رینجرز کو داد دینی چاہیے کہ انہوں نے بڑے بڑے ڈاکوئوں کی پکڑ دھکڑ شروع کر رکھی ہے اور اگر تفتیش اور تحقیق میں مار نہ کھا گئے تو عدالتوں کے ذریعے عبرتناک سزائوں کی نوید ہے۔ سفید پوش ڈاکوئوں کو پکڑنا مشکل کام ہے۔ اس کے لئے آپ ناکہ نہیں لگا سکتے’ ریڈ نہیں کرسکتے’پولیس مقابلہ نہیں کیا جاسکتا۔ سیاسی رعب داب میں لپٹے اور عزت مآب کی قلغیاں سجائے ان قومی ڈاکوئوں کی تعداد بھی بہت ہے اور ان کے بنتے ٹوٹتے اتحاد وفاقی اداروں کو بعض اوقات بے بس کر دیتے ہیں۔ لیکن سپہ سالار اعظم جناب جنرل راحیل شریف کی کمٹمنٹ پر قربان جانے کو جی چاہتا ہے کہ وہ اس مشکل ترین مہم میں مسلسل کامیابیاں حاصل کر رہے ہیں۔ ہماری دلی دُعا ہے کہ وہ خوشامدیوں سے بچ بچا کر قومی بقاء کے اس صالح عمل کو منطقی انجام تک پہنچا سکیں اور وارداتیوں کی ریشہ دوانبوں سے محفوظ رہیں۔
میں معروف اور دیکھے بھالے ڈاکوئوں کا تذکرہ کرنا چاہتا ہوں۔اخبارات کے اندر کرائم کارنرز ایسی خبروں سے بھرے پڑے ہیں جن سے ظاہر ہوتا ہے کہ عام اور پرامن شہریوں کی عمر بھر کی جمع پونجی لوٹنے والے ڈاکو کس قدر نڈر اور سفاک ہیں۔ رات اڑھائی بجے کے لگ بھگ ٹی وی چینلز پر متواتر ٹکّر اور تازہ ترین خبریں چل رہی ہوتی ہیں۔

سندھ میں دو ڈاکو مارے گئے۔ ساہیوال میں لوگوں نے ڈاکو پکڑ کر پولیس کے حوالے کردیا’پنڈی کے بنی چوک میں پچاس لاکھ کا ڈاکہ پڑ گیا۔ میڈیا ٹائون میں صبح آٹھ بجے ایک گھر کو لوٹ لیا گیا۔ آئی ٹین فور میں ایک ریٹائرڈ بریگیڈیئر کے گھر سے پچپن لاکھ روپے لوٹ لئے گئے۔ نیلور میں ڈاکو ایک گھر میں گھس گئے’ اہل خانہ کو یرغمال بنایا اور زیورات لوٹ کر فرار ہوگئے وغیرہ۔ ایسی درجنوں خبریں روزانہ ٹی وی چینلز اور اخبارات کے ذریعے موصول ہوتی ہیں لیکن یہ خبر کہیں پڑھنے کو نہیں ملتی کہ ضلعی انتظامیہ یا آئی جی پولیس نے کوئی ایسا ہنگامی اجلاس طلب کیا ہو جس میں ان مسلح ڈاکوئوں کی گرفتاری کا کوئی منصوبہ شروع کیا گیا ہو۔
وفاقی دارالحکومت کے کئی تھانوں میںفون کی سہولت موجود نہیں۔ اگر رات کو اطلاع دینی ہو کہ ڈاکو واردات کے لئے کسی گلی میں گھس گئے ہیں تو رابطہ قائم کرتے کرتے مظلوم انسان لُٹ جاتا ہے۔ وہ ایک بے بس شکار کی طرح ڈاکوئوں کے رحم و کرم پر ہوتا ہے۔ شہری سوچتے رہتے ہیں کہ مال اور جان کے تحفظ کے لئے اب کس کو پکاریں۔ پولیس کی ٹیمیں پورے اسلام آباد میں پھیلی ہیں لیکن ان کی آنکھوں کے سامنے ڈاکو چہل قدمی کرتے گزر جاتے ہیں۔
جڑواں شہروں میں رپورٹ ہونے والی وارداتوں میں سرقہ بالجبر’اسلحہ کی نوک پر مال و متاع سے محرومی اور بعض اوقات بے بسی کی موت جیسے واقعات شامل ہیں۔ڈاکوئوں کے لشکر اتر آئے ہیں۔ پولیس کو ایف آئی آر درج کرانے جائیں تو وہ ڈاکے کی جگہ لفظ چوری لکھ کر ٹال دیتے ہیں۔ پولیس میں بہت نیک لوگ ہیں۔لیکن عوام ان کی نیک نیتی کا کیا کریں۔ وہ تو لٹ رہے ہیں۔ بچے اور بچیاں خوف میں مبتلا ہو کر ذہنی توازن کھو بیٹھتی ہیں۔ اپنے گھر میں ۔ہاں جسے جنت کہا جاتا ہے ‘ وہی گھر ڈرانے لگتا ہے۔ کسی نے جہیز کے لئے کچھ بچا رکھا ہے’کسی نے بچے کی فیس جمع کرانی ہے۔ کسی نے بوڑھاپے کے لئے چند ہزار روپے جمع کر رکھے ہیں ۔گھر سے محفوظ جگہ کونسی ہوگی۔ لیکن افسوس کہ آج کل گھر ہی محفوظ نہیں رہے۔
شہری سوال کرتے ہیں کہ آخر تھانے والے ان منہ زور درندوں کو پکڑتے کیوں نہیں۔ وزیر داخلہ کہاں چُھپے بیٹھے ہیں۔ شہر اقتدار کو اس عذاب سے نجات کون دلائے گا۔ سائبر کرائم سیل موجود ہے’ جگہ جگہ ناکے لگے ہیں۔شہر کے داخلی اور خارجی راستوں پر کیمرے نصب کئے گئے ہیں پھر بھی عوام غیر محفوظ ہیں۔ ہر گھر کے سروے ہوتے ہیں۔کریہ داروں کا آڈٹ ہوچکا۔ آخر یہ ڈاکو کہاں سے آتے ہیں۔ کیا آسمان سے نازل ہورہے ہیں یا زمین سے پھوٹ رہے ہیں۔ ان پر قابو پانا کتنا مشکل ہے۔؟
عوام میں عدم تحفظ کا احساس پڑھتا جارہا ہے۔ یہ بھی کہا جارہا ہے کہ ڈاکو انتہائی تربیت یافتہ ہیں۔کوئی قفل’ کوئی دیوار’ کوئی گیٹ ان کے سامنے ٹھہر نہیں سکتا۔ یہ دستانہ پوش ہوتے ہیں۔نقاب اوڑھے ہوتے ہیں۔ جوگر پہنے ہوئے ہوتے ہیں۔ اکثر پشتو بھی بولتے ہیں۔ ان کی دہشت سے لوگ راتوں کو جاگتے ہیں۔ یہ سب کب تک ہوگا۔ خدارا ہر کام فوج پر مت ڈالو۔ گلی محلے اور گھر میں قیامت ڈھانے والے ان ڈاکوئوں سے نجات دلائو تاکہ عوام آپ کو اپنا نجات دہندہ کہہ سکے۔ اور ڈاکوئوں کو بھی یاد دلانا ضروری ہے کہ وہ ظلم سے باز آجائیں ۔قرآن پاک میں ارشاد ہوتا ہے۔
”اے ایمان والو ‘ایک دوسرے کے مال کو باطل طریقے سے مت کھائو ”
فرمان رسول اللہ صلی اللہ علیہ وآلہ وسلم ہے کہ’
”تمہارا خون’تمہار امال اور تمہاری آبرو ایک دوسرے پر اسی طرح حرام ہیں کہ جس طرح آج کا دن ‘یہ مہینہ اور اس شہر (مکہ)کی حرمت قائم ہے”۔(خطبہ حجة الوداع)۔

یہ بات بلا شک و شبہ کہی جاسکتی ہے کہ کراچی میں گذشتہ ایک برس سے جاری آپریشن کسی تخصیص اور تفریق کے بغیر جاری ہے۔ کوئی پارٹی یا گروہ یہ نہیں کہہ سکتا کہ رینجرز کے اس آپریشن میں کس طرح کی جانبداری برتی جارہی ہے۔ جس پارٹی کا جتنا بڑا سائز اور حجم ہے اسی حساب سے کرپشن اور بدعنوانی کے حوا لے بھی نتھی ہیں۔ ایم کیو ایم کے خلاف اندرون ملک ہی نہیں بیرون ملک سے بھی ثبوت اور انکشافات سامنے آرہے ہیں۔یوں محسوس ہوتا ہے کہ متحدہ کے مبّینہ مجرموں کے خلاف گھیرا مکمل ہوچُکا ہے اور اب آخری ہلہ بولا جانا ہے۔ دوسری طرف پاکستان پیپلزپارٹی کے درجن بھر لوگ زیرحراست ہیں ‘بعض اہم لوگ پیشگی اطلاعات پر فرار ہوچکے ہیں’لیکن دو درجن سے زائد لوگ جن میں صوبائی وزراء اور مشیر شامل ہیںانہیں باہر جانے سے روک دیا گیا ہے۔نقدی پکڑی گئی ہے اور بہت سے راز دیرینہ راز دانوں نے افشاء کردیئے ہیں۔ خیال یہی ہے کہ آئندہ چند دنوں میں دو سو تیس ارب روپے کی سالانہ کرپشن کا تمام نیٹ ورک پکڑا جائے گا اور دہشت گردوں کو مالی معاونت فراہم کرنے والے بھی دھر لئے جائیں گے۔ وفاقی حکومت اور افواج پاکستان کے درمیان اس معاملے پر مکمل ہم آہنگی دکھائی دیتی ہے۔ وزیراعظم میاں محمد نوازشریف اور آرمی چیف جنرل راحیل شریف کے درمیان مسلسل رابطے اور معلومات کے تبادلے سے یہ تاثر اُبھر رہا ہے کہ پاکستان کی سیاسی وعسکری تاریخ میں پہلی بار سیاسی اور فوجی قیادت میں قومی مسائل کے حل کے لئے ایک مکمل ہم آہنگی پائی جاتی ہے۔یہ ایک انتہائی خوش آئند پہلو ہے۔حکومت کی کوشش یہ ہے کہ کراچی آپریشن کے آخری رائونڈ میں بھی سندھ کے اندر منتخب جمہوری حکومت قائم رہے اور گورنر راج کا آپشن اختیار نہ کرنا پڑے۔ ضرب عضب کا ایک مرحلہ بڑی حّد تک کامیاب ہوچُکا ہے۔دہشت گردوں کا صفایا ہوچُکا ہے۔خیبر ایجنسی میں بھی امن قائم کیا جاچُکا ہے۔پاکستان مخالف قوتوں نے پاکستان کو غیر مستحکم کرنے کا جو جال بُنا تھا اس جال کو افواج پاکستان اور پاکستانی قوم نے عظیم شہادتیں دے کر کاٹ ڈالا ہے۔ضرب عضب دوسرے مرحلے میں داخل ہوچکی ہے۔شہروں کے اندر دہشت گردوں کا تعاقب جاری ہے۔ خودکش حملوں اور ٹارگٹ کلنگ میں واضع اور نمایاں کمی آچکی ہے۔ دہشت گردوں کے مالی معاونین کی کھوج لگاتے رینجرز کے ہاتھ سندھ کے بدعنوان سیاستدانوں ‘ کرپٹ افسروں اور عہدیداروں کے گریباں تک پہنچ چکے ہیں۔
ایک اُمید سی پیدا ہوئی ہے کہ پاکستان سے میگاکرپشن کا خاتمہ قریب آن لگا ہے۔ایسی صورتحال میں بعض حلقے مختلف قسم کی افواہیں پھیلانے میں مصروف ہیں۔اسلام آباد میں ایسے لوگ ہیں جو صبح و شام جمہوری نظام کے خاتمے کی باتیں کرتے ہیں۔ اُن کے سازشی نظریات کسی سے ڈھکے چھپے نہیں ہیں۔ میں کوئی جمہوریت کا ترجمان نہیں ہوں لیکن یہ سوچ لینا چاہیے کہ اسی جمہوری حکومت کے سبب ہی افواج پاکستان کو سو فیصد عوامی حمایت حاصل ہوئی ہے۔پاکستان کی ترقی کے لئے دونوں طاقتوں کا آپس میں مل کر چلنا ہی نتائج کا ضامن ہے۔ کچھ بدخواہ حلقے یہ افواہیں پھیلانے میں مصروف ہیں کہ آپریشن اس لیے کیا جارہا ہے کہ کراچی اور سندھ میں فوج کے بہت سے کام روک لئے گئے ہیں اور وہ نااہل سندھ حکومت سے سخت نالاں ہیں۔بعض دانشور دُور کی کوڑی لارہے ہیں کہ ایم کیو ایم کے خلاف بی بی سی کی رپورٹوں کا مقصد متحدہ اور وفاقی حکومت کے درمیان دوریاں پیدا کرکے مُلک کا امن وامان تباہ کرنا ہے تاکہ چین طے شدہ سرمایہ کاری سے باز رہے۔ بعض افواہ ساز لوگ بے پر کی اڑا رہے ہیں کہ جنرل راحیل شریف نے نوازشریف کو دھمکی دی ہے کہ اگر کراچی آپریشن نہ ہونے دیا گیا تو عمران خان اور طاہر القادری پھر میدان میں ہوں گے۔
کرپشن کا خاتمہ خوشحالی کی اولین شرط ہے۔ ہمیں سمجھنا چاہیے کہ رینجرز اپنی جان ہتھیلی پر رکھ کر کرپٹ مافیا سے ہمیں نجات دلا رہے ہیں۔ہماری قومی ذمہ داری ہے کہ ہم گلی محلے میں چلتے پھرتے اٹھتے بیٹھتے ایسے منفی پروپیگنڈہ کا توڑ کریں۔ہمیں رمضان شریف میں ویسے بھی سنی سنائی باتوں کو آگے نہیں بڑھانا چاہیے۔ پُراُمید رہنا چاہیے اور مایوسی پھیلانے والے لوگوں کو نیکی کے کاموں میں تعاون پر آمادہ کرنا چاہیے۔ بدعنوانی اور لوٹ مار کے خاتمے کے لئے کی گئی ہر کوشش نیکی کے زمرے میں آتی ہے۔اللہ فرماتے ہیں’
”نیکی کے کاموں میں ایک دوسرے سے تعاون کرو اور برائی اور ظلم کے کاموں میں ایک دوسرے سے تعاون مت کرو”۔

سنکیانگ میں دو کروڑ مسلمان آبادہیں ۔ گو ان کی زبان ترکی سے مماثلت رکھتی ہے لیکن لسانی اور ثقافتی اعتبار سے وہ خود کو وسط ایشیائی ریاستوں کے زیادہ قریب سمجھتے ہیں۔صدیوں سے سنکیانگ کی معیشت کا دارومدار زراعت اور تجارت پر ہے، جس کا اظہار سلک روٹ پر واقع کاشغرجیسے مصروف شہروں سے ہوتا ہے۔بیسویں صدی کے اوائل میں کچھ عرصے کے لئے الغیور آبادی نے اپنی آزادی کا اعلان کر دیا تھا لیکن انیس سو اننچاس میں یہ علاقہ باقاعدہ طور پرکیمونسٹ چین کے مکمل کنٹرول میںلایا گیا ۔
رپورٹ شائع ہوئی ‘کہ چینی حکومت نے زیادہ تراس مسلم آبادی والے مغربی علاقے سنکیانگ میں سرکاری ملازمین، طلبہ اور اساتذہ کی طرف سے رمضان کے مہینے میں روزہ رکھنے پر پابندی عائد کر دی ہے۔ ساتھ ہی تمام ریستوران بھی کھلے رکھنے کا حکم دے دیا گیا ہے۔ چینی حکومت جانتی ہے کہ رمضان کے مہینے میں طلوع آفتاب سے پہلے سے لے کر غروب آفتاب تک روزہ رکھنا اسلام کے بنیادی ارکان میں شامل ہے اور دنیا کے دوسرے معاشروں کی طرح چین میں بھی ایغور اور دیگر نسلوں کے مسلمان باشندے روزے رکھتے ہیں۔
لیکن چین میں حکمران کمیونسٹ پارٹی، جو باضابطہ طور پر ایک لادین پارٹی ہے، گزشتہ کئی برسوں سے اس پالیسی پر عمل پیرا ہے کہ مغربی صوبے سنکیانگ میں مسلمانوں کو جہاں تک ہو سکے، روزے رکھنے سے باز رکھا جائے۔ سنکیانگ چین کا وہ واحد علاقہ ہے جہاں پورے ملک میں نسلی اقلیت کی حیثیت رکھنے والی ایغور مسلم آبادی مقامی طور پر اکثریت میں ہے۔حیرت ہے کہ چین میں بدھ مت کے پیروکاروں پر کبھی کوئی پابندی نہیں لگائی گئی۔ چینی حکومت سنکیانگ میں جس طرح مسلمان باشندوں کے اسلامی احکامات پر عمل پیرا ہونے پر پابندیاں لگانے لگی ہے، اس کے نتیجے میں اس خطے میں نسلی کشیدگی میں اضافہ ہوسکتا ہے۔ یہ بات اس لیے بھی اہم ہے کہ چین کے اسی علاقے میں حالیہ برسوں کے دوران مسلح جھڑپوں اور سکیورٹی دستوں کی مبینہ مسلم انتہا پسندوں کے خلاف کارروائیوں میں سینکڑوں افراد مارے جا چکے ہیں۔ہم پاکستانی چاہتے ہیں کہ چین پرامن رہے اور وہاں کی اقلیتوں میں ہم آہنگی موجود رہے۔چینی حکام کا کہنا ہے کہ بیجنگ حکومت کو سنکیانگ میں دہشت گردی کے خطرات کا سامنا ہے اور وہاں پرتشدد اور خونریز واقعات میں جو اضافہ ہو رہا ہے، اس کا سبب مذہبی انتہا پسندی ہے۔لیکن عبادات پر پابندی لگانے سے کیا مذہبی انتہا پسندی کم ہوسکے گی؟ان حکومتی دعووں کے برعکس چین کی طرف سے روزہ رکھنے پر پابندی کا یہ مقصد دکھائی دیتا ہے کہ ایغور مسلمانوں کو رمضان کے دوران ان کی مسلم ثقافتی پہچان سے دور رکھا جائے۔
بعض مسلمان رہنمائوں کا خیال ہے کہ مذہبی بنیادوں پر روزہ رکھنے پر پابندیاں عائد کرنے کی حکومتی پالیسی ایسی اشتعال انگیزی ہے، جس کا نتیجہ صرف عدم استحکام اور تنازعے کی صورت میں ہی نکلے گا۔
گزشتہ برسوں کی طرح اس سال بھی ان پابندیوں کا دائرہ کار سنکیانگ میں اسکولوں کے مسلم بچوں تک بھی پھیلا دیا گیا ہے۔ سنکیانگ کا شہر ترباغاطائے چینی زبان میں تاچینگ کہلاتا ہے۔ اس شہر میں مقامی محکمہ تعلیم کی طرف سے تمام اسکولوں کو چند روز قبل حکم دیا گیا تھا کہ وہ طلبہ کو بتا دیں کہ نسلی اقلیتی طلبہ کو رمضان کے مہینے میں روزہ رکھنے، مساجد میں داخلے اور کسی قسم کی مذہبی سرگرمیوں میں حصہ لینے سے پرہیز کرنا چاہیے۔
پاکستان کی وزارت مذہبی امور کو چین کی وزارت ثقافت سے رابطہ کرنا چاہیے۔ پاکستان کی سیکورٹی فورسز نے دہشت گردی کیخلاف جنگ میں ان گروہوں کا بھی صفایا کیا ہے جو سنکیانگ صوبہ میں انتہا پسندانہ کارروائیوں میں مبینہ طور پر ملوث تھے۔ پاکستان چین دوستی مذید تجارتی راہداری کے ذریعے بہت مضبوط ہوچُکی ہے لیکن اگر وہاں کے مسلمانوں کو مذہبی آزادیاں مل جائیں تو اہل چین اور اہل پاکستان قلبی طور پر ایک دوسرے کے مزید قریب ہوجائیں گے۔مسلمانوں پر روزہ فرض ہے’چینی حکام لاکھ لادین سہی لیکن مسلمانوں کو اپنے رب کے احکامات بجالانے کا موقع فراہم کریں ۔ یہ ڈیڑھ ارب مسلمانوں پر ایک احسان ہوگا۔

ضد کا کوئی علاج نہیں۔محض احتجاجی سیاست کی بُنیاد پر قد بڑھانے ہوں تو یہ مُلک اس طرز سیاست کے لئے بہت ہی زرخیز ہے۔لیکن اگر واقعتا مقصد کاروباری ترقی اور ذہنی و سماجی سکون ہے تو پھر یہ فلسفہ میری سمجھ سے بالاتر ہے کہ رات آٹھ بجے مارکیٹیں بند کرنے سے بزنس کمیونٹی تباہ ہوجائے گی۔ دنیا بھر کے اوقات کار کے ماہرین اس بات پر متفق ہیں کہ روزانہ آٹھ گھنٹے کا کام ایک نارمل لائف اسٹائل کے لئے بہترین ٹائم ٹیبل ہے۔ مزدور اور کارکن کے بنیادی حقوق بھی یہی طے ہوئے ہیں کہ آٹھ گھنٹے سے زیادہ کام نہ لیا جائے ۔پاکستان ایسے خوش نصیب ملکوں میں شمار ہوتا ہے جہاں اوقات نماز کی پابندی ہماری عمومی زندگی کا حصہ ہے۔ نماز فجر کے لئے اٹھنا انتہائی افضل عمل ہے۔دنیا میں بل گیٹس جیسے کامیاب افراد کی زندگی میں سحر خیزی اور جلد سو جانے کو بنیادی وصف قرار دیا گیا ہے ۔ ہمارے والدین نے ہمیں یہی سکھایا تھا کہ نماز فجر ادا کریں ۔صبح کی سیر کریں’ناشتہ کریں اور کام پر لگ جائیں۔ جب تک ہم اسی قدرتی نظام الاوقات پر عمل پیرا رہے تب تک صحت مند زندگی کے لطف اٹھاتے رہے اور جوں ہی ہم نے دوپہر تک سونے اور رات 2بجے تک جاگنے کے غیر فطری رویے اپنانا شروع کئے چہروں کی رونق عنقا ہوگئی۔ رت جگوں کی مار پڑنے لگی اور روشنیوں کی چکا چوند میں کاروبار جاری رکھنے سے سماجی اور طبی مسائل جنم لینے لگے۔
بجلی بحران گذشتہ پندرہ بیس برسوں میں شدید ہوا۔ لیکن سچ یہ ہے کہ ہمارے ہاں رات کو کاروبار جاری رکھنے اور مارکیٹیں اور بازار کُھلے رکھنے کی لت کراچی سے یہاں آئی۔اور دیکھے ہی دیکھتے ہمارے دیہات بھی اس عذاب میں گرفتار ہوگئے۔اب یہ عادت بد اس قدر پُختہ ہوگئی ہے کہ اگر اسلام آباد میں مارکیٹیں رات آٹھ بجے اور شادی ہال رات دس بجے بند کرنے کا فیصلہ ہوا ہے تو ہمارے مزاج گرامی اس فیصلے کو کسی دشمن طاقت کا حملہ تصور کررہے ہیں۔یہ کہا جارہا ہے کہ یہ تاجروں کے پیٹ پر لات ماری جارہی ہے۔ ان کے بچوں کو بھوکا رکھنے کی کوشش کی جارہی ہے۔
اگر یہ فیصلہ گاہکوں اور شہریوں کے لئے کسی پریشانی کا سبب ہوتا تو پھر شہریوں کی طرف سے کوئی احتجاج ہونا چاہیے تھا۔لیکن ایسا کوئی مظاہرہ دیکھنے میں نہیں آیا۔ دکانداروں کی طرف سے کہا جارہا ہے کہ اسلام آباد کے شہری نکلتے ہی رات کوہیں۔ اگر آٹھ بجے دکانیںبند ہوجائیں گی تو لوگ خریداری کیسے کریں گے۔ ہوسکتا ہے کہ وقتی طور پر شہریوں کی عادت بدلنے میں کچھ وقت لگے۔لیکن شہریوں کے لئے اسلام آباد میں ہفتہ اتوار کی دو روزہ چھٹی ہوتی ہے۔ وہ ہفتہ کے دن بھرپور خریداری کرسکتے ہیں۔
ایک دکاندار اگر صبح دس بجے بھی دکان کھولے تو رات آٹھ بجے تک بہت وقت ہوتا ہے۔ جس نے کسی ہنگامی صورتحال میں کچھ خریدنا یا بیچنا ہے اسے کوئی دقت نہیں ہوگی۔
آخر دنیا میں دیگر ترقی یافتہ ممالک بھی ہیں۔ وہاں کاروبار ہوتے ہی دن کی روشنی میں ہیں۔چین’ جاپان’امریکہ اور سعودی عرب۔ وہاں نہ کسی کا کاروبار رکتا ہے نہ کسی کے پیٹ پر لات پڑتی ہے۔ یہ انوکھی منطق صرف اور صرف پاکستان میں ہی پیش کی جاتی ہے۔
یہ اللہ پاک کا حکم ہے ۔اوقات کی خدائی تقسیم ہے کہ دن کوکاروبار کرو اور رات تمہارے آرام کے لئے بنائی گئی ۔ ہر دور کا اسلامی تمدن گواہی دیتا ہے کہ مسلمانوں نے وقت کی اسی خدائی تقسیم پر عمل کیا ہے۔ اقبال نے تو آداب سحرگاہی کو دانائی و بینائی کی بنیاد بتایا ہے۔جو رات گئے تک بھائو تائو کرتے ہیں اور مصنوعی روشنیوں میں ناقص مال فروخت کریں انہیں سحر گاہی کا مزا کیسے آئے گا۔
حکومت کو کوئی کمزوری نہیں دکھانی چاہیے۔ لیکن محض حکم دے دینے سے معاملات سلجھ نہیں سکتے۔ تاجروں کے نمائندوں کو پہلے اعتماد میں لینا چاہیے۔ انہیں قائل کرنا چاہیے۔اور پولیس گردی سے تاجروں کو بچانا چاہیے۔مارکیٹیں ہرحال میں آٹھ بجے بند ہونی چاہیں۔ اسے محض بجلی کی کمی سے نہیں جوڑنا چاہیے۔ اسے اسلامی تعلیمات کے ساتھ منسلک کرنا چاہیے۔ ایک اچھے مسلمان کی طرح ہمیں فطرتی اوقات کار اپنانے چاہیں۔
تاجر بھائیوں سے بھی اپیل ہے کہ وہ حکومتی فیصلے کو اپنی ہار جیت کا مسئلہ نہ بنائیں۔ دو چار ماہ کے بعد یہی فیصلہ ان کے لئے رحمت بن جائے گا۔وہ گھر والوں کو وقت دے سکیں گے۔ بچوں کے ساتھ ہنس کھیل سکیں گے۔بوڑھے والدین کی خدمت کرسکیں گے اور صحت جیسی نعمت سے لطف اندوز ہوسکیںگے۔کاروبار میں ترقی رات کو جاگنے سے مشروط نہیں بلکہ ایمانداری’جائز منافع اور کوالٹی سے مشروط ہوتی ہے۔اور گاہک اور دکاندار دن کی روشنی میں ان شرائط کا بہتر تحفظ کرسکتے ہیں۔
اخباری مالکان اور ٹی وی چینلز کو بھی سوچنا چاہیے کہ رات بھر نشتریات جاری رکھنے اور خبریں بنانے سے کونسی بہتری آگئی ہیں۔میڈیا ورکرز کی اکثریت معدے کی بیماریوں میں مبتلا ہورہی ہے ۔ غیر فطری اوقات کار کے نتیجے میں بننے والی خبریں اور رپورٹیں تعمیری کی بجائے تخریبی زیادہ ہوتی ہیں۔ جاگنے اور جگانے کے اس مریضانہ کلچر کو خیرباد کہنا ہوگا کہ اللہ نے دن کام اور رات آرام کے لئے بنائی ہے۔

ایسا کبھی ہوا نہیں کہ دنیا سے شر مکمل طورپر ختم ہوگیا ہو۔انسان کے اندر شر کی قوتیں خیر کی طاقتوں سے ہمیشہ نبردآزما رہتی ہیں ۔آپ اسے حضرت انسان کی فطرت کہہ سکتے ہیں ۔ان شرانگیز طاقتوں کو آپ نیگیٹیو فورسز کا عنوان دے سکتے ہیں ۔قرآن انہیں شیطانی طاقتوں کا نام دیتا ہے ۔ہر منفی سوچ ،ہر تخریبی تصور ہر انسان دشمن منصوبہ ،ہرابلیسی حربہ چاہے اس کا محل وقوع انسان کی اپنی ذات ہو ،اس کا ماحول ہو،ملک ہویاسرزمین ہو ،شیطان ہی کی کارستانی قرار پائے گی۔ہوس لالچ،ظلم ،استبداد ،بدعنوانی ،بدامنی،بد عہدی ،بے وفائی ،دھوکہ دہی ،نوسر بازی ،بزدلی ،منافقت،ہیجان انگیزی ،خیانت،جھوٹ ،فراڈ ،بے ادبی ،فریب کاری ،بعض وعناد،انا پرستی ،چوری ،ڈاکہ زنی ،قتل وغارت اور وحشت وبربریت یہ تمام وہ بیماریاں ہیں جنہیں شیطان نے ایجاد کیا ہے اور وہ کمال ہوشیاری کیساتھ انسانی دل ودماغ میں ان کی پیوندکاری کرتا ہے اور انسان کو شرکے راستے پر ڈال دیتا ہے ۔تشکک اور بے یقینی ،مایوسی اور غفلت جیسے ہتھیاروں سے مسلح ہوکر شیطان جب حملہ آور ہوتا ہے تو بڑے بڑے پختہ عزم انسان ریت کا ڈھیر ہوجاتے ہیں ۔شیطان کا تصور ہر مذہب اور عقیدے کے پیروکاروں میں اپنے اپنے ناموں اور حوالوں سے موجود ہے ۔قرآن نے اس تصور کو بڑے بلیغ پیرائے میں بیان فرمایا ہے ۔”بے شک شیطان تمہارا کھلا دشمن ہے تم بھی اسے دشمن سمجھو“ حدیث نبوی ہے ‘
”شیطانی وسوسے تمہارے وجود میں خون کی طرح گردش کرتے ہیں “لیکن فطرت نے انسان کو شیطان کے مقابلے میں تنہاءنہیں چھوڑا ،یہ ہرگز نہیں کہ انسان شیطان کے مقابلے میں بے بس پیدا کیا گیا ہے ۔خالق نے انسان کو پیدا کرتے وقت پانچ چھ فٹ قد کے اس جسم کے اندر ہی وہ آلہ لگادیا ہے جو انسان کو قدم قدم پر آگاہ کرتا ہے کہ تم اب شیطانی قوت کے زیر اثر آرہے ہو۔جس طرح گاڑی اوورسپیڈ ہونے پر سرخ رنگ کی بتی اور آلارم بجنے شروع ہوجاتے ہیں اسی طرح انسان کے اندر ضمیر نام کا ایک آلارم بجنا شروع ہوجاتا ہے ۔غافل سے غافل انسان بھی یہ نہیں کہہ سکتا کہ اسے اچھائی اور برائی میں تمیز نہیں ہے ۔وہ جنگل میں رہتا ہو ۔یا بازاروں کے شورشرابے میں زندگی بسر کرتا ہو،حرف شناس ہویا ان پڑھ ۔رنگ ،نسل ،زبان اور عقیدے کی تفریق کے بغیر جوروح بھی لباس فطرت میں ڈھلی ہے اسے ضمیر کا آلہ لگاکر بھیجا گیا ہے ۔ارشاد ہوتا ہے ‘
”ہم نے انسان کو پیدا کیا اور جانتے ہیں اس کا نفس جن وسوسوں سے دو چار رہتا ہے ۔ہم تو اسکی رگ حیات (شاہ رگ )سے بھی قریب تر ہیں “
قرآن نے احسن تقویم کا ٹائٹل ہی انسان کو اسی لئے عطا کیا ہے کہ وہ واحد جاندار ہے جو اچھائی اور برائی میں تمیز کرسکتا ہے ۔ جس طرح شیطان منفی ہتھکنڈوں سے مسلح ہے اسی سطح انسان اپنے ضمیر کی زبردست طاقت سے مز ّین ہے ۔یہی وجہ ہے کہ ابتدائے آفرینش سے لیکر آج تک شر اور خیر باہم نبردآزما رہتے ہیں ۔ایسا کبھی ،کسی دور میں نہیں ہوا کہ شر غالب آجائے اور خیر کی قوت مفتوح ہوجائے ۔ایسا ہوتا تو انسانیت کا قافلہ بیچ راہ کے فنا ہوچکا ہوتا ۔آج ساڑھے چھ ارب انسانوں کا وجود اس بات کا ثبوت ہے کہ خیر کی طاقتیں مفقودنہیں بلکہ موجود ہیں ۔بقول اقبالؒ
ستیزہ کار رہا ہے ازل سے تا امروز
چراغ مصطفوی سے شرارِ بوا لہبی

سوال یہ ہے کہ عوام اور سیاست کا آپس میں کتنا گہرا تعلق ہے۔اگر اس ملک کی آبادی بیس کروڑ مان لی جائے تو مئی 2013ء کے انتخابات میں انتخابی عمل میں حصہ لینے والے پاکستانیوں کی کل تعداد صرف ساڑھے چار کروڑ بنتی ہے۔یہ ساڑھے چار کروڑ لوگ کل آبادی کا صرف بائیس فیصد بنتے ہیں ۔ یعنی 78فیصد وہ پاکستانی ہیں جو مختلف وجوہات کی بناء پر اس انتخابی عمل سے دور رہے ہیں ۔ مرکز میں حکومت بنانے والی جماعت کو ڈیڑھ کروڑ لوگوںنے ووٹ دیا۔ صوبہ خیبر پختونخواہ میں حکمرانی کا حق حاصل کرنے والی جماعت کو پچھتر لاکھ ووٹ پڑے اور سندھ میں حکمران گروہ کے حصے میں 68لاکھ اور اسی طرح ایم کیو ایم اور آزاد امیدواران کو ووٹ ڈالے گئے ۔ ان تمام اعدادوشمار سے ایک بات ثابت ہوگئی کہ سیاستدانوں کا عوام کے صرف بائیس فیصد حصے سے تعلق ہے۔ باقی عوام کو نہ تو سیاست پر اعتماد ہے اور نہ ہی سیاستدانوںکو اپنا نجات دہندہ تصور کرتے ہیں ۔یا دوسرے لفظوں میں آپ یہ کہہ لیں کہ پاکستانی قوم کا بہت بڑا حصہ سیاسی نظام سے اس قدر مایوس ہوچکا ہے کہ انہیں اس سے کوئی غرض ہی نہیں کہ ملک میں فوج کی حکمرانی ہے۔(ن) کی حکومت ہے۔ طاہر القادری کا انقلاب یا عمران خان کا نیا پاکستانعام آدمی کو شکایت کیا ہے؟ سڑک بند ہے ‘دھوپ میں کھڑنا ہونا پڑتا ہے’ دل سے گالیاں نکلتی ہیں لیکن عام آدمی کچھ نہیں کرسکتا۔جلسہ ہے جلوس ہے۔مارکیٹ بند پڑی ہے ۔کاروبار ہو نہیں سکتا۔ گھر سے باہر نہیں نکل سکتے۔ دھرنے ہوتے ہیں تو مال و جان کا خطرہ منڈلانے لگتا ہے۔ ووٹ ڈالیں تو بھی مصیبت۔ نہ ڈالیں تو بھی مصیبت۔جب مصیبت ہی گلے پڑنی ہے تو ضرور ووٹ ڈال کر یہ مصیبت خریدنی ہے۔
مشرف دور سے پہلے عام لوگوں کا خیال تھا کہ چلیں اب کی بار فوج آئی ہے تو کم از کم سیاسی وارداتیوں سے نجات مل جائے گی۔کاروبار بڑھے گا’ بے روزگاری کم ہوگی اور روٹی چلتی رہے گی۔ لیکن مشرف کے اندرسے بھی بالآخر ایک سیاستدان برآمد ہوا اور یہی لوگ جو اب ”انقلاب” کے میمنہ و مسیرہ بنے دکھائی دیتے ہیں یہ باوردی مشرف کے دائیں بائیں جلوہ گر رہتے تھے۔ مشرف نے بھی لوگوں کو پکڑ پکڑ کر ریفرنڈم میں انگوٹھے لگوائے اور عوام جو پہلے ہی لاتعلق تھے مزید لاتعلق ہوگئے۔ پھر پی پی پی والے آگئے۔ اب نوازشریف ہیں اور عمران خان ایک صوبہ کی بجائے پورے مرکز پر حکمرانی کرنا چاہتے ہیں ۔ اس کے لئے وہ عوام کو ذہنی طور پر یرغمال بنانے کے لئے نت نئے نعرے گھڑتے ہیں۔دھاندلی دھاندلی کا شور مچا تے ہیں۔
سوات میں بجلی کے ایک منصوبے کا سنگ بنیاد رکھتے ہوئے انہوںنے عوام کو جھانسہ دیا ہے کہ ”اگر اقتدار ملا تو بجلی دو روپے فی یونٹ کردوں گا”۔ حاضرین نے تالیاں بجا کر اس اعلان کی داد دی کیونکہ حاضرین عام لوگ نہیں بلکہ پروفیشنل ووٹرز ہوتے ہیں جن کا کام بوقت ضرورت ”شیم شیم”اور ”ویلکم ویلکم” کے نعرے لگانا ہوتا ہے۔ جانتے وہ بھی ہیں کہ دو روپے میں تو ٹافی نہیں آتی پھر بجلی کا یونٹ کیسے آئے گا لیکن پارٹی کے ساتھ وفاداری کا تقاضا ہے کہ لیڈر کے ہر جھوٹ کو ”الہام” سمجھ کر سنا جائے ۔
خیبرپختونخواہ کے وزیراعلیٰ نے کہہ دیا ہے کہ وہ اپنی بجلی اپنے پاس رکھیں گے اور پنجاب
کو بجلی نہیں دیں گے۔ اس پر بھی تالیاں بجائی گئیں۔
جناب ڈاکٹر طاہر القادری کی پارٹی کو چونکہ ووٹ نہیں ملتے اس لئے انہوں نے مسلح انقلاب کا راستہ اختیار کرلیا ہے۔ ان کی ملازم خواتین اور ان کی نظریاتی پیروکار بچیوں نے اپنے قد سے بڑے بڑے ڈنڈے ہاتھوں میں لے لئے ہوئے ہیں۔
عام آدمی نے گزشتہ 68برسوں میں ہر طرح کے نعرے سنے’ہر طرح کی تحریکیں بھگتیں’ہر طرح کی جمہوری اور اسلامی جماعتوں کا پلو پکڑا۔لیکن حالات بدلے تو صرف لیڈروں کے بدلے ہیں۔ عام آدمی نے تو گھر کا سامان یا زمین کا قطعہ بیچ کر جان ہتھیلی پر رکھ کر دیار غیر کا قصدکیا یا ملک میں رہتے ہوئے ہی بے روزگاری اور غربت کو صبر سے گلے لگائے رکھا ہے۔ عام آدمی کو یہ بھی معلوم نہیں کہ عمران خان کہاں کا غریب ہے۔ جو خود بیرون ملک پڑھتا رہا۔ جس کے بچے باہر پڑھتے ہیں جس کا سینکڑوں ایکڑ اراضی پر پھیلا فارم ہائوس ہے۔ اس کے پاس یہ دولت کہاں سے آئی؟ ان کے والد گورنمنٹ ملازم تھے۔ ان کی تنخواہ میں پانچ مرلے کا گھر نہیں بن سکتا تھا پھر یہ زمان پاک کی کوٹھیاں اور ایچی سن کی فیسیں کون ادا کرتا رہا۔
ملک کے اندر سیاسی طبقہ اس قدر متحرک ہے کہ وہ چند ہزار ہو کر بیس کروڑ لوگوں کو یرغمال بنائے ہوئے ہیں۔ ذہنی ‘معاشی اورجسمانی طور پر یرغمالی عوام کس سے فریاد کریں ۔بقول شاعر بچ کر اب کہاں جائیں اس سیاسی جنگل میں۔ ایک طرف درندہ ہے ایک طرف شکاری ہے!
کوئی حل تو نہیں لیکن ایک طریقہ ہے کہ عام لوگ اپنے خالق حقیقی سے التجا کریں ۔نماز استسقاء ادا کریں’الٹے ہاتھ کرکے گڑ گڑائیں۔ یا رب اس بستی کو امن کی بستی بنا دے۔جہاں ہم سکون کے ساتھ اپنے بچوں کے ہمراہ زندہ ہی رہ سکیں!

وجیہہ الدین احمد انتہائی منکسر المزاج ہیں۔ انہیں اپنے مشن سے عشق ہے۔ ان کا پورا خاندان ہی شائد ایسے مشنری مزاج کے افرادپر مشتمل ہے۔ربع صدی سے علم وحکمت کی تعلیم عام کرنے والے اس علمی گھرانے کو اپنے سربراہ مولوی ریاض الدین احمدمرحوم کی قومی سطح کی کاوشوں اور علمی نوعیت کی سرگرمیوں پر بہت فخر ہے اور وہ ان کاوشوں کو اپنی خاندانی تاریخ کا ایک سنہری باب تصورکرتے ہیں۔مولوی ریاض الدین احمد مرحوم کے سب سے چھوٹے بیٹے جناب وجیہہ الدین احمد سے کراچی کے علاقے ناظم آباد میں واقع جناح یونیورسٹی فار وومن کے وسیع وعریض کیمپس میں ملاقات ہوئی۔جناب وجیہہ الدین احمد گوناں گوں مصروفیات کے باوجود خوش مزاج شخص ہیں۔ٹھہرے ہوئے لہجے میں اپنا مدعابیان کرنے کے ماہر بھی ہیں۔

”میرے والد مولوی ریاض الدین احمد علی گڑھ یونیورسٹی کے فارغ التحصیل تھے۔ انہیں عورتوں کی تعلیم کے حوالے سے ہمیشہ فکردامن گیر رہتی تھی۔اس حوالے سے وہ اکثر کہا کرتے تھے’

”اگر ہم اپنے ملک پاکستان میں خواندگی کی شرح تیزی سے بڑھانا چاہتے ہیں تو ہمیں خواتین کی تعلیم کی طرف بھرپور توجہ دینی ہوگی۔ میری نظر میں ایک پڑھی لکھی ماں ایک پڑھے لکھے باپ سے زیادہ بہتر طور پر اپنے بچوں کو زیور تعلیم سے آراستہ کرسکتی ہے ۔ اس کو اس طور پربھی محسوس کرسکتے ہیں کہ اگر آپ بچوں سے سوال کریں کہ بڑے ہو کر کیا بنو گے؟ تو لڑکوں کا جواب زیادہ تر یہی ہوتا ہے کہ انجینئر بنیں گے’ ڈاکٹر بنیں گے یا پائلٹ بنیں گے لیکن لڑکیاں زیادہ تر یہی خواہش کرتی ہیں کہ وہ بڑی ہو کر ٹیچر بنیں گی۔ گو کہ ہماری آنے والی پوری نسل کسی نہ کسی طور پر جذبہ رکھتی ہے لیکن میں اپنی بیٹیوں کے جذبے کو سلام پیش کرتا ہوں جو صحیح معنوں میں ہماری آنئدہ نسلوں کی معمار ہیں”۔
مولوی ریاض الدین احمد نے اپنی اسی فکر کا ذکر قائداعظم سے بھی کیا۔آگرہ سے تعلق رکھنے والے اس خانوادے کے متحرک سپوت جناب الحاج مولوی ریاض الدین احمد تحریک قیام پاکستان میں پیش پیش رہے تھے۔آگرہ میں جب کبھی قائداعظمتشریف لاتے تو مولوی ریاض الدین کو بھی طلب فرماتے۔مولوی صاحب کے جذبے کو دیکھتے ہوئے قائداعظم نے فرمایا’
”پاکستان بن رہا ہے۔پہلے پاکستان کے بنانے میں دن رات ایک کردیجئے پھر خواتین کی تعلیم کے لئے میرے نام سے یونیورسٹی قائم کرنا”پاکستان بن گیا اور حسب وعدہ و جذبہ مولوی ریاض الدین احمدنے آگرہ چھوڑ کر 1948ء میں کراچی میں پہلے تعلیمی ادارے کی بنیاد رکھی۔ دیکھتے ہی دیکھتے تعلیم کی شمع فروزاں ہوتی گئی اور انجمن اسلامیہ سکول سمیت کئی تعلیمی ادارے کھل گئے۔1972ء میں بڑے بڑے تعلیمی ادارے قومیائے گئے اور جناب ریاض الدین احمد کے قائم کردہ اداروں کو بھی حکومت نے قبضہ میں لے لیا۔ لیکن 1984ء میں قومیائے گئے ادارے واپس مل گئے۔پھر زور وشور کے ساتھ یونیورسٹی کے قیام کاکام تیزی سے شروع ہوگیا”۔
1993ء میں سندھ اسمبلی نے جناح یونیورسٹی فار وومن کا چارٹر دے دیا۔حکیم سعید شہید قائمقام گورنر سندھ نے اس یونیورسٹی کا سنگ بنیاد رکھا اور یوں سرسید احمد کے ایک جانشین اورلیاقت علی خان کے مایہ ناز کارکن الحاج مولوی ریاض الدین احمد اور ان کے بیٹوں نے وہ عہد پورا کر دکھایا جو انہوں نے آگرہ میں قیام کے دوران قائداعطم کے ساتھ کیا تھا۔ وہ قائداعظم کے ادنیٰ سے سپاہی تھے جنہوں نے قائداعظم کے تمام ارشادات اور نصیحتوں پر عمل کرکے دکھا دیا۔نظم و ضبط’اتحاد’محنت ‘لگن’ایثار’قربانی ‘ہمت عزم وارادہ کا زندہ نمونہ تھے۔ معروف معلمہ محترمہ نورالصباح چغتائی نے ایک جگہ لکھاہے ‘
” ریاض الدین صاحب نہایت سادہ لباس پہنتے اور پرانی روایات اور رسم و رواج کو قدر کی نگاہ سے دیکھتے’ادارے میں داخل ہوتے ہی وہ ایک طائرانہ نگاہ استانیوں اور طالبات کے لباس پر ضرور ڈالتے اور اگر کوئی ٹیڈی یا قابل اعتراض لباس میں ہوتا تو اس کو وہیں ایک باپ کی طرح مشفقانہ انداز میں نصیحت کرتے اور کبھی سخت سست بھی کہہ دیتے۔ریاض الدین صاحب نہایت غریب پرور انسان تھے جب کوئی طالبہ ان کے پاس فیس معاف کروانے کے لئے درخواست لے جاتی وہ لازمی طور پر ہمدردی سے غور کرنے کے لئے مجھے لکھا کرتے۔انہوں نے کہہ رکھا تھا کہ ان بچیوں کی فیس پہلے معاف کی جائے جن کے سر پر باپ کا سایہ نہیں ہے اس کے بعد دوسری نادار طالبات کا خیال رکھا جائے یہی وجہ ہے کہ ہزاروں نادار اور یتیم بچیوں نے اس ادارے سے تعلیم پائی اور وہ بچیاں آج برسرروزگار ہو کر اپنے خاندان کی کفالت کر رہی ہیں۔”شاعر نے شائدایسی ہستیوں کے بارے میں کہا ہے’
ماناکہ اس زمین کو نہ گلزار کر سکے
کچھ خارکم ہوئے تو ہیں گذرے جدھر سے ہم
ملاقات دو گھنٹے تک جاری رہی۔ساڑھے دس ایکڑ پر پھیلی اس یونیورسٹی کے مختلف شعبہ جات کا دورہ بھی کرایا گیا۔ اس موقع پر علم و عرفان کا چلتا پھرتا نمونہ پروفیسر ڈاکٹر نسیم فاروقی (وائس چانسلر) بھی موجود تھے۔ چھ ہزار بچیاں اور تین ہزار لڑکے یہاں زیور تعلیم سے آراستہ ہوتے ہیں ۔انتہائی کم فیسوں میں جدید ترین طرز کی تعلیم کا حصول ایک بہترین صدقہ جاریہ ہے۔
جناب وجیہہ الدین احمد کی تجویز تھی کہ ڈاکٹر صاحب آئندہ جب آپ کراچی آئیں تو یونیورسٹی آڈیٹوریم میں آپ ایک مفصل لیکچر دیں۔میں اور میری علمی حیثیت کیا لیکن جی چاہتا ہے کہ دینی و دنیاوی تعلیم کے اس جیتے جاگتے شہر کے ساکنان کے ساتھ مل ضرور ملوں کہ قائداعظم کی اجازت پر ”جناح”لفظ کے ساتھ شروع ہونے والایہ تعلیمی ادارہ تحریک پاکستان کے دنوں کی یاد تازہ کرنے کا خوبصورت ذریعہ ہے۔

 کہا جاتا ہے کہ اگر مواقع (Opportunity )اور اہلیت (Competency)باہم مل جائیں تو پھر کامیابی (Success) یقینی ہوجاتی ہے۔ ہم اپنے اردگرد اس فارمولے کو بنیاد بنا کر جائزہ لیں تو ہمیں احساس ہوگا کہ ہر سماج اور معاشرے میں ایسے افراد کی بے شمار تعداد ہے جن میں صلاحیت ہے لیکن موقع نہیں ملتا اور کئی ایسے افراد ہیں جن کے پاس مواقع تو موجود ہیں لیکن ان میں صلاحیت نہیں ہے جس کے باعث وہ معاشرے کے ناکام یا ناکارہ افراد کہلاتے ہیں۔ مواقع پیدا کرنا تاکہ اہل افراد ان مواقع سے فائدہ اٹھا کر کامیابیاں حاصل کریں اور معاشرہ مجموعی طور پر متحرک ہوسکے ایک اہم ترین سماجی ذمہ داری ہے۔ اسی طرح بے صلاحیت افراد کی ایسے خطوط پر تربیت کرنا کہ ان کے اندر چھپی ہوئی صلاحیتوں کو اجاگر کیا جاسکے۔یہ بھی برابر کی اہم سماجی ذمہ داری ہے۔ہم یہ کہہ سکتے ہیں کہ صلاحیت اپنے لئے مواقع پیدا کرلیتی ہے اور مواقع اپنے لئے باصلاحیت لوگ تلاش کر لیتے ہیں۔تعلیم وتربیت اور علم و ہنر دراصل اسی مقصد کے لئے ہوتے ہیں تاکہ افرادی قوت کی تعمیر ہوسکے۔کسی بھی فلاحی ریاست کی ذمہ داری ہوتی ہے کہ وہ ایک طرف افراد کی تعمیروترقی کا نظام وضع کریں اور دوسری طرف صنعت و تجارت اور خدمات کا ایسا سسٹم تیار کریں کہ پیداواری سرگرمیاں عروج پاسکیں۔دنیا میںفلاحی ریاستیں ایسا ہی کرتی ہیں لیکن پاکستان جو کہ کسی لحاظ سے فلاحی’ جمہوری اور اسلامی ریاست نہیں بن سکا اس کے زیرسایہ پروان چڑھنے والے معاشرے اورافراد کی حالت زار بگڑتی چلی جاتی ہے۔ایسے معاشروں میں بیروزگاری تمام حدیں پھلانگ جاتی ہے۔ غرباء اور ضرورتمندوں کی فوج ظفر موج پیدا ہوتی ہے ۔پھر اپاہج’ بیوائیں’مساکین اور بیماروں کو سنبھالنے والا کوئی نہیں ہوتا۔ اور جب غربت حد سے بڑھ جائے تو غریبوں میںردّعمل سر اٹھانا شروع کردیتا ہے اور یہی ردّعمل خانہ جنگی ‘دہشتگردی اور بغاوت کی شکل اختیار کر لیتا ہے۔خریداروں کی تعداد گھٹتی جاتی ہے اور چھیننے اور مانگنے والوں کے جتھے تیار ہونا شروع ہوتے ہیں جن کے وجود کے سبب بنے بنائے معاشرے اجڑ جاتے ہیں اور اس ویرانی کا سب سے زیادہ نقصان سرمایہ کاری کرنے والے اداروں کو ہوتا ہے۔انہیں اپنے کارخانے بند ہوتے دکھائی دیتے ہیں۔یہی وہ خوف ہے جس کے تحت بڑے بڑے کاروباری اداروں اور کارپوریٹ مراکز کو اپنے اردگرد کے لوگوں کی صلاحیت بڑھانے اور ان کے لئے پیداواری مواقع پیدا کرنے کے لئے منصوبے بنائے اور اس اہتمام کو کارپوریٹ سوشل رسپانسبلٹی (سی ایس آر) کا نام دیا۔آج دنیا کی تمام ملٹی نیشنل کمپنیاں سماجی ذمہ داریاں نبھانے کے لئے بجٹ مخصوص کرتی ہیں بلکہ بعض بین الاقوامی انتظامی اداروں کی طرف سے اس بجٹ کی تخصیص لازمی قرار دے دی گئی ہے اور اسے قانون بنا دیا گیا ہے۔یوں ملٹی نیشنل کمپنیاں چاہتے نہ چاہتے ہوئے بھی اس مد میں کچھ نہ کچھ خرچ کرتی اور اپنے سالانہ اعدادوشمار میں اس کا بڑھ چڑھ کر ذکر بھی کرتی ہیں۔

اسلام نے سماجی ذمہ داریوں کی ادائیگی کو مسلمان کا مقصد حیات قرار دیاہے۔اسلام کے معاشی نظام کا بنیادی مقصد ہی معاشرے کے ناکام افراد کی کفالت کرنا اورعامة الناس کی صلاحیتوں کو اجاگر کرنے کمائی کے مواقع پیدا کرنے ذریعہ بنایا ہے۔صدقات’خیرات اور صدقہ جاریہ کے سارے تصورات ہی اس لئے دیئے گئے کہ معاشرے میں کوئی غریب نہ رہے اور بنیادی ضرورتیں ریاست کے ہر فرد کو ملیں۔
اسوہ حسنہ سے ہمیں پتہ چلتا ہے کہ حضرت محمد صلی اللہ علیہ وآلہ وسلم لوگوں کو کارآمد شہری بنانے کے لئے کس طرح ترغیب دیتے تھے۔
”ایک بار مسجد نبوی میں ایک شخص حاضر ہوا اور عرض کی کہ بھوکا ہوں اور روزگار بھی نہیں ہے۔آپ صلی اللہ علیہ وآلہ وسلم نے اس شخص سے کہا کہ کیا تیرے پاس کوئی اثاثہ ہے جس کے جواب میں اس شخص نے کہا کہ میرے پاس ایک لوہے کا پیالہ ہے جس سے میں پانی پیتا ہوں آپۖ نے فرمایا کہ پیالہ لے آئو۔ پھر آپ ۖنے اصحابہ اکرام سے فرمایا کہ کوئی ہے جو اس پیالے کو خریدلے۔ ایک صحابی نے کہا کہ میں ایک درہم میںخریدتا ہوں۔آپۖ نے فرمایا کہ پیالہ مہنگا ہے اس کے زیادہ دام کون لگائے گا۔پھر ایک اصحابی آگے بڑھے اور کہا کہ میں اس کے دو درہم دیتا ہوں۔آپۖ نے دو درہم اس بے روزگار شخص کو دیے اور فرمایاکہ ایک درہم کا کلہاڑا خریدو اور ایک درہم کی ایک رسی اور تھوڑی خوراک لے لو اور جنگل میںچلے جائواورلکڑیاں کاٹ کر شہر میں بیچو’وہ شخص پندرہ روز بعد آپۖ کی محفل میں حاضر ہوا اور مسکراتے ہوئے بولا”حضورۖ میںخوشحال ہورہا ہوں”۔
اس مشہور واقعہ سے پتہ چلتا ہے کہ اصل کام یہ نہیں کہ آپ کسی بھوکے کو بار بار کھانا کھلاتے رہیں لیکن بلکہ سماجی خدمت یہ ہے کہ آپ اس بھوکے کو روٹی کمانے کا ڈھنگ سکھا دیں اور اس مقصد کے لئے اگر آپ کمیونٹی کو بھی ساتھ شامل کر لیں تو پھر تعمیر افراد سے آگے بڑھ کر تعمیر معاشرہ کا مرحلہ طے ہوسکتا ہے۔قرآن حکیم نے آغاز میں ہی ارشاد فرمایا کہ ”یہ وہ کتاب ہے جس میں کوئی شک نہیں اور ہدایت ہے ان متقی لوگوں کیلئے جو غیب پر ایمان لائے’جنہوں نے صلوٰة قائم کی اور اس رزق سے (انسانوں کی ترقی اور خوشحالی) کے لئے خرچ کرتے ہیں جو ہم نے ان کو دیا”۔اس کا واضح مطلب یہ ہے کہ متقی لوگ وہی ہیں جو تعمیر افراد اور تعمیر معاشرہ کی سماجی ذمہ داری پوری کرنے کے لئے اپنے مال سے خرچ کرتے ہیں۔
”یدع الیتیم” کی ہدایت کا مفہوم بھی یہی ہے کہ ایسے نمازیوں کے لئے ہلاکت ہے جو یتیموں کو کھانا کھانے پر ابھارتے نہیںترغیب نہیں دیتے’یعنی ایسا انتظام نہیں کرتے کہ جس کے ذریعے یتیم(جن کی رہنمائی کرنے کے لئے باپ کا سایہ نہیں رہا) تعلیم وترتیب حاصل کرے اور معاشرے کا کارآمد فرد بن جائے۔ ایسی احادیث مبارکہ اور آیات قرآنی کا ایک ذخیرہ موجودہے جس سے سماجی ذمہ داریوں کا واضح انداز میںتعین بھی ہوتا ہے اور ان ذمہ داریوں کو احسن طریقے سے پورا کرنے کا سلیقہ بھی ملتا ہے۔یورپ نے غرباء کے خوف اور خریداروں کی قوت خرید ختم ہونے کے خوف سے یا یوں کہے کہ اپنی پراڈکٹ کے خریداروں کو زندہ رکھنے کے لئے سماجی ذمہ داریوں کا احساس کیا ہے۔
بنیاد جو بھی ہو بیسویں صدی کے آغاز پر اس کا احساس جاگ جانا ایک خوش آئند پہلو ہے۔ورنہ سترہویں اور اٹھارویںصدی میں تو کاروباری لوگ انتہائی سفاک تھے۔ وہ اپنے کارکنوں کو بیگار کاٹنے پر مجبور کرتے تھے ‘غریبوں کو غلام بناتے تھے اور سماج کی ہر ضرورت کو پس پشت ڈال کر محض اپنی تجوریاں بھرتے جاتے تھے۔ انسانیت نے بہ حیثیت مجموعی اس ضرورت کو محسوس کر لیا ہے کہ نفع کمانے کے ساتھ ساتھ ان بستیوں میں غربت’ افلاس’جہالت اور بے ہنری کو بھی ختم کرنا چاہیے جہاں ان کے بڑے بڑے پلانٹ منافع بخش لگے ہیں اور مٹی کو سونا بنا کر بیچ رہے ہیں۔پاکستان میںیوں تو انفرادی طور پر کاروباری حضرات صدقہ و خیرات میں کسی سے پیچھے نہیں لیکن کاروباری ادارے کے طور پرسماجی ذمہ داریاں نبھانے کا رجحان جڑ نہیںپکڑ رہا ۔
پاکستان میں اس وقت کم و بیش اڑھائی سو ملٹی نیشنل کام کر رہی ہیں ۔حکومت کو چاہیے کہ وہ کارپوریٹ اداروں کو سی ایس آربجٹ کے حوالے سے پابند بنائے اور سی بی آر کو چاہیے کہ وہ اپنا ٹیکس لیتے وقت اس وقت تک این او سی جاری نہ کرے جب تک کہ سی ایس آر کے تحت چلنے والے منصوبوں کی مکمل چھان بین نہ کرلے۔محض ٹیکس چھوٹ کے لئے بھرے گئے جعلی گوشواروں سے سماج کے ضرورت مند لوگوں کی حق تلفی ہوتی ہے۔
یہ خیال کیا جاتاہے کہ اگر پاکستان میں موجود ملٹی نیشنل کمپنیاں اور مقامی کاروباری ادارے صرف پانچ برس تک سی ایس آر بجٹ کو پوری دلجمعی کے ساتھ سماجی بہتری کے منصوبوں پر خرچ کریں تو پاکستان میں نہ صرف غربت کی شرح آدھی رہ جائے گی بلکہ معاشرتی مزاج میں ناقابل یقین مثبت تبدیلی بھی رونما ہوگی۔
ملٹی نیشنل کمپنیوں کا معاملہ الگ ہے لیکن بطور مسلمان پاکستان کے بڑے بڑے کاروباری گروپ اس کارخیر میں منظم انداز میں حصہ لیں۔انفرادی صدقہ و خیرات سے سماجی ذمہ داری کا وسیع مقصد حاصل نہیں ہوسکے گا۔غربت ‘بے روزگاری اور معاشرتی بے چینی ختم نہ ہوسکے گی۔اللہ اور اس کے رسول صلی اللہ علیہ وآلہ وسلم نے غربت کے خاتمے اور افراد کی تعمیروتربیت کے لئے مال خرچ کرنے پر جس قدر زور دیا ہے اس کا اندازہ درج ذیل آیت مقدسہ کے ترجمہ سے واضح ہوتا ہے۔
”جو کوئی جزا کے دن (مال کی محبت میں گرفتار رہنے کے جرم میں) مجرم بن کر آگیا وہ چاہے گا کہ اس دن کے عذاب سے بچنے کے لئے اپنے بیٹوں کو’اپنی بیوی کو’اپنے بھائی کو اور اپنے خاندان کو جو اسے پناہ دیتا رہا اور روئے زمین کے ہر شخص کو فدیے میں دے دے’پھر اپنے آپ کو اس سے چھڑا لئے(جواب ملے گا) ہرگز نہیں وہ آگ کی لپیٹ ہے چمڑی ادھیڑتی۔ ہر اس شخص کو پکارتی ہوئی جس نے پیٹھ پھیری اور منہ موڑا اور مال جمع کیا اور سینت سینت کر رکھا”۔
قرآن مجید میں اس حوالے سے ایک دوسری جگہ ارشاد ہے ”کیا ہم نے اس کو دو آنکھیں نہیں دیں ( کہ حقائق کو دیکھتا)اور زبان اور دو ہونٹ نہیں دیئے(کہ بھلائی کی ترغیب دیتا)اور دونوں راستے نہیں سمجھائے(کہ اچھے اور برے کو سمجھتا)؟ مگر وہ گھاٹی پر نہیں چڑھا اور تم کیا سمجھے کہ وہ گھاٹی کیا ہے (یہی کہ) گردن چھڑائی جائے۔ یا بھوک کے دن کسی قرابت مندو یتیم یا کسی خاک آلود مسکین کو کھانا کھلا یا جائے۔پھر آدمی ان میں سے ہو جو ایمان لائے اورجنہوں نے اس پر ثابت قدمی کی اور دوسروں سے ہمدردی کی نصیحت کی”۔
میں تمام دولت مندوں اور منافع بخش اداروں اور ان کے مالکان سے التماس کرتا ہوں کہ وہ غریبوں کی بجائے غربت سے نفرت کریں اور غربت سے نفرت کا بہترین طریقہ یہ ہے کہ غریب کی تعلیم و تربیت اور روزگار کے لئے منظم و مربوط انداز میں تحریک چلائی جائے۔ ملک بھر میں ایسے رفاعی منصوبے شروع کئے جائیں جن کے ذریعے غرباء کی عزت نفس بھی بحال رہے’وہ کسی شخص کے آگے ہاتھ پھیلانے کی ہزیمت سے بچ جائیں اور سماج کے کارآمد افراد بن کر ملک کی اجتماعی ترقی میں حصہ ڈال سکیں تاکہ ہمارا سماج بھی روشن سماج ہو یہاں کا غریب بھی مہذب اور تہذیب یافتہ نظر آئے کیونکہ’
نورسرمایہ سے ہے روئے تمدن کی جلا
ہم جہاںرہتے ہیں وہاں تہذیب نہیں پل سکتی
مفلسی حس لطافت کو مٹا دیتی ہے
بھوک آداب کے سانچوں میں نہیںڈھل سکتی

دنیا بھر میں ایک سو نوے کے لگ بھگ ممالک ہیں اور ان میں بسنے والوںکی تعداد تقریباًسات ارب ہے۔ کوئی ایسا ملک نہیں جہاں قومی ایام پر ہم آہنگی کی بجائے فکری انتشار پیدا کیا جاتا ہو۔کوئی ملک اس فضول بحث کا متحمل نہیں ہوسکتا جس میں اس کے قیام کی وجوہات کو ناجائز قرار دیا جائے ۔کوئی قوم اتنی احسان فراموش نہیں ہوسکتی کہ وہ اپنے محسنوں کے کردار پر کیچڑ اچھالے۔ کسی ریاست کا قانون اپنے ذرائع ابلاغ کو اجازت نہیں دے سکتا کہ وہ ملکی وجود کے خلاف پروپیگنڈا کرنے‘ مسلمہ حقیقتوں کو متنازعہ بنانے اور قومی تخلیق کے اسباب کو غیر حقیقی قرار دےنے پر مذاکرے کرائے۔

پاکستان وہ بدقسمت ملک ہے کہ جس میںمحض اپنے پروگرام کی ریٹنگ بڑھانے‘ اپنے کالم میں زور پیدا کرنے اور اپنے اخبار کی دھار تیز کرنے کے لئے چودہ اگست ‘ 23مارچ‘6ستمبر۔قائداعظمؒ۔علامہ اقبال ؒ۔ سرسید احمد خانؒ اورلیاقت علی خان ؒ سمیت قومی شخصیات اور ایام کے بارے میں جو منہ میں آئے وہ اچھال دے‘صفحے پر بکھیر دے! ٹی وی سکرین کی آڑ میں ذہنی تشدد کی یہ اذیت گاہیں صرف اسی ملک میں وجود پاتی ہیں۔پیمرا‘وزارت اطلاعات اور ٹی وی چینلز کی مفاداتی تنظیمیں خدا جانے اس ملک کو ذہنی خلفشار کا شکار کرکے کس دشمن گروہ کے ایجنڈے کو آگے بڑھا رہی ہیں۔یہ سیکولر کس جنس کا نام ہے کوئی نہیں جانتا۔یہ نسل لنڈا بازار کے دانشوروں کے ہاں پیدا ہوئے جارہی ہے۔صحافتی بددیانتی دیکھئے کہ 23مارچ کو ایک دو ٹی وی چینلز چھوڑ کر ہر کسی نے ”قرارداد پاکستان“ کو متنازعہ بنانے کے لئے ایڑی چوٹی کا زورلگایا۔ ”ہمیں اس قرار داد نے کیا دیا؟“۔”کیا ہم نے پاکستان اس لئے بنایا تھا“۔”قائداعظمؒ کا فلسفہ ریاست یہ تو نہیں تھا“۔” یہ تو قرارداد لاہورتھی۔ اسے سازش کے تحت قرارداد پاکستان کا نام دے دیا گیا“۔ اگر ان جعلی دانشوروں کی پیدائش ایک سازش ہے تو پھر اس ملک کے وجود میں آنے کا سبب 23مارچ کا دن بھی کوئی سازش ہو سکتی ہے۔
23مارچ کے بارے میں شکوک وشبہات پھیلانے اور حکمران طبقہ کی نااہلیوں کو قرارداد پاکستان سے جوڑنے کی بھونڈی کوشش کرنے والوں کواس پاک سرزمین پر ترس کیوں نہیں آتا؟۔ جو دانشور اپنی پسند ناپسند‘اپنے چند دن کی پھوں پھاں اور اپنی باطنی خباثتوں کی تسکین کے لئے میرے وطن کے حوالوں کا مذاق اڑاتے ہیں ‘غلیظ بہتان لگاتے اور ہذیان بکتے ہیں ‘میں ان کے بارے میں کسی احترام اور ادب کا مکلف نہیں ہوسکتا۔بھارتی چینلز میرے وطن کا ‘قرارداد پاکستان کا‘قرارداد مقاصد کا‘نظریہ پاکستان کا مذاق اڑائیں تو سمجھ میں آسکتا ہے لیکن جس کشتی پر میں اور یہ ٹی وی چینلز سوار ہیںاسی میں یہ سوراخ کریں اور میں ہاتھ سے‘زبان سے اور دل سے ان کے خلاف جہاد نہ کروں تو میرے ایمان پر سوالیہ نشان آتا ہے۔ یہی نہیں مجھے لگتا ہے جیسے کوئی دشمن میرے پاﺅں کے نیچے سے میرے حصے کی زمین کا ٹکرا کھینچ رہا ہو۔
اے مخالفین نظریہ پاکستان! یاد رکھو تم جتنی اس نظریہ کی مخالفت کرو گے یہ اتنا ہی پھیلے گا۔ برصغیر میں دو قومیں تھیں‘ دو قومیں ہیں اور دو قومیں رہیں گی۔ ہندو اور مسلمان دو الگ الگ قومیں ہیں۔ اس کا ثبوت چاہتے ہو تو ہندوستان کے مسلمانوں کی حالت زار جا کر دیکھ لو!
نظریہ پاکستان نظریہ اسلام ہے ۔اس کی بنیاد اسی روز رکھ دی گئی تھی جس روز ہندوستان میں پہلا مسلمان آیا تھا۔ محترم ڈاکٹر مجید نظامی نے اس نظریہ کی آبیاری کی۔اب یہ تناور درخت بن چکا ہے۔ نسیم انور بیگ (جنت نصیب)نے اس نظریہ کا مورچہ اسلام آباد میں لگایا‘بیگ راج کی تحریک پر اورجناب میاں محمد جاوید جیسے مخلص احباب کی سرپرستی کے سبب میں بھی اس نظریاتی محاذ کا ادنیٰ سا سپاہی ہوں۔میرا ہی نہیں اٹھارہ کروڑ پاکستانیوں کا ہی نہیں‘24کروڑ بھارتی مسلمانوں اور 20کروڑ بنگلہ دیشی مسلمانوں کا بھی یہ ایمان ہے۔اور یہ نظریہ میری اور پاکستانی قوم کی پہچان ہے۔قوم کی پہچان مٹاﺅ گے تو خود مٹ جاﺅ گے!

اچانک ہی پروگرام بن گیا۔عظمت اللہ دیرینہ دوست ہیں ۔اچھی انگریزی لکھنے والے صحافیوں میں شمار ہوتا ہے۔ قائداعظم یونیورسٹی کے ساتھی ہیں۔سماجی رابطوں کو نبھانے کا حوصلہ اور ہنر جانتے ہیں۔ معروف ٹی وی اینکر اور کالم نگار جناب اسرار کسانہ بھی اولڈ قائدین ہیں۔سابق انکم ٹیکس ڈپٹی کمشنر ہاورڈیونیورسٹی کے فارغ التحصیل اور قائداعظم یونیورسٹی کے ہونہار سٹوڈنٹ جناب حسن کامران بشیر بھی ہمراہ تھے۔اسرار کسانہ سے درخواست کی کہ گوجرخان جانے کی تمنا قلب و دماغ کو جکڑ رہی ہے۔ مصروفیات سے کون بچا ہوا ہے۔بہرحال کسانہ آمادہ ہوگئے کہ گوجرخان کے راز دان ہیں اور وہاں کی عقیدت ان کے لب ولہجہ پر حاوی رہتی ہے۔

پروفیسراحمد رفیق اختر کے بارے لوگوں سے سنا اور کالموں میں پڑھ رکھا تھا۔ اندھی عقیدت میں بہہ جانے کا ہرگز قائل نہیں ہوں۔عامل ‘نجومی’ قیافہ شناس’دست شناس ‘ستارہ شناس سب بجا لیکن جو بات قرآن کریم اور اسوہ رسول صلی اللہ علیہ وآلہ وسلم سے ثابت نہ ہو’اسے ماننے پر جی آمادہ ہی نہیں ہوتا۔پروفیسر صاحب کے پاس بھی اس لئے جانے کی خواہش جاگی تھی کہ ان کا تعارف ایک سچے دانشور’عالم باوصف اور بے غرض پروفیسر کے طور پر ذہن میں نقش تھا۔
بغیر ملے ‘کوئی معاملات کئے کسی شخصیت کے بارے میں جو امیج ہمارے ذہنوں پر بنتا ہے وہ اس وقت تک ادھورا رہتا ہے جب تک ملاقات اور معاملات والا مرحلہ طے نہیں ہوجاتا۔ ہم آجکل میڈیا کے بنائے ہوئے بت پوجتے ہیں۔ چاہے یہ بت صحافتی ہوں’سیاسی ہوں’ مذہبی و مسلکی ہوں یا علم ودانش کے حوالے سے ہوں۔ملاقات میرا شوق ہے۔ میںکبھی بھی مردم بیزار نہیں رہا۔ میں نے اپنے دماغ میں براجمان بہت سے بتوں کو پہلی ملاقات میں ہی ٹوٹتے اور بکھرتے دیکھا ہے۔ پروفیسر احمدرفیق اختر کو لوگ بے حد عقیدت کی نگاہ سے دیکھتے ہیں۔ بعض لوگوں نے انہیں کسی عامل یا قیافہ شناس کے طور پر اپنے ذہنوں میں بٹھا رکھا ہے۔پروفیسر صاحب سے ملاقات کرنے کا فائدہ یہ ہوا کہ ان کے بارے میں جو میرا تصور تھا وہ مزید مضبوط ہوا اور یہ پہلا موقع ہے کہ مجھے ”بت شکنی” کے مرحلے سے گذرنا نہیں پڑا۔
میں قرآن پاک کا ایک ادنیٰ سا طالب علم ہوں’اور اسی کے ذریعے میں ”بائی چوائس” مسلمان ہوا ہوں۔ اور پروفیسر صاحب کو میں قرآنی تعلیمات کے حوالے سے ہی جاننا چاہتا تھا۔ سچ یہ کہ تقریباً تین گھنٹے تک جناب پروفیسر صاحب سے مختلف موضوعات پر گفتگو ہوئی۔ ان میں علمی تکبر بالکل نہیں۔انہوں نے قرآنی فکر سے مرصع جوابات دیکر میری تشفی کی۔جہاں تک پروفیسر صاحب کی ”کرامات” یا ”علم غیب” کے بارے میں ضعیف العقیدہ گروہ کی طرف سے پھیلائی جانے والی باتیں ہیں وہ پروفیسر صاحب کی ذات پر محض بہتان ہے۔وہ شریعت محمدیۖ کے سچے پیروکار ہیں اور لوگوں کو راہ راست کی طرف دلنشین انداز میں رغبت دلانے کا فریضہ سرانجام دیتے ہیں۔ بجھے دلوں میں امید اور اللہ کی رحمت کے چراغ جلاتے ہیں۔حرص و ہوس کے بندوں کو تعلق باللہ کی راہ پر ڈالتے ہیں۔
ان کے ہاں اپنی اپنی ضرورتوں اور حاجتوں کے حوالے سے امرائ’ وزرائ’ عسکری عہدیداران اور عمال حکومت سب جاتے ہیں۔ وہ نہ تو پھونکیں مارتے ہیں ‘ نہ تعویز بانٹتے ہیں اور نہ ہی کندھے تھپکاتے ہیں۔ وہ سراسر خیر کے داعی ہیں اور نفرتوں کو مٹانے اور محبتیں بانٹنے کا درس دیتے ہیں۔ہم آج کل مسلک اور عقیدت کے نام پر جن بے شمار توہمات اور خرافات کا شکار ہوگئے ہیںپروفیسر رفیق ایسے ماحول میں ایک گوشہ عافیت ہیں اور ان سے ملاقات کرنے کے بعدان کی علمی’ عقلی اور دانشمندانہ گفتگو انسان کو بہتر طرز زندگی کی طرف لوٹ آنے کا ذریعہ بنتی ہے ۔ اشکالات’شکوک وشبہات اور تفکرات نے ہماری زندگیوں میں زہر گھول رکھا ہے’گوجرخان کے اس گوشے میں جانے سے ایک بار دل کا زنگ اتر جاتا ہے ۔ پروفیسر صاحب علم کا خزانہ ہیں۔قرآنی حوالوں سے رہبری کرتے ہیں۔ان کے پاس عقیدت میں اندھا ہو کر جانے کی بجائے دماغ کی آنکھیں کھلی رکھ کر کچھ سیکھنے کے لئے جانا چاہیے کہ ایسے لوگ کھلے دماغوں کو زیادہ پسند کرتے ہیں۔”ترجیح اول خدا کی ذات بن جائے تو انسان کامیاب ہوجاتا ہے”۔”جس کا اللہ پر یقین ہو اس پر جادو اثر نہیں کرتا”۔”رب سے زندہ تعلق کا ہونا تعلق بااللہ کی درست تشریح ہے” لوگوں کی خامیوں پر نہیں خوبیوں پر نظر رکھو”۔ایسے سینکڑوں جملے ہیں جن پر ایک پوری کتاب لکھی جاسکتی ہے۔ اصل بات علم کے ان موتیوں پر عمل ہے اور گوجرخان کے اس گوشے میں اسی کا اہتمام ہوتا ہے۔

جماعت اسلامی بنگلہ دیش کے رہنما عبدالقادر ملا کو بھارتی نواز حسینہ واجد کی کٹھ پتلی عدالت کی طرف سے پھانسی دیئے کئی روز گذر گئے لیکن بنگلا حکومت کے خلاف نفرت اور بیزاری کی لہر روز بروز زور پکڑتے جارہی ہے۔ردعمل کی لہریں بنگلا حدود سے نکل کر پورے عالم اسلام میںپھیل رہی ہیں۔اور ہر طرف سے ایک ہی صدا ہے کہ ”ظلم ہوا ”۔ اگر کچھ زبانیں ابھی تک کھل کر مذمت نہیں کر پا رہیں تو اس کا سبب یہ ہے کہ پھانسی گھاٹ پر جھولنے والے شخص کا تعلق جماعت اسلامی سے ہے۔ اگر یہی پھانسی کسی بے ریش اور بے نظریہ اور سیکولر شخصیت کے حصے میں آتی تو یو این او سے لے کر کراچی لاہور تک ہر جگہ شمعیں روشن ہوتیں اور قد آدم تصاویر کے سامنے پھولوں کے ڈھیر لگ جاتے۔پاکستان کی نئی نسل کو شائد علم ہی نہ ہو کہ مقتل میں تڑپتے لاشے کا قصور کیا تھا۔

اس میں کوئی دوسری رائے نہیں کہ بھارت کی پٹھو حکومت نے 1971ء میں پاکستان کو دولخت کرنے میں والی طاقتوں کا مقابلہ کرنے والے پاکستانیوں کے خلاف جنگی جرائم کے لئے جو ٹریبونل قائم کیا وہ سراسر سیاسی نوعیت کا ہے۔ اس ٹریبونل کے طریقہ کار اور اس میں شامل لوگوں سے کسی انصاف کی قطعاً توقع نہیں ہوسکتی۔یہ وہ حقیقت ہے جس کا اظہار انسانی حقوق کی عالمی تنظیموں نے بھی کیا ہے۔اندازہ کیجئے کہ حسینہ واجد اور اس کے حامیوں نے الزام لگایا ہے کہ دوران جنگ 30لاکھ لوگوں کو قتل کیا گیا۔تمام آزاد ذرائع نے اس ”30لاکھ” کو ناقابل یقین قرار دیا ہے۔چونکہ یہ قتل اور ریپ کی مبینہ وارداتوں میں پاک فوج اور اس کا ساتھ دینے والی جماعت اسلامی کو ملوث کیا گیا ہے اس لئے پاکستان بطور ریاست اس ”جرم” میں فریق بنایا گیا ہے۔لیکن حکومت پاکستان نے ڈھاکہ جا کر ”غیر مشروط معافی” مانگ لی۔ اور یہ معافی بھی اس وقت کے آرمی چیف جنرل پرویز مشرف نے مانگی تھی۔خود فوج کے افسران اس ”معافی” پر حیرت زدہ رہ گئے تھے کیونکہ ابھی ان نوے ہزار فوجیوں میں سے ہزاروں افسران زندہ ہیں جنہوںنے مشرقی پاکستان میں مکتی باہنی اور بھارتی فوج کا بڑے ہی نامساعد حالات میں مقابلہ کیا تھا۔معاملہ تو بالکل الٹ تھا۔پاکستان کی حامی بستیوں’محلوں اور دیہاتوں میں مکتی باہنی کے غنڈوں نے جس طرح ظلم ڈھائے تھے اس پر بی بی سی کی رپورٹیں گواہ ہیں ۔ کس طرح البدر اور الشمس کے نوجوانوں کو لٹا کر ان کے سینوں میں پاکستان کے جھنڈے گاڑے گئے۔ کتنی عفت مآب بہنوں اور بیٹیوں کو ان کے والدین کے سامنے بے آبرو کیا گیا۔فوج نے ہتھیار ڈالنے سے پہلے جماعت اسلامی کو اطلاع تک دینا ضروری نہ سمجا تھا’ یہ جماعت اسلامی کے لوگ ہی تھے جو پاکستان زندہ باد کے نعرے لگاتے رہے اور قتل ہوتے رہے۔
اس وقت تو بنگلہ دیش کی تحریک چل رہی تھی’ بنگلہ دیش قائم نہیں ہوا تھا۔ لہٰذا جو لوگ پاکستان کی بقاء کی جنگ لڑ رہے تھے انہیں بنگلہ دیش کا باغی کہنا حب الوطنی کی کسی بھی تعریف کی توہین ہے۔ بنگلہ دیش قائم ہونے کے بعد جماعت اسلامی نے بھی اسے اپنا ملک تسلیم کر لیا اور جناب عبدالقادر ملا اور ان کے رفقاء نے سی بنگلہ دیش میں الیکشن لڑے اور ملا دو بار پارلیمنٹ کے رکن رہے۔ وہ ایک مئوقر اخبار کے ایڈیٹر اور ڈھاکہ پریس کلب کے صدر بھی رہے۔ جنگی جرائم کا ٹریبونل قائم کرکے دراصل حسینہ واجد نے ہندو لابی اور بھارت کو خوش کرنے کی کوشش کی ہے۔آج چٹاگانگ میں علیحدگی تحریک چل رہی ہے اور یہی جماعت اسلامی ہے جس کے کارکنان علیحدگی کی تحریک کے خلاف ڈٹے ہوئے ہیں۔کیا چٹاگانگ آزاد ہوجانے کے بعد انہیں پھر سے جنگی مجرم کیا جائے گا؟۔
کیا وہ لوگ جو بلوچستان کے اندر علیحدگی پسندوں کا نشانہ بن رہے ہیں وہ جنگی مجرم ہیں یا سچے پاکستانی۔افسوس کہ جنرل پرویز مشرف نے بھی بھارت کو خوش کرنے کے لئے ڈھاکہ میں جا کر معافی مانگ کر سچے پاکستانیوں کی توہین کی تھی اور آج اگر فوج اور حکومت حسینہ واجد کو پاکستان کی جنگ لڑنے والوں کے قتل عام سے باز رکھنے کی تگ و دو نہیں کرتے تو پھر عام پاکستانی اپنے وطن کی محبت میں جان قربان کرتے وقت کئی بار سوچے گا۔ افراد کو پھانسی ہوتی رہتی ہے۔ وہ اپنا صلہ اللہ کے ہاں سے ضرور پائیں گے لیکن لاتعلقی سے اعتبار کو بھی پھانسی ہوتی ہے اور اگر اداروں اور ریاستوں سے اعتماد اٹھ جائے تو پھر دفاع وطن کیلئے ”پتر ہٹوں سے خریدنے پڑتے ہیں” البدر اور الشمس کے جھنڈے تلے بغیر کسی معاوضے’ تنخواہ اور تمغے کے جان نچھاور کرنے والے سامنے نہیں آتے۔
ڈھاکہ کی جیل میں نظریہ پاکستان کوپھانسی نہیں ہوئی بلکہ یقین ہوگیا ہے کہ ان پھانسیوں سے اب نظریہ پاکستان مزید پھیلے گا اور جس طرح عبدالقادر نے پھندے کو چوم کر کلمہ پاک کا ورد کرتے اسلام زندہ باد کا نعرہ لگا کر جان جان آفریں کے سپرد کی ہے ۔ اس سے شہادت کے جذبے پروان چڑیں گے اور بنگلہ دیش بالآخر اسلامی جمہوریہ بن کر ابھرے گا۔

ماہ دو ماہ بعد کراچی کا چکر ضرور لگتا ہے۔یوں معاش کا معاملہ بھی سدھرتا ہے اور منی پاکستان کے حالات سے بھی واقفیت رہتی ہے۔گزشتہ دنوں ساحل سمندر کی طرف اڑان بھری تو جہاز میں عوامی نیشنل پارٹی صوبہ سندھ کے صدر اور کراچی میں پٹھان بہن بھائیوں کے ہر دلعزیز رہنما جناب شاہی سید سے سرسری گفتگو ہوئی جو اسلام آباد میں ایک مفصل ملاقات کی باہمی خواہش پر منتج ہوئی۔گوکہ شاہی سید سے ملاقات کی تصاویر اور خبر پاکستان اکانومی واچ کے پلیٹ فارم سے ملک کے مئوقعر اخبارات میں شائع ہوچکی ہے ‘لیکن درج ذیل تفصیلات بھی دلچسپ ہیں۔حسب وعدہ ووقت پختون رہنما پارلیمنٹ لاجز میں اپنے اپارٹمنٹ میں منتظر تھے۔بڑے تپاک سے ملے۔بے تکلف’سادہ طبعیت اور سیدھے سادھے پٹھان سے بات چیت کا اپنا ہی مزا تھا۔تجزیہ نگار بیگ راج بھی ہمراہ تھے۔چائے کا دور چلا اور جناب شاہی کی ”شاہانہ”زندگی کے راز کھلنے شروع ہوئے۔

”ضلع مردان کا رہنے والا ہوں۔ایک گائوں میں پیدا ہوا۔ والدین کے پاس اتنی زمین نہیں تھی کہ وہ میری تعلیم کا خرچہ بھی اٹھا لیتے۔آٹھویں کے بعد روزگار کی تلاش میں کراچی چلا گیا۔ وہاںفیکٹری میں مزدوری کر لی۔ پھر رکشا خرید لیا’ٹیکسی بھی چلائی۔چونکہ میں نے پیسے گھر نہیں بھیجنے ہوتے تھے اور رہائش اور خوراک بھی سستی تھی اس لئے پیسوں کی بچت ہوئی اور پھر میں نے دکان خرید لی۔بڑی محنت کی ۔ کچھ زمین خریدی۔ زمین کے ریٹ بڑھنے سے میں بھی مالدار ہوگیا۔پٹرول پمپ خریدا اور سی این جی سٹیشن بھی بنایا۔ چونکہ کراچی آنے والے میر ے علاقے کے لوگ اپنی مشکلات کے حل کے لئے میرے پاس آتے تھے اور میں اپنے تعلقات استعمال کرکے ان کے مسئلے حل کرواتا تھا’ اس لئے اللہ نے عزت بھی دی۔1991ء میں میں پارٹی میں چلا گیا۔ اور پھر مسلسل صوبائی صدر منتخب ہوتا رہا”۔بڑے اختصار کے ساتھ انہوں نے اپنا تعارف مکمل کیا۔میں نے ان سے پوچھا کہ آپ سینیٹر ہیں۔آپ کی پارٹی کی صوبہ خیبرپختونخواہ میں حکومت بھی رہی۔آپ نے وزارت کیوں نہ لی۔اس پر شاہی سید کا کہنا تھا کہ مجھے وزارت کی پیشکش ہوئی میں نے پیشکش کرنے والوں سے پوچھا کہ آخر وزیر بن کر میں کیا کروں گا؟۔ وزیر بننے کی خواہش دو وجوہات سے ہوسکتی ہے۔ ایک یہ کہ میں اپنی دولت میں اضافہ کروں۔ اس کی مجھے کوئی ضرورت نہیں۔مجھے ہر ماہ دس بارہ لاکھ روپے کا کاروبارسے آجاتا ہے۔ مجھے اس سے زیادہ کی ضرورت نہیں۔ بیٹے باہر ہیں۔ وہ اپنا کماتے ہیں اورکھاتے ہیں۔ اگر اہل ہوں گے تو اپنے لئے جمع کر لیں گے اور اگر نااہل ہوئے تو جمع کی ہوئی دولت اجاڑ دیں گے۔ اس لئے دولت اکٹھی کرنے کا کوئی فائدہ نہیں۔دوسری بات جس سے لوگ وزیر بننا چاہتے ہیں وہ ہے کہ وزیر کے اختیارات لے کر لوگوں کے کام کرائے جاسکیں  تو اس ملک کی بیوروکریسی ایسی ہے کہ یہاں دیواروں سے ٹکریںمارتے رہیں’ لوگوں کے کام نہیں ہوسکتے۔رشوت کے بغیر یہاں  ایک نالی نہیں بنوائی جاسکتی۔ اس لئے میں نے وزارت کی پیشکش شکریے کے ساتھ واپس کردی۔کراچی کے حالات کے بارے پختون رہنما کا کہنا تھا کہ سپریم کورٹ نے اس حوالے سے تاریخی اقدامات کی نشاندہی کر دی ہے۔پولیس کو غیر سیاسی کیا جائے۔آپریشن کراس دی بورڈ” کیا جائے۔شہر کو اسلح سے پاک کیا جائے اور نئے سرے سے انتخابی حلقہ بندیاں کی جائیں۔ اگر یہ چار اقدامات خلوص نیت سے اٹھائے جائیں تو کراچی چھ ماہ کے اندر امن کا گہوارہ بن سکتا ہے۔اقتصادی بہتری کے حوالے سے شاہی سید نے بڑے کھرے انداز میں تبصرہ کرتے ہوئے کہا کہ جب ملک میں امن ہی نہیں ہے تو پھر خوشحالی کیسی۔جس ملک میں اس کے اپنے کاروباری اور سرمایہ کار گروپ بیرون ملک بھاگ رہے ہوں وہاں باہر سے آکر لوگ کیوں سرمایہ کاری کریں گے۔ میری مثال سامنے ہے ۔ میں نے اپنے بیٹوں کو خود دبئی میں کاروبار بنا دیئے ہیں۔ یہاں تو وہی لوگ کاروبار کریں گے اور سرمایہ  لگائیں گے جنہوں نے بیوروکریسی کے ساتھ ملکر ڈاکے ڈالنے اور راتوں رات منافع جمع کرنا ہے۔کاروبار تو ایک درخت کی مانند ہوتا ہے جو نسل در نسل بڑھتا ہے۔پاکستان میں ایسی فضاء ہی نہیں کہ ایسے درخت جڑیں پکڑ سکیں۔ جو لوگ اس کے باوجود یہاں سرمایہ کاری کر رہے ہیں  وہ یا تو مجبور ہیں یا پھر ولی اللہ ہیں۔پاکستان کی وفاداری کے سوال پر اے این پی کے رہنما نے دو ٹوک جواب دیا کہ ان کے رہنما باچا خان نے پاکستان کی مخالفت ضرور کی تھی لیکن ان کی مخالفت کی وجہ یہ تھی کہ کمزور پاکستان کی بجائے مضبوط پاکستان بنایا جائے۔ جب وہ اسمبلی میں آگئے تو پھر مخالفت کا طعنہ دینا صرف جماعت اسلامی والوں کا ہی وطیرہ ہوسکتا ہے۔یہ پاکستان ہے تو ہم ہیں۔پاکستان کے علاوہ ہمارا کوئی اور وطن نہیں۔ہم نے روس کے خلاف جہاد کو امریکہ کی جنگ کہا اور یہ سچ ثابت ہوا۔ آج ڈرون کے خلاف مظاہرے ہوتے ہیں۔ضرور ہونے چاہیں ۔لیکن آسمانی ڈرون کے ساتھ ساتھ زمینی ڈرون کا خاتمہ بھی ضروری ہے۔ڈاکٹر صاحب… سب سے زیادہ قربانیاں میری پارٹی نے دی ہیں۔ لیکن پنجاب کا کون سا ضلع ہے۔ جہاں لاشیں نہیں پہنچیں۔ طالب کون ہے اور کون غیر طالب ۔یہ تو ہمارے ادارے ہی بہتر بتا سکتے ہیں۔ اگر نیت میں اخلاص ہو تو پھر طالبان کے ساتھ مذاکرات بھی کامیاب ہوسکتے ہیں۔شاہی سید سے بیگ راج نے پنجاب کے خلاف مبینہ نفرت کے بارے میں سوال کیا تو شاہی سید نے کہا کہ پنجاب بڑے بھائی کی طرح ہے۔ ہم پختون بڑے بھائی کو والد کی طرح سمجھتے ہیں۔پنجاب کو چاہیے کہ وہ شفیق والد کی طرح ڈانٹے ڈپٹے بھی لیکن شاباش بھی دیا کرے۔جناب شاہی سید سے ملاقات کے دوران ایم کیو ایم کے حوالے سے ان کے شکوے گلے بھی سنے۔بعض باتیں ایسی ہیں کہ ان کا بیان کرنا شائد ”فساد فی سبیل اللہ” کے زمرے میں آتا ہے اس لئے انہیں پیش قارئین نہیں کیا جاسکتا۔ البتہ ان کے اس تجزیے پر غور ضروری ہے کہ مسلم لیگ (ن) اور پی پی پی دونوں ہی الطاف حسین  کو ناراض کرنا نہیں چاہتے۔ وہ ایم کیو ایم کی عوامی قوت (جسے شاہی سید  ٹھپہ مافیا کی کرشمہ سازی  زیادہ اور حق پرست عوام کی کارگزاری کم سمجھتے ہیں)کو ایک بندوق کے طور پر ایک دوسرے پر تانے رکھنا چاہتے ہیں۔ گوکہ آجکل کراچی میں ٹارگٹ کلنگ کی وارداتیں کم ہوگئی ہیں ‘لیکن حکومت’ایم کیو ایم’ پی پی پی اور دیگر مذہبی وسیاسی جماعتوں کو اس بات پر یکسو ہوجانا چاہیے کہ مجرم’مجرم ہوتا ہے۔اسے سیاسی لبادہ اوڑھا کر سیاسی قوت حاصل نہیں کی جاسکتی۔