سوات کے بعد جنوبی وزیرستان میں بھی فوجی آپریشن کامیابی کے ساتھ خاتمے کے قریب ہے۔ کرم اور خیبر ایجنسی میں بھی شدت پسندوں کا خاتمہ کیا جارہاہے۔ بظاہر یہ معلوم ہوتا ہے کہ فوجی آپریشنز کی کامیابی سے ملک کے اندر شدت پسندوں کا خاتمہ ہوجائے گا اور یوں اس ملک کو طالبانائزیشن اور دہشتگردی سے نجات مل جائے گی۔

سوات میں آپریشن راہ نجات کے بعد امید یہی تھی کہ اب کم از کم وادی سوات اور دیر میں دہشتگردی کا کوئی واقعہ نہیں ہوگا لیکن نہ صرف یہ کہ عید کے تیسرے روز اے این پی کے ممبر صوبائی اسمبلی کو خودکش حملے میں اڑا دیا گیا بلکہ پشاور کچہری کے اندر خون کی ہولی کھیلی گئی۔ بچے اور عورتیں ناحق جاں بحق ہوئے۔ راولپنڈی پریڈ لین میں بھی دہشتگردوں کا اصل ٹارگٹ مسجد میں نماز ادا کرتے فوجی افسران کے بچے تھے جن کو بچاتے ہوئے جنرل عمر بلال سمیت انتہائی قیمتی افسران شہید ہو گئے۔ ابھی پریڈ لین مسجد کے اندر خون دھویا بھی نہیں جاسکا تھا کہ ملتان کے اندر دہشت و بربریت کا مظاہرہ ہوگیا۔ ایم کیو ایم کے قائد نے شہداءکے لئے بروقت سوگ کا اعلان کیا۔لاہور اور ڈیرہ غازی خان میں بھی ظلم ہوا۔ متحدہ کے رہنماﺅںنے شہدا کی قبروں پر پھول چڑھائے اور یہ سلسلہ ابھی جاری ہے۔ کچھ علم نہیں یہ حروف شائع ہونے تک خدانخواسطہ پھر کونسی قیادت ڈھائی جاچکی ہو۔
کیا ہم بحیثیت قوم یہ سوچ کر کہ دہشتگردی کے واقعات غیر ملکی طاقتیں کرا رہی ہیں مطمئن ہو کر بیٹھ جائیں ۔ یاہم یہ سمجھ کر خوش ہوجائیں کہ قبائلی علاقوں میں محض چند ایک لوگ ایسے ہیں جو کہ پر تشدد کارروائیوں میںملوث ہیںاور فوجی آپریشنز سے یہ ”مٹھی بھر لوگ“ ختم ہوجائیںگے۔ اگرایسا ہے تو پھر جنوبی وزیرستان کے چپے چپے پر فوج کا مکمل کنٹرول ہوچکا ہے۔ لیکن یہ دہشتگرد کہاں سے آرہے ہیں؟ اگر یہ محض کسی ایک قبیلہ سے تعلق رکھنے والے گنے چنے افراد ہیں تو اب تک ہزاروں دہشتگرد مارے جاچکے ہیں آخر ان کا خاتمہ کیوں نہیں ہوتا۔ ہمیں یہ مان لینا چاہیے کہ نائن الیون کے بعد امریکہ نے بغیرسوچے سمجھے محض اپنی طاقت کے زعم میں افغانستان پر یلغار کردی اور سابق صدر پرویز مشرف نے اس یلغار میں غیر مشروط حمایت کرکے امریکی مخالف تمام طاقتوں‘جذبوں اور سوچوں کوپاکستان اور پاکستانی افواج سے ٹکرانے کا راستہ دے دے۔ آج بھی ہم ہر طرح کی وضاحتیں دینے کے باوجود قوم کے ایک کثیر حصے کو یہ یقین نہیں دلا سکے کہ دہشتگردی کے خلاف جنگ میں امریکہ کا ساتھ دے کر ہم امریکہ کی نہیں اپنی جنگ لڑ رہے ہیں۔ یہی وجہ ہے کہ جونہی پاکستان کے اندر کوئی خودکش حملہ ہوتا ہے تو عوام جہاں دہشتگردوں کو بددعائیں دیتے ہیں وہیں امریکہ کو بھی کوستے ہےں۔
ہمیں یہ حقیقت قبول کر لینی چاہیے کہ ہم جن کو چند ایک طالبان‘ دہشتگرد‘شدت پسند‘انتہا پسند کہہ کرپہاڑ کو رائی بنانے کی خواہش پال رہے ہیں وہ چند ایک نہیں۔ پاکستانیوں کا ایک بہت بڑا حصہ امریکی مخالف جذبات میں بہہ کر ان طالبان کا درپردہ معاون بن چکا ہے۔
امریکہ نے واضح اعلان کردیا ہے کہ وہ 2011ءکے بعد افغانستان میں نہیں رہے گا۔ بعض تجزیہ نگاروں کا کہنا ہے کہ وہ 2011ءسے ایک سال پہلے ہی یہاں سے فارغ ہوجائے گا۔امریکہ رہے یا جائے پاکستان کی سیاسی قیادتوں پر فرض عائد ہوتا ہے کہ مسئلہ کا سیاسی حل تلاش کرنے کے لئے قبائلی عوام کو شدت پسندوں سے علیحدہ کیا جائے۔بات چیت پر تیارطالبان رہنماﺅں کو بھی اعتمادمیں لیں۔ ہم نے آپریشنز کرکے دیکھ لئے لیکن جوںجوں آپریشنز کا دائرہ وسیع ہوتا جاتاہے توں توں دہشتگردانہ کارروائیاں بڑھتی جارہی ہیں۔
جنرل حمید گل اور عمران خان طالبان سے مذاکرات کے لئے خود کو سامنے لائے ہیں۔چونکہ ان رہنماﺅں کی سیاسی حیثیت مسلمہ نہیں ہے اس لئے ان کی بات شائد وہ اثر نہ دکھا سکے جس کا حالات کاتقاضا کرتے ہیں۔ جناب الطاف حسین آج کل نہ صرف کراچی بلکہ لاہور‘گلگت اور بلتستان میں بھی مقبولیت حاصل کر رہے ہیں۔ انہوںنے حال ہی میں ملک بھر کے تمام علماء سے خطاب کرکے مذہبی قوتوں کا اعتماد بھی حاصل کر لیا ہے۔کراچی جو کہ متحدہ کا ”ہوم گراﺅنڈ“ ہے وہاں اڑتیس لاکھ کے لگ بھگ پٹھان بہن بھائی بستے ہیں۔ یقینا ان میں قبائلی علاقوں کے بھی بہت سے لوگ ہوں گے ۔ کیا ایسا ممکن نہیں ہے کہ متحدہ کوئی ایسی راہ نکالے کہ ”طالبان“ تشدد کی راہ چھوڑ کر سیاسی عمل میں حصہ دار بن سکیں۔
مجھے یقین ہے کہ جناب الطاف حسین کی شخصیت میںوہ کرشمہ دکھائی دیتا ہے کہ اگر وہ ارادہ کر لیں تو بظاہر بہت ہی ناممکن کام ممکن بن سکتا ہے۔ پاکستان کو خانہ جنگی والی صورتحال سے بچایاجاسکتا ہے۔

دنیا پر غالب سرمایہ دارانہ نظام نے متوسط طبقہ کو نچوڑ کر رکھ دیاہے۔ روٹی‘ کپڑا اور مکان کی عدم دستیابی نے پہلی دنیا سمیت ساڑھے چھ ارب انسانوں کو بے چین کررکھا ہے۔ بنیادی ضرورتوں سے محروم لوگ یورپ کے ہوں ‘ امریکی ریاستوں میں بستے ہوں‘

افریقی ہوں‘ ایشیائی ہوں یا مشرق بعید میں مشقت کرتے ہوں اس دن کے منتظر ہیں جب دولت چند ہاتھوں سے نکل کر عوام الناس کی رگوں میںخون بن کر دوڑے گی اور ورکنگ کلاس کو ان کی کارکردگی اور صلاحیت کے مطابق معاوضے ملنا شروع ہوں گے۔ انسانی خوشحالی کی منزل اسی عہد میںحاصل ہوگی جس دور میں ارتکاز دولت کا شیطانی کھیل ختم ہوگا ورنہ امیر ملکوں کے اجلاسوں کے دوران ہزاروں اور لاکھوں لوگ مظاہرے کرتے رہیں گے جلاﺅ گھیراﺅ ہوتا رہے گا اور متوسط طبقہ خط غربت پر پہنچ کر کسی بڑے عالمی خونی انقلاب کا ایندھن بن جائے گا۔

پاکستان کی بڑی سیاسی جماعتوں میں پاکستان پیپلزپارٹی غریبوں کے نام پروجود میں آئی تھی۔آج کی پی پی پی میں غریبوں کی نمائندگی صرف گلی محلہ تک محدود ہوگئی ہے۔ ان کا کام صرف قطاروں میں لگ کر ذوالفقار علی بھٹو شہید اور محترمہ بے نظیر بھٹو شہید کے نام پر ووٹ ڈالنا رہ گیا ہے۔ پی پی پی کی حکومت بن گئی لیکن غریب اور متوسط طبقہ کی بڑے ایوانوںمیں موجودگی ایک خواب بن گیا۔ کراچی سے خیبر تک اور خضدار سے گلگت تک جتنے منتخب نمائندے وزراءاور مشیر منظر پر چھائے ہوئے ہیں ان میں نام کی حد تک بھی متوسط گروہ کی کوئی حیثیت نہیں ہے۔پارٹی قیادت سے لے کر حکومتی قیادت تک سب کے سب لوگ چند گھرانوں اور چند گروہوں کے لوگ ہیں۔یہی وجہ ہے کہ بے نظیر انکم سپورٹ پروگرام کے تحت اربوں روپے تقسیم کئے جانے کے باوجود غربت کی شرح میں روز بروز اضافہ ہورہا ہے اور معاشرے کی جان مڈل کلاس بے آس ہو کر رہ گئی ہے۔

پاکستان مسلم لیگ (ن)خودکو دوسری بڑی سیاسی جماعت تصور کرتی ہے لیکن پارٹی کی حالیہ تنظیم نو میں متوسط طبقے کے کسی شخص کوکوئی نمایاں پوزیشن نہیں دی گئی۔ ایک خاندان اور اس خاندان کے متموّل وفادار لوگوں کو ہی آگے لایا گیا ہے۔پنجاب میں اکثریت ان عہدیداروں کی ہے جو معروف معنوں میں شائد جاگیردار اور وڈیرے نہ ہوں لیکن دولت مندی اور سیاسی سوچ کے اعتبار سے ان کا شمار بحر صورت طبقہ اشرافیہ میںہی ہوتا ہے۔ حد یہ ہے کہ پنجاب مسلم لیگ (ن) کی باگ دوڑ جناب شہبازشریف کے سپرد کرکے انہیں چیف آرگنائزر مقررکر دیا گیا ہے۔ پوری سیاست ایک فیملی افیئر بن کر رہ گیا ہے ۔متوسط طبقہ اپنی استعداد اور تعداد کے حوالے سے روز بروز کم ہورہا ہے۔وہ لوگ جو اپنی سفید پوشی اور نیک سیرتی کے سبب اپنی ایک ساکھ اور پہچان رکھتے ہیں‘غربت کی اتھاہ گہرائیوںمیں گم ہورہے ہیں۔ معاشرتی توازن اور قومی ترقی کا ضامن یہ سفید پوش طبقہ معاشی مجبوریوں اور سیاسی محرومیوں کے سبب حکومتی اور ریاستی امور سے لاتعلق ہوتا جارہاہے۔

جہاں تک مذہبی سیاسی جماعتوں کا تعلق ہے۔ان کے نزدیک شائد انسانوں کا معاشی اور سماجی مسئلہ کوئی مسئلہ ہی نہیں ہوتا۔ ان کی سیاست کا محور چند غیر انسانی قسم کے اشوز ہوتے ہیں اور وہ جذباتی نعروں اور استحصالی نظریوں کی بنیاد پر تحریکیں اٹھاتے‘حکومتیں گراتے اور لوگوںکو ہیپناٹائز رکھتے ہیں۔اسلام اور قرآن کے حقیقی تقاضوں اور بشریت کے لئے خدا کی طرف سے جاری ہونے والے احکامات کی طرف رجوع ہی نہیں کرتے۔ عوام الناس کو صرف” گو امریکہ گو“ اور ”آ امریکہ آ“ کے گورکھ دھندے میں الجھائے رکھتے ہیں۔ انسان کی بنیادی ضرورتیں‘ معاشی اور تہذیبی ارتقاءکے مطالبے ان کے نزدیک غیر شرعی قرار پاتے ہیں۔ ان کے اسلام اور شریعت کی جھلک اہل سوات نے سزا کے طور پر بھگتی ہے۔حیرت انگریز المیہ یہ کہ ان جماعتوں کے سرگرم کارکنوں کا کثیر حصہ مڈل کلاسیوں پر ہی مشتمل ہوتا ہے۔ خدا جانے کب یہ جماعتیں اسلام کے معاشی نظام کی طرف توجہ دیں گے!

متحدہ قومی موومنٹ گزشتہ تیس برس سے متوسط طبقہ کی سیاست کر رہی ہے۔ اس سیاسی جماعت کی پہلی دہائی تشدد کا شکار رہی ہے لیکن گزشتہ بیس برس سے انہوں نے اقتدار کے ایوانوں میں قدم رکھا ہے۔ اسے حسن اتفاق کہیے یا پاکستان کی خوش قسمتی کہ متحدہ کا کارکن اور قائد دونوں کا تعلق غریب اور متوسط طبقہ سے ہے۔ متحدہ کے سیاسی انداز سے اختلاف کیا جاسکتا ہے لیکن اس کے سیاسی نظریے سے اس لئے اختلاف ممکن نہیں کہ انہوں نے ایوان ہائے اقتدار میں جن لوگوں کو نمائندگی کا حق دیاہے وہ وزارتیں اور مشاورتیں نبھانے کے باوجود وڈیرے اور جاگیردار نہ بن سکے۔آج بھی صوبہ سندھ کے اکثر حق پرست ایم پی اےز بسوں پر سفر کرتے اور ان کی میٹنگز کا مینیو چائے سموسے تک ہی محدود رہتا ہے۔

متحدہ نے اپنے سیاسی مزاج میں جاگیردارانہ اور سرمایہ دارانہ سوچ کو ابھی تک گھسنے نہیں دیا اور آج ان کی ہر لیول کی سیاسی قیادتیں کسی ایک خاندان یا کسی ایک علاقے یا گروہ تک محدود نہیں ہیں۔پارٹی اور عوامی خدمت کے لئے جو جس قدر متحرک ہے اسی قدر اس کی سیاسی حیثیت بھی تسلیم ہوتی ہے۔

کیا متحدہ اپنے اس سیاسی فلسفہ کو ملک بھر کے سفید پوش طبقوں کو متحرک کرنے کے لئے کار آمد بناسکے گی؟ کیا اس ملک کے مڈل کلاسیئے کبھی متحد ہوسکیں گے۔؟

متحدہ قومی موومنٹ کے دامن میں ایسے ہیرے بھی ہیں کبھی سوچا نہ تھا۔شائد سوچ کا دائرہ متعصب حدوں میں محدود ہی رہتا اگر مجھے تواتر کیساتھ شہر قائد آنے کا موقع نہ ملتا۔آج کا کراچی وہ نہیں جہاں سے فقط مار دھاڑ اور فرقہ وارانہ تشدد کی خبریں موصول ہوتی تھیں۔

نہ ہی یہ وہ کراچی ہے جہاں کبھی بمبئی کی طرز پر مافیا نے پنجے گاڑ رکھے تھے اور کاروباری لوگ وہاں سے بھاگ جانے میں ہی عافیت محسوس کرتے تھے۔ نہ یہ وہ منی پاکستان ہے جس میں ٹریفک دوپہر کے وقت جام ہوتا تھا تو شہریوں کو رات سڑکوں پر ہی گزارنا پڑتی تھی۔ اکتوبر 2005ءکو شہر کراچی نے اپنے ایک ایسے فرزند کو اپنے معاملات سونپے جو کسی وڈیرے یا جاگیردار کے گھرپیدا نہیں ہوابلکہ ورکنگ اورمڈل کلاس کا چشم وچراغ ہے۔ ابتدائی تعلیم کراچی سے حاصل کی ‘ملائشیا سے گریجوایشن کی ‘پھر وسائل مجتمع کرکے انگلینڈ سے ایم بی اے کی ڈگری لی اور اپنے قائد جناب الطاف حسین کے حکم پر واپس کراچی آکر پاکستان کے سب سے بڑے اور بگڑے ہوئے شہر کو سنوارنے کا حلف اٹھایا۔

36سالہ سید مصطفی کمال نے اہل کراچی کو ایک نئی سوچ دی۔ کراچی سب کا ‘سب کراچی کے “۔ملکیت کا خوبصورت احساس۔شہریوں کو طبقہ‘علاقہ‘زبان‘ سیاست سب سے بالاتر ہو کر اپنے شہر کا خود مالک بننا ہے۔ اسے بنانے‘ سنوارنے‘ اٹھانے اور بڑھانے کے لئے اپنے وقت میں سے وقت دینا ہے۔اپنے فکر میں سے فکر دینی ہے اور اپنے حسنِ اخلاق میں سے خوبصورتی منتقل کرنا ہے۔

نوجوان میئر نے بڑی مستعدی سے اپنے اردگرد بہترین انسانی سرمایہ جمع کر لیا۔ اپنے مزاج کے مطابق اپنی ٹیم کا انتخاب کیا‘ عمل کی تڑپ دیکھی اور فیلڈ میں اتار دیا۔ جس ملک میں گورنس کے خواب دیکھتے عوام کی آنکھیں تھک گئی ہوں وہاں گڈ گورنس کو ایک معجزہ ہی کہا جاسکتا ہے۔ سچ یہی ہے کہ متحدہ کے اس کارکن نے کراچی میںمعجزہ کر دکھایا ہے۔ یہ احساس اس وقت اور پختہ ہوا جب ملک کی اعلیٰ عدالت کے ایک جج نے گڈ گورنس کی مثال کے طور پر کراچی کا حوالہ دیا تھا۔

شہر کی صفائی کا منصوبہ ہو‘ سیوریج کا معاملہ ہو‘ ٹریفک کا مسئلہ ہو‘ امن وامان کی بات ہو یا شجرکاری کا مرحلہ ۔ مصطفی کمال اور ان کے کونسل ناظمین جب کوئی فیصلہ کر لیتے ہیں ‘ پورا اترے ہیں۔ حق پرستوں کی اس حق پرستی کے ناقدین بھی گواہ ہیں اور آج جب میں کراچی کی سڑکوں پر باآسانی اور بہ روانی گاڑی چلائے جارہا ہوں تو میرے دل سے سید مصطفی کمال کے لئے دعائیںنکلتی ہیں۔ کاش کہ یہ شخص ہمیشہ کے لئے اس شہر کو نصیب ہوجائے!

کراچی ہماری قومی معیشت میں ریڑھ کی حیثیت رکھتا ہے۔ یہ پاکستان کا واحد بین الاقوامی شہر ہے ۔ کسی میٹروپولیٹن سٹی کو میٹروپول ہونے اور گلوبل ورلڈ میں شمولیت کےلئے کچھ بنیادی تبدیلیوں کی ضرورت ہوتی ہے۔ شہری منصوبہ بندی‘بیرونی سرمایہ کاری اور اعلیٰ انسانی وسائل۔آج کراچی میں بین الاقوامی سرمایہ کاری کا عمل ایک تسلسل سے آگے بڑھ رہاہے۔ کونسا دن ہے جب بیرون ممالک سے یہاں وفود نہیں آتے اور درجنوں منصوبے ہیں جن میں زرمبادلہ اپنا رنگ بکھیررہا ہے۔سید مصطفی کمال نے کراچی کو دوسرا دبئی بنانے کا جو خواب دیکھا اور دکھایا تھا‘اہل کراچی اس کو پورا ہوتے محسوس کرتے ہیں۔

عالمی شہرت یافتہ رسالے ”فارن پالیسی“ نے کراچی کے میئر کو دنیا کے تین کامیاب ترین میئرز میں دوسرے نمبر پرکامیاب قرار دیا۔”میئر آف دی مومنٹ“ کا خطاب دیا گیا۔ اس اصطلاح کا صحیح مفہوم تو ماہرین ہی بتائیں گے لیکن کراچی کے حالات سے اندازہ ہوتا ہے کہ یہاں کا سٹی ناظم واقعی متحرک ‘ باصلاحیت اور محنتی شخص ہی ہوگا۔

اہل کراچی کو ہی نہیں پاکستان بھر کے عوام کو جناب سید مصطفی کمال کی کاوشوں کو سراہنا چاہیے کیونکہ انہوںنے ثابت کیا کہ تیسری دنیا انسانی جوہر سے خالی نہیں اور نہ ہی پاکستان میں قحط الرجال ہے۔ اصل مسئلہ یہ ہے کہ ایسا سیاسی نظام غالب آئے جہاں حسب ونسب اور دولت وثروت کی بجائے صلاحیت‘ ایمانداری اور سخت کوشی کی بنیاد پر معاشرے کے افراد کو ذمہ داریاں سونپی جائیں۔متوسط طبقہ اگر کسی ملک کی باگ دوڑ سنبھال لے تو پرامن انقلاب برپا ہوسکتے ہیں۔کاش کہ اپنے وطن عزیز میں ایسا ہوسکے۔ میںناگن چورنگی برج کے اوپر سے گزر رہا ہوں۔چلتی ٹریفک اور جگ مگ کرتی گاڑیوں کو دیکھ کر”کراچی کا جمال ۔سید مصطفی کمال“ خود بخود زبان پر آجاتا ہے۔

”ظالمان“ کے ظلم کا شکار ہونے والی زیادہ سیاسی شخصیات کا تعلق عوامی نیشنل پارٹی سے ہے۔مالاکنڈ ڈویژن ‘فاٹا اور پشاور میں اے این پی کا شائد ہی کوئی رہنما ہو جسے بالواسطہ یا بلاواسطہ طور پر ظلم و بربریت کا نشانہ نہ بنایا گیا ہو۔ ایک اندازے کے مطابق اے این پی کی دوسرے اور تیسرے درجے کی لیڈر شپ کا قتل عام کیاگیا ہے۔

کونسا گھر اور کونسا حجرہ ہے جس میں عوامی نیشنل پارٹی کے مقتولوں کے لئے فاتحہ خوانی نہیں پڑھی گئی۔ طالبان نما ظالمان نے اس پارٹی کے مقامی رہنماﺅں کو چن چن کر نشانہ بنایا۔ان کے گھروں پر یلغاریں ہوئیں‘زنان خانوں تک کو آگ لگائی گئی۔ کالج پڑھتے بچے‘ بچوں کو ذبح کردیا گیا۔اے ۔این ۔پی کو خوفزدہ کرنے کے لئے ہر ہتھکنڈہ استعمال کیا گیا۔ دھمکی آمیز خطوط اور فون روزمرہ کا معمول ہے۔ بلکہ پوری اسمبلی کو اڑا دینے کے الٹی میٹم بھی دیئے جاچکے ہیں۔وزیروں کی ہٹ لسٹ جاری کی گئی ہے اور یہ سلسلہ خدا جانے کہاں تک جاری رہے گا۔
بعض وزراءاور ایم پی اے حضرات عالم خوف میں پشاور چھوڑ کر دبئی جا پہنچے۔ کچھ نے ہوسکتا ہے کہ ”ظالمان“ سے اندر کھاتے معافی بھی مانگ رکھی ہو۔لیکن بحیثیت پارٹی اے این پی نے ظلم کے سامنے سرنڈرنہیں کیا۔
آج کل پشاور شہر کے نہتے شہریوں کو نشانہ بنایا جارہا ہے۔ خودکش حملہ آور جب ہائی ٹارگٹ تک نہیں پہنچ پاتا تو پھر وہ سوفٹ ٹارگٹ یعنی عام شہریوں کی جان لینے کو ہی جہاد اکبر سمجھ کر خود کو اڑا دیتا ہے۔انسانی جسموں کے پرخچے اڑتے ہیں‘لاشوں کے ڈھیر لگ جاتے ہیں۔ہسپتالوں میں بستر نہیں ملتا اور مردہ خانوں میں جگہ کم پڑجاتی ہے ۔ پشاور کی تجارتی سرگرمیاں ماند پڑگئی ہیں۔جس شہر میںشیرخوار بچے بارود سے اڑادیئے جائیں وہاں عید کی خوشیاں کون منائے۔مسندِ اقتدار کانٹوں کی سیج نہیں تو اورکیا ہے؟ خوف وزیراعلیٰ ہاﺅس کی بارہ دریوںمیں گردش کرتا ہے۔ناظمین کی حویلیون میں چنگھاڑتا ہے اور شہریوں کے دلوں پر راج کرتا ہے۔
ظالمان نے سوچا ہوگا کہ اے۔این۔پی حزن و ملال میں ڈوب جائے گی اور اس کے رہنماءبھاگ جائیں گے۔اسمبلی ہوگی نہ پولیس ٹھہرے گی اور پشاور پر ظالمان قبضہ کرکے اپنی علیحدہ ریاست کے قیام کا اعلان کردیں گے۔
ایسا نہیںہوا۔ موت کا خوف بجا لیکن انسان پر ایک ایسی کیفیت بھی آتی ہے جب وہ موت پر بھی غالب آجاتا ہے۔ اے این پی جسے مذہبی جماعتیں سیکولر جماعت کا طعنہ دیتی ہیں اس کی قیادت نے بھاگنے کا راستہ نہیں اپنایا بلکہ ڈٹ جانے کی راہ اختیار کی ہے ۔ باچا خان کے پیروکاروں نے ثابت کیا ہے کہ وہ اس ملک یعنی پاکستان کی بقاءکے لئے کسی بھی محب وطن پارٹی سے زیادہ محب وطن ہیں۔ وہ اپنے سیاسی مستقبل کی ہی نہیں بلکہ جانوں کی قربانی بھی دے سکتے ہیں اور ان لوگوں نے ثابت کیا ہے کہ انہیں اپنی دھرتی سے لازوال محبت ہے اور وہ کسی خارجی تحریک کے ہاتھوں اپنے معاشرے کو یرغمال ہونے نہیں دیںگے۔پاکستانیوں کو اور خصوصاً لکھنے والوں کو اے این پی کی اس جانفشانی اور استقلال پر حوصلہ افزائی کرنی چاہیے۔
گزشتہ دنوں پشاور میں پے در پے خودکش دھماکوں کے بعد ذرائع ابلاغ نے جناب بشیر احمد بلور کے تاثرات لئے اوران سے پوچھا کہ اے۔این۔پی کا آئندہ لائحہ عمل کیا ہوگا‘ اس پر بشیر بلور نے جوجواب دیا وہ صوبہ سرحد یا صوبہ پختون خواہ کے لوگوںکی بہادری کا منہ بولتا ثبوت ہے‘
”یہ طالبان اگر ہمارے بچوں کو بھی مار دیں‘ وزیراعلیٰ ہاﺅس پر حملہ کردیں‘ کچھ بھی کریں ہم ان کے سامنے جھکیں گے نہیں‘ عوام کو ان کے حوالے نہیں کریں گے۔“ بشیر بلور کی آنکھوں میں غم کے ساتھ غصہ بھی تھا ان کے لہجے سے عجیب طرح کا عزم مصّمم چھلک رہا تھا۔ میں ان کی گفتگو سنتا رہا ۔مجھے یقین آگیا کہ پٹھان واقعی غیرت مند ہوتے ہیں۔پاکستان اس لحاظ سے بڑا ہی خوش قسمت ملک ہے کہ اسے ورثے میں بہادر لوگوں کی محبتیں ملی ہیں۔ آج جس جذبے کے ساتھ ہماری مسلح افواج شرپسندوں اور دہشتگردوں کی گردنیں ماپ ری ہیں اسی جذبے ‘ہمت اور اخلاقی جرات کا مظاہرہ ہماری سیاسی قیادتوں کی طرف سے بھی دکھائی دے رہا ہے خصوصاً اٹک پار کے پاکستانی اس ملک کی بقاءکی جنگ میں سب سے برتر ثابت ہورہے ہیں!۔

تعریفی اسناد‘امتیازی اعزازات اور سنہری تمغات ہر کامیاب انسان کا حق بھی ہے اور خواہش بھی۔ ہم میں سے ہر شخص چاہتا ہے کہ وہ زندگی کے کسی شعبے میں جب بھی کوئی نمایاں کارنامہ سرانجام دے تو سماج اس کو سراہائے‘ اس کے گلے میں پھولوں کے ہار ڈالے اور اس کے سینے پر تمغے سجائے۔ مردم شناس سوسائٹی کو ایسا کرنا بھی چاہیے۔ اچھائی اور نیکی کے فروغ کے لئے ضروری ہے کہ ہم روشن راہوں کے مسافروں کو ان کے حصے کی پذیرائی دینے میں کنجوسی نہ کریں۔

صالح لوگوں میں سے عظیم ترین وہ لوگ ہیں جو اپنی ذاتی کامیابی کو کبھی ذاتی تصور نہیں کرتے۔ ورنہ حقیقت یہ ہے کہ استنبول شہر کے وسیع وعریض ہال میں عظیم الشان تقریب کے اندر پاکستان کے الشفاءٹرسٹ آئی ہسپتال کو عزت مآب پرنس طلال کی طرف سے یو این او کا جو ایوارڈ دیاگیا وہ خالصتاً اس ٹرسٹ کے صدر جنرل (ر) جہانداد خان کی شخصیت کو دیا گیا ہے۔”اگفنڈ“ کے نام سے یہ وہی ایوارڈ ہے جو بنگلہ دیش کے عالمی شہرت یافتہ بینکار محمد یونس کو بھی دیاگیاہے۔اقوام متحدہ کے ادارے ورلڈ ہیلتھ آرگنائزیشن کے ساتھ ملکر ”عرب گلف فنڈ“ کے منتظمین نے دو برس قبل ایسے لوگوں کا کھوج لگایا جنہوں نے انسانی صحت کے حوالے سے کوئی پراجیکٹ شروع کیا‘اسے عالمی معیار کے مطابق چلا کر دکھایا اور اس کے چلتے رہنے کے لئے مالی اور انسانی وسائل کا بہترین نظام بھی وضع کردیا ہو۔ اسے پاکستان کی خوش قسمتی کہیے کہ تمام تر ریسرچ اور سکروٹنی کے بعد پاکستان بھر میں سے ایک ہی نام سامنے آیا اور وہ بے وسیلہ اندھیری آنکھوں میں روشنیاں لانے والے جہانداد خان ہیں۔
جنرل (ر) جہانداد کسی طور بھی اس اعزاز کو اپنی ذات کے حوالے سے مختص کرنے پر تیار نہیں ہیں۔”میری ذات کی کوئی اہمیت نہیں‘ الشفاءٹرسٹ ہسپتال کا ایک خاکروب بھی اس ایوارڈ کا اتنا ہی حقدار ہے جتنا میں ہوں۔ یہ ڈاکٹروں کی محنت کا ثمر ہے بلکہ سچ یہ ہے کہ الشفاءٹرسٹ کو میں نے کچھ نہیںدیا‘ اس نے مجھے بہت کچھ دیا۔اگر میں یہاں نہ ہوتا تو گھر بیٹھا موت کے فرشتے کا انتظار کررہا ہوتا“ جنرل صاحب نے ”ڈان“اخبار کے رپورٹر کے سامنے اپنے قلبی احساسات بیان کرتے ہوئے کہا۔
میرے کالم نگار دوست بیگ راج نے الشفاءٹرسٹ کو ایسا عالمی ایوارڈ ملنے کی جو وجوہات بتائیں‘میں خود بھی آنکھوں کے اس ہسپتال میں جاکر یہ خوبیاں دیکھ چکا ہوں۔میںنے پہلے بھی اس موضوع پر ایک کالم لکھا تھا اور محترم جنرل (ر)صاحب نے اپنے آفس بلا کر بڑی شفقت سے شکریہ اداکیا تھا۔ اس بڑے آدمی کی ملاقات سے انسان کے اندر امیدیں جاگ اٹھتی ہیں۔
1985ءمیں الشفاءٹرسٹ کی بنیاد رکھی گئی۔پہلا آئی ہسپتال راولپنڈی میں قائم کیا گیا اور اس کے ساتھ ہر صوبے میں ایک معیاری ہسپتال بنانے کا اعلان بھی کیا۔ آج الشفاءٹرسٹ کے چار ہسپتال قائم ہوچکے ہیں۔ سکھر‘کوہاٹ اور مظفرآباد کے ہسپتال دیکھ کر انسان دنگ رہ جاتا ہے کہ کیا پاکستان میں بھی ایسے ادارے قائم ہوسکتے ہیں!۔ہر سال پانچ لاکھ لوگوں کی آنکھوں کا مفت علاج۔یہ کہنا آسان ہے لیکن کرنا شائد جہانداد جیسے لوگوں کاہی حوصلہ ہے الشفاءٹرسٹ ہر ہفتے ایک کروڑ روپے خرچ کرتا ہے جس میں سے ساٹھ فیصد عطیاّت ہوتے ہیں۔ اور عطیات اکٹھے کرنا جان جوکھوں کا کام ہے۔
میں جنرل (ر) جہانداد کو بوڑھا نہیں کہوں گا۔ بوڑھے وہ لوگ ہوتے ہیں جن کے عزم عمر رسیدہ ہوجائیں۔آنکھوں کو روشنی دینے کے اس سفر پر گزشتہ پچیس برس سے مسلسل چلنے والے اس مسافر کو بوڑھاپا دیکھ کر ہی بھاگ جاتا ہوگا۔ جنرل (ر) صاحب نے اپنی کتاب ”Depart With A Smile“ میں اس نقطے کو اپنی ذاتی زندگی کے تجربات کی روشنی میں واضح کیا ہے اور خود کو بوڑھا قرار دے کر زندگی کے فرائض سے الگ ہوجانے والوں کے لئے ایک روشن راہ کی نشاندہی بھی کردی ہے۔”انسان کی زندگی کے تین حصے ہیں۔پہلا سیکھو‘ دوسرا کماﺅ اور تیسرا لوٹاﺅ“ جنرل (ر) صاحب کہتے ہیں کہ اس ملک نے لوگوں کو بہت کچھ دیا ہے۔خصوصاً خوشحال اور دولت مند لوگوں پر فرض ہے کہ وہ زندگی کے تیسرے حصے میں اس وطن کو کچھ نہ کچھ واپس ضرور کریں۔ وہ جس قدر لوٹانے میںمصروف ہوں گے اسی قدر جوان رہیں گے۔ اور جب اس دنیا کو چھوڑیں گے تو ان کے ہونٹوں پر اطمینان کی ایک مسکراہٹ ہوگی۔
اقوام متحدہ کے ادارے کی طرف سے یہ پہلا ایوارڈ ہے جو پاکستان کے کسی آئی ہسپتال کو ملا ہے۔ یہ پورے پاکستان کا اعزاز ہے۔پاکستانی لوگ عظیم کارنامے سرانجام دینے میں کسی سے کم نہیں ہیں۔ کاش کہ اہل بصیرت اور بصارت موت کے وقت مسکرانے کی خواہش پیدا کر لیں اور الشفاءٹرسٹ جیسے بیسیوں ادارے بنا ڈالیں۔جہانداد خان کی طرح روشنی کا سفیر بننا ہی ہماری لائف مشن اسٹیٹمنٹ ہونی چاہیے!

بتایا جارہاہے کہ عراق کے اندر امریکہ کا سب سے بڑا سفارتخانہ ہے جس کی تعمیر پر تقریباً ستر ملین ڈالرز خرچ ہوئے تھے۔اسلام آباد میں امریکی اپنے لئے جو سفارتخانہ بنانے جارہے ہیں اس پر سترملین ڈالرز سے کہیں زیادہ رقم خرچ ہوگی۔ پاکستان میں امریکی سفارتخانہ دنیا کا سب سے بڑا سفارتخانہ ہوگا۔اس کالونی نما سفارتخانے کی حفاظت کے لئے عمارتوں کے اندر ہی ”میرینز“ نہیں ہوں گے بلکہ اسلام آباد کے تمام داخلی و خارجی راستوں اور ہوائی اڈوں پر بھی سیکورٹی کے انتظامات براہ راست امریکیوں کی نگرانی میں چلے جائیں گے۔ ہزاروں کی تعداد میں عملہ کام کرے گا۔امریکیوں کی خوراک اور مشروبات یقینا امریکہ سے درآمد ہوں گی۔البتہ ”ورائٹی“ کی خاطر لوکل مارکیٹ سے بھی فائدہ اٹھایا جاسکے گا۔ کہا جارہا ہے کہ وسیع وعریض سفارتخانے بن جانے کے بعد اسلام آباد کسی بھی غیر ملکی جارحیت سے ہمیشہ کے لئے محفوظ ہوجائے گا اور امریکہ کی دیکھا دیکھی دیگر امیر ممالک بھی پاکستان میں پراپرٹی خریدنے میں دلچسپی دکھائیں گے اور یوں ”فرینڈز آف پاکستان“ اپنی جیبیں ڈھیلی کرنا شروع کردیں گے۔ڈالروں کی ریل پیل ہوگی اور اسلام آباد دبئی بن جائے گا۔ یاد رہے کہ امریکیوں کی متوقع آمد کی اطلاع پا کر مالکان مکانات نے گھروں کے کرائے پہلے ہی دوگنا کردیئے ہیں۔
”بلیک واٹر“ نامی امریکی تنظیم کے بارے میں رپورٹ شائع ہوئی ہے کہ اس تنظیم نے کراچی میں اپنا ہیڈکوارٹر بنا لیا ہے اور ایشیائی ممالک کے اندر اپنی سرگرمیاں تیز کرنے کے لئے ”آن لائن“ فارم کے ذریعے بھرتی شروع کردی ہے۔سرائیکی ‘پشتو‘بلوچی اور اردو بولنے والوں کو بھاری معاوضوں کے عوض بھرتی کیا جارہا ہے یہ لوگ ”مخبری“ کا کام کریں گے اور امریکہ مخالف لوگوں‘تنظیموں‘گروہوں اور جذبوں کی اطلاع دیا کریں گے۔ امریکی ملازمت کے اس سنہری بندوبست کا فائدہ اٹھاتے ہوئے پاکستان کے ہر چغل خور اور مخبر نے فارم بھرنا شروع کردیئے ہیں۔ اطلاعات ہیں کہ اس طرح امریکہ نے پاکستان کے لئے روزگار کے نئے راستے کھول دیئے ہیں۔
اب آپ اپنے ملک میں رہتے ہوئے امریکی نوکری کا لطف اٹھا سکیں گے۔ ویزے کا جھنجھٹ نے ایئر پورٹوں پر جامہ تلاشی۔ اپنے بہن‘بھائیوں کی مخبری کریں‘چھاپے مروائیں ‘گرفتاریاں کروائیں ”بلیک واٹر“ کو ہارڈ ٹارگٹ دیں اور ڈالرز کمائیں۔
”کارپوریٹ فارمنگ“ کے تصور کو عملی جامہ پہنانے کے لئے سعودی عرب سمیت مختلف امیر ممالک کو زرعی رقبے لیز پر دینے کے فیصلے سے خوشحالی قریب آئے گی۔زمینیں لیز پر لینے والے امیر ممالک کے ”شیوخ“ اور ”لینڈلارڈز“ اپنے زیر تسلط رقبوں میں سونا اگانے کے لئے مشینوں کے علاوہ انسان بھی استعمال کریں گے اور ظاہر ہے پاکستان سے سستا انسان کہاں ملے گا۔ اس طرح ”مزدور“ کسانوں کو بہتر اجرت ملے گی۔خدا نہ کرے کہ عرب شیوخ زمینوں کے ٹھیکے یہاں جاگیرداروں کو دے دیں اور غریب کسان دہری چکی میں پسنا شروع ہوجائیں۔ بہرحال امکانات یہ ہیں کہ عربوں کے اونٹ جب پاکستانی خیموں میں مکمل طور پر گھس جائیں گے تو خوشحالی آئے گی۔
وفاقی وزیر خزانہ نے صاف صاف بتا دیا ہے کہ شوگر مافیا سے وابستہ لوگ حکومت اوراپوزیشن بنچوں پر براجمان ہیں اس لئے ان کے خلاف کارروائی کو خارج از امکان ہی سمجھا جائے۔ سپریم کورٹ اور ہائیکورٹ کے واضح احکامات کے باوجود چینی چالیس روپے فی کلو کے حساب سے کہیں فروخت ہوتی نہیں پائی جاسکی۔ یہ سچ ہے کہ سترہ کروڑ عوام کو پانچ سو افراد کے رحم و کرم پر نہیں چھوڑا جاسکتا لیکن یہ پانچ سو افراد اپنے ذیلی اور ضمنی مفادات کو سترہ کروڑ عوام پر قربان کرنے کے لئے تیار نہیں اور سابق صدر مشرف کی طرح انہیںکوئی ڈرا نہیں سکتا۔بلکہ اب تو ان کی حفاظت کے لئے ”بلیک واٹر“ کے دستے بھی دستیاب ہوگئے۔ عدالتیں اور عوام صرف ”حاضر ہو!“ کے واویلے سن سکتی ہےں۔!
امریکی آجائیں ‘سعودی آجائیں ‘دبئی والے چھاجائیں یا فرینڈز آف پاکستان والے گھیرا تنگ کر لیں۔ جو ہوتا ہے ہوجائے‘صرف اتنا کوئی بتا دے کہ پاکستان کی فیصلہ کرنے‘ سوچنے اور بولنے کی خودمختاری کو ”غیروں“ کے ہاتھوں بیچ دینے سے کیا ہم خوشحال ہوجائیں گے؟ کیا خطہ غربت سے نیچے رینگنے والے پاکستانیوں کو بغیرقطار میں لگے دو وقت کی روٹی مل سکے گی؟

یوں محسوس ہوتا ہے کہ مسلم لیگ”ن“ چوٹ لگاﺅ اور بھاگو کے فلسفے پر کاربندہے اور اس جماعت کے شہ دماغ پی پی پی کیخلاف ابھی تک کسی باقاعدہ جنگ کو مناسب خیال نہیں کرتے۔ حالانکہ ”ن“ لیگ کے صف اول کے مجاہدین نے طالبانی انداز میں لانگ مارچ کی دھمکی بھی دے دی تھی۔ لیکن چند روز قبل جناب میاں محمد نوازشریف نے اخباری مالکان اور سینئر صحافیوں کے اعزاز میں دیئے گئے افطار ڈنر کے موقع پر اپنے جن باوضو خیالات کا اظہار کیا اور عمومی سوالات کے جو مصالحانہ جوابات دیئے۔ ان سے ظاہر ہوتا ہے کہ ”ن“ لیگ مشرف کے احتساب کے اشو کو اب مزید آگے بڑھانا نہیں چاہتی اور اس اشو کو مستقبل میں پی پی پی کیساتھ ناراض ہونے کے لئے محض ایک پوائنٹ کے طور پر قابل تذکرہ رکھنا چاہتی ہے۔

ہوسکتا ہے کہ پرویز مشرف نے عہدہ صدارت چھوڑتے وقت جناب آصف علی زرداری اور ان کی پارٹی کے ساتھ جو ”ڈیل“ کی تھی اس سے جناب نوازشریف کو بے خبر رکھا گیا ہو۔اگرچہ یہ ممکن نہیں اور جب میاں نوازشریف بھری بزم میں ایسی کسی ڈیل سے اپنی لاعلمی کا اظہار کرتے ہیں تو ان کا معصوم چہرہ ”تجاہل عارفانہ“ سے مزید معصوم سامن جاتا ہے۔ ہوسکتا ہے کہ میاں برادران کو جنرل پرویز مشرف کی دستربرد سے نکال کر حجاز مقدس لے جانے والے اور آٹھ برس تک ان کی مہمان نوازی کرنے والے سعودی دوستوںنے بھی میاں نوازشریف کو ایسی ڈیل سے بے خبر رکھا ہو۔ یہ بھی ممکن ہے کہ برطانیہ کے وزیرخارجہ ملی بینڈ نے بھی جناب میاں صاحب کو اندھیرے میں رکھا ہو۔ صدر مشرف نے جناب میاں صاحب سے اقتدار چھینا تھا ادھار یا بھیک نہیں مانگی تھی۔وہ ”مواخذے“ کے خوف سے زیادہ اپنے غیر ملکی دوستوں کی ”ضمانت“ پر عہدہ صدارت چھوڑنے پر مجبور ہوئے تھے۔ ان کی الوداعی تقریر اعتراف نہیں بلکہ دھمکیوں سے پر تھی اور انہیں اپنی واپسی کا اتنا ہی اعتماد تھا جتنا آج کل میاں نوازشریف کو اپنے وزیراعظم بننے کا یقین ہے۔
ہمیں میاں صاحب کا یہ جملہ”سعودی عرب کو پاکستانی معاملا ت میں الجھایا نہ جائے“ سن کر تکلیف دہ حیرت ہوئی۔ جو شخص خود سعودی مداخلت یا محبت کے طفیل اٹک قلعے سے نکل کر مسجد نبوی پہنچ گیا اور سعودی مہربانوں کی فراغ دلی کے سبب ہی اسے وطن واپس آنے اور یہاں آکر اپنی پارٹی کو الیکشن لڑنے اور پنجاب میں برادرخورد کی حکومت قائم کرنے کا موقع ملا وہی آج کہتا ہے کہ ”سعودی عرب کو پاکستانی معاملات میں نہ الجھایا جائے“۔ایسی نکتہ آفرینیاں صرف روزوں کی برکت سے ہی ممکن ہےں!
اسلام آباد کے مقامی ہوٹل میں یونائیٹڈ انٹرنیشنل گروپ کی طرف سے افطار ڈنر کا اہتمام کیا گیا تھا۔ گروپ کے چیف ایگزیکٹو جناب میاں شاہد حالات سے نہ گھبرانے والے ایک کامیاب کاروباری شخصیت ہیں بلکہ وہ طبقہ فکر کی نمایاں شخصیات سے تعلقات نبھا نے کا بھی حوصلہ رکھتے ہیں۔افطار ڈنر کیا تھا‘پاکستانی سیاست کے ”عامل پروفیسر“ جناب شیخ رشید احمد‘تھنکرز فورم کے چیئرمین جناب جنرل (ر) اسد درانی ‘قومی اسمبلی میں قائمہ کمیٹی برائے وزارت داخلہ کے جراءت مند چیئرمین جناب سینیٹر طلحہ محمود‘ایئرمارشل (ر) مسعود اورجناب رضاگیلانی سمیت درجنوں اصحاب فکر دانش کی ایک بھرپور محفل تھی۔راقم اس گروپ کے ڈائریکٹر پبلک ریلیشنز کی حیثیت سے ان احباب کو خصوصی دعوت دی تھی۔ جناب شیخ رشید صاحب کو سیاسی باریکیوں کو چند اشاروں ‘کنایوں میں بیان کرنے پر ملکہ حاصل ہے۔ ان کی سیاسی پھلجھڑیاں ‘بعض اوقات بڑے بڑے سیاسی طوفانوں کی پیشگی خبر ثابت ہوئی ہیں۔ انہوں نے میرے ایک سوال کے جواب میں کہا ”میاںنوازشریف ابھی پچھلے سفر کی تھکاوٹ اتار نہیں سکے اور دوسرے سفر کی تیاریاں کر رہے ہیں۔“
سینیٹر طلحہ محمود کو اہم ترین قائمہ کمیٹی کی چیئرمین شپ سنبھالنے کا موقع ملا تو انہوںنے داخلی مگرمچھوں کی کلاس لینا شروع کی۔ اصلاح احوال ایک سست رفتار عمل ہے لیکن خرابیوں اور خامیوں کی بروقت نشاندہی کرنے میں سینیٹر طلحہ محمود نے کبھی غفلت نہیں برتی‘کسی دباﺅ یا لالچ کو خاطر میںنہیں لایا۔انہیں حق ہے کہ وہ اپنی خوبصورت مونچھوں کو اور بھی بلند کریں۔کہنے لگے ” یہ سیاستدان لوگ بھی عجیب الخلقت ہیں۔ لوگوں کے اصل مسائل‘قوم کے حقیقی دکھ اور قوم کی ضروری خودمختاری۔ یہ سارے اشوز نان اشوز بنا دیئے گئے “۔ جنرل (ر) اسد درانی کا اپنا انداز تکلم ہے وہ جچے تلے انداز میں منظم و مربوط تبصرے اور تجزیے کرنے میں مہارت رکھتے ہیں۔
میرے ملک کی سیاست کو صبر کی عادت نہیں رہی۔میاں صاحب کو علم ہے کہ وہ جس ”مائنس وَن“فارمولے کو پروموٹ کر رہے ہیں اس کے روبہ عمل ہونے سے وہ خود بھی مائنس ہوجائیں گے اور ”پلس“ ہونے کے لئے کوئی اور ہوگا!۔

امریکی حکمران بھی عجیب وغریب قسم کے دماغی خلجان میں مبتلا رہتے ہیں۔ امریکہ بہت بڑا ملک ہے۔ باون ریاستیںہیں‘زرخیز زمینیں ہیں‘ بہترین دماغ ہیں۔ اپنے ملک میں رہیں‘ اپنے لوگوںکی صحت اور تعلیم کی سہولتوں میں اضافہ کریں اور خود خوبصورت زندگی بسر کریں اور دنیا کو اپنے نظریات اور روایات کے مطابق زندگی بسر کرنے دیں۔ خدا جانے بیٹھے بٹھائے وہاں کے شہہ دماغوں کو کون سا کیڑا کاٹتا ہے اور ہر دس سال بعد کسی دوسرے ملک پر یلغار کردیتے ہیں۔ اپنے نوجوانوں کا خون بہاتے ہیں‘ اسلحہ پھونکتے ہیں اور لاشیں گراتے‘ ملکوں کو تہس نہس کرتے ہیں۔ جب مرنے مارنے کے عمل سے تھک جاتے ہیں تو پھر باعزت واپسی کے راستے ڈھونڈنے لگتے ہیں بلکہ اکثر ہاتھ باندھ کر ‘منتیں کرکے مجروح ملک سے بھاگ جاتے ہیں۔

آجکل باراک حسین اوبامہ کی قیادت میں امریکی انتظامیہ ایک بار پھر افغانستان سے ”باعزت واپسی“ کے لئے راہیں ڈھونڈ رہی ہے۔ کابل میں ایسی حکومت اورایسے کئی کٹھ پتلی حکمران کی تلاش کی جارہی ہے جو طالبان کے ساتھ صلح کرانے میں مددگار ثابت ہو۔ تاکہ کسی نہ کسی طرح امریکی قوم کو بتایا جاسکے کہ چھ برس تک بم برسانے نہتے افغان عوام کو ہلاکت خیزیوں کے جہنم میں جھونکنے اور دنیا بھر میں اپنی فوجی برتری کا مذاق اڑانے کے بعد بالآخر‘ ”فتح مند“ ہو کر امریکی سورما واپس لوٹ رہے ہیں۔ واشنگٹن میں منتظر گرلز فرینڈز فاتح ہیروز کے گلے میںہار ڈال سکیں۔ حزیمت سے بچ نکلنے کی کوئی راہ ہو‘ کوئی ہمراہ ہو!
افغانستان میں امریکہ کی حامی ”موڈریٹ طالبان“ پر مشتمل حکومت کا قیام اور بلگرام اور جلال آباد میں قائم امریکی اڈوں کی حفاظت۔ کوئی یہ ضمانت دے ‘ امریکی آج ہی افغانستان سے بھاگ کھڑے ہوں گے۔ لیکن یہ ”کارنامہ“ کون سرانجام دے سکتا ہے؟
امریکی انتظایہ اس قدر بے بس ہوچکی ہے کہ وہ مایوسی کے عالم میں اپنی ہر شکست کا ذمہ دار پاکستان کو ٹھہراتی دکھائی دیتی ہے۔ کبھی پاکستان دہشتگردی کی اس نام نہاد جنگ میں ”فرنٹ اسٹیٹ “ اور نان نیٹو اتحادی کا درجہ پایا تھا آج کل جو امریکی عہدیدار بھی اس دہشتگردی کی جنگ کے حوالے سے لب کشائی کرتا ہے وہ کھلے لفظوں میں پاکستان کو دہشتگردی کا سب سے بڑا مرکز قرار دیتا ہے۔ گویا اب ان کے نزدیک افغانستان میں امریکی فتح کا سارا دارومدار پاکستان کو ”سیدھا“ کرنے پر ہوگیا ہے۔ اندر کھاتے کہا جارہا ہے کہ امریکی ناکامیوں کا اصل سبب پاکستان ہے‘اس کی فوج ہے اور اس کی آئی ایس آئی ہے۔ کبھی بلوچستان میں ”طالبان شوریٰ“ کا نام لیا جاتا ہے‘ کبھی پنجاب میں لشکر طیبہ کا حوالہ دیا جاتا ہے اور کبھی کراچی کے اردگرد طالبان کے گھیرے کا شوشہ چھوڑا جاتا ہے۔ غرض یہ کہ پاکستان پر چاروں طرف سے یلغار ہورہی ہے ‘ اورافغانستان میں امریکی شکست کی مکمل ذمہ داری پاکستانی ریاست کے سر تھوپ دی گئی ہے۔
پہلے صدر جنرل پرویز مشرف پر ”ڈبل کراس“ کا الزام لگا کر ان کی پشت پناہی ترک کی گئی اور مشرف حکومت کی جگہ ”جمہوری“ حکومت کے راستے کو صاف کیاگیا۔(ن) لیگ اور پی پی پی…. گویا آگ اور پانی کے ملاپ سے دہشتگردی کی جنگ جیتنے کی امیدیں وابستہ کر لی گئیں ۔ اطلاعات کے مطابق جناب زرداری سے ڈرونز حملوں کی کھلی چھٹی مطلوب تھی‘ سو وہ مل گئی۔اب تو حکومت وقت ان ڈرونز حملوں پر لفظی احتجاج بھی نہیںکرتی ۔ لیکن متواتر حملوں کے باوجود بھی افغانستان کے عوام کی طرف سے لڑی جانے والی آزادی کی جنگ میں کمی کی بجائے تیزی ہی آرہی ہے۔ اس لئے اب شائد امریکی فوجوں کو فاٹا کے علاقوں میں اتارنے کی خواہش چٹکیاں کاٹ رہی ہے۔مطالبہ صرف یہ ہے کہ پاکستانی ٹروپس کا کنٹرول بھی امریکی کمانڈرز کو دیا جائے تاکہ ہر اول دستوں کے طور پر خود پاکستانی فوج ہی قبائلی عوام پر یلغار کرے اور امریکی کمانڈز صرف تماشا دیکھیں۔
پاک فوج ایسے کسی منصوبے کی راہ میں آ ہنی چٹان بن کر کھڑی ہوگئی ہے۔ جناب زرداری مزید کسی عوامی لانگ مارچ کے متحمل نہیں ہوسکتے۔ اس لئے خیال کیا گیا ہے کہ کیوں نہ اپنی فتح کو یقینی بنانے کے لئے میاںنوازشریف کی سرپرستی شروع کردی جائے!
میاں نوازشریف صاحب اس مسلم کشی میں کیا امریکہ کے قابل اعتماد پارٹنر بن سکیں گے؟۔ذاتی سا خیال ہے کہ میاں صاحب کو ایسے مصنوعی سہاروں کی ہرگز ضرورت نہیں ہے اور سچ یہ ہے کہ جس پاکستانی پر امریکی اعتماد کا الزام لگے گا‘وہ پاکستانی قوم کا اعتماد کھو دے گا۔ اس لئے کہ ”امریکی اعتماد“ ایک ایسا ”صفر“ ہے جو بڑے بڑے عوامی رہنماﺅں کو ہیرو سے زیرو کردیتا ہے۔ دیکھنا یہ ہے کہ جناب میاں صاحب آنے والے دوسالوں میں اس الزام سے بچنے کے لئے کیا ٹھوس اقدامات کرتے ہیں؟

Click here to View Printed Statment

معاشی مسابقت کے اس دور میں چین نے اقتصادی ترقی کو ہی اپنی خارجہ پالیسی کا مرکز و محور بنا لیا ہے۔ ”ہم جنگ نہیں کرینگے“ چین کی قومی قیادت اس فلسفے پر پوری طرح یکسوئی سے عمل پیرا ہے اور دنیا بھر میں مارکیٹوں پر مارکیٹیں فتح کرتے معاشی خوشحالی کے نئے نئے ریکارڈ قائم کر رہی ہے۔ یہ نہیں کہ چین اپنے دفاع سے غافل ہے۔ اسلحہ سازی کے اعتبار اور دفاعی تقاضوں کے لحاظ سے بھی چینی حکومت دنیا کی سپرطاقت کے ہم پلہ ہونے کے قریب ہے۔ آج امریکہ سمیت ترقی یافتہ ممالک بھی چین کے مقروض ہوچکے ہیں اور دفاعی ضرورتوں کو پورا کرنے کے لئے چین کی طرف بے چین نگاہوں سے دیکھ رہے ہیں

چین کو اس کرہ ارض پر چلتا پھرتاہر انسانی ڈھانچہ اپنا ”کلائنٹ“ دکھائی پڑتا ہے۔ اہل چین کو کسی کے مذہب‘ رنگ‘ ملک اور زبان سے کوئی غرض نہیںوہ اپنی مصنوعات کو اس قدر گاہک دوست بنا چکاہے کہ ساڑھے چھ ارب انسانوں کے اس سنگسار میں شائد ہی کوئی انسانی گروہ ایسا بچا ہو جوکسی نہ کسی طور چین کے زرمبادلہ کے ذخائر بڑھانے میں مددگار نہ بن رہا ہو۔ بچہ بوڑھا ‘نوجوان ‘عورت مرد اور ہیجڑا۔ صحت مند اور اپاہج ‘گورا اور کالا‘امریکی اورایرانی‘ مسلم غیر مسلم سب کے سب چینی مصنوعات خریدتے ہیں‘ استعمال کرتے ہیں اور مزید خریدنا چاہتے ہیں۔ چین کے نزدیک دنیا ایک منڈی ہے اور چین کو ہر وہ ملک پیارا اور قریبی ہے جہاں کی آبادی زیادہ ہو۔ آج کے جدید چین کے نزدیک بھارت ڈیڑھ ارب آبادی کا ملک ایک بہت بڑی مارکیٹ ہے۔ اس لئے وہ بھارت کے ساتھ کسی سرحدی کشمکش میں الجھ کر اپنی یہ مارکیٹ کھونا نہیں چاہتا۔ یہی وجہ ہے کہ دلائی لامہ والے معاملے کے باوجود چین بھارت کے زیر تسلط اپنے جغرافیائی حصے سے فی الوقت دستبردار ہوگیا ہےِ۔ اس نے ویت نام کی حکومت سے کامیاب مذاکرات کر لئے ہیں اور امریکہ کے نو منتخب صدر باراک حسین ابامہ کو دنیا میں امن اور خوشحالی لانے کے لئے دعوت بھی دے دی ہے۔
چین کے پاکستان کے ساتھ تعلقات کی بنیاد بھی دراصل پاکستان کے اندر منافع بخش سرمایہ کاری ہی ہے۔ پاکستان کی بگڑتی ہوئی سکیورٹی صورتحال کے باوجود بھی چینی فرموں اور کمپنیوں نے یہاں پر اپنا بوریا بستر نہیں لپیٹا اور یورپی اور امریکی کمپنیوں کے برعکس سرمایہ کاری کے نیٹ ورک کو وسعت دینے کا فیصلہ کیا ہے۔ پاکستان بھی چین جیسے مفید ہمسایہ اور دوست ملک کے سرمائے کاروں کو ہر سہولت دینے پر کم بستہ ہوچکا ہے اورپاک چین اقتصادی فورم بنا کر چینی سرمایہ کاروں کے راستے میں حائل بیورو کریٹک اور سکیورٹی رکاوٹوں کو دور کررہا ہے۔ پاک چین دوستی دونوں ملکوں کی معاشی ترقی کے لئے پہلے سے بھی زیادہ ضروری ہوچکی ہے۔
چینی حکومت پاکستان کے حکمرانوں کو یہی بات سمجھانے میں مصروف ہے کہ وہ بھارت کیساتھ کشیدگی کم کرنے کے عمل کو آگے بڑھاتی رہے۔ افسوس کے ممبئی واقعات کے بعد بھارت کے ذمہ داروں کی طرف سے غیر ذمہ دارانہ بیانات اور مسئلہ کشمیر پر کسی قسم کی ٹھوس پیش رفت نہ کرنے کے سبب تجارتی سرگرمیوں کو بھی جاری رکھنا مشکل ہوگیاہے۔ چین کو پاکستان کی حساس صورتحال کا ادراک ضرور ہے لیکن وہ پاکستان کے سولہ کروڑ لوگوں کی خاطر بھارت کے ڈیڑھ ارب گاہکوں کو ناراض کرنا نہیں چاہتا۔
بھارت نے سلامتی کونسل میں جماعت الدعوة کے خلاف درخواست دائر کی اور سلامتی کونسل کے پانچ مستقل ارکان نے بیک جنبش قلم اس گروپ کو دہشتگرد تنظیم قرار دے دیا۔ پاکستانی شائد جیسے اس فیصلے کی شدت سے منتظر تھی۔ ادھر سلامتی کونسل کا فیصلہ آیا اور اڑتالیس گھنٹے کی ڈیڈ لائن پورا ہونے سے بہت پہلے ہی حکومت نے جماعت الدعوة کے ہسپتال‘سکولز ‘مساجد اور دفاتر پر تالے ڈال کر تھوک کے حساب سے گرفتاریاں کر ڈالیں۔ فیصلے کی تفصیلات سے یہ بات سامنے آئی ہے کہ برطانیہ‘روس‘امریکہ اور فرانس کے علاوہ چین نے بھی اس بار سلامتی کونسل کے فیصلے کے حق میں ووٹ دیا۔ بعض سرکاری حلقوں کی طرف سے چین کے رویے کو حکومت کی مجبوری کے طور پر پیش کیا جارہا ہے۔ کہا جارہا ہے کہ اس بار چین نے پاکستان کا ساتھ نہیں دیا۔ یہ ایک خطرناک اور بے بنیاد سوچ ہے جسے سرکاری عہدیداران وقتی سیاسی فائدے کے لئے پھیلا رہے ہیں یہ حقیقت ہے کہ چین کو بھارت کی منڈی سے بہت کچھ حاصل کرنا ہے اور وہ پاکستان کے کسی مسئلے کی خاطر بھارت کو ناراض نہیں کرنا چاہتا لیکن سلامتی کونسل کے حوالے سے حقائق مختلف ہیں۔جنرل (ر) حمید گل صاحب نے اپنے ایک انٹرویو میں واضح کیا ہے کہ پاکستان کی طرف سے جماعت الدعوة کے خلاف آنے والی قرارداد کو ویٹو کرنے کے بارے میں چین سے کہا ہی نہیں گیا۔ اگر یہ حقیقت ہے تو پھر چین کے خلاف بداعتمادی نہیں پھیلانا چاہیے۔ پاک چین تعلقات میں اعتماد برقرار رکھنا انتہائی ضروری ہے ورنہ بدلتی عالمی صورتحال میں کہیں ہم اپنے آزمودہ دوست کو ناراض نہ کر بیٹھیں!

فرینڈز آف ڈیموکریٹک پاکستان کے افتتاحی اجلاس کے اختتام پر پاکستان کے صدر جناب آصف علی زرداری نے نیویارک میں ذرائع ابلاغ کے نمائندوں سے گفتگو کرتے ہوئے بڑے واضح الفاظ میں ”فرینڈز“ سے ممکنہ توقعات کی وضاحت کر ڈالی تھی۔ صدر صاحب نے کہا تھا کہ ہمیں کیش نہیں بلکہ سرمایہ کاری چاہیے۔ حالانکہ عمومی فضا یہی تھی کہ دولت مند ملکوں کے اجلاس میں پاکستان کو کم از کم دس ارب ڈالرز نقد مل جائیں گے۔

اچھا ہی ہوا کہ ہمارے دوستوںنے ہمیں مزید مقروض نہیں کیا اور ابوظہبی کے تکنیکی اجلاس میں پاکستان کے اندر صرف سرمایہ کاری کے ممکنہ شعبوں کاجائزہ لیا گیا۔ امید رکھی جارہی ہے کہ پاکستان کے ان دوستوں کا ماہ جنوری میں اسلام آباد کے اندر وزارتی سطح کا اجلاس سرمایہ کاری کے حوالے سے کوئی باقاعدہ اعلان کردے گا۔
پاکستان کے موجودہ ابتر مالی حالات میں بحیثیت قوم ہماری توقعات امریکہ سمیت دنیا کے تمام کھاتے پیتے ممالک سے وابستہ ہوجانا ایک قدرتی امر تھا۔ لیکن توقعات کو جائزہ حدود تک محدود رکھنا بھی ایک بالغ قوم کی ذمہ داری ہونی چاہیے۔ افسوس کہ ہم نے مالی بحران کی حالت میں خودداری کے تاثرات کو برقرار نہیں رکھا اور اپنے اوپر ”مانگت“ ہونے کا لیبل لگوا لیا ہے۔ حالانکہ تھوڑے صبر اور بچت کے ساتھ ہم بہتر وقتوں کا لطف اٹھا سکتے تھے۔
کیا یہ حقیقت نہیں ہے کہ چین کی قیادت ہمیں اس بحران سے نکالنے میں بے حد سنجیدہ تھی۔ پاکستان نے 2006ءمیں چین سے پانچ سو ملین ڈالر اس وعدے کے ساتھ حاصل کئے تھے کہ وہ یہ رقم اپنے زر مبادلہ کے ذخائر بڑھانے کے لئے سٹیٹ بینک میںرکھے گا اور خرچ نہیں کرے گا۔ اور جب زرمبادلہ کی صورتحال مضبوط ہوجائے گی تو یہ پانچ سو ملین ڈالر واپس کردیئے جائیں گے۔ افسوس کہ شوکت عزیز صاحب کی معاشی ٹیم نے اپنے وعدے کا پاس نہ کیا اور خزانہ بھرجانے کے باوجود چین کو پانچ سو ملین ڈالر حسب وعدہ واپس نہیں کئے گئے بلکہ خرچ کر ڈالے گئے چین اس عہد شکنی پر پاکستان کی حکومت سے نالاں رہا ہے ۔ جب آصف علی زرداری چین کے دورے پر گئے اور اپنے مالی بحران کی بات کی تو چینیوںنے اپنی ناراضگی کا اظہار کیا لیکن ساتھ ہی تسلی دی کہ ہم پاکستان کو ڈیفالٹ نہیں ہونے دیں گے۔ اطلاعات ہیں کہ چین نے پاکستان کے اندر تاریخ کی سب سے بڑی سرمایہ کاری کرنے کا فیصلہ کر لیا ہے۔ صرف یہی نہیں مزید پانچ سو ملین ڈالرز دینے کی بھی منظوری دے دی ہے۔
ہم نے سعودی عرب کے حوالے سے بہت شور مچایا اور ایسا تاثر پیدا کیا کہ سعودی حکومت کو پاکستان کے لئے ہر حال میں اپنے خزانوں کے منہ کھول دینے چاہیں لیکن گزشتہ چھ ماہ میں پاکستان کی معاشی ٹیم کی کوئی شکل ہی نہیں تھی مسلم لیگ (ن) کے وزیرخزانہ سب کچھ چھوڑ چھاڑ کر گھر بیٹھ گئے تھے اور پی پی پی کے وزیر خزانہ کو معاشی پیچیدگیوں کا کوئی ادراک ہی نہیں تھا۔ سعودی عرب سے کسی ٹھوس معاشی منصوبہ بندی کے بغیر محض ادھار تیل مانگتے چلے جانا یکطرفہ خواہش کے سوا کچھ نہیں تھا۔ تیل کی قیمتیں آسمان سے گر کر زمین پرآلگی ہیں۔ سعودی حکومت خود بھی معاشی دباﺅ کا شکار ہے اور ن لیگ اور پی پی پی کی آپس میں نااتفاقی نے بھی ہمارے دوستوں کو گومگو کی کیفیت میں مبتلا کر رکھا ہے۔ معاشی لحاظ سے پاکستان جان کنی کے عالم میں سے گزر رہا ہے اور اب ہماری واحد امید یہ رہ گئی ہے کہ امریکی سینٹ میں پاکستانی امداد کا جو بل سینٹر اوبامہ نے پیش کیا تھا اس پر عملدرآمد ہوجائے اور پاکستان کو پندرہ بلین ڈالرز کی ”امداد“ مل جائے۔ خدا جانے اس ”امداد“ کے حصول کے لئے ہمیں قومی خودمختاری کی مزید کتنی قربانیاں ادا کرنا پڑیں گی؟
اصل سوال یہ بھی ہے کہ کیا ہم آئی ایم ایف کی شرائط پر عمل درآمد کے اہل ہیں؟ سب سے بڑی آزمائش اربوں روپے کے مزید ٹیکس لاگو کرنا اور غیر ترقیاتی اخراجات میں خاطر خواہ کٹوتی کرنا ہے۔ اگر دفاعی اخراجات میں کمی نہ بھی کی جائے تو ضروری اضافے کو روکنا ہی بہت سے مسائل پیدا کرسکتا ہے۔ اس پر کٹھن مرحلہ موجودہ وزارتوں کے اخراجات کم کرنا ہوگا۔ ”فرینڈز“ اسی صورت میں یہاں سرمایہ کاری کے لئے حامی بھریں گے جب پاکستان کے اندر داخلی استحکام اور سکیورٹی کی صورتحال مثالی ہوگی۔ صورتحال یہ ہے کہ یہاں پہلے سے موجودہ بڑی بڑی یورپی کمپنیاں اپنا بوریا بستر لپیٹ کر واپس جارہی ہیں۔ صوبہ سرحد سے بھی بین الاقوامی امدادی ادارے اپنی سرگرمیاں بند کرچکے ہیں۔ یہ کہنا کہ ابوظہبی کے بعد اسلام آباد میں ہونے والے اجلاس میں فرینڈز آف پاکستان اربوں ڈالرز کی سرمایہ کاری کے منصوبے شروع کردیں گے ابھی ایک خیال اور خواب ہے ۔ وہ سرمایہ کاری سے پہلے بہت سی شرائط عائد کریں گے۔ انہیں بلامشروط سرمایہ کاری پر کون قائل کرے گا۔ وہ اپنی حیثیت میں ”فرینڈز “ سے زیادہ ”ماسٹرز“ ثابت ہوں گے۔ اور ہماری داخلی صورتحال اس قدر گھمبیر ہے کہ ہم انہیں ماسٹرز بننے سے روک بھی نہیں سکتے۔

Click here to View Printed Statment

ابھی تک وہ اعدادوشمار سامنے نہیں آئے جن کی بنیاد پر معلوم ہوسکے کہ پاکستان نے آج تک جتنے ادارے اور صنعتیں پرائیویٹائز کئے ہیں ان سے کل کتنی رقم حاصل ہوئی ہے اور اس رقم سے کتنے غیر ملکی قرضے ادا ہوسکے ہیںلیکن سادہ اور عام فہم سی حقیقت یہ ہے کہ تمام ترنج کاریوں کے باوجود پاکستان کے بیرونی اور اندرونی قرضوں میںاضافہ ہی ہوا ہے

اور معاشی جان کنی کے عالم سے نکلنے کے لئے ایک بار پھر ہمیں آئی۔ایم ۔ایف کی دہلیز پر سر جھکانا پڑا ہے۔آپ کو پیسوں کی ضرورت ہو تو گھر کا سامان بیچ دیں۔ یہ ہے وہ معاشی تدبّر جس کے لئے ہماری حکومتیں بڑے بڑے معاشی ماہرین کی مہنگے داموں خدمات حاصل کرتی ہیں اور جب کسی ادارے کو ہم کوڑیوں کے مول فروخت کردیتے ہیں تو پھر کامیابی کے جشن مناتے ہیں۔
حکومت چاہتی ہے کہ وہ اپنی ذمہ داریوں کو نبھانے کی بجائے ذمہ داریوں سے چھٹکارا پائے۔ گڈگورننس کا یہ فارمولہ بڑا ہی انوکھا ہے۔ خصوصاً ترقی پذیر ممالک میں جہاں پر حکومت روزگار کے وسیع مواقع پیدا کرنے کے نعرے لگا کر وجود پاتی ہیں وہیں روزگار کے محفوظ ذرائع کا گلا گھونٹ دیا جاتا ہے۔ ”بہترین حکومت کم از حکومت ہے۔“ یہ فارمولا پاکستان جیسے مفلوک الحال ملکوں کے لئے بنا ہی نہیں۔ یہاں فری اکانومی جیسے سرمایہ دارانہ تصورات کے عمل دخل سے صرف اور صرف مہنگائی ‘بے روزگاری اور امیر اور غریب کے درمیان خلیج بڑھتی ہے۔ نج کاری فری اکانومی کا لازمی جزو ہے جس سے قومی نوعیت کی انتہائی حساس پیچیدگیاں ہی پیدا نہیں ہوتیں بلکہ عوام کا حکومت پر سے اعتماد بھی ختم ہوجاتا ہے۔
گو کہ سٹیل ملز کی نجکاری کے خلاف سپریم کورٹ آف پاکستان کے فیصلے کے بعد وقتی طور پر اندھا دھند نج کاری کے کلچر کو کافی دھچکا لگا تھا۔ لیکن نئی حکومت پھر سے اسی کلچر کے فروغ میں مصروف ہوگئی ہے۔ حالانکہ آج جوگروہ اور پارٹیاں حکمران اتحاد میں شامل ہیں‘وہ اسٹیل ملز کی پرائیویٹائزیشن کے خلاف سراپا احتجاج تھیں لیکن آج قادر پور گیس فیلڈ جیسے منافع بخش اداروں کو اونے پونے فروخت کرنے کی جلدی دکھائی دے رہی ہے۔ عوامی حلقوں اور رائے عام کے اداروں نے اس جلد بازی کا بروقت نوٹس لیا ہے اور وقتی طورپر وزیراعظم نے قادر پور گیس فیلڈ کا معاملہ رکوا دیا ہے۔ لیکن حقیقت یہ ہے کہ اس گیس فیلڈ کو فروخت کرنے کے تمام معاملات طے پاچکے ہیں۔پارلیمنٹ کی مصنوعی رکاوٹ کو ہٹانا صدارتی نظام میں زیادہ مشکل کام نہیں ہے۔
پاکستان اسٹیلز ملز کا معاملہ بھی لوگوں کی نگاہ میں رہنا چاہیے۔ آخرکیا سبب ہے کہ چھ ماہ قبل تک جو اسٹیلز ملز چھ ارب روپے کاسالانہ منافع پر دے رہی تھی وہ اچانک سات ارب روپے کا خسارہ دکھا رہی ہے اور سٹیٹ بینک آف پاکستان سے قرضہ لینا پڑا ہے؟ اس معاملے کی کھوج لگائی جانی چاہیے کہیں ایسا تو نہیں کہ منافع بخش اداروںکو بیچنے پر تنقید سے بچنے کے لئے اسٹیل ملز جیسے اداروںکو سفید ہاتھی ثابت کرنے کی پالیسی اپنائی جارہی ہو۔ ممکن ہے کہ آئندہ دو چار ماہ تک ایسے اعدادوشمار سامنے لائے جائیں جن سے ثابت ہو کہ قادر پور گیس فیلڈر بھی خسارے میں جارہی ہے۔ اس لئے خسارے والے یونٹوں سے چھٹکارا پانا ضروری قرار پائے۔
یہی پاکستان ہے جس میں بہت سے قومی ادارے اپنی بہترین صلاحیتوں کو بروئے کار لاتے ہوئے تمام تر بدترمالی حالات کے باوجود نہ صرف پاکستان کے قومی خزانے میں اربوں روپے کاسالانہ ٹیکس جمع کروا رہے ہیں بلکہ ہزاروں خاندانوں کے روزگار کا ذریعہ بھی بنے ہوئے ہیں۔ فوجی فرٹیلائزر کی ایک روشن مثال ہمارے سامنے ہے۔ کم از کم پچاس ہزار گھروں کے چولہا جلانے کا سہرا ایف ایف سی کی مینجمنٹ کے سرسجتا ہے۔ ایف ایف سی کے سیکرٹری بریگیڈیئر (ر) خالد کبریا کے مطابق سارک ممالک کی اکاﺅنٹس کمیٹی نے ایف ایف سی کو اکاﺅنٹس پریذنٹیشن پر بہترین ایوارڈ دیا ہے۔ایف ایف سی اوسطً پانچ ارب روپے سالانہ قومی خزانے میں ٹیکس کی مد میں جمع کراتی ہے۔اربوں روپے کے زرمبادلہ کی بچت علیحدہ ہوتی ہے۔ اسی طرح ہمارے درجنوں ایسے ادارے ہیں جن کو اگر اچھی مینجمنٹ میسر آجائے اور اہل اور فعال لوگ تعینات کردیئے جائیں تو انہیں منافع بخش بنا کر قومی ترقی کو ممکن بنایاجاسکتا ہے۔
یہ کیسا معاشی ویژن ہے کہ ہم اپنے قومی صنعتی اور کاروباری اداروں کو ٹھیک کرنے کی بجائے ان کو ناکارہ اور غیر منافع بخش ثابت کرنے پر تلے رہتے ہیں۔ کیا کچھ لوگوں یا وزارتوں کے کوئی ایسے ذاتی مفادات ہوتے ہیں کہ وہ ”غیر منافع بخش “ کا الزام لگا کر اداروں کو ”قتل“ کرتے جارہے ہیں ۔ یہ قومی نہیں ایک قبیع سوچ ہے۔ اسے قومی اثاثوں کی نجکاری کی بجائے کاروکاری ہی کہا جائے گا۔ آپ اپنی ذمہ داریاں نبھانے اور کچھ سنوارنے کی بجائے کسی صنعت یا ادارے پر ”کاری“ کا الزام لگائیں اور اشتہارات دیکر اسے ”نج کاری“ کی موت مار دیں!۔

Click here to View Printed Statment

اسلام والدین کے متعلقین کی بھی عزت کرنے کا حکم دیتا ہے
دنیا کا ہر مذہب اور تہذیب اس بات پر متفق ہے کہ والدین کے ساتھ حسن سلوک کرنا چاہئے ان کا ادب و احترام ملحوظ خاطر رکھنا چاہیے۔ اس بارے میں قرآن کی تعلیم سب سے زیادہ اہم اور اپنے ایک انفرادی سلوک کی حامل ہے۔ مثلاً جب کبھی اللہ تعالیٰ نے اپنی استطاعت وفرمانبرداری کی تعلیم دی ہے۔ ترجمہ ”اے بندو تم میرا (اللہ کا) شکر کرو اور اپنے والدین کا شکر ادا کرو تم تمام کو میری ہی طرف لوٹ کر جانا ہے۔“ (سورة لقمان14)

یاد رکھئے کہ جس طرح سے اللہ کے حقوق ہم پر فرض ہیں بالکل اسی طرح انسانوںکے حقوق بھی ہم پر فرض ہیں اور اتنے ہی اہم ہیں۔ انسانوں میں والدین کے حقوق بھی ہم پر فرض ہیں اور اتنے ہی اہم ہیں۔ انسانوں میں والدین کے حقوق سب سے زیادہ بڑھ کر ہیں۔ ماں باپ کے ساتھ حسن سلوک کرنے والوں کو جنت کی بشارت دی گئی ہے۔(ترجمہ)اور ہم نے انسان کو اپنے ماں باپ کے ساتھ حسن سلوک کرنے کا حکم دیا ہے اور اس کی ماں نے اسے تکلیف جھیل کر پیٹ میں رکھا اور تکلیف برداشت کرکے اسے جنم دیا اس کے حمل کا اور اس کے دودھ چھڑانے کا زمانہ تیس مہینے کا ہے۔ یہاں تک کہ جب وہ اپنی پختگی اور چالیس سال کی عمر کو پہنچا تو کہنے لگا اے میرے پروردگار! مجھے توفیق دے کہ میں تیری اس نعمت کا شکر بجالاﺅں جو تو نے مجھ پر اور میرے ماں باپ پر انعام کی ہے اور یہ کہ میں ایسے نیک عمل کروں جن سے تو خوش ہوجائے اور تو میری اولاد بھی صالح بنا۔ میں تیری طرف رجوع کرتا ہوں اور میں مسلمانوں میں سے ہوں۔ یہی وہ لوگ ہیں جن کے نیک اعمال کو ہم قبول فرما لیتے ہیں اور جن کے بداعمال سے درگزر کر لیتے ہیں (یہ) جنتی لوگوں میں سے ہیں۔اس سچے وعدے کے مطابق جو ان سے کیا جاتا تھا( سورة الحقاف 15-16) والدین سے نافرمانی کرنے والوں کے لئے گھاٹا ہی گھاٹا ہے (ترجمہ) “ اور جس نے اپنے ماں باپ سے کہا کہ تم سے میں تنگ آگیا ہوں تجھے خرابی ہو تو ایمان لے آ‘ بے شک اللہ کا وعدہ حق ہے‘وہ جواب دیتا ہے کہ یہ تو صرف اگلوں کے افسانے ہیں‘ یہ لوگ ہیں جن پر عذاب کا فیصلہ چسپاں ہوچکا ہے۔ اور جنوں اور انسانوں کی ان امتوں میں شامل ہوگئے ہیں جو ان سے پہلے گزر چکی ہیں‘ یقینا وہ تھے ہی گھاٹا اٹھانے والے۔“ (سورة الاحقاف 17-18) اللہ تعالیٰ کے رسول پاک نے بھی فرمایا۔ ترجمہ ”تم اپنی ماں کے ساتھ صلہ رحمی کرو تم اپنی ماں کے ساتھ نیک سلوک کرو‘ تم اپنی ماں کے ساتھ صلہ رحمی کرو پھر تم اپنے باپ کے ساتھ صلہ رحمی کرو‘ پھر تم اپنے قریبی رشتہ داروں کے ساتھ صلہ رحمی کرو۔ پھے اس کے بعد دور کے رشتہ داروں کے ساتھ صلہ رحمی کرو“۔ (مظہری)
ماں کے ساتھ اس طرح کے خاص حسن سلوک اور صلہ رحمی کا حکم اللہ تعالیٰ نے کئی وجوہات کی بناءپر دیا ۔1۔بچہ کو اپنے پیٹ میں رکھنے کی تکلیف اور پیدائش کے وقت کی تکلیف سہنے کی وجہ سے ۔2 بچہ پیدا ہونے سے پہلے اور بچہ پیدا ہونے کے بعد بچے کی پرورش ونشونما کے لئے اس کے بدن سے بچے کو غذا دی جاتی ہے۔3۔ ہر وقت بچہ کو اپنے کاندھوں پر لادے رہنا دن رات اس کی ضرورتوں کے پیچھے لگے رہنا۔4۔ ماں بچوں کو سکھاتی ہے اور انہیں تربیت دیتی ہے ‘نفسیات کے ماہرین کا کہنا ہے کہ بچپن کی تعلیم وتربیت کا اثر بچے کی آگے کی زندگی پڑتا ہے۔ دنیا کی تمام عظیم شخصیتیں اپنی عظیم ماﺅں کی وجہ سے عظیم کہلائیں۔واضح رہے کہ ماں کے احسانات بہت زیادہ ہیں ۔ اسی لئے اللہ تعالیٰ نے اس کے حقوق کواتنی اہمیت دی ہے لیکن افسوس کی بات ہے کہ کئی مائیں اللہ تعالیٰ کی دی ہوئی فوقیت اور اہمیت کا غلط استعمال کرتی ہے بہت ساری مائیں بچوں کو اپنے قبضے میں لے لیتی ہیں اور باپ کو بچوںکے معاملات میں اپاہج بنا دیتی ہیں یہاں تک کہ ایسی مائیں بچوں کو گھریلو معاملات میں باپ کا مخالف بنا دیتی ہیں۔ جس کی بناءپر اس گھر کا نظام درہم برہم ہو کر رہ جاتا ہے۔ ایسی مائیں اللہ کی دیگر ہدایات کو بھول کر ایسا کرتی ہیں(ترجمہ) ”مرد عورتوں پر حاکم ہیں اس وجہ سے کہ اللہ تعالیٰ نے ایک دوسرے پر فضیلت دی ہے اور اس وجہ سے کہ مردوں نے اپنے مال خرچ کئے ہیں‘ پس نیک عورتیں (ہوتی ہیں) اطاعت شعر(مردوں کی) غیرحاضری میں حفاظت کرنے والیاں“۔(سورة النساء34)
اللہ تعالیٰ نے قرآن پاک میں گھریلو زندگی کے متعلق سب سے زیادہ مفصل ہدایتیں دی ہیں۔ اتنی ہدایتیں زندگی کے دوسرے شعبے کے متعلق نہیں ملتیں۔ کیونکہ گھریلو سکون کی اہمیت او ر بقاءاللہ تعالیٰ کی نظر میں بہت اہم ہے۔ ایسی ماﺅں کا اسی طرح کا غیر اسلامی سلوک ان کے شوہروں کو انتہائی تکلیف میں مبتلا کردیتا ہے اور بہت مسائل پیدا کردیتا ہے ۔ اللہ تعالیٰ کی نظر میں ایسی ماﺅں کا اجر کم ہوجاتا ہے۔کیونکہ وہ خاوند کو اس کے مقام سے گرا کر اولاد کی مدد سے گھریلو سکون کو تباہ و برباد کرتی ہیںکئی ایسی مائیں اپنی زندگی کے آخری حصہ میں اپنی غلطیوں کو تسلیم کرلیتی ہیں جب وہ خود اپنے پیدا کئے ہوئے مسائل میں گھر کر پریشان ہوجاتی ہیں۔ لیکن پھر اس وقت نقصان کی تلافی انتہائی مشکل ہوجاتی ہے۔
حقیقت میں ہر بری چال کا نتیجہ اس چال کے چلنے والے پرہی وارد ہوجاتا ہے۔ (ترجمہ) ” کسی بھی بری چال کا نتیجہ اس چال کے چلنے والے ہی کومل کر رہتا ہے۔ (سورة الفاطر 43:) والدین کے ادب و احترام کے لئے مزید تفصیل دی گئی ہے۔“ (ترجمہ) اور تیر ا پروردگار صاف صاف حکم دے چکا ہے کہ تم اس کے سوا کسی اور کی عبادت نہ کرنا اور ماں باپ کے ساتھ احسان کرنا اگر تیری موجودگی میں ان سے ایک یا یہ دونوں بڑھاپے کو پہنچ جائیں تو ان کے آگے اف تک نہ کہنا ‘نہ انہیں ڈانٹ ڈپٹ کرنا بلکہ ان کے ساتھ ادب و احترام سے بات چیت کرنا اور عاجزی اور محبت کے ساتھ تواضح کا بازو پست رکھے رکھنا اور دعا کرتے رہنا کہ اے میرے پروردگار! ان پر ویسا ہی رحم کرو جیسا انہوں نے مجھے بچپن میں بالا۔ جو کچھ تمہارے دلوں میں ہے اسے تمہارا رب بخوبی جانتا ہے اگر تم نیک ہو تو وہ رجوع کرنے والوں کو بخشنے والا ہے“(سورة الاسرار 23-25)
ان آیات میں اللہ تعالیٰ نے اپنی اطاعت کے بعد دوبارہ والدین کے ادب و احترام کی بات کی ہے۔ ان آیات میں اللہ تعالیٰ نے ہمیں سمجھایا ہے کہ ہم بچپن میں کس طرح بے یارومددگار تھے اور والدین نے ہمیں پالا پوسا اور پروان چڑھایا‘ہمارے والدین ہماری ہر خواہش پورا کرتے تھے۔ مکمل خلوص اور محبت کے ساتھ اسی لئے اولاد پر فرض ہے کہ وہ والدین کا احترام کرے اور ان سے اچھا سلوک کرے۔ اگرچہ عمر کے تمام حصوں میں والدین کا ادب احترام کرنا چاہئے لیکن ان کی طرف زیادہ تر توجہ اس وقت ہونی چاہیے جب وہ بوڑھے ہوجائیں کیونکہ وہ بھی اسی طرح بے یارومددگار ہوجاتے ہیں جیسے ہم بچپن میں تھے‘ اللہ تعالیٰ نے ان آیات میںمندرجہ ذیل ہدایات ہمیں دی ہیں۔1۔والدین کو ان کی بے عزتی کے طور پر چھوٹے سے چھوٹا لفظ بھی نہیں کہنا چاہیے۔2۔ان کے سامنے چلا کر نہیں بولنا چاہیے۔3۔ انتہائی محبت بھرے لہجے اور ہمدردی کے انداز میں ان سے بات کرنی چاہیے۔4۔ والدین کے ساتھ ہر معاملہ انتہائی فرمانبرداری اور نرمی سے کرنا چاہئے۔ ان کے ساتھ رحمدل کا معاملہ ہونا چاہیے اور دل کی گہرائیوں سے یہ سب کچھ ہونا چاہئے محض دکھانے کے لئے روایتی انداز میںنہیں ہونا چاہیے۔5۔ ہمیں والدین کے لئے دعا کرنا چاہیے کہ میرے والدین پر رحم فرما کہ بالکل اسی طرح جس طرح وہ لوگ بچپن میں مجھ پر رحم وکرم کرتے تھے۔ یہ دعا ان کی موت کے بعد بھی کرتے رہنا چاہیے۔ کیونکہ اللہ تعالیٰ نے خود یہ دعا ہمیں سکھائی ہے۔ اور اس کی تلقین فرمائی ہے۔6 سورة الاسرارءکی آیت نمبر 25 میں اللہ تعالیٰ نے یہ بات بھی ہمارے دلاسے کے طور پر بیان کردی ہے کہ اگر کسی سے بھول چوک یا غلطی سے والدین کے متعلق کوئی نازیبا کلمات نکل جائیں۔جو لاپرواہی کی وجہ سے نہیںبلکہ سخت محنت کرتے ہوئے انجانے میں ہوجاتے تو اس پر اللہ تعالیٰ ہمیں سزا نہ دے گا۔ بشرطیکہ ہم خلوص دل سے توبہ کر لیں اور معافی مانگ لیں اورمعافی مانگ لیں۔ اللہ تعالیٰ ہمارے دلوں کی گہرائیوں سے بھی واقف ہے ۔ والدین کے احترام کے بارے میں بہت ساری احادیث بھی موجود ہیں۔ ایک مرتبہ ایک آدمی نے حضرت محمد سے پوچھا وہ کونسا عمل ہے جو اللہ تعالیٰ کو سب سے زیادہ پسند ہے ‘جواباً آپ نے فرمایا وقت مقررہ پر عبادت کرنا‘پوچھنے والے نے پوچھا اس کے بعد کون سا عمل؟ آپ نے فرمایا والدین کے ساتھ حسن سلوک (بخاری) ۔ حضرت عبداللہ بن عمرؓ روایت کرتے ہیں کہ ایک آدمی نے جہاد میں جانے کی اجازت چاہی تو آپ نے پوچھا کیا تمہارے والدین زندہ ہیں؟ اس نے کہا ہاں‘ آپ نے فرمایا کہ تمہارے والدین کی خدمت کرنا تمہارے لئے جہاد ہے۔(بخاری) یاد رکھئے یہ حکم اس وقت ہے جب والدین کی خدمت کرنے والا کوئی نہ ہو تو ان کو اکیلا بے سہارا چھوڑ کر نہیں جانا چاہئے ‘ اگر گھر میں دوسرے بھائی وغیرہ ہوں تب یہ حکم نہ ہوگا اور اگر جہاد فرض عین ہو تب بھی ہر مسلمان کو جہاد پر نکلنا فرض ہوگا۔ اسلام اس بات کی بھی تلقین کرتا ہے ہم اپنے والدین کے متعلقین کی بھی عزت کریں‘چاہے وہ والدین کے رشتہ دار ہوں یا والدین کے دوست۔ حضرت عبداللہ بن عمرؓ روایت کرتے ہیں کہ حضرت محمد نے کہا کہ اگر تم اپنے والدین کے دوستوں کا احترام کروگے تو یہ بلاواسطہ تمہارے والدین ہی کا احترام ہوگا۔(بخاری)۔