اقبال نے کہا تھا، وہی جواں ہے قبیلے کی آنکھ کا تارا شباب جس کا ہے بے داغ، ضرب ہے کاری میں جب پہلی بار سردار یاسر الیاس خان سے ملا تو میرے ذہن میں اقبال کے اس شعر نے سرسراہٹ کی تھی۔سردار یاسر سے تفصیلی ملاقات چیمبر آف کامرس اینڈ انڈسٹری کے ہیڈ آفس میں ہوئی۔اس خوبصورت اور خوب سیرت نوجوان نے مغل وفد کا پر تپاک استقبال کیا۔سردار صاحب کو چیمبر کا الیکشن جیتنے پر جہلم سے جناب میاں نعیم بشیر،جناب ندیم ساجد کی سربراہی میں ممتاز مغل شخصیات پر مشتمل ایک نمائندہ وفد مبارکباد دینے آیا تھا۔اسلام آباد سے جناب بیگ راج اور حسنین عرفانی مغل بھی موجود تھے۔سردار یاسر کمیٹی روم میں وفد کے ارکان سے باری باری گلے ملے،تعارف حاصل کیا اور خیریت دریافت کی۔پھر انہوں نے اپنی انتخابی مہم کے حوالے سے دلچسپ باتیں بتائیں۔چیمبر کے الیکشن میں سردار صاحب نے سب سے زیادہ ووٹ لیے۔

انہوں نے اپنی کمپین روائتی طریقوں سے ہٹ کر جدید طرز پر ترتیب دی۔ ووٹروں تک پیغام پہنچانے کیلئے آئی ٹی کا زبردست استعمال کیا۔ تاجروں کو کھانے کھلا کر اپنا ہمدرد بنانے کی بجائے سردار یاسر نے اپنا پیغاموثر بنانے اور پیغام رسانی کے ذرائع کو برق رفتار بنانے پر توجہ مرکوز رکھی۔حکومت پنجاب کے معاون خصوصی محترم سردار تنویر الیاس خان کے چھوٹے بھائی سردار یاسر خان امریکی یونیورسٹی سے فارغ التحصیل ہیں۔وہ بات کرنے کا ڈھنگ جانتے ہیں۔بڑے سائنٹفک طریقے سے مخاطب کو اپنی طرف متوجہ کئے رکھتے ہیں۔اچھے سامع بھی ہیں۔تکبر اور بڑائی نہیں،طبعیت میں ادب آداب کا رنگ غالب رہتا ہے۔ کسی بھی چیمبر کے کم عمر ترین صدر ہیں۔وہ کسی حادثے کے نتیجے میں اس منصب تک نہیں پہنچے بلکہ وہ چیمبر کے معاملات کو بہتر کرنے کے ارادے سے الیکشن لڑے ہیں۔ان کے ذہن میں تاجر برادری اور ملک کی معاشی صورتحال کو سنوارنے کا باقاعدہ روڈ میپ ہے۔ان کے ویثرن سے متاثر ہوکر حکومت کی اقتصادی ٹیم سردار صاحب کی وزیراعظم سے ملاقات بھی کروا چکی ہے۔یہ نوجوان صدر آج کا نہیں آنے والے پچاس سال کی ضروریات کے بارے میں منصوبہ سازی کر ناچاہتے ہیں۔باقائدگی کے ساتھ دفتر آتے اور تاجروں کو درپیش مسائل کا حل نکالتے ہیں۔ان تمام باتوں سے ہٹ کر دونوں بھائیوں کی ایک خوبصورت بات یہ کہ وہ اپنی قوم اور قبیلے کو بڑا احترام دیتے ہیں۔”آج میرے اپنے خاندان کے لوگ مجھے مبارکباد دینے آئے ہیں،میں بہت خوش ہوں”سردار یاسر صاحب نے چیمبر کے زعما کو فخر سے بتایا۔پھر مغل برادری کی فلاحی سرگرمیوں کے بارے میں باتیں کرتے رہے۔گھنٹہ بھر کی میٹنگ ہوئی۔چائے،کافی،ونگز اور فروٹ کیک سے تواضع کی۔پھر فوٹو سیشن شروع ہوا۔سردار صاحب کی مصروفیات بھی بے پناہ ہیں لیکن جب تک ہم نے خود اجازت نہیں لی،قبیلے کی آنکھ کا یہ تارا وفد کے ارکان کیساتھ ہی جگمگاتا رہا،تصویریں بنواتا رہا،ہنستا مسکراتا رہا۔اپنائیت کا ایسا احساس کہ دل و دماغ سرشار ہوگئے۔جناب ندیم ساجد مغل مالائیں ساتھ لائے تھے۔گھوڑے کا قیمتی ماڈل تحفہ کے طور پر پیش کیا۔پنجاب بیکری کیطرف سے سردار صاحب کی تصویر والا لذیذ اور دیدہ زیب کیک بھی تھا۔ملاقات تقریب میں بدل گئی۔سردار تنویر الیاس خان ملکی معیشت کی بہتری کیلئے اوورسیز پاکستانیوں کو ملک میں سرمایہ کاری پر آمادہ کرتے رہتے ہیں۔وہ پنجاب انوسٹمنٹ بورڈ کے چیئرمین بھی ہیں۔ان کی قابل تجاویز پر پیش رفت بھی ہورہی ہے۔تارکین وطن کی جانب سے ملک کے اندر سرمایہ کاری میں خاطر خواہ اضافہ ہو چکا ہے۔ان کے چھوٹے بھائی اب چیمبر کے پلیٹ فارم سے انتہائی بنیادی کام کررہے ہیں۔یہ دونوں بھائی صرف اپنی مغل برادری ہی نہیں پوری پاکستانی اور کشمیری قوم کا فخر ہیں،یہ واقعی قوم کے سردار ہیں۔ ان کا کردار بے داغ ہے،یہ معیشت کا پہیہ چلانے میں ضرب کاری سے متصف ہیں۔ قبیلے کی آنکھ کا تارا ہونے کے تصور اقبال پر پورا اترتے ہیں۔

راقم نے آئی جی سندھ کے اغواء کے حوالے سے چند روز قبل “سندھ پولیس کو سیلوٹ”کے عنوان سے کالم لکھا تھا جسے آئی جی مشتاق مہر صاحب نے پڑھا اور شکریہ کا پیغام بھی بھیجا۔میرا خیال ہے کہ پولیس کلچر میں یہ ایک انوکھا واقعہ تھا کہ اپنے سربراہ کی عزت کی خاطر اور پولیس کے مورال کو بلند رکھنے کیلئے افسران نے احتجاجا رخصت پر جانے کا فیصلہ کیا۔ہمارے ہاں پولیس کے بارے میں عمومی تصور یہ ہے کہ چھوٹے افسروں اور سپاہیوں کی حوصلہ شکنی ہوتی ہے وہ اگر کوئی کارنامہ سر انجام دے بھی دیں تو مقامی ایس ایچ او کریڈٹ اپنے نام کرتا ہے۔اور انعام وغیرہ کے معاملے میں اعلی افسران ہی حقدار ٹھہرائے جاتے ہیں۔حال ہی میں ہم ایسا منظر پنجاب میں دیکھ چکے ہیں۔

سانحہ موٹر وے لاہور میں مجرم کی گرفتاری پر رکھا گیا انعام اعلی پولیس افسران میں تنازعہ کا سبب بنا رہا۔لیکن سندھ پولیس نے اپنے ڈیپارٹمنٹ کے حوالے سے منفی تائثر کو نہ صرف زائل کیا بلکہ انتہائی شاندار مثال قائم کی۔اے ایس آئی محمد بخش نے کسی انعام کے لالچ میں مظلوم ماں کی مدد نہیں کی تھی،نہ ہی اس جونئیر پولیس افسر کی بیٹی نے کسی شہرت کی وجہ سے خود کو خطرے میں ڈالا تھا۔اس متوسط طبقہ کے گھرانے نے جب بدنصیب عورت کی داستان سنی تو خالص انسانی ہمدردی کے جذبے سے سرشار ہوکر سماج کے ظالم درندوں کو پکڑنے اور مظلوم ماں کی معصوم بیٹی کو بازیاب کرانے کا منصوبہ بنایا۔محمد بخش نے ساری کہانی بیان کی۔اس نے بتایا کہ اس کی بہادر بیٹی نے گرفتاری کا ذریعہ بننے کیلئے خود کو جب رضاکارانہ طور پر پیش کیا تو شفقت پدری آڑے آئی اور وہ آبدیدہ ہوگیا۔پھر بیٹی نے تسلی دی”ابا مجھ پر بھروسہ رکھو،میں اسے گریبان سے پکڑ لوں گی،آپ پستول گھر میں رکھ دیں،آپ جذباتی ہو کر خون کردیں گے اور ہم مصیبت میں پڑ جائیں گے”یہ کوئی آسان مرحلہ نہ تھا۔مجرم کچھ بھی کرسکتا تھا۔لیکن جونہی اس درندے نے نقاب ہٹانے کو کہا،بہادر بیٹی نے لپک کر اسے گریبان سے پکڑ لیا،اتنی دیر میں گھات میں کھڑے اے ایس آئی اور سفید کپڑوں میں ملبوس دیگر پولیس اہلکاروں نے اس درندے کو دبوچ لیا۔پھر جسطرح مظلوم عورت کی زخمی اور بیہوش بیٹی پانچ سالہ علیشا کو عقوبت خانے سے تلاش کیا گیا سب ایک ڈرامائی منظر لگتا ہے۔لیکن سندھ کے شہر کشمور میں پیش آنے والا یہ ایک حقیقی واقعہ ہے۔محمد بخش کی جرآت اور فرض شناسی کا جب چرچہ ہوا اور مایوسیوں کے مارے سماج کو امید اور یقین سے مزین ایک خبر سننے کو ملی تو ہر طرف سے دادو تحسین وصول ہو نا شروع ہوئی۔وزیر اعظم پاکستان نے اے ایس آئی محمد بخش سے فون پر بات کی،سندھ کے اس پولیس افسر کو قومی ہیرو قرار دیا۔محمد بخش نے بتایا،”میرے ایس ایچ او نے سب سے پہلے مجھے شاباش دی،ساتھیوں نے مجھے تھپکیاں دیں اورسندھ حکومت نے دس لاکھ روپے نقد انعام کا اعلان کیا اوربہادر بیٹی کے تعلیمی اخراجات اٹھانے کا اعلان کیا”لیکن آئی جی مشتاق مہر نے اپنے قابل فخر افسر پر کمال شفقت فرمائی۔سنٹرل پولیس آفس کراچی میں محمد بخش اور اس کی فیملی کا پرتپاک استقبال کیا۔اس عظیم باپ،بیٹی اور بیوی کو شاہی بگھی پر بٹھایا گیا،پھولوں کی پتیاں نچھاور کی گئیں، مہمان خصوصی محمد بخش کو مالائیں پہنائی گئیں۔پولیس بینڈ نے سلامی دی اور استقبالی چبوترے پر آئی جی نے اس چھوٹے سے او رغریب سے اے ایس ائی کو گلے لگایا۔ پولیس ڈیپارٹمنٹ کیطرف سے بیس لاکھ روپے کا اعلان کیا۔اور ستارہ شجاعت دینے کی سفارش کی جبکہ بیٹی کیلئے ستارہ امتیاز کی سفارش کی۔سندھ پولیس نے دوسری بار اعلی کردار کی مثال پیش کی۔پہلے اپنے آئی جی کیلئے اتحاد اور یکجہتی کا مظاہرہ کیا اور اب اپنے ایک اے ایس آئی کی حوصلہ افزائی کیلئے دل فرش راہ کردیا۔پولیس کے بارے میں منفی رویوں کو تبدیل کرنے کا بہترین موقع فراہم کیا ہے۔ہمیں نیکی کے کاموں میں تعاون کرنے کا حکم ملاہے۔اسی حکم کو بجا لاتے ہوئے اپنے دل سے،سندھ پولیس کو ایک اور سیلوٹ پیش کرتا ہوں۔

انسان کے چار وجود ہیںیعنی حیوانی ، عقلی، روحانی اور اخلاقی وجود۔ان کا تذکیہ ہی ہماری اصل کامیابی ہے۔ اخلاقی وجودسے ہی کاروباری اخلاقیات تشکیل پاتی ہیں۔قرآن پاک میں ایسی بیشمار آیات ہیں جن میںاخلاقی قدروں پر عمل نہ کرے والوں کو تنبیہ کی گئی ہے۔ایک جگہ ارشاد ہوتا ہے کہ تم ناپ تول کر لیتے وقت پورا لیتے ہو اور دیتے وقت کم تولتے ہو۔کیا تم روز آخرت پر یقین نہیں رکھتے۔اس عظیم دن پر کہ جس دن لوگ رب العلمین کے سامنے کھڑے ہوں گے ۔انشورنس میں بھی ہم ایک وعدہ بیچتے ہیں اور کلیم ہمارا پروڈکٹ ہوتا ہے اگر ہم اپنا کیا ہوا وعدہ پورا نہیں کرتے تو دراصل ہم بھی کم تولنے والوں میں شمار ہونگے۔دنیا کا کوئی کاروبار بھی ایمانداری کے بغیر نہیں چل سکتا۔جہاں ایمانداری نہیں ہوتی وہاں اعتماد نہیں ہوتا اور جہاں اعتماد نہیں ہوتا وہاں کاروباری لین دین نہیں ہوسکتا۔دھوکہ دہی سے وقتی فائدہ اٹھایا جا سکتا ہے لیکن تادیر نقصان مقدر بن جاتا ہے۔انشورنس سیکٹر کی ساری عمارت ہی اعتماد اور اعتبار کی اینٹوں سے جڑی ہے۔

آپ لمحہ بھر کیلئے سوچیے کہ کہ انشورنس کے بانی اداروں اور کمپنیوں کو اپنا اعتماد جمانے کیلئے کتنی مشکلات آئی ہونگی،کتنے خسارے برداشت کرنے پڑے ہونگے اور کتنی بار اپنی پراڈکٹس اور سروسز کو اپ ڈیٹ کرنا پڑا ہوگا۔میں یہاں کاروباری ایمانداری کی بات کررہا ہوں۔جھوٹ سے اجتناب۔جھوٹ کاروباری اعتماد کا سب سے بڑا قاتل ہے۔ڈائریکٹر سے لیکر کارکن تک اور مالک سے لیکر پروڈیوسر تک سب کوایک دوسرے کیساتھ سچ بولنا چاہیے۔آپس میں بھی سچ بولنا ٹیم میں باہمی اعتماد کو فروغ دیتا ہے۔آپ کلائنٹس سے کیا شرائط طے کر رہے ہیں،کیا پیشکش کی ہے،کلائنٹس کا حقیقی اسٹیٹس کیا ہے؟ڈیل کی جزیات کیا طے کی ہیں،یہ سچ سچ بتایا جانا ضروری ہے۔کم ازکم آپ اور کلائنٹس کے درمیان ہونے والی ڈیل کا متعلقہ باس کو علم ہونا چاہیے۔تاکہ کمپنی کو خسارے کا کم سے کم احتمال ہو۔اسی طرح مالک یا ڈائریکٹرز کو چاہیے کہ وہ ہر ڈیل کو اپنی ذاتی ڈیل سمجھیں اور کسی نقصان کی صورت میں سارا ملبہ کسی ایک آفیسر پر مت ڈالیں۔ ہمارے ہاں دو بڑے مسائل ہیں جن کے سبب اعتماد کی فضا کو دھچکا لگتا ہے اور کاروبار پھلتا پھولتا نہیں۔ایک معاملہ یہ کہ جونہی کوئی ڈیل فائنل ہونے کے قریب ہوتی ہے،کوئی دوسرا ایجنٹ کم ریٹس پر اس ڈیل کو اچک لیتا ہے۔بعض اوقات توافسران خود ایسی حوصلہ شکن کارروائیوں میں شریک ہوجاتے ہیں۔ایسے ماحول میں ایک طرف محنتی کارکنوں کے دل ٹوٹ جاتے ہیں اور وہ بھی منفی سوچ پر چل پڑتے ہیںتو دوسری طرف ریٹ کم کر دینے سے ادراے کا پریمئیم کم ہو جاتا اور انڈسٹری بدنام ہو تی ہیں اور بزنس ٹارگٹس ادھورے رہ جاتے ہیں۔بلکہ کمپنی کا خسارہ بھی بڑھ جاتا ہے۔دوسرا بڑا مسئلہ کلیم کلیرنس اور پیمنٹ کا ہے۔ہمیں ذہن میں رکھنا چاہیے کہ انشورنس بزنس کوئی کیش اینڈ کیری سٹور نہیں بلکہ ہائی رسک بیسڈ اور ہائیلی ان پریڈکٹ ایبل کاروبار ہے۔ہم رسک ریڈکشن کی تمام پیش بندیوں کے بعد بھی یقین سے نہیں کہہ سکتے کہ اب اس ڈیل کے نتیجے میں کوئی کلیم نہیں آئے گا۔کلیم تو دینا ہی ہوتا ہے لیکن بعض انشورنس کمپنیاں پالیسی کے طور پر کلائنٹس کو تنگ کرتی ہیں۔افسران کی کوشش ہوتی ہے کہ کلیم کو اتنا لٹکا کہ کلائنٹس مایوس ہوکر اپنی رقم کو بھول جائیںبعض سرویرز بھی اس میں اپنا کردار ادا کرتے ہے۔ملکی قوانین کے باوجود ایسے اعتماد شکن اقدامات متواتر ہو تے ہیں جس کے سبب پاکستان میں انشورنس کے بزنس کے بارے میں عمومی رائے یہ ہے کہ یہاں سب فراڈ ہوتا ہے جو کہ سچ نہیں۔اس پرسیپشن کی بنیاد پر ہی یہ سیکٹر پھل پھول نہیں سکا۔ورنہ پاکستان جیسے ترقی پزیر ملک میں انشورنس بزنس پھیلنے کا وسیع پوٹینشل موجود ہے۔ انشورنس سیکٹر پاکستان کا حصہ نہ ہونے کے برابر ہے۔جہاں بنکوں کا دبا آتا ہے یا کوئی قانونی ضرورت ہوتی ہے وہاں تو لوگ انشورنس کرواتے ہیں ورنہ ان کے گھر تباہ ہوجاتے ہیں ،گاڑیاں تباہ ہو جاتی ہیں لیکن وہ انشورنس کیطرف نہیں آتے۔اس کی وجہ آگہی میں کمی ہے۔ہم ایف پی سی سی آئی کی سٹنڈنگ کمیٹی کے پلیٹ فارم سے ایک پبلک اوئیر نیس کمپین بھی چلانا چاہتے ہیں۔ہمارہ ماننا ہے کہ رسک کور سب کیلئے اور بیمہ ایمانداری کے ساتھ۔”میرے ان ابتدائی کلمات کے بعد سیمینار کے باقی مقررین نے بھی اپنے اپنے انداز میں فئرنس پریکٹسز پر روشنی ڈالی۔خاص طور پر شکریہ کے مستحق جناب ڈاکٹر محمد خاور جمیل جو فیڈرل انشورنس محتسب کے اہم ترین منصب پر فائز ہیں۔ڈاکٹر صاحب فیڈرل سیکرٹری رہے،انہوں نے 36 برس تک وفاقی اور صوبائی سطح پر خدمات سر انجام دیں ہیں۔میں ان کا بے حد شکر گزار ہوں۔ ہمارے چیف گیسٹ تھے اور اہم ترین مقرر بھی۔جناب شازیب علی ہمارے مہمان اعزازتھے۔وہ ایس ای سی پی کے کمشنر ہیں اور انہوں نے مذکورہ موضوع پر انتہائی قیمتی آرآء سے نوازا۔جناب شبیر اے گلامالی آئی اے پی کے چئیرمن بھی ہمارے مہمان خاص تھے۔جناب مبشر نعیم صدیقی فیڈرل محتسب انشورنس سیکریٹریٹ کے ڈائریکٹر جنرل ہیں،خاص طور پر حصہ لے رہے تھے۔میاں زاہد حسین معروف شخصیت ہیں۔ سابق صوبائی وزیر ہیں اور وائس چیئرمین ہیں بزنس پینل ایف پی سی سی آئی کے۔ہمارے سرپرست ہیں۔UTSکے مخدوم تاشیریوسف۔الفلاح انشورنس کے CEOجناب عبدالحی مغل اور IAPکے ریجنل ہیڈ محمد ہشام بھی موجودہیں ۔ہمارے سیمینار کے موڈریٹر جناب طارق حسین ایس ای سی پی کے سابق ڈائریکٹر ہیں۔ان کا وسیع تجربہ ہے۔سیمینار کے اختتام پر میں نے سب احباب کا شکریہ ادا کیا اور بتایا کہ اس سیمینار میں سامنے آنے والی تجاویز کو میڈیا کے ذریعے خبر کی صورت میں شائع کیا جائے گا۔لیکن اس کے ساتھ ساتھ اہم نکات بر مبنی رپورٹ کو متعلقہ لوگوں اور اداروں تک بھی پہنچائیں گے تاکہ انشورنس سیکٹر کی بہتری میں اپنا باقاعدہ حصہ ڈال سکیں۔

صوبہ سندھ کے محکمہ داخلہ کیطرف سے مسلم لیگ ن کے سربراہ میاں نواز شریف کے داماد اور مریم نواز کے شوہر کیپٹن (ر) صفدر کے خلاف مقدمے اور پولیس کی اعلی قیادت سے بدسلوکی اور توہین کی تحقیقات کے لیے قائم وزارتی کمیٹی نے اپنی تحقیقات شروع کر رکھی ہیں۔اس صوبائی وزارتی کمیٹی کے کنوینر صوبائی وزیر سعید غنی جبکہ ارکان میں ناصر حسین شاہ، سید سردار علی شاہ،اویس قادر شاہ اور معاون خصوصی مرتضی وہاب شامل ہیں۔کمیٹی 18 اور 19 اکتوبر کو کیپٹن(ر)صفدر کے خلاف مقدمہ درج کرنے کے لیے پولیس پر ڈالے گئے مبینہ دبائواور ہوٹل میں چھاپہ مار کر مسلم لیگ ن کی نائب صدر مریم نواز اور کیپٹن صفدر کی پرائیوسی اور وقار کو مجروح کرنے کے الزامات کی تحقیقات کررہی ہے۔قارئین کو یاد ہو گا کہ قانون نافذ کرنے والے اداروں نے کیپٹن (ر) صفدر کو 19 اکتوبر کی صبح کراچی کے ایک مقامی ہوٹل سے گرفتار کیا تھا۔ ان کے خلاف بانی پاکستان محمد علی جناح کے مزار پر نعرے بازی کرنے اور دھمکیاں دینے کے الزام میں مقدمہ درج کیا گیا۔

اور پیر کو ہی کراچی کی ایک مقامی عدالت نے انھیں ضمانت پر رہا کرنے کا حکم دیا تھا۔ چیئرمین بلاول بھٹو نے آرمی چیف جنرل قمر جاوید باجوہ اور ڈی جی آئی ایس آئی سے بھی اس واقعہ کی تحقیقات کا مطالبہ کیا تھا۔ جس کے بعد آرمی چیف کی جانب سے کراچی کے کور کمانڈر کو تحقیقات کر کے فوری رپورٹ دینے کی ہدایت کی تھی۔آئی جی سندھ مشتاق مہر پر دبا ڈالنے کیخلاف آئی جی سمیت سندھ پولیس کے 36 افسران و اہلکاروں کی جانب سے احتجاجا چھٹی پر جانے کی درخواستیں جمع کروائی گئیں جن میں سے 20 افسران کا تعلق کراچی جبکہ 16 کا صوبے کے دیگر شہروں سے تھا۔آرمی چیف کی بلاول بھٹو کو تحقیقات کی یقین دہانی کے بعدا گرچہ چھٹی کی درخواستیں کچھ عرصہ کیلئے رکی ہوئی ہیں لیکن سندھ پولیس کے اس شدید ترین احتجاج نے جہاں پولیس کے وقار میں اضافہ کیا ہے وہیں پورے پاکستان کے لوگوں کو احساس دلایا ہے کہ سندھ کی پولیس غیرت مند ہے۔ احتجاج سے یہ بھی باور کرایا کہ پولیس فورس اپنی عزت نفس پر آنچ نہیں آنے دے گی اور اپنے فرائض میں کسی قسم کی مداخلت برداشت نہیں کرے گی۔آئی جی سندھ مشتاق مہر اور سندھ پولیس کی اس جرآت کو جناب بلاول بھٹو،جناب نواز شریف،محترمہ مریم نواز صاحبہ اور محترم مولانا فضل الرحمان نے جائز اور جراتمندانہ قدم قرار دیا۔میاں نواز شریف نے تو سندھ پولیس کو سیلوٹ بھی پیش کیا۔تحقیقات کا جو بھی نتیجہ ہوگا وہ کسی نہ کسی فریق کیلئے متنازعہ ہی ہوگا۔ لیکن ایک بات تاریخی طور پر غیر متنازعہ ہی رہیگی کہ آئی جی سندھ نے اپنے افسروں اور جوانوں کے مورال کو بروقت سنبھالا اور ہزار خطرات مول لیکر دبا ڈالنے والوں کو واضع اور دو ٹوک پیغام دیا۔پولیس فورس کا مورال بلند رکھنا کسی بھی کمانڈر کی اولین ترجیح ہوتی ہے۔اگر مورال گر جائے تو پھر پولیس مجرموں کی سرکوبی نہیں کرسکتی۔جناب مشتاق مہر اس بات کو جانتے ہیں۔صوبہ سندھ امن و امان کے حوالے سے مشکل ترین صوبہ ہے۔اس صوبہ کی پولیس نے دہشت گردوں پر قابو پانے کیلئے کسی بھی دوسرے صوبے سے زیادہ قربانیاں دی ہیں۔جناب مشتاق مہر جہاں ایک پروفیشنل آئی جی ہیں وہیں اہنی فورس کا خیال رکھنے میں بھی خاص شہرت رکھتے ہیں۔یہی وجہ ہے جب دیگر افسران تک اپنے آئی جی کی توہین کی بات پہنچی تو تقریبا تمام آفیسر نے ہی رخصت پر جانے کا فیصلہ کیا۔پولیس کے اندر ایسی مثالیں خال خال ہی ملتی ہیں۔جناب مشتاق مہر سے میری ملاقات کراچی میں ہوئی تھی۔ نامور خاتون صحافی محترمہ حمیرا موٹالہ اور ان کی ٹیم کے اعزاز میں،میں نے ایک عشائیہ کا اہتمام کیا تھا جس میں مشتاق مہر چیف گیسٹ تھے۔اس وقت وہ ایڈیشنل آئی جی تھے۔ ان کی گفتگو سن کر اور ان سے باتیں کر کے معلوم ہوا کہ وہ دھیمے مزاج کے اصول پسند آدمی ہیں۔ہمارے سیاسی رہنما عموما پولیس افسران کو اپنا ملازم سمجھتے ہیں۔لیکن بلاول بھٹو آئی جی سندھ اور دیگر پولیس افسران کی بڑی عزت کرتے ہیں۔انہوں نے آئی جی صاحب کوحکم دینے یا ناراض ہونے کی بجائے بلاول ہاس چا ئے پر بلایا،ان کی بات سنی،پولیس فورس کی ذہنی کیفیت سے آگاہی حاصل کی اور درخواست کی کہ پولیس فورس تحقیقات تک اپنی چھٹیوں کی درخواستیں واپس لے لے۔آئی جی نے افسران کو اعتماد میں لیکر فرائض کی ادائیگی پھر سے شروع کر رکھی ہے۔اب یہ سندھ حکومت اور آرمی چیف پر منحصر ہے کہ وہ ان غیرت مند اور فرض شناس پولیس افسران کی دلجوئی کا کیا راستہ نکالتے ہیں۔لیکن سچی بات یہ ہے کہ مشتاق مہر کو سیلوٹ کرنے پر میرا بھی جی چاہتا ہے!

کالم شروع کرنے سے پہلے چند احادیث پیش خدمت ہیں۔حضرت ابوسعید خدری رضی اللہ تعالی عنہ سے مروی ہے کہ رسول اللہ صلی اللہ علیہ وسلم نے فرمایا: جس شخص کی تین بیٹیاں ہوں یا تین بہنیں ہوں اور وہ ان کے ساتھ احسان اور سلوک کا معاملہ کرے، ان کے ساتھ اچھا برتاو کرے، تو اس کی بدولت وہ جنت میں داخل ہوگا (ترمذی) حضرت ابوہریرہ رضی اللہ تعالی عنہ سے روایت ہے کہ حضور اقدس صلی اللہ علیہ وسلم نے فرمایا: جس شخص کی تین بیٹیاں یا تین بہنیں ہوں اور اس کو ان بیٹیوں یا بہنوں کی پرورش کا سابقہ پیش آئے اور وہ اللہ تعالی کی رضا کے لئے ان کی پرورش کرے اور ان کو تہذیب و ادب سکھائے اور ان کے کھلانے پلانے اور دیگر ضروریات کے انتظام کی تکلیف پر صبر کرے تو اللہ تعالی اس کے اس عمل کی وجہ سے اس کو جنت میں داخل کرے گا۔کسی نے سوال کیا: اگر دو بیٹیاں ہوں تو؟۔ آپۖ نے فرمایا: دو بیٹیوں کا بھی یہی حکم ہے۔

پھر کسی نے سوال کیا: اگر کسی کی ایک بیٹی ہو تو کیا وہ اس ثواب عظیم سے محروم رہے گا؟۔ آپۖ نے فرمایا: جو شخص ایک بیٹی کی اس طرح پرورش کرے گا، اس کے لئے بھی جنت ہے۔ (اتحاف الساد المتقین) میں نے اپنی دوسری بیٹی بھی رخصت کردی۔میں نے اس بیٹی کی بھی شفقت پدری کے جذبے کے تحت اور اسلامی احکامات کی روح کے مطابق بہترین پرورش کی ہے۔اپنی حیثیت کے مطابق لائف اسٹائل فراہم کیا۔بیٹی کو سوفٹ وئیر انجینئرنگ کے بعد ڈیٹا سائنس میں ایم فل کروایا اور اضافی طور پر ہومیو پیتھی کا ڈاکٹر بھی بنایا۔بیٹی کی رضامندی سے اس کا رشتہ طے کیا۔جائیداد سے اس کا شرعی حق مختص کیا اور اپنے وسائل کے مطابق اس کی رخصتی کی تقریب کا اہتمام کیا۔یوں اپنی پیاری بیٹی فاطمہ صدف کو بھی رخصت کردیا۔تقریب سادہ رکھی لیکن اپنے مہمانوں کی خاطر داری میں کسر نہیں رہنے دی۔یہ بھی اللہ کی توفیق سے ممکن ہوا۔میں گزشتہ 25برس سے راولپنڈی/اسلام آباد کے سماجی کاروباری وسیاسی حلقوں میں اٹھنا بیٹھتا ہوں اور ہر شعبے سے تعلق رکھنے والے احباب سے ایک قربت پیدا ہوگئی ہے۔ان احباب نے بڑی مہربانی کی اور کورونا کے ڈر کے باوجود بڑی تعداد میں تشریف لائے۔ہر کسی نے بیٹی کیلئے دعا دی اور مجھے عزت بخشی۔ جو نہ آسکے انہوں نے فون پر معذرت کی۔ہماری مغل برادری کے سرپنچ پنجاب سر مایہ کاری بورڈ کے چیئرمین اور سنٹورس کے چیف ایگزیکٹو محترم سردار تنویر الیاس خان اور مغل برادری کی ملک بھر سے نامور شخصیات جلوہ افروز تھیں۔جہلم سے خاص طور پر جناب میاں نعیم بشیر حاجی عمران اسلم مغل اور جناب ندیم ساجد مغل اپنے دوستوں کے ہمراہ شریک ہوئے۔فیصل آباد سے مہمان آئے۔بدین سے ڈاکٹر ذوالفقار مرزا صاحب کے خصوصی نمائندے جناب منیر مرزادوستوں کے ہمراہ خصوصی طور پر تشریف لائے۔کشمیر سے جنید مغل مانسہرہ سے جناب شفیق مغل بھی موجود تھے۔معروف کالم نگار جناب مظہر برلاس اور عبدلودود قریشی بھی وقت نکال کر آئے۔اکبر مغل،شفیق مغل،ناصر مغل، کامران مغل،سردار صدیق خان ،بیگ راج اور ارشد مغل سب تھے۔اپنا بینک کے چیئر مین جناب میاں شاہد نے اپنی انتہائی مصروف زندگی سے وقت نکالا۔وہ کافی دیر ہمارے ساتھ موجود رہے۔یو آئی سی کی پوری ٹیم اس اہم ترین تقریب کی رونقیں بڑھا رہی تھی۔لاھورسے مشتاق ورائچ اور ایڈیشنل سیکرٹری پیٹرولیم چوہدری ایوب میرے یونیورسٹی فیلوز کے ہمراہ تشریف لائیں ۔ڈاکٹر اعظم، ڈاکٹر نعیم مغل، ڈاکٹر جاوید قریشی، ڈاکٹر اعجاز نسیم، اے ایس پی چوہدری الفت اور پنڈی چیمبر کے سابق صدر عامر اقبال راجہ نے بھی شرکت کی۔ حاضر سروس بیوروکریٹ،ریٹائرڈ جرنیل صاحبان،صحافی دوست اور کارپوریٹ سیکٹر کے دوست بھی نمایاں تھے جنرل فیض علی چشتی، جنرل اسددرانی، جنرل آصف دریز، بریگیڈئر اسلم، بریگیڈئر تصدق، کرنل بختیار حکیم، سیشن جج ارشد محمود، ڈی جی این سی آر ڈی اسرار احمد، ڈاکٹر امتیاز گوندل ، سی ڈی اے کے ڈائریکٹر ریونیو میاں طارق لطیف اور ناصر مغل نے بھی مہربانی فرمائی۔جس جس کو دعوت ملی وہ ٹریفک جام کی مشکلات کے باوجود تشریف لائے لیکن ایک سستی مجھ سے ہوئی۔میں گزارش کرونگا کہ محترم والدین اس سستی سے بچیں۔ہم وقت بچانے کیلئے آجکل وٹس ایپ پر ہی دعوت نامے بھیج دیتے ہیں۔میرے خیال میں بیٹی کی رخصتی کی دعوت پورے اہتمام سے دی جانی چاہیے۔میرا احساس یہ ہے کہ چاہے سادہ سا کارڈ ہو،دعوت نامہ مہمان کے پاس ضرور پہنچنا چاہیے۔شہر کے رہنے والوں کو بھی بائی ہینڈ یا بذریعہ ڈاک دعوت نامہ دینا بیٹی کی رخصتی کو یادگار بنا دیتا ہے۔کامسیٹ یونیورسٹی کے سامنے پاکستان بینکوئٹ ہال میں تقریبا پانچ سو مہمانوں کی میزبانی کرکے اطمینان ہوا۔کھانا لذیز تھا،انتطامات خوبصورت تھے اور سروس تیز رفتار تھی۔پارکنگ وسیع اور انتظامیہ ہمدرد پائی۔الحمدللہ ! میری بیٹی کو سینکڑوں دوستوں نے اپنی دعاں میں رخصت کیا۔احادیث نبوی میں دی بشارت کا میں حقدار ہو گیا۔یہ میری اور میرے اہل خانہ کی خوش نصیبی ہے۔مجھے پختہ یقین ہے کہ بیٹیوں کی خدمت سے اللہ راضی ہوتا ہے۔ بیٹیوں کی پیدائش پر چہرہ سیاہ کرنے والو۔بیٹیاں اللہ کی رحمت ہوتی ہیں۔

خیر اور شر کا تصادم فطری اور دائمی ہے

ایسا کبھی ہوا نہیں کہ دنیا سے شر مکمل طورپر ختم ہوگیا ہو۔انسان کے اندر شر کی قوتیں خیر کی طاقتوں سے ہمیشہ نبردآزما رہتی ہیں ۔آپ اسے حضرت انسان کی فطرت کہہ سکتے ہیں ۔ان شرانگیز طاقتوں کو آپ نیگیٹیو فورسز کا عنوان دے سکتے ہیں ۔قرآن انہیں شیطانی طاقتوں کا نام دیتا ہے ۔ہر منفی سوچ ،ہر تخریبی تصور ہر انسان دشمن منصوبہ ،ہرابلیسی حربہ چاہے اس کا محل وقوع انسان کی اپنی ذات ہو ،اس کا ماحول ہو،ملک ہویاسرزمین ہو

،شیطان ہی کی کارستانی قرار پائے گی۔ہوس ،لالچ،ظلم ،استبداد ،بدعنوانی ، بدامنی،بد عہدی ،دھوکہ دہی ،نوسر بازی ،بزدلی ،منافقت،ہیجان انگیزی ،خیانت، جھوٹ ، فراڈ ،بے ادبی ،فریب کاری ،بعض وعناد،انا پرستی ،چوری ،ڈاکہ زنی ،قتل وغارت اور وحشت وبربریت یہ تمام وہ بیماریاں ہیں جنہیں شیطان نے ایجاد کیا ہے اور وہ کمال ہوشیاری کیساتھ انسانی دل ودماغ میں ان کی پیوندکاری کرتا ہے اور انسان کو شرکے راستے پر ڈال دیتا ہے ۔تشکک اور بے یقینی ،مایوسی اور غفلت جیسے ہتھیاروں سے مسلح ہوکر شیطان جب حملہ آور ہوتا ہے تو بڑے بڑے پختہ عزم انسان ریت کا ڈھیر ہوجاتے ہیں ۔شیطان کا تصور ہر مذہب اور عقیدے کے پیروکاروں میں اپنے اپنے ناموں اور حوالوں سے موجود ہے ۔قرآن نے اس تصور کو بڑے بلیغ پیرائے میں بیان فرمایا ہے ۔

”شیطان نے کہا میں بھی اب تیری سیدھی راہ پر (چلنے والے )انسانوں کی گھات میں لگارہوں گا۔آگے اور پیچھے دائیں اور بائیں ہر طرف سے انہیں گھیروں گا اور توان میں سے اکثر کو شکر گزار نہ پائے گا۔“(سورة اعراف)

حدیث نبوی ہے :۔

”شیطانی وسوسے تمہارے وجود میں خون کی طرح گردش کرتے ہیں “

فطرت نے انسان کو شیطان کے مقابلے میں تنہاءنہیں چھوڑا ۔یہ ہرگز نہیں کہ انسان شیطان کے مقابلے میں بے بس پیدا کیا گیا ہے ۔خالق نے انسان کو پیدا کرتے وقت پانچ چھ فٹ قد کے اس جسم کے اندر ہی وہ آلہ لگادیا ہے جو انسان کو قدم قدم پر آگاہ کرتا ہے کہ تم اب شیطانی قوت کے زیر اثر آرہے ہو۔جس طرح گاڑی اوورسپیڈ ہونے پر سرخ رنگ کی بتی اور آلارم بجنا شروع ہوجاتے ہیں اسی طرح انسان کے اندر ضمیر نام کا ایک آلارم بجنا شروع ہوجاتا ہے ۔غافل سے غافل انسان بھی یہ نہیں کہہ سکتا کہ اسے اچھائی اور برائی میں تمیز نہیں ہے ۔وہ جنگل میں رہتا ہو ۔یا بازاروں کے شورشرابے میں زندگی بسر کرتا ہو،حرف شناس ہویا ان پڑھ ۔رنگ ،نسل ،زبان اور عقیدے کی تفریق کے بغیر جوروح بھی لباس فطرت میں ڈھلی ہے اسے ضمیر کا آلہ لگاکر بھیجا گیا ہے ۔

ارشاد ہوتا ہے ۔

اور گواہ ہے وہ نفس انسانی (ضمیر) اور اسکی ذات جسے ہم نے ہموار کیا۔پھر اس کی بدی اور پرہیز گاری اس پر الہام کردی۔یقینا فلاح پاگیا جس نے نفس کا تزکیہ کیا اور نامراد ہوا وہ جس نے اسے دبادیا۔(سورة شمس)

قرآن نے احسن تقویم کا ٹائٹل ہی انسان کو اسی لئے عطا کیا ہے کہ وہ واحد جاندار ہے جو اچھائی اور برائی میں تمیز کرسکتا ہے ۔ جس طرح شیطان منفی ہتھکنڈوں سے مسلح ہے اسی طرح انسان اپنے ضمیر کی زبردست طاقت سے مز ّین ہے ۔یہی وجہ ہے کہ ابتدائے آفرینش سے لیکر آج تک شر اور خیر باہم نبردآزما رہتے ہیں ۔ایسا کبھی ،کسی دور میں نہیں ہوا کہ شر غالب آجائے اور خیر کی قوت مفتوح ہوجائے ۔ایسا ہوتا تو انسانیت کا قافلہ بیچ راہ کے فنا ہوچکا ہوتا ۔آج ساڑھے چھ ارب انسانوں کا وجود اس بات کا ثبوت ہے کہ خیر کی طاقتیں مفقودنہیں بلکہ موجود ہیں ۔

بقول اقبالؒ:۔

ستیزہ کار رہا ہے ازل سے تا امروز

چراغ مُصطفوی سے شرارِ بوالہبی

سوئے ہوئے ضمیر کو الہامی کتب ہی جگاسکتی ہیں

آپ اپنے گھر سے سکیورٹی آلارم کو ہٹا دیجئے یا اس کی تاریں کھینچ دیں تو پھر واردات کرنے والوں کو کوئی خطرہ نہیں رہتا ۔نہ آلارم بجے گا نہ آپ جاگیں گے ۔نہ اپنے مال واسباب کا تحفظ کرسکیں گے ۔نفسیاتی ماہرین کا کہنا ہے کہ انسان کو اگر مسلسل ایک ماہ تک کسی واقعہ پر ضمیر نہ جھنجھوڑے تو سمجھئے کہ انسان کا ضمیر سورہا ہے ۔یعنی الارم کا کنکشن کٹ گیا ہے ۔حقیقت یہ ہے کہ ضمیر کبھی نہیں سوتا ۔دراصل انسان اپنے کان بند کرلیتا ہے ۔طیش اور عیش انسانی دل ودماغ کی دوایسی حالتیں ہیں جن میں مبتلا ہوکر انسان اپنے جاگے ہوئے ضمیر کو بار بار سلانے کی پریکٹس کرتا ہے ۔شیطان کی جیت کا یہ عجب منظر ہوتا ہے ۔یہ وہ حالت ہوتی ہے کہ انسان خود اپنے آپ کو ماررہا ہوتا ہے ۔وہ اس قدر شقی القلب ہوجاتا ہے کہ اپنی زندگی کے سب سے بڑے محافظ یعنی ضمیر کو اپنے ہاتھوں سے بے بس کردیتا ہے ۔ایسی حالت سے نکلنے کیلئے ہی عقیدے اور ایمان کی ضرورت پڑتی ہے ۔خالق کائنات نے مردہ ضمیر انسانوں کو جگانے اور واپس فطرت کی طرف لوٹانے کیلئے اپنے پسندیدہ انسانوں یعنی پیغمبروں کے ذریعے زندگی کی گائیڈ بکس اتاری ہیں ۔!

ارشادرباّنی ہے :۔

”اے نبی ﷺ ہم نے تم کو شہادت دینے والا ،بشارت دینے والا اور خبردار کردینے والا بناکر بھیجا ہے تاکہ اے لوگو تم اللہ اور اس کے رسول پر ایمان لاﺅ،اس کے رسول کا ساتھ دو اس کی تعظیم وتوقیر کرو اور صبح شام اللہ کی تسبیح کرو۔“(سورة فتح)

مذہب ،دین اور ایمان یہ کوئی ایسی غیر ضروری یا نمائشی اشیاءنہیں ہیں جنہیں انسانی زندگی کو محض زیبا بنانے کیلئے اتارا گیا ہو ۔زندگی کی گاڑی کو کامیابی کی پٹڑی سے نہ اترنے دینا اور متعین وقت میں منزل تک پہنچا دینے کیلئے ضمیر کافی ہے لیکن چونکہ انسان اس آلارم کو جان بوجھ کر سلادیتا ہے اس لئے اسے واپس پٹڑی پر لانے کیلئے الہامی ہدایات کی ضرورت ہوتی ہے ۔جس طرح کار بنانے والے کو علم ہے کہ کار کا مینوئل کیا ہوگا ۔اسی طرح انسان کے خالق کو علم ہے کہ انسان کی کامیابی کیلئے کون کون سی حدود وقیود اور کس طرح کی احتیاطی تدابیر کی ضرورت ہوگی ۔خالق کائنات نے بڑی محنت ،انتہائی محبت اور بے پناہ چاہت کیساتھ وحی کے ذریعے ہر امت ہر گروہ کیلئے ہدایات نازل فرمادی ہیں ۔

ارشاد رباّنی ہے ۔

”یہ بڑی بابرکت کتاب ہے جو تمہاری طرف نازل کی گئی ہے تاکہ یہ لوگ اس کی آیات پر غور کریں اور عقل وفکر رکھنے والے اس سے سبق حاصل کریں۔“(سورة ص)

انسانیت کا اہم مسئلہ

انسانیت کے سارے مسائل کی جڑ الہامی تعلیمات سے دوری ہے ۔الہامی تعلیمات سے گریز نے ہی آج کے انسان کو شیطانی قوتوں کے آگے بے بس بناکر رکھ دیا ہے ۔ سائنس اور سائنسی طرز فکر کا سب سے بڑا نقصان یہ ہے کہ اس نے انسانی ذہنوں کو شک میں مبتلا کردیا ہے ۔جب تک کسی معاملے میں انسان خود تجربات کرکے کسی نتیجے تک نہ پہنے وہ معاملے کی صداقت اور حقانیت کو تسلیم کرنے پر آمادہ ہی نہیں ہوتا ۔انسانی ذہنوں نے وحی اور الہام کو بھی سائنس کی کسوٹی پر پرکھنے کی کوشش کی ہے انسانی ذہن محسوسات تک محدود بنایا گیا ہے ۔اس لئے وہ اللہ ،رسولﷺ اور کتاب اللہ ،جیسے الہامی حقائق کو مشکوک نگاہوں سے دیکھتا ہے ۔جب کہ الہامی ہدایات کا تقاضا یہی ہے کہ ان کی حقانیت میںرتی برابر شک نہ کیا جائے ۔خواہشات اور تعصبات میں پڑے بغیر اس کے ذریعے تعقل ،تفکر اور تذکر کیا جائے ۔اس برترکلام ہی نہیں اپنی زندگیوں میں حکم کا درجہ دیا جائے ۔اس سے ہدایت پاکر اس پر عمل کرنے کا ارادہ اور اس کے تقاضے جب سمجھ میں آجائیں تو چند لمحات ضائع کیے بغیر اس کے سامنے سرنگوں کردیا جائے۔

گو کہ اب مابعد طبیعات کے علم پر بھی بہت کام ہورہا ہے اور امید رکھنی چاہیے کہ انسانیت اپنی اجتماعی فطرتی بصیرت کے ذریعے اپنے خالق حقیقی کو جلد پہچان لے گی اور الہامی کتابوں اور ان کے ذریعے پہنچنے والی کائناتی سچائیوں پر بحیثیت مجموعی ایمان لے آئے گی لیکن قافلہ انسانی ہنوز شبہات کے اندھیروں میں غلطاں وپیچاںہے ۔بظاہر انسان نے ستاروں پر کمندیں ڈال لی ہیں ،سورچ کی روشنی کو گرفتار کرلیا ہے ،کائنات کے ظواہر کو ایک ”مٹھی “میں سمو دیا ہے ،کمپیوٹر سے آگے نینو ٹیکنالوجی کی طرف بڑھ رہا ہے ۔لیکن اس سب علم ودانش ،تحقیق اور تخلیق کے باوجود لائف مینوئل (الہامی ہدایات)کی سچائی پر ڈگمگاتا ایمان اسے تسخیر کائنات کیلئے یکسوئی مہیا نہیں کررہا ہے ۔اور احسن تقوم کا جو اعزاز فاطر ارض وسما نے عطاءفرمایا ہے انسان ابھی اس اعزاز سے پوری طرح لطف اندوز نہیں ہوپارہا ۔قافلہ انسانیت کا سب سے بڑا مسئلہ یہ ہے کہ شک وشہبات نے اجتماعی ضمیر مردہ کردیا ہے اور الہامی تعلیمات سے دوری کی وجہ سے اس کے ضمیر کو جگانے والے تمام ذرائع بے اثر ہورہے ہیں ۔آج کی ہر ترقی ایک نئی الجھن کی نشاندہی کرتی ہے ۔ہر ایجاد کسی نئی تباہی کا پیش خیمہ بن رہی ہے ۔!محبان انسانیت کو آگے بڑھ کر رہنمائی کرنی چاہیے اور الہامی قوائد وضوابط کی تشہیر کرکے تیز رفتار گاڑی کو نیکی اور راست روی کی پٹڑی سے سرکنے نہیں دینا چاہیے ۔ورنہ طیش اور عیش ،یاسیت اور جہالت کی شیطانی قوتیں اس خوبصورت زمین کو جہنم بنادیں گی۔!

(بقول علامہ اقبال)

ڈھونڈنے والا ستاروں کی گزرگاہوں کا

اپنے افکار کی دنیا میں سفر کرنہ سکا

جس نے سورج کی شعاعوں کو گرفتار کیا

زندگی کی شب تاریک سحر کرنہ سکا

پاکستان میں خیر کی قوتیں مغلوب کیوں؟

کسی بھی معاشرے اور تہذیب میں جب تک خیر کی قوتیں غالب رہتی ہیں معاشرے تباہ نہیں ہوتے ۔بداطمینانی نہیں پھیلتی اور انتشار گلی کوچوں میں ننگا نہیں ناچتا ۔ملک ،سلطنت اقتدار اور اختیار یہ وہ انعامات ہیں جو فطرت خوش ہوکر کسی قوم ،گروہ یا فرد کیلئے ممکن بنادیتی ہے ۔لیکن جہاں یہ انعامات ہیں وہیں آزمائش بھی ہوتی ہے ۔پاکستان ،ایک نیا ملک ،ایک انعام تھا لیکن ہم نے اپنے زندہ ضمیروں کو ہوس اور لالچ کے ہتھوڑے مارمارکر ادھموا کردیا اور آج یہی انعام ہمارے لئے بہت بڑی آزمائش بن چکا ہے ۔جب گھر کے باسیوں کو اپنے گھر کے درودیوار سے خوف آنے لگے تو اس سے بڑی آزمائش کیا ہوگی ۔دانشور اور غم خوار حلقے ہمیں کسی بڑے قومی حادثے سے بچانے کیلئے نت نئے فارمولے اور حل پیش کرتے ہیں ۔کوئی گڈ گورنس کی بات کرتا ہے ۔کسی کو صدارتی طرز حکومت میں مسائل حل ہوتے دکھائی دیتے ہیں ،کئی مغربی جمہوریت ہی کو کامل حل ثابت کرتے ہیں ۔کسی کا خیال ہے کہ سخت ترین قانون ہمیں شیطانی بیماریوں سے نجات دلاسکتا ہے ۔کسی کو تمام مسائل کی جڑ فوجی اقتدار دکھائی دے رہا ہے ۔کوئی اسلامی انقلاب کا جھنڈا لہرانے میں نجات کی امید لگائے بیٹھا ہے ۔غرض جتنے ذہن ہیں اتنے ہی فارمولے گردش کررہے ہیں ۔پاکستان اس وقت عملی طورپر تیسری دنیا کا چوتھے نمبر کا ملک ہے جس میں ہر تخریبی قوت ،ہر منفی جذبہ اور ہر شیطانی حربہ پوری طاقت اور قوت کیساتھ پھل پھول رہا ہے ۔شرکے مقابلے میں خیر دبکا بیٹھا ،منتظر فردا ہے ۔!

وہ کونسا جذبہ ہے جو ہمیں جھوٹ بولنے سے روکے گا ۔جو ہمیں ذخیرہ اندوزی سے بازرکھ سکتا ہے ۔ہم کیوں ہوس پرستی چھوڑیں ۔کس کی خاطر بدعنوانی دھوکہ دہی ،بُغض وعناد سے باز رہیں ؟منافقت ترک کریں ؟ایک دوسرے کو روند ڈالنے کی روش ترک کرنے سے کیا حاصل ہوگا ؟۔ضمیر کو جگاڈالنے کا فائدہ کیا ہے ؟نت نئی فریب کاریاں کس کی خاطر چھوڑ دی جائیں ؟۔یہی وہ سوالات ہیں جو ہمیں بحیثیت قوم تذبذب میں مبتلا رکھتے ہیں اور ہم اپنی اس جنت نظیر سرزمین کو شیطانی جذبوں کے سبب جہنم زار بنارہے ہیں ۔کوئی قانون ۔کوئی ضابطہ ،کوئی اتھارٹی ،کوئی خوف اور کوئی شوق ہمیں اس وقت تک راہ راست پر نہیں لاسکتا جب تک ہم بحیثیت قوم اللہ تعالیٰ کی طرف سے زندگی کے آغاز اور انجام کے بارے میں ارشاد فرمائے گئے احکامات پر کامل یقین پیدا نہیں کرتے ۔

ارشاد ہوتا ہے ۔

”اہل کتاب اورمشرکین میں سے جن لوگوں نے کفر کیا وہ یقینا جہنم کی آگ میں جائیں گے اور ہمیشہ وہاں رہیں گے ۔یہ لوگ بدترین خلائق ہیں ۔اور یقینا جو لوگ ایمان لائے اور نیک عمل کیے وہ بہترین خلائق ہیں ۔ان کی جزاءان کے رب کے ہاں دائمی قیام کی جنتیں ہیں جہاں وہ ہمیشہ ہمیش رہیں گے ۔اللہ ان سے راضی اور وہ اپنے رب سے راضی ہوئے ۔یہ سب اس کیلئے ہے جس نے اپنے رب کا خوف کیا ہو۔(البینہ )

جب مجھے یقین ہوگا کہ مجھے دنیا میں کئے گئے ہر عمل کا روز محشر حساب دینا ہے تو میں کسی سماجی قانون ،کسی داروغے کے نہ ہوتے ہوئے بھی خیر پر کار بند رہوں گا ۔جب مجھے یقین ہوگا کہ شیطانی قوتوں کے تابع کئے گئے افعال مجھے دہکتی آگ میں جلائیں گے تو مجھے میرے اندر کا انسان برائیوں سے روکے گا ۔جب مجھے یقین ہوگا کہ رزق حلال کمانے سے مجھے جنت ملے گی جس میں میرے وہم وگمان سے بھی کہیں زیادہ نعمتیں مختص ہوں گی تو پھر میں چند اضافی ٹکوں کے عوض کسی کا حق نہیں ماروں گا ۔زندگی بعد از موت ،جنت کا شوق اور دوزخ کا خوف ،اللہ کی دوستی میں پختہ یقین اور اعمال نامے کی خوبصورتی ،یہی وہ ایمان ہے یہی قرآنی تعلیمات ہیں جو ہر مذہب ،ہر عقیدے میں تھوڑی بہت تبدیلیوں کے ساتھ ایک جیسے ہیں ۔اگر آج کا پاکستانی اپنے اپنے عقیدے کے مطابق الہامی تعلیمات پر کاربند ہوجائے تو شر کے ہاتھوں مغلوب یہی سولہ کروڑ انسان خیر کی بہت بڑی قوت بن جائیں گے ۔جب تک اکائی سیدھی نہیں ہوتی ،اجتماعیت ٹیڑھی ہی رہے گی ۔اصلاح احوال کا واحد حل صالحیت میں ہے اور انسانی دل ودماغ زیادہ دیر تک صالح اعمال سے دور نہیں رہ سکتے ۔اس لئے میرا ایمان ہے کہ پاکستان کے تمام مسائل کا حل اب بھی ممکن ہے ۔شرط یہ ہے کہ ہرپاکستانی قرآن کی فطرتی تعلیمات سے جڑ جائے ۔اگر کوئی عیسائی ہے تو وہ حضرت عیسیؑ کی آفاتی ہدایات پر عمل کرکے کسی مذہب اور عقیدے نے جھوٹ کو نیکی قرار نہیں دیا ،ظلم کو جواز نہیں بخشا ،خیانت کو صلاحیت نہیں کہا ۔انسان دشمنی کو بہادری قرار نہیں دیا ۔کرپشن کو عزت کا موجب نہیں ٹھہرایا ۔

ہمیں اپنے حیوانی ،عقلی، روحانی اوراخلاقی وجود کا تذکیہ قرآن مجید کی تعلیمات کے ذریعے کرنا ہوگا ۔یہی کردار سازی کا بہترین ذریعہ ہے ۔کیونکہ کردار سازی اس وقت تک ہو ہی نہیں سکتی جب تک انسان کے اندر ایمان کا بیج نہ ہو۔ ضمیر اور الہامی تعلیمات کی خوراک دے کر ایمان کا پودا ہرا بھرا کیا جاسکتا ہے ۔یہی انسانی عروج کی اساس ہے۔

مکالے کے آخر میں پاکستانی بہن بھائیوں کو قرآن یعنی انسانی ہدایت کے مرکز سے جڑے رہنے کی ترغیب دلارہا ہوں ۔بقول شاعر:۔

اپنے مرکز سے اگر دور نکل جاﺅ گے

خواب ہو جاﺅ گے افسانوں میں ڈھل جاﺅ گے

اپنی مٹی پہ ہی چلنے کا سلیقہ سیکھو

سنگ مر مر پہ چلو گے تو پھسل جاﺅ گے

دے رہے ہیں جو لوگ تمہیں رفاقت کا فریب

ان کی تاریخ پڑھوگے تو دہل جاﺅ گے

مغرب اور مشرق میں سب سے بڑا فرق یہ ہے کہ مغرب اپنے فیملی سسٹم کو تباہ کرچکا ہے اور مشرق اس نظام سے ابھی تک جڑا ہوا ہے۔اگرچہ ہمارے ہاں بھی یہ بحث چھیڑ دی گئی ہے کہ خاندانی نظام کا آخر فائدہ کیا ہے؟میرے نزدیک اس نظام کا سب سے بڑا فائدہ حال ہی میں کرونا وباء کے دوران سامنے آیا ہے۔کتنے ہی ایسے مریض تھے جنہیں ان کے بہن بھائیوں اور عزیز واقارب نے سنبھالا۔حالانکہ شروع شروع میں حکومت کیطرف سے بہت سختی کی گئی تھی۔کورونا کے مریض کو اچھوت سمجھ کر سرکاری ہسپتال میں بے یارو مدد گار چھوڑ دیا جاتا تھا۔لیکن یہ بہن بھائی اور ماں باپ ہی تھے جو بارش اور دھوپ میں وارڈ کے باہر کھڑے رہتے تھے اور ڈاکٹروں سے التجائیں کرتے تھے کہ ایک بار ان کو اپنے مریض کو دیکھ لینے دیں۔جب ادوایات کی فراہمی عام ہوگئی تو گھر والوں نے اپنے مریض کو گھر میں ہی آئسولیٹ کیا اور انہوں نے مریض کو نفسیاتی طور پر بے سہارا نہیں ہونے دیا۔

آزمائش کے دوران ہمدردی کے دو بول ہی بہت بڑا نفسیاتی سہارا بن جاتے ہیں۔پاکستان میں تو بہن بھائی ہر طرح کا خطرہ مول لیکر اپنے پیاروں کا سہارا بن جاتے ہیں۔مجھے ذاتی طور پر اس کا تجربہ ہوا ہے۔میں بھی کورونا کا شکار ہوا اور گھر میں صاحب فراش ہوگیا۔لیکن میرے بیوی بچوں نے مجھ سے دوری اختیار نہیں کی۔میری چھوٹی بیٹی منسا رباب تو میرے ساتھ اٹھکیلیاں کرتی اور چلبلی باتیں کرکے ہنساتی رہتی تھی۔اس کا اثر بیماری کیخلاف میری قوت مدافعت پر پڑا۔میں نفسیاتی طور پر مظبوط ہو گیا۔دوائیوں نے اثر کرنا شروع کردیا اور میں صحت مند ہوگیا۔یقین جانیں اگر گھر والے مجھے ایک کمرے میں پھینک کر دور ہٹ جاتے اور کھانا بھی کھڑکی سے پھینکتے تو میں مرض کیخلاف شائد ہی لڑ پاتا۔مغرب کی حالت آپ کے سامنے ہے۔امریکہ اور اٹلی کی ایسی ایسی ویڈیوز سامنے آچکی ہیں جن سے پتا چلتا ہے کہ کورونا کا شکار مریض کس قدر تنہائی کے ہاتھوں لاچار ہوئے ہیں۔مغربی دنیا میں آزمائش نے سماج کے کھوکھلے پن کو بری طرح ظاہر کیا ہے۔بہترین ہسپتال ہیں۔مسکراتی ہوئی نرسیں ہیں۔ادویات اور آلات ہیں۔لیکن اپنا کوئی نہیں۔ہمدردی کے دو بول میسر نہیں۔دور ایکدوسرے سے بہت دور۔اپنی اپنی زندگی۔زندگی میں اپنی اپنی مرضی۔آزادی اور بے سمت آزادی۔خاندانی نظام کی جگہ ریاست نے لی لیکن ریاست تو ایک مشین کے طور پر کام کرتی ہے وہ ماں باپ کا نعم البدل کیسے ہوسکتی ہے۔امدادی ادارے بہن بھائی کی اپنائیت کہاں سے لائیں۔آپ یہ سن کر حیران ہونگے کہ آسٹریلیا میں لوگوں کو تنہائی کے سبب پیدا ہونے والی نفسیاتی پریشانیوں سے چھٹکارا دلانے کیلئے کورونا امداد کے علاوہ کروڑوں ڈالر مختص کرنا پڑے ہیں۔یادرہے کہ آسٹریلیا جو انتہائی خوشحال اور پرامن ملک سمجھا جاتا ہے وہاں ڈیپریشن سے ہر سال ساڑھے تین ہزار نوجوان خود کشیاں کرتے ہیں۔ایک اندازے کیمطابق اس سال خودکشیوں کی تعداد دگنی ہوجائے گی۔کیونکہ نوجوان لڑکوں اور لڑکیوں کا کوئی دکھ بانٹنے والا نہیں۔کوئی بغیر لالچ کے قریب آنے پر تیار نہیں۔
خاندانی نظام کی بنیاد ایک جگہ رہنا نہیں بلکہ رشتوں کا احساس ہے۔ایکدوسرے کا سہارا بننے کا عہد ہے ۔ جب مرد اور عورت نکاح کرتے ہیں تو بیوی اور خاوند کے حقوق پورے کرنے کا عہد لیا جاتا ہے۔ جب نیا جوڑا رشتہ ازدواج میں بندھ جاتا ہے تو دراصل نسل انسانی کو بڑھانے اورپیدا ہونیوالے انسانوں کی بہترین پرورش کرنے کا ایک نیا یونٹ بن جاتا ہے۔اس یونٹ کو کامیاب بنانے کیلئے نانا نانی،دادا دادی،بہن بھائی،چاچے مامے،خالائیں اور پھوپھیاں موجود ہوتی ہیں۔اسی لیے اسلام نے خونی رشتہ داروں کے بھی حقوق بیان فرما دئیے ہیں۔خاتم النبیین رسالت مآب حضرت ۖ نے رشتہ داروں سے صلہ رحمی کا درس دیا ہے۔آپ ۖ اپنے رشتہ داروں کا بہت خیال رکھتے تھے ۔حضرت فاطمہ اور حضرت امام حسین اور امام حسن سے محبت مثالی تھی ۔آپ ۖ اپنے دادا اور اپنے چچا سے بے پناہ قربت رکھتے تھے ۔حضرت حمزہ رضی اللہ اپنے بھتیجے پر جان نچھاور کرتے تھے ۔آپ ۖ نے ارشاد فرمایا،
”آپس میں تحائف دیا کرو،ایکدوسرے کو کھانا کھلایا کرو اور رشتہ داروں کے ساتھ صلہ رحمی کیا کرو۔جنت میں داخل ہوجاؤ گے۔”
ہمیں ہمارا میڈیا بھائی کو ظالم دکھاتا ہے،ماں کو جانبدار دکھاتا ہے اور باپ کو لاتعلق۔بہنوں کو سازشی اور بیٹوں بیٹیوں کو خود سربتایا جاتا ہے ۔یہ سب ایک منصوبے کے تحت ہورہا ہے ۔خاندان سے بیزار کرکے خدائی یونٹ کو توڑنے کی سازش ہے ۔مقدس رشتوں کو مشکوک بنانا سب سے بڑا فتنہ ہے۔رشتوں کو سنبھالیں ۔اگر رشتہ دار کھلی زیادتی بھی کررہے ہیں تو بھی برداشت کریں ۔معاملات بہت بگڑنے لگیں تو خاموشی اختیارکرلیں۔کسی خوف کے سبب کے نہیں بلکہ اپنے رب کی رضا کی خاطر۔ورنہ یہ رشتے ٹوٹ جائیں گے ۔ہمارا رب بھی ناخوش ہوگااور ہم تنہائیوں کے گھپ اندھیروں میں گم ہوتے جائیں گے ۔

بارشوں نے شہروں کے چھپے ہوئے گند کو ہی نہیں اچھالا ہمارے دل ودماغ میں بھری ہوئی بدبو کو بھی شاہراہوں پر انڈیل دیا ہے ۔سیاستدان،میڈیا اور سوشل میڈیا صارفین سب کسی دلچسپ ویڈیو کی تلاش میں ہیں ۔کسی ڈوبتے ہوئے ٹینکر کی تصویر مل جائے ،کسی گٹر میں پھنسے ہوئے بچے کی لاش مل جائے ،کوئی چوتھی منزل سے چھلانگ لگاتا دکھائی دے جائے ،کسی کے گھر پانی گھسے اور دوشیزائیں بھاگتے ہوئے نظر آجائیں ،کسی عورت کا لخت جگر بپھری لہروں میں بہہ جائے۔کہیں سے کچھ ایسا مل جائے جس سے تقریر دلپذیر ہوسکے ،جس سے ریٹنگ بڑھ سکے اور جس سے ویڈیو کلپ وائرل ہوجائے ۔مجھے ایک ویڈیو کلپ دیکھ کر بیحد دکھ ہوا کہ درجنوں لوگ اپنے موبائل فون لیے ایک پل کے بہہ جانے کی ہنس ہنس کر ویڈیو بنا رہے ہیں۔پانی کا بہاؤ اسقدر شدید تھا کہ دو تین منٹوں میں لوگوں کی آنکھوں کے سامنے وہ پل اڑ گیا اور لوگوں نےِِ”وہ گیا،وہ گیا ”کے مسرت بھرے قہقے لگائے ۔

یہ کسی دشمن ملک کا پل نہیں تھا اور نہ ہی اس کے ٹوٹنے سے کوئی فتح ملنے والی تھی ۔بلکہ رابطہ منقطع ہونے سے لاکھوں لوگوں کا روزگار تباہ ہونا تھا اورعام لوگوں کا ایک بہت بڑاذریعہ آمدورفت ختم ہونے جارہا تھا۔لیکن ہمارے نوجوانوں کے لیے یہ دل لگی کا ساماں تھا ۔کسی ایک نے نہیں روکا کہ بھائیو ہم پل کو تو نہیں بچا سکتے لیکن آو! ٔاللہ کے حضور گڑگڑا کر دعا کریں کے وہ بارش کی اس آفت کو ٹال دے اور ہمارے گھر ڈوب جانے سے بچ جائیں ۔شائد ہمارا مزاج ایسا بن گیا ہے کہ حکومت بھی شغل میں خوش رہتی ہے ،میڈیا بھی شغلی ہوچکا ہے اور ہم سب بھی مشغلوں کے عادی بن گئے ہیں ۔پہلی قوم دیکھی ہے جو اوروں کی تباہی پر خوش ہوتے ہوتے اب اپنی تباہی پر بھی خوش ہونے کی عادی ہوگئی ہے ۔
کراچی میں کیا کچھ نہیں ہوچکا۔اس عروس البلاد شہر کو اجاڑنے میں کسی نے کوئی کمی نہیں چھوڑی۔کچرا یہاں سے اٹھایا ہی نہیں جاتا،پینے کا پانی یہاں دستیاب نہیں ہوتا،بجلی یہاں سے غائب رہتی ہے ۔تجاوزات کی بھر مار ہے ۔سٹریٹ کرائم زوروں پر رہتا ہے ۔اور بارش نے ہر طرف طوفان نوح برپا کیا ہے ۔غریبوں کی جھونپڑیاں ندی نالوںکی نظر ہوگئیں اور ڈیفنس کے بنگلوں میںبھی گٹرکا پانی گھس گیا۔غریب غربا ہی نہیں سیٹھ اور امرا بھی سڑکوںپر پڑے دیکھے۔کارخانے ڈوب گئے اور ائیربیس بھی آبی ریلوں سے بچ نہ سکی ۔سب پر پانی پھر گیا۔صوبائی حکومت کی نااہلی تو مسلمہ ٹھہری ،مرکزی حکومت نے بھی صورتحال کا صرف لطف اٹھایا ۔اداروں کی صلاحیت بھی کھل کر سامنے آگئی۔ریاست کی بے بسی نے خطرے کے گھڑیال بجادئے لیکن ہمارا تماش بینی والا مزاج جوں کاتوںہے ۔ایک دوسرے کو نوچنے اور بھنبھوڑنے کے سوا کوئی تعمیری سوچ عنقا رہی ہے ۔کوئی خوف خدا ہمارے وجود کو چھو نہیںپارہا۔ایک طرف دل دہلادینے والے مناظر ہیںاوردوسری طرف ہمارے بے حسی کے قہقے ہیں ۔جب انسان بے بس ہوجاتے ہیں تو وہ توبہ کرتے ہیں اورپروردگار سے معافی مانگتے ہیں ۔لیکن ہماری بے حسی کی انتہا ہے کہ ہم اپنی موت پر آپ ہی رقص کرنے کے خواہش مند دکھائی دیتے ہیں ۔اللہ کی طرف رجوع نہیں کرتے ۔میڈیابھی صرف انہونی دکھاتا ہے لوگوں کو اچھائی کی طرف مائل ہونے ہی نہیں دیتا۔
لوگ پانی میں گردن گردن تک ڈوبے مدد کو پکار رہے ہیں لیکن ہمارے ٹی وی انہیں نئے موبائل سیٹ اور ہاؤسنگ پراجیکٹ کے اشتہار دکھا رہے ہیں ۔وہ بھوک اور پیاس سے مر رہے ہیں لیکن ٹی وی سکرین انہیں کوکا کولا پینے کی ترغیب دے رہا ہے ۔ہم گنہگار اورظالم ہونیکی ہر صفت پر پورا اتررہے ہیں اورپھر گلا کرتے ہیں کہ یہ مصیبتیں کیوں آرہی ہیں ۔سورة بقرہ میں ارشاد ہوتا ہے ،
”ہم نے نازل کی ان ظالموں پر ایک آفت سماوی اس وجہ سے کہ وہ نافرمانی کرتے تھے”
پھر سورة شوری میںفرمایا،
”اورتم کو جو کچھ مصیبت پہنچتی ہے وہ تمہارے ہی ہاتھوں کئے ہوئے کاموں سے پہنچتی ہے”
اس میں کیا شک ہے یہ آفتیں ،بیماریاں اور مصیبتیں بطور انسان اور مسلمان ہماری آزمائش کے لیے ہوتی ہیں۔افسوس کہ ہم بحیثت قوم ان آزمائشوں میں ایک تماشا دیکھنے والی قوم بن کر سامنے آئے ہیں ۔اللہ ہماری کوتاہیوں کومعاف فرماکر ہمیں سدھری ہوئی قوم بنا دے ،ورنہ ہماری حالت تو اس شعر کے مصداق ہے ،
بے دلی ہائے تماشا کہ نہ عبرت ہے نہ ذوق
بے کسی ہائے تمنا کہ نہ دنیا ہے نہ دیں

ہونا تو یہ چاہیے تھا کہ یہ اعلان کسی مسلمان ملک کے امرا ء کرتے ۔دنیا میں مسلمان ملکوںکی تعداد پچاس کے لگ بھگ ہے ۔بعض ممالک توایسے ہیں جن کے حکمران سونے سے تعمیر کردہ محلات میں رہتے ہیں ،ہیرے جواہر جڑی کاروں میں سفر کرتے ہیں۔ ان کے واش رومز میں لگے کموڈ بھی چاندی کے ڈھلے ہوتے ہیں ۔دنیا کے امیر ترین لوگوں میں دس کا تعلق مسلمان ملکوںسے ہے۔ عربوں کے پاس اربوں کا شمار محال ہے،ان کی بے بہا دولت کے تذکرے میڈیا کی زینت بنتے ہیں ۔پاکستان کے دس امیر ترین لوگوں میں جناب شاہد خان ،جناب میاں محمد منشا ،جناب آصف علی زرداری ،سر انور پرویز،میاں محمد نوازشریف ،جناب صدرالدین ہاشوانی ،جناب عبدالرزاق داؤد،جناب ملک ریاض اور جناب طارق سیگل جیسے لوگ موجود ہیں ۔لیکن بعض ایسے بھی امیر ترین لوگ ہیں جو ایک دو کروڑ کی کمی سے ٹاپ ٹین میں آنے سے رہ گئے ہوں گے ۔جہانگیر ترین ،علیمہ خان ،جنرل کیانی کے بھائی ،علیم خان اور اس طرح کے سیکڑوں پاکستانی ہیں جن کی دولت بے حساب ہے ۔لیکن ایسا اعلان کسی مسلمان ارب پتی کو نصیب نہیں ہوا۔

یہ دنیا کے 180امیرترین لوگ ہیں جنہوں نے کہا ہے کہ وہ ارب پتی ہیں لیکن انسانیت کیلئے۔ان اغنیا نے اپنی حکومتوں کو ایک کھلاخط تحریر کیا ہے کہ کورونا سے پیدا ہونے والی غربت اور بے روزگاری کا مقابلہ محض خیرات سے نہیں کیا جاسکتا لہذا اس کیلئے ہم امیروں پر بھاری اضافی ٹیکس لگائے جائیں ۔خط کے نیچے تمام امراء نے اپنے نام لکھے اور دستخط کئے ہیں ۔انسانیت کے ان امیر ترین دوستوں نے خط میں لکھا ہے کہ ابھی وقت ہے کہ ہم اس وبا سے بگڑنے والے معاشی توازن کو ٹھیک کرسکتے ہیں ۔حکومتیں جلدی کریں کہیں دیر نہ ہوجائے ۔
جی سیون ممالک نے بھی عالمی مالیاتی اداروںسے کہا ہے کہ وہ فی الفور قرضوں کے اوپر سود معاف کردیں کیونکہ غریب ممالک اس قابل نہیں رہے کہ وہ سود سمیت قرضے ادا کرسکیں ۔ورلڈ ہیلتھ آرگنائزیشن نے ایکبار بھر وارننگ دی ہے کہ کورونا کے حوالے سے غیر سنجیدگی کا مظاہرہ کرنے والے ممالک موت سے مذاق کررہے ہیں ۔کورونا سے نپٹنے کیلئے سخت اقدامات کی ضرورت ہے ۔اقوام متحدہ نے خبردارکیا ہے کہ آنے والے سال میں غربت اوربے روزگاری میں ہوشرباء اضافہ ہوجائیگا۔
”دولت برائے انسانیت ”کا اعلان کرنیوالوں کا تعلق پہلی دنیا سے ہے۔چین کے امیر ترین لوگ پہلے ہی اپنی دولت کا ایک حصہ اس وائرس سے نپٹنے کیلئے وقف کرچکے ہیں ۔ہوسکتاہے کہ مسلمان ملکوں کے امیر ترین لوگ بھی غیرمسلم ارب پتی افراد کے قافلے میں شامل ہوجائیں ۔پاکستان کے امیر ترین افراد کا اگر حکومت پر اعتماد بحال ہوجائے تو شائد وہ بھی اپنی دولت پر اضافی ٹیکس لاگو کرانے کیلئے کوئی خط لکھ دیں ۔آخر کورونا کی وجہ سے بہت سی میڈیکل اور ٹیکسٹائل ملوں کو منافع بھی ہورہا ہے ۔
دولت کا چند ہاتھوں میں ارتکاز عوام کی خوشحالی کو آہنی مٹھی میںبند کردینا ہے ۔اسلام نے اس عمل کی سختی سے ممانعت کی ہے ۔اسلام کی منشا تو یہ ہے کہ ضرورت سے جو کچھ زائد ہے وہ اللّہ کی راہ میں خرچ کردو۔جو لوگ دولت جمع کرتے ہیں ان کو دردناک عذاب سے بار بار ڈرایا گیا ہے ۔یہاں تک بتایا گیاہے کہ جزاوسزا کے روز طلائی سکے پگھلاکر ان کی پیٹھوں اور پیشانیوں کو داغا جائے گا ۔جب انسانیت بھوک اور غربت سے مر رہی ہوتو اللّہ کی راہ کونسی ہے ۔ظاہر ہے اللّہ کے بندوں کیلئے سہولتیں پیدا کرنا ہی اللّہ کی پسندیدہ راہ ہے ۔آج وبائی مرض نے کاروبار ٹھپ کردئے ہیں ۔حکومت ویسے ہی ناسمجھ اور ناتجربہ کار ہے ۔لوگوں پر مایوسی کے دورے پڑ رہے ہیں ۔گیلپ سروے کے مطابق پاکستانیوںکی ایک کثیر تعداد اس کرونا اور اس سے پیدا ہونیوالی صورتحال سے نپٹنے کیلئے اپنے گھروں کا سامان بیچ رہی ہے ۔ایسے عالم میں دولت مندوں کی دولت کس کام آئے گی ۔یہ دولت کہاں استعمال کریں گے ،اسے لیکرکہاں جائیں گے ۔اب وقت ہے کہ بگڑتے معاشی نظام کے توازن کوسدھارنے کیلئے اپنی تجوریوں کے منہ کھول دیں ۔اگر حکومت پر اعتماد نہیں تو باہم ملکر کوئی نظام وضع کرلیں ۔لوگوں کو بے روزگار نہ کریں ۔منافع نہیں ہورہا توبھی تنخواہ دیتے رہیں تاکہ گھروں کے چولہے چلتے رہیں ۔اب خیرات سے کام نہیں چلے گا۔اکٹھی کی ہوئی دولت کو بانٹنا ہوگا ۔دولت برائے انسانیت کا نعرہ لگا کر مجبور انسانوں کی زندگیوںمیںآسانی پیدا کرنی ھوگی۔آخرت سنوارنے کا اس سے بہتر موقع شائد پھر نہ مل سکے !

Click here to View Printed Statement

کائنات کا دولھا انسان اللہ پروردگار عالم کی تخلیق کا بہترین شاہکار ہے۔ رب کائنات نے اسے نعمتوں کے اتنے انبار عطا فرما دیے کہ جنہیں دیکھ کر ذرا سا غور کرنے پر ہمیں اللہ نظر آنے لگتا ہے۔ اللہ خود اپنے کلام میں فرماتا ہے”تمہارے نفوس میں میری نشانیاں موجود ہیں تو کیا تم ان پر غور نہیں کرتے“۔

ہم اپنی ذات سے ذرا باہر نظر دوڑائیں تو سورج‘ چاند‘ ہوا‘ پانی ‘ستارے آسمان‘زمین اور جانور سب کے سب قدرت کی نشانیاں ہونے کے ساتھ ساتھ حضرت انسان کی ایسے خدمت میں جتے ہوئے ہیں جیسے ان کا ہم سے بہت بڑا کام پھنسا ہوا ہے۔ ان پر نگاہ دوڑا کر یوں محسوس ہوتا ہے کہ جیسے سورج چمکتا‘چاند دمکتا‘ستار روشن‘ سمندر موجزن‘ ہوائیں چلتی‘ پھول کھلتے‘پھل پکتے اور جانور سواری و غذا کے لئے پیدا ہی ہمارے لئے کئے گئے ہیں۔ احساس کچھ یوں ہوتا ہے کہ جیسے ہم آقا ہیں اور یہ ہمارے خدمت گزار حالانکہ اصل صورتحال اس کے برعکس ہے۔ ان سب سے پوچھیے کہ اگر انسان نہ ہو تو تمہاری صحت پر کیا اثر پڑے گا تو یہ سب کہیں گے ہماری بلا سے۔ مگر انسان ان کے بغیر ایک پل بھی زندہ نہیں رہ سکتا۔
غرض ساری کائنات اپنا کام مالک حقیقی کی مرضی کے عین مطابق کر رہی ہے مگر انسان ہے کہ ظالم بھولا ہوا ہے۔
گھوڑے کو مالک صرف چارہ ہی ڈالتا ہے تو وہ اس کے بدلے اس کے لئے لڑ کر اپنی جان دے دیتا ہے۔ مگر انسان اپنے مالک کا بڑا ناشکرا ہے اور اس کی وجہ سورہ عادیات میں جو بتائی گئی وہ ہے مال سے بے پناہ محبت:
دنیا میں کسی ادارے کا مالک تیوری چڑھا لے تو ملازم فوراً ہاتھ باندھ کر کھڑا ہوجاتا ہے مگر کارخانہ قدرت کا حکم کئی بار جھنجوڑ چکا مگر ہم اس کی کوئی پرواہ نہیں کرتے۔آذان کی پکار تو ہمارے کانوں سے ٹکرا کر واپس چلی جاتی ہی رہی ہے لیکن اب تو ہم چھوٹے عذابوں کی ایک سیریز کو اپنی آنکھوں سے دیکھنے کے باوجود بھی راہ حق کی طرف جانے سے کترا رہے ہیں۔
وہ ہمیں بار بار اپنے کلام میں بتا چکا ہوں کہ میں نے یہ تمام کائنات تمہارے لئے مسخر کردی ہے مگر تم کو اپنے پیار کے لئے پیدا کیا ہے۔ وہ واضح طور پر آگاہ کرتا ہے کہ تمہاری تخلیق کا مقصد میری محبت اورمیری مخلوق سے پیار ہے۔
وہ خبردار کرتا ہے کہ اگر تم مجھ سے محبت نہیں کرو گے تو میں عنقریب تمہاری چھٹی کروا دوں گا اور تمہاری جگہ ایسی قوم پیدا کروں گا جو کہ مجھ سے محبت کرے گی اور میں ان سے محبت کروں گا۔
وہ کہتا ہے کہ میں تم سے رزق روزی نہیں مانگتا۔رزق رساں تو میں ہوں۔ اس لئے تمہاری روزی کا میں سامان کروں گا تم تو بس میری طرف پیار کی نگاہ اٹھا کر کبھی دیکھ ہی لیا کرو۔
وہ ہم کو بار بار اپنی نعمتوں کی یاددہانی کراتا ہے کہ شائد نگاہ ان کی طرف مبذول کرے تو نگاہ شکریہ اوپر بھی اٹھا لے۔مگر ہمارا حال تو یہ ہے کہ گائے نے اگر دودھ پلایا ہے تو ہم نے اسے ماتا بنا کر اسی کے آگے سر تسلیم دل خم دیا۔اللہ کو ہم سے گلا ہے کہ گوبر اور خون کے درمیان سے ظالمو تم کو خالص دودھ تو میں نے پلایا ہے اور تم نے ساقی پر نگاہ کرنے کے بجائے برتن کے آگے سر نیاز جھکا دیا۔ جبکہ گائے کو تو یہ خبر بھی نہیں کہ یہ سارا نظام کیسے چل رہا ہے۔ رب کا فرمان ہے کہ سورج اور چاند کو سجدہ کرنے والو اسے پہچانو جس کے ہاتھ میں ان کی رسی ہے۔
دنیا میں ماں جب بچے کو نہلا دھلا کر نئے کپڑے پہنا کر سامنے کھڑا کرتی ہے اور پوچھتی ہے کہ سب کچھ کس نے دیا ہے تو بچہ اگر صرف اتنا کہہ دے کہ ”ماں تو نے“ تو صرف اتنا کہنے پر ہی ہم نے کئی بار دیکھا ہے کہ وہ بچے کو درجنوں بوسے دیتی ہے۔ یہی حال مالک کا ہے جب بندہ نہا دھو کر آئینہ کے سامنے کھڑا ہو اور یہ کلمات ادا کرے کہ اللہ تیرا شکر ہے تو مجھے خوبصورت شکل عطا فرمائی۔ میری سیرت کو بھی خوبصورت بنا دے تو عرش سے آواز آتی ہے۔ ”بندے جا تیری اس خوبصورت بات پر میں نے تیرے پچھلے گناہ معاف کردیئے“۔ وہ فرماتا ہے کہ اگر نعمت کا شکر ادا کرو گے تو نعمتوں کی بارش کردوں گا اور ناشکری کرو گے تو میرا عذاب بہت سخت ہے۔
اللہ نے ہمیں مختلف انداز سے یاددھانیاں کروائی ہیں کہ شائد انسان اپنے محبوب حقیقی کی طرف نظر التفات کرلے۔وہ فرماتا ہے کہ جب تم ماں کے بطن سے گود مادر میں آئے تو کچھ نہیں جانتے تھے۔ یہ سمع و بصر اور دل ودماغ جس پر تم اتنا اتراتے ہو میں نے عطا فرمائے ۔ایک طرف تو ان نعمتوں کا تذکرہ کیا عام لوگوں کیلئے تو دوسری طرف میڈیکل سائنس کے ماہرین کو بتایا کہ تم نے آج یہ ثابت کیا ہے کہ انسان کو پہلے سماعت ملتی ہے بعد میں بصارت مگر رب العالمین نے چودہ سو سال قبل ہی یہ حقیقت اپنے نبی صلی اللہ علیہ وآلہ وسلم کی زبان سے جاری فرما دی تھی۔
وہ ہمارے کئی بھائیوں کو ان میں سے کچھ عطا نہیں بھی فرماتا۔شائد اس لئے کہ آنکھوں سے محروم کوئی شخص جب گلی گلی سے یہ پکارتا گزرے کہ” آنکھوں والو! آنکھیں بڑی نعمت ہیں“ تو ہمیں ان کے نعمت ہونے کا واقعتاً احساس ہوجائے آپ غور فرمائیں تو نوزائیدہ بچہ نہ بول سکتا ہے نہ رفع حاجت کرنے کے قابل ہوتا ہے۔غلاظت کے اس ڈھیر کے لئے دودھ کی نہروں کے علاوہ ماں کے دل میں اتنا پیار بھی ڈال دیا کہ وہ ساری غلاظتیں اپنے دامن میں لے لیتی اور بچے کو صاف ستھری جگہ ڈالتی۔میں تو اس کو اس طرح دیکھتا ہوں کہ دنیا میں جو ماں کا کردار ادا کر رہی ہے وہ ماں نہیں بلکہ دائی ہے اصل ماں (پالنے والی ذات) تو وہ ہے جس نے اس دائی کے دل میں اتنا پیار ڈالا ہوتا۔ سرکار صلی اللہ علیہ وسلم نے بھی اللہ کے پیار کو ماپنے کے لئے ماں کے پیار کا پیمانہ استعمال کیا۔ آپ کسی سفر پر جا رہے تھے کہ ناگہاں کسی عورت کا بچہ کھو گیا۔ وہ بڑی بے چینی کے عالم میں پاگلوں کی طرح اسے ڈھونڈتی پھر رہی تھی۔ کافی وقت بعد وہ اسے اچانک نظر آیا تو اس نے بچے کو اپنی بانہوں میں جکڑ کر اسے بے شمار بوسے دیے۔ ایسی کیفیت میں حضور صلی اللہ علیہ وآلہ وسلم نے صحابہ کو اس کی طرف اشارہ کرتے ہوئے فرمایا کہ دیکھو تمہارا رب تم سے اس ماں سے بھی ہزاروں گنا زیادہ پیار کرتا ہے جب قرآن فرماتا ہے کہ ماں باپ کے سامنے اف تک نہ کہو تو میں سوچتا ہوں کہ جب ہم اس ماں کے سامنے اف نہیں کہہ سکتے تو اس حقیقی ماں کے سامنے اف کیسے کہہ سکتے ہیں اور اس کے حکموں کو پا کر ان کی نافرمانی کرنے کی جسارت کیسے کرسکتے ہیں۔ میں انسان میں موجود اعضاءاور نظام کو دیکھ کر کبھی کبھی خیال کرتا ہوں کہ جانے وہ خود کتنا پیارا ہوگا جس کی تخلیق اتنی پیاری ہے۔
انسان کے اندر اور باہر کے ماحول میں یہ نشانیاں ہم سے کچھ کہتی ہیں ۔ گاڑی میں جانے والا مسافر اپنے دوست کو دیکھ کر جب رومال لہراتا ہے تو اس کی حرکت سے دیکھنے والے کو ایک نتیجہ نکالنا ہوتا ہے اگر کوئی رومال کی رنگت‘ اس کی دھاریوں‘ اس کے کپڑے کے معیار پر غور کرنے لگے تو زمانے والے اسے احمق کہیں گے۔دراصل اس طرح کرنے سے اس کا مقصد اس کی توجہ اپنی جانب مبذول کروانا ہوتا ہے۔
اگر کوئی مہمان کسی کے گھر کھانا کھانے کے وقت سب باتوں کو لاجک سمجھ جائے کہ بلب میں روشنی پاور ہاﺅس سے آرہی ہے۔ پھول جو گلدانوں میں سجائے گئے ہیں یہ اس طرح گلدانوںمیں نہیں اُگتے بلکہ باغ سے لائے گئے ہیں۔بادلوں کو دیکھ کر ان کا سارا فلسفہ بیان کردے۔ غرض ہر چیز کے بارے بڑی عقل مندی سے متاثر کن کرتا جائے۔ کھانے پر بھی بڑی سیرحاصل گفتگو کر ڈالے مگر کھانا کھانے کے بعد میزبان کا شکریہ ادا کیے بغیر چلائے تو کوئی شخص بھی ایسے شخص کو عقلمند نہیں کہے گا۔ عقل بہت بڑی چیز ہے اس کی بنیاد پر انسان اشرف المخلوقات کے درجہ پر فائز ہوا ہے مگر یہی عقل اگر کسی جسم سے نکال دی جائے تو وہ پاگل کہلائے گا۔ یاد رہے کہ عقل اگر وحی کی روشنی سے ہٹ کر فیصلے کرے گی تو یہ باولی کہلائے گی۔خدا کا فرمان بھی کچھ اسی طرح سے ہے کہ جب میرے بندے آسمانوں اور زمین کی تخلیقات میں غور کرتے ہیں تو نتیجہ بے فکر کے طور پر بے ساختہ یہ کہہ اٹھتے ہیں کہ اے رب تو نے یہ سب بے کار پیدا نہیں کیا۔ وہ کہتے ہیں کہ رب تو پاک ہے ہم کو آگ سے بچا کر اپنا دیددار نصیب فرما۔ بقول شاعر
تیری جنت کو یا رب کیا کروں
آرزو ہے تجھے دیکھا کروں

Click here to View Printed Statement

JANG LAHORE

ہر سال ماہ صیام میں منبرومحراب سے روزے کی فضیلتیں بیان کی جاتی ہیں اسلامی سکالرز انتہائی فصاحت وبلاغت کے ساتھ اس ماہ مقدس کے ساتھ وابستہ برکتوں’رحمتوں اور بخششوں کے تذکرے دہراتے ہیں۔نماز تراویح’نوافل ‘صدقہ اور خیرات کے طور طریقوں اور آداب و اسلوب کا موثر ذکر ہوتا ہے۔ہمارے اخبارات’رسائل اور ٹی وی چینلز خصوصی پروگرام اور اشاعت کا اہتمام کرتے ہیں۔ کوئی بھی صاحب شعور مسلمان پاکستانی یہ نہیں کہہ سکتا کہ اسے روزے کی اہمیت’افطار اور سحر کے طریقے اور رکوع و سجود کے انداز سے واقفیت نہیں ہے۔ لیکن کیا سبب ہے کہ ذرائع ابلاغ کے ذریعے پھیلائی جانے والی آگاہی کے باوجود معاشرے میں اس مقدس مہینے کے طفیل جو بہتری متوقع ہوتی ہے وہ وقوع پذیر نہیں ہوتی اور معاشرے میں اصلاح کی بجائے ہر سال پہلے سے زیادہ بگاڑ دکھائی دیتا ہے؟یوں تو حکومت بھی رحمتوں والے اس مہینے میں عوام الناس کی ہمدردیاں سمیٹنے کے لئے حکومتی سطح پر کئی اقدامات اٹھاتی ہے۔

مثلاً یوٹیلٹی سٹورز میں سینکڑوں اشیاء کی قیمتیں کم کردی گئی ہیں اسلام آباد’ لاہور اور کراچی میں خصوصی بازار سجائے جاتے ہیں تاکہ روزہ داروں اور عام آدمی کو سستی اشیائے خوردونوش بآسانی دستیاب ہوسکیں۔ رمضان پیکج کے نام پر بھی ہر بازار اور مارکیٹ میںبظاہر لوگوں کی سہولت کے لئے پرکشش سٹال سجائے جاتے ہیں لیکن پھر بھی ماہ رمضان میں مہنگائی کا جن پوری طرح بوتل سے باہر آکر صارفین کا منہ چڑانا شروع کردیتا ہے۔اس ماہ کے تقدس کا شعور بھی ہر شہری کو حاصل ہے۔مسجدیں نمازیوں سے بھری پڑی ہوتی ہیں ۔ تراویح کے دوران قرآن اور اس کی تفسیر کا اہتمام ہوتا ہے اور یوں لگتا ہے کہ ہر طرف نیکیوں کی برسات آگئی ہے لیکن عملاً لوٹ مار ہی ہوتی ہے’جھوٹ پر جھوٹ گھڑے جارہوتے ہیں اور ہمارے کردار اندر سے مزید کھوکھلے ہورہے ہوتے ہیں۔ آخر رمضان شریف کی برکتیں ہمارے حصے میں کیوںنہیں آتیں ۔غریب امیر کیوں نہیں ہوجاتا’مظلوم کو انصاف کیوں نہیں مل پاتا’ہم بحیثیت قوم ہر سال پہلے سے زیادہ مقروض کیوں ہوجاتے ہیں۔عالمی سطح پر پہلے سے زیادہ رسوائی ہمارے نصیب میں کیوں لکھ دی جاتی ہے؟یوں محسوس ہوتا ہے کہ ہمارے سماج میں مصنوعی رکھ رکھائو نے اسقدرجڑیں گاڑ لی ہیں کہ اب روزے جیسی عبادت کو بھی ہم نے ”انجوائے” کرنے کا کوئی ذریعہ بنا لیا ہے۔ہمارے ذرائع ابلاغ خصوصاً ہماری ٹی وی سکرین نے خالصتاً تذکیہ نفس کے لئے اور تعلق بااللہ کو از سر نو پروان چڑھانے کے لئے مختص روزے جیسی عبادت کو بھی اشتہارات کے ذریعے ایک ”سٹیٹس سمبل” بنا دیاہے۔ٹی وی چینلز نے ایسے سکالرز ”ہائر” کر لئے ہیں جو اپنی چکنی چپڑی باتوں سے ناظرین کا دل موہ لیتے ہیں۔اور پھر وہ ماہر مداری کی طرح لوگوں کوکسی پراڈکٹ کی طرف راغب کردیتے ہیں۔گویا روزے اور رمضان میں لوگوں کے مذہبی اور دینی رجحانات کا استحصال کرنے کا ایک نیا طریقہ ایجاد ہوگیا ہے اور یہی حالات ہمارے اخبارات کے بھی ہیں ۔کھانے پینے کی اشیائ’پہننے’ہاتھ منہ دھونے اور سجنے سجانے کے سامان کی جس قدر تشہیر ‘مارکیٹنگ اور سیل ماہ رمضان میں کی جاتی ہے شائد ہی کسی اور ماہ میں یہ کاروبار اس قدر عروج پاتا ہو۔ ٹی وی پروگرام اور اشتہارات نے اس عبادت کو ایک کلاس کے لئے خوشی اور غربت کی لکیر سے نیچے رہنے والوں کے لئے ایک آزمائش بنا ڈالا ہے۔یہی وجہ ہے کہ اس ماہ مقدس کی برکتیں بھی ہم سے روٹھ چکی ہیں۔ ”روزہ میرے لئے ہے اور اس کا اجر میں ہی دوں گا” اس حدیث مبارکہ کے بالکل برعکس اب روزہ اور اس سے زبردستی جوڑ دی جانے والی پرتعیش افطار و سحر نے اسے بھی شہرت’ بڑائی اور امارت کے اظہار کا ذریعہ بنا ڈالا ہے۔پیغمبر اسلام حضرت محمد صلی اللہ علیہ وآلہ وسلم نے ماہ صیام میںایسا کوئی عمل لازم نہیں فرمایا جس کی تشہیر آج کے پاکستانی معاشرے میں کی جارہی ہے۔اصراف سے منع فرمایا گیا۔سادگی پر زور دیا گیا مال کی قربانی کا حکم دیا۔ کان’آنکھ’ ہاتھ اور پائوں تک کے روزے کی بات کی لیکن یہاں تو ہر انسانی اعضا روزہ شکنی کرتا ہوا دکھایا جارہا ہے۔ پھر برکت کیسی؟میری استدعا ہے کہ کم از کم ماہ صیام میں ٹی وی سکرین کے ملفوف شیطانی ایجنڈے سے ضرور بچیں تاکہ تذکیہ نفس کی منزل آسان ہوسکے۔ کم از کم اپنے حصے کی افطاری کے برابر  رقم ایمانداری کے ساتھ اپنے ضرورت مند قرابت داروں’ ہمسائے ‘مسکین یا شہری پر ضرور خرچ کردیں۔ذاتی طور پر ہم یہی کرسکتے ہیں شائد اس سے برکتیںنازل ہوسکیں۔