اقبال نے کہا تھا، وہی جواں ہے قبیلے کی آنکھ کا تارا شباب جس کا ہے بے داغ، ضرب ہے کاری میں جب پہلی بار سردار یاسر الیاس خان سے ملا تو میرے ذہن میں اقبال کے اس شعر نے سرسراہٹ کی تھی۔سردار یاسر سے تفصیلی ملاقات چیمبر آف کامرس اینڈ انڈسٹری کے ہیڈ آفس میں ہوئی۔اس خوبصورت اور خوب سیرت نوجوان نے مغل وفد کا پر تپاک استقبال کیا۔سردار صاحب کو چیمبر کا الیکشن جیتنے پر جہلم سے جناب میاں نعیم بشیر،جناب ندیم ساجد کی سربراہی میں ممتاز مغل شخصیات پر مشتمل ایک نمائندہ وفد مبارکباد دینے آیا تھا۔اسلام آباد سے جناب بیگ راج اور حسنین عرفانی مغل بھی موجود تھے۔سردار یاسر کمیٹی روم میں وفد کے ارکان سے باری باری گلے ملے،تعارف حاصل کیا اور خیریت دریافت کی۔پھر انہوں نے اپنی انتخابی مہم کے حوالے سے دلچسپ باتیں بتائیں۔چیمبر کے الیکشن میں سردار صاحب نے سب سے زیادہ ووٹ لیے۔

انہوں نے اپنی کمپین روائتی طریقوں سے ہٹ کر جدید طرز پر ترتیب دی۔ ووٹروں تک پیغام پہنچانے کیلئے آئی ٹی کا زبردست استعمال کیا۔ تاجروں کو کھانے کھلا کر اپنا ہمدرد بنانے کی بجائے سردار یاسر نے اپنا پیغاموثر بنانے اور پیغام رسانی کے ذرائع کو برق رفتار بنانے پر توجہ مرکوز رکھی۔حکومت پنجاب کے معاون خصوصی محترم سردار تنویر الیاس خان کے چھوٹے بھائی سردار یاسر خان امریکی یونیورسٹی سے فارغ التحصیل ہیں۔وہ بات کرنے کا ڈھنگ جانتے ہیں۔بڑے سائنٹفک طریقے سے مخاطب کو اپنی طرف متوجہ کئے رکھتے ہیں۔اچھے سامع بھی ہیں۔تکبر اور بڑائی نہیں،طبعیت میں ادب آداب کا رنگ غالب رہتا ہے۔ کسی بھی چیمبر کے کم عمر ترین صدر ہیں۔وہ کسی حادثے کے نتیجے میں اس منصب تک نہیں پہنچے بلکہ وہ چیمبر کے معاملات کو بہتر کرنے کے ارادے سے الیکشن لڑے ہیں۔ان کے ذہن میں تاجر برادری اور ملک کی معاشی صورتحال کو سنوارنے کا باقاعدہ روڈ میپ ہے۔ان کے ویثرن سے متاثر ہوکر حکومت کی اقتصادی ٹیم سردار صاحب کی وزیراعظم سے ملاقات بھی کروا چکی ہے۔یہ نوجوان صدر آج کا نہیں آنے والے پچاس سال کی ضروریات کے بارے میں منصوبہ سازی کر ناچاہتے ہیں۔باقائدگی کے ساتھ دفتر آتے اور تاجروں کو درپیش مسائل کا حل نکالتے ہیں۔ان تمام باتوں سے ہٹ کر دونوں بھائیوں کی ایک خوبصورت بات یہ کہ وہ اپنی قوم اور قبیلے کو بڑا احترام دیتے ہیں۔”آج میرے اپنے خاندان کے لوگ مجھے مبارکباد دینے آئے ہیں،میں بہت خوش ہوں”سردار یاسر صاحب نے چیمبر کے زعما کو فخر سے بتایا۔پھر مغل برادری کی فلاحی سرگرمیوں کے بارے میں باتیں کرتے رہے۔گھنٹہ بھر کی میٹنگ ہوئی۔چائے،کافی،ونگز اور فروٹ کیک سے تواضع کی۔پھر فوٹو سیشن شروع ہوا۔سردار صاحب کی مصروفیات بھی بے پناہ ہیں لیکن جب تک ہم نے خود اجازت نہیں لی،قبیلے کی آنکھ کا یہ تارا وفد کے ارکان کیساتھ ہی جگمگاتا رہا،تصویریں بنواتا رہا،ہنستا مسکراتا رہا۔اپنائیت کا ایسا احساس کہ دل و دماغ سرشار ہوگئے۔جناب ندیم ساجد مغل مالائیں ساتھ لائے تھے۔گھوڑے کا قیمتی ماڈل تحفہ کے طور پر پیش کیا۔پنجاب بیکری کیطرف سے سردار صاحب کی تصویر والا لذیذ اور دیدہ زیب کیک بھی تھا۔ملاقات تقریب میں بدل گئی۔سردار تنویر الیاس خان ملکی معیشت کی بہتری کیلئے اوورسیز پاکستانیوں کو ملک میں سرمایہ کاری پر آمادہ کرتے رہتے ہیں۔وہ پنجاب انوسٹمنٹ بورڈ کے چیئرمین بھی ہیں۔ان کی قابل تجاویز پر پیش رفت بھی ہورہی ہے۔تارکین وطن کی جانب سے ملک کے اندر سرمایہ کاری میں خاطر خواہ اضافہ ہو چکا ہے۔ان کے چھوٹے بھائی اب چیمبر کے پلیٹ فارم سے انتہائی بنیادی کام کررہے ہیں۔یہ دونوں بھائی صرف اپنی مغل برادری ہی نہیں پوری پاکستانی اور کشمیری قوم کا فخر ہیں،یہ واقعی قوم کے سردار ہیں۔ ان کا کردار بے داغ ہے،یہ معیشت کا پہیہ چلانے میں ضرب کاری سے متصف ہیں۔ قبیلے کی آنکھ کا تارا ہونے کے تصور اقبال پر پورا اترتے ہیں۔

آج انسانیت مجموعی طور پر انتشار کا شکار ہے ۔تمام تر ترقی ‘خوشحالی تعلیم اور علم کے باوجود ساڑھے چھ ارب انسان ایک دوسرے کو نیچا دکھانے اور اس کرہ ارض کو نہ ختم ہونے والے فتنوں میں مبتلا کردینے کی کوشش میں مصروف ہیں۔کوئی ایسا خطہ نہیں جو جنگ و جدل سے پاک ہو۔ جہاں انسان انسان کو کاٹ نہ رہا ہو۔ جہاں آدم آدم کو لوٹ نہ رہا ہو امیر غریب کو کھائے جارہا ہے۔ باوسیلہ دنیا بے وسیلہ بستیوں کو اجاڑ رہی ہے۔تقابل کا فلسفہ اپنے تمام تر منفی معنوں کے ساتھ نسل انسانی کی تباہ کاریوں میں کارفرما ہے۔ کچھ معلوم نہیں کب زیر زمین چھپے ہوئے ایٹم بم’ سمندر میں تیرتی ہوئی نیو کلیائی آب دوزیں ‘تابکاری مواد اٹھائے فضاء میں قلانچیں بھرتے طیارے اور خلا میں ہچکولے لیتے مصنوعی سیارے اچانک کسی مہم جو ذہن کی چھوٹی سی غلطی سے اس قافلہ انسانیت کو آگ لگا دیں اور احسن تقویم کے فارمولے پر پیدا کردہ انسان اپنی ہی بدتد بیری اور بدنیتی کے سبب اپنے گھر کو جلا کر خاکستر کردے۔ انسانیت کو بچانے کی آج جس قدر ضرورت ہے۔

شاہد اس سے پہلے کبھی بھی نہ تھی۔ مختلف یورپی دانشور اور انسانی حقوق کے چیمپئن خود ساختہ تھیوری اور محض انسانی ذہن سے پھوٹنے والی احتیاطوں کو ملحوظ خاطر رکھ کر انسانیت کے قافلے کو بچانے کی کوشش میں مصروف ہیں لیکن تمام تر خلوص نیت کے باوجود مغربی انسان دوست ادارے اور حلقے محض اندھیروں میں ٹامک ٹوئیاں مار رہے ہیں ان کی حالت یہ ہے کہ
فلسفی کو بحث کے اندر خدا ملتا نہیں
ڈور کو سلجھا رہا ہے اور سرا ملتا نہیں
اُلجھی ہوئی ڈور کا سرا ڈھونڈنے کے لئے انہیں ہر طرح کے تعصبات سے بالاتر ہو کر صرف اور صرف سچ کو تلاش کرنا ہوگا۔ مجھے یقین ہے کہ اگر انہوں نے مذہب ‘زبان ‘علاقے ‘رنگ نسل’ Status اور دنیاوی طبقاتی تقسیم کی عینک اتار کر حق کی تلاش کو نکلیں گے تو پھر انسانیت کے عظیم محسن ،دنیا جہاں کے لئے رحمت للعالمین اور صرف مسلمانوں کے لئے نہیں بلکہ بنی نوع انسان کے غم گسار آخری پیغمبر خاتم النبین حضرت محمدۖ کی تعلیمات تک ضرور پہنچ جائیں گے۔
اگر ہم ماہ ربیع الاول میں کوئی ایسی کتاب ترتیب دے سکیں ۔ کوئی ایسی قلم بنا سکیں جس میں رسول پاک ۖ کی تعلیمات کا بھرپور تاثر ملتا ہو اور وہ یورپ اور امریکہ کے لوگوں کو دکھائی جائیں تو میں دعویٰ سے کہتا ہوں کہ جو ذہن گستاخی پر اتر آئے ہیں وہی ذہن آپ ۖ کے حق میں اس طرح سرنگوں ہوجائیں گے جس طرح حضرت عمر تلوار حمائل کئے درنبوت پر جھک گئے تھے۔
قافلہ انسانیت کو درپیش جان لیوا حادثوں سے بچانے کا صرف ایک ہی راستہ ہے کہ ہم بحیثیت مسلمان اسوء رسولۖ پر عمل کریں اور غیر مسلموں کو ڈرانے اور خوفزدہ کرنے کے بجائے یا ان سے مرعوب ہونے اور دور ہونے کے بجائے انہیں تعلیمات نبوی سادہ اور آسان سے لفظوں میں سمجھا سکیں۔ دنیا میں مختلف شخصیات علم و کمال’دولت و جمال اور قوت واقتدار لے کر آتی رہی ہیں مگر ہم حضور انورۖ کو سب سے زیادہ اہمیت دیتے ہیں۔اس کی ایک وجہ تو ہماری جناب رسول اللہۖ سے محبت و عقیدت اور ہمارا ان کے ساتھ رشتہ ایمان میں بندھا ہونا ہے تو دوسری وجہ یہ بھی ہے کہ جو آپ ۖ نے انسانیت کو عطا کیا ہے وہ آپۖ سے پہلے یا بعد میں کسی نے نہیں دیا۔
دنیا کی دوسری شخصیات کو دیکھیں تو سکندر’رستم و دیگر نامور کمانڈرز جاہ و جلال دکھا کر چلے گئے’ کارل مارکس اورلینن جیسے لوگ نظریاتی نعرے دے کر جہاں فانی سے کوچ کر گئے۔
غرض کوئی علمی موشگافیاں دکھا کر چلا گیا کسی نے غلط نظریات میں الجھا کر اسے کمال تصور کیا۔ کسی نے انسانیت کو خاک وخون میں تڑپانے سے لطف حاصل کیا مگر حضورۖ کے انقلاب سے انسانیت کو رہنمائی’ امن ‘ہدایت و نور ملا ہے۔
اور آپۖ کے ارشادات آج کے مہذب انسان کے لئے بھی اسی طرح مفید اور حیات بخش ہیں۔ جس طرح 1500 سال قبل کے انسان کے لئے تھے۔ ان کی روشنی اور تابانی میں ذرا فرق نہیں آیا۔اخلاق کی جھلک’ کردار کی بلندی’ امانت ‘دیانت اور انسانیت کے لئے پیار جہاں بھی ہے وہ حضور صلی اللہ علیہ وسلم کا دیا ہوا ہے۔ آپ کی بتائی ہوئی باتیں آج بھی بڑے بڑے سائنس دان پڑھتے ان سے ہدایت و رہنمائی حاصل کرتے اور قلب سلیم رکھنے والے آپ کے آخری نبیۖ ہونے کی شہادت دیتے ہیں۔
اسلام کے دیئے ہوئے معاشی’ معاشرتی ‘سیاسی عدل اور خاندانی نظاموں کا جو بھی حصہ جانے انجانے میںکہیں بھی نافذ ہے دنیا اس کی برکات حاصل ہورہی ہیںاور مجموعی طور پر معاشرے ‘نظام اور اسلام کی بخشی ہوئی اچھائیوں کے طفیل ہی ترقی کر رہے ہیں۔ کئی معاشرے صرف سچ کی بنیاد پر آگے بڑھ رہے ہیں’ بعض ممالک صرف محنت کی بنیاد پر دنیا میں نام پیدا کرچکے ہیں۔
جاپان انسانی حقوق کی بناء پر پہچان بنا چکا ہے۔اسی طرح معاشرے سے لے کر فرد تک اسلامی تعلیمات کی برکات پھیلتی ہیں۔
حضور انور ۖ سے قبل افریقہ اور یورپ میں غلام بنانے کے بھیانک مناظر دیکھنے میں آئے ہیں ۔تاریخ گواہ ہے کہ کچھ لوگوں کو دہشت جمانے کی غرض سے بے دردی سے ہلاک کردیا جاتا اور باقیوں کو غلام بنا لیا جاتا تھا اور غلامی کی بھی اس حد تک گری ہوئی مثالیں ان لوگوں نے قائم کیں کہ اپنے معزز مہمانوں کے سامنے شراب و شباب سرو کرنے کے بعد ان کے ہاتھوں میں تیر دے دیئے جاتے ۔ غلاموں کو سامنے کونے میں بٹھا دیا جاتا اور تیر غلام پر برسائے جاتے۔ جوں جوں غلام تڑپتا تو مہمان محظوظ ہوتےِ جبکہ سرور کائنات نے زید بن حارثہ سے ایسا سلوک کیا کہ وہ اپنے والد اور چچا کے ساتھ جانے سے انکاری ہوگئے اور حضورۖ سے چمٹ گئے۔ اس پر تاریخ گواہ ہے کہ نبوت سے پہلے دور میں حضورۖ زید کو کعبے میں لے گئے اور اعلان کیا کہ آج سے زید کو زید بن محمد کہا جائے۔
قرآن پاک کے نزول کی اولین سورتوں میں سورہ بلد میں ”گردنیں آزاد کرو” کی واضح ایک آیت موجود ہے جبکہ آگے چل کر غلامی کے ادارے کو تدریج کے ساتھ مکمل طور پر اسلام نے ختم کردیا۔
میں تو سمجھتا ہوں کہ اصل روشنی اسلام ہی کے پاس ہے یہ مغرب کے پاس جو روشنی ہے وہ اس قسم کی روشنی ہے جو چور اور ڈکیت کے ہاتھ میں ہوتی ہے۔ وہ اس لائٹ سے اپنے گھر کا راستہ نہیں ڈھونڈ رہا ہوتا مگر دوسرے کے گھر اور دوسرے کے مال کی طرف ہدایت و رہنمائی لے رہا ہوتا ہے۔ روشنی وہی ہوتی ہے جو انسان کو انسانیت کا سبق دے۔ ڈیزی کٹر پھینکنے کے بعد بسکٹوں کے ڈبے پھینکنے سے خداوند کبھی خوش نہیں ہوتا۔
حضورۖ کی تعلیمات پر نگاہ دوڑائی جائے تو حیرانگی ہوتی ہے کہ جو بات آج ہم لمبی لمبی تقاریر میں نہیں کہہ پاتے آپ نے چند جملوں میں کہہ ڈالیں۔ مکہ سے مدینہ تشریف لانے پر آپۖ نے جو خطبہ ارشاد فرمایا جو ایک منٹ سے کم وقت کا تھا اور خطبہ حجة الوداع کے موقع پر آخری تاریخی خطبہ بھی مکمل لکھ لیا گیا اور اس کا وقت بھی دس منٹ سے زائد نہیں ہے۔
آیئے آپۖ کی انسان کے حوالے سے فرمائے گئے ارشادات کا جائزہ لیتے ہیں’میرا یہ آج بھی دعویٰ ہے کہ جو لوگ پیغمبر اسلام کے حوالہ سے نفرت انگیز تحریریں لکھتے ‘ توہین آمیز کارٹون بناتے اوردل آزار فلمیں دکھاتے ہیں ۔ ان تک محسن انسانیت کی تعلیمات حقیقی طور پر پہنچ ہی نہیں سکیں۔
اس موقع پر میں آپ ۖ کے مدینے داخل ہونے والے خطبے پر کچھ عرض کرنا چاہوں گا۔
آپ ۖنے فرمایا”سلام کو عام کرو” اور باہم کھانے کھلایا کرو ‘صلہ رحمی کیا کرو’رات کے اس پہر نماز پڑھا کرو جب لوگ سو رہے ہوں۔ تم جنت میں سلامتی کے ساتھ داخل ہوجائو گے۔
سلام ایک دعا ہے یعنی تم پر سلامتی ہو۔ اس کی تفصیل میں حضورۖ نے دوسرے موقع پر فرمایا کہ مسلمان وہ ہے جس کی زبان اور ہاتھ سے دوسرے مسلمان محفوظ رہیں۔
مزید برآں لفظ مسلمان کو بھی اپنی ایک حدیث میں واضح کردیا کہ جو کوئی ہماری طرح نماز پڑھے اور ہمارے قبلے کی پیروی کرے وہ مسلمان ہے۔ آپ ۖ یہاں تک مسلمانوں کے لئے رئوف و رحیم ہیں کہ آخری خطبے میں آپۖ نے یہ بھی واضح کردیا کہ مسلمان کی جان و مال ‘عزت اور آبرو دوسرے مسلمان پر حرام ہے اور میرے غیر مسلم بھائیوں کو یہ جان کر خوشی ہوگی کہ حدیث قدسی میں حضورۖ نے ہمیں آگاہ کیا کہ اللہ تعالیٰ فرماتا ہے۔
”لوگ میرا کنبہ ہیں” اور قرآن میں آیا کہ جو کوئی ایک انسان کی جان بچائے گا اس نے گویا پوری انسانیت کی جان بچائی۔ آپۖ کے ارشاد کے دوسرے حصے میں فرمایا گیا کہ آپس میں کھانے کھلایا کرو۔ ہمیں معلوم ہے کہ درندے ‘حیوان اور انسان میں فرق یہ ہے کہ درندہ شکار مار کر چیڑپھاڑ کرتا ہے۔ اپنا پیٹ بھرتا اور باقی کو وہیں پھینک دیتا ہے۔ حیوان کو جو دیا جائے وہ اسے کھا لیتا اور باقی پر گندگی کر دیتا ہے جبکہ انسان اپنا کھانے کے بعد باقی اپنے بھائیوں کو دے دیتا ہے۔ حضورۖ کی تعلیمات اس سے بھی ایک درجہ آگے ہیں۔آپۖ نے ایسے لوگ تیار کردیئے جنہیں میدان کار زار میں بھی کچھ پینے کو ملا ہے تو اسے اگلے زخمی بھائی کی طرف بڑھانے کا اشارہ کیا۔ گویا اسلام پہلے دوسرے بھائی کو کھلا کر پھر خود کھانے کا درس دیتا ہے حضورۖ کے ارشادات کے مطابق اگر کسی کا پڑوسی بھی بھوکا سویا ہوا ہو اور ہم نے پیٹ بھر کر کھانا کھایا ہو تو نہ صرف ہمارا یہ لقمہ حرام بن جائے گا بلکہ اس سے بڑھ کر ایسے شخص کا حضورۖ پر کوئی ایمان نہ ہونے کا سر ٹیفکیٹ بھی سرکارۖ نے جاری فرما دیا ہے۔
صبح تہجد کی نماز سے انسان کے دل میں نرمی پیدا ہوتی ہے ۔ خدا کی محبت اور اس کے بندوں سے پیار بڑھتا ہے۔ سورہ مزمل کے مطابق ایسا کرنے سے نفس پر ضرب کاری لگتی ہے تکبر وغرور جاتا رہتا ہے۔ انسان کے منہ سے اچھی اور پیاری بات نکلتی ہے۔ دعوت دینے کے آداب سمجھ میں آتے ہیں’ بقول اقبال
عطار ہورومی ہو رازی ہو غزالی ہو
کچھ ہاتھ نہیں آتا بے آہ سحر گا میں
یہ عمل انسان کے اندر برداشت اور حوصلہ بھی پیدا کرتا ہے جیسا کہ حضورۖ پر ایک مشرکہ بوڑھی کوڑا پھینکتی تھی جب چند دن اس نے ایسا نہ کیا تو معلوم ہوا کہ وہ بیمار پڑگئی ہے ۔ اس دن سرکارۖ اس کے گھر اس کی عیادت کرنے تشریف لے گئے۔ہمیں بڑی واضح ہدایات ہیں کہ ”تم میں سے بہتر وہ ہے جو لوگوں کے لئے نفع بخش ہو” انسانوں کے درمیان برابری کا درس آخری خطبہ میں جس شان سے دیا گیا ہے وہ اس بات سے عیاں ہے کہ UN کے آئینی چارٹر کی شقیں اس خطبہ رسولۖ سے لی گئی ہیں۔اسی طرح پوری شرح صدر کے ساتھ یہ بات کہی جاسکتی ہے کہ اگر کسی فرد’تنظیم یا ملک کا مقصد انسانیت کی فلاح قرار پایا ہے تو اسے اپنے اس مقصد میں کامیاب ہونے کے لئے اسوہ رسولۖ ہی اپنا لائحہ عمل قرار دینا ہوگا۔ جس قدر آپۖ کے طریقہ کار’فرمودات اور طرز ِ حیات پر عمل ہوگا اسی قدر انسانی فلاح کی منزل قریب تر ہوگی۔ اقبال نے اسی راز کو ایک مصرے میں یوں بیان کیا تھا’
دہر میں اسم محمدۖ سے اجالا کردے
اور میں قرآن مجید کی اس آیت پر اپنی تحریر کا خاتمہ کروں گا ”اگر تم اللہ سے محبت کرتے ہو تو میری (رسولۖ اللہ کی) اتباع کرو اللہ تم سے محبت کرے گا”۔

خیر اور شر کا تصادم فطری اور دائمی ہے

ایسا کبھی ہوا نہیں کہ دنیا سے شر مکمل طورپر ختم ہوگیا ہو۔انسان کے اندر شر کی قوتیں خیر کی طاقتوں سے ہمیشہ نبردآزما رہتی ہیں ۔آپ اسے حضرت انسان کی فطرت کہہ سکتے ہیں ۔ان شرانگیز طاقتوں کو آپ نیگیٹیو فورسز کا عنوان دے سکتے ہیں ۔قرآن انہیں شیطانی طاقتوں کا نام دیتا ہے ۔ہر منفی سوچ ،ہر تخریبی تصور ہر انسان دشمن منصوبہ ،ہرابلیسی حربہ چاہے اس کا محل وقوع انسان کی اپنی ذات ہو ،اس کا ماحول ہو،ملک ہویاسرزمین ہو

،شیطان ہی کی کارستانی قرار پائے گی۔ہوس ،لالچ،ظلم ،استبداد ،بدعنوانی ، بدامنی،بد عہدی ،دھوکہ دہی ،نوسر بازی ،بزدلی ،منافقت،ہیجان انگیزی ،خیانت، جھوٹ ، فراڈ ،بے ادبی ،فریب کاری ،بعض وعناد،انا پرستی ،چوری ،ڈاکہ زنی ،قتل وغارت اور وحشت وبربریت یہ تمام وہ بیماریاں ہیں جنہیں شیطان نے ایجاد کیا ہے اور وہ کمال ہوشیاری کیساتھ انسانی دل ودماغ میں ان کی پیوندکاری کرتا ہے اور انسان کو شرکے راستے پر ڈال دیتا ہے ۔تشکک اور بے یقینی ،مایوسی اور غفلت جیسے ہتھیاروں سے مسلح ہوکر شیطان جب حملہ آور ہوتا ہے تو بڑے بڑے پختہ عزم انسان ریت کا ڈھیر ہوجاتے ہیں ۔شیطان کا تصور ہر مذہب اور عقیدے کے پیروکاروں میں اپنے اپنے ناموں اور حوالوں سے موجود ہے ۔قرآن نے اس تصور کو بڑے بلیغ پیرائے میں بیان فرمایا ہے ۔

”شیطان نے کہا میں بھی اب تیری سیدھی راہ پر (چلنے والے )انسانوں کی گھات میں لگارہوں گا۔آگے اور پیچھے دائیں اور بائیں ہر طرف سے انہیں گھیروں گا اور توان میں سے اکثر کو شکر گزار نہ پائے گا۔“(سورة اعراف)

حدیث نبوی ہے :۔

”شیطانی وسوسے تمہارے وجود میں خون کی طرح گردش کرتے ہیں “

فطرت نے انسان کو شیطان کے مقابلے میں تنہاءنہیں چھوڑا ۔یہ ہرگز نہیں کہ انسان شیطان کے مقابلے میں بے بس پیدا کیا گیا ہے ۔خالق نے انسان کو پیدا کرتے وقت پانچ چھ فٹ قد کے اس جسم کے اندر ہی وہ آلہ لگادیا ہے جو انسان کو قدم قدم پر آگاہ کرتا ہے کہ تم اب شیطانی قوت کے زیر اثر آرہے ہو۔جس طرح گاڑی اوورسپیڈ ہونے پر سرخ رنگ کی بتی اور آلارم بجنا شروع ہوجاتے ہیں اسی طرح انسان کے اندر ضمیر نام کا ایک آلارم بجنا شروع ہوجاتا ہے ۔غافل سے غافل انسان بھی یہ نہیں کہہ سکتا کہ اسے اچھائی اور برائی میں تمیز نہیں ہے ۔وہ جنگل میں رہتا ہو ۔یا بازاروں کے شورشرابے میں زندگی بسر کرتا ہو،حرف شناس ہویا ان پڑھ ۔رنگ ،نسل ،زبان اور عقیدے کی تفریق کے بغیر جوروح بھی لباس فطرت میں ڈھلی ہے اسے ضمیر کا آلہ لگاکر بھیجا گیا ہے ۔

ارشاد ہوتا ہے ۔

اور گواہ ہے وہ نفس انسانی (ضمیر) اور اسکی ذات جسے ہم نے ہموار کیا۔پھر اس کی بدی اور پرہیز گاری اس پر الہام کردی۔یقینا فلاح پاگیا جس نے نفس کا تزکیہ کیا اور نامراد ہوا وہ جس نے اسے دبادیا۔(سورة شمس)

قرآن نے احسن تقویم کا ٹائٹل ہی انسان کو اسی لئے عطا کیا ہے کہ وہ واحد جاندار ہے جو اچھائی اور برائی میں تمیز کرسکتا ہے ۔ جس طرح شیطان منفی ہتھکنڈوں سے مسلح ہے اسی طرح انسان اپنے ضمیر کی زبردست طاقت سے مز ّین ہے ۔یہی وجہ ہے کہ ابتدائے آفرینش سے لیکر آج تک شر اور خیر باہم نبردآزما رہتے ہیں ۔ایسا کبھی ،کسی دور میں نہیں ہوا کہ شر غالب آجائے اور خیر کی قوت مفتوح ہوجائے ۔ایسا ہوتا تو انسانیت کا قافلہ بیچ راہ کے فنا ہوچکا ہوتا ۔آج ساڑھے چھ ارب انسانوں کا وجود اس بات کا ثبوت ہے کہ خیر کی طاقتیں مفقودنہیں بلکہ موجود ہیں ۔

بقول اقبالؒ:۔

ستیزہ کار رہا ہے ازل سے تا امروز

چراغ مُصطفوی سے شرارِ بوالہبی

سوئے ہوئے ضمیر کو الہامی کتب ہی جگاسکتی ہیں

آپ اپنے گھر سے سکیورٹی آلارم کو ہٹا دیجئے یا اس کی تاریں کھینچ دیں تو پھر واردات کرنے والوں کو کوئی خطرہ نہیں رہتا ۔نہ آلارم بجے گا نہ آپ جاگیں گے ۔نہ اپنے مال واسباب کا تحفظ کرسکیں گے ۔نفسیاتی ماہرین کا کہنا ہے کہ انسان کو اگر مسلسل ایک ماہ تک کسی واقعہ پر ضمیر نہ جھنجھوڑے تو سمجھئے کہ انسان کا ضمیر سورہا ہے ۔یعنی الارم کا کنکشن کٹ گیا ہے ۔حقیقت یہ ہے کہ ضمیر کبھی نہیں سوتا ۔دراصل انسان اپنے کان بند کرلیتا ہے ۔طیش اور عیش انسانی دل ودماغ کی دوایسی حالتیں ہیں جن میں مبتلا ہوکر انسان اپنے جاگے ہوئے ضمیر کو بار بار سلانے کی پریکٹس کرتا ہے ۔شیطان کی جیت کا یہ عجب منظر ہوتا ہے ۔یہ وہ حالت ہوتی ہے کہ انسان خود اپنے آپ کو ماررہا ہوتا ہے ۔وہ اس قدر شقی القلب ہوجاتا ہے کہ اپنی زندگی کے سب سے بڑے محافظ یعنی ضمیر کو اپنے ہاتھوں سے بے بس کردیتا ہے ۔ایسی حالت سے نکلنے کیلئے ہی عقیدے اور ایمان کی ضرورت پڑتی ہے ۔خالق کائنات نے مردہ ضمیر انسانوں کو جگانے اور واپس فطرت کی طرف لوٹانے کیلئے اپنے پسندیدہ انسانوں یعنی پیغمبروں کے ذریعے زندگی کی گائیڈ بکس اتاری ہیں ۔!

ارشادرباّنی ہے :۔

”اے نبی ﷺ ہم نے تم کو شہادت دینے والا ،بشارت دینے والا اور خبردار کردینے والا بناکر بھیجا ہے تاکہ اے لوگو تم اللہ اور اس کے رسول پر ایمان لاﺅ،اس کے رسول کا ساتھ دو اس کی تعظیم وتوقیر کرو اور صبح شام اللہ کی تسبیح کرو۔“(سورة فتح)

مذہب ،دین اور ایمان یہ کوئی ایسی غیر ضروری یا نمائشی اشیاءنہیں ہیں جنہیں انسانی زندگی کو محض زیبا بنانے کیلئے اتارا گیا ہو ۔زندگی کی گاڑی کو کامیابی کی پٹڑی سے نہ اترنے دینا اور متعین وقت میں منزل تک پہنچا دینے کیلئے ضمیر کافی ہے لیکن چونکہ انسان اس آلارم کو جان بوجھ کر سلادیتا ہے اس لئے اسے واپس پٹڑی پر لانے کیلئے الہامی ہدایات کی ضرورت ہوتی ہے ۔جس طرح کار بنانے والے کو علم ہے کہ کار کا مینوئل کیا ہوگا ۔اسی طرح انسان کے خالق کو علم ہے کہ انسان کی کامیابی کیلئے کون کون سی حدود وقیود اور کس طرح کی احتیاطی تدابیر کی ضرورت ہوگی ۔خالق کائنات نے بڑی محنت ،انتہائی محبت اور بے پناہ چاہت کیساتھ وحی کے ذریعے ہر امت ہر گروہ کیلئے ہدایات نازل فرمادی ہیں ۔

ارشاد رباّنی ہے ۔

”یہ بڑی بابرکت کتاب ہے جو تمہاری طرف نازل کی گئی ہے تاکہ یہ لوگ اس کی آیات پر غور کریں اور عقل وفکر رکھنے والے اس سے سبق حاصل کریں۔“(سورة ص)

انسانیت کا اہم مسئلہ

انسانیت کے سارے مسائل کی جڑ الہامی تعلیمات سے دوری ہے ۔الہامی تعلیمات سے گریز نے ہی آج کے انسان کو شیطانی قوتوں کے آگے بے بس بناکر رکھ دیا ہے ۔ سائنس اور سائنسی طرز فکر کا سب سے بڑا نقصان یہ ہے کہ اس نے انسانی ذہنوں کو شک میں مبتلا کردیا ہے ۔جب تک کسی معاملے میں انسان خود تجربات کرکے کسی نتیجے تک نہ پہنے وہ معاملے کی صداقت اور حقانیت کو تسلیم کرنے پر آمادہ ہی نہیں ہوتا ۔انسانی ذہنوں نے وحی اور الہام کو بھی سائنس کی کسوٹی پر پرکھنے کی کوشش کی ہے انسانی ذہن محسوسات تک محدود بنایا گیا ہے ۔اس لئے وہ اللہ ،رسولﷺ اور کتاب اللہ ،جیسے الہامی حقائق کو مشکوک نگاہوں سے دیکھتا ہے ۔جب کہ الہامی ہدایات کا تقاضا یہی ہے کہ ان کی حقانیت میںرتی برابر شک نہ کیا جائے ۔خواہشات اور تعصبات میں پڑے بغیر اس کے ذریعے تعقل ،تفکر اور تذکر کیا جائے ۔اس برترکلام ہی نہیں اپنی زندگیوں میں حکم کا درجہ دیا جائے ۔اس سے ہدایت پاکر اس پر عمل کرنے کا ارادہ اور اس کے تقاضے جب سمجھ میں آجائیں تو چند لمحات ضائع کیے بغیر اس کے سامنے سرنگوں کردیا جائے۔

گو کہ اب مابعد طبیعات کے علم پر بھی بہت کام ہورہا ہے اور امید رکھنی چاہیے کہ انسانیت اپنی اجتماعی فطرتی بصیرت کے ذریعے اپنے خالق حقیقی کو جلد پہچان لے گی اور الہامی کتابوں اور ان کے ذریعے پہنچنے والی کائناتی سچائیوں پر بحیثیت مجموعی ایمان لے آئے گی لیکن قافلہ انسانی ہنوز شبہات کے اندھیروں میں غلطاں وپیچاںہے ۔بظاہر انسان نے ستاروں پر کمندیں ڈال لی ہیں ،سورچ کی روشنی کو گرفتار کرلیا ہے ،کائنات کے ظواہر کو ایک ”مٹھی “میں سمو دیا ہے ،کمپیوٹر سے آگے نینو ٹیکنالوجی کی طرف بڑھ رہا ہے ۔لیکن اس سب علم ودانش ،تحقیق اور تخلیق کے باوجود لائف مینوئل (الہامی ہدایات)کی سچائی پر ڈگمگاتا ایمان اسے تسخیر کائنات کیلئے یکسوئی مہیا نہیں کررہا ہے ۔اور احسن تقوم کا جو اعزاز فاطر ارض وسما نے عطاءفرمایا ہے انسان ابھی اس اعزاز سے پوری طرح لطف اندوز نہیں ہوپارہا ۔قافلہ انسانیت کا سب سے بڑا مسئلہ یہ ہے کہ شک وشہبات نے اجتماعی ضمیر مردہ کردیا ہے اور الہامی تعلیمات سے دوری کی وجہ سے اس کے ضمیر کو جگانے والے تمام ذرائع بے اثر ہورہے ہیں ۔آج کی ہر ترقی ایک نئی الجھن کی نشاندہی کرتی ہے ۔ہر ایجاد کسی نئی تباہی کا پیش خیمہ بن رہی ہے ۔!محبان انسانیت کو آگے بڑھ کر رہنمائی کرنی چاہیے اور الہامی قوائد وضوابط کی تشہیر کرکے تیز رفتار گاڑی کو نیکی اور راست روی کی پٹڑی سے سرکنے نہیں دینا چاہیے ۔ورنہ طیش اور عیش ،یاسیت اور جہالت کی شیطانی قوتیں اس خوبصورت زمین کو جہنم بنادیں گی۔!

(بقول علامہ اقبال)

ڈھونڈنے والا ستاروں کی گزرگاہوں کا

اپنے افکار کی دنیا میں سفر کرنہ سکا

جس نے سورج کی شعاعوں کو گرفتار کیا

زندگی کی شب تاریک سحر کرنہ سکا

پاکستان میں خیر کی قوتیں مغلوب کیوں؟

کسی بھی معاشرے اور تہذیب میں جب تک خیر کی قوتیں غالب رہتی ہیں معاشرے تباہ نہیں ہوتے ۔بداطمینانی نہیں پھیلتی اور انتشار گلی کوچوں میں ننگا نہیں ناچتا ۔ملک ،سلطنت اقتدار اور اختیار یہ وہ انعامات ہیں جو فطرت خوش ہوکر کسی قوم ،گروہ یا فرد کیلئے ممکن بنادیتی ہے ۔لیکن جہاں یہ انعامات ہیں وہیں آزمائش بھی ہوتی ہے ۔پاکستان ،ایک نیا ملک ،ایک انعام تھا لیکن ہم نے اپنے زندہ ضمیروں کو ہوس اور لالچ کے ہتھوڑے مارمارکر ادھموا کردیا اور آج یہی انعام ہمارے لئے بہت بڑی آزمائش بن چکا ہے ۔جب گھر کے باسیوں کو اپنے گھر کے درودیوار سے خوف آنے لگے تو اس سے بڑی آزمائش کیا ہوگی ۔دانشور اور غم خوار حلقے ہمیں کسی بڑے قومی حادثے سے بچانے کیلئے نت نئے فارمولے اور حل پیش کرتے ہیں ۔کوئی گڈ گورنس کی بات کرتا ہے ۔کسی کو صدارتی طرز حکومت میں مسائل حل ہوتے دکھائی دیتے ہیں ،کئی مغربی جمہوریت ہی کو کامل حل ثابت کرتے ہیں ۔کسی کا خیال ہے کہ سخت ترین قانون ہمیں شیطانی بیماریوں سے نجات دلاسکتا ہے ۔کسی کو تمام مسائل کی جڑ فوجی اقتدار دکھائی دے رہا ہے ۔کوئی اسلامی انقلاب کا جھنڈا لہرانے میں نجات کی امید لگائے بیٹھا ہے ۔غرض جتنے ذہن ہیں اتنے ہی فارمولے گردش کررہے ہیں ۔پاکستان اس وقت عملی طورپر تیسری دنیا کا چوتھے نمبر کا ملک ہے جس میں ہر تخریبی قوت ،ہر منفی جذبہ اور ہر شیطانی حربہ پوری طاقت اور قوت کیساتھ پھل پھول رہا ہے ۔شرکے مقابلے میں خیر دبکا بیٹھا ،منتظر فردا ہے ۔!

وہ کونسا جذبہ ہے جو ہمیں جھوٹ بولنے سے روکے گا ۔جو ہمیں ذخیرہ اندوزی سے بازرکھ سکتا ہے ۔ہم کیوں ہوس پرستی چھوڑیں ۔کس کی خاطر بدعنوانی دھوکہ دہی ،بُغض وعناد سے باز رہیں ؟منافقت ترک کریں ؟ایک دوسرے کو روند ڈالنے کی روش ترک کرنے سے کیا حاصل ہوگا ؟۔ضمیر کو جگاڈالنے کا فائدہ کیا ہے ؟نت نئی فریب کاریاں کس کی خاطر چھوڑ دی جائیں ؟۔یہی وہ سوالات ہیں جو ہمیں بحیثیت قوم تذبذب میں مبتلا رکھتے ہیں اور ہم اپنی اس جنت نظیر سرزمین کو شیطانی جذبوں کے سبب جہنم زار بنارہے ہیں ۔کوئی قانون ۔کوئی ضابطہ ،کوئی اتھارٹی ،کوئی خوف اور کوئی شوق ہمیں اس وقت تک راہ راست پر نہیں لاسکتا جب تک ہم بحیثیت قوم اللہ تعالیٰ کی طرف سے زندگی کے آغاز اور انجام کے بارے میں ارشاد فرمائے گئے احکامات پر کامل یقین پیدا نہیں کرتے ۔

ارشاد ہوتا ہے ۔

”اہل کتاب اورمشرکین میں سے جن لوگوں نے کفر کیا وہ یقینا جہنم کی آگ میں جائیں گے اور ہمیشہ وہاں رہیں گے ۔یہ لوگ بدترین خلائق ہیں ۔اور یقینا جو لوگ ایمان لائے اور نیک عمل کیے وہ بہترین خلائق ہیں ۔ان کی جزاءان کے رب کے ہاں دائمی قیام کی جنتیں ہیں جہاں وہ ہمیشہ ہمیش رہیں گے ۔اللہ ان سے راضی اور وہ اپنے رب سے راضی ہوئے ۔یہ سب اس کیلئے ہے جس نے اپنے رب کا خوف کیا ہو۔(البینہ )

جب مجھے یقین ہوگا کہ مجھے دنیا میں کئے گئے ہر عمل کا روز محشر حساب دینا ہے تو میں کسی سماجی قانون ،کسی داروغے کے نہ ہوتے ہوئے بھی خیر پر کار بند رہوں گا ۔جب مجھے یقین ہوگا کہ شیطانی قوتوں کے تابع کئے گئے افعال مجھے دہکتی آگ میں جلائیں گے تو مجھے میرے اندر کا انسان برائیوں سے روکے گا ۔جب مجھے یقین ہوگا کہ رزق حلال کمانے سے مجھے جنت ملے گی جس میں میرے وہم وگمان سے بھی کہیں زیادہ نعمتیں مختص ہوں گی تو پھر میں چند اضافی ٹکوں کے عوض کسی کا حق نہیں ماروں گا ۔زندگی بعد از موت ،جنت کا شوق اور دوزخ کا خوف ،اللہ کی دوستی میں پختہ یقین اور اعمال نامے کی خوبصورتی ،یہی وہ ایمان ہے یہی قرآنی تعلیمات ہیں جو ہر مذہب ،ہر عقیدے میں تھوڑی بہت تبدیلیوں کے ساتھ ایک جیسے ہیں ۔اگر آج کا پاکستانی اپنے اپنے عقیدے کے مطابق الہامی تعلیمات پر کاربند ہوجائے تو شر کے ہاتھوں مغلوب یہی سولہ کروڑ انسان خیر کی بہت بڑی قوت بن جائیں گے ۔جب تک اکائی سیدھی نہیں ہوتی ،اجتماعیت ٹیڑھی ہی رہے گی ۔اصلاح احوال کا واحد حل صالحیت میں ہے اور انسانی دل ودماغ زیادہ دیر تک صالح اعمال سے دور نہیں رہ سکتے ۔اس لئے میرا ایمان ہے کہ پاکستان کے تمام مسائل کا حل اب بھی ممکن ہے ۔شرط یہ ہے کہ ہرپاکستانی قرآن کی فطرتی تعلیمات سے جڑ جائے ۔اگر کوئی عیسائی ہے تو وہ حضرت عیسیؑ کی آفاتی ہدایات پر عمل کرکے کسی مذہب اور عقیدے نے جھوٹ کو نیکی قرار نہیں دیا ،ظلم کو جواز نہیں بخشا ،خیانت کو صلاحیت نہیں کہا ۔انسان دشمنی کو بہادری قرار نہیں دیا ۔کرپشن کو عزت کا موجب نہیں ٹھہرایا ۔

ہمیں اپنے حیوانی ،عقلی، روحانی اوراخلاقی وجود کا تذکیہ قرآن مجید کی تعلیمات کے ذریعے کرنا ہوگا ۔یہی کردار سازی کا بہترین ذریعہ ہے ۔کیونکہ کردار سازی اس وقت تک ہو ہی نہیں سکتی جب تک انسان کے اندر ایمان کا بیج نہ ہو۔ ضمیر اور الہامی تعلیمات کی خوراک دے کر ایمان کا پودا ہرا بھرا کیا جاسکتا ہے ۔یہی انسانی عروج کی اساس ہے۔

مکالے کے آخر میں پاکستانی بہن بھائیوں کو قرآن یعنی انسانی ہدایت کے مرکز سے جڑے رہنے کی ترغیب دلارہا ہوں ۔بقول شاعر:۔

اپنے مرکز سے اگر دور نکل جاﺅ گے

خواب ہو جاﺅ گے افسانوں میں ڈھل جاﺅ گے

اپنی مٹی پہ ہی چلنے کا سلیقہ سیکھو

سنگ مر مر پہ چلو گے تو پھسل جاﺅ گے

دے رہے ہیں جو لوگ تمہیں رفاقت کا فریب

ان کی تاریخ پڑھوگے تو دہل جاﺅ گے

افسوس کہ ہمارے ہاں کامیابی اور ناکامی کے معیار اقدار پر استوار ہونے کی بجائے اختیاروزر اور اقتدار جیسی مصنوعی بنیادوں پر اٹھائے جارہے ہیں۔جو لوگ اصولوں کیساتھ زندگی گزارتے ہیں وہ ہمارے نزدیک ناکام،بھولے اور بیوقوف قرار پاتے ہیں۔جھکنے والے رفعتیں پاتے ہیں اور بااصول لوگ راندہ درگاہ ہوجاتے ہیں۔ہمارے معاشرے کے بگاڑ کا سبب بھی یہی غلط معیارات ہیں۔ہمارے دین نے ہمیں حق کی گواہی دینے کا درس دیا ہے۔اسلام کی ابتدا ہی کلمہ حق کہنے سے ہوئی تھی۔حق گوئی ایک اعلی وصف سمجھا جاتا تھا۔بااصول انسان کی توقیر ہوتی تھی۔سچ بولنے والے کو بہادر ہونے کا لقب ملتا تھا۔جابر سلطان کے سامنے ڈٹ جانے والے عوام کیلئے روشنی کا مینار ہوتیتھے۔معاشرہ انہی روشن میناروں کی روشنی میں صراط مستقیم پر چلتا رہتا تھا۔جسٹس ریٹائرڈ وجیہہ الدین احمد ہمارے معاشرے کیلئے روشنی کا مینار ہیں۔ لیکن افسوس کہ کچھ کم ظرفوں نے اس روشنی کے اس مینارکو گرانے کی کوشش کی۔

جسٹس وجیہہ الدین نے جنرل پرویز مشرف کے سامنے جھکنے سے انکار کردیا۔تحریک انصاف کے اندر مالی اور سیاسی بے ضابطگیاں پکڑیں اور عمران خان سے کہا کہ وہ غلط لوگوں سے نجات پائیں۔وہ سندھ ہائیکورٹ کے چیف جسٹس تھے تو سندھ ہائیکورٹ کے معاملات کو بغیر کوئی حکم سنائے درست کیا۔ان کے بارے میں مشہور تھا کہ وہ حکم نہیں سناتے۔وہ قانون کا صرف حوالہ دیتے ہیں اور گنہگاروں کو یقین ہوتا ہے کہ جسٹس صاحب قانون پر عملدرآمد کروا کر رہیں گے۔وہ سپریم کورٹ آف پاکستان کے سینئر جسٹس رہے۔انہیں بہت عزت ملی۔انہوں نے سی پی او کے تحت حلف اٹھانے سے انکار کر دیا۔وہ چیف جسٹس بحالی تحریک کے روح رواں رہے۔دہلی میں پیدا ہوئے اور آزادی کے سال کراچی منتقل ہوگئے تھے۔جسٹس صاحب کے والد نے ان کی تربیت اصول پسندی پر کی۔اور یہی اصول پسندی آج بھی ان کی شخصیت کا طرہ امتیاز ہے۔وقت لیکر ان کی رہائش گاہ واقع ڈی ایچ اے کراچی حاضر ہوا۔بڑی شفقت سے پیش آئے۔یہ طویل نشست تھی۔چیدہ چیدہ نکات اس طرح ہیں۔میں نے عرض کی کہ جسٹس صاحب،بیت اللہ الحرام کی تعمیر کے بعد سیدنا ابراہیم علیہ السلام نے مکہ مکرمہ کے لیے جو دعائیں کیں ان میں سے ایک دعا یہ بھی تھی: رب اجعل ھذا بلدا آمنا وارزق اھلہ من الثمرات.( البقرہ:) اے میرے رب! اس کو پر امن شہر بنادیجئے اور یہاں کے رہنے والوں کو قسم قسم کے پھلوں سے رزق عطا فرمائیے۔ پاکستان بھی اسلام کی بنیاد پر بنا۔لیکن یہاں نہ امن ہے نہ رزق وافر ہے؟جسٹس صاحب فرمانے لگے کہ خوشحال معاشروں کیلئے پہلی شرط امن ہے۔اس دعا میں بھی پہلی بات امن کی گئی ہے۔افسوس کہ ہم اپنے ملک میں پہلی شرط ہی پوری نہیں کرسکے۔پھر انہوں نے کچھ وجوہات تفصیل سے بتائیں۔ ان کا کہنا تھا کہ سربراہ مملکت سے لیکر ہر ادارے کا سربراہ اہل اور امانت دار ہونا ضروری ہے۔فنانشل مینیجمنٹ ملکی ضرورتوں کے تابع ہونی چاہیے۔یہ نہیں کہ کسی کے دبا پر آپ اپنے روپے کی قدر گھٹاتے جائیں اور دن بدن مقروض ہوتے جائیں۔یہ عمل تجوری میں چھید کرنے کے مترادف ہے۔غریب لوگوں کے بارے میں اعدادوشمار کا حوالہ دیکر جسٹس صاحب نے بتایا کہ عام مزدور کی تنخواہ اس وقت پچھتر ہزار روپے ماہانا ہونی چاہیے۔جسٹس صاحب نے کہا کہ کرپشن پر زیرو ٹالرینس ہونی چاہیے۔ان کے اسی مقف کی وجہ سے ہی شائد پارٹی سے نکال دیا گیا تھا کیونکہ انٹراپارٹی الیکشن میں ہر طرح کی کرپشن سامنے آئی تھی۔میڈیا کے بارے میں جسٹس وجیہہ الدین کہہ رہے تھے کہ ملک کے دیگر شعبوں کیطرح یہ شعبہ بھی زوال کا شکار ہے۔میرا خیال تھا کہ وہ وزیراعظم عمران خان پر براہ راست تنقید کریں گے لیکن میری امید کے برعکس انہوں نے اپنی گفتگو کو اصولی بات چیت تک محدود رکھا۔حالانکہ جب انہوں نے تحریک انصاف کی مسلسل ناانصافیوں سے تنگ آکر استعفی دیا تھا تو شدید تنقید کی تھی جو قومی اخبارات میں شہہ سرخیوں کیساتھ شائع بھی ہوئی تھی۔80 برس کے جسٹس صاحب ایک مشعل کی مانند پوری آب وتاب کیساتھ اصول پسندی کی روشنی بانٹ رہے ہیں۔افسوس کہ ہم بحیثیت قوم روشنی کے ان میناروں کے قریب جانے سے ہچکچاتے ہیں۔ہمیں خطرہ رہتا ہے کہ کہیں ہم اپنی خود غرضی،جھوٹی انا اور فریب کاری کے اندھیروں سے باہر نہ آجائیں۔

پوری دنیا میں جنگوں اور تباہیوں کے نتیجے میں ہر وقت ہجرت اور نقل مکانی کا تکلیف دہ عمل جاری رہتا ہے ۔انسانی زندگی کی دشواریاں بڑھتی رہتی ہیں ۔ہر سال لاکھوں لوگ مہاجر بنتے ہیں،بے گھر ہوتے ہیں ۔یتیم اور بے سہارا بچوں کی تعداد میں اضافہ ہوجاتا ہے ۔بیواؤں اور یتیموں کیلئے زندگی ایک سزا بن جاتی ہے ۔بے بسی کی اس زندگی میں کوئی غم بانٹنے والا ہو ،کوئی پیاسے کو پانی پلائے ،کوئی بھوکے کوکھانا ،کوئی بے گھر کو چھت دے ۔مریض کیلئے دوا پہنچائے اور یتیم کے سر پر ہاتھ رکھے ۔مصیبت کا شکار انسان خوشحال انسانوں سے مدد کی امید لگائے رہتے ہیں ۔اس کار خیر کے لیے پوری دنیا میں ادارے موجود ہیں۔خیرات کرنے والوں کی کمی نہیں اور اس خیرات کو مناسب اور احسن انداز میں ضرورت مندوں تک پہنچانے والی خدمت گار تنظیمیں بھی بڑی تندہی سے یہ کام سرانجام دے رہی ہیں ۔ایک ایسا ہی نامور ادارہ خبیب فاؤنڈیشن بھی ہے ۔

اکرام بخاری دوست ہیں اور ملک کے نامور صحافیوں میں ان کا شمار ہوتا ہے ۔وہ میڈیا ہاوسز اور اخبارات میں کام کرنے والے بے آوازکارکنوں کی آوازبنے ہیں ،بہت اچھے لکھاری اور شعلہ بیاں مقرر ہیں ۔چونکہ وہ صحافی کارکنوں کی حسرت ناک زندگی کو قریب سے دیکھتے ہیں اس لیے وہ معاشرے کے پسے ہوئے طبقے کی ضرورتوں کو بھی جانتے ہیں ۔اپنے اندر پائے جانے والے خدمت خلق کے طبعی میلان کے سبب وہ خبیب فاؤنڈیشن منسلک سے ہوگئے ہیں ۔گزشتہ دنوں بخاری صاحب نے مجھے بھی یاد کیا اور کہا کہ سینئر کالم نگاروںکیلئے ظہرانہ پر ایک نشست رکھی ہے ۔بخاری صاحب طویل بیماری کے بعد روبہ صحت ہوئے تھے ،انہیں بستر علالت پر ملا تھا ۔ملاقات کا اشتیاق بھی تھا اور خبیب فاؤنڈیشن کے بارے میں بھی ایک تجسس بھی ۔
فاؤنڈیشن کے چیئرمین جناب ندیم احمد خان نے استقبال کیا اور اپنے قریب ہی بٹھا لیا۔کمال کے متحرک اور باحوصلہ انسان ہیں ۔فلاحی کام کرنا پاکستان میں بڑا مشکل ہو گیا ہے ۔میں ایک ٹرسٹ بنا کر بند کرچکا ہوں ۔سرکاری منکر نکیر اسقدر زچ کر لیتے ہیں کہ انسانوں کی خدمت کی بجائے کہیں بھاگ جانے کو جی چاہتا ہے ۔لیکن خان صاحب گزشتہ بیس برس سے اس کار خیر میں جتے ہوئے ہیں ۔خبیب فاؤنڈیشن کی فلاحی اور رفاحی سرگرمیاں نہ صرف پاکستان میں ہر وقت جاری رہتی ہیں بلکہ بیرون ممالک بھی اس کی شاخیں پوری مستعدی کے ساتھ دکھی انسانیت کا دکھ بانٹنے میں مصروف ہیں ۔یہ خان صاحب کی انسانیت سے غیرمشروط محبت ہی تھی جس کے تحت خبیب فاؤنڈیشن نے سامان خوردونوش سے بھرا ہوا بحری جہاز فلسطین پہنچانے کا عزم کیا ۔اور پھر اسرائیل نے جو کیا اور جس طرح جان جوکھوں میں ڈال کر خبیب کے کارکن اور صحافی فلسطینیوں تک پہنچے وہ انسانی تاریح کی ایک عظیم داستان ہے۔شام کے مہاجر ہوں یا کشمیر کے مظلوم مسلمان۔یہ زلزلے کی تباہی ہویا سیلاب کی صورتحال ۔غریب بچوں کی تعلیم کا معاملہ ہو یا یتیم بچوں کیلئے بورڈنگ ہاؤس کی تعمیر ۔آپ ہر محاذپر فاؤنڈیشن کو صف اول میں پائیں گے ۔اس فاؤنڈیشن کا طرہ امتیاز یہ ہے کہ ان کی طرف سے دی جانے والی امداد عارضی نہیں بلکہ ضرورتوں کے عین مطابق ہوتی ہے ۔اگر مالی مدد ہے تو وہ بھی اس وقت تک جاری رہے گی جب تک کسی ضرورت مند کی مکمل طور پر بحالی نہیں ہوجاتی ۔آپ حیران ہونگے کہ ندیم احمد خان نے زلزلہ میں جن بے سہارا بچوں کی ذمہ داری اٹھائی تھی انہیں راستے میں نہیں چھوڑا بلکہ آج وہ بچے یونیورسٹیوں تک پہنچ چکے ہیں ۔ہر سال عید قربان پر فاؤنڈیشن کے زیر انتظام پوری دنیا میں سینکڑوں جانور ذبع ہوتے ہیں اور فاؤنڈیشن کے کارکن یہ گوشت ضرورتمندوں اور قیدیوں میں بانٹتے ہیں ۔یہی نہیں بلکہ بعض لوگوںکو پکا کر کھاناکھلاتے ہیں ۔اسی طرح رمضان کے مقدس ماہ میں افطار ڈنرکا ایک خوبصورت سلسلہ چل پڑتا ہے اور خان صاحب خود بھی ایک کارکن کی طرح انتظامات میں لگ جاتے ہیں ۔خبیب فاؤنڈیشن کی سرگرمیاں دیکھ کر میں دعوے سے کہ سکتا ہوں کہ یہ فاؤنڈیشن عالم اسلام کا مایہ ناز فلاحی ادارہ بن چکا ہے ۔جو مخیر لوگ اور ادارے اور تنظیمیں خبیب فاؤنڈیشن کے فلاحی منصوبوں کیلئے فنڈز فراہم کرتے ہیں وہ لائق تحسین ہیں وہ افضل ہیں اور ان کا ثواب رب کریم کے پاس محفوظ ہے ،
قران مجید میں اللہ پاک فرماتے ہیں کہ ،
”جو اپنا مال اللہ کی راہ میں خرچ کرتے ہیں ان کا ثواب ان کے رب کے پاس ہے اور انہیں نہ کچھ اندیشہ ہوگا اور نہ غم”
حدیث مبارکہ ہے کہ دینے والا ہاتھ لینے والے ہاتھ سے افضل ہے ۔ایک اور حدیث میں ارشاد ہوتا ہے کہ صدقہ دینے سے مال کم نہیں ہوتا
کرو مہربانی تم اہل زمیں پر ۔۔خدا مہرباں ہوگا عرش بریں پر

موذی وائرس کوڈ 19 انسان ساختہ ہے یا قدرتی اس راز سے تو شائد ہی کبھی پردہ اٹھ سکے لیکن اس وباء کی نتیجے میں ہر قوم اور ملک کی صلاحیتوں کا خوب اندازہ ہوگیا ہے۔پہلی دنیا اور تیسری دنیا برابر کھڑے ہیں بلکہ ترقی یافتہ اقوام اس وائرس کے سامنے مکمل طور پر بے بس دکھائی دیئے ہیں۔عالمی رہنماؤں کے رویے بھی دلچسپ رہے ہیں۔عدم یکسوئی نے بڑی بڑی شخصیات کے کھوکھلے پن کو ظاہر کردیا ہے۔امریکی صدر ٹرمپ جن کی متلون مزاجی سے سیاسی لطیفے جنم لیتے رہتے ہیں انہوں کرونا وائرس سے نپٹنے کیلئے انتہائی غیر سنجیدگی کا مظاہرہ کیا ہے۔صدر ٹرمپ اپنی ریاستوں پر باربار حملہ آور ہوئے ہیں۔وہ کرونا کے علاج کیلئے الٹےسیدھے طبی مشورے بھی دیتے رہے ہیں۔جراثیم کش ادویات کے استعمال کا مشورہ بھی ٹرمپ نے ہیدیا ہے۔امریکی صدر پر مخبوط الحواس ہونے کی پھبتیاں کسی جارہی ہیں۔ ٹرمپ کی توجیہات اور راجہ بازارمیں بیٹھے کسی سنیاسی بابا کے مشوروں میں کوئی فرق نہیں۔چونکہ ہمارے وزیر اعظم کا بھی صدر ٹرمپ کےدوستوں میں شمار ہوتا ہے اس لئے پاکستان بھی کورونا سے نپٹنے میں عدم یکسوئی اور فکری افرا تفری کا شکارہے۔

پاکستان کے اندر لاک ڈاؤن کے دوران انتہائی شرمناک مناظردیکھنے کو ملے جن کا عمومی سا جائزہ ہماریسماجی ،سیاسی اور انتظامی حالت زار کو واضع کردیتا ہے۔کونساشہر اورقصبہ ہے جہاں لاک ڈاؤن پرعملدرآمد کروانے کیلئے پولیس کو تشدد کا سہارا نہیں لینا پڑا۔بعض جگہوں پر روزگار کیلئے باہر نکلنےوالےمزدوروں کو پولیس نے گھیرگھیر کر مرغا بنایا اور جگہ جگہ مرغا پریڈ کروائی گئی۔پھر ان کارناموں کی ویڈیوبنا کر وائرل بھی کروائی گئیں۔ اسی طرح کراچی اور رائے ونڈ میں حاجی نمازی قسم کے شہریوں نےپولیس پر حملے کیے ۔پولیس افسران کو گھروں میں پناہ لینا پڑی۔زائرین اور تبلیغی جماعت کے لوگوں کووائرس پھیلانے کا ذریعہ قرار دیاگیا اوریہ کسی مسلک کیطرف سے نہیں ہوا بلکہ حکومتی ترجمانوں کی بریفنگ سے انتشار پھیلا۔پاکستان شائددنیاکا واحد ملک ہے جس میں کرونا کے مشتبہ مریضوں کیساتھ مجرموں بلکہ دہشت گردوں جیسا سلوک کیا گیا۔سوشل میڈیا پر اس حوالے سے متعدد ویڈیو کلپ اپ لوڈ ہوئے جن سے پوری دنیا میں پاکستان کی جگ ہنسائی ہوئی۔

جو کچھ آئسولیشن سنٹر کے اندر ہوا وہ ایک الگ داستان ہے۔سینکڑوں شہریوں کو بھیڑ بکریوں کی طرح خیمہ بستیوں میں مقید کیا گیا۔رائے ونڈ اورسکھر میں انسانیت کی تذلیل کی گئی۔ڈاکٹروں تک کو حفاظتی کٹس سےمحروم رکھا گیا ۔کورونا سے متاثر ہونے والے ڈاکٹروں کا کہیں بھی رونا دھونا کام نہیں آیا۔لاک ڈاؤن کےمعاملے پر مرکز اور صوبہ سندھ میں سرد جنگ نے صحافتی اور سیاسی محاذ گرمائے جو اب بھی گرماگرم ہیں۔تحریک انصاف کی حکومت نے اپنی نااہلیوں کوچھپانے کیلئے پی پی پی کی صوبائی حکومت کی اہلیت کو بھی آڑے ہاتھوں لیا۔وزیر اعظم پاکستان کے مؤقف کو درست ثابت کرنے کیلئے سندھ کے گورنر نے تاجروں کو صوبائی حکومت کے لاک ڈاؤن کیخلاف بغاوت پر امادہ کیا۔پی پی پی کے لوگوں نے بھی عمران خان پرجوابی وار کیے۔بقول شاعر،

ایک دوسرے سے بچ کر نکلنا محال تھا ۔ایک دوسرے کو روندکر آنا پڑا ہمیں

اور اپنے دئے کو چاند بتانے کے واسطے۔بستی کا ہر چراغ بجھانا پڑا ہمیں

اچھے واقعات بھی ہوئے۔جماعت اسلامی نے اپنی فلاحی تنظیم الخدمت کے تحت ضرورت مندوں کیدہلیز پر راشن پہنچایا۔اپنے ہسپتال اور ایمبولینس گاڑیاں صوبائی حکومتوں کے حوالے کردیں۔امیر جماعت اسلامی نے کورونا کیخلاف آگاہی مہم کی سرپرستی کی اور جماعت کے تمام کارکنوں کو لوگوں کی مدد کیلئےمتحرک کردیا۔اسی طرح دعوت اسلامی والوں نے تھیلیسیمیا کے مریضوں کو خون فراہم کیا اور کورونہ سےمرنے والوں کی تجہیز وتکفین کرنے کا بندوبست کیا۔اور اب بھی اس کار خیر میں مصروف ہیں۔ مسلم لیگ ن نے بھی وینٹلیٹرز اور ماسک تقسیم کئے اور ن لیگ کے بعض ایم پی ایز نے اپنے حلقوں میں راشن بھی بانٹا۔بہت سی سماجی تنظیموں نے اپنے طور پر راشن پہنچانے کا اہتمام کیا ہے۔مغل برادری کی تنظیمیں بھی اس محاذ پر سرگرم دکھائی دیں۔تنظیم مغلیہ جہلم نے مغل ویلفئر فورم کی معاونت سے رمضان راشن گفٹس کا وسیع بندوبست کیا اور جہلم شہر اور مضافات میں یونین کونسل کی سطح پر یہ گفٹس تقسیم کئے۔

کورنا کب ٹلے گا اس کا کسی کو علم نہیں لیکن ہمارے رویے کب تبدیل ہونگے یہ ہمارے بس میں ہے۔انسانوں کی کمزوریاں اور خوبیاں آزمائشں کے دوران ہی سامنے آتی ہیں۔ہمیں اپنی خوبیوں اور خامیوں کاایک پار پھر اندازہ ہوگیا ہے۔ہمیں بحثیت ایک مسلمان قوم کے قرآن سے ہی رہنمائی لینی ہے اور ایک بلند کردار قوم بن کر اس وباء پر قابو پانا ہے !

ملاقاتیںتو پہلے بھی ہوتی رہتی ہیں لیکن یہ ملاقات خاص ثابت ہوئی۔ ایک دوست کے ہمراہ جنرل صاحب سے چند منٹ کی حاضری کیلئے وقت مانگا تھا،لیکن وقت گزرنے کااحساس ہی نہ ہوا۔جنرل اسلم بیگ نے ملکی صورتحال پر کا جو تجزیہ فرمایا وہ سننے کے لائق تھا ۔یوں سمجھئے کہ ہر پاکستانی کے دل کی آوازہے ۔جنرل صاحب کی گفتگو سے میں نے جو تائژ لیا وہ اسطرح کا ہے کہ پاکستان میں امریکی لابی نے معاملات کو مکمل طور پر اپنے کنٹرول میںکررکھا ہے اور ہمارے قومی اداروں میں اختلافی سوچ کے حامل لوگوںکو کھڈے لائن لگا دیا جاتاہے ۔ہماری خارجہ پالیسی امریکی ڈکٹیشن کے مطابق چلتی ہے ۔یہ تائژ بھی قائم ہوا کہ پاکستان کو چین سے دور ہٹانے کیلئے بھارت کا ہوّا دکھا کر بلیک میل کیا جاتا ہے ۔جنرل صاحب کا کہنا تھا پاکستان میںمذہبی جماعتوں کی بڑھتی ہوئی مقبولیت امریکی اثرورسوخ کا ردعمل ہے اور اگر ان جماعتوں کو مین سڑیم میں نہ لایا گیاتو پاکستان کے قومی وجود کو شدید خطرات لاحق ہوجائیں گے۔ لیکن امریکہ ان جماعتوں کا شدید مخالف ہے ۔پاکستان ،ایران اور افغانستان کا ایک بلاک بننا چاہیے ۔اس خطے میں امن ،ترقی اور خوشحالی کا یہی واحد راستہ ہے ۔

جنرل صاحب جب بات سن رہے ہوتے ہیں تو ان کے ہونٹوں پر ہلکی سی مسکراہٹ طاری رہتی ہے ۔میںنے سوال کیا کہ جنرل صاحب کیا ہمارے موجودہ خراب حالات کا سبب یہ تو نہیں کہ ہم بحثیت قوم قرآن کی رہنمائی سے دور ہوتے جارہے ہیں اور اسلام نے ہمارے لیے یہود وہنود کے حوالے سے جو حدود متعین کی تھیں وہ توڑدی گئی ہیں۔جنرل صاحب نے میری بات کی تائید کی اور کہا کہ یہی سچ ہے لیکن جو ایسی بات کرے گا اسے ناپسندیدہ عناصر کی فہرست میں شامل کردیا جائے گا ۔
جاننے والے جانتے ہیں کہ جنرل بیگ نے ہمیشہ حق گوئی کا حق ادا کیا ہے ۔جنرل پرویز مشرف کو اختلاف رائے براداشت نہیں تھی۔اس دور میں جنرل اسلم بیگ کے گھر کی دیواریں بھی گرا دی گئیں تھیں ۔ جنرل بیگ کا یہی اختلاف تھا کہ اپنے لوگوں کو امریکہ کے آگے مت بیچو ۔مشرف کی عدم برداشت کی یہ حالت تھی کہ سابق آرمی چیف جنرل اسلم بیگ کی ای میل کو ہیک کروایا گیا اور روابط کے ذرائع محدود کردئے گئے ۔جنرل صاحب نے کلمہ حق کہنا نہ تب چھوڑا نہ اب۔ان کی ذات پر کیچڑ اچھالا گیا۔ایک بے بنیاد مقدمہ بنایا گیا ۔لیکن سپریم کورٹ میں کچھ بھی ثابت نہ ہوا الٹا الزام لگانے والوں کو شرمندگی اٹھانا پڑی ۔جنرل صاحب نے ایرانی جرنیل قاسم سلمانی کی امریکی میزائلوں سے ہلاکت کو مسلم امہ پر حملہ قرار دیاتو امریکی لابی نے مرحوم سلمانی کی جنرل بیگ کے ساتھ ایک اتفاقی تصویرکو وائرل کروادیا۔گویا اگلا ٹارگٹ جنرل صاحب ہوسکتے ہیں ۔لیکن جنرل صاحب ایسی دھمکیوں سے مرعوب ہونے والے نہیں ۔وہ دنیا کی بہترین فوج کے سپہ سالار رہے ہیں ۔اور ان کا دامن ہر لحاظ سے اجلا ہے ۔
دیر تک گفتگو ہوتی رہی ۔جنرل صاحب کی مہمان نوازی ہمیشہ یادگار ہوتی ہے ۔جہاں لوازمات کام ودہن میں تنوع پایا جاتا ہے وہیں وہ مہمان کے سامنے طلائی طشتریاں خود بڑھا رہے ہوتے ہیں ۔جنرل صاحب بے مقصد زندگی گزارنے کے کبھی بھی عادی نہیں رہے ۔آجکل وہ ایک رہائشی منصوبے پر کام کررہے ہیں ۔ایسی رہائشی کالونیاںبنانا چاہتے ہیں جس میں غریب لوگوںکو امیر لوگوں جیسے گھر مل سکیں اور ان کے بچے بھی ملک کے خوشحال لوگوں جیسی تعلیم حاصل کر سکیں۔یہ ایک غیرمنافع بخش منصوبہ ہوگا ،جس میں گھر حاصل کرنے والوں کو معمولی سا ماہانہ کرایہ دینا ہوگااوردس پندرہ برس بعد وہ گھر کے مالک بن جائیں گے ۔اس مجوزہ کالونی میںمعیاری اسکول ،فری ہسپتال اور کھیل کے میدان ہونگے اور یہ کالونیاں بڑی شاہراہوں کے قریب بنیں گی۔اگرچہ سرمایہ لگانے والے کو زیادہ منافع نہیں ہوگا لیکن ان کا سرمایہ ڈوبے گا نہیں اور ثواب میں برابر کے حصہ دار ہونگے۔غریبوں کو امیروں جیسے ماحول فراہم کرنا ایک خواب ہے لیکن جنرل صاحب خواب دیکھتے اور اسے پوراکرگزرتے ہیں ۔ضرب مومن بھی ایک خواب تھا لیکن دنیا پر حیرت طاری ہوگئی تھی جب یہ فوجی مشقیں تکمیل پذیر ہوئی تھیں ۔جنرل صاحب نے اپنی مجوزہ کالونی کیلئے جگہ حاصل کرلی ہے۔آجکل جنرل صاحب ہروقت اسی منصوبے کے بارے میں سوچتے رہتے ہیں ۔
محفل ختم ہوگئی۔الوداع کہنے کے لیے بیرونی گیٹ تک آئے ۔پھر مجھے رکنے کا کہا۔ان کے پرسنل سیکرٹری کے ہاتھ میں ایک تھیلا تھا۔کہنے لگے یہ آپ کیلئے ہے ،سلوا کرپہن لینا ،مجھے خوشی ہوگی ۔یہ پینٹ کوٹ کا قیمتی کپڑا تھا ۔میں نے پہنا تو لوگوں نے اس سوٹ کی تعریف کی ۔شکریہ جنرل صاحب ،تحفے اور قیمتی باتوں کا شکریہ!

لوڈشیڈنگ کے ستائے عوام نے حکمران مافیا کے گھروں پر یلغار شروع کردی ہے۔ایسے تمام گروہ’ادارے اور افراد جو اس باطل جمہوری نظام کو اٹھارہ کروڑ عوام پر مسلط کرنے میں براہ راست ملوث ہیں ان کے گھروں کو جلا ڈالنا چاہیے یہ گروہ ہے جو انسانیت کے نام پر دھبہ ہے ‘انسانی ضرورتوں کا قاتل ہے ‘انسانی جذبوں کے لئے توہین کی علامت ہے یہ ممبران پارلیمنٹ’ یہ سینیٹرز’ یہ سیاسی مچھندر’یہ واپڈا’ پیپکو یہ سب اسی قابل رہ گئے ہیں کہ روشنیاں چھیننے کے جرم میں ان کے وجود سے نجات حاصل کر لی جائے۔

ستم درستم کو روا رکھنے والی حکومت کو صرف کوسنے اور گالیاں دینے سے غصہ کم نہیں ہوگا ان کے چہروں پر کالک ملنا چاہیے۔ ان کے جسموں کو لہولہان  ہونا چاہیے۔ سب نے عوام سے دھوکہ کیا۔ مسند اقتدار تک پہنچنے کیلئے  جھوٹ بولے اور اقتدار پر قابض ہونے کے بعد بھی دروغ گوئی کی۔کیا اس کے لئے کوئی افلاطونی دماغ چاہیے کہ جب بجلی کی پیداوار کے لئے ڈیم نہیں بنائے گئے تو بجلی کہاں سے آئے گی۔ آسمان سے گرسکتی ہے باقی تو کوئی ایسا ذریعہ نہیں جہاں سے آٹھ دس ہزار میگاواٹ کا شارٹ فال پورا ہوسکے یہ کرائے کے پاور ہائوسز ‘یہ ونڈ پاور پراجیکٹس’یہ تھرمل پاور پلانٹس’کہیں سے 50میگاواٹ ‘کہیں سے ڈیڑھ سو میگاواٹ ۔روپیہ دینے کے لئے نہیں۔بھاری رقوم تو اس نظام کو پالنے پوسنے پر خرچ ہوجاتی ہیں’پھر بجلی کی پیداوار کے لئے سرمایہ کہاں سے آئے گا۔اشک شوئی کے تمام ڈرامے محض لوگوں کے زخموں پر نمک چھڑکنے اور جلتی آگ پر تیل ڈالنے کے مترادف ہیں۔پنجاب کے رہنے والوں کو پتھر کے دور میں دھکیل دیاگیا ہے۔ موجودہ صوبائی اور مرکزی حکومت ایک یونٹ بجلی پیدا کرنے میں دلچسپی نہیں رکھتی۔مرکزی حکومت صرف تین صوبوں کی حکومت ہے۔ کالا باغ ڈیم کا نام آتے ہی یہ خم ٹھونک کر کھڑی ہوجاتی ہے۔کالاباغ ڈیم صرف پنجاب کے لئے نہیں پورے پاکستان کے لئے ہے۔ بڑے دعوے اور نعرے لگائے گئے کہ بھاشا ڈیم’ منڈا ڈیم اور خدا جانے کون کون سے ڈیم بن رہے ہیں۔سب فراڈ۔ کوئی ایک بڑا ڈیم بھی زیر تعمیر نہیں۔چند چھوٹی چھوٹی ڈیمیاں بن رہی ہیں۔ لیکن پھر بھی دعوے ہیں کہ عوام انتظار کریں بجلی آرہی ہے۔لوڈشیڈنگ ختم ہونے والی ہے اور عدم توانائی کا عالم یہ ہے کہ چوبیس گھنٹوں میں دو گھنٹے آتی ہے اور آئندہ برس  اگر بھارت یا ایران سے بجلی فوری طور پر درآمد نہیں کی جاتی تو ہفتہ میں صرف ایک گھنٹہ بجلی ملا کرے گی۔ یہ وہ حقائق ہیں جو حکمرانوں کو ازبر ہیں لیکن وہ جھوٹ بولتے ہی چلے جاتے ہیں۔ایسے جھوٹے اور فراڈیے حکمرانوںکے گلے میں پٹکے ڈال کر ریگل چوک میں گھسیٹا جانا چاہیے۔سنگین مذاق کی کوئی حد ہوتی ہوگی لیکن یہ حد حکمرانوں نے توڑ دی ہے۔ ملک کے اندر پاور نہ ہونے کے سبب بے روزگاروں کی فوج ظفر موج سڑکوں پر سیلاب کی صورت میں امڈ آتی ہے۔پہیہ بند’بھٹی ٹھنڈی’چمنی سے دھویں کی بجائے کبوتر نکلتے ہیں۔لوگ کیا کریں۔ انہیں گاڑیاں نہیں جلانی چاہیں’ تھانے خاکستر نہیں کرنے چاہیں صرف حکمران طبقہ کے گھروں میں گھس جانا چاہیے۔ اپنے دکھوں کا حساب برابر کرنا چاہیے۔پنجاب حکومت بھی تماشا کررہی ہے۔میاں شہبازشریف کو بڑے میاں صاحب نے باندھ رکھا ہے۔ میاں شہبازپنجاب کی بات تو کرتے ہیں لیکن کالاباغ ڈیم کا نام لینے سے ڈرتے ہیں کیونکہ برادر کلاں نے وزیراعظم بننا ہے۔اگر میاں شہباز نے صرف پنجاب کا مقدمہ لڑنا ہوتا تو کب کا ڈیم بن چکا ہوتا اور پاکستان میں توانائی کا مسئلہ دو سو برسوں کے لئے حل ہوجاتا لیکن اب تماشا کر رہے ہیں کالا باغ ڈیم کے لئے حکومت نے بجٹ میں صرف دس لاکھ روپے مختص کئے ہیں۔دس لاکھ میں ڈیم کا بورڈ نہیں بنتا۔ صرف تماشا!صدر اور وزیراعظم یا تو بہت سادہ لوح ہیں یا انتہا کے سفاک لوگ۔ ہر تین مہینے کے بعد خبر چھپ جاتی ہے کہ وزیراعظم نے ملک میں بدترین لوڈشیڈنگ کا نوٹس لے لیا ہے۔ صدر نے حکم  دیا ہے کہ ”بجلی پیدا کی جائے” عوام کی اور کس طرح توہین کی جاتی ہے۔ یہ نوٹس  لینے اور بجلی پیدا کرنے کا حکم دینے سے کیا دس ہزار میگاواٹ نیشنل گرڈ میں شامل ہوجائے گی؟عوام نے بھی فیصلہ کر لیا ہے کہ ان کی مصیبتوں پر قہقے لگانے والے حکمرانوں کا وہ خود نوٹس  لیں گے او رالحمدللہ ہر روز یہ نوٹس لیا جارہا ہے۔ اب کوئی ممبر پارلیمنٹ اپنے گھر میں بھی محفوظ نہیں۔یہ عوام کا نوٹس ہے۔ پاکستان کے ستائے ہوئے لوگوںنے ظالم حکمرانوں کے ظلم کا  نوٹس لینے کی حقیقی راہ ڈھونڈلی!!

تنقید برائے تنقید نہیں۔حقیقت یہ ہے کہ پنجاب کے وزیراعلیٰ میاں محمد شہباز شریف نے آئندہ امریکی امداد نہ لینے کا اعلان کرکے صرف صوبہ پنجاب ہی نہیں بلکہ پورے پاکستان کے غیور عوام کے دلوں کی ترجمانی کردی ہے۔ہوسکتا ہے کہ ”سستی روٹی سکیم“ اور ”دانش سکولوں“ کے قیام کی طرح جناب شہباز شریف کا یہ اعلان بھی محض اپنے بکھرتے ہوئے ووٹ بینک کو متحد رکھنے کی کوشش ہو لیکن نتیجہ جو بھی نکلے پاکستان کی سیاسی تاریخ میں غیر ملکی امداد سے چھٹکارے کا یہ تصور اس قدر خوش آئند ہے کہ شریف برادران کی داد و تحسین کئے بغیر رہا نہیں جاسکتا۔ یوں تو ”قرض اتارو ملک سنوارو مہم“ بھی معاشی خودمختاری کے حصول کی خواہش کے تابع ایک کوشش تھی لیکن تمام ترغیبات کے باوجود بھی قرض اتارنے کے لئے رقم جمع نہ ہوسکی اور جو رقم جمع ہوئی وہ شائد اس قابل بھی نہیں تھی کہ اس کا ذکر کوئی حوالہ بن سکتا۔اگر صرف صوبہ پنجاب ہی غیر ملکی امداد کی ضرورت سے ماوراءہوجائے تو سمجھیں کہ پاکستان کے ساٹھ فیصد عوام خود دار کہلانے کے مستحق ضرور پائیں گے۔پنجاب حکومت کے میر منشی اب کس طرح کا بجٹ بنائیں گے اور اپنے خساروں کو کیسے پورا کریں گے‘ یہ آنے والے دنوں میں واضح ہوجائے گا۔ہم ہر روز قومی خودمختاری کی تسبیح پڑھتے ہیں اور امریکیوں سے پرزور مطالبے ہوتے ہیں کہ وہ ہماری قومی خودمختاری کا احترام کرےں لیکن آگے سے جواب ڈرون حملوں کی صورت میں دیا جاتا ہے۔ امریکی کانگریس میں بعض سینٹر تو اس قدر منہ پھٹ ہیں کہ وہ ہمارے اس مطالبے کا سرعام مذاق اڑاتے ہیں۔آج کل امریکی حلقوں‘اخبارات اور دانش کدوں میں پاکستان اور پاکستان کی عسکری اور سیاسی قیادتوں کے خوب لتے ّ لئے جارہے ہیں۔”جب ہم ڈالرز دے رہے ہیں تو پھر یہ قومی خودمختاری کہاں سے آگئی؟“ اکثر امریکیوں کا یہی جواب ہے۔پاکستان کے اپنے اقتصادی اعدادوشمار سے واضح ہوتا ہے کہ پاکستان نے امریکی جنگ میں اب تک 70ارب ڈالرز کا نقصان اٹھایا ہے جبکہ پاکستان کو فوجی اور ترقیاتی مد میں صرف بیس ارب ڈالرز ملے ہیں۔چالیس ہزار پاکستانیوں کی زندگیوں کا خون بہا طے کیا جائے تو معلوم ہوگا کہ ستر نہیں ایک سو ستر ارب ڈالرز کا مالی نقصان اور کھربوں ڈالر کی جگ ہنسائی حصے میں آئی ہے۔
میں نے بڑے بڑے اقتصادی ماہرین سے یہ سوال پوچھا ہے کہ پاکستان کس طرح ایک خودمختار اور آزاد ملک بن سکتا ہے۔ سب کا متفقہ جواب یہ ہے کہ آپ آج امریکی امداد لینا بند کردیں‘کل سے خودمختاری واپس مل جائے گی۔ لیکن مقام افسوس یہ ہے کہ ہمارے عسکری اور سیاسی قائدین امریکی امداد کی بندش کا سوچ کر ہی کپکپانے لگتے ہیں ۔ وہ تمام تر قومی غیرت اور ملی حمیت کو طاق نسیاں پر رکھ کر دست بستہ ہیلری کلنٹن کے حضور گڑگڑانے لگتے ہیں۔گزشتہ پچاس برسوں میں ملنے والی امریکی امداد کا تجزیہ کیاجائے تو یہ خوفناک حقیقت سامنے آئے گی کہ امداد کا ستر فیصد حصہ فوجی مقاصد اور تیس فیصد حصہ سیاسی مقاصد کے لئے استعمال ہوا ہے۔اسلحہ خریدا گیا اور ایسی تمام خریداریوں میں کمیشن مافیا پروان چڑھا ہے۔عوامی بہبود کے نام پر بھی جو امداد ملی وہ چند گھرانوں میں بانٹ لی گئی یا پھر سیاسی رشوت کے طور پر خرچ ہوگئی۔آج بھی کیری لوگر بل کے تحت ملنے میں امداد کا ایک کثیر حصہ بینظیر انکم سپورٹ پروگرام کے تحت ریوڑیوں کی صورت میں بانٹا جارہا ہے۔ نہ کسی بے روزگار کو روزگار ملا اور نہ ہی کوئی گھرانہ معاشی طور پر خودانحصاری کی منزل کوپا سکا۔ خیرات دست بدست بانٹی جائے یا کریڈٹ کارڈ کے ذریعے دی جائے کبھی بھی مانگنے والوں کی قسمت بدل نہیں سکی البتہ پروپیگنڈا کے طور پر وقتی فوائد ضرور مل جایا کرتے ہیں۔
میاں شہبازشریف کے اس معاشی تجزئے سے مکمل اتفاق ہے کہ غیر ملکی امداد صرف اشرافیہ کے کام آئی ہے عام آدمی کی حالت کبھی نہیں بدل سکی۔خود امریکی تجزیہ کاروں کے نزدیک امریکی امداد نے پاکستان کے معاشی استحکام میں دو فیصد بھی بہتری پیدا نہیں کی۔ایسی صورتحال میںپنجاب حکومت کا یہ نعرہ بہرحال تازہ ہوا کا جھونکا ہے اور اس اعلان کی اصل زد امریکی چالبازیوں پر پڑتی ہے۔امریکی اپنی تمام تر کوششوں کے باوجود ننانوے فیصد پاکستانیوں کی نفرت میں کمی نہیں کرسکے۔پنجاب حکومت کے اس اعلان نے عوام کو امریکی امداد کے بند ہونے کے مبینہ خطرناک نتائج سے بالاتر کردیا ہے۔اگر یہ رسم چل نکلی تو بہت ممکن ہے کہ باقی صوبوں میںیہ سوچ باقاعدہ عوامی مطالبہ بن کرسامنے آئے کہ امریکی امداد لینا بند کرو ورنہ ہم ووٹ نہیں دیں گے۔اگر پنجاب بغیر امداد کے زندہ رہ سکتا ہے تو پھردوسرے صوبوں کے غیور لوگ اور ہزارے آخر خودمختاری اور عزت والی زندگی کیوں نہیں گزار سکتے؟
میاں شہبازشریف اپنے اس اعلان کے حق میں رائے عامہ کو ہموار کرنے کے لئے گرما گرم تقاریر فرما رہے ہیں۔میاں چنوں میں ایک جلسہ سے خطاب کے دوران انہوں نے جنگ خندق کے حوالے سے اپنے اعلان کو تقویت دی ہے۔”حکومت پیٹ پر تین پتھر باندھے گی آپ صرف ایک باندھیں اور اپنے ملک کو غیر ملکی حملوں سے بچائیں“۔اگر چھوٹے اور بڑے میاںصاحبان علامتی طورپر ہی سہی اپنے حفاظتی سکواڈ اور اپنے روزمرّہ کے اخراجات میں 25فیصد کمی کردیں تو لوگ شائد بجلی اور گیس کے مطالبے سے ہی دستبردار ہوجائیں۔ جنگ خندق کے موقع پر ہمارے پیارے رسول نے اپنے پیٹ پر واقعتا پتھر باندھ رکھے تھے۔اس لئے اصحابہ اکرامؓ بھوک کی حالت میں بھی حفاظتی خندق کھودنے میں کامیاب ہوگئے۔ آج بھی ہمارے لیڈر اگر واقعتا خود مثال بنیں تو کوئی وجہ نہیں کہ ہم اپنی قومی خودمختاری اور ملی غیرت کے مضبوط ارادوں کی حفاظتی خندق کھودنے میں کامیاب ہوجائیں‘ اقبال نے سچ فرمایا‘
اے طائر لاہوتی‘اس رزق سے موت اچھی
جس رزق سے آتی ہو پرواز میں کوتاہی