کبھی پاکستان کی ترقی کی رفتار دنیا بھر میں سب سے زیادہ تھی۔ 1960ءکے عشرے میں پاکستان کے ماہرین اقتصادیات نے سب کو ورطہ حیرت میں ڈال دیا تھا۔ساﺅتھ کوریانے بغیر کسی جھجھک کے پاکستان کے اقتصادی ماڈل کی نقل تیار کی اور اپنے ملک کو پاکستانی قدموں پر قدم رکھ کر چلانا شروع کردیا۔متاثر ہونے کی بھی حد ہوتی ہے۔ سئیول شہر کوبھی کراچی کی طرز پر بسایا گیا ۔وہ جوہمیںماڈل سمجھ کر ہمارے پیچھے چلے تھے وہ آگے بڑھتے گئے اور ہم روز بروز پیچھے کی طرف سرکتے گئے۔ آج ہم کہاں اور ساﺅتھ کوریا کہاں کھڑا ہے! کوئی تقابل ہی نہیں کوئی موزانہ زیب نہیں دیتا۔آج ہماری ترقی کی رفتار2.2 فیصد پر آکر ایسے رکی گویابریکیں لگ گئیں۔ ہزار دھکے مارو لیکن زمین جنبد نہ جنبد گل محمد

سودی نظام سے وابستہ معیشت سے جڑی اس دنیا کی ترقی میں بہت بڑا کردار بینکوں‘ بنکاری اور بینکاروں کا رہا ہے۔ اقتصادی ماہرین سرجوڑ کر ملکی معیشت کی بہتری کیلئے منصوبہ سازی کرتے ہیں اور بینک ان منصوبوں میں سرمایہ کاری کرکے ترقی کے پہیے کو حرکت میں لاتے ہیں۔ امریکہ‘ چین ‘جاپان اور بھارت۔یہ بینکاری نظام ہی ہے جس پر ان ممالک کی ترقی و عروج کا دارومدار ہے ۔چین کے بینک سرمایہ کارانہ سوچ کے حامل ہیں اور بہت سی امریکی کمپنیوں کو سرمایہ فراہم کر رہے ہیں۔ ایسے ممالک جن کے پاس پیسہ نہیں وہاں چینی بینک اور کمپنیاں مل کر پراجیکٹس مکمل کر رہے ہیں اور ان پراجیکٹس سے خاطر خواہ منافع کما رہے ہیں۔

پاکستان میں گزشتہ برسوں میں بینکاری سسٹم نے بہت ترقی کی ہے۔بینکوں کی عمارتوں کے شیشتوں کے سائز اور رنگ ہی نہیں بدلے انداز اور اطوار بھی تبدیل ہوگئے۔ ہر سال بھاری منافع کمانے والے ان بینکوں نے لوگوں کو منافع دینے کی بجائے ان کو ”کنزیومر ازم“ کی طرف راغب کرکے مال کمایا ہے۔ کریڈٹ کارڈز‘ کاروں پر قرضہ جات‘مکانوں کے لئے قرضے‘غرض ان بینکوں نے کسی ترقیاتی منصوبے میںشراکت داری کرنے کی بجائے صرف اور صرف اکاﺅنٹ ہولڈرز کو سہولیات کی فراہمی کے بدلے کھاتہ داروں کی رقوم سے ہی پیسے کاٹے ہیں۔اگر یہ کہا جائے کہ پاکستان میں بینکنگ نظام”کماﺅ“ کی بجائے”کھاﺅ“ بن گیا ہے تو مبالغہ نہ ہوگا۔

بنگلہ دیش میں ڈاکٹر محمد یونس بھی ایک بینکار ہی تھے۔انہوں نے میگا کی بجائے مائیکروفنانسنگ کا ایسا نظام وضع کیا کہ آج بنگلہ دیش میں شراکت داری کے ذریعے منافع کمانے کی ایک دوڑ لگی ہے۔معیشت کا پہیہ پوری رفتار سے چل رہا ہے۔ہمارے ہاں ایسا کیوں نہیں ہوا۔آخر ہمارے بینکار اور اقتصادی ماہرین مل کر ایسا پروگرام کیوں ترتیب نہیں دے سکے ۔ سروسز کے بدلے پیسہ کمانے کا رجحان بینکوں کے وجود پر کیا اثرات ڈالے گا؟ ایسے ہی سوالات لئے میں نے اپنی تنظیم ”پاکستان اکانومی واچ“ کے وائس پریذیڈنٹ عظمت اللہ کے ہمراہ گزشتہ دنوں کراچی کے معروف بینکاروں سے ملاقاتیں کیں۔

”بینکوں میں ڈاﺅن سائزنگ کا عمل شروع ہوچکا ہے۔ادغام یعنی ”مرجر“ کے رجحان نے بھی جنم لیا ہے۔ظاہر ہے یہ صورتحال بینکنگ سسٹم کیلئے کوئی نیک شگون نہیں ہے۔ ایسے منفی اشارات کا بنیادی سبب بینکوں کی موجودہ پالیسی ہے۔آج کل کم و بیش تمام بینکس قرضے فراہم کرنے میں جتے ہوئے ہیں۔حکومت اور حکومتی اداروں کو ”لوننگ“ ہورہی ہے یا کنزیومر ازم کو فروغ دیا جارہا ہے۔بینکوں کا اصل کام ترقیاتی منصوبوں کیلئے سرمایہ کی فراہمی ہوتا ہے۔اسی سے نظام بینکاری پر اعتماد بڑھتا ہے اور منافع میں مسلسل اضافہ ہوتا ہے۔سروسز اور لون کی فراہمی کے بعد سرمایہ ساکت ہوجاتا ہے۔‘ملک ترقی کرتا ہے نہ سماجی طور پر معاشرہ آگے بڑھتا ہے“سمٹ بینک کے چیف ایگزیکٹو جناب حسین لوائی نے بڑے ججے تلے انداز میں اصل مرض کی طرف نشاندہی کی۔ جناب حسین لوائی صرف بینکار ہی نہیں معیشت دان بھی ہیں۔ قومی سطح کے ایسے بینکار ہیں جنہوں نے متعدد ڈوبتے ہوئے بینکوں کو سنبھالا اور انہیں قومی ترقی میں حصہ ڈالنے کے قابل بنایا۔

اسلامی بینکاری کے ماہر اور بینک اسلامی کے چیف ایگزیکٹو آفیسر حسن عزیز بالگرامی تجزیہ اور تبصرہ سے گریزاں دکھائی دیئے لیکن انہوں نے راقم کو یقین دلایا کہ ملک میںاسلامی بینکاری کا مستقبل روشن ہے اور عام لوگوں میں سرمایہ کاروں کا اعتماد بحال کرنے میں ان کا بینک کامیابیاںحاصل کر رہا ہے۔

دبئی اسلامک بینک کے فنانشنل کنٹرولر گیون گون سالوز سے بھی ملاقات ہوئی۔ خوش مزاج اور ملنسار بینکار ہیں۔ ان کے خیالات کا حاصل بھی یہی ہے کہ ملکی معیشت کی بہتری کیلئے اب بینکاروں کو شراکت داری کے منصوبوں میں سرمایہ کاری کی طرف توجہ کرنا چاہیے۔غیر ضروری اخراجات کم کرنے چاہیں اور کھاتہ داروں کو سہولتوں کی فراہمی آسان اور سستی کرنی چاہیے۔

یہ ایک المیہ ہوگا اگر منافع کی بلندیوں کو چھولینے کے بعد ہمارے بینک ایسی منصوبہ بندی نہ کرسکیں جس سے زوال کو ٹالا جاسکے۔قومی ترقی کو اگر بینکاری کا ہدف قرار دے کر آگے بڑھا جائے ‘متحرک اور تعلیم یافتہ نوجوانوں کو چھوٹے چھوٹے کاروبار شروع کرانے کے لئے سرمایہ فراہم کیا جائے تو کوئی وجہ نہیں کہ پاکستان ایک بار پھر ساٹھ والی دہائی کو دہرانہ سکے!

تنقید برائے تنقید نہیں۔حقیقت یہ ہے کہ پنجاب کے وزیراعلیٰ میاں محمد شہباز شریف نے آئندہ امریکی امداد نہ لینے کا اعلان کرکے صرف صوبہ پنجاب ہی نہیں بلکہ پورے پاکستان کے غیور عوام کے دلوں کی ترجمانی کردی ہے۔ہوسکتا ہے کہ ”سستی روٹی سکیم“ اور ”دانش سکولوں“ کے قیام کی طرح جناب شہباز شریف کا یہ اعلان بھی محض اپنے بکھرتے ہوئے ووٹ بینک کو متحد رکھنے کی کوشش ہو لیکن نتیجہ جو بھی نکلے پاکستان کی سیاسی تاریخ میں غیر ملکی امداد سے چھٹکارے کا یہ تصور اس قدر خوش آئند ہے کہ شریف برادران کی داد و تحسین کئے بغیر رہا نہیں جاسکتا۔ یوں تو ”قرض اتارو ملک سنوارو مہم“ بھی معاشی خودمختاری کے حصول کی خواہش کے تابع ایک کوشش تھی لیکن تمام ترغیبات کے باوجود بھی قرض اتارنے کے لئے رقم جمع نہ ہوسکی اور جو رقم جمع ہوئی وہ شائد اس قابل بھی نہیں تھی کہ اس کا ذکر کوئی حوالہ بن سکتا۔اگر صرف صوبہ پنجاب ہی غیر ملکی امداد کی ضرورت سے ماوراءہوجائے تو سمجھیں کہ پاکستان کے ساٹھ فیصد عوام خود دار کہلانے کے مستحق ضرور پائیں گے۔پنجاب حکومت کے میر منشی اب کس طرح کا بجٹ بنائیں گے اور اپنے خساروں کو کیسے پورا کریں گے‘ یہ آنے والے دنوں میں واضح ہوجائے گا۔ہم ہر روز قومی خودمختاری کی تسبیح پڑھتے ہیں اور امریکیوں سے پرزور مطالبے ہوتے ہیں کہ وہ ہماری قومی خودمختاری کا احترام کرےں لیکن آگے سے جواب ڈرون حملوں کی صورت میں دیا جاتا ہے۔ امریکی کانگریس میں بعض سینٹر تو اس قدر منہ پھٹ ہیں کہ وہ ہمارے اس مطالبے کا سرعام مذاق اڑاتے ہیں۔آج کل امریکی حلقوں‘اخبارات اور دانش کدوں میں پاکستان اور پاکستان کی عسکری اور سیاسی قیادتوں کے خوب لتے ّ لئے جارہے ہیں۔”جب ہم ڈالرز دے رہے ہیں تو پھر یہ قومی خودمختاری کہاں سے آگئی؟“ اکثر امریکیوں کا یہی جواب ہے۔پاکستان کے اپنے اقتصادی اعدادوشمار سے واضح ہوتا ہے کہ پاکستان نے امریکی جنگ میں اب تک 70ارب ڈالرز کا نقصان اٹھایا ہے جبکہ پاکستان کو فوجی اور ترقیاتی مد میں صرف بیس ارب ڈالرز ملے ہیں۔چالیس ہزار پاکستانیوں کی زندگیوں کا خون بہا طے کیا جائے تو معلوم ہوگا کہ ستر نہیں ایک سو ستر ارب ڈالرز کا مالی نقصان اور کھربوں ڈالر کی جگ ہنسائی حصے میں آئی ہے۔
میں نے بڑے بڑے اقتصادی ماہرین سے یہ سوال پوچھا ہے کہ پاکستان کس طرح ایک خودمختار اور آزاد ملک بن سکتا ہے۔ سب کا متفقہ جواب یہ ہے کہ آپ آج امریکی امداد لینا بند کردیں‘کل سے خودمختاری واپس مل جائے گی۔ لیکن مقام افسوس یہ ہے کہ ہمارے عسکری اور سیاسی قائدین امریکی امداد کی بندش کا سوچ کر ہی کپکپانے لگتے ہیں ۔ وہ تمام تر قومی غیرت اور ملی حمیت کو طاق نسیاں پر رکھ کر دست بستہ ہیلری کلنٹن کے حضور گڑگڑانے لگتے ہیں۔گزشتہ پچاس برسوں میں ملنے والی امریکی امداد کا تجزیہ کیاجائے تو یہ خوفناک حقیقت سامنے آئے گی کہ امداد کا ستر فیصد حصہ فوجی مقاصد اور تیس فیصد حصہ سیاسی مقاصد کے لئے استعمال ہوا ہے۔اسلحہ خریدا گیا اور ایسی تمام خریداریوں میں کمیشن مافیا پروان چڑھا ہے۔عوامی بہبود کے نام پر بھی جو امداد ملی وہ چند گھرانوں میں بانٹ لی گئی یا پھر سیاسی رشوت کے طور پر خرچ ہوگئی۔آج بھی کیری لوگر بل کے تحت ملنے میں امداد کا ایک کثیر حصہ بینظیر انکم سپورٹ پروگرام کے تحت ریوڑیوں کی صورت میں بانٹا جارہا ہے۔ نہ کسی بے روزگار کو روزگار ملا اور نہ ہی کوئی گھرانہ معاشی طور پر خودانحصاری کی منزل کوپا سکا۔ خیرات دست بدست بانٹی جائے یا کریڈٹ کارڈ کے ذریعے دی جائے کبھی بھی مانگنے والوں کی قسمت بدل نہیں سکی البتہ پروپیگنڈا کے طور پر وقتی فوائد ضرور مل جایا کرتے ہیں۔
میاں شہبازشریف کے اس معاشی تجزئے سے مکمل اتفاق ہے کہ غیر ملکی امداد صرف اشرافیہ کے کام آئی ہے عام آدمی کی حالت کبھی نہیں بدل سکی۔خود امریکی تجزیہ کاروں کے نزدیک امریکی امداد نے پاکستان کے معاشی استحکام میں دو فیصد بھی بہتری پیدا نہیں کی۔ایسی صورتحال میںپنجاب حکومت کا یہ نعرہ بہرحال تازہ ہوا کا جھونکا ہے اور اس اعلان کی اصل زد امریکی چالبازیوں پر پڑتی ہے۔امریکی اپنی تمام تر کوششوں کے باوجود ننانوے فیصد پاکستانیوں کی نفرت میں کمی نہیں کرسکے۔پنجاب حکومت کے اس اعلان نے عوام کو امریکی امداد کے بند ہونے کے مبینہ خطرناک نتائج سے بالاتر کردیا ہے۔اگر یہ رسم چل نکلی تو بہت ممکن ہے کہ باقی صوبوں میںیہ سوچ باقاعدہ عوامی مطالبہ بن کرسامنے آئے کہ امریکی امداد لینا بند کرو ورنہ ہم ووٹ نہیں دیں گے۔اگر پنجاب بغیر امداد کے زندہ رہ سکتا ہے تو پھردوسرے صوبوں کے غیور لوگ اور ہزارے آخر خودمختاری اور عزت والی زندگی کیوں نہیں گزار سکتے؟
میاں شہبازشریف اپنے اس اعلان کے حق میں رائے عامہ کو ہموار کرنے کے لئے گرما گرم تقاریر فرما رہے ہیں۔میاں چنوں میں ایک جلسہ سے خطاب کے دوران انہوں نے جنگ خندق کے حوالے سے اپنے اعلان کو تقویت دی ہے۔”حکومت پیٹ پر تین پتھر باندھے گی آپ صرف ایک باندھیں اور اپنے ملک کو غیر ملکی حملوں سے بچائیں“۔اگر چھوٹے اور بڑے میاںصاحبان علامتی طورپر ہی سہی اپنے حفاظتی سکواڈ اور اپنے روزمرّہ کے اخراجات میں 25فیصد کمی کردیں تو لوگ شائد بجلی اور گیس کے مطالبے سے ہی دستبردار ہوجائیں۔ جنگ خندق کے موقع پر ہمارے پیارے رسول نے اپنے پیٹ پر واقعتا پتھر باندھ رکھے تھے۔اس لئے اصحابہ اکرامؓ بھوک کی حالت میں بھی حفاظتی خندق کھودنے میں کامیاب ہوگئے۔ آج بھی ہمارے لیڈر اگر واقعتا خود مثال بنیں تو کوئی وجہ نہیں کہ ہم اپنی قومی خودمختاری اور ملی غیرت کے مضبوط ارادوں کی حفاظتی خندق کھودنے میں کامیاب ہوجائیں‘ اقبال نے سچ فرمایا‘
اے طائر لاہوتی‘اس رزق سے موت اچھی
جس رزق سے آتی ہو پرواز میں کوتاہی

بعض اوقات پانی جنگلی گھاس کے اندر سے گزر رہا ہوتا ہے اور دیکھنے والا محسوس کرتا ہے کہ پانی ٹھہرا ہوا ہے‘چل نہیں رہا۔یہی آب رواں جب سامنے کھڑی چٹانوں اور رکاوٹوں سے ٹکراتا ہے تو پھر شور اٹھتا ہے۔بڑے بڑے پتھر تیز بہاﺅ کا شکار ہوجاتے ہیں۔ رکاوٹیں سرنگوں ہوتی جاتی ہیں اور پانی تباہی مچاتا بڑھتا چلا جاتا ہے۔پاکستانی معاشرے کی یہی صورتحال ہے۔آزاد عدلیہ‘آزاد میڈیا‘آزاد پارلیمنٹ اور منظم افواج کے ہوتے ہوئے کوئی تصور ہی نہیںکرسکتا کہ اس دھرتی پر کوئی انقلاب آسکتا ہے‘کوئی عوامی سیلاب سب کچھ تباہ کرسکتا ہے ۔لیکن عوام کے غم اور غصے ‘مایوسی اور بے بسی‘بے اختیاری اور لاچاری۔سب اندر ہی اندر ایک طوفان کی شکل اختیار کرتے جارہے ہیں۔آزاد عدلیہ ایک آخری امید‘لیکن عوام کو کوئی ریلیف ملتا دکھائی نہیںدیتا۔میڈیا آزاد تر‘لیکن سوائے غصے سے بھرے غبارے میں سے ہوا نکالنے‘پنکچر لگا کر پھر ہوا بھرنے اور پھر سوئی مار دینے کے کوئی نتیجہ سامنے نہیں آرہا۔ ہر ”انفارمیشن“ پہلے سے طے شدہ ایجنڈے کے تحت سامنے آتی ہے۔ پروگرام ”ہٹ“ اور بریکنگ نیوز“ کی دوڑ اشوز کو نان اشوز اور رائی کو پہاڑ بنانے کے لئے لگائی جارہی ہے۔منتخب پارلیمنٹ عوام کی نمائندگی کی دعویدار ہے لیکن عوام کو اس جمہوریت کے نتیجے میں بھی مسائل ہی مسائل ملے ہیں۔حکومت اور یہ نظام محض اپنی مدت پوری کرنے کو ہی اپنی اور عوام کی کامیابی تصور کر رہے ہیں لیکن عام آدمی ان ایوانوں کو اب نفرت اور بیزاری کی نگاہ سے دیکھتا ہے۔ دل سے پوچھتا ہے اس نظام کا حاصل کیا ہے۔ افواج پاکستان دفاع وطن کی ذمہ داریوں میں مصروف ہیں اور فوجی اقتدار کے نتیجے میں مسلط ہونے والی امریکی جنگ سے نجات کی کوشش کررہی ہیں۔ کوئی بھی تو نہیں جو بجلی لا دے‘چولہے جلا دے ‘ روزگار دلا دے‘عزتوں کو محفوط بنائے‘عصمتوں کی پاسداری کرے۔!
سلطان بشیر الدین محمود سے تفصیلی نشست ہوئی۔ وہ اٹامک انرجی کمیشن کے ڈی جی رہے۔انہوںنے ”امہ تعمیر نو“ کے پلیٹ فارم پر حکومت پاکستان کی رضامندی اور حوصلہ افزائی سے ملاں محمد عمر کی حکومت کے دوران افغانستان کی تعمیر نو کی بنیادیں رکھی تھیں۔ وہ اور ان کی ٹیم کے معزز اور معتبر ارکان تواتر کے ساتھ افغانستان جاتے رہے اور روسی قبضے کے دوران تباہ ہوجانے والے انفراسٹرکچر کو بحال کرنے کے منصوبے بناتے رہے۔ مسلسل مطالعے اور طویل مشاہدے کے سبب وہ بڑے جچے تلے انداز میںپاکستانی معاشرے کے اندر متوقع تبدیلیوں کا تجزیہ کرتے ہیں۔سلطان بشیر الدین محمود کہہ رہے تھے‘
”پاکستان میں صرف غریب ہی نہیں امیر آدمی بھی تنگ بیٹھا ہے۔ غریب اس لئے بے زار ہے کہ اسے روٹی میسر نہیں اور امیر اس لئے کہ اس کے گھر کا ایئرکنڈیشنز نہیں چل رہا۔ بے بسی کی اس حالت کو ہم سب ابھی تک برداشت کرتے آئے ہیں لیکن اب ہمارا نوجوان طبقہ ہماری ”برداشت“ کی اس عادت سے تنگ آچکا ہے۔ وہ اب برداشت کرنے پر تیار نہیں۔ نوجوانوں کے عدم برداشت کو محسوس کرنا ہوتو انٹرنیٹ پر مختلف بلاگز کو پڑھنا ضروری ہے۔نوجوان نسل اب اخبارات اور ٹیلی ویژن کے ذریعے اپنے جذبات اور احساسات کا اظہار نہیں کرتے بلکہ وہ انٹرنیٹ کے ذریعے اپنے رابطے بڑھاتے اور کسی انجانی منزل کی طرف نکل کھڑے ہونے کا اظہارکرتے ہیں۔
امیر اور غریب‘پنجابی‘پٹھان ‘سندھی‘بلوچ‘سرائیکی‘ہزاروی‘ مہاجر اور بہاولپوری یہ سب گروہ اور طبقے اپنے اپنے دکھ لے کے نکلیںگے اور ایک لاوے کی شکل اختیار کر جائیں گے ۔اس لاوے کو مولوی سنبھال نہیں پائے گا کیونکہ نئی نسل مولوی سے واقف نہیں اور اس کے پیچھے چلنا بھی نہیں چاہتی۔شائد سوشلسٹ گروہ اس بے چینی سے فائدہ اٹھائیں یا شائد مسلم سکالرز مولوی کی جگہ لے سکیں۔ کچھ کہا نہیںجاسکتا“۔
جناب سلطان بشیرالدین ایک سائنسدان بھی ہیں اور قرآن کے طالب علم بھی۔ان کے تجزئے کو پرکھنا ہو تو اسلام آباد سے نکل کر ہمیں اصلی پاکستان میں کچھ وقت گزارتا چاہیے۔خدا نہ کرے کہ نوجوان نسل اور مایوسی میں گھرے عوام کا غم اور غصہ کسی لاوے کی شکل اختیار کرے اور جاگیردار طبقہ‘یا کوئی اور بالاتر گروہ اس لاوے کو اپنے حق میں استعمال کرلے۔ہمارے دانشوروں کو ابھی سے گہرا مطالعہ کرکے کوئی مثبت اور بہتر راہ تجویز کرنی چاہیے۔ہمارے موجودہ رہبر اور ناخدا اپنی بقاءکے لئے اس قدر مصروف ہیں کہ انہیں متوقع طوفانوں کا احساس ہی نہیںرہا‘انہیں کون سمجھائے کہ‘
عکس ٹھہرے ہوئے پانی میں ہے طوفانوں کا
ناخدا سے یہ کہو کہ وہ لب ساحل نہ رہے

ماضی میں جھانکنا انسان کی فطرت ہے۔نہ چاہتے ہوئے بھی انسانی سوچ ماضی کے جھروکے سے جھانکنے لگتی ہے۔ دس برس ہونے کو آئے ہیں امریکہ نے نائن الیون کے حادثے کا بدلہ لینے کے لئے روسیوں کے ہاتھوں پہلے سے ہی تباہ حال افغانستان پر ڈیزی کٹر بموںکی بوچھاڑ کر دی تھی۔آج امریکی سفیر پورے یقین سے اعلان کر رہا ہے کہ امریکہ افغانستان سے واپس جانے کے لئے نہیں آیا۔ پھر کس لئے آیا؟ یہ وہ سوال ہے جس کے ہزاروں جواب ہیں۔”نائن الیون“ بپا کرنے والے کون تھے‘یہ سارا نزلہ طالبان کی ”اسلامی حکومت “پر کیوں گرا؟۔ایسے سوالوں کے جوابات دیتے ہوئے لوگوں نے کتابیں لکھی ہیں۔ جب تک مورخ تاریخ قلم بند کرتے رہیں گے‘افغانستان پر امریکی قبضہ کی وجوہات پر بحث ہوتی رہے گی۔
افغانستان جیسے قبائلی معاشرے میں ”امارات اسلامی“ کے قیام کا تجربہ کیسا رہا‘اس سوال کا جواب لینے کے لئے مجھے محترم سلطان بشیر محمود جیسے نیوٹرل اور بے غرض تجزیہ کار سے بہتر گواہ دکھائی نہیں دیتا۔ یہ پاکستان کے وہ نیوکلیئر سائنسدان ہیں جنہوں نے ٹیکنالوجی اور تعلیم کی بنیاد پر ملت اسلامیہ کی نشاة ثانیہ کا ایک خواب دیکھا۔ خوش قسمتی سے ان دنوں لاہور‘اسلام آباد اور کابل میں چند احباب”امہ تعمیر نو“ کے نام سے ایک ادارہ قائم کرچکے تھے لہٰذا جناب سلطان محمود اور ان کے دوستوں کے حلقہ نے اس مشن کے لئے خود کو وقف کردیا۔ ان کے اس مشن سے اسلام آباد اور کابل کے سفارتخانے آگاہ رہتے تھے اور تعمیراتی تعلیمی اور صنعتی منصوبوں کی تکمیل کے لئے دونوں ممالک کی حکومتیں بھی انتہائی معاون تھیں۔
”ہم نے افغانستان میں اڑھائی برس تک کام کیا۔ملا محمد عمر کی حکومت بڑا تعاون کرتی تھی۔کرپشن ہرگز نہیں تھی۔ احکامات پر عملدرآمد منٹوں میں ہوتا تھا۔ ہم نے قندھار انڈسٹریل ایریا میں آٹا مل لگائی ‘ماچس فیکٹری کے لئے اسباب مہیاکئے۔ تعمیر شروع ہوگئی تھی۔انگور کا باغ لگانے کے لئے حکومت افغانستان نے ہمیں بارہ ہزار ایکڑ اراضی آلاٹ کردی تھی۔کسی وزیر یا کسی افسر نے کبھی کوئی رشوت‘تحفہ یا مراعات طلب نہیں کیں۔ہم حیران ہوتے تھے کہ یہ معاشرہ اچانک اس قدر شفاف اور دیانتدار کیسے ہوگیا ہے۔ہم نے کئی بار رات کو سفر کئے‘افغانستان کی حدود کے اندر کبھی کوئی حادثہ پیش نہیں آیا۔ بے خطر آیا جایا کرتے تھے“
”طالبان تحریک نے لوگوں کے اندر عجیب جذبہ بھر دیا تھا۔ وہ پڑھے لکھے نہیں تھے‘ڈگریاں نہیں لی تھیں۔ مدرسوں سے نکلنے والے مولوی تھے۔ لیکن ان کے اندر (Honesty of Purpose) یعنی مقصد کے ساتھ اخلاص بہت تھا۔لہٰذا جو کام کسی انجینئر یا ایم ڈی کے ہاتھوں ہونا تھا وہ کام عام مولوی بہتر انداز میں سرانجام دے رہا تھا۔ ہمیں کابل کے قریب ایک ہائیڈرو پاور ہاﺅس کا معائنہ کرایاگیا۔ہم اس پاور ہاوئس کے جنرل منیجر سے ملے۔یہ کسی مدرسے سے فارغ التحصیل مولوی تھے۔ہم نے پوچھا کہ یہ تو پاورہاﺅس ہے اور خالص ٹیکنیکل کام ہے آپ اسے کس طرح سنبھال لیتے ہیں۔مولوی صاحب کا جواب تھا کہ میںکوئی انجینئر نہیں ہوں۔ میں اس پاور ہاﺅس پر مامور ہوں۔میں روزانہ صبح آجاتا ہوں۔ایک ایک آدمی کے پاس جاکر اس کی ضرورت پوچھتا ہوں اور وقت مقررہ میں جیسے بھی ہو اس کی وہ تیکنیکی ضرورت پوری کروا دیتا ہوں۔“
”ہمیں ایک بہت بڑی مسجد میں لے جایا گیا۔مسجد روسی حملوں کے سبب جگہ جگہ سے خستہ تھی۔ اس مسجد میں سینکڑوں بچیاں پڑھ رہی تھیں۔ ریاضی تھی‘عربی تھی اور سکول کی دیگر کتابیں پڑھائی جارہی تھیں۔ ہمیں مہتمم نے بتایا کہ ہم نے تین گھنٹے بچیوں کی تعلیم کے لئے مختص کرنے کا حکم دیا ہے۔ چونکہ ہمارے پاس پڑھانے والے اساتذہ ہی نہیں اس لئے ابھی ابتدائی کلاسوں کا اجراءکیا ہے۔ مسجد میں پڑھانے کا سبب یہ ہے کہ ہمارے بچوں کے لئے سکول نہیں تو بچیوںکے لئے کہاں سے لائیں۔ ہم نے چار لاکھ کتابیں مفت فراہم کرنے کا پروگرام بنایا تاکہ تعلیم کا دائرہ وسیع ہوسکے“
”میں یہ نہیں کہوں گا کہ طالبان کی حکومت مکمل اسلامی ماڈل تھی۔میرا اندازہ ہے کہ یہ ستر فیصد اسلامی اور تیس فیصد قبائلی تھی۔ذرائع ابلاغ نے ستر فیصد کا ”بلیک آﺅٹ“ کیا اور 30فیصد کو ”فلیش“ کیا۔امریکی حملے کا ایک بڑا سبب یہ ہوسکتا ہے کہ افغانستان میں یہ ستر فیصد اسلامی حکمرانی پاکستان سمیت دوسرے مسلم ممالک میں تازہ ہوا کا جھونکا ثابت ہوئی۔مسلم عوام توقع کرنے لگے تھے کہ ان کے ہاں کا فرسودہ نظام بھی بدل جائے گا اور ان کے ہاں بھی ”امارات اسلامی“ جیسا تجربہ ہوگا۔ یہ بات امریکہ کے لئے سب سے بڑی پریشانی تھی۔ایران کا انقلاب بھی امریکہ کے لئے ناقابل برداشت تھا۔لیکن یہ شیعہ مسلمانوں تک محدود تھا۔ افغانستان میںاگر طالبان کی حکومت چلنے دی جاتی تو پھر یہ ”سنی انقلاب“ پورے عالم اسلام میں پھیل جاتا۔ اور یہ بات امریکہ کے لئے قطعاً قابل برداشت نہیں ہوسکتی تھی“
”پاکستان میں مسلمان سب ہیں لیکن اسلام پسند بہت کم تعداد میں ہیں۔مولوی اور اسلام کے علمبردار پاکستانی معاشرے میں اپنا اعتبار کھوچکے ہیں۔یہاں کے طالبان نظریاتی نہیںفسادی گروہ بن چکے ہیں۔ان کے نظریے کو عوام کی تائید حاصل نہیں ہوسکی۔پاکستان میں روزگار‘انصاف اور اختیار سے محروم عوام کو کسی نظریے سے کوئی غرض نہیں رہی“جناب سلطان محمود بشیر کے مشاہدات سن کر دل نے چاہا‘دوڑ پیچھے کی طرف اے گردش ایام تو!

پاکستان میں بہت کم لوگوں کو علم ہوگا کہ موسم سرما کی ٹھٹھرتی شاموں میں انگیٹھی کے سامنے بیٹھ کر ہم جس ”کاجو“ سے لطف اندوز ہوتے ہیں وہ بھارت نہیں بلکہ نائجیریا کی پیداوار ہے۔بادامی رنگت والا یہ خشک میوہ افریقہ کے سرسبزوشاداب ملک کے جنگلات میں خود روپودوں پر لگتا ہے ۔بھارت کے کاروباری لوگ کوڑیوں کے مُول یہ جنگلی جنس حاصل کرتے ہیں پھر اس کچے ”کاجو“ کو خاص درجہ حرارت پر بھونتے ہیں‘چھیلتے ہیں اور پیکٹوں میں ڈال کر پوری دنیا میں برآمد کرتے ہیں۔غریب آدمی نے تو شائد ساری زندگی اس پرلطف میوے کو کبھی چکھا بھی نہ ہو لیکن صاحب حیثیت لوگ جانتے ہیں کہ لاہور اور اسلام آباد کی مارکیٹوں میں کس بھاﺅ فروخت ہوتا ہے۔انڈیا کے کاروباری لوگ عرصہ دراز سے اس بزنس کے ذریعے کثیر دولت کمارہے ہیں۔
نائیجریا میں پاکستانی سفیر محترم جنرل (ر) آصف دریز اختر راقم کو کمال شفقت سے اپنے حلقہ یاراںمیں شمار کرتے ہیں۔گفتگو میں روانی اور تاثیر مخاطب کو مسلسل متوجہ کئے رکھتی ہے۔ اگر وہ خود اپنا تعارف افواج پاکستان کے حوالے سے نہ کرائیں تو انداز تکلمّ سے سپاہی نہیں بلکہ عالمی سطح کے سفارتکار دکھائی دیتے ہیں۔پاک فوج پر فخر ہونا چاہیے کہ اس کے دامن میں ایسے نفیس الطبع اہل دانش بھی موجود ہیں۔ گزشتہ ہفتے میرے دفتر تشریف لائے ان سے نائجیریا کے حوالے سے گفتگو ہوئی۔
جنرل صاحب کہہ رہے تھے ۔”کہ پاکستان میں عام تصور یہ ہے کہ نائجیریا اور افریقہ کا کوئی خطرناک سا خطہ ہے جہاں آدم خور بستے ہیں لیکن وہاں ڈیڑھ دو برس گزارنے کے بعد اس نتیجے پر پہنچا ہوں کہ پاکستانی تاجر اس ملک میں لا محدود کاروباری مواقع سے فائدہ نہیں اٹھا رہے۔ نائجیریااور پاکستان کی آبادی تقریباً ایک جیسی ہے۔ نائجیریابھی پاکستان کی طرح برطانیہ کی نوآبادی رہی ہے اور اس کا فائدہ یہ ہے کہ انگریزی زبان آسانی سے بولی اور سمجھی جاتی ہے۔ نائجیریا دنیا میں تیل پیدا کرنے والا چھٹا بڑا ملک ہے۔امریکہ میں پچیس فیصد تیل نائجیریا سے جاتا ہےِ۔حال ہی میں چین نے بڑے پیمانے پر اس دورافتادہ ملک میں سرمایہ کاری شروع کی ہے۔سڑکیں‘پل اور عمارتیں۔جدھر دیکھیں چینی انجینئرز اور محنت کش مصروف کار ہیں۔چینی کمپنیوں نے نائجیریا سے کیش کے بجائے آئل کی گارنٹی لی ہے۔ بین الاقوامی بینک ”گارنٹر“ کے طور پر یہ ڈیل کراتے ہیںِ۔چین آئندہ سو سال تک آئل کے حصول کو یقینی بنانے کے لئے نائجیریا کی ترقی میں سرمایہ لگا رہا ہے۔جرمنی کی کمپنیاں طویل عرصہ سے موجود ہیں۔ ان کے ہیڈ آفس دارالخلافہ” ابوجہ“ میں موجود ہیں جبکہ آپریشنز شمالی اور جنوبی نائجیریا میں پھیلے ہوئے ہیں۔ بھارت نے صرف ”کاجو“ کے کاروبار ہی نہیں بلکہ چاول‘آئی ٹی اور ایجوکیشن میں بھی سرمایہ کاری کی ہے۔ کس قدر افسوس اور دکھ کی بات ہے کہ پاکستانی چاول دبئی جاتا ہے اور دبئی سے انڈین کمپنیاں یہی چاول خرید کر اپنے ناموں کے لیبل لگا کر نائجیریا برآمد کر رہی ہیں۔پاکستانیوں کو علم ہے کہ چاول براہ راست نائجیریا بھیجنے میں بہت زیادہ منافع ہے‘لیکن پاکستانی تاجر ”روٹین“ سے آگے بڑھتے ہی نہیں۔ہمارے ہاں نئی منڈیاں تلاش کرنے کی جستجو بھی نہیں۔ہم ہر بار مغربی اور امریکی منڈیوں کی طرف لپکتے ہیں اور بھارت اور چین نائجیریاجیسے ملک سے ہر سال اربوں ڈالر کما رہے ہیںِ۔بھارت کی نائجیریامیں درآمد دس ارب ڈالرز ہے جبکہ پاکستان کی صرف تین سو ملین ڈالرز!
نائجیریا کے عام لوگ شائد پاکستان کے بارے میں بہت زیادہ نہیں جانتے۔ہماری کبھی وہاں کوئی تجارتی نمائش بھی نہیں ہوئی۔”ابوجہ“ کے اعلیٰ افسران پاکستان کے بڑے مداح ہیں۔ کسی دور میں پاکستان سے ڈاکٹرز‘انجینئرز اور ٹیچرز اس ملک میں آئے تھے۔ وہاں ان لوگوں نے بڑی محنت کی۔ نائجیریاکے پڑھے لکھے لوگ اب بھی اپنے پاکستانی ٹیچرز‘ڈاکٹرز اور انجینئرز کا ذکر محبت سے کرتے ہیں۔
نائجیریا کوئی خشک یا بنجر ملک نہیں ہے۔وہاں کی زمین انتہائی زرخیز ہے ۔ شکرقندی کی مانند کی ایک فصل ”ییم“ بہتات میںپائی جاتی ہے۔ چھ ماہ بارش کا سلسلہ چلتا ہے اور چھ ماہ دھوپ تمازت دیتی ہے۔”ییم“ایک بار بودیں تو کئی کٹاﺅ دے دیتی ہے۔ نائجیریا کے عام لوگ اسے پیس کر آٹا بناتے ہیں اور اسی سے سالن تیار کرتے ہیں۔شائد دنیا میں سب سے زیادہ مونگ پھلی بھی یہیں ہوتی ہے۔مونگ پھلی بوتلوں میں ڈال کر بیچی جاتی ہے۔ نائجیریا کے کیلے کا سائز بالشت بھر ہوتا ہے۔عام لوگ اسے سبزی کے طور پر پکاتے ہیںِ۔شکرقندی‘مونگ پھلی اور کیلے وغیرہ کو ”پراسس“ کرکے بہت سازرمبادلہ کمایا جاسکتا ہے۔
نائجیریا ایسا ملک ہے جو اپنے استعمال کی تمام اشیاءبیرونی ممالک سے درآمد کرتا ہے‘اس ملک سے صرف وہی کاروباری لوگ فائدہ اٹھا سکتے ہیں جن کے اندر محنت اور مہارت کے ذریعے دولت اور عزت کمانے کا جذبہ ہو۔ نائجیریا کا معاشرہ ابھی تعمیر کے عمل سے گزر رہا ہے۔وہاں معاملات میں پیچیدگیاں بھی ہیں لیکن اگر ہمارے چیمبرز آف کامرس اور بڑے صنعتی اور مالی ادارے تہیہ کر لیں تو صرف نائجیریاکے ذریعے ہی ہم اپنا برآمدی ہدف پورا کرسکتے ہیں۔شرط صرف ہمت کی ہے‘خدا کی مدد بھی میسر ہوجائے گی!

جنرل (ر) مرزا اسلم بیگ افواج پاکستان کے شائد واحد سپہ سالار ہوں گے جن کے پاس اقتدار سنبھالنے کا مکمل موقع تھا لیکن انہوں نے انتہائی قومی سوچ کا ثبوت دیتے ہوئے ملک کے اندر جمہوریت کو راستہ دیا۔ جنرل صاحب کو ان کی اسی جمہوری سوچ کی بدولت”جمہوری جرنیل“ بھی کہا جاتا ہے ۔دشمنوں کی نیندیں حرام کردینے والی فوجی مشقوں ”ضرب مومن“ کے خالق‘ صوبہ بہار کے علاقے اعظم گڑھ سے تعلق رکھنے والے معزز مغل خاندان کے چشم وچراغ جنرل (ر) مرزا اسلم بیگ کے ساتھ اپنے کالم نگار دوست بیگ راج کے ہمراہ دو گھنٹے کی طویل نشست ہوئی جس میں جنرل صاحب نے نہ صرف اپنی سیاسی ناکامی کی وجوہات بیان کیں بلکہ پاکستان میں انقلاب کے خطرات سے آگاہ کیا۔ سیاست اور ریاست کے طالبعلموں کے لئے جنرل بیگ کے اس تجزیے میں روشنی کا سامان تو ہے ہی ‘ قارئین کیلئے بھی دلچسپی کا سبب ہوں گے۔”میں سیاست میں کیوں ناکام ہوا“جنرل صاحب نے گفتگو کے آغاز میں خود ہی سوال اٹھایا۔اورپھربتانے لگے کہ میں نے 1986ءسے 1996ءتک دس سال ”پاکستان عوامی قیادت“ کے پلیٹ فارم سے عوام کو بیدار کرنے کی سرتوڑ کوشش کی۔ پاکستان کے بیسیوں اضلاع میں گیا۔ لوگوں سے طویل بحثیں ہوئیں۔ اس دس برس کے عرصہ میں میں نے اپنے تمام جمع شدہ وسائل خرچ کردیئے۔ لیکن میرا مشاہدہ یہ ہے کہ پاکستانی عوام اور حکمران طبقہ سوچ کے اعتبار سے ایک ہوچکے ہیں۔ لوگ اس وقت تک کسی سیاسی پارٹی یا رہنما کا ساتھ نہیں دیتے جب تک انہیں ساتھ دینے کے بدلے کسی ”حصول“ کا یقین نہ ہو۔ اسی طرح دولت مند اور مخیرحضرات اس وقت تک سرمایہ کاری نہیں کرتے جب تک اس سرمائے کے عوض ان کو اپنا سرمایہ پڑھنے کا یقین نہ ہو۔ لہٰذا پاکستانی عوام اور ووٹر کسی انقلاب یا بڑی تبدیلی کے خواہش مند نہیںہیںبلکہ وہ فوری فائدے کے پیچھے بھاگتے رہتے ہیں بالکل حکمران طبقے کی طرح جو اپنے وقتی فائدے کے لئے ایک دوسرے کے ساتھ جڑتے اور ٹوٹتے ہیں ۔لہٰذا کسی جوہری تبدیلی کے لئے پاکستان کے اندر کوئی انقلاب برپا نہیں ہوسکتا۔
فرض کیا کہ معاشرے کا کچھ حصہ بہت خلوص کے ساتھ آگے بڑھتا ہے اور عوام کو وقتی طور پر جذباتی کرکے اپنے ساتھ ملا کر انقلاب نما تبدیلی لے آتا ہے یعنی موجودہ سسٹم کو لپیٹ کر اس کی جگہ کوئی اور سسٹم لے آتا ہے تو یہ ملک حصوں میں بٹ جائے گا۔
قومی وحدت کی بنیادیں بہت ہی کمزور ہوچکی ہیں۔ اسلام ہماری قومی وحدت کی بنیاد تھی لیکن عوام اور حکمران طبقہ کا ستر سے اسی فیصد حصہ اسلام کے بنیادی تقاضے نبھانے پر آمادہ ہی نہیں۔اگر سماجی انصاف اور انسانی برابری کا اسلامی تقاضا پورا کیا جاتا تو ہمارے مسلمان بنگالی بھائی ہم سے جدا نہ ہوتے۔ چونکہ اسلام ہماری وحدت کا واحد ذریعہ نہیں رہا۔ اس لئے اب اگر کوئی انقلاب آتا ہے تو ہماری قومی وحدت کا شیرازہ بکھر جائے گا۔ قومی وحدت سے متضاد ہمارے معاشرے میں صوبائی تعصبات بہت مضبوط ہوچکے ہیں۔قیام پاکستان کے بعد وسائل کی غیر منصفانہ تقسیم نے علاقائی سوچ کو پورے شدومد سے ابھارا ہے۔ سندھ‘بلوچستان‘شمالی پنجاب‘ہزارہ صوبہ اورخیبر پختونخواہ میں سب نعرے اور گروہ قومیتوں کے حقوق کے نام پرانتشار کا شکار ہوجائیں گے۔ علیحدگی کی مزید خطرناک تحریکیں شروع ہوسکتی ہیں ۔ ان لوگوں کے بیرونی طاقتوں کے ساتھ مضبوط روابط ہیں۔لہٰذا اگر مشرق وسطیٰ کی طرح پاکستان میں کوئی انقلاب آتا ہے تو یہ جغرافیائی وحدت کے لئے زہر قاتل ثابت ہوگا۔
پاکستانی عوام کے پاس دو راستے ہیں۔ ایک یہ کہ ڈیڑھ برس مزید انتظار کریں اور آئندہ الیکشن میں سوچ سمجھ کر حصہ لیں۔انتخابات کا سلسلہ چلنے دیا جائے اور ہر انتخابات میں تھوڑی بہت اصلاح کو ٹارگٹ رکھا جائے۔مجھے یقین ہے کہ ضیاءالحق اور مشرف جمہوریت کی راہ میں رکاوٹ نہ بنتے تو آج ہمارا جمہوری نظام بڑی حد تک شفاف ہوچکا ہوتا۔ عوام بھی بالغ النظر ہو کر وقتی اور فوری ”حصول“ کی بجائے اعلیٰ ترین قومی مقاصد کو اپنا پہلا اور آخری مطالبہ قرار دے چکے ہوتے۔ پاکستانی عوام کے پاس دوسرا راستہ یہ ہے کہ انقلاب کا نعرہ لگانے والوں کے پیچھے چل پڑیں اور پاکستان کو نہ ختم ہونے والے خطرات سے دوچار کردیں۔انقلاب لانا تو شائد ممکن ہوجائے لیکن انقلاب کو سنبھالنا ناممکن ہوجائے گا۔انقلاب کی راہ پر چلنے والے رہبروں کو جنرل اسلم بیگ کے ان خیالات کو مدنظر رکھناہوگا!

وزارت خارجہ کی خاتون ترجمان نے کرکٹ ڈپلومیسی کو کامیاب قرار دیتے ہوئے یہ یقین بھی ظاہر کردیا کہ پاکستان اور بھارت اپنے مسائل خود حل کرسکتے ہیں کسی تیسرے فریق کی ضرورت نہیں۔آپ قارئین کو یاد ہوگاکہ سابق صدر جنرل پرویز کی حکومت نے آگرہ میں بے آبرو ہونے سے پہلے تواتر اور تسلسل کے ساتھ یہی خوشخبری سنائی تھی کہ اب پاکستان اور بھارت خود اس قابل ہوگئے ہیںکہ کشمیرسمیت تمام معاملات خود ہی حل کرلیں گے امریکہ یا کسی اور ملک کی طرف سے ثالثی کی قطعاً ضرورت نہیں ہے۔آگرہ میں جب بھارت عین وقت پر تمام عہدوپیمان بھول کر تحریر شدہ متفقہ مسودے سے مکر گیا تو کمانڈو صدر مایوسی کے عالم میں ہاتھ ملتے دکھائی دیئے اور پھر موہالی میں ادھموا ہونے تک ہم امریکہ ‘برطانیہ اور چین سمیت ہر ملک کو پکارتے رہے کہ وہ مسئلہ کشمیر حل کرانے میں ثالثی کی ذمہ داری پوری کریں۔
پاکستانی قوم کے لئے یہ حیرت ناک خبر ہے کہ حکومت پاکستان ایک بار پھر پرویز مشرف والے اس یقین کے ساتھ سرشار ہوگئی ہے کہ اب پاکستان اور بھارت اپنے مسائل خود حل کرسکتے ہیں۔ آخر موہالی میں میچ ہارنے کے علاوہ ایسا کونسا چمتکار ہوا ہے کہ مسئلہ کشمیر جیسے عالمی تنازعہ پر بھارت ایک بار پھر قابل اعتبار ہوگیا ہے؟ منموہن سنگھ‘سونیا گاندھی اور راہول گاندھی نے ایسا کونسا جادو کردیا ہے کہ ہمارے وزیراعظم سید یوسف رضا گیلانی کوبھی بھارتی قیادت کے منہ سے پھول جھڑتے دکھائی دیئے۔وزیراعظم کے لب و لہجہ سے خوشی یوں جھڑتی ہے گویا بھارتی قیادت نے کشمیر ان کی جھولی میں ڈال دیا ہے اور اب بس چند دنوں کی بات ہے جب ہماری قومی قیادت سرینگر کی ڈل جھیل میں کشتیاں چلا رہی ہوگی۔ تقسیم ہند کا ادھورا عمل آنکھ جھپکنے میں مکمل ہوجائے گا!
تفصیلات شائع ہوئی ہیں کہ منموہن نے جناب گیلانی کی طرف سے پاکستان کے دورے کی دعوت قبول کر لی ہے۔یہ بھی طے ہوا ہے کہ اب دونوں ممالک کے تجارت کے سیکرٹریز آپس میں ملیں گے۔1971ءکے کچھ قیدی بھی چھوڑ دیئے جائیں گے اور پاکستان کی قید میں سزائے موت کا ایک قیدی بھی شائد رہا کردیا جائے گا۔ہماری خاتون وزیر اطلاعات ونشریات نے دعویٰ کیا ہے کہ بھارت کو احساس ہوگیا ہے کہ معاملات صرف مذاکرات سے ہی حل کئے جاسکتے ہیں۔ہمارے حکمران خوشی سے بغلیں بجا رہے ہیں اور اس اظہار مسرت کے پیچھے یہ رازبھی بتایا جارہا ہے کہ بھارت نے بمبئی حملوں کے ملزموں کی حوالگی کا مطالبہ ترک کر دیا ہے۔ پاکستانی حکمرانوں کو سکھ کا سانس ملا ہے۔بتایا جارہا ہے کہ بھارت کی شہہ پر امریکہ کے بمبئی حملوں میں ہلاکت شدگان کے لواحقین کی طرف سے درج کرائے گئے مقدمے کی پیروی ختم ہوجائے گی اور یوں آئی ایس آئی کے سربراہ کسی ممکنہ گرفتاری سے بچ جائیں گے۔افواہ ہے کہ ان”انعامات “کی خاطر ہی ہماری قومی ٹیم نے سیمی فائنل میں چار کیچ چھوڑے اور ٹیسٹ میچ والی بیٹنگ کی تھی۔ مزید یہ افواہ بھی ہے کہ خطے میں بھارت کی بالادستی کو تسلیم کرلیا گیا ہے۔ موہالی کے گراﺅنڈ میں شکست کے بدلے ہی چندی گڑھ میں ہونے والے مذاکرات ”کامیاب“ہوئے۔
پنجاب کے وزیراعلیٰ نے پاکستانی کرکٹ ٹیم کی اس ”شاندار“کارکردگی پر نہ صرف یہ کہ استقبال کیا بلکہ ہر کھلاڑی کو پانچ پانچ لاکھ روپے بھی دیئے۔ وزیراعظم ہاﺅس میں ”قومی مفاد“ کا مظاہرہ کرنے والی اس بہادر ٹیم کو چائے پلائی جائے گی۔ ٹیم کے کپتان شاہد آفریدی کو قوم سے معافی مانگنے سے منع کردیا گیا ۔انہیں تھپکی دی جارہی ہے کہ انہوں نے بہت بڑا ”کارنامہ“ سرانجام دیا ہے اور ان کے حیرت انگیز کھیل نے دو ملکوں کو آپس میں پھر سے ملادیا ہے۔یہ پہلی بار ہے کہ بھارت سے ذلت آمیز شکست کے باوجود قومی ٹیم کو پھولوں اور نوٹوں کے ہار پہنائے جارہے ہیں۔مصباح الحق سے کسی نے نہیں پوچھا کہ اس نے ”ون ڈے“کو ”ٹیسٹ میچ“ کیوں بنایا۔کسی نے کیچ چھوڑنے والوں کا محاسبہ نہیں کیا۔قوم کوپہلے کرکٹ کا بخار چڑھایا گیااور اب تپتے جسم پر برف ملی جارہی ہے۔
یہ بھی پہلی بار ہواکہ بھارتی اخبارات نے پاکستانی ٹیم کو بدترین شکست کے باوجود بہترین الفاظ میں خراج تحسین پیش کیا۔”وہ شکست کھاگئے لیکن ان کے سر فخر سے بلند ہیں“ ایسے ایسے ذومعنی جملے لکھے گئے کہ اپنی دانشمندی بھی ششدر کھڑی ہے۔
کھیل ہی کھیل میں پس پردہ طاقت نے پاکستانی حکومت کو بھارتی حاشیہ نشیبی پر بالآخر آمادہ کر لیا ہے اور مسئلہ کشمیر کامثلہ کرنے کی تیاریاں مکمل ہوگئی ہیں۔کشمیر کو ایک طرف رکھ کر خطے میں امریکی مفادات کے تحفظ کی خاطر آگے بڑھنے اور بڑھتے ہی چلے جانے کا ٹاسک دے دیا گیا ہے اب کشمیری اور ان کے رہنما ہزار قربانیاں دیتے رہیں۔ ان کے جواں سال بچے اس پاکستان کی خاطر کٹتے اور مرتے رہیں اور کشمیریوں کی زندگی جہنم بنی رہے ہم بھارت کے ساتھ تجارت کو بڑھائیں گے۔”دہشتگردی“ کیخلاف جنگ میں اکٹھے چلیں گے۔ سید علی گیلانی کی آواز صدا بصحرا ہی رہے گی۔کھیل ہی کھیل میں ہم نے ایک بار پھر کشمیر کو کھیل تماشہ بنا دیا ہے !یہ ہے ہماری قومی خودمختاری اور کشمیر سے محبت کا ایک اور مظاہرہ!

جب سے لفظ شناسی کے درجے کو پہنچے ہیں پاکستان کے حوالے سے ہر دور میں لفظ ”بحران“ کا تکرار سنا ہے۔بحران در بحران‘ایک سے نکلیں تو دوسرے میں پھنس جائیں گویا مرض بڑھتا گیا جوں جوں دوا کی۔ دیگر قومیں اور ممالک بحرانوں سے نکلتے جارہے ہیں اور ہم اس دلدل میں دھنستے چلے جارہے ہیں۔ماہرین اقتصادیات اور دانشوران معاشیات اب اس امر پر متفق ہوگئے ہیں کہ مستقبل کے پاکستان کو توانائی کے شدید ترین بحران کا سامنا کرنا ہے۔ بجلی‘ گیس ‘کوئلہ اور تیل یہ توانائی کے چار بڑے ذرائع ہیں اور انہی ذرائع سے ہم مشین کا پہیہ چلاتے اور فیکٹری کی چمنیوں سے دھواں اگلتے ہیں۔ گھر میں روشنی کرنا ہو یا تندرو تپانا ہو‘ہوا میں تیرنا ہو یا سمندر میں غوطہ زنی کرنی ہو‘سڑک پر فراٹے بھرنے ہوں یا کھیت کھلیانوں میں فصلوں کو لہلانا ہونا۔ ہر خوشی اور خوشحالی کے لئے توانائی کاکوئی نہ کوئی ذریعہ درکار ہے۔ تیل جلاتے ہیں اور اس سے تھرمل پاور پیدا کرتے ہیں۔جلانے کے لئے تیل کا حصول اب دل جلانے سے کہیں زیادہ کار دل فگار ہے۔ تیل بیرون ممالک سے آتا ہے۔ یہ ڈالروں کے سکے میں خریدا جاتا ہے۔ ہمارے ہاں ڈالرز نہیں روپیہ ہے۔ ہم تقریباًسو روپے جمع کریں تو ایک منحوس ڈالر کا پیٹ بھرتا ہے۔ 2015ءتک اندازہ ہے کہ ہمیں تیل کی درآمد پر ہر سال اڑتیس ارب ڈالر تک خرچ کرنے پڑیں گے۔ یہ ڈھیر سارے ڈالر کہاں سے آئیں گے۔ ہماری برآمدات کا ہدف دو ہزار پندرہ تک زیادہ سے زیادہ پندرہ ارب ڈالر ہوگا۔ ہم پندرہ ارب ڈالر کمائیں گے اور دگنے ڈالر دے کر تیل خریدیں گے۔ جب ایسا نہیں کرسکیں گے تو پھر چلتی فیکٹریوں میں سے آدھی سے زیادہ بند کریں گے‘روشن گھروں میں جلتے قمقموں کا گلا گھونٹیں گے اور ہوائی جہازوں اور ٹرینوں کے روٹ بیچیں گے یا انہیں گراﺅنڈ کردیں گے۔آبادی بڑھتی جائے گی اور بجلی کی پیداوار روز بروز کم ہوتی جائے گی۔ ہائیڈل پاور پراجیکٹس کے لئے ہائیڈل پاور چاہیے۔اس کے لئے آبی ذخائر یعنی ڈیم بننے ہیں۔ کب بنتے ہیں ‘کہاں بنتے ہیں۔ایک خواب اور خیال کے سوا اس باب میں رکھا کیا ہے؟ کوئی عالمی‘قومی بینک سرمایہ کاری کے لئے تیارنہیں۔ بھاشا ڈیم ایک مدہوم سی امید ہی تو ہے! جتنے عرصے میں ہم ڈیموں کے لئے سرمایہ تلاش کریں گے۔ اتنی مدت میں ہمارا ہمسایہ ملک ہمارے باقی ماندہ دریاﺅں کا جوہر نچوڑ چکا ہوگا۔ ہم عالمی منصفوں سے منصفی کی بھیک مانگ رہے ہوں گے اور جب مایوسی پوری طرح چھا جائے گی تو پھر ”جنگِ آب“ شروع ہوجائے گی۔ پانی ملے یا نہ ملے خون ضرور بہتا دکھائی دے گا۔ جنگ نہ ہوئی تو ہم پچکے جسموں کے ساتھ صحرا کی موت مر جائیں گے۔
دنیا میں گیس کے ذخائر بے پناہ ہیں ۔ ایران سے معاہدہ ہوچکا لیکن طاقتوروں کی طرف سے اجازت نہیں کہ ہم اس پائپ لائن پر آگے بڑھیں‘ہمیں ترکمانستان کی طرف دھکیل دیا گیا ہے اور خبرگرم ہے کہ ازبکستان نے صاف کہہ دیا ہے کہ پاکستان ترکمانستان سے گیس حاصل نہیںکرسکتا۔ اب کہاں جائیں؟ قطر والے کیا کریں گے ۔ ہم گیس کے پائپوں میں صرف سُوں سُوں سنا کریں گے۔ صنعت و حرفت کا پہیہ تو جام ہوگا ہی‘گھروں کے چولہے ٹھنڈے ٹھار پڑ جائیںگے۔
سولر سوسائٹی آف پاکستان کے صدر شاہد اعوان اور سیکرٹری جنرل علی ذوالقرنین سے بہتر کوئی نہیں جانتا کہ پاکستان کی کل آبادی کے صرف 40فیصد حصے کو اس ادھموئی سی بجلی کی سہولت حاصل ہے۔ صرف 20فیصد آبادی کو گیس سے استفادہ حاصل کرنے کا موقع میسر ہے۔2015ءتک آبادی کے اس حصے کو بھی یہ سہولت میسر نہیں رہے گی۔ ہم استعمال شدہ ٹشو پیپر جلا کر چائے بنایا کریں گے اور سورج ڈھلتے ہی حیات ہمہ گیر کی سرگرمیاں بھی ڈھل جائیں گی۔پتھر کا زمانہ دیکھا نہیں لیکن قرائن سے لگتا ہے کہ دو چار برس بعد یہ بھی دیکھ لیں گے۔
کوئلہ بہت ہے۔ہمارے سائنسدان فرماتے ہیں کہ ملک میں تھر کے علاقے میں کوئلہ کی اعلیٰ کوالٹی کا اس قدر ذخیرہ ہے کہ آئندہ پانچ سو برس تک نہ صرف یہ کہ ملک کی گیس اور حرارت کی ضرورت پوری ہوسکتی ہے بلکہ ہم ایکسپورٹ کرنے کی پوزیشن میں ہوں گے۔ سائنسدانوں کے منہ میں گھی شکر! لیکن کوئلہ تہہ زمین سے خودبخود نکل کر ہماری بھٹھیوں میں کیسے پہنچ جائے گا۔ سنا ہے کہ کوئلے کو گیس میں تبدیل کرنے والی ایک مشین جاپان سے آئی تھی۔وہاں پر زلزلہ‘ سونامی اور تابکاری سے مشین کی درآمد رک گئی ہے۔ ابھی پائلٹ پروجیکٹ شروع ہوگا۔ چین والے ناراض ہو کر الگ بیٹھ گئے ہیں۔پہلے ہم نے انہیں یہ کام سونپا تھا‘پھر خدا جانے ہمارے تیز رفتار دماغوںنے عہد شکنی کیوں کی۔ اب ہم مختلف سرمایہ کاروں پر تکیہ لگائے بیٹھے ہیں۔ کب نومن تیل ہوگا اور کب رادھا ناچے گی!۔
بجلی پیدا کرنے کی صلاحیت طلب سے زیادہ ہے لیکن تیل خریدنے کیلئے رقم نہیں۔بجلی کی بچت کے چرچے رہتے ہیں لیکن 30فیصد تو لائن لاسز میں ضائع ہوجاتی ہے۔ کیسا ظلم ہے کہ ان لائن لاسز کو کم دکھانے کے لئے ہمارے متعلقہ محکمے لوگوں کے میٹر تیز کردیتے ہیں۔گزشتہ چالیس برسوں سے بجلی پر چلنے والے ٹیوب ویل پر سبسڈی کی رقم بلوچستان ‘ اندرون سندھ اور صوبہ خیبرپختونخواہ کھا جاتے ہیں۔جرمانہ پنجاب کو بھرنا پڑتا ہے! جب صورتحال یہ ہو تو پھر بجلی کیلئے رقم کہاں سے آئے گی۔ ہماری قومی حالت یہ ہے کہ ہمارے لوگ” ایئرکنڈیشنڈ لائف “ کو ترک کرنے پر آمادہ ہی نہیں۔آج ہم ایئرکنڈیشنڈ بند کردیں اور قصر صدارت سے لیکر افسران خاص تک تمام کے تمام گھروں سے یہ برق خور مشینیں اٹھالی جائیں تو بجلی کے بحران کو فی الفور کافور کیا جاسکتا ہے ۔لیکن قوم اور حکمران سب ایک ہی مرض میں مبتلا ہیں۔تن آسانی‘ ڈنگ ٹپاﺅ پالیسی اور مانگ تانگ کر گزرا!
توانائی کے متبادل ذرائع کے لئے بورڈ بنے‘ایجنسیاں متحرک ہوئیں۔ ونڈ ٹربائن‘ سولر واٹر ہیٹر‘بائیو ڈیزل‘ سب کاغذی منصوبے ثابت ہوئے۔متبادل توانائی بورڈ کے چیئرمین عارف علاﺅ الدین حقائق کی بنیاد پر ثابت کرتے ہیں کہ پاکستان ایسے خطے میں ہے جہاں پر سورج کی شعاعیں سب سے زیادہ وقت موجود رہتی ہیں‘ ہمارے ساحل سمندر پر ایسے بے شمار مقامات ہیں جہاں سال بھر تیز ہوائیں چلتی رہتی ہیں ‘ہماری زمین پر تیل پیدا کرنے والے پودے اور فصلیں بوئی جاسکتی ہیں۔ اگر ایک جھونپڑی میں پانچ ہزار روپے سے سولر سیل لگا کر عمر بھر کے لئے روشنی کی جاسکتی تو یہ کیا جانا چاہیے۔ یہ ”سولرسیل“ مفت بانٹے جانے چاہیں۔ بے نظیر انکم سپورٹ پروگرام‘ بیت المال اور غربت مٹاﺅ سکیمیں۔آخر ہر جھونپڑی والے کو ایک سولر لالٹین کیوں نہیں دیتے‘کم از کم وہ اس کی روشنی میں اپنے دریدہ دامن کو دیکھ تو لے‘مٹیالا پانی پیتے وقت حشرارت الارض کو پھونک ہی مار سکے!
کیا ہم چین سے یہ سستا سا نسخہ بھی حاصل نہیں کرسکتے! افسوس کہ غریبوں کی جھونپڑیوں میں چراغ جلانے کیلئے معمولی سی سرمایہ کاری کے بھی ہم قابل نہیں رہے۔”کک بیک“ کے چکر میں ہم ”بیک ہی بیک“ ہورہے ہیں۔
حکومت کہتی ہے کہ عوام سرمایہ کاری کرے‘ عوام سوچتی ہے کہ یہ کام حکومت کے ہیں۔حکمرانوں کو اطمینان ہے کہ اگر توانائی کا یہ بحران اسی رفتار سے بھی جاری رہے تو بھی ان کے بنگلوں ‘شیش محلوں اور ایوان ہائے اقتدارمیں روشنیاں جگ مگ کرتی رہیں گی۔ ملک بھر اندھیروں میں ڈوب جائے انہیں اس سے کیا ۔چند اور رینٹل پاور پروجیکٹس کرائے پر لے کر کارسلطنت تو چلاتے ہی رہیں گے ۔بحران دراصل توانائی کا نہیں ہماری نیتوں کا ہے۔ ہمارے ارادوں کا ہے اور ہماری فکر ونظر کا ہے۔ اقبال نے کہا تھا‘
ہم کو تو میسر نہیں مٹی کا دیا بھی
گھر پیر کا بجلی کے چراغوں سے ہے روشن
فیصلہ کرنے والے ”پیروں“ کے جب تک عوام کش انداز نہیں بدلتے‘بحران‘ بحرانوں کو جنم دے کر بڑا کرتے رہیں گے۔

پاکستان کا مسئلہ نمبر ایک کیا ہے؟ ہر صاحب شعور پاکستانی اپنی زندگی میںکئی بار سوال اٹھاتا ہے لیکن کوئی شافی جواب نہ پا کر قلبی بے اطمینانی اور بے چینی کے دائمی مرض میںمبتلا ہوجاتا ہے۔ افراد ہی نہیں بڑے بڑے ادارے اسی سوال کو بنیاد بنا کر بحث و تمحیص کی لامتناہی نشستوں کا اہتمام کرتے رہتے ہیں۔ لیکن آج تک یا تو اس سوال کا کوئی قابل عمل حل پیش ہی نہیں کیاگیا یا پھر اگر کہیں کوئی جواب موجود ہے تو اسے عوام الناس کی طرف سے اجتماعی پذیرائی حاصل نہیں ہوسکی۔ ہمارے عہد کے معروف قومی دانشور محترم نسیم انور بیگ کہتے ہیں کہ بعض اوقات جواب سے زیادہ سوال اہم ہوتا ہے۔ یہ اہم سوالات پوچھتے رہنا چاہیے ۔چاہے اس کا جواب کہیں سے بھی نہ ملے۔ شائد ایسے ہی کسی جذبے سے سرشار ہو کر راقم بھی اس سوال کو شعور کے لبادے سے سجا کر صاحبان علم و دانش کی خدمت میں پیش کرتا رہتاہے۔ پاکستانی سوچ کے حامل اصحاب رائے نے ”تھنکرز فورم“ کے نام سے افکار تازہ کا ایک دسترخوان سجا رکھا ہے۔ میری خوش قسمتی ہے کہ اس فورم نے مجھے بھی پاکستان کے اصل مسئلہ پر گزارشات پیش کرنے کا حکم دیا۔ہنگامہ زیست کی مصروفیات کے سبب میں مقررہ تاریخ پر حاضر تو نہ ہوسکا لیکن تحریری گزارشات بھجوا دی تھیں ‘ چاہتا ہوں کہ اپنے قارئین کی بھی نذر کروں۔

کہنے کو تعلیم بھی پاکستان کا مسئلہ نمبر ایک ہے‘بعض دانشمندوں کے نزدیک اقتصادیات یعنی دولت کا حصول ایک بڑا مسئلہ ہے ۔ یہ سارے مسائل بنیادی ہیں ۔ لیکن یہاں معاملہ مرغی اور انڈے والا ہے۔ کیا انڈہ پہلے ہے یا مرغی؟ میرے نزدیک تمام مسائل کی بنیاد کسی معاشرے کی اجتماعی سوچ سے جڑی ہوئی ہے۔ سوچ ہی دراصل ارادے کا روپ دھارتی ہے اور پھر ارادے عمل میں ڈھلتے ہیں۔ جیسی سوچ ویسے ہی عوامل۔ رسول اللہ صلی اللہ علیہ وسلم نے کتنی خوبصورتی کیساتھ احاطہ فرمایا”اعمال کا دارومدار نیتوں پر ہے“۔ اگر پاکستان مسائلستان بن چکا ہے تو اس کی بنیادی وجہ یہ ہے کہ ہماری سوچ الجھی ہوئی ہے۔فکر میں یکسوئی نہیں۔ اسی الجھاﺅ اور عدم یکسوئی کا نتیجہ ہے کہ ہم بحیثیت قوم مسائل کو حل کرنے کے بجائے نت نئے مسائل کوجنم دے رہے ہیں۔ہمیں ہر حال میں چند متفقہ خیالات کو سوچ کا پہناوہ پہنانا چاہیے تاکہ ہمارے عوامل میں ہم آہنگی پیداہوسکے۔

ہم میں سے ہر آدمی اپنی نجی اور اجتماعی زندگی میں متفق ہے کہ معاشرہ بغیر انصاف کے قائم نہیں رہتا۔ پھر کیا سبب ہے کہ ہم اس اجتماعی اور متفقہ سوچ کو عمل میں ڈھلنے نہیںدیتے۔ نظام عدل کا خواب ہماری اجتماعی فکر کا آئینہ دار ہے۔ یہ ریاست کی ذمہ داری ہے کہ نظام عدل ہر سطح اور ہر طرح سے قائم دائم رہے۔ قانون کی حکمرانی۔ چاہے معاشرے کے تمام لوگ ان پڑھ ہوں یا پی ایچ ڈی‘ انصاف اور عدل سب کے لئے ہو۔غریب ہوں یا امیر انصاف کا ترازو ایک پلڑے سے کبھی محروم نہ کیا جائے۔ میرے نزدیک نظام عدل کسی بھی معاشرے کی پہلی اور آخری ضرورت ہے۔ عدل کی خواہش دراصل شعور کی اعلیٰ ترین سطح ہے اور اس لحاظ سے خدا کے فضل سے پاکستان کے اندر اہل شعور کی کمی نہیں۔ گاﺅں کا مفلس کسان بھی عدل مانگتا ہے ‘شہر کا بابو بھی انصاف کا خواہاںہے۔حد یہ کہ ظالمانہ اور غاصبانہ طرز زندگی کے رسیا لوگ بھی جب پھنس جاتے ہیں تو انصاف ہی کے طلبگار دکھائی دیتے ہیں۔بحریہ ٹاﺅن میں کارریس ہوئی۔ چندبدقسمت شائقین ہلاک ہوگئے۔ایک ملزم نے مرحومین کے لواحقین سے معافی نامہ حاصل کر لیا۔ اب وہ ملزم عدالت سے یہ استدعا کر رہا ہے کہ جب لواحقین اسے معاف کرچکے ہیں تو عدالت بھی اسے اس کیس سے بری کردے کہ قانون میں معافی کی گنجائش ہے۔گویا جو لوگ بظاہر طاقتور ہیں وہ بھی بوقت ضرورت عدالت اورعدل ک پناہ میں آنا چاہتے ہیں۔ اگر کوئی عدالتی نظام موجود نہ ہو توجائز حق بھی نہ مل سکے کیونکہ ہر بااثر آدمی سے بھی بڑا بااثرشخص موجود ہوتا ہے۔ آزاد عدلیہ کی عدم موجودگی میں صرف انارکی پھیلتی ہے اور افراد‘گروہ اور قومیتیں انصاف کے اپنے اپنے ترازو گاڑھ کر من مانے فیصلے کرتے ہیں۔ آپس میں بداعتمادی بڑھتی ہے۔دشمن اپنی کمزوریوں سے فائدہ اٹھاتے ہیں اور یا تو ”طالبان “ جیسے لوگ حاوی ہوجاتے ہیں یا پھر ریاست ”پولیس اسٹیٹ“ بن جاتی ہے۔ اور ایسا بھی ہوتا ہے کہ ردعمل کے نتیجے میں ریاستیوں کے پاﺅں اکھڑ جاتے ہیں۔میرے نزدیک پاکستان کا مسئلہ نمبر ایک یہاں نظام عدل کا قیام ہے۔خدا کا شکر ہے کہ اس ملک میں نظام عدل کے قیام کا مقصد لیکر ایک سیاسی پارٹی بھی میدان میں اتری ہوئی ہے۔قرآن نے بار بار عدل اور انصاف پر زور دیاہے۔

عدل کرو۔یہ تقویٰ کے بہت قریب ہے۔(القرآن)

اللہ تم کو حکم کرتا ہے کہ امانتیں ان کے اصل مالکان کو لوٹا دو اور جب تم لوگوں کے درمیان فیصلے کرو تو عدل کے مطابق فیصلے کرو۔اللہ تم کو اچھی تلقین کرتا ہے ۔ بے شک اللہ سمیع و بصیر ہے(القرآن)

رحمت اللعالمین حضرت محمد صلی اللہ علیہ وسلم نے نظام عدل کی بنیاد اسطرح بیان فرمائی ”خدا کی قسم! اگرمیری بیٹی فاطمہ بھی چوری کرتی تو اس کے ہاتھ کاٹ دینے کا حکم جاری کرتا“

مزیدبرآں اسلامی تعلیمات ہمیں سکھاتی ہیں کہ معاشرہ کفر کی بنیاد پر تو زندہ رہ سکتا ہے مگر ظلم کی بنیاد پر نہیں۔

اگر ہم میں سے ہر صاحب شعور اس بات پر متفق ہوجائے کہ پاکستان اس وقت تک آگے نہیں بڑھ سکتا جب تک یہاں ایک مربوط اور قابل عمل نظام عدل رواج نہیںپاتا تو پھر اصحاب رائے اور قانونی ماہرین اورا سلامی اسکالرز کو آمادہ کیاجائے کہ وہ سر جوڑ کربیٹھیں اور نظام عدل کاایک ماڈل تیار کریں۔مروجہ نظام کی تمام خوبیوں کو سمو لیاجائے اور کمی اور کوتاہی کی نشاندہی کرکے اس کے متبادل تصور کو سامنے لایا جائے۔ یہ کام حکومتوں کے نہیںبلکہ تھنک ٹینکس کے ہیں۔امریکہ کے اندر ہر شعبہ سے وابستہ ایسے تھنکرز فورم مصروف کار رہتے ہیں اورا ن کی سفارشات پالیسی ساز اداروں تک مسلسل پہنچتی رہتی ہےں۔پاکستان میں یہ کام شروع ہے لیکن ابھی تحقیق کے وہ مراحل سامنے نہیںآئے۔حالات جن کا تقاضا کر رہے ہیں۔مجھے پختہ یقین ہے کہ اگر ایک ماڈل نظام عدل دستاویز کی صورت میں سامنے لایا جائے اور اسلامی نظریاتی کونسل میں جو تحقیقی مقالات تیار ہوچکے ہیں ان سے بھی رہنمائی لی جائے۔پھر اس دستاویز کو انگریزی اور اردو زبان میں ذرائع ابلاغ کے ذریعے عوام الناس تک پہنچا دیا جائے تو ہماری بعض بڑی سیاسی پارٹیاں اپنے انتخابی منشورمیں ایسی دستاویز کے مندرجات کو جگہ دے سکتی ہیں۔

ایک بار عوام کو یقین آجائے کہ ہمارے ملک کا نظام عدل مکمل اور قابل عمل ہے تو پھر اعتماد خود بخود اپنا راستہ بنا لے گا۔ آج بے یقینی اور لاتعلقی کا سب سے بڑا سبب یہ ہے کہ عدالتوں کے اندر جا کر بھی انصاف کا حصول اس قدر مہنگا اور طویل ہے کہ لوگ اپنے معاملات کو عدالتوں میں لے جانے سے گریزاں دکھائی د یتے ہیں۔بھینس چوری کے مقدمے میں جیل کاٹنے والوں کی سزا قاتل کی سزا بعض ا وقا ت سے بڑھ جاتی ہے اور یوں حاکم او ر محکوم دونوں طبقے ہی ظالم اور مظلوم کی نفسیات سے پراگندہ رہتے ہیں۔

نظام عدل کے بعد دوسرا مرحلہ سماجی انصاف کا ہے۔سماجی انصاف دو طرح کا ہوتا ہے۔ایک یہ کہ ریاست اور فرد کے درمیان معاہدہ انصاف پر مبنی ہونا چاہیے۔اس سلسلے میں سوشل کنٹریکٹ کو از سرنو ترتیب دینے کی ضرورت ہے۔ پیغمبر اسلام حضرت محمد صلی اللہ علیہ وسلم نے آخری خطبہ حج میں نہ صرف نظام عدل بلکہ ریاست اور فرد کے درمیان تعلق اورمعاہدے کی لازوال بنیادیں فراہم کردی تھیں۔آپ اس خطبہ کے نمایاںنکات کو ذہن میں لائیں تو آپ کو اندازہ ہوجائے گا کہ وسائل کی تقسیم کار کیا ہوگی۔حاکم اور عوام کے حقوق کیا ہوں گے۔ مذکورہ خطبے کو محور بنانے سے رنگ ‘نسل‘زبان اور علاقے کبھی سماجی انصاف میںرکاوٹ نہیں بنےں گے۔حکومت تمام شہریوں کے مال اور جان کے تحفظ کی ضمانت دے گی۔ اقلیتیں ہر طرح کے شہری حقوق کی اسی طرح حق دار ہوں گی جس طرح جا حق مسلمان اکثریت کو دیا گیا ہے۔اسلامی ریاست کا سربراہ بھی وہی کھانا کھائے گا جو عام شہری کھاتا ہے۔شہریوں کی بنیادی ضرورتیں ریاست کے ذمہ ہوں گی۔ ریاست اپنے عوام کی انفرادی اور اجتماعی ترقی اور انسانی تکریم کے راستے میں آنے والی رکاوٹوں کو ہٹائے گی۔

سماجی انصاف کا دوسرا حصہ انسانوں کے آپس کے تعلقات کار ہیں۔گورے کو کالے پر ‘عربی کو عجمی اور امیر کو غریب پر کوئی فوقیت نہیں۔جو آقا پہنے گا وہی غلام پہنے گا۔آج آقا افسرمالک اور غلام ملازم کے معنوں میں دیکھا جانا چاہیے۔آج ریاست مدینہ کا نمونہ تو کہیں دکھائی نہیں دیتا لیکن یورپ کے بعض ممالک میں وہاں کا وزیراعظم اور سربراہ مملکت بھی عام شہری کی سی زندگی گزارتے دکھائی دیتے ہیں۔

سینئر صحافیوں کے ایک وفد کو سرکاری طور پر سویڈن بلایا گیا۔ ہمارے دوست اور لیتھونیا کے اعزازی کونسل جنرل جناب مسعود خان جو سویڈن میں کاروبار کرتے ہیں‘انہیں صحافیوں کے اس گروپ کو سویڈن کی سیر کرانے کی ذمہ داری سونپی گئی۔صحافی دستے نے خان صاحب سے مطالبہ کیا کہ سویڈن میں انہیں کوئی ”انوکھی“ جگہ دکھائی جائے۔صحافتی دستے کو ایک پرانے محلے میں لے جایا گیا۔ ایک گھر سے کہیں دور گاڑیاں روکی گئیں اور پیدل دوسری منزل کے ایک بوسیدہ مکان پر دستک دی گئی۔ اندر سے خاتون خانہ باہر آئیں اور دستک کاسبب پوچھا۔خان صاحب نے ان سے پوچھا کہ صاحب خانہ گھر پر ہیں‘جواب نفی میں ملا۔اس سارے عمل میں صحافی دوست خاصے نالاں سے دکھائی دیئے۔”آخر اس بوسیدہ محلے میں کونسی”انوکھی“چیز جسے آپ دکھانے لائے ہیں“۔

”اسی بوسیدہ گھر میں اس ملک کے وزیراعظم رہتاہے“۔ خان صاحب کا جواب سن کر صحافی ششدر رہ گئے۔

ہمارے ہاں سماجی انصاف انفرادی سطح پر بھی دکھائی نہیں دیتا۔ہمیں تو تعلیمات دی گئیں کہ وہ شخص ہرگز مسلمان نہیں ہوسکتا جو خود پیٹ بھر کر کھانا کھائے اور اس کا ہمسایہ بھوکا رہے۔ اصحابہ فرماتے ہیں رسول اللہ صلی اللہ علیہ وسلم نے ہمسائے کے حقوق پر اس قدر زور دیا کہ وہ ہم گھبرا گئے کہ کہیں ہمسائے کو وراثت میںحقدار ہی نہ ٹھہرایاجائے۔آپ لمبی تقریروں‘تعلیم کے حق میں لچھے دار بیانات اور انسانی حقوق کے فریب نعروں کو چھوڑیے۔دل پر ہاتھ رکھ کر سوچئے کہ اگر سماجی انصاف کے حوالے سے اسلامی تعلیمات کے صرف اس پروگرام پر عمل شروع کردیں‘تو ٹھیک پانچ برس کے اندر اندراس ملک میںنہ کوئی بھوکا رہے گا‘نہ ان پڑھ نظرآئے گا۔

برس ہا برس کے مطالعہ اور قرآن فہمی کی کوشش کے بعد راقم اس نتیجے پر پہنچا ہے کہ حکومتوں پر تنقید کرنے اور لمبے چوڑے منصوبے بنانے کی بجائے اگر آج ہم چند لوگ بھی سماجی انصاف کا علم لے کرمحبت اور ایثار کے جذبے سے آگے بڑھیں اور صرف تحریک حقوق ہمسایہ بپا کردیں تو یہی ملک سویڈن سے کہیں بڑی ویلفیئر سٹیٹ بن جائے گا۔

آج کے سماج کو سیاسی سے زیادہ سماجی رہبروں کی ضرورت ہے۔ نظام عدل اور سماجی انصاف آپس میں باہم مربوط ہیں‘اگر ریاست نظام عدل رائج نہیںکرتی تو سماجی کارکن اور رہبر آگے بڑھ کر آپس کے سماجی انصاف کی ترغیبات سامنے لائیں۔

مجھے یقین ہے کہ ہم نہیں تو آنے والی نسلیں اس راز کو پالیں گی اور یاسیت کے بادلوں کو چیرکر امید کا روشن سورج ڈھونڈ نکالیں گی۔

شبنم افشانی مری پیدا کرے گی سوزوساز

اس چمن کی ہر کلی باد صبا ہوجائے گی

شب گریزاں ہوگی آخر جلوہ خورشید سے !

یہ چمن معمور ہوگا پھر نغمہ توحید سے

سیاست کے کوچے میں سب سے زیادہ بے آبرو ہونے والی جنس خود سیاست ہی ہے۔ علم شہریت میں سیاستدان کی تعریف چاہے جو بھی ہو لیکن پاکستان کے اندر اس قبیلے کے لوگوں کا نام آتے ہی عہد شکن‘دروغ گو‘مکار‘ لٹیرا وغیرہ کے معنی دماغ میں گھومنے لگتے ہیں۔ ہر وہ لیبل جو تخریبی اور منفی رجحانات پر چسپاں کیا جاسکتا ہے وہ سیاست کاروں کے لئے مختص ہو کر رہ گیا ہے۔ جب مہذب انداز میں کسی کو گالی دینا ہو تو” آپ تو ٹھہرے سیاستدان“ ہی کہہ دینا کافی سمجھا جاتا ہے۔ چونکہ سیاست جمہوریت کے ذریعے نشوونما پاتی ہے اس لئے عوام عمومی طور پر مروجہ جمہوری نظام سے بھی بیزار دکھائی دیتے ہیں۔”سیاست میں کوئی مستقل دشمن یا دوست نہیں ہوتا“۔”سیاست میں ہر وقت دروازے کھلے رکھے جاتے ہیں“۔ یہ اورایسی ہی توجیحات ہیں جن کو عوام سمجھتے تو ہیں لیکن انہیں اصولوں اور ضابطوں سے ماوراءجان کر دل سے قبول کرنے پر تیار نہیں ہوئے۔پاکستان میں پروان چڑھنے والی سیاست کو بے اصولی سیاست کے عنوان سے پکارا اور لکھا جارہا ہے لیکن کیا ایسی سوچ کے پختہ ہوجانے سے پاکستان جیسے ترقی پذیر ملک کے مسائل کا کوئی حل نکل سکتا ہے؟ یہی وہ سوال ہے جس کا جواب دینے کے لئے مجھے مقامی کالج کے شعبہ سیاسیات کے طلبہ و طالبات نے دعوت دی تھی۔ میں نے اپنی تقریر کے آغاز سے قبل حاضرین سے سوال کیا کہ کیا آپ کی نگاہ میں اس وقت پاکستان کا کوئی ایک سیاستدان بھی ایسا نہیں جسے آپ اصول پسند سیاستدان کہہ سکتے ہوں۔طلباءپہلے تو شش وپنج کا شکار ہوئے پھر ایم اے کی ایک طالبہ نے کہا”میں سمجھتی ہوں کہ عمران خان ایک اصول پسند سیاستدان کے طور پر ابھر رہے ہیں“۔ تھوڑی دیرخاموشی طاری رہی اور پھر لڑکوں کی طرف سے بھی چند تائیدی کلمات سننے کو ملے ۔گوکہ چند طلباءنے میاں محمد نوازشریف کا نام بھی لیا اور بعض نے مرحومہ بے نظیر بھٹو کو اصول پسند قرار دیا لیکن اکثریت اس بات پر متفق دکھائی دی کہ عمران خان کی سیاست اصولوں کے گرد گھومتی ہے اور انہوں نے ابھی تک محض اقتدار کی خاطر کسی غیر اصولی موقف کی تائید کی اور نہ ہی کسی ایسے سیاستدان کا ساتھ دیا جس نے قومی مفادات کو کسی حوالے سے کوئی نقصان پہنچایا ہو۔
حاصل گفتگو یہ رہا کہ پاکستان کے مسائل کا حل صرف اور صرف اصولی سیاست میں ہی مضمر ہے ۔میرے لئے یہ حیران کن بات تھی کہ ایک پرائیویٹ کالج کے باشعور طلبہ و طالبات کی اکثریت عمران خان کو اصولی سیاستدان تسلیم کرتی ہے۔ میں نے اپنی حیرت کو ٹھوس حقائق کی کسوٹی پر پرکھنے کے لئے پورا ہفتہ نوجوانوں کی سیاسی سوچ پرکھنے پر لگایا۔
قارئین!مجھے یہ کہنے میں کوئی عار نہیں کہ میرے سروے اور تجزیے کی رو سے پاکستان کے نوجوانوں کی اکثریت صرف اور صرف بے اصولی سیاست سے بیزار ہے۔اگر انہیں کوئی اصول پسند سیاستدان میسر آجائے تو وہ آج بھی قومی معاملات سے پہلوتہی کی بجائے مکمل شرکت داری کر سکتے ہیں۔گوکہ عمران خان کے بارے میں میرے ذاتی خیالات قدرے مختلف ہیں لیکن ہمیں بحیثیت قوم مطمئن رہنا چاہیے کہ ہماری نوجوان نسل کی اکثریت مستقبل کے پاکستان کو عمران خان کی نظر سے دیکھتے ہیں۔تجزیے میں بعض دلچسپ باتیں بھی سامنے آتی ہیں۔اکثر نوجوانوں کا خیال ہے کہ عمران خان نے کسی بھی قومی الیکشن میں اپنی پارٹی کے امیدواروں سے ٹکٹ کے بدلے رقم مانگی نہ ہی اپنی طرف سے پیسہ پھینکا۔ انتخابات کے دوران ووٹروں کی خریدوفروخت کے کلچر کو ختم کرنے کے لئے ہمارے قومی ہیرو نے کوئی منفی سرگرمی نہیں دکھائی۔عمران خان کے حق میں رائے دینے والے نوجوانوں کا یہ بھی خیال ہے کہ عمران پاکستان کے وہ واحد سیاستدان ہیں جنہوں نے اپنی آمدن اور جائیداد کا صحیح صحیح اندراج کرایا اور اس پر عائد پورے کا پورا ٹیکس ادا کیا‘ڈگری جعلی نہیں ہے اور وہ جو بات بھاٹی چوک میں کہتے ہیں وہی لندن میں بھی کہہ لیتے ہیں۔
یہ کہنا بہت مشکل ہے کہ عمران خان کا سیاسی مستقبل کیا ہوگا لیکن پاکستان کی کل آبادی کا چالیس فیصد حصہ نوجوانوں پر مشتمل ہے۔ اب چونکہ ووٹر کی عمر کی حد اٹھارہ برس ہوچکی ہے اور اگر عمران خان کا پیغام ٹھیک طور سے ہمارے ان نوجوانوں تک پہنچ رہا ہے اور بوقت الیکشن یہ نوجوان واقعتاً پولنگ بوتھ کا رخ کر لیتے ہیں تو عمران خان کے ووٹ بینک میں واضح اضافہ دکھائی دے گا۔ہمارے مرشدمحترم نسیم انور بیگ فرماتے ہیں کہ قومی سوچ میںایسی تبدیلی کے ذریعے ہماری فیصلہ کرنے کی خودمختاری بحال ہوسکتی ہے۔آج کے عمران خان کے تعارف محض کرکٹ یا شوکت خانم ہسپتال نہیں رہا ۔اسلام اور پاکستان کی خوشبو میں گھندا ہواسیاسی فلسفہ بھی تعارف بنتا جارہا ہے۔متبادل سیاسی قیادت کا احساس ہی پاکستانی معاشرے کے لئے ایک صحت مندانہ نفسیاتی سفر ہے۔عمران کی سیاست دراصل مایوسیوں میں گھری قوم کے لئے ایک نئی امید ضرور ہے۔

تعلیمی بجٹ میںاضافہ تو اب محض ایک سہانا سپناہی رہ گیا ہے جو ہرسیاسی پارٹی کے منشور میں خوبصورت خطاطی کا لباس پہنے چھوئی موئی بنا بیٹھا ہے۔برسراقتدار آنے کے بعد جب وزیر تعلیم بجٹ کی اس مد پر لب کشائی کرنا چاہتا ہے تو اس کے ہونٹ خشک ہوجاتے اور ماتھے پر شرمندگی کے پسینے پھوٹنے لگتے ہیں۔ٹاٹ سکولوں پر بیٹھنے والے جب بڑے عہدوں پر پہنچ کر اپنے سکول جاتے بچوں کی ٹائیاں درست کر رہے ہوتے ہیں تو بھول جاتے ہیں

کہ ان کے پیروکار”ٹاٹیئنز “ کو اب سرے سے سکول ہی مسیر نہیںہیں۔سلطانہ فاﺅنڈیشن کی طرف سے سامنے آنے والی تحقیق سے پتہ چلتا ہے کہ ہمارے ملک کے چھ کروڑ بچے ایسے ہیں جو سکول جانے کی عمر تو رکھتے ہیںلیکن ان کے لئے سکول ہیں نہ اساتذہ‘ٹاٹ تو ان کے لئے عیاشی ہوگی! ستم ظریفی دیکھئے کہ قیام پاکستان کے بعد افسر شاہی کے مزے لوٹنے والوں کی اکثریت کا تعلق دیہی علاقوں سے تھا اور وہ سب ماسٹر کے ”ہدایت اللہ“ کی وساطت سے ہی سدھائے گئے تھے اور ان کا سارا رعب و دبدبہ ٹاٹ سکولوں کے مرہون منت تھا لیکن جب انہوں نے اختیارات کے گھوڑے کی باگ ڈور سنبھالی تو اس قدر سرپٹ دوڑے کہ ان کو دیہات بھی بھول گئے‘پسماندگیاںبھی ذہنوں سے محو ہوگئیں اور ”دو دونے چار“ کے رٹے بھی طاق نسیاں پر رکھے گئے۔ بابوﺅں کی اس فوج ظفر موج نے گزشتہ ساٹھ برسوں تک اس ملک کی تعلیمی پالیسیاں وضع کرنے میں ٹنوں کے حساب سے کاغذ ضائع کئے اور اربوں روپے کی سٹیشنری پھونک ڈالی لیکن غریبوں کے سکول پہلے سے بھی بدحال ہوگئے۔
ٹاٹ سکولوں کا سب سے بڑا فائدہ یہ تھا کہ وہاںایک ہی صف میں ”محمود وایاز“ بیٹھ کر پڑھا کرتے تھے۔نمبردار کا بچہ اور بشیرے موچی کا ”منڈا“ ساتھ ساتھ نہ سہی لیکن ایک ماسٹر جی سے سبق تو لیتے تھے۔ اب تو انسانی حقوق اسقدر ”یکساں “ ہوگئے ہیں کہ غریب کا بچہ امیروں کے مہنگے ترین تعلیمی اداروں میں صرف جھاڑو دے سکتا ہے وہاں بیٹھ کر علم حاصل نہیں کرسکتا۔پنجاب کے وزیراعلیٰ کو غریب پروری کا ہمیشہ دعویٰ رہا ہے۔ دانش سکول سسٹم اسی طرف ایک قدم بتایا جارہا ہے۔خبریں بنانے اور تصویریں چھپوانے کے لئے ایسے اقدامات تیر بہدف نسخے ہوتے ہیں۔ایک سکول جس میں ساڑھے تین سو بچے پڑھتے ہیں اس پر ساڑھے تیرہ کروڑ روپے لگا دیئے گئے ۔پنجاب کے باقی لاکھوں پرائمری سکولوں کا کیا بنے گا؟ یہ سوچنے کے لئے شائد حکمرانوں کے پاس فرصت نہیں یا ایسا سوچنے سے خبر بن نہیں پاتی ۔ سکول سے محروم بچوںکا کوئی درماں کرنا تو دور کی بات جو سرکاری سکولوں میںخاک پھانکتے ہیں ان کی حالت زار پر کسی کو رونا آتا ہے نہ ہی کسی ”سخت گیر“ وزیراعلیٰ کا دل پسیچتا ہے۔سرکاری کالجوں کامعیار تعلیم بلند کرنے کے بہت دعوے کئے جارہے ہیں اور اس کی خاطر ہر کالج کے لئے بورڈ آف گورنرز کے قیام کا حکم دیا جاچکا ہے جس کے خلاف طلبہ اور اساتذہ سراپا احتجاج بنے رہے ہیں۔ہوسکتا ہے کہ یہ حکم نامہ واپس ہوجائے یا چند ترامیم کے ذریعے لاگو ہوجائے۔ اساتذہ کو اعتراض ہے کہ ایسے بندوبست سے ان کی ”آزادی“ چھین لی جائے گی اور ان کی ترقی اور تنزل کے فیصلے یہ خود مختار بورڈز کریںگے۔ طلبہ کو ڈر ہے کہ فیسوںمیں اضافہ ہوگا اور اس طرح وہ کاغذ کی جو ڈگری حاصل کر لیا کرتے تھے اس سے بھی محروم ہوجائیں گے۔راقم خود ایک پرائیویٹ سکول چلاتا ہے۔ راولپنڈی اسلامک سکول آف ایکسیلینس(رائز) کے نام سے میں نے یہ ادارہ راولپنڈی کینٹ کے پسماندہ علاقے میں قائم کر رکھا ہے۔ معروف دانشور جناب نسیم انور بیگ اور نظریہ پاکستان کے اکابرین کی اخلاقی مدد حاصل ہے۔ایک بچے کی معیاری تعلیم پر کم از کم ایک ہزار روپے ماہانہ کا خرچہ اٹھتا ہے۔ بچے کے والدین سے اوسطاً چار سو روپے وصول ہوتے ہیں باقی میں اور میرا خاندان اپنے ذاتی وسائل سے کسی نہ کسی طرح پورے کر رہا ہے ۔لیکن قارئین ! آپ حیران ہوں گے کہ بچوں کے والدین یہ رقم دینے سے بھی قاصر ہوتے ہیں اور ہر روز کوئی ماں‘ کوئی باپ اس غرض سے دستک دیتا ہے کہ اس بار ان کی آمدن معمولی رہی اس لئے فیس ادا نہیں کرسکتے۔ اللہ کا کرم ہے کہ میں نے تعلیم وتربیت کا یہ ادارہ کسی کاروباری مقصد کے لئے نہیں بنایا۔آپ سوچیں کہ کاروباری تعلیمی ادارے کیا ایسے بچوں کو قبول کریں گے جو فیس نہ دے سکتے ہوں؟ یہی وہ مسئلہ ہے جس کے سبب مڈل کلاسیوں کے بچے سرکاری سکولوں میں جانے پر مجبور ہیں اور وہاں جانے کا مطلب یہ ہے کہ یہ کروڑوں بچے بڑے ہو کر ڈگریاں لے کر بھی مارکیٹ کا مقابلہ نہیں کرپاتے کہ ان کا تعلیمی نصاب‘ اساتذہ کی اہلیت اور تعلیمی ماحول انہیں اپر کلاس سے کوسوں پیچھے پھینک دیتاہے۔
ضرورت تو یہی تھی کہ حکومت اور حکمران ٹولے اپنے غیر ضروری اخراجات بند کرتے‘تعلیم کو پرائیویٹ ہونے سے بچاتے اورریاست کے سارے وسائل سرکاری تعلیمی اداروں کی بہتری کے لئے جھونک دیتے لیکن ایسانہیں کیا گیا اور اب پنجاب کے رحم دل وزیر اعلیٰ نے بھی سرکاری کالجوں کو خود مختاری دینے کا فیصلہ فرما دیا ہے۔ خودمختاری کا سادہ سا مطلب یہ ہے کہ معیار تعلیم کی بلندی کےلئے جو اضافی اخراجات اٹھیں گے وہ حکومت تو مہیاکرنے سے ماضی کی طرح قاصر ہی رہے گی۔ عملاً یہ ہوگا کہ بورڈ فیصلہ کرے گا کہ وسائل پیدا کرنے کے لئے بھاری فیسیں وصول کی جائیں اور دوچار سال کے بعد بھاری فیسیں دے سکنے والے طلبہ و طالبات ان کالجوں میںنظر آئیں گے باقی کے ”ٹاٹیئنز“ گلیوں میں آوارہ پھریں گے یا پھر ردعمل کا شکار ہو کردہشتگردی کی وارداتوں میں ایندھن کا کام دیں گے۔خود بھی جلیں گے اور روٹس‘بیکن ہاﺅس‘سٹی‘فروبلزوالوں کو بھی جلا کر راکھ کردیں گے۔ خاص تعلیم جب عام نہیں ہوگی تو پھر عام لوگ خاص طرح کی نفسیات کا شکار ہوجائیں گے امن اور خوشحالی روٹھی ہی رہے گی!۔