Click here to View Printed Statement

Click here to View Printed Statement

JANG LAHORE IQRA PAGE

کہا جاتا ہے کہ دور جاہلیت میں عورت اللہ تعالیٰ کی مظلوم مخلوق تھی۔معاشرے میں اسے سخت حقارت کی نظر سے دیکھا جاتا تھا۔ طرح طرح کے توہمات اس کی ذات کے ساتھ وابستہ کئے جاتے تھے۔گھروں میں باندیوں سے بدترسلوک اس کا مقدر تھا۔ سوسائٹی میں رائے مشورے اور تنقید و احتساب کا حق اسے قطعاً نہ تھا۔ بیویوں کی تعداد پر کوئی پابندی عائد نہ تھی۔وراثت میں بھی اس کا حصہ نہ تھا۔زندگی کے کسی شعبے میں بھی اس کی شہادت قابل قبول نہ تھی۔ حد تو یہ ہے کہ پیدا ہوتے ہی عورت کو زندہ قبر میں گاڑھ دیا جاتا تھا۔

آج کا دور دور جاہلیت نہیں بلکہ دور تہذیب وترقی کہلاتا ہے۔یہ اندھیروں کا نہیں روشنیوں کا زمانہ ہے۔ حقوق کی پامالی نہیں بلکہ حقوق کی تحصیل و بحالی آج کا موضوع بحث ہے’غلامی کا دور ختم ہوا’اب آزادی کا زمانہ ہے۔عورت اب ملکی انتخابات میں حصہ لے سکتی ہے’ووٹ دے سکتی ہے’ اعلیٰ سے اعلیٰ تعلیم حاصل کرسکتی ہے’چھوٹے دفتر سے لے کر بڑے سے بڑے کارخانوں اور فیکٹریوں تک کے دروازے اس کے لئے کھلے ہیں۔شہادت’ رائے’مشورہ’ تنقید احتساب اور وراثت کے تمام حقوق اسے آج آئینی طور پر حاصل ہیں۔کھیل کود کے میدان میں بھی اسے اپنے جوہر دکھانے کی آزادی حاصل ہے۔یہاں تک کہ بعض ملکوں کی سربراہی میں بھی اسے عملاً حاصل ہے لیکن افسوس مجموعی طور پر عورت جتنی مظلوم کل تھی اتنی ہی آج بھی ہے۔
عورت کے لئے دور جاہلیت ابھی مکمل طور پر ختم نہیں ہوا۔آج کی آزادی کئی غلامیوں کو اپنے جلو میں لے آئی ہے۔اس وقت بھی اس کے حقوق بحال کم اور ماپال زیادہ کئے جارہے ہیں۔آخرت سے بے خوف والدین کل بھی اپنی بیٹیوں کو جائیداد میں شرعی حصے سے محروم رکھتے تھے اور آج بھی محروم رکھتے ہیں۔پہلے کی طرح آج کل بھی اس کی پیدائش پر ناخوشی کا اظہار کیا جاتا ہے اور سب سے بڑا ظلم اس دور میں جو روا رکھا جاتا ہے وہ ہے تجارت کے فروغ کے لئے نسوانیت کا بے دریغ استعمال۔میری نظر میں یہ ظلم ایک ایسا ظلم ہے کہ جس نے موجودہ زمانے کی نام نہاد آزادیوں’مراعات’حقوق ہمدردیوں کو قطعاً بے معنی بنا کر رکھ دیا ہے۔
جب میں کسی دکان پر شوگرل یا شاپ گرل کو جوتے یا کپڑے بیچتے ہوئے دیکھتا ہوں تو اس کی مظلومی پر آبدیدہ ہوجاتا ہوں۔یہ عورت کے جسمانی حسن اور اس کی نسوانی کشش کا کھلا استحصال ہے۔یہ عہدہ اسے اس اخلاقی بنیاد پر نہیں ملتا کہ وہ بیروزگار ہے یا معاشی طور پر بے یارومددگار ہے یا تعلیم اس عہدہ سے متعلق ہے بلکہ محض اس تجارتی بناء پر ملتا ہے کہ اس کی موجودگی گاہکوں کی کشش کا باعث بنے گی اور اس طرح مالکان کی دکان چمکے گی۔
عورت کا وہ مقدس جسم کہ جو سوائے شوہر کے کسی دوسرے شخص کے سامنے بے لباس نہیں کیاجاسکتا اور جس کو چھونے کی یہاں تک حرمت ہے کہ عورت اپنے جسم کو چھونے والے یا چھونے کی کوشش کرنے والے مرد کو قانوناً ہلاک کرسکتی ہے۔آج اسے بلاتامل فلمی سکرین پر نیم برہنہ کیا جارہا ہے اور محض چند سکوں کا لالچ دے کر اس سے وہ تمام کردار کروائے جارہے ہیں جو عورت عام حالات میں کبھی برداشت نہیں کرسکتی ۔ناقص کہانی’بے کیف مکالموں’گھسی پٹی موسیقی اور بے روح منظر نامے جیسے عیوب پر عورت کے جسم کا پردہ ڈالاجارہا ہے’ فلم میں جو کچھ عورت آج کرتی ہے وہ اس کی زندگی کا سب سے بڑا المیہ اور اس کی حیات کی سب سے بڑی غلامی ہے۔
آج نئی تہذیب کے جدید تقاضوں نے عورت کی نیم برہنہ تصویر کو ہر بوتل’ڈبے’پیکٹ’اخبار ‘رسالہ اور کتاب کے اوراق پر ناگزیر بنا دیا ہے۔یہ عورت کی نسائیت اور اس کی عظمت کے تقدس کی ہر طرح کھلی پامالی ہے’صنعت کار خواہ سائیکل’سکوٹر اور کار سے متعلق ہو یا اس کا تعلق ادویات’جفت سازی اور پان بیڑی سگریٹ فروخت کرنے والے ادارے سے ہو وہ اپنی صنعت اور تجارت کے لئے عورت کے نیم برہنہ جسم کو استعمال کرنا اپنے لئے فرض تصور کرتا ہے۔اگر پنسل ‘دوات’کاپی وغیرہ عمدہ کوالٹی کی ہے تو اس پرکسی عمدہ نوجوان حسین وجمیل خاتون کی تصویر طبع ہونا ضروری ہے۔یہ سب کچھ عورت کی تذلیل اور اس کی سخت توہین ہے۔
عورت کے معاشرتی کردار میں تقدس اور پاکیزگی کو ملحوظ رکھا جائے۔ اس کا جسم تجارتی مقاصد کی خاطر تخلیق نہیں کیا گیاہے۔قدرت نے عورت میں شرم و حیا کے احساسات مٹنے اور مٹانے کے لئے نہیں پیدا فرمائے بلکہ قدرت نے ان کی تخلیق کے ذریعہ عورت کی عفت مابی کا سامان فراہم کیا ہے جو روزی کا لالچ دے کر عورت کو اس کی فطری شرم وحیا سے محروم کرتا ہے یا اس کی شان سے گرے ہوئے امور کی انجام دہی کے لئے بروئے کار لاتا ہے ‘وہ عورت کا سب سے بڑا دشمن ہے ‘ اسے جلد یا بدیرمٹنا ہی چاہئے اورا س کی جگہ ایک صالح اور عورت دوست معاشرے قائم ہونا چاہیے۔

Click here to View Printed Statement

Jang Lahore Iqra Page

آجکل فحاشی اور عریانی کے ہر مظہر کو ملفوف بنا کر مارکیٹ کرنے کا رواج چل پڑا ہے۔عورت کو حیا اور پاکیزگی کے ماحول سے نکالنے کے نت نئے طریقے ایجاد ہوگئے ہیں۔بدقسمت عورتیں ہیں جو اپنی ناسمجھی یا کسی مجبوری کے سبب ابلیسی دماغوں کے پھیلائے ہوئے جال میں پھنس جاتی ہیں اور پھر ”پبلک پراپرٹی” بن کر اپنے تقدس کو چند ٹکوں کے عوض دربدر نیلام کرتی پھرتی ہیں۔ پاک دامن بچیوں اور بیبیوں کو چکا چوند کردینے والے مناظر کے پیچھے چھپے غلیظ کاروبار سے آگا ہ کرنا جہاں والدین کا فرض اولین ہے وہیں قلم کار وں اور دانشوروں کو بھی اس پھیلے ناسور کا ادراک ہونا چاہیے۔ خوبصورت لباس زیب تن کرنا ہر ذی روح کی قدرتی خواہش ہے اور زیورات اور بنائو سنگھار عورت کی شدید ترین آرزو ہوتی ہے ۔بوتیک پر بکنے والے لباس کے ساتھ اگر کسی ہیروئن یا ماڈل کی تصویر ہو تو کاروبار خوب چمک جاتا ہے ۔

درزی یا فیشن ڈیزائنر’شوز بنانے والے زیورات اور میک اپ بیچنے والے اپنے کاروبار کو بڑھاوا دینے کے لئے اپنی مصنوعات کی تشہیر کے لئے ماڈلنگ’کیٹ واک اور فوٹو سیشن کے ذریعے عورتوں کوکاروباری مقاصد کیلئے استعمال کرتے ہیں۔”یہ تو ماڈلنگ ہے ” یہ کہہ کر بے روزگار اور بے مہار لڑکیوں کو فوٹو سیشن سے گزارا جاتا ہے اور پھر وہ ایک انجانی منزل کی طرف ‘بلکہ دوزخ کی آگ کی طرف لپکتی چلی جاتی ہیں۔مجھے آج کی اس نشست میں خالصتاً قرآن وحدیث کی روشنی میں اپنی مسلمان بہنوں’ بیٹیوں کو ”ماڈلنگ” جیسی بے حیائی کے حوالے سے بعض ضروری پہلوئوں سے آگاہ کرنا ہے۔قرآن کریم سورہ الاحزاب (٢٢) میں عورتوںکو حکم دیتا ہے”اسلام سے پہلے جاہلیت کے زمانے میں جس بنائو سنگھار کی نمائش کرتی پھرتی تھیں وہ اب نہ کرو”سورہ النور(٢١) میں ارشاد ربانی ہے۔ ”اور وہ اپنے  پائوں زمین پر مارتی ہوئی نہ چلیں کہ جو زینت انہوں نے چھپا رکھی ہے (یعنی زیور وغیرہ) اس کا حال معلوم ہو(یعنی جھنکار سنائی دے ) اسی آیت میں ذرا آگے چل کر ارشاد ہوتا ہے ”اے نبیۖ! مومن عورتوں سے بھی کہہ دو کہ وہ اپنی نگاہوں کو (غیر مردوں کی دید سے) باز رکھیں اور اپنی شرمگاہوں کی حفاظت کریں’اور وہ اپنے سینوں پر اپنی اوڑھینوں کے بُکل مار لیا کریں۔سورہ الاحزاب (٢٢) میں ارشاد باری تعالیٰ ہے”اگر تمہارے دل میں خدا کا خوف ہے تو دبی زبان سے بات نہ کرو کہ جس شخص کے دل میں بدنیتی کی بیماری ہو وہ تم سے کچھ امیدیں وابستہ کرلے گا۔ بات کرو تو سیدھے سادے طریقے سے کرو”(جس طرح انسان انسان سے بات کیا کرتا ہے)۔رسول اللہ صلی اللہ علیہ وآلہ وسلم کا ارشاد گرامی ہے۔”جو عورتیں کپڑے پہن کر بھی ننگی ہی رہیں وہ دوسروں کو رجھائیں اور خود دوسروں پر رنجھیں اور بختی اونٹ کی طرح ناز سے گردن ٹیڑھی کرکے چلیں’وہ جنت میں ہرگز داخل نہ ہوں گی اور نہ ہی اس کی خوشبوپائیں گی”۔ نماز باجماعت میں اگر امام غلطی کرے یا اس کو کسی حادثہ پر متنبہ کرنا ہو تو مردوں کو سبحان اللہ کہنے کا حکم ہے مگر عورتوں کو ہدایت کی گئی ہے کہ صرف دستک دیں اور زبان سے کچھ نہ بولیں(ابودائود)۔حضور اکرم صلی اللہ علیہ وآلہ وسلم نے مردوں کو فرمایا۔”اپنی عورتوں کو لباس زینت اور نازواندازکے ساتھ مساجد میں جانے سے روکو” عورتوں کی نماز باجماعت میں مونث امام کو اندرون صف کھڑا ہونے کی ہدایت ہے (تاکہ وہ نمایاں ہو کر بے حجاب نہ ہوجائے)(ہدایہ جلد اول) ۔انفرادی نماز میں عورتوں کے لئے حکم ہے کہ وہ سجدے میں اپنے سینے اور پیٹ کو رانوں سے ملائیں تاکہ بدن کے پھیلائو اور تفاصل میں سینہ لٹک کر بے حجاب نہ ہوجائے ۔قعدے میں میرین پر بیٹھ کر پیروں کو ایک طرف نکالیں تاکہ پیروں پر بیٹھ کر رانیں ابھری ہوئی اور اوپر کا دھڑ بلند نہ دکھائی دے۔ قیام میں ہاتھ سینے پر باندھیں تاکہ سینے کا ابھار نمایاں ہو کر بے پردہ نہ ہوجائے۔شریعت درحقیقت ماں ‘ بہن’ بھائیوں کو ایک دوسرے کے برابر کھڑا ہو کر نماز ادا کرنے کی اجازت نہیں دیتی۔غزوات (وہ جنگیں جن میں حضورۖ نے شرکت فرمائی) میں مسلمان عورتیں اپنا جسم حتی الوسع زخمی مجاہدین سے مس نہیں ہونے دیتی تھیں اور اکثر ان کا دائرہ خدمت اپنے نزدیک ترین رشتے داروں تک محدود ہوا کرتا تھا۔حضورۖ کا ارشاد ہے ”جو شخص کسی عورت کا ہاتھ چھوئے گا جس کے ساتھ اس کا جائز تعلق نہ ہو ‘ اس ہتھیلی پر قیامت کے روزانگارہ رکھا جائے گا”۔حضرت عائشہ کا بیان ہے کہ نبی اکرمۖ عورتوں سے صرف زبانی اقرار لے کر بیعت کیا کرتے تھے۔ ان کا ہاتھ اپنے ہاتھ میں نہ لیتے تھے۔ آپۖ نے کبھی ایسی عورت کے ہاتھ کو مس نہیں کیا جو آپۖ کے نکاح میں نہ ہو۔(بخاری’باب بیعتیہ لنسائ’مسلم باب کیفیة’بیعةالنسائ) مرنے کے بعد بھی عورت کے مردہ جسم کو صرف اس کے محرم مرد ہی ہاتھ لگا سکتے ہیں۔شریعت نے عورت کی پردہ داری کا اس حد تک خیال رکھا ہے کہ (مرد کے مقابلے میں) اس کے کفن میں سر اور سینے کو خصوصاً ڈھکنے کے لئے ایک کپڑا زائد ہوتا ہے اور اس کا مردہ جسم کو قبر میں اتارتے وقت بھی پردے کا اہتمام کیا جاتا ہے۔شرم و حیا کے ضمن میں ہماری ملی روایات بھی ہمیشہ سے انتہائی شاندار اور قابل فخر رہی ہیں اور پاکیزہ خیال ہزاروں گھرانوں میں آج بھی ان پر عمل ہوتا ہے۔ ان دیندار اور خداترس  خاندانوں کی کنواری لڑکیاں شادی سے پہلے کسی قسم کا سنگار نہیں کرتیں۔ بزرگوں کے سامنے ان کے سروں پر سے کبھی دوپٹہ نہیں اترتا۔ دولہا اور دلہن اپنے والدین کی موجودگی میں ایک دوسرے کے قریب یا برابر لگ کر نہیں بیٹھتے۔ خود والدین بھی جو ان اولاد کے سامنے ایسی ہی شرم و حیا کا مظاہرہ کرتے ہیں۔منگنی کے بعد لڑکی کا لڑکے سے (لڑکا خواہ کتنی ہی قریبی عزیز ہو) پردہ کروا دیا جاتاہے۔نکاح کے وقت لڑکی کی طرف سے خاموشی اختیار کرنا یا محض گردن ہلا کر ”ہاں” کر دینا ہی ایجاب و قبول کی علامت سمجھا جاتا ہے۔ نوجوان لڑکی بن سنور کر سٹوڈیو میں جا کر اپنی تصویر اتروانے کا سوچ بھی نہیں سکتی(ہماری اس ملی روایت کا انگریز حکمرانوں تک نے احترام کیا اور انہوں نے مسلمان خواتین کو مختلف نوعیت کے فارموں و دیگردستاویزات پر اپنی تصویر چسپاں کرنے سے مستثنیٰ قرار دے رکھا تھا)۔ قیام پاکستان سے قبل مسلمان لڑکیاں نرس کا پیشہ اختیار نہیں کیا کرتی تھیں( اس لئے کہ ان کا واسطہ نا محرم مرد مریضوں سے پڑتا تھا)سکول کالج میں تھیٹریکل کمپنیوں کی جانب سے منعقد کیے جانے  والے ڈراموں میں عورتوں کا کردار بھی مرد ہی ادا کیا کرتے تھے۔عورتوں کا درزیوں کی دکانوں پر جا کر اپنے جسم کا ماپ دینا حرام سمجھا جاتا تھا۔بال ترشوانا ابروئیں باریک کرنا بعیدازقیاس تھا۔اندازہ لگایا جاسکتا ہے کہ وہ خدا جو نمائش حسن کو ”تبرج الجاھلیہ ” قرار دیتا ہے۔وہ رسول اکرم صلی اللہ علیہ وآلہ وسلم جو فریضہ امامت اور نماز کی ادائیگی کے دوران بھی عورت کی پردہ پوشی کا پورا اہتمام فرماتے ہیں اور مسلمان معاشرہ کی اعلیٰ روایات جو ایک جوان بیٹی کو اپنے والد کے سامنے بھی برہنہ سر دیکھنا گوارا نہیں کرتیں’ بھلا موجودہ دور کی حیاسوز اور شرمناک ”ماڈلنگ” کو کیسے برداشت کرسکتے ہیں؟ قرآنی معاشرہ میں ایک خوش اندام’چھیل چھبیلی’الھڑدوشیزہ کے سٹائلش’ ننگے شانوں پر بکھرے ہوئے بالوں کے ساتھ بھڑکیلے’نیم عریاں اور چست لباس میں سیگرٹوں کے کش لگانے’دریا اور سمندر کے پانی میں غوطے لگانے اچھلنے کودنے ‘ قہقے لگانے اورمکمل دلربائی کے انداز میں ڈائیلاگ ادا کرنے وغیرہ کی قطعاً کوئی گنجائش نہیں ہے ۔ ان خرافات کو صرف مغرب کا جنس زد بدتہذیب اور عورت کی عصمت و عفت کی اہمیت سے ناآشنا’مادرپدر آزاد معاشرہ ہی برداشت کرسکتا ہے۔مسلمان سوسائٹی کبھی کسی تاجر کو اس امر کی اجازت نہیں دے سکتی کہ وہ اپنی دکانداری چمکانے کی غرض سے عورت کے جسم کا سہارا لے۔یہ نسوانیت کا کھلا استحصال ہے ۔اسلامی  قوانین میں عورت کی معاشی پوزیشن مرد سے بھی زیادہ مستحکم رکھی گئی ہے تاہم بہ امر مجبوری اسلام عورت کو کسب رزق سے نہیں روکتا۔ اضطراری حالت میں وہ تعلیم وتدریس’طب صنعت وحرفت’تجارت’تصنیف و تالیف ‘ادب و صحافت’غرض زندگی کے اکثر شعبوں کے دروازے اس پر کھول دیتا ہے  لیکن اس کڑی پابندی کے ساتھ کہ وہ اپنے پیٹ کی آگ بجھاتے بجھاتے دوزخ کی آگ سے غافل نہ ہوجائے اور اپنی تمام تر معاشی سرگرمیوں میں پاکیزگی نفس اور شرم و حیا کا دامن ہاتھ سے نہ چھوڑے!۔قرآن وسنت کی واضح ہدایات اور شاندار اسلامی تہذیب کے حوالوںکے بعد والدین پر یہ لازم ہے کہ وہ اپنے بچوں اور بچیوں کو دوزخ کی آگ کی طرف جانے سے فوراً روک لیں۔اللہ تمام بہنوں ‘بیٹیوں کی عزتوں کی حفاظت فرمائے(آمین)۔

Click here to View Printed Statement

JANG LAHORE IQRA PAGE

NAWA-I-WAQT KARACHI MILLI EDITION

آج انسانیت مجموعی طور پر انتشار کا شکار ہے ۔تمام تر ترقی ‘خوشحالی تعلیم اور علم کے باوجود ساڑھے چھ ارب انسان ایک دوسرے کو نیچا دکھانے اور اس کرہ ارض کو نہ ختم ہونے والے فتنوں میں مبتلا کردینے کی کوشش میں مصروف ہیں۔کوئی ایسا خطہ نہیں جو جنگ و جدل سے پاک ہو۔ جہاں انسان انسان کو کاٹ نہ رہا ہو۔ جہاں آدم آدم کو لوٹ نہ رہا ہو امیر غریب کو کھائے جارہا ہے۔ باوسیلہ دنیا بے وسیلہ بستیوں کو اجاڑ رہی ہے۔تقابل کا فلسفہ اپنے تمام تر منفی معنوں کے ساتھ نسل انسانی کی تباہ کاریوں میں کارفرما ہے۔ کچھ معلوم نہیں کب زیر زمین چھپے ہوئے ایٹم بم‘ سمندر میں تیرتی ہوئی نیو کلیائی آب دوزیں ‘تابکاری مواد اٹھائے فضاءمیں قلانچیں بھرتے طیارے اور خلا میں ہچکولے لیتے مصنوعی سیارے اچانک کسی مہم جو ذہن کی چھوٹی سی غلطی سے اس قافلہ انسانیت کو آگ لگا دیں اور احسن تقویم کے فارمولے پر پیدا کردہ انسان اپنی ہی بدتد بیری اور بدنیتی کے سبب اپنے گھر کو جلا کر خاکستر کردے۔ انسانیت کو بچانے کی آج جس قدر ضرورت ہے۔ شاہد اس سے پہلے کبھی بھی نہ تھی۔ مختلف یورپی دانشور اور انسانی حقوق کے چیمپئن خود ساختہ تھیوری اور محض انسانی ذہن سے پھوٹنے والی احتیاطوں کو ملحوظ خاطر رکھ کر انسانیت کے قافلے کو بچانے کی کوشش میں مصروف ہیں لیکن تمام تر خلوص نیت کے باوجود مغربی انسان دوست ادارے اور حلقے محض اندھیروں میں ٹامک ٹوئیاں مار رہے ہیں ان کی حالت یہ ہے کہ

فلسفی کو بحث کے اندر خدا ملتا نہیں
ڈور کو سلجھا رہا ہے اور سرا ملتا نہیں
اُلجھی ہوئی ڈور کا سرا ڈھونڈنے کے لئے انہیں ہر طرح کے تعصبات سے بالاتر ہو کر صرف اور صرف سچ کو تلاش کرنا ہوگا۔ مجھے یقین ہے کہ اگر انہوں نے مذہب ‘زبان ‘علاقے ‘رنگ نسل ‘ Status اور دنیاوی طبقاتی تقسیم کی عینک اتار کر حق کی تلاش کو نکلیں گے تو پھر انسانیت کے عظیم محسن دنیا جہاں کے لئے رحمت للعالمین اور صرف مسلمانوں کے لئے نہیں بلکہ بنی نوع انسان کے غم گسار آخری پیغمبر خاتم النبین حضرت محمدﷺ کی تعلیمات تک ضرور پہنچ جائیں گے۔
اگر ہم ماہ ربیع الاول میں کوئی ایسی کتاب ترتیب دے سکیں ۔ کوئی ایسی قلم بنا سکیں جس میں رسول پاک ﷺ کی تعلیمات کا بھرپور تاثر ملتا ہو اور وہ یورپ اور امریکہ کے لوگوں کو دکھائی جائیں تو میں دعویٰ سے کہتا ہوں کہ جو ذہن گستاخی پر اتر آئے ہیں وہی ذہن آپ ﷺ کے حق میں اس طرح سرنگوں ہوجائیں گے جس طرح حضرت عمرؓ تلوار حمائل کئے درنبوت پر جھک گئے تھے۔
قافلہ انسانیت کو درپیش جان لیوا حادثوں سے بچانے کا صرف ایک ہی راستہ ہے کہ ہم بحیثیت مسلمان اسوءرسول پر عمل کریں اور غیر مسلموں کو ڈرانے اور خوفزدہ کرنے کے بجائے یا ان سے مرعوب ہونے اور دور ہونے کے بجائے انہیں تعلیمات نبوی سادہ اور آسان سے لفظوں میں سمجھا سکیں۔ دنیا میں مختلف شخصیات علم و کمال‘دولت و جمال اور قوت واقتدار لے کر آتی رہی ہیں مگر ہم حضور انور کو سب سے زیادہ اہمیت دیتے ہیں۔اس کی ایک وجہ تو ہماری جناب رسول اللہ سے محبت و عقیدت اور ہمارا ان کے ساتھ رشتہ ایمان میں بندھا ہونا ہے تو دوسری وجہ یہ بھی ہے کہ جو آپ نے انسانیت کو عطا کیا ہے وہ آپ سے پہلے یا بعد میں کسی نے نہیں دیا۔
دنیا کی دوسری شخصیات کو دیکھیں تو سکندر‘رستم و دیگر نامور کمانڈرز جاہ و جلال دکھا کر چلے گئے‘ کارل مارکس اورلینن جیسے لوگ نظریاتی نعرے دے کر جہاں فانی سے کوچ کر گئے۔
غرض کوئی علمی موشگافیاں دکھا کر چلا گیا کسی نے غلط نظریات میں الجھا کر اسے کمال تصور کیا۔ کسی نے انسانیت کو خاک وخون میں تڑپانے سے لطف حاصل کیا مگر حضور کے انقلاب سے انسانیت کو رہنمائی‘ امن ‘ہدایت و نور ملا ہے۔
اور آپ کے ارشادات آج کے مہذب انسان کے لئے بھی اسی طرح مفید اور حیات بخش ہیں۔ جس طرح 1500 سال قبل کے انسان کے لئے تھے۔ ان کی روشنی اور تابانی میں ذرا فرق نہیں آیا۔اخلاق کی جھلک‘ کردار کی بلندی‘ امانت ‘دیانت اور انسانیت کے لئے پیار جہاں بھی ہے وہ حضور صلی اللہ علیہ وسلم کا دیا ہوا ہے۔ آپ کی بتائی ہوئی باتیں آج بھی بڑے بڑے سائنس دان پڑھتے ان سے ہدایت و رہنمائی حاصل کرتے اور قلب سلیم رکھنے والے آپ کے آخری نبی ہونے کی شہادت دیتے ہیں۔
اسلام کے دیئے ہوئے معاشی‘ معاشرتی ‘سیاسی عدل اور خاندانی نظاموں کا جو بھی حصہ جانے انجانے میںکہیں بھی نافذ ہے دنیا اس کی برکات حاصل ہورہی ہیںاور مجموعی طور پر معاشرے ‘نظام اور اسلام کی بخشی ہوئی اچھائیوں کے طفیل ہی ترقی کر رہے ہیں۔ کئی معاشرے صرف سچ کی بنیاد پر آگے بڑھ رہے ہیں‘ بعض ممالک صرف محنت کی بنیاد پر دنیا میں نام پیدا کرچکے ہیں۔
جاپان انسانی حقوق کی بناءپر پہچان بنا چکا ہے۔اسی طرح معاشرے سے لے کر فرد تک اسلامی تعلیمات کی برکات پھیلتی ہیں۔
حضور انور ﷺ سے قبل افریقہ اور یورپ میں غلام بنانے کے بھیانک مناظر دیکھنے میں آئے ہیں ۔تاریخ گواہ ہے کہ کچھ لوگوں کو دہشت جمانے کی غرض سے بے دردی سے ہلاک کردیا جاتا اور باقیوں کو غلام بنا لیا جاتا تھا اور غلامی کی بھی اس حد تک گری ہوئی مثالیں ان لوگوں نے قائم کیں کہ اپنے معزز مہمانوں کے سامنے شراب و شباب سرو کرنے کے بعد ان کے ہاتھوں میں تیر دے دیئے جاتے ۔ غلاموں کو سامنے کونے میں بٹھا دیا جاتا اور تیر غلام پر برسائے جاتے۔ جوں جوں غلام تڑپتا تو مہمان محظوظ ہوتےِ جبکہ سرور کائنات نے زید بن حارثہ سے ایسا سلوک کیا کہ وہ اپنے والد اور چچا کے ساتھ جانے سے انکاری ہوگئے اور حضور سے چمٹ گئے۔ اس پر تاریخ گواہ ہے کہ نبوت سے پہلے دور میں حضور زید کو کعبے میں لے گئے اور اعلان کیا کہ آج سے زید کو زید بن محمد کہا جائے۔
قرآن پاک کے نزول کی اولین سورتوں میں سورہ بلد میں ”گردنیں آزاد کرو“ کی واضح ایک آیت موجود ہے جبکہ آگے چل کر غلامی کے ادارے کو تدریج کے ساتھ مکمل طور پر اسلام نے ختم کردیا۔
میں تو سمجھتا ہوں کہ اصل روشنی اسلام ہی کے پاس ہے یہ مغرب کے پاس جو روشنی ہے وہ اس قسم کی روشنی ہے جو چور اور ڈکیت کے ہاتھ میں ہوتی ہے۔ وہ اس لائٹ سے اپنے گھر کا راستہ نہیں ڈھونڈ رہا ہوتا مگر دوسرے کے گھر اور دوسرے کے مال کی طرف ہدایت و رہنمائی لے رہا ہوتا ہے۔ روشنی وہی ہوتی ہے جو انسان کو انسانیت کا سبق دے۔ ڈیزی کٹر پھینکنے کے بعد بسکٹوں کے ڈبے پھینکنے سے خداوند کبھی خوش نہیں ہوتا۔
حضورﷺ کی تعلیمات پر نگاہ دوڑائی جائے تو حیرانگی ہوتی ہے کہ جو بات آج ہم لمبی لمبی تقاریر میں نہیں کہہ پاتے آپ نے چند جملوں میں کہہ ڈالیں۔ مکہ سے مدینہ تشریف لانے پر آپ نے جو خطبہ ارشاد فرمایا جو ایک منٹ سے کم وقت کا تھا اور خطبہ حجة الوداع کے موقع پر آخری تاریخی خطبہ بھی مکمل لکھ لیا گیا اور اس کا وقت بھی دس منٹ سے زائد نہیں ہے۔
آیئے آپﷺ کی انسان کے حوالے سے فرمائے گئے ارشادات کا جائزہ لیتے ہیں‘میرا یہ آج بھی دعویٰ ہے کہ جو لوگ پیغمبر اسلام کے حوالہ سے نفرت انگیز تحریریں لکھتے ‘ توہین آمیز کارٹون بناتے اوردل آزار فلمیں دکھاتے ہیں ۔ ان تک محسن انسانیت کی تعلیمات حقیقی طور پر پہنچ ہی نہیں سکیں۔
اس موقع پر میں آپ کے مدینے داخل ہونے والے خطبے پر کچھ عرض کرنا چاہوں گا۔
آپ نے فرمایا”سلام کو عام کرو“ اور باہم کھانے کھلایا کرو ‘صلہ رحمی کیا کرو‘رات کے اس پہر نماز پڑھا کرو جب لوگ سو رہے ہوں۔ تم جنت میں سلامتی کے ساتھ داخل ہوجاﺅ گے۔
سلام ایک دعا ہے یعنی تم پر سلامتی ہو۔ اس کی تفصیل میں حضورﷺ نے دوسرے موقع پر فرمایا کہ مسلمان وہ ہے جس کی زبان اور ہاتھ سے دوسرے مسلمان محفوظ رہیں۔
مزید برآں لفظ مسلمان کو بھی اپنی ایک حدیث میں واضح کردیا کہ جو کوئی ہماری طرح نماز پڑھے اور ہمارے قبلے کی پیروی کرے وہ مسلمان ہے۔ آپ ﷺ یہاں تک مسلمانوں کے لئے رﺅف و رحیم ہیں کہ آخری خطبے میں آپ نے یہ بھی واضح کردیا کہ مسلمان کی جان و مال ‘عزت اور آبرو دوسرے مسلمان پر حرام ہے اور میرے غیر مسلم بھائیوں کو یہ جان کر خوشی ہوگی کہ حدیث قدسی میں حضور نے ہمیں آگاہ کیا کہ اللہ تعالیٰ فرماتا ہے۔
”لوگ میرا کنبہ ہیں“ اور قرآن میں آیا کہ جو کوئی ایک انسان کی جان بچائے گا اس نے گویا پوری انسانیت کی جان بچائی۔ آپ کے ارشاد کے دوسرے حصے میں فرمایا گیا کہ آپس میں کھانے کھلایا کرو۔ ہمیں معلوم ہے کہ درندے ‘حیوان اور انسان میں فرق یہ ہے کہ درندہ شکار مار کر چیڑپھاڑ کرتا ہے۔ اپنا پیٹ بھرتا اور باقی کو وہیں پھینک دیتا ہے۔ حیوان کو جو دیا جائے وہ اسے کھا لیتا اور باقی پر گندگی کر دیتا ہے جبکہ انسان اپنا کھانے کے بعد باقی اپنے بھائیوں کو دے دیتا ہے۔ حضورﷺ کی تعلیمات اس سے بھی ایک درجہ آگے ہیں۔آپﷺ نے ایسے لوگ تیار کردیئے جنہیں میدان کار زار میں بھی کچھ پینے کو ملا ہے تو اسے اگلے زخمی بھائی کی طرف بڑھانے کا اشارہ کیا۔ گویا اسلام پہلے دوسرے بھائی کو کھلا کر پھر خود کھانے کا درس دیتا ہے حضور کے ارشادات کے مطابق اگر کسی کا پڑوسی بھی بھوکا سویا ہوا ہو اور ہم نے پیٹ بھر کر کھانا کھایا ہو تو نہ صرف ہمارا یہ لقمہ حرام بن جائے گا بلکہ اس سے بڑھ کر ایسے شخص کا حضور پر کوئی ایمان نہ ہونے کا سر ٹیفکیٹ بھی سرکار نے جاری فرما دیا ہے۔
صبح تہجد کی نماز سے انسان کے دل میں نرمی پیدا ہوتی ہے ۔ خدا کی محبت اور اس کے بندوں سے پیار بڑھتا ہے۔ سورہ مزمل کے مطابق ایسا کرنے سے نفس پر ضرب کاری لگتی ہے تکبر وغرور جاتا رہتا ہے۔ انسان کے منہ سے اچھی اور پیاری بات نکلتی ہے۔ دعوت دینے کے آداب سمجھ میں آتے ہیں‘ بقول اقبال
عطار ہورومی ہو رازی ہو غزالی ہو
کچھ ہاتھ نہیں آتا ہے آہ سحر گا میں
یہ عمل انسان کے اندر برداشت اور حوصلہ بھی پیدا کرتا ہے جیسا کہ حضور پر ایک مشرکہ بوڑھی کوڑا پھینکتی تھی جب چند دن اس نے ایسا نہ کیا تو معلوم ہوا کہ وہ بیمار پڑگئی ہے ۔ اس دن سرکار اس کے گھر اس کی عیادت کرنے تشریف لے گئے۔ہمیں بڑی واضح ہدایات ہیں کہ ”تم میں سے بہتر وہ ہے جو لوگوں کے لئے نفع بخش ہو“ انسانوں کے درمیان برابری کا درس آخری خطبہ میں جس شان سے دیا گیا ہے وہ اس بات سے عیاں ہے کہ UN کے آئینی چارٹر کی شقیں اس خطبہ رسول سے لی گئی ہیں۔اسی طرح پوری شرح صدر کے ساتھ یہ بات کہی جاسکتی ہے کہ اگر کسی فرد‘تنظیم یا ملک کا مقصد انسانیت کی فلاح قرار پایا ہے تو اسے اپنے اس مقصد میں کامیاب ہونے کے لئے اسوہ رسول ہی اپنا لائحہ عمل قرار دینا ہوگا۔ جس قدر آپ کے طریقہ کار‘فرمودات اور طرز ِ حیات پر عمل ہوگا اسی قدر انسانی فلاح کی منزل قریب تر ہوگی۔ اقبالؒ نے اسی راز کو ایک مصرے میں یوں بیان کیا تھا ‘
دہر میں اسم محمد سے اجالا کردے
اور میں قرآن مجید کی اس آیت پر اپنی تحریر کا خاتمہ کروں گا ”اگر تم اللہ سے محبت کرتے ہو تو میری (رسولﷺ اللہ کی) اتباع کرو اللہ تم سے محبت کرے گا“۔

Click here to View Printed Statement

حاجیوں کو سہولتیں فراہم کرنے کے لئے آل سعود ہمہ تن مصروف عمل رہتی ہے ۔بیت اللہ اور مسجد نبویۖ کی توسیع کا عمل جاری رہتاہے۔طواف کعبہ کے لئے آسانیاں فراہم کی جارہی ہیں۔ سعودی عرب کے حکمران یوں تو بادشاہ ہیں لیکن امت مسلمہ کے لئے ان کا مقام اور احترام اس قدر بلند وبالا ہے کہ ہم انہیںخادمین حرمین شریف کے لقب سے پکارتے ہیں۔ ان کے اس ارفع مقام کا واحد سبب یہ ہے کہ وہ کعبة اللہ اورمسجد نبویۖ کی خدمت پر مامور رہتے ہیں۔ہم دعا گو ہیں کہ اللہ آل سعود کی حکمرانی کو دوام بخشے اور جمہوریت کے نام پر ان کے خلاف آئے روز ہونے والی سازشوں کوناکام فرمائے۔ مسلم دنیا میں واحد اسلامی مملکت ہے جس کو ہم فلاحی اسلامی ریاست کہہ سکتے ہیں۔ خدا جانے نمونے کی اس ماڈل ویلفیئر اسٹیٹ کومظاہروں کے ذریعے غیر مستحکم کرنے والے خفیہ ہاتھ کیا چاہتے ہیں۔

اس سال حج کی سعادت نصیب ہوئی۔میری اہلیہ بھی اس عظیم دینی فریضہ کی ادائیگی کے لئے ہمراہ تھیں۔ دوست احباب بھی گروپ میں شامل تھے۔دوران طواف’روضہ رسولۖ پر حاضری اور مسجد نبوی میں نوافل ادا کرتے وقت دلی کیفیات کا تذکرہ یہاں مقصود نہیں۔ عمومی تاثرات اورمشاہدات تک ہی خود کومحدود رکھوں گا۔ اس سے قبل کہ میں سعودی حکام کی طرف سے کئے جانے والے حج انتظامات کے حوالے سے گذارشات کروں سب سے پہلے اپنے پاکستانی حاجی بھائیوں سے دست بستہ عرض ہے کہ حج جیسی عبادت کی روح کو ضرور سمجھیں ۔ اللہ کا حکم ہے کہ ہر صاحب استطاعت بیت اللہ کا حج کرے۔ رسول پاکۖ کی احادیث سے واضح ہوتا ہے کہ زندگی میں ہر صاحب استطاعت پر کم از کم ایک بار حج فرض ہے۔کہنے کا مقصد یہ ہے کہ حج فرض ہے فیشن نہیںہے۔ یہ صحیح ہے کہ کسی مسلمان پر ہر سال حج کرنے پر بھی کوئی پابندی یا ناپسندیدگی نہیں ہے۔بلکہ ہوسکتا ہے کہ بعض مذہبی حلقوں کے نزدیک ایک سے زیادہ حج کرنے کی بہت فضلیت بھی ہو۔ اسلام کے مجموعی نظام حیات پر نظر ڈالیں تو بعض سماجی فرائض ایسے ہیں کہ اگر انہیں پورا کیا جائے تو حج سے زیادہ یا حج کے برابر ہی ثواب ملتا ہے۔ میری گزارش ہے کہ ایک بار حج کرنے ولے صاحب دوسرے حج سے پہلے اپنے دیگر فرائض کی طرف متوجہ ہوجائیں۔ پاکستان میں ہمارے اردگرد لوگوںکے ایسے ہجوم ہیں جن کو ایک وقت کی روٹی تک میسر نہیں ہے۔ دو اڑھائی لاکھ کی تعداد میں ہر سال حج کرتے ہیں اور میرا اندازہ ہے کہ کل حاجیوں کی تعداد میں کم از کم پندرہ فیصد ایسے الحاج  ہوتے ہیں جن میں سے کوئی پانچواں اور کوئی ساتواں حج فرما رہا ہوتاہے۔میری گزارش ہے کہ ہمیں قرآن کے احکامات اور پیغمبر اسلام کے اسوہ کی روشنی میں اپنے ہمسایوں’ عزیزوں ‘مسکینوں اور ضرورت مندوں کی مالی مشکلات کا جائزہ لیتے رہنا چاہئے اور اگر دوسرے حج کے اخراجات ان  مجبور اور گرے ہوئے مسلمانوں کو معاشی طور پراٹھانے میں خرچ ہوجائیں تو روز محشر رسولۖ اپنی رحمت اور محبت کی چادر آپ پر تان لیں گے۔ دوسرا پہلو یہ ہے کہ وہاں اکثر پاکستانی حاجیوں کے روز و شب کا بغور جائزہ لینے کے بعد یہ تاثر بھی ملا کہ ناجائز طریقے استعمال کرنے میں باقی قوموں سے ہم آگے ہیں۔خدا کرے یہ جھوٹ ہو لیکن ایسے رویے سامنے آئے کہ شرمندگی کے سوا چارہ نہ تھا۔دھکم پیل’مقدس مقامات کے قریب پہنچنے کے لئے عورتوں تک کا خیال نہ رکھنا’شوروغل خیموں میں دوسروں کی جگہ پر قبضہ کر لینا اورعجلت یہ ایسے معاملات ہیں جن کو دیکھ اور سن کر اپنے قومی اخلاق پر ماتم کرنے کو جی چاہتا ہے۔مناسک حج پر بھی اختلاف ہوتے دیکھا ہے۔اچھے خاصے پڑھے لکھے اور صاحبان علم و دانش لوگ محض اپنے مسلکی تعصب کی بنیاد پر امامت کے جھگڑوں اور نمازوں کے اوقات اور مقامات پر تنازعہ میں الجھے رہتے ہیں۔ یہ دل دکھانے والی صورتحال ہے۔اگر ان سے کہا جائے کہ جناب آپ عالم دین ہیں۔ آپ کی باتیںبھی ٹھیک ہونگی لیکن یہاں تو ہم امت واحدہ کا تصور پیش کرنے حاضر ہوئے ہیں۔یہاں ہم صرف اور صرف سیرت رسولۖ تک خود کو محدود رکھیں اور مشترکات کو آگے بڑھائیں اور اس احسن عمل پر تنقید نہ کریں جس پر خود رسولۖ اللہ نے عمل فرمایا تو وہ فقہی حجتیں  تراشتے اور گروپ کے اندر گروپ بنا کرکھڑے ہوجاتے ہیں۔حج آپریٹرز کی شکایت تو اب وقت کا ضیاع ہی دکھائی دیتی ہیں۔حج کے تمام ادارے اور ان کے حوالے سے رشوت اور سفارش کی ایسی داستانیں ہم پاکستانیوں کے دامن سے جڑی ہیں کہ کہاں کہاں صفائی دیں اور کس کس کے آگے وضاحت کریں۔لیکن ان آپریٹرز کو خدا کا خوف ہے نہ کسی قانون کا ڈر۔سہولتوں کے سنہرے سپنے دکھا کر کس طرح بے یارومددگار چھوڑتے ہیں۔عورتوں کو روتے دیکھا ہے۔خدارا اب تو باز آجائیں۔حاجیوں کو زچ کرنے کے لئے پی آئی اے ہی کافی ہے۔کس کس بے تدبیری کا ذکر کروں۔شیطان کو رجم کرتے وقت غیر ضروری جلد بازی کرتے وقت بھول جاتے ہیں کہ وہ شیطان کی بجائے اپنے ہی مومن بھائیوں پر سنگ باری کر رہے ہوتے ہیں۔ دھکم پیل سے کتنے ہی حاجی پائوں تلے آکر کچلے جاتے ہیں۔ تھوڑاصبر اور نظم و ضبط مناسک حج کی ادائیگی کو انتہائی آسان اور باوقار بناسکتا ہے۔ ہمارے گروپ کاروان زین کے انچارج جناب مقصود بھٹی اور ہمارے معلم پروفیسرحسین صدیق بدر قدم قدم پر ہماری رہنمائی کرتے رہے۔رہنمائی کا یہ فریضہ ہر گروپ میں ادا ہونا چاہے۔ سعودی حکومت نے جدید طرز کی ٹرین سروس کا آغاز کیا ہے یہ ایک مقام سے دوسرے مقام تک جانے کا تیز ترین ذریعہ ہے لیکن اس کا انتظام انتہائی نااہل اور بدتہذیب کارکنوں کے حوالے کردیا گیا ہے۔انتظامیہ اپنی بدتدبیروں اور اکھڑپن کی وجہ سے لوگوں کے دل دکھاتی اور بددعائیں سمیٹتی ہے۔ہمارے سامنے منا سے حاجی اس ٹرین میں سوار ہورہے تھے۔ایک عورت کا ایک پائوں اندر اور دوسراباہرٹرین کا باہری داخلی دروازہ بند کردیا گیا۔ وہ بچاری منت کر رہی تھی۔ہم ”بابو” کو کہہ رہے ہیں کہ بھائی یہ گروپ سے بچھڑجائے گی لیکن  شورطے(سپاہی) نے اس عورت کو سخت الفاظ کہہ کر نیچے دھکا دے دیا۔کتنے ہی حاجی اپنے گروپ سے بچھڑ کر گم ہوجاتے ہیں اور پھر کوئی ایسا مرکزی ڈیسک نہیں جہاں جا کر وہ اپنی بپتاسناسکیں۔ایک آدھ کوئی ”چوکی” قائم بھی ہے تو اس پر سوائے عربی زبان کے اور کوئی ترجمان نہیں بیٹھا ہوا۔ ایک حشر برپا ہوتا ہے اور سپاہی اس سب سے بے نیاز۔مخیرادارے اور خود سعودی لوگ حج کے موقع پر خوب خیرات کرتے ہیں۔کھانا بانٹا جاتا ہے اور یقین کیجئے وہاں کھانا لینے والے یوں جھپٹے ہیں جیسے ہمارے ہاں سیلاب زدگان امدادی قافلوں پر ٹوٹ پڑتے ہیں۔حکومت چاہے تو اس کو ایک مہذب صورت دے سکتی ہے اگر داتا دربار پر لنگر لینے والے لوگ قطاروں میں لگ سکتے ہیں تو آخر مکہ مکرمہ میں ایسا کیوں نہیں ہوسکتا۔حج کے دنوں میں سعودی دکاندار اور ٹرانسپورٹرز لوٹنے کی نفسیات میں مبتلا ہوتے ہیں۔قیمتوں کا تعین اور کرائے نامے مختلف زبانوں میں چسپاں کئے جانے چاہیں ۔حاجیوں کی تعلیم وتربیت کے لئے گو کہ پاکستان کے اندر حاجی کیمپ لگایا جاتا ہے اور وہاں جانے والے حاجیوں کو مناسک حج کی ادائیگی کے طریقے’عبادات اور دعائیں سکھائی جاتی ہیں۔لیکن اصل مسئلہ حج جیسی عبادت کی روح سے متعارف کروانا ہوتا ہے۔یہاں تفصیل کا موقع محل نہیں لیکن فلسفہ حج کو بیان کرتے ہوئے تمام مفسرین کے نزدیک حج کی مثال ایک جنگ کی سی ہے۔ حج کا لباس بھی ایک مختصر سا جنگی لباس ہوتا ہے۔ہم حجرہ اسود یعنی اللہ کے دائیں ہاتھ کو چوم کر اس کے اوپر اپنا ہاتھ رکھ کر اللہ کی بڑائی کا ذکر کرتے اور اللہ سے کئے گئے عہد کو پورا کرنے کا اعادہ کرتے ہیں۔اللہ تعالیٰ ارشاد فرماتے ہیں”اللہ نے مومنوں سے ان کے جان و مال  کے بدلے جنت کا سودا کرلیا”کعبہ کے گرد چکر لگانا صفہ و مروہ کے گرد پھیرے لگانا اور منیٰ کی طرف کوچ کرنا گویا کہ کمانڈر کے حکم پر فوج نقل و حرکت کر رہی ہے اور پھر عرفات کے میدان میں پڑائو۔ اگر حج کی روح کو انسان اپنے قلب پر اتار لے تو پھر اس کے اندر خود بخود وہ جذبہ پیدا ہوجاتا ہے جس کے تحت دوسرے حجاج کی عزت و توقیر بھی دل میں بیٹھ جاتی۔دوسروں کے لئے وقت اور باری کی قربانی بھی دی جاسکتی ہے۔ پھر منیٰ میں  جگہوںپر قبضہ کرنے ‘ گندی اور غلاظت پھیلانے ‘ بخل اور کنجوسی تکبر اور عدم برداشت جیسی منفی سوچ سے بچاجاسکتا ہے۔ اگرسعودی حکومت چاہے تو حج پر گئے لوگوں کیلئے مختصر سے تربیتی کورسز شروع کروا سکتی ہے ۔ سب سے بڑی دقت مترجمین کی عدم موجودگی کے سبب پیدا ہوتی ہے۔گم شدگی کی صورت میں کوئی سہولت نہیں جہاں جا کر اپنی بپتابیاں کی جاسکے۔ میڈیکل کی سہولتیں تو ہوتی ہیں  لیکن انتہائی کم اور وہاں بھی ڈاکٹر صاحبان صرف عربی زبان جانتے ہیں۔ اور بدتمیزی اور تکبر ان میں کوٹ کوٹ کر بھرا ہوا دیکھا گیا۔ مریض کی بات مکمل سنے بغیر نسخہ اس کے ہاتھ میں تھما دیا جاتا تھا گویابھیک دی جارہی ہو۔اب ایک پنجابی بولنے والے مریض کو اپنی بات سمجھانے کے لئے بڑی مشکل پیش آتی ہے۔ انتہائی تکلیف دہ پہلو یہ کہ سعودی دکانداروں کے عربی بولنے کے لئے ریٹ الگ اور غیرعربوں کے لئے  وہی ریٹ چار گنا بڑھ جاتے ہیں۔گویا عرب و عجم کی تفریق حج کے موقع پر بھی برقرار رہتی ہے۔خصوصاً سعودی ٹرانسپورٹرز غیر عربی حجاج کو خوب لوٹتے ہیں۔سعودی عرب سے تعلق رکھنے والے ریڑھی بان جو معذور خواتین و حضرات کو بھاری رقم کے عوض طواف کروا رہے ہوتے ہیں’ اس قدر منہ زور ہوتے ہیں کہ وہ راہ چلتے حجاج کو ٹکریں مار کر زخمی کردیتے ہیں۔ میں امید کرتا ہوں کہ متعلقہ سعودی ادارے میری ان گذارشات کو حج انتظامات کی بہتری کے لئے مثبت تجاویز جا ن کر عملی جامہ پہنانے کی کوشش فرمائیں گے۔

Click here to View Printed Statement

تکبّر اور غرور انسانی بیماریوں میں سے انتہائی خطرناک بیماری ہے۔ قرآن پاک میں ارشاد ہوتا ہے” خدا تکبّر کرنے والے اور بڑائی مارنے والے کو دوست نہیں رکھتا”۔تکبّر کرنے والے بدقسمت شخص کی حالت یہ ہوتی ہے کہ وہ ہمیشہ تندخو ہوتا ہے۔نرم گوئی ‘شفقت’دلنوازی اور درگزر سے کام لینے کی صلاحیت چھن جاتی ہے اور بیگانے تو بیگانے اس کے اپنے بھی اس کا ساتھ چھوڑنے لگتے ہیں۔ عام شخص تو تکبّر اور غرور کی حالت میں مبتلا ہو کر صرف اپنی ذات کا نقصان کرتا ہے لیکن جس شخص کو امت اور قوم کی رہنمائی کا فریضہ سرانجام دینا ہو اس کے لئے یہ بیماری جان لیوا ثابت ہوتی اوراس کا قافلہ بددل ہو کر بکھر جاتا ہے۔

اقبال نے اسی فلسفے کو یوں بیان کیا ہے کہ’کوئی کاررواں سے ٹوٹا کوئی بدگماں حرم سےکہ میرکاررواں میں نہیں خوئے دلنوازیعمران خان کے مخالفین ہی نہیں ان کے قریب رہنے والے اور سالہا سال ان کی ہمرکابی میں روز وشب گزارنے والے دوستوں کا خیال ہے کہ عمران کے اندر خوئے دلنوازی نہیں ہے اور ان کی شخصیت میں غرور اور تکبّر کا عنصر غالب رہتا ہے۔ وہ ایک پاپولر رہنما ہونے کے باوجود اپنے بارے میں پائے جانے والے اس تصور کو کم یا ختم نہیں کرسکے۔عمران خان کے ”سونامی” میں شامل ہونے والوں کی تعداد جس قدر زیادہ ہے اسی تعداد میں لوگ ان سے دور بھی ہٹ رہے ہیں اور سیاسی قدوقامت والی شخصیات نے عمران کو چھوڑنے کی سب سے بڑی وجہ ان کے متکبرانہ  رویے کو قرار دیا ہے۔ جب کوئی لیڈر یہ یقین کرلے کہ اٹھارہ کروڑ لوگوں میں سے صرف وہی نیک اور ایماندار ہے تو پھر یہ تکبّر کی بدترین حالت ہوتی ہے اورا چھے لیڈر کی سب سے بڑی اچھائی یہ ہوتی ہے کہ وہ بیماری کی نشاندہی پر شکریہ ادا کرتے ہوئے اپنے رویہ میں جوہری تبدیلی لائے تاکہ اس سے دور بھاگنے والے اس کی نرم خوئی اور دلنوازی سے متاثر ہو کر قافلہ میں پھر سے شامل ہوجائیں۔اسی جذبہ تعمیر سے مغلوب ہو کر راقم نے جناب عمران خان کو ان کے بارے میں لوگوں کے ذہنوں میں پائے جانے والے تصور سے آگاہ کرتے ہوئے سوال کیا”’اگر آپ ناراض نہ ہوں تو میں آپ کو بتانا چاہتا ہوں کہ آپ کے اپنے اور مخالفین دونوں کا خیال ہے کہ عمران خان متکبر ہیں۔ایسا ہے یا نہیں لیکن کیا آپ اپنے بارے پائے جانے والے اس تصور (Perception) کو تبدیل کرنے کا کوئی راستہ نکا لیں گے”۔ اس سے قبل کہ میرے سوال کا کوئی معقول جواب خود عمران خان دیتے’ ان کے پہلو میں کھڑے ایک بیس سالہ نوجوان نے جوش جذبات میں راقم کو مخاطب کرتے ہوئے کہا”’دیکھیں جی میں پچھلے سولہ برس سے عمران بھائی کے ساتھ ہوں۔ میں چھوٹا سا تھا جب عمران بھائی کے ساتھ آیا۔میں نے خان صاحب کے اندر تکبر والی کوئی بات نہیں دیکھی”۔کالم نگار اور اینکرپرسن اس نوجوان کی بات پر ہلکا سا مسکرا کر رہ گئے۔ کیونکہ نوجوان کے دعوے کو سچ مانیں تو وہ چار برس کی عمر میں تحریک انصاف میں شامل ہوگیا تھا۔”دیکھیں جی۔ میں متکبر نہیں ہوں۔آپ یہاں جتنے لوگ بیٹھے ہیں آپ میں سے کوئی بھی ایسا نہیں جس کے اندر میرے جیسا خوف خدا ہو۔” عمران کے چہرے کا رنگ بدلنے لگا۔ ہمارے ایک دوست کالم نگار نے لقمہ دیا ”جناب خان صاحب آپ نے کہا کہ آپ سے زیادہ خوف خدا رکھنے والا ہم میں سے کوئی بھی نہیں یہ بھی تو تکبر کی ہی ایک علامت ہے۔” خان صاحب شائد غصے میں آگئے تھے لیکن انہوں نے کمال مہارت سے اپنے غصے پر قابو پایا کیونکہ ان کے ہیڈ آفس اسلام آباد میں  بلائی گئی کالم نگاروں اور صحافیوں کی اس نشست میں تقریباً ساری ہی نامور شخصیات موجود تھیں۔”سنیں جی۔عمران بھائی کا معاملہ تو درویشوں والا ہے۔ان کے کوٹ میں دو سو سوراخ ہیں۔شائد اب بھی ہوں۔میں نے خان صاحب سے کہا کہ آپ یہ کوٹ بدل کیوں نہیں لیتے تو انہوں نے کہا کہ تم مجھے بھی نوازشریف جیسے لوگوں کی طرح بنانا چاہتے ہو”۔تحریک انصاف کے ایک اور کارکن نے خان صاحب کو کمک پہچانا ضروری سمجھتے ہوئے صفائی پیش کی۔راقم نے اسلامی نظام کے نفاذ کے حوالے سے بھی جناب خان صاحب سے سوال کیا لیکن انہوں نے اس کا جواب انتہائی بددلی سے دیا اور بظاہر ہنستے ہوئے مجھے پھر ایک بار باور کرایا کہ وہ ہرگز متکبر نہیں ہیں۔میرا مقصد یہ کبھی نہیں رہا کہ میں دوسروں کے بلاوجہ عیب ٹٹولوں۔ لیکن رہنمائوں کا معاملہ کچھ اور ہے ۔عمران خان پر نوجوانوں کی اکثریت جان نچھاور کرنے پر تیار رہتی ہے ۔میری دعا ہے کہ وہ ضرورکامیاب ہوں۔ لیکن میں ان کی خامیوں پر خوبیوں کی مصنوعی ملمع کاری کرکے ان سے کسی شاباش کا متمنی نہیں ہوں۔انہیں سب سے پہلے یہ تسلیم کرنا ہوگا کہ وہ بھی ایک  انسان ہیں اور ان کے رویے میں کمزوری ہوسکتی ہے۔ رکھ رکھائو اور وضع داری ہمارے سماج کی روح  ہے۔ جب تک عمران خان پاکستانی معاشرے کی وضع داری’دلجوئی اور رکھ رکھائو کو نہیں اپناتے وہ اپنے قریب تر ہونے والوں کو کھوتے رہیں گے۔ لاپرواہی اور کسی کو خاطر میں نہ لانے کا دوسرا نام تکبر ہی ہوتا ہے۔بہتری کے لئے دعا گوہوں کہ تبدیلی ہم سب کی خواہش ہے!!

Click here to View Printed Statement

JANG LAHORE

ہر سال ماہ صیام میں منبرومحراب سے روزے کی فضیلتیں بیان کی جاتی ہیں اسلامی سکالرز انتہائی فصاحت وبلاغت کے ساتھ اس ماہ مقدس کے ساتھ وابستہ برکتوں’رحمتوں اور بخششوں کے تذکرے دہراتے ہیں۔نماز تراویح’نوافل ‘صدقہ اور خیرات کے طور طریقوں اور آداب و اسلوب کا موثر ذکر ہوتا ہے۔ہمارے اخبارات’رسائل اور ٹی وی چینلز خصوصی پروگرام اور اشاعت کا اہتمام کرتے ہیں۔ کوئی بھی صاحب شعور مسلمان پاکستانی یہ نہیں کہہ سکتا کہ اسے روزے کی اہمیت’افطار اور سحر کے طریقے اور رکوع و سجود کے انداز سے واقفیت نہیں ہے۔ لیکن کیا سبب ہے کہ ذرائع ابلاغ کے ذریعے پھیلائی جانے والی آگاہی کے باوجود معاشرے میں اس مقدس مہینے کے طفیل جو بہتری متوقع ہوتی ہے وہ وقوع پذیر نہیں ہوتی اور معاشرے میں اصلاح کی بجائے ہر سال پہلے سے زیادہ بگاڑ دکھائی دیتا ہے؟یوں تو حکومت بھی رحمتوں والے اس مہینے میں عوام الناس کی ہمدردیاں سمیٹنے کے لئے حکومتی سطح پر کئی اقدامات اٹھاتی ہے۔

مثلاً یوٹیلٹی سٹورز میں سینکڑوں اشیاء کی قیمتیں کم کردی گئی ہیں اسلام آباد’ لاہور اور کراچی میں خصوصی بازار سجائے جاتے ہیں تاکہ روزہ داروں اور عام آدمی کو سستی اشیائے خوردونوش بآسانی دستیاب ہوسکیں۔ رمضان پیکج کے نام پر بھی ہر بازار اور مارکیٹ میںبظاہر لوگوں کی سہولت کے لئے پرکشش سٹال سجائے جاتے ہیں لیکن پھر بھی ماہ رمضان میں مہنگائی کا جن پوری طرح بوتل سے باہر آکر صارفین کا منہ چڑانا شروع کردیتا ہے۔اس ماہ کے تقدس کا شعور بھی ہر شہری کو حاصل ہے۔مسجدیں نمازیوں سے بھری پڑی ہوتی ہیں ۔ تراویح کے دوران قرآن اور اس کی تفسیر کا اہتمام ہوتا ہے اور یوں لگتا ہے کہ ہر طرف نیکیوں کی برسات آگئی ہے لیکن عملاً لوٹ مار ہی ہوتی ہے’جھوٹ پر جھوٹ گھڑے جارہوتے ہیں اور ہمارے کردار اندر سے مزید کھوکھلے ہورہے ہوتے ہیں۔ آخر رمضان شریف کی برکتیں ہمارے حصے میں کیوںنہیں آتیں ۔غریب امیر کیوں نہیں ہوجاتا’مظلوم کو انصاف کیوں نہیں مل پاتا’ہم بحیثیت قوم ہر سال پہلے سے زیادہ مقروض کیوں ہوجاتے ہیں۔عالمی سطح پر پہلے سے زیادہ رسوائی ہمارے نصیب میں کیوں لکھ دی جاتی ہے؟یوں محسوس ہوتا ہے کہ ہمارے سماج میں مصنوعی رکھ رکھائو نے اسقدرجڑیں گاڑ لی ہیں کہ اب روزے جیسی عبادت کو بھی ہم نے ”انجوائے” کرنے کا کوئی ذریعہ بنا لیا ہے۔ہمارے ذرائع ابلاغ خصوصاً ہماری ٹی وی سکرین نے خالصتاً تذکیہ نفس کے لئے اور تعلق بااللہ کو از سر نو پروان چڑھانے کے لئے مختص روزے جیسی عبادت کو بھی اشتہارات کے ذریعے ایک ”سٹیٹس سمبل” بنا دیاہے۔ٹی وی چینلز نے ایسے سکالرز ”ہائر” کر لئے ہیں جو اپنی چکنی چپڑی باتوں سے ناظرین کا دل موہ لیتے ہیں۔اور پھر وہ ماہر مداری کی طرح لوگوں کوکسی پراڈکٹ کی طرف راغب کردیتے ہیں۔گویا روزے اور رمضان میں لوگوں کے مذہبی اور دینی رجحانات کا استحصال کرنے کا ایک نیا طریقہ ایجاد ہوگیا ہے اور یہی حالات ہمارے اخبارات کے بھی ہیں ۔کھانے پینے کی اشیائ’پہننے’ہاتھ منہ دھونے اور سجنے سجانے کے سامان کی جس قدر تشہیر ‘مارکیٹنگ اور سیل ماہ رمضان میں کی جاتی ہے شائد ہی کسی اور ماہ میں یہ کاروبار اس قدر عروج پاتا ہو۔ ٹی وی پروگرام اور اشتہارات نے اس عبادت کو ایک کلاس کے لئے خوشی اور غربت کی لکیر سے نیچے رہنے والوں کے لئے ایک آزمائش بنا ڈالا ہے۔یہی وجہ ہے کہ اس ماہ مقدس کی برکتیں بھی ہم سے روٹھ چکی ہیں۔ ”روزہ میرے لئے ہے اور اس کا اجر میں ہی دوں گا” اس حدیث مبارکہ کے بالکل برعکس اب روزہ اور اس سے زبردستی جوڑ دی جانے والی پرتعیش افطار و سحر نے اسے بھی شہرت’ بڑائی اور امارت کے اظہار کا ذریعہ بنا ڈالا ہے۔پیغمبر اسلام حضرت محمد صلی اللہ علیہ وآلہ وسلم نے ماہ صیام میںایسا کوئی عمل لازم نہیں فرمایا جس کی تشہیر آج کے پاکستانی معاشرے میں کی جارہی ہے۔اصراف سے منع فرمایا گیا۔سادگی پر زور دیا گیا مال کی قربانی کا حکم دیا۔ کان’آنکھ’ ہاتھ اور پائوں تک کے روزے کی بات کی لیکن یہاں تو ہر انسانی اعضا روزہ شکنی کرتا ہوا دکھایا جارہا ہے۔ پھر برکت کیسی؟میری استدعا ہے کہ کم از کم ماہ صیام میں ٹی وی سکرین کے ملفوف شیطانی ایجنڈے سے ضرور بچیں تاکہ تذکیہ نفس کی منزل آسان ہوسکے۔ کم از کم اپنے حصے کی افطاری کے برابر  رقم ایمانداری کے ساتھ اپنے ضرورت مند قرابت داروں’ ہمسائے ‘مسکین یا شہری پر ضرور خرچ کردیں۔ذاتی طور پر ہم یہی کرسکتے ہیں شائد اس سے برکتیںنازل ہوسکیں۔

Click here to View Printed Statement

Click here to View Printed Statements

Click here to View Printed Statements

آج انسانیت مجموعی طور پر انتشار کا شکار ہے ۔تمام تر ترقی ‘خوشحالی تعلیم اور علم کے باوجود ساڑھے چھ ارب انسان ایک دوسرے کو نیچا دکھانے اور اس کرہ ارض کو نہ ختم ہونے والے فتنوں میں مبتلا کردینے کی کوشش میں مصروف ہیں۔کوئی ایسا خطہ نہیں جو جنگ و جدل سے پاک ہو۔ جہاں انسان انسان کو کاٹ نہ رہا ہو۔ جہاں آدم آدم کو لوٹ نہ رہا ہو امیر غریب کو کھائے جارہا ہے۔

باوسیلہ دنیا بے وسیلہ بستیوں کو اجاڑ رہی ہے۔تقابل کا فلسفہ اپنے تمام تر منفی معنوں کے ساتھ نسل انسانی کی تباہ کاریوں میں کارفرما ہے۔ کچھ معلوم نہیں کب زیر زمین چھپے ہوئے ایٹم بم‘ سمندر میں تیرتی ہوئی نیو کلیائی آب دوزیں ‘تابکاری مواد اٹھائے فضاءمیں قلانچیں بھرتے طیارے اور خلا میں ہچکولے لیتے مصنوعی سیارے اچانک کسی مہم جو ذہن کی چھوٹی سی غلطی سے اس قافلہ انسانیت کو آگ لگا دیں اور احسن تقویم کے فارمولے پر پیدا کردہ انسان اپنی ہی بدتد بیری اور بدنیتی کے سبب اپنے گھر کو جلا کر خاکستر کردے۔ انسانیت کو بچانے کی آج جس قدر ضرورت ہے۔ شاہد اس سے پہلے کبھی بھی نہ تھی۔ مختلف یورپی دانشور اور انسانی حقوق کے چیمپئن خود ساختہ تھیوری اور محض انسانی ذہن سے پھوٹنے والی احتیاطوں کو ملحوظ خاطر رکھ کر انسانیت کے قافلے کو بچانے کی کوشش میں مصروف ہیں لیکن تمام تر خلوص نیت کے باوجود مغربی انسان دوست ادارے اور حلقے محض اندھیروں میں ٹامک ٹوئیاں مار رہے ہیں ان کی حالت یہ ہے کہ فلسفی کو بحث کے اندر خدا ملتا نہیںڈور کو سلجھا رہا ہے اور سرا ملتا نہیںاُلجھی ہوئی ڈور کا سرا ڈھونڈنے کے لئے انہیں ہر طرح کے تعصبات سے بالاتر ہو کر صرف اور صرف سچ کو تلاش کرنا ہوگا۔ مجھے یقین ہے کہ اگر انہوں نے مذہب ‘زبان ‘علاقے ‘رنگ نسل‘ Status اور دنیاوی طبقاتی تقسیم کی عینک اتار کر حق کی تلاش کو نکلیں گے تو پھر انسانیت کے عظیم محسن دنیا جہاں کے لئے رحمت للعالمین اور صرف مسلمانوں کے لئے نہیں بلکہ بنی نوع انسان کے غم گسار آخری پیغمبر خاتم النبین حضرت محمدﷺ کی تعلیمات تک ضرور پہنچ جائیں گے۔اگر ہم ماہ محرم الحرام میں کوئی ایسی کتاب ترتیب دے سکیں ۔ کوئی ایسی قلم بنا سکیں جس میں رسول پاک ﷺ کی تعلیمات کا بھرپور تاثر ملتا ہو اور وہ یورپ اور امریکہ کے لوگوں کو دکھائی جائیں تو میں دعویٰ سے کہتا ہوں کہ جو ذہن گستاخی پر اتر آئے ہیں وہی ذہن آپ ﷺ کے حق میں اس طرح سرنگوں ہوجائیں گے جس طرح حضرت عمرؓ تلوار حمائل کئے درنبوت پر جھک گئے تھے۔ قافلہ انسانیت کو درپیش جان لیوا حادثوں سے بچانے کا صرف ایک ہی راستہ ہے کہ ہم بحیثیت مسلمان اسوءرسول پر عمل کریں اور غیر مسلموں کو ڈرانے اور خوفزدہ کرنے کے بجائے یا ان سے مرعوب ہونے اور دور ہونے کے بجائے انہیں تعلیمات نبوی سادہ اور آسان سے لفظوں میں سمجھا سکیں۔ دنیا میں مختلف شخصیات علم و کمال‘دولت و جمال اور قوت واقتدار لے کر آتی رہی ہیں مگر ہم حضور انور کو سب سے زیادہ اہمیت دیتے ہیں۔اس کی ایک وجہ تو ہماری جناب رسول اللہ سے محبت و عقیدت اور ہمارا ان کے ساتھ رشتہ ایمان میں بندھا ہونا ہے تو دوسری وجہ یہ بھی ہے کہ جو آپ نے انسانیت کو عطا کیا ہے وہ آپ سے پہلے یا بعد میں کسی نے نہیں دیا۔دنیا کی دوسری شخصیات کو دیکھیں تو سکندر‘رستم و دیگر نامور کمانڈرز جاہ و جلال دکھا کر چلے گئے‘ کارل مارکس اورلینن جیسے لوگ نظریاتی نعرے دے کر جہاں فانی سے کوچ کر گئے۔غرض کوئی علمی موشگافیاں دکھا کر چلا گیا کسی نے غلط نظریات میں الجھا کر اسے کمال تصور کیا۔ کسی نے انسانیت کو خاک وخون میں تڑپانے سے لطف حاصل کیا مگر حضور کے انقلاب سے انسانیت کو رہنمائی‘ امن ‘ہدایت و نور ملا ہے۔اور آپ کے ارشادات آج کے مہذب انسان کے لئے بھی اسی طرح مفید اور حیات بخش ہیں۔ جس طرح 1500 سال قبل کے انسان کے لئے تھے۔ ان کی روشنی اور تابانی میں ذرا فرق نہیں آیا۔اخلاق کی جھلک‘ کردار کی بلندی‘ امانت ‘دیانت اور انسانیت کے لئے پیار جہاں بھی ہے وہ حضور صلی اللہ علیہ وسلم کا دیا ہوا ہے۔ آپ کی بتائی ہوئی باتیں آج بھی بڑے بڑے سائنس دان پڑھتے ان سے ہدایت و رہنمائی حاصل کرتے اور قلب سلیم رکھنے والے آپ کے آخری نبی ہونے کی شہادت دیتے ہیں۔ اسلام کے دیئے ہوئے معاشی‘ معاشرتی ‘سیاسی عدل اور خاندانی نظاموں کا جو بھی حصہ جانے انجانے میںکہیں بھی نافذ ہے دنیا اس کی برکات حاصل ہورہی ہیںاور مجموعی طور پر معاشرے ‘نظام اور اسلام کی بخشی ہوئی اچھائیوں کے طفیل ہی ترقی کر رہے ہیں۔ کئی معاشرے صرف سچ کی بنیاد پر آگے بڑھ رہے ہیں‘ بعض ممالک صرف محنت کی بنیاد پر دنیا میں نام پیدا کرچکے ہیں۔جاپان انسانی حقوق کی بناءپر پہچان بنا چکا ہے۔اسی طرح معاشرے سے لے کر فرد تک اسلامی تعلیمات کی برکات پھیلتی ہیں۔حضور انور ﷺ سے قبل افریقہ اور یورپ میں غلام بنانے کے بھیانک مناظر دیکھنے میں آئے ہیں ۔تاریخ گواہ ہے کہ کچھ لوگوں کو دہشت جمانے کی غرض سے بے دردی سے ہلاک کردیا جاتا اور باقیوں کو غلام بنا لیا جاتا تھا اور غلامی کی بھی اس حد تک گری ہوئی مثالیں ان لوگوں نے قائم کیں کہ اپنے معزز مہمانوں کے سامنے شراب و شباب سرو کرنے کے بعد ان کے ہاتھوں میں تیر دے دیئے جاتے ۔ غلاموں کو سامنے کونے میں بٹھا دیا جاتا اور تیر غلام پر برسائے جاتے۔ جوں جوں غلام تڑپتا تو مہمان محظوظ ہوتےِ جبکہ سرور کائنات نے زید بن حارثہ سے ایسا سلوک کیا کہ وہ اپنے والد اور چچا کے ساتھ جانے سے انکاری ہوگئے اور حضور سے چمٹ گئے۔ اس پر تاریخ گواہ ہے کہ نبوت سے پہلے دور میں حضور زید کو کعبے میں لے گئے اور اعلان کیا کہ آج سے زید کو زید بن محمد کہا جائے۔قرآن پاک کے نزول کی اولین سورتوں میں سورہ بلد میں ”گردنیں آزاد کرو“ کی واضح ایک آیت موجود ہے جبکہ آگے چل کر غلامی کے ادارے کو تدریج کے ساتھ مکمل طور پر اسلام نے ختم کردیا۔ میں تو سمجھتا ہوں کہ اصل روشنی اسلام ہی کے پاس ہے یہ مغرب کے پاس جو روشنی ہے وہ اس قسم کی روشنی ہے جو چور اور ڈکیت کے ہاتھ میں ہوتی ہے۔ وہ اس لائٹ سے اپنے گھر کا راستہ نہیں ڈھونڈ رہا ہوتا مگر دوسرے کے گھر اور دوسرے کے مال کی طرف ہدایت و رہنمائی لے رہا ہوتا ہے۔ روشنی وہی ہوتی ہے جو انسان کو انسانیت کا سبق دے۔ ڈیزی کٹر پھینکنے کے بعد بسکٹوں کے ڈبے پھینکنے سے خداوند کبھی خوش نہیں ہوتا۔حضورﷺ کی تعلیمات پر نگاہ دوڑائی جائے تو حیرانگی ہوتی ہے کہ جو بات آج ہم لمبی لمبی تقاریر میں نہیں کہہ پاتے آپ نے چند جملوں میں کہہ ڈالیں۔ مکہ سے مدینہ تشریف لانے پر آپ نے جو خطبہ ارشاد فرمایا جو ایک منٹ سے کم وقت کا تھا اور خطبہ حجة الوداع کے موقع پر آخری تاریخی خطبہ بھی مکمل لکھ لیا گیا اور اس کا وقت بھی دس منٹ سے زائد نہیں ہے۔آیئے آپﷺ کی انسان کے حوالے سے فرمائے گئے ارشادات کا جائزہ لیتے ہیں‘میرا یہ آج بھی دعویٰ ہے کہ جو لوگ پیغمبر اسلام کے حوالہ سے نفرت انگیز تحریریں لکھتے ‘ توہین آمیز کارٹون بناتے اوردل آزار فلمیں دکھاتے ہیں ۔ ان تک محسن انسانیت کی تعلیمات حقیقی طور پر پہنچ ہی نہیں سکیں۔اس موقع پر میں آپ کے مدینے داخل ہونے والے خطبے پر کچھ عرض کرنا چاہوں گا۔آپ نے فرمایا”سلام کو عام کرو“ اور باہم کھانے کھلایا کرو ‘صلہ رحمی کیا کرو‘رات کے اس پہر نماز پڑھا کرو جب لوگ سو رہے ہوں۔ تم جنت میں سلامتی کے ساتھ داخل ہوجاﺅ گے۔سلام ایک دعا ہے یعنی تم پر سلامتی ہو۔ اس کی تفصیل میں حضورﷺ نے دوسرے موقع پر فرمایا کہ مسلمان وہ ہے جس کی زبان اور ہاتھ سے دوسرے مسلمان محفوظ رہیں۔مزید برآں لفظ مسلمان کو بھی اپنی ایک حدیث میں واضح کردیا کہ جو کوئی ہماری طرح نماز پڑھے اور ہمارے قبلے کی پیروی کرے وہ مسلمان ہے۔ آپ ﷺ یہاں تک مسلمانوں کے لئے رﺅف و رحیم ہیں کہ آخری خطبے میں آپ نے یہ بھی واضح کردیا کہ مسلمان کی جان و مال ‘عزت اور آبرو دوسرے مسلمان پر حرام ہے اور میرے غیر مسلم بھائیوں کو یہ جان کر خوشی ہوگی کہ حدیث قدسی میں حضور نے ہمیں آگاہ کیا کہ اللہ تعالیٰ فرماتا ہے۔”لوگ میرا کنبہ ہیں“ اور قرآن میں آیا کہ جو کوئی ایک انسان کی جان بچائے گا اس نے گویا پوری انسانیت کی جان بچائی۔ آپ کے ارشاد کے دوسرے حصے میں فرمایا گیا کہ آپس میں کھانے کھلایا کرو۔ ہمیں معلوم ہے کہ درندے ‘حیوان اور انسان میں فرق یہ ہے کہ درندہ شکار مار کر چیڑپھاڑ کرتا ہے۔ اپنا پیٹ بھرتا اور باقی کو وہیں پھینک دیتا ہے۔ حیوان کو جو دیا جائے وہ اسے کھا لیتا اور باقی پر گندگی کر دیتا ہے جبکہ انسان اپنا کھانے کے بعد باقی اپنے بھائیوں کو دے دیتا ہے۔ حضورﷺ کی تعلیمات اس سے بھی ایک درجہ آگے ہیں۔آپﷺ نے ایسے لوگ تیار کردیئے جنہیں میدان کار زار میں بھی کچھ پینے کو ملا ہے تو اسے اگلے زخمی بھائی کی طرف بڑھانے کا اشارہ کیا۔ گویا اسلام پہلے دوسرے بھائی کو کھلا کر پھر خود کھانے کا درس دیتا ہے حضور کے ارشادات کے مطابق اگر کسی کا پڑوسی بھی بھوکا سویا ہوا ہو اور ہم نے پیٹ بھر کر کھانا کھایا ہو تو نہ صرف ہمارا یہ لقمہ حرام بن جائے گا بلکہ اس سے بڑھ کر ایسے شخص کا حضور پر کوئی ایمان نہ ہونے کا سر ٹیفکیٹ بھی سرکار نے جاری فرما دیا ہے۔صبح تہجد کی نماز سے انسان کے دل میں نرمی پیدا ہوتی ہے ۔ خدا کی محبت اور اس کے بندوں سے پیار بڑھتا ہے۔ سورہ مزمل کے مطابق ایسا کرنے سے نفس پر ضرب کاری لگتی ہے تکبر وغرور جاتا رہتا ہے۔ انسان کے منہ سے اچھی اور پیاری بات نکلتی ہے۔ دعوت دینے کے آداب سمجھ میں آتے ہیں‘ بقول اقبالعطار ہورومی ہو رازی ہو غزالی ہوکچھ ہاتھ نہیں آتا ہے آہ سحر گا میںیہ عمل انسان کے اندر برداشت اور حوصلہ بھی پیدا کرتا ہے جیسا کہ حضور پر ایک مشرکہ بوڑھی کوڑا پھینکتی تھی جب چند دن اس نے ایسا نہ کیا تو معلوم ہوا کہ وہ بیمار پڑگئی ہے ۔ اس دن سرکار اس کے گھر اس کی عیادت کرنے تشریف لے گئے۔ہمیں بڑی واضح ہدایات ہیں کہ ”تم میں سے بہتر وہ ہے جو لوگوں کے لئے نفع بخش ہو“ انسانوں کے درمیان برابری کا درس آخری خطبہ میں جس شان سے دیا گیا ہے وہ اس بات سے عیاں ہے کہ UN کے آئینی چارٹر کی شقیں اس خطبہ رسول سے لی گئی ہیں۔اسی طرح پوری شرح صدر کے ساتھ یہ بات کہی جاسکتی ہے کہ اگر کسی فرد‘تنظیم یا ملک کا مقصد انسانیت کی فلاح قرار پایا ہے تو اسے اپنے اس مقصد میں کامیاب ہونے کے لئے اسوہ رسول ہی اپنا لائحہ عمل قرار دینا ہوگا۔ جس قدر آپ کے طریقہ کار‘فرمودات اور طرز ِ حیات پر عمل ہوگا اسی قدر انسانی فلاح کی منزل قریب تر ہوگی۔ اقبالؒ نے اسی راز کو ایک مصرے میں یوں بیان کیا تھا‘دہر میں اسم محمد سے اجالا کردےاور میں قرآن مجید کی اس آیت پر اپنی تحریر کا خاتمہ کروں گا ”اگر تم اللہ سے محبت کرتے ہو تو میری (رسولﷺ اللہ کی) اتباع کرو اللہ تم سے محبت کرے گا“۔

میں عمران خان کا حامی تھا اب نہیں رہا۔عمران نے انقلاب کا نعرہ لگایا۔”چور چوروں کا احتساب نہیں کرسکتے“”روایتی سیاست اور گھسے پٹے سیاستدان اس ملک کی تقدیر کیا بدلیں گے“۔”تحریک انصاف بالکل نئی ٹیم لے کر آئے گی“۔” اس نظام کو جڑ سے اکھاڑ پھینکے گے“ یہ سیاسی عہد و پیماں تھے جن کے سحر میں میرے جیسے بہت سے محب وطن اسیر ہوئے‘ عمران خان کی صورت میں ہمیں ایک مسیحا نظر آنے لگا۔ میں اور میرے ساتھیوں نے عمران کی ذات سے جڑی بہت سی منفی حقیقتوں‘کہانیوں اور تبصروں کو توجہ نہیں دی اور نئے پاکستان کی تعمیر کیلئے تبدیلی کے اس نشان کو دل ودماغ میں سجا لیا۔مجھے ذاتی طور پر پہلا دھچکا اس وقت لگا جب عمران خان نے پیپلزپارٹی کی قیادت سے روٹھ کر آنے والے شاہ محمود قریشی کو نہ صرف یہ کہ پارٹی میں شامل کیا بلکہ انہیں وائس چیئرمین بھی بنا ڈالا۔شاہ محمود قریشی جاگیردار ہیں یا نہیں لیکن حقیقت یہ ہے کہ وہ ایک گدی نشین ہیں

اور ہر سال اپنے ہزاروں مریدین کا ذہنی اور مذہبی استحصال کرتے ہیں۔ غریب غرباءسے ہر سال کروڑوں روپے وصول کرتے ہیں۔ان کی سیاسی اہمیت کی بنیاد بھی موروثیت ہے صرف اس کی شکل پیری مریدی ہے۔ ان کے ووٹروں کا ان سے ایک استحصالی رشتہ ہے۔عمران خان تو علامہ اقبالؒ کے فلسفے کو لیکر چلنے کا دعویٰ کر رہے تھے پھر کیا ہوا کہ عقیدت مندوں سے نیازیں اکٹھی کرنے والے اس قریشی پیر کو اپنی انقلابی جماعت کا وائس چیئرمین مقرر کر لیا۔ اگر شاہ محمود قریشی اور زرداری کے ٹولے کے درمیان ریمنڈ ڈیوس کے ایشو پر اختلاف نہ ہوتا اور اگر جناب گیلانی کی جگہ جناب قریشی کو وزیراعظم کی باری دے دی جاتی تو آج بھی اس شاہ کے منہ سے اپنے بادشاہ کے لئے پھول جھڑ رہے ہوتے اور یہی شاہ محمود قریشی ‘عمران خان اور تحریک انصاف کے کیخلاف شعلے اگل رہے ہوتے۔ذاتی مفادات کے سبب اپنی سابق پارٹی سے روٹھ جانے والے سیاستدان کو عمران خان نے کلین چٹ دے کر اپنے ساتھ شامل کر لیا ۔جعلی ڈگری والوں اور نیب زدگان کی پوری ٹیم اکٹھی کر لی۔ہاشمی سمیت یہ ساری وہ ٹیم ہے جو خود انتہا کی متکبر ہے‘عام آدمی کے ساتھ ہاتھ ملا کر دس بار دھوتے ہیں۔عمران نے اپنے نظریے کے باعث اپنے ساتھ ملنے والوں سے پہلی ناانصافی کی اور یوں یہ سلسلہ ایسا چلا کہ رکنے کا اب نام ہی نہیں لیتا۔سیاستدانوں کا ”دکھی گروپ“ اپنے لئے سکھ ڈھونڈنے تحریک انصاف میں شریک ہوچکا ہے۔عمران خان اس ”فیاضی“ کا جو ا ب دینے کی بجائے ”فرشتے تو ملیں گے نہیں“ کہہ کر نظریاتی کارکنوںکو ٹھنڈا کرنے کی کوشش کر رہے ہیں۔اگر آپ کے پاس ”فرشتے“ نہیں تو پھر باقی پارٹیوں کو ”شیطان“ ہونے کے طعنے کیوں دیتے رہے۔عمران خان نے دوسرا بڑا دھچکا ایم کیو ایم کی طرف دوستی کا ہاتھ بڑھا کر دیا۔ہم جب متحدہ قومی موومنٹ کے حق میں لکھ رہے تھے تو عمران کے حامی حلقے ہمیں ایسا کرنے سے روکتے تھے۔عمران خان جناب الطاف حسین کیخلاف لندن میں ثبوت لئے پھرتے رہے۔انہیں ماہ مئی والا خون خرابہ نہیں بھولتا تھا۔ لیکن اچانک ایسا کیا انقلاب آیا کہ ایم۔کیو ۔ایم ایک حقیقت لگنے لگی اور اب وہ نائن زیرو جانے کیلئے بیتاب نظر آتے ہیں۔آخر یہ دوغلا پن اور دھوکہ دہی کس کے حکم پر ہے۔اگر ایم کیو ایم حقیقت ہے جو کہ ہے‘تو پھر (ن) لیگ‘ پی پی پی اور دیگر سیاسی و مذہبی جماعتیں بھی حقیقتیں ہیں۔ تحریک انصاف نے اگر مفاہمت اور مصالحت کی سیاست کر نی ہے تو اس ملک کے معصوم نوجوان کب تک ”خان جی“کا جھریوں بھرا چہرہ دیکھتے رہیں گے ۔اورساٹھ سالہ ہیرو کو لوگ کیوں پوجیں گے؟جنون گروپ کب تک نئی نسل کو مجنوں بنائے رکھے گا؟لوگوں کو سب کچھ یاد آرہا ہے۔عمران خان کے اپنے بچے اپنے ننھیال میں پل رہے ہیں۔ ان کے رگ و پے میں یہودی رزق سرایت کر رہا ہے۔ عمران خان کو اسلامی ریاست کا ماڈل بھی انگلینڈ ہی دکھائی دیتا ہے۔ ان کو اچانک امریکی مظالم بھی بھول گئے ہیں۔ان کی حریت فکر کا دائرہ دھیرے دھیرے سمٹتا جارہا ہے۔وہ امریکیوں سے زیادہ اب ان کی مدد کرنے اور انہیں باعزت واپسی کا راستہ دینے کے فارمولے کو پروموٹ کرتے دکھائی دیتے ہیں۔ عمران خان نے لاہور میں جلسہ کرنے سے قبل واشنگٹن میں کن کن امو رپر امریکی عہدیداروں کو اعتماد میں لیا کسی کو خبر نہیں۔شاہ محمود قریشی کو بھی امریکہ بلایا گیا تھا۔ پھر معاملات طے پا گئے۔عمران کی تلخ زبان امریکہ کے حق میں شیریں ہوگئی۔عمران یعنی ہمارا خان بھی”حقیقت پسند“ ہوگیا۔یہ جان کر تیسرا بڑا دھچکا لگا کہ تحریک انصاف کی پروجیکشن اور لابنگ کیلئے پاکستان کے سب سے بڑے امریکہ نواز میڈیا گروپ کے ساتھ باقاعدہ ڈیل طے پا گئی ہے۔عمران خان کن ہاتھوں میں پھنستے جارہے ہیں؟ ان کو کس نے یرغمال بنانا شروع کردیا ہے؟ افسوس کہ عمران نے اپنے لاکھوں چاہنے والوں کے اعتماد اور پیار کیساتھ روایتی کھلواڑ شروع کردیا ہے۔تحریک انصاف معاشرے کو انصاف دینے کی بجائے ناانصافیوں کی آماجگاہ بن گئیہے۔