Click here to View Printed Statement

ایبٹ آباد کمیشن رپورٹ پڑھتے جایئے اور شرماتے جایئے۔ جو لوگ اس رپورٹ کو جعلی ثابت کرنے پر تلے ہیں انہیں شائد معلوم نہیں کہ کمیشن کے سربراہ جناب جسٹس (ر) جاوید اقبال نے اسے قعطاً جعلی قرار نہیں دیا بلکہ ذرائع ابلاغ سے یہ اپیل کی ہے کہ وہ مندرجات سے نتیجہ صحیح اخذ نہیںکرپائے۔رپورٹ الجزیرہ ٹی وی نے چلائی اور پاکستانی میڈیا میں جنگل کی آگ کی طرح پھیلی۔ سیکورٹی اداروں سے وابستہ بااختیار لوگ پہلے حیران ہوئے اور پھرناراض ہوگئے۔کچھ بداندیشوں نے اس کی ”ٹائمنگ” کا سوال اٹھایا اور بعض نے اسے نوازشریف حکومت اور فوج کے درمیان صحیح خلیج بڑھانے کا منصوبہ قرار دیا۔حکومت نے ان خبروں کا بھرپور تاثر لیا اور رپورٹ لیک ہونے کے بارے تحقیقات کا اعلان کیا۔”کس نے کیسے یہ رپورٹ چرائی ہے؟”۔ اس سوچ کے تحت اب کئی ایجنسیاں چھان بین کر رہی ہیں اور بعض لوگ زیرنگرانی آچکے ہیں اور کئی ایک پکڑے بھی جائیں گے۔ یہ کام بھی ہونا چاہیے کہ قومی راز افشا کرنے کا رجحان بہت ہی خطرناک ہوتا ہے۔فرض کیا کہ قومی راز فروخت کرنے والا پکڑا جاتا ہے اور اسے کوئی سزا بھی ہوجاتی ہے تو کیا

اس سے یہ حقیقت تبدیل ہوجائے گی کہ امریکہ نے 2مئی کو ایبٹ آباد شہر میں گھس کر دنیا کے سب سے مطلوب شخص اسامہ بن لادن کو جاں بحق کردیا تھا۔ کیا پکڑنے سے رپورٹ کے مندرجات سے انکار کیا جاسکتا ہے۔کیا یہ حقیقت نہیں کہ رپورٹ میں بظاہر کسی ادارے یا شخص کا نام لے کر کسی کو ذمہ دار نہیں ٹھہرایا گیا لیکن آئی۔ایس ۔آئی’پولیس’آئی بی اور سب سے بڑھ کر زرداری حکومت کو مکمل طور پر نااہل اور ناکام قرار دیا گیا ہے۔آئی۔ایس۔آئی کے اہلکاروں اور افسروں کے غرور اور تکبر کی نشاندہی کی گئی ہے۔عام پاکستانی تو آج بھی یہ یقین کرنے پر تیار نہیں کہ آئی۔ایس۔آئی جیسی ایجنسی کو پانچ برس تک معلوم ہی نہیں ہوسکاکہ اسامہ بن لادن انہی کے ہاں ”مہمان” بن کر رہ رہا تھا۔ پھر یہ سوال کہ ہیلی کاپٹروں کا شور بھی ہمارے محافظوں کو جگا نہ سکا کس قدر تکلیف دہ ہے اور جو جاگ گئے تھے انہوںنے کسی قسم کا ردعمل ظاہر کرنا ضروری نہ سمجھا۔ سقوط ڈھاکہ سے بھی بڑا سانحہ ہوگیا لیکن کسی ”غیرت مند” نے رضاکارانہ طور پر بھی استعفیٰ دینا مناسب نہ سمجھا۔ صدر’وزیراعظم ‘آرمی چیف کوئی بھی ذمہ دار نہیں تو پھر اس ملک کے دفاع کی ذمہ داری الماس بوبی کھسرے کے حوالے کردی جائے کم از کم وہ ہجڑوں کی جماعت کے ساتھ تالیاں بجا کر ٹھمکا لگا کر دشمن کوحواس باختہ تو کر ہی دے گا۔آئی۔ایس۔آئی کے سابق چیف جنرل (ر) شجاع پاشا کو ریٹائرڈ ہوتے ہی دبئی میں نئی نوکری مل گئی۔ رپورٹ کیسے چوری ہوئی یہ ایک اہم معمہ ہے لیکن رپورٹ جو کہہ رہی ہے اس پر سر جوڑ کر بیٹھنا اور آئندہ کے لئے اپنی اصلاح کرنا اس سے کہیں ضروری ہے۔ہم جناب میاں محمد نوازشریف سے ایک پاکستانی کی حیثیت سے سوال کرتے ہیں کہ اگر امریکہ پاکستان پر حملہ آور ہوتے ہوئے پھر کسی ”ایبٹ آباد” میں چھپے کسی ”الظواہری” کے کمپائونڈ میں اترتا ہے اور وزیراعظم کو اطلاع دی جاتی ہے تو جناب نوازشریف کیا کریں گے؟۔حکومت کو صرف یہی سوال ذہن میں رکھ کر سیکورٹی پلان از سر نو ترتیب دینا چاہیے۔اس رپورٹ میں بہت سے انکشافات ہوچکے ہیں۔فتح اور شکست تو بعد کی بات ہے اگر بغیر مقابلہ کئے ہی ڈھیر ہوجانا ہے تو پھر شیر کی جگہ کسی مناسب جانور کا انتخاب کر لیجئے تاکہ قوم مغالطے میں نہ ماری جائے۔خفیہ اداروں میں کام کرنے والے کارکنوں کی حوصلہ افزائی بہت ضروری ہے۔ ان کا ومرال بلند کرنے کے لئے پانچ گھنٹے نہیں پانچ روز ان کے پاس گذاریں کہ وہ سب بھی پاکستانی ہیں لیکن خطاکاروں کو ”تھاپڑا” مت ماریں ورنہ اس سے ان لوگوں کی حوصلہ شکنی ہوتی ہے جو اپنی جان ہتھیلی پر رکھ کر دہشتگردوں کی کھچاروں میں گھستے اور ان کو کیفرکردار تک پہنچاتے ہیں۔ایجنسیوں کے اندر اصلاحات’ میرٹ’کارکردگی کے کڑے معیار کو لاگو کرنا وقت کی اہم ترین ضرورت بن گئی ہے۔سول و ملٹری ایجنسیوں کے دائرہ کار کا از سر نو جائزہ لیا جانا ضروری ہے۔رپورٹ بار بار کہہ رہی ہے کہ جاگ جائو’جاگ جائو۔کیا ہم اب بھی سوئے رہیں گے!!

Click here to View Printed Statement

پہلے رمضان کو سٹوروں پر’پھل فروشوں کے پاس اور دُکانوں پر بے پناہ رش نظر آیا۔ ہر شخص زیادہ سے زیادہ سامان خوردونوش خریدنے میںجُتا ہوا تھا۔ جس کو ایک تھیلے آٹے کی ضرورت تھی اس کی کوشش تھی کہ وہ پورا یوٹیلٹی سٹور ہی اٹھا کر لے جائے۔جسے روزہ افطار کرنے کے لئے چند کھجوریں دکار تھیں وہ بھی کلو سے کم نہیں لے رہا تھا۔ٹماٹر کے بغیر بھی ہنڈیا چڑھائی جاسکتی ہے لیکن ہر خریدار ٹماٹروں کو یوں للچائی ہوئی نظرو سے گھور رہا تھا گویا اسے زندگی بھر یہ سوغات میسر نہ آسکے گی۔ہر کوئی رمضان کے پورے مہینے کی خریداری کر لینا چاہتا تھا۔ غریب اور امیر کے درمیان صرف قوت خرید کا فرق دیکھا ہے باقی ذخیرہ اندوزانہ طرز فکر میں ذرہ برابر فرق محسوس نہیں ہوا۔ماہ صیام کے بارے میں قرآن پاک میں جو حکم ہوتا ہے

وہ تمام اصحاب علم بار بار پڑھتے اور سنتے ہیں لیکن شائد سمجھتے بہت کم ہیں۔ روزہ کا سب سے اول و آخر مُدعا یہی ہے کہ انسان کے اندر تقویٰ آجائے۔ تقویٰ بہت معنی خیز لفظ ہے ‘لیکن جو چند مفہوم میری حقیر سی دانست میں محفوظ ہیں وہ یہی ہیں کہ ایک شخص (مومن) اگر اپنی خواہشات پر قابو نہیں پاسکتا یعنی وہ اپنی لذات کو ضبط کے بندھن میں باندھنے سے قاصر ہے اور صبر کا دامن تھام نہیں سکتا تو وہ متقی ہرگز نہیں بن سکتا۔زیادہ سے زیادہ خریداری اور غیر ضروری خریداری فضول خرچی کے زمرے میں آتی ہے۔یوں محسوس ہوتا ہے کہ روزہ دار کو یقین نہیں کہ کل بھی آنا ہے اور یہ زمین ہر وقت خوراک اگلتی ہے اور گزشتہ گیارہ ماہ سے وہ انتہائی نارمل طریقے سے روزانہ کی خریداری کرتے رہے ہیں۔اشیاء بھی یہیں ہیں ‘دکاندار بھی یہی ہیںاور آپ ہم سب یہیں ہیں پھر آخر کیا سبب ہے کہ رمضان کا چاند نظر آتے ہی ہمارے دل ودماغ پر ایمرجنسی سی نافذ ہوجاتی ہے ۔ہمارے اندر صبر اور ضبط آنے کی بجائے ”جلدی” اور ”جلدبازی”خریداری اور بسیار خریداری کی ہوس جاگ اٹھتی ہے۔ہماری اسی نفسیات کا ذخیرہ اندوز گروہ فائدہ اٹھاتے ہیں اور وہ کھانے پینے کی اشیاء ذخیرہ کرکے رمضان شروع ہوتے ہی کئی گنا زیادہ قیمتوں پر اشیائے ضروریہ فروخت کردیتے ہیں۔ہم اپی غیر ضروری ایمرجنسی کے ذریعے دراصل معاشرے کے ان ناسوروں کے لئے لوٹ مار کے ذرائع اور راستے پیدا کرتے ہیں۔اگر چینی نہیںمل رہی تو صبر کر لیں چین ضروری ہے۔چینی ضروری نہیں۔یقین جانیں اگر ہم مہنگی چیزوں کو چند روز کے لئے نہ خریدیں تو قیمتیں زمین پر آلگیں گی لیکن ہم چونکہ تقویٰ کے حقیقی معنوں سے بہت دور ہوتے ہیں اس لئے اپنی معمولی لذتوں کو روک نہیں سکتے۔رمضان پورا مہینہ رہے گا۔ اگر ہم کسی لمحے روزے کے بنیادی تقاضے صبر اور ضبط کا مظاہرہ کرسکیں  تو یہ اس معاشرے’ اس ملک اور خود اس ماہ مقدس پر بڑا احسان ہوگا۔آج کے کالم میں روزے کے حوالے سے چند دیگر اہم نکات بھی پیش خدمت ہیں۔روزے دار کو پانچ باتیں بار بار اپنے ذہن میں دھراتے رہنا چاہیں ۔یہ کہ وہ اللہ پروردگار عالم کا بندہ ہے’اسے اللہ کی جناب میں ایک دن جوابدہی کے لئے پیش ہونا ہے’ عبادت میں محبت کے ساتھ رسول اللہ صلی اللہ علیہ وآلہ وسلم کی اطاعت اس پر لازم ہے’اسے دنیا کی اس امتحان گاہ میں صبر سے کام لینا چاہئے’جس طرح اس نے اللہ کے حکم پر حلال اشیاء مخصوص اوقات کے لئے اپنے اوپر حرام کر لی ہیں اسی طرح ساری زندگی اللہ کے ہر حکم کے سامنے فرمانبردار بن کر رہے گا۔یہ ماہ مقدس واقعتاً انسان کی روحانی اور جسمانی ”اوور ہالنگ” کا شاندار موقع ہے۔ اصل ضرورت اس بات کی ہے کہ  روزہ دار کے ہاتھ’ پائوں’ زبان’ دل اور دماغ سے دوسرے لوگ نقصان نہ اٹھائیں بلکہ اس ماہ میں  معاشرہ مجموعی طور پر ”رفاعی معاشرے” کا روپ دھارلے!۔

Click here to View Printed Statement

ایک سال بھی مسند اقتدار پر نہ بیٹھ سکے اور فوجیوں کے نرغے میں نامعلوم مقام پر منتقل کردیئے گئے۔ تجزیہ نگار محمد مرسی کے فوج کے ہاتھوں یوں فارغ ہونے کی وجوہات تراشتے رہیںگے۔ لیکن حقیقت یہ کہ اخوان المسلمین کو برس ہا برس کی آزمائشوں کے بعد مصر کا اقتدار ملا لیکن وہ غیروں کی سازشوں سے زیادہ اپنی نااہلیوں کے سبب اسے سنبھال نہ پائے۔امت مسلمہ کی مذہبی سیاسی جماعتوں کا پرابلم یہی ہے۔وہ اپنے طور پر یہ تصور کر لیتی ہیں کہ معاشرے میں نیکی اور راست روی صرف انہی سے شروع ہوتی اور ُانہی پر ختم ہوجاتی ہے۔وہ امور حکومت کو اپنے محدود نظریات کے مطابق چلانے کی دُھن میں مگن ہوتے ہیں اور عامة الناس کی خالصتاً انسانی ضرورتوں کو بھول کر رضائے الٰہی کے حصول کو اپنی منزل قرار دیتے ہیں۔

وہ اکثریت کو لبرل’سیکولر اور بے دین سمجھ کر اپنے اردگرد ایک مخصوص ذہنیت کا دائرہ کھینچ لیتے ہیں اور لوگ جب اپنی ضرورتوں کو احتجاج کی شکل دیتے ہیں تو وہ احتجاج کو سازش قرار دے کر رد کردیتے ہیں۔کیا یہ حقیقت نہیں کہ مصر اور اس کی فوج اور وہاں کی عوام کسی طور پر کبھی بھی مذہبی نہیں رہے۔ کیمپ ڈیوڈ معاہدے کے بعد مصر عملاً امریکی امداد پر پلنے والا ملک بن گیا تھا۔ اور عبدالجمال ناصر جیسے طاقتور رہنمائوں نے مصریوں کے اندر بڑی حد تک نیشنلزم بھر دیا تھا۔”عرب اسپرنگ” نے جمی جمائی حکومتوں کیخلاف ایک بڑی تبدیلی کے لئے سر اٹھایا اور یوں اخوان المسلمین نے بھی اپنا راستہ بنایا لیکن اخوان نے مصر کے لبرل طبقات اور سیکولر گروہوں کو یہ کہہ کر اپنے ساتھ ملایا تھا کہ اقتدار میں آنے کے بعد وہ انسانی بھلائی اور عوامی خوشحالی کو پہلی ترجیح قرار دیں گے۔لیکن جب اقتدار مل گیا تو محمد مُرسی نے نہ صرف اپنے مخالفین کو چن چن کر نکال باہر کیا بلکہ اپنے مخالف صحافیوں پر عجیب وغریب طرح کے الزامات لگا کر انہیں پابند سلاسل کیا اور اپنے مخالف ‘ہر آواز کو امریکی سازش قرار دیا۔جن گروہوں کی مدد سے جناب مرسی نے ووٹ لیا انہیں ہی ناراض کردیا اور عوامی فلاح کی بجائے پارٹی کی مضبوطی پر سارا زور لگا دیا۔زمینی حقائق کوئی لطیفہ نہیں ہوتے کہ انہیں مذاق میں اڑا دیا جائے۔مصر ایک کثیر الجہتی ثقافت اور مذہب کا ملک ہے۔ثقافت اور سیاحت ہی اس ملک کی معیشت کی جان ہے۔غیر ملکی سیاحوں کو ہر طرح کی خرافات کی آزادی چاہیے۔ آپ ان خرافات کو پسند کریں یا نہ کریںلیکن صدیوں سے رچے بسے تصورات کو یکبارگی ملیامیٹ نہیں کرسکتے۔ تدبیر اور تدریج کا سہارا لینا پڑتا ہے۔ اور عوام کے معاشی حالات بہتر کرکے ہی آپ پاپولر لیڈر رہ سکتے ہیں۔لوگوں کے پیٹ پر آپ لات ماریں گے تو وہ کہیں نہ کہیں تحریر چوک بنالیں گے۔ اور جب دوسرے ڈیرے ڈالنے والوں کی تعداد کروڑوں تک جاپہنچے تو پھر ملکی فوج آگے بڑھتی ہے ورنہ یو این او کی فوجیں آدھمکتی ہیں۔اسلامی ملکوں میں فوجیں شب خون مارنے میں بڑی مہارت رکھتی ہیں ۔ جس ملک میں پٹرول لینے کے لئے دو دن دن لائنوں میں کھڑا رہنا پڑے’ ٹیکس پر ٹیکس نافذ ہورہے ہوں’وہاں اخوان کی شرافت اور سادگی کو لوگ بھول جاتے ہیں اور فوج کو پکارتے ہیں۔فوج کے کئی سینئر جرنیلوں کو ہٹا کر اپنی پسند کا جنرل لگانے کا تجربہ ہمیشہ خطرناک رہا ہے۔یہ پاکستان کے جنرل ضیاء الحق اور جنرل پرویز مشرف ہوں یا مصر کے جنرل عبدالفتح ہوں۔جرنیل جرنیل ہوتا ہے۔ اس کا اول و آخر مقصد فتح ہے۔دشمن فتح نہ ہوسکیں تو پھر اپنے ملک کو فتح کر لیتے ہیں۔لوگ ترکی کی مثال دیتے ہیں۔ترکی کی برسراقتدار پارٹی قطعاً اسلامی پارٹی نہیں ہے۔اسلامی سوچ رکھنے والی یہ ایک ویلفیئر پارٹی ہے۔ انہوں نے عوام کی بہتری کے لئے کام کیا ہے اور ذاتی نظریات کو بہت پیچھے رکھا ہے۔ مسلسل تین بار اقتدار حاصل کرنے کے باوجود ترکی میں شراب نوشی پر ہلکی سی پابندی کا تاثر ملا اور وہاں بھی تحریر سکوائر سج گیا۔ لوگ اپنے ذاتی معاملات میں کسی کی مداخلت پسند نہیں کرتے ہاں البتہ آپ محبت کے ساتھ تبلیغ کے ذریعے اسلام کے اعلیٰ اوصاف کی طرف لوگوں کو مائل کرسکتے ہیں۔آج بھی دنیا کا سب سے بڑا قبحہ خانہ ترکی میں واقع ہے۔ہمارے ہاں بھی نیا آرمی چیف بننے جارہا ہے۔ہم میاں محمد نوازشریف سے توقع رکھتے ہیں کہ وہ اپنے وعدوں کے مطابق کسی سینئر کو آرمی چیف بنائیں گے اپنی پسند کا ایک تجربہ سامنے ہے۔مرسی کی مثال سامنے رکھیں اورکسی جرنیل پر بھروسہ کرکے اسے آگے مت لائیں۔

Click here to View Printed Statement

خون ہی خون ہے۔ دو چار دن کے وقفے کے بعد پاکستانی سوچنے لگتے ہیں کہ شائد قاتلوں اور دہشتگردوں کو رحم سا آگیا ہے۔ ایک موہوم سی اُمید پیدا ہونے لگتی ہے لیکن اُمید کی ڈوری کا سرا پوری طرح تھام نہیں پاتے کہ پھر کسی چوک’ کسی چوراہے پر انسانی جسم کے خون میں لتھڑے ہوئے ٹکڑے ملتے ہیں۔ کوئی جلی لاش کسی ایمبولینس میں رکھی جارہی ہوتی ہے۔ بم دھماکہ’ریموٹ کنٹرول دھماکہ’ خودکش دھماکہ’ ٹارگٹ کلنگ’ بوری بند لاش’ اغوائ’ ہماری سماعتوں میں خوف ہی خوف بھر جاتا ہے۔ ایک پوری فضاء سوگوار ہوجاتی ہے۔صف ماتم لپیٹنے کی فرصت ہی نہیں رہتی۔ہر انسان کش کارروائی کی ذمہ داری قبول کرنے والے ببانگ دہل اخبارات اور ٹی وی والوں کو فون پر بتاتے ہیں کہ جیتے جاگتے انسانوں کو چیتھڑوں میں تبدیل کرنے کا کارنامہ فلاں گروپ نے سرانجام دیا ہے۔ عورتیں’بچے’بوڑھے’ شیعہ’سنی’ مسلم’ غیر مسلم ۔کوئی بھی تو محفوظ نہیں ہے۔وردی اور شیروانی ‘امیر  اور غریب سب ہی قتل گاہوں میں سربریدہ پڑے ہیں۔ بڑے بڑے دل گردے والے ٹی وی پر مقتولوں کی چلنے والی فوٹیج دیکھ نہیں پاتے۔ آگ اور خون کا یہ گھنائونا کھیل کب ختم ہوگا؟

یہی وہ سوال ہے جو شعور اور لاشعور میں سماء گیا ہے۔ پوری قوم نفسیاتی مریض بن گئی ہے۔اُمید تھی کہ جناب میاں محمد نوازشریف کی شرافت کی بدولت شائد خون بہانے والوں کو شرم آجائے۔نہ ڈرون گرانے والوں کو شرم آئی اور نہ ہی بے گناہ پاکستانیوں کو بارود سے اڑانے والوں کو احساس ہوا۔ پاکستان کے لئے دونوں قوتیں’ دونوں نظریات’دونوں گروہ  بے رحم قاتل ثابت ہورہے ہیں۔طالبان کے ہمدرد بھی ان کی درندگی کی بھینٹ چڑھ گئے۔جناب عمران خان کی حق گوئی اور امریکی جنگ کی شدید ترین مخالفت بھی طالبان نامی گروہ کو غارت گری سے باز نہ رکھ سکی۔عام پاکستانی یہ سوچنے میں حق بجانب ہے کہ کیا یہ ملک زندگی اور سرمائے کے لئے محفوظ بھی ہے یا نہیں۔جہاں اوسطً روزانہ دو درجن سے زائد لوگ قتل کردیئے جائیں اور یہ عمل گزشتہ بارہ برس سے متواتر چل رہا ہو اور پچاس ہزار سے زائد انسان اس آگ میں جل چکے ہوں اور یہ ” قتل عام” کہیں تھمنے کا نام نہ لیتا ہو’وہاں زندگی کیسی اور خوشحالی کا تصور کیسا؟۔اگر یہ خانہ جنگی ہے توخانہ کس کا تباہ ہورہا ہے؟ ہمارے عسکری  اور سیاسی آکابرین آج تک سائے کا تعاقب کررہے ہیں۔آخر کوئی تدبیر کاگرکیوں نہیں ہوتی۔یہ قوم کس کے ہاتھ پہ لہو تلاش کرے۔ امریکی محفوظ ہیں ‘برطانوی محفوظ ہیں’عشرت کدے محفوظ ہیں’ بے حیائی کو پھلانگتے فیشن شو ہر روز منعقد ہوتے ہیں۔سودخور یہاں ہیں ‘اسمگلرز یہاں ہیں’ذخیرہ اندوز کھلے عام دھندہ کر رہے ہیں معاشرہ  کے سارے مجرم آزاد ہیں۔زندگی کی رعنائیوں سے پوری طرح لطف اندوز ہورہے ہیں ۔طالبان انہیں کچھ نہیں کہتے وہ جب مارتے ہیں تو ملک کے محافظوں کو مارتے ہیں۔پاکستان کی تنصیبات پر حملہ کرتے ہیں ۔پاکستان کے دوست ملک کو ٹارگٹ کرتے ہیں ۔شیعہ سنی فساد کو بھڑکاتے ہیں۔آخر ان کا ایجنڈا کیا ہے؟ حکومت ان کے اصل روپ سے پردہ چاک کیوں نہیں کرتی اور اگر وہ ریاست سے زیادہ طاقتور ہیں تو ہر روز مرنے کی بجائے عوام کو سچ بتا دیا جائے ۔دعوے اور جھوٹے وعدے پہلے رحمان ملک کیا کرتے تھے اور اب شائد یہ ناخوشگوار فریضہ جناب چوہدری نثار کو ادا کرنا پڑ رہا ہے۔اگر یہ گروہ فتنہ ساز ہیں اور ہم سب حق پر ہیں تو پھر اعلان جنگ کیوں نہیں ہوتا۔خدارا پاکستان کو قتل گاہ بنانے والوں کے خلاف اعلان جنگ کریں اور فتنہ  سازوں کو واصل جہنم کرکے واپس لوٹیں۔ لیکن پہلے یہ بتا دیں کہ یہ واقعتاً پاکستانی ہیں جو گمراہ  ہوگئے ہیں یا دشمن ممالک کے کارندے ہیں؟ کوئی تو بات کریں جس سے ہمارے آنسو تھم جائیں!۔