Click here to View Printed Statement

کائنات کا دولھا انسان اللہ پروردگار عالم کی تخلیق کا بہترین شاہکار ہے۔ رب کائنات نے اسے نعمتوں کے اتنے انبار عطا فرما دیے کہ جنہیں دیکھ کر ذرا سا غور کرنے پر ہمیں اللہ نظر آنے لگتا ہے۔ اللہ خود اپنے کلام میں فرماتا ہے”تمہارے نفوس میں میری نشانیاں موجود ہیں تو کیا تم ان پر غور نہیں کرتے“۔

ہم اپنی ذات سے ذرا باہر نظر دوڑائیں تو سورج‘ چاند‘ ہوا‘ پانی ‘ستارے آسمان‘زمین اور جانور سب کے سب قدرت کی نشانیاں ہونے کے ساتھ ساتھ حضرت انسان کی ایسے خدمت میں جتے ہوئے ہیں جیسے ان کا ہم سے بہت بڑا کام پھنسا ہوا ہے۔ ان پر نگاہ دوڑا کر یوں محسوس ہوتا ہے کہ جیسے سورج چمکتا‘چاند دمکتا‘ستار روشن‘ سمندر موجزن‘ ہوائیں چلتی‘ پھول کھلتے‘پھل پکتے اور جانور سواری و غذا کے لئے پیدا ہی ہمارے لئے کئے گئے ہیں۔ احساس کچھ یوں ہوتا ہے کہ جیسے ہم آقا ہیں اور یہ ہمارے خدمت گزار حالانکہ اصل صورتحال اس کے برعکس ہے۔ ان سب سے پوچھیے کہ اگر انسان نہ ہو تو تمہاری صحت پر کیا اثر پڑے گا تو یہ سب کہیں گے ہماری بلا سے۔ مگر انسان ان کے بغیر ایک پل بھی زندہ نہیں رہ سکتا۔
غرض ساری کائنات اپنا کام مالک حقیقی کی مرضی کے عین مطابق کر رہی ہے مگر انسان ہے کہ ظالم بھولا ہوا ہے۔
گھوڑے کو مالک صرف چارہ ہی ڈالتا ہے تو وہ اس کے بدلے اس کے لئے لڑ کر اپنی جان دے دیتا ہے۔ مگر انسان اپنے مالک کا بڑا ناشکرا ہے اور اس کی وجہ سورہ عادیات میں جو بتائی گئی وہ ہے مال سے بے پناہ محبت:
دنیا میں کسی ادارے کا مالک تیوری چڑھا لے تو ملازم فوراً ہاتھ باندھ کر کھڑا ہوجاتا ہے مگر کارخانہ قدرت کا حکم کئی بار جھنجوڑ چکا مگر ہم اس کی کوئی پرواہ نہیں کرتے۔آذان کی پکار تو ہمارے کانوں سے ٹکرا کر واپس چلی جاتی ہی رہی ہے لیکن اب تو ہم چھوٹے عذابوں کی ایک سیریز کو اپنی آنکھوں سے دیکھنے کے باوجود بھی راہ حق کی طرف جانے سے کترا رہے ہیں۔
وہ ہمیں بار بار اپنے کلام میں بتا چکا ہوں کہ میں نے یہ تمام کائنات تمہارے لئے مسخر کردی ہے مگر تم کو اپنے پیار کے لئے پیدا کیا ہے۔ وہ واضح طور پر آگاہ کرتا ہے کہ تمہاری تخلیق کا مقصد میری محبت اورمیری مخلوق سے پیار ہے۔
وہ خبردار کرتا ہے کہ اگر تم مجھ سے محبت نہیں کرو گے تو میں عنقریب تمہاری چھٹی کروا دوں گا اور تمہاری جگہ ایسی قوم پیدا کروں گا جو کہ مجھ سے محبت کرے گی اور میں ان سے محبت کروں گا۔
وہ کہتا ہے کہ میں تم سے رزق روزی نہیں مانگتا۔رزق رساں تو میں ہوں۔ اس لئے تمہاری روزی کا میں سامان کروں گا تم تو بس میری طرف پیار کی نگاہ اٹھا کر کبھی دیکھ ہی لیا کرو۔
وہ ہم کو بار بار اپنی نعمتوں کی یاددہانی کراتا ہے کہ شائد نگاہ ان کی طرف مبذول کرے تو نگاہ شکریہ اوپر بھی اٹھا لے۔مگر ہمارا حال تو یہ ہے کہ گائے نے اگر دودھ پلایا ہے تو ہم نے اسے ماتا بنا کر اسی کے آگے سر تسلیم دل خم دیا۔اللہ کو ہم سے گلا ہے کہ گوبر اور خون کے درمیان سے ظالمو تم کو خالص دودھ تو میں نے پلایا ہے اور تم نے ساقی پر نگاہ کرنے کے بجائے برتن کے آگے سر نیاز جھکا دیا۔ جبکہ گائے کو تو یہ خبر بھی نہیں کہ یہ سارا نظام کیسے چل رہا ہے۔ رب کا فرمان ہے کہ سورج اور چاند کو سجدہ کرنے والو اسے پہچانو جس کے ہاتھ میں ان کی رسی ہے۔
دنیا میں ماں جب بچے کو نہلا دھلا کر نئے کپڑے پہنا کر سامنے کھڑا کرتی ہے اور پوچھتی ہے کہ سب کچھ کس نے دیا ہے تو بچہ اگر صرف اتنا کہہ دے کہ ”ماں تو نے“ تو صرف اتنا کہنے پر ہی ہم نے کئی بار دیکھا ہے کہ وہ بچے کو درجنوں بوسے دیتی ہے۔ یہی حال مالک کا ہے جب بندہ نہا دھو کر آئینہ کے سامنے کھڑا ہو اور یہ کلمات ادا کرے کہ اللہ تیرا شکر ہے تو مجھے خوبصورت شکل عطا فرمائی۔ میری سیرت کو بھی خوبصورت بنا دے تو عرش سے آواز آتی ہے۔ ”بندے جا تیری اس خوبصورت بات پر میں نے تیرے پچھلے گناہ معاف کردیئے“۔ وہ فرماتا ہے کہ اگر نعمت کا شکر ادا کرو گے تو نعمتوں کی بارش کردوں گا اور ناشکری کرو گے تو میرا عذاب بہت سخت ہے۔
اللہ نے ہمیں مختلف انداز سے یاددھانیاں کروائی ہیں کہ شائد انسان اپنے محبوب حقیقی کی طرف نظر التفات کرلے۔وہ فرماتا ہے کہ جب تم ماں کے بطن سے گود مادر میں آئے تو کچھ نہیں جانتے تھے۔ یہ سمع و بصر اور دل ودماغ جس پر تم اتنا اتراتے ہو میں نے عطا فرمائے ۔ایک طرف تو ان نعمتوں کا تذکرہ کیا عام لوگوں کیلئے تو دوسری طرف میڈیکل سائنس کے ماہرین کو بتایا کہ تم نے آج یہ ثابت کیا ہے کہ انسان کو پہلے سماعت ملتی ہے بعد میں بصارت مگر رب العالمین نے چودہ سو سال قبل ہی یہ حقیقت اپنے نبی صلی اللہ علیہ وآلہ وسلم کی زبان سے جاری فرما دی تھی۔
وہ ہمارے کئی بھائیوں کو ان میں سے کچھ عطا نہیں بھی فرماتا۔شائد اس لئے کہ آنکھوں سے محروم کوئی شخص جب گلی گلی سے یہ پکارتا گزرے کہ” آنکھوں والو! آنکھیں بڑی نعمت ہیں“ تو ہمیں ان کے نعمت ہونے کا واقعتاً احساس ہوجائے آپ غور فرمائیں تو نوزائیدہ بچہ نہ بول سکتا ہے نہ رفع حاجت کرنے کے قابل ہوتا ہے۔غلاظت کے اس ڈھیر کے لئے دودھ کی نہروں کے علاوہ ماں کے دل میں اتنا پیار بھی ڈال دیا کہ وہ ساری غلاظتیں اپنے دامن میں لے لیتی اور بچے کو صاف ستھری جگہ ڈالتی۔میں تو اس کو اس طرح دیکھتا ہوں کہ دنیا میں جو ماں کا کردار ادا کر رہی ہے وہ ماں نہیں بلکہ دائی ہے اصل ماں (پالنے والی ذات) تو وہ ہے جس نے اس دائی کے دل میں اتنا پیار ڈالا ہوتا۔ سرکار صلی اللہ علیہ وسلم نے بھی اللہ کے پیار کو ماپنے کے لئے ماں کے پیار کا پیمانہ استعمال کیا۔ آپ کسی سفر پر جا رہے تھے کہ ناگہاں کسی عورت کا بچہ کھو گیا۔ وہ بڑی بے چینی کے عالم میں پاگلوں کی طرح اسے ڈھونڈتی پھر رہی تھی۔ کافی وقت بعد وہ اسے اچانک نظر آیا تو اس نے بچے کو اپنی بانہوں میں جکڑ کر اسے بے شمار بوسے دیے۔ ایسی کیفیت میں حضور صلی اللہ علیہ وآلہ وسلم نے صحابہ کو اس کی طرف اشارہ کرتے ہوئے فرمایا کہ دیکھو تمہارا رب تم سے اس ماں سے بھی ہزاروں گنا زیادہ پیار کرتا ہے جب قرآن فرماتا ہے کہ ماں باپ کے سامنے اف تک نہ کہو تو میں سوچتا ہوں کہ جب ہم اس ماں کے سامنے اف نہیں کہہ سکتے تو اس حقیقی ماں کے سامنے اف کیسے کہہ سکتے ہیں اور اس کے حکموں کو پا کر ان کی نافرمانی کرنے کی جسارت کیسے کرسکتے ہیں۔ میں انسان میں موجود اعضاءاور نظام کو دیکھ کر کبھی کبھی خیال کرتا ہوں کہ جانے وہ خود کتنا پیارا ہوگا جس کی تخلیق اتنی پیاری ہے۔
انسان کے اندر اور باہر کے ماحول میں یہ نشانیاں ہم سے کچھ کہتی ہیں ۔ گاڑی میں جانے والا مسافر اپنے دوست کو دیکھ کر جب رومال لہراتا ہے تو اس کی حرکت سے دیکھنے والے کو ایک نتیجہ نکالنا ہوتا ہے اگر کوئی رومال کی رنگت‘ اس کی دھاریوں‘ اس کے کپڑے کے معیار پر غور کرنے لگے تو زمانے والے اسے احمق کہیں گے۔دراصل اس طرح کرنے سے اس کا مقصد اس کی توجہ اپنی جانب مبذول کروانا ہوتا ہے۔
اگر کوئی مہمان کسی کے گھر کھانا کھانے کے وقت سب باتوں کو لاجک سمجھ جائے کہ بلب میں روشنی پاور ہاﺅس سے آرہی ہے۔ پھول جو گلدانوں میں سجائے گئے ہیں یہ اس طرح گلدانوںمیں نہیں اُگتے بلکہ باغ سے لائے گئے ہیں۔بادلوں کو دیکھ کر ان کا سارا فلسفہ بیان کردے۔ غرض ہر چیز کے بارے بڑی عقل مندی سے متاثر کن کرتا جائے۔ کھانے پر بھی بڑی سیرحاصل گفتگو کر ڈالے مگر کھانا کھانے کے بعد میزبان کا شکریہ ادا کیے بغیر چلائے تو کوئی شخص بھی ایسے شخص کو عقلمند نہیں کہے گا۔ عقل بہت بڑی چیز ہے اس کی بنیاد پر انسان اشرف المخلوقات کے درجہ پر فائز ہوا ہے مگر یہی عقل اگر کسی جسم سے نکال دی جائے تو وہ پاگل کہلائے گا۔ یاد رہے کہ عقل اگر وحی کی روشنی سے ہٹ کر فیصلے کرے گی تو یہ باولی کہلائے گی۔خدا کا فرمان بھی کچھ اسی طرح سے ہے کہ جب میرے بندے آسمانوں اور زمین کی تخلیقات میں غور کرتے ہیں تو نتیجہ بے فکر کے طور پر بے ساختہ یہ کہہ اٹھتے ہیں کہ اے رب تو نے یہ سب بے کار پیدا نہیں کیا۔ وہ کہتے ہیں کہ رب تو پاک ہے ہم کو آگ سے بچا کر اپنا دیددار نصیب فرما۔ بقول شاعر
تیری جنت کو یا رب کیا کروں
آرزو ہے تجھے دیکھا کروں

بوڑھے پنشنر نے پنشن نہ ملنے کیخلاف احتجاجاً جان دے دی تو حکمرانوں کو پنشن دینے کاخیال آیا۔ وہ مفلوک الحال جو گلے میں پھندے اور منہ میں خشک روٹیاں لٹکائے ماتم کر رہے تھے اور ان کی کہیں شنوائی نہ تھی انہیں بینکوں کے باہر کرسیوں پر بٹھا کر پنشن کی رقم فراہم کردی گئی۔احتجاج کرنے والوں کو سبق ملا کہ اس نظام حکومت میں موت سے ہمکنار ہو کر ہی کوئی آواز ایوان اقتدار تک پہنچائی جاسکتی ہے۔سندھ کے 32سالہ نوجوان راجا خان رند نے پارلیمنٹ ہاﺅس کے سامنے خودسوزی کی۔تنگدستی کیخلاف اس کا احتجاج خودسوزی پر ختم ہوا۔

لاش اٹھی توحکمرانوں کو خیال آیا کہ سیاسی مخالفین اس جنازے کو استعمال کریں گے لہٰذا اسی وقت حکومتی حکمت عملی حرکت میں آئی۔ سید خورشید شاہ نے سوختہ شخص کے بھائی اور باپ کو ایئر ٹکٹ فراہم کئے۔تجہیز وتکفین کا خرچہ دیا اور بیوہ اور بچوں کی داد رسی کا اعلان کر ڈالا۔ سندھ کے ہر نوجوان کو یہ پیغام ملا کہ اپنے بچوں کو دو وقت کی روٹی دینے کے لئے پارلیمنٹ ہاﺅس کے سامنے خودسوزی ہی موثر راستہ ہے۔یہ کیسا سیاسی اور عوامی کلچر ہے کہ انتہائی جائز مطالبہ منوانے کے لئے بھی مینار پاکستان سے چھلانگ لگانی پڑتی ہے‘واپڈا کے دفاتر توڑنے پڑتے ہیں‘ایجوکیشنل بورڈ کا ریکارڈ جلانا پڑتا ہے۔ اپنی جان لینی پڑتی ہے۔ گھیراﺅ اور جلاﺅ اب اس سماج کا عمومی رویہ بن گیا ہے۔ احتجاج احتجاج۔ احتجاجی طریقہ کار اس قدر معروف اور مقبول ہوا ہے کہ ہر شخص ‘ہر کمیونٹی ‘ ہر ادارہ سال کے بارہ ماہ احتجاجی صورتحال سے دوچار رہتا ہے۔ آج کا پاکستانی چاہے اس کا تعلق کسی مسلک‘صوبے‘زبان ‘پیشہ اور کاروبار سے ہو وہ ہر وقت اور ہرلمحہ احتجاج پر تیار ہے بلکہ مجبور ہے۔حکمران طبقہ بھی جان بوجھ کر سویا رہتا ہے اور معاملات کو اس وقت تک ٹالتا رہتا ہے جب تک بات چیت تہذیب اور دلیل کے دائرے سے نکل کر احتجاج اور انتقام تک نہیں پہنچ جاتی۔اگرکوئی ٹی وی چینل دکھا سکے تو دیکھا جاسکتا ہے کہ پاکستان میں کوئی ایک روز شائد عید کا روز بھی ایسا نہ ہو جس دن پاکستان کے کسی نہ کسی حصے میں احتجاج نہ ہورہا ہو۔لوگوں کو سڑکوں پر لانا شائد اب سب سے آسان کام رہ گیا ہے۔حکمران طبقہ کے کرتوتوں میں ایک کرتوت یہ بھی ہے کہ وہ ایک دوسرے کو نیچا دکھانے کے لئے عوام کو سڑکوں پر آنے کی دعوت دیتے ہیں اور چونکہ عوام کے پاس کرنے کو کچھ ہے ہی نہیں‘وہ بھی وقت گزاری اور تماش بینی کے لئے ان کے جلسے جلوسوں کو رونق بخشتے ہیں۔ جلسوں کا سب سے بڑا فائدہ یہ ہے کہ بے روزگاروں کی عزت اور توقیر بڑھ جاتی ہے۔مختلف لیڈر اور پارٹیاں بے روزگاروں تک پہنچتی ہیں اور انہیں اپنا ”کارکن“ بننے پر آمادہ کرتی ہیں۔ کسی بے روزگار سے پوچھ لیں وہ کسی نہ کسی سیاسی جتھے کا کارکن ضرور ہوگا۔آپ کہہ سکتے ہیں کہ احتجاجی سیاست نے اس ملک کے کروڑوں بے روزگاروں اور بھوکوں کو جز وقتی مصروفیت ضرور دے دی ہے۔ نفری پوری کرنے کے لئے سروں کی ضرورت ہوتی ہے اور پاکستان میں انسانوں کی کمی نہیں۔ ماشاءاللہ ہر روز ہزاروں نہیں لاکھوں پیدا ہوتے ہیں۔خدا خیرے کرے!تحریک انصاف نے گوجرانوالہ میں بے روزگار نوجوانوں کا جم غفیر اکٹھا کیا تو ہر طرف خوف و ہراس پھیل گیا۔ ن لیگ کو اپنے گڑھ میں گڑبڑ دکھائی دی اور اب (ن) لیگ ”گو زرداری گو“ کی تحریک شروع کرچکی ہے جو کہ بہرحال احتجاجی ہے۔میاں نوازشریف نے ٹرکوں پر امدادی سامان سجایا اور سندھ کے ڈبکیاں کھاتے ہاری ان کے استقبال کو ٹوٹ پڑے۔ پیپلزپارٹی کو فکر لاحق ہوئی۔ موت اور زندگی اللہ کے ہاتھ میں لیکن ”مادرجمہوریت“ کی موت نے جناب زرداری اور ان کی پارٹی کو بہرحال سکھ کے چند دن عطا کردیئے۔کسی نے سچ کہا کہ”ماواں ٹھنڈیاں چھاواں“۔(ق) لیگ والوں نے عدالت سے بری ہونے والے اپنے نوجوان رہنما کا اتنا بڑا استقبال کیا کہ جلسہ پنجاب حکومت کیخلاف احتجاج کا بہت بڑا مظاہرہ ہوگیا۔احتجاج‘جلسہ‘ جلوس‘ریلی‘ دھرنا اور مارچ کے لئے پاکستان کی زمین انتہائی زرخیز ہے۔چلچلاتی دھوپ ہو یا جاڑے کی ٹھنڈ۔ کوئی موسمی رکاوٹ احتجاج کا راستہ روک نہیں سکتی۔ دلوں میں نفرت‘اکتاہٹ اور انتقام کی سلگتی آگ پر حکمرانوں کی کرپشن‘نااہلی اور بدعنوانی تیل انڈیلتی رہتی ہے۔آج کل تو موسم ویسے ہی مہربان ہے۔ خوبصورت دھوپ میں جسم گرمانے کو خواہ مخواہ جی چاہ رہا ہوتا ہے۔اب بھی اگر میاں برادران لاکھوں لوگوں کو سڑکوں پر نہ لا سکیں تواس کا مطلب ہوگا کہ عوام کوئی نیا تماشا دیکھناچاہتے ہیں ویسے جناب زرداری نے تو ہر وہ اقدام اٹھا دیا جس نے لوگوں کو اس نظام سے متنفر کردیا ہے۔

جب سے لفظ شناسی کے درجے کو پہنچے ہیں پاکستان کے حوالے سے ہر دور میں لفظ ”بحران“ کا تکرار سنا ہے۔بحران در بحران‘ایک سے نکلیں تو دوسرے میں پھنس جائیں گویا مرض بڑھتا گیا جوں جوں دوا کی۔ دیگر قومیں اور ممالک بحرانوں سے نکلتے جارہے ہیں اور ہم اس دلدل میں دھنستے چلے جارہے ہیں۔ماہرین اقتصادیات اور دانشوران معاشیات اب اس امر پر متفق ہوگئے ہیں کہ مستقبل کے پاکستان کو توانائی کے شدید ترین بحران کا سامنا کرنا ہے۔ بجلی‘ گیس ‘کوئلہ اور تیل یہ توانائی کے چار بڑے ذرائع ہیں اور انہی ذرائع سے ہم مشین کا پہیہ چلاتے اور فیکٹری کی چمنیوں سے دھواں اگلتے ہیں۔ گھر میں روشنی کرنا ہو یا تندرو تپانا ہو‘ہوا میں تیرنا ہو یا سمندر میں غوطہ زنی کرنی ہو‘سڑک پر فراٹے بھرنے ہوں یا کھیت کھلیانوں میں فصلوں کو لہلانا ہونا۔ ہر خوشی اور خوشحالی کے لئے توانائی کاکوئی نہ کوئی ذریعہ درکار ہے۔ تیل جلاتے ہیں اور اس سے تھرمل پاور پیدا کرتے ہیں۔جلانے کے لئے تیل کا حصول اب دل جلانے سے کہیں زیادہ کار دل فگار ہے۔ تیل بیرون ممالک سے آتا ہے۔ یہ ڈالروں کے سکے میں خریدا جاتا ہے۔ ہمارے ہاں ڈالرز نہیں روپیہ ہے۔ ہم تقریباًسو روپے جمع کریں تو ایک منحوس ڈالر کا پیٹ بھرتا ہے۔ 2015ءتک اندازہ ہے کہ ہمیں تیل کی درآمد پر ہر سال اڑتیس ارب ڈالر تک خرچ کرنے پڑیں گے۔ یہ ڈھیر سارے ڈالر کہاں سے آئیں گے۔ ہماری برآمدات کا ہدف دو ہزار پندرہ تک زیادہ سے زیادہ پندرہ ارب ڈالر ہوگا۔ ہم پندرہ ارب ڈالر کمائیں گے اور دگنے ڈالر دے کر تیل خریدیں گے۔ جب ایسا نہیں کرسکیں گے تو پھر چلتی فیکٹریوں میں سے آدھی سے زیادہ بند کریں گے‘روشن گھروں میں جلتے قمقموں کا گلا گھونٹیں گے اور ہوائی جہازوں اور ٹرینوں کے روٹ بیچیں گے یا انہیں گراﺅنڈ کردیں گے۔آبادی بڑھتی جائے گی اور بجلی کی پیداوار روز بروز کم ہوتی جائے گی۔ ہائیڈل پاور پراجیکٹس کے لئے ہائیڈل پاور چاہیے۔اس کے لئے آبی ذخائر یعنی ڈیم بننے ہیں۔ کب بنتے ہیں ‘کہاں بنتے ہیں۔ایک خواب اور خیال کے سوا اس باب میں رکھا کیا ہے؟ کوئی عالمی‘قومی بینک سرمایہ کاری کے لئے تیارنہیں۔ بھاشا ڈیم ایک مدہوم سی امید ہی تو ہے! جتنے عرصے میں ہم ڈیموں کے لئے سرمایہ تلاش کریں گے۔ اتنی مدت میں ہمارا ہمسایہ ملک ہمارے باقی ماندہ دریاﺅں کا جوہر نچوڑ چکا ہوگا۔ ہم عالمی منصفوں سے منصفی کی بھیک مانگ رہے ہوں گے اور جب مایوسی پوری طرح چھا جائے گی تو پھر ”جنگِ آب“ شروع ہوجائے گی۔ پانی ملے یا نہ ملے خون ضرور بہتا دکھائی دے گا۔ جنگ نہ ہوئی تو ہم پچکے جسموں کے ساتھ صحرا کی موت مر جائیں گے۔
دنیا میں گیس کے ذخائر بے پناہ ہیں ۔ ایران سے معاہدہ ہوچکا لیکن طاقتوروں کی طرف سے اجازت نہیں کہ ہم اس پائپ لائن پر آگے بڑھیں‘ہمیں ترکمانستان کی طرف دھکیل دیا گیا ہے اور خبرگرم ہے کہ ازبکستان نے صاف کہہ دیا ہے کہ پاکستان ترکمانستان سے گیس حاصل نہیںکرسکتا۔ اب کہاں جائیں؟ قطر والے کیا کریں گے ۔ ہم گیس کے پائپوں میں صرف سُوں سُوں سنا کریں گے۔ صنعت و حرفت کا پہیہ تو جام ہوگا ہی‘گھروں کے چولہے ٹھنڈے ٹھار پڑ جائیںگے۔
سولر سوسائٹی آف پاکستان کے صدر شاہد اعوان اور سیکرٹری جنرل علی ذوالقرنین سے بہتر کوئی نہیں جانتا کہ پاکستان کی کل آبادی کے صرف 40فیصد حصے کو اس ادھموئی سی بجلی کی سہولت حاصل ہے۔ صرف 20فیصد آبادی کو گیس سے استفادہ حاصل کرنے کا موقع میسر ہے۔2015ءتک آبادی کے اس حصے کو بھی یہ سہولت میسر نہیں رہے گی۔ ہم استعمال شدہ ٹشو پیپر جلا کر چائے بنایا کریں گے اور سورج ڈھلتے ہی حیات ہمہ گیر کی سرگرمیاں بھی ڈھل جائیں گی۔پتھر کا زمانہ دیکھا نہیں لیکن قرائن سے لگتا ہے کہ دو چار برس بعد یہ بھی دیکھ لیں گے۔
کوئلہ بہت ہے۔ہمارے سائنسدان فرماتے ہیں کہ ملک میں تھر کے علاقے میں کوئلہ کی اعلیٰ کوالٹی کا اس قدر ذخیرہ ہے کہ آئندہ پانچ سو برس تک نہ صرف یہ کہ ملک کی گیس اور حرارت کی ضرورت پوری ہوسکتی ہے بلکہ ہم ایکسپورٹ کرنے کی پوزیشن میں ہوں گے۔ سائنسدانوں کے منہ میں گھی شکر! لیکن کوئلہ تہہ زمین سے خودبخود نکل کر ہماری بھٹھیوں میں کیسے پہنچ جائے گا۔ سنا ہے کہ کوئلے کو گیس میں تبدیل کرنے والی ایک مشین جاپان سے آئی تھی۔وہاں پر زلزلہ‘ سونامی اور تابکاری سے مشین کی درآمد رک گئی ہے۔ ابھی پائلٹ پروجیکٹ شروع ہوگا۔ چین والے ناراض ہو کر الگ بیٹھ گئے ہیں۔پہلے ہم نے انہیں یہ کام سونپا تھا‘پھر خدا جانے ہمارے تیز رفتار دماغوںنے عہد شکنی کیوں کی۔ اب ہم مختلف سرمایہ کاروں پر تکیہ لگائے بیٹھے ہیں۔ کب نومن تیل ہوگا اور کب رادھا ناچے گی!۔
بجلی پیدا کرنے کی صلاحیت طلب سے زیادہ ہے لیکن تیل خریدنے کیلئے رقم نہیں۔بجلی کی بچت کے چرچے رہتے ہیں لیکن 30فیصد تو لائن لاسز میں ضائع ہوجاتی ہے۔ کیسا ظلم ہے کہ ان لائن لاسز کو کم دکھانے کے لئے ہمارے متعلقہ محکمے لوگوں کے میٹر تیز کردیتے ہیں۔گزشتہ چالیس برسوں سے بجلی پر چلنے والے ٹیوب ویل پر سبسڈی کی رقم بلوچستان ‘ اندرون سندھ اور صوبہ خیبرپختونخواہ کھا جاتے ہیں۔جرمانہ پنجاب کو بھرنا پڑتا ہے! جب صورتحال یہ ہو تو پھر بجلی کیلئے رقم کہاں سے آئے گی۔ ہماری قومی حالت یہ ہے کہ ہمارے لوگ” ایئرکنڈیشنڈ لائف “ کو ترک کرنے پر آمادہ ہی نہیں۔آج ہم ایئرکنڈیشنڈ بند کردیں اور قصر صدارت سے لیکر افسران خاص تک تمام کے تمام گھروں سے یہ برق خور مشینیں اٹھالی جائیں تو بجلی کے بحران کو فی الفور کافور کیا جاسکتا ہے ۔لیکن قوم اور حکمران سب ایک ہی مرض میں مبتلا ہیں۔تن آسانی‘ ڈنگ ٹپاﺅ پالیسی اور مانگ تانگ کر گزرا!
توانائی کے متبادل ذرائع کے لئے بورڈ بنے‘ایجنسیاں متحرک ہوئیں۔ ونڈ ٹربائن‘ سولر واٹر ہیٹر‘بائیو ڈیزل‘ سب کاغذی منصوبے ثابت ہوئے۔متبادل توانائی بورڈ کے چیئرمین عارف علاﺅ الدین حقائق کی بنیاد پر ثابت کرتے ہیں کہ پاکستان ایسے خطے میں ہے جہاں پر سورج کی شعاعیں سب سے زیادہ وقت موجود رہتی ہیں‘ ہمارے ساحل سمندر پر ایسے بے شمار مقامات ہیں جہاں سال بھر تیز ہوائیں چلتی رہتی ہیں ‘ہماری زمین پر تیل پیدا کرنے والے پودے اور فصلیں بوئی جاسکتی ہیں۔ اگر ایک جھونپڑی میں پانچ ہزار روپے سے سولر سیل لگا کر عمر بھر کے لئے روشنی کی جاسکتی تو یہ کیا جانا چاہیے۔ یہ ”سولرسیل“ مفت بانٹے جانے چاہیں۔ بے نظیر انکم سپورٹ پروگرام‘ بیت المال اور غربت مٹاﺅ سکیمیں۔آخر ہر جھونپڑی والے کو ایک سولر لالٹین کیوں نہیں دیتے‘کم از کم وہ اس کی روشنی میں اپنے دریدہ دامن کو دیکھ تو لے‘مٹیالا پانی پیتے وقت حشرارت الارض کو پھونک ہی مار سکے!
کیا ہم چین سے یہ سستا سا نسخہ بھی حاصل نہیں کرسکتے! افسوس کہ غریبوں کی جھونپڑیوں میں چراغ جلانے کیلئے معمولی سی سرمایہ کاری کے بھی ہم قابل نہیں رہے۔”کک بیک“ کے چکر میں ہم ”بیک ہی بیک“ ہورہے ہیں۔
حکومت کہتی ہے کہ عوام سرمایہ کاری کرے‘ عوام سوچتی ہے کہ یہ کام حکومت کے ہیں۔حکمرانوں کو اطمینان ہے کہ اگر توانائی کا یہ بحران اسی رفتار سے بھی جاری رہے تو بھی ان کے بنگلوں ‘شیش محلوں اور ایوان ہائے اقتدارمیں روشنیاں جگ مگ کرتی رہیں گی۔ ملک بھر اندھیروں میں ڈوب جائے انہیں اس سے کیا ۔چند اور رینٹل پاور پروجیکٹس کرائے پر لے کر کارسلطنت تو چلاتے ہی رہیں گے ۔بحران دراصل توانائی کا نہیں ہماری نیتوں کا ہے۔ ہمارے ارادوں کا ہے اور ہماری فکر ونظر کا ہے۔ اقبال نے کہا تھا‘
ہم کو تو میسر نہیں مٹی کا دیا بھی
گھر پیر کا بجلی کے چراغوں سے ہے روشن
فیصلہ کرنے والے ”پیروں“ کے جب تک عوام کش انداز نہیں بدلتے‘بحران‘ بحرانوں کو جنم دے کر بڑا کرتے رہیں گے۔

قیامت خیز بارشوں نے ریلے کی شکل اختیار کی‘توقع نہ تھی کہ سیلابی ریلے آپس میں مل کر ”طوفان نوح“ بپا کریں گے۔ جانیں تو بچ گئیں لیکن چھت بہہ گئے۔چولہے برتن‘ کپڑے‘ بپھری لہروں نے اچٹ لئے۔گندم ‘اناج‘مرچ‘ مصالحہ سب کچھ ہی تو بہہ گیا۔بہت شور اٹھا۔بین الاقوامی امدادی ٹیمیں پہنچیں۔پاکستان کی ہر سیاسی اور سماجی تنظیم نے امداد کے لئے کیمپس لگائے۔ خوراک تقسیم کی گئی۔ٹینٹس فراہم کئے گئے۔ نقد رقوم بانٹی گئیں لیکن سارے امدادی کام ابھی ادھورے ہی تھے کہ موسم سرما آگیا۔
چار ماہ کوئی مدت نہیں ہوتی‘دعوے یہی تھے موسم سرما سے پہلے پہلے تمام سیلاب زدگان کو گرم کپڑے مل جائیں گے۔سردی سے بچانے کےلئے کمبل دستیاب ہوں گے۔برف باری اور بارشوں سے بچاﺅ کے لئے پکے گھر ہوں گے۔ لیکن ایسا نہیں ہوسکا۔ سیلاب زدگان کو بھوک سے ہی نجات نہیں دلائی جاسکی۔ کجا کہ انہیں پختہ گھروں کی ”عیاشی“ میسر آسکتی۔سردی سے مرنے سے پہلے شائد یہ لوگ بھوک سے مر جائیں۔
اقوام متحدہ کے ادارہ برائے خوراک نے تین ماہ پہلے خبردار کر دیا تھا کہ صوبہ خیبرپختونخواہ ‘پنجاب ‘سندھ اور بلوچستان میںمجموعی طور پر گیارہ ہیکٹر کے رقبہ پر کھڑی فصلیں تباہ ہوچکی ہیں‘بیس لاکھ کے لگ بھگ جانور مر گئے ہیں اور تیس لاکھ کی تعداد میں مرغیاں ضائع ہوگئی ہیں۔فصلوں کی تباہی اور سیلاب زدہ علاقوں میں دوبارہ کاشت نہ ہونے کے سبب قحط سالی کا منظر ہوگا۔اگر بروقت خوراک کا بندوبست نہ ہوا تو خوراک کی شدید قلت سے ہزاروںبچے اور بوڑھے موت کے منہ میں چلے جائیں گے‘جو مرنے سے بچ گئے وہ بھی ہڈیوں کے ڈھانچے بن جائیںگے۔اکتوبر میں پھر وارننگ دی گئی کہ جن ممالک نے امداد کا وعدہ کیا تھا وہ اپنے وعدوں کو ایفا کریں کیونکہ خوراک خریدنے کے لئے اس عالمی ادارے ورلڈ فوڈ پروگرام کے پاس رقم نہیں اور وقت تیزی سے گزر رہا ہے۔اکتوبر میں ہی سندھ حکومت کو سندھی علاقوں سے بے گھر ہو کر شہروں کا رخ کرنے والے لاکھوں پناہ گزینوں کی حالت زار اور خوراک کی روز بروز بڑھتی قلت کے حوالے سے مفصل بریفنگ دی گئی تھی۔ابھی پھر تازہ رپورٹ آئی ہے کہ کم از کم بیس لاکھ افراد ایسے ہیں جنہیں خوراک کی کمی کا شدید خطرہ ہے اور اگر اب بھی امدادی اداروں نے بروقت توجہ نہ دی تو نتائج توقع سے بھی بھیانک نکلیں گے۔
حیرت انگریز خبر یہ ہے کہ صوبہ پنجاب کے گوداموں میں پڑی گندم گل سڑ رہی ہے۔ گندم برآمد کرنے کی اجازت مانگی جارہی ہے۔ خراب ہونے والی ہزاروں بوریاں روزانہ گوداموں سے باہر پھینکوائی جارہی ہیں۔ اس گندم پر ہر روز لاکھوں روپے بینکوںکا سود بھی ادا کیا جارہا ہے۔ کیا سبب ہے کہ صوبائی یا مرکزی حکومت اقوام متحدہ کی اپیل پر کان نہیں دھرتی ۔باوجود یہ کہ ہم اپنے ہم وطنوں کے لئے روٹی بھی غیر ملکی اداروں سے مانگیں اور ان اداروں کے نخرے دیکھیں‘کیا بہتر نہیں کہ اپنے گھر میں پڑی گندم کو ان علاقوں کے مفلوک الحال لوگوں میں تقسیم کردیں۔ اطلاعات یہ ہیں کہ گندم کی آنے والی فصل ”بمپر کراپ“ ہوگی اور گزشتہ برس سے کہیںزیادہ گندم پیدا ہوگی۔ اگر تمام اندازے اور تخمینے اسی صورتحال کی طرف اشارہ کرتے ہیں تو پھر سرکاری سٹوروں میں بھری اس گندم کو صوبہ سندھ‘ بلوچستان اور خیبرپختونخواہ کے بے آسرا لوگوں میں خیرات کر دینے سے کون سی چیز مانع ہے۔
ہمارا میڈیا ہر نئی خبر کی دم پکڑ کر بے سمت دوڑتا ہے۔آجکل ”وکی لیکس“ کے انکشافات امریکہ اور برطانیہ کے اخبارات مسلسل شائع کرکے اپنی گرتی ہوئی سرکولیشن کو سہارا دے رہے ہیں اور ہمارے اخبارات اور ٹی وی چینلز بھی ان جھوٹے اماموں کے پیچھے آنکھیں بند کرکے سربسجود ہوچکے ہیں۔ انہیں خبر ہی نہیں کہ ان کے اردگرد کیا ہورہا ہے۔ گیس کا سلنڈر دو ہزار روپے کو پہنچ چکا ہے ‘پیازاسی روپے کلو ہوگئے ہیں لیکن ہمارے ذرائع ابلاغ کا بڑا حصہ ”روز روشن کی طرح عیاں حقیقتوں کو” انکشافات“ سمجھ کر اپنے قارئین اور ناظرین کے دل و دماغ میں کوٹ کوٹ کر بھر رہے ہیں ۔ ان کا کیمرہ سیلاب زدہ علاقوں کا رخ ہی نہیں کرتا‘ ان کا قلم پاکستان کے بیس لاکھ لوگوں کی بھوک کا تذکرہ ہی نہیں کرتا۔ آخر کوئی توازن‘کوئی انصاف۔ اس غریب عوام کو میڈیاسے توقع تھی کہ وہ ان کے مسائل کو لیکر اٹھے گااور کسی نتیجے پر پہنچنے سے پہلے چھوڑے گا نہیں۔”فالواپ“ کہاں گیا….؟ سیلاب زدگان کو ”وکی لیکس“ کے انکشافات سے کیا لینا۔ وہ سارے جانتے ہیں کہ ہمارے ہاں امریکہ کے کہنے پر ہی حکومتیںآتی اور جاتی ہیں۔ جب اتنی بڑی خبر سے ہم سب واقف ہیں تو پھر اس کی عامیانہ اور بازاری تفصیلات پڑھنے سے کیا ملے گا۔”وکی لیکس“ نے سیلاب زدگان کے حق میں تو کچھ بھی ”لیک“ نہیںکیا۔انہیں تو روٹی چاہیے‘ٹھٹھرتے بچوں کے لئے چھت چاہیے‘ یہ کیا ”وکی لیکس“ کھائیں گے اور انکشافات اوڑھیں گے؟

سابق صدر جنرل (ر) پرویز مشرف کے آٹھ سالہ دور حکومت میںپاکستانی عوام نے جدید روشن خیالی کے نام پر بہت سے ذہنی اور روحانی تازیانے برداشت کئے- اس دور کے سات نکاتی ایجنڈے نے بہت سی امیدیں پیدا کردی تھیں اور بڑے بڑے کرپٹ لوگ ”نیب“ کے ذریعے شکنجے میں کسے بھی گئے ۔پھر یوں ہوا کہ سدا بہار سیاسی نوسربازوں نے چیف ایگزیکٹو کے گرد گھیرا تنگ کرنا شروع کردیا اور چاپلوسی‘ ترغیب حرص وہوس کا ایسا شکنجہ کسا گیا کہ نہ کالا باغ ڈیم بن سکا‘نہ کشمیر مل سکا اور نہ ہی شفاف سیاسی کلچر نصیب ہوسکا۔کوئی جائز وجہ نہیں کہ مشرف کی یادآئے ‘لیکن پھر بھی مشرف کی یادکیوں آتی ہے؟

چینی (شوگر) ایک معمولی سا اشو ہے۔ یہ اسقدر غیر معمولی کیوں بن گیا ہے۔ چینی ہر گھر‘ ہر کچن اور ہر فرد کی ضرورت ہے۔ تھوڑی یا زیادہ ہر ذی روح کو یہ میٹھا اور دانے دار مواد اپنے پیٹ میں اتارنا پڑتا ہے۔یہ کہنا آسان ہے کہ چینی خوری ایک فضول خرچی ہے لیکن طبیب بتاتے ہیں اور راقم خود بھی شعبہ طب سے وابستہ ہے اور جانتا ہے کہ ہر روز ایک خاص مقدار میں چینی انسان کی بنیادی ضرورت ہے۔پھر یہ چینی کہاںچلی گئی۔ پاکستان ایک زرعی ملک ہے اور یہاں گنے کی فصل انتہا کی ہوتی ہے۔ چھ ماہ قبل خوشخبری تھی کہ ملک میںچینی کی بہتات ہے اور اس بہتات کے ہوتے ہوئے سوال ہی پیدا نہیں ہوسکتا کہ کوئی کمی واقع ہوجائے۔ پھر دیکھتی آنکھوں کے سامنے چینی کی قیمت بڑھنا شروع ہوگئی۔ 35روپے سے پچاس روپے‘ پھر پچاس سے ساٹھ اور سو روپے اور یہی چینی ڈیڑھ سو روپے تک فروخت ہوئی صرف ایک ماہ کے اندر چینی کی قیمت چھلانگیں لگاتی اور قلانچیں بھرتی دنیا بھرمیں بلند ترین سطح کو چھونے لگی۔
ملک میں منتخب جمہوری حکومت ہے۔ صدر پاکستان بھی منتخب‘وزیراعظم متفقہ طور پر منتخب‘ وزیراعلیٰ پنجاب جو کہ خادم اعلیٰ کا لقب پسند فرماتے ہیں‘سستی روٹی سکیم سے شہرت پانے والے آہنی ہاتھوں والے شہباز شریف۔ اسمبلیوں کے اجلاس جاری رہے۔ پٹرول ‘ڈیزل کی قیمتیں بڑھیں۔ (ن) لیگ نے قرارداد جمع کرائی۔ اخبارات میں قائد حزب اختلاف نے گرما گرم بیانات داغے لیکن نتیجہ صفر۔ یوں محسوس ہوا کہ قومی اور صوبائی اسمبلیوں میں بیٹھے سب ”خادمین عوام“ دراصل چینی چور ہیں۔ کسی کے بھائی کو لائسنس جاری کیا گیا۔ کسی کے انکل ٹھیکہ لے اڑے۔مل مالکان کا تعلق پنجاب اور سندھ کے حکمرانوں سے ہے۔ سب وہی چینی چور ہیں جنہوںنے پرویز مشرف کے آخری دنوں میںعبوری حکومت کے دوران عوام کی جیبیں کاٹی تھیں سب ایک دوسرے کے رشتہ دار‘ سب ایک دوسرے کے حصہ دار‘ بظاہر پارٹیاں مختلف‘ اندرونُ خانہ ایک…. قبیلہ اور کرتوت…. ایک جیسے!
پنجاب کے حکمران چینی کراچی سے خریدیں گے۔پنجاب کی ملوں‘ ذخیرہ گھروں اور سرکاری سٹوروں پر پڑی چینی کہاں گئی۔ ایک شیطانی گٹھ جوڑ شروع ہوگیا ہے۔چینی کی قیمت ڈیڑھ سو تک لے جا کر سو روپے تک لانے کی سازش تیار۔
بیرسٹر محمد علی سیف انتھک سیاسی کارکن ہیں۔سیاست میں نووارد نہیں بلکہ ”رہنماساز“ قسم کے خاموش سپاہی ہیں۔ایسے اعلیٰ تعلیم یافتہ اور وضع دار نوجوان اصولی سیاست کے دامن میں جڑے چمکدار موتی کی حیثیت رکھتے ہیں۔ جناب راشد قریشی ‘جناب ڈاکٹر امجد اور مشرف کے دوسرے ساتھی خاردار سیاست میں فی الحال کانٹے چننے کے لئے ہمہ تن مصروف ہیں ۔ان کی محنت اپنی جگہ۔یہ ان کی دھڑے بندی ہے۔ تمام تر مخالفتوں‘ آزمائشوں اور طعنوں کے باوجود وہ پرویز مشرف کے نڈر وکیل ہیں لیکن سچ یہ ہے کہ اپنا دل پرویزمشرف کے بارے میں ابھی تک نرم نہیںہے۔
مشرف کو یاد کرنے کی کوئی جائز وجہ نہیں‘اگر دماغ سے سوچوں تو جناب مشرف کی سوچ سے کوسوں دور ہوں لیکن اگر غریب آدمی کی صدا سنوں تو پھر مشرف کا دور یاد آتا ہے اور یہ تسلیم کئے جانے کے سوا کوئی چارہ نہیں کہ کم از کم اس ”فوجی آمر“ کے دور میں غریبوں کویوں مٹیّ کھانے پر مجبور نہیں کیا گیا تھا۔ زندگی اس طرح کبھی تلخ نہیں ہوتی تھی اور والدین کو بچوں کے سامنے تھوڑے سے میٹھے کے لئے ہر روز شرمندہ نہیں ہونا پڑا تھا۔ کاش کہ مشرف چوہدریوں کے ہتھے نہ چڑھتے تو شایدآج بھی حکمران ہوتے!

بات معمولی سی ہے۔دہلی میںمنعقدہ کامن ویلتھ گیمز میں پاکستانی دستے کی قیادت ایک کھلاڑی کر رہا تھا۔ سٹیج سے اس ویٹ لفٹر کھلاڑی کا بار بار نام بھی لیا جارہا تھا لیکن ٹی وی سکرین پر پاکستانی جھنڈا کھیل کے صوبائی وزیر نے تھام رکھا تھا۔سندھ سے تعلق رکھنے والے اس وزیر کو نمایاں ہونے کے شوق نے اس قدر دبوچ رکھا تھا کہ اس نے قائد کھلاڑی کو ایک مرحلہ پر آگے بڑھنے سے زبردستی روک دیا۔ ہزاروں لاکھوں ناظرین نے یہ منظر دیکھا۔ہوسکتا ہے

کہ ٹی وی چینلز نے کیمرہ ٹرک کے ذریعے ایسا منظرتخلیق کیا ہو جس سے وزیر موصوف کے ہاتھ میں جھنڈا دکھایا گیا ہو اور ہوا میںلہراتا ہوا ہاتھ ان کا نہ ہو بلکہ کوئی دستِ غیبی خود بخود نمودار ہوگیا ہو مرکز میں براجمان حکمران جماعت کو شک کا فائدہ دیا جانا چاہیے لیکن دستاویزی ریکارڈ سے بھی یہی حقیقت واضح ہوتی ہے کہ جناب وزیر موصوف نے طے شدہ پروگرام کے تحت اس سنہری موقع سے فائدہ اٹھانے کا فیصلہ کیا تھا اور جو حق پوری دنیا کھلاڑیوں کو دیتی ہے وہ حق بھی پی پی پی کے وزیر اور صدر پاکستان کے قابل اعتماد آدمی نے اپنے نام کر لیا۔گو یہ مالی کرپشن نہیں ہے لیکن بہرحال اخلاقی کرپشن کی ایک قبیح صورت ضرور ہے۔ظاہر ہے وزیر کی اس حرکت سے ہمارے کھلاڑی بھی شرمندہ ہوئے ہوں گے اور ان کا مورال ایسے ہی ڈاﺅن ہوا ہوگا جس طرح جناب زرداری کے دوست اعجاز بٹ صاحب کی منہ زور خواہشوں کے سبب کرکٹ کے کھلاڑیوں کاجذبہ سرد ہوتا ہے۔
ایک اور معمولی سی بات یہ ہے کہ سیلاب کی تباہ کاریاں جب زوروں پر تھیں تو نیویارک سٹاک ایکسچینج نے ہمارے پاکستانی ہائی کمیشن کو اجازت دی کہ وہ مذکورہ سٹاک ایکسچینج کی ویب سائٹ پر سیلاب زدگان کے حالات دکھا کر فنڈز جمع کر لیں۔سٹاک کے ممبران منتظر تھے لیکن جب مقررہ وقت پر ویب سائٹ سامنے آئی تو وہاں سیلاب زدگان کی بجائے قیمتی سوٹوں میں ملبوس ہمارے سفیروں کی تصویریں جھلک رہی تھیں اور سیلاب کے حوالے سے کسی تصویر کا تصور تک نہ تھا۔ یہ بھی خود کو نمایاں کرنے کا ایک سنہری موقع تھا اور ہمارے سفیروں جن میں سے اکثر این۔آر۔او زدہ ہیں اور بڑے صاحب کی قربتیں”انجوائے“ کرتے ہیں نے اپنی تشہیر کے لئے استعمال کیا۔آج تک دفتر خارجہ کی طرف سے اس ”اخلاقی کرپشن“ کی بھی کوئی وضاحت نہیں آسکی !
وزارتوںکاعالم ہی نرالا ہے۔آپ کسی منسٹر کے دفتر چلے جائیں وہاں گیٹ پر کھڑے چوکیدار سے لیکر وزارت کی کرسی تک ہر کوئی ”دیہاڑی“ لگانے میںمشغول ہے۔ خدا جانے اس قدر ہوشیار اور آزاد میڈیا کے ہوتے ہوئے ان بیچاروں کی کوئی دیہاڑی لگ بھی رہی ہے یا نہیں لیکن وزیراعظم ہاﺅس اورپریذیڈنٹ ہاﺅس سے پورے ملک میںمختلف محکموں کے سربراہوں کو دن میںکئی کئی ”اہم ترین کالیں“موصول ہورہی ہیں اور ہر کال کی تان اس پر ٹوٹتی ہے۔”یہ صدر صاحب کا حکم ہے۔ یہ وزیراعظم کا حکم ہے یہ کام ہوجانا چاہیے۔ اسلام آباد کی ایک یونیورسٹی کے ایک ڈائریکٹر کو فون آگیا کہ ”یہ نوجوان بھجوا رہا ہوں‘اس کو سکالر شپ مل جاناچاہیے“۔ میں ایوان صدر سے بول رہا ہوں۔یہ صدر مملکت کا حکم ہے ۔”ڈائریکٹر نے ہمت کرکے کہہ دیا “۔ ”اگر صدر صاحب کا حکم ہے تو تحریری طور پر بھجوا دیجئے کیونکہ میرٹ پر یہ طالب علم سکالر شپ کا اہل نہیں ہے “۔”فون کو ہی تحریر سمجھئے“۔!جواب ملا اور فون بند ہوگیا۔
لوڈشیڈنگ پر اب غصہ نہیں صرف رونا آتا ہے ۔ بے بسی کی ایسی انتہا کسی دور میں بھی دکھائی نہیں دیتی۔ ضروری نہیں کہ ترقی پذیر ممالک میں بنیادی ضرورتیں ہر کسی کو میسر آئیںلیکن موجودہ حکومت کا مزاج ہی انوکھا ہے۔وہ جس قدر اس مسئلہ کو حل کرنے کی کوشش کرتی ہے اسی قدر یہ مسئلہ بگڑتا جارہا ہے۔ رینٹل پاور پراجیکٹس بھی لگ گئے ۔ امریکہ نے بھی مبینہ طور پر بھاری رقوم بھجوا دیں۔دبئی والوں نے بھی پلانٹ ولانٹ بھجوادیا۔لیکن بجلی ہے کہ آتی ہی نہیں ۔موسم سرما میں کھپت ویسے ہی نصف رہ جاتی ہے ۔ڈیم پانی سے لبالب بھرے ہوئے ہیں۔لیکن بجلی نہیں ہے۔ خیال تھا کہ بجلی شائد سستی ہونے کے سبب اخراجات پورے نہیں ہورہے۔اب کی بار جو بل آئے ہیں تولوگوں کے کان تک جلنے لگے ہیں۔ لیکن بل ہے بجلی نہیں ہے! وزیر لوڈشیڈنگ سے لیکر میٹر ریڈر تک سب دیہاڑیوں کے چکرمیں ہیں۔اہلیت اور صلاحیت کی جگہ لالچ ‘حرص اور ہوس نے لے لی ہے۔کوئی ایک بھی ایسا شخص نہیں جو معاملات سلجھانے کا حوصلہ رکھتا ہو!
بظاہر ڈالروں کی بارش ہے۔کیری لوگر بل ‘یو۔ایس۔ایڈ‘ سیلاب فنڈ‘دہشتگردی کیخلاف جنگ لڑنے کے الگ اور بے حساب ڈالرز ۔اخباروں‘بیانوں پر ڈالر ہی ڈالر ہیں۔لیکن یہ سارے ڈالرز جاکہاں رہے ہیں؟ کسی کو کچھ علم نہیں۔کوئی بتانے پر تیار نہیں کہ جب اتنے ڈالر آرہے ہیں تو پھر ہمارا بیچارہ روپیہ روز بروز نیچے کیوں کھسک رہاہے۔خاکم بدین سنتے ہیں کہ آئندہ بجٹ سے پہلے پہلے یہ منحوس ڈالر ہمارے لال رنگ کے ایک نوٹ کو روند چکا ہوگا!
یوں محسوس ہوتا ہے کہ ”گڈگورننس“ کے لئے باصلاحیت لوگوں کی جو تعداد انتہائی ضروری ہوتی ہے وہ بھی موجودہ سیٹ اپ میں دستیاب نہیں۔جب بگاڑ رہی ”گڈ گورننس“ کا نام ہو تو پھر اصلاح احوال کی امید کہاں سے ابھرے۔ پنجاب ہو یا خیبرپختونخواہ ہو ‘بلوچستان اور سندھ ہو یا مرکز …. ہر جگہ قحط الرجال ضربیں کھاتا دکھائی دیتا ہے۔جب اچھے لوگ ہی نہیں تو اچھائی کی توقع کیوں رکھیں!۔

ماضی میں غریب غرباءاپنی غربت اور تنگدستی کو اپنا مقدر سمجھ کر دھیرے دھیرے موت کی طرف بڑھتے رہتے تھے۔بغاوت کا آپشن عام نہیں ہوا تھا۔ یہی وجہ ہے کہ پاکستان میں ساٹھ اور ستر کی دیہائیوںمیں اشتراکی نظریات اپنے تمام تر پرکشش نعروں کے باوجود پاکستانی معاشرے میں جڑ نہ پکڑ سکے اور روس اور امریکہ کے درمیان سرد جنگ نے پاکستانی عوام کو روس سے بڑی حد تک لاتعلق ہی رکھا۔

جناب ذوالفقار علی بھٹو نے عوام کے احساس محرومی کو مقامی رنگ میں ابھار کر امیر اور غریب کے درمیان حائل خلیج میں اپنے سیاسی بیڑے کو اتارا اور کسی خونی خانہ جنگی کے بغیرکامیابی کے ساحل پر اتر گئے ۔وقتی طور پر محروم طبقوں کی زبان بندی ہوگئی لیکن بھٹو کے روٹی‘کپڑے اور مکان کے نعرے نے غریبوں کے اندر یہ احساس ضرور پیدا کردیا تھا کہ غربت ان کا مقدر نہیں بلکہ اُمراءکی طرف سے مسلط کردہ ایک نظریہ ہے۔تعلیم کے عام ہونے اور ذرائع ابلاغ کے آزاد ہونے کے سبب بھی ایک بنیادی تبدیلی آئی۔ہوسکتاہے کہ اس تبدیلی کے بارے میں خود ذرائع ابلاغ کو بھی علم نہ ہو۔اسلامی عقائد کی تشریح اور قرآنی آیات کی تفسیر عام ہوئی اور وسائل کی تقسیم کے حوالے سے غلط مذہبی تصورات کو بہت بڑا دھچکا لگا۔ طبقہ اشرافیہ کے بارے میں پھیلائے جانے والے احترام بھرے عقائد باطل ثابت ہوئے اور حقوق کے قرآنی تصور نے پاکستانی عوام کے اندر بغاوت کے جواز کا راستہ بنا لیا۔ حقیقت بھی یہی ہے کہ ریاست کے وسائل کی تقسیم تمام شہریوں میں برابر تقسیم کرنے کا مطالبہ عین اسلامی ہے اور اگر ایک طبقہ ان وسائل پر قابض ہو کر پچانوے فیصد شہریوں کے لئے غربت اور تنگدستی کاسامان کرے تو پھر ایسے طبقوں سے اپنے حقوق چھین لینا بھی ایک جہاد ہے۔
پاکستان میں رائج معاشی نظام کا حاصل یہی ہے کہ مخصوص طبقہ بسیار خوری جبکہ محروم طبقہ بھوک سے مر رہا ہے۔جاگیردار اور سرمایہ دار طبقہ نے قومی دولت لوٹنے کے نت نئے طریقے اختیار کئے اور عوام کے ووٹوںکو محض اپنی لوٹ مار کے تحفظ کے لئے استعمال کیا ہے۔
اگر طالبان کی تحریک محدود مذہبی نظریات کی بجائے اسلام کے معاشی نظام کی بنیاد پر آگے بڑھتی تو پاکستان کے نوے فیصد لوگ ان کو خوش آمدید کہتے اور اب تک پاکستان میں واقعتاً انقلاب برپا ہوچکا ہوتا۔پاکستان میںغربت کا عالم یہ ہے کہ آپ چند ہزار روپے کے عوض کسی بھی نوجوان کو خودکش بمبار بنانے پر آمادہ کرسکتے ہیں ‘کوئی صحت مند شخص محض پچاس ہزار روپے کے عوض اپنا گردہ بیچ سکتا ہے اور تنگدستی کے ہاتھوں تنگ آئے کسی پاکستانی کو اپنے بچوں کو زہردینے میں ہچکچاہٹ محسوس نہیں ہوتی۔
لوڈشیڈنگ کےخلاف مظاہرہ ہو تو نوجوان تشدد پر اتر آتے ہیں‘بیکریاں اور جنرل سٹور لوٹے جاتے ہیں اور طبقہ امراءسے وابستہ ہرنشانی جلا کر راکھ کر دی جاتی ہے۔کراچی میں آپ تھوڑے سے پیسوں کے عوض قاتل بھرتی کرسکتے ہیں۔پنجاب کے گبھرو نوجوان گھر کا چولہا جلانے کے لئے غیر ممالک کی سرحدوں کو پار کرتے ہوئے گولیوںکانشانہ بنتے ہیں لیکن پھر بھی موت کی طرف ہجرت جاری ہے۔ کرغیزستان سے بچ کر آنے والے پاکستانی سٹوڈنٹس نے محض اس غرض سے وطن چھوڑا کہ یہاں وہ بھاری تعلیمی اخراجات برداشت کرنے سے قاصر تھے۔ ان کے گھروں کی تصویریں دیکھ کر اندازہ ہوجاتا ہے کہ انہوںنے اسلامی جمہوریہ پاکستان کی حدود سے باہر قدم کیوں رکھا تھا۔
پاکستان میں حکمران طبقہ میں واحد ایک حکمران ہے جس کو امیر اور غریب کے درمیان بڑھتی ہوئی خلیج کے خطرناک نتائج کا ادراک ہے۔جناب شہبازشریف شروع دن سے طبقہ امراءکو بار بار آگاہ کر رہے ہیں کہ اگر محروم عوام کی داد رسی نہ ہوئی تو انقلاب سب کچھ بہا کر لے جائے گا۔ بے روزگار نوجوانوں میں زرعی اراضی کی تقسیم جیسے تمام اقدامات دراصل اسی خوف کے تحت اٹھائے گئے ہیں۔
چند روز قبل لاہور کے ایک رکشہ ڈرائیور نے اپنی بچیوں کو زہردے کر خود بھی زہر کھا لیا تھا۔وزیراعلیٰ پنجاب جناب شہبازشریف نے بچ جانے والی ماں اور اس کے بچوں کو دس لاکھ روپے کی گرانٹ کا اعلان کیا اورمفت تعلیم کی نوید سنائی ۔ ہم یقین سے کہہ سکتے ہیں کہ اگر خودکشی کرنے والے رکشہ ڈرائیور کو اس کی زندگی میں پانچ لاکھ روپے مل جاتے اور اسے کسی بہتر روزگار پر لگا دیا جاتا تو شائد آج دس لاکھ دینے کی ضرورت نہ پڑتی۔
انفرادی خیرات کرنے سے غربت دور ہونہیں سکتی جب تک حکومتیں اپنے اللے تللے ترک نہیں کرتی اور حکمران طبقہ کی ضرورت سے زائد دولت عوام کے اندر گردش نہیں کرتی تب تک عوام کے احساس محرومی میں کمی نہیں آئے گی۔ عوام کو دال ملتی رہے تو شائدحکمرانوں کے مرغی کھانے پر اعتراض نہ ہو لیکن جب کثیر آبادیوں میں فاقے ہوں اور طبقہ اشرافیہ فائیو سٹار زندگی کے مزے اڑا رہا ہو تو پھر خودکش بمبار اور خودکشی کرنے والوں کی تعداد میں اضافہ ہوگا۔ محرومی کا احساس بغاوت بنے گا اور مقدر والی دلیل اس بغاورت کا راستہ نہیں روک سکے گی۔یہ بغاوت بھیانک شکل میں سامنے آرہی ہے۔ خونی انقلاب دستک دے رہا ہے!

یہ کیسی بدنصیبی ہے کہ تاریخ انسانی کا بدترین سیلاب بھی پاکستانی سیاستدانوں کو متحد نہیںکرسکا۔ یہ کیسی مٹی کے بنے ہوئےلاجز خالی ہوجانے چاہیں تھے ۔ اپنے حلقوں میں جا کر ہمدردی کے دو بول ہی بول دیتے۔ لوگ ان سے کھانے کوسونے کے نوالے اور رہنے کو محل تھوڑا ہی مانگ رہے ہیں۔بھوکے ہیںان کی بھوک بانٹ لو‘کھلے آسمان تلے ان کی بے بسی میں حصے دار بن جاﺅ۔ کسی ڈوبتے بوڑھے کی طرف کوئی ہوا بھری ٹیوب پھینک کر اسے بچالو‘ ملیریا سے تڑپتے کسی معصوم کی پیشانی پرشفقت بھرا ہاتھ ہی رکھ دو۔

لیکن یہ کیسے عوامی نمائندے ہیں جو اپنی بڑی بڑی کوٹھیوں میں مرغن افطاریاں اڑانے میں مشغول ہیں۔ ان کی ایک ماہ کی تنخواہیں کاٹی گئیں اور ہر پارٹی کے رکن نے جا کر وزیراعظم سے شکوے کئے ”سائیں یہ تو ظلم ہوا“۔ وزیراعظم اور صدر اپنے وزراءاور مشیروں کو دھکے دے کر نکالتے ہیں کہ سیلاب زدہ علاقوں میں جاﺅ لیکن یہ عجیب مخلوق ہیں کہ راستے سے ہی بھاگ آتے ہیں۔ جو بہت متحرک ہیں وہ بھی زیادہ سے زیادہ کسی بند پر تھوڑی دیر ٹھہر کر تصویر بنواتے اور ثبوت کے طور پر یہ تصویر وزیراعظم کے پرسنل سٹاف کو پہنچا کر مطمئن ہوجاتے ہیں کہ ڈیوٹی ادا ہوگئی۔ چند ایک تین یا چار ایم این اے اور ایم پی اے کو چھوڑ کر باقی سب ہاتھ پہ ہاتھ دھر ے محومنتظرفردا بیٹھے ہیں۔”فوج ہے نا“ یہ ہے وہ مختصر سا جواب جو ہمارے سیاستدانوں کے لبوں پر اٹھکیلیاں کرتا سنائی دیتا ہے۔
افواج پاکستان کا کردار بلاشبہ قابل تعریف ہے۔اس بے رحم سیلاب سے لوگوں کے مال و جان کو بچانے کےلئے آرمی‘نیوی اور ایئرفورس کمال سرعت کے ساتھ تیز پانیوں میں اتری ہوئی ہے لیکن ہماری سیاسی قیادتوں کو احساس نہیں کہ افواج پاکستان کا بہت بڑا آپریشنل حصہ مختلف فوجی مہمات میں پھنسا ہوا ہے۔ مشرقی سرحدوں سے مکمل طور پر فوج کو واپس بلایا نہیںجاسکتا اور مغربی سرحدوں سے امریکہ اور طالبان ہمیں ہٹنے نہیں دے رہے۔ ایک طرف دو کروڑ سے زائد پاکستانی زندگی کی سانسیں بحال رکھنے کی کشمکش میںمبتلا ہیں اور دوسری جانب امریکی محکمہ خارجہ کی جانب سے ”ڈومور“ کی رٹ برقرار ہے۔ عالمی مالیاتی ادارے سوائے زبانی جمع خرچ کے کچھ کرنے پر تیار نہیں”کرپشن“ کا بہانہ بنا کر مٹھی بھینچ لی ہے۔ جو کرپشن گزشتہ اڑھائی برس میں امریکیوں کو دکھائی نہیں دی وہ سیلاب میں اچانک نقاب اتار کر سامنے آگئی ہے۔ یو ایس ایڈ والے بھی اپنی مدد کو ”شفافیت“ سے مشروط کر رہے ہیں جبکہ اس وقت تو ہر صاحب ثروت کو لوٹانے کی دوڑ میں سبقت لے جانے کی کوشش کرنی چاہیے کیونکہ یہ وقت امتحان ہے۔سیلاب زدگان کیلئے صبر کا امتحان اور باقیوں کے لئے شکر کا۔ بقول شاعر
اب وقت ہے پیچ وخم دستار کو بدلو
اخلاق کو عادات کو اطوار کو بدلو
بدلو گے تو بچ جاﺅ گے تم قہر خدا سے
اڑ جائیں گے یہ ریگ محل ورنہ ہوا سے
جو کچھ بھی ضرورت سے زیادہ ہے لٹا دو
ٹل جاتی ہیں آفات غریبوں کی دعا ہے
افغانستان میں خود مالی کرپشن کے عالمی ریکارڈ کرنے والے امریکی اداروں کو شرم تک نہیں آتی۔ ہمارے سیاستدان بغلیں بجا رہے ہیں ”واہ جی واہ۔زرداری کی وجہ سے امداد نہیں مل رہی۔دنیا کو اعتبارہی نہیں“۔ پھرکس پر اعتبار ہے؟نوازشریف کے قرض اتارو ملک سنوارو پروگرام پر اعتبار ہے ؟ ایم کیو ایم کے مبینہ بھتہ خوروں پر اعتبار ہے؟ جمائما خان سے رقم ہتھیا کر سینکڑوں ایکڑ اراضی پر فارم ہاﺅس بنا لینے والے شخص پراعتبار ہے؟ ڈیزل چوری کرنے والے مولاﺅں پر اعتماد ہے؟کس پر اعتبار ہے؟
افسوس کہ یہ وقت باہمی انتشار کا نہیں اتحاد و یکجہتی کاہے۔ تصور کریں اس بدنصیب باپ کا جس کا گھر سیلاب میں بہہ گیا ہے اور وہ اپنی جوان بیٹیوں کو ہجوم سے چھپاتا پھرتا ہے لیکن چھت ہے نہ دیوار۔خوراک کے لئے ٹرک کے پیچھے بھاگ رہا ہے‘ صاف پانی کی بوندوں کو نگاہیں ترس گئیں‘بیٹی کے پاس بدلنے کو کپڑے تک نہیں‘ حبس بدبو اور بے یقینی…. سیاستدانو! خدارا اپنی کچھاروں سے باہر نکلو‘ بڑے بڑے محلات میں ان پردہ دار گھرانوں کو چند دن مہمان ہی رکھ لو۔ یا ان کے ملیا میٹ ہوجانے والے دیہاتوں اور شہروں کے قریب ٹینٹ ویلج‘کوئی سایہ ‘کوئی سائبان ‘کچھ تو کرو۔ فوج کو پھنسانے کی کوشش کرو گے تو خود بھی گردنوں تک دھنس جاﺅ گے۔ فوج کو پکارنے اور دھتکارنے والے دونوں گروہ انجانے میں اپنی سیاسی موت کو دعوت دے رہے ہیں۔اب کی بار فوج آئی تو نائن زیرو بچے گا نہ رائے ونڈ کا محل‘منصورہ محفوظ رہے گا نہ بلاول ہاﺅس۔ فضل الرحمن کا جبہ ہوگا نہ سرخ پوش پختون…. بس فوج ہوگی اور صرف فوج!
ہمارے ٹی وی اینکر اپنی بچگانہ حرکتوں اور طفلانہ شرارتوں سے ابھی تک باز نہیں آرہے۔وہ الطاف حسین کے بیان کو لیکر چائے کی پیالی میں طوفان اٹھا رہے ہیں اور سیاستدان جنہیں اپنے عقل وشعور پر بہت ناز ہے وہ سدھائے ہوئے شکار کی طرح ان پروگراموں میںشریک ہورہے ہیں۔ہونا تو یہ چاہیے تھا کہ سیلاب زدگان کی مدد کے لئے ایک اجتماعی شعور پیدا کیا جاتا۔قوم کے اندر خودی اور خودداری کی روح پھونکی جاتی لیکن عملاً سیلاب زدگان کی مظلومیت اور حکومت کی غیر مقبولیت کو ایک دوسرے سے گتھم گھتا کراکے ٹی وی چینلز روزانہ تماشا لگاتے ہیں۔ میر میراثی اور پیشہ ور نوحہ خواں سورج ڈھلتے ہی ٹی وی سکرینوں پر قابض ہو کر قوم کے مورال کو سیلاب میں بہانے کی واردات کرتے ہیں….!
تمہارے اندر انتشار ہے لیکن سیلاب زدگان یکسو ہیں کہ جب انہیں مدد کی ضرورت ہے اس وقت میڈیا اور سیاستدان ان کی عزتیں اچھالنے اور بربادیاں”انجوائے“ کرنے میں مشغول ہیں۔!سنو‘سنو قرآن کی آواز سنو۔ اللہ تعالیٰ نے آپ جیسے انسانوںپر اپنے احسانات گنوانے کے بعد فرمایا ہے‘”تم لوگ گھاٹی عبور نہیں کرسکے اور گھاٹی کیا ہے‘ نجات دلانا اور قحط کے دنوں میںقرابت دار یتیم ‘خاک گزیدہ محتاج کو کھانا کھلانا“۔

یہ کیسی بدنصیبی ہے کہ تاریخ انسانی کا بدترین سیلاب بھی پاکستانی سیاستدانوں کو متحد نہیںکرسکا۔ یہ کیسی مٹی کے بنے ہوئے لوگ ہیں۔ انہیں انسانیت کا دکھ نہ سہی اپنے ووٹروں کا ہی احساس ہوجانا چاہیے تھا۔ منسٹر کالونی‘ ایم این اے ہاسٹلز اور پارلیمنٹ لاجز خالی ہوجانے چاہیں تھے ۔ اپنے حلقوں میں جا کر ہمدردی کے دو بول ہی بول دیتے۔ لوگ ان سے کھانے کوسونے کے نوالے اور رہنے کو محل تھوڑا ہی مانگ رہے ہیں۔

بھوکے ہیںان کی بھوک بانٹ لو‘کھلے آسمان تلے ان کی بے بسی میں حصے دار بن جاﺅ۔ کسی ڈوبتے بوڑھے کی طرف کوئی ہوا بھری ٹیوب پھینک کر اسے بچالو‘ ملیریا سے تڑپتے کسی معصوم کی پیشانی پرشفقت بھرا ہاتھ ہی رکھ دو۔ لیکن یہ کیسے عوامی نمائندے ہیں جو اپنی بڑی بڑی کوٹھیوں میں مرغن افطاریاں اڑانے میں مشغول ہیں۔ ان کی ایک ماہ کی تنخواہیں کاٹی گئیں اور ہر پارٹی کے رکن نے جا کر وزیراعظم سے شکوے کئے ”سائیں یہ تو ظلم ہوا“۔ وزیراعظم اور صدر اپنے وزراءاور مشیروں کو دھکے دے کر نکالتے ہیں کہ سیلاب زدہ علاقوں میں جاﺅ لیکن یہ عجیب مخلوق ہیں کہ راستے سے ہی بھاگ آتے ہیں۔ جو بہت متحرک ہیں وہ بھی زیادہ سے زیادہ کسی بند پر تھوڑی دیر ٹھہر کر تصویر بنواتے اور ثبوت کے طور پر یہ تصویر وزیراعظم کے پرسنل سٹاف کو پہنچا کر مطمئن ہوجاتے ہیں کہ ڈیوٹی ادا ہوگئی۔ چند ایک تین یا چار ایم این اے اور ایم پی اے کو چھوڑ کر باقی سب ہاتھ پہ ہاتھ دھر ے محومنتظرفردا بیٹھے ہیں۔”فوج ہے نا“ یہ ہے وہ مختصر سا جواب جو ہمارے سیاستدانوں کے لبوں پر اٹھکیلیاں کرتا سنائی دیتا ہے۔
افواج پاکستان کا کردار بلاشبہ قابل تعریف ہے۔اس بے رحم سیلاب سے لوگوں کے مال و جان کو بچانے کے لئے آرمی‘نیوی اور ایئرفورس کمال سرعت کے ساتھ تیز پانیوں میں اتری ہوئی ہے لیکن ہماری سیاسی قیادتوں کو احساس نہیں کہ افواج پاکستان کا بہت بڑا آپریشنل حصہ مختلف فوجی مہمات میں پھنسا ہوا ہے۔ مشرقی سرحدوں سے مکمل طور پر فوج کو واپس بلایا نہیںجاسکتا اور مغربی سرحدوں سے امریکہ اور طالبان ہمیں ہٹنے نہیں دے رہے۔ ایک طرف دو کروڑ سے زائد پاکستانی زندگی کی سانسیں بحال رکھنے کی کشمکش میںمبتلا ہیں اور دوسری جانب امریکی محکمہ خارجہ کی جانب سے ”ڈومور“ کی رٹ برقرار ہے۔ عالمی مالیاتی ادارے سوائے زبانی جمع خرچ کے کچھ کرنے پر تیار نہیں”کرپشن“ کا بہانہ بنا کر مٹھی بھینچ لی ہے۔ جو کرپشن گزشتہ اڑھائی برس میں امریکیوں کو دکھائی نہیں دی وہ سیلاب میں اچانک نقاب اتار کر سامنے آگئی ہے۔ یو ایس ایڈ والے بھی اپنی مدد کو ”شفافیت“ سے مشروط کر رہے ہیں۔ افغانستان میں خود مالی کرپشن کے عالمی ریکارڈ کرنے والے امریکی اداروں کو شرم تک نہیں آتی۔ ہمارے سیاستدان بغلیں بجا رہے ہیں ”واہ جی واہ۔زرداری کی وجہ سے امداد نہیں مل رہی۔دنیا کو اعتبارہی نہیں“۔ پھرکس پر اعتبار ہے؟نوازشریف کے قرض اتارو ملک سنوارو پروگرام پر اعتبار ہے ؟ ایم کیو ایم کے مبینہ بھتہ خوروں پر اعتبار ہے؟ جمائما خان سے رقم ہتھیا کر سینکڑوں ایکڑ اراضی پر فارم ہاﺅس بنا لینے والے شخص پراعتبار ہے؟ ڈیزل چوری کرنے والے مولاﺅں پر اعتماد ہے؟کس پر اعتبار ہے؟
افسوس کہ یہ وقت باہمی انتشار کا نہیں اتحاد و یکجہتی کاہے۔ تصور کریں اس بدنصیب باپ کا جس کا گھر سیلاب میں بہہ گیا ہے اور وہ اپنی جوان بیٹیوں کو ہجوم سے چھپاتا پھرتا ہے لیکن چھت ہے نہ دیوار۔خوراک کے لئے ٹرک کے پیچھے بھاگ رہا ہے‘ صاف پانی کی بوندوں کو نگاہیں ترس گئیں‘بیٹی کے پاس بدلنے کو کپڑے تک نہیں‘ حبس بدبو اور بے یقینی…. سیاستدانو! خدارا اپنی کچھاروں سے باہر نکلو‘ بڑے بڑے محلات میں ان پردہ دار گھرانوں کو چند دن مہمان ہی رکھ لو۔ یا ان کے ملیا میٹ ہوجانے والے دیہاتوں اور شہروں کے قریب ٹینٹ ویلج‘کوئی سایہ ‘کوئی سائبان ‘کچھ تو کرو۔ فوج کو پھنسانے کی کوشش کرو گے تو خود بھی گردنوں تک دھنس جاﺅ گے۔ فوج کو پکارنے اور دھتکارنے والے دونوں گروہ انجانے میں اپنی سیاسی موت کو دعوت دے رہے ہیں۔اب کی بار فوج آئی تو نائن زیرو بچے گا نہ رائے ونڈ کا محل‘منصورہ محفوظ رہے گا نہ بلاول ہاﺅس۔ فضل الرحمن کا جبہ ہوگا نہ سرخ پوش پختون…. بس فوج ہوگی اور صرف فوج!
ہمارے ٹی وی اینکر اپنی بچگانہ حرکتوں اور طفلانہ شرارتوں سے ابھی تک باز نہیں آرہے۔وہ الطاف حسین کے بیان کو لیکر چائے کی پیالی میں طوفان اٹھا رہے ہیں اور سیاستدان جنہیں اپنے عقل وشعور پر بہت ناز ہے وہ سدھائے ہوئے شکار کی طرح ان پروگراموں میںشریک ہورہے ہیں۔ہونا تو یہ چاہیے تھا کہ سیلاب زدگان کی مدد کے لئے ایک اجتماعی شعور پیدا کیا جاتا۔قوم کے اندر خودی اور خودداری کی روح پھونکی جاتی لیکن عملاً سیلاب زدگان کی مظلومیت اور حکومت کی غیر مقبولیت کو ایک دوسرے سے گتھم گھتا کراکے ٹی وی چینلز روزانہ تماشا لگاتے ہیں۔ میر میراثی اور پیشہ ور نوحہ خواں سورج ڈھلتے ہی ٹی وی سکرینوں پر قابض ہو کر قوم کے مورال کو سیلاب میں بہانے کی واردات کرتے ہیں….!
تمہارے اندر انتشار ہے لیکن سیلاب زدگان یکسو ہیں کہ جب انہیں مدد کی ضرورت ہے اس وقت میڈیا اور سیاستدان ان کی عزتیں اچھالنے اور بربادیاں”انجوائے“ کرنے میں مشغول ہیں۔!سنو‘سنو قرآن کی آواز سنو۔ اللہ تعالیٰ نے آپ جیسے انسانوںپر اپنے احسانات گنوانے کے بعد فرمایا ہے‘”تم لوگ گھاٹی عبور نہیں کرسکے اور گھاٹی کیا ہے‘ نجات دلانا اور قحط کے دنوں میںقرابت دار یتیم ‘خاک گزیدہ محتاج کو کھانا کھلانا“۔

روزہ کھلنے میں ابھی چالیس منٹ باقی ہیں لیکن مسجد نبوی کے ہر حصے میں نمازی افطار کی تیاریوں میں مصروف ہیں۔ ہر شخص اپنے ساتھ کچھ نہ کچھ افطاری لا رہا ہے جسے دروازوں پر کھڑے ہوئے دربان چیک کرتے ہیں۔کھجوریں‘قہوہ‘جوس کے ڈبے اندر لانے کی اجازت ہے۔سموسوں اور پکوڑوں کی ممانعت ہے۔ یہ پابندی اس لئے عائد ہے کہ مسجد میں گندگی نہ پھیلے۔ تھرموس میں اگر قہوہ ہے تو آپ اسے لے جاسکتے ہیں لیکن دودھ والی چائے پر دربان اعتراض کرتے ہیں۔

لوگ صفوں پر پتلی پلاسٹک بچھا لیتے ہیں تاکہ کھانے پینے کی چیزوں سے قالین خراب نہ ہوں۔ میں مسجد نبوی کے ایک دروازے پر کھڑا یہ منظر دیکھ رہا ہوں۔ اس دوران میری نظر اچانک مسجد نبوی کے باہر کے فرش کی طرف اٹھتی ہے تو کیا دیکھتا ہوں کہ جنت البقیع قبرستان والے حصے میں جو دکانیں ہیں ان کے دکاندار پلاسٹک کے بڑے بڑے رول کھول کر اسے سنگ مرمر کے فرش پر بچھا رہے ہیں بالکل ایسا ہی منظر ہے جیسے گھریلو دعوتوں میں ہوتا ہے کہ لوگ سفید چاندنی پر دسترخوان والا کپڑا پھیلا دیتے ہیں تاکہ سفید چاندنی پر کوئی داغ نہ پڑے۔ادھر پلاسٹ بچھی ادھر ایک صاحب ان پر کھجوروں کے پیکٹ ترتیب سے رکھنے لگے ایک دوسرے صاحب آئے انہوں نے پلاسٹک پر ایک ایک روٹی رکھنی شروع کردی۔ سامنے والی دکان سے ایک صاحب کئی کارٹن ایک ہاتھ گاڑی میں لے کر آئے اور انہوں نے ہر روٹی کے ساتھ دہی کا ایک ڈبہ رکھنا شروع کردیا۔ دوسری طرف پلاسٹک بچھانے والے باہر کے مختلف حصوں میں اپنا کام کر رہے ہیں۔ مسجد نبوی کے باہر کھڑا حیران ہورہا ہوں کہ افطاری کا اہتمام تو ہورہا ہے لیکن روزہ دار کہاں ہیں۔ کیا دیکھتا ہوں کہ لوگ مختلف اطراف سے آنے لگے اور فرش پر بچھے ہوئے دسترخوانوں پر بیٹھنا شروع کردیا۔ ایک جانب کا حصہ خواتین نے سنبھال لیا ہے ۔ جیسے جیسے افطاری کا وقت قریب آرہا ہے لوگ بھی دسترخوانوں پر بیٹھتے جارہے ہیں۔مختلف لوگ تھیلوں میں‘ڈبوں میں اور ٹوکریوں میں کھانے پینے کی مختلف چیزیں لے کر آرہے ہیں اور روزہ داروں کے سامنے رکھتے جارہے ہیں ۔ یہ وہ حضرات ہیں جو ثواب کی خاطر روزہ داروں کو فی سبیل اللہ افطاری پیش کررہے ہیں۔ میں خاموش کھڑا لوگوں کے اس ایمانی جذبے کو دیکھ رہا ہوں کہ کتنے خوش قسمت ہیں یہ لوگ مسجد نبوی میں روزہ کھولنے والوں کی خدمت کر رہے ہیں۔ میں یہ سوچ ہی رہا تھا کہ ایک صاحب نے میرے ہاتھ میں کھجوروں کے دو چھوٹے پیکٹ اور جوس کا ایک ڈبہ تھما دیا۔ میںنے کچھ کہنا چاہا تو وہ افطار افطار کرتے ہوئے آگے بڑھ گئے۔ روزہ کھلنے میں اب صرف دس منٹ باقی رہ گئے ہیں میرا ارادہ مسجد کے اندر روزہ کھولنے کا تھا لیکن باہر کا منظر اخوت‘ بھائی چارہ سخاوت اور اسلامی اقدار کا ایسا روح پرور نظارہ پیش کررہا تھا کہ میں نے بھی باہر بچھی ہوئی پلاسٹک پر عوامی انداز میں روزہ افطار کرنے کا فیصلہ کیا۔قریب ہی بچھی ہوئی پلاسٹک پر میں بیٹھا ہی تھا کہ سامنے والی صفوں پر ایک ہنگامہ برپا ہوگیا جسے دیکھ کر میں اپنی سنجیدگی برقرار نہ رکھ سکا اور بے اختیار ہنسی چھوٹ گئی۔ ہوا یہ کہ کوئی صاحب جوس کے ٹین والے ڈبے کئی کارٹنز میں لے کر آئے اور لوگوں میں بانٹنے کی بجائے انہوں نے یہ کارٹنز ایک خالی جگہ پر رکھ دیئے تاکہ لوگ اپنی خود پسند کے جوس کا ڈبہ اٹھا لیں۔ ان کا فیصلہ تو مناسب تھا لیکن لوگ ان ڈبوں پر اس طرح جھپٹے کہ دیکھتے ہی دیکھتے ان ڈبوں کے حصول کے لئے جم غفیر جمع ہوگیا اور ایسی چھینا چھپٹی ہوئی کہ تو یہ ہی بھلی۔ کسی کے ہاتھ ایک ڈبہ آیا اور کوئی دو دو لے کر چلتا بنا۔ تین منٹ کے بعد ایک صاحب شربت کی بھری ہوئی بالٹی لے کر آئے اور کاغذ کے گلاسوں میں شربت بانٹنا شروع کردیا۔ غرض روزہ افطار سے دو تین منٹ پہلے تک افطاری بانٹنے کا سلسلہ جاری رہا۔ جو لوگ باہر روزہ کھولنے کی بجائے اندر مسجد میں جارہا تھے کہ انہیں صفوں میں بیٹھے ہوئے افراد چاہے وہ عرب ہوں ‘ایرانی ہوں‘سوڈانی ہوں‘یمنی ہوں‘ پاکستانی یا بھارتی ہوں بڑی محبت سے آواز دے کر اپنے پاس روزہ کھولنے کی دعوت دے رہے تھے۔ اس قسم کے ایمانی مناظر خانہ کعبہ میں بھی دیکھنے میں آتے ہیں۔افطاری کی چیکنگ کا یہاں بھی وہی نظام ہے جو مسجد نبوی میں ہے۔موذن کی آواز کے ساتھ ہی گولے بھی چھوڑے جاتے ہیں۔ اذان کے بعد تقریباً پندرہ منٹ کا وقفہ دیا جاتا ہے۔ میں نے اندازہ لگایا ہے کہ اس وقفہ میں روزہ دار افطاری کے ساتھ ساتھ اگر کھانا بھی کھانا چاہیں تو آسانی سے کھا سکتے ہیں۔ سب سے حیرت انگیز چیز میں نے مسجد نبوی اور حرم شریف میں یہ دیکھتی کہ لاکھوں افراد افطاری کے بعد ان ہی پندرہ منٹ میں صفوں کی صفائی بھی کر لیتے ہیں صفوں پر بچھی ہوئی پلاسٹک میں بچی ہوئی چیزیں لپیٹ کر قریبی پڑے ہوئے ڈرمز میں ڈال دیتے ہیں یا اپنے پاس رکھ لیتے ہیں تاکہ نماز کے بعد باہر جاتے ہوئے ان چیزوں کو ڈرمز میںڈال دیں۔ صفائی کا عمل روزہ داروں اور خدمت پر مامور افراد کی جانب سے اس تیز رفتاری کے ساتھ ہوتا ہے کہ یہ محسوس ہی نہیں ہوتا کہ یہاں کچھ دیر پہلے لاکھوں افراد کھا پی رہے تھے۔میں نے اس بات پر بہت غور کیا کہ اگر عام حالات میں کسی دعوت میں صرف ایک ہزار افراد کے کھانے کے بعد صفائی کا عمل شروع کیا جائے تو مکمل صفائی کے لئے کافی وقت درکار ہوگا مگر یہ اللہ کی برکتیں ہیں کہ اذان اور نماز کے وقت کے وقفہ میں صرف پندرہ منٹ کے اندر مکمل صفائی کردی جاتی ہے۔روزہ افطار کرنے کے مناظر جہاں اسلامی روایات کی عکاسی کرتے ہیں وہاں ہمیں زندگی میں ڈسپلن ‘ بھائی چارہ اور محبت کا درس بھی دیتے ہیں گو ہمارے ہاں بھی یہ عمل جاری ہے لیکن ہمارے ہاں افطاری بھیجنے کا رواج مساجد میں ہے اور وہ بھی زیادہ تر جمعرات اورجمعہ کے روز افطاری بھیجی جاتی ہے۔کاش ہم بھی مسجد نبوی اور حرم شریف میں رائج اسلامی اقدار کو اپنے معاشرہ میں عام کریں اور مساجد میں افطاری بھیجنے کے ساتھ ساتھ اپنی گلی محلے اور علاقے کے غریب غربا افراد تک افطاری پہنچانے کی عادت کو اپنا کر لوگوں کی دعائیں بھی لیں اور ثواب دارین بھی حاصل کریں۔

مغرب میں مشرق کی بیٹی سعیدہ وارثی اگر کھوکھلی شخصیت کی مالک ہوتیں تو اپنے ماضی کے سارے حوالے بھول بھال کر یورپ کے رنگ میں رنگی جاچکی ہوتیں۔ نہ انہیں پاکستان یاد ہوتا نہ وہ پاکستانی خواتین کی فلاح و بہبود کیلئے ”سویرا فاﺅنڈیشن“ کی بنیاد رکھتیں نہ وہ گوجرخوان کی ثناءخواں بنتی اور نہ ہی بیول کے ببول انہیں یاد رہتے۔
سعیدہ تو پیدا ہی برطانیہ میں ہوئیں۔ وہ پیدائشی طور پر برطانوی ہیں۔ ان کی تعلیم وتربیت اور پرورش و پر داخت بھی یورپ کے مرکز و محور میں ہوتی رہی۔ ہمارے پاکستانی نوجوان یہاں پیدا ہوتے ہیں ۔بیس بائیس برس کی بہاریں لوٹتے ہیں اور جب انہیں یورپ کا ویزا ملتا ہے اور وہاں روشن دنوں کی تلاش میں سرگرداں ہوتے ہیں تو اپنا آپ ہی بھول جاتے ہیں۔

صفدر حسین ایک مزدور تھے ایسے پڑھے لکھے بھی نہیں تھے۔کسی شہر سے تعلق نہیں بلکہ گوجرخان کے ایک دیہات میں جوان ہوئے۔ رعنائیاں اور رونقیں نصیب میں نہیں تھیں۔غربت اور افلاس نے جب دھاوا بولا تو ”روشن دنوں“ کی تلاش میں برطانیہ جاپہنچے۔ یہ بات بھی خود سعیدہ وارثی نے بتائی۔ بغیر کسی شرمندگی کے بتائی۔ اپنے ماضی کے کسی باب کو چھپایا نہیں۔ صفدر حسین کی بیٹی ایک مزدور کی بیٹی ہونے پر فخرکا اظہار کرتے ہوئے بتاتی ہیں کہ ان کے والد نے ایک مل میں مزدوری کرنا شروع کردی۔ مزدوری کا یہ عمل کئی برسوں پر محیط ہے ۔صفدر حسین کا حسن یہ کہ انہوں نے اپنی بیٹیوں کو اپنے ماضی سے جوڑے رکھا۔ اولاد کو ”مغرب زدہ“ نہیں ہونے دیا۔ برطانوی معاشرے کی اچھائیوں کو اپنانے کی ترغیب دی اور برائیوں سے بچنے کا حوصلہ بخشا۔ حافظ قرآن سعیدہ اپنی پانچ بہنوں کے ساتھ مغرب کے اندر مشرق کی بیٹی بن کر آگے بڑھتی رہی۔
سعیدہ کی سعادت مندی کہ انہوں نے چالیس برس بعد برطانیہ کی حکمران پارٹی کی چیئرپرسن شپ اور حکومت میں وزارت کا عہدہ پانے کے بعد سرکاری حیثیت میں اپنے پہلے دورہ کے لئے بھی پاکستان کو ہی منتخب کیا۔ وہ شلوار قمیض میںملبوس عام پاکستانی خواتین کی طرح دکھائی دیں۔”میرا یہ پاکستانی لباس یورپ میں فیشن بن جائے گا“ انہیں اپنی وضع قطع پر کس قدر فخر ہے!
ہمارے ڈرامہ نگار اور پروڈیوسرز جدیدیت کے نام پر تنگ جینز پہنے ہوئے شرم و حیا سے عاری اداکاراﺅں کی منڈی سجاتے ہیں۔پاکستانی ڈرامے دیکھ کر یوں محسوس ہوتا ہے کہ پورا پاکستان ننگا ہو چکا ہے ۔انہیں سعیدہ وارثی جیسی بیٹی دکھائی نہیں دیتی۔ٹی وی میڈیا صرف عورت کی ”نسوانیت“ مارکیٹ کرنے میںمصروف ہے۔ مشرق نے سعیدہ جیسی بیٹیاں بھی پیدا کی ہیں۔ ان کی سوچ اور ان کا لباس آخر غالب کلچر کیوں نہیں بن پارہا۔ محترمہ بے نظیر بھٹو شہید نے عوامی سیاست میں آنے کے بعد اپنے سر سے کبھی چادر نہیں اتاری تھی ۔آخر وہ بھی تو آکسفورڈ کی پڑھی ہوئی اور امیر ترین حکمران کی بیٹی تھیں۔قائداعظمؒ کی بہن مادر ملتّ نے کب دوپٹہ اتارا تھا؟ افسوس کہ خودی اور خودداری کے احساس کو ہمارے دماغوں سے زبردستی کھرچا جارہا ہے۔
سعیدہ وارثی نے اپنے گاﺅں میں اپنے لوگوںکے درمیان جاکر بڑی خوبصورت باتیں کیں۔”پاکستان میں ایک مثبت اور انقلابی تبدیلی لانا ناممکن نہیں اگر پاکستان کے حکمران اور عوام اسلامی احکامات اور تعلیمات کی روشنی میں تمام فیصلے کریں تو تبدیلی جلد ہی ممکن ہوسکتی ہے۔ اگر میں مسلسل محنت اور جدوجہد سے اس مقام پر پہنچ سکتی ہوں تو پھر دوسرے پاکستانی یہ سب کچھ کیوںنہی کرسکتے۔“
مجھے ذاتی طور پر سعیدہ وارثی پر فخر ہے کہ میرا تعلق بھی گوجرخان سے ہے ۔ میں نے سعیدہ کے گھر جا کر وہاں ان کے عزیز واقارب کے خیالات براہ راست سنے۔ ایک قومی اخبار ان خیالات اور تاثرات کو رنگین ایڈیشن میں شائع کرچکا ہے۔سچ یہ ہے کہ گوجر خان ہی نہیں پوری پاکستانی قوم نے سعیدہ وارثی سے اچھی امیدیں وابستہ کر رکھی ہیں۔
سعیدہ وارثی کی سعادت مندی کی یہ انتہا ہے کہ انہوں نے خود آگے بڑھ کر پاکستان کے حوالے سے بعض ذمہ داریاں اپنے سر لے لی ہیں۔ ”میرے علاقے کے لوگ مجھ سے بہت توقعات رکھتے ہیں۔ میری ذمہ داری ہے کہ میں پاکستان اور برطانیہ کو قریب تر لاﺅں“۔برطانیہ جیسے ملک میں بھارتی لابی بہت مضبوط ہے اور کشمیر کے معاملے پر دس برس قبل تک برطانیہ کا موقف پاکستان کے موقف سے قریب تر تھا لیکن اب برطانیہ کے پالیسی ساز اداروں میں بھارتی لابی نے اپنے رنگ جمانے شروع کردیئے ہیں۔ پاکستان کی خوش نصیبی کہ اسے سعیدہ وارثی جیسی سفارتکار مل رہی ہیں۔ اب انگلینڈ میں اسلام آباد کی خوبصورت آواز سنائی دےتی رہے گی!