ترقی کے سارے اشاریے بیکار ہیں اگر ملک کے مفلوک الحال عوام کے حالات نہیں سدھرتے۔بین الاقوامی طورپر بھی اب سماجی رہنما اور دانشور اس نتیجے پر پہنچ چکے ہیں کہ ہر معاشرے اور ملک کو ترقی کے ایسے اہداف مقرر کرنے چاہیں جو غربت کے مستقل خاتمے کا سبب بنیں ۔اس کیلئے جہاں سماج کی کچھ اجتماعی ذمہ داریاں ہیں وہیں حکومتوں ،پالیسی سازاداروں اور سب سے بڑھ کر کاروباری اداروں کی ذمہ داریاں بھی بہت بڑھ گئی ہیں ۔دنیا میں جوں جوں دولت کی فراوانی بڑھتی جارہی ہے توں توں غربت میں بھی اضافہ ہوتا جارہاہے ۔بظاہر خیرات کرنے والے ملکوںاوراداروں کی کمی نہیں لیکن پھر بھی تعلیم،صحت اور تحفظ سے محروم طبقات کی تعداد میں اضافہ ہوتا جارہا ہے ۔ ایسا کیوںہورہا ہے؟

اسی سوال کاجواب ڈھونڈنے کیلئے راقم نے سماجی ذمہ داریوں کو نبھانے والے کاروباری گروپ یونائیٹڈ انٹرنیشنل گروپ اور اپنے ادارے پاکستان اکانومی واچ کے مشترکہ پلیٹ فارم سے اسلام آباد کے مقامی ہوٹل میں سیمینار کا انعقاد کیا ۔سسٹین ایبل ڈویلپمنٹ گولزاکیڈمی کا تعاون بھی حاصل تھا ۔ سینٹورس کے چیف ایگزیکٹو،سردار میڈیا گروپ کے مالک اور پنجاب انوسٹمنٹ بورڈ کے چئیرمین،بھائی کی طرح شفقت فرمانے والے ،محترم سردار تنویر الیاس خان سیمینار میں مہمان خصوصی تھے ۔جبکہ جنرل ریٹائرڈ نعیم خالد لودھی نے صدارت کی ۔ اکانومی واچ کے چئیرمین جناب بریگیڈئیر ریٹائیڑڈ محمد اسلم سیشن کو کنڈکٹ کررہے تھے ۔جہلم سے کاروباری شخصیت میاں نعیم بشیر بھی تشریف لائے ۔میجرجنرل ریٹائرڈ جاوید اسلم طاہر ، سابق سفیر میجرجنرل ریٹائرڈ آصف دریز اختر،سابق آئی جی اسلام آباد جناب سلیم طارق لون،این سی آر ڈی کے ڈائریکٹر جنرل اسرار محمد خان،تھنکرز فورم پاکستان کے چئیرمین بریگیڈیر ریٹائرڈ آصف ہارون راجہ،سماجی رہنما جناب ندیم ساجدمغل مع ٹیم ممبران تشریف لائے ۔ جڑواں شہروں کی کاروباری ،سماجی اور صحافتی شخصیات کی بڑی تعداد جمع تھی ۔سی ایس آر کلب کے احباب بھی موجود تھے ۔
یونائیٹٹد گروپ کے چیف ایگزیکٹو محترم میاں محمد شاہد درد دل رکھنے والے انسان ہیںاور ان کا گروپ سینکٹروں لوگوں کو روزگار فراہم کرتا ہے ۔میاں صاحب کی خواہش ہوتی ہے کہ وہ پس منظر میں رہیں لیکن کاروباری حلقوں میں سماجی ذمہ داریوں کے حوالے سے ایک سازگار فضا کو پروان چڑھایا جائے ۔ان کا گروپ اس سے پہلے لاہور اور کراچی میں بھی ایسے مفید سیمنیار کروا چکا ہے ۔وفاقی دارلحکومت میں یہ تیسرا بڑا سیمینار تھا ۔گروپ کے سٹاف ممبران نے آنے والے ہر مہمان کا پھولوں کے ساتھ استقبال کیا۔پروگرام تین بجے سہہ پہر شروع ہوا اور چھ بجے تک جاری رہا ۔ایکطرف جہاں مقررین نے غربت کے خاتمے کیلئے ترقی کے پائیدار اہداف پر روشنی ڈالی اور ان کو پورا کرنے میں کاروباری اداروں کی ذمہ داریوںسے آگاہ کیا وہیںشرکا نے انتہائی جچے تلے کمنٹس دیے اور قابل عمل تجاویز بھی دیں ۔تین گھنٹے تک سیمینار کی دلچسپی برقرار رہی اور ڈیڑھ سو کے لگ بھگ لوگ جم کربیٹھے رہے ۔اگر کمنٹس ،تجاویز اور سوالات کو اکٹھا کردیا جائے تو ایک مفید معلوماتی پمفلٹ بن سکتا ہے ۔
جنرل لودھی نے ذاتی تجربات کو ہلکے پھلکے انداز میںبیان کیا اور سیمینار پر زعفرانی رنگ طاری ہوگیا ۔ جنرل صاحب کا کہنا تھا کہ ہمیں کام کرناہوگا اور جس کا جو کام ہے اسے ہی موقع دیا جانا چاہیے ۔غربت کے خاتمے کیلئے جبتکہ ہم نظم وضبط کیساتھ مختلف پروجیکٹس پر کام نہیں کرتے ہماری تمام کوششیں ادھوری رہیں گی ۔جنرل لودھی نے مثالوں سے سمجھایا کہ کس طرح ملکی لیول پر شروع کئے جانے والے منصوبے ہماری غیر پیشہ وارانہ اور غیر ذمہ دارانہ رویوںکی وجہ سے متوقع نتائج حاصل نہ کرسکے۔سٹیج سیکریڑی محمد نعیم قریشی نے
بھی اسٹیج کو خوب سنبھالا ۔سردار تنویر الیاس خان نے سیمینار سے خطاب کرت ہوئے بڑی پر مغز باتیں کیں ۔انہوں نے کہا،
”غربت کے خاتمے کی ذمہ داری سے جان نہیں چھڑائی جاسکتی۔انسانوں کی فلاح مقدم ہونی چاہیے ۔معاشی طور پر معاشرے کو منصفانہ بنیادوں پر استوار کرنا بہترین پالیسی ہوتی ہے ۔اور اس مقصد کیلئے وقت دینا انسانیت کی سب سے بڑی خدمت ہے ۔ذمہ داری کا یہی احساس پائیدار ترقی کی بنیاد ہے ۔وفاقی اور پنجاب حکومت اپنی اس ذمہ داری کو نبھانے کیلئے نیک نیتی کیساتھ کوشاں ہے”
سردارصاحب کے خطاب کے بعد دعا کیساتھ سیمینار کا اختتام ہوا۔فوٹو سیشن ہوئے اور شرکا کی پرلطف ہائی ٹی سے مہمان نوازی کی گئی ۔

جمہوریت جُوں جُوں مستحکم ہورہی ہے سرمائے کا عمل دخل بھی بڑھتا جارہا ہے ۔لاہور کے حلقہ 122 میں حالیہ ضمنی انتخابات کے نتائج میں سے ایک نتیجہ یہ بھی نکلا ہے کہ دولت کو پانی کی طرح بہایا گیا ہے ۔ اگر ایک طرف پیسے کے ساتھ ساتھ اختیار اور اقتدار کا بے دریغ استعمال ہوا تو دوسری طرف حکومتوں کے اثرورسوخ کے مقابلہ کے لئے بھاری رقوم خرچ کی گئیں۔ ایک اندازے کے مطابق ڈیڑھ لاکھ ووٹروں کو پولنگ بوتھ تک لانے میں اربوں روپے خرچ ہوگئے۔الیکشن کمیشن کی طرف سے خرچ کئے گئے وسائل پر الگ بجٹ لگا۔ فوج’ پولیس اور دیگر سرکاری عملہ بھی پیسے کے بغیر حرکت نہیں کرسکتا۔ اگر تمام اخراجات کو جمع کر لیا جائے تو ایک ووٹر پر ہزاروں روپے خرچ ہوئے ہیں۔ جمہوریت اس قدر مہنگی ہوگی اس کا تصور تو شائد اس نظام کے بانیوں نے بھی نہیں کیا ہوگا۔ ابھی بلدیاتی انتخابات کا چل چلائو ہے اور ایک ایک اُمیدوار لاکھوں’ کروڑوں کے اخراجات کا تخمینہ لگائے بیٹھا ہے۔

الیکشن کمیشن کا ضابطہ اخلاق اپنی جگہ لیکن اس ضابطہ اخلاق کی صرف کاغذی حیثیت بچ گئی ہے ۔ یہ نہیں کہ الیکشن کمیشن کو ضابطہ اخلاق کی خلاف ورزی کی اطلاعات نہیں دی گئیں۔ بروقت اطلاعات فراہم ہونے کے باوجود الیکشن کمیشن بڑی خاموشی اور ڈھٹائی سے سرمائے کا کھیل ہوتا دیکھتا رہا۔ بالکل ایک بے حس یا بے بس تماشبین کی طرح!
پیارے پاکستان میں جمہوریت کو ایمان کا درجہ دے دیا گیا ہے۔ اگر اس نظام کے خلاف کوئی بات کرے تو اسے فوراً اسٹیبلشمنٹ کا ”پرزہ” قرار دے کر سماج دُشمن ثابت کردیا جاتا ہے۔ تمام شہری برابر ہیں۔ یہ ہمارا آئین کہتا ہے لیکن جمہوریت کے فیوض و برکات سے مستفیدہونے والے تمام شہری برابر نہیں ہیں۔ جس کے پاس جتنا پیسہ ہے اتنا ہی وہ جمہوریت سے فیضیاب ہوسکتا ہے۔ ہم نے کبھی نہیں دیکھا کہ اس جمہوری نظام نے کسی سفید پوش یا غریب شخص کو مستند اقتدار تک پہنچایا ہو۔ کہا جاتا ہے کہ جمہوریت کا علاج مزید جمہوریت ہے ۔ لیکن عملاً معاملہ بالکل الٹ ہے۔ پاکستان میں جب بھی انتخابات کی چھلنی لگتی ہے تو سماجی طور پر بدکردار ‘مالی طور پر کرپٹ اور سیاسی طور پر نااہل لوگ ہی اسمبلیوں میں پہنچتے ہیں۔ سینٹ کا تو اللہ ہی حافظ ہے ۔ سینیٹر بننے کے لئے کھلے عام بولیاں لگتی ہیں۔تناسب کے اعتبار سے اسمبلیوں کے اندر اہلیت کی بنیاد پر آنے والے آٹے میں نمک کے برابر ہیں۔ جب کالا دھن خرچ کرکے انتخابات جیتنا ہیں تو پھر ان اسمبلیوں سے حاصل کیا ہوگا۔ اربوں کھربوں کی کرپشن’ملک اور عوام گروی رکھ کر غیر ملکی قرضے۔آئی ایم ایف اور ورلڈ بینک کے آگے کشکول پھیلائے کھڑے رہتے ہیں۔
انتخابات میں برتری کا فلسفہ بھی ایک طرفہ تماشا ہے۔ جیت تو ایک ووٹ سے بھی جیت کہلائے گی۔ کسی کو کتنے ووٹوں سے جیت ملی ایک بے معنی سا سوال ہے۔ ایاز صادق ایک ووٹ سے جیتیں یا دس ہزار ووٹوں سے۔ان کی قومی اسمبلی کی نشست پر فرق نہیں پڑتا۔ جہاں گدھے گھوڑے کا ووٹ برابر ہے وہاں جیت گدھے کے ووٹ سے ہو یا گھوڑے کے ووٹ سے کیا فرق پڑ سکتا ہے؟
پُرامن انتقال اقتدار کے لئے جمہوری نظام کو آخری حل قرار دیا گیا ہے۔ اسلام نے باہمی مشاورت کی بنیادی ضرورت پر زور دیا ہے لیکن مشاورت کا کوئی طریقہ کار طے نہیں ہو سکا۔ البتہ اہل مشاورت کی اہلیت کے لئے امین اور صادق ہونے کی شرط عائد کی ہے۔آئین میں شق نمبر 62 اور 63 لاگو کرنے پر ثابت ہوا کہ اسمبلیوں میں پہنچنے والے اکثر نمائندگان خائن ہیں اور جھوٹ بولتے ہیں۔ لہٰذا اس شق سے بھی جان چھڑا لی گئی۔ اب تو سارے راستے کھلے ہیں۔ ہر انتخاب پر اخراجات کی حد بڑھتی جائے گی اور عام آدمی بھی اپنے ووٹ کی قیمت وصول کرنے پر مجبور ہوجائے گا۔ گنتی جب جمہوریت کی روح ہے تو پھر اہلیت کا مقام صفر ہے’ اقبال نے بہت پہلے یہ نکتہ سمجھا دیا تھا۔
جمہوریت اک طرز حکومت ہے کہ جس میں
بندوں کو گنا کرتے ہیں تولا نہیں کرتے

دہشت گردی اب کسی ایک مُلک یا قوم کا مسئلہ نہیں رہا۔ یہ ایک بین الاقوامی اشو بن چُکا ہے۔ پاکستان دہشت گردی کے عفریت سے بُری طرح متاثر ہوا ہے۔ افواج پاکستان کو دہشت گردوں کے خاتمے کا جو ٹاسک دیا گیا تھا وہ بڑی حد تک پورا ہوچکا ہے۔ فوجی نوعیت کی فتوحات قابل ذکر ہیں۔ضرب عضب کے تین اہداف مقرر کئے گئے تھے۔پہلا ہدف ان دہشت گرد گروہوں اور تنظیموں کے ٹھکانے ختم کرنے تھے جو اعلانیہ طور پر ریاست اور ملک کے خلاف برسرپیکار تھے۔ الحمد اللہ ہماری عسکری قوت نے ”ناقابل شکست ” سمجھے جانے والے ان گروہوں کا خاتمہ کردیا ہے۔ یہ بلوچستان کے علیحدگی پسند لشکر تھے یا اسلام کا نام استعمال کر کے اسلامی جمہوریہ پاکستان کو توڑنا چاہتے تھے دونوں قسم کے گروہ اپنے انجام کو پہنچ گئے ہیں۔ جو چند بچے ہیں وہ بھی فرار کی راہ اختیار کئے ہوئے ہیں۔ہمارے بہادر فوجی ان کی آخری پناہ گاہوں تک جاپہنچے ہیں۔دوسرا ہدف فرقہ وارانہ تنظیموں کی وارداتوں پر قابو پانا تھا۔مقام شکر ہے کہ ان کے وجود کو بھی نیست و نابود کردیا گیا ہے۔ اب ان کے اندر ہتھیار اٹھانے کی ہمت نہیں رہی اور ان کے ماسٹر مائنڈز کو مضبوط گرفت میں لیا جاچُکا ہے۔ مُلک میں ٹارگٹ کلنک کے اکا دُکا واقعات تو ہوتے ہیں لیکن ایسی انتہا پسند تنظیموں کا نیٹ ورک تباہ کردیا گیاہے۔ تیسرا اور اہم ترین ہدف دہشت گرد تنظیموں کی مالی معاونت اور معاون لوگوں کے گرد گھیرا تنگ کرنا تھا اس حوالے سے کراچی میں جو آپریشن ہورہا ہے اس کے ذریعے بڑے بڑے نامی گرامی لوگوں کو پکڑا جا چُکا ہے۔ چونکہ کرپشن انڈسٹری کے ذریعے ہی ان شدت پسند گروہوں کو مالی مدد فراہم کی جاتی تھی اس لئے مالی بدعنوانی کے ذرائع پر آہنی ہاتھ ڈالا گیا ہے ۔ قوم کو یقین ہے کہ کراچی میں آپریشن اپنے منطقی انجام تک پہنچ کر ہی ختم ہوگا۔
سوال یہ پیدا ہوتا ہے کہ کیا عسکری فتوحات دہشت گردانہ سوچ کو ختم کر پائیں گی۔ ایسا ہونا ممکن نہیں ہوتا۔ جب تک عمومی سوچ تبدیل نہیں ہوتی اور انتہا پسند مذہبی مفکرین کے ساتھ ڈائیلاگ نہیں ہوتا تب تک دہشت گردی کے مآخذ ختم نہیں ہوسکتے۔ طالبان فکر کے حامل گروہوں کو اس وقت بزور قوت دبادیا گیا ہے لیکن ان کے اندر کے دہشت گرد پر ہم فتح حاصل نہیں کرسکے۔ کہا جارہا ہے کہ بہت سے طالبان نے ”داعش” میں شمولیت اختیار کر لی ہے۔ داعش کی فکر ہرگز مقامی نہیں ہے۔یہ تنظیم کسی ردّعمل کے نتیجے میں سامنے نہیں آئی بلکہ اس کا ایک خاص فلسفہ ہے اور اس کے چاہنے والے امریکہ اور یورپ میں بکثرت موجود ہیںِ۔لیکن اس تنظیم نے پاکستان اور افغانستان جیسے غیر عرب ممالک میں بھی اپنے اثرات ظاہر کرنا شروع کردیئے ہیں۔ یہ ایک خالص نظریاتی جنگ ہے ۔”داعش” کی غیر انسانی کارروائیوں کو دیکھا جائے تو تاریخ اسلام بلکہ انسانی تاریخ میں ایسی بہیمانہ سرگرمیوں کی کوئی مثال نہیں ملتی۔ پاکستان نے دہشت گردی کے اس ابھرتے ہوئے خطرے سے نپٹنے کا کوئی بندوبست نہیں کیا۔یہ طالبان نہیں ہیں بلکہ طالبان سے دس گناہ خطرناک لوگ ہیں اور ان کے نزدیک ہم تمام پاکستانی واجب القتل ہیں۔
بوکو حرام کی کارروائیوں کی جھلک دیکھ کر انسان لرز اٹھتا ہے۔ اسی طرح داعش جس طرح قتل عام کرتی ہے اس سے بھی لرزہ طاری ہوجاتا ہے ۔ عالمی نیٹ ورک کی حامل اس تنظیم کو پاکستانی نوجوانوں کے ذہن متاثر کرنے کے لئے کسی مدرسے یا مسجد کی ضرورت نہیں۔سوشل میڈیا ان کا سب سے بڑا ہتھیار ہے۔ یورپ سے لڑکیاں ان داعشیوں کے ساتھ نکاح کے لئے شام اور عراق کا خطرناک سفر طے کرتی ہیں۔ یورپ کی آزاد زندگی ان کو روک نہیں سکتی۔یہ وہ حالات ہیں جن کا فکری انداز میں مقابلہ کیا جانا ضروری ہے۔سچ یہ ہے کہ ان کے فکری توڑ کے لئے کوئی کام نہیں ہوا۔ ادارہ منہاج القرآن نے کچھ کام کیا لیکن ڈاکٹر طاہر القادری دھرنا سیاست میں ایسے اُلجھے کہ پورا سال ضائع ہوگیا۔ شیخ الاسلام نے چھ سو صفحات پر مشتمل ایک فتویٰ تحریر کیا تھا جس میں امن کا ایک مکمل نصاب بھی دیا گیا تھا۔ کاش کہ اس نصاب کو ہر یونیورسٹی کالج اور سکول میں متعارف کروایا جاتا۔
اسے پاکستانی قوم کی خوش قسمتی کہیے کہ ڈاکٹر صاحب نے ہمت کرکے دوبارہ سے اس کام کو آگے بڑھانے کا اعلان کردیا ہے۔ڈاکٹر صاحب کے قریبی رفیق کار اور شعلہ بیان مقرر جناب عُمر ریاض عباسی نے گزشتہ روز مجھ سے رابطہ کیا اور مجھے 29جولائی کو ”دہشت گردی کے خلاف امن کے اسلامی نصاب” کی افتتاحی تقریب میں شرکت کی دعوت دی ہے۔ قبلہ ڈاکٹر طاہر القادری صاحب کی سیاست سے اختلاف کیا جاسکتا ہے لیکن ان کی قومی سوچ اور دینی فکر قابل غور ہوتی ہے۔ امن کے لئے اس نظریاتی جنگ میں ہر اس شخص کو ساتھ دینا چاہیے جو صرف پاکستان ہی نہیں بلکہ پوری دنیا میں امن کا خواہاں ہے۔ مسلم امت کو بغیر کسی تیاری کے ایک نہ ختم ہونے والی جنگ میں جھونک دیا گیا ہے جس کا انجام مسلمانوں کے لئے تباہی لا رہا ہے ۔امت مسلم کو اس عذاب سے نجات دلانے کے لئے ڈاکٹر صاحب کے اس صالح عمل میں ہماری قلمی کاوشیں حاضر رہیں گی۔ کیونکہ قرآن پاک کا حکم ہے ”نیکی اور پرہیزگاری کے کاموں میں ایک دوسرے سے تعاون کرو”۔

سوال یہ ہے کہ عوام اور سیاست کا آپس میں کتنا گہرا تعلق ہے۔اگر اس ملک کی آبادی بیس کروڑ مان لی جائے تو مئی 2013ء کے انتخابات میں انتخابی عمل میں حصہ لینے والے پاکستانیوں کی کل تعداد صرف ساڑھے چار کروڑ بنتی ہے۔یہ ساڑھے چار کروڑ لوگ کل آبادی کا صرف بائیس فیصد بنتے ہیں ۔ یعنی 78فیصد وہ پاکستانی ہیں جو مختلف وجوہات کی بناء پر اس انتخابی عمل سے دور رہے ہیں ۔ مرکز میں حکومت بنانے والی جماعت کو ڈیڑھ کروڑ لوگوںنے ووٹ دیا۔ صوبہ خیبر پختونخواہ میں حکمرانی کا حق حاصل کرنے والی جماعت کو پچھتر لاکھ ووٹ پڑے اور سندھ میں حکمران گروہ کے حصے میں 68لاکھ اور اسی طرح ایم کیو ایم اور آزاد امیدواران کو ووٹ ڈالے گئے ۔ ان تمام اعدادوشمار سے ایک بات ثابت ہوگئی کہ سیاستدانوں کا عوام کے صرف بائیس فیصد حصے سے تعلق ہے۔ باقی عوام کو نہ تو سیاست پر اعتماد ہے اور نہ ہی سیاستدانوںکو اپنا نجات دہندہ تصور کرتے ہیں ۔یا دوسرے لفظوں میں آپ یہ کہہ لیں کہ پاکستانی قوم کا بہت بڑا حصہ سیاسی نظام سے اس قدر مایوس ہوچکا ہے کہ انہیں اس سے کوئی غرض ہی نہیں کہ ملک میں فوج کی حکمرانی ہے۔(ن) کی حکومت ہے۔ طاہر القادری کا انقلاب یا عمران خان کا نیا پاکستانعام آدمی کو شکایت کیا ہے؟ سڑک بند ہے ‘دھوپ میں کھڑنا ہونا پڑتا ہے’ دل سے گالیاں نکلتی ہیں لیکن عام آدمی کچھ نہیں کرسکتا۔جلسہ ہے جلوس ہے۔مارکیٹ بند پڑی ہے ۔کاروبار ہو نہیں سکتا۔ گھر سے باہر نہیں نکل سکتے۔ دھرنے ہوتے ہیں تو مال و جان کا خطرہ منڈلانے لگتا ہے۔ ووٹ ڈالیں تو بھی مصیبت۔ نہ ڈالیں تو بھی مصیبت۔جب مصیبت ہی گلے پڑنی ہے تو ضرور ووٹ ڈال کر یہ مصیبت خریدنی ہے۔
مشرف دور سے پہلے عام لوگوں کا خیال تھا کہ چلیں اب کی بار فوج آئی ہے تو کم از کم سیاسی وارداتیوں سے نجات مل جائے گی۔کاروبار بڑھے گا’ بے روزگاری کم ہوگی اور روٹی چلتی رہے گی۔ لیکن مشرف کے اندرسے بھی بالآخر ایک سیاستدان برآمد ہوا اور یہی لوگ جو اب ”انقلاب” کے میمنہ و مسیرہ بنے دکھائی دیتے ہیں یہ باوردی مشرف کے دائیں بائیں جلوہ گر رہتے تھے۔ مشرف نے بھی لوگوں کو پکڑ پکڑ کر ریفرنڈم میں انگوٹھے لگوائے اور عوام جو پہلے ہی لاتعلق تھے مزید لاتعلق ہوگئے۔ پھر پی پی پی والے آگئے۔ اب نوازشریف ہیں اور عمران خان ایک صوبہ کی بجائے پورے مرکز پر حکمرانی کرنا چاہتے ہیں ۔ اس کے لئے وہ عوام کو ذہنی طور پر یرغمال بنانے کے لئے نت نئے نعرے گھڑتے ہیں۔دھاندلی دھاندلی کا شور مچا تے ہیں۔
سوات میں بجلی کے ایک منصوبے کا سنگ بنیاد رکھتے ہوئے انہوںنے عوام کو جھانسہ دیا ہے کہ ”اگر اقتدار ملا تو بجلی دو روپے فی یونٹ کردوں گا”۔ حاضرین نے تالیاں بجا کر اس اعلان کی داد دی کیونکہ حاضرین عام لوگ نہیں بلکہ پروفیشنل ووٹرز ہوتے ہیں جن کا کام بوقت ضرورت ”شیم شیم”اور ”ویلکم ویلکم” کے نعرے لگانا ہوتا ہے۔ جانتے وہ بھی ہیں کہ دو روپے میں تو ٹافی نہیں آتی پھر بجلی کا یونٹ کیسے آئے گا لیکن پارٹی کے ساتھ وفاداری کا تقاضا ہے کہ لیڈر کے ہر جھوٹ کو ”الہام” سمجھ کر سنا جائے ۔
خیبرپختونخواہ کے وزیراعلیٰ نے کہہ دیا ہے کہ وہ اپنی بجلی اپنے پاس رکھیں گے اور پنجاب
کو بجلی نہیں دیں گے۔ اس پر بھی تالیاں بجائی گئیں۔
جناب ڈاکٹر طاہر القادری کی پارٹی کو چونکہ ووٹ نہیں ملتے اس لئے انہوں نے مسلح انقلاب کا راستہ اختیار کرلیا ہے۔ ان کی ملازم خواتین اور ان کی نظریاتی پیروکار بچیوں نے اپنے قد سے بڑے بڑے ڈنڈے ہاتھوں میں لے لئے ہوئے ہیں۔
عام آدمی نے گزشتہ 68برسوں میں ہر طرح کے نعرے سنے’ہر طرح کی تحریکیں بھگتیں’ہر طرح کی جمہوری اور اسلامی جماعتوں کا پلو پکڑا۔لیکن حالات بدلے تو صرف لیڈروں کے بدلے ہیں۔ عام آدمی نے تو گھر کا سامان یا زمین کا قطعہ بیچ کر جان ہتھیلی پر رکھ کر دیار غیر کا قصدکیا یا ملک میں رہتے ہوئے ہی بے روزگاری اور غربت کو صبر سے گلے لگائے رکھا ہے۔ عام آدمی کو یہ بھی معلوم نہیں کہ عمران خان کہاں کا غریب ہے۔ جو خود بیرون ملک پڑھتا رہا۔ جس کے بچے باہر پڑھتے ہیں جس کا سینکڑوں ایکڑ اراضی پر پھیلا فارم ہائوس ہے۔ اس کے پاس یہ دولت کہاں سے آئی؟ ان کے والد گورنمنٹ ملازم تھے۔ ان کی تنخواہ میں پانچ مرلے کا گھر نہیں بن سکتا تھا پھر یہ زمان پاک کی کوٹھیاں اور ایچی سن کی فیسیں کون ادا کرتا رہا۔
ملک کے اندر سیاسی طبقہ اس قدر متحرک ہے کہ وہ چند ہزار ہو کر بیس کروڑ لوگوں کو یرغمال بنائے ہوئے ہیں۔ ذہنی ‘معاشی اورجسمانی طور پر یرغمالی عوام کس سے فریاد کریں ۔بقول شاعر بچ کر اب کہاں جائیں اس سیاسی جنگل میں۔ ایک طرف درندہ ہے ایک طرف شکاری ہے!
کوئی حل تو نہیں لیکن ایک طریقہ ہے کہ عام لوگ اپنے خالق حقیقی سے التجا کریں ۔نماز استسقاء ادا کریں’الٹے ہاتھ کرکے گڑ گڑائیں۔ یا رب اس بستی کو امن کی بستی بنا دے۔جہاں ہم سکون کے ساتھ اپنے بچوں کے ہمراہ زندہ ہی رہ سکیں!

میڈیائی فضاءمیں طالبان ‘مذاکرات‘ شہید‘نیٹو سپلائی ڈرون ‘جہاد اور امن جیسے عنوانات چھائے ہوئے ہیں۔خدا نہ کرے محرم الحرام کے ماہ میں کوئی سانحہ پیش آئے‘ اگر ایسا ہوا تو پھر لاشیں‘ خون اور آگ کے نظارے بھی ٹی وی سکرینوں پر چھا جائیں گے۔یہ بھی ممکن ہے کہ حکومت طالبان مذاکرات کے لئے کوئی ٹیم تشکیل پائے اور ہمارے اینکرپرسنز پورا مہینہ اسی پانی میں مدھانی ڈال کر بیٹھے رہیں۔ غرض یہ کہ ذرائع ابلاغ جنہیں عوام کا ترجمان ہونے کا دعویٰ ہے وہ چند مخصوص واقعات‘لوگوں اور گروہوں کے لئے ہی وقف رہے۔حکومت ایسے حالات میں بڑی مطمئن رہتی ہے۔اور بڑی خاموشی سے مہنگائی کے جن کے ہاتھ پاﺅں کھول دیتی ہے۔آئی۔ ایم۔ایف جیسے اداروں سے مذاکرات کامیاب ہوجاتے ہیں اور غریب کو مارنے کے تمام تیر بہدف نسخے بھی آزما لئے جاتے ہیں

۔اللہ جانے امریکہ کو حکیم اللہ محسود سے کوئی دشمنی تھی یا پاکستان کے عوام سے۔اچھا خاصا مہنگائی کے خلاف شورشرابا شروع ہوا تھا۔تحریک انصاف نے (چاہے بلدیاتی انتخابات میں بہتر نتائج کے لئے ہی سہی ‘مہنگائی کے خلاف تحریک چلانے کا اعلان تو کر ہی دیا تھا۔امید تھی کہ عوامی غیض وغضب کے مبینہ خوف سے شائد پٹرول اڑتالیس پیسے کی بجائے چار پانچ روپے سستا ہوجاتا لیکن امریکی ڈرون نے اس ملک کے عوام سے کونسا بدلہ لیا کہ راتوں رات فضاءہی بدل گئی۔غریب اپنی ترجمانی کے خواب ہی دیکھتے رہ گئے اور مہنگائی کی جگہ ”شہادت“ نے لے لی۔جوں ہی ذخیرہ اندوزوں اور ان کے سرپرست محکموں‘ افسروں اور باوسیلہ لوگوں نے ذرائع ابلاغ اور تحریک انصاف کو عوامی مسئلہ کی طرف سے غافل پایا‘مہنگائی کے میزائل برسانا شروع کردیئے۔پاکستان میں گراں فروشی اور عوام دشمنی کے ایسے ”ہنی مون پیریڈز“ سال میں کئی بار آتے ہیں‘بلکہ جب سے نون لیگ کی پژ مُردہ حکومت نے معاملات کو چھوا ہے‘مہنگائی ‘فحاشی کی طرح پھیلتی جارہی ہے اورفحاشی مہنگائی کی طرح اچھل کود کر رہی ہے۔خیال تھا اور میرا خیال نہیں عام آدمی کا خیال تھا کہ بے وقعت روپے کے ساتھ گوشت کا تصور ہی ختم کردینا چاہیے اور عید بقر کے علاوہ پورا سال ”ہندو“ بن جانا چاہیے۔اگر ایسا کریں گے تو چلیں دال ساگ ہی سہی‘پیٹ تو بھرتا ہی رہے گا۔لیکن مرض بڑھتا گیا جوں جوں دُعا کی کے مصداق یہ خواب بھی جوئے شیر لانے والا خواب ثابت ہوا۔دو تین دنوں میں مرچ‘ساگ اورپیاز ‘مرغی سے مہنگے کردیئے گئے۔روٹی نے آٹھ روپے سے چھلانگ لگائی اور دس تک جاپہنچی اور یہاں بھی رکی نہیں۔ مانسہرہ میں پندرہ روپے کی فروخت ہوئی اور روٹی کی یہ دوڑ جاری ہے۔غریب نے سوچا ہو گا کہ دو ٹماٹر لے کر چٹنی ہی بنا لیں گے لیکن ٹماٹر ایک سو ساٹھ سے لے کر دو سو روپے تک چلاگیا اور یوں چٹنی پیاز کا ”شاہانہ طرز ضیافت“ بھی صرف امراءکے لئے مختص ہوگیا۔”کیلا پچاس روپے درجن‘ ایک سوروپے کے دو درجن لے جاﺅ“ اتوار بازار میں ریڑھی بان کو یہ آواز لگاتے سن کر ہمارے ایک دوست اس کے قریب گئے اور ہاتھ باندھ کر اس سے کہا” ذرا آہستہ بولو۔ اگر حکومت کو پتہ چل گیا تو یہ بھی ہماری پہنچ سے دور چلا جائے گا“۔ بہرحال آجکل کیلا سستا ہے اور ہوسکتا ہے کہ جناب شہباز شریف لاہوریوں کو ہدایت کردیں کہ دال روٹی اور مرغ چھوڑو اور تین وقت کیلے کھایا کرو۔ آپ میاں برادران سے کچھ بھی توقع کرسکتے ہیں۔ڈرونز گرانے ہیںیا نہیں۔یہ جہادیوں اور فسادیوں کا معاملہ ہے۔امریکہ خود بھی بہت بڑا فسادی ملک ہے۔یہ اوپر والے طبقات اور تخت پاکستان پر قبضہ کے خواہش مندوں کے کھیل ہیں۔غریب آدمی کو اس جنگ سے صرف ”خوف“ ہی ملنا ہے۔ڈرون گرائیں یا نہ گرائیں‘لیکن ٹماٹر ضرور گرالیں۔

قارئین اکرام! میں آپ سے دست بستہ پہلے تو معافی مانگتا ہوں۔میں نے مسلم لیگ (ن) کے انتخابی نعروں اور وعدوں سے متاثر ہو کر ”خوشخبریاں آنے لگیں“ کے عنوان سے کالم لکھا اور اپنے طور پر یقین کر لیا تھا کہ اب عوام الناس کی معاشی حالت بہتر ہوجائے گی۔لیکن گزشتہ دنوں کے پے در پے ایسے حکومتی اقدامات سامنے آئے ہیں کہ مجھے اپنے لکھے ہوئے لفظوں پر شرمندگی ہورہی ہے اور میں ایک بار پھر سے ”حقیقت پسندی“ کی پرخار وادیوں میں الجھ گیا ہوں۔پنجاب فورم نے حکومت سے مطالبہ کیا ہے کہ بھارت کی طرز پر پاکستان میں بھی غرباءکے لئے فوڈ سیکورٹی بل پارلیمنٹ میں لایا جائے اور غریبوں کے لئے سستی دال روٹی کا قانون بنا دیا جائے۔ میں نے اخبارات میں شائع ہونے والی یہ خبر پڑھی تو مجھے سخت افسوس ہوا۔آج پاکستان کے اقتصادی حالات اس نہج پر پہنچ گئے ہیں

کہ روٹی جیسی عام خوراک بھی عام پاکستانیوں کی دسترس سے باہر ہوگئی ہے۔کبھی یہی پنجاب تھا جو پورے متحدہ ہندوستان کو خوراک فراہم کرتا تھا اور پاکستان بننے سے لے کر دو چار ماہ قبل تک کم از کم روٹی کی قیمتیں کنٹرول میں تھیں ۔لیکن آخر یہ کونسی معاشی مہارت ہے جس کے نتیجے میں روٹی کی قیمت ہی کنٹرول میں نہیں آرہی۔زمین اپنی‘ پانی اپنا‘ کھاد کے کارخانے اپنے‘کھاد کے لئے استعمال ہونے والی گیس اپنی‘تندور ٹیکنالوجی اپنی‘ تندورچی اپنے‘ گندم کو آٹے میں تبدیل کرنے والی ملیں بھی پاکستان میں ہی بنتی ہیں۔آخر کیا وجوہات ہیں کہ ہماری اپنی روٹی بھی ہمارا ساتھ نبھانے پر تیار نہیں۔روٹی کا سرکاری طور پر طے کیا گیا وزن ایک سو بیس گرام ہے۔ اور شریف برادران کی حکومت سے قبل یہ روٹی چار یا پانچ روپے میں مل جاتی تھی۔ اب روٹی کا وزن ستر گرام کردیا گیا ہے لیکن قیمت آٹھ روپے تک پہنچ گئی ہے۔خیبرپختونخواہ میں بیس روپے تک روٹی فروخت ہورہی ہے۔آخر کونسی آفت آگئی ہے کہ موجودہ حکومت کے معاشی ماہرین پاکستانیوں کی بنیادی خوراک کو بھی چھین رہے ہیں ۔یہ بات سمجھانے کی ضرورت نہیں کہ سات افراد پر مشتمل کنبہ اگر فی کس روزانہ چار روٹیاں کھاتا ہے تو روزانہ کی کتنی رقم صرف روٹی پر خرچ ہوگی اور ماہانہ ایک کنبے کو چھ ہزار یا دس ہزار روپے میں کس طرح روح اور جسم کا رشتہ برقرار رکھنے کا سلیقہ آئے گا۔ورلڈ بینک اور ورلڈ فوڈ پروگرام نے اپنے تازہ سروے میں انکشاف کیا ہے کہ پاکستان کی ساٹھ فیصد آبادی پہلے ہی کم خوراکی کا شکار ہے۔ صوبہ سندھ‘بلوچستان اور خیبرپختونخواہ میں خوراک کی بدترین صورتحال ہے۔ان صوبوں کے دیہی علاقوں میں مفلوک الحال عوام کو دور سے دیکھیں‘ لگتا ہے ایتھوپیا میں آگئے ہیں۔ایک زرعی ملک کی یہ حالت ہے کہ ماﺅں کو اپنے حصے کی روٹی اپنے بچوں کو دینا پڑ رہی ہے تاکہ بچوں کو کم از کم پیٹ بھر کر کھانا میسر آسکے۔جنوبی پنجاب کے حالات بھی بھوک زدہ ہیں۔ اب جو مہنگائی کا ایک تازہ طوفان ہماری بستیوں میں آیا ہے۔ تو اس کا نتیجہ بھوک سے اموات کی صورت میں نکل رہا ہے۔ سفیدپوش تو بجلی اور گیس کے بل ادا کرتے کرتے ”پھانک“ ہونے والے ہیں‘لیکن جھونپڑیوں اور کچے گھروں میں زندگی گزارنے والے اپنی ہاتھوں سے بوئی جانے والی گندم کی بالیوں کو چھونہیں سکیں گے کہ روٹی کی قیمت بڑھتے بڑھتے امریکہ جتنی ہوجائے گی۔ آمدن صفر اور خوراک کی قیمت نیویارک جیسی! یہ کیسا معاشی انقلاب ہے!وزیرخزانہ جناب اسحاق ڈار صاحب بھی گندم کی روٹی کھا کر ہی بڑے ہوئے اور ایک بار پھر وزیرخزانہ بن گئے۔انہوں نے قوم کو خوشخبری دی ہے کہ ڈالروں کی بارش شروع ہوگئی ہے۔ بین الاقوامی مالیاتی اداروں کو پاکستان کی معاشی اصلاحات پر اعتماد آگیا ہے۔ ڈار صاحب کی ہر خوشخبری عوام کے لئے نیا ڈر لے کر آتی ہے۔دنیا بھر میں خوراک‘ بجلی اور گیس کی فراہمی پر حکومتیں سبسڈی دیتی ہیں ورنہ حکومتوں کی ضرورت ہی کیا رہ جاتی ہے۔لیکن ہمارے وزیر خزانہ ”سبسڈی“ والی لعنت سے قوم کو نجات دلانا چاہتے ہیں اور آئی ایم ایف کے منافع کو یقینی بنانے کے لئے دال روٹی کی قیمت بڑھائے جارہے ہیں۔جو غریبوں کے منہ سے نوالے چھینتے ہیں وہ ڈار نہیں صرف ڈر ہوتے ہیں اور ڈر اور خوف قوموں کو اٹھاتا نہیں بلکہ نفسیاتی اور جسمانی طور پر بیمار کر دیتا ہے۔ بیس کروڑ افراد میں سے اٹھارہ کروڑ بھوکے پاکستانیوں کا بوجھ ڈار صاحب کے کندھوں پر ہے!

ہر پاکستانی خوف زدہ ہے ۔انجانے خوف نے دل ودماغ پر قبضہ جما رکھا ہے۔ جو ہے وہ چھن جانے کا خوف‘ راہ چلتے لٹ جانے کا خوف‘ٹارگٹ کلرز کے ہاتھوں قتل ہوجانے کا خوف‘بھتہ خوروں کی باہمی چپقلش کا شکار ہوجانے کا خوف‘کسی خودکش دھماکے میںہلاک ہوجانے کا ڈر‘دشمن کے حملے کا کھٹکا‘غربت اور مہنگائی کے ہاتھوں رسوائی کا عفریت‘عزتوں کی پامالی کا دھچکا‘اولاد کے اغواءہوجانے کا احتمال۔ کسی مفتی کے ہاتھوں کنگال ہوجانے کی فکر۔جو خوشحال ہیں انہیں بدحال ہوجانے کا وسوسہ‘جو بااختیار ہیں انہیں بے اختیارہوجانے کے خدشات۔ کون ہے جو اس خوف سے بچا ہوا ہے۔رات پہلو بدلتے گزرتی ہے کہ ابھی ڈاکو گھس آئیں گے اور دولت لوٹیں گے۔ایسا خوف جو ہر روز بڑھتا ہے کم نہیں ہوتا۔یہ بستی چھوڑ جانے کو عقل اکساتی ہے۔

ایک دل ہے جو پاکستان کے لئے دھڑکتا ہے۔ ایئرپورٹ پر انٹرنیشنل فلائٹس چیک کریں۔ ہر روز سینکڑوں نہیں ہزاروں لوگ ڈالروں سمیت بیرون ملک فرار ہورہے ہیں۔ملک چھوڑ کر بھاگنے والوں کو کسی دلیل سے روکنا ممکن ہی نہیں ۔سمجھ دار وہی ٹھہرے ہیں جو خود اگر دوہری شہریت حاصل نہیں بھی کرسکے تو کم از کم اپنے بچوں کے لئے انہوں نے یہ سہولت حاصل کر رکھی ہے۔یہ ملک صرف لٹیروں اورلٹنے والوں کے لئے رہ گیا ہے۔یا پھرغریب ووٹ ڈالیں اور سیاستدان ان پر حکومت کریں۔تارکین وطن بھی اپنے بڑھاپے میں حکمرانی کا چسکا پورا کرنے پاکستان آسکتے ہیں اور وزیراعظم اورگورنر وغیرہ بن سکتے ہیں۔کراچی جل رہا ہے ۔کراچی قتل گاہ ہے۔ کراچی کرائم سٹی بن گیا ہے۔کراچی کی بات ہی کیا یہاں تو اسلام آباد جیسے شہر میں بھتہ خوروں کے درجنوں گروہ برسرپیکار ہیں۔طالبان نے تو بھتہ خوری کو باقاعدہ انڈسٹری کی شکل دے دی ہے اور انہوں نے اس صنعت سے ہونے والی آمدن کو ریگولیٹ کرنے کے لئے چارٹرڈ اکاﺅنٹینٹس بھی رکھ لئے ہیں۔بھتہ خوری متبادل معیشت کا نقشہ پیش کر رہی ہے۔ایماندار کاروباری‘اگر کہیں ہیں تو سوچنے لگے ہیں کہ حکومت کو ٹیکس دینا بہتر ہے یا طالبان کو بھتہ دینا زیادہ اچھا ہے۔ لوگوںکو اب یہ شکایت کرنے کی جرات نہیں وہ تو ٹیکس اور بھتہ دونوںادا کرنے پر آمادہ ہیں انہیں صرف جان کی امان مل جائے لیکن یہی امان تو وہ جنس ہے جو آج قائداعظمؒ کے اس پاکستان میں نایاب ہوتی جارہی ہے۔لوگ لمحہ بھر کے لئے سوچیں کہ پاکستان جس حالت خوف میں ہے‘اسے کیا کہتے ہیں؟ آخر عذاب اور کس کو کہتے ہیں۔کیا یہ خوف عذاب الٰہی نہیں ہے۔کیا اللہ تعالیٰ کی ذات ہم پاکستانیوں سے اس قدر نالاں ہوگئی ہے کہ اس نے بیس کروڑ مسلمانوں کو چند ظالم گروہوں کے سامنے بے بس کردیا ہے۔اتنی بڑی منظم اور مسلح فوج‘ خفیہ ایجنسیاں‘پنجاب پولیس جیسی پولیس‘ آئی ٹی کی جدید ترین سہولتیں۔سب کچھ ہوتے ہوئے ہم خوف کی اس حالت سے باہر نہیں آپارہے اور ہمارے حزن میں روز بروز اضافہ ہوتاجارہا ہے۔ پہچانیئے کہ یہ عذاب الٰہی تو نہیں ہے۔کہیں ہم بحیثیت مجموعی اللہ اور اس کے رسول صلی اللہ علیہ وآلہ وسلم کے واضح احکامات کی صریحاً خلاف ورزی بلکہ بغاوت کے مرتکب تو نہیں ہورہے۔جب تک ہم اپنے پورے شعور کے ساتھ اپنے کرتوتوں سے تائب نہیں ہوتے اور اللہ کی طے کردہ حدود کے اندر رہ کر زندگی گزارنے کے عہد نہیں کرتے ہم کبھی اس خوف سے باہر نہیں آسکیں گے۔ کوئی لیڈر‘کوئی دانشور‘کوئی مذہبی عالم ہمیں اس عذاب سے نجات نہیں دلا سکتا۔ ہمیں اللہ کی طرف رجوع کرنا ہوگا۔حقوق اللہ اور حقوق العباد کو پہچاننا ہوگا اوراللہ کی اس نافرمانی کو ترک کرنا ہوگا۔قرآن حکیم قوموں کی زندگی میں خوف کو عذاب سے تعبیر کرتا ہے۔ ہمیں قرآنی وارننگز کو سامنے رکھنا ہوگا۔

Click here to View Printed Statement

عقل محو تماشاہی رہی اور عشق نے چھلانگ لگا دی۔ دانش مندی اور معاملہ فہمی کا تقاضا تو یہی تھا کہ ایک غیر تربیت یافتہ’جسمانی طور پر ان فٹ اور اسلحہ کے اعتبار سے مکمل طور پرنہتا شخص ایک مسلح’بپھرے ہوئے اور مرنے مارنے پر تلے بیٹھے پاگل کو قابو کرنے کی کوشش نہ کرتا بلکہ ایسا سوچنا بھی حماقت کے زمرے میں آتا ہے۔ عقلمندوں کے نزدیک کوئی احمق آدمی جس کوجان بوجھ کر اپنی جان ضائع کرنے کا شوق ہو وہی ایسی حرکت کرسکتا ہے۔

اگر خدانخواستہ سکندر نامی پاگل کی گولی زمرد خان کو لگ جاتی اور اس کے نتیجے میںخان صاحب کو جانی نقصان ہوجاتا تو پاکستانی قوم کو مایوسی کے سوا کیا ملتا۔ یہ سارے دلائل اپنی جگہ وزن رکھتے ہیں۔لیکن مملکت پاکستان کو دہشتگردوں اور مسلح پاگلوں نے  جس طرح آگے لگا رکھا ہے اور عقل مند ان کے مقابلے پر بے بس دکھائی دیتے ہیں۔ایسی صورت میں عام پاکستانی کا دل دُکھتا بلکہ خون کے آنسو روتا ہے۔ پندرہ اگست کی رات بلیو ایریا کے چائنا چوک پر حافظ آباد سے تعلق رکھنے والے ایک حواس باختہ درندے اور اس کی شاطر بیوی نے جس طرح دارالحکومت کی اعصابی فضاء کو اپنے قابو میں جکڑے رکھا اس پانچ گھنٹے کے اعصاب شکن منظر کو دیکھ دیکھ کر لوگوں کے اندر غصے اور حیرت کے جذبات بھڑکتے رہے۔ ٹی وی چینلز کا کردار تو ہمیشہ منفی ہی رہتا ہے۔ لیکن اس رات منفیت کی آخری حدوں کو چھو رہا تھا۔ سچ تو یہ ہے کہ میڈیا نے اس پاگل کو پانچ گھنٹے تک تحفظ فراہم کئے رکھا۔ پولیس کو کوئی کارروائی کرنے کے لئے موقع ہی نہیں دیا گیا۔گولی کی پہنچ چار سو میٹر تک کارگر ہوتی ہے اور میڈیا کی فوج ظفر موج پاگل کے قریب تر ہونے کے لئے بضد رہی اور پولیس بیچاری کو ہاتھا پائی پر مجبور کردیا۔پولیس کی اپنی حکمت عملی تھی وہ اپنے ٹارگٹ کو اعصابی طور پر مجروح کرنا چاہتی تھی لیکن ذرائع ابلاغ کے طعنوں’اور اشتعال انگیزیوں کے سامنے سیکورٹی ادارے بے بس ہوگئے تھے۔اسلام آباد کے شہری بھی تماشا دیکھنے موقع پر موجود تھے۔پیپلزپارٹی کے رہنما جناب زمرد خان جو جوانی میں اسلحہ چلانے کے ماہر بتائے جاتے ہیں وہ ہمیشہ سے بہادر تھے۔لیکن پولیس کو انہوں نے اپنی آمد کا جو مقصد بتایا وہ یہی تھاکہ ”پاگل ”کو اس کے بچوں کا واسطہ دے کر ہتھیار ڈالنے پر قائل کردیا جائے۔پولیس نے ”پاگل” کی بیوی کے ذریعے جناب زمرد خان کا تعارف کروایا اور جب ”پاگل” بات چیت پر آمادہ ہوگیا تو جناب زمرد خان مذاکرات کے لئے اس کے پاس چلے گئے۔اور پھر اچانک جو ہوا وہ عقل کو دنگ کردینے والا منظر تھا۔پاکستان کو زخمی کرنے والے دہشتگرد پاگلوں اور پاگل دہشتگردوں کو یہ احساس ہوگیا ہوگا کہ پاکستانی قوم میں زمرد خان بھی ہوتے ہیں جن کی قومی غیرت کو گوارا نہیں کہ کوئی اسلحہ کے زور پر شہر اور ملک کو یرغمال بنائے اور یہ نڈرلوگ  نتائج کی پرواہ کئے بغیر مسلح ہاتھوں کو مروڑ سکتے ہیں۔اگر زمردخان اس پاگل پر نہ چھپٹتا تو بھی پولیس گھٹنے بھر کے بعد آپریشن پر گزرتی لیکن زمرد خان کی ”ادا” ایک ریفرنس بن گئی۔ہماری ڈوبتی قومی حمیت کو زمردخان کی ہمت نے سہارا دے ڈالا۔جو معرکے عقل اور حقیقت پسندی سے سرنہ ہو رہے ہوں انہیں سر پھرے لوگ ہی سر کرتے ہیں۔ عقل مندوں کی دنیا چاہے زمرد خان کے اس عمل کو احمقانہ عمل قرار دیتی رہے لیکن دھڑکتے دلوں کی آواز زمرد خان کے ساتھ دھڑکتی رہے گی۔ پاکستان کے حالات کا تقاضا ہی یہی ہے کہ جنون’عشق اور جذبے والے چند سرپھرے لوگ آگے بڑھیں اور قوم کو حوصلہ فراہم کریں ۔بہادری حکمت پر غالب آئی۔زمرد خان کو کسی اعزاز کی نہیں فقط دعائوں کی ضرورت ہے اورملک کو چند زمردخانوں کی ضرورت !۔

Click here to View Printed Statement

افغان آرمی چیف جنرل شیر محمد کریمی پاکستان پر الزام عائد کرچکے ہیں کہ افغان طالبان اسلام آباد کے کنٹرول میں ہیں۔پاکستان چاہے تو افغان جنگ کا خاتمہ چند ہفتوں میں ہوسکتا ہے۔پاکستان میں ڈرون حملے یوں ہی نہیں ہوتے بلکہ پاکستان نے پاکستانی طالبان کی فہرست امریکی حکام کے حوالے کی ہے جن کو امریکہ ڈرون حملوں کے ذریعے نشانہ بناتا ہے۔جنرل کریمی کے اس بیان کو پاکستان کیخلاف ایک ہمسایہ مسلم ملک کی طرف سے ایف آئی آر قرار دیا جاسکتا ہے۔ اس بیان میں چھپے ہوئے زہر کے اثرات جلد سامنے آنے شروع ہوجائیں گے۔ اس بیان سے یہ بات بھی کھل کر سامنے آرہی ہے کہ پاکستانی طالبان کی درپردہ نہیں بلکہ کھلے عام مدد افغان آرمی کی طرف سے جاری ہے۔مولوی فضل اللہ تو افغانستان کے صوبے نورستان میں ہی پائے جاتے ہیں۔خودکش حملہ آور اور ان کی تربیت کے تمام سراغ بھی افغان سرزمین سے ہی جڑتے ہیں۔

جنرل کریمی نے ڈرون حملوں کے حوالے سے پاکستانی عمل دخل کا شوشہ چھوڑ کر دراصل پاکستانی طالبانکی نہ صرف پیٹھ ٹھونکی ہے بلکہ انہیں پرتشدد کارروائیوں کے لئے جواز بھی گڑھ کردے دیا ہے۔یہ جانتے ہوئے بھی کہ اکثر ڈرون حملے حقانی نیٹ ورک سے منسلک رہنمائوں پر ہوتے ہیں اور افغان صدر حامد کرزئی کے بقول یہ حقانی نیٹ ورک پاکستان کے کنٹرول میں ہے ۔پھر بھی افغان حکومت تماشہ لگانے سے باز نہیں آئی۔اہل فکر و نظر بخوبی جانتے ہیں کہ افغان حکومت کے منہ میں بھارت کی زبان ہوتی ہے۔افغان نیشنل آرمی کی ”تربیت” بھارتی انسٹرکٹر کر رہے ہیں اور وہاں کی سڑکیں اور دیگر انفراسٹرکچر پر بھارت اربوں ڈالر خرچ کرچکا ہے۔دوحہ میں طالبان کے ساتھ مذاکرات کا ڈھنڈورا امریکہ پیٹتا رہتا ہے۔امریکیوں کو اپنی ایک لاکھ سے زائد فوج 2014ء تک افغان حدود سے باہر نکالنی ہے ۔کرزئی صاحب چاہتے ہیں کہ امریکی یہاں سے واپس نہ جائیں اور حامدکرزئی کی کرپٹ حکومت یوں ہی جلوہ گرہ رہے۔لیکن امریکیوں کو جناب کرزئی سے جو کام لینا تھا وہ لے چکے اب انہیں ”باعزت”واپسی چاہیے اور اس ”باعزت” واپسی کے لئے انہیں اصلی طالبان سے مذاکرات کی مجبوری ہے۔افغانستان کے چند بڑے شہر چھوڑ کر باقی ماندہ علاقے پر طالبانی پرچم لہراتے ہیں اور وہاں ملاں محمد عمر کا فرمان چلتا ہے۔امریکیوں کو علم ہے کہ جناب کرزئی کی نیشنل آرمی طالبان کے سامنے شائد چند ماہ بھی نہ نکال سکے اور یوںامریکہ پر یہ الزام آئے کہ اس نے افغانستان کو ایک بار پھر بے یارومددگار چھوڑ دیا ہے۔طالبان کون ہیں۔اب یہ بار بار دہرانے کی ضرورت نہیں ہے کہ تقریباً تمام پختون آبادی کی طالبان کو حمایت حاصل ہے۔ جب کابل میں کابل میں پختون دشمن لابیاں حکمران ہیں تو ظاہر ہے وہاں کی اکثریت پختون قوم کرزئی کو اپنا دشمن سمجھتی ہے۔یہی وجہ ہے کہ چالیس ممالک کی افواج ملکر بھی طالبان کا کچھ بگاڑ نہیں سکتیں اور طالبان جب چاہتے ہیں صدارتی محل پر ہلہ بول دیتے ہیں۔ امریکی بیس میں گھس کر تباہی مچا دیتے ہیں۔طالبان کو کنٹرول کرنا ایک لطیفہ ہی ہوسکتا ہے ۔ وہ افغانستان کے فرزند اور آزادی کے متوالے افغان ہیں۔ اگر ان کا کنٹرول پاکستان کے ہاتھ میں ہوتا تو افغانستان پر کبھی امریکی یلغار نہ ہوتی۔طالبان حکومت کے پاس پاکستان کی آئی ایس آئی کے لوگ ہی نہیں گئے’پاکستانی علماء کے وفود بھی گئے تھے کہ جناب اسامہ کو آپ ملک بدر کردیں تاکہ جنگ کی نوبت نہ آئے’ لیکن جناب ملاں عمر کا ایک ہی جواب تھا کہ وہ ہمارے مہمان ہیں اور ہم مہمان کو جانے کا نہیں کہہ سکتے ۔طالبان کسی کے کنٹرول میں نہیں۔ جناب کرزئی اور امریکہ کو بالآخر انہی طالبان سے مذاکرات کرکے اقتدار ان کے حوالے کرنا پڑے گا۔یہ کام آج نہیں تو کل ضرور ہوکر رہے گا۔

Click here to View Printed Statement

خون ہی خون ہے۔ دو چار دن کے وقفے کے بعد پاکستانی سوچنے لگتے ہیں کہ شائد قاتلوں اور دہشتگردوں کو رحم سا آگیا ہے۔ ایک موہوم سی اُمید پیدا ہونے لگتی ہے لیکن اُمید کی ڈوری کا سرا پوری طرح تھام نہیں پاتے کہ پھر کسی چوک’ کسی چوراہے پر انسانی جسم کے خون میں لتھڑے ہوئے ٹکڑے ملتے ہیں۔ کوئی جلی لاش کسی ایمبولینس میں رکھی جارہی ہوتی ہے۔ بم دھماکہ’ریموٹ کنٹرول دھماکہ’ خودکش دھماکہ’ ٹارگٹ کلنگ’ بوری بند لاش’ اغوائ’ ہماری سماعتوں میں خوف ہی خوف بھر جاتا ہے۔ ایک پوری فضاء سوگوار ہوجاتی ہے۔صف ماتم لپیٹنے کی فرصت ہی نہیں رہتی۔ہر انسان کش کارروائی کی ذمہ داری قبول کرنے والے ببانگ دہل اخبارات اور ٹی وی والوں کو فون پر بتاتے ہیں کہ جیتے جاگتے انسانوں کو چیتھڑوں میں تبدیل کرنے کا کارنامہ فلاں گروپ نے سرانجام دیا ہے۔ عورتیں’بچے’بوڑھے’ شیعہ’سنی’ مسلم’ غیر مسلم ۔کوئی بھی تو محفوظ نہیں ہے۔وردی اور شیروانی ‘امیر  اور غریب سب ہی قتل گاہوں میں سربریدہ پڑے ہیں۔ بڑے بڑے دل گردے والے ٹی وی پر مقتولوں کی چلنے والی فوٹیج دیکھ نہیں پاتے۔ آگ اور خون کا یہ گھنائونا کھیل کب ختم ہوگا؟

یہی وہ سوال ہے جو شعور اور لاشعور میں سماء گیا ہے۔ پوری قوم نفسیاتی مریض بن گئی ہے۔اُمید تھی کہ جناب میاں محمد نوازشریف کی شرافت کی بدولت شائد خون بہانے والوں کو شرم آجائے۔نہ ڈرون گرانے والوں کو شرم آئی اور نہ ہی بے گناہ پاکستانیوں کو بارود سے اڑانے والوں کو احساس ہوا۔ پاکستان کے لئے دونوں قوتیں’ دونوں نظریات’دونوں گروہ  بے رحم قاتل ثابت ہورہے ہیں۔طالبان کے ہمدرد بھی ان کی درندگی کی بھینٹ چڑھ گئے۔جناب عمران خان کی حق گوئی اور امریکی جنگ کی شدید ترین مخالفت بھی طالبان نامی گروہ کو غارت گری سے باز نہ رکھ سکی۔عام پاکستانی یہ سوچنے میں حق بجانب ہے کہ کیا یہ ملک زندگی اور سرمائے کے لئے محفوظ بھی ہے یا نہیں۔جہاں اوسطً روزانہ دو درجن سے زائد لوگ قتل کردیئے جائیں اور یہ عمل گزشتہ بارہ برس سے متواتر چل رہا ہو اور پچاس ہزار سے زائد انسان اس آگ میں جل چکے ہوں اور یہ ” قتل عام” کہیں تھمنے کا نام نہ لیتا ہو’وہاں زندگی کیسی اور خوشحالی کا تصور کیسا؟۔اگر یہ خانہ جنگی ہے توخانہ کس کا تباہ ہورہا ہے؟ ہمارے عسکری  اور سیاسی آکابرین آج تک سائے کا تعاقب کررہے ہیں۔آخر کوئی تدبیر کاگرکیوں نہیں ہوتی۔یہ قوم کس کے ہاتھ پہ لہو تلاش کرے۔ امریکی محفوظ ہیں ‘برطانوی محفوظ ہیں’عشرت کدے محفوظ ہیں’ بے حیائی کو پھلانگتے فیشن شو ہر روز منعقد ہوتے ہیں۔سودخور یہاں ہیں ‘اسمگلرز یہاں ہیں’ذخیرہ اندوز کھلے عام دھندہ کر رہے ہیں معاشرہ  کے سارے مجرم آزاد ہیں۔زندگی کی رعنائیوں سے پوری طرح لطف اندوز ہورہے ہیں ۔طالبان انہیں کچھ نہیں کہتے وہ جب مارتے ہیں تو ملک کے محافظوں کو مارتے ہیں۔پاکستان کی تنصیبات پر حملہ کرتے ہیں ۔پاکستان کے دوست ملک کو ٹارگٹ کرتے ہیں ۔شیعہ سنی فساد کو بھڑکاتے ہیں۔آخر ان کا ایجنڈا کیا ہے؟ حکومت ان کے اصل روپ سے پردہ چاک کیوں نہیں کرتی اور اگر وہ ریاست سے زیادہ طاقتور ہیں تو ہر روز مرنے کی بجائے عوام کو سچ بتا دیا جائے ۔دعوے اور جھوٹے وعدے پہلے رحمان ملک کیا کرتے تھے اور اب شائد یہ ناخوشگوار فریضہ جناب چوہدری نثار کو ادا کرنا پڑ رہا ہے۔اگر یہ گروہ فتنہ ساز ہیں اور ہم سب حق پر ہیں تو پھر اعلان جنگ کیوں نہیں ہوتا۔خدارا پاکستان کو قتل گاہ بنانے والوں کے خلاف اعلان جنگ کریں اور فتنہ  سازوں کو واصل جہنم کرکے واپس لوٹیں۔ لیکن پہلے یہ بتا دیں کہ یہ واقعتاً پاکستانی ہیں جو گمراہ  ہوگئے ہیں یا دشمن ممالک کے کارندے ہیں؟ کوئی تو بات کریں جس سے ہمارے آنسو تھم جائیں!۔

Click here to View Printed Statement

کائنات کا دولھا انسان اللہ پروردگار عالم کی تخلیق کا بہترین شاہکار ہے۔ رب کائنات نے اسے نعمتوں کے اتنے انبار عطا فرما دیے کہ جنہیں دیکھ کر ذرا سا غور کرنے پر ہمیں اللہ نظر آنے لگتا ہے۔ اللہ خود اپنے کلام میں فرماتا ہے”تمہارے نفوس میں میری نشانیاں موجود ہیں تو کیا تم ان پر غور نہیں کرتے“۔

ہم اپنی ذات سے ذرا باہر نظر دوڑائیں تو سورج‘ چاند‘ ہوا‘ پانی ‘ستارے آسمان‘زمین اور جانور سب کے سب قدرت کی نشانیاں ہونے کے ساتھ ساتھ حضرت انسان کی ایسے خدمت میں جتے ہوئے ہیں جیسے ان کا ہم سے بہت بڑا کام پھنسا ہوا ہے۔ ان پر نگاہ دوڑا کر یوں محسوس ہوتا ہے کہ جیسے سورج چمکتا‘چاند دمکتا‘ستار روشن‘ سمندر موجزن‘ ہوائیں چلتی‘ پھول کھلتے‘پھل پکتے اور جانور سواری و غذا کے لئے پیدا ہی ہمارے لئے کئے گئے ہیں۔ احساس کچھ یوں ہوتا ہے کہ جیسے ہم آقا ہیں اور یہ ہمارے خدمت گزار حالانکہ اصل صورتحال اس کے برعکس ہے۔ ان سب سے پوچھیے کہ اگر انسان نہ ہو تو تمہاری صحت پر کیا اثر پڑے گا تو یہ سب کہیں گے ہماری بلا سے۔ مگر انسان ان کے بغیر ایک پل بھی زندہ نہیں رہ سکتا۔
غرض ساری کائنات اپنا کام مالک حقیقی کی مرضی کے عین مطابق کر رہی ہے مگر انسان ہے کہ ظالم بھولا ہوا ہے۔
گھوڑے کو مالک صرف چارہ ہی ڈالتا ہے تو وہ اس کے بدلے اس کے لئے لڑ کر اپنی جان دے دیتا ہے۔ مگر انسان اپنے مالک کا بڑا ناشکرا ہے اور اس کی وجہ سورہ عادیات میں جو بتائی گئی وہ ہے مال سے بے پناہ محبت:
دنیا میں کسی ادارے کا مالک تیوری چڑھا لے تو ملازم فوراً ہاتھ باندھ کر کھڑا ہوجاتا ہے مگر کارخانہ قدرت کا حکم کئی بار جھنجوڑ چکا مگر ہم اس کی کوئی پرواہ نہیں کرتے۔آذان کی پکار تو ہمارے کانوں سے ٹکرا کر واپس چلی جاتی ہی رہی ہے لیکن اب تو ہم چھوٹے عذابوں کی ایک سیریز کو اپنی آنکھوں سے دیکھنے کے باوجود بھی راہ حق کی طرف جانے سے کترا رہے ہیں۔
وہ ہمیں بار بار اپنے کلام میں بتا چکا ہوں کہ میں نے یہ تمام کائنات تمہارے لئے مسخر کردی ہے مگر تم کو اپنے پیار کے لئے پیدا کیا ہے۔ وہ واضح طور پر آگاہ کرتا ہے کہ تمہاری تخلیق کا مقصد میری محبت اورمیری مخلوق سے پیار ہے۔
وہ خبردار کرتا ہے کہ اگر تم مجھ سے محبت نہیں کرو گے تو میں عنقریب تمہاری چھٹی کروا دوں گا اور تمہاری جگہ ایسی قوم پیدا کروں گا جو کہ مجھ سے محبت کرے گی اور میں ان سے محبت کروں گا۔
وہ کہتا ہے کہ میں تم سے رزق روزی نہیں مانگتا۔رزق رساں تو میں ہوں۔ اس لئے تمہاری روزی کا میں سامان کروں گا تم تو بس میری طرف پیار کی نگاہ اٹھا کر کبھی دیکھ ہی لیا کرو۔
وہ ہم کو بار بار اپنی نعمتوں کی یاددہانی کراتا ہے کہ شائد نگاہ ان کی طرف مبذول کرے تو نگاہ شکریہ اوپر بھی اٹھا لے۔مگر ہمارا حال تو یہ ہے کہ گائے نے اگر دودھ پلایا ہے تو ہم نے اسے ماتا بنا کر اسی کے آگے سر تسلیم دل خم دیا۔اللہ کو ہم سے گلا ہے کہ گوبر اور خون کے درمیان سے ظالمو تم کو خالص دودھ تو میں نے پلایا ہے اور تم نے ساقی پر نگاہ کرنے کے بجائے برتن کے آگے سر نیاز جھکا دیا۔ جبکہ گائے کو تو یہ خبر بھی نہیں کہ یہ سارا نظام کیسے چل رہا ہے۔ رب کا فرمان ہے کہ سورج اور چاند کو سجدہ کرنے والو اسے پہچانو جس کے ہاتھ میں ان کی رسی ہے۔
دنیا میں ماں جب بچے کو نہلا دھلا کر نئے کپڑے پہنا کر سامنے کھڑا کرتی ہے اور پوچھتی ہے کہ سب کچھ کس نے دیا ہے تو بچہ اگر صرف اتنا کہہ دے کہ ”ماں تو نے“ تو صرف اتنا کہنے پر ہی ہم نے کئی بار دیکھا ہے کہ وہ بچے کو درجنوں بوسے دیتی ہے۔ یہی حال مالک کا ہے جب بندہ نہا دھو کر آئینہ کے سامنے کھڑا ہو اور یہ کلمات ادا کرے کہ اللہ تیرا شکر ہے تو مجھے خوبصورت شکل عطا فرمائی۔ میری سیرت کو بھی خوبصورت بنا دے تو عرش سے آواز آتی ہے۔ ”بندے جا تیری اس خوبصورت بات پر میں نے تیرے پچھلے گناہ معاف کردیئے“۔ وہ فرماتا ہے کہ اگر نعمت کا شکر ادا کرو گے تو نعمتوں کی بارش کردوں گا اور ناشکری کرو گے تو میرا عذاب بہت سخت ہے۔
اللہ نے ہمیں مختلف انداز سے یاددھانیاں کروائی ہیں کہ شائد انسان اپنے محبوب حقیقی کی طرف نظر التفات کرلے۔وہ فرماتا ہے کہ جب تم ماں کے بطن سے گود مادر میں آئے تو کچھ نہیں جانتے تھے۔ یہ سمع و بصر اور دل ودماغ جس پر تم اتنا اتراتے ہو میں نے عطا فرمائے ۔ایک طرف تو ان نعمتوں کا تذکرہ کیا عام لوگوں کیلئے تو دوسری طرف میڈیکل سائنس کے ماہرین کو بتایا کہ تم نے آج یہ ثابت کیا ہے کہ انسان کو پہلے سماعت ملتی ہے بعد میں بصارت مگر رب العالمین نے چودہ سو سال قبل ہی یہ حقیقت اپنے نبی صلی اللہ علیہ وآلہ وسلم کی زبان سے جاری فرما دی تھی۔
وہ ہمارے کئی بھائیوں کو ان میں سے کچھ عطا نہیں بھی فرماتا۔شائد اس لئے کہ آنکھوں سے محروم کوئی شخص جب گلی گلی سے یہ پکارتا گزرے کہ” آنکھوں والو! آنکھیں بڑی نعمت ہیں“ تو ہمیں ان کے نعمت ہونے کا واقعتاً احساس ہوجائے آپ غور فرمائیں تو نوزائیدہ بچہ نہ بول سکتا ہے نہ رفع حاجت کرنے کے قابل ہوتا ہے۔غلاظت کے اس ڈھیر کے لئے دودھ کی نہروں کے علاوہ ماں کے دل میں اتنا پیار بھی ڈال دیا کہ وہ ساری غلاظتیں اپنے دامن میں لے لیتی اور بچے کو صاف ستھری جگہ ڈالتی۔میں تو اس کو اس طرح دیکھتا ہوں کہ دنیا میں جو ماں کا کردار ادا کر رہی ہے وہ ماں نہیں بلکہ دائی ہے اصل ماں (پالنے والی ذات) تو وہ ہے جس نے اس دائی کے دل میں اتنا پیار ڈالا ہوتا۔ سرکار صلی اللہ علیہ وسلم نے بھی اللہ کے پیار کو ماپنے کے لئے ماں کے پیار کا پیمانہ استعمال کیا۔ آپ کسی سفر پر جا رہے تھے کہ ناگہاں کسی عورت کا بچہ کھو گیا۔ وہ بڑی بے چینی کے عالم میں پاگلوں کی طرح اسے ڈھونڈتی پھر رہی تھی۔ کافی وقت بعد وہ اسے اچانک نظر آیا تو اس نے بچے کو اپنی بانہوں میں جکڑ کر اسے بے شمار بوسے دیے۔ ایسی کیفیت میں حضور صلی اللہ علیہ وآلہ وسلم نے صحابہ کو اس کی طرف اشارہ کرتے ہوئے فرمایا کہ دیکھو تمہارا رب تم سے اس ماں سے بھی ہزاروں گنا زیادہ پیار کرتا ہے جب قرآن فرماتا ہے کہ ماں باپ کے سامنے اف تک نہ کہو تو میں سوچتا ہوں کہ جب ہم اس ماں کے سامنے اف نہیں کہہ سکتے تو اس حقیقی ماں کے سامنے اف کیسے کہہ سکتے ہیں اور اس کے حکموں کو پا کر ان کی نافرمانی کرنے کی جسارت کیسے کرسکتے ہیں۔ میں انسان میں موجود اعضاءاور نظام کو دیکھ کر کبھی کبھی خیال کرتا ہوں کہ جانے وہ خود کتنا پیارا ہوگا جس کی تخلیق اتنی پیاری ہے۔
انسان کے اندر اور باہر کے ماحول میں یہ نشانیاں ہم سے کچھ کہتی ہیں ۔ گاڑی میں جانے والا مسافر اپنے دوست کو دیکھ کر جب رومال لہراتا ہے تو اس کی حرکت سے دیکھنے والے کو ایک نتیجہ نکالنا ہوتا ہے اگر کوئی رومال کی رنگت‘ اس کی دھاریوں‘ اس کے کپڑے کے معیار پر غور کرنے لگے تو زمانے والے اسے احمق کہیں گے۔دراصل اس طرح کرنے سے اس کا مقصد اس کی توجہ اپنی جانب مبذول کروانا ہوتا ہے۔
اگر کوئی مہمان کسی کے گھر کھانا کھانے کے وقت سب باتوں کو لاجک سمجھ جائے کہ بلب میں روشنی پاور ہاﺅس سے آرہی ہے۔ پھول جو گلدانوں میں سجائے گئے ہیں یہ اس طرح گلدانوںمیں نہیں اُگتے بلکہ باغ سے لائے گئے ہیں۔بادلوں کو دیکھ کر ان کا سارا فلسفہ بیان کردے۔ غرض ہر چیز کے بارے بڑی عقل مندی سے متاثر کن کرتا جائے۔ کھانے پر بھی بڑی سیرحاصل گفتگو کر ڈالے مگر کھانا کھانے کے بعد میزبان کا شکریہ ادا کیے بغیر چلائے تو کوئی شخص بھی ایسے شخص کو عقلمند نہیں کہے گا۔ عقل بہت بڑی چیز ہے اس کی بنیاد پر انسان اشرف المخلوقات کے درجہ پر فائز ہوا ہے مگر یہی عقل اگر کسی جسم سے نکال دی جائے تو وہ پاگل کہلائے گا۔ یاد رہے کہ عقل اگر وحی کی روشنی سے ہٹ کر فیصلے کرے گی تو یہ باولی کہلائے گی۔خدا کا فرمان بھی کچھ اسی طرح سے ہے کہ جب میرے بندے آسمانوں اور زمین کی تخلیقات میں غور کرتے ہیں تو نتیجہ بے فکر کے طور پر بے ساختہ یہ کہہ اٹھتے ہیں کہ اے رب تو نے یہ سب بے کار پیدا نہیں کیا۔ وہ کہتے ہیں کہ رب تو پاک ہے ہم کو آگ سے بچا کر اپنا دیددار نصیب فرما۔ بقول شاعر
تیری جنت کو یا رب کیا کروں
آرزو ہے تجھے دیکھا کروں

یہ ایک انوکھی تقریب تھی۔آج پاکستان میں ہر طرف خون کی آندھیاں چل رہی ہیں اور پورا ملک قتل گاہ بن چکا ہے۔ مسلمان ایک دوسرے کو کاٹ رہے ہیںاورغیر مسلم سہمے ہوئے اپنی جانیں بچانے کی غرض سے ہمسایہ ممالک میں پناہیں ڈھونڈ رہے ہیں۔مولوی’ مفتی’علامہ’ قاری اور قاضی اور قادری کا نام آتے ہی ایک عجیب سا خوف دامن گیر ہوجاتا ہے ‘مذہب’مدرسہ’ مسجد’جبہ و دستار اور منبرومحراب دہشت کی علامتیںبنا دی گئی ہیں۔کون’ کب’ کہاں کسی کو موت کے گھاٹ اتار دے کچھ اندازہ نہیں ہوسکتا۔شیعہ محفوظ نہ دیوبند ی پرسکون۔یہ تو مسلمانوں کے مختلف مسالک کا حال ہے’ بیچارے غیر مسلم کہاں اور ان کی صدائیں کہاں۔ ایسے خونیں حالات میں جہاں اعتماد اور اعتقاد دونوں مشکوک ہوجائیں وہاں قاضی حسین احمد مرحوم کی یاد میں تقریب گویا نفرتوں میں جلتی ملت کے لئے تھوڑی دیر سستانے اور ذہنی طور پر پاکیزگی اختیار کرنے کا ایک نادر موقعہ تصور کیا جانا چاہیے۔

”قاضی صاحب کی زندگی اور ان کی جدوجہد پر سرسری سی نگاہ ڈالیں تو ہمیں معلوم ہوجائے گا کہ مرحوم ان ہستیوں میں شامل تھے جو اپنے رب سے راضی اور رب ان سے راضی ہوا۔ایسے انسانوں کو قرآن”’نفس مطمئنہ”قرار دیتا ہے۔ ایسے صالح افراد رنگ’نسل’علاقے’مذہب’قومیت اور اسٹیٹس سے بالاتر ہو کر صرف اور صرف انسانوں کی اصلاح اور بھلائی کے لئے اپنی تمام تر صلاحیتیںوقف کردیتے ہیں۔یہی وہ طرز زندگی ہے جس کو دیکھ کر’پرکھ کر مسلمان’ ہندو’مسیحی’ سکھ اور پارسی سب قوموں اور قبیلوں کے نمائندے جماعت اسلامی کے سابق امیر اور ملی یکجہتی کونسل کے سابق صدرمحترم قاضی حسین جنت نصیب کے ساتھ محبت اور عقیدت کا اظہار کرتے تھے اور ان کی رحلت پر صرف جماعت کے کارکن نہیں’ تمام سیاسی و مذہبی جماعتوں کے سربراہوں نے افسوس کا اظہار کیا اور اقلیتوں کے تمام نمائندوں نے دعائے مغفرت کی اور مرحوم کے لواحقین سے اظہار یکجہتی کیا۔ حاضرین’ اتحاد ملت کی پہچان قاضی حسین کے لئے آج ورلڈ مینارٹیز الائنس کے کنوینئر اور مسیحی برادری کے ساتھ ساتھ بلکہ پاکستان کے ہر مظلوم شہری کی آوازجناب جے سالک نے تعزیتی اجلاس کا انعقاد کرکے فرض ادا کیا ہے”
راقم نے پریس کلب اسلام آباد میں منعقدہ اس تقریب میں اپنی گفتگو ختم کی تو جناب جے سالک نے گرج دار اور پرجوش لہجے میں قاضی حسین احمد مرحوم کے ساتھ بیتے دنوں کی یادیںتازہ کرتے ہوئے کہا’
”ظالمو قاضی آرہا ہے” کا نعرہ دراصل میری مسیحی برادری کا بھی نعرہ تھا۔ لفظ ”ظالمو” حکمران طبقہ کے لئے تھا۔ ایک ایسا طبقہ جس نے غریب کا لہو نچوڑا اور پاکستان کے مجبور اور مقہور لوگوں کو محرومیوں کی دلدل میں دھکا دے دیا۔ جب کبھی بھی اس طبقہ کے خلاف کوئی تحریک اٹھے گی۔قاضی کا نعرہ اور چہرہ دونوں ہمارے لئے روشنی کا سبب بنیں گے”۔
قاضی حسین احمد کے بیٹے اور لب و لہجے اورسوچ اور انداز بیان میں ہو بہو اپنے والد مرحوم کا نمونہ جناب آصف لقمان قاضی نے حاضرین کو بتایا کہ جب قاضی صاحب اپنے گھر نوشہرہ میں جایا کرتے تھے تو اقلیتی لوگ ان سے ملاقات کرنے ضرور آتے اور وہ ہمارے گھر میں مہمان کی بجائے میزبان ہوتے۔ قاضی صاحب سچے عاشق رسولۖ تھے اور وہ اکثر کہتے کہ محمد رسول اللہ صلی اللہ علیہ وآلہ وسلم صرف مسلمانوں کے لئے نہیں بلکہ تمام انسانوں کے لئے رحمت الالعالمین تھے اور آپۖ کے پیروکاروں کو تمام انسانوں کی زندگیوں کو سنوارنے کے لئے جدوجہد کرنی چاہیے”۔
ملی یکجہتی کونسل کے ڈپٹی سیکرٹری جنرل جناب ثاقب اکبر نے حاضرین کو بتایا کہ جب ملی یکجہتی کونسل کا نام رکھا جارہا تھا تو خاص طور پرلفظ ملی استعمال کیا گیا کہ ملت میں تمام پاکستانی شامل ہیں۔ قاضی صاحب نے کئی بار کہا کہ یہ کونسل یہ صرف مسلمانوں کے اندر اتحاد اور یکجہتی کے لئے نہیں بلکہ غیر مسلموں اور مسلمانوں کے درمیان بھی اخوت اور محبت پھیلانے کا ایک پلیٹ فارم ہے۔سینکڑوں کی تعداد میں آئے حاضرین نے اس وقت سب کو حیران کردیا جب سٹیج سے ”قاضی حسین احمد زندہ باد” کا نعرہ لگوایا گیا مسیحی اور مسلمان سب نے بیک وقت اور بلند آہنگ ہو کر قاضی زندہ باد کی آواز بلند کی ۔تقریب ختم ہونے لگی تو جے سالک پھر مائیک پر آئے اور ڈبڈباتی آنکھوں اور گلوگیر آواز کیساتھ کہا کہ قاضی حسین احمد ہمارے لئے ایک مسیحاکا درجہ رکھتے تھے’ خداوند کریم ان کے درجات بلند فرمائیں۔