ہمارے والدین ”کرپشن” کے لفظ سے واقف نہیں تھے۔ قیام پاکستان کے بعد رشوت ستانی کی اصطلاع عام ہوئی تھی۔ بعض بیوروکریٹس کے بارے میں مشہور تھا کہ وہ بہت بڑے رشوت خور ہیں۔ تقسیم کے وقت جھوٹے کلیم بنانے اور ان جعلی کاغذات کے عوض رشوت لے کر زمینیں اور جائیدادیں الاٹ کرنے والوں کا چرچا رہتا تھا۔ جب عدالتی نظام پھیل گیا تو بعض ججوں کے بارے میں بھی خبریں آنا شروع ہوئیں کہ فلاں جج رشوت خُور ہے۔ رشوت ستانی ایک ایسا الزام اور جُرم تھا کہ عام لوگ کسی راشی افسر کو دیکھ لیتے تو کُھلے عام بیزاری کا اظہار کرتے دکھائی دیتے تھے۔ بعض دفاتر کے اندر ”رشوت لینے اور دینے والے دونوں جہنمی ہیں” کی حدیث مبارکہ جلی حروف میں لکھی ہوئی تھی۔ رشوت خوری کیخلاف سماجی اور مذہبی جماعتیں مہمات بھی چلاتی تھیں۔ رشوت خور عہدیدار کے ساتھ کوئی معزز شہری اپنی بیٹی بیاھنے پر تیار نہیں ہوتا تھا۔ پولیس افسران کے خلاف رشوت کے مقدمات بننے شروع ہوئے

اور یہ لطیفہ بھی عام ہوا کہ ”رشوت لینے کے جُرم میں پکڑا جانے والا رشوت دے کر چھوٹ جاتا ہے”۔ اُردو اخبارات کے کالم نگار حکومتوں کو یہ کہہ کر جھنجھوڑتے تھے کہ ملک میں رشوت کا ”چلن ”عام ہوگیا ہے۔ دھیرے دھیرے رشوت ستانی ہمارے سماج اور مزاج کا حصہ بن گئی ہے۔انسداد رشوت ستانی کے محکمے بنائے گئے ۔ قانون میں تبدیلیاں لائی گئیں ۔ایوب خان کے دور میں کوٹے اور پرمٹ کا کلچر عام ہوا۔ معلوم ہوا ہے کہ رشوت تو بہت ہی معصوم سا گناہ ہے۔ پرمٹ حاصل کرنے والوں نے دن دُگنی رات چُگنی دولت سمیٹنا شروع کردی۔ بہت سے نو دو لیتے پیدا ہوگئے۔
جب رشوت خور کی اصطلاح بدعنوانی کے وسیع معنوں کا احاطہ کرنے سے قاصر ہوئی تو پھر ہم نے لفظ ”کرپٹ” مستعار لے لیا۔پہلے پہل کسی کو ”کرپٹ”کہتے ہوئے لہجہ دھیما اور محتاط ہوتا تھا۔
”کرپٹ” ہونے کا مطلب”اخلاقی” طور پر بدیانتی سمجھی جاتی تھی۔ کسی افسر کو ”کرپٹ” کہنے کا مقصد یہ تھا کہ یہ شخص انتہائی قسم کا شبابی کبابی ہے۔ پھر وقت بدل گیا اور جنرل یحییٰ خان اور ذوالفقار علی بھٹو کا دور آیا۔ اخلاقی بدیانتی اور شراب و شباب بڑے لوگوں کا معمول ٹھہرائے گئے۔ دائیں بازو کے دانشوروں نے ”پینے پلانے” اور ناپاک رشتوں کو ”ذاتی” فعل قرار دے دیا۔ ایک نئی فکری واردات کی گئی۔ بتایا گیا کہ اصل ”کرپشن” تو مالی کرپشن ہوتی ہے۔”مالی کرپشن” کا فلسفہ امریکہ’ یورپ اور روس کی مادر پدر آزاد تہذیب نے گھڑا تھا۔ فحاشی و عریانی”کرپشن” کی تعریف سے نکل گئی۔ بداخلاقی فیشن بن گیا اور مردوزن کے غیر اخلاقی اختلاط کو ”معمول” سمجھ لیا گیا۔ اسلامی معاشرے میں سب سے بدترین شخص ”زانی” سمجھا جاتا تھا۔ لیکن پاکستان کی کرکٹ ٹیم کے بعض کھلاڑیوں کو کُھلی چھوٹ مل گئی۔ بعد میں یہی کھلاڑی ہمارے قومی ہیرو بنے اور عورتوں کے ساتھ ان کے ناجائز تعلقات سے معاشرے نے نگاہیں پھیرے رکھیں۔ اسلام میں ”زانی” کی سزاسو دُرے ہیں۔ لیکن ”ہیروازم” کے اسیر عوام نے اس جُرم کو بھی ”ہیرو کی شان” سمجھ لیا۔ مسلم معاشروں میں کسی بدکار شخص کو نفرت اور حقارت کی نگاہ سے دیکھا جاتا تھا لیکن جب ہمارے ہیرو سیاستدان بن گئے تو ان کی تمام مبینہ اور کھلے عام بدکاریوں کو ماضی کی خطا سمجھ کر معاف کردیا گیا۔
ہمارے سماجی روّیے تیزی سے بدلنے لگے ہیں۔اس وقت ہم اُسے ”کرپٹ” کہتے ہیں جیسے یورپ ”کرپٹ” سمجھتا ہے۔ ہمارے نزدیک ”کرپشن”کی وہی تعریف معتبر ہے جو یورپی تہذیب میں معتبر ٹھہرتی ہے۔ آج پاکستان میں ہر بچہ’عورت اور مرد”کرپشن کرپشن ”کی گردان سُن رہا ہے۔نئی نسل کے ذہن میں بٹھایا جارہا ہے کہ ”کرپشن” کا مقصد آف شور کمپنی بنانا ہے۔مالی بدعنوانی اور بدکاری میں زمین آسمان کا فرق ہوتا ہے۔
قارئین! اب کسی کو کرپٹ کہنے سے اُس کے چہرے پر شرمندگی نمایاں نہیں ہوتی۔ کیونکہ وہ سمجھتا ہے کہ کہنے والا اُس کی ”بدکاری” کے بارے میں نہیں بلکہ ”مالی معاملات” کے حوالے سے کوئی الزام لگا رہا ہے ۔حالانکہ جو شخص اخلاقی بدعنوانی یا ”مورل کرپشن” کا مرتکب ہوگا وہی ہر طرح کی کرپشن کرسکتا ہے۔آپ کے نزدیک آج جتنے بڑے بڑے”کرپٹ” ہیں دراصل وہ پہلے اخلاقی طور پر بھی کبھی پاک صاف نہیں رہے۔ یہ ہونہیں سکتا کہ کوئی شخص اخلاقی طور پر دیانتدار ہو اور مالی طور پر بددیانت۔جو فرد اپنے اللہ کے ساتھ ایماندارانہ رویہ نہیں رکھتا وہ ریاست’عوام اور دُنیا کے ساتھ ایمانداری کا برتائو کیسے کرسکتا ہے۔اور آخر پہ یہ بھی عرض کرتا چلوں کہ’
جہاں قرآن مجید کا واضح حکم ہے کہ ایک دوسرے کا مال باطل طریقے سے نہ کھائو تو وہیں اللہ قتل اور زنا کو بڑے گناہ قرار دیتے ہوئے یہاں تک فرماتے ہیں کہ زنا کے قریب بھی مت جائو۔ہمیں قرآنی اصطلاحات اور احکامات کو سامنے رکھتے ہوئے آگے بڑھنے کا عہد کرنا چاہیے۔

انفاق فی سبیل اللہ سے مراد ضرورت مندوں‘ یتیموں اور بے سہارا لوگوں پر اللہ تعالیٰ کی خوشنودی کو مدنظر رکھتے ہوئے مال خرچ کرنا ہے۔قرآن حکیم میں متعدد مقامات پر مسلمانوں کو انفاق فی سبیل اللہ کا حکم دیا ہے کہ جو مال تمہاری چند روزہ زندگی میں تمہیں نصیب ہوا ہے اور جسے تم چھوڑ کر جانے والے ہو اسے اللہ تعالیٰ کے راستے میں خرچ کرکے آخرت کا سامان تیار کرو۔سورة الحدید میں ارشاد باری تعالیٰ ہے‘
”اللہ اور اس کے رسول صلی اللہ علیہ وآلہ وسلم پر ایمان لاﺅ اور اس (مال و دولت) میں سے خرچ کرو جس میں اس نے تمہیں اپنا نائب(امین) بنایا ہے“۔
اللہ کی رضا کے لئے ضرورتمندوں کی ضروریات کو پوراکرنا اور اس کے دیئے ہوئے مال سے خرچ کرنا انفاق فی سبیل اللہ کہلاتا ہے۔
خرچ کرنے کا انداز مختلف ہوسکتا ہے۔ ظاہری اور باطنی طور پر انفاق کرنے کا حکم ہےِ۔یہاں ایک باریک نکتہ سامنے آتا ہے کہ ظاہری طور پر انفاق کرنے یا انفاق کو ظاہر کرنے کی بھی کچھ شرائط ہیں۔آپ اگر ایک ہسپتال بنوا رہے ہیں تو یہ ظاہری انفاق ہے ۔اس سے کسی ضرورت مند کی عزت نفس مجروح ہونے کا اندیشہ نہیں ہے ۔ ایسے کسی فلاحی اور رفاعی پراجیکٹ کے حوالے سے اگر تشہیر کا پہلو نکل رہا ہے تو اس میں کوئی مضائقہ نہیں۔ لیکن اگر کسی بیوہ یا یتیم کی مدد ہورہی ہے اور کسی طرح کا امدادی سامان تقسیم کرنا ہو تو پھر فوٹو سیشن بہت ہی معیوب لگتا ہے۔ اسلامی معاشروں میں صدیوں سے ضرورتمندوں کی ضرورتیں پوری ہوتی رہی ہیں اور اکثر مخیر لوگ چُھپ چُھپا کر یہ مدد کر رہے ہوتے ہیں۔ ”لینے والے کو دینے والے ہاتھ کا پتہ نہ چلے“ اس احتیاط کا پورا پورا خیال رکھا جاتا ہے لیکن جب سے این جی اوز سامنے آئی ہیں اور نمائش کا کلچر فروغ پایا ہے تب سے ضرورت مندوں ‘ بیواﺅں اور یتیموں کو تشہیر کا سستا ذریعہ بنا لیا گیا ہے۔اخبارات دیکھیں‘ چینلز کے سامنے بیٹھ جائیں ہر طرف ایسی تصویروں اور رپورٹوں کی بھرمار ہوتی ہے۔آٹے کا تھیلہ دیتے وقت تصویر ‘گھی کا ڈبہ دیتے وقت تصویر‘ رقم کا لفافہ دیتے وقت تصویر۔غرض مقصد اپنی تصویر بنوانا اور ذاتی تشہیر کرنا ہے نہ کہ ضرورتمندوں کی دادرسی کرنا ہے۔ عزت نفس قدم قدم پر مجروح کی جاتی ہے۔ یہی وجہ ہے کہ سفید پوش ضرورت مند اپنی ضرورت کا اظہار ہی نہیں کرپاتے مبادا کے خیرات کرنے والے ہاتھ کیمرے لے کر گھروں میں گھس آئیں۔ روتی بچیوں کی تصویریں بنائیں اور بھوک سے نڈھال ماں کے بیانات ریکارڈ کریں۔
سب سے ظلم اس وقت ہوتا ہے جب ضرورت مندوں کی طرف سے مخیرخواتین و حضرات یا ادروں کا شکریہ ادا کیا جارہا ہوتا ہے۔ اسلام میں خیرات کے پیچھے صرف ایک ہی جذبہ کارفرما ہونا چاہیے اور وہ فقط اللہ تعالیٰ کی رضا اور خوشنودی ہے۔ جب مقصد اللہ کی رضا ہو تو پھر تشہیر کی ضرورت نہیں رہتی۔ وہ تو انسان کی شہ رگ سے بھی قریب تر ہے۔ اور وہ دلوں کے بھید جانتا اور نیتوں کو بھانپ لیتا ہے۔
جب میڈیا ایک کلچر کو فروغ دے رہا ہو تو بہت مشکل ہے کہ اس تصویری اور تشہیری عذاب سے معاشرے کو نجات دلائی جاسکے۔لیکن اب بھی ایسے صالح افراد اور نیک تنظیمیں موجود ہیں جو ضرورت مندوں کی ضرورتیں تو پورا کرتی ہیں لیکن ضرورت مندوں کا تماشا نہیں لگاتیں۔
ایک ایسا ہی قابل تقلید اور مظاہرہ پھالیہ میں منعقدہ مغل ویلفیئر کنونشن میں دیکھنے کو ملا۔ تنظیم مغلیہ پھالیہ کی دعوت پر مجھے بھی بلایا گیا تھا۔ ایک بڑے پنڈال کے عقب میں جہیز کا سامان‘ سلائی مشینیں اور بجلی کے پنکھے طویل قطار میں سجائے گئے تھے۔ بتایا گیا تھا کہ یہ سامان ضرورت مندوں میں تقسیم کیا جائے گا اور ضرورت مندوں میں زیادہ تر غریب اور بیوا خواتین شامل تھیں۔ کنونشن کے منتظمین نے مستحق افراد کی عزت نفس کا خیال رکھتے ہوئے یہ اہتمام کیا کہ اپنی سکروٹنی کمیٹی کے ذریعے ضرورت مندوں کا تعین پہلے سے کر لیا تھا۔ ان کی فہرست تیار تھی اور کیا چیز کس کو دینی ہے یہ بھی طے تھا۔ لیکن تنظیم کے سیکرٹری انفارمیشن مرزا قیصر فاروق نے بتایا کہ سامان کی تقسیم کی تصاویر نہیں بنیں گی۔ بلکہ فہرست میں درج نام بھی ظاہر نہیں کئے جائیں گے تاکہ کسی ضرورتمند کا دل نہ دُکھے۔
مجھے یقین ہے کہ تنظیم مغلیہ کے اس قدام سے لوگوں کے دلوں میں خیرات کرنے کا جذبہ مزید بڑھا ہوگا۔ اور جو شہرت تصویر کے ذریعے حاصل ہونی تھی اس سے کہیں زیادہ نیک نامی ملی ہے۔ اللہ سے دُعا ہے کہ ہمیں ظاہری نمائش سے بچائے تاکہ ہمیں انفاق فی سبیل اللہ کے حقیقی مقاصد حاصل ہوسکیں۔

ہریانہ کے جاٹوں نے احساس محرومی کا شکار ہو کر دہلی کو جانے والی پانی کی نہر بند کردی’پٹریاں اُکھاڑ پھینکی’ عمارتوں کو نذر آتش کردیا۔ فوج بھی پُرتشدد مظاہروں کوروک نہیں پائی۔جاٹ برادری کی احتجاجی تحریک میں 20 سے زائد لوگ ہلاک ہوئے’ سینکڑوں زخمی ہوئے لیکن مرکزی حکومت مظاہرین کو پُرامن رہنے کی تلقین کرتی رہی۔ مذاکرات کامیاب ہوئے یا ناکام حقیقت یہ ہے کہ بھارت کے پاس اپنے کسانوں کو دینے کے لئے کچھ بھی نہیں ہے۔ جاٹ تھک ہار کر بیٹھ جائیں گے۔ مودی سرکار کا شائننگ انڈیا فی الحال بُجھا ہوا ملک ہے جس میں جمہوریت تو بہت ہے لیکن عوام کی حالت زار روز بروز بگڑتی جارہی ہے۔ احساس محرومی پھیلتا جارہا ہے اور خطہ غربت سے رہنے والوں کی تعداد روز بروز بڑھ رہی ہے۔ ڈیڑھ ارب کی آبادی میں ایک ارب وہ انسان ہیں جن کو ضروری غذا دستیاب نہیں ہے۔ ساٹھ کروڑ وہ ہیں جن کے پاس ٹائلٹ کی سہولت نہیں ہے۔آخر شائننگ انڈیا کا سارا پیسہ کہاں جارہا ہے؟
چین کے ایک ملٹری تھنک ٹینک کی حالیہ رپورٹ میں بتایا گیا ہے کہ سال 2015ء میں بھارت دوسرا بڑا ملک ہے جس نے سب سے زیادہ اسلحہ خریدا ہے۔ جبکہ پاکستان نے اسلحہ کی درآمد پر نسبتاً کم رقم خرچ کی ہے۔ پاکستان اسلحہ کے خریداروں کی فہرست میں نویں سے دسویں نمبر پر آگیا ہے لیکن بھارت نے اسلحہ کی ریکارڈ خرید کی ہے۔
اسٹاک ہوم انٹرنیشنل پیس ریسرچ انسٹی ٹیوٹ (سپرئی) نے بتایا ہے کہ بھارت نے کم و بیش 2015ء میں بھی اتنا ہی اسلحہ خریدا ہے جتنا 2014ء میں خرید کر اول نمبر حاصل کیا تھا۔ تین ہزار ملین ڈالر۔ اس کو بھارتی روپے سے ضرب دیں تو کھربوں روپے بنتے ہیں۔ روس’ امریکہ اور اسرائیل سے خریدے ہوئے اسلحہ کے انبار لگا چُکا ہے لیکن عالمی سطح پر کسی قسم کی پریشانی کا اظہار تک نہیں کیا گیا۔
پاکستان کو امریکہ نے آٹھ ایف سولہ طیارے بیچنے کی منظوری دی تو بھارت میں واویلا مچ گیا۔ امریکی سفیر کو دفتر خارجہ طلب کرکے احتجاج کیا گیا۔ دُنیا بھر میں بھارتی لابی نے امریکی صدر پر دبائو ڈالا اور فیصلہ منسوخ کرنے کا مطالبہ کیا۔ حالانکہ صدر اُوبامہ نے جس سمری کی منظوری دی اُس میں صاف لکھا ہے کہ پاکستان دہشت گردی کے خلاف جنگ میں فرنٹ لائن اسٹیٹ ہے اور سرحدوں کی نگرانی کے لئے اس کی ایئرپاور مضبوط ہونا ضروری ہے۔ لیکن بھارت نے آج بھی احتجاج جاری رکھا ہوا ہے اور وہ پاکستان کے اسلحہ کی ضرورتوں کو کسی طور پورا ہونے نہیں دینا چاہتا۔
آخر بھارت کو کس سے خطرہ ہے۔ وہ پاکستان کے مقابلے میں کئی گنا زیادہ امریکہ کی ”مہربانیاں” سمیٹ رہا ہے۔ ایٹمی معاہدہ کر چُکا ہے اور امریکہ سے جدید ترین اسلحہ خرید رہا ہے۔ چین کے ساتھ اس کے سرحدی تنازعات سردخانے میں جاچکے ہیں اور مخاصمت کی جگہ تجارت نے لے لی ہے۔ اربوں ڈالر سالانہ کے کاروباری اور تجارتی معاہدے ہو چکے ہیں۔ پھر بھارت کو کس سے خطرہ ہے۔ کیا بھارت اپنے دفاع کے لئے اسلحہ خرید رہا ہے؟۔ ہرگز نہیں۔ پاکستان نے عزت’ غیرت سب دائو پر لگا کر پٹھان کوٹ کے ملزمان کے خلاف گوجرانوالہ میں ایف آئی آر درج کی ہے ۔ بھارتی وزیر دفاع اس پر مطمئن نہیں۔مودی کا یہ اعتراف کہ سقوط ڈھاکہ کے لئے بھارت نے مکتی باہمی کا ساتھ دیا تھا’ ان کے ارادوں اور ناپاک عزائم کو سمجھنے کے لئے کافی ہے۔ بھارت کے وزراء بار بار پاکستان کو سبق سکھانے کے لئے ”ہوم ورک” پر زُور دے چکے ہیں۔ یہ اسی ”ہوم ورک” کی ایک جھلک ہے کہ بھارت اپنے ہمسائے اور دس گنا چھوٹے ملک پر جارحیت کی تیاریاں کر رہا ہے ۔ اسے اس سے غرض نہیں کہ جاٹ برادری کے حقوق پورے ہوتے ہیں یا نہیں’ اسے انتہا پسندوں کی خواہش کو پورا کرنا اور پاکستان سے اپنی ازلی دُشمنی کو پروان چڑھانا ہے۔ دُنیا کس قدر خود غرض ہے کہ جنوبی ایشیاء میں سب سے بڑا ملک اسلحے کے انبار لگا رہا ہے اور کوئی پوچھنے والا نہیں۔

کائنات کا دولہا انسان اللہ پروردگار عالم کی تخلیق کا بہترین شاہکار ہے۔ رب کائنات نے اسے نعمتوں کے اتنے انبار عطا فرما دیے کہ جنہیں دیکھ کر ذرا سا غور کرنے پر ہمیں اللہ نظر آنے لگتا ہے۔ اللہ خود اپنے کلام میں فرماتا ہے”تمہارے نفوس میں میری نشانیاں موجود ہیں تو کیا تم ان پر غور نہیں کرتے“۔
ہم اپنی ذات سے ذرا باہر نظر دوڑائیں تو سورج‘ چاند‘ ہوا‘ پانی ‘ستارے آسمان‘زمین اور جانور سب کے سب قدرت کی نشانیاں ہونے کے ساتھ ساتھ حضرت انسان کی ایسے خدمت میں جتے ہوئے ہیں جیسے ان کا ہم سے بہت بڑا کام پھنسا ہوا ہے۔ ان پر نگاہ دوڑا کر یوں محسوس ہوتا ہے کہ جیسے سورج چمکتا‘چاند دمکتا‘ستار روشن‘ سمندر موجزن‘ ہوائیں چلتی‘ پھول کھلتے‘پھل پکتے اور جانور سواری و غذا کے لئے پیدا ہی ہمارے لئے کئے گئے ہیں۔ احساس کچھ یوں ہوتا ہے کہ جیسے ہم آقا ہیں اور یہ ہمارے خدمت گزار حالانکہ اصل صورتحال اس کے برعکس ہے۔ ان سب سے پوچھیے کہ اگر انسان نہ ہو تو تمہاری صحت پر کیا اثر پڑے گا تو یہ سب کہیں گے ہماری بلا سے۔ مگر انسان ان کے بغیر ایک پل بھی زندہ نہیں رہ سکتا۔
غرض ساری کائنات اپنا کام مالک حقیقی کی مرضی کے عین مطابق کر رہی ہے مگر انسان ہے کہ ظالم بھولا ہوا ہے۔گھوڑے کو مالک صرف چارہ ہی ڈالتا ہے تو وہ اس کے بدلے اس کے لئے لڑ کر اپنی جان دے دیتا ہے۔ مگر انسان اپنے مالک کا بڑا ناشکرا ہے اور اس کی وجہ سورہ عادیات میں جو بتائی گئی وہ ہے مال سے بے پناہ محبت:
دنیا میں کسی ادارے کا مالک تیوری چڑھا لے تو ملازم فوراً ہاتھ باندھ کر کھڑا ہوجاتا ہے مگر کارخانہ قدرت کا حکم کئی بار جھنجوڑ چکا مگر ہم اس کی کوئی پرواہ نہیں کرتے۔آذان کی پکار تو ہمارے کانوں سے ٹکرا کر واپس چلی جاتی ہی رہی ہے لیکن اب تو ہم چھوٹے عذابوں کی ایک سیریز کو اپنی آنکھوں سے دیکھنے کے باوجود بھی راہ حق کی طرف جانے سے کترا رہے ہیں۔
وہ ہمیں بار بار اپنے کلام میں بتا چکا ہوں کہ میں نے یہ تمام کائنات تمہارے لئے مسخر کردی ہے مگر تم کو اپنے پیار کے لئے پیدا کیا ہے۔ وہ واضح طور پر آگاہ کرتا ہے کہ تمہاری تخلیق کا مقصد میری محبت اورمیری مخلوق سے پیار ہے۔
وہ خبردار کرتا ہے کہ اگر تم مجھ سے محبت نہیں کرو گے تو میں عنقریب تمہاری چھٹی کروا دوں گا اور تمہاری جگہ ایسی قوم پیدا کروں گا جو کہ مجھ سے محبت کرے گی اور میں ان سے محبت کروں گا۔
وہ کہتا ہے کہ میں تم سے رزق روزی نہیں مانگتا۔رزق رساں تو میں ہوں۔ اس لئے تمہاری روزی کا میں سامان کروں گا تم تو بس میری طرف پیار کی نگاہ اٹھا کر کبھی دیکھ ہی لیا کرو۔
وہ ہم کو بار بار اپنی نعمتوں کی یاددہانی کراتا ہے کہ شائد نگاہ ان کی طرف مبذول کرے تو نگاہ شکریہ اوپر بھی اٹھا لے۔مگر ہمارا حال تو یہ ہے کہ گائے نے اگر دودھ پلایا ہے تو ہم نے اسے ماتا بنا کر اسی کے آگے سر تسلیم دل خم دیا۔اللہ کو ہم سے گلا ہے کہ گوبر اور خون کے درمیان سے ظالمو تم کو خالص دودھ تو میں نے پلایا ہے اور تم نے ساقی پر نگاہ کرنے کے بجائے برتن کے آگے سر نیاز جھکا دیا۔ جبکہ گائے کو تو یہ خبر بھی نہیں کہ یہ سارا نظام کیسے چل رہا ہے۔ رب کا فرمان ہے کہ سورج اور چاند کو سجدہ کرنے والو اسے پہچانو جس کے ہاتھ میں ان کی رسی ہے۔
دنیا میں ماں جب بچے کو نہلا دھلا کر نئے کپڑے پہنا کر سامنے کھڑا کرتی ہے اور پوچھتی ہے کہ سب کچھ کس نے دیا ہے تو بچہ اگر صرف اتنا کہہ دے کہ ”ماں تو نے“ تو صرف اتنا کہنے پر ہی ہم نے کئی بار دیکھا ہے کہ وہ بچے کو درجنوں بوسے دیتی ہے۔ یہی حال مالک کا ہے جب بندہ نہا دھو کر آئینہ کے سامنے کھڑا ہو اور یہ کلمات ادا کرے کہ اللہ تیرا شکر ہے تو مجھے خوبصورت شکل عطا فرمائی۔ میری سیرت کو بھی خوبصورت بنا دے تو عرش سے آواز آتی ہے۔ ”بندے جا تیری اس خوبصورت بات پر میں نے تیرے پچھلے گناہ معاف کردیئے“۔ وہ فرماتا ہے کہ اگر نعمت کا شکر ادا کرو گے تو نعمتوں کی بارش کردوں گا اور ناشکری کرو گے تو میرا عذاب بہت سخت ہے۔
اللہ نے ہمیں مختلف انداز سے یاددھانیاں کروائی ہیں کہ شائد انسان اپنے محبوب حقیقی کی طرف نظر التفات کرلے۔وہ فرماتا ہے کہ جب تم ماں کے بطن سے گود مادر میں آئے تو کچھ نہیں جانتے تھے۔ یہ سمع و بصر اور دل ودماغ جس پر تم اتنا اتراتے ہو میں نے عطا فرمائے ۔ایک طرف تو ان نعمتوں کا تذکرہ کیا عام لوگوں کیلئے تو دوسری طرف میڈیکل سائنس کے ماہرین کو بتایا کہ تم نے آج یہ ثابت کیا ہے کہ انسان کو پہلے سماعت ملتی ہے بعد میں بصارت مگر رب العالمین نے چودہ سو سال قبل ہی یہ حقیقت اپنے نبی صلی اللہ علیہ وآلہ وسلم کی زبان سے جاری فرما دی تھی۔
وہ ہمارے کئی بھائیوں کو ان میں سے کچھ عطا نہیں بھی فرماتا۔شائد اس لئے کہ آنکھوں سے محروم کوئی شخص جب گلی گلی سے یہ پکارتا گزرے کہ” آنکھوں والو! آنکھیں بڑی نعمت ہیں“ تو ہمیں ان کے نعمت ہونے کا واقعتاً احساس ہوجائے آپ غور فرمائیں تو نوزائیدہ بچہ نہ بول سکتا ہے نہ رفع حاجت کرنے کے قابل ہوتا ہے۔غلاظت کے اس ڈھیر کے لئے دودھ کی نہروں کے علاوہ ماں کے دل میں اتنا پیار بھی ڈال دیا کہ وہ ساری غلاظتیں اپنے دامن میں لے لیتی اور بچے کو صاف ستھری جگہ ڈالتی۔میں تو اس کو اس طرح دیکھتا ہوں کہ دنیا میں جو ماں کا کردار ادا کر رہی ہے وہ ماں نہیں بلکہ دائی ہے اصل ماں (پالنے والی ذات) تو وہ ہے جس نے اس دائی کے دل میں اتنا پیار ڈالا ہوتا۔ سرکار صلی اللہ علیہ وسلم نے بھی اللہ کے پیار کو ماپنے کے لئے ماں کے پیار کا پیمانہ استعمال کیا۔ آپ کسی سفر پر جا رہے تھے کہ ناگہاں کسی عورت کا بچہ کھو گیا۔ وہ بڑی بے چینی کے عالم میں پاگلوں کی طرح اسے ڈھونڈتی پھر رہی تھی۔ کافی وقت بعد وہ اسے اچانک نظر آیا تو اس نے بچے کو اپنی بانہوں میں جکڑ کر اسے بے شمار بوسے دیے۔ ایسی کیفیت میں حضور صلی اللہ علیہ وآلہ وسلم نے صحابہ کو اس کی طرف اشارہ کرتے ہوئے فرمایا کہ دیکھو تمہارا رب تم سے اس ماں سے بھی ہزاروں گنا زیادہ پیار کرتا ہے جب قرآن فرماتا ہے کہ ماں باپ کے سامنے اف تک نہ کہو تو میں سوچتا ہوں کہ جب ہم اس ماں کے سامنے اف نہیں کہہ سکتے تو اس حقیقی ماں کے سامنے اف کیسے کہہ سکتے ہیں اور اس کے حکموں کو پا کر ان کی نافرمانی کرنے کی جسارت کیسے کرسکتے ہیں۔ میں انسان میں موجود اعضاءاور نظام کو دیکھ کر کبھی کبھی خیال کرتا ہوں کہ جانے وہ خود کتنا پیارا ہوگا جس کی تخلیق اتنی پیاری ہے۔
انسان کے اندر اور باہر کے ماحول میں یہ نشانیاں ہم سے کچھ کہتی ہیں ۔ گاڑی میں جانے والا مسافر اپنے دوست کو دیکھ کر جب رومال لہراتا ہے تو اس کی حرکت سے دیکھنے والے کو ایک نتیجہ نکالنا ہوتا ہے اگر کوئی رومال کی رنگت‘ اس کی دھاریوں‘ اس کے کپڑے کے معیار پر غور کرنے لگے تو زمانے والے اسے احمق کہیں گے۔دراصل اس طرح کرنے سے اس کا مقصد اس کی توجہ اپنی جانب مبذول کروانا ہوتا ہے۔
اگر کوئی مہمان کسی کے گھر کھانا کھانے کے وقت سب باتوں کو لاجک سمجھ جائے کہ بلب میں روشنی پاور ہاﺅس سے آرہی ہے۔ پھول جو گلدانوں میں سجائے گئے ہیں یہ اس طرح گلدانوںمیں نہیں اُگتے بلکہ باغ سے لائے گئے ہیں۔بادلوں کو دیکھ کر ان کا سارا فلسفہ بیان کردے۔ غرض ہر چیز کے بارے بڑی عقل مندی سے متاثر کن کرتا جائے۔ کھانے پر بھی بڑی سیرحاصل گفتگو کر ڈالے مگر کھانا کھانے کے بعد میزبان کا شکریہ ادا کیے بغیر چلائے تو کوئی شخص بھی ایسے شخص کو عقلمند نہیں کہے گا۔ عقل بہت بڑی چیز ہے اس کی بنیاد پر انسان اشرف المخلوقات کے درجہ پر فائز ہوا ہے مگر یہی عقل اگر کسی جسم سے نکال دی جائے تو وہ پاگل کہلائے گا۔ یاد رہے کہ عقل اگر وحی کی روشنی سے ہٹ کر فیصلے کرے گی تو یہ باولی کہلائے گی۔خدا کا فرمان بھی کچھ اسی طرح سے ہے کہ جب میرے بندے آسمانوں اور زمین کی تخلیقات میں غور کرتے ہیں تو نتیجہ بے فکر کے طور پر بے ساختہ یہ کہہ اٹھتے ہیں کہ اے رب تو نے یہ سب بے کار پیدا نہیں کیا۔ وہ کہتے ہیں کہ رب تو پاک ہے ہم کو آگ سے بچا کر اپنا دیددار نصیب فرما۔ بقول شاعر
تیری جنت کو یا رب کیا کروں
آرزو ہے تجھے دیکھا کروں

شفیق اور ملنسار’معاملہ فہم اور زیرک’ا ہلیت اور ایمانداری چہرے سے عیاں ۔ دھیمے لہجے میں گفتگو کے ماہر۔مخاطب پر بوجھ نہ اُدھورے جُملے۔ بناوٹ اور تصّنع سے دُور۔پہلی ملاقات میں ہی شخصیت کا اسیر ہوجانے کو جی چاہتا ہے۔ میں شخصیت پرستی سے کوسوں دُور رہنے والا آدمی ہوں۔ احباب جانتے ہیں کہ میرا قلم ریاکاری کی بیماری سے ہنوز بچا ہوا ہے۔ شجاعت علی بیگ سے جو لوگ ملے ہیں وہ میری اس رائے سے اتفاق کریں گے کہ بیگ صاحب نے جس شعبے میں بھی قدم رکھا اس شعبے کو معزز کردیا۔ پاکستان کے سینئر ترین بینکار ہیں۔ سندھ حکومت میں وزارت ایجوکیشن اینڈ لٹریسی کے وزیر رہے۔ انہوں نے پورے سندھ کے تعلیمی اداروں کا دورہ کیا’ اور تعلیمی صورتحال کو بہتر بنانے کے لئے ایک بڑی ہی معلوماتی اور کارآمد رپورٹ مرتب کی۔ یہ رپورٹ گورنر سندھ اور صدر پاکستان جنرل پرویز مشرف کو بھجوائی گئی۔ اس رپورٹ پر عملدرآمد تو نہ ہوسکا لیکن یہ حکومتی ریکارڈ کا حصہ بن گئی۔ دو برس قبل جب مملکت پاکستان کی طرف سے نمایاں شخصیات کو تمغات سے نوازنے کا مرحلہ آیا تو ایجوکیشن منسٹری نے اس رپورٹ کا حوالہ دیا۔ رپورٹ از سر نو دیکھی گئی اور اسے اس قابل سمجھا گیا کہ اس کے خالق کو ستارہ امتیاز سے نوازا جائے۔

فیصلہ ہوگیا تو مزید کیٹیگری بھی سامنے آگئی۔ معلوم ہوا کہ صرف سندھ ہی نہیں پورے پاکستان میں کھیل کے فروغ کے لئے بھرپور کام کیا ہے۔ یہی نہیں ملک میں بینکنگ سیکٹر کو ترقی دینے میں بھی بیگ صاحب کا اہم کردار ہے۔
میری ملاقات ایک مشترکہ صحافی دوست معروف کالم نگار اور سفرنامہ نویس جناب سید وجاہت علی کے ذریعے ہوئی۔ بیگ صاحب کے ڈیفنس ہائوسنگ سوسائٹی میں واقع گھر میں بیٹھے تھے۔ یہ وہی گھر ہے جہاں بڑی بڑی سیاسی اور سماجی شخصیات آتی رہی ہیں۔ محترمہ خوش بخت شجاعت جیسی عظیم خاتون جس گھر کی مالکہ ہوں وہاں علم و فن کی کہکشائیں سجتی ہوں گی۔ بیگ صاحب اپنی اہلیہ کی محبت میں مسرور رہتے ہیں۔ شجاعت علی بیگ نے دوران گفتگو بتایا ‘
”میرے والدین چاہتے تھے کہ ان کو ایسی باصلاحیت بہو ملے جو ان کے پورے گھر کو سنبھال سکے۔ خوش بخت کمال کی ڈبیٹر اور منتظم تھیں۔ اُن سے شادی میرے لئے بہت بڑی خوش بختی ہے”۔
شجاعت علی بیگ کا تعلق لاہور کے بھاٹی دروازے سے ہے۔وہ پکّے لاہوری ہیں۔میاں بیوی دونوں معزز مغل خاندانوں کے چشم وچراغ ہیں۔ بیگ صاحب نے لاہور سے تعلیم حاصل کی۔ وہ کالج کے دنوں میں باکسنگ کرتے تھے۔باکسنگ کا جذبہ آج بھی موجزن رہتا ہے۔وہ مسائل کو حل کرنے میں یدطولیٰ رکھتے ہیں۔
پاکستان اکانومی واچ کو آٹھ برس بیت گئے ہیں۔ پاکستان کی اکانومی اور حکومت کی اقتصادی پالیسیوں کے حوالے سے میرے تحقیقی بیانات اخبارات میں شہ سرخیوں کے ساتھ شائع ہوتے رہتے ہیں۔ بیگ صاحب کو اکانومی واچ کا غائبانہ تعارف تھا۔ چونکہ وہ آج کل پاکستان کی سب سے بڑی تنظیم فیڈریشن آف چیمبرز آف کامرس اینڈ انڈسٹری کی پبلک ریلیشن کمیٹی کے سربراہ ہیں اس لئے ان سے ملاقات کرنا میری تنظیمی ذمہ داری بھی تھی۔ جب میں نے اکانومی واچ کے حوالے سے اپنی رپورٹ پیش کی تو انہوں نے مجھے فیڈریشن کی خدمات اور کارناموں کو میڈیا میں سامنے لانے کی ذمہ داری سونپ دی۔کراچی ہیڈ آفس کی طرف سے مجھے اسلام آباد میں فیڈریشن کی پبلک ریلیشنز کمیٹی کا انچارج نامزد کردیا۔ ان کی رہنمائی میں کوشش کروں گا کہ اس معتبر ادارے کے کام آسکوں۔
اُردو سپیکنگ گھرانے میں شادی ہوئی ہے۔ ان کا اُردو کا لب و لہجہ بھی کمال کا ہے۔ لیکن وہ اپنی ”لاہوریت” کو کبھی نہیں بھولے۔ خوب پنجابی بولتے ہیں۔ اُن کے دوستوں کا حلقہ بہت وسیع ہے۔ اُن سے ایک بار ملنے والا بار بار ملنے کی آرزو پالتا ہے۔ وہ کراچی میں لاہور کی خوشبو بن کر محبتیں بانٹتے اور چاہتیں سمیٹتے ہیں۔

ڈاکٹر سعید الٰہی رجل العمل ہیں۔ عمل کے آدمی ہیں۔ وہ جو سوچتے ہیں کر گزرتے ہیں ۔اور چونکہ موروثی طور پر پاکستانیت سے جڑے ہوئے ہیں اس لئے ان کی سوچ پاکستان سے باہر جاتی نہیں ہے۔ ان سے جو ایک بار ملتا ہے دوبارہ ملنے کی آرزو پالتا رہتا ہےِ۔ بناوٹ سے کوسوں دور ہیں۔ یہ دنیا دار العمل ہے اور وہ زندگی کے ہر لمحے میں ملک کے لئے کچھ کر نا چاہتے ہیں۔ منصوبے اور تصّورات ہاتھ باندھے حاضر رہتے ہیں۔ عام آدمی ایک وقت میں کسی ایک اشو کو سُلجھا رہا ہوتا ہے۔ڈاکٹر صاحب کے پاس ایک نہیں کئی دماغ ہیں۔ وہ بیک وقت درجنوں محاذوں پر ڈٹے ہوئے ہیں۔ ادھر مسئلہ پیدا ہوا اُدھر کھٹاکھٹ اس کے دو تین حل سامنے آگئے۔ان کے دفتر میں مغل دربار کا سا ماحول ہوتا ہے۔ کچھ نہ کچھ نیا ہورہا ہوتا ہے ۔ بیگ راج جیسے کئی رتن قلم کاغذ لئے ہدایات لے رہے ہوتے ہیں ۔ سیاست پر تجزیہ چل رہا ہے ‘ کسی دوست کی سفارش ہورہی ہے’ ٹی وی پروگرام ریکارڈ ہور ہا ہے’ سیمینار کی تیاری ہورہی ہے’گھریلو معاملات بھی طے ہو رہے ہیں۔ ملاقاتوں کا ایک سلسلہ جاری رہتا ہے۔ جب سے ہلال احمر کے چیئرمین بنے ہیں سٹاف کی دوڑیں لگی رہتی ہیں ۔ افسر شاہی معدوم ہوگئی ہے۔ کام ‘کام اور بس کام کا منظر دیکھنا ہو تو اس انتھک مسیحا کے ساتھ ہو لیجئے۔ آپ جسمانی اور دماغی طور پر تھک جائیں گے لیکن ڈاکٹر سعید الٰہی کو ہشاش بشاش پائیں گے۔ وہ کم خور ہیں۔ بہت کم سوتے ہیں۔ کام ہی ان کی ”انجوائے منٹ” ہے۔ہلال احمر فورم کا قیام ان کا تازہ قدم ہے۔ مصیبتوں میں گھرے اور تباہیوں سے متاثرہ لوگوں کے انسانی مسائل کو میڈیا’ متعلقہ اداروں اور حکومت تک پہنچانے کے لئے تشکیل دیئے گئے اس فورم کا پہلا اجلاس تھا۔ مجھے بھی مدعو کیا گیا تھا ۔ یہ ایک سیمینار تھا جس میں وزیرستان سے عارضی طور پر بے گھر ہوجانے والے لاکھوں پاکستانیوں کے حوالے سے درپیش مشکلات اور اقدامات پر بات کی گئی۔سرحدوں کے وفاقی وزیر محترم جنرل عبدالقادر بلوچ مہمان خصوصی تھے۔ مجھے اعزاز حاصل ہوا کہ تلاوت اور تشریح سے پروگرام کا آغاز کروں۔ انسانی خدمت کے حوالے سے آیات تلاوت کیں اور احادیث نبویۖ کی روشنی میں مختصر تشریح بھی پیش کی۔ جناب عبدالقادر بلوچ کا خطاب انتہائی پُرمغز تھا۔ انہوں نے کہا کہ وزیرستان اور خیبر ایجنسی سے بے گھر ہونے والے لوگ سب سے سچے اور پکے پاکستانی ہیں۔ ان کی حب الوطنی پر شک کرنا لاکھوں مائوں ‘ بہنوں اور بچوں کی لازوال قربانیوں کی توہین کے مترادف ہے۔ کون ہے جو اپنا گھر چھوڑنا چاہتا ہے۔ یہ لوگ عارضی طور پر بے گھرنہیں ہوئے۔ ان میں سے اکثر وہ ہیں جو دس دس سال سے اپنے گھر سے دُور کانٹوں بھری زندگی گذار رہے ہیں۔ عبدالقادر بلوچ کا کہنا تھا کہ ان کی مہمان نوازی میں بہت سی کوتاہیاں ہوئی ہیں۔ لیکن ان کی واپسی باعزت طور پر ہورہی ہے۔ پھر سے گھر آباد کرنے کے لئے پورے وسائل مہیا کئے جارہے ہیں۔ انہوں نے تجویز دی کہ نئے ادارے بنانے کی بجائے ہلال احمر جیسے اداروں پر انحصار کرنا چاہے۔ یہ ایسا قومی ادارہ ہے جس پر باہر کے لوگ بھی اعتماد کرتے ہیں اور اس کے پاس بہترین انفراسٹرکچر بھی موجود ہےِ۔ وفاقی وزیر نے یہ بات کہہ کر سب کو حیران کردیا ہے کہ ہلال احمر پہلے ایک مُردہ گھوڑا تھا اور ڈاکٹر سعید الٰہی نے اس مُردہ گھوڑے میں جان ڈال دی ہے۔ سیمینار میں ڈائریکٹر آپریشنز غلام محمد اعوان نے ہلال احمر کیطرف سے آئی ڈی پیز کے لئے مہیا کی گئی خدمات پر تفصیلی روشنی ڈالی۔ انہوں نے بے گھر ہونے والے افراد کے لئے ایک مربوط نظام وضع کرنے پر زور دیا۔ سرجن جنرل میجر جنرل آصف نے بھی ہلال احمر کے کام کی تعریف کی۔ فاٹا اور گلگت بلتستان ہلال احمر کے چیئرمین بھی مقررین میں شامل تھے۔
یہ ایک مختصر سیمینار تھا لیکن ہر مقرر نے اپنے طے شدہ وقت میں اہم اور معلوماتی باتیں کیں۔حاضرین کے کمنٹس نے پروگرام کو مزید دلچسپ بنا دیا تھا۔ معروف کالم نگار اور اسلامی دانشور جناب اوریا مقبول جان نے کہا کہ یہاں بہت سے فورم بنتے ہیں۔کچھ باہر کی فنڈنگ سے چلتے ہیں اور بعض سیاسی ایجنڈے کو پروان چڑھانے کے لئے سرگرم رہتے ہیں۔ ہلال احمر فورم خالصتاً انسانی اور قومی اشو پر سنجیدہ سوچ بچار کے لئے قائم کیا گیا ہےِ۔ ہمیں اپنی اپنی عصبتیوں کو بالائے طاق رکھ کر قومی مسائل کی نشاندہی اور ان کے حل کے لئے بحث و مباحثے کو رواج دینا چاہیے۔ امریکہ اس لئے حکمران بنا ہوا ہے کہ وہاں ہزاروںتھنک ٹینک ہیں جو ریسرچ کی بنیاد پر کام کرتے اور اپنی حکومتوں کو متواتر رہنمائی فراہم کرتے ہیں۔فورم میں کینیڈین ریڈکراس کے صدر نے بھی حصہ لیا۔ انہوں نے ہلال احمر فورم کے قیام کو خوب سراہا۔
ہلال احمر کے رضاکاروں اور سٹاف ممبران نے بڑی دلجمی کے ساتھ اس سیمینار میں حصہ لیا۔ قومی میڈیا کی بھرپور نمائندگی بھی موجود تھی۔مشران کی نمائندگی بھی دکھائی دے رہی تھی۔ تقریب کے اختتام پر وسیع لان میں چائے کا اہتمام کیا گیا تھا۔ یہ سیمینار محسنین پاکستان کے ساتھ یکجہتی کا ایک اعادہ تھا اور ان کی قربانیوں کو سامنے لانے کا اہتمام بھی ۔

آرمی چیف نے بلاکم وکاست واضح کردیا ہے کہ پاک چین اقتصادی راہ داری ہر حال میں مکمل ہوگی۔ جنرل راحیل شریف نے بلوچستان کے دورے کے دوران پاکستان کے دشمنوں کو خبردار کیا ہے کہ پاکستان اس راہ داری کے مخالفین اور پاکستان کی اقتصادی ترقی کے دشمنوں کو پوری طرح پہچانتا ہے۔ سپہ سالار کے اس پُراعتمادلہجے کے بعد افواج پاکستان اور سول حکومت کی ترجیحات کے حوالے سے یک نگاہی کا تاثر مضبوط ہوگیا ہے۔آرمی چیف کے اس عزم کے ساتھ ہی کراچی اسٹاک ایکسچینج میں ریکارڈ تیزی آئی ہے۔میاں محمد نوازشریف نے پارلیمانی پارٹی کے حالیہ اجلاس میں مسلم لیگی ارکان اسمبلی اور وزراء و مشیران کے اہم ترین اجلاس سے خطاب کرتے ہوئے سپہ سالار کی بات کو دہرایا ہے۔ انہوںنے جوڈیشل کمیشن کے فیصلے کے حوالے سے پاکستان تحریک انصاف کو ”ڈی سیٹ” کرنے کے مطالبے کو غیر ضروری اور وقت کا ضیاع قرا ر دیا ہے اور واضح ہدایات کی ہیں کہ چھوٹے موٹے سیاسی تنازعات میں الجھنے کی بجائے اقتصادی راہ داری کے منصوبے پر عمل درآمد کو فوری اور یقینی بنایا جائے۔ ایک خبر یہ بھی ہے کہ میاں نوازشریف نے یہ طے کر لیا ہے کہ دو ہزار اٹھارہ تک بجلی کے پراجیکٹس ہر حال میں مکمل کرنے ہیں۔ باخبر حلقے یہ کہہ رہے ہیں اس مقصد کے حصول کے لئے پراجیکٹس پر عملاً کام شروع ہوگیا ہے۔
یوں تو پاکستان میں گذشتہ برس کاروں کی فروخت ریکارڈ رہی ہے۔ لیکن اس کا یہ مطلب ہرگز نہیں کہ پاکستان کے اندر غربت کی شرح میں کمی آئی ہے۔ پاکستانیوں کی کثیر تعداد بے روزگاری کے عذاب میں مبتلا ہے اور بے روزگاری ہی غربت کو جنم دیتی ہے۔ اقتصادی راہداری سے جڑے تمام منصوبوں میں تمام صوبوں کے لئے معاشی ترقی کے پہلو شامل ہیں۔ خدا کا شکر ہے کہ صوبائی حکومتوں نے اپنے تمام اختلافات تقریباً ختم کر لئے ہیں اور آگے آنے والے مسائل کو حل کرنے کے لئے پارلیمانی کمیٹی بھی بنا دی گئی ہے جو وقتاً فوقتاً اختلافی امور نمٹائے گی۔ایک بڑی ڈویلپمنٹ یہ ہوئی ہے کہ ایران کا یورپی ممالک سے جوہری اختلافات پر معاہدہ طے پا گیا ہے اور پاک ایران گیس پائپ لائن کی راہ ہموار ہوگئی۔ ایرانی حکومت کی طرف سے ایک دو روز میں اس حوالے سے ایک اعلیٰ سطحی وفد اسلام آباد کا دورہ کرنے والا ہے۔پاکستان نے سعودی یمن جھگڑے سے خود کو بچا کر رکھا جس سے ہمسایہ ملک ایران کے ساتھ تعلقات مزید بہتر ہونے کی توقعات کی جاسکتی ہیں۔ پاکستان کے وزیراعظم نے روس میں ایک کانفرنس کے دوران بھارتی وزیراعظم نریندر مودی سے بھارت کی شرائط پر ملاقات کی تھی۔ اگرچہ وزیراعظم کو اس پر اندرون ملک بڑی سُبکی اٹھانا پڑی لیکن بھارتی رویے سے اندازہ ہوتا ہے کہ وزیراعظم نے یہ سب جان بوجھ کر کیا تھا تاکہ بھارت کو کسی اشتعال انگیزی کا کوئی جواز نہ مل سکے۔ اس وقت بھارت ان ممالک کی فہرست میں سب سے نمایاں ہے جو پاکستان کو اقتصادی راہداری پر عمل درآمد سے روکنا چاہتے ہیں۔
قارئین ! میں پہلے بھی اس بات پر زور دیتا رہا ہوں کہ یہ وقت صبر’تدبر اور حکمت کا ہے۔مومنانہ فراست اسی کو کہتے ہیں کہ قوم کے عظیم تر مفاد میں دشمن کی وقتی اشتعال انگیزیوں سے درگزر کی جائے۔ بھارت جانتا ہے کہ پینتالیس ارب ڈالر کے اس منصوبے سے پاکستان کی رگوں میں معاشی خون پوری تیزی سے دوڑنے لگے گا اور ایک قریب المرگ معیشت کو ہوش آجائے گا۔ بھارت نے ہماری شاہ رگ کشمیر پر قبضہ کر رکھا ہے۔ قدرت نے جغرافیائی حیثیت سے فائدہ اٹھانے اور متبادل شاہ رگ تعمیر کرنے کا ایک سنہری موقع فراہم کردیا ہے۔
متبادل شاہ رگ کو کسی قبضہ اور کسی حملہ سے بچانا ہماری سب کی مشترکہ ذمہ داری ہے۔فوج ہو سیاست ہو۔عوام ہوں یاخواص۔اگرہم چاہتے ہیں کہ ہماری آئندہ نسلیں بے روزگاری اور بے حمیتی سے محفوظ رہیں تو اس شاہ رگ کے لئے ہمیں جہاں ایک طرف دن رات محنت کرنی ہے وہیں اس کی نگہداشت کا فریضہ بھی نبھانا ہے۔ چند مٹھی بھر شرپسند اور غیر ملکیوں کے ایجنٹ ترقی کے اس شاندار منصوبے کو ہم سے چھین نہ پائیں!

بی بی سی کی رپورٹ آنے کے بعد خیال کیا جارہا تھا کہ وزارت داخلہ حرکت میں آئے گی اور ایم کیو ایم کے متحرک رہنمائوں کے گھروں پر چھاپے پڑیں گے’ دفاتر سیل ہوں گے اور الطاف حسین صاحب کو برطانیہ سے طلب کیا جائے گا۔ ”ایگزیکٹ” کے معاملے میں چوہدری نثار علی خان نے جو سرعت دکھائی تھی’ اس سے یہی توقع تھی ۔ نیو یارک ٹائمز اور بی بی سی کا” تقدس” تقریباً ایک جیسا ہے تو ردعمل بھی برابر کا ہونا چاہیے۔ لیکن چوہدری صاحب اس کے برخلاف بارہ گھنٹے تک خاموش رہے ‘ وزیر دفاع نے بین السطور گفتگو کی اور قومی اسمبلی میں طعنہ دیا کہ ایم ۔ کیو ۔ ایم کی ”لوڈشیڈنگ ” ہونے والی ہے۔ وزیراعظم میاں محمد نوازشریف کو کہیں سے فون آیا ہوگا انہوں نے چوہدری نثار کو بی بی سی کی رپورٹ کے حوالے سے تحقیقات کرنے کا حکم دیا ہے ۔ چوہدری صاحب نے تحقیقات کے اس کام کو طول دینے کے لئے برطانیہ سے معلومات حاصل کرنے کی راہ ڈھونڈی ہے۔ خط جائے گا’ کب جائے گا’ پھر جواب آئے گا۔بی بی سی والے حکومت پاکستان کو ثبوت فراہم کریں گے یا ٹال دیں گے۔ ابلتا پانی ہے اور اس میں ٹھنڈی مدھانی ہے۔ وزارت داخلہ اسے گھماتی رہے گی۔ہلکا پُھلکا شور اُٹھے گا اور پھر میڈیا کو کوئی بڑی خبر مل جائے گی۔ جس طرح ایم۔ کیو۔ ایم کے خلاف بی بی سی کی رپورٹ نے ملک میں جاری لوڈشیڈنگ کے سبب جاری حملوں سے مسلم لیگ (ن) کو نجات دلائی ہے اسی طرح کوئی بڑی خبر ایم۔ کیو ۔ ایم کو موجودہ صورتحال سے نکال دے گی۔1990ء سے لے کر آج تک ایم۔کیو۔ایم کے خلاف وطن سے غداری کے متعدد الزامات لگائے گئے لیکن ثابت کچھ نہ ہوسکا الٹا متحدہ کے ووٹ بنک میں اضافہ ہوا۔ مارچ میں نائن زیرو پر چھاپہ مارا گیا ‘چیختے چنگھاڑے ثبوت ملے۔ قاتل پکڑے گئے ۔غیر ملکی اسلحہ برآمد ہوا ۔لیکن اسی حلقے میں جب الیکشن ہوا تو پی ٹی آئی الیکشن ہار گئی۔
بی بی سی کی ایک رپورٹ پہلے بھی چل چکی ہے الطاف حسین کی لائیو تقاریر ریکارڈ پر ہیں جن کی بنیاد پر ماہرین قانون کہہ چکے ہیں کہ اشتعال اور خون خرابے کے مقدمات بن سکتے ہیں۔ ایک بھاری بھر کم فائل جناب عمران خان صاحب بھی برطانوی پولیس کو فراہم کرچکے ہیں۔ ذوالفقار مرزا مستند ثبوت دے چکے ہیں۔آخر وہ کونسی طاقت ہے جو ریاست پاکستان کو ایم۔ کیو ۔ایم کے خلاف کوئی مقدمہ دائر نہیں کرنے دیتی۔ رائو انور اور صورت مرزا کے بیانات کے بعد کونسا ثبوت چاہیے؟
دو ہی صورتیں ہوسکتی ہیں ۔ یا تو ایمِ۔کیو۔ایم کے بقول انہیں غریب اور مڈل کلاس عوام کے حقوق کی جنگ لڑنے کی سزا دی جارہی ہے یا پھر کوئی خفیہ ہاتھ ہیں جو ایم۔کیوِ۔ایم کو زندہ رکھنا چاہتے ہیں۔ یہ اندرونی ہاتھ ہیں یا بیرونی۔ یہ بھی ایک راز ہے۔
بی بی سی کا ادارہ اپنی رپورٹ پر قائم ہے لیکن الطاف حسین نے اس رپورٹ کو بالکل جھوٹ قرار دیا ہے۔ انہوں نے اپنے پرجوش کارکنوں سے جذباتی خطاب کیا ہے ۔ ان کا یہ جملہ بہت ہی کاٹ دار ہے ”جب ضرورت ہوتی ہے تو ایم۔کیو۔ ایم محب وطن اور جب کام نکل جاتا ہے تو غدار”۔ کیا یہ حقیقت نہیں کہ مسلم لیگ (ن) اور پی پی پی نے اپنے سیاسی مفادات کے لئے متحدہ کے ساتھ اتحاد بنائے ہیں۔ متحدہ کے لوگ اسمبلیوں اور قائمہ کمیٹیوں میں موجود ہیں۔ متحدہ کے خلاف جتنے ثبوت آرہے ہیں۔ وہ کسی سول یا وفاقی ادارے کی طرف سے مہیا نہیں کئے گئے۔ رینجرز کی تحویل میں آنے والے مجرموں کی زبانی سامنے آئے ہیں ۔ان ثبوتوں کو عدالت لے جانے میں کیا چیز مانع ہے۔
عوام یہ توقع کرتے ہیں کہ اور ان کی یہ توقع بجا بھی ہے کہ آئیں بائیں شائیں کرنے کی بجائے آپریشن ضرب عضب کو اس کے منطقی انجام تک پہنچنے دیںِ۔ غیر ملکی اطلاعاتی اداروں کی رپورٹوں کو بنیاد بنا کر اگر تحقیقات ہونی ہیں تو پھر بی بی سی کی رپورٹ پر بھی ٹھوس ردعمل کی ضرورت ہےِ۔ تحقیقات کے لئے خط لکھنے جیسے وقت گذاری کے اقدامات سے پتہ چلے گا کہ آپ رینجرز کی پیٹھ میں چھرا گھونپنے کا ارادہ رکھتے ہیں۔ایسا تاثر تقویت پا رہا ہے ۔ سندھ حکومت سے وابستہ کرپٹ لوگوں کو خاموشی سے باہر جانے دیا جارہا ہےِ۔(ن) لیگ کو یاد رکھنا چاہیے کہ فوج نے ہی اسے دھرنے سے بچایا ہے۔ایسا نہ ہو کہ اب کی بار یہ سہارا بھی کام نہ آسکے اس لئے تحقیقات کروائیں ‘انتظار نہیں !!

ضرب عضب پوری قوت کیساتھ جاری ہے ۔ نتائج بھی بڑی حد تک مثبت قرار دیئے جاسکتے ہیں۔یہ بھی سچ ہے کہ دہشت گرد اب میدان چھوڑ کر بھاگ رہے ہیں ۔ وہ انتہائی مایوسی کی حالت میں بچوں’ عورتوں اور غیرمتحارب کمیونٹی پر حملہ کر رہے ہیں۔ ان کا بچ نکلنا اب محال دکھائی دے رہا ہے۔دہشت گردوں کیخلاف یہ فتوحات خالصتاً عسکری نوعیت کی ہیں۔ہمارے بہادر عساکر اپنی جان ہتھیلی پر رکھ کر قومی بقاء کی جنگ لڑ رہے ہیں۔آج پوری قوم اپنی مسلح افواج’ آئی ایس آئی’ رینجرز اور پولیس کی قربانیوں کو دل و جان سے تسلیم کرتی ہے اور امریکہ سمیت دنیا بھر میں افواج پاکستان کی حکمت عملی’ بہادری اور جوانمردی کو قدر کی نگاہ سے دیکھا جارہا ہے ۔شمالی وزیرستان اور خیبر ایجنسی کے عوام باعزت طور پر گھروں کو واپس جارہے ہیں۔ ان کے پرامن رزو و شب کو یقینی بنانے کے لئے بھی ضروری اقدامات کئے گئے ہیں۔ سرحد پار افغانستان کے اندر موجود دہشت گردوں کا پیچھا کیا جارہا ہے۔حکومتی سطح پر افغان حکومت کو قائل کر لیا گیا ہے کہ وہ اپنی سرزمین کو پاکستان کیخلاف استعمال نہ ہونے دے۔ حال ہی میںکراچی سے پکڑے جانے والے دہشت گردوں نے ہندوستانی خفیہ ایجنسی ”را” سے تربیت حاصل کرنے کے انکشافات کئے ہیں۔ ان انکشافات کی روشنی میں ”را” کے ملوث ہونے کے ٹھوس ثبوت بھی بھارت کو دیئے گئے ہیں۔اور ہماری سیاسی اور عسکری قیادتوں نے ”را” کے ملوث ہونے کے بارے میں عوام کو بھی آگاہ کردیا ہے۔ بلوچستان میں ہتھیار بند علیحدگی پسندوں کا صفایا بھی ہورہا ہے۔ایک اُمید ظاہر کی جارہی ہے کہ آئندہ تین ماہ تک ملک بھر میں دہشت گردوں کی کمر توڑ کر رکھ دی جائے گی۔لیکن اصل سوال یہ ہے کہ کیا دہشت گردی کا یہی واحد حل ہے کہ طاقت کو مزید طاقت سے دباتے رہیں اور ہماری ڈھیر ساری توانائیاں خانہ جنگیوں کی نذر ہوتی رہیں۔اس سوال کا جواب حاصل کرنے سے پہلے ایک ضمنی سوال ضروری ہے۔
”دہشت گرد کون ہے”۔ مذہبی منافرت سے جنم لینے والے نظریات کے حامل افراد اور گروہ دہشت گرد کون ہیں؟ کیا بلوچستان میں حقوق کے نام پر جنگ کرنے والے دہشت گرد ہیں۔ کیا داعش کی سوچ سے متاثر بندوق بردار دہشت گرد ہیں؟ کیا ”را” کے ایجنٹ دہشت گرد ہیں۔ ہم کس کو دہشت گرد کہیں’ کس کو انتہا پسند گردانیں’کس کو ”را” کا ایجنٹ گردانیں؟۔آخر دہشت گرد کی تعریف کیا ہے۔ ایسی تعریف جو بچے’بوڑھے’مسٹر’ مولوی’ امیر’ غریب’فوجی’ سویلین’پارلیمنٹرین اور ووٹر کو سمجھ آسکے۔ہمارے سرکاری تھنک ٹینک ایسی جامع اور مختصر سی تعریف فراہم کرنے میں ناکام رہے ہیں۔اگر ایسی تعریف کہیں کی گئی ہے تو اس کی پوری طرح تشہیر نہیں ہوسکی۔ اس لئے آج بھی ہمارے مذہبی طبقات جن کی حب الوطنی پر شک نہیں وہ بعض مسلح گروہوں کیخلاف ریاست کی جاری جدوجہد کو دل سے ٹھیک نہیں سمجھتے۔ کتنے ہی عوامی حلقے ہیں جو بلوچ دہشت گردوں کو تو دہشت گرد قرار دیتے ہیں لیکن طالبان کو وہ ہرگز دہشت گرد نہیں مانتے بلکہ انہیں مجاہدین کہتے ہیں۔ اگرچہ اب کھل کر طالبان کی حمایت سامنے نہیں آرہی لیکن آج اگر سیکورٹی ایجنسیوں کی گرفت کمزور پڑے تو پھر طالبانی جھنڈے لہرانا شروع ہوجائیں گے۔
اس مزاحمتی فکر کا سبب یہ ہے کہ ریاستی سطح پر دہشت گردی کی کوئی متفقہ تعریف سامنے نہیں آسکی اور پاکستانیوں کی بہت بڑی تعداد خارجی افکار اور نظریات سے براہ راست متاثر ہورہی ہے۔ہمارے نامور مذہبی دانشور آج بھی امریکہ کی مخالفت میں طالبانی سوچ اور مسلح جدوجہد کرنے والے جتھوں کو مظلوم سمجھتے ہیں ۔ ان کے لئے ہمدردیوں پروان چڑھاتے ہیں اور غلبہ اسلام کے جوش میں ”مجاہدین اسلام” کی کامیابی کے لئے دُعا گو رہتے ہیں۔
ریاستی اداروں کو ‘ سرکاری دانشوروں کو ایک بات بار بار لوگوں کے ذہنوں میںدلائل کے ساتھ بٹھا دینے کی ضرورت ہے کہ کوئی فرد’ کوئی گروہ’ کوئی جتھہ اسلام ‘حقوق’ انتقام’ مسلک’ زبان ‘ جہادکے نام پر اگر ریاست کے خلاف’عوام کے خلاف’کسی فرد یا کسی دوسرے گروہ کے خلاف ہتھیار اٹھائے گا تو وہ دہشت گرد کہلائے گا۔بندوق صرف ریاست کا ہتھیار رہے گا۔ کسی کو خوفزدہ کرکے مطلب برآری کا نام دہشت گردی ہے۔ اگر ”دہشت گرد” کے بارے میں حکومتی سطح پر یکسوئی ہوجائے تو پھر عوامی سطح پر بھی اسی کلچر کو فروغ حاصل ہوگا۔ دہشت گرد دراصل فتنہ پھیلاتا ہے۔فساد برپا کردیتا ہے۔فتنہ پھیلانے والوں کو ختم کردینے کا قرآنی حکم واضح ہے۔ قرآنی حکم کو ہر سرکاری دفتر’ہر مسجد اور ہر مدرسہ’ہر تعلیمی ادارے اور ہر عوامی دفتر میں جلی حروف سے لکھا جانا چاہیے ۔جو دہشت گرد ہے وہ فسادی ہے اور جو فسادی ہے وہ دہشت گرد ہے۔ فسادی کو قتل کرنے کا حکم ہے ۔ افواج پاکستان’ سیکورٹی ایجنسیاں اور پولیس جب فسادیوں کو ٹھکانے لگاتی ہیں تو وہ دراصل اللہ کے حکم کو بجالاتی ہے۔ عوام ان کا ساتھ دیں جو فسادیوں کا خاتمہ کرنے میں جُتے ہوئے ہیں۔ اللہ پاک کی ساری محبتیں’سارے انعامات اور جنت کے سارے وعدے انہی بہادروں کے لئے ہیں جو اسلامی ریاست کے امن و استحکام کو برقرار رکھنے اور فسادیوں کو واصل جہنم کرنے کے لئے پابہ رکاب رہتے ہیں۔
اس قلبی طمانیت کے بعد یہ بھی سمجھ لینا ضروری ہے کہ فساد کسی فلسفہ کی بنیاد پر بپا کیا جاتا ہے۔جھوٹے سچے خیالات اور فریب کاری کے سبب ہی لوگ گمراہ ہوتے ہیں اور وہ ریاست کیخلاف تلوار اٹھا کر فتنہ پروری پر اتر آتے ہیں۔ جب تک ہم اس فلسفہ پر نظریاتی ضرب نہیں لگاتے تب تک ضرب عضب کے حقیقی فوائد بھی حاصل نہیں ہوسکتے۔ یہ کام شائد حکومتوں سے زیادہ مذہبی ‘سیاسی اور سماجی دانشوروں کا ہوتا ہے۔ہمارا کام صرف خبرنامے سننے تک نہیں رہنا چاہیے۔ہم میں سے ہر ایک کا ایک قومی فریضہ ہے جسے ادا نہ کرنے کی صورت میں ہمیں یا ہمارے بچوں کو کسی نہ کسی شکل میں خمیازہ بھگتنا پڑے گا۔ کیا ایسا ہوا ہے کہ عوامی سطح پر ایسے حلقے قائم ہوئے ہوں جہاں مختلف مکاتب فکر کے لوگ مل جل کر دہشت گردی کے خلاف نفرت کا اظہار کریں ۔ہمارے اکثر بہن بھائیوں نے اپنے دماغوں کے اندر دہشت گرد چھپا رکھے ہیں۔معذرت کیساتھ لیکن حقیقت یہی ہے کہ ہم آج بھی سنی’ شیعہ وہابی’بریلوی کی مسلکی تفریق میں مبتلا ہیں۔صرف تفریق ہی نہیں بلکہ نفرت پرورش پارہی ہے۔ آپ اس حقیقت کو کیسے جھٹلا سکتے ہیں کہ کوئی دیوبندی کسی بریلوی کے گھر رشتہ کرنے پر آمادہ نہیں’ کوئی شیعہ کسی اہلحدیث کے ساتھ ناطہ قائم کرنا نہیں چاہتا۔ جب ہم سماجی رشتوں میں بھی مسلک کو حائل کرتے ہیں تو پھر شیعہ کافر’ بریلوی ‘مشرک اوردیوبندی گستاخ جیسے نعرے فروغ پاتے ہیں ۔یہ سب زہر ہمارے قومی وجود میں سرائیت کر رہے ہیں۔ موقع پرست دہشت گرد کو جب پہلے سے موجودہ زرخیز زمین ملے گی تو اس کے لئے فساد پھیلانا کتنا آسان ہوجائے گا۔
کیا ہم میں سے ہر شخص یہ نہیں جانتا کہ پیغمبر اسلام نے ہمیں صرف اور صرف مسلمان بنایا اور قرآن اور اسوہ رسول صلی اللہ علیہ وآلہ وسلم ہمارے ایمان کی دو واحد بنیادیں ہیں۔قرآن نے بار بار فرمایا’ ہم نے تمہیں مسلمان بنایا۔یہ مسلک بعد کی پیدوار ہیں۔جو لوگ مسلک کو ہی اسلام سمجھ کر”جہاد فی سبیل اللہ ” کا علم اٹھاتے ہیں وہی گمراہ ہیں۔ اور اس گمراہی سے ہی انتہا پسندی جنم لیتی ہے اور یہ انتہا پسندی دہشت گردی کو ہوا دیتی ہے۔حکومت’ فوج اور ریاستی ادارے اپنے طور کام کریں’لیکن بطور مسلمان اور بطور پاکستانی ہمیں بھی اپنے حصے کا کام کرنا ہے۔
میری تجویز ہے کہ محلے کی سطح پر عوامی نوعیت کی ایسی یکجہتی کمیٹیاں تشکیل دی جائیں جن میں تمام مسالک کے لوگ شامل ہوں۔ مسجدوں کے باہر لکھا جائے کہ یہاں ہر مسلک کا مسلمان نماز ادا کرسکتا ہے۔محرم کے دوران واقعہ کربلا کے ایسے تذکرے ہوں جو سب مسالک کے لئے قابل قبول ہوں۔ جب تک ہم اندر کے مسلکی دہشت گرد کو نہیں مارتے عسکری فتوحات ادھوری رہیں گی۔

نااُمید ہونے کے لئے ہزاروں دلائل موجود ہیں۔ لیکن پُرامید رہنے کے لئے وجوہات تلاش کرنا پڑتی ہیں۔ پاکستان بیم ورجا کے اس دوراھے پر آگیا ہے کہ اب یہ ہمارے اوپر منحصر ہے کہ ہم پھر سے یاسیت میں ڈوب جائیں یا اپنے دماغ کو جھٹکا دیں اور امید کا ننھا سا دیا روشن کرکے آگے بڑھیں۔ یہ کہا نہیں جاسکتا کہ کب کوئی دہشتگرد کسی ہدف پر پہنچ کر خود کو اڑا دے اور میرا مﺅقف بھی ہوا میں اڑ جائے۔ لیکن ذرا ٹھہریئے۔ کیا یہ بہت بڑی اُمید افزاءبات نہیں ہے کہ گزشتہ تین ماہ کے اندر دہشت گردوں کا صفایا کرنے کے لئے عسکری اور سیاسی قوتوں نے کمال اتحاد اور یگانگت کا مظاہرہ کیا ہے۔سینکڑوں دہشت گرد پکڑے گئے ہزاروں انتہا پسندوں کے گرد گھیرا تنگ ہوا اور سپہ سالار اعظم اور ان کی ٹیم نے جس طرح افغانستان اور امریکہ کی حکومتوں کو دہشت گردی کے خلاف جنگ میں ان ممالک کی ذمہ داریوں کا احساس دلایا۔ یہ ہماری خارجہ پالیسی کے خلاف قابل فخر پہلو ہے ۔مشیر داخلہ نے بڑے اعتماد سے کہا ہے کہ سول اور ملٹری قیادت میں مکمل ہم آہنگی پائی جاتی ہے۔ استحکام پاکستان کیخلاف خطرے کی گھنٹی ہمیشہ سول ملٹری تعلقات میں دراڑ ہی رہی ہے۔اب یہ کہا جاسکتا ہے کہ پاکستان واضح سمت میں بڑی یکسوئی کیساتھ آگے بڑھ رہا ہے۔ ہمارے انتظامی اور امن وامان کے ذمہ دار اداروں ‘عسکری صلاحیت اور سیاسی سوجھ بوجھ میں بڑی تیزی کے ساتھ بہتری آئی ہے۔ اب عام آدمی پھر سے خوف کی چادر اتار کر احساس تحفظ سے سرشار ہورہا ہے۔

چنیوٹ کے نزدیک لوہے تانبے اور سونے کے ذخائر دریافت ہوئے ہیں۔ اگرچہ حزب اختلاف کے بعض رہنماﺅں نے مذاق اڑایا ہے ” کہ لوہار کو لوہا مل گیا“ اور چوہدری پرویز الٰہی صاحب نے بیان دیا کہ چنیوٹ کے ذخائر نندی پور پاور پراجیکٹ کی طرح ایک ” خواب“ ہی ثابت ہوگا ۔لیکن ملک کے نامور سائنسدانوں نے ان ذخائر کی دریافت کو حقیقت پر مبنی قرار دیا ہے۔ ان ذخائر کو پاکستان کیلئے تائید غیبی قرار دیا جارہا ہے۔ یہ بھی بتایا گیا ہے کہ تھرکول سے اس سال کے آخر میں بجلی کی پیداوار شروع ہوجائے گی۔
امید کی ایک بہت بڑی وجہ یہ ہے کہ جناب عمران خان نے اپنے صوبے میں تعمیری کاموں اور سیاسی تطہیر کے منصوبوں پر کام شروع کردیا ہے۔ بظاہر تو یہ بات غیر اہم سی لگتی ہے لیکن اگر خیبرپختونخواہ کی حکومت واقعتاً ایک ارب درخت لگا دیتی ہے تو آپ اندازہ لگا سکتے ہیں کہ دس سال کے اندر ماحول پر کتنے مثبت اثرات مرتب ہوں گے اور صوبہ کی معاشی حالت میں کس قدر بہتری آئے گی۔ صوبہ بلوچستان میں علیحدگی پسندوں کی تحریک فی الوقت دم توڑ چکی ہے۔ اور اس بات کو علیحدگی پسندوں کے حلقے بھی تسلیم کرتے ہیں۔ صوبہ کے وزیراعلیٰ نے اپنی سادہ طرز زندگی سے اپنے مخالفین کے منہ بند کردیئے ہیں اور وہاں کے بلدیاتی انتخابات کے نتیجے میں بننے والی شہری حکومتوں نے اپنے حلقوں میں کام شروع کردیا ہے۔ ابھی کل کی بات تھی کہ پاکستان کے اس صوبہ کے دارالحکومت کوئٹہ میں پاکستانی پرچم لہرانا یا یوم پاکستان منانا ایک مہیب خواب تھا۔لیکن اب نہ صرف وہاں کھلے عام یوم پاکستان منایا جاتا ہے بلکہ وہاں کے ہزاروں نوجوان افواج پاکستان میں کمیشن بھی حاصل کرچکے ہیں اور وہ دفاع وطن میں اپنی ذمہ داریاں نبھا رہے ہیں۔
کراچی میں بھتہ خوروں اور دہشت گردوں پر ہاتھ ڈالنا ایک دیوانے کا خیال دکھائی دیتا تھا۔ لیکن تمام تر سیاسی مخالفتوں‘دھمکیوں اور دھماکوں کے باوجود رینجرز اپنا کام کر رہے ہیں اور حال ہی میں کراچی کے اندر اعلیٰ سطحی اجلاس اس بات کی طرف واضح اشارہ ہے کہ وہاں ٹارگٹڈ آپریشن جاری رہے گا ۔”بندوق صرف ریاست کے پاس ہوگی“ یہ وہ منزل ہے جسے بالآخر پاکستان نے حاصل کرنا ہے اور یوں محسوس ہوتا ہے کہ مفاداتی گروہوں کی تھکاوٹ کا عمل شروع ہوگیا ہے ۔زیادہ تر روپوش ہوچکے ہیں جو بچے ہیں وہ یا تو مارے جارہے ہیں یا ابھی انہوں نے نئے بہروپ دھار لئے ہیں۔ اور قانون نافذ کرنے والے ”چیتے اور عقاب“ہر بہروپیئے کا چہرہ بے نقاب کرنے پر تیار بیٹھے ہیں۔
پنجاب میں دو ماہ قبل تک سٹریٹ کرائم انتہاﺅں کو چھو رہاتھا ۔گلی محلے میں دن دیہاڑے بندوق کی نوک پر عورتوں کے زیور چھینے جاتے تھے‘نقدی لوٹ لی جاتی تھی اور اغواءبرائے تاوان کی وارداتیں بھی زوروں پر تھیں۔ اب خبریں آرہی ہیں کہ ”سٹریٹ کرائم“ کے اس عذاب میں کمی آگئی ہے ۔پنجاب میں نو تعمیر شدہ قائداعظم سولر پارک نے کام شروع کردیا ہے۔ ملتان کا ایئرپورٹ بھی فعال ہوگیا ہے اور جنوبی پنجاب میں تعمیراتی اور روزگار پیدا کرنے والے منصوبے فائلوں سے نکل کر زمین پر شکل پانا شروع ہوگئے ہیں۔
ہمارے ایک وفاقی وزیر نے سعودی عرب کے حوالے سے ایک بے بنیاد بیان داغ دیا اور بعد میں اس بیان سے مکر گئے لیکن سچی بات یہ ہے کہ ان کے اس بیان کا حوالہ دے کر مخصوص لابی کے بعض کالم نویسوں ‘دانشوروں اور اینکروں نے آسمان سر پر اٹھا لیا تھا۔ یہ جانے بغیر کے پاکستان اور سعودی عرب کے تعلقات میں معمولی سے تلخی بھی نہ صرف پاکستان اور سعودی عرب کے لئے بلکہ پوری امت مسلمہ کے لئے خطرناک ہوگی۔ یہ تو قدرت نے فیصلہ دیا اور آج سعودی عرب شاہ سلیمان کی کمان میں ہے ۔آج کی سعودی حکومت پاکستان سے اتنی ہی محبت کرتی ہے جتنا کہ کوئی پاکستانی اپنے ملک سے محبت کرسکتا ہے ۔سعودی بادشاہ کی طرف سے پاکستان کے حکمرانوں کو اپنے ہاں بلانا اور بادشاہ کا ایئرپورٹ جا کر وزیراعظم پاکستان کا استقبال کرنا پاکستانیوں کے لئے بہت بڑی خوشخبری ہونا چاہیے۔ میرے پاس ایسی معلومات ہیں جن کی بنیاد پر میں کہہ سکتا ہوں کہ جلد ہی سعودی عرب کی طرف سے پاکستان میں بڑی سرمایہ کاری ہوگی اور سعودی عرب میں پاکستانیوں کے لئے ہمدردانہ ماحول پیدا ہوجائے گا۔عالمی امور میں ان دونوں ممالک کی باہمی مشاورت سے پاکستان کی اہمیت بڑھے گی۔
ایران کے ساتھ ”پائپ لائن “اور ”جند اللہ“ کے معاملات پر جو تلخیاں جنم پا رہی ہیں وہ بھی خوش اسلوبیوں میں تبدیل ہونے لگی ہیں اور جند اللہ کے سربراہ کی گرفتاری سے ایک بڑا ”بریک تھرو“ ہوا ہے ۔پاکستان کا ہمیشہ سے یہ موقف رہا ہے کہ ایٹمی مسئلہ پر ایران پر پابندیاں اسی معاملے کو بگاڑیں گی۔ یہ معاملہ بات چیت سے حل ہونا چاہیے۔ پاکستان کے اس موقف کی تائید ہورہی ہے ۔سعودی عرب نے بھی اپنے مﺅقف میں نرمی پیدا کر لی ہے اور اُمید یہی ہے کہ اپریل کے آخری ہفتے میں امریکہ کا ایران سے مجوزہ معاہدہ طے پاجائے گا اور پاکستان پر ایک برادر ہمسایہ ملک کی طرف سے شکوک وشبہات کا سلسلہ رک جائے گا۔
افغانستان میںکئی دیہائیوں کے بعد پاکستان کے مﺅقف کو سمجھنے والی حکومت برسراقتدارآئی ہے۔آج کا افغانستان اگر پاکستان دوست نہیں تو دشمن بھی نہیں ہے۔ خصوصاً دہشتگردانہ کارروائیوں کے حوالے سے کم از کم افغان صدر پوری طرح یکسو ہیں۔گوکہ وہاں ایک متوازن حکومت بھی چل رہی ہے جو پاکستان کی سابقہ پالیسیوں کے باعث اپنی سابقہ پالیسی پر کاربند ہے لیکن آرمی چیف کا کابل بار بار جانا خیروبرکت کا سبب بنے گا۔افغان طالبان کے حوالے سے بڑے مضبوط اور مثبت اشارے مل رہے ہیں ۔اگر مذاکرات ہوجاتے ہیں اور طالبان بھی حکومت میں کسی طور شامل ہوجاتے ہیں تو پھر افغانستان داخلی طور پر مستحکم ملک بن جائے گا اور پاکستان کو مغرب کی طرف سے درپیش مشکلات میں کمی آجائے گی۔
بھارتی سرکار کا بچپنا ابھی برقرار ہے۔ وہ جہاں اسلحہ کی دوڑ میں سرپٹ دوڑے جارہی ہے وہیں پاکستان مخالف کارروائیوں کو بھی ہوا دے رہی ہے۔ یہ پاکستان کے لئے ایک اعصابی حملہ ہے۔ اس حملے کا جواب بھی سفارتی سطح پر دیا جاسکتا ہے۔پاکستان نے اس محاذ پر کبھی بھی کوئی پیش رفت نہیں دکھائی۔ اور اب یہ آوازیں اٹھنا شروع ہوگئی ہیں کہ جس ملک کا کوئی مستقل وزیر خارجہ ہی نہ ہو اس کی وزارت خارجہ کیا کارکردگی دکھائے گی۔ پاکستان کے لئے آنے والے سال دو سال بڑے ہی قیمتی ہیں۔داخلی طور پر استحکام رہے گا۔آئی ڈی پیز واپس جارہے ہیں۔افغان مہاجرین کی واپسی کا عمل شروع ہے۔مذہبی طبقات کے ساتھ موافقت کی فضاءپیدا کرنے کی سر توڑ کوششیں ہورہی ہیں۔بجلی کی پیداوار‘ برآمدات میں اضافہ اور روزگار کی سکیمیں حکومت کی اولین ترجیح ہونی چاہیں۔پاکستان کی خوش بختی ہے کہ چین اس ملک میں بہت بڑی سرمایہ کاری کرنے جارہا ہے۔ بلوچستان کی ناعاقبت اندیش اسمبلی نے گوادر کاشغر روڈ کے معاملے میں بعض رکاوٹیں کھڑی کی ہیں۔لیکن میاں نوازشریف کی ایک صلاحیت کو دشمن بھی مانتے ہیں۔ وہ روٹھے ہوﺅں کو منانے کی خداداد صلاحیت سے مالا مال ہیں۔امید ہے کہ روٹ کے فروعی جھگڑے اس عظیم سرمایہ کاری کو روک نہیں پائےں گی۔
تُرکی پاکستان کا بلاشک وشبہ مخلص دوست ہے۔ تُرکی کے ترقیاتی تجربات سے پنجاب میں فائدہ اٹھایا جارہا ہے ۔بعض تجزیہ کار پاکستان اور تُرکی میں بڑھتی ہوئی قربتوں کیخلاف بھی شیطانی فلسفے سامنے لارہے ہیں۔اس وقت ترکوں پر شک کرنا پاکستان کے خلاف دشمنی کے مترادف ہوگا۔ حکومتی میڈیا منیجرز کی آزمائش ہے کہ وہ ایسے تمام میڈیائی حملہ آوروں سے ہوشیار رہیں اور انہیں ملاقات اور دلائل سے بے اثر کردیں۔
پاکستان کی قیمتی معدنیات کے بارے میں عالمی اداروں کی رپورٹس موجود ہیں۔پاکستان کے اسلحہ ساز ادارے کمال دکھا رہے ہیں۔ میزائل ٹیکنالوجی میں حیران کن ایجادات سامنے آرہی ہیں۔ قومی خزانے میں ہدف کے مطابق ڈالرز موجود ہیں۔زرمبادلہ کے ذخائر میں کمی کی بجائے اضافہ ہورہا ہے ۔روپے کی قیمت مستحکم ہے اور پٹرول کی قیمتوں میں کمی نے ملکی معیشت کو استحکام بخشا ہے ۔ عوامی ضرورت کی اشیاءکی قیمتوںمیں اگرچہ کوئی خاطر خواہ کمی تو نہیں ہوئی لیکن اضافہ بھی دیکھنے میں نہیں آیا۔ ایل۔ این۔ جی کی فراہمی سے ایندھن کی کمی پر قابو پانے میں مدد کی امید ہے۔
غرض تلاش کرنے سے ایسی ہزاروں نشانیاں موجود ہیں جن سے اُمید کا چراغ روشن ہورہا ہے۔ 23مارچ کو فوجی پریڈ ہمارے اس چراغ کو مزید روشن کردے گی۔

ایک بار پھر خطہ ء عراق وشام سے یہ خبریں آرہی ہیں کہ داعش نامی تنظیم اپنے مفتوحہ علاقوں میں مردوں کو قتل کر رہی ہے اور مال غنیمت کے طور پر ہاتھ لگنے والی عورتوں کو فروخت کیا جارہا ہے ۔ہوسکتا ہے کہ ایسی خبروں میں مغربی ذرائع ابلاغ کی طرف سے کچھ مبالغہ بھی ہو لیکن مختلف ذرائع دور جاہلیت والے اس فعل کی تصدیق کرچکے ہیں اور مذکورہ تنظیم کی طرف سے کوئی تردید تاحال سامنے نہیں آئی۔داعش یا دولت اسلامیہ کی طرف سے جاری ہونے والے ہر طرح کے بیانات شائع ہورہے ہیں اور سوشل میڈیا کسی کنٹرولنگ اتھارٹی کا پابند نہیں اس لئے عورتوں کی فروخت کے حوالے سے تواتر کے ساتھ شائع ہونے والی خبروں کی اگر تردید کی جاتی تو یقیناًوہ بھی کسی نہ کسی طرح منظر پر آجاتی۔پاکستان کے مذہبی حلقوں نے داعش کے ان افعال کو نہ صرف غیر اسلامی قرار دیا بلکہ غیر انسانی بھی کہا ہے۔ تصاویر بھی سامنے آئی ہیں او ان بدقسمت عورتوں کو قطار میں بٹھایا دکھایا گیا۔ یہ خبریں اور تصویریں دیکھ کر انسانی دماغوں پر ایک سناٹا سا چھا جاتا ہے کہ آج کے ترقی یافتہ دور اور اسلامی تعلیمات کے عام ہونے کے باوجود بھی یہ سب کچھ ممکن ہے؟ غیر ملکی دانشوروں کی متفقہ رائے بھی سامنے آئی ہے کہ عورت کے رہنے کے لئے اس دنیا پر بھارت سب سے نامناسب ملک ہے۔ یہ 2014ء ہے اور اب جا کر ہندوستان کے اندر عورت کے حق میں قوانین بننے کا عمل شروع ہوا ہے۔اس پربھی وہاں کے روایتی ہندو حلقے خوش نہیں ہیں۔پاکستان میں قوانین کے اعتبار سے عورتیں بہت بہتر پوزیشن میں ہیں۔ریاست پوری طاقت کے ساتھ ایسے مسلح گروہوں کے قلع قمع میں مصروف ہے جو عورت کو کسی لحاظ سے معاشرتی ترقی میں کوئی کردار ادا کرنے نہیں دینا چاہتے۔ملالہ یوسف زئی کا زخمی چہرہ بھی ایسی طاقتوں کے چہرے بے نقاب کر رہا ہے۔
امریکہ اور یورپ میں عورت کی خودمختاری کے نام پر ایک گھناؤنا کھیل کھیلا جارہا ہے۔پاؤں کے ناخن سے لے کر سر کے بالوں تک عورت کو ایک اشتہار بنا کر اس کی بااختیاری کا استحصال ہورہا ہے۔ ریپ کی بڑھتی وارداتوں کا نتیجہ ہے کہ مغرب کے کاروباری ادارے ایسے آلے تیار کر رہے ہیں کہ عورت خطرہ محسوس کرتے ہی اگربٹن دبا دے تو اس کی حفاظت کا بندوبست ہوجائے گا۔
یہ وہ چند تلخ حقائق ہیں جن کو سرسری انداز میں بیان کرنے کا مقصد یہ ہے کہ عورت کے حوالے سے اس وقت کوئی بھی ایسا معاشرہ موجود نہیں ہے جسے ہم مثالی کہہ سکیں۔
عورت کو اختیار اسی صورت مل سکتا ہے جب اس کے بارے میں مرد اور عورت دونوں کے اندرنسوانی احترام کا قوی احساس جڑ پکڑ سکے۔ عورت قابل احترام ہے اور بہت سے حوالوں کے اعتبار سے مرد کے برابر ہی نہیں بلکہ مرد سے بالاتربھی ہے۔
ہمارے ایک دوست جو ایک سیاسی مذہبی جماعت کے امیر ہیں انہوں نے بتایا کہ ان کے ہاں ایک بیٹی پیدا ہوئی اور پھر اٹھارہ برس تک کوئی اولاد نہیں ہوئی۔ وہ کہتے ہیں کہ انہوں نے اللہ کے حضورؐ گڑگڑا کر دُعا مانگی ’’بیٹا ہو یا نہ ہو تیری رضا ہے۔لیکن مجھے ایک اور بیٹی دے دو تاکہ میں جنت کا حقدار ہوسکوں‘‘۔ یہ ہے وہ احساس جسے قرآن اور اسوہ رسالت مآب صلی اللہ علیہ وآلہ وسلم نے مسلمانوں اور انسانوں کے اندر بیدار کرنے کی کوشش کی بلکہ واضع احکامات دیئے۔حدیث مبارک ہے کہ جس نے تین بیٹیوں کی اعلیٰ تعلیم وتربیت (اچھی پرورش) کی اس پر جنت واجب ہوگئی۔ آپ نے پڑھا ہوگا کہ اس پر بعض اصحابہؓ پریشان ہوئے اور پوچھا یا رسولؐ اللہ جس کی دو بیٹیاں ہوں گی کیا وہ جنت سے محروم رہ جائے گا ‘آپؐ نے فرمایا نہیں ’’جس نے دو بیٹیوں کی بھی اچھی طرح پرورش کی وہ بھی جنت کا مستحق ٹھہرا‘‘۔
اب اچھی طرح پرورش کا معانی بھی سمجھ لیجئے۔
رسول اللہ صلی اللہ علیہ وآلہ وسلم کا ارشاد ہے کہ علم کا حصول ہر مسلمان عورت اور ہر مسلمان مرد پر فرض ہے۔گویا عورت کو تعلیم دلوانا عین فرض ہے اور تربیت کا ایک حصہ ہے۔ اسی طرح فرمایا کہ صحت مند مومن کمزور مومن سے بہتر ہے۔یہاں مومن جمع کے صیغے میں استعمال ہوا ہے۔ لہٰذا بچوں اور عورتوں کی صحت پر خرچ کرنا بھی منشاء اسلام ہے ۔ اسلام عورت کے حوالے سے مردوں کے اندر یہ احساس پیدا کرنا چاہتا ہے کہ وہ تعلیم و تربیت کے لحاظ سے نہ صرف مردوں کے برابر ہیں بلکہ جنت بیٹیوں کے ذریعے ملے گی بیٹوں کے ذریعے نہیں ۔دیکھئے کس طرح اسلام نے عورت کو مرد پر بالادستی دے دی ہے۔ بیٹی کو رحمت قرار دینے کا مقصد بھی مردوں کی نفسیاتی بالادستی کو چیلنج کرنا تھا۔
حضرت خدیجہؓ کا اسلام کے حوالے سے شاندارکردار ذہن نشین رہنا چاہیے۔ آپؓ تجارت پیشہ تھیں‘آپ کے شوہر ؐ آپ سے کاروباری ہی نہیں سماجی اور تبلیغ اسلام کے حوالے سے مشاورت فرماتے تھے۔ اس سے ثابت ہوتا ہے کہ عقل و دانش کا تعلق صرف مرد سے نہیں۔ عورت بھی مشیر ہوسکتی ہے ‘ اسی طرح بے شمار اصحابیات کی معاشی‘ سماجی اور مذہبی سرگرمیوں سے تاریخ اسلام بھری پڑی ہے۔
حجاب اور پردے کے اعتبار سے بھی پہلے مردو کو حکم دیا گیا کہ وہ نگاہیں نیچی رکھے پھر عورت کو ستر ڈھانپنے کا حکم آیا ہے۔وراثت کے قوانین پڑھ کر یوں لگتا ہے کہ اسلام مرد کو کنگال اور عورت کو دولت مند دیکھنا چاہتا ہے۔ باپ کا حصہ بھی لے اور شوہر سے بھی معاشی فوائد سمیٹے۔گویا معاشی خودمختاری کی اسلام نے ایسی بنیاد رکھ دی کہ اس پر اگر سو فیصد عمل ہو تو شائد سارے مرد عورتوں کے مقروض ہوجائیں۔ چونکہ آپ لوگ تعلیم یافتہ ہیں اور عورتوں کے حوالے سے اسلام کی طرف سے دی جانے والی خودمختاری کے ہر پہلو سے آپ واقف ہیں اس لئے تفصیل حذف کر رہا ہوں۔آج اگر آپ نکاح نامہ کو غور سے پڑھیں تو اس میں واضح شق موجود ہے جس میں اگر لڑکی چاہے تو ’’عورت کو طلاق حق‘ والی شرط رکھ سکتی ہے۔ اگر مرد طلاق دے سکتا ہے تو عورت بھی خلع مانگ سکتی ہے۔
اصل مسئلہ کیا ہے۔اصل مسئلہ یہ ہے کہ اسلامی تعلیمات کو عام فہم کیا جائے اور قبائلی روایات اور عرب رسم و رواج کو جو لوگ اسلام بنا کر پیش کرتے ہیں ان کی اس جعل سازی کو بے نقاب کیا جائے۔ آئین پاکستان میں عورتوں کی وراثت سے انکار ‘دفتروں اور مارکیٹوں میں ان کو خوفزدہ کرنا یا ان کو معاشی دوڑ میں جنس کی بنیاد پر آگے بڑھنے سے روکنا سب قابل گرفت جرائم ہیں۔ ہمارے ہاں جہاں باقی قوانین پر کوئی عمل نہیں ہورہا ہے ایسے ہی عورتوں کے سماجی ‘معاشی تحفظ کے حوالے سے قوانین پر بھی عمل نہیں ہورہا۔لیکن پاکستان میں پھر بھی ایک عورت وزیراعظم بن سکتی ہے‘جج بن سکتی ہے‘ ڈی سی بن سکتی ہے‘سائنسدان بن سکتی ہے‘جرنیل بن سکتی ہے اور سب سے بڑھ کر یہ کہ وہ اینکر پرسن بن سکتی ہے۔
یہ ایک طویل سفر ہے۔پاکستان کی عورتوں نے بڑی تیزی سے یہ سفر طے کرنا ہے۔ بہت بڑی خوشخبری ہے کہ ہر امتحانی نتائج میں لڑکیاں شاندار کارکردگی دکھا رہی ہیں۔ اس کا صاف مطلب یہ ہے کہ پاکستان کا مستقبل جہالت نہیں روشنی میں آنکھ کھولے گا۔ ذرائع ابلاغ کا بہت بڑا کردار ہے اساتذہ کا انتہائی ذمہ دارانہ کردار ہے۔ دیہات کی عورت کو شہر کی عورت نے آگے بڑھانا ہے۔ اس ملک کو معاشی خودمختاری بھی عورت نے ہی دلانی ہے۔ سیاسی پارٹیوں کو چاہیے کہ وہ اسمبلی میں بھی مخصوص نشستوں پر ایسی خواتین کو آگے لائیں جو معاشرے کے اس بڑے حصے کی حقیقی ترجمانی کرسکیں۔معاشرے کا بناؤ اور بگاڑ اب عورت کے ہاتھ میں ہے۔ بیٹی رحمت ہے اور اس بکھرے‘کٹے پھٹے اور لڑتے جھگڑتے پاکستان کو اس رحمت سے بہت سی اُمیدیں ہیں۔

کائنات کا دولہا انسان اللہ پروردگار عالم کی تخلیق کا بہترین شاہکار ہے۔ رب کائنات نے اسے نعمتوں کے اتنے
انبار عطا فرما دیے کہ جنہیں دیکھ کر ذرا سا غور کرنے پر ہمیں اللہ نظر آنے لگتا ہے۔ اللہ خود اپنے کلام میں فرماتا ہے”تمہارے نفوس میں میری نشانیاں موجود ہیں تو کیا تم ان پر غور نہیں کرتے”۔
ہم اپنی ذات سے ذرا باہر نظر دوڑائیں تو سورج’ چاند’ ہوا’ پانی ‘ستارے آسمان’زمین اور جانور سب کے سب قدرت کی نشانیاں ہونے کے ساتھ ساتھ حضرت انسان کی ایسے خدمت میں جتے ہوئے ہیں جیسے ان کا ہم سے بہت بڑا کام پھنسا ہوا ہے۔ ان پر نگاہ دوڑا کر یوں محسوس ہوتا ہے کہ جیسے سورج چمکتا’چاند دمکتا’ستار روشن’ سمندر موجزن’ ہوائیں چلتی’ پھول کھلتے’پھل پکتے اور جانور سواری و غذا کے لئے پیدا ہی ہمارے لئے کئے گئے ہیں۔ احساس کچھ یوں ہوتا ہے کہ جیسے ہم آقا ہیں اور یہ ہمارے خدمت گزار حالانکہ اصل صورتحال اس کے برعکس ہے۔ ان سب سے پوچھیے کہ اگر انسان نہ ہو تو تمہاری صحت پر کیا اثر پڑے گا تو یہ سب کہیں گے ہماری بلا سے۔ مگر انسان ان کے بغیر ایک پل بھی زندہ نہیں رہ سکتا۔غرض ساری کائنات اپنا کام مالک حقیقی کی مرضی کے عین مطابق کر رہی ہے مگر انسان ہے کہ ظالم بھولا ہوا ہے۔
گھوڑے کو مالک صرف چارہ ہی ڈالتا ہے تو وہ اس کے بدلے اس کے لئے لڑ کر اپنی جان دے دیتا ہے۔ مگر انسان اپنے مالک کا بڑا ناشکرا ہے اور اس کی وجہ سورہ عادیات میں جو بتائی گئی وہ ہے مال سے بے پناہ محبت:
دنیا میں کسی ادارے کا مالک تیوری چڑھا لے تو ملازم فوراً ہاتھ باندھ کر کھڑا ہوجاتا ہے مگر کارخانہ قدرت کا حکم کئی بار جھنجوڑ چکا مگر ہم اس کی کوئی پرواہ نہیں کرتے۔آذان کی پکار تو ہمارے کانوں سے ٹکرا کر واپس چلی جاتی ہی رہی ہے لیکن اب تو ہم چھوٹے عذابوں کی ایک سیریز کو اپنی آنکھوں سے دیکھنے کے باوجود بھی راہ حق کی طرف جانے سے کترا رہے ہیں۔
وہ ہمیں بار بار اپنے کلام میں بتا چکا ہوں کہ میں نے یہ تمام کائنات تمہارے لئے مسخر کردی ہے مگر تم کو اپنے پیار کے لئے پیدا کیا ہے۔ وہ واضح طور پر آگاہ کرتا ہے کہ تمہاری تخلیق کا مقصد میری محبت اورمیری مخلوق سے پیار ہے۔
وہ خبردار کرتا ہے کہ اگر تم مجھ سے محبت نہیں کرو گے تو میں عنقریب تمہاری چھٹی کروا دوں گا اور تمہاری جگہ ایسی قوم پیدا کروں گا جو کہ مجھ سے محبت کرے گی اور میں ان سے محبت کروں گا۔
وہ کہتا ہے کہ میں تم سے رزق روزی نہیں مانگتا۔رزق رساں تو میں ہوں۔ اس لئے تمہاری روزی کا میں سامان کروں گا تم تو بس میری طرف پیار کی نگاہ اٹھا کر کبھی دیکھ ہی لیا کرو۔
وہ ہم کو بار بار اپنی نعمتوں کی یاددہانی کراتا ہے کہ شائد نگاہ ان کی طرف مبذول کرے تو نگاہ شکریہ اوپر بھی اٹھا لے۔مگر ہمارا حال تو یہ ہے کہ گائے نے اگر دودھ پلایا ہے تو ہم نے اسے ماتا بنا کر اسی کے آگے سر تسلیم دل خم دیا۔اللہ کو ہم سے گلا ہے کہ گوبر اور خون کے درمیان سے ظالمو تم کو خالص دودھ تو میں نے پلایا ہے اور تم نے ساقی پر نگاہ کرنے کے بجائے برتن کے آگے سر نیاز جھکا دیا۔ جبکہ گائے کو تو یہ خبر بھی نہیں کہ یہ سارا نظام کیسے چل رہا ہے۔ رب کا فرمان ہے کہ سورج اور چاند کو سجدہ کرنے والو اسے پہچانو جس کے ہاتھ میں ان کی رسی ہے۔
دنیا میں ماں جب بچے کو نہلا دھلا کر نئے کپڑے پہنا کر سامنے کھڑا کرتی ہے اور پوچھتی ہے کہ سب کچھ کس نے دیا ہے تو بچہ اگر صرف اتنا کہہ دے کہ ”ماں تو نے” تو صرف اتنا کہنے پر ہی ہم نے کئی بار دیکھا ہے کہ وہ بچے کو درجنوں بوسے دیتی ہے۔ یہی حال مالک کا ہے جب بندہ نہا دھو کر آئینہ کے سامنے کھڑا ہو اور یہ کلمات ادا کرے کہ اللہ تیرا شکر ہے تو مجھے خوبصورت شکل عطا فرمائی۔ میری سیرت کو بھی خوبصورت بنا دے تو عرش سے آواز آتی ہے۔ ”بندے جا تیری اس خوبصورت بات پر میں نے تیرے پچھلے گناہ معاف کردیئے”۔ وہ فرماتا ہے کہ اگر نعمت کا شکر ادا کرو گے تو نعمتوں کی بارش کردوں گا اور ناشکری کرو گے تو میرا عذاب بہت سخت ہے۔
اللہ نے ہمیں مختلف انداز سے یاددھانیاں کروائی ہیں کہ شائد انسان اپنے محبوب حقیقی کی طرف نظر التفات کرلے۔وہ فرماتا ہے کہ جب تم ماں کے بطن سے گود مادر میں آئے تو کچھ نہیں جانتے تھے۔ یہ سمع و بصر اور دل ودماغ جس پر تم اتنا اتراتے ہو میں نے عطا فرمائے ۔ایک طرف تو ان نعمتوں کا تذکرہ کیا عام لوگوں کیلئے تو دوسری طرف میڈیکل سائنس کے ماہرین کو بتایا کہ تم نے آج یہ ثابت کیا ہے کہ انسان کو پہلے سماعت ملتی ہے بعد میں بصارت مگر رب العالمین نے چودہ سو سال قبل ہی یہ حقیقت اپنے نبی صلی اللہ علیہ وآلہ وسلم کی زبان سے جاری فرما دی تھی۔
وہ ہمارے کئی بھائیوں کو ان میں سے کچھ عطا نہیں بھی فرماتا۔شائد اس لئے کہ آنکھوں سے محروم کوئی شخص جب گلی گلی سے یہ پکارتا گزرے کہ” آنکھوں والو! آنکھیں بڑی نعمت ہیں” تو ہمیں ان کے نعمت ہونے کا واقعتاً احساس ہوجائے آپ غور فرمائیں تو نوزائیدہ بچہ نہ بول سکتا ہے نہ رفع حاجت کرنے کے قابل ہوتا ہے۔غلاظت کے اس ڈھیر کے لئے دودھ کی نہروں کے علاوہ ماں کے دل میں اتنا پیار بھی ڈال دیا کہ وہ ساری غلاظتیں اپنے دامن میں لے لیتی اور بچے کو صاف ستھری جگہ ڈالتی۔میں تو اس کو اس طرح دیکھتا ہوں کہ دنیا میں جو ماں کا کردار ادا کر رہی ہے وہ ماں نہیں بلکہ دائی ہے اصل ماں (پالنے والی ذات) تو وہ ہے جس نے اس دائی کے دل میں اتنا پیار ڈالا ہوتا۔ سرکار صلی اللہ علیہ وسلم نے بھی اللہ کے پیار کو ماپنے کے لئے ماں کے پیار کا پیمانہ استعمال کیا۔ آپ کسی سفر پر جا رہے تھے کہ ناگہاں کسی عورت کا بچہ کھو گیا۔ وہ بڑی بے چینی کے عالم میں پاگلوں کی طرح اسے ڈھونڈتی پھر رہی تھی۔ کافی وقت بعد وہ اسے اچانک نظر آیا تو اس نے بچے کو اپنی بانہوں میں جکڑ کر اسے بے شمار بوسے دیے۔ ایسی کیفیت میں حضور صلی اللہ علیہ وآلہ وسلم نے صحابہ کو اس کی طرف اشارہ کرتے ہوئے فرمایا کہ دیکھو تمہارا رب تم سے اس ماں سے بھی ہزاروں گنا زیادہ پیار کرتا ہے جب قرآن فرماتا ہے کہ ماں باپ کے سامنے اف تک نہ کہو تو میں سوچتا ہوں کہ جب ہم اس ماں کے سامنے اف نہیں کہہ سکتے تو اس حقیقی ماں کے سامنے اف کیسے کہہ سکتے ہیں اور اس کے حکموں کو پا کر ان کی نافرمانی کرنے کی جسارت کیسے کرسکتے ہیں۔ میں انسان میں موجود اعضاء اور نظام کو دیکھ کر کبھی کبھی خیال کرتا ہوں کہ جانے وہ خود کتنا پیارا ہوگا جس کی تخلیق اتنی پیاری ہے۔
انسان کے اندر اور باہر کے ماحول میں یہ نشانیاں ہم سے کچھ کہتی ہیں ۔ گاڑی میں جانے والا مسافر اپنے دوست کو دیکھ کر جب رومال لہراتا ہے تو اس کی حرکت سے دیکھنے والے کو ایک نتیجہ نکالنا ہوتا ہے اگر کوئی رومال کی رنگت’ اس کی دھاریوں’ اس کے کپڑے کے معیار پر غور کرنے لگے تو زمانے والے اسے احمق کہیں گے۔دراصل اس طرح کرنے سے اس کا مقصد اس کی توجہ اپنی جانب مبذول کروانا ہوتا ہے۔
اگر کوئی مہمان کسی کے گھر کھانا کھانے کے وقت سب باتوں کو لاجک سمجھ جائے کہ بلب میں روشنی پاور ہائوس سے آرہی ہے۔ پھول جو گلدانوں میں سجائے گئے ہیں یہ اس طرح گلدانوںمیں نہیں اُگتے بلکہ باغ سے لائے گئے ہیں۔بادلوں کو دیکھ کر ان کا سارا فلسفہ بیان کردے۔ غرض ہر چیز کے بارے بڑی عقل مندی سے متاثر کن کرتا جائے۔ کھانے پر بھی بڑی سیرحاصل گفتگو کر ڈالے مگر کھانا کھانے کے بعد میزبان کا شکریہ ادا کیے بغیر چلائے تو کوئی شخص بھی ایسے شخص کو عقلمند نہیں کہے گا۔ عقل بہت بڑی چیز ہے اس کی بنیاد پر انسان اشرف المخلوقات کے درجہ پر فائز ہوا ہے مگر یہی عقل اگر کسی جسم سے نکال دی جائے تو وہ پاگل کہلائے گا۔ یاد رہے کہ عقل اگر وحی کی روشنی سے ہٹ کر فیصلے کرے گی تو یہ باولی کہلائے گی۔خدا کا فرمان بھی کچھ اسی طرح سے ہے کہ جب میرے بندے آسمانوں اور زمین کی تخلیقات میں غور کرتے ہیں تو نتیجہ بے فکر کے طور پر بے ساختہ یہ کہہ اٹھتے ہیں کہ اے رب تو نے یہ سب بے کار پیدا نہیں کیا۔ وہ کہتے ہیں کہ رب تو پاک ہے ہم کو آگ سے بچا کر اپنا دیددار نصیب فرما۔ بقول شاعر
تیری جنت کو یا رب کیا کروں
آرزو ہے تجھے دیکھا کروں