معروف معنوں میں نظرء یہ پاکستان دو قومی نظرء یہ ہے جس کی بنیاد پر 1947ء میں ہندوستان کی تقسیم ہوئی اور پاکستان معرض وجود میں آگیا۔قائداعظمؒ انگریز سامراج اور ہندو اکثریت کو اپنی سالہا سال کی جدوجہد کے دوران یہ باور کراتے رہے کہ ہندوستان میں مسلمان اور ہندو دو قومیں ہیں جو تہذیبی‘مذہبی‘سیاسی اور تاریخی لحاظ سے بالکل مختلف ہیں ۔ہندوؤں نے مسلمانوں سے اپنی سدا بہار نفرت کے ذریعے بالآخر انگریزوں کو قائداعظمؒ کا مؤقف تسلیم کرنے پر آمادہ کردیا اور پاکستان کا قیام ممکن ہوگیا۔
دو قومی نظریہ نے ہی ثابت کیا کہ قومیں زبان‘رنگ اور نسل کے اعتبار سے ہی مختلف نہیں ہوتیں بلکہ مذہب کی بنیاد پر ان کی جداگانہ حیثیت قائم ہوتی ہے۔ اقبالؒ نے اسی طرف اشارہ کرتے ہوئے فرمایا تھا‘ قوم مذہب سے ہے مذہب جو نہیں تو کچھ بھی نہیں‘‘۔ہندوستان کے رہنے والوں کا رنگ ایک جیسا تھا‘ زبان ایک جیسی تھی اور شائد نسلی حوالے بھی ایک جیسے تھے۔ذات کے اعتبار سے ایک دوسرے کیساتھ جڑے ہوئے تھے لیکن مسلمان اللہ کے پیروکارجبکہ ہندوبت پرست۔ اگر تو اسلام کی جگہ کوئی اور مذہب ہوتا تو شائد معاملہ مختلف ہوتا لیکن اسلام کی تعلیمات مسلمانوں کو غیر مسلموں کی سماجی اور مذہبی برتری قبول کرنے سے روکتا ہے۔ یہ صحیح ہے کہ ہزار سال تک مسلمان اور ہندو مشترکہ طور پر اس خطے میں ز ندگی گذارتے رہے تھے لیکن یہ اسی صورت ممکن ہوا تھا کہ مسلمان اقلیت میں ہونے کے باوجود سیاسی اور مذہبی طور پر بالاتر تھے اور حکومت مسلمانوں کے پاس تھی۔ اسلام اپنے ماننے والوں کو اپنی ریاست قائم کرنے کا حکم دیتا ہے۔ یہ اسلام کا ہی سچاجذبہ تھا جس نے برصغیر کے مسلمانوں کو علیحدہ وطن کا مطالبہ کرنے پر اُبھارا۔ لہٰذا نظریہ پاکستان دراصل نظریہ اسلام ہی ہے۔
برصغیر میں اسلام کی اشاعت فتح مکہ کے فوری بعد سے ہی شروع ہوجاتی ہے۔ محمد بن قاسم کی آمد سے قبل بھی مسلمان مبلغین ہندوستان میں تبلیغ کی غرض سے آتے تھے اور ہندوستان کے باسی ان کی انسان دوستی سے متاثر ہو کر اسلام قبول کرتے رہے۔ ہندو مذہب کی تنگ نظری نے اسلام کی اشاعت میں کلیدی کردار ادا کیا ۔ بعد میں علماء کرام اور اولیاء اللہ نے بھی اسلام کی تبلیغ جاری رکھی۔
اسلام کی اشاعت اسلامی ا سکالرز اور مبلغین کی صحبت اور کردار کے مرہون منت رہی ہے ۔اچھامبلغ اچھا استاد ہی ہوتا ہے ۔ لیکن اُستاد اور مبلغ میں ایک باریک سافرق ہے۔مبلغ ہر سطح کے ذہنوں سے مخاطب ہوتا ہے لیکن اُستاد نئی نسلوں کے ذہن و قلب کو سنوارنے کا نازک فریضہ سرانجام دیتا ہے۔ اُستاد کو یہ اختیار ہے کہ وہ چاہے تو اپنے دائرہ کار میں آنے والے معصوم ذہنوں میں کانٹے بودے‘چاہے پھول اُگائے۔اُستاد چاہے تو انسانی ذہن کو الحاد سے آلود کردے یا خداپرستی سے آشنا کردے۔ یہ اُستاد ہی ہے جو عام سے انسان کو کامیابیوں کے اوج سریا تک پہنچاتا ہے۔
پاکستان میں یوں تو ماشاء اللہ ننانوے فیصد مسلمان ہیں اور یہ فرض بھی کر لیا جاتا ہے کہ چونکہ مسلمان ہیں اس لئے اسلام سے دوری ناممکن ہے اور جب تک اسلام سے جُڑے ہیں پاکستان سے جُڑے ہیں۔ لیکن کچھ تلخ حقائق اس معروضے کے خلاف جارہے ہیں۔ہمارے ہاں ایسے ادارے‘ سکول اور کالجز ہیں جہاں استاد نظریہ پاکستان کے خلاف تبلیغ کرتے ہیں۔ وہ اسلام بیزاری کے فلسفے کو آگے بڑھاتے ہیں۔ وہ قیام پاکستان کو غیر ضروری قرار دیتے ہیں۔ یہی وہ خطرہ ہے جس بھانپتے ہوئے لاہور اور اسلام آباد میں نظریہ پاکستان ٹرسٹ اور نظریہ پاکستان سنٹر کا قیام عمل میں لایا گیا۔محب وطن پاکستانی اپنے اساتذہ اکرام سے یہ توقع رکھتے ہیں کہ وہ اسلامی تعلیمات کو عام کرنے اور اسلامی تہذیب و آداب کو طلبہ و طالبات کے ذہنوں میں راسخ کرنے کے لئے اپنے سبجیکٹ کے ساتھ ساتھ نظریہ پاکستان کو اپنی ذمہ داری کے طور پر پڑھائیں گے۔بچوں کے دلوں میں خدا کی محبت اور اس کی ہی فرمانبرداری کے بیج بوئیں گے کیونکہ بقول شاعر‘
اللہ سے کرے دور تو تعلیم بھی فتنہ ‘املاک بھی اولاد بھی جاگیر بھی فتنہ
ناحق کے لئے اٹھے توشمشیر بھی فتنہ‘شمشیرہی کیا نعرہ تکبیربھی فتنہ
وہ طلباء و طالبات کو بار بار یہ احساس دلائیں گے کہ اگر دو قومی نظریہ نہ ہوتا تو پاکستان نہ ہوتا۔قائد نے ایک موقع پر فرمایا‘’’اگر ہم دنیا کو زیادہ محفوظ بنانا چاہتے ہیں تو ہمیں اصلاح کا کام افراد سے شروع کرنا پڑ ے گا‘‘۔ اگر پاکستان کوشورشوں سے بچانا ہے تو پھر اپنے قومی تشخص(اسلام) سے قربت اختیار کرنی ہوگی۔ملکوں اور قوموں کی مضبوط بنیادیں انسانی ذہنوں میں رکھی جاتی ہیں۔ یہ کٹھن کام ہے۔حالات ایسے ہیں کہ بچوں کی یکسوئی اور اعتماد ڈانواں ڈول ہوچکا ہے۔خود اساتذہ میڈیا سے متاثر ہورہے ہیں۔ یوں لگتا ہے کہ ہمارے پاؤں سے ہماری زمین کھینچی جارہی ہے۔ یہی وہ حالات ہیں جن میں استاد کا کردارابھرکر سامنے آتا ہے۔آپ توقع نہ کریں کہ اس فرض کے نبھانے سے آپ کو حکومت یا معاشرے کی طرف سے توصیفی الفاظ سننے کو ملیں گے۔لیکن یہ یاد رکھ لیں کہ اس کام کے کرنے سے آپ کے سٹوڈنٹس آگے بڑھیں گے۔ ان کے اندر ایک جذبہ بیدار ہوگا اور وہ کسی کاز کے ساتھ وہ منزلیں بھی طے کر لیں گے جو محض تعلیم برائے تعلیم کے ذریعے حاصل نہیں کرسکتے۔قائداعظمؒ نے فرمایا‘ معلم اور تعلیم کووطن سے محبت پیداکرنے کا ذریعہ ہونا چاہئے‘بقول شاعر‘
میں آدمی ہوں وطن کو نہ کس طرح چاہوں
عزیز رکھتی ہے چڑیا بھی کھونسلا اپنا

ایک بداندیش کالم نگار نے ”پانچ لاکھ خودکش” کے عنوان سے کالم لکھ کر قبائلی عوام کے جذبہ حب الوطنی کو مشکوک ٹھہرایا ہے۔دانشوروں کا المیہ ہی یہی ہے کہ وہ ان جانے خوف پھیلا کر سامنے کی خوبصورت حقیقتوں کا مذاق اڑانے میں ہی کمال قلم و علم ڈھونڈتے ہیں۔ کیا یہ بات روز روشن کی طرح عیاں نہیں ہے کہ شمالی وزیرستان میں ایک خاص فلسفہ کے حامل مسلح گروہ اپنی امارت قائم کرکے پاکستان کو تاخت و تاراج کرنے کی جانب بڑھتے چلے آرہے تھے۔ محب وطن قبائلی لوگ شروع شروع میں مزاحمت کرتے رہے اوروہاں مقامی رہائشیوں اور غیر ملکی جنگجوئوں کے درمیان خونی جھڑپیں بھی ہوتی رہیں لیکن جب ریاست اپنے لوگوں کا تحفظ نہ کرسکی اور وہاں کی سول انتظامیہ بھی خوفزدہ ہوکر ان خارجی عناصر کو راستہ دینے لگی تومقامی عوام خاموش ہوگئے۔ہمارے بعض دینی حلقے بھی جہاد کے نام پر گمراہ ہوئے ۔

امارات اسلامیہ افغانستان’امارت اسلامیہ ازبکستان ‘چین اور نہ جانے کہاں کہاں کی خیالی اسلامی ریاستوں کے ہیڈکوارٹرز یہاں سرگرم تھے لیکن ظلم کب تک جاری رہ سکتا ہے۔جب یہ لوگ اپنے ایجنڈے پر آگے بڑھے اور انہوں نے ریاست کے معاشی اور دفاعی اہداف کو تواترکے ساتھ نشانہ بنانا شروع کردیا تو پھر ایک ہی سوال تھا۔ملک انہیں دنیا ہے یا اس کی حفاظت کرنی ہے۔فیصلہ ہوگیا۔آپریشن کی حکمت عملی طے ہوگئی۔جراحی کے سارے عمل کو صرف اوپر کے چند فیصلہ سازوں تک محدود رکھنا ہی بہترین حکمت عملی ہوتی ہے۔ایسا ہی ہوا اور دشمنان قوم اور عوام کو اچانک آلیا گیا۔تحریک انصاف کی قیادت کو سوچنا چاہیے کہ آپریشن کا اعلان دہشت گردوں کو بھاگنے اور محفوظ مقامات پر منتقل ہونے کا موقع دینے کے مترادف ہوتا۔ جب گھیرا مکمل کر لیا گیا تو اب ضرورت تھی کہ سول آبادی کو بچایا جائے۔ فوجی حکمت عملی کی سب سے خوبصورتی ہی یہی کہ وہاں کی آبادی کا مکمل طور پر انخلاء ہوچکا ہے۔جو وہاں ہیں وہ صرف لڑنے والے گروہ ہیں۔ متحارب گروہوں کا خاتمہ لمحہ وار جاری ہے اور قرائن بتا رہے ہیںکہ بیس کروڑ پاکستانیوں کو خوفزدہ کرنے والے بیس دنوں میں ہی دم دبا کر بھاگ رہے ہیں۔درجنوں پکڑے گئے ہیں اور سینکڑوں ہلاک ہوچکے ہیں اور اس وقت تک ہلاک ہوتے رہیں گے جب تک یہ فتنہ ختم نہیں ہوجاتا۔
شمالی وزیرستان کے لوگوں نے اگر خودکش بمبار بننے کا فیصلہ کرنا ہوتا تو وہ بنوں کی طرف ہجرت نہ کرتے’افغانستان چلے جاتے۔ اب تو وہ اسی ہزار جو افغانستان چلے گئے تھے اور جن کو افغان حکومت نے اپنا ایجنٹ بنانے کے لئے ایک ایک لاکھ روپے بھی دیئے تھے وہ بھی واپس آرہے ہیں۔قبائلی عوام غریب ضرور ہیں لیکن وہ ہمارے دانشوروں کی طرح سودے بازیاں نہیں کرتے۔پاکستان کے ساتھ ہمیشہ کھڑے تھے’کھڑے ہیں اور کھڑے رہیں گے۔اس لئے کہ جتنی وہ اس ملک سے محبت کرتے ہیں اتنا یہ ملک بھی ان سے محبت کرتا ہے۔
دس لاکھ سے زائد ہمارے یہ محسنین ‘بنوں’کوہاٹ’کراچی’ لاہور اور راولپنڈی اسلام آباد میں مقیم ہیں۔ان کی رجسٹریشن ہی سب سے بڑا مسئلہ تھا کیونکہ شفاف طریقے سے ہر گھر تک امداد پہنچانا ایک چینلج ہوتا ہے۔دوہری رجسٹریشن کی شکایات بھی موجود تھیں۔جب تک رجسٹریشن نہ ہوتی امدادی ادارے کوئی بھی قابل ذکر دادرسی نہ کرپاتے۔اب حکومت کی طرف اضافی عید پیکج کا بھی اعلان کردیا گیا ہے۔ خیراتی اور امدادی اداروں کی طرف سے روزانہ ٹنوں کے حساب سے خوراک اور راشن پہنچ رہا ہے اور یہاں ہلال احمر جیسے ادارے انتہائی منظم اور مربوط انداز میں اپنے حصے کی امدادی سرگرمیوں میں مصروف ہیں۔پینے کے صاف پانی کی فراہمی بھی ایک اہم ضرورت ہے۔ بھلا ہو ہلال احمر کے چیئرمین جناب ڈاکٹر سعید الٰہی کا کہ انہوں نے بیس ہزار لٹر یومیہ کی پیداواری صلاحیت کا واٹر فلٹر پلانٹ لگا دیاہے۔متاثرین ٹھنڈا اور صاف پانی پیتے ہیں اور اس کا اہتمام کرنے والوں کو دعائیں دیتے ہیں۔
کہنے کا مقصد یہ کہ متاثرین کی دلجوئی اس لئے نہیں کہ یہ لوگ کہیں مخالف ہو کر خودکش حملہ آور نہ بن جائیں بلکہ اس لئے کہ یہ لوگ واقعتاً ہمارے محسن ہیں۔انہیں آئی ڈی پیز مت لکھو۔یہ محسنین پاکستان ہیں۔یہ کبھی خودکش بمبار نہیں بن سکتے۔بہت جلد باعزت واپسی اور بحالی کے منصوبے پر کام شروع ہونے والا ہے۔

پاکستان میں معاشی لحاظ سے کتنے طبقات ہیں اس بارے کوئی تازہ سروے تو موجود نہیں ہے لیکن اگر ہم اپنے اردگرد نظر ڈالیں تو شہر ‘ گلی اور محلے میں ہمیں یہ طبقات مجسم صورت میں دکھائی دیں گے۔ایک پورا طبقہ ان خاندانوں پر مشتمل ہے جو پیشہ ور بھکاری ہیں یا ان کے پاس بھیک مانگنے کے سوا کوئی چارہ کار ہی نہیں ہے۔بھکاریوں کے جتھے آپ کو پاکستان کے ہر چوک اور چوراہے میں مل جائیں گے۔ بلکہ کسی مذہبی یا قومی تہوار کے دنوں میں مانگنے والوں سے جان چھڑانا ہی بہت بڑی انجوائے منٹ ہوتی ہے۔آپ بھکاریوں کے سامنے بے بس ہوجاتے ہیں ۔آبادی میں اضافہ کے ساتھ ساتھ اس پیشہ یا مجبوری سے منسلک تعداد میں اضافہ ہی ہوتا جارہا ہے۔ یہ لاکھوں میں نہیں کروڑوں میں پہنچ رہے ہیں ۔دوسرا طبقہ فاقہ مست دیہاڑی دار مزدوروں اور ہنرمندوں کا ہے۔مزدور مانگ تو نہیں سکتے لیکن ملک میں کوئی کاروبار نہ ہونے کے سبب فاقوں مرتے ہیں۔ بیروزگاری کی شرح میں ہر سال اضافہ ہوتا ہے۔ پاکستان میں ہرچوتھا آدمی بیکار ہے۔

اگر مکمل طور پر بیکار نہیں بھی تو جزوقتی طور پر بیکار ہے۔آپ کے محلے یا گلی میں یا آپ کے بنگلے اورکوٹھی کے پچھواڑے میں یا آپ کی انتہائی محفوظ ہاﺅسنگ سوسائٹی میں کسی بلند وبالا عمارت کی آخری منزل پر اینٹیں اٹھاتے مزدور آپ کو ضرور مل جائیں گے۔میری التماس ہے کہ لمحہ بھر رک کر ان کے احوال دریافت کر لیجئے۔ آپ یہ جان کر حیران رہ جائیں گے کہ ان دیہاڑی دار مزدوروں کے کوئی حقوق ہی نہیں ہوتے۔دیہاڑی لگ گئی تو ٹھیک ورنہ گھر بیٹھے بھوک کی تیز دھوپ پر عیاشیاں تلتے رہتے ہیں۔اس طبقہ سے بھی لاکھوں خاندان جڑے ہوئے ہیں۔ہمارے ملک کا چھوٹا کسان‘کلرک‘ملازم‘ ملوںمیں کام کرنے والے کارکن‘دفتروں میں استحصال زدہ عورتیں۔یہ سب وہ گروہ ہیں جن سے ملنے پر ہمیں اپنے معاشرے کے اصلی چہرے کا پتہ چلتا ہے ۔خط غربت سے زندگی گزارنے کا مفہوم کیا ہوتا ہے اس کا اندازہ کبھی اس خط پر سسکتی زندگیوں کی حسرت بھری نگاہوں میں جھانک کر دیکھنے سے ہوگا۔غربت کی دلدل میں پھنسے عوام کے طبقات کی تعداد گنے نہیں گنی نہیں جاسکتی۔ اسی طرح خوشحال طبقات کی بھی کئی قسمیں ہیں۔ لوئر مڈل کلاس طبقے کے افراد اپنی بقاءکی جنگ لڑ رہے ہیں۔ انہیں ہر روز یہ کھٹکا لگا رہتا ہے کہ اب کے اگر مڈل کلاسیوں والی سیڑھی سے کھسکے تو اور سیدھا خط غربت کے مہیب خانوں میں جاگریںگے۔یہ تگ و دو اور سخت جانفشانی کرنے والے لوگ ہوتے ہیں۔ان کو آپ آسودہ حال نہیں کہہ سکتے۔غریب انہیں اپنا حصہ سمجھتے ہیں اور امیر انہیں اوپر آنے سے روکتے رہتے ہیں۔اس سے قبل کہ میں خوشحال لوگوں کے اگلے طبقے کا ذکر کروں‘ یہ ضروری سمجھتا ہوں کہ بتا دوں کہ میں طبقاتی کشمکش پر یقین نہیں رکھتا کہ معاشی بنیادوں پر بپا ہونے والے انقلابات غریبوں کے لئے مزید غربت ہی لے کر آتے ہیں ۔میں نے تو اپنے جیسے مڈل کلاس طبقے اور اس طبقے سے بالاتر امراءاور اشرافیہ کے لوگوں کو صرف یہ حساس دلانا ہے کہ جب تک ملک کے اندر معاشی انصاف نہیں ہوگا بھتہ خوروں کی بھرتیاں جاری رہیں گی اور جرائم پیشہ گروہوں اور انڈر ورلڈ کو انسانی ایندھن ملتا ہی رہے گا۔ آپ بھتے دے دے کر بھی تھک جائیں گے لیکن پھر بھی معاشرتی سکون نصیب نہیں ہوگا۔اپر مڈل کلاس جسے نسلوں تک آسودگی میسر ہے یہ دہری شہریت کے حامل ہوتے ہیں۔ ان کے لئے دبئی اور اسلام آباد میں زندگی کی سہولتیں ایک جیسی سہولتیں ہوتی ہیں ۔ ان کے اوپر ایک طبقہ ہے جسے طبقہ امراءکہتے ہیں۔ ان کے لئے ہر ملک اپنا ہے اور انہیںملکوں اور خطوں کے چند مقامات یاد ہوتے ہیں شائد ملکوں کے نام یاد رکھنا ان کی مجبوری نہیں ہوتی۔ان کی دولت ان کے اپنے اندازوں سے بھی کہیں زیادہ ہوتی ہے۔ ان کے خزانوں میں صرف اضافہ ہوتا ہے کمی نہیں آتی۔یہ قارونی طبقہ پاکستان میں کم نہیں ہے۔سوئٹزرلینڈ کے بینک ان کی رقوم سے بھرے ہوئے ہیں۔میں نے معاشی طبقات کا ایک تاثراتی سا جائزہ پیش کیا ہے۔ جس ملک میں غریب اور امیر میں اس قدر خلیج حائل ہو وہاں ہر روز درجنوں لوگ گھائل نہ ہوں یہ کیسے ممکن ہے۔ اسلام نے اسی معاشی ناہموار ی کے خاتمے کے لئے حسب حیثیت خیرات‘ صدقات‘غریب رشتہ داروں کی مالی معاونت‘قرضہ حسنہ‘زکوٰة جیسے راستے کھولے تاکہ دولت چند ہاتھوں میں منجمد نہ ہو۔ اور پھر آخری حل بتایا کہ ” ضرورت سے جو کچھ زائد ہو اسے راہ خدا میں خرچ کرو“ جب تک ہم اسلام کے اس انقلابی پیغام کو عملاً نہیں اپناتے ہمیں سکون نہیں مل سکتا۔

Click here to View Printed Statement

سستی روٹی کی سکیم چلانے والوں نے ایک سو اسی درجے کی ”کلٹی” ماری اور روٹی کی موجودہ قیمتوں پر بھی ایک فیصد جی ایس ٹی کا نفاذ کر ڈالا۔یہ تو بھلا ہو آزاد عدلیہ کا کہ جناب چیف جسٹس نے عوام کے ساتھ یہ ہاتھ ہونے نہیں دیا اور یوں غریب آدمی کی دال ‘روٹی ‘ آلو پیاز’مرچ ‘برف اور باردانہ آئی ایم ایف کی دستبرد سے بچ گئے ورنہ میاں محمد نوازشریف کے قرابت دار ماہرین اقتصادیات نے تو”خونی انقلاب” کی بنیاد رکھ دی تھی۔اس میں کیا شک ہے کہ ملک کے اقتصادی حالات کسی طرح کنٹرول میں نہیں آرہے۔ آئی ایم ایف کڑی شرائط کا تقاضا کرتا ہے اور عوام کے بدن سے مزید خون نچوڑنے کے مختلف طریقے آزمانے پر آمادہ کرتا ہے۔قومی خزانہ ”بڑے حاجی صاحب” اور ان کے وزراء اعظم اور نوسرباز دوست پہلے ہی خالی کرکے جاچکے ہیں۔پاور پلانٹس بجلی پیدا کرنے کے لئے پانچ سو ارب روپے مانگ رہے ہیں

اور ہمارے وزیر خزانہ نے ساٹھ دنوں کے اندریہ رقم مہیا کرنے کا وعدہ بھی کر رکھا ہے۔یہ پانچ سو ارب روپے کہاں سے آئیںگے ۔بڑا آسان نسخہ ہے ۔پوری قوم روزانہ دو روٹیاں بھی کھائے تو ہر روز 36کروڑ روٹی پکتی ہے یا بکتی ہے۔ اس طرح اگر جی ایس ٹی کے نفاذ سے روٹی ایک روپے مہنگی کردی جائے تو حکومت کے خیال میں اسے روزانہ 36کروڑ روپے صرف روٹی کی مد میں وصول ہوسکتے ہیں۔خوردونوش کی باقی اشیاء اور ادویات پر ٹیکس لگا دیں تو بھی کروڑوں نہیں اربوں روپے روزانہ نچوڑے جاسکتے ہیں۔حکومت جب منصوبے بناتی ہے تو زمینی حقائق بھول جاتی ہے۔پہلے غیر رجسٹرڈ پٹرول پمپوں کو تو کنٹرول کر لیں صرف اسی ایک عمل سے اتنے پیسے مل جائیں گے جتنے ضروریات زندگی کی عمومی اشیاء پر ٹیکس کے نفاذ سے متوقع ہوسکتے ہیں۔امیروں سے لے کر غریبوں کو دینے کے دعوے کرنے والے انقلابی اور جذباتی قائدین کو دال روٹی پر ٹیکس لگانے سے پہلے سوچ لینا چاہیے تھا کہ اس سے حاصل حصول تو کچھ نہ ہوگا۔ غریب کا لقمہ چھن جائے گا اور حکمرانوں کے نصیب میں محض بددعائیں آئیں گی۔عوام کو توقع تھی اور ہمارا اپنا بھی یہی خیال تھا کہ مسلم لی گ(ن) کی حکومت مہنگائی کے مارے عوام کو کم از کم مزید نہیں ماریں گے اور کوئی ایسی منصوبہ سازی فرمائیں گے کہ جس سے عام آدمی کے لئے کچھ آسانیاں پیدا ہوسکیں۔ایک خام خیالی یہ بھی تھی کی میاں صاحب آتے ہی بیرون ملک اپنے اثاثوں کو وطن واپس لانے کا اعلان کریں گے اور قومی خزانے میں ایک معقول رقم جمع کراکے ایک نیا”ٹرینڈ” سیٹ کریں گے۔اگر نئے ٹیکس لگا کر ہی معاشی مشکلات سے نکلنا ہے تو اس کے لئے اقتصادی ماہرین کی کیا ضرورت ہے۔چولہا ٹیکس لگا دیں’ ہوا کھانے پر ٹیکس لگا دیں’ فٹ پاتھ پر چلنے کا ٹیکس لگا دیں’شہروں میں ٹائلٹس کو حکومتی تحویل میں لے کر ریٹس بڑھا دیںَ اگر آئی ایم  ایف کے ”تیر بہدف”مشورے ہی آزمانے ہیں تو پھر ”خوددار اور خودمختار ملت” کے نعرے لگانے کا فائدہ کیا ہے۔تنقید تو ہوگی۔ جب کام ہی ایسے ہوں گے جس سے رہی سہی قوت خرید بھی دم توڑ جائے تو ظاہر یہ تعریف نہیں ہوسکتی۔آج کے کالم میں حکومت کو ایک مشورہ بھی دینا ضروری سمجھتا ہوں۔پاکستان میں بیچارے عوام اپنی معمولی آمدنیوں کا کثیر حصہ علاج معالجے پر خرچ کردیتے ہیں۔پاکستان میں ایلوپیتھی علاج نہ صرف مہنگا ہے بلکہ ایلوپیتھی ادویات کھانے سے ہزارہا۔پیچیدگیاں بھی پیدا ہورہی ہیں۔جرمنی کے بعد اب انڈیا اور امریکہ کے اندر متبادل ادویہ کا طریقہ علاج متعارف ہوچکا ہے اور ہومیوپیتھی طریقہ علاج کی طرف رجحان بڑھ رہا ہے ۔یہ ادویات انتہائی سستی’ معیاری اور غیر مضر ہیں۔حکومت کو چاہیے کہ وہ اس طریقہ علاج کی سرپرستی کرے۔ہومیوپیتھک کالجوںکے نصاب اور انتظام کو سرکاری میڈیکل کالجوں کی طرح ”ریگولٹ” کرنے اور ہومیوپیتھک ادویات کی اندرون ملک تیاری کے راستے ہموار کرے۔عوام کے اندر بھی شعور اجاگر کرنے کے لئے اشتہارات دیئے جائیں۔اس طرح ایک کثیر زرمبادلہ بھی بچے گا’ عوام کو سستا علاج مہیا ہوگا اور ایک صحت مند پاکستان ابھرے گا۔سستی روٹی اور سستا علاج ہی خوشحال پاکستان کی ضمانت ہے۔

Click here to View Printed Statement

بے پناہ اور اکثر اوقات غیر ضروری معلومات تک بہ آسانی رسائی نے ہر بالغ پاکستانی کو مستقل ناقد بنا دیا ہے ۔ جس کو دیکھو جہاں دیکھو تنقید ہی تنقید ہورہی ہے۔ اس تنقیدی فضا کا نقصان بہت ہورہا ہے۔ اور وہ نقصان یہ کہ آج کا کوئی بھی بالغ پاکستانی کسی پر کسی طرح کا اعتماد کرنے کو تیار نہیں بلکہ اس کی ذہنی کیفیت ایسی ہوگئی ہے کہ خود فرد کو اپنے کئے ہوئے عمل پر بھی اعتماد نہیں رہا۔
بداعتمادی نئے نئے طرزکے رَدِعمل سامنے لارہی ہے۔ہم نے جن کو ووٹ دیئے ہمیں ان کی صلاحیتوں پر اعتماد نہیں ۔ ہم نے جن کیخلاف ووٹ ڈالا ان کی مخالفت پر شک ہے۔ بے یقینی ایسے پھیلی ہے کہ اللہ تعالیٰ کی اس سب سے عظیم مخلوق کی’’ By Default‘‘ قسم کی خوبیوں پر بھی یقین نہیں رہا۔آگ جلاتی ہے اس کا یقین ہے‘پانی بہاتا ہے اس پر بھی یقین ہے‘مٹی اگاتی ہے اس کا بھی یقین ہے لیکن انسان بہتری لاسکتا ہے‘بگڑے معاملات سنوار سکتا ہے‘اصلاح احوال کرسکتا ہے

‘تعمیروترقی کی طرف گامزن ہوسکتا ہے۔اس کا ہمیں یقین نہیں۔ ہم اس قدر بے صبرے ہیں کہ دودھ کو دہی بننے میں جتنا وقت درکار ہوتا ہے اتنے وقت کے لئے بھی صبر نہیں کرسکتے۔ ہم چاہتے ہیں کہ ہر روز کوئی مجعزہ دیکھیں ‘کوئی مداری ہو اور ریت سے جلیبی نکال کر دکھادے‘ہتھیلی پر سرسوں جما دے اور منہ کھلے تو بجلی نکلنی شروع ہو۔ درختوں پر انرجی کے بڑے بڑے گولے جھولنے لگیں۔ہم ایسے بے صبر ہیں کہ ہمارے صبر اور شکر کا پیمانہ ہر وقت لبریزرہتا ہے۔ہم ہر وقت تحریک چلانے‘ دھرنا دینے اور مظاہرہ کرنے پر کمربستہ رہتے ہیں۔ہمارا سب سے مرغوب قومی مشغلہ مظاہرے کرنا ہے۔چھوٹا مظاہرہ‘درمیانہ مظاہرہ‘بڑا مظاہرہ۔اسلامی طرز کا مظاہرہ‘برگرز کا مادرپدرآزاد مظاہرہ۔آپ کو کسی اخبار میں اشتہار دینے کی ضرورت نہیں آپ صرف چند ٹی وی رپورٹرز کو ایس ایم ایس کریں کہ اس وقت لالکڑتی میں بجلی کی لوڈشیڈنگ کے خلاف مظاہرہ ہورہا ہے۔ بس اس ایس ایم ایس کی ضرورت ہے۔رپورٹرز کیمرہ مین اور ان کی گاڑیاں 1122 سے بھی پہلے پہنچیں گی وہ آپ کو خود گائیڈ کریں گے۔’’یہاں ایک زبردست ہجوم ہے‘ٹریفک جام ہے‘ لوگ نڈھال ہیں۔بچے اور عورتیں بھی شریک ہیں۔گزشتہ اٹھارہ گھنٹے سے بجلی نہیں آئی۔ایک قیامت کا سامان ہے۔‘‘اور خدا جانے کیا کیا فارمولہ رپورٹنگ ہوتی ہے۔ اچانک ایک چھوٹا سا مظاہرہ ایک بہت بڑے جلوس میں تبدیل ہوجائے گا۔ٹائروں کو لگی ہوئی آگ گاڑیوں کو لپیٹ میں لے لے گی۔محکمہ کے دفاتر پر پتھراؤ ہوگا۔پکڑ دھکڑ ہوگی لیکن بجلی پھر بھی نہیں ہوگی کہ بجلی اگر مظاہروں سے آتی ہوتی تو گزشتہ پانچ برسوں میں ضرور آجاتی۔تبدیلی کے خواہشمندوں نے نئے نئے چوزوں کی طرح میدان سیاست میں دانا چُگنا شروع کیا تو انہیں بھی اپنی سیاسی ترتیب کا بہترین طریقہ مظاہرے اور دھرنے ہی محسوس ہوئے۔یہاں دھرنا وہاں دھرنا۔یہ کام تو پہلے ہی ہورہا تھا۔تبدیلی کس بات کی؟
ذرائع ابلاغ کا کام تعلیم بھی ہوتا ہے۔کیا قوم کو بتایا نہیں جاسکتا کہ بجلی کے بحران کا بنیادی سبب کیا ہے۔لوگوں کو کیوں نہیں بتایا جاتا کہ ایک آدمی کے لئے تیار کی گئی روٹی کو جب سو آدمی کھانے کی کوششیں کریں گے تو سب بھوکے ہی سوئیں گے۔کوئی نیا ڈیم بنا‘کوئی نئے ایٹمی بجلی گھر لگے‘کوئی سولر انرجی کوئی کوئلے سے توانائی۔کالاباغ ڈیم کا نام لینا گویا منہ کالا کرانے کے مترادف ہے۔جب حقائق یہ ہیں تو بے صبری کیسی‘بداعتمادی کیسی۔آپ نے سوچ سمجھ کر ووٹ دیئے۔ایک پارٹی کو بھاری اکثریت سے مرکز میں پہنچایا۔اب انہیں اقتدار سنھبالنے دیں۔انہوں نے آپ سے وعدے کئے ہیں اور بجلی بحران کے خاتمے کا ایک مکمل منصوبہ پیش کیا۔اسے دیکھ پڑھ کرآپ نے ووٹ دیئے۔تھوڑا سا صبر کرلیں ۔ اس قدر بے اعتمادی کیوں کہ آپ کسی کو کام ہی نہ کرنے دیں اور سیاسی مچھندروں کے ہتھے چڑھ کر خود کو مزید تھکاڈالیں۔ اگر آپ نے لیڈر چنے ہیں تو اپنے لیڈروں پر اعتماد کرنا بھی سیکھیں۔محض ٹی وی چینلز والوں کی رپورٹوں کے لئے خود کو ایندھن کے طور پر مت پیش کریں!۔

Click here to View Printed Statement

بڑے دِل گُردے کی بات ہے۔دہشتگردی نے کتنے گھر اُجاڑ دیئے۔کوئی مقام ایسا نہیں جہاں خون نہ بہایا گیا ہو۔خون بہانے والے کھل کر کھیلے اور آئندہ بھی شائد وہ غارت گری کی اسی راہ پر چلتے رہیں۔کوئی بھی ایسی سیاسی پارٹی نہیں جس کے جسد کو بموں اور گولیوں نے چھلنی نہ کیا ہو۔کوئی بڑی سیاسی شخصیت ایسی نہیں جسے بالواسطہ یا بلاواسطہ طور پر خوف میں مبتلا نہ کیاگیا ہو۔عام پاکستانی جلسے جلوس میں جانے سے پہلے کئی بار سوچتا رہا کہ وہ واپس آئے گا بھی یا نہیں۔انتخابات کی گہماگہمی اوربموں کی پوچھاڑ ساتھ ساتھ چلتی رہی۔بمبار ہارے نہ ہی عوام نے حوصلہ چھوڑا۔اتنے بڑے خطرات مُول لیکر اس انتخابی نظام میں لوگ آخر کیوں حصہ دار بنے۔

موت سامنے تھی پھر بھی جوشیلے نعرے’ پسینہ چھوڑتے ہاتھوں میں جھنڈے اور برتری حاصل کرنے کے لئے ڈنڈے لہراتے رہے۔جنون اور قارون سب کیوں جُتے رہے۔ماضی میں کسی بھی انتخاب میں ایسی شدید سیاسی تقسیم اور تھکا دینے والی سیاسی سرگرمیاں دیکھنے کو نہیں ملتیں۔یہ جانتے ہوئے بھی کہ جمہوریت نے سوائے مایوسیوں کے ہمیں کچھ نہیں دیا۔کرپشن’لوٹ مار اور خانہ جنگیاں۔یہ سب جمہوریت کا ہی تحفہ ہے۔ اس کے باوجود قوم نے مزید جمہوریت کو ہی اپنی منزل تصور کیا۔ ایسے حالات میں جبکہ ایک طرف شیخ الاسلام ڈاکٹر طاہر القادری نے ”کرپٹ نظام” سے لڑنا ہوگا۔ گیارہ مئی کو ”دھرنا ہوگا” کی پورے پاکستان میں وال چاکنگ کرائی۔ ایس ایم ایس اور فیس بُک کے ذریعے ووٹ نہ ڈالنے پر لوگوں کو آمادہ کیا۔دھرنے دیئے ‘لوگ پھر بھی ووٹ کی پرچی کو خوشحالی کا چیک سمجھ کر سنبھالتے رہے۔آخری نتیجہ جو بھی ہو ایک نتیجہ بہرحال برآمد ہوچُکا کہ پاکستانی عوام کی اکثریت جمہوریت کے علاوہ کسی اور نظام کی طرف راغب نہیں ہوسکی۔ طالبان کا ”امارت اسلامی” کا فلسفہ بھی پوری شدت کے ساتھ سامنے آیا اور آرہا ہے۔حزب التحریر کے لوگوں نے اپنے طور پر ”خلافت” کی طرف مراجعت پر بھرپور مہم چلائی اور چلا رکھی ہے۔لیکن ایک عام پاکستانی کو سمجھ نہیں آتی کہ پُرامن انتقال اقتدار کا دوسرا کونسا طریقہ ہوسکتاہے۔ہمیں قوم کی نفسیات کا تجزیہ کرتے وقت یہ بات بھی ذہن میں رکھنی چاہئے کہ اسلام کی طرف سے دیا جانے والا ”امرھم شوریٰ بینھم” کی تشریح بھی ووٹ یا رائے دیہی کے ذریعے ہی ممکن ہے۔ یہ صحیح ہے کہ پاکستان کے ستر فیصد نوجوان شرعی نظام کے حامی ہیں لیکن ان کے سامنے شرعی نظام کے نفاذ کا ذریعہ پارلیمان کے علاوہ کوئی نہیں۔حکمران چُننے کا اختیار ایک ایسا حق ہے جو صرف اور صرف ووٹ کے ذریعے ہی مل سکتا ہے۔ اور یہی حق لینے اور آزمانے کی خاطر پاکستانی قوم نے زخم برداشت کئے۔ لاشیں اٹھائیں ‘اغواء کی وارداتیں ہوئیں اور بالآخر پولنگ سٹیشنوں پر پہنچ گئے۔سچ یہ کہ لوگ خون کے دریا عبور کرکے پولنگ بُوتھ تک پہنچے۔جیتنے والی پارٹیوں کو حکومتیں بناتے وقت یہ ذہن میں رکھنا ہوگا کہ اگر اب کی بار بھی محض باری لینے کی نفسیات حاوی رہی اورعام آدمی کی زندگی میں کوئی مثبت تبدیلی نہ آسکی تو پھر غیر جمہوری فلسفے کو پروان چڑھنے سے دنیا کی کوئی طاقت روک نہ سکے گی۔اگر شیر اور بلے کا تکبرّکسی مضبوط اور مفید اتحاد کی راہ میں رکاوٹ بنا تو یہ قوم نہ شریف برادران کو معاف کرے گی اور نہ ہی اپنے قومی ہیرو سے مزید ہمدردی کرسکے گی۔دونوں پارٹیوں نے انتخابی مہم کے دوران تقریباً ایک جیسے پروگرام دیئے’ایک جیسے وعدے کئے۔(ن) لیگ کے پاس حکمرانی کا وسیع تجربہ ہے اور اس پارٹی نے واقعتا بڑے بڑے منصوبے مکمل کئے ہیں۔لیکن تحریک انصاف کے پاس ایک پُرجوش فورس ہے۔ اگر واقعتا یہ پارٹیاں نیا پاکستان بنانا چاہتی ہیں تو پھر ان کی آپس کی مخاصمت اس مُلک کو پھر سے اندھیروں میںدھکیل دے گی۔ یہ قوم بڑی حوصلہ مند ہے لیکن ذاتی مفادات کے تابع سیاسی قلابازیوں کو کبھی برداشت نہ کر پائے گی۔ووٹ اور اس نظام سے ہمیشہ کے لئے لاتعلق ہوجائے گی۔

یہ توفیق کی بات ہے ۔اللہ نے موجودہ حکومت کو یہ توفیق بخشی اور کابینہ کے دستخطوں سے پاکستان کی بہتری کا ایک اور بندوبست ہوگیا۔2002ء میں بحیرہ عرب میں گوادر کے مقام پر گہرے پانیوں میںخطے کی ایک بڑی بندرگاہ کی تعمیر کا سنگ بنیاد رکھا گیا تھا۔ چین کے ڈپٹی پرائم منسٹر اور پاکستان کے صدر جنرل پرویز مشرف نے تختی کی نقاب کشائی کی تھی۔بندرگاہ کی تعمیر کے لئے سرمایہ چین نے فراہم کیا تھا اور عمومی رائے یہی تھی کہ تعمیر کا پہلا مرحلہ مکمل ہونے کے بعد بندرگاہ کے انتظامات بھی چین سنبھالے گا۔ لیکن امریکی دبائو کے سامنے پرویز مشرف صاحب حسب روایت ڈھیر ہوگئے اور سنگاپور کی ایک کمپنی کو انتطامات سونپ دیئے گئے۔

اب جیسے بھی ہوا’ یہ انتظامات چین کی سرکاری کمپنی سنبھال رہی ہے۔ وہ تعمیر کے باقی مراحل بھی مکمل کرے گی اور یوں پاکستان کو سمندر کے راستے تجارت اور توانائی کا ایک اور بڑا ذریعہ میسر آجائے گا۔چین کو انتظامات سونپنے پر ہوسکتا ہے کہ پاکستان کے بعض قریبی ہمسایہ ممالک کو دھچکا لگا ہو لیکن بظاہر کسی بھی ملک نے اس معاہدے پر کسی تشویش کا اظہار نہیں کیا ۔تشویش کا اظہار ہونا بھی نہیں چاہئے کہ کاروبار کرنا ہر ملک کا حق بھی  ہے اورضرورت بھی۔ چین ایک بہت بڑا ملک ہے اور اسے تجارت اور آئل کی ترسیل کے لئے نئے روٹس درکار ہیں۔خوش قسمتی سے پاکستان کے پاس ایسا سمندر ہے جس پر ایک دو نہیں متعدد بندرگاہیں تعمیر کی جاسکتی ہیں ۔ چین کو مشرق وسطیٰ کا تیل چاہیے اور اس کے لئے اسے بہت لمبا چکر کاٹ کر پاکستان کے ساتھ ملحقہ علاقوں میں تیل سپلائی کرنا پڑتا ہے۔ اسی طرح اسے اپنا سستا سامان گلف’انڈیا اور یورپ تک پہنچانے کے لئے بھی بے پناہ سفری اخراجات اٹھانے پڑتے ہیں۔ گوادر بندرگاہ کے استعمال سے چین کو اپنا مال بیچنے میں ہزارہا آسانیاں میسر آجائیں گی۔پاکستان کا اپنا فائدہ ہے۔کرائے کی صورت میں پاکستان کو اربوں ڈالرسالانہ کمانے کا موقع ملے گا۔ بلوچستان کے ہزاروں روزگار نوجوانوں کو براہ راست اور بالواسطہ روزگار میسر آجائے گا۔ گوادر کے اردگرد زمینوں کی قیمت بڑھے گی اور رئیل اسٹیٹ کا بزنس ترقی پائے گا۔ ایک نیا شہر آباد ہوجائے گا اور صوبہ بلوچستان کی خستہ حالی کو خوشحالی میں تبدیل کرنے کا موقع بھی مل جائے گا۔چینیوں کے ساتھ کام کرنے سے پاکستانیوں کو بھی تربیت ملے گی اور یوں پاک چین دوستی کے ثمرات عام آدمی تک بھی پہنچنا شروع ہوجائیں گے۔ اہل چین کا بندرگاہیں چلانے اور کامیابی سے ہمکنار کرنے کا وسیع تجربہ ہے۔ وہ سری لنکا میں ایک بندرگاہ تعمیر کرچکا ہے اور بنگلہ دیش میں بھی ایسا ہی منصوبہ زیر تکمیل ہے۔دنیا بھر کی ترقی میں چین کا کردار کسی بھی سپرپاور سے کہیں زیادہ ہے۔بھارت کو پاک چین معاہدے پر تشویش ہے۔بھارت فکر مند ہے۔بھارت کے وزیر دفاع نے انتہائی عجلت میں اپنی پریشانی کا اظہار کردیا ہے ۔اتنا بڑا ملک اور غربت میں پھنسی کروڑوں کی  آبادی ۔” تجھے پرائی کیا پڑی اپنی نبیڑتو” لیکن بھارت کو کون سمجھائے۔ جہاں کہیں پاکستان کا فائدہ ہوگا’دہلی والے تڑپنا شروع کردیتے ہیں۔اگر اپنے وجود کے مطابق بڑے پن کا مظاہرہ کرتا تو کہتا”بھارت اور چین باہمی تجارت کی بلندیوں کو چھو رہے ہیں۔گوادرپورٹ کا انتظام پاکستا ن جس ملک کو چاہے دے دے۔ اس سے خطے میں تجارتی رجحانات کو فروغ ملے گا”۔ لیکن اپنے خبث باطن کو چھپا نہیں سکا اور اپنی تنگ نظری کی دھوتی کھول کر دنیا کے سامنے ننگا ہوگیا۔بھارت کی یہ سوچ کہ اس نے پاکستان اور چین دونوں کا راستہ روکنا ہے مقامی نہیں بلکہ امریکی اسپانسرڈ ہے۔ ورنہ کہاں بھارت اور کہاں یہ دو ملک۔ چین نے تو ”NO WAR” کا بورڈ لگا رکھا ہے اور وہ ہر مسئلہ کو بات چیت سے حل کر رہا ہے۔ پھر کس کے خلاف جنگ ؟ یہ بے معنی تشویش کیوں؟

ان لوگوں سے پیشگی معذرت جنہوں نے جمہوریت کو مذہب کا درجہ دے رکھا ہے۔مغربی جمہوریت کے شاہکار سامنے آنا شروع ہوگئے ہیں۔یورپی ممالک میں اب شہریوں کی فلاح و بہبود کے بجائے ہم جنس پرستوں کے شیطانی حقوق ایشو بن چکے ہیں۔امریکہ کی ایک ریاست میں ”چکلے” چلانے والے ایک بدکار کو گورنر بنایا گیا ہے۔ یہی نہیں امریکی حکومت خصوصاً صدر ابامہ مجبور ہے کہ وہ طاقتور حزب اختلاف  کے دبائو کے سامنے سرنڈر کرجائے اور جنگ بندی کی خواہش کو ترک کرکے نئی جنگوں کی گنجائش پیدا کرے تاکہ امریکی اسلحہ ساز اور آئل کمپنیوں کا بزنس چلتا رہے۔خود پاکستان کے اندر جمہوریت کے پردے میں جو لوٹ مار ہورہی ہے اس کے تذکروں سے اخبارات بھرے پڑے ہیں۔’

‘ہنگ پارلیمنٹ اور کولیشن گورنمنٹ” نے اس ملک کے غریب آدمی کے ساتھ جو کھیل کھیلا ہے اس کا نتیجہ یہ نکلا ہے کہ خطِ غربت سے نیچے سرک جانے والوںکی تعداد لاتعداد ہوتی جارہی ہے ۔مغربی جمہوریت نے اہلیت کی بجائے اکثریت کی بنیاد پر فیصلے کرنے ہیں اور اکثریت کو ورغلانے اور سدھانے کے لئے طاقتور میڈیا جیسے ہتھیار موجود ہیں۔آج کی نشست میں دنیا کی سب سے بڑی جمہوریت کا کچھ تذکرہ کرنا ہے۔ ہمارے اسٹیٹ ٹیلی ویژن سمیت تمام ٹی وی چینلز پر اشتہارات اور ناچ گانے  کے پروگراموں میں دکھائی دینے والا وہی ملک بھارت ہے جس کے بارے میں 2006ء میں سچرکمیٹی نے رپورٹ دی کہ کس طرح مسلمانوں کی زندگی اجیرن کردی گئی ہے۔شاہ رخ خان نے بھارتی دہشتگردوں کی دہائی دی اور وہاں کے وزیر داخلہ نے بے جی پی کا پول کھولا۔بھارتی خواتین کی چیخ و پکار سنیں تو آج کو معلوم ہوجائے گا کہ دنیا کی سب سے بڑی جمہوریت  میں عورتوں کے ساتھ کیا سلوک ہورہا ہے۔ 2008ء میں ممبئی اور دہلی میں پرائیویٹ کلینک چلانے والے ڈاکٹروں کے حوالے سے ایک رپورٹ شائع ہوئی جس میں بتایا گیا تھا کہ ہر تین سیکنڈ بعد ایک بچی کو قتل کردیا جاتا ہے۔قتل کا طریقہ یہ کہ ڈاکٹر بچی کی پیدائش سے پہلے ہی ماں کے پیٹ میں  ہی اسے مار دیتے ہیں اور اگر نومولود اس دنیا میں آجائے  تو بعض سفاک ڈاکٹر والدین کی رضامندی سے اس معصوم حوازادی کو تیزاب کے ڈرم میں ڈال دیتے ہیں۔ والدین پر خوف طاری ہے کہ ان کی بچی جوان ہو کر نہ صرف ان پر معاشی بوجھ بنے گی بلکہ  اس کی عزت بھی محفوظ نہیں ہوگی اور ان کے لئے زندگی بھر کا ایک روگ بن جائے گا۔ بھارتی سیاستدان پارلیمنٹ کے اندر عورتوں پر آوازے کستے ہیں اور غلیظ قسم کے القابات سے نوازتے ہیں۔شاہ رخ خان نے ایک مضمون میں اپنے احساسات کیا لکھے کہ اس کے بچوں کو قتل کرنے کی دھمکیاں ملنا شروع ہوگئیں۔ اب وہ بیچارہ محض مسلمان ہونے کی بنیاد پر ”شوسینا” کے جذبہ انتقام کا نشانہ بن رہا ہے اور ان کو خوش کرنے کے لئے طرح طرح کی تاویلیں پیش کر رہا ہے۔پاکستان کی ہاکی ٹیم نے بھارت کا کیا بگاڑا تھا۔ ان کو کھیلے بغیر واپس بھجوا دیا کہ جمہوریت کا تقاضا تھا کہ ہندودہشتگرد تنظیم خوش رہے اور تنگ نظر ہندوئوں  کے ووٹ حاصل کئے جاسکیں۔بھارتی وزیر داخلہ نے ثبوتوں کے ساتھ یہ راز فاش کیا کہ بھارت میں دہشتگردانہ کارروائیاں ہندو انتہا پسندوں کا ”اپنا کارنامہ” ہے لیکن وہ دہشتگردی کے ہر واقعہ کی ذمہ داری مسلمانوں پر ڈال دیتے ہیں۔ ہمارے میڈیا مداری کس تواتر کے ساتھ کشمیری مجاہدین کو رگڑا دیتے ہیں ۔جہاد کشمیر کو کس قدر حقارت اور ناگواری سے بیان کرتے ہیں اور کس ڈھٹائی کے ساتھ بھارت کو مظلوم اور مظلوموں کو ظالم ثابت کرنے پر ادھارکھائے رہتے ہیں۔ لیکن نصف صدی کے سب سے بڑے سچ کو سن کر ‘پڑھ کر اور جان کر بھی بھارت کے خلاف نہ کوئی زبان کھلی نہ ہی ”میڈیا ٹرائل” ہوا۔”امن کی آشا” نے آزادی صحافت کے کان میں کیا پھونکا ؟ مجرم ذہنیت کی بھارتی جماعتوں اور گروہوں کو خود بھارتی وزیر بے نقاب کرتا ہے لیکن پاکستانی میڈیا پھر سے نقاب ڈال دیتا ہے!ہر ٹی وی سکرین پر بھارتی ڈرامے’ بھارتی ناچ’ بھارتی اشتہارات ‘جی چاہتا ہے پتھر مار کر سکرین توڑ دیں لیکن پیمرا کی غیرت جاگتی ہے نہ اسلامی نظریاتی کونسل جیسے اداروں کو توفیق ہوتی ہے ‘ دنیا کی سب سے بڑی جمہوریت کو سرخی پائوڈر لگا کر ہمارے دل و دماغ میں ”رول ماڈل” کے طور پر پیش کیا جارہا ہے۔انشاء اللہ وہ وقت دور نہیں جو ان  نقالوں اور طبلچیوں کی گردنیں سچے پاکستانیوں کی گرفت میں ہوں گی۔

ثقافت کی کوئی متفقہ تعریف وقت کی زیاں کاری ہے ۔ایک حقیقت متفقہ ہے کہ ثقافت عقائد سے جنم لیتی ہے۔ اس فارمولے کی مدد سے ہم یورپی’ بھارتی اور پاکستانی ثقافتون میںواضح تفریق کرسکتے ہیں۔ایک عام مسلمان پاکستانی کا عقیدہ کیا ہے۔قرآن کتاب ہدایت ہے اور سیرت رسولۖ اس ہدایت کا نمونہ ہے۔کسی گئے گزرے مسلمان سے بھی پوچھ لیں اسے ایمان کے اس درجے پر آپ ضرور پائیں گے۔پاکستان میں ننانوے فیصد مسلمان ہیں اور وہ اپنی سوچوں میں اسلامی تعلیمات کو ہی اپناذریعہ ہدایت اور وجہ نجات سمجھتے ہیں ۔
ان کی سوچ میں مرد و زن کے وہی رشتے مقدس ہیں جنہیں اسوہ رسولۖ نے مقدس ٹھہرایا ہے۔ لباس’چال چلن’رہن سہن اور بول چال کے جو معیار رات قرآن نے طے کردیئے ہیں ‘ عامتہ الناس ان معیارات کو ہی اعلیٰ اخلاقی اقدار کے طور پر قبول کرتے ہیں۔ پاکستانی قوم بحیثیت مجموعی ثقافت کی کسی ایسی تشریح کو ماننے پر تیار نہیں جو قرآن وسنت کے صریحاً خلاف ہو۔عمل کی بات نہیں میں یہاں ایمان اور عقیدے کی بات کر رہا ہوں۔ یہی وجہ ہے کہ جب ہمارے ٹی وی سکرینوں پر کوئی منظر’کوئی ڈائیلاگ’کوئی کہانی ‘کوئی فوٹیج ایسی دکھائی دیتی ہے جوہماری عظیم اسلامی اقدار کے خلاف ہو تو ناظرین اور سامعین کا بلڈپریشر ہائی ہوجاتا ہے۔ وہ بیزاری کا اظہار کرتے ہیں لیکن تفریح و معلومات کا کوئی متبادل انتظام نہ ہونے کے سبب دلگرفتگی کے عالم میں چپ سادھ لیتے ہیں۔

ثقافتی دہشتگردوں نے امریکی اور بھارتی لابیوں سے بھاری معاوضے وصول کرکے ہمارے چینل پر اشتہار’ پروگرام’ٹاک شو کی صورت میں ایسا بندوبست کردیا ہے کہ آپ ریموٹ کنٹرول مسلسل ہاتھ میں رکھیں تو بھی آپ ثقافتی حملے سے بچ نہیں پاتے۔ معاوضہ جوں جوں بڑھتا جارہا ہے’شیطانی ثقافت کے ڈرون حملے بھی تیز ہوتے جارہے ہیں ۔ڈالر کی کشش نے پاکستانی ذہنیت رکھنے والے بڑے بڑے دانشوروں اور اینکروں کو دبوچ لیا ہے۔ہم ان کی رہائی کے لئے دعاگو ہیں’ کہ آخر جلد یابدیر واپس آجائیں گے۔
ایک بڑے پرائیویٹ ٹی وی چینل نے جینے کا نیا ڈھنگ سیکھ لیا ہے۔ جیو ضرور مگر اتنی بے غیرتی کی زندگی کا کیا جینا۔اتنے بڑے میزبان اور اپنا ایک دن ایک پیشہ ور عورت کے ساتھ گزارتے اور اس کے عشق میں ایسے ہلکان ہوتے کہ کبھی اسے ناچتے دکھایا جارہا ہے ‘کبھی اسے گاہکوں کے ساتھ بھائو تائو کرتے۔ پروگرام کے میزبان کے منہ سے شہوت کی رالیں ٹپکتی ہیں اور اگر شائد ناظرین کا خوف نہ ہوتا تو وہ خلوتوں میں گم ہوجاتے۔ایسے لوگوں پر ترس آتا ہے جو اپنی پرتعیش زندگی کے لئے انتہائی پسماندہ سوچ کے اسیر ہورہے ہیں۔
چمکتے ماتھے والے ایک اور دانشور جو میڈیا کے اسی گروپ کا ملازم ہے وہ بھی پاکستان کے خلاف میروں کی چاکری کرتے کرتے میر جعفر بن گیاہے۔ جو ہر کسی کو اپنے سامنے جوابدہ سمجھتا تھا آج پوری قوم اس سے جواب طلب کر رہی ہے۔آخر کیا ہوا اس کی غیرت اور غربت کو؟وہ کوئی امیر آدمی بھی نہیں پھر’وہ کسی کو آن لائن لے کر آیا اور وینا ملک کی غلاظت بھری گفتگو کو پاکستانیوں کے ذہنوں میں انڈیلتا رہا۔بدقماش عورتوں کی ”بولڈنیس” کو فروخت کرنے کا دھندا شروع کردیا۔یہ کام تو ان بازاروں میں بھی خاص قسم کے ٹپکے والے ملازم کرتے ہیں’ ہمارے لئے قابل صد افتخار کو کیا ہوگیا کہ وہ بھی شیطانی ‘سفلی اور ہیجانی مارکیٹ کا سوداگر بن گیا۔خود کو پاکستان دشمنوں کے پھیلائے ہوئے ”فتنہ” کا حصہ بنا لیا۔ایسے اینکرز کے لئے صرف ایک شعر ہی کہہ سکتا ہوں’
زندگی اتنی غنیمت بھی نہیں کہ جس کے لئے
اس عہد کم ظرف کی ہر بات گوارہ کر لیں
کوئی ایک ٹی وی چینل ہو تو ناظرین جا کر اس کا گھیرائو کریں یا اسے دیکھنا بند کریں۔یہاں تو جدھر دیکھتا ہوں اُدھرتو ہے تو ہے۔پاکستانی ثقافت اسلامی تعلیمات سے جنم لیتی ہے اور اسے پروان چڑھانا ہم سب کی مذہبی ہی نہیں اپنی زندگی کی بھی ضرورت ہے۔ ہم ہر طرح کی دہشتگردی کی مذمت کرتے ہیں اور اس ثقافتی دہشتگردی کی بھرپور مذمت بھی۔قارئین ٹی وی اینکرز’ٹی وی مالکان اور دانشوروں کی اصلاح فکر کی دعا کیجئے!

Click here to View Printed Statement

JANG LAHORE IQRA PAGE

NAWA-I-WAQT KARACHI MILLI EDITION

آج انسانیت مجموعی طور پر انتشار کا شکار ہے ۔تمام تر ترقی ‘خوشحالی تعلیم اور علم کے باوجود ساڑھے چھ ارب انسان ایک دوسرے کو نیچا دکھانے اور اس کرہ ارض کو نہ ختم ہونے والے فتنوں میں مبتلا کردینے کی کوشش میں مصروف ہیں۔کوئی ایسا خطہ نہیں جو جنگ و جدل سے پاک ہو۔ جہاں انسان انسان کو کاٹ نہ رہا ہو۔ جہاں آدم آدم کو لوٹ نہ رہا ہو امیر غریب کو کھائے جارہا ہے۔ باوسیلہ دنیا بے وسیلہ بستیوں کو اجاڑ رہی ہے۔تقابل کا فلسفہ اپنے تمام تر منفی معنوں کے ساتھ نسل انسانی کی تباہ کاریوں میں کارفرما ہے۔ کچھ معلوم نہیں کب زیر زمین چھپے ہوئے ایٹم بم‘ سمندر میں تیرتی ہوئی نیو کلیائی آب دوزیں ‘تابکاری مواد اٹھائے فضاءمیں قلانچیں بھرتے طیارے اور خلا میں ہچکولے لیتے مصنوعی سیارے اچانک کسی مہم جو ذہن کی چھوٹی سی غلطی سے اس قافلہ انسانیت کو آگ لگا دیں اور احسن تقویم کے فارمولے پر پیدا کردہ انسان اپنی ہی بدتد بیری اور بدنیتی کے سبب اپنے گھر کو جلا کر خاکستر کردے۔ انسانیت کو بچانے کی آج جس قدر ضرورت ہے۔ شاہد اس سے پہلے کبھی بھی نہ تھی۔ مختلف یورپی دانشور اور انسانی حقوق کے چیمپئن خود ساختہ تھیوری اور محض انسانی ذہن سے پھوٹنے والی احتیاطوں کو ملحوظ خاطر رکھ کر انسانیت کے قافلے کو بچانے کی کوشش میں مصروف ہیں لیکن تمام تر خلوص نیت کے باوجود مغربی انسان دوست ادارے اور حلقے محض اندھیروں میں ٹامک ٹوئیاں مار رہے ہیں ان کی حالت یہ ہے کہ

فلسفی کو بحث کے اندر خدا ملتا نہیں
ڈور کو سلجھا رہا ہے اور سرا ملتا نہیں
اُلجھی ہوئی ڈور کا سرا ڈھونڈنے کے لئے انہیں ہر طرح کے تعصبات سے بالاتر ہو کر صرف اور صرف سچ کو تلاش کرنا ہوگا۔ مجھے یقین ہے کہ اگر انہوں نے مذہب ‘زبان ‘علاقے ‘رنگ نسل ‘ Status اور دنیاوی طبقاتی تقسیم کی عینک اتار کر حق کی تلاش کو نکلیں گے تو پھر انسانیت کے عظیم محسن دنیا جہاں کے لئے رحمت للعالمین اور صرف مسلمانوں کے لئے نہیں بلکہ بنی نوع انسان کے غم گسار آخری پیغمبر خاتم النبین حضرت محمدﷺ کی تعلیمات تک ضرور پہنچ جائیں گے۔
اگر ہم ماہ ربیع الاول میں کوئی ایسی کتاب ترتیب دے سکیں ۔ کوئی ایسی قلم بنا سکیں جس میں رسول پاک ﷺ کی تعلیمات کا بھرپور تاثر ملتا ہو اور وہ یورپ اور امریکہ کے لوگوں کو دکھائی جائیں تو میں دعویٰ سے کہتا ہوں کہ جو ذہن گستاخی پر اتر آئے ہیں وہی ذہن آپ ﷺ کے حق میں اس طرح سرنگوں ہوجائیں گے جس طرح حضرت عمرؓ تلوار حمائل کئے درنبوت پر جھک گئے تھے۔
قافلہ انسانیت کو درپیش جان لیوا حادثوں سے بچانے کا صرف ایک ہی راستہ ہے کہ ہم بحیثیت مسلمان اسوءرسول پر عمل کریں اور غیر مسلموں کو ڈرانے اور خوفزدہ کرنے کے بجائے یا ان سے مرعوب ہونے اور دور ہونے کے بجائے انہیں تعلیمات نبوی سادہ اور آسان سے لفظوں میں سمجھا سکیں۔ دنیا میں مختلف شخصیات علم و کمال‘دولت و جمال اور قوت واقتدار لے کر آتی رہی ہیں مگر ہم حضور انور کو سب سے زیادہ اہمیت دیتے ہیں۔اس کی ایک وجہ تو ہماری جناب رسول اللہ سے محبت و عقیدت اور ہمارا ان کے ساتھ رشتہ ایمان میں بندھا ہونا ہے تو دوسری وجہ یہ بھی ہے کہ جو آپ نے انسانیت کو عطا کیا ہے وہ آپ سے پہلے یا بعد میں کسی نے نہیں دیا۔
دنیا کی دوسری شخصیات کو دیکھیں تو سکندر‘رستم و دیگر نامور کمانڈرز جاہ و جلال دکھا کر چلے گئے‘ کارل مارکس اورلینن جیسے لوگ نظریاتی نعرے دے کر جہاں فانی سے کوچ کر گئے۔
غرض کوئی علمی موشگافیاں دکھا کر چلا گیا کسی نے غلط نظریات میں الجھا کر اسے کمال تصور کیا۔ کسی نے انسانیت کو خاک وخون میں تڑپانے سے لطف حاصل کیا مگر حضور کے انقلاب سے انسانیت کو رہنمائی‘ امن ‘ہدایت و نور ملا ہے۔
اور آپ کے ارشادات آج کے مہذب انسان کے لئے بھی اسی طرح مفید اور حیات بخش ہیں۔ جس طرح 1500 سال قبل کے انسان کے لئے تھے۔ ان کی روشنی اور تابانی میں ذرا فرق نہیں آیا۔اخلاق کی جھلک‘ کردار کی بلندی‘ امانت ‘دیانت اور انسانیت کے لئے پیار جہاں بھی ہے وہ حضور صلی اللہ علیہ وسلم کا دیا ہوا ہے۔ آپ کی بتائی ہوئی باتیں آج بھی بڑے بڑے سائنس دان پڑھتے ان سے ہدایت و رہنمائی حاصل کرتے اور قلب سلیم رکھنے والے آپ کے آخری نبی ہونے کی شہادت دیتے ہیں۔
اسلام کے دیئے ہوئے معاشی‘ معاشرتی ‘سیاسی عدل اور خاندانی نظاموں کا جو بھی حصہ جانے انجانے میںکہیں بھی نافذ ہے دنیا اس کی برکات حاصل ہورہی ہیںاور مجموعی طور پر معاشرے ‘نظام اور اسلام کی بخشی ہوئی اچھائیوں کے طفیل ہی ترقی کر رہے ہیں۔ کئی معاشرے صرف سچ کی بنیاد پر آگے بڑھ رہے ہیں‘ بعض ممالک صرف محنت کی بنیاد پر دنیا میں نام پیدا کرچکے ہیں۔
جاپان انسانی حقوق کی بناءپر پہچان بنا چکا ہے۔اسی طرح معاشرے سے لے کر فرد تک اسلامی تعلیمات کی برکات پھیلتی ہیں۔
حضور انور ﷺ سے قبل افریقہ اور یورپ میں غلام بنانے کے بھیانک مناظر دیکھنے میں آئے ہیں ۔تاریخ گواہ ہے کہ کچھ لوگوں کو دہشت جمانے کی غرض سے بے دردی سے ہلاک کردیا جاتا اور باقیوں کو غلام بنا لیا جاتا تھا اور غلامی کی بھی اس حد تک گری ہوئی مثالیں ان لوگوں نے قائم کیں کہ اپنے معزز مہمانوں کے سامنے شراب و شباب سرو کرنے کے بعد ان کے ہاتھوں میں تیر دے دیئے جاتے ۔ غلاموں کو سامنے کونے میں بٹھا دیا جاتا اور تیر غلام پر برسائے جاتے۔ جوں جوں غلام تڑپتا تو مہمان محظوظ ہوتےِ جبکہ سرور کائنات نے زید بن حارثہ سے ایسا سلوک کیا کہ وہ اپنے والد اور چچا کے ساتھ جانے سے انکاری ہوگئے اور حضور سے چمٹ گئے۔ اس پر تاریخ گواہ ہے کہ نبوت سے پہلے دور میں حضور زید کو کعبے میں لے گئے اور اعلان کیا کہ آج سے زید کو زید بن محمد کہا جائے۔
قرآن پاک کے نزول کی اولین سورتوں میں سورہ بلد میں ”گردنیں آزاد کرو“ کی واضح ایک آیت موجود ہے جبکہ آگے چل کر غلامی کے ادارے کو تدریج کے ساتھ مکمل طور پر اسلام نے ختم کردیا۔
میں تو سمجھتا ہوں کہ اصل روشنی اسلام ہی کے پاس ہے یہ مغرب کے پاس جو روشنی ہے وہ اس قسم کی روشنی ہے جو چور اور ڈکیت کے ہاتھ میں ہوتی ہے۔ وہ اس لائٹ سے اپنے گھر کا راستہ نہیں ڈھونڈ رہا ہوتا مگر دوسرے کے گھر اور دوسرے کے مال کی طرف ہدایت و رہنمائی لے رہا ہوتا ہے۔ روشنی وہی ہوتی ہے جو انسان کو انسانیت کا سبق دے۔ ڈیزی کٹر پھینکنے کے بعد بسکٹوں کے ڈبے پھینکنے سے خداوند کبھی خوش نہیں ہوتا۔
حضورﷺ کی تعلیمات پر نگاہ دوڑائی جائے تو حیرانگی ہوتی ہے کہ جو بات آج ہم لمبی لمبی تقاریر میں نہیں کہہ پاتے آپ نے چند جملوں میں کہہ ڈالیں۔ مکہ سے مدینہ تشریف لانے پر آپ نے جو خطبہ ارشاد فرمایا جو ایک منٹ سے کم وقت کا تھا اور خطبہ حجة الوداع کے موقع پر آخری تاریخی خطبہ بھی مکمل لکھ لیا گیا اور اس کا وقت بھی دس منٹ سے زائد نہیں ہے۔
آیئے آپﷺ کی انسان کے حوالے سے فرمائے گئے ارشادات کا جائزہ لیتے ہیں‘میرا یہ آج بھی دعویٰ ہے کہ جو لوگ پیغمبر اسلام کے حوالہ سے نفرت انگیز تحریریں لکھتے ‘ توہین آمیز کارٹون بناتے اوردل آزار فلمیں دکھاتے ہیں ۔ ان تک محسن انسانیت کی تعلیمات حقیقی طور پر پہنچ ہی نہیں سکیں۔
اس موقع پر میں آپ کے مدینے داخل ہونے والے خطبے پر کچھ عرض کرنا چاہوں گا۔
آپ نے فرمایا”سلام کو عام کرو“ اور باہم کھانے کھلایا کرو ‘صلہ رحمی کیا کرو‘رات کے اس پہر نماز پڑھا کرو جب لوگ سو رہے ہوں۔ تم جنت میں سلامتی کے ساتھ داخل ہوجاﺅ گے۔
سلام ایک دعا ہے یعنی تم پر سلامتی ہو۔ اس کی تفصیل میں حضورﷺ نے دوسرے موقع پر فرمایا کہ مسلمان وہ ہے جس کی زبان اور ہاتھ سے دوسرے مسلمان محفوظ رہیں۔
مزید برآں لفظ مسلمان کو بھی اپنی ایک حدیث میں واضح کردیا کہ جو کوئی ہماری طرح نماز پڑھے اور ہمارے قبلے کی پیروی کرے وہ مسلمان ہے۔ آپ ﷺ یہاں تک مسلمانوں کے لئے رﺅف و رحیم ہیں کہ آخری خطبے میں آپ نے یہ بھی واضح کردیا کہ مسلمان کی جان و مال ‘عزت اور آبرو دوسرے مسلمان پر حرام ہے اور میرے غیر مسلم بھائیوں کو یہ جان کر خوشی ہوگی کہ حدیث قدسی میں حضور نے ہمیں آگاہ کیا کہ اللہ تعالیٰ فرماتا ہے۔
”لوگ میرا کنبہ ہیں“ اور قرآن میں آیا کہ جو کوئی ایک انسان کی جان بچائے گا اس نے گویا پوری انسانیت کی جان بچائی۔ آپ کے ارشاد کے دوسرے حصے میں فرمایا گیا کہ آپس میں کھانے کھلایا کرو۔ ہمیں معلوم ہے کہ درندے ‘حیوان اور انسان میں فرق یہ ہے کہ درندہ شکار مار کر چیڑپھاڑ کرتا ہے۔ اپنا پیٹ بھرتا اور باقی کو وہیں پھینک دیتا ہے۔ حیوان کو جو دیا جائے وہ اسے کھا لیتا اور باقی پر گندگی کر دیتا ہے جبکہ انسان اپنا کھانے کے بعد باقی اپنے بھائیوں کو دے دیتا ہے۔ حضورﷺ کی تعلیمات اس سے بھی ایک درجہ آگے ہیں۔آپﷺ نے ایسے لوگ تیار کردیئے جنہیں میدان کار زار میں بھی کچھ پینے کو ملا ہے تو اسے اگلے زخمی بھائی کی طرف بڑھانے کا اشارہ کیا۔ گویا اسلام پہلے دوسرے بھائی کو کھلا کر پھر خود کھانے کا درس دیتا ہے حضور کے ارشادات کے مطابق اگر کسی کا پڑوسی بھی بھوکا سویا ہوا ہو اور ہم نے پیٹ بھر کر کھانا کھایا ہو تو نہ صرف ہمارا یہ لقمہ حرام بن جائے گا بلکہ اس سے بڑھ کر ایسے شخص کا حضور پر کوئی ایمان نہ ہونے کا سر ٹیفکیٹ بھی سرکار نے جاری فرما دیا ہے۔
صبح تہجد کی نماز سے انسان کے دل میں نرمی پیدا ہوتی ہے ۔ خدا کی محبت اور اس کے بندوں سے پیار بڑھتا ہے۔ سورہ مزمل کے مطابق ایسا کرنے سے نفس پر ضرب کاری لگتی ہے تکبر وغرور جاتا رہتا ہے۔ انسان کے منہ سے اچھی اور پیاری بات نکلتی ہے۔ دعوت دینے کے آداب سمجھ میں آتے ہیں‘ بقول اقبال
عطار ہورومی ہو رازی ہو غزالی ہو
کچھ ہاتھ نہیں آتا ہے آہ سحر گا میں
یہ عمل انسان کے اندر برداشت اور حوصلہ بھی پیدا کرتا ہے جیسا کہ حضور پر ایک مشرکہ بوڑھی کوڑا پھینکتی تھی جب چند دن اس نے ایسا نہ کیا تو معلوم ہوا کہ وہ بیمار پڑگئی ہے ۔ اس دن سرکار اس کے گھر اس کی عیادت کرنے تشریف لے گئے۔ہمیں بڑی واضح ہدایات ہیں کہ ”تم میں سے بہتر وہ ہے جو لوگوں کے لئے نفع بخش ہو“ انسانوں کے درمیان برابری کا درس آخری خطبہ میں جس شان سے دیا گیا ہے وہ اس بات سے عیاں ہے کہ UN کے آئینی چارٹر کی شقیں اس خطبہ رسول سے لی گئی ہیں۔اسی طرح پوری شرح صدر کے ساتھ یہ بات کہی جاسکتی ہے کہ اگر کسی فرد‘تنظیم یا ملک کا مقصد انسانیت کی فلاح قرار پایا ہے تو اسے اپنے اس مقصد میں کامیاب ہونے کے لئے اسوہ رسول ہی اپنا لائحہ عمل قرار دینا ہوگا۔ جس قدر آپ کے طریقہ کار‘فرمودات اور طرز ِ حیات پر عمل ہوگا اسی قدر انسانی فلاح کی منزل قریب تر ہوگی۔ اقبالؒ نے اسی راز کو ایک مصرے میں یوں بیان کیا تھا ‘
دہر میں اسم محمد سے اجالا کردے
اور میں قرآن مجید کی اس آیت پر اپنی تحریر کا خاتمہ کروں گا ”اگر تم اللہ سے محبت کرتے ہو تو میری (رسولﷺ اللہ کی) اتباع کرو اللہ تم سے محبت کرے گا“۔

JANG LAHORE

ایسا کبھی ہوا نہیں کہ دنیا سے شر مکمل طورپر ختم ہوگیا ہو۔انسان کے اندر شر کی قوتیں خیر کی طاقتوں سے ہمیشہ نبردآزما رہتی ہیں ۔آپ اسے حضرت انسان کی فطرت کہہ سکتے ہیں ۔ان شرانگیز طاقتوں کو آپ نیگیٹیو فورسز کا عنوان دے سکتے ہیں ۔قرآن انہیں شیطانی طاقتوں کا نام دیتا ہے ۔ہر منفی سوچ ،ہر تخریبی تصور ہر انسان دشمن منصوبہ ،ہرابلیسی حربہ چاہے اس کا محل وقوع انسان کی اپنی ذات ہو ،اس کا ماحول ہو،ملک ہویاسرزمین ہو

،شیطان ہی کی کارستانی قرار پائے گی۔ہوس ،لالچ،ظلم ،استبداد ،بدعنوانی ، بدامنی،بد عہدی ،دھوکہ دہی ،نوسر بازی ،بزدلی ،منافقت،ہیجان انگیزی ،خیانت، جھوٹ ، فراڈ ،بے ادبی ،فریب کاری ،بعض وعناد،انا پرستی ،چوری ،ڈاکہ زنی ،قتل وغارت اور وحشت وبربریت یہ تمام وہ بیماریاں ہیں جنہیں شیطان نے ایجاد کیا ہے اور وہ کمال ہوشیاری کیساتھ انسانی دل ودماغ میں ان کی پیوندکاری کرتا ہے اور انسان کو شرکے راستے پر ڈال دیتا ہے ۔تشکک اور بے یقینی ،مایوسی اور غفلت جیسے ہتھیاروں سے مسلح ہوکر شیطان جب حملہ آور ہوتا ہے تو بڑے بڑے پختہ عزم انسان ریت کا ڈھیر ہوجاتے ہیں ۔شیطان کا تصور ہر مذہب اور عقیدے کے پیروکاروں میں اپنے اپنے ناموں اور حوالوں سے موجود ہے ۔قرآن نے اس تصور کو بڑے بلیغ پیرائے میں بیان فرمایا ہے ۔

”شیطان نے کہا میں بھی اب تیری سیدھی راہ پر (چلنے والے )انسانوں کی گھات میں لگارہوں گا۔آگے اور پیچھے دائیں اور بائیں ہر طرف سے انہیں گھیروں گا اور توان میں سے اکثر کو شکر گزار نہ پائے گا۔“(سورة اعراف)

حدیث نبوی ہے :۔

”شیطانی وسوسے تمہارے وجود میں خون کی طرح گردش کرتے ہیں “

فطرت نے انسان کو شیطان کے مقابلے میں تنہاءنہیں چھوڑا ۔یہ ہرگز نہیں کہ انسان شیطان کے مقابلے میں بے بس پیدا کیا گیا ہے ۔خالق نے انسان کو پیدا کرتے وقت پانچ چھ فٹ قد کے اس جسم کے اندر ہی وہ آلہ لگادیا ہے جو انسان کو قدم قدم پر آگاہ کرتا ہے کہ تم اب شیطانی قوت کے زیر اثر آرہے ہو۔جس طرح گاڑی اوورسپیڈ ہونے پر سرخ رنگ کی بتی اور آلارم بجنا شروع ہوجاتے ہیں اسی طرح انسان کے اندر ضمیر نام کا ایک آلارم بجنا شروع ہوجاتا ہے ۔غافل سے غافل انسان بھی یہ نہیں کہہ سکتا کہ اسے اچھائی اور برائی میں تمیز نہیں ہے ۔وہ جنگل میں رہتا ہو ۔یا بازاروں کے شورشرابے میں زندگی بسر کرتا ہو،حرف شناس ہویا ان پڑھ ۔رنگ ،نسل ،زبان اور عقیدے کی تفریق کے بغیر جوروح بھی لباس فطرت میں ڈھلی ہے اسے ضمیر کا آلہ لگاکر بھیجا گیا ہے ۔

ارشاد ہوتا ہے ۔

اور گواہ ہے وہ نفس انسانی (ضمیر) اور اسکی ذات جسے ہم نے ہموار کیا۔پھر اس کی بدی اور پرہیز گاری اس پر الہام کردی۔یقینا فلاح پاگیا جس نے نفس کا تزکیہ کیا اور نامراد ہوا وہ جس نے اسے دبادیا۔(سورة شمس)

قرآن نے احسن تقویم کا ٹائٹل ہی انسان کو اسی لئے عطا کیا ہے کہ وہ واحد جاندار ہے جو اچھائی اور برائی میں تمیز کرسکتا ہے ۔ جس طرح شیطان منفی ہتھکنڈوں سے مسلح ہے اسی طرح انسان اپنے ضمیر کی زبردست طاقت سے مز ّین ہے ۔یہی وجہ ہے کہ ابتدائے آفرینش سے لیکر آج تک شر اور خیر باہم نبردآزما رہتے ہیں ۔ایسا کبھی ،کسی دور میں نہیں ہوا کہ شر غالب آجائے اور خیر کی قوت مفتوح ہوجائے ۔ایسا ہوتا تو انسانیت کا قافلہ بیچ راہ کے فنا ہوچکا ہوتا ۔آج ساڑھے چھ ارب انسانوں کا وجود اس بات کا ثبوت ہے کہ خیر کی طاقتیں مفقودنہیں بلکہ موجود ہیں ۔

بقول اقبالؒ:۔

ستیزہ کار رہا ہے ازل سے تا امروز

چراغ مُصطفوی سے شرارِ بوالہبی

سوئے ہوئے ضمیر کو الہامی کتب ہی جگاسکتی ہیں

آپ اپنے گھر سے سکیورٹی آلارم کو ہٹا دیجئے یا اس کی تاریں کھینچ دیں تو پھر واردات کرنے والوں کو کوئی خطرہ نہیں رہتا ۔نہ آلارم بجے گا نہ آپ جاگیں گے ۔نہ اپنے مال واسباب کا تحفظ کرسکیں گے ۔نفسیاتی ماہرین کا کہنا ہے کہ انسان کو اگر مسلسل ایک ماہ تک کسی واقعہ پر ضمیر نہ جھنجھوڑے تو سمجھئے کہ انسان کا ضمیر سورہا ہے ۔یعنی الارم کا کنکشن کٹ گیا ہے ۔حقیقت یہ ہے کہ ضمیر کبھی نہیں سوتا ۔دراصل انسان اپنے کان بند کرلیتا ہے ۔طیش اور عیش انسانی دل ودماغ کی دوایسی حالتیں ہیں جن میں مبتلا ہوکر انسان اپنے جاگے ہوئے ضمیر کو بار بار سلانے کی پریکٹس کرتا ہے ۔شیطان کی جیت کا یہ عجب منظر ہوتا ہے ۔یہ وہ حالت ہوتی ہے کہ انسان خود اپنے آپ کو ماررہا ہوتا ہے ۔وہ اس قدر شقی القلب ہوجاتا ہے کہ اپنی زندگی کے سب سے بڑے محافظ یعنی ضمیر کو اپنے ہاتھوں سے بے بس کردیتا ہے ۔ایسی حالت سے نکلنے کیلئے ہی عقیدے اور ایمان کی ضرورت پڑتی ہے ۔خالق کائنات نے مردہ ضمیر انسانوں کو جگانے اور واپس فطرت کی طرف لوٹانے کیلئے اپنے پسندیدہ انسانوں یعنی پیغمبروں کے ذریعے زندگی کی گائیڈ بکس اتاری ہیں ۔!

ارشادرباّنی ہے :۔

”اے نبی ﷺ ہم نے تم کو شہادت دینے والا ،بشارت دینے والا اور خبردار کردینے والا بناکر بھیجا ہے تاکہ اے لوگو تم اللہ اور اس کے رسول پر ایمان لاﺅ،اس کے رسول کا ساتھ دو اس کی تعظیم وتوقیر کرو اور صبح شام اللہ کی تسبیح کرو۔“(سورة فتح)

مذہب ،دین اور ایمان یہ کوئی ایسی غیر ضروری یا نمائشی اشیاءنہیں ہیں جنہیں انسانی زندگی کو محض زیبا بنانے کیلئے اتارا گیا ہو ۔زندگی کی گاڑی کو کامیابی کی پٹڑی سے نہ اترنے دینا اور متعین وقت میں منزل تک پہنچا دینے کیلئے ضمیر کافی ہے لیکن چونکہ انسان اس آلارم کو جان بوجھ کر سلادیتا ہے اس لئے اسے واپس پٹڑی پر لانے کیلئے الہامی ہدایات کی ضرورت ہوتی ہے ۔جس طرح کار بنانے والے کو علم ہے کہ کار کا مینوئل کیا ہوگا ۔اسی طرح انسان کے خالق کو علم ہے کہ انسان کی کامیابی کیلئے کون کون سی حدود وقیود اور کس طرح کی احتیاطی تدابیر کی ضرورت ہوگی ۔خالق کائنات نے بڑی محنت ،انتہائی محبت اور بے پناہ چاہت کیساتھ وحی کے ذریعے ہر امت ہر گروہ کیلئے ہدایات نازل فرمادی ہیں ۔

ارشاد رباّنی ہے ۔

”یہ بڑی بابرکت کتاب ہے جو تمہاری طرف نازل کی گئی ہے تاکہ یہ لوگ اس کی آیات پر غور کریں اور عقل وفکر رکھنے والے اس سے سبق حاصل کریں۔“(سورة ص)

انسانیت کا اہم مسئلہ

انسانیت کے سارے مسائل کی جڑ الہامی تعلیمات سے دوری ہے ۔الہامی تعلیمات سے گریز نے ہی آج کے انسان کو شیطانی قوتوں کے آگے بے بس بناکر رکھ دیا ہے ۔ سائنس اور سائنسی طرز فکر کا سب سے بڑا نقصان یہ ہے کہ اس نے انسانی ذہنوں کو شک میں مبتلا کردیا ہے ۔جب تک کسی معاملے میں انسان خود تجربات کرکے کسی نتیجے تک نہ پہنے وہ معاملے کی صداقت اور حقانیت کو تسلیم کرنے پر آمادہ ہی نہیں ہوتا ۔انسانی ذہنوں نے وحی اور الہام کو بھی سائنس کی کسوٹی پر پرکھنے کی کوشش کی ہے انسانی ذہن محسوسات تک محدود بنایا گیا ہے ۔اس لئے وہ اللہ ،رسولﷺ اور کتاب اللہ ،جیسے الہامی حقائق کو مشکوک نگاہوں سے دیکھتا ہے ۔جب کہ الہامی ہدایات کا تقاضا یہی ہے کہ ان کی حقانیت میںرتی برابر شک نہ کیا جائے ۔خواہشات اور تعصبات میں پڑے بغیر اس کے ذریعے تعقل ،تفکر اور تذکر کیا جائے ۔اس برترکلام ہی نہیں اپنی زندگیوں میں حکم کا درجہ دیا جائے ۔اس سے ہدایت پاکر اس پر عمل کرنے کا ارادہ اور اس کے تقاضے جب سمجھ میں آجائیں تو چند لمحات ضائع کیے بغیر اس کے سامنے سرنگوں کردیا جائے۔

گو کہ اب مابعد طبیعات کے علم پر بھی بہت کام ہورہا ہے اور امید رکھنی چاہیے کہ انسانیت اپنی اجتماعی فطرتی بصیرت کے ذریعے اپنے خالق حقیقی کو جلد پہچان لے گی اور الہامی کتابوں اور ان کے ذریعے پہنچنے والی کائناتی سچائیوں پر بحیثیت مجموعی ایمان لے آئے گی لیکن قافلہ انسانی ہنوز شبہات کے اندھیروں میں غلطاں وپیچاںہے ۔بظاہر انسان نے ستاروں پر کمندیں ڈال لی ہیں ،سورچ کی روشنی کو گرفتار کرلیا ہے ،کائنات کے ظواہر کو ایک ”مٹھی “میں سمو دیا ہے ،کمپیوٹر سے آگے نینو ٹیکنالوجی کی طرف بڑھ رہا ہے ۔لیکن اس سب علم ودانش ،تحقیق اور تخلیق کے باوجود لائف مینوئل (الہامی ہدایات)کی سچائی پر ڈگمگاتا ایمان اسے تسخیر کائنات کیلئے یکسوئی مہیا نہیں کررہا ہے ۔اور احسن تقوم کا جو اعزاز فاطر ارض وسما نے عطاءفرمایا ہے انسان ابھی اس اعزاز سے پوری طرح لطف اندوز نہیں ہوپارہا ۔قافلہ انسانیت کا سب سے بڑا مسئلہ یہ ہے کہ شک وشہبات نے اجتماعی ضمیر مردہ کردیا ہے اور الہامی تعلیمات سے دوری کی وجہ سے اس کے ضمیر کو جگانے والے تمام ذرائع بے اثر ہورہے ہیں ۔آج کی ہر ترقی ایک نئی الجھن کی نشاندہی کرتی ہے ۔ہر ایجاد کسی نئی تباہی کا پیش خیمہ بن رہی ہے ۔!محبان انسانیت کو آگے بڑھ کر رہنمائی کرنی چاہیے اور الہامی قوائد وضوابط کی تشہیر کرکے تیز رفتار گاڑی کو نیکی اور راست روی کی پٹڑی سے سرکنے نہیں دینا چاہیے ۔ورنہ طیش اور عیش ،یاسیت اور جہالت کی شیطانی قوتیں اس خوبصورت زمین کو جہنم بنادیں گی۔!

(بقول علامہ اقبال)

ڈھونڈنے والا ستاروں کی گزرگاہوں کا

اپنے افکار کی دنیا میں سفر کرنہ سکا

جس نے سورج کی شعاعوں کو گرفتار کیا

زندگی کی شب تاریک سحر کرنہ سکا

پاکستان میں خیر کی قوتیں مغلوب کیوں؟

کسی بھی معاشرے اور تہذیب میں جب تک خیر کی قوتیں غالب رہتی ہیں معاشرے تباہ نہیں ہوتے ۔بداطمینانی نہیں پھیلتی اور انتشار گلی کوچوں میں ننگا نہیں ناچتا ۔ملک ،سلطنت اقتدار اور اختیار یہ وہ انعامات ہیں جو فطرت خوش ہوکر کسی قوم ،گروہ یا فرد کیلئے ممکن بنادیتی ہے ۔لیکن جہاں یہ انعامات ہیں وہیں آزمائش بھی ہوتی ہے ۔پاکستان ،ایک نیا ملک ،ایک انعام تھا لیکن ہم نے اپنے زندہ ضمیروں کو ہوس اور لالچ کے ہتھوڑے مارمارکر ادھموا کردیا اور آج یہی انعام ہمارے لئے بہت بڑی آزمائش بن چکا ہے ۔جب گھر کے باسیوں کو اپنے گھر کے درودیوار سے خوف آنے لگے تو اس سے بڑی آزمائش کیا ہوگی ۔دانشور اور غم خوار حلقے ہمیں کسی بڑے قومی حادثے سے بچانے کیلئے نت نئے فارمولے اور حل پیش کرتے ہیں ۔کوئی گڈ گورنس کی بات کرتا ہے ۔کسی کو صدارتی طرز حکومت میں مسائل حل ہوتے دکھائی دیتے ہیں ،کئی مغربی جمہوریت ہی کو کامل حل ثابت کرتے ہیں ۔کسی کا خیال ہے کہ سخت ترین قانون ہمیں شیطانی بیماریوں سے نجات دلاسکتا ہے ۔کسی کو تمام مسائل کی جڑ فوجی اقتدار دکھائی دے رہا ہے ۔کوئی اسلامی انقلاب کا جھنڈا لہرانے میں نجات کی امید لگائے بیٹھا ہے ۔غرض جتنے ذہن ہیں اتنے ہی فارمولے گردش کررہے ہیں ۔پاکستان اس وقت عملی طورپر تیسری دنیا کا چوتھے نمبر کا ملک ہے جس میں ہر تخریبی قوت ،ہر منفی جذبہ اور ہر شیطانی حربہ پوری طاقت اور قوت کیساتھ پھل پھول رہا ہے ۔شرکے مقابلے میں خیر دبکا بیٹھا ،منتظر فردا ہے ۔!

وہ کونسا جذبہ ہے جو ہمیں جھوٹ بولنے سے روکے گا ۔جو ہمیں ذخیرہ اندوزی سے بازرکھ سکتا ہے ۔ہم کیوں ہوس پرستی چھوڑیں ۔کس کی خاطر بدعنوانی دھوکہ دہی ،بُغض وعناد سے باز رہیں ؟منافقت ترک کریں ؟ایک دوسرے کو روند ڈالنے کی روش ترک کرنے سے کیا حاصل ہوگا ؟۔ضمیر کو جگاڈالنے کا فائدہ کیا ہے ؟نت نئی فریب کاریاں کس کی خاطر چھوڑ دی جائیں ؟۔یہی وہ سوالات ہیں جو ہمیں بحیثیت قوم تذبذب میں مبتلا رکھتے ہیں اور ہم اپنی اس جنت نظیر سرزمین کو شیطانی جذبوں کے سبب جہنم زار بنارہے ہیں ۔کوئی قانون ۔کوئی ضابطہ ،کوئی اتھارٹی ،کوئی خوف اور کوئی شوق ہمیں اس وقت تک راہ راست پر نہیں لاسکتا جب تک ہم بحیثیت قوم اللہ تعالیٰ کی طرف سے زندگی کے آغاز اور انجام کے بارے میں ارشاد فرمائے گئے احکامات پر کامل یقین پیدا نہیں کرتے ۔

ارشاد ہوتا ہے ۔

”اہل کتاب اورمشرکین میں سے جن لوگوں نے کفر کیا وہ یقینا جہنم کی آگ میں جائیں گے اور ہمیشہ وہاں رہیں گے ۔یہ لوگ بدترین خلائق ہیں ۔اور یقینا جو لوگ ایمان لائے اور نیک عمل کیے وہ بہترین خلائق ہیں ۔ان کی جزاءان کے رب کے ہاں دائمی قیام کی جنتیں ہیں جہاں وہ ہمیشہ ہمیش رہیں گے ۔اللہ ان سے راضی اور وہ اپنے رب سے راضی ہوئے ۔یہ سب اس کیلئے ہے جس نے اپنے رب کا خوف کیا ہو۔(البینہ )

جب مجھے یقین ہوگا کہ مجھے دنیا میں کئے گئے ہر عمل کا روز محشر حساب دینا ہے تو میں کسی سماجی قانون ،کسی داروغے کے نہ ہوتے ہوئے بھی خیر پر کار بند رہوں گا ۔جب مجھے یقین ہوگا کہ شیطانی قوتوں کے تابع کئے گئے افعال مجھے دہکتی آگ میں جلائیں گے تو مجھے میرے اندر کا انسان برائیوں سے روکے گا ۔جب مجھے یقین ہوگا کہ رزق حلال کمانے سے مجھے جنت ملے گی جس میں میرے وہم وگمان سے بھی کہیں زیادہ نعمتیں مختص ہوں گی تو پھر میں چند اضافی ٹکوں کے عوض کسی کا حق نہیں ماروں گا ۔زندگی بعد از موت ،جنت کا شوق اور دوزخ کا خوف ،اللہ کی دوستی میں پختہ یقین اور اعمال نامے کی خوبصورتی ،یہی وہ ایمان ہے یہی قرآنی تعلیمات ہیں جو ہر مذہب ،ہر عقیدے میں تھوڑی بہت تبدیلیوں کے ساتھ ایک جیسے ہیں ۔اگر آج کا پاکستانی اپنے اپنے عقیدے کے مطابق الہامی تعلیمات پر کاربند ہوجائے تو شر کے ہاتھوں مغلوب یہی سولہ کروڑ انسان خیر کی بہت بڑی قوت بن جائیں گے ۔جب تک اکائی سیدھی نہیں ہوتی ،اجتماعیت ٹیڑھی ہی رہے گی ۔اصلاح احوال کا واحد حل صالحیت میں ہے اور انسانی دل ودماغ زیادہ دیر تک صالح اعمال سے دور نہیں رہ سکتے ۔اس لئے میرا ایمان ہے کہ پاکستان کے تمام مسائل کا حل اب بھی ممکن ہے ۔شرط یہ ہے کہ ہرپاکستانی قرآن کی فطرتی تعلیمات سے جڑ جائے ۔اگر کوئی عیسائی ہے تو وہ حضرت عیسیؑ کی آفاتی ہدایات پر عمل کرکے کسی مذہب اور عقیدے نے جھوٹ کو نیکی قرار نہیں دیا ،ظلم کو جواز نہیں بخشا ،خیانت کو صلاحیت نہیں کہا ۔انسان دشمنی کو بہادری قرار نہیں دیا ۔کرپشن کو عزت کا موجب نہیں ٹھہرایا ۔

ہمیں اپنے حیوانی ،عقلی، روحانی اوراخلاقی وجود کا تذکیہ قرآن مجید کی تعلیمات کے ذریعے کرنا ہوگا ۔یہی کردار سازی کا بہترین ذریعہ ہے ۔کیونکہ کردار سازی اس وقت تک ہو ہی نہیں سکتی جب تک انسان کے اندر ایمان کا بیج نہ ہو۔ ضمیر اور الہامی تعلیمات کی خوراک دے کر ایمان کا پودا ہرا بھرا کیا جاسکتا ہے ۔یہی انسانی عروج کی اساس ہے۔

مکالے کے آخر میں پاکستانی بہن بھائیوں کو قرآن یعنی انسانی ہدایت کے مرکز سے جڑے رہنے کی ترغیب دلارہا ہوں ۔بقول شاعر:۔

اپنے مرکز سے اگر دور نکل جاﺅ گے

خواب ہو جاﺅ گے افسانوں میں ڈھل جاﺅ گے

اپنی مٹی پہ ہی چلنے کا سلیقہ سیکھو

سنگ مر مر پہ چلو گے تو پھسل جاﺅ گے

دے رہے ہیں جو لوگ تمہیں رفاقت کا فریب

ان کی تاریخ پڑھوگے تو دہل جاﺅ گے