلم لیگ قائداعظم بھی اب یقین ہوگیا ہے کہ انتخابات ٹلتے دکھائی نہیں دیتے۔چوہدری برادران نے کسی ”مبارک سنٹر” کے فل پیج اشتہارات کی بارش کردی ہے ۔وہ ماضی کی محفلوں کو عوامی شعور میں سجا کر آئندہ کے لئے ووٹ مانگنے کا جواز تلاش کر رہے ہیں۔ان کا ووٹ بینک شائد دیوالیہ ہونے والا ہے۔ ان کے دستر خوان کے خوشہ چینوں نے دن دیہاڑے ”اڈاری”مارنی شروع کردی ہے اور اکثر ہیں کہ رائے ونڈ کی بالکونیوں میں غڑغوں غڑغوں کرتے دکھائی دیتے ہیں ‘میاں محمد نوازشریف کی نوازشات کا بند کواڑ کھلا اور کہاں کہاں سے پنکھ پکھیرو واپس میاں صاحب کے ہاتھوں پر بوسے دینے پہنچ گئے ۔تجزیہ نگار حیرت زدہ ہیں کہ میاں صاحب نے آخر کیسی ”چمک” دکھائی کے کراچی سے خیبر تک بڑے بڑے سیاسی گرو”بڑا بھائی” مان کر قدموں میںآ بیٹھے ہیں۔بعض تو ایسے ہیں کہ میاں صاحب کے باقاعدہ مریدین میں شامل ہوگئے ہیں۔جناب ممتاز بھٹو جیسے قدآور سندھی وڈیرے بھی میاں صاحب کو ”قائد”مان کر اپنا سیاسی بڑھاپا پرسکون  بنانا چاہتے ہیں۔جناب پیرآف پگاڑو اپنے والد مرحوم کے برعکس سنجیدہ اور متحرک’ تخت لاہور کے ایسے اسیر ہوئے کہ پورے سندھ کو اٹھا کر میاں صاحب کی جھولی میں ڈال دیا۔سندھی قوم پرست جن کی زبان پر پنجاب کے خلاف دشنام طرازیوں کے واویلے بسیرا کیا کرتے تھے آج پنجابی لیڈر کے باجماعت ہمرکاب ہوگئے۔ یہ سیاسی معجزہ نہیں تو اور کیا ہے؟پاکستان کی حفاظت اور فیڈریشن کی طاقت کے کیسے کیسے سامان پیدا ہوگئے۔مولانا فضل الرحمن اور جماعت اسلامی میاں صاحب کے ساتھ مل گئے۔ جماعت اسلامی کا عمران خان کے ساتھ جانا تقریباً محال ہوچکا کہ تحریک انصاف کے ترجمان ”مذہبی انتہا پسندوں” کے خلاف بیانات داغتے رہتے ہیں۔انتخابی بخار چڑھنا شروع ہوگیا۔جوں ہی اسمبلیاں ٹوٹیں گی۔سیاسی وفاداریاں مزید ٹوٹ پھوٹ کا شکار ہوں گی اور ٹوٹنے والے بہت سے چاند تارے بہرحال میاں صاحب کی گود میںگریں گے۔سمجھ نہیں آرہی کہ  ہوا کا رخ میاں نوازشریف کی طرف کیوں پھر گیا ہے۔ کیا ایسا تو نہیں کہ آئندہ انتخابات میں وہ تمام پارٹیاں ایک طرف ہوں گی جنہوںنے امریکی جنگ میں ڈالر وصول کئے ہیں اور وہ پارٹیاں جنہیںعمومی طور پر اینٹی امریکہ سمجھا جارہا ہے وہ دوسری جانب۔ ایسی تقسیم کی صورت میںطالبان کی ہمدردیاں کونسا رخ اختیار کریں گی۔دیکھئے پندرہ مارچ کے بعد صف بندیوں میں مزید نکھار آئے گا۔

Click here to View Printed Statement

Jang Lahore Iqra Page

آجکل فحاشی اور عریانی کے ہر مظہر کو ملفوف بنا کر مارکیٹ کرنے کا رواج چل پڑا ہے۔عورت کو حیا اور پاکیزگی کے ماحول سے نکالنے کے نت نئے طریقے ایجاد ہوگئے ہیں۔بدقسمت عورتیں ہیں جو اپنی ناسمجھی یا کسی مجبوری کے سبب ابلیسی دماغوں کے پھیلائے ہوئے جال میں پھنس جاتی ہیں اور پھر ”پبلک پراپرٹی” بن کر اپنے تقدس کو چند ٹکوں کے عوض دربدر نیلام کرتی پھرتی ہیں۔ پاک دامن بچیوں اور بیبیوں کو چکا چوند کردینے والے مناظر کے پیچھے چھپے غلیظ کاروبار سے آگا ہ کرنا جہاں والدین کا فرض اولین ہے وہیں قلم کار وں اور دانشوروں کو بھی اس پھیلے ناسور کا ادراک ہونا چاہیے۔ خوبصورت لباس زیب تن کرنا ہر ذی روح کی قدرتی خواہش ہے اور زیورات اور بنائو سنگھار عورت کی شدید ترین آرزو ہوتی ہے ۔بوتیک پر بکنے والے لباس کے ساتھ اگر کسی ہیروئن یا ماڈل کی تصویر ہو تو کاروبار خوب چمک جاتا ہے ۔

درزی یا فیشن ڈیزائنر’شوز بنانے والے زیورات اور میک اپ بیچنے والے اپنے کاروبار کو بڑھاوا دینے کے لئے اپنی مصنوعات کی تشہیر کے لئے ماڈلنگ’کیٹ واک اور فوٹو سیشن کے ذریعے عورتوں کوکاروباری مقاصد کیلئے استعمال کرتے ہیں۔”یہ تو ماڈلنگ ہے ” یہ کہہ کر بے روزگار اور بے مہار لڑکیوں کو فوٹو سیشن سے گزارا جاتا ہے اور پھر وہ ایک انجانی منزل کی طرف ‘بلکہ دوزخ کی آگ کی طرف لپکتی چلی جاتی ہیں۔مجھے آج کی اس نشست میں خالصتاً قرآن وحدیث کی روشنی میں اپنی مسلمان بہنوں’ بیٹیوں کو ”ماڈلنگ” جیسی بے حیائی کے حوالے سے بعض ضروری پہلوئوں سے آگاہ کرنا ہے۔قرآن کریم سورہ الاحزاب (٢٢) میں عورتوںکو حکم دیتا ہے”اسلام سے پہلے جاہلیت کے زمانے میں جس بنائو سنگھار کی نمائش کرتی پھرتی تھیں وہ اب نہ کرو”سورہ النور(٢١) میں ارشاد ربانی ہے۔ ”اور وہ اپنے  پائوں زمین پر مارتی ہوئی نہ چلیں کہ جو زینت انہوں نے چھپا رکھی ہے (یعنی زیور وغیرہ) اس کا حال معلوم ہو(یعنی جھنکار سنائی دے ) اسی آیت میں ذرا آگے چل کر ارشاد ہوتا ہے ”اے نبیۖ! مومن عورتوں سے بھی کہہ دو کہ وہ اپنی نگاہوں کو (غیر مردوں کی دید سے) باز رکھیں اور اپنی شرمگاہوں کی حفاظت کریں’اور وہ اپنے سینوں پر اپنی اوڑھینوں کے بُکل مار لیا کریں۔سورہ الاحزاب (٢٢) میں ارشاد باری تعالیٰ ہے”اگر تمہارے دل میں خدا کا خوف ہے تو دبی زبان سے بات نہ کرو کہ جس شخص کے دل میں بدنیتی کی بیماری ہو وہ تم سے کچھ امیدیں وابستہ کرلے گا۔ بات کرو تو سیدھے سادے طریقے سے کرو”(جس طرح انسان انسان سے بات کیا کرتا ہے)۔رسول اللہ صلی اللہ علیہ وآلہ وسلم کا ارشاد گرامی ہے۔”جو عورتیں کپڑے پہن کر بھی ننگی ہی رہیں وہ دوسروں کو رجھائیں اور خود دوسروں پر رنجھیں اور بختی اونٹ کی طرح ناز سے گردن ٹیڑھی کرکے چلیں’وہ جنت میں ہرگز داخل نہ ہوں گی اور نہ ہی اس کی خوشبوپائیں گی”۔ نماز باجماعت میں اگر امام غلطی کرے یا اس کو کسی حادثہ پر متنبہ کرنا ہو تو مردوں کو سبحان اللہ کہنے کا حکم ہے مگر عورتوں کو ہدایت کی گئی ہے کہ صرف دستک دیں اور زبان سے کچھ نہ بولیں(ابودائود)۔حضور اکرم صلی اللہ علیہ وآلہ وسلم نے مردوں کو فرمایا۔”اپنی عورتوں کو لباس زینت اور نازواندازکے ساتھ مساجد میں جانے سے روکو” عورتوں کی نماز باجماعت میں مونث امام کو اندرون صف کھڑا ہونے کی ہدایت ہے (تاکہ وہ نمایاں ہو کر بے حجاب نہ ہوجائے)(ہدایہ جلد اول) ۔انفرادی نماز میں عورتوں کے لئے حکم ہے کہ وہ سجدے میں اپنے سینے اور پیٹ کو رانوں سے ملائیں تاکہ بدن کے پھیلائو اور تفاصل میں سینہ لٹک کر بے حجاب نہ ہوجائے ۔قعدے میں میرین پر بیٹھ کر پیروں کو ایک طرف نکالیں تاکہ پیروں پر بیٹھ کر رانیں ابھری ہوئی اور اوپر کا دھڑ بلند نہ دکھائی دے۔ قیام میں ہاتھ سینے پر باندھیں تاکہ سینے کا ابھار نمایاں ہو کر بے پردہ نہ ہوجائے۔شریعت درحقیقت ماں ‘ بہن’ بھائیوں کو ایک دوسرے کے برابر کھڑا ہو کر نماز ادا کرنے کی اجازت نہیں دیتی۔غزوات (وہ جنگیں جن میں حضورۖ نے شرکت فرمائی) میں مسلمان عورتیں اپنا جسم حتی الوسع زخمی مجاہدین سے مس نہیں ہونے دیتی تھیں اور اکثر ان کا دائرہ خدمت اپنے نزدیک ترین رشتے داروں تک محدود ہوا کرتا تھا۔حضورۖ کا ارشاد ہے ”جو شخص کسی عورت کا ہاتھ چھوئے گا جس کے ساتھ اس کا جائز تعلق نہ ہو ‘ اس ہتھیلی پر قیامت کے روزانگارہ رکھا جائے گا”۔حضرت عائشہ کا بیان ہے کہ نبی اکرمۖ عورتوں سے صرف زبانی اقرار لے کر بیعت کیا کرتے تھے۔ ان کا ہاتھ اپنے ہاتھ میں نہ لیتے تھے۔ آپۖ نے کبھی ایسی عورت کے ہاتھ کو مس نہیں کیا جو آپۖ کے نکاح میں نہ ہو۔(بخاری’باب بیعتیہ لنسائ’مسلم باب کیفیة’بیعةالنسائ) مرنے کے بعد بھی عورت کے مردہ جسم کو صرف اس کے محرم مرد ہی ہاتھ لگا سکتے ہیں۔شریعت نے عورت کی پردہ داری کا اس حد تک خیال رکھا ہے کہ (مرد کے مقابلے میں) اس کے کفن میں سر اور سینے کو خصوصاً ڈھکنے کے لئے ایک کپڑا زائد ہوتا ہے اور اس کا مردہ جسم کو قبر میں اتارتے وقت بھی پردے کا اہتمام کیا جاتا ہے۔شرم و حیا کے ضمن میں ہماری ملی روایات بھی ہمیشہ سے انتہائی شاندار اور قابل فخر رہی ہیں اور پاکیزہ خیال ہزاروں گھرانوں میں آج بھی ان پر عمل ہوتا ہے۔ ان دیندار اور خداترس  خاندانوں کی کنواری لڑکیاں شادی سے پہلے کسی قسم کا سنگار نہیں کرتیں۔ بزرگوں کے سامنے ان کے سروں پر سے کبھی دوپٹہ نہیں اترتا۔ دولہا اور دلہن اپنے والدین کی موجودگی میں ایک دوسرے کے قریب یا برابر لگ کر نہیں بیٹھتے۔ خود والدین بھی جو ان اولاد کے سامنے ایسی ہی شرم و حیا کا مظاہرہ کرتے ہیں۔منگنی کے بعد لڑکی کا لڑکے سے (لڑکا خواہ کتنی ہی قریبی عزیز ہو) پردہ کروا دیا جاتاہے۔نکاح کے وقت لڑکی کی طرف سے خاموشی اختیار کرنا یا محض گردن ہلا کر ”ہاں” کر دینا ہی ایجاب و قبول کی علامت سمجھا جاتا ہے۔ نوجوان لڑکی بن سنور کر سٹوڈیو میں جا کر اپنی تصویر اتروانے کا سوچ بھی نہیں سکتی(ہماری اس ملی روایت کا انگریز حکمرانوں تک نے احترام کیا اور انہوں نے مسلمان خواتین کو مختلف نوعیت کے فارموں و دیگردستاویزات پر اپنی تصویر چسپاں کرنے سے مستثنیٰ قرار دے رکھا تھا)۔ قیام پاکستان سے قبل مسلمان لڑکیاں نرس کا پیشہ اختیار نہیں کیا کرتی تھیں( اس لئے کہ ان کا واسطہ نا محرم مرد مریضوں سے پڑتا تھا)سکول کالج میں تھیٹریکل کمپنیوں کی جانب سے منعقد کیے جانے  والے ڈراموں میں عورتوں کا کردار بھی مرد ہی ادا کیا کرتے تھے۔عورتوں کا درزیوں کی دکانوں پر جا کر اپنے جسم کا ماپ دینا حرام سمجھا جاتا تھا۔بال ترشوانا ابروئیں باریک کرنا بعیدازقیاس تھا۔اندازہ لگایا جاسکتا ہے کہ وہ خدا جو نمائش حسن کو ”تبرج الجاھلیہ ” قرار دیتا ہے۔وہ رسول اکرم صلی اللہ علیہ وآلہ وسلم جو فریضہ امامت اور نماز کی ادائیگی کے دوران بھی عورت کی پردہ پوشی کا پورا اہتمام فرماتے ہیں اور مسلمان معاشرہ کی اعلیٰ روایات جو ایک جوان بیٹی کو اپنے والد کے سامنے بھی برہنہ سر دیکھنا گوارا نہیں کرتیں’ بھلا موجودہ دور کی حیاسوز اور شرمناک ”ماڈلنگ” کو کیسے برداشت کرسکتے ہیں؟ قرآنی معاشرہ میں ایک خوش اندام’چھیل چھبیلی’الھڑدوشیزہ کے سٹائلش’ ننگے شانوں پر بکھرے ہوئے بالوں کے ساتھ بھڑکیلے’نیم عریاں اور چست لباس میں سیگرٹوں کے کش لگانے’دریا اور سمندر کے پانی میں غوطے لگانے اچھلنے کودنے ‘ قہقے لگانے اورمکمل دلربائی کے انداز میں ڈائیلاگ ادا کرنے وغیرہ کی قطعاً کوئی گنجائش نہیں ہے ۔ ان خرافات کو صرف مغرب کا جنس زد بدتہذیب اور عورت کی عصمت و عفت کی اہمیت سے ناآشنا’مادرپدر آزاد معاشرہ ہی برداشت کرسکتا ہے۔مسلمان سوسائٹی کبھی کسی تاجر کو اس امر کی اجازت نہیں دے سکتی کہ وہ اپنی دکانداری چمکانے کی غرض سے عورت کے جسم کا سہارا لے۔یہ نسوانیت کا کھلا استحصال ہے ۔اسلامی  قوانین میں عورت کی معاشی پوزیشن مرد سے بھی زیادہ مستحکم رکھی گئی ہے تاہم بہ امر مجبوری اسلام عورت کو کسب رزق سے نہیں روکتا۔ اضطراری حالت میں وہ تعلیم وتدریس’طب صنعت وحرفت’تجارت’تصنیف و تالیف ‘ادب و صحافت’غرض زندگی کے اکثر شعبوں کے دروازے اس پر کھول دیتا ہے  لیکن اس کڑی پابندی کے ساتھ کہ وہ اپنے پیٹ کی آگ بجھاتے بجھاتے دوزخ کی آگ سے غافل نہ ہوجائے اور اپنی تمام تر معاشی سرگرمیوں میں پاکیزگی نفس اور شرم و حیا کا دامن ہاتھ سے نہ چھوڑے!۔قرآن وسنت کی واضح ہدایات اور شاندار اسلامی تہذیب کے حوالوںکے بعد والدین پر یہ لازم ہے کہ وہ اپنے بچوں اور بچیوں کو دوزخ کی آگ کی طرف جانے سے فوراً روک لیں۔اللہ تمام بہنوں ‘بیٹیوں کی عزتوں کی حفاظت فرمائے(آمین)۔

یہ توفیق کی بات ہے ۔اللہ نے موجودہ حکومت کو یہ توفیق بخشی اور کابینہ کے دستخطوں سے پاکستان کی بہتری کا ایک اور بندوبست ہوگیا۔2002ء میں بحیرہ عرب میں گوادر کے مقام پر گہرے پانیوں میںخطے کی ایک بڑی بندرگاہ کی تعمیر کا سنگ بنیاد رکھا گیا تھا۔ چین کے ڈپٹی پرائم منسٹر اور پاکستان کے صدر جنرل پرویز مشرف نے تختی کی نقاب کشائی کی تھی۔بندرگاہ کی تعمیر کے لئے سرمایہ چین نے فراہم کیا تھا اور عمومی رائے یہی تھی کہ تعمیر کا پہلا مرحلہ مکمل ہونے کے بعد بندرگاہ کے انتظامات بھی چین سنبھالے گا۔ لیکن امریکی دبائو کے سامنے پرویز مشرف صاحب حسب روایت ڈھیر ہوگئے اور سنگاپور کی ایک کمپنی کو انتطامات سونپ دیئے گئے۔

اب جیسے بھی ہوا’ یہ انتظامات چین کی سرکاری کمپنی سنبھال رہی ہے۔ وہ تعمیر کے باقی مراحل بھی مکمل کرے گی اور یوں پاکستان کو سمندر کے راستے تجارت اور توانائی کا ایک اور بڑا ذریعہ میسر آجائے گا۔چین کو انتظامات سونپنے پر ہوسکتا ہے کہ پاکستان کے بعض قریبی ہمسایہ ممالک کو دھچکا لگا ہو لیکن بظاہر کسی بھی ملک نے اس معاہدے پر کسی تشویش کا اظہار نہیں کیا ۔تشویش کا اظہار ہونا بھی نہیں چاہئے کہ کاروبار کرنا ہر ملک کا حق بھی  ہے اورضرورت بھی۔ چین ایک بہت بڑا ملک ہے اور اسے تجارت اور آئل کی ترسیل کے لئے نئے روٹس درکار ہیں۔خوش قسمتی سے پاکستان کے پاس ایسا سمندر ہے جس پر ایک دو نہیں متعدد بندرگاہیں تعمیر کی جاسکتی ہیں ۔ چین کو مشرق وسطیٰ کا تیل چاہیے اور اس کے لئے اسے بہت لمبا چکر کاٹ کر پاکستان کے ساتھ ملحقہ علاقوں میں تیل سپلائی کرنا پڑتا ہے۔ اسی طرح اسے اپنا سستا سامان گلف’انڈیا اور یورپ تک پہنچانے کے لئے بھی بے پناہ سفری اخراجات اٹھانے پڑتے ہیں۔ گوادر بندرگاہ کے استعمال سے چین کو اپنا مال بیچنے میں ہزارہا آسانیاں میسر آجائیں گی۔پاکستان کا اپنا فائدہ ہے۔کرائے کی صورت میں پاکستان کو اربوں ڈالرسالانہ کمانے کا موقع ملے گا۔ بلوچستان کے ہزاروں روزگار نوجوانوں کو براہ راست اور بالواسطہ روزگار میسر آجائے گا۔ گوادر کے اردگرد زمینوں کی قیمت بڑھے گی اور رئیل اسٹیٹ کا بزنس ترقی پائے گا۔ ایک نیا شہر آباد ہوجائے گا اور صوبہ بلوچستان کی خستہ حالی کو خوشحالی میں تبدیل کرنے کا موقع بھی مل جائے گا۔چینیوں کے ساتھ کام کرنے سے پاکستانیوں کو بھی تربیت ملے گی اور یوں پاک چین دوستی کے ثمرات عام آدمی تک بھی پہنچنا شروع ہوجائیں گے۔ اہل چین کا بندرگاہیں چلانے اور کامیابی سے ہمکنار کرنے کا وسیع تجربہ ہے۔ وہ سری لنکا میں ایک بندرگاہ تعمیر کرچکا ہے اور بنگلہ دیش میں بھی ایسا ہی منصوبہ زیر تکمیل ہے۔دنیا بھر کی ترقی میں چین کا کردار کسی بھی سپرپاور سے کہیں زیادہ ہے۔بھارت کو پاک چین معاہدے پر تشویش ہے۔بھارت فکر مند ہے۔بھارت کے وزیر دفاع نے انتہائی عجلت میں اپنی پریشانی کا اظہار کردیا ہے ۔اتنا بڑا ملک اور غربت میں پھنسی کروڑوں کی  آبادی ۔” تجھے پرائی کیا پڑی اپنی نبیڑتو” لیکن بھارت کو کون سمجھائے۔ جہاں کہیں پاکستان کا فائدہ ہوگا’دہلی والے تڑپنا شروع کردیتے ہیں۔اگر اپنے وجود کے مطابق بڑے پن کا مظاہرہ کرتا تو کہتا”بھارت اور چین باہمی تجارت کی بلندیوں کو چھو رہے ہیں۔گوادرپورٹ کا انتظام پاکستا ن جس ملک کو چاہے دے دے۔ اس سے خطے میں تجارتی رجحانات کو فروغ ملے گا”۔ لیکن اپنے خبث باطن کو چھپا نہیں سکا اور اپنی تنگ نظری کی دھوتی کھول کر دنیا کے سامنے ننگا ہوگیا۔بھارت کی یہ سوچ کہ اس نے پاکستان اور چین دونوں کا راستہ روکنا ہے مقامی نہیں بلکہ امریکی اسپانسرڈ ہے۔ ورنہ کہاں بھارت اور کہاں یہ دو ملک۔ چین نے تو ”NO WAR” کا بورڈ لگا رکھا ہے اور وہ ہر مسئلہ کو بات چیت سے حل کر رہا ہے۔ پھر کس کے خلاف جنگ ؟ یہ بے معنی تشویش کیوں؟

ان لوگوں سے پیشگی معذرت جنہوں نے جمہوریت کو مذہب کا درجہ دے رکھا ہے۔مغربی جمہوریت کے شاہکار سامنے آنا شروع ہوگئے ہیں۔یورپی ممالک میں اب شہریوں کی فلاح و بہبود کے بجائے ہم جنس پرستوں کے شیطانی حقوق ایشو بن چکے ہیں۔امریکہ کی ایک ریاست میں ”چکلے” چلانے والے ایک بدکار کو گورنر بنایا گیا ہے۔ یہی نہیں امریکی حکومت خصوصاً صدر ابامہ مجبور ہے کہ وہ طاقتور حزب اختلاف  کے دبائو کے سامنے سرنڈر کرجائے اور جنگ بندی کی خواہش کو ترک کرکے نئی جنگوں کی گنجائش پیدا کرے تاکہ امریکی اسلحہ ساز اور آئل کمپنیوں کا بزنس چلتا رہے۔خود پاکستان کے اندر جمہوریت کے پردے میں جو لوٹ مار ہورہی ہے اس کے تذکروں سے اخبارات بھرے پڑے ہیں۔’

‘ہنگ پارلیمنٹ اور کولیشن گورنمنٹ” نے اس ملک کے غریب آدمی کے ساتھ جو کھیل کھیلا ہے اس کا نتیجہ یہ نکلا ہے کہ خطِ غربت سے نیچے سرک جانے والوںکی تعداد لاتعداد ہوتی جارہی ہے ۔مغربی جمہوریت نے اہلیت کی بجائے اکثریت کی بنیاد پر فیصلے کرنے ہیں اور اکثریت کو ورغلانے اور سدھانے کے لئے طاقتور میڈیا جیسے ہتھیار موجود ہیں۔آج کی نشست میں دنیا کی سب سے بڑی جمہوریت کا کچھ تذکرہ کرنا ہے۔ ہمارے اسٹیٹ ٹیلی ویژن سمیت تمام ٹی وی چینلز پر اشتہارات اور ناچ گانے  کے پروگراموں میں دکھائی دینے والا وہی ملک بھارت ہے جس کے بارے میں 2006ء میں سچرکمیٹی نے رپورٹ دی کہ کس طرح مسلمانوں کی زندگی اجیرن کردی گئی ہے۔شاہ رخ خان نے بھارتی دہشتگردوں کی دہائی دی اور وہاں کے وزیر داخلہ نے بے جی پی کا پول کھولا۔بھارتی خواتین کی چیخ و پکار سنیں تو آج کو معلوم ہوجائے گا کہ دنیا کی سب سے بڑی جمہوریت  میں عورتوں کے ساتھ کیا سلوک ہورہا ہے۔ 2008ء میں ممبئی اور دہلی میں پرائیویٹ کلینک چلانے والے ڈاکٹروں کے حوالے سے ایک رپورٹ شائع ہوئی جس میں بتایا گیا تھا کہ ہر تین سیکنڈ بعد ایک بچی کو قتل کردیا جاتا ہے۔قتل کا طریقہ یہ کہ ڈاکٹر بچی کی پیدائش سے پہلے ہی ماں کے پیٹ میں  ہی اسے مار دیتے ہیں اور اگر نومولود اس دنیا میں آجائے  تو بعض سفاک ڈاکٹر والدین کی رضامندی سے اس معصوم حوازادی کو تیزاب کے ڈرم میں ڈال دیتے ہیں۔ والدین پر خوف طاری ہے کہ ان کی بچی جوان ہو کر نہ صرف ان پر معاشی بوجھ بنے گی بلکہ  اس کی عزت بھی محفوظ نہیں ہوگی اور ان کے لئے زندگی بھر کا ایک روگ بن جائے گا۔ بھارتی سیاستدان پارلیمنٹ کے اندر عورتوں پر آوازے کستے ہیں اور غلیظ قسم کے القابات سے نوازتے ہیں۔شاہ رخ خان نے ایک مضمون میں اپنے احساسات کیا لکھے کہ اس کے بچوں کو قتل کرنے کی دھمکیاں ملنا شروع ہوگئیں۔ اب وہ بیچارہ محض مسلمان ہونے کی بنیاد پر ”شوسینا” کے جذبہ انتقام کا نشانہ بن رہا ہے اور ان کو خوش کرنے کے لئے طرح طرح کی تاویلیں پیش کر رہا ہے۔پاکستان کی ہاکی ٹیم نے بھارت کا کیا بگاڑا تھا۔ ان کو کھیلے بغیر واپس بھجوا دیا کہ جمہوریت کا تقاضا تھا کہ ہندودہشتگرد تنظیم خوش رہے اور تنگ نظر ہندوئوں  کے ووٹ حاصل کئے جاسکیں۔بھارتی وزیر داخلہ نے ثبوتوں کے ساتھ یہ راز فاش کیا کہ بھارت میں دہشتگردانہ کارروائیاں ہندو انتہا پسندوں کا ”اپنا کارنامہ” ہے لیکن وہ دہشتگردی کے ہر واقعہ کی ذمہ داری مسلمانوں پر ڈال دیتے ہیں۔ ہمارے میڈیا مداری کس تواتر کے ساتھ کشمیری مجاہدین کو رگڑا دیتے ہیں ۔جہاد کشمیر کو کس قدر حقارت اور ناگواری سے بیان کرتے ہیں اور کس ڈھٹائی کے ساتھ بھارت کو مظلوم اور مظلوموں کو ظالم ثابت کرنے پر ادھارکھائے رہتے ہیں۔ لیکن نصف صدی کے سب سے بڑے سچ کو سن کر ‘پڑھ کر اور جان کر بھی بھارت کے خلاف نہ کوئی زبان کھلی نہ ہی ”میڈیا ٹرائل” ہوا۔”امن کی آشا” نے آزادی صحافت کے کان میں کیا پھونکا ؟ مجرم ذہنیت کی بھارتی جماعتوں اور گروہوں کو خود بھارتی وزیر بے نقاب کرتا ہے لیکن پاکستانی میڈیا پھر سے نقاب ڈال دیتا ہے!ہر ٹی وی سکرین پر بھارتی ڈرامے’ بھارتی ناچ’ بھارتی اشتہارات ‘جی چاہتا ہے پتھر مار کر سکرین توڑ دیں لیکن پیمرا کی غیرت جاگتی ہے نہ اسلامی نظریاتی کونسل جیسے اداروں کو توفیق ہوتی ہے ‘ دنیا کی سب سے بڑی جمہوریت کو سرخی پائوڈر لگا کر ہمارے دل و دماغ میں ”رول ماڈل” کے طور پر پیش کیا جارہا ہے۔انشاء اللہ وہ وقت دور نہیں جو ان  نقالوں اور طبلچیوں کی گردنیں سچے پاکستانیوں کی گرفت میں ہوں گی۔