پچیس برس سے اسلام آباد کے دیہی علاقے میں متوسط اور غریب گھرانوں کے بچوں کی تعلیم و تربیت میں مصروف ڈاکٹر نعیم غنی سے جب بھی ملاقات ہوتی ہے وہ بے سکول بچوں کی دردناک کہانی سناتے ہیں۔”جوبچے کسی مدرسے یا سکول میں پڑھ رہے ہیں حکومت کی ساری توجہ ان کی طرف ہوتی ہے لیکن وہ اڑھائی کروڑ بچے جن کے لئے نہ سکول ہے نہ اُستاد وہ اسی معاشرے کا حصہ ہیں۔اُن کے بارے میں کسی کو فکر ہی نہیں”۔”حکومتوں کی اپنی ترجیحات ہوتی ہیں جس ملک میں تعلیم کا بجٹ ہی دو فیصد سے آگے نہ بڑھا ہو اُس مُلک میں دانش سکول ایک مذاق ہی لگتا ہے”۔
”تعلیم عام کرنا اور ہر بچے کو سکول میں داخل کرنا آئینی تقاضا ہے لیکن شائد آئی ایم ایف کا دبائو ہے کہ صحت اور تعلیم پر سرکاری خزانے سے رقم نہ لگائی جائے اور اسے پرائیوٹائزڈ ہی رہنے دیا جائے”۔
سُلطانہ فائونڈیشن کے اس زیرک چیئرمین کے پاس ٹھوس اعدادوشمار ہیں’دلائل ہیں اور درد دل بھی ہے۔ وہ ہر فورم پر بے سکول بچوں کا مقدمہ لڑتے ہیں۔اُن کی پریشانی کی بازگشت ایک سرکاری رپورٹ میں بھی سنائی دی ہے۔ وفاقی وزارت تعلیم اور تعلیمی منصوبہ بندی کی اکیڈمی ”ایپام” کی رپورٹ بہ عنوان ”پاکستان ایجوکیشن سٹیٹسٹکس” میں اعتراف کیا گیا ہے کہ پاکستان کے پانچ سے سولہ سال کی عمر کے تقریباً نصف بچے سکول میں نہیں پڑھتے اور سکول سے باہر بچوں میں لڑکوں کے مقابلے میں لڑکیوں کی تعداد کہیں زیادہ ہے۔پاکستان میں پانچ سے سولہ سال تک کے بچوںکی تعداد تقریباً پانچ کروڑ کے لگ بھگ ہے۔ اس طرح اڑھائی کروڑ بچے سکول سے باہر ہیں اور بغیر کسی تعلیم کے جوان ہورہے ہیں۔ رپورٹ میں اُن بچوں کا بھی ذکر ہے جو سکول میں داخل ہوئے لیکن انہوں نے پانچویں کلاس کے بعد سکول چھوڑ دیا۔ یہ بات بھی سامنے آئی ہے کہ پاکستان میں اسی فیصد سکول پرائمری سطح کے ہیں اور اُن میں سے تیس فیصد ایسے سکول ہیں جن میں صرف ایک استاد دستیاب ہے۔نصاب ‘ تعلیمی معیار اور اساتذہ کی پریشان کن صورتحال بھی سامنے لائی گئی ہے۔
اس رپورٹ پر تبصرہ کرتے ہوئے وفاقی وزیر تعلیم وتربیت جناب بلیغ الرحمان نے آئیں بائیں شائیں کرنے کے بعد ارشاد فرمایا ہے کہ یہ اتنی بڑی تعداد میں بچوں کا سکول سے باہر رہنا باعث ندامت ہے۔
بلیغ الرحمن اچھے وزیر ہیں کم از کم انہوں نے حقائق تسلیم کر لئے ہیں اور اپنی ندامت کا اظہار بھی کردیا ہے۔
حال ہی میں وزیراعظم پاکستان اپنی نورِ نظر محترمہ مریم نواز اور اپنے کار خاص جناب ڈاکٹر طارق فضل چوہدری کے ہمراہ وفاقی دارالحکومت کے کسی سرکاری سکول میں جلوہ گر تھے۔ وہاں انہوں نے ایک ماہر اتالیق کا رول اپناتے ہوئے ”معصوم” بچوں سے سوالات کئے’ ان کے ساتھ وقت گذارا اور سکول کی سہولیات بہتر بنانے پر احکامات جاری فرمائے۔ جب سے تعلیم کے پھیلائو کے لئے محترمہ مریم نواز صاحبہ کو امریکہ سے کروڑوں ڈالر ملے ہیں تب سے اسلام آباد کے سرکاری سکولوں میں پرائم منسٹر کی آمد کے سلسلے میں بھی چل نکلے ہیں۔ ایک رپورٹ میں بتایا گیا ہے کہ فیڈرل سکولوں میں ایسے بدقسمت سکول کثرت میں موجود ہیں جہاں بچیوں کے لئے ٹائلٹ کی سہولت دستیاب نہیں’ ایسے کالج موجود ہیں جہاں سٹاف نہیں ۔جب وزیراعظم کا دورہ ہوتا ہے تو سکول کی چمک دمک دیدنی ہوجاتی ہے۔ لیکن جونہی دورہ ختم ہوتا ہے پھر وہی اُجڑی بستیاں اور ٹوٹے بنچ نمودار ہوجاتے ہیں۔ ایک طرف میاں شہبازشریف کے بند ہوتے ہوئے دانش سکول ہیں اور دوسری طرف امید کی رسی سے بندھے وفاقی سکول ہیں۔ یوں محسوس ہوتا ہے کہ حکومت صرف درشنی اقدامات پر یقین رکھتی ہے۔ جب سکول جانے والے اڑھائی کروڑ بچوں کی حالت سُدھر نہیں پارہی تو جوبچے سکول سے واقف ہی نہیں اُن کے لئے کون پریشان ہوگا!
سُلطانہ فائونڈیشن نے اپنے یوسف صراف سنٹر کے ذریعے موقعہ سکولوں کا جال پھیلایا ہے۔ یہ بے سکول بچوں کو سکول میں لانے کی بجائے اُن کے گھروں ‘کارخانوں’دُکانوں اور کچی بستیوں کے اندر اُن کی تعلیم وتربیت کا قابل عمل منصوبہ ہے۔ فائونڈیشن نے ان بچوں کی عمر’ ذہنی قابلیت اور فراغت کو سامنے رکھ کر مخصوص نصاب ترتیب دیئے ہیں۔
”ہم نے ایک ماڈل دے دیا ہے۔ اس ماڈل کو جگہ جگہ دھرایا جائے تو چند سالوں میں اڑھائی کروڑ بچوں کو سکول میں داخل کئے بغیر تعلیم سے بہرہ مند کیا جاسکتا ہے”۔
ڈاکٹر صاحب نے ایک ملاقات میں ”موقعہ” سکولو ںپر روشنی ڈالتے ہوئے بتایا۔ یہ ایک انقلابی منصوبہ ہے۔چھوٹے پیمانے پر اسلام آباد میں عمل درآمد جاری ہے۔مخیر حضرات ایسے سکولوں کو گود لے رہے ہیں۔ یہ تحریک آگے بڑھ رہی ہے۔ اگر وزیر تعلیم شرمندہ ہونے کی بجائے ڈاکٹر نعیم غنی جیسے لوگوں سے مل لیں تومستقل شرمندگی سے قوم کو بچایا جاسکتا ہے۔

ہریانہ کے جاٹوں نے احساس محرومی کا شکار ہو کر دہلی کو جانے والی پانی کی نہر بند کردی’پٹریاں اُکھاڑ پھینکی’ عمارتوں کو نذر آتش کردیا۔ فوج بھی پُرتشدد مظاہروں کوروک نہیں پائی۔جاٹ برادری کی احتجاجی تحریک میں 20 سے زائد لوگ ہلاک ہوئے’ سینکڑوں زخمی ہوئے لیکن مرکزی حکومت مظاہرین کو پُرامن رہنے کی تلقین کرتی رہی۔ مذاکرات کامیاب ہوئے یا ناکام حقیقت یہ ہے کہ بھارت کے پاس اپنے کسانوں کو دینے کے لئے کچھ بھی نہیں ہے۔ جاٹ تھک ہار کر بیٹھ جائیں گے۔ مودی سرکار کا شائننگ انڈیا فی الحال بُجھا ہوا ملک ہے جس میں جمہوریت تو بہت ہے لیکن عوام کی حالت زار روز بروز بگڑتی جارہی ہے۔ احساس محرومی پھیلتا جارہا ہے اور خطہ غربت سے رہنے والوں کی تعداد روز بروز بڑھ رہی ہے۔ ڈیڑھ ارب کی آبادی میں ایک ارب وہ انسان ہیں جن کو ضروری غذا دستیاب نہیں ہے۔ ساٹھ کروڑ وہ ہیں جن کے پاس ٹائلٹ کی سہولت نہیں ہے۔آخر شائننگ انڈیا کا سارا پیسہ کہاں جارہا ہے؟
چین کے ایک ملٹری تھنک ٹینک کی حالیہ رپورٹ میں بتایا گیا ہے کہ سال 2015ء میں بھارت دوسرا بڑا ملک ہے جس نے سب سے زیادہ اسلحہ خریدا ہے۔ جبکہ پاکستان نے اسلحہ کی درآمد پر نسبتاً کم رقم خرچ کی ہے۔ پاکستان اسلحہ کے خریداروں کی فہرست میں نویں سے دسویں نمبر پر آگیا ہے لیکن بھارت نے اسلحہ کی ریکارڈ خرید کی ہے۔
اسٹاک ہوم انٹرنیشنل پیس ریسرچ انسٹی ٹیوٹ (سپرئی) نے بتایا ہے کہ بھارت نے کم و بیش 2015ء میں بھی اتنا ہی اسلحہ خریدا ہے جتنا 2014ء میں خرید کر اول نمبر حاصل کیا تھا۔ تین ہزار ملین ڈالر۔ اس کو بھارتی روپے سے ضرب دیں تو کھربوں روپے بنتے ہیں۔ روس’ امریکہ اور اسرائیل سے خریدے ہوئے اسلحہ کے انبار لگا چُکا ہے لیکن عالمی سطح پر کسی قسم کی پریشانی کا اظہار تک نہیں کیا گیا۔
پاکستان کو امریکہ نے آٹھ ایف سولہ طیارے بیچنے کی منظوری دی تو بھارت میں واویلا مچ گیا۔ امریکی سفیر کو دفتر خارجہ طلب کرکے احتجاج کیا گیا۔ دُنیا بھر میں بھارتی لابی نے امریکی صدر پر دبائو ڈالا اور فیصلہ منسوخ کرنے کا مطالبہ کیا۔ حالانکہ صدر اُوبامہ نے جس سمری کی منظوری دی اُس میں صاف لکھا ہے کہ پاکستان دہشت گردی کے خلاف جنگ میں فرنٹ لائن اسٹیٹ ہے اور سرحدوں کی نگرانی کے لئے اس کی ایئرپاور مضبوط ہونا ضروری ہے۔ لیکن بھارت نے آج بھی احتجاج جاری رکھا ہوا ہے اور وہ پاکستان کے اسلحہ کی ضرورتوں کو کسی طور پورا ہونے نہیں دینا چاہتا۔
آخر بھارت کو کس سے خطرہ ہے۔ وہ پاکستان کے مقابلے میں کئی گنا زیادہ امریکہ کی ”مہربانیاں” سمیٹ رہا ہے۔ ایٹمی معاہدہ کر چُکا ہے اور امریکہ سے جدید ترین اسلحہ خرید رہا ہے۔ چین کے ساتھ اس کے سرحدی تنازعات سردخانے میں جاچکے ہیں اور مخاصمت کی جگہ تجارت نے لے لی ہے۔ اربوں ڈالر سالانہ کے کاروباری اور تجارتی معاہدے ہو چکے ہیں۔ پھر بھارت کو کس سے خطرہ ہے۔ کیا بھارت اپنے دفاع کے لئے اسلحہ خرید رہا ہے؟۔ ہرگز نہیں۔ پاکستان نے عزت’ غیرت سب دائو پر لگا کر پٹھان کوٹ کے ملزمان کے خلاف گوجرانوالہ میں ایف آئی آر درج کی ہے ۔ بھارتی وزیر دفاع اس پر مطمئن نہیں۔مودی کا یہ اعتراف کہ سقوط ڈھاکہ کے لئے بھارت نے مکتی باہمی کا ساتھ دیا تھا’ ان کے ارادوں اور ناپاک عزائم کو سمجھنے کے لئے کافی ہے۔ بھارت کے وزراء بار بار پاکستان کو سبق سکھانے کے لئے ”ہوم ورک” پر زُور دے چکے ہیں۔ یہ اسی ”ہوم ورک” کی ایک جھلک ہے کہ بھارت اپنے ہمسائے اور دس گنا چھوٹے ملک پر جارحیت کی تیاریاں کر رہا ہے ۔ اسے اس سے غرض نہیں کہ جاٹ برادری کے حقوق پورے ہوتے ہیں یا نہیں’ اسے انتہا پسندوں کی خواہش کو پورا کرنا اور پاکستان سے اپنی ازلی دُشمنی کو پروان چڑھانا ہے۔ دُنیا کس قدر خود غرض ہے کہ جنوبی ایشیاء میں سب سے بڑا ملک اسلحے کے انبار لگا رہا ہے اور کوئی پوچھنے والا نہیں۔

سچے رضاکار کو کسی تعریف یا تحسین کی ضرورت نہیں ہوتی۔ رضاکارانہ جذبہ انسانی تسکین اور روحانی تشفی کے ساتھ جُڑا ہوتا ہے۔ طمانیت قلب ہی سب سے بڑا صلہ ہوتاہے۔ ایک مسلمان خلق خدا کے کاموں میں اس لئے حصہ لیتا ہے تاکہ اللہ پاک کی رضا مندی اور قربت حاصل کرسکے۔ جہاں تک کسی فرد کی رضاکارانہ سرگرمیوں کے حوالے سے سماجی اور سماجی تنظیموں کی ضرورت ہوتی ہے تو اس کے لئے رضاکاروں کی عزت افزائی‘ تصدیق اور توثیق ضروری ہوتی ہے۔
پاکستان میں انسانی خدمت کے درجنوں ادارے موجود ہیں۔ سرکاری ‘ نیم سرکاری اورغیر سرکاری سب کی اپنی اپنی خدمات ہیں۔دُکھ اور درد کی گھڑی میں ہمدرد ی کے دو بول بھی بہت وقعت رکھتے ہیں۔ ہلال احمر پاکستان ان سب اداروں سے نمایاں مقام رکھتا ہے۔
ریڈکریسنٹ یعنی ہلال احمر ایک طرف قومی سطح کا ادارہ ہے تو دوسری طرف یہ ریڈکراس /ریڈکریسنٹ موومنٹ کا حصہ بھی ہے۔ ایک سو نوے ممالک میں ایسے قومی ادارے موجود ہیں۔ انسانی خدمت کی اس تحریک کا ہیڈکوارٹر جنیوا میں ہے۔ انٹرنیشنل کمیٹی آف ریڈکراس اور انٹرنیشنل فیڈریشن آف ریڈکراس/ریڈ کریسنٹ سوسائٹیز کے ملاپ سے یہ ایک تحریک بنتی ہے ۔ کسی ممبر مُلک میں کوئی قدرتی آفت آئے‘ دہشت گردی ہو یا جنگیں ہوں اس تحریک میں شامل تمام ادارے اور سوسائٹیاں مدد کو پہنچتی ہیں۔ لیکن اصل امتحان اس ملک کی ریڈکراس یا ریڈکریسنٹ کا ہوتا ہے۔

اگر قومی ریڈکریسنٹ کے فعال رضاکاروں کی صحیح تربیت ہو اور ہر ضلع اور ہر تحصیل میں ان کا نیٹ ورک موجود ہو تو تباہی کے نتیجے میں متوقع خطرات کو کم کیا جاسکتا ہے۔ پاکستان جغرافیائی طور پر ایسے خطے میں واقع ہے جہاں زلزلے اور سیلاب کا اندیشہ برقرار رہتا ہے۔ ایسے ملک میں ریڈکریسنٹ یا ہلال احمر کو بہت زیادہ فعال رہنے کی ضرورت ہوتی ہے۔ خصوصاً جب ملک میں وبائی امراض اور دہشت گردی کا خطرہ منڈلاتا رہے پھر ہلال احمر جیسے انسانی خدمت کے اداروں کی ذمہ داریاں مزید بڑھ جاتی ہیں۔
پاکستان ہلال احمر اپنے قیام سے ہی فعال دکھائی دیتی ہے۔ لیکن اس کے دائرہ کار کی محدویت نے اسے عوامی نہیں ہونے دیا۔ ادارے کی اہمیت کو سمجھتے ہوئے وزیراعظم پاکستان میاں محمد نوازشریف نے سیاسی دامن میں کھلنے والے خوبصورت پھول کو اس ادارے کے لئے مختص کردیا تھا۔ جواں ہمت اور جواں سال ڈاکٹر سعید الٰہی نے جونہی اس ادارے کی باگ ڈور سنبھالی تو ہلال احمر کے دائرہ کار میں اضافہ ہوتا دکھائی دیا۔ انہوں نے اس ادارے کو محض تباہی کے دوران خدمات سرانجام دینے تک محدود نہیں رہنے دیا بلکہ اسے ہمہ وقت متحرک رکھنے کا عظیم منصوبہ تشکیل دیا اور اس پر عمل شروع کردیا۔
عرصہ دراز سے رضاکاروں کی تعداد پانچ لاکھ تھی۔ ان میں سے اکثریت خاموش تھی اور ہیڈ آفس کی طرف سے ان کے ساتھ کوئی مربوط رابطہ نہیں تھا۔ڈاکٹر سعید الٰہی نے تین سالوں میں پچاس لاکھ نئے رضاکار بنانے کا ہدف طے کیا اور پہلے سال کے اندر سترہ لاکھ کی حد کو چُھو لیا۔ اس غرض کے لئے پنجا ب یونیورسٹی اور علامہ اقبال یونیورسٹی جیسی بڑی بڑی جامعات کے ساتھ معاہدے کئے گئے۔اور اب ان اداروں کے طلبہ و طالبات کی ٹریننگ کے پروگرام ترتیب دیئے جارہے ہیں۔عام سوچ سے ہٹ کر چیئرمین ہلال احمر نے مدرسوں کے طلباءو طالبات کو قافلہ انسانیت میں شامل کرنے کا جاندار پروگرام ترتیب دیا۔ تمام مسالک کے علماءکونیشنل ہیڈکوارٹر میں دعوت دی گئی اور ہلال احمر اور تنظیمات اتحاد مدارس کے مابین ”میثاق انسانیت“ کے عنوان سے معاہدہ طے پا گیا۔ ضلعی انتظامیہ کے تعاون سے پنجاب کے مختلف مدارس میں فرسٹ ایڈٹریننگ شروع کی جاچُکی ہے۔
اسلام آباد دارالحکومت میں بین الاقوامی معیار کی کوئی ایمرجنسی ایمبولینس سروس نہیں تھی۔ ہلال احمر نے جدید طرز کی یہ سروس شروع کی۔1030 کے ملانے پر سات سے دس منٹ میں یہ سروس فراہم ہوجاتی ہے۔ ہلال احمر نے 1122 سے بھی معاہدہ کر لیا ہے۔ جونہی اسلام آباد کے حوالے سے 1122 کو کوئی کال وصول ہوتی ہے ‘ہلال احمر کی ایمبولینس حرکت میں آجاتی ہیں۔ ایمبولینس میںفرسٹ ایڈ اور فوری طبی امداد کا سامان موجود ہوتا ہے۔ اس سروس کی افادیت کو ایوان صدر نے بھی سند عطا کی اور خود صدر پاکستان جناب ممنون حسین نے اس کا افتتاح فرمایا۔ ڈاکٹر سعید الٰہی ایسی سروس کو پورے مُلک میں شروع کرنا چاہتے ہیں۔ انہوں نے نیشنل ایمبولینس سروس کا ایک منصوبہ وزیراعظم پاکستان اور صدر پاکستان کی منظوری کے لئے بھجوا رکھا ہے۔ ایمبولینس کا مقصد محض زخمیوں اور لاشوں کی ہسپتال تک منتقلی نہیں بلکہ زخمی کو اٹھانے سے پہلے فوری طبی امداد فراہم کرکے جان بچانا بھی ہے۔ کہا جاتا ہے کہ مرحوم جنرل آصف نواز کا ڈرائیور اور بیوی نے اگر فرسٹ ایڈ کی معمولی سی تربیت بھی حاصل کی ہوتی تو جنرل صاحب کی جان بچائی جاسکتی تھی۔ جہاں ہر گھر میں فرسٹ ایڈ کی ضرورت ہے وہیں ایمبولینس پر موجود عملے کی تربیت بھی از حد ضروری ہے۔ایمبولینس کا ڈرائیور ایک ماہر فرسٹ ایڈ ر ہونا چاہیے۔ اس مقصد کو پورا کرنے کے لئے پاکستان میں آئرش تنظیم کے ملاپ سے پہلا ایمبولینس کالج بنایا گیا ہے۔ ہلال احمر کے نیشنل ہیڈکوارٹرز میں ماہرین کی زیرنگرانی چلنے والے اس کالج میں تربیت حاصل کرنے والے افراد نہ صرف پاکستان کے اندر قیمتی جانیں بچانے میں معاون ثابت ہوں گے بلکہ بیرون ممالک جا کر قیمتی زرمبادلہ بھی کما سکتے ہیں۔ کالج میں داخلے شروع ہیں اور معمولی فیس کے عوض غیر معمولی ہنر سے آراستگی کا اہتمام کردیا گیا ہے۔ڈاکٹر صاحب اس کالج کوکافی نہیں سمجھتے۔انہوںنے راقم کو بتایا کہ پاکستان میں ڈیزاسٹرز کے حوالے سے کوئی یونیورسٹی نہیں ہے۔ڈیزاسٹر یعنی قدرتی آفات یا انسان ساختہ تباہی سے نپٹنے کے لئے دُنیا میں نت نئی تحقیقات ہورہی ہیں ۔تعلیم وتربیت کے دس سے زائد مضامین پڑھائے جارہے ہیں۔ نقصانات کو کیسے کم کرنا ہے ‘فوری امداد کی رسائی کیسے ممکن بنانی ہے‘متاثرہ آبادیوں سے مکالمہ کیسے کرنا ہے۔حکومتی اور امدادی اداروں کے درمیان رابطہ کاری کیسے ہوگی۔ آباد کاری میں حائل مشکلات پر کیسے قابو پانا ہے۔ ڈونرز کو کس طرح اور کیسے شریک کرنا ہے۔ میڈیکل‘خوراک‘ رہائش کے انتظامات کیسے ہوں گے۔ خاندان سے بچھڑ جانے والوں کو کس طرح ڈھونڈ نکالنا ہے۔ٹرانسپیرنسی اور شفافیت کو کس طرح یقینی بنانا ہے۔ روزگار کے مواقع کس طرح بحال کرنے ہیں۔ نفسیاتی طور پر متاثر ہوجانے والے افراد کو کس طرح ہنسی مسکراتی زندگی لوٹانی ہے۔انفسٹرکچر کمیونیکیشن میں ٹیکنالوجی کا کیا رول ہوسکتا ہے۔غرض بیسیوں مضامین ہیں جو اس مجوزہ ریڈکریسنٹ ڈیسرایئریونیورسٹی میں پڑھائے جائیں گے۔
پڑھانے کی بات شروع ہوئی تو ایک اور اہم منصوبے کا ذکر بھی آگیا۔ڈاکٹر سعید الٰہی نے بتایا کہ انہوں نے حکومت کو تجویز دی ہے کہ سکولوں‘کالجوں اور یونیورسٹیوں میں ”ریڈکریسنٹ کورز“ کا اجراءکیا جائے۔ یہ ایک لحاظ سے نیشنل کیڈٹ کور (National Cadet Corps) کی طرز پر تربیتی پروگرام ہوگا۔ این سی سی کی بجائے آر سی سی کا مقصد ہر طالبعلم کو فرسٹ ایڈ کی ٹریننگ دینا ‘والنٹیئر اور بلڈ ڈونر بنانا ہے۔ ایسا پروگرام خود حکومت کے لئے بھی نیک نامی کا سبب بنے گا۔ یہ ایک صدقہ جاریہ ہوگا۔ ایک بار اگر ایسے پروگرام پر عمل شروع ہوگیا تو چند سالوں کے اندر پاکستان میں خون عطیہ کرنے والوں کی کمی رہے گی‘ نہ بوقت ضرورت تربیت یافتہ رضاکاروں کے لئے دیگر ممالک کی طرف دیکھنا پڑے گا اور نہ ہی آئے روز فوری طبی امداد نہ مل پانے کے سبب قیمتی جانوں کا ضیاع ہوگا۔ یہ ایک انقلابی منصوبہ ہے اور ہلال احمر کے چیئرمین اس منصوبے کو ہر حال میں شروع کروانا چاہتے ہیں۔
”آپ لوگ اس سلسلے میں ہماری مدد کریں‘ کالم لکھیں‘ حکومتی حلقوں میں اسے پروموٹ کریں۔پاکستان کی اس سے بڑی خدمت کوئی نہیں ہوگی“ ان کی آنکھوں میں ایک اشتیاق تھا اور وہ لب ولہجہ کے اعتبار سے پُراُمید دکھائی دے رہے تھے۔
گھنٹہ بھر کی اس بریفنگ کے دوران مختلف شعبہ ہائے زندگی کی کتنی شخصیات ان سے ملنے آئیں۔ سینئر ترین صحافی بھی دکھائی دیئے‘ سماجی رہنما بھی جلوہ گر تھے۔ وہاں جو بھی آیا اس کے اندر خدمت انسانیت کا موثر اور مجسم احساس بیدار ہوا۔ ڈاکٹر صاحب کی ہمہ گیر شخصیت نے ہلال احمر کو گمنامی سے نکال کر عوامی بنا دیا ہے۔ وہ رضاکاروں کی عزت افزائی کا بہتر سے بہتر راستہ نکالنتے رہے ہیں۔ انہوں نے کہا‘ڈاکٹر صاحب ہلال احمر کے پلیٹ فارم سے جو بھی دُکھی انسانیت کی خدمت کرنے کا عزم کرے گا وہ رضاکار نہیں کہلائے گا۔ ہم اس ادارے کا باقاعدہ سٹار بنائیں گے۔ وہ معاشرے کا ستارہ ہے۔ اس کا جذبہ اس قابل ہے کہ اسے ”سٹار“ کہا جائے“۔
ملاقات کے لئے آئے ایک سینئر کالم نگار کو ڈاکٹر سعید الٰہی نے اپنے ہاتھوں سے سنہری اور دمکتا ہوا سٹار لگایا اور ہلال احمر کے ستارے اور چاند دونوں جگمگاتے ہوئے دکھائی دیئے۔ ان چاند تاروں کی روشنی پھیل رہی ہے اور نفسانفسی کے اس عالم میں بھی ہلال احمر لوگوں کے غم بانٹنے‘ دکھ کم کرنے اور بے لوث خدمت کرنے کےلئے تصور‘ منصوبہ اور عمل کے مراحل تیزی سے طے کر رہی ہے۔
قارئیں! آپ بھی اس تحریک خدمت انسانیت کے دست و بازو بن کر‘ اور تَعاوَنُو عَلی البِروَالتقویٰ کی عملی تفسیر بن جائیں۔ڈاکٹر سعید الٰہی پُکار رہے ہیں‘
اب وقت ہے پیچ وخم دستار کو بدلو
اخلاق کو عادات کو اطوار کو بدلو
بدلو گے تو بچ جاﺅ گے تم قہر خدا سے
اڑجائیں گے یہ ریگ محل ورنہ ہوا سے
جو کچھ ضرورت سے زیادہ ہے لُٹادو
ٹل جاتی ہیں آفات غریبوں کی دُعا سے
حدیث قدسی ہے‘
”مخلوق اللہ کا کُنبہ ہے اور کوئی اللہ کے کنبہ کے ساتھ سب سے اچھا سلوک کرتا ہے وہ اللہ کو سب سے زیادہ پیارا ہے“۔

پاکستان حالت جنگ میں ہے۔ یہ جنگ ہم پر مسلط کردی گئی ہے۔ بعض محققین کا خیال ہے کہ ضیاء الحق دور میں غلط خارجی پالیسیوں کے سبب ہم نے دہشت گردی کا راستہ کھولا اور پرویز مشرف کے دور میں امریکہ کا ساتھ دے کر اس عفریت کو مکمل طور پر اپنے گلے ڈال لیا۔ آج کے زمینی حقائق یہ ہیں کہ امریکہ’ روس اور دیگر طاقتیں سکون اور امن کے ساتھ زندگی گزار رہے ہیں لیکن یہ پاکستان ‘ہمارا پاکستان ایک ایسی جنگ میں مبتلا ہوچکا ہے جس کے ختم ہونے کے امکانات بہت کم دکھائی دیتے ہیں۔ سولہ دسمبر 2014ء کو اے پی ایس پشاور میں دہشت گردوں نے بربریت کی انتہا کردی تھی اور آٹھ ماہ بعد بڈا بیر ایئربیس پر نمازیوں کو خون میں نہلا کر انہوںنے ایک بار پھر اے پی ایس کی خونی یادوں کو تازہ کردیا ۔

تیس انسانوں کو گولیوں سے بھون ڈالنے کی ویڈیو اور تصاویر سامنے آچُکی ہیں۔ جب مُلک میں خون کی ہولی کھیلی گئی’ ہو تو پھر عید کی خوشیاں بے معنی ہوجاتی ہیں۔اندوہناکی کی ایک دبینر چادر ہے جو کراچی سے خیبر اور گوادر سے گلگت تک تنی ہوئی ہے ۔ جنگی ترانے اور ترانوں کے اندر شہید ہوتے ہوئے پاک فوج کے جوانوں کی جھلکیاں روح اور جسم میں ایک سنسناہٹ سی طاری کر دیتے ہیں۔ دہشت گردوں کی گرفتاریوں کی خبریں بھی تواتر کے ساتھ چل رہی ہیں۔ خوف اور جوش کی ملی جلی کیفیات کے اندر عید قربان جاری رہی۔
یہ بات دعوے کے ساتھ کہی جاسکتی ہے کہ ملک کے سنجیدہ حلقوں نے قربانی کرتے وقت مُلک کے لئے قربان ہونے والے اپنے بہادروں کو کسی نہ کسی طور یاد ضرور رکھا ہے۔ قربانی کا فلسفہ حضرت اسماعیل علیہ السلام کی عظیم قربانی سے پُھوٹتا ہے۔ کسی بھی بڑے اور اعلیٰ مقصد کے لئے دی گئی قربانی کو اللہ پاک کی رضا کی سند عطا ہو جاتی ہے۔ اللہ سے قربت اور تعلق کی آبیاری کے لئے ہم بکرے’ بھیڑ اونٹ یا گائے کو ذبح کرتے ہیں۔ہمیں تعلق بااللہ کی روحانی قوت نصیب ہوتی ہے۔ لوگوں کی جان کی حفاظت کے لئے دہشت گردوں سے لڑتے اور انسانیت کے قاتلوں سے جنگ کرتے اگر جان قربان ہوجائے تو اس قربانی کو بھی یقیناً اسماعیلی جذبے سے ہی مہمیز ملی ہوگی۔ یہ شہادت گہہ الفت میں قدم رکھنا ہے ۔ لوگ آسان سمجھتے ہیں مسلماں ہونا۔
زندگی گذارنے کا ایک فلسفہ یہ ہے کہ ہم سانحات اور حادثات کو مصنوعی طریقے سے بھلانے کی روش پر چل پڑیں۔ناچ گانے کی طرف قوم کو راغب کریں اور بڈھ بیر کے شہداء کے تذکرے کو اپنی روزمرہ کی گفتگو سے خارج کردیں۔ یہ غفلت کہلائے گی۔ ایک روش یہ کہ ہم شہداء کی عظمت اور قربانی کو یاد رکھیں۔غم کو اپنی طاقت بنائیں۔اسلام کی دی ہوئی تعلیمات کے مطابق زندگی گذارتے رہنے کا عہد دھرالیں اور اپنی اپنی انفرادی اور اجتماعی ذمہ داریوں کی طرف توجہ دیں۔ عید قربان پر جس طرح مہنگائی کا جن سربازار ناچتا رہا’جس طرح ہر دُکاندار قصائی بن کر مڈل کلاس طقبہ کی کھال ادھیڑتا رہا اور جس طرح سرکاری مشینری عوام الناس کی حالت زار سے لاتعلق رہی ‘ جس طرح ہم نے گلی محلے میں گندگی اور اوجڑیاں پھینکیں اس طرز عمل سے واضح ہوتا ہے کہ ہم نے سنت ابراہیمی کی اصل روح کو اپنے دل و دماغ میں ابھی تک اتارا نہیں ہے ۔اللہ کے ہاں ہمارا قربانی کا گوشت نہیں جاتا۔ نیت ‘حضور نیت جاتی ہے۔ کیا یہ سچ نہیں کہ ہم میں اکثر لوگ مسکینوں اور عزیزوں کے حصے کا گوشت بھی فریزر میں جمائے رکھتے ہیں اور چند انتڑیوں اور چھچھڑوں کے سوا مستحقین تک کچھ پہنچ نہیں پاتا۔ ہم میں سے کتنے ہیں جنہوں نے تھوڑا سا وقت نکال کر غور وفکر کیا ہو اور محلے میں ایسے گھرانوں کو ڈھونڈنے کی کوشش کی ہو جو واقعتاً قربانی کے گوشت کے حقدارہیں۔ کیا منظر ہوتا اگر صاحبان خانہ خود گوشت لے کر لوگوں کے دروازے پر دستک دیتے اور بڑے احترام اور اہتمام کے ساتھ گوشت پیش کرتے۔ اس طرح ایک دوسرے کے ساتھ ملنے’ ایک دوسرے کو سمجھنے اور ایک دوسرے کے قریب آنے کا موقع ملتا۔ غم یہ بھی ہے کہ دشمن نے ملک کو چاروں اطراف سے گھیر رکھا ہے۔ اور غم یہ بھی ہے کہ ہم اب بھی اپنی انائوں’اپنی عصبتیوں اور اپنی طبقاتی سوچ قربان کرنے پر آمادہ نہیں ہیں۔ایسے میں دہشت گردوں کا خاتمہ کس قدر مشکل ہوتا جارہا ہے۔!

دہشت گردی اب کسی ایک مُلک یا قوم کا مسئلہ نہیں رہا۔ یہ ایک بین الاقوامی اشو بن چُکا ہے۔ پاکستان دہشت گردی کے عفریت سے بُری طرح متاثر ہوا ہے۔ افواج پاکستان کو دہشت گردوں کے خاتمے کا جو ٹاسک دیا گیا تھا وہ بڑی حد تک پورا ہوچکا ہے۔ فوجی نوعیت کی فتوحات قابل ذکر ہیں۔ضرب عضب کے تین اہداف مقرر کئے گئے تھے۔پہلا ہدف ان دہشت گرد گروہوں اور تنظیموں کے ٹھکانے ختم کرنے تھے جو اعلانیہ طور پر ریاست اور ملک کے خلاف برسرپیکار تھے۔ الحمد اللہ ہماری عسکری قوت نے ”ناقابل شکست ” سمجھے جانے والے ان گروہوں کا خاتمہ کردیا ہے۔ یہ بلوچستان کے علیحدگی پسند لشکر تھے یا اسلام کا نام استعمال کر کے اسلامی جمہوریہ پاکستان کو توڑنا چاہتے تھے دونوں قسم کے گروہ اپنے انجام کو پہنچ گئے ہیں۔ جو چند بچے ہیں وہ بھی فرار کی راہ اختیار کئے ہوئے ہیں۔ہمارے بہادر فوجی ان کی آخری پناہ گاہوں تک جاپہنچے ہیں۔دوسرا ہدف فرقہ وارانہ تنظیموں کی وارداتوں پر قابو پانا تھا۔مقام شکر ہے کہ ان کے وجود کو بھی نیست و نابود کردیا گیا ہے۔ اب ان کے اندر ہتھیار اٹھانے کی ہمت نہیں رہی اور ان کے ماسٹر مائنڈز کو مضبوط گرفت میں لیا جاچُکا ہے۔ مُلک میں ٹارگٹ کلنک کے اکا دُکا واقعات تو ہوتے ہیں لیکن ایسی انتہا پسند تنظیموں کا نیٹ ورک تباہ کردیا گیاہے۔ تیسرا اور اہم ترین ہدف دہشت گرد تنظیموں کی مالی معاونت اور معاون لوگوں کے گرد گھیرا تنگ کرنا تھا اس حوالے سے کراچی میں جو آپریشن ہورہا ہے اس کے ذریعے بڑے بڑے نامی گرامی لوگوں کو پکڑا جا چُکا ہے۔ چونکہ کرپشن انڈسٹری کے ذریعے ہی ان شدت پسند گروہوں کو مالی مدد فراہم کی جاتی تھی اس لئے مالی بدعنوانی کے ذرائع پر آہنی ہاتھ ڈالا گیا ہے ۔ قوم کو یقین ہے کہ کراچی میں آپریشن اپنے منطقی انجام تک پہنچ کر ہی ختم ہوگا۔
سوال یہ پیدا ہوتا ہے کہ کیا عسکری فتوحات دہشت گردانہ سوچ کو ختم کر پائیں گی۔ ایسا ہونا ممکن نہیں ہوتا۔ جب تک عمومی سوچ تبدیل نہیں ہوتی اور انتہا پسند مذہبی مفکرین کے ساتھ ڈائیلاگ نہیں ہوتا تب تک دہشت گردی کے مآخذ ختم نہیں ہوسکتے۔ طالبان فکر کے حامل گروہوں کو اس وقت بزور قوت دبادیا گیا ہے لیکن ان کے اندر کے دہشت گرد پر ہم فتح حاصل نہیں کرسکے۔ کہا جارہا ہے کہ بہت سے طالبان نے ”داعش” میں شمولیت اختیار کر لی ہے۔ داعش کی فکر ہرگز مقامی نہیں ہے۔یہ تنظیم کسی ردّعمل کے نتیجے میں سامنے نہیں آئی بلکہ اس کا ایک خاص فلسفہ ہے اور اس کے چاہنے والے امریکہ اور یورپ میں بکثرت موجود ہیںِ۔لیکن اس تنظیم نے پاکستان اور افغانستان جیسے غیر عرب ممالک میں بھی اپنے اثرات ظاہر کرنا شروع کردیئے ہیں۔ یہ ایک خالص نظریاتی جنگ ہے ۔”داعش” کی غیر انسانی کارروائیوں کو دیکھا جائے تو تاریخ اسلام بلکہ انسانی تاریخ میں ایسی بہیمانہ سرگرمیوں کی کوئی مثال نہیں ملتی۔ پاکستان نے دہشت گردی کے اس ابھرتے ہوئے خطرے سے نپٹنے کا کوئی بندوبست نہیں کیا۔یہ طالبان نہیں ہیں بلکہ طالبان سے دس گناہ خطرناک لوگ ہیں اور ان کے نزدیک ہم تمام پاکستانی واجب القتل ہیں۔
بوکو حرام کی کارروائیوں کی جھلک دیکھ کر انسان لرز اٹھتا ہے۔ اسی طرح داعش جس طرح قتل عام کرتی ہے اس سے بھی لرزہ طاری ہوجاتا ہے ۔ عالمی نیٹ ورک کی حامل اس تنظیم کو پاکستانی نوجوانوں کے ذہن متاثر کرنے کے لئے کسی مدرسے یا مسجد کی ضرورت نہیں۔سوشل میڈیا ان کا سب سے بڑا ہتھیار ہے۔ یورپ سے لڑکیاں ان داعشیوں کے ساتھ نکاح کے لئے شام اور عراق کا خطرناک سفر طے کرتی ہیں۔ یورپ کی آزاد زندگی ان کو روک نہیں سکتی۔یہ وہ حالات ہیں جن کا فکری انداز میں مقابلہ کیا جانا ضروری ہے۔سچ یہ ہے کہ ان کے فکری توڑ کے لئے کوئی کام نہیں ہوا۔ ادارہ منہاج القرآن نے کچھ کام کیا لیکن ڈاکٹر طاہر القادری دھرنا سیاست میں ایسے اُلجھے کہ پورا سال ضائع ہوگیا۔ شیخ الاسلام نے چھ سو صفحات پر مشتمل ایک فتویٰ تحریر کیا تھا جس میں امن کا ایک مکمل نصاب بھی دیا گیا تھا۔ کاش کہ اس نصاب کو ہر یونیورسٹی کالج اور سکول میں متعارف کروایا جاتا۔
اسے پاکستانی قوم کی خوش قسمتی کہیے کہ ڈاکٹر صاحب نے ہمت کرکے دوبارہ سے اس کام کو آگے بڑھانے کا اعلان کردیا ہے۔ڈاکٹر صاحب کے قریبی رفیق کار اور شعلہ بیان مقرر جناب عُمر ریاض عباسی نے گزشتہ روز مجھ سے رابطہ کیا اور مجھے 29جولائی کو ”دہشت گردی کے خلاف امن کے اسلامی نصاب” کی افتتاحی تقریب میں شرکت کی دعوت دی ہے۔ قبلہ ڈاکٹر طاہر القادری صاحب کی سیاست سے اختلاف کیا جاسکتا ہے لیکن ان کی قومی سوچ اور دینی فکر قابل غور ہوتی ہے۔ امن کے لئے اس نظریاتی جنگ میں ہر اس شخص کو ساتھ دینا چاہیے جو صرف پاکستان ہی نہیں بلکہ پوری دنیا میں امن کا خواہاں ہے۔ مسلم امت کو بغیر کسی تیاری کے ایک نہ ختم ہونے والی جنگ میں جھونک دیا گیا ہے جس کا انجام مسلمانوں کے لئے تباہی لا رہا ہے ۔امت مسلم کو اس عذاب سے نجات دلانے کے لئے ڈاکٹر صاحب کے اس صالح عمل میں ہماری قلمی کاوشیں حاضر رہیں گی۔ کیونکہ قرآن پاک کا حکم ہے ”نیکی اور پرہیزگاری کے کاموں میں ایک دوسرے سے تعاون کرو”۔

اگر آپ بیرون ملک رہتے ہیں اور پاکستان کے بارے میں آنے والی خبروں اور تبصروں پر نگاہ رکھتے ہیں تو آپ کو دو طرح کی صورتحال سے واسطہ پڑے گا۔پہلی صورتحال تو یہ ہے کہ پاکستان میں اوپر سے لے کر نیچے تک کرپشن ہے ‘چور بازاری ہے ‘رشوت اور اقرباپروری ہے اور اداراتی بگاڑ زوروں پر ہے۔ یہ صورتحال کوئی مصنوعی نہیں ہے۔جہاں نیب جیسا ادارہ سپریم کورٹ میں پچاس میگا کرپشن سکینڈل کی فہرست جمع کروائے اور بتایا جائے کہ ساڑھے چار سو ارب روپے کی مالی بدعنوانی ہوئی ہے اور بدعنوانیوں میں سابق وزراء اعظم تک کے لوگ شامل ہیں پھر خبر آئے کہ کراچی میں سالانہ 2سو تیس ارب روپے کا بھتہ وصول ہوتا ہے اور اس بھتہ خوری کے ڈانڈے بلاول ہائوس سے ملتے ہیں۔ پھر انکشاف ہوا اور وہ انکشاف بھی غیر ملکی میڈیا میں ہو کہ کراچی کی ایک ہر دلعزیز سیاسی پارٹی کے سرکردہ لوگوں کے بھارت کے ساتھ تعلقات ہیں اور وہ ”را” سے مالی مدد وصول کرتے رہے ہیں۔ پھر خبر آئے کہ صوبہ کے پی کے ایک وزیر کو اس لئے گرفتارکر لیا گیا ہے کہ اس نے قیمتی پتھر کی فروخت میں اربوں روپے کا غبن کیا ہے۔ جب پتہ چلے کہ سندھ میں بیسیوں ہسپتال ہیں جن میں دل کے امراض کی تشخیص کرنے والی مشینیں عرصہ دراز سے بند پڑی ہیں ‘1122 کی ایمبولینس گاڑیوں کو کھڑے کھڑے زنگ لگ گیا ہے۔ خبر آئے کہ پاکستان میٹروبس سروس برسات کی پہلی بارش بھی برداشت نہیں کرسکی اور اس کا ٹریک جگہ جگہ سے قابل مرمت ہوچکا ہے۔ غرض پڑھتے جائیں سوچتے جائیں’ آپ کے ذہن میں ایک ہی نقشہ ابھرے گا کہ وطن عزیز کو کرپٹ مافیا نے اپنے چنگل میں لے لیا ہے اور اس شرمندہ کر دینے والی صورتحال کے ہوتے ہوئے ہم دنیا میں سر اٹھا کر نہیں چل سکتے۔دنیا ہماری عزت کرنے پر آمادہ نہیں۔ اس کے برعکس خبروں کا ایک دوسرا حصہ ہے جس سے امید کے پہلو جھلکتے ہیں۔ پاکستان کی سیاسی اور عسکری قیادت نے مل کر ملک کو دہشت گردی سے پاک کرنے کا جو فیصلہ کیا تھا اس پر بڑے جذبے اور حوصلے سے عملدرآمد جاری ہے اور اب ہماری بہادر مسلح افواج دہشت گردوں کے آخری ٹھکانوں کی طرف بڑھ رہے ہیں۔شوال سے بھی آگے پہنچ کر ان کے خاتمے کا اعلان کرنے والے ہیں۔شہروں کے اندر ضرب عضب کا دوسرا مرحلہ بھی شروع ہے۔ جنوبی پنجاب سے دہشت گردوں کے سرپرستوں اور کارندوں کو چن چن کر اٹھایا گیا ہے اور ان کے مالی معاونت کاروں کی تلاش جاری ہے۔ کراچی کے اندر دہشت گرد گروہوں تک پہنچنے والی رقوم کے تعاقب میں جاتے ہوئے سیاسی پارٹیوں کے ملوث انتہائی بااثر لوگوں کوبھی دھر لیا گیا ہے اور اس سلسلے میں بعض رکاوٹوں کے باوجود پیپلزپارٹی کے چیئرمین بلاول بھٹو نے مکمل اور غیر مشروط تعاون کا یقین دلایا ہے ۔ ایم کیو ایم بظاہر اس آپریشن کے خلاف ہے اور وہ احتجاج کی دھمکیاں بھی دے رہی ہے لیکن اسی جماعت کے سنجیدہ لوگ رینجرز سے تعاون کر رہے ہیں اور کراچی میں کسی قسم کی گڑبڑ کا اندیشہ نہیں رہا۔ کراچی کے شہریوں کو ایک حوصلہ ملا ہے اور ٹارگٹ کلنگ میں بڑی حد تک کمی آچکی ہے بلکہ ایک لحاظ سے ختم ہوچکی ہے ۔کراچی میں بجلی کی طویل لوڈشیڈنگ کے باوجود اب سڑکیں بلاک نہیں ہوتیں’بسوں کو نہیں جلایا جاتا اور کاروبار بند نہیں ہوتے۔ امن وامان مکمل طور پر بحال ہوچکا ہے۔ ایم۔ کیو ۔ ایم کے لوگ محب وطن ہونے کی قسمیں کھا رہے ہیں اور ”را” کو ملک دشمن ایجنسی قرار دے رہے ہیںِ۔
یہ تصویر کا دوسرا رخ ہے ۔ پاکستان قومی وقار کی بحالی کی جدوجہد میں دوراہے پر آکر کھڑا ہوگیا ہے۔اب یہ ملکی سیاسی جماعتوں پر انحصار ہے کہ وہ چاہیں تو فوج کے تعاون سے پاکستان کے چہرے پر لگے کرپشن کے داغ کو ہمیشہ کے لئے مٹا سکتے ہیں۔وہ نیب کی طرف سے اپنے اوپر لگائے گئے کرپشن کے الزامات کو عدالتوں کے ذریعے صاف کروائیں۔ یہ ان کی طرف سے انفرادی اور اجتماعی نیکی کے زمرے میں آئے گا۔ اگر سیاستدان تعاون کریں اور عہد کر لیں کہ انہوں نے ماضی کی کوتاہیوں پر توبہ کرنی ہے اور قومی وقار کو بحال کرنے کے لئے ہر قربانی دینی ہے تو پھر کوئی وجہ نہیں پاکستانی معاشرے سے کرپشن’ غبن’ لوٹ مار کا خاتمہ نہ ہوسکے۔ یہ اس ملک اور قوم کے ساتھ ہی نہیں اپنے ساتھ بھی بڑی نیکی ہے۔قرآن کا حکم ہے’
”نیکی اور پرہیزگاری کے کاموں میں ایک دوسرے سے تعاون کرو”

ہم اکثر فیس بک پر دیکھتے ہیں کہ دوست احباب اپنے نومولود بچے بچیوں کی تصاویر لگا دیتے ہیں۔ کمنٹس میں ہم پڑھتے ہیں کہ ہر کوئی بچے کی صحت’درازی عمر اور اچھے نصیب کی دعا کر رہا ہوتا ہے۔عموماً یہ لکھا ہوتا ہے کہ ”خدا زندگی دے’خدا نصیب اچھے کرے”۔ اولاد بذات خود ایک انعام ہے۔ اللہ پاک نے اولاد کو میٹھے میوے سے تشبیہہ دی ہے۔ بیٹوں کے حوالے سے ہم بہت متفکر ّ رہتے ہیں۔ہمیں فکر ہوتی ہے کہ یہ بڑے ہو کر کامیاب انسان بنیں۔خوب دولت اور ناموری کمائیں۔ ایک بڑا حلقہ ابھی تک بیٹیوں کو بوجھ سمجھتا ہے اور شائد غربت’ جہیز اور عدم تحفظ کے سبب بہت سے لوگ نہ چاہتے ہوئے بھی بیٹیوں کے معاملے میں حد سے زیادہ حساس ہوجاتے ہیں۔ اور آئے دن کے سماجی حادثوں کو دیکھ کر بیٹی کے والدین ایک ہی دعا کرتے ہیں کہ ”یااللہ میری بچی کے نصیب اچھے ہوں”۔
جیسا اوپر عرض کی ہے کہ اولاد خود ایک انعام ہے۔ اگر کسی ماں باپ کے ہاں اولاد ہوئی ہے تو دراصل اس کے گھر پر اللہ پاک کا خصوصی کرم ہوا ہے۔ بیٹے اور بیٹیاں یہ تو اللہ کی اپنی تقسیم ہے اور اس مسئلے میں الجھنا تخلیق کار کی صناعی اور حسن پیدائش پر اعتراض والی بات ہوگی۔قرآن پاک میں ارشاد ہوتا ہے’
”ہم جس کو چاہتے ہیں بیٹے دیتے ہیں اور جس کو چاہتے ہیں بیٹیاں عطا کرتے ہیں اور جس کو چاہتے ہیں دونوں دیتے ہیں ”۔اب یہ والدین پر منحصر ہے کہ وہ اللہ کے اس انعام کو اچھا نصیب بناتے ہیں یا پھر فتنہ کے رُوپ میں سامنے لاتے ہیں۔
والدین کے پاس دو راستے ہیں۔پہلا راستہ اپنی اولاد کی بہترین تربیت کا راستہ ہے۔ یہ ایک کٹھن اور محنت طلب کام ہے۔ اس کام میں خالص نیت کیساتھ مفاد عامہ کا مقصد بھی پیش نظر رہنا چاہیے۔ آپ نے بچے کی تربیت اس لئے کرنی ہے تاکہ وہ آپ کا سہارا بنے’اپنی ذمہ داریاں نبھائے اور معاشرے کے لئے مفید شہری ثابت ہو۔ ایک فرد کی تربیت دراصل معاشرے پر بہت بڑا احسان ہے۔ والدین کے لئے تربیت یافتہ اولاد پھل دار اور خوشبودار درخت کی مانند ہے۔ وہ جُوں جُوں بڑی ہوتی جائے گی اس کی خوشبو اور مٹھاس اپنے اردگرد کے ماحول کو خوبصورت کرے گی۔ غیر تربیت یافتہ اولاد کانٹے دار جھاڑی کی مانند ہے۔ جو آدمی اس کے قریب سے گزرے گا وہ اس کا دامن تار تار کردے گی۔ اسے زخمی کرے گی اور اسے تکلیف پہنچائے گی۔حدیث نبویۖ ہے کہ اپنی اولاد کے ساتھ رحم دلی کا مظاہرہ کرو اور ان کی خوب تعلیم وتربیت کرو۔
تربیت کیا ہے۔ یہی وہ اہم پہلو ہے جس کی جانب توجہ مرکوز کروانا چاہتا ہوں۔ اکثر والدین یہ سمجھتے ہیں کہ بچوں کی تربیت یہ ہے کہ ان کو موسم گرما کے بہترین اور مہنگے کپڑے خرید کر دیئے جائیں۔ ان کو خالص اور برانڈڈ خوراک مہیا کی جائے۔ ان کو مہنگے سکولوں میں پڑھایا جائے۔ان کے جوان ہونے سے پہلے ان کے لئے مال و اسباب کے انبار لگا دیئے جائیں۔ انہیں پڑھنے کے لئے یا ملازمت کے لئے بیرون ملک بھیج دیا جائے۔ یہ سب کچھ ضروری ہے ۔تربیت کا ایک مرحلہ ہے۔ بعض دینی حلقے تربیت کے اس پروگرام میں تھوڑا سا اضافہ کر لیتے ہیں۔وہ سمجھتے ہیں کہ بچے کو حفظ قرآن کروانا ہے اور پھر چاہے بیکن ہائوس میں پڑھائیں ‘چاہیں اسے کسی فوجی سکول میں داخلہ دیں وہ بڑا ہو کر ضرور اچھا اور مفید شہری بن جائے گا۔ اصل مسئلہ یہ ہے نہیں۔ ہم اپنی خواہش کے مطابق اپنے بچوں کو مختلف سانچوں میں ڈھالتے رہتے ہیں۔ والدین کو اپنے بچوں کے حوالے سے بار بار سوچنا چاہیے کہ آخر ہم انہیں بطور شہری کیسے دیکھنا چاہتے ہیں۔
سڑک پر کوئی حادثہ پیش آگیا ہے۔ دو طرح کے لوگ جمع ہوتے ہیں۔ ایک وہ جو لاتعلق ہو کر کھڑے ہوگئے ہیں۔ انہیں افسوس ہے کہ قیمتی جان ضائع ہوگئی۔ دوسری طرح کے وہ لوگ ہیں جنہیں دکھ ہے لیکن وہ لاتعلق کھڑے نہیں ہیں بلکہ اس دکھ کو بانٹنے کی کوشش کرتے ہیں ۔زخمی کو سنبھالتے ہیں’ ٹریفک جام ہے تو اسے چلاتے ہیں۔ آپ بطور والدین کس گروہ کو پسند کریں گے۔ ظاہر ہے دوسرے گروہ کو جو دُکھ بانٹنے کی کوشش کرتا ہے۔ خدانخواستہ اگر حادثے میں زخمی ہونے والے آپ ہوتے تو آپ یقیناً اس دوسرے گروہ کے ممنوں رہتے۔ یہی وہ معیار ہے جسے آپ نے اپنے بچوں کی تربیت کرتے وقت سامنے رکھنا ہے۔
پاکستان کو آج ایسی نسل کی ضرورت ہے جو معاشرے کے حادثوں کو دیکھ کر لاتعلق نہ رہے بلکہ حادثے کے متاثرین کا دکھ کم کرے۔ اس کی حیثیت چاہے انجینئر کی ہو’ ڈاکٹر کی ہو’ کاروباری شخصیت کی ہو’سیاستدان کی ہو ‘ آرمی آفیسر کی ہو۔ اس کی تربیت کا مرکزی نقطہ اچھا اور بہترین انسان بننا ہے۔ اور اچھے اور بہترین انسان کی تمام خوبیاں احادیث نبویۖ اور قرآنی تعلیمات میں واضح کردی گئی ہیں۔ اگر دینی معیارات پر تربیت پوری اترے گی تو نہ صرف والدین اور اولاد کے نصیب اچھے ہوں گے بلکہ ہمارا ملک کے بھی خوش نصیب کہلائے گا۔

بی بی سی کی رپورٹ آنے کے بعد خیال کیا جارہا تھا کہ وزارت داخلہ حرکت میں آئے گی اور ایم کیو ایم کے متحرک رہنمائوں کے گھروں پر چھاپے پڑیں گے’ دفاتر سیل ہوں گے اور الطاف حسین صاحب کو برطانیہ سے طلب کیا جائے گا۔ ”ایگزیکٹ” کے معاملے میں چوہدری نثار علی خان نے جو سرعت دکھائی تھی’ اس سے یہی توقع تھی ۔ نیو یارک ٹائمز اور بی بی سی کا” تقدس” تقریباً ایک جیسا ہے تو ردعمل بھی برابر کا ہونا چاہیے۔ لیکن چوہدری صاحب اس کے برخلاف بارہ گھنٹے تک خاموش رہے ‘ وزیر دفاع نے بین السطور گفتگو کی اور قومی اسمبلی میں طعنہ دیا کہ ایم ۔ کیو ۔ ایم کی ”لوڈشیڈنگ ” ہونے والی ہے۔ وزیراعظم میاں محمد نوازشریف کو کہیں سے فون آیا ہوگا انہوں نے چوہدری نثار کو بی بی سی کی رپورٹ کے حوالے سے تحقیقات کرنے کا حکم دیا ہے ۔ چوہدری صاحب نے تحقیقات کے اس کام کو طول دینے کے لئے برطانیہ سے معلومات حاصل کرنے کی راہ ڈھونڈی ہے۔ خط جائے گا’ کب جائے گا’ پھر جواب آئے گا۔بی بی سی والے حکومت پاکستان کو ثبوت فراہم کریں گے یا ٹال دیں گے۔ ابلتا پانی ہے اور اس میں ٹھنڈی مدھانی ہے۔ وزارت داخلہ اسے گھماتی رہے گی۔ہلکا پُھلکا شور اُٹھے گا اور پھر میڈیا کو کوئی بڑی خبر مل جائے گی۔ جس طرح ایم۔ کیو۔ ایم کے خلاف بی بی سی کی رپورٹ نے ملک میں جاری لوڈشیڈنگ کے سبب جاری حملوں سے مسلم لیگ (ن) کو نجات دلائی ہے اسی طرح کوئی بڑی خبر ایم۔ کیو ۔ ایم کو موجودہ صورتحال سے نکال دے گی۔1990ء سے لے کر آج تک ایم۔کیو۔ایم کے خلاف وطن سے غداری کے متعدد الزامات لگائے گئے لیکن ثابت کچھ نہ ہوسکا الٹا متحدہ کے ووٹ بنک میں اضافہ ہوا۔ مارچ میں نائن زیرو پر چھاپہ مارا گیا ‘چیختے چنگھاڑے ثبوت ملے۔ قاتل پکڑے گئے ۔غیر ملکی اسلحہ برآمد ہوا ۔لیکن اسی حلقے میں جب الیکشن ہوا تو پی ٹی آئی الیکشن ہار گئی۔
بی بی سی کی ایک رپورٹ پہلے بھی چل چکی ہے الطاف حسین کی لائیو تقاریر ریکارڈ پر ہیں جن کی بنیاد پر ماہرین قانون کہہ چکے ہیں کہ اشتعال اور خون خرابے کے مقدمات بن سکتے ہیں۔ ایک بھاری بھر کم فائل جناب عمران خان صاحب بھی برطانوی پولیس کو فراہم کرچکے ہیں۔ ذوالفقار مرزا مستند ثبوت دے چکے ہیں۔آخر وہ کونسی طاقت ہے جو ریاست پاکستان کو ایم۔ کیو ۔ایم کے خلاف کوئی مقدمہ دائر نہیں کرنے دیتی۔ رائو انور اور صورت مرزا کے بیانات کے بعد کونسا ثبوت چاہیے؟
دو ہی صورتیں ہوسکتی ہیں ۔ یا تو ایمِ۔کیو۔ایم کے بقول انہیں غریب اور مڈل کلاس عوام کے حقوق کی جنگ لڑنے کی سزا دی جارہی ہے یا پھر کوئی خفیہ ہاتھ ہیں جو ایم۔کیوِ۔ایم کو زندہ رکھنا چاہتے ہیں۔ یہ اندرونی ہاتھ ہیں یا بیرونی۔ یہ بھی ایک راز ہے۔
بی بی سی کا ادارہ اپنی رپورٹ پر قائم ہے لیکن الطاف حسین نے اس رپورٹ کو بالکل جھوٹ قرار دیا ہے۔ انہوں نے اپنے پرجوش کارکنوں سے جذباتی خطاب کیا ہے ۔ ان کا یہ جملہ بہت ہی کاٹ دار ہے ”جب ضرورت ہوتی ہے تو ایم۔کیو۔ ایم محب وطن اور جب کام نکل جاتا ہے تو غدار”۔ کیا یہ حقیقت نہیں کہ مسلم لیگ (ن) اور پی پی پی نے اپنے سیاسی مفادات کے لئے متحدہ کے ساتھ اتحاد بنائے ہیں۔ متحدہ کے لوگ اسمبلیوں اور قائمہ کمیٹیوں میں موجود ہیں۔ متحدہ کے خلاف جتنے ثبوت آرہے ہیں۔ وہ کسی سول یا وفاقی ادارے کی طرف سے مہیا نہیں کئے گئے۔ رینجرز کی تحویل میں آنے والے مجرموں کی زبانی سامنے آئے ہیں ۔ان ثبوتوں کو عدالت لے جانے میں کیا چیز مانع ہے۔
عوام یہ توقع کرتے ہیں کہ اور ان کی یہ توقع بجا بھی ہے کہ آئیں بائیں شائیں کرنے کی بجائے آپریشن ضرب عضب کو اس کے منطقی انجام تک پہنچنے دیںِ۔ غیر ملکی اطلاعاتی اداروں کی رپورٹوں کو بنیاد بنا کر اگر تحقیقات ہونی ہیں تو پھر بی بی سی کی رپورٹ پر بھی ٹھوس ردعمل کی ضرورت ہےِ۔ تحقیقات کے لئے خط لکھنے جیسے وقت گذاری کے اقدامات سے پتہ چلے گا کہ آپ رینجرز کی پیٹھ میں چھرا گھونپنے کا ارادہ رکھتے ہیں۔ایسا تاثر تقویت پا رہا ہے ۔ سندھ حکومت سے وابستہ کرپٹ لوگوں کو خاموشی سے باہر جانے دیا جارہا ہےِ۔(ن) لیگ کو یاد رکھنا چاہیے کہ فوج نے ہی اسے دھرنے سے بچایا ہے۔ایسا نہ ہو کہ اب کی بار یہ سہارا بھی کام نہ آسکے اس لئے تحقیقات کروائیں ‘انتظار نہیں !!

یہ بات بلا شک و شبہ کہی جاسکتی ہے کہ کراچی میں گذشتہ ایک برس سے جاری آپریشن کسی تخصیص اور تفریق کے بغیر جاری ہے۔ کوئی پارٹی یا گروہ یہ نہیں کہہ سکتا کہ رینجرز کے اس آپریشن میں کس طرح کی جانبداری برتی جارہی ہے۔ جس پارٹی کا جتنا بڑا سائز اور حجم ہے اسی حساب سے کرپشن اور بدعنوانی کے حوا لے بھی نتھی ہیں۔ ایم کیو ایم کے خلاف اندرون ملک ہی نہیں بیرون ملک سے بھی ثبوت اور انکشافات سامنے آرہے ہیں۔یوں محسوس ہوتا ہے کہ متحدہ کے مبّینہ مجرموں کے خلاف گھیرا مکمل ہوچُکا ہے اور اب آخری ہلہ بولا جانا ہے۔ دوسری طرف پاکستان پیپلزپارٹی کے درجن بھر لوگ زیرحراست ہیں ‘بعض اہم لوگ پیشگی اطلاعات پر فرار ہوچکے ہیں’لیکن دو درجن سے زائد لوگ جن میں صوبائی وزراء اور مشیر شامل ہیںانہیں باہر جانے سے روک دیا گیا ہے۔نقدی پکڑی گئی ہے اور بہت سے راز دیرینہ راز دانوں نے افشاء کردیئے ہیں۔ خیال یہی ہے کہ آئندہ چند دنوں میں دو سو تیس ارب روپے کی سالانہ کرپشن کا تمام نیٹ ورک پکڑا جائے گا اور دہشت گردوں کو مالی معاونت فراہم کرنے والے بھی دھر لئے جائیں گے۔ وفاقی حکومت اور افواج پاکستان کے درمیان اس معاملے پر مکمل ہم آہنگی دکھائی دیتی ہے۔ وزیراعظم میاں محمد نوازشریف اور آرمی چیف جنرل راحیل شریف کے درمیان مسلسل رابطے اور معلومات کے تبادلے سے یہ تاثر اُبھر رہا ہے کہ پاکستان کی سیاسی وعسکری تاریخ میں پہلی بار سیاسی اور فوجی قیادت میں قومی مسائل کے حل کے لئے ایک مکمل ہم آہنگی پائی جاتی ہے۔یہ ایک انتہائی خوش آئند پہلو ہے۔حکومت کی کوشش یہ ہے کہ کراچی آپریشن کے آخری رائونڈ میں بھی سندھ کے اندر منتخب جمہوری حکومت قائم رہے اور گورنر راج کا آپشن اختیار نہ کرنا پڑے۔ ضرب عضب کا ایک مرحلہ بڑی حّد تک کامیاب ہوچُکا ہے۔دہشت گردوں کا صفایا ہوچُکا ہے۔خیبر ایجنسی میں بھی امن قائم کیا جاچُکا ہے۔پاکستان مخالف قوتوں نے پاکستان کو غیر مستحکم کرنے کا جو جال بُنا تھا اس جال کو افواج پاکستان اور پاکستانی قوم نے عظیم شہادتیں دے کر کاٹ ڈالا ہے۔ضرب عضب دوسرے مرحلے میں داخل ہوچکی ہے۔شہروں کے اندر دہشت گردوں کا تعاقب جاری ہے۔ خودکش حملوں اور ٹارگٹ کلنگ میں واضع اور نمایاں کمی آچکی ہے۔ دہشت گردوں کے مالی معاونین کی کھوج لگاتے رینجرز کے ہاتھ سندھ کے بدعنوان سیاستدانوں ‘ کرپٹ افسروں اور عہدیداروں کے گریباں تک پہنچ چکے ہیں۔
ایک اُمید سی پیدا ہوئی ہے کہ پاکستان سے میگاکرپشن کا خاتمہ قریب آن لگا ہے۔ایسی صورتحال میں بعض حلقے مختلف قسم کی افواہیں پھیلانے میں مصروف ہیں۔اسلام آباد میں ایسے لوگ ہیں جو صبح و شام جمہوری نظام کے خاتمے کی باتیں کرتے ہیں۔ اُن کے سازشی نظریات کسی سے ڈھکے چھپے نہیں ہیں۔ میں کوئی جمہوریت کا ترجمان نہیں ہوں لیکن یہ سوچ لینا چاہیے کہ اسی جمہوری حکومت کے سبب ہی افواج پاکستان کو سو فیصد عوامی حمایت حاصل ہوئی ہے۔پاکستان کی ترقی کے لئے دونوں طاقتوں کا آپس میں مل کر چلنا ہی نتائج کا ضامن ہے۔ کچھ بدخواہ حلقے یہ افواہیں پھیلانے میں مصروف ہیں کہ آپریشن اس لیے کیا جارہا ہے کہ کراچی اور سندھ میں فوج کے بہت سے کام روک لئے گئے ہیں اور وہ نااہل سندھ حکومت سے سخت نالاں ہیں۔بعض دانشور دُور کی کوڑی لارہے ہیں کہ ایم کیو ایم کے خلاف بی بی سی کی رپورٹوں کا مقصد متحدہ اور وفاقی حکومت کے درمیان دوریاں پیدا کرکے مُلک کا امن وامان تباہ کرنا ہے تاکہ چین طے شدہ سرمایہ کاری سے باز رہے۔ بعض افواہ ساز لوگ بے پر کی اڑا رہے ہیں کہ جنرل راحیل شریف نے نوازشریف کو دھمکی دی ہے کہ اگر کراچی آپریشن نہ ہونے دیا گیا تو عمران خان اور طاہر القادری پھر میدان میں ہوں گے۔
کرپشن کا خاتمہ خوشحالی کی اولین شرط ہے۔ ہمیں سمجھنا چاہیے کہ رینجرز اپنی جان ہتھیلی پر رکھ کر کرپٹ مافیا سے ہمیں نجات دلا رہے ہیں۔ہماری قومی ذمہ داری ہے کہ ہم گلی محلے میں چلتے پھرتے اٹھتے بیٹھتے ایسے منفی پروپیگنڈہ کا توڑ کریں۔ہمیں رمضان شریف میں ویسے بھی سنی سنائی باتوں کو آگے نہیں بڑھانا چاہیے۔ پُراُمید رہنا چاہیے اور مایوسی پھیلانے والے لوگوں کو نیکی کے کاموں میں تعاون پر آمادہ کرنا چاہیے۔ بدعنوانی اور لوٹ مار کے خاتمے کے لئے کی گئی ہر کوشش نیکی کے زمرے میں آتی ہے۔اللہ فرماتے ہیں’
”نیکی کے کاموں میں ایک دوسرے سے تعاون کرو اور برائی اور ظلم کے کاموں میں ایک دوسرے سے تعاون مت کرو”۔

”اے مسلمانو! تمہیں کیا ہوگیا ہے کہ تم اللہ کے راستے میں کمزور مردوں’عورتوں اور بچوںکی خاطر نہیں لڑتے۔ جو کہتے ہیں کہ اے ہمارے رب! ہمیں اس بستی سے نکال کہ اس کے باشندے ظالم ہیں۔ اور ہمارے لئے اپنی طرف سے کوئی حمایتی بھیج۔اور ہمارے لئے اپنی طرف سے کوئی مددگار بھیج۔” (سورة النساء آیت نمبر75)
اجتماعی قبریں ان کے اجتماعی احساس کو بیدار نہ کر پائیں۔ ہانپتی’ بھاگتی’کٹتی اور بکھرتی عصمتیں ان کے اجتماعی دل کو موم نہ کرسکیں۔چھتوں’بالکونیوں اور درختوں کیساتھ لٹکتی لاشیں ان کے اجتماعی جسم میں جھر جھریاں پیدا نہ کرسکیں۔ نومولودوں کو وحشی قدموں نے دبوچ ڈالا۔ ننھے ہاتھوں کو سفاک درندوں نے کلہاڑوں کے ساتھ کاٹا’ مسکان بھرے چہروں کو بے رحمی کیساتھ اجاڑا گیا۔ کسی قوم نے آہ نہیں بھری’کسی بھی ملک نے چیخ نہ ماری۔ سات ارب انسان’ انسانی حقوق کی لاکھوں تنظیمیں’ ڈیڑھ ارب مسلمان’ سینکڑوں ممالک۔ دنیا کے منصف لاتعلق۔آخر نسل کشی کے اس بہیمانہ وارداتوں پر دنیا بولتی کیوں نہیں۔ صرف اس لئے کہ روہنگیہ لوگ مسلمان ہیں۔ صرف اس لئے کہ وہ کلمہ گو ہیں۔ صرف اس لئے کہ وہ اسلام کے پیروکار ہیں۔ ان کی زبانوں پر اللہ اکبر’ محمد رسول اللہ’ سبحان اللہ جیسے الفاظ ادا ہوتے ہیں۔
روہنگیا مسلمانوں پر میانمیر حکومت ‘سماج اور سیاست نے دل کھول کر ستم کئے۔ ایسا وحشتناک قتل عام تو امریکہ ‘ویت نام جنگ کے دوران بھی نہیں ہوا ہوگا۔ یہودیوں کو جرمنی نازیوں نے اس طرح اذیتناک طریقے سے ختم نہیں کیا ہوگا ۔کیا انسان اتنا سفاک ہوسکتا ہے ۔ سوشل میڈیا پر جو تصاویر آرہی ہیں۔ ایک بار دیکھ لیں تو پورا دن بے چینی میں گذرتا ہے۔جب یہ معصوم بچے سسکیاں لیتے ہوں گے تو کیا قاتل کے دل میں رحم نہیں آتا ہوگا۔ بدھ ازم کے پجاری اس قدر بے حس ہوگئے ہیں۔ ہم اپنے بچوں کو مہاتما بدھ کے بارے میں ہر اچھی بات بتاتے ہیں۔ بدھ ازم تو انسانی دکھوں کو کم کرنے کا درس دیتا ہے پھر یہ کیسے بدھسٹ ہیں جو بے بس انسانوں کو رحم مادر میں قتل کرنے سے بھی گریز نہیں کرتے۔
سوچتا ہوں کہ کیا میانمیر کوئی ایسی اقتصادی یا سیاسی قوت ہے کہ کوئی اس کا بازو مروڑنے پر تیار نہیں۔میانمیریا برما یہ تو ایک غریب سا ملک ہے۔ قرضوں کی معیشت ہے۔ اس کا حجم ایسا کہ اسے شائد عالمی برادری میں برابری کا حق ہی نہ ملے۔ یہ کوئی امریکہ’ روس ‘چین’ جاپان’ انگلینڈ۔ اس کی کیا حیثیت ہے۔ اگر کوئی ایک ملک بھی کھڑا ہوجائے اور وہ کہہ دے کہ اگر انسانیت کے خلاف ریاست کی سرپرستی میں ہونے والا یہ جرم بند نہ ہوا تو میانمیر کی اینٹ سے اینٹ بجا دی جائے گی۔ اگرا یسا کہہ دے ‘ کوئی عالمی طاقت دھمکی دے دے۔ اپنے مفادات کے لئے یہ ملک جنگیں چھیڑ لیتے ہیں۔ پراکسی وار کرواتے ہیں۔ لیکن میانمیر کے مسلمانوں کے لئے کوئی آواز کیوں نہیں اٹھاتا۔
کیا تھائی لینڈ کے بارڈر پر روہینگیا مسلمانوں کی اجتماعی قبریںنہیں ملیں۔ رونگھٹے کھڑے ہوجاتے ہیں۔ دل سے خون پھوٹنے لگتا ہے۔ جب سے میانمیر قائم ہے۔ مسلمانوں کے لئے وہاں بے وطنی ہے۔کہاں جائیں۔بنگلہ دیش والے مارتے ہیں۔ کوئی ملک اپنے ہاں پناہ دینے کے لئے تیار نہیں۔ کہاں جائیں۔ یہ زمین اللہ کی ہے۔ سب انسانوں کا مشترکہ اثاثہ ہے۔ پھر ان لاکھوں انسانوں کے حصے کی زمین کہاں گئی؟ او آئی سی نے وہی کیا جو وہ مسلم امہ کے مسائل کے حوالے سے کرتی آئی ہے۔ روہنگیا مسلمان نہ دولت مند’ نہ خوبصورت’ رنگ گورا نہ پیٹ میں اناج’ان کی عورتیں پردہ دار۔ ان کے ثقافتی طائفے بن نہیں سکتے’ یہ جینز پہن کر جسم کی نمائش کا فن نہیں جانتی۔ عالمی برادری کے سارے انسانی جذبے’سیاست اور شہوت کے گرد گھومتے ہیں۔ خدا جانے امریکہ کے انسانی حقوق کے ادارے کب جاگتے ہیں۔ اگر کوئی کتا بھوک سے مر رہا ہو اور اہل مغرب کو پتہ چل جائے تو وہ بسکٹوں اور برگروں کے ڈھیر لگا دیں۔ یہاں کھلے آسمان تلے’سمندر کے نمکین پانیوں میں ڈگمگاتی کشتیوں کے اندر انسانی بچے پانی کی بوند کو ترس رہے ہیں’ ایک نوالہ ان کی روح اور جسم کا رشتہ بحال کرسکتا ہے لیکن کمیونیکیشن کے اس جدید دور میں’ کوئی عالمی طاقت نوالا دینے کو تیار نہیں’کوئی امیر ملک پانی کی ایک بوتل پہنچانے پر آمادہ نہیں۔ تصویر تو یہاں بھی بن سکتی ہے۔ آپ کی انسان دوستی کا ڈھنڈورا تو یہاں بھی پیٹا جاسکتا ہے۔کیا آپ انتظار کر رہے ہیں کہ سمندر کی سطح پر لاشیں قطار اندر قطار تیرنے لگیں اور آپ ریسکیو کے ذریعے ان کو اکٹھا کریں اور بڑی سی تصویر بنوا لیں؟افسوس کہ عالمی ضمیر بحر ہند میں ڈوب گیا ہے۔
بدھسٹوں نے بہت بُری رسم ڈالی۔ مسلمانوں کی نسل کشی کا راستہ اختیار کرکے اپنے لئے دردناک مستقبل کا فیصلہ لکھ لیا۔ اب یہ ہوگا کہ مسلمان ہزار بار سوچیں گے کہ بدھسٹوں پر نگاہ رکھنی ہے۔ یہ مسلمانوں کے قاتل ہیں۔ یہ انسانیت کے دشمن ہیں۔اسلام فوبیا کے ماتحت اگر مسلمانوں کا قتل جائز ہے تو پھر بدھ فوبیا کی پیدائش کو کون روک سکتا ہے۔ ظلم کا حساب ہو کر رہے گا۔ یہ اللہ کا قانون ہے۔جیسا کہ سورة البروج میں ارشاد ہے’
”برجوں والے’آسمانوں کی قسم! اور اس دن کی جس کا وعدہ کیا گیا ہے۔اور حاضر ہونے والے کی اور حاضر کیے گئے کی۔ہلاک کیے گئے خندقوں والے۔(ان خندقوں میں)آگ تھی ایندھن والی۔جبکہ وہ ان خندقوں کے کنارے بیٹھے تھے۔ اور جو کچھ وہ مومنوں کے ساتھ کر رہے تھے’اسے دیکھ رہے تھے۔ اور انہیں ان (مومنوں)کا یہی کام برا معلوم ہوا کہ وہ اللہ غالب’قابل تعریف پر ایمان لائے تھے۔ وہ ذات کہ اسی کے لئے آسمانوں اور زمین کی بادشاہی ہے اور اللہ ہر چیز پر قادر ہے۔بے شک جنہوں نے مومن مردوں اور مومن عورتوں کو ستایا پھر توبہ نہ کی تو ان کے لیے جہنم کا عذاب ہے اور ان کے لیے جلانے والا عذاب ہے”۔

پہلے تو ہم سب پاکستانیوں کو بانیان پاکستان کا مشکور ہونا چاہیے کہ جنہوں نے انتہائی نامساعد حالات میں ہمیں ایک ایسا خطہ ارضی لے دیا جس کی جغرافیائی اہمیت ہر بدلتے منظر نامے میں بڑھتی جارہی ہے ۔ اگر فرصت ہو تو باوضو ہوکر علامہ اقبال ‘ قائداعظم اور محترمہ فاطمہ جناح جیسی ہستیوں کے لئے فاتحہ خوانی ضرور کرنی چاہیے۔پاکستان کو عالمی سطح پر سرمایہ کاری ضرور کرنی چاہیے۔پاکستان کو عالمی سطح پر سرمایہ کاری کے لئے بہترین ملک قرار دیا جاتا رہا ہے ۔تھوڑے سے حالات سنبھلے ہیں اور چین و پاکستان نے دوراندیشی کا مظاہرہ کرتے ہوئے اس ٹریڈ کو ریڈور کی تعمیر کا معاہدہ کر لیا ہے جو دراصل شاہراہ خوشحالی ہے۔پینتالیس ارب ڈالر کے معاہدے جوں جوں زمین پر اترنا شروع ہوں گے۔ معاشی سرگرمیاں تیز ہونا شروع ہوجائیں گے۔انجینئر اور مزدورتو ایک مکان بناتے وقت بھی ضروری ہوتے ہیں یہ تو تین ہزار کلو میٹر طویل کوریڈور ہے۔سینکڑوں پل بننے ہیں۔ کئی بلڈنگز تعمیر ہونی ہیں۔ کئی برس لگنے ہیں۔ بے روزگاری کا خاتمہ یقینی دکھائی دیتا ہے۔بجلی پیدا کرنے کے کئی منصوبے لگنے ہیں۔ وزیر منصوبہ بندی و ترقی احسن اقبال کے مطابق 2018ء تک بجلی کے منصوبے مکمل ہوجائیں گے اور اگر پہلے سے شروع منصوبوں پربھی تیز رفتاری کے ساتھ کام شروع رہا تو بجلی کی پیداوار کا تخمینہ بارہ سے پندرہ ہزار میگاواٹ کا ہے۔ اگر آئندہ تین برس میں بجلی کی کمی پوری ہوگی تو پاکستان کے اندر پہلے سے موجودہ انڈسٹری کا پہیہ بھی پوری رفتار کے ساتھ گھومے گا اور لوگوں کے دن پھریں گے۔ عام آدمی کو بھی عزت کے ساتھ تو روٹی کمانے کا اپنے ملک کے اندر ہی موقع پیدا ہوجائے گا۔شک کرنا ہمارا قومی مزاج بن چکا ہے۔ہمیں ہماری حکومتوں نے اس تواتر کے ساتھ دھوکے دیئے ہیں کہ سامنے طلوع ہونے والا سورج بھی ہمیں کوئی فراڈ دکھائی دیتا ہے۔ ہماری بداعتمادی اور مایوسی ایسی نفسیاتی حدود میں داخل ہوگئی ہے کہ یقین کی نعمت ہم سے چھن گئی ہے ۔لیکن یہ ذہنی کیفیت ہمارے تلخ تجربات کا نتیجہ ہی نہیں ہے بلکہ بہت سے رائے ساز ادارے بھی ہمارے عوامی مزاج کو ایسی حالت میں رکھنے کے لئے سازشی نظریات کو پروموٹ کرتے ہیں۔ چینی صدر کے تاریخی دورے کے حوالے سے بعض حلقے شک و شبہات پھیلا رہے ہیں۔ وہ بار بار ہمارے ذہنوں میں یہ ڈالنے کی کوشش کررہے ہیں کہ ” اندر کھاتے” میاں برادران کی کوئی ڈیل ہوئی ہے ۔ کہیں نہ کہیں کوئی ”کک بیک” بھی ہوگا۔یہ بھی کہا جارہا ہے کہ یہ دو ملکوں سے زیادہ ملکوں کے حکمرانوں کے درمیان طے پانے والا باہمی مفادات کے تحفظ کا معاہدہ ہے ۔ افسوس کے ساتھ ایسی لابیاں موجود ہیں جن کے تانے بانے واشنگٹن’ دہلی اور مسلمان ہمسایہ ممالک کے ساتھ جاملتے ہیں۔ بیوروکریسی کا ایک حصہ بھی اس میں پیش پیش ہے۔انہیں یہ غم ہے کہ چین ان کے بچوں کو وظائف نہیں دے گا۔ ان کے ہاں چینی ایمبیسی کی طرف سے تحائف اور دیگر لوازمات نہیں پہنچتے اور چین کسی قسم کی مالی کرپشن کی آفر نہیں کرتا۔ امریکہ کے ساتھ اگر معاہدے ہوتے ہیں تو بڑے بڑے پردہ نشینوں کی نسلیں منور ہوجاتی ہیں۔یہاں معاملہ صرف اور صرف کام کرنے کا ہے۔ جو چینی کمپنیاں سرمایہ کاری کریں گی اس منصوبہ پر عمل درآمد کے لئے ان کے اپنے نگران ہوں گے۔ اپنے انجینئر بھی ہوں گے اور یہ ایک پارٹنر شپ کے تحت سلسلہ آگے بڑھے گا۔ پینتالیس ارب ڈالر کوئی امداد نہیں ہے ۔کوئی قرضہ بھی نہیں ہے۔سرمایہ چین کا ‘منصوبہ پاکستان اور چین کا ‘ اور تکمیل بھی دونوں ملکوں نے مل کر کرنی ہے۔رشوت کا راستہ ہی بند ہے۔ اس لئے وہ گروہ اور خاندان جن کی فائیوسٹار لائف کا دارومدار ہی کرپشن پر رہاہے۔ وہ اس معاہدہ کے بارے میں افواہیں پھیلا رہے ہیں۔
بعض سیاسی قوتیں یہ سمجھتی ہیں کہ اگر میاں نوازشریف اپنے دور میں اس معاہدے پر تیس فیصد عملدرآمد کروانے میںکامیاب ہوگئے تو آئندہ انتخابات میں (ن) لیگ کو شکست دینا مشکل ہوجائے گا۔ اس لئے وہ ابھی تو خاموش ہیں لیکن جلد ہی وہ ”اصولی اختلاف” کا جھنڈا اٹھا کر میدان میں ہوں گی۔ ایک بار پھر کوشش ہوگی کہ کسی نہ کسی طور پر وسط مدتی الیکشن کا شور شرابا اٹھے تاکہ چینی کمپنیاں محتاط ہوجائیں اور منصوبہ پر کام لٹک جائے۔
یہ نصیب کی بات ہے۔میاں برادران کے اندر حکمرانی پر ہزار اختلاف ہیں۔میں خود بھی ان کا بڑا ناقد ہوں۔لیکن تھوڑی دیر کے لئے سوچیں۔ میاں برادران عمران خان کے ہاتھوں کل تک فارغ ہورہے تھے ۔پرویز مشرف نے اس خاندان کو اپنی طرف سے ہمیشہ کے لئے نااہل کردیا تھا۔ ملک بدری ہوگئی تھی ۔ یہ خاندان موت اور زندگی کی حدوں کو چھو کر آیا ہے۔ یہ ان کے نصیب میں لکھا تھا کہ یہ پاکستان کی ایسی خدمت سرانجام دیں گے۔ معاشی منصوبوں کی ماں۔ہاں پاک چین معاہدے۔ جو کبھی ممکن دکھائی نہیں دیتے تھے۔ وہ معاہدے میاں نوازشریف کے ہاتھوں سرانجام پائے۔
ہمیں چینیوں کے اعتماد پر پورا اُترنا ہے۔حسد’بغض اور سیاسی مخاصمت کو بالائے طاق رکھ کر صرف اور صرف ملکی ترقی اور عوامی خوشحالی کی خاطر چینیوں کے لئے راستہ بنانا ہے۔ ان کو محبت دینی ہے ۔ ان سے بھائیوں والا سلوک کرنا ہے۔ اب ہمارا امتحان شروع ہوگیا ہے۔

نااُمید ہونے کے لئے ہزاروں دلائل موجود ہیں۔ لیکن پُرامید رہنے کے لئے وجوہات تلاش کرنا پڑتی ہیں۔ پاکستان بیم ورجا کے اس دوراھے پر آگیا ہے کہ اب یہ ہمارے اوپر منحصر ہے کہ ہم پھر سے یاسیت میں ڈوب جائیں یا اپنے دماغ کو جھٹکا دیں اور امید کا ننھا سا دیا روشن کرکے آگے بڑھیں۔ یہ کہا نہیں جاسکتا کہ کب کوئی دہشتگرد کسی ہدف پر پہنچ کر خود کو اڑا دے اور میرا مﺅقف بھی ہوا میں اڑ جائے۔ لیکن ذرا ٹھہریئے۔ کیا یہ بہت بڑی اُمید افزاءبات نہیں ہے کہ گزشتہ تین ماہ کے اندر دہشت گردوں کا صفایا کرنے کے لئے عسکری اور سیاسی قوتوں نے کمال اتحاد اور یگانگت کا مظاہرہ کیا ہے۔سینکڑوں دہشت گرد پکڑے گئے ہزاروں انتہا پسندوں کے گرد گھیرا تنگ ہوا اور سپہ سالار اعظم اور ان کی ٹیم نے جس طرح افغانستان اور امریکہ کی حکومتوں کو دہشت گردی کے خلاف جنگ میں ان ممالک کی ذمہ داریوں کا احساس دلایا۔ یہ ہماری خارجہ پالیسی کے خلاف قابل فخر پہلو ہے ۔مشیر داخلہ نے بڑے اعتماد سے کہا ہے کہ سول اور ملٹری قیادت میں مکمل ہم آہنگی پائی جاتی ہے۔ استحکام پاکستان کیخلاف خطرے کی گھنٹی ہمیشہ سول ملٹری تعلقات میں دراڑ ہی رہی ہے۔اب یہ کہا جاسکتا ہے کہ پاکستان واضح سمت میں بڑی یکسوئی کیساتھ آگے بڑھ رہا ہے۔ ہمارے انتظامی اور امن وامان کے ذمہ دار اداروں ‘عسکری صلاحیت اور سیاسی سوجھ بوجھ میں بڑی تیزی کے ساتھ بہتری آئی ہے۔ اب عام آدمی پھر سے خوف کی چادر اتار کر احساس تحفظ سے سرشار ہورہا ہے۔

چنیوٹ کے نزدیک لوہے تانبے اور سونے کے ذخائر دریافت ہوئے ہیں۔ اگرچہ حزب اختلاف کے بعض رہنماﺅں نے مذاق اڑایا ہے ” کہ لوہار کو لوہا مل گیا“ اور چوہدری پرویز الٰہی صاحب نے بیان دیا کہ چنیوٹ کے ذخائر نندی پور پاور پراجیکٹ کی طرح ایک ” خواب“ ہی ثابت ہوگا ۔لیکن ملک کے نامور سائنسدانوں نے ان ذخائر کی دریافت کو حقیقت پر مبنی قرار دیا ہے۔ ان ذخائر کو پاکستان کیلئے تائید غیبی قرار دیا جارہا ہے۔ یہ بھی بتایا گیا ہے کہ تھرکول سے اس سال کے آخر میں بجلی کی پیداوار شروع ہوجائے گی۔
امید کی ایک بہت بڑی وجہ یہ ہے کہ جناب عمران خان نے اپنے صوبے میں تعمیری کاموں اور سیاسی تطہیر کے منصوبوں پر کام شروع کردیا ہے۔ بظاہر تو یہ بات غیر اہم سی لگتی ہے لیکن اگر خیبرپختونخواہ کی حکومت واقعتاً ایک ارب درخت لگا دیتی ہے تو آپ اندازہ لگا سکتے ہیں کہ دس سال کے اندر ماحول پر کتنے مثبت اثرات مرتب ہوں گے اور صوبہ کی معاشی حالت میں کس قدر بہتری آئے گی۔ صوبہ بلوچستان میں علیحدگی پسندوں کی تحریک فی الوقت دم توڑ چکی ہے۔ اور اس بات کو علیحدگی پسندوں کے حلقے بھی تسلیم کرتے ہیں۔ صوبہ کے وزیراعلیٰ نے اپنی سادہ طرز زندگی سے اپنے مخالفین کے منہ بند کردیئے ہیں اور وہاں کے بلدیاتی انتخابات کے نتیجے میں بننے والی شہری حکومتوں نے اپنے حلقوں میں کام شروع کردیا ہے۔ ابھی کل کی بات تھی کہ پاکستان کے اس صوبہ کے دارالحکومت کوئٹہ میں پاکستانی پرچم لہرانا یا یوم پاکستان منانا ایک مہیب خواب تھا۔لیکن اب نہ صرف وہاں کھلے عام یوم پاکستان منایا جاتا ہے بلکہ وہاں کے ہزاروں نوجوان افواج پاکستان میں کمیشن بھی حاصل کرچکے ہیں اور وہ دفاع وطن میں اپنی ذمہ داریاں نبھا رہے ہیں۔
کراچی میں بھتہ خوروں اور دہشت گردوں پر ہاتھ ڈالنا ایک دیوانے کا خیال دکھائی دیتا تھا۔ لیکن تمام تر سیاسی مخالفتوں‘دھمکیوں اور دھماکوں کے باوجود رینجرز اپنا کام کر رہے ہیں اور حال ہی میں کراچی کے اندر اعلیٰ سطحی اجلاس اس بات کی طرف واضح اشارہ ہے کہ وہاں ٹارگٹڈ آپریشن جاری رہے گا ۔”بندوق صرف ریاست کے پاس ہوگی“ یہ وہ منزل ہے جسے بالآخر پاکستان نے حاصل کرنا ہے اور یوں محسوس ہوتا ہے کہ مفاداتی گروہوں کی تھکاوٹ کا عمل شروع ہوگیا ہے ۔زیادہ تر روپوش ہوچکے ہیں جو بچے ہیں وہ یا تو مارے جارہے ہیں یا ابھی انہوں نے نئے بہروپ دھار لئے ہیں۔ اور قانون نافذ کرنے والے ”چیتے اور عقاب“ہر بہروپیئے کا چہرہ بے نقاب کرنے پر تیار بیٹھے ہیں۔
پنجاب میں دو ماہ قبل تک سٹریٹ کرائم انتہاﺅں کو چھو رہاتھا ۔گلی محلے میں دن دیہاڑے بندوق کی نوک پر عورتوں کے زیور چھینے جاتے تھے‘نقدی لوٹ لی جاتی تھی اور اغواءبرائے تاوان کی وارداتیں بھی زوروں پر تھیں۔ اب خبریں آرہی ہیں کہ ”سٹریٹ کرائم“ کے اس عذاب میں کمی آگئی ہے ۔پنجاب میں نو تعمیر شدہ قائداعظم سولر پارک نے کام شروع کردیا ہے۔ ملتان کا ایئرپورٹ بھی فعال ہوگیا ہے اور جنوبی پنجاب میں تعمیراتی اور روزگار پیدا کرنے والے منصوبے فائلوں سے نکل کر زمین پر شکل پانا شروع ہوگئے ہیں۔
ہمارے ایک وفاقی وزیر نے سعودی عرب کے حوالے سے ایک بے بنیاد بیان داغ دیا اور بعد میں اس بیان سے مکر گئے لیکن سچی بات یہ ہے کہ ان کے اس بیان کا حوالہ دے کر مخصوص لابی کے بعض کالم نویسوں ‘دانشوروں اور اینکروں نے آسمان سر پر اٹھا لیا تھا۔ یہ جانے بغیر کے پاکستان اور سعودی عرب کے تعلقات میں معمولی سے تلخی بھی نہ صرف پاکستان اور سعودی عرب کے لئے بلکہ پوری امت مسلمہ کے لئے خطرناک ہوگی۔ یہ تو قدرت نے فیصلہ دیا اور آج سعودی عرب شاہ سلیمان کی کمان میں ہے ۔آج کی سعودی حکومت پاکستان سے اتنی ہی محبت کرتی ہے جتنا کہ کوئی پاکستانی اپنے ملک سے محبت کرسکتا ہے ۔سعودی بادشاہ کی طرف سے پاکستان کے حکمرانوں کو اپنے ہاں بلانا اور بادشاہ کا ایئرپورٹ جا کر وزیراعظم پاکستان کا استقبال کرنا پاکستانیوں کے لئے بہت بڑی خوشخبری ہونا چاہیے۔ میرے پاس ایسی معلومات ہیں جن کی بنیاد پر میں کہہ سکتا ہوں کہ جلد ہی سعودی عرب کی طرف سے پاکستان میں بڑی سرمایہ کاری ہوگی اور سعودی عرب میں پاکستانیوں کے لئے ہمدردانہ ماحول پیدا ہوجائے گا۔عالمی امور میں ان دونوں ممالک کی باہمی مشاورت سے پاکستان کی اہمیت بڑھے گی۔
ایران کے ساتھ ”پائپ لائن “اور ”جند اللہ“ کے معاملات پر جو تلخیاں جنم پا رہی ہیں وہ بھی خوش اسلوبیوں میں تبدیل ہونے لگی ہیں اور جند اللہ کے سربراہ کی گرفتاری سے ایک بڑا ”بریک تھرو“ ہوا ہے ۔پاکستان کا ہمیشہ سے یہ موقف رہا ہے کہ ایٹمی مسئلہ پر ایران پر پابندیاں اسی معاملے کو بگاڑیں گی۔ یہ معاملہ بات چیت سے حل ہونا چاہیے۔ پاکستان کے اس موقف کی تائید ہورہی ہے ۔سعودی عرب نے بھی اپنے مﺅقف میں نرمی پیدا کر لی ہے اور اُمید یہی ہے کہ اپریل کے آخری ہفتے میں امریکہ کا ایران سے مجوزہ معاہدہ طے پاجائے گا اور پاکستان پر ایک برادر ہمسایہ ملک کی طرف سے شکوک وشبہات کا سلسلہ رک جائے گا۔
افغانستان میںکئی دیہائیوں کے بعد پاکستان کے مﺅقف کو سمجھنے والی حکومت برسراقتدارآئی ہے۔آج کا افغانستان اگر پاکستان دوست نہیں تو دشمن بھی نہیں ہے۔ خصوصاً دہشتگردانہ کارروائیوں کے حوالے سے کم از کم افغان صدر پوری طرح یکسو ہیں۔گوکہ وہاں ایک متوازن حکومت بھی چل رہی ہے جو پاکستان کی سابقہ پالیسیوں کے باعث اپنی سابقہ پالیسی پر کاربند ہے لیکن آرمی چیف کا کابل بار بار جانا خیروبرکت کا سبب بنے گا۔افغان طالبان کے حوالے سے بڑے مضبوط اور مثبت اشارے مل رہے ہیں ۔اگر مذاکرات ہوجاتے ہیں اور طالبان بھی حکومت میں کسی طور شامل ہوجاتے ہیں تو پھر افغانستان داخلی طور پر مستحکم ملک بن جائے گا اور پاکستان کو مغرب کی طرف سے درپیش مشکلات میں کمی آجائے گی۔
بھارتی سرکار کا بچپنا ابھی برقرار ہے۔ وہ جہاں اسلحہ کی دوڑ میں سرپٹ دوڑے جارہی ہے وہیں پاکستان مخالف کارروائیوں کو بھی ہوا دے رہی ہے۔ یہ پاکستان کے لئے ایک اعصابی حملہ ہے۔ اس حملے کا جواب بھی سفارتی سطح پر دیا جاسکتا ہے۔پاکستان نے اس محاذ پر کبھی بھی کوئی پیش رفت نہیں دکھائی۔ اور اب یہ آوازیں اٹھنا شروع ہوگئی ہیں کہ جس ملک کا کوئی مستقل وزیر خارجہ ہی نہ ہو اس کی وزارت خارجہ کیا کارکردگی دکھائے گی۔ پاکستان کے لئے آنے والے سال دو سال بڑے ہی قیمتی ہیں۔داخلی طور پر استحکام رہے گا۔آئی ڈی پیز واپس جارہے ہیں۔افغان مہاجرین کی واپسی کا عمل شروع ہے۔مذہبی طبقات کے ساتھ موافقت کی فضاءپیدا کرنے کی سر توڑ کوششیں ہورہی ہیں۔بجلی کی پیداوار‘ برآمدات میں اضافہ اور روزگار کی سکیمیں حکومت کی اولین ترجیح ہونی چاہیں۔پاکستان کی خوش بختی ہے کہ چین اس ملک میں بہت بڑی سرمایہ کاری کرنے جارہا ہے۔ بلوچستان کی ناعاقبت اندیش اسمبلی نے گوادر کاشغر روڈ کے معاملے میں بعض رکاوٹیں کھڑی کی ہیں۔لیکن میاں نوازشریف کی ایک صلاحیت کو دشمن بھی مانتے ہیں۔ وہ روٹھے ہوﺅں کو منانے کی خداداد صلاحیت سے مالا مال ہیں۔امید ہے کہ روٹ کے فروعی جھگڑے اس عظیم سرمایہ کاری کو روک نہیں پائےں گی۔
تُرکی پاکستان کا بلاشک وشبہ مخلص دوست ہے۔ تُرکی کے ترقیاتی تجربات سے پنجاب میں فائدہ اٹھایا جارہا ہے ۔بعض تجزیہ کار پاکستان اور تُرکی میں بڑھتی ہوئی قربتوں کیخلاف بھی شیطانی فلسفے سامنے لارہے ہیں۔اس وقت ترکوں پر شک کرنا پاکستان کے خلاف دشمنی کے مترادف ہوگا۔ حکومتی میڈیا منیجرز کی آزمائش ہے کہ وہ ایسے تمام میڈیائی حملہ آوروں سے ہوشیار رہیں اور انہیں ملاقات اور دلائل سے بے اثر کردیں۔
پاکستان کی قیمتی معدنیات کے بارے میں عالمی اداروں کی رپورٹس موجود ہیں۔پاکستان کے اسلحہ ساز ادارے کمال دکھا رہے ہیں۔ میزائل ٹیکنالوجی میں حیران کن ایجادات سامنے آرہی ہیں۔ قومی خزانے میں ہدف کے مطابق ڈالرز موجود ہیں۔زرمبادلہ کے ذخائر میں کمی کی بجائے اضافہ ہورہا ہے ۔روپے کی قیمت مستحکم ہے اور پٹرول کی قیمتوں میں کمی نے ملکی معیشت کو استحکام بخشا ہے ۔ عوامی ضرورت کی اشیاءکی قیمتوںمیں اگرچہ کوئی خاطر خواہ کمی تو نہیں ہوئی لیکن اضافہ بھی دیکھنے میں نہیں آیا۔ ایل۔ این۔ جی کی فراہمی سے ایندھن کی کمی پر قابو پانے میں مدد کی امید ہے۔
غرض تلاش کرنے سے ایسی ہزاروں نشانیاں موجود ہیں جن سے اُمید کا چراغ روشن ہورہا ہے۔ 23مارچ کو فوجی پریڈ ہمارے اس چراغ کو مزید روشن کردے گی۔