میڈیائی فضاءمیں طالبان ‘مذاکرات‘ شہید‘نیٹو سپلائی ڈرون ‘جہاد اور امن جیسے عنوانات چھائے ہوئے ہیں۔خدا نہ کرے محرم الحرام کے ماہ میں کوئی سانحہ پیش آئے‘ اگر ایسا ہوا تو پھر لاشیں‘ خون اور آگ کے نظارے بھی ٹی وی سکرینوں پر چھا جائیں گے۔یہ بھی ممکن ہے کہ حکومت طالبان مذاکرات کے لئے کوئی ٹیم تشکیل پائے اور ہمارے اینکرپرسنز پورا مہینہ اسی پانی میں مدھانی ڈال کر بیٹھے رہیں۔ غرض یہ کہ ذرائع ابلاغ جنہیں عوام کا ترجمان ہونے کا دعویٰ ہے وہ چند مخصوص واقعات‘لوگوں اور گروہوں کے لئے ہی وقف رہے۔حکومت ایسے حالات میں بڑی مطمئن رہتی ہے۔اور بڑی خاموشی سے مہنگائی کے جن کے ہاتھ پاﺅں کھول دیتی ہے۔آئی۔ ایم۔ایف جیسے اداروں سے مذاکرات کامیاب ہوجاتے ہیں اور غریب کو مارنے کے تمام تیر بہدف نسخے بھی آزما لئے جاتے ہیں

۔اللہ جانے امریکہ کو حکیم اللہ محسود سے کوئی دشمنی تھی یا پاکستان کے عوام سے۔اچھا خاصا مہنگائی کے خلاف شورشرابا شروع ہوا تھا۔تحریک انصاف نے (چاہے بلدیاتی انتخابات میں بہتر نتائج کے لئے ہی سہی ‘مہنگائی کے خلاف تحریک چلانے کا اعلان تو کر ہی دیا تھا۔امید تھی کہ عوامی غیض وغضب کے مبینہ خوف سے شائد پٹرول اڑتالیس پیسے کی بجائے چار پانچ روپے سستا ہوجاتا لیکن امریکی ڈرون نے اس ملک کے عوام سے کونسا بدلہ لیا کہ راتوں رات فضاءہی بدل گئی۔غریب اپنی ترجمانی کے خواب ہی دیکھتے رہ گئے اور مہنگائی کی جگہ ”شہادت“ نے لے لی۔جوں ہی ذخیرہ اندوزوں اور ان کے سرپرست محکموں‘ افسروں اور باوسیلہ لوگوں نے ذرائع ابلاغ اور تحریک انصاف کو عوامی مسئلہ کی طرف سے غافل پایا‘مہنگائی کے میزائل برسانا شروع کردیئے۔پاکستان میں گراں فروشی اور عوام دشمنی کے ایسے ”ہنی مون پیریڈز“ سال میں کئی بار آتے ہیں‘بلکہ جب سے نون لیگ کی پژ مُردہ حکومت نے معاملات کو چھوا ہے‘مہنگائی ‘فحاشی کی طرح پھیلتی جارہی ہے اورفحاشی مہنگائی کی طرح اچھل کود کر رہی ہے۔خیال تھا اور میرا خیال نہیں عام آدمی کا خیال تھا کہ بے وقعت روپے کے ساتھ گوشت کا تصور ہی ختم کردینا چاہیے اور عید بقر کے علاوہ پورا سال ”ہندو“ بن جانا چاہیے۔اگر ایسا کریں گے تو چلیں دال ساگ ہی سہی‘پیٹ تو بھرتا ہی رہے گا۔لیکن مرض بڑھتا گیا جوں جوں دُعا کی کے مصداق یہ خواب بھی جوئے شیر لانے والا خواب ثابت ہوا۔دو تین دنوں میں مرچ‘ساگ اورپیاز ‘مرغی سے مہنگے کردیئے گئے۔روٹی نے آٹھ روپے سے چھلانگ لگائی اور دس تک جاپہنچی اور یہاں بھی رکی نہیں۔ مانسہرہ میں پندرہ روپے کی فروخت ہوئی اور روٹی کی یہ دوڑ جاری ہے۔غریب نے سوچا ہو گا کہ دو ٹماٹر لے کر چٹنی ہی بنا لیں گے لیکن ٹماٹر ایک سو ساٹھ سے لے کر دو سو روپے تک چلاگیا اور یوں چٹنی پیاز کا ”شاہانہ طرز ضیافت“ بھی صرف امراءکے لئے مختص ہوگیا۔”کیلا پچاس روپے درجن‘ ایک سوروپے کے دو درجن لے جاﺅ“ اتوار بازار میں ریڑھی بان کو یہ آواز لگاتے سن کر ہمارے ایک دوست اس کے قریب گئے اور ہاتھ باندھ کر اس سے کہا” ذرا آہستہ بولو۔ اگر حکومت کو پتہ چل گیا تو یہ بھی ہماری پہنچ سے دور چلا جائے گا“۔ بہرحال آجکل کیلا سستا ہے اور ہوسکتا ہے کہ جناب شہباز شریف لاہوریوں کو ہدایت کردیں کہ دال روٹی اور مرغ چھوڑو اور تین وقت کیلے کھایا کرو۔ آپ میاں برادران سے کچھ بھی توقع کرسکتے ہیں۔ڈرونز گرانے ہیںیا نہیں۔یہ جہادیوں اور فسادیوں کا معاملہ ہے۔امریکہ خود بھی بہت بڑا فسادی ملک ہے۔یہ اوپر والے طبقات اور تخت پاکستان پر قبضہ کے خواہش مندوں کے کھیل ہیں۔غریب آدمی کو اس جنگ سے صرف ”خوف“ ہی ملنا ہے۔ڈرون گرائیں یا نہ گرائیں‘لیکن ٹماٹر ضرور گرالیں۔

حکومت معلق ہی رہتی ہے۔ یہ صوبہ ہی ایسا ہے جس میں مستحکم حکومتیں اور مستحسن فیصلے کم ہی دیکھنے میں آئے ہیں۔ تحریک انصاف کی اس اُدھوری حکومت کے بارے میں بھی خدشات پائے جاتے ہیں۔بڑے ہی ابتدائی دور سے گزر رہی ہے۔ جو لوگ ابھی سے کامیابی اور ناکامی کے حوالے سے فیصلے صادر کر رہے ہیں انہیں تجزیاتی انصاف سے کام لینا چاہیے۔صوبائی حکومت کو ”ناکام” قرار دینے سے پہلے اس صوبہ کی حالت زار کو بھی مدنظر رکھنا چاہیے۔ ابتری کو سامنے رکھ کر ہی بہتری کا اندازہ  لگایا جانا چاہیے۔راقم کو کبھی بھی بہت زیادہ توقعات نہیں رہیں ۔ہمارے ہاں جمہوریت ہو یا آمریت چونکہ افراد کی حیثیت اہم ہوتی ہے اس لئے جہاں فرد باصلاحیت ہوا’ وہاں نتائج بہترہوگئے اور جہاں افراد کرپٹ ہوں یا نااہل تو پوری جماعت ملکر بھی ملک کو دلدل سے باہر نہیں نکال سکتی۔ جماعتوں کی کارکردگی ان کی لیڈر شپ سے مترشح ہوتی ہے۔تحریک انصاف ایک نئی سیاسی جماعت ہے

بلکہ پاکستانی قوم نے ایک نیا تجربہ کیا ہے۔عمران خان کی طلسماتی شخصیت نوجوانوں کے دل و دماغ پر ایسی چھائی کہ آج بھی  خان صاحب کی ہر دلعزیزی میں فرق نہیں آسکا۔مجھے بھی ان کی شخصیت سے کئی اختلافات ہیں’لیکن اس ملک کا مستقبل ان کے ساتھ وابستہ ہوچکا ہے۔اور آنے والی اسمبلیوں میں بھی ان کا وجود مٹایا نہ جاسکے گا۔ خان صاحب کو ذاتی طور پر حکمرانی کا کوئی تجربہ نہیں ہے لیکن ان کے ذاتی خیالات انتہائی شفاف اور پاکیزہ ہیں۔ ان کے دل میں جو ہوتا ہے وہی ان کی زبان پر بھی آتا ہے۔جس طرح انہوں نے ڈرونز کا معاملہ عالمی سطح پر اٹھایا اور جس دلیل اور دلیری کے ساتھ انہوں نے مغرب کو اس ظلم کا احساس دلایا ہے’یہ ایک عمل ہی ان کی حب الوطنی’ انسان دوستی اور اسلام پسندی کے لئے بہت بڑی دلیل ہے۔”میرے گھر امریکی سفیر آئے۔میں نے ملازم سے کہا کہ سفیر نے آنا ہے کوئی بسکٹ وغیرہ لے آنا۔وہ دکان سے عام سے  بسکٹ لے آئے۔ چائے پر امریکی سفیر نے خود شاپر سے  بسکٹ نکال کر کھائے”۔میں نے ایک ٹی وی پر جب عمران خان کی یہ گفتگو سنی تو مجھے ان کی خودداری کا اعتراف کرنا پڑا۔ اگر کوئی اور ہوتا تو وہ ”ہٹو بچو” ‘ہائی ٹی ‘ ہائے بائے” کے وہ اہتمام کرتا کہ امریکی سفیر ‘سفیرکی بجائے وائسرائے دکھائی دیتے۔خیبرپختونخواہ کے وزیراعلیٰ جناب پرویز خٹک سے میرا تعارف نہیں تھا۔ان کے دیرینہ دوست محمد طارق نے مجھ سے ان کی شخصیت کے بارے میں ایسی محبت بھری گفتگو کی کہ مجھے جناب خٹک سے ملاقات کا اشتیاق پیدا ہوا اور جناب جاوید بدر صاحب کی رابطہ کاری کے نتیجے میں یہ تفصیلی ملاقات ہوگئی۔پرویز خٹک لباس ہی نہیں لب و لہجہ کے اعتبار سے بھی انتہائی سادہ مگر پختہ عزم کا نمونہ ہیں۔ انہوں نے لگی لپٹی رکھے بغیر جہاں اپنے اپنے صوبے کے مسائل کا احاطہ کیا وہیں اپنے خوابوں ‘منصوبوں اور کارروائیوں پر بھی روشنی ڈالی۔ ان کا کہنا تھا کہ احتساب کمیشن کے دائرہ اختیار میں اضافہ کردیاگیا ہے۔یہ کمیشن اداروں کے سربراہوں پر ہاتھ ڈال سکے گا۔انہوں نے کہا کہ یہ بااختیار کمیشن ہوگا اور اسمبلی سے بل پاس ہونے کے بعد روبہ عمل ہوگا اور چیف منسٹر تک کو گرفتار کرسکے گا۔انہوںنے کہا کہ پٹواری کانظام بھی بہتر بنایا جارہا ہے۔ا ب پٹواری سے رشوت نہ لینے کا حلف لیا جائے گا اور زمین کا ریکارڈ کمپیوٹرائزڈ  ہوگا۔ وزیراعلیٰ نے کہا کہ صوبہ کا سب سے بڑا چیلنج تعلیم ہے۔اس سلسلے میں بیرون اور اندرون ملک مخیر حضرات نے اربوں روپے کے عطیات کی پیشکش کی ہے اور ہم اس سلسلے میں ایک جامع منصوبہ بناچکے ہیں۔ہم یکساں نصاب تعلیم کے لئے پہلی کلاس سے ہی انگریزی لازمی ہوجائے گی۔اساتذہ کے تبادلے ختم کردیں گے اور جس سکول میں ٹیچر بھرتی ہوگا اسی سے ریٹائرڈ ہوگا۔تعلیم میٹرک تک مفت ہوگی’امیر اور غریب کا فرق ختم ہوجائے گا۔انہوں نے کہا کہ  امن وامان کا مسئلہ طالبان سے جُڑا ہوا ہے اور اگر علمائے کرام آگے بڑھیں تو طالبان سے مذاکرات کو کامیاب بنایاجاسکتا ہے۔انہوں نے کہا کہ دہشتگرد کارروائیاں کرکے فاٹا میں روپوش ہوجاتا ہیں جس سے انہیں پکڑنا ناممکن ہوجاتا ہے۔پرویزخٹک نے کہا کہ تھانوں کے اندر کیمرے نصب کئے جارہے ہیں اور پولیس کی ٹریننگ کا پلان بنا لیا گیا ہے۔جناب پرویز خٹک کے خیالات میں یکسوئی تھی۔وہ عمران خان کی شخصیت کو اپنے لئے فکری توانائی کا سبب قرار دیتے ہیں۔صوبے کے عوام کی حالت بدل دینے کا جذبے سے سرشار ہیں۔میرا ذاتی خیال یہی ہے کہ اس وقت وہ تمام قوتیں جو صوبہ خیبرپختونخواہ کے خیرخواہ ہونے کا دعویٰ کرتے ہیں انہیں تحریک انصاف کی حکومت کا غیر مشروط ساتھ دینا چاہیے۔ محض سیاسی اختلافات اور حکومت ہتھیانے کے لئے پروپیگنڈہ مہم چلانے کا نقصان صرف عوام الناس کو ہوگا۔

حکومت اپنے دکھوں کا مداوا نہیںکرپا رہی شہریوں کے دکھوں کا درماں کیسے کرے گی۔ڈبل شاہ سکینڈل کے بعد مفتیان کا مضاربہ سکینڈل سامنے آچکا ہے۔یہاں تو ہر طرف نسیان کے مریض دکھائی دیتے ہیں۔ماضی قریب کو بھول جاتے ہیں۔جن احباب نے مفتیان کو زیادہ منافع کے لئے بھاری رقوم فراہم کیں انہوں نے ڈبل شاہ کے انجام کو سامنے نہیں رکھا ورنہ وہ ایسی غلطی نہ کرتے۔چونکہ ہم بھول جانے کے عادی ہیں۔ اس لئے ایسے سکینڈل آئندہ بھی منظر عام پر آتے رہیں گے۔دوسری بڑی وجہ حد سے بڑھا ہوا لالچ بھی ہے۔ہمارے بینکوں نے منافع کی ایک شرح طے کر رکھی ہے۔انوسٹمنٹ پر اس سے ڈبل یا ٹرپل منافع کا تصور ممکن نہیں ہے لیکن جب کوئی شخص یا گروہ آپ کو بینک کی نسبت تین چار گنا زیادہ منافع دینے کی حامی بھرے تو طبعاً آپ اس کی طرف مائل ضرور ہوجائیں گے۔

مضاربہ سکینڈل میںتیسرا پہلو اعتماد اور اعتقاد کا ہے۔کوئی بھی مسلمان چاہے وہ کتنا ہی ان پڑھ یا سادہ لوح کیوں نہ ہو وہ یقین رکھتا ہے کہ سود لینا اور دینا حرام عوامل ہیں۔لہٰذا وہ بینکوں میں منافع پر پیسہ رکھنا اوراس کا سود کھانے سے حتی الوسع کتراتے ہیں۔ہمارے کاروباری حلقوں میں بہت سی تعداد ایسے لوگوں کی ہے جنہوں نے مجبوراً کوئی ایک بینک اکاﺅنٹ کھول رکھا ہے۔ باقی بہت سا کاروبار وہ بینک سے بالا بالا سر انجام دیتے ہیں۔پاکستان کے اندر بینکوں کے لٹنے اور دیوالیہ ہونے کے ایسے واقعات بھی ہیں کہ لوگ بینکوں کے کرنٹ اکاﺅنٹ میں بھی اپنی جمع پونجی رکھتے ہوئے ڈرتے ہیں۔ اسلامی بینکنگ نے مسلمان کھاتہ داروں کے اندر کچھ اعتماد پیدا کیا ہے لیکن ابھی بھی دولت کا بہت بڑا حصہ لوگوں نے غیر روایتی طریقوں سے محفوظ کر رکھا ہے ۔جہاں تک اعتماد کا تعلق ہے تو سچ یہ ہے کہ لوگوں کو ”ڈبل شاہ“ پر اندھا اعتماد تھا اور آج بھی بہت سے لوگ ”شاہ صاحب“ کو بے قصور سمجھتے ہیں۔”شاہ صاحب“ کی بیٹی آخری وقت تک دہائی دیتی رہی کہ ”شاہ صاحب کو رہا کردیں اور کاروبار کرنے دیں‘ سب کے پیسے منافع سمیت واپس آجائیں گے“۔ڈبل شاہ کے ”متاثرین“ جنہیں نیب اور میڈیا نے متاثرین قرار دیا تھا وہ نیب کے دفاتر کے آج بھی چکر کاٹتے ہیں لیکن بڑے کھاتے داروں کو رقوم واپس نہیں مل سکیں۔ڈبل شاہ اور ان کی فیملی کو ”چپ“ کروا دیا گیا ہے اور ”نیب“ نے اپنی اعلیٰ کارکردگی کے تاج میں ایک اور پر لگانے کا اعزاز حاصل کر لیا ہے۔دنیا کے کسی ملک میں ایسا ممکن نہیں کہ کوئی بینک اپنے تمام کھاتہ داروں کو بیک وقت رقوم واپس کرسکے۔ کیونکہ بینک آپ کا پیسہ لے کر کہیں لگاتا ہے اور جب تک وہ ڈیل میچور نہ ہو رقم کی واپسی مشکل ہوتی ہے۔بینک آپ کا پیسہ مجھے اور میرا پیسہ کہیں اور دے رہا ہوتا ہے۔پاکستان میں کسی نے خبر اڑا دی تھی کہ الفلاح بینک دیوالیہ ہوگیا ہے۔ہم نے دیکھا کہ کس طرح کھاتہ داروں کی دوڑیں لگیں اور ہر برانچ پر ”کھڑکی توڑ“ قسم کا رش تھا۔ مذکورہ بینک کو اپنے دوسرے بینکوں سے رقم منتقل کروا کے کھاتہ داروں کے منہ بند کرنے پڑے۔اگر مضاربہ کمپنیوں نے اپنے بھرپور اعتماد کی بنیاد پر لوگوں سے رقوم لی ہیں اور کمپنیاں بروقت منافع دے رہی تھیں تو آخر کیا ہوا کہ اچانک مفتیان کی پکڑ دھکڑ شروع ہوئی اور کھاتہ داروں کے منہ میں ”فراڈ“ کے الفاظ ڈال دیئے گئے۔ سوال یہ ہے کہ مفتیان کا موقف سامنے کیوں نہیں آنے دیا گیا۔ ان کا جو موقف سامنے آیا وہ پولیس اور نیب کی حراست کے دوران آیا۔مضاربہ متاثرین بے بس ہیں ان کی کھربوں روپے کی رقم ڈوب گئی ہے۔انہیں منافع مل رہا تھا۔ وہ مطمئن تھے بلکہ بہت خوش تھے۔ ان کے سامنے بڑی بڑی بلڈنگز دکھائی دے رہی تھیں۔بڑے بڑے سٹورز کھل رہے تھے۔ہوسکتا ہے کہ بیرون ممالک بھی کوئی بزنس کیا جارہا ہو۔مضاربہ بزنس کے خلاف سب سے بڑی دلیل یہ دی جاتی ہے کہ اتنا منافع ممکن ہی نہیں۔مجھے نیشنل بینک کے سابق عہدیدار نے بتایا کہ اگر بنکنگ سسٹم میں بینکوں کے کرائے‘تنخواہیں ‘کمیشن اور آپریشنل اخراجات ختم کردیئے جائیں تو خالص منافع مضاربہ سکینڈل میں بیان کردہ منافع کے قریب قریب ہی ہوجائے گا۔مضاربہ سکینڈل سے نیب کو کتنا کمیشن ملے گا ؟جو رقم وصول کی جارہی ہے اسے کس بینک میں رکھا جارہا ہے؟اس رقم پر سود کی رقم کس کی جیب میں جاتی ہے۔مفتیان کو پریس میں اپنا مﺅقف بیان کرنے کا موقع کیوں نہیں دیا گیا؟ پرائیویٹ مضاربہ کمپنیوں کو کس خطرے کے پیش نظر پھلنے پھولنے نہیںدیا جارہا؟ کیا مفتیان کیخلاف یہ سکینڈل بینکنگ سیکٹر‘میڈیا اور نیب کی کوئی مشترکہ سازش ہے؟۔یہ وہ سوالات ہیں جن کے جواب دیئے جانے چاہیں تاکہ سچ اور جھوٹ سامنے آسکے۔اسلامی نظریاتی کونسل کو اس سکینڈل کی از خود تحقیق کرنی چاہیے اور علماءکو اپنی آراءدینی چاہیں ۔کہیں سود خوروںنے اسلامی مضاربہ کے راستے روکنے کا کوئی منصوبہ ہی نہ بنا لیا ہوا!۔

پاکستان میں معاشی لحاظ سے کتنے طبقات ہیں اس بارے کوئی تازہ سروے تو موجود نہیں ہے لیکن اگر ہم اپنے اردگرد نظر ڈالیں تو شہر ‘ گلی اور محلے میں ہمیں یہ طبقات مجسم صورت میں دکھائی دیں گے۔ایک پورا طبقہ ان خاندانوں پر مشتمل ہے جو پیشہ ور بھکاری ہیں یا ان کے پاس بھیک مانگنے کے سوا کوئی چارہ کار ہی نہیں ہے۔بھکاریوں کے جتھے آپ کو پاکستان کے ہر چوک اور چوراہے میں مل جائیں گے۔ بلکہ کسی مذہبی یا قومی تہوار کے دنوں میں مانگنے والوں سے جان چھڑانا ہی بہت بڑی انجوائے منٹ ہوتی ہے۔آپ بھکاریوں کے سامنے بے بس ہوجاتے ہیں ۔آبادی میں اضافہ کے ساتھ ساتھ اس پیشہ یا مجبوری سے منسلک تعداد میں اضافہ ہی ہوتا جارہا ہے۔ یہ لاکھوں میں نہیں کروڑوں میں پہنچ رہے ہیں ۔دوسرا طبقہ فاقہ مست دیہاڑی دار مزدوروں اور ہنرمندوں کا ہے۔مزدور مانگ تو نہیں سکتے لیکن ملک میں کوئی کاروبار نہ ہونے کے سبب فاقوں مرتے ہیں۔ بیروزگاری کی شرح میں ہر سال اضافہ ہوتا ہے۔ پاکستان میں ہرچوتھا آدمی بیکار ہے۔

اگر مکمل طور پر بیکار نہیں بھی تو جزوقتی طور پر بیکار ہے۔آپ کے محلے یا گلی میں یا آپ کے بنگلے اورکوٹھی کے پچھواڑے میں یا آپ کی انتہائی محفوظ ہاﺅسنگ سوسائٹی میں کسی بلند وبالا عمارت کی آخری منزل پر اینٹیں اٹھاتے مزدور آپ کو ضرور مل جائیں گے۔میری التماس ہے کہ لمحہ بھر رک کر ان کے احوال دریافت کر لیجئے۔ آپ یہ جان کر حیران رہ جائیں گے کہ ان دیہاڑی دار مزدوروں کے کوئی حقوق ہی نہیں ہوتے۔دیہاڑی لگ گئی تو ٹھیک ورنہ گھر بیٹھے بھوک کی تیز دھوپ پر عیاشیاں تلتے رہتے ہیں۔اس طبقہ سے بھی لاکھوں خاندان جڑے ہوئے ہیں۔ہمارے ملک کا چھوٹا کسان‘کلرک‘ملازم‘ ملوںمیں کام کرنے والے کارکن‘دفتروں میں استحصال زدہ عورتیں۔یہ سب وہ گروہ ہیں جن سے ملنے پر ہمیں اپنے معاشرے کے اصلی چہرے کا پتہ چلتا ہے ۔خط غربت سے زندگی گزارنے کا مفہوم کیا ہوتا ہے اس کا اندازہ کبھی اس خط پر سسکتی زندگیوں کی حسرت بھری نگاہوں میں جھانک کر دیکھنے سے ہوگا۔غربت کی دلدل میں پھنسے عوام کے طبقات کی تعداد گنے نہیں گنی نہیں جاسکتی۔ اسی طرح خوشحال طبقات کی بھی کئی قسمیں ہیں۔ لوئر مڈل کلاس طبقے کے افراد اپنی بقاءکی جنگ لڑ رہے ہیں۔ انہیں ہر روز یہ کھٹکا لگا رہتا ہے کہ اب کے اگر مڈل کلاسیوں والی سیڑھی سے کھسکے تو اور سیدھا خط غربت کے مہیب خانوں میں جاگریںگے۔یہ تگ و دو اور سخت جانفشانی کرنے والے لوگ ہوتے ہیں۔ان کو آپ آسودہ حال نہیں کہہ سکتے۔غریب انہیں اپنا حصہ سمجھتے ہیں اور امیر انہیں اوپر آنے سے روکتے رہتے ہیں۔اس سے قبل کہ میں خوشحال لوگوں کے اگلے طبقے کا ذکر کروں‘ یہ ضروری سمجھتا ہوں کہ بتا دوں کہ میں طبقاتی کشمکش پر یقین نہیں رکھتا کہ معاشی بنیادوں پر بپا ہونے والے انقلابات غریبوں کے لئے مزید غربت ہی لے کر آتے ہیں ۔میں نے تو اپنے جیسے مڈل کلاس طبقے اور اس طبقے سے بالاتر امراءاور اشرافیہ کے لوگوں کو صرف یہ حساس دلانا ہے کہ جب تک ملک کے اندر معاشی انصاف نہیں ہوگا بھتہ خوروں کی بھرتیاں جاری رہیں گی اور جرائم پیشہ گروہوں اور انڈر ورلڈ کو انسانی ایندھن ملتا ہی رہے گا۔ آپ بھتے دے دے کر بھی تھک جائیں گے لیکن پھر بھی معاشرتی سکون نصیب نہیں ہوگا۔اپر مڈل کلاس جسے نسلوں تک آسودگی میسر ہے یہ دہری شہریت کے حامل ہوتے ہیں۔ ان کے لئے دبئی اور اسلام آباد میں زندگی کی سہولتیں ایک جیسی سہولتیں ہوتی ہیں ۔ ان کے اوپر ایک طبقہ ہے جسے طبقہ امراءکہتے ہیں۔ ان کے لئے ہر ملک اپنا ہے اور انہیںملکوں اور خطوں کے چند مقامات یاد ہوتے ہیں شائد ملکوں کے نام یاد رکھنا ان کی مجبوری نہیں ہوتی۔ان کی دولت ان کے اپنے اندازوں سے بھی کہیں زیادہ ہوتی ہے۔ ان کے خزانوں میں صرف اضافہ ہوتا ہے کمی نہیں آتی۔یہ قارونی طبقہ پاکستان میں کم نہیں ہے۔سوئٹزرلینڈ کے بینک ان کی رقوم سے بھرے ہوئے ہیں۔میں نے معاشی طبقات کا ایک تاثراتی سا جائزہ پیش کیا ہے۔ جس ملک میں غریب اور امیر میں اس قدر خلیج حائل ہو وہاں ہر روز درجنوں لوگ گھائل نہ ہوں یہ کیسے ممکن ہے۔ اسلام نے اسی معاشی ناہموار ی کے خاتمے کے لئے حسب حیثیت خیرات‘ صدقات‘غریب رشتہ داروں کی مالی معاونت‘قرضہ حسنہ‘زکوٰة جیسے راستے کھولے تاکہ دولت چند ہاتھوں میں منجمد نہ ہو۔ اور پھر آخری حل بتایا کہ ” ضرورت سے جو کچھ زائد ہو اسے راہ خدا میں خرچ کرو“ جب تک ہم اسلام کے اس انقلابی پیغام کو عملاً نہیں اپناتے ہمیں سکون نہیں مل سکتا۔

Click here to View Printed Statement

بھارت میں عورت ذات پر حملوں کی خبریں سُن سُن کر کان پک گئے تھے۔ہرصاحب دل اور ضمیر جب عصمت دری کی خبریں سنتا ہے تو خون کے آنسو روتا ہے۔ آدمیت جہاں ہے وہ شیطانیت کیخلاف آواز بلند کرتی ہے۔ حیوانوں کے غول کسی حوا زادی کی عصمت کی چادر بمبئی میں تار تار کریں یا کسی معصوم دوشیزہ پر انگلینڈ میں حملہ ہوجائے خون کھولتا اور دل مجرموں کو سرعام پھانسی لگتے دیکھنا چاہتا ہے۔اسلام نے تو درندوں کے معاشرے میں عورت کو تقدس کی چادر اوڑھانے کا انقلابی کارنامہ سرانجام دیا اور آج جب کہ ایمان کا درجہ قرون اولیٰ والا نہیں پھر بھی عورت کیخلاف ہر جرم اور زیادتی کو بحیثیت مجموعی مسلمان نفرت اور حقارت سے دیکھتے ہےں۔

مسلمان معاشروں میں سوائے چند مادرپدر آزاد خواتین اور ان کے دم قدم سے دندناتی ہوئی این جی اوز عورت کو حجاب‘شرم اور تقدس سے محروم کرنا چاہتی ہیں لیکن پوری امت اس بات پر متفق ہے کہ عورت ماں ‘ بہن‘ بیٹی‘بہو اور بیوی کے روپ میں مردوں کی نسبت کہیں زیادہ بارعب‘بااختیار اور قابل احترام ہستی ہے۔ ان مقدس رشتوں کو کوئی شیطان یا انسان کے روپ میں چھپا حیوان اگر روندنا چاہے تو اسلام نے ایسے ناسوروں کیلئے دنیا میں سخت ترین سزائیں رکھی ہیں اور قیامت میں ان کے لئے دہکتی ہوئی آگ ہے۔ہم مطمئن تھے کہ کم از کم پاکستان میںسوائے اکا دُکا واقعات کے معاشرہ عورت کے احترام کا غماض ہے۔بھارت میں چونکہ ریاست اور مذہب دونوں اس معاملے میں بہت کاہل ہیں اس لئے وہاں پے در پے ایسے واقعات کی سمجھ آسکتی ہے لیکن پاکستان میں اس طرح کے خوفناک اور مہیب مناظر سمجھ سے بالاتر ہیں۔ایک ایسا ملک جس میں ہر وقت اللہ‘ رسول کا نام لیا جاتا ہو‘ہر وقت قرآن کی تلاوت ہورہی ہوتی ہے اور عورت کے حقوق پر عمدہ قوانین موجود ہیں وہاں درندگی اور شیطنیت کا کھیل کیوں کر جاری ہے۔ننھی بچی کی چیخیںپاکستانیوں کے دل و دماغ میں آج بھی کچوکے لگا رہی ہیں ۔تصور کرکے ہی دماغ پھٹنے لگتا ہے۔ہر صاحب اولاد سمجھتا ہے جیسے اس کی وہ اپنی بیٹی ہے۔اسلام جہاں ایسے قبیح جرائم میں ملوث درندوں کو شدید ترین سزاﺅں کا حکم دیتا ہے وہاں وہ جرائم کی تشہیر کو بھی روکتا ہے۔ لیکن جب سے پاکستانی معاشرہ آزاد میڈیا کے ہاتھوں یرغمال بنا ہے ‘ دہرے عذاب نے گھیر لیا ہے۔ ہمارے ٹی وی چینلز نے اس پانچ سالہ معصومہ کو بھی نہیں بخشا۔ اس کے بدنصیب والدین کی تصویریں ‘اس نیم بے ہوش بچی کی تصویریں ‘ اس واقعہ کو جس طرح نمک مرچ لگا کر ‘ اس کی جزئیات کو ہماری آنکھوں میں اتارا ہے اسی سے یوں لگتا ہے کہ ہمارا اجتماعی شعور ہی گمراہ ہوگیا ہے۔ننھی مجروحہ سب کی بچی ہے۔اخبارات نے اپنی سرکولیشن بڑھانے کے لئے نہ صرف یہ کہ فرنٹ پیج پر اس غریب کی تصاویر شائع کیں بلکہ اسی سے ملتے جلتے حادثات کو ڈھونڈ ڈھونڈ کر نمایاں کیا۔ یہ کیسی لذت صحافت ہے جو شیطانوں کو گلیمرائز کرتی ہے۔یہ ٹی وی کیمرے‘یہ فوٹوگرافر‘یہ کرائم رپورٹرز کیا انہوں نے خدا کو جان نہیں دینی۔اگر ان کی سٹوری نہیں اٹھے گی تو کیا ہوگا‘یہ دنیا سے تو نہیں اٹھائے جارہے۔اللہ نہ کرے کل اپنی کوئی عزیزہ کسی شیطان کے ہتھے چڑھ جائے‘یا کوئی بدنصیب رشتہ دارعورت کسی دھندے میں پکڑی جائے تو کیا یہ سب کچھ ہوگا جو ایک غیرت مند خاندان کے ساتھ کیا گیا ہے۔وہ بچی جوان ہوگی تو اس کے پاس سوائے خودکشی کے کون سا راستہ چھوڑا گیا ہے۔خاکم بدہن! لمحہ بہ لمحہ رپورٹنگ نے مجرموںکو پولیس اور قانون نافذ کرنے والے اداروں کے ہر اقدام اور موومنٹ سے آگاہ رکھا۔ وہ یقیناً ٹی وی دیکھ کر اپنی پوزیشنیں تبدیل کرتے رہے ہوں گے۔عام ناظرین یہ سوچنے پر مجبور ہیں کہ آج کا ہمارا آزاد میڈیا مجرموں کے ساتھ ہے یا مظلوموں کاساتھی۔ ہر جرم ٹی وی سکرین پر دکھایا نہیں جاسکتا۔ امریکہ یورپ اور مبینہ مہذب ممالک میں ایسے جرائم کو اندر کے صفحات پر لے جاتے ہیں اور ایسی خبریں بچوں کے سونے کے بعدنشر کی جاتی ہیں۔لیکن یہاں تو بریکنگ نیوز کی دوڑ نے ہر اخلاقی حد پھلانگ دی ہے ۔سول سوسائٹی میں اگر کچھ بھی شرم ہے تو وہ اس منہ زور اور حیوانی قسم کے میڈیا کیخلاف صف آراءہوجائے ورنہ یہ ہر گھر میں گھس کر خوف اور دہشت پھیلا دے گا۔ لوگ اپنے بچوں سے اخبار چھپاتے پھرتے اور خبرناموں کے سوئچ تبدیل کرتے تھک گئے ہیں ۔کوئی ہے جو اس خوش رہنے والی قوم کو میڈیائی درندوں سے نجات دلائے۔اگر اپر دیر کی شہادتوں کی خبریں نہ آتیں تو ہم آج بھی اپنی بیٹی کے ساتھ ہونے والی درندگی کے مناظر دیکھ رہے ہوتے۔درندوں کو سزا ملنی چاہیے اور انہیں چیرپھاڑ کر رکھ دینا چاہیے۔ لیکن درندگی کے پروموٹرز کا بھی ہاتھ روکنا ضروری ہوگیا ہے۔اللہ پاک کا حکم ہے‘”نیکی اور پرہیز گاری کے کامو ں میں تعاون کرو اور برائی اور گناہ کے کاموں میں تعاون نہ کرو“

قارئین اکرام! میں آپ سے دست بستہ پہلے تو معافی مانگتا ہوں۔میں نے مسلم لیگ (ن) کے انتخابی نعروں اور وعدوں سے متاثر ہو کر ”خوشخبریاں آنے لگیں“ کے عنوان سے کالم لکھا اور اپنے طور پر یقین کر لیا تھا کہ اب عوام الناس کی معاشی حالت بہتر ہوجائے گی۔لیکن گزشتہ دنوں کے پے در پے ایسے حکومتی اقدامات سامنے آئے ہیں کہ مجھے اپنے لکھے ہوئے لفظوں پر شرمندگی ہورہی ہے اور میں ایک بار پھر سے ”حقیقت پسندی“ کی پرخار وادیوں میں الجھ گیا ہوں۔پنجاب فورم نے حکومت سے مطالبہ کیا ہے کہ بھارت کی طرز پر پاکستان میں بھی غرباءکے لئے فوڈ سیکورٹی بل پارلیمنٹ میں لایا جائے اور غریبوں کے لئے سستی دال روٹی کا قانون بنا دیا جائے۔ میں نے اخبارات میں شائع ہونے والی یہ خبر پڑھی تو مجھے سخت افسوس ہوا۔آج پاکستان کے اقتصادی حالات اس نہج پر پہنچ گئے ہیں

کہ روٹی جیسی عام خوراک بھی عام پاکستانیوں کی دسترس سے باہر ہوگئی ہے۔کبھی یہی پنجاب تھا جو پورے متحدہ ہندوستان کو خوراک فراہم کرتا تھا اور پاکستان بننے سے لے کر دو چار ماہ قبل تک کم از کم روٹی کی قیمتیں کنٹرول میں تھیں ۔لیکن آخر یہ کونسی معاشی مہارت ہے جس کے نتیجے میں روٹی کی قیمت ہی کنٹرول میں نہیں آرہی۔زمین اپنی‘ پانی اپنا‘ کھاد کے کارخانے اپنے‘کھاد کے لئے استعمال ہونے والی گیس اپنی‘تندور ٹیکنالوجی اپنی‘ تندورچی اپنے‘ گندم کو آٹے میں تبدیل کرنے والی ملیں بھی پاکستان میں ہی بنتی ہیں۔آخر کیا وجوہات ہیں کہ ہماری اپنی روٹی بھی ہمارا ساتھ نبھانے پر تیار نہیں۔روٹی کا سرکاری طور پر طے کیا گیا وزن ایک سو بیس گرام ہے۔ اور شریف برادران کی حکومت سے قبل یہ روٹی چار یا پانچ روپے میں مل جاتی تھی۔ اب روٹی کا وزن ستر گرام کردیا گیا ہے لیکن قیمت آٹھ روپے تک پہنچ گئی ہے۔خیبرپختونخواہ میں بیس روپے تک روٹی فروخت ہورہی ہے۔آخر کونسی آفت آگئی ہے کہ موجودہ حکومت کے معاشی ماہرین پاکستانیوں کی بنیادی خوراک کو بھی چھین رہے ہیں ۔یہ بات سمجھانے کی ضرورت نہیں کہ سات افراد پر مشتمل کنبہ اگر فی کس روزانہ چار روٹیاں کھاتا ہے تو روزانہ کی کتنی رقم صرف روٹی پر خرچ ہوگی اور ماہانہ ایک کنبے کو چھ ہزار یا دس ہزار روپے میں کس طرح روح اور جسم کا رشتہ برقرار رکھنے کا سلیقہ آئے گا۔ورلڈ بینک اور ورلڈ فوڈ پروگرام نے اپنے تازہ سروے میں انکشاف کیا ہے کہ پاکستان کی ساٹھ فیصد آبادی پہلے ہی کم خوراکی کا شکار ہے۔ صوبہ سندھ‘بلوچستان اور خیبرپختونخواہ میں خوراک کی بدترین صورتحال ہے۔ان صوبوں کے دیہی علاقوں میں مفلوک الحال عوام کو دور سے دیکھیں‘ لگتا ہے ایتھوپیا میں آگئے ہیں۔ایک زرعی ملک کی یہ حالت ہے کہ ماﺅں کو اپنے حصے کی روٹی اپنے بچوں کو دینا پڑ رہی ہے تاکہ بچوں کو کم از کم پیٹ بھر کر کھانا میسر آسکے۔جنوبی پنجاب کے حالات بھی بھوک زدہ ہیں۔ اب جو مہنگائی کا ایک تازہ طوفان ہماری بستیوں میں آیا ہے۔ تو اس کا نتیجہ بھوک سے اموات کی صورت میں نکل رہا ہے۔ سفیدپوش تو بجلی اور گیس کے بل ادا کرتے کرتے ”پھانک“ ہونے والے ہیں‘لیکن جھونپڑیوں اور کچے گھروں میں زندگی گزارنے والے اپنی ہاتھوں سے بوئی جانے والی گندم کی بالیوں کو چھونہیں سکیں گے کہ روٹی کی قیمت بڑھتے بڑھتے امریکہ جتنی ہوجائے گی۔ آمدن صفر اور خوراک کی قیمت نیویارک جیسی! یہ کیسا معاشی انقلاب ہے!وزیرخزانہ جناب اسحاق ڈار صاحب بھی گندم کی روٹی کھا کر ہی بڑے ہوئے اور ایک بار پھر وزیرخزانہ بن گئے۔انہوں نے قوم کو خوشخبری دی ہے کہ ڈالروں کی بارش شروع ہوگئی ہے۔ بین الاقوامی مالیاتی اداروں کو پاکستان کی معاشی اصلاحات پر اعتماد آگیا ہے۔ ڈار صاحب کی ہر خوشخبری عوام کے لئے نیا ڈر لے کر آتی ہے۔دنیا بھر میں خوراک‘ بجلی اور گیس کی فراہمی پر حکومتیں سبسڈی دیتی ہیں ورنہ حکومتوں کی ضرورت ہی کیا رہ جاتی ہے۔لیکن ہمارے وزیر خزانہ ”سبسڈی“ والی لعنت سے قوم کو نجات دلانا چاہتے ہیں اور آئی ایم ایف کے منافع کو یقینی بنانے کے لئے دال روٹی کی قیمت بڑھائے جارہے ہیں۔جو غریبوں کے منہ سے نوالے چھینتے ہیں وہ ڈار نہیں صرف ڈر ہوتے ہیں اور ڈر اور خوف قوموں کو اٹھاتا نہیں بلکہ نفسیاتی اور جسمانی طور پر بیمار کر دیتا ہے۔ بیس کروڑ افراد میں سے اٹھارہ کروڑ بھوکے پاکستانیوں کا بوجھ ڈار صاحب کے کندھوں پر ہے!

اللہ پاک نے قرآن حکیم میں تمام انسانوں اور خصوصاً مسلمانوں کو اپنے روزمرہ کے معاملات باہمی مشاورت سے چلانے کا حکم دیا ہے ۔باہمی مشاورت دراصل جمہوریت کی روح ہے اور ووٹ اور الیکشن مشاورت کے عمل کو ممکن بنانے کا ایک طریقہ ہے۔ جمہوری حکومتوں پر لازم ہے کہ وہ منتخب ہونے کے بعد بھی ریاست کے معاملات وسیع تر مشاورت کے ذریعے طے کرتی رہیں‘جہاں مشاورت کا عمل ختم ہوا وہیں سے جمہوری آمریت نے سراٹھاناشروع کردیا۔مشاورت کا دائرہ کار صرف سرکاری امور تک محدود نہیں رہنا چاہئے۔بلکہ گلی محلے کے مسائل کے حل تک وسیع ہونا چاہیے۔ کسی بھی شہری کو دو طرح کے مسائل سے واسطہ پڑتا ہے۔

ایک کا تعلق تو ریاست اور اس کی پالیسیوں اور قوانین سے ہے اور دوسرا اس کی شہری زندگی اور اس سے متعلقہ امور سے ہے۔ صوبائی اور قومی پارلیمان کا کام قانون سازی کرنا ہے۔ اگر وہ ایسے قوانین بنائیں جن پر عمل درآمد سے عام شہری کی زندگی میں خوشحالی آئے اور احساس تحفظ ابھرے تو ہم ایسے قوانین کو فلاحی قوانین کہتے ہیں۔ہر وہ قانون جو انسان کے بنیادی حقوق کا تحفظ کرے وہ دراصل ”ہیومنٹرین لا“ کہلائے گا۔ اور جو جمہوری حکومت ایسے قوانین کا اجراءکرے اسے انسانی حقوق کی محافظ حکومت کہنا چاہیے۔اسلام کی تعلیمات اور آئین پاکستان میں قرارداد مقاصد کی روشنی میں انسانی حقوق کے خدوخال واضح کردیئے گئے ہیں۔ ہمیں یاد رکھنا چاہے کہ مسلمانوںکے انسانی حقوق بعض حدود کے اندر ہیں۔ ہم جنس پرستی اور دیگر حیوانی اور شہوانی خواہشات کو انسانی حقوق کے نام پر قبول نہیں کرسکتے۔ بہرحال قوانین کا دائرہ پارلیمان کے اختیار میں آتا ہے۔شہری حقوق بھی دراصل انسانی حقوق ہی ہیں۔ صاف پانی کی فراہمی ‘سڑکوں کی کشادگی‘ذرائع آمدورفت کی فراوانی‘ تعلیم اور صحت کے لئے سہولتیں اور سیوریج اور صفائی کے تمام معاملات بنیادی انسانی حقوق سے ہی منسلک ہیں۔لیکن یہ ایسے معاملات ہیں جن کے لئے شہریوں کو پارلیمنٹ اور ممبران پارلیمنٹ کے دروازے پر دستک دینے کی حاجت نہیں ہونی چاہیے۔ ایک گلی کے لوگ آپس میں مشاورت کرکے الیکشن کے ذریعے اپنے نمائندے منتخب کرکے اپنے ”سوک اشوز“کو حل کرسکتے ہیں۔پھر محلے کی سطح پر اور پھر قصبہ اور شہری کی بنیاد پر ایک نیٹ ورک بنایا جاسکتا ہے۔ اسی سوچ کو ”مقامی حکومتوں“ کے عنوان کے تحت عملی جامہ پہنایا جاتا ہے۔پاکستان میں بدقسمتی سے مقامی حکومتوں کا کبھی بھی کوئی موثر نظام نافذ نہیں ہوسکا۔سیاسی پارٹیوں کی ضد ہوتی ہے کہ گلی محلے کی حکومتوں میں بھی انہی کے نمائندے آگے آئیں۔ آمریت کے دور میں غیر سیاسی بنیادوں پر مقامی حکومتیں بنائی جاتی ہیں۔ یوں عوام کے مسائل کے حل کے وقت پارٹی پالیٹکس اور آمریت کا اثرورسوخ حاوی رہتا ہے۔ترقی یافتہ قوموں نے مقامی حکومتوں کے نظام کو بڑی کامیابی کے ساتھ آگے بڑھایا ہے اور شہر کے میئر کی ذمہ داری ہے کہ وہ شہریوں کے مسائل کو مشاورت سے حل کرے‘اس کے لئے اسے مرکزی حکومت کی طرف نہ دیکھنا پڑتا ہے نہ ہی اسے مالی معاونت کی ضرورت ہوتی ہے۔پولیس بھی میئر کے تابع ہوتی ہے اور یوں امن وامان کا مسئلہ بھی نہیں بگڑتا۔سپریم کورٹ کی طرف سے مقامی حکومتوں کے انتخابات کا حکم آچکا ہے۔ بعض صوبوں نے اس پر کام بھی شروع کردیا ہے۔ توقع یہی ہے کہ بہت جلد یہ مرحلہ طے ہوجائے گا۔لیکن ضرورت اس امر کی ہے کہ منتخب میئر‘یا کونسل چیئرمین پارٹی پالٹیکس سے بالاتر رہیں۔جہاں پارٹی آتی ہے وہیں نفاق شروع ہوتا ہے‘جمہوری سوچ کا گلہ دبا دیا جاتا ہے اور شہریوں کے شہری اور انسانی حقوق غصب ہونا شروع ہوجاتے ہیں ۔متنازعہ مقامی حکومتیں صرف تنازعات پیدا کریں گی اور عوام ان حکومتوں کے معرض وجود میں آجانے کے بعد بھی بے مقام ہی رہیں گے۔

Click here to View Printed Statement

سیاستدانوں نے قومی اسمبلی اور سینٹ کے اجلاسوں میںدل کھول کر ایک دوسرے کی دُرگت بنائی ہے۔تنگ آمد بجنگ آمد کے مصداق وزیر داخلہ نے اپوزیشن کو جواب آں غزل جو سنائی تو ذرائع ابلاغ بھی عش عش کر اٹھے۔ سکندر بمقالہ زمرد کے نت نئے پہلو سامنے آچکے ہیں جن میں سے بعض دلچسپ’کچھ حسرتناک اور چند عبرتناک بھی ہیں۔ اس واقعہ سے کون کیا سیکھتا ہے۔ یہ اپنے اپنے ظرف کی بات ہے۔بہرحال عوام جو کہ تماشبین ثابت ہوئے۔ پولیس جو کہ نااہل ثابت ہوئی ‘میڈیا جو کہ غیر ذمہ دارثابت ہوا اور حکمران جو کہ متذبذب ثابت ہوئے۔ اگر چاہیں تو اپنی اپنی حدود میں رہ کر خود احتسابی کا عمل مکمل کرسکتے ہیں اور یوں ہم آنے والے اس نوعیت کے حادثوں میں مناسب ردعمل کے اظہار کا سلیقہ سیکھ سکتے ہیں ۔

لیکن اگر مقصد ایک دوسرے کو نیچا دکھانا اور پوائنٹ سکورنگ ہو تو پھر سکندر آئندہ بھی یوں ہی آتے رہیں گے اور زمردخان بھی ایسے ہی پیدا ہوتے رہیں گے۔سکندر شو سے متعلقہ تمام اداروں اورافراد کے منہ میں زبان ہے اور وہ بڑے دھڑلے کے ساتھ اپنا اپنا مئوقف لوگوں تک پہنچا رہے ہیں لیکن اس شو کے اصل فریق جس کی کھچائی کے لئے ہر کوئی ادھارکھائے بیٹھا ہے’اس کی کوئی سنتا ہے نہ ہی سننے دیتا ہے۔اگر پولیس کو سٹن گن چلانا نہیں آتی تو اس پر تضحیک آمیز انداز میں قہقے لگانے کا کیا جواز ہے؟ کیا یہ حقیقت نہیں کہ ہماری پولیس کو حکومت مخالف پارٹیوں کو دبانے اور جلسہ گاہوں کی رونقیں بڑھانے کے لئے بھرتی کیا جاتا ہے۔ کس دور میں کب کسی نے اس پولیس سے کہا ہے کہ آپ کا فرض جدید کرائم کے خلاف کارروائی کرنا ہے۔ آپ پولیس کی تمام اکیڈمیوںکا ریکارڈ نکلوا کر دیکھ لیجئے۔ وہاں ”سٹن گن” کا ذکر تک نہیں ہوگا۔ جب پولیس کو ”سکندر شو” جیسے واقعات سے نپٹنے کی کوئی ٹریننگ ہی نہیں دی گئی تو پھر پولیس پر قہقے لگانے سے پہلے خود اپنی سوچ ‘مزاج اورسیاسی ترجیحات پر بے رحم قہقہ لگایئے۔آپ کیکر کے درخت سے آم حاصل کرنا چاہتے ہیں تو یہ آپ حکمران طبقے کا دماغی فتور ہے پولیس کا قصور نہیں۔اگر بعض پولیس افسران نے جناب زمرد خان کو سکندر تک پہنچنے کا موقع فراہم کیا ہے تو اس کے پیچھے بھی پولیس کی نفسیات میں بھرتی سے لے کر پروموشن تک شخصی اور سیاسی تعلقات کی اہمیت کارفرما ہے۔ پولیس کو عوام کے جان و مال کے تحفظ کی بجائے مختلف شخصیات کی چاپلوسی کی راہ کس نے دکھلائی ہے۔پولیس کو کس نے حکومتی اثر سے پاک رکھنے کی کوشش کی ہے۔سب حکمران اپنے اپنے گریبانوں میں جھانکیں۔انشاء اللہ مایوسی ہوگی۔پولیس سے یہ توقع کرنا کہ وہ ”آئی ٹی ایکسپرٹ” کے طور پر بھی کام کریں گے’ بالکل عبث ہے ۔ جس ایس ایچ او کو عام کمپیوٹر چلانا نہیں آتا وہ القاعدہ کے نیٹ ورک میں کیسے گھس جائے گا۔ آن لائن ایف آئی آر کے پروگرام کا حشر یہ ہورہا ہے کہ سینئر پولیس افسران اپنے ”ڈیکسٹاپ” کھول کر آن لائن ڈیٹا دیکھنے کی بجائے ہر وقت پرنٹ حاصل کررہے ہوتے ہیں۔مجھے کینٹ کے ایک تھانے میں ایک سال قبل کسی مظلوم کے ساتھ جانے کا اتفاق ہوا۔وہاں ایک سائل محرر صاحب کو اے ٹی ایم کارڈ چرائے جانے کی شکایت کر رہے تھے اور جناب محرر باربار پوچھتے تھے”ایس کارڈ نال کی کردے او”۔جہاں آئی ٹی سے واقفیت کا یہ عالم ہو وہاں جدید طرز کے کرائم کو یہ پولیس تو کنٹرول نہیں کرسکتی۔ پولیس کی جدید خطوط پر تربیت کے بڑے دعوے سامنے آئے لیکن عملاً معاملہ جوں کا توں ہے۔پولیس پرگرجنے اور برسنے سے پہلے ان کی تربیت کا مناسب بندوبست کیجئے۔ ان کے مالی معاملات کو باعزت بنایئے۔ ان کے ڈیوٹی اوقات کو انسانی حدود میں لایئے اور پھر ان سے نتائج کی توقع  کیجئے۔ اور کچھ بھی نہ کریں تو کم از کم پولیس والوں کا مئوقف تو ضرور سن لیا کریں ۔یکطرفہ رگڑا مزید شرمندگیوں کو جنم دے سکتا ہے۔ پولیس سے نفرت نہیں۔پولیس کی عزت کیجئے اس سے آپ کی اپنی عزت میں اضافہ ہوگا۔

Click here to View Printed Statement

عقل محو تماشاہی رہی اور عشق نے چھلانگ لگا دی۔ دانش مندی اور معاملہ فہمی کا تقاضا تو یہی تھا کہ ایک غیر تربیت یافتہ’جسمانی طور پر ان فٹ اور اسلحہ کے اعتبار سے مکمل طور پرنہتا شخص ایک مسلح’بپھرے ہوئے اور مرنے مارنے پر تلے بیٹھے پاگل کو قابو کرنے کی کوشش نہ کرتا بلکہ ایسا سوچنا بھی حماقت کے زمرے میں آتا ہے۔ عقلمندوں کے نزدیک کوئی احمق آدمی جس کوجان بوجھ کر اپنی جان ضائع کرنے کا شوق ہو وہی ایسی حرکت کرسکتا ہے۔

اگر خدانخواستہ سکندر نامی پاگل کی گولی زمرد خان کو لگ جاتی اور اس کے نتیجے میںخان صاحب کو جانی نقصان ہوجاتا تو پاکستانی قوم کو مایوسی کے سوا کیا ملتا۔ یہ سارے دلائل اپنی جگہ وزن رکھتے ہیں۔لیکن مملکت پاکستان کو دہشتگردوں اور مسلح پاگلوں نے  جس طرح آگے لگا رکھا ہے اور عقل مند ان کے مقابلے پر بے بس دکھائی دیتے ہیں۔ایسی صورت میں عام پاکستانی کا دل دُکھتا بلکہ خون کے آنسو روتا ہے۔ پندرہ اگست کی رات بلیو ایریا کے چائنا چوک پر حافظ آباد سے تعلق رکھنے والے ایک حواس باختہ درندے اور اس کی شاطر بیوی نے جس طرح دارالحکومت کی اعصابی فضاء کو اپنے قابو میں جکڑے رکھا اس پانچ گھنٹے کے اعصاب شکن منظر کو دیکھ دیکھ کر لوگوں کے اندر غصے اور حیرت کے جذبات بھڑکتے رہے۔ ٹی وی چینلز کا کردار تو ہمیشہ منفی ہی رہتا ہے۔ لیکن اس رات منفیت کی آخری حدوں کو چھو رہا تھا۔ سچ تو یہ ہے کہ میڈیا نے اس پاگل کو پانچ گھنٹے تک تحفظ فراہم کئے رکھا۔ پولیس کو کوئی کارروائی کرنے کے لئے موقع ہی نہیں دیا گیا۔گولی کی پہنچ چار سو میٹر تک کارگر ہوتی ہے اور میڈیا کی فوج ظفر موج پاگل کے قریب تر ہونے کے لئے بضد رہی اور پولیس بیچاری کو ہاتھا پائی پر مجبور کردیا۔پولیس کی اپنی حکمت عملی تھی وہ اپنے ٹارگٹ کو اعصابی طور پر مجروح کرنا چاہتی تھی لیکن ذرائع ابلاغ کے طعنوں’اور اشتعال انگیزیوں کے سامنے سیکورٹی ادارے بے بس ہوگئے تھے۔اسلام آباد کے شہری بھی تماشا دیکھنے موقع پر موجود تھے۔پیپلزپارٹی کے رہنما جناب زمرد خان جو جوانی میں اسلحہ چلانے کے ماہر بتائے جاتے ہیں وہ ہمیشہ سے بہادر تھے۔لیکن پولیس کو انہوں نے اپنی آمد کا جو مقصد بتایا وہ یہی تھاکہ ”پاگل ”کو اس کے بچوں کا واسطہ دے کر ہتھیار ڈالنے پر قائل کردیا جائے۔پولیس نے ”پاگل” کی بیوی کے ذریعے جناب زمرد خان کا تعارف کروایا اور جب ”پاگل” بات چیت پر آمادہ ہوگیا تو جناب زمرد خان مذاکرات کے لئے اس کے پاس چلے گئے۔اور پھر اچانک جو ہوا وہ عقل کو دنگ کردینے والا منظر تھا۔پاکستان کو زخمی کرنے والے دہشتگرد پاگلوں اور پاگل دہشتگردوں کو یہ احساس ہوگیا ہوگا کہ پاکستانی قوم میں زمرد خان بھی ہوتے ہیں جن کی قومی غیرت کو گوارا نہیں کہ کوئی اسلحہ کے زور پر شہر اور ملک کو یرغمال بنائے اور یہ نڈرلوگ  نتائج کی پرواہ کئے بغیر مسلح ہاتھوں کو مروڑ سکتے ہیں۔اگر زمردخان اس پاگل پر نہ چھپٹتا تو بھی پولیس گھٹنے بھر کے بعد آپریشن پر گزرتی لیکن زمرد خان کی ”ادا” ایک ریفرنس بن گئی۔ہماری ڈوبتی قومی حمیت کو زمردخان کی ہمت نے سہارا دے ڈالا۔جو معرکے عقل اور حقیقت پسندی سے سرنہ ہو رہے ہوں انہیں سر پھرے لوگ ہی سر کرتے ہیں۔ عقل مندوں کی دنیا چاہے زمرد خان کے اس عمل کو احمقانہ عمل قرار دیتی رہے لیکن دھڑکتے دلوں کی آواز زمرد خان کے ساتھ دھڑکتی رہے گی۔ پاکستان کے حالات کا تقاضا ہی یہی ہے کہ جنون’عشق اور جذبے والے چند سرپھرے لوگ آگے بڑھیں اور قوم کو حوصلہ فراہم کریں ۔بہادری حکمت پر غالب آئی۔زمرد خان کو کسی اعزاز کی نہیں فقط دعائوں کی ضرورت ہے اورملک کو چند زمردخانوں کی ضرورت !۔

Click here to View Printed Statement

جب اپنے وطن میں روٹی روزی کے ذرائع محدود اور بے روزگاری لامحدود ہوجائے تو پھر دیارِ غیر جا کر قسمت آزمائی کرنی چاہیے۔ ہجرت تجارت کی غرض سے ہو یا تعلیم کی غایت سے ہو۔ یہ ابن بطوطہ کا سفر ہو یا کولمبس کی سمندر پیمائی ہو’ہجرت کی کلفتیں اورمصیبتیں اپنی جگہ مگر اس کے نتیجے میں بہتری ضرور آتی ہے۔اپنے مالی حالات بہتر بنانے کے لئے ہم گائوں سے شہر اور شہر سے دوسرے شہر ہجرتیں کرتے ہیں۔اسی کے نتیجے میں نئی نئی آبادیاں جنم لیتی ہیں۔ایک دوسرے کی زبانیں سمجھتے ہیں’ایک دوسرے کے رہن سہن اپناتے اور ہنرمندی کو سیکھتے ہیں۔عربی کا محاورہ ہے ”سفر ایک زحمت ہے” لیکن یہ بھی حقیقت ہے کہ ”سفر وسیلہ ظفر” بھی ہوتا ہے ۔دونوں محاوروں کا مشترکہ مفہوم یہ کہ ہجرت جدائی اور سفر کی مشکلات اگر برداشت کر لی جائیں تو پھر کامیابی مل جاتی ہے۔رزق کی تلاش میں اس کرہ ارضی پر چلنے پھرنے کا قرآن نے باقاعدہ حکم بھی دیا ہے۔

ہجرت کوئی آسان کام نہیں ہے۔خصوصاً جب آپ رزق کی تلاش میں اپنے پیاروں کو امیدوں کے سہارے چھوڑ کر دیارغیر جابستے ہیں تو جدائی کا عذاب سہنا پڑتا ہے۔ہمارے ایک کروڑ کے لگ بھگ بھائی اور بیٹے جو ”تارکین وطن” کہلاتے ہیں بسلسلہ روزگار تارک وطن ہوچکے ہیں۔وہ یورپ’ امریکہ’جاپان اور گلف میں ہر طرح کی مزدوری کرتے اور خدمات انجام دیتے ہیں۔جو اٹھارہ بیس برس کی عمر میں وہاں پہنچے تھے واپسی کی خواہش پر وہیں بوڑھے ہوگئے۔ا ن کے بیٹے بھی وہیں ان کے پاس گئے اور اب وہ بھی بڑھاپے کو پہنچ رہے ہیں۔دونسلوں کو دیارِ غیر کی مٹی چاٹ چُکی ہے۔ ان پاکستانیوں میں سے اکثر جان پر کھیل کر یورپ پہنچے۔بعض تو راستے میں ہی گھائل کر دیئے گئے اور بعض عرصہ دراز تک روپوش رہے۔بیروزگاری ‘غربت اور مہنگائی کے ستائے ہوئے ہمارے گھبر و جوان ”تارک” ہونے کے لئے کیا کیا”تج”کر گئے۔آج پاکستان ان ممالک میں سرفہرست ہے جن کی افرادی قوت نے دنیا بھر میں اپنی محنت اور صلاحیت کا لوہا منوایا ہے۔ یہ سچ ہے کہ یہ لوگ پاکستان چھوڑکر گئے کہ بھوک ان کے تعاقب میں تھی۔لیکن جوں ہی انہیں پیٹ بھر کر کھانا ملا تو سب سے پہلے انہوں نے پیچھے کی طرف دیکھا۔ اپنی مزدوری’تنخواہ اور منافع سب کچھ پاکستان بھجوایا ہے اور آج ان کی بجھوائے جانے والی رقوم کا حجم ساڑھے تیرا ارب ڈالرز سالانہ تک جا پہنچا ہے۔گزشتہ دنوں سعودی عرب کے سرکاری ٹی وی ”الاقتصادیہ” کے نمائندے اور پاکستانی معیشت پر گہری نگاہ ر رکھنے والے حیطم ناصر اوورسیز پاکستانیوں کے حوالے سے انٹرویو کرنے میرے آفس تشریف لائے۔انہوں نے پوچھا”’اوورسیز پاکستانی جو رقومات بھجواتے ہیں ان کی پاکستانی معیشت کے لئے کیا اہمیت ہے”۔ میں نے ”الاقتصادیہ” کے نمائندے کوجواب دیا”’بیرون ممالک مقیم پاکستانیوں کی ترسیلاب زر کے طفیل ہی ہمارے زرمبادلہ کے ذخائر کو سانس لینے کا موقعہ مل رہا ہے۔اگر ساڑھے تیرہ ارب ڈالرز کے لگ بھگ ہر سال پاکستانی معیشت کو آکسیجن کا یہ ٹیکہ نہ لگتا تو ہم کب کے ڈیفالٹ کرچکے ہوتے۔اوورسیز پاکستانی بیرون ممالک سے ڈالرز’ریال اور درہم بھجواتے ہیں اور حکومت ان سے غیر ملکی کرنسی لے کر انہیں پاکستانی روپے دے دیتی ہے۔اس طرح ہمارے زرمبادلہ کا حجم پھول جاتا ہے”۔”الاقتصادیہ” کا اگلا سوال سعودی عرب میں پھنسے غیر قانونی پاکستانیوں کو تین ماہ کی اضافی مدت کے حوالے سے تھا۔جس کے جواب میں راقم نے کہا ”سعودی عرب کی حکومت نے پاکستان سے اپنی غیر مشروط محبت کا ثبوت دیا ہے۔ اب پاکستانیوں کو چاہیے کہ اگر ان کے کاغذات مکمل نہیں تو وہ رضاکارانہ طور پر واپس آجائیں۔میزبان ملک کے قوانین کا احترام بہرطور لازمی ہے۔”قارئین !یہ ایک ضمنی سا تذکرہ  آگیا ہے۔اصل بات یہ کہ جو پاکستانی رزق کی تلاش میں بیرون ملک ہجرت کر گئے ہیں  انہیں ”تارکین وطن” کہنا بہت بڑی زیادتی ہے۔پاکستان سے دور ہوتے بھی انہوں نے اس دھرتی کو ”ترک” نہیں کیا۔ وہ اپنی ساری بچتیں اور ساری محبتیں پاکستان پر نچھاور کر رہے ہیں۔ان کی اس عظمت کو ہمیں یاد رکھنا چاہیے۔جن ہاتھوں نے اپنے’اپنے گھر والوں اور اپنے ہم وطنوں کے لئے رزق اور خوشحالی کے لئے کام کیا’ ان ہاتھوں کو بوسہ دینا چاہیے۔

Click here to View Printed Statement

ایبٹ آباد کمیشن رپورٹ پڑھتے جایئے اور شرماتے جایئے۔ جو لوگ اس رپورٹ کو جعلی ثابت کرنے پر تلے ہیں انہیں شائد معلوم نہیں کہ کمیشن کے سربراہ جناب جسٹس (ر) جاوید اقبال نے اسے قعطاً جعلی قرار نہیں دیا بلکہ ذرائع ابلاغ سے یہ اپیل کی ہے کہ وہ مندرجات سے نتیجہ صحیح اخذ نہیںکرپائے۔رپورٹ الجزیرہ ٹی وی نے چلائی اور پاکستانی میڈیا میں جنگل کی آگ کی طرح پھیلی۔ سیکورٹی اداروں سے وابستہ بااختیار لوگ پہلے حیران ہوئے اور پھرناراض ہوگئے۔کچھ بداندیشوں نے اس کی ”ٹائمنگ” کا سوال اٹھایا اور بعض نے اسے نوازشریف حکومت اور فوج کے درمیان صحیح خلیج بڑھانے کا منصوبہ قرار دیا۔حکومت نے ان خبروں کا بھرپور تاثر لیا اور رپورٹ لیک ہونے کے بارے تحقیقات کا اعلان کیا۔”کس نے کیسے یہ رپورٹ چرائی ہے؟”۔ اس سوچ کے تحت اب کئی ایجنسیاں چھان بین کر رہی ہیں اور بعض لوگ زیرنگرانی آچکے ہیں اور کئی ایک پکڑے بھی جائیں گے۔ یہ کام بھی ہونا چاہیے کہ قومی راز افشا کرنے کا رجحان بہت ہی خطرناک ہوتا ہے۔فرض کیا کہ قومی راز فروخت کرنے والا پکڑا جاتا ہے اور اسے کوئی سزا بھی ہوجاتی ہے تو کیا

اس سے یہ حقیقت تبدیل ہوجائے گی کہ امریکہ نے 2مئی کو ایبٹ آباد شہر میں گھس کر دنیا کے سب سے مطلوب شخص اسامہ بن لادن کو جاں بحق کردیا تھا۔ کیا پکڑنے سے رپورٹ کے مندرجات سے انکار کیا جاسکتا ہے۔کیا یہ حقیقت نہیں کہ رپورٹ میں بظاہر کسی ادارے یا شخص کا نام لے کر کسی کو ذمہ دار نہیں ٹھہرایا گیا لیکن آئی۔ایس ۔آئی’پولیس’آئی بی اور سب سے بڑھ کر زرداری حکومت کو مکمل طور پر نااہل اور ناکام قرار دیا گیا ہے۔آئی۔ایس۔آئی کے اہلکاروں اور افسروں کے غرور اور تکبر کی نشاندہی کی گئی ہے۔عام پاکستانی تو آج بھی یہ یقین کرنے پر تیار نہیں کہ آئی۔ایس۔آئی جیسی ایجنسی کو پانچ برس تک معلوم ہی نہیں ہوسکاکہ اسامہ بن لادن انہی کے ہاں ”مہمان” بن کر رہ رہا تھا۔ پھر یہ سوال کہ ہیلی کاپٹروں کا شور بھی ہمارے محافظوں کو جگا نہ سکا کس قدر تکلیف دہ ہے اور جو جاگ گئے تھے انہوںنے کسی قسم کا ردعمل ظاہر کرنا ضروری نہ سمجھا۔ سقوط ڈھاکہ سے بھی بڑا سانحہ ہوگیا لیکن کسی ”غیرت مند” نے رضاکارانہ طور پر بھی استعفیٰ دینا مناسب نہ سمجھا۔ صدر’وزیراعظم ‘آرمی چیف کوئی بھی ذمہ دار نہیں تو پھر اس ملک کے دفاع کی ذمہ داری الماس بوبی کھسرے کے حوالے کردی جائے کم از کم وہ ہجڑوں کی جماعت کے ساتھ تالیاں بجا کر ٹھمکا لگا کر دشمن کوحواس باختہ تو کر ہی دے گا۔آئی۔ایس۔آئی کے سابق چیف جنرل (ر) شجاع پاشا کو ریٹائرڈ ہوتے ہی دبئی میں نئی نوکری مل گئی۔ رپورٹ کیسے چوری ہوئی یہ ایک اہم معمہ ہے لیکن رپورٹ جو کہہ رہی ہے اس پر سر جوڑ کر بیٹھنا اور آئندہ کے لئے اپنی اصلاح کرنا اس سے کہیں ضروری ہے۔ہم جناب میاں محمد نوازشریف سے ایک پاکستانی کی حیثیت سے سوال کرتے ہیں کہ اگر امریکہ پاکستان پر حملہ آور ہوتے ہوئے پھر کسی ”ایبٹ آباد” میں چھپے کسی ”الظواہری” کے کمپائونڈ میں اترتا ہے اور وزیراعظم کو اطلاع دی جاتی ہے تو جناب نوازشریف کیا کریں گے؟۔حکومت کو صرف یہی سوال ذہن میں رکھ کر سیکورٹی پلان از سر نو ترتیب دینا چاہیے۔اس رپورٹ میں بہت سے انکشافات ہوچکے ہیں۔فتح اور شکست تو بعد کی بات ہے اگر بغیر مقابلہ کئے ہی ڈھیر ہوجانا ہے تو پھر شیر کی جگہ کسی مناسب جانور کا انتخاب کر لیجئے تاکہ قوم مغالطے میں نہ ماری جائے۔خفیہ اداروں میں کام کرنے والے کارکنوں کی حوصلہ افزائی بہت ضروری ہے۔ ان کا ومرال بلند کرنے کے لئے پانچ گھنٹے نہیں پانچ روز ان کے پاس گذاریں کہ وہ سب بھی پاکستانی ہیں لیکن خطاکاروں کو ”تھاپڑا” مت ماریں ورنہ اس سے ان لوگوں کی حوصلہ شکنی ہوتی ہے جو اپنی جان ہتھیلی پر رکھ کر دہشتگردوں کی کھچاروں میں گھستے اور ان کو کیفرکردار تک پہنچاتے ہیں۔ایجنسیوں کے اندر اصلاحات’ میرٹ’کارکردگی کے کڑے معیار کو لاگو کرنا وقت کی اہم ترین ضرورت بن گئی ہے۔سول و ملٹری ایجنسیوں کے دائرہ کار کا از سر نو جائزہ لیا جانا ضروری ہے۔رپورٹ بار بار کہہ رہی ہے کہ جاگ جائو’جاگ جائو۔کیا ہم اب بھی سوئے رہیں گے!!

Click here to View Printed Statement

سٹاک ایکسچینج پھر بلندیوں کو چھو رہی ہے۔کارپوریٹ سیکٹر سرمایہ کاری اور روزگار  کے حوالے سے پرامید ہوچکا ہے ۔نندی پور پاور پراجیکٹ پر دو برسوں سے رکا ہوا کام پھر سے شروع ہورہا ہے۔ریلوے کے سسٹم کی بہتری کے لئے پانچ سو ملین روپے مہیا کردیئے گئے ہیں۔پرائیویٹ بجلی گھروں کو پانچ سو ارب روپے کی ادائیگی کردی گئی ہے۔درجنوں نئی چینی کمپنیاں سرمایہ کاری کے لئے پاکستان کا رخ کر رہی ہیں۔برطانوی حکومت پنجاب کے اندر تعلیم کے شعبہ میں پائونڈ خرچنا چاہتی ہے۔اور بہت سے منصوبے پائپ لائن میں ہیں اور سب سے بڑی خوشخبری یہ کہ میاں نوازشریف کی حکومت نے بھی پاک ایران گیس پائپ لائن منصوبے کو جاری رکھنے کانہ صرف عندیہ دیا ہے بلکہ 2014ء تک مکمل کرنے کا عہد بھی دھرایا ہے۔لوڈشیڈنگ کا دورانیہ دھیرے دھیرے کم ہوتا دکھائی دے رہا ہے۔ اگرچہ کم ہونے کی رفتار بہت ہی کم ہے

اور اگر رفتار یہی رہی تو بقول وفاقی وزیر گیس و بجلی لوڈشیڈنگ پر مکمل طور پر قابو پانے میں تیس سال لگیں گے۔لیکن عوام کو یہ محسوس کرکے حیرت انگیز خوشی ہوئی کہ افطار و سحر کے وقت نوے فیصد علاقوں میں لوڈشیڈنگ نہیں ہورہی ہے۔حالانکہ ایسے اعلانات گزشتہ آٹھ برسوں میں ہوتے رہے لیکن عملدرآمد نہ ہوسکا۔ یہ توفیق میاں نوازشریف کو ملی کہ کم از کم وہ اپنے اعلان کو سچا ثابت کرپائے۔ہر روز خبریں آتی ہیں کہ بڑے بڑے سکینڈل افشاء ہوتے ہیں۔حالانکہ پی پی پی پی رہی نہ اس کی حکومت لیکن کرپشن کہانیاں نت حیرتیں بکھیرتی ہیں۔عام پاکستانی حیران ہوتا ہے کہ کیا زرداری حکومت کا کام صرف کرپشن’ کرپشن اور کرپشن ہی تھا۔کونسا محکمہ اور کونسی کارپوریشن ایسی ہے جہاں ڈاکہ نہیں پڑا۔جہاں نقب نہیں لگائی گئی ‘ جہاں نوسربازی نہیں ہوئی۔پہلے میرا خیال تھا کہ جناب زرداری کے ساتھ اٹھنے بیٹھنے والے نااہل تھے اس وجہ سے ان کی ناک کے نیچے ملک کو لوٹا جاتا رہا اور انہیں خبر نہ ہوئی ۔لیکن اب یہ میرا یقین ہے کہ مسند اقتدار تک پہچنے والے کم و بیش سارے ہی لوگ خائن تھے’ بددیانت تھے اور انتہائی چالاک اور سفاک!مالی کرپشن کرنے والے لوگ معصوم ذہن نہیں ہوتے بلکہ شاطر ذہن ہوتے ہیں۔قارئین! جب کوئی کرپٹ افسر یا سیاستدان یا جرنیل پکڑا جاتا ہے تو عوامی ہمدردیاں اس کے ساتھ ہوجاتی ہیں۔ٹرانسپرنسی انٹرنیشنل کی حالیہ رپورٹ کے مطابق پاکستان کے تمام طبقات اور ادارے کسی نہ کسی لیول کی کرپشن میں ملوث ہیں۔ لیکن دلچسپ پہلو یہ ہے کہ میڈیا’ملٹری اور ملاں انیس بیس کے فرق سے لوٹ مار میں ایک جیسے ہی ملوث ہیں۔پارلیمنٹرین اور پولیس کا درجہ ذرا سا اوپر ہے۔مجھے ڈر اس بات کا ہے کہ پاکستان جونہی ترقی کی شاہراہ پر آگے بڑھے گا کرپشن کے جن اور بھوت گھات میں بیٹھ جائیں گے اور جوں ہی حکمران ترقی کے تصور سے شاداب ہونے لگیں گے ان کی صفوں میں گھسے کرپٹ مافیا کو لوٹ مار کا موقع مل جائے گا اور بظاہر ملک ترقی کر رہا ہوگا لیکن اندر ہی اندر سے کھوکھلا بھی ہو رہا ہوگا۔یہ ضروری نہیں کہ ہر دور میں ٹرانسپرنسی انٹرنیشنل یاپاکستان اکانومی واچ جیسے ادارے حکومتوں کی کرپشن کہانیاں سامنے لائیں تو پھر پکڑ دھکڑ ہو بلکہ احتساب کا ایسا خود کار نظام وضع کرنے کی ضرورت ہے کہ سرمایہ کاروں اور کاروباری حلقوں کے جڑے اعتماد کو پھر کوئی ٹھیس نہ پہنچا سکے!