Click here to View Printed Statement

سیاسی پارٹیاں ابھی انہیں اپنے لئے کوئی خطرہ نہیں سمجھتیں۔ابھی حفظ مراتب اور وضع داری غالب ہے۔ڈاکٹر صاحب ہر محفل میں بڑی سیاسی پارٹیوں کے نظریاتی قلعوں پر اپنے فکری میزائل داغتے ہیں لیکن چونکہ نشانے خطا جارہے ہیں اور مسلمہ سیاسی قائدین کو ان پھلجھڑیوں سے کوئی خاص کوفت نہیں ہوتی اس لئے وہ ڈاکٹر صاحب کو بزرگی اور بڑائی کا فائدہ دے کر آگے بڑھ رہے ہیں۔ میں اس دن سے ڈرتا ہوں جب ڈاکٹر صاحب اپنی نوزائیدہ پارٹی کے کسی ٹکٹ ہولڈر کے جلسے میں جا کر پی پی پی’ ن لیگ’ ایم کیو ایم یا اے این پی کی قیادتوں کے خلاف بارود اگلیں گے اور جواب میں خدا جانے کتنے پتھر سہنے پڑ جائیں گے۔ تب تقدس کی چادر تار تار ہوجائے گی اور دنیا کہے گی کہ دیکھو پاکستانی سیاست دان محسن پاکستان کے ساتھ کیا کر رہے ہیں۔

یہ سچ ہے کہ بھارت نے اپنے ایٹمی سائنسدان کو صدارت کے منصب پر بٹھایا۔ یہ بھی تلخ حقیقت ہے کہ ایک باوردی حکمران نے عظیم ایٹمی سائنسدان کو جی بھر کر رسوا کیا۔ لیکن یہ تو حکمران طبقہ کے معاملات ہیں۔ڈاکٹر اے کیو خان کا مقام اور مرتبہ حکمرانوں کے نزدیک کم تر ہوسکتا ہے عوام الناس کے دلوں اور دماغوں میں اس شخص کا نہ قد کم ہوا اور نہ حیثیت گدلائی ہے۔ جب تک ڈاکٹر صاحب نے ”تحریک تحفظ پاکستان” کی داغ بیل نہیں ڈالی تھی وہ قوم کے نزدیک غیر متنازعہ اور بلامشروط طور پر ایک قومی ہیرو تھے۔ سیاست میں آنے کے بعد ان کے حصے میں تقسیم شدہ محبتیں ہوں گی۔ جس طرح عمران خان نے اپنے لئے مشروط محبت کی راہ منتخب کی ہے’اسی طرح جناب اے کیو خان کو بھی بٹوارے کا سامنا کرنا پڑے گا۔ تیرے ووٹرز’ میرے ووٹرز کی جب تقسیم ہوگی تو پھر چاہنے والوں کے دلوں میں اکتاہٹ بھی ہوگی’ نفرت بھی جنم لے گی اور انتقام کے جذبات بھی ابھریں گے۔
کچھ سمجھ میں نہیں آتا کہ ہمارے قومی ہیروزکو کونسی کمی ہے جسے وہ سیاست کے ذریعے پورا کرنا چاہتے ہیں۔سیاست کے ذریعے اقتدار تک جایا جاتا ہے اور آج کل اہل اقتدار کو جس طرح چوک چوراہوں میں ذلیل کیا جاتا ہے جس طرح میڈیا ٹرائل ہوتا ہے اور سپریم کورٹ جس طرح دھلائی کرتی ہے’ کم از کم قومی ہیرو کو ایسے اقتدار پر دس بار لعنت بھیجنی چاہئے۔پاکستان میں کرنے کے لئے بڑے کام پڑے ہیں۔ آپ شروع کریں’حکومتیں’ عوام اور خواص سب آپ کے ایک اشارے پر کروڑوں اربوں روپے عطیات دیں گے۔آپ نے ایجوکیشن کے ادارے بنانے ہیں تو آپ کو روپے پیسے کی کمی نہیں رہے گی۔آپ کی لوگ عزت کریں گے کہ وہ آپ کی صلاحیتوںاور آپ کی نیک نیتی پر اعتماد کرتے ہیں۔
یہ سیاست بھی کیسا آسیب ہے کہ انسانی سوچ کو اپنے قبضہ میں لے کر ایسی بے راہ روی پر لگاتا ہے کہ مصلحین اصلاح اور معماران ملت تعمیر افراد کے کارخیر کو خیرباد کہہ کر اقتدار کے شارٹ کٹ کی طرف کھنچے چلے آتے ہیں۔جب سیاست کا طوفان ان صالحین کو اٹھا کر منہ کے بل گرا دیتا ہے تو پھر قوم تعلیم وتربیت کے وسیع منصوبوں سے ہمیشہ کے لئے محروم ہوجاتی ہے۔
قوم کو عمران خان سے کتنی امیدیں تھیں۔ساٹھ فیصد سے زائد خاموش اکثریت عمران کو نجات دہندہ سمجھنے لگی تھی۔ان کا خیال تھا کہ عمران بڑی خاموشی کے ساتھ ایک خاموش انقلاب برپا کردیں گے۔لیکن اکسانے اور دھکا دینے والوں نے قوم سے ان کا قومی ہیرو چھین لیا اور آج وہی ہیرو خارزار سیاست میں آبلہ پابھاگ رہا ہے۔اصغر خان کے ساتھ کیا ہوا۔ ابرار الحق جسے صوفی گلوکار ہونے کا دعویٰ تھا’ وہ سیاست کا ایسا اسیر ہوا کہ توازن ہی کھو بیٹھا۔اگر پی پی پی یا ن لیگ دوبارہ جیتے تو ملک چھوڑ جائوں گا” کسی فنکار کی ذہنی پسماندگی کی انتہا ہے۔
ڈاکٹر اے کیو خان کو دھکا دینے والے چوہدری خورشید الزمان ہی ہیں۔تحریک تحفظ پاکستان کے تاسیسی اجلاس میں فیصلہ ہوا تھا کہ ڈاکٹر صاحب کو ئی سیاسی پارٹی نہیں بنائیں گے اور نہ انتخابی سیاست کا حصہ بنیں گے بلکہ تمام سیاسی زعماء اور کارکنوں کو اصلاح کی طرف مائل کریں گے۔لیکن ”قدم بڑھائو قدیر خان۔ قوم تمہارے ساتھ ہے”۔ کا نعرہ لگانے والوں نے ایک ایٹمی سائنسدان کو سیاست دان بناڈالا۔
سیاست شجر منوعہ نہیں ہے۔لیکن یہ ضروری نہیں کہ ہر صاحب بصیرت رہنما سیاست کے ذریعے ہی قوم کی خدمت کرے۔ اگر جذبہ قوم کی خدمت ہی ہے تو اس حرزاں نصیب ملک کے لئے کرنے کو بہت سے کام ہیں۔ جس ملک میں ہر سال ہزاروں لاکھوں لوگ ہیپاٹائٹس سے ہی مرجاتے ہوں وہاں ڈاکٹر قدیر خان اسمبلی میں پہنچ کر کیا تیر ماریں گے۔ جس قوم کے اسی فیصد حصے کو پینے کا صاف پانی میسر نہ ہو’ جہاں تباہیوں سے متاثر ہونے والے کروڑوں انسانوں کو آفتوں سے نپٹنے کی بنیادی سوجھ بوجھ تک نہ ہو وہاں ہمارے قومی ہیرو سیاست کے ہاتھوں زیروہو رہے ہیں۔اقتدار صرف اختیار کے لئے ہوتا ہے اور یقین جانیے کہ مولانا عبدالستار ایدھی کا اختیار بڑے بڑے سیاستدانوں سے کہیں زیادہ ہے کہ اختیار صرف قانون کی کتابوں میں تحریر پروٹوکول نہیں دلوں میں موجزن احترام سے پوٹھتا ہے۔
ڈاکٹر اے کیو خان نے پاکستان کو ایٹمی پاکستان بنا کر بہت بڑا احسان کیا ہے۔ کاش کہ وہ ایک اور احسان اس قوم پر کریں اور سیاست کی وادیوں سے واپس لوٹ آئیں’ قوم کی اکثریت انہیں صرف اور صرف اپنا ہیرو دیکھنا چاہتی ہے۔

توانائی بحران کے حوالے سے اب کوئی دوسری رائے نہیں رہی۔ مشرف دور  کے آخری برسوں تک یہ سوچ جاری رہی کہ ملک میں بجلی اورگیس کی وافر مقدار موجود ہے اگر لائن لاسز اور چوری پر قابو پا لیا جائے تو کوئی وجہ نہیں کہ ہم توانائی کی ضرورتوں کو پہلے سے موجود ذرائع کے ذریعے پورا کرسکتے ہیں۔ لیکن آج چار برس مزید گذرنے کے بعد یہ خوش فہمی بھی دور ہوگئی ہے۔بجلی چوروں کو لگام دینے کی بجائے آج کل ان کے ناز اٹھائے جارہے ہیں۔کراچی میں کنڈا سسٹم کوئی ختم نہیں کراسکتا۔ جنوبی پنجاب  کے بعض حصوں میں بھی بجلی چوری کا رجحان تیزی سے پھیل رہا ہے۔ سندھ کے اکثر دیہی علاقوں میں سال میں ایک بار بجلی کا بل آتا ہے جو ہزار دو ہزار سے زیادہ نہیں ہوتا۔ بڑے بڑے سرکاری ادارے’وزیراعظم ہائوس ‘ ایوان صدر سب بجلی کے بلوں کے نادہندہ ہیں۔بجلی کے صارفین کا چالیس فیصد حصہ باقی ماندہ ساٹھ فیصد کا بھی بل ادا کرتا ہے۔

لائن لاسز کو بھی کنٹرول نہیں کیا جاسکا۔ 20فیصد تک بڑھ جانے والے لائن لاسز کو کس طرح قابو کیا جاسکتا۔ اس بارے آج تک کوئی قابل عمل حل پیش ہی نہیں کیا جاسکا۔لہٰذا اب یہ محض ایک خوش کن خیال رہ گیا ہے کہ ملک کے اندر بجلی کی پہلے سے موجود پیداواری صلاحیت کی بنیاد پر انرجی بحران پر قابو پایا جاسکتا ہے۔ جس شرح کے ساتھ آبادی میں اضافہ ہورہا ہے اس حساب سے سپلائی اور ڈیمانڈ کا فرق چار ہزار میگاواٹ سے بڑھ کر آٹھ ہزار ہوگیا ہے اور بہت ممکن ہے کہ آئندہ برس اس کو مزید ضرب لگے اور یہ فرق دس بارہ ہزار میگاواٹ کو چھولے ۔گیس کا عالم بھی نرالا ہے مرض بڑھتا گیا جوں جوں دوا کی۔ یوں تو حال ہی میںصوبہ پختونخواہ کے ایک سیاستدان نے خوشخبری دی ہے کہ صوبے کے اندر گیس کے نئے ذخائر دریافت ہوئے ہیں لیکن ذخائر کی پہلے بھی شائد کمی نہیں ہے۔ اصل مسئلہ  ان ذخائر سے فائدہ اٹھانا ہے۔ صوبہ خیبرپختونخواہ میں حکمران جماعت کی دور اندیشی کا ماتم کیا جانا چاہیے۔ محض ایک سیاسی نعرے اورضد کے سبب وہ کالا باغ ڈیم کو مردہ گھوڑا قرار دیتے ہیں۔ حالانکہ ملکی اور بین الاقوامی تحقیقی ادارے بار بار یہ باور کراچکے کہ اس ڈیم کی تعمیر سے معمولی نقصان کے بدلے خیبرپختونخواہ کو غیر معمولی نفع ہوسکتا ہے۔ لیکن میں نہ مانوں والی ضد ہے اور اٹھارہویں ترمیم میں صوبائی خودمختاری کے حوالے سے صوبوں کو اختیار دیا گیا ہے کہ وہ اپنے طور پر توانائی کے ذرائع پیدا کرسکتے ہیں۔ لیکن پنجاب حکومت جو لوڈشیڈنگ کیخلاف مینار پاکستان میں ٹینٹ کیبنٹ اجلاس کر رہی ہے’اس حکومت نے صوبے پنجاب میں بننے والے مجوزہ کالاباغ ڈیم کے لئے اس سال بجٹ میں صرف دس لاکھ روپے رکھے ہیں۔جب سنجیدگی کا یہ عالم ہو تو پھر  بجلی بحران پر کیونکر قابوپایا جاسکتا ہے!جہاں تک سندھ کے ضلع تھرپارکر میں پائے جانے والے کوئلے کے ذخائر کے حوالے سے جاری ہونے والے اعدادوشمار کا تعلق ہے تو ان میں ہوسکتا ہے مبالغہ آمیزی کا عنصر بھی شامل ہو۔لیکن حقیقت یہ ہے کہ اس ملک کے نامور سیاستدان ڈاکٹر ثمرمبارک اور ان کی ٹیم نے کوئلے کوزیر زمین جلانے اور اس سے گیس اور بجلی پیدا کرنے کا جو بیڑا اٹھایا تھا وہ اس میں تمام تر مالی صورتحال’دفتری رکاوٹوں اور حاسدوں کی پیدا کردہ مشکلات کے باوجود بڑی حد تک سرخرو ہوچکے ہیں اور دسمبر 2011ء میں ہی انہوں نے تھرکول  کے ایک بلاک میں انڈرگرائونڈ گیسی فیکیشن کا تجربہ کامیاب کر دکھایا تھا۔ یہ الگ بات ہے کہ آئل مافیا اور پرائیویٹ پاور ہائوسز نے ان کی اس کامیابی کو متنازعہ بنانے کی کوشش کی مگر ذرائع ابلاغ میں ان لوگوں کی ایسی دھلائی ہوئی کہ وہ وقتی طور پر دبک کر بیٹھ گئے ہیں۔تھرکول پراجیکٹ میں بہت بڑی رکاوٹ اس پراجیکٹ کی ملکیت بھی تھی۔ اب یہ طے ہوچکا ہے کہ یہ پراجیکٹ کلی طور پر سندھ حکومت کی ملکیت ہوگا اور وفاقی حکومت  اس کے لئے سرمایہ فراہم کرے گی۔سندھ کے بجٹ 2012-13ء میں اس پراجیکٹ کی ترقی اور تکمیل کے لئے ساڑھے تیرہ ارب روپے رکھے گئے ہیں اور حالیہ دورہ  چین کے دوران صدر آصف علی زرداری  اور ان کی ٹیم نے ایک چینی فرم کو پھر سے آمادہ کر لیا ہے کہ وہ تھرکول پراجیکٹ میں حصہ لے گی۔تھرکول پراجیکٹ میں پہلے ہی بہت دیرہوچکی ہے اور اس دیر کی سب سے بڑی وجہ سرمایہ کاری کا فقدان ہے ۔سرمایہ کاروں کا معاملہ یہ ہے کہ وہ اصل فیلڈ پر پہنچ ہی نہیں پاتے اور نہ وہ پائیلٹ پراجیکٹ کو دیکھ پاتے ہیں۔ انفراسٹرکچر نہ ہونے کے برابر ہے بلکہ سرے سے ہے ہی نہیں۔اب اگر سندھ حکومت ایک سال کے اندر اندر کراچی کے ساحل سے تھر تک بہتر سڑک تعمیر کر لیتی ہے پھر تھرکول فیلڈ تک سڑک نکالنا ایک کام ہے۔ اسی طرح واٹرکیریئر سسٹم ترتیب دینا ہے۔انفراسٹرکچر جس قدر جلد مکمل ہوگا اسی قدر پراجیکٹ میں سرمایہ کاروں کی دلچسپی بڑھے گی۔پاکستان کی توانائی کی  ضروریات اور خودانحصاری کی کنجی تھر کے صحرا میں مدفون ہے جسے مرکزی اور صوبائی حکومتیں نظرانداز کر رہی تھیں جو عوام کو بہتر مستقبل سے محروم کرنے کے مترادف ہے بھارت نے راجستھان سے کوئلہ نکالنا شروع کردیا ہے مگر پاکستان میں صرف کاغذی کارروائی کی جارہی ہے تھرکے کوئلے کے ذخائر قوم کے لئے زندگی اور موت کا مسئلہ ہے  جسے نظرانداز کرنے کا آپشن ہے ہی نہیں فنڈز کی کمی’ افسر شاہی کی سازشوں’ بین الاقوامی اداروں کی عدم دلچسپی سمیت تمام معاملات فوری طور پر حل کرنا ہوں گے۔ بیوروکریسی نے ورلڈ بینک کے لئے بنائی گئی توانائی کے ذرائع کی رپورٹ میں تھرکاذکرنہ کرکے قومی جرم کیا ہے۔پاکستان کے پڑوسی ممالک بھی ان ذخائر کو اپنی ضروریات پوری کرنے کے لئے استعمال کرسکتے ہیں جس کے لئے انہیں سرمایہ کاری کرنا ہوگی۔ ہمارے پاس سعودی عرب کے تیل کے ذخائر سے تقریباً تین گنا زیادہ توانائی موجود ہے جسے استعمال کرنا وقت کا تقاضہ ہے جو پاکستان کو آٹھ سو سال تک پچاس ہزار میگاواٹ بجلی فراہم کرسکتا ہے حکومت وقت ضائع کئے بغیر تمام کاغذی کارروائی مکمل کرے’ سارے علاقہ کا سروے کیا جائے’کوئلہ کی قیمت کا تعین کرے’ پانی ‘بجلی’سڑک’ ریلوے’ ایئرپورٹ فضلہ کو ٹھکانے لگانے اور مناسب سیکورٹی کا انتظام کرے تو کوئی وجہ نہیں کہ تین سال کے اندر لوڈشیڈنگ کے عذاب سے نجات مل جائے اور ہمارے سرمایہ کار بنگلہ دیش بھاگنے اور عوام سڑکوں پر ٹائر جلانے کی بجائے ملکی اور قومی ترقی میں پھر سے جت جائیں۔

مینارپاکستان کے سائے تلے نوجوانوں کے جم غفیر کی توہین کسی صورت نہیں ہونی چاہیے۔ جو سیاسی تجزیہ نگار اور پارٹی ترجمان اس تاریخی جلسے کی تعداد اور استعداد کو کم کرنے کی کوشش کر رہے ہیں وہ خلق خدا کی آواز کو سننا ہی نہیں چاہتے۔ یہ ٹھیک کہ کسی ایک جلسہ سے انقلاب برپا نہیں ہوتے اور نہ ہی یہ اس بات کی ضمانت ہے کہ آئندہ الیکشن میں تحریک انصاف ہر حال میں جیت جائے گی لیکن یہ تو تسلیم کیا جانا ضروری ہے

کہ برسوں سے جاری گلے سڑے سیاسی نظام کے خلاف ہماری نسل نو نے بغاوت کا بگل بجا دیا ہے۔ ہم جنہیں برگر فیملی کے ممبران کہہ کر اپنی پاکیزہ نظروں سے گرا رہے تھے عمران نے ان”لفنٹروں“ کی نگاہوں نگاہوں میں بہرحال تبدیلی کے خواب سجا دیئے ہیں۔ بدلا ہوا خان جوہری تبدیلیوں کا نقیب بن کر سامنے آگیا ہے۔ٹوئٹر‘فیس بک اور یو ٹیوب نے جس طرح عرب ممالک کے اندر سوشل نیٹ ورکنگ کو آسان بنا دیا تھا‘مینار پاکستان کے سائے تلے جمع ہونے والوں نے بھی اسی آسان راستے کا فائدہ اٹھایا ہے۔انہوں نے ممبر و محراب سے شائد صدائے حق نہ سنی ہو لیکن اپنے کمپیوٹر اور موبائل کے ذریعے تحریک کے اثرات جذب کئے ہیں ۔ پاکستان کے ایک کونے سے دوسرے کونے تک رنگ‘نسل‘ مسلک اور قبیلے سے بالاتر ہو کر لوگ خصوصاً وہ اٹھارہ سالہ نوجوان جنہوں نے ابھی ابھی ووٹر ہونے کا حق حاصل کیا ہے وہ عمران خان کے ساتھ کھڑے ہوگئے ہیں۔پہلے بھی کئی بار کہہ چکا ہوں کہ تبدیلی کا سب سے بڑا محرک نوجوان ہی ہوتے ہیں اور خوشی سے یہ اثاثہ عمران کے ہاتھ لگ چکا ہے۔ راقم نے اپنے ایک کالم میں ایک تعلیمی ادارے میںلیکچر کا حوالہ دے کر بتایا تھا کہ آج کا نوجوان موجودہ سیاسی قیادتوں سے کسقدر نالاں ہے اور وہ عمران کو ”مسیحا“ کا درجہ کیوں دیتے ہیں۔حیرت ہوتی ہے کہ مسلم لیگ (ن) نے سیاسی نابالغ پن کا مظاہرہ کرتے ہوئے خواہ مخواہ عمران کی توپوں کا رخ اپنی طرف موڑ لیا۔ پیپلزپارٹی عقل مند نکلی اور انہوں نے بڑے سلیقے کیساتھ عمران کی مقبولیت کو(ن) لیگ کیخلاف استعمال کر ڈالاہے۔ گو کہ اب صورتحال بدل گئی ہے اور (ن) لیگ والوں کو ہوش آگیا ہے کہ کل کلاں عمران خان کے ساتھ اتحاد بھی ہوسکتا ہے۔ توقع یہی ہے کہ (ن) لیگ اور عمران خان ایک دوسرے کیخلاف انتقامی کارروائیوں سے باز رہیں گے۔ایسے اشارے ہیں کہ بعض شرپسند عناصر قتل‘جلاﺅ اور توڑ پھوڑ کی ایسی وارداتیں کریں گے جن کا مقصد میاں برادران اور تحریک انصاف کے سربراہ کو آپس میں لڑا دینا ہو۔ تحریک انصاف کے رہنماﺅں کو اس صورتحال کا بغور جائزہ لیتے رہنا چاہیے۔ کیونکہ عمران اور نوازشریف انیس بیس کے فرق سے ایک ہی سیاسی بات کر رہے ہیں۔کرپشن کیخلاف‘ نئے پاکستان کی تعمیر‘غیرت مند اور خودمختار ملک۔یہ ساری باتیں مشترک ہیں۔جہاں تک ذاتی دولت اور اثاثوں کا تعلق ہے تو دونوں ماشاءاللہ طبقہ امراءسے تعلق رکھتے ہیں۔فرق صرف یہ کہ میاں صاحب کا کچھ سرمایہ شاید بیرون ملک ہو جبکہ عمران خان کے تمام اثاثے پاکستان کے اندر ہیں۔ البتہ عمران خان کے بچوں کو اگرننھال کی طرف سے حصہ یا تحفہ ملتا ہے تو وہ ایک الگ معاملہ ہوگا۔عمران خان کا جلسہ سیاسی مخالفین کی نیندیں حرام کئے رکھے گا۔ چاہے بڑی سیاسی پارٹیاں اس سے بڑا شو بھی کر لیں لیکن یہ حقیقت ہے کہ عمران خان تیسرے آپشن کے طور پر میدان میں رہیںگے۔ میرا ذاتی تجزیہ ہے کہ اگر عمران خان نے اپنی ذات کو فیصلوں پر نہ ٹھونسا اور فیصلے اپنی پارٹی کے سینئر ارکان پر چھوڑے تو فیلڈ میں قدرے بہتر لوگ اتارے جاسکیں گے۔پاکستان میں قحط الرجال ہے۔عمران خان کو بھٹوثانی قرارنہیں دیا جاسکتا۔عمران بھٹو سے کہیں زیادہ مشکل حالات میں قسمت آزمائی کرنا چاہتا ہے۔ یہ ردعمل کا مرحلہ نہیں ہے بلکہ آگے بڑھ کر ایک نیا اور قابل عمل لائحہ عمل مرتب کرنے کا چیلنج ہے۔دلوں کو کچھ وقت کیلئے گرمایا جاسکتا ہے لیکن ذہنوں کو تادیر کسی تصور کیساتھ ہم آہنگ رکھنامشکل ترین عمل ہے۔عمران خان کے حامیوں سے گذارش کرنی ہے کہ وہ اپنے جلسہ کی دھاک کو اپنے لئے انعام سمجھیں نہ کہ اسے اپنی طاقت سمجھ کر کسی منفی سوچ میں مبتلا ہوجائیں۔ ابھی سفر طویل ہے۔ ابھی منزل کی طرف رخ ہوا ہے۔ تبدیلی کی خواہش کو کسی تحریری نعرے‘ کسی منشور کی شکل میں لانا ضروری ہے ورنہ جلسہ کی کامیابیاں تحلیل ہونے میںتھوڑا سا وقت لگتا ہے۔

بوڑھے پنشنر نے پنشن نہ ملنے کیخلاف احتجاجاً جان دے دی تو حکمرانوں کو پنشن دینے کاخیال آیا۔ وہ مفلوک الحال جو گلے میں پھندے اور منہ میں خشک روٹیاں لٹکائے ماتم کر رہے تھے اور ان کی کہیں شنوائی نہ تھی انہیں بینکوں کے باہر کرسیوں پر بٹھا کر پنشن کی رقم فراہم کردی گئی۔احتجاج کرنے والوں کو سبق ملا کہ اس نظام حکومت میں موت سے ہمکنار ہو کر ہی کوئی آواز ایوان اقتدار تک پہنچائی جاسکتی ہے۔سندھ کے 32سالہ نوجوان راجا خان رند نے پارلیمنٹ ہاﺅس کے سامنے خودسوزی کی۔تنگدستی کیخلاف اس کا احتجاج خودسوزی پر ختم ہوا۔

لاش اٹھی توحکمرانوں کو خیال آیا کہ سیاسی مخالفین اس جنازے کو استعمال کریں گے لہٰذا اسی وقت حکومتی حکمت عملی حرکت میں آئی۔ سید خورشید شاہ نے سوختہ شخص کے بھائی اور باپ کو ایئر ٹکٹ فراہم کئے۔تجہیز وتکفین کا خرچہ دیا اور بیوہ اور بچوں کی داد رسی کا اعلان کر ڈالا۔ سندھ کے ہر نوجوان کو یہ پیغام ملا کہ اپنے بچوں کو دو وقت کی روٹی دینے کے لئے پارلیمنٹ ہاﺅس کے سامنے خودسوزی ہی موثر راستہ ہے۔یہ کیسا سیاسی اور عوامی کلچر ہے کہ انتہائی جائز مطالبہ منوانے کے لئے بھی مینار پاکستان سے چھلانگ لگانی پڑتی ہے‘واپڈا کے دفاتر توڑنے پڑتے ہیں‘ایجوکیشنل بورڈ کا ریکارڈ جلانا پڑتا ہے۔ اپنی جان لینی پڑتی ہے۔ گھیراﺅ اور جلاﺅ اب اس سماج کا عمومی رویہ بن گیا ہے۔ احتجاج احتجاج۔ احتجاجی طریقہ کار اس قدر معروف اور مقبول ہوا ہے کہ ہر شخص ‘ہر کمیونٹی ‘ ہر ادارہ سال کے بارہ ماہ احتجاجی صورتحال سے دوچار رہتا ہے۔ آج کا پاکستانی چاہے اس کا تعلق کسی مسلک‘صوبے‘زبان ‘پیشہ اور کاروبار سے ہو وہ ہر وقت اور ہرلمحہ احتجاج پر تیار ہے بلکہ مجبور ہے۔حکمران طبقہ بھی جان بوجھ کر سویا رہتا ہے اور معاملات کو اس وقت تک ٹالتا رہتا ہے جب تک بات چیت تہذیب اور دلیل کے دائرے سے نکل کر احتجاج اور انتقام تک نہیں پہنچ جاتی۔اگرکوئی ٹی وی چینل دکھا سکے تو دیکھا جاسکتا ہے کہ پاکستان میں کوئی ایک روز شائد عید کا روز بھی ایسا نہ ہو جس دن پاکستان کے کسی نہ کسی حصے میں احتجاج نہ ہورہا ہو۔لوگوں کو سڑکوں پر لانا شائد اب سب سے آسان کام رہ گیا ہے۔حکمران طبقہ کے کرتوتوں میں ایک کرتوت یہ بھی ہے کہ وہ ایک دوسرے کو نیچا دکھانے کے لئے عوام کو سڑکوں پر آنے کی دعوت دیتے ہیں اور چونکہ عوام کے پاس کرنے کو کچھ ہے ہی نہیں‘وہ بھی وقت گزاری اور تماش بینی کے لئے ان کے جلسے جلوسوں کو رونق بخشتے ہیں۔ جلسوں کا سب سے بڑا فائدہ یہ ہے کہ بے روزگاروں کی عزت اور توقیر بڑھ جاتی ہے۔مختلف لیڈر اور پارٹیاں بے روزگاروں تک پہنچتی ہیں اور انہیں اپنا ”کارکن“ بننے پر آمادہ کرتی ہیں۔ کسی بے روزگار سے پوچھ لیں وہ کسی نہ کسی سیاسی جتھے کا کارکن ضرور ہوگا۔آپ کہہ سکتے ہیں کہ احتجاجی سیاست نے اس ملک کے کروڑوں بے روزگاروں اور بھوکوں کو جز وقتی مصروفیت ضرور دے دی ہے۔ نفری پوری کرنے کے لئے سروں کی ضرورت ہوتی ہے اور پاکستان میں انسانوں کی کمی نہیں۔ ماشاءاللہ ہر روز ہزاروں نہیں لاکھوں پیدا ہوتے ہیں۔خدا خیرے کرے!تحریک انصاف نے گوجرانوالہ میں بے روزگار نوجوانوں کا جم غفیر اکٹھا کیا تو ہر طرف خوف و ہراس پھیل گیا۔ ن لیگ کو اپنے گڑھ میں گڑبڑ دکھائی دی اور اب (ن) لیگ ”گو زرداری گو“ کی تحریک شروع کرچکی ہے جو کہ بہرحال احتجاجی ہے۔میاں نوازشریف نے ٹرکوں پر امدادی سامان سجایا اور سندھ کے ڈبکیاں کھاتے ہاری ان کے استقبال کو ٹوٹ پڑے۔ پیپلزپارٹی کو فکر لاحق ہوئی۔ موت اور زندگی اللہ کے ہاتھ میں لیکن ”مادرجمہوریت“ کی موت نے جناب زرداری اور ان کی پارٹی کو بہرحال سکھ کے چند دن عطا کردیئے۔کسی نے سچ کہا کہ”ماواں ٹھنڈیاں چھاواں“۔(ق) لیگ والوں نے عدالت سے بری ہونے والے اپنے نوجوان رہنما کا اتنا بڑا استقبال کیا کہ جلسہ پنجاب حکومت کیخلاف احتجاج کا بہت بڑا مظاہرہ ہوگیا۔احتجاج‘جلسہ‘ جلوس‘ریلی‘ دھرنا اور مارچ کے لئے پاکستان کی زمین انتہائی زرخیز ہے۔چلچلاتی دھوپ ہو یا جاڑے کی ٹھنڈ۔ کوئی موسمی رکاوٹ احتجاج کا راستہ روک نہیں سکتی۔ دلوں میں نفرت‘اکتاہٹ اور انتقام کی سلگتی آگ پر حکمرانوں کی کرپشن‘نااہلی اور بدعنوانی تیل انڈیلتی رہتی ہے۔آج کل تو موسم ویسے ہی مہربان ہے۔ خوبصورت دھوپ میں جسم گرمانے کو خواہ مخواہ جی چاہ رہا ہوتا ہے۔اب بھی اگر میاں برادران لاکھوں لوگوں کو سڑکوں پر نہ لا سکیں تواس کا مطلب ہوگا کہ عوام کوئی نیا تماشا دیکھناچاہتے ہیں ویسے جناب زرداری نے تو ہر وہ اقدام اٹھا دیا جس نے لوگوں کو اس نظام سے متنفر کردیا ہے۔

لومڑی مکار کیوں ہوتی ہے؟بظاہر تو وہ ایک خوبصورت‘سمارٹ اور پھرتیلا سا جانور ہے لیکن اس کی مکاری سے جنگل کا بادشاہ بھی پناہ مانگتا ہے۔مکاری اور عیاری امریکہ پر ختم ہے۔ہیلری کلنٹن اپنے لاﺅ لشکر سمیت پاکستان تشریف لائیں۔کبھی لہجہ سخت تھا کہیں پھول جھڑتے رہے۔چہرہ تنا ہوا بھی دکھائی دیا اور مسکراہٹیں بکھرتی بھی نظر آئیں۔ پاکستانیوں سے زیادہ پاکستان کی فکرمندی‘ہمارے آرمی چیف کے جملوں کی جو گالی‘حملہ نہ کرنے کی یقین دہانیاں اور ”ساس“ والی میٹھی میٹھی نصیحتیں بھی سنائیں۔ہم سب نے سکھ کا سانس لیا سب”فتح مندی“ کے احساس سے سرشار ہوئے۔افغانستان پر ہمارا موقف امریکی موقف ٹھہرا۔ گویا امریکیوں نے ہمارے سامنے ”سرنڈر“ کردیا۔آخر اتنی مہربانیاں کیوں ہوئیں۔ نرم گوئی کے پیچھے کیا چھپا ہوا تھا۔

امریکی وزیر خارجہ کے لب و لہجہ کی تبدیلی کے ساتھ ہی حامد کرزئی نے پاکستان سے اپنی ”لازوال“ محبت کی بھڑک ماری‘بھارت نے پاکستان کو سلامتی کونسل کا مستقل رکن بننے کے لئے نہ صرف ووٹ ڈالا بلکہ بقول ہمارے سفیر ہمارے ازلی دشمن نے ہمارے حق میں لابنگ بھی کر ڈالی‘ہمارے تجارتی وفد کے سربراہ امین فہیم ”کامیابیوں“ کے جھنڈے گاڑتے دکھائی دیئے۔بھارت نے پاکستان کو یورپی یونین تک رسائی کے حوالے سے حائل رکاوٹیں دور کرنے کا عندیہ دےدیا۔ ہر طرف کامیابیاں ہی کامیابیاں۔آخر یہ ”چمتکار“ کیوں ہوا۔ بھارتی ہیلی کاپٹر اور اس کا عملہ باعزت طور پر واپس بھجوایا گیا۔بھارتی سرکار اور ذرائع ابلاغ نے ہمارے سپہ سالار کی تعریفوں کے پل باندھ دیئے۔ بطور پاکستانی میں یہ سب کچھ سوچتا ہوں تو ورطہ حیرت میں ڈوب جانے کو جی چاہتا ہے۔ دشمنوں کی طرف سے ایسی محبتیں۔ اللہ خیر کرے!لیکن ایک چھوٹی سی خبر‘خبر کے اندر انکشاف‘انکشاف کے پیٹ میں خوف۔ ایک جھرجھری سی لے کر رہ گیا۔ ہمارے وزیر پٹرولیم و قدرتی وسائل ڈاکٹر عاصم نے بھانڈا پھوڑ دیا۔”ایران سے گیس لینے کے حوالے سے عالمی دباﺅ کو بھی مدنظر رکھیں گے“۔ اصل معاملہ سامنے آگیا”کچھ لو اور کچھ دو“ کے فلسفے کا اصل حاصل حصول سب سامنے آگیا۔”عالمی دباﺅ“ کا مطلب کیا ہوا؟ ہمارے حکمرانوں کے لئے ایک امریکہ ہی پورا عالم ہے۔ ہیلری نے پیار میں بھیگے لفظوں کے ساتھ پاکستان کو نصحیت فرمائی کہ ”پاکستان ایران سے گیس نہ لے کیوں کہ ایران اپنے تمام ہمسایہ ملکوں کے لئے ایک خطرناک ہمسایہ ہے “ ہم نے ایک بار پھر امریکہ کو اندر کھاتے یہ یقین دہانی کرا دی ہے کہ ایران سے گیس لینے کے معاملے کو لٹکا دیں گے۔اس وقت تک لٹکائے رکھیں گے جب تک امریکہ کی طرف سے گرین سگنل نہیں آجاتا۔ اس کے بدلے ہمیں کہیں سے گیس تو نہیں ملے گی لیکن امریکی فوجیں پاکستان پر حملہ نہیں کریں گے اور پاکستان کو افغان مسئلہ کے ”وائنڈاپ“ میں کچھ کردار ادا کرنا ہوگا۔کیسا ”لو اور دو“ ہے؟ پاکستان جس کی زندگی گیس کے بغیر ٹھٹھر ٹھٹھر کر اقتصادی موت کو گلے لگالے گی۔اربوں ڈالرز ہر سال کا نقصان اٹھانا پڑے گا۔ کارخانوں کی چمنیاں بند ہوں گی‘چولہے ٹھنڈے ہوں گے اور سڑکوں پر مظاہرے‘مظاہروں میں توڑپھوڑ جلاﺅ گھیراﺅ۔ لیکن ایران سے گیس نہیں لیں گے کیوں کہ امریکہ نے ایران کے گرد مزید گھیرا تنگ کرنا ہے‘ اس پر جارحیت مسلط کرنی ہے اور اس غرض و غائیت کے لئے پاکستان نے استعمال ہونا ہے۔ ایسے حالات میں گیس پائپ لائن بچھائی نہیں جاسکتی!سی آئی اے عراق‘ افغانستان کی ”فتح“ کے بعد ایران کو فتح کرنا چاہتی ہے۔ایک ڈرامہ رچایا جاچکا ہے۔سی آئی اے نے دو ایرانی نژاد امریکیوں پر الزام عائد کررکھا ہے کہ وہ امریکہ میں سعودی سفیر کو قتل کرنا چاہتے تھے۔ سعودیوں نے سی آئی اے کے اس ”ڈرامہ“ کو حقیقت تسلیم کرکے ایران کو سبق سکھانے کے امریکی منصوبے کی مکمل حمایت کردی ہے۔ دوچار سالوں کی بات ہے۔حالات تیزی سے ایران پر جارحیت کی جانب بڑھ رہے ہیں۔پاکستانی سیاست‘حکومت اور صحافت عالم اسلام کے خلاف اس خطرناک سازش کو بے نقاب کرنے کی بجائے امریکیوں کی زبان اور سوچ سے ہم آہنگ دکھائی دے رہی ہے۔کوئی نہیں‘کوئی مسلمان لیڈر اس حیثیت میں نہیں کہ وہ سعودی اور ایرانی بھائیوں کے پاس حاضری دے‘ ان کے پاﺅں پکڑے ان کی آپس میں ملاقات کرا دے۔آپس کی غلط فہمیاں دور کرا دے تاکہ امت مسلمہ مزید تقسیم سے بچ جائے۔ایران اور سعودی عرب دونوں ملکوں کو بھی شائد یہ احساس ہی نہیں کہ وہ دھیرے دھیرے کسی تباہی کی طرف بڑھ رہے ہیں۔یہی امریکہ تھا جس نے شاہ ایران کو اس علاقے میں تھانیدار بنا رکھا تھا۔اب یہی امریکہ ہے جس نے سعودی عرب کو ایک سو ارب ڈالر کا اسلحہ فروخت کردیا ہے۔پاکستان سے اپنے دوست اور دشمن چننے کا اختیار لے لیاگیا ہے۔ایرانی گیس سے پاکستانی چولہے نہیں جل پائیں گے کہ ہیلری نے ہمیں دھمکیاں دے کر ہم سے ہماری خوشحالی پھر چھین لی ہے!!

اسے ڈوبنا ہے‘آج نہیں تو کل۔یہ ٹائیٹنک بچتا دکھائی نہیں دیتا۔ بے ساکھیوں کے سہارے اس کے خسارے پورے نہیں ہوتے۔ ہم اس سے پندرہ بیس برس قبل ہی نجات حاصل کرچکے ہوتے اگر میاں شہبازشریف اسے فوج کا مصنوعی سہارا مہیا نہ کرتے۔ کرپشن کی دیمک نے بجلی کی پیداوار اور ترسیل کے اس پورے نظام کو اندر سے کھوکھلا کردیا ہے۔ بجلی کے ہر کھمبے کے ساتھ مالی بدعنوانی کا ایک میٹر لگا دیا گیا ہے۔

میٹر ریڈر سے لیکر چیئرمین تک اور چیئرمین سے لیکربرق و آب کے وزیر تک ہر کوئی دیہاڑی لگانے‘منتھلی وصولنے اور ”کک بیک“ کھوجنے میں جتا ہے۔ ذرائع ابلاغ کی تنقید‘عوام کی پکار ن لیگ کے دھرنے سب کار لاحاصل ہیں۔اس سفید ہاتھی کی سونڈ پر جوں تک نہیں رینگتی۔لوڈشیڈنگ میں عارضی وقفے بحران ختم نہیں کرپائے۔توانائی کے تمام غیر جانبدار سروے اس بات کی نشاندہی کرتے ہیں کہ پاکستان کے اندر بجلی کا کوئی بحران ہی نہیں ہے۔اس کو چھوڑیے کہ تھرمل بجلی گھروں کو فرنس آئل فراہم کرنے کے لئے پی ایس او کو رقوم فراہم کی جارہی ہیں یا نہیں‘اصل معاملہ یہ ہے کہ پاکستان کے نوے فیصد صارفین ہائیڈل پاور کے ذریعے بننے والی بجلی استعمال کرتے ہیں۔ڈیم بھرے ہیں‘بجلی موجود ہے لیکن علانیہ اور غیر اعلانیہ لوڈشیڈنگ کے نام پر بجلی کی طویل بندش پھر بھی جاری رہتی ہے اور طوالت بڑھتی ہی جارہی ہے۔بجلی جاتی کہاں ہے؟ خود واپڈا والے مانتے ہیں کہ بجلی کا تیس فیصد لائن لاسز میں غائب ہوجاتا ہے۔لائنوں کے باعث جو لاس (loss)ہورہا ہے اس کا بل بڑی مہارت کے ساتھ صارفین کے کھاتے میں ڈال دیا جاتا ہے۔بیس فیصد بجلی چوری کر لی جاتی ہے۔چوری روکنے کیلئے حکومتی سطح پر کچھ ہو ہی نہیں سکتا کہ اس کام کی اس حکومت میں سکت ہی نہیں ہے۔واپڈا یہ کارنامہ سرانجام دینے کی ضرورت محسوس ہی نہیں کرتا۔بجلی چوروں کو پکڑنے کی بجائے بل ادا کرنے والے مجبور عوام کو ٹی وی اشتہاروں کے ذریعے نصیحتیں کی جارہی ہیں۔تف ہے ایسی تدبیر پر۔قوم کو بے وقوف بنانے والے نت نئے فارمولے گھڑے جارہے ہیں۔انسان دشمن دماغوں نے ریاکاری کی فیکٹریاں کھول رکھی ہیں۔پوری قوم کو بجلی چور سمجھ کر بجلی چوری سے باز رہنے کی تبلیغ کی جاتی ہے۔بڑے بڑے اینکر پرسن ”خدمت خلق“ کے اس اشتہار میں چہرہ دکھانے اور نصیحت فرمانے کے پیسے وصول کرچکے ہیں۔وہ طے شدہ سچ بولنے کے عادی ہیں ۔ واپڈا کو سچ کہنے یا سمجھانے کی بجائے ان کی دھوکہ دہی کی میڈیا مہمات میں حصہ دار بن گئے ہیں۔ ریاست کا ظلم کب ختم ہوگا کچھ کہا نہیں جاسکتا۔کم از کم عمران خان صاحب اس ”واپڈا“ سے ہی نجات دلا دیںکہ یہ خود تو ڈوب رہا ہے۔کروڑوں انسانوں کی معمولی معمولی سی خوشیاں بھی ڈبو دے گا۔کوئی تو اٹھے جو اس ادارے کو لوٹنے والوں کی فہرستیں بنائے اور چوک چوراہوں میں آویزاں کرے۔کوئی تو ہو جو ہرطرح کی بدعنوانی سے بغاوت کرے اور عوام الناس کی جیبوں پر ڈاکہ ڈالنے والے ڈاکوﺅں اور لٹیروں کو سرعام کوڑے مارے۔ بڑے بڑے ادارے اس ماردھاڑ میں حصہ دار بن گئے ہیں۔کنڈے کہاں پڑے ہیں؟ میٹر کن کے گھمائے جاتے ہیں؟ سب کو سب کا علم ہے لیکن معصوم صارفین جو بل بھرنے کیلئے قطاروں میں کھڑے رہتے ہیں انہیں ٹی وی دیکھنے کی سزا دی جاتی ہے۔ انہیں سمجھایا جاتا ہے۔”بجلی چوری قومی جرم ہے“۔لوگ ہر ماہ کپکپاتے ہاتھوں سے بجلی کا موت نما پروانہ نکال کر سوچنے لگتے ہیں کہ انہوںنے بجلی کو چوری کب کیا ہے؟۔پریذیڈنٹ ہاﺅس اور گورنر ہاﺅسز کے بل بھی ان کے کھاتے میں ڈال دیئے گئے ہیں۔ظالم ریاست کیخلاف بغاوت ہر انسان کا حق ہے۔مغلوب یا غالب اس کا فیصلہ وقت اور حالات کریں گے ۔کوئی نہیں جو ان شیش محلوں کے فانوس ریزہ ریزہ کردے۔ان کے گھروں میں گھس کر اندھیرے انڈیل آئے۔ایسے ادارے جو شہریوں کی خدمت کے نام پر زحمت تقسیم کریں انہیں ڈوب جانا ہوتا ہے۔ڈبونے والے باہر سے نہیں اندر سے کارروائی کرتے ہیں۔واپڈا ایک بار پھر ڈوب رہا ہے ۔اسے ڈوبنے دیں‘ صرف ڈبونے والوں کے چہروں کو پہچان لیں۔وقت جب اپنا پہیہ گھمائے گا تو ان چہروں پر لوڈشیڈنگ کی سیاہی ملی ہوئی دکھائی دے گی۔ان چوروں کا انجام صرف اور صرف عوام کے ہاتھوں لکھا گیا ہے۔ابھی صرف عمارتیں اورگاڑیاں جل رہی ہیں‘بہت جلد عوام ان کالے چہروں والے مگرمچھوں کے پیٹ چاک کر رہے ہوں گے!

اس میں کیا شک ہے کہ صحافی پیشہ خواتین وحضرات انتہائی دباﺅ کے تحت کام کرنے والے طبقات میں بلند مقام رکھتے ہیں۔حیات وممات کے اندازے لگانے والوں نے ثابت کیا ہے کہ باقی شعبوں کی نسبت صحافیوں کی عمریں کم ہوتی ہیں۔ وہ جلد ہی اس دنیا سے رخصت ہوجاتے ہیں۔پاکستان جیسے ممالک میں صحافت سے وابستہ افراد کی عمریں باقی ممالک کے صحافیوں سے کہیں کم ہیں۔ کم عمری یا جواں سالی کے دوران موت کے بڑے بڑے اسباب میں ایک سبب ڈپریشن ہے۔ذہنی دباﺅ ہی اعصابی تناﺅ کو جنم دیتا ہے۔

جسم کے اندر بیماریوں کی روک تھام کا خودکار نظام ناکارہ ہوجاتا ہے۔شوگر اور بلڈپریشر اپنا کام دکھا جاتے ہیں۔خبر اور خصوصاً سب سے پہلے خبر نکالنے اور سنوارنے کی ذمہ داری سے عہدہ برآ ہونے والے دماغوں کوانتہائی بے خبری کے عالم میںہارٹ اٹیک جیسی بیماری آلیتی ہے۔صحافیوں کے پاس اتنا وقت ہی نہیں ہوتا کہ وہ مڑ کر تھوڑی دیر پیچھے دیکھیں۔اہل وعیال اور بیوی بچوں سے جزوقتی ملاقاتوں کے عادی صحافیوں کو اپنی جسمانی صحت کے سلسلے میں فرصت ہی نہیں اور اگر خوش قسمتی سے وقت میسر آ بھی جائے تو وسائل میسر نہیں ہوتے اور اگر جسم مجبور کردے کہ اب میڈیکل چیک اپ کے علاوہ دوسرا کوئی راستہ نہیں بچا تو وہ کسی انشورنس سکیم کے تحت یا کسی ہسپتال سے دوستانہ تعلقات کی بنیاد پر زیر علاج چلے جاتے ہیں۔ہمارے ایلوپیتھی ڈاکٹر حضرات صحافیوں کے جسم پر بھی وہی نسخے آزماتے ہیں جو سٹریس اور ڈپریشن سے بچے ہوئے دوسرے مریضوں کیلئے یقیناکارآمد ہوتے ہوں گے۔میں ذاتی طور پر کتنے ہی صحافی بھائیوں کو جانتا ہوں جو وقتی طور پر ”ریلیف“ حاصل ہوجانے کے بعد تہہ در تہہ پیچیدگیوں میں گھر جاتے ہیں اور بالآخر ان کے معالج کے پاس ان کی دوائی کی مقدار میں اضافہ کرنے کے سوا کوئی چارہ کار باقی نہیں رہتا۔دوائیوں کے مارے ہوئے ایسے انسانی جسم اداروں کیلئے بوجھ بن جاتے ہیں۔ان کی دماغی صلاحیتیں شدید متاثر ہوتی ہیں اور وہ کسی تخلیق‘کسی نئے آئیڈیا اور کسی اچھوتی سٹوری یاخبر کے سامنے لانے کے قابل نہیں رہتے۔میں ایلوپیتھی طریقہ علاج کا ہرگز مخالف نہیں ہوں۔الٹرنیٹومیڈیسن میں ڈاکٹریٹ کی تعلیم کے دوران میرا یہ احساس پختہ ہوا کہ مختلف طریقہ ہائے علاج کے ماہر ڈاکٹرز کو آپس میں مخاصمت کی بجائے ہسپتال یا کمیونٹی کی بنیاد پر ایسے مشاورتی بورڈ بنانے چاہیں جن کے ممبران میں ایلوپیتھی‘ہومیوپیتھی‘یونانی حکمت‘آکوپنکچر اور دنیا میں رائج مختلف طریقہ ہائے علاج کے ماہرین شامل ہوں۔جدید تحقیق سے پتہ چلتا ہے کہ ہر ایک سو مریضوں میں ستر مریض ایسے ہوتے ہیں جنہیں کسی متبادل طریقہ علاج کی ضرورت ہوتی ہے۔ لیکن ایلوپیتھی حضرات یہ حقیقت جانتے ہوئے بھی اپنے مریض کو کبھی ہومیوپیتھی میڈیسن تجویز نہیں کریں گے ۔ ہومیوپیتھی ڈاکٹرز اور یونانی حکیم بھی اپنے مریض کو کبھی ایلوپیتھی ڈاکٹر کے پاس جانے کا مشورہ نہیں دیں گے۔افسوس کہ پاکستان کے اندر ابھی متبادل ادویہ کا طریقہ علاج جڑ پکڑ ہی نہیں پایا اور مریضوں کے مرض ٹھیک ہونے کی بجائے عمومی طور پر صحتیں گرتی جارہی ہیں۔لندن اور واشنگٹن میں اب ایسے کلینک کھل رہے ہیںجہاں الٹرنیٹ میڈیسن میں پی ایچ ڈی ڈاکٹرزمریض کو مشورہ دیتے ہیں کہ وہ اپنی مرض کے لئے کونسا طریقہ علاج اپنائے۔کہنے کا مقصد یہ ہے کہ دماغی دباﺅ کے تحت کام کرنے والی خواتین وحضرات کیلئے ایلوپیتھی ادویات فائدے کی بجائے نقصان کا سبب بنتی ہیں۔ جس کی تازہ مثال آج کل ڈینگی کا وائرس ہے۔ماہرین طب متفق ہیں کہ ڈینگی وائرس کا حملہ ان مریضوں کیلئے مہلک ثابت ہوتا ہے جن کے جسموں کا دفاعی نظام کمزور ہے۔شائد اسی لئے اس بخار کو امیروں کا بخار بھی کہا جاتا ہے۔حالانکہ مسئلہ امارت یا غربت کا نہیں ہے ۔ جو جسم تسلسل کیساتھ ایلوپیتھی ادویا ت استعمال کرتے ہیں۔ایسے جسموں کے اندر ڈینگی جیسے وائر س سے نمٹنے کی صلاحیت نہیں رہتی۔ایلوپیتھی ادویات میں شائد ہی کوئی ایسی میڈیسن ہو جو بغیرنقصان پہنچائے انسان کے دفاعی نظام کو بحال کرے۔ یہی وجہ ہے کہ ڈینگی کے مریضوں کو دھڑا دھڑ ادویات دی جارہی ہیں لیکن افاقہ توقعات سے بہت کم ہے۔میری شدید خواہش تھی کہ اپنی صحافی برادری کو ڈینگی کے وائرس سے بچاﺅ کیلئے ادویات فراہم کروں۔ اسی غرض کے تحت30 اکتوبر کو نیشنل پریس کلب اسلام آباد میں فری میڈیکل کیمپ لگایا گیا اور میرے ہمراہ ڈاکٹروں کی چھ رکنی ٹیم نے صحافیوں اور ان کے اہلخانہ سمیت ایک دن میں تقریباً چھ سو مریضوں کو نہ صرف چیک کیا بلکہ مفت ہومیوپیتھی ادویات بھی فراہم کیں۔پریس کلب کے عہدیداران اس بات پر مبارکباد کے مستحق ہیں کہ وہ اپنے ممبران کی صحت مندی کے بارے میںفکر مند رہتے ہیں اور فری میڈیکل سہولتوںکی فراہمی جاری رکھتے ہیں۔میرا ایمان ہے کہ صحت مند جسم رکھنے والے لوگ ہی صحت مند دماغ سے لطف اندوز ہوسکتے ہیں۔اگر ہم چاہتے ہیں کہ ہماری صحافت میں صحت مندرجحانات پروان چڑھیں تو پھر ہمیںصحافیوں کیلئے فری میڈیکل سہولتیں مہیا کرنا ہوںگی۔صحافی برادری کو اپنے کام کی نوعیت کو سامنے رکھتے ہوئے ایلوپیتھی سے بچنا ہوگا اور الٹرنیٹ میڈیسن کے تصور سے فائدہ اٹھانا ہوگا۔

خوب جان لو کہ دنیاکی زندگی اس کے سوا کچھ نہیں کہ ایک کھیل اور دل لگی اور ظاہری ٹیپ ٹاپ اور تمہارا ایک دوسرے پر فخر جتانا اور مال واولاد میں ایک دوسرے سے بڑھ جانے کی کوشش کرنا ہے۔ اس کی مثال ایسی ہے جیسے ایک بارش ہوگئی تو اسے پیداہونے والی نباتات کو دیکھ کر کاشتکار خوش ہوگئے۔

پھر وہی کھیتی پک جاتی ہے اور تم دیکھتے ہو کہ وہ زرد ہوگئی پھر وہ بھس بن کر رہ جاتی ہے۔اس کے برعکس آخرت وہ جگہ ہے جہاں سخت عذاب ہے اور اللہ کی مغفرت اور وہ جنت جس کی وسعت آسمان و زمین جیسی ہے جو مہیا کی گئی ہے ان لوگوں کے لئے جو اللہ اور اس کے رسولوں پر ایمان لائے ہوں یہ اللہ کا فضل ہے جسے چاہتا ہے عطا فرماتا ہے اور اللہ بڑے فضل والا ہے۔(سورہ حدید)
قرآن کریم انسانی زندگی کا نقشہ کھینچ رہا ہے ۔موت پر تو ہر انسان کا ایمان ہے لیکن اس کے باوجود ہم میں سے کوئی موت کا تصور بھی لانے کو تیار نہیں ہے۔ اس کا تذکرہ کرنا۔ اس کو آگے بیان کرنا اور اس موضوع پر سوچنا۔ غوروفکرکرنا تو دور کی بات ہے کہیں ہلکا سا خیال بھی دل میں آجائے تو ہم اسے جھٹکنے اور بھگانے کی کوشش کرتے ہیں۔ ہم فریب میں مبتلا ہیں اور ”شیطانِ الرجیم“نے اس معاملے میں ہمیں دھوکے میں ڈال رکھا ہے ۔ ہمارا پیارا بیٹا اگر ماں باپ کے سامنے غلطی سے موت کا ذکر کرلے توہم ناراض ہوجاتے ہیں اور اسے پیار سے ڈانٹتے ہیں کہ ”نہ بیٹا نہ ایسی بات منہ سے نہ نکالنا“ کیسی عجیب بات ہے ریل گاڑی یا بس میں بیٹھا مسافر اگر اپنے ساتھ کی سیٹ پر بیٹھے مسافر سے اس کی کمائی کے بارے میں پوچھ لے یا اس کے بچوں کے بارے میں دریافت کر لے یا اس کے کسی ذاتی مسئلہ پر استفسار کرلے تو وہ ان باتوں کا جواب نہیں دیتا بلکہ ناراضگی کا اظہار کرتا ہے یہ اجنبی مجھ سے کیوں ایسی باتیں پوچھتا ہے اس کا ان باتوں کے پوچھنے کا کیا مقصد ہے ؟مگر اگر وہی مسافر دوسرے سے اس کی منزل یا ”آخری سٹیشن جہاں اس نے اترنا ہے“ کے بارے میں پوچھے تو بلا جھجھک بول اٹھتا ہے کہ کراچی اور اگر پوچھنے والے کا آخری ٹھکانا بھی کراچی ہی تو دونوں میں دوستی ہوجاتی ہے۔
مگر یہ دنیا میں زمین کی گاڑی پر سوار مسافر جن میں سے سب کا آخری اسٹیشن ”میدان حشر“ ہے کا حال گاڑی کے مسافر سے بالکل الٹاہے۔ یہاں وہ گاڑی کے مسافر کے برعکس تمام باتوں کے جواب خوشی سے دیتا ہے تذکرے کرتا ہے لیکن اگر کوئی دوسرا مسافر اس سے آخری اسٹیشن کے بارے میں پوچھ لے توتیوری چڑھا کے کہتا ہے”تو مرے میں کیوں مروں“۔ حالانکہ حال یہ ہے کہ یہ مسافر آخر کار جا تو وہیں رہا ہے اور بے بسی کا عالم یہ ہے کہ سفر بدل کا رخ نہیں کرسکتا۔گاڑی کو روک نہیں سکتا۔حتیٰ کہ ڈبہ بھی بدل نہیں سکتا۔کوئی مسافر اگر دنیا میں یہ کہے کہ مجھے جوانی نہیں بچپن بہت پسند ہے تو نہ صرف یہ وہ اپنے سفر کو پیچھے نہیں لے جاسکتا ہے بلکہ وہ تو رفتار بھی آہستہ نہیں کرسکتا۔ ہر حال میں آگے دھکیلا جارہا ہے۔ اس مسافر کا کمال یہ ہے کہ اسے سب کچھ یاد ہے مگر منزل آخری اسٹیشن بھول گیا ہے اور اسی کو قرآن یاد دلا رہا ہے۔
قرآن اسے تو یقین کا نام دے رہا ہے۔ دنیا میں کوئی خدا‘رسول‘ قیامت‘ کتاب اور فرشتوں کا تو منکر ہوسکتا ہے مگر موت پر ہر کسی کو یقین ہی نہیں بلکہ اس ظالم انسان کو یقین کامل ہے مگر اس نے اسے چھپا رکھا ہے تذکرہ نہیں کرتا دنیا کے معاملات کہیں خراب نہ ہوجائیں۔
دنیا میں اس ظالم کو فنا پر اتنا یقین ہے کہ جب سورج پورے جوبن پر بالکل سر کے اوپر ہو۔ اپنی پوری شدت اور حدت کے ساتھ تو یہ انسان اسے زوال کے وقت کا سورج کہتا ہے حالانکہ بظاہر اس وقت وہ عروج پر ہوتا ہے یہ بھولے زوال کے وقت کا اسی وجہ سے کہتے ہیں کہ انہیں یقین ہے کہ عروج تو چند لمحوں کا ہوتا ہے اور اس کے بعد یہ زوال پذیر ہوجائے گا۔اپنے متعلق اس کا خیال بالکل مختلف ہے وہ سمجھتا ہے میں بڑا ہور ہا ہوں سالگرہ منائی جارہی ہے خوشیاں منائی جارہی ہیں ۔آج اٹھائیسویں سالگرہ ہے آج چالیسویں ہے وغیرہ وغیرہ۔ اسے یہ خیال نہیں ہے کہ سفر جو طے ہورہا ہے وہ طے نہیں کم ہورہا ہے
جوانی میں عدم کے واسطے سامان کو غافل
مسافر شب کو اٹھتے ہیں جو جانا دور ہوتا ہے
دنیا کی مثال ہمارے سامنے ہے کہ کوئی پھل دار درخت جب پورے جوبن پر پہنچ جائے۔ اس کے پھل پک جائیں تو یقینی بات ہوتی ہے کہ کوئی پھل ابھی ٹوٹ کر گرنے والا ہے۔ اسی طرح کوئی شخص یہ کہے کہ میں پورے جوبن پرپہنچ گیا ہوں۔اللہ کا دیا ہوا مال بہت ہے میرے بچے بھی جوان ہیں ان کی اولادیں ہورہی ہیں۔خوشیاں ہیں۔بہاریں ہیں تو پھر نادان انسان اب انتظار کر کہ کوئی پھل ٹوٹ کر گرنے والا ہے۔
مجھے شادابی صحن چمن سے خوف آتا ہے
یہی انداز تھے جب لٹ گئی تھی زندگی اپنی
دنیا بھی کرکٹ کی طرح چند روز مزے دار کھیل ہے ۔کھلاڑی کتنے مزے میں کھیل رہا ہوتا ہے۔تالیاں بج رہی ہیں۔خوشیاں منائی جارہی ہیں ادھر چھکا ادھر چوکوں کی بارش۔بلے باز کو مبارک بادیں مل رہی ہیں مگریکایک ایک گیند بلے اور ٹانگوں کے کہیں نیچے سے نکلتا ہوا وکٹوں کو چھو لیتا ہے ساری خوشیاں ختم ہوجاتی ہیں اور کھلاڑی گردن جھکائے ہوئے سنچری مکمل نہ ہوسکنے کے غم میں واپس پویلین چلا جاتا ہے۔ اب ہمیں فکر یہی کرنا ہوگی کہ کہیں یہ موت کا بال اچانک ہماری روح کو کہیں سے نہ ٹکرا جائے اور ہم اپنی سنچری مکمل نہ کرسکیں۔
دنیا کے معاملات میں تو انسان اتنا چالاک ہے کہ کرایہ کے مکان میں تو ایک پھل دار دخت نہیں لگاتا کہ پرایامکان ہے محنت کا کیا فائدہ ۔مگراپنی اس چند سالہ زندگی میں دولت اور اقتدار کے سارے خزانے حاصل کر لینا چاہتا ہے۔
قرآن میں فرماتا ہے کہ جب تم میں سے کسی پر موت آجاتی ہے تو اللہ اس کے رشتہ داروں کی نسبت اللہ تعالیٰ مرنے والے کے زیادہ قریب ہوتا ہے۔اللہ انسان کو چیلنج کرتے ہیں کہ اگر تمہیں میرے روزِ جزا پر یقین نہیںتو تم سب طاقتور لوگ اسے روک لو۔ اسے مت جانے دو۔ کیوں اسے موت کے منہ میں جانے دیتے ہو۔ اسے اپنے سے جدا نہ ہونے دو۔ماں باپ سرہانے کھڑے بین کر رہے ہوتے ہیں۔ جو ان بھائیوں کی جوڑیاں دائیں بائیں کھڑی ہوتی ہیں۔ طاقت ور بہادر خاندان کے سینکڑوں سپوت پاﺅں کی طرف کھڑے ہیں مگر اسے لوٹا نہیں سکتے اور بلانے کے انداز اتنا سخت ہے کہ اگر جی ٹی روڈ پر یا کسی چوراہے پر بلوایا گیا ہے تو گھر اطلاع دینے کی مہلت بھی نہیں ملتی۔ اللہ فرماتے ہیں کہ یہ اور بات ہے کہ ہم دنیا میں اپنے دربار کی طرف بڑے پیار سے بلاتے تھے کہ ”آﺅ نماز کی طرف ‘آﺅ فلاح کی طرف‘ مگر یہ تکبر کرنے والا کہتا تھا کہ میرے بچے کو کون پالے گا۔ میرا کاروبار کون سنبھالے گا۔ میرا سکول کون چلائے گا۔ ہر دو گھنٹہ کے بعد حاضری بڑی مشکل ہے۔اللہ معاف فرمائے گا کیونکہ اللہ کو بھی ہمارا علم ہے کہ میں بچوں کے لئے رزق کما رہا ہوں۔ اللہ کے بلانے کا انداز پر قربان جائیں۔ چھ مرتبہ اللہ اکبر اور آخر میںلَا ِالہ اِلا اللہُ کہلوایا۔ تصور یہ دلوایا کہ اللہ بہت بڑا ہے ۔ اللہ کو بڑا جان لو اور صرف ا سی کے آگے سر تسلیم خم کرو۔ ہم دنیا میں کسی کمپنی میں کام کرتے ہیں اور اس کا چیئرمین اگر ہمیںکام دے اور ہم اسے کر رہے ہوں تو دوسرے کسی افسر کا حکم نہیں مانتے کہ کمپنی کے مالک کا کام کر رہے ہیں۔گھر سے پیارا بیٹا بلانے آئے تو منع کرتے ہیں۔ بیوی کا فون بھی بند کردیتے ہیں۔ دوستوں کو بھی ٹال دیتے ہیں اگر وہی چیئرمین بلا بھیجے تو ساری فائلیں پھینک دیتے ہیں اور ایک لمحہ ضائع کیے بغیر ادب سے اس کے دفتر چلے جاتے ہیں ۔ اللہ نے بھی یہی تصور دلایا ہے کہ دنیا کے جس کارخانے میں تم رہتے ہو اس کارخانے کا بڑا بلا رہا ہے اب کسی عذر کی گنجائش نہیں ہے۔
اور مزید یہ کہ جب قیامت کے روز تجلیات خداوندی کا پر تو پڑے گا تو حکم ہوگا کہ سب لوگ سجدے میں گر جاﺅ اس روز سب سجدے میں گر جائیں گے مگر کچھ لوگ سجدہ کرنا چاہنے کے باوجود سجدہ نہ کر پائیں گے ۔ قرآن کہتا ہے کہ وہ اس لئے کہ جب دنیا میں صحیح سالم تھے تو ہمارے بلانے پر نہیں آتے تھے۔قرآن ایک جگہ یہ بھی کہتا ہے کہ اس روز تو صرف وہی لوگ سجدہ کرسکیں گے جو دنیا میں یہ تڑپ لیے اللہ کی پکار پر لبیک کہتے ہوئے مسجدوں میں آتے تھے کہ ایک دن اللہ تعالیٰ کی ملاقات اسی بہانے ہوجائے گی۔ یہ اللہ کی عظمت ہے کہ دنیا کی حقیقت کس پیار سے سمجھاتا ہے مگر ہم ہیں کہ ”یہودیوں“ کی طرح محض ظاہر پر ہی محنت کیے جارہے ہیں انسان کا جسم صرف سواری ہے اور اس کے اعمال سوار ہیں جب تک سوار اچھا نہ ہو سواری کی کوئی عزت نہیں کرتا۔
علامہ اقبال نے کہا ہے کہ
عمل سے زندگی بنتی ہے جنت بھی جہنم بھی
یہ خاکی اپنی فطرت میں نہ نوری ہے نہ ناری
عمل والے اور بے عمل رہتے تو ایک جہاں میں ہیں مگر دونوں میں فرق ہے۔
پرواز ہے دونوں کی اسی ایک فضاءمیں
کرگس کا جہاں اور ہے شاہیں کا جہاں اور
اعمال کے لئے ہمارے پاس اللہ کی دی ہوئی کتاب موجود ہے جس میں قیامت تک کے آنے والے انسانوں کے لئے رہنمائی موجود ہے۔ اور اللہ تعالیٰ خود ارشاد فرماتے ہیں کہ ہم نے قرآن کو آسان کردیا تو ہے کوئی جو اس سے فائدہ اٹھائے“ حضور نے فرمایا کہ تم میں سے بہترین وہ ہے جو قرآن کو خود سیکھے اور پھر دوسروں کو سکھائے۔ ہمارا اصل کام یہ ہے کہ ہم قرآن سے جڑیں اور اپنے بھائیوں کو تاکید کریں کہ بھائی جس سفر کے تم مسافر ہو اس سفر میں کس کس چیز کی ضرورت ہے اور وہ سامان ساتھ لے کر چلو کہ کہیں اللہ تعالیٰ کے حضور شرمندگی نہ ہو ہمارے سرکار صلی اللہ علیہ وسلم تو ہمیں ان تمام اعمال کا دنیا کے اندر ہی بتا کر گئے ہیں اس کے باوجود اگر ہم مار کھا گئے تو پر کوئی حجت باقی نہ رہے گی۔
اللہ تعالیٰ فرماتے ہیں کہ قیامت کے روز جنت والے دوزخیوں سے سوال کریں گے کہ تمہیں کیا چیز جہنم میں لے گئی تو وہ کہیں گے کہ ہم نماز نہیں پڑھتے تھے۔ مسکین کو کھانا نہیں کھلاتے تھے۔ دین کا کوئی مذاق اڑاتا تھا ہم بھی اس میں شریک ہوتے تھے اور پھر یقین آگیا۔ موت آگئی اور دھر لیے گئے۔ اس لئے ہمیں ایک تو چاہئے کہ اپنے اعمال اللہ تعالیٰ اور اس کے رسول کے فرمانوں کے مطابق کر لیں اور یہ صورت پیدا کر لیں کہ جب موت کا وقت قریب آجائے تو کلمہ شہادت لبوں پر ہو اور ہم مسکراتے جارہے ہوں ۔
آیئے اپنے آپ سے عہد کریں کہ آج سے قرآن کا دامن تھام کر محنت کا آغاز کر لیں فاصلہ تو تھوڑا سار ہے‘ بس کوشش یہ ہو کہ جب میدان حشر میں پہنچیں تو ہمارا رب اور اس کا محبوب ناراض نہ ہوں وہ ہم سے خوش ہوں اور ہم دعا کریں کہ مالک ہمیں توفیق دے کہ ہم ایسے اعمال کریں کہ جب تیرے حضور پہنچیں تو ہمیں ندامت نہ ہو۔ اور دوسری طرف ہمیں یہ بھی چاہئے کہ اپنے ساتھیوں کو بھی اللہ تعالیٰ کی طرف بلائیں کہ ہمارے بھائی بھی اللہ کی بھڑکائی ہوئی آگ میں جانے سے بچ جائیں۔

جہاں روزانہ لاشیں گرتی ہوں‘خون بہتا ہو‘گولیاں سنسنا تی ہوں‘آگ بھڑکتی ہو اور آرزوئیں جلتی ہوں ‘وہاں کے رہنے والے کس ذہنی کرب سے گزرتے ہوں گے اس کا اندازہ لاہور اورا سلام آباد میں بیٹھنے والوں کو بمشکل ہی ہوگا۔مائیں اپنے بچوں کو امام ضامن باندھ کر باہر نکالتی ہیں کہ کہیں رقص کرتی موت ان کے لختِ جگر نور نظر کو اچک کر نہ لے جائے۔قاتل کے نزدیک کوئی تفریق نہیں۔عورت‘مرد‘بچہ‘بوڑھا‘مالک‘مزدور‘پٹھان‘مہاجر‘پنجابی‘ بنگالی سب گولی کے سامنے بے بس ۔کسی کی کوئی حیثیت ہی نہیں رہی۔عالم اور جاہل‘ہوش مند اور بے ہوش سب ایک ہی خوف میں مبتلا ہوگئے ہیں۔اچانک گولی پار ہوجانے کا خوف۔کٹی پہاڑی پر سرکٹے‘کورنگی میں لہورنگ بکھرا‘لیاری میں خون کے بیوپاری دھاڑے‘دھوبی گھاٹ میں گھات لگی‘شیرشاہ میں شاہ بھی کٹے‘شیر بھی ڈھیر ہوئے۔کون سا علاقہ‘کونسا گوشہ ہے جہاں انسانی خون کی بدبو نہیں سونگھی جاسکتی۔ قاتل کون‘مقتول کون۔مرنے اور مارنے والے سب کراچی کے ہیں۔سب مسلمان بھی ہیں اور سب روزے دار بھی ہیں۔گولی کہاں سے آئی کراچی کے کسی محلے سے‘گولی کہاں گئی کراچی کے دوسرے محلے میں۔ مارنے والے ”انقلاب“ کے نعرے لگاتے ہیں‘مرنے والوں کے جنازے پڑھانے والے”انقلاب“ کے نعرے لگاتے ہیں۔کہا گیا کوئی خفیہ ہاتھ ہے۔کوئی غیر ملکی طاقت ہے لیکن زمینی حقائق بالکل مختلف نکلے ہیں۔سب کچھ اندرونی ہے۔ٹریگر پر آئی ہوئی انگلی‘کندھے پر رکھی ہوئی بندوق‘کندھا اور وہ سینہ جس میں اس گولی نے اتر جانا ہے۔سب یہیں کا ہے‘سب اردو بولتے ہیں‘سب پاکستانی ہیں‘سب منی پاکستان کے باسی ہیں۔امن ریلیاں ہوچکیں‘نائن زیرو‘بلاول ہاﺅس‘گورنر ہاﺅس‘وزیراعلیٰ ہاﺅس سمیت کونسا مقام ہے جہاں کراچی کو پرامن بنانے کے عہد و پیماں نہیں باندھے گئے۔لیکن درد بڑھتا گیا جوں جوں دوا کی۔آخر کونسا آسیب ہے‘کونسا دیو ہے جو ہمارے پیارے کراچی‘غریب پرور کراچی‘پہلے دارالحکومت‘ چمنیوں کے شہر کراچی کو پھر سے دبوچ لیتا ہے۔پھر خونخواروں کے پٹے کھول دیتا ہے!!کبھی بھارت کے شہر ممبئی میں ظلم کی ایسی ہی رات طاری رہتی تھی۔وہاں کی پولیس کو بااختیار اور باصلاحیت بنایا گیا اور ممبئی بہت حد تک پرامن ہوگیا۔آج ممبئی اس خطے کا معاشی مرکز بن چکا ہے۔لیکن کراچی جس نے سب پر کرم کیا آج خود رحم کی بھیک مانگ رہا ہے۔شہری محصور‘کاروبارمسدود!یہ کیسی سیاست ہے جو اپنے ماننے والوں کو خوف دیتی ہے۔خون آشام شامیں اور لہو بار صبحیں دیتی ہے۔انسان ہی زندہ نہیں رہیں گے تو حکمرانی قبرستانوں پر کروگے؟جناب آصف علی زرداری نے تمام تر قومی سطح کی مصروفیات ترک کرکے کئی روز کراچی میں لگی آگ بجھانے کی تدبیریں کیں۔رحمان ملک لپکتی آگ میں کود جانے والا وزیرداخلہ متحرک ومتفکر پھر رہا ہے۔ برق رفتاری کے ساتھ کراچی کے دورے کئے‘رات بھر جاگ کر شہر کے حساس علاقوں کی صورتحال کا مشاہدہ کیا۔مسلح گروہوں اور قاتل گینگ تک پہنچ جانے کے انکشافات بھی کئے لیکن قتل گاہیں جوں کی توں سجی ہیں۔فیصل رضا عابدی فعال ہیں لیکن کراچی میں ہونے والی قتل وغارت گری پر انتہائی مغموم۔کراچی پردکھ اور غم کی چادر تنی ہے اور سمندر کی وسعتیں بھی اس الم کو سنبھال نہیں پا رہیں۔باوسیلہ لوگ کراچی کو خیرآباد کہہ کر پنجاب اور اندرون سندھ کا رخ کر رہے ہیں۔ راقم خود بھی تواتر کے ساتھ اس بدنصیب شہر میں جاتا رہتا ہے۔خوشحال لوگ یا تو بیرون ملک جاتے ہیں یا انہوں نے اندرون ملک کوئی پناہ گاہ تلاش کر لی ہے۔اگراہل اقتدارگروہ قتل وغارت کو روکنے کو اپنا مذہبی اور دینی فریضہ بھی سمجھ لیں تو شائد ان کے اعمال میں برکت پڑ جائے۔ماہ صیام میں یہ مسئلہ باآسانی حل ہوسکتا ہے بشرطیکہ اس خون خرابے سے وابستہ ہر انسان اپنے قلب میں جھانکے اور قرآن و احادیث پر مبنی درج ذیل نکات پر عمل پیرا ہوجائے‘اللہ تعالیٰ فرماتے ہیں‘جس نے ایک مسلمان کو جان بوجھ کر قتل کیا۔ اس کی سزا جہنم ہے۔ہمیشہ ہمیشہ وہاں رہے گا۔اللہ کا غضب اس پر بھڑکے گا۔اللہ ایسے شخص پر لعنت فرمائیں گے اور اس کے لئے دردناک عذاب تیار کر رکھا گیا ہے۔(القرآن)اور خطبہ وداع میں حضور نے ایک مسلمان کی جان‘ مال ‘عزت و آبرو کو دوسرے مسلمان کیلئے حرام قرار دیا تھا۔

کبھی پاکستان کی ترقی کی رفتار دنیا بھر میں سب سے زیادہ تھی۔ 1960ءکے عشرے میں پاکستان کے ماہرین اقتصادیات نے سب کو ورطہ حیرت میں ڈال دیا تھا۔ساﺅتھ کوریانے بغیر کسی جھجھک کے پاکستان کے اقتصادی ماڈل کی نقل تیار کی اور اپنے ملک کو پاکستانی قدموں پر قدم رکھ کر چلانا شروع کردیا۔متاثر ہونے کی بھی حد ہوتی ہے۔ سئیول شہر کوبھی کراچی کی طرز پر بسایا گیا ۔وہ جوہمیںماڈل سمجھ کر ہمارے پیچھے چلے تھے وہ آگے بڑھتے گئے اور ہم روز بروز پیچھے کی طرف سرکتے گئے۔ آج ہم کہاں اور ساﺅتھ کوریا کہاں کھڑا ہے! کوئی تقابل ہی نہیں کوئی موزانہ زیب نہیں دیتا۔آج ہماری ترقی کی رفتار2.2 فیصد پر آکر ایسے رکی گویابریکیں لگ گئیں۔ ہزار دھکے مارو لیکن زمین جنبد نہ جنبد گل محمد

سودی نظام سے وابستہ معیشت سے جڑی اس دنیا کی ترقی میں بہت بڑا کردار بینکوں‘ بنکاری اور بینکاروں کا رہا ہے۔ اقتصادی ماہرین سرجوڑ کر ملکی معیشت کی بہتری کیلئے منصوبہ سازی کرتے ہیں اور بینک ان منصوبوں میں سرمایہ کاری کرکے ترقی کے پہیے کو حرکت میں لاتے ہیں۔ امریکہ‘ چین ‘جاپان اور بھارت۔یہ بینکاری نظام ہی ہے جس پر ان ممالک کی ترقی و عروج کا دارومدار ہے ۔چین کے بینک سرمایہ کارانہ سوچ کے حامل ہیں اور بہت سی امریکی کمپنیوں کو سرمایہ فراہم کر رہے ہیں۔ ایسے ممالک جن کے پاس پیسہ نہیں وہاں چینی بینک اور کمپنیاں مل کر پراجیکٹس مکمل کر رہے ہیں اور ان پراجیکٹس سے خاطر خواہ منافع کما رہے ہیں۔

پاکستان میں گزشتہ برسوں میں بینکاری سسٹم نے بہت ترقی کی ہے۔بینکوں کی عمارتوں کے شیشتوں کے سائز اور رنگ ہی نہیں بدلے انداز اور اطوار بھی تبدیل ہوگئے۔ ہر سال بھاری منافع کمانے والے ان بینکوں نے لوگوں کو منافع دینے کی بجائے ان کو ”کنزیومر ازم“ کی طرف راغب کرکے مال کمایا ہے۔ کریڈٹ کارڈز‘ کاروں پر قرضہ جات‘مکانوں کے لئے قرضے‘غرض ان بینکوں نے کسی ترقیاتی منصوبے میںشراکت داری کرنے کی بجائے صرف اور صرف اکاﺅنٹ ہولڈرز کو سہولیات کی فراہمی کے بدلے کھاتہ داروں کی رقوم سے ہی پیسے کاٹے ہیں۔اگر یہ کہا جائے کہ پاکستان میں بینکنگ نظام”کماﺅ“ کی بجائے”کھاﺅ“ بن گیا ہے تو مبالغہ نہ ہوگا۔

بنگلہ دیش میں ڈاکٹر محمد یونس بھی ایک بینکار ہی تھے۔انہوں نے میگا کی بجائے مائیکروفنانسنگ کا ایسا نظام وضع کیا کہ آج بنگلہ دیش میں شراکت داری کے ذریعے منافع کمانے کی ایک دوڑ لگی ہے۔معیشت کا پہیہ پوری رفتار سے چل رہا ہے۔ہمارے ہاں ایسا کیوں نہیں ہوا۔آخر ہمارے بینکار اور اقتصادی ماہرین مل کر ایسا پروگرام کیوں ترتیب نہیں دے سکے ۔ سروسز کے بدلے پیسہ کمانے کا رجحان بینکوں کے وجود پر کیا اثرات ڈالے گا؟ ایسے ہی سوالات لئے میں نے اپنی تنظیم ”پاکستان اکانومی واچ“ کے وائس پریذیڈنٹ عظمت اللہ کے ہمراہ گزشتہ دنوں کراچی کے معروف بینکاروں سے ملاقاتیں کیں۔

”بینکوں میں ڈاﺅن سائزنگ کا عمل شروع ہوچکا ہے۔ادغام یعنی ”مرجر“ کے رجحان نے بھی جنم لیا ہے۔ظاہر ہے یہ صورتحال بینکنگ سسٹم کیلئے کوئی نیک شگون نہیں ہے۔ ایسے منفی اشارات کا بنیادی سبب بینکوں کی موجودہ پالیسی ہے۔آج کل کم و بیش تمام بینکس قرضے فراہم کرنے میں جتے ہوئے ہیں۔حکومت اور حکومتی اداروں کو ”لوننگ“ ہورہی ہے یا کنزیومر ازم کو فروغ دیا جارہا ہے۔بینکوں کا اصل کام ترقیاتی منصوبوں کیلئے سرمایہ کی فراہمی ہوتا ہے۔اسی سے نظام بینکاری پر اعتماد بڑھتا ہے اور منافع میں مسلسل اضافہ ہوتا ہے۔سروسز اور لون کی فراہمی کے بعد سرمایہ ساکت ہوجاتا ہے۔‘ملک ترقی کرتا ہے نہ سماجی طور پر معاشرہ آگے بڑھتا ہے“سمٹ بینک کے چیف ایگزیکٹو جناب حسین لوائی نے بڑے ججے تلے انداز میں اصل مرض کی طرف نشاندہی کی۔ جناب حسین لوائی صرف بینکار ہی نہیں معیشت دان بھی ہیں۔ قومی سطح کے ایسے بینکار ہیں جنہوں نے متعدد ڈوبتے ہوئے بینکوں کو سنبھالا اور انہیں قومی ترقی میں حصہ ڈالنے کے قابل بنایا۔

اسلامی بینکاری کے ماہر اور بینک اسلامی کے چیف ایگزیکٹو آفیسر حسن عزیز بالگرامی تجزیہ اور تبصرہ سے گریزاں دکھائی دیئے لیکن انہوں نے راقم کو یقین دلایا کہ ملک میںاسلامی بینکاری کا مستقبل روشن ہے اور عام لوگوں میں سرمایہ کاروں کا اعتماد بحال کرنے میں ان کا بینک کامیابیاںحاصل کر رہا ہے۔

دبئی اسلامک بینک کے فنانشنل کنٹرولر گیون گون سالوز سے بھی ملاقات ہوئی۔ خوش مزاج اور ملنسار بینکار ہیں۔ ان کے خیالات کا حاصل بھی یہی ہے کہ ملکی معیشت کی بہتری کیلئے اب بینکاروں کو شراکت داری کے منصوبوں میں سرمایہ کاری کی طرف توجہ کرنا چاہیے۔غیر ضروری اخراجات کم کرنے چاہیں اور کھاتہ داروں کو سہولتوں کی فراہمی آسان اور سستی کرنی چاہیے۔

یہ ایک المیہ ہوگا اگر منافع کی بلندیوں کو چھولینے کے بعد ہمارے بینک ایسی منصوبہ بندی نہ کرسکیں جس سے زوال کو ٹالا جاسکے۔قومی ترقی کو اگر بینکاری کا ہدف قرار دے کر آگے بڑھا جائے ‘متحرک اور تعلیم یافتہ نوجوانوں کو چھوٹے چھوٹے کاروبار شروع کرانے کے لئے سرمایہ فراہم کیا جائے تو کوئی وجہ نہیں کہ پاکستان ایک بار پھر ساٹھ والی دہائی کو دہرانہ سکے!