ماہ دو ماہ بعد کراچی کا چکر ضرور لگتا ہے۔یوں معاش کا معاملہ بھی سدھرتا ہے اور منی پاکستان کے حالات سے بھی واقفیت رہتی ہے۔گزشتہ دنوں ساحل سمندر کی طرف اڑان بھری تو جہاز میں عوامی نیشنل پارٹی صوبہ سندھ کے صدر اور کراچی میں پٹھان بہن بھائیوں کے ہر دلعزیز رہنما جناب شاہی سید سے سرسری گفتگو ہوئی جو اسلام آباد میں ایک مفصل ملاقات کی باہمی خواہش پر منتج ہوئی۔گوکہ شاہی سید سے ملاقات کی تصاویر اور خبر پاکستان اکانومی واچ کے پلیٹ فارم سے ملک کے مئوقعر اخبارات میں شائع ہوچکی ہے ‘لیکن درج ذیل تفصیلات بھی دلچسپ ہیں۔حسب وعدہ ووقت پختون رہنما پارلیمنٹ لاجز میں اپنے اپارٹمنٹ میں منتظر تھے۔بڑے تپاک سے ملے۔بے تکلف’سادہ طبعیت اور سیدھے سادھے پٹھان سے بات چیت کا اپنا ہی مزا تھا۔تجزیہ نگار بیگ راج بھی ہمراہ تھے۔چائے کا دور چلا اور جناب شاہی کی ”شاہانہ”زندگی کے راز کھلنے شروع ہوئے۔

”ضلع مردان کا رہنے والا ہوں۔ایک گائوں میں پیدا ہوا۔ والدین کے پاس اتنی زمین نہیں تھی کہ وہ میری تعلیم کا خرچہ بھی اٹھا لیتے۔آٹھویں کے بعد روزگار کی تلاش میں کراچی چلا گیا۔ وہاںفیکٹری میں مزدوری کر لی۔ پھر رکشا خرید لیا’ٹیکسی بھی چلائی۔چونکہ میں نے پیسے گھر نہیں بھیجنے ہوتے تھے اور رہائش اور خوراک بھی سستی تھی اس لئے پیسوں کی بچت ہوئی اور پھر میں نے دکان خرید لی۔بڑی محنت کی ۔ کچھ زمین خریدی۔ زمین کے ریٹ بڑھنے سے میں بھی مالدار ہوگیا۔پٹرول پمپ خریدا اور سی این جی سٹیشن بھی بنایا۔ چونکہ کراچی آنے والے میر ے علاقے کے لوگ اپنی مشکلات کے حل کے لئے میرے پاس آتے تھے اور میں اپنے تعلقات استعمال کرکے ان کے مسئلے حل کرواتا تھا’ اس لئے اللہ نے عزت بھی دی۔1991ء میں میں پارٹی میں چلا گیا۔ اور پھر مسلسل صوبائی صدر منتخب ہوتا رہا”۔بڑے اختصار کے ساتھ انہوں نے اپنا تعارف مکمل کیا۔میں نے ان سے پوچھا کہ آپ سینیٹر ہیں۔آپ کی پارٹی کی صوبہ خیبرپختونخواہ میں حکومت بھی رہی۔آپ نے وزارت کیوں نہ لی۔اس پر شاہی سید کا کہنا تھا کہ مجھے وزارت کی پیشکش ہوئی میں نے پیشکش کرنے والوں سے پوچھا کہ آخر وزیر بن کر میں کیا کروں گا؟۔ وزیر بننے کی خواہش دو وجوہات سے ہوسکتی ہے۔ ایک یہ کہ میں اپنی دولت میں اضافہ کروں۔ اس کی مجھے کوئی ضرورت نہیں۔مجھے ہر ماہ دس بارہ لاکھ روپے کا کاروبارسے آجاتا ہے۔ مجھے اس سے زیادہ کی ضرورت نہیں۔ بیٹے باہر ہیں۔ وہ اپنا کماتے ہیں اورکھاتے ہیں۔ اگر اہل ہوں گے تو اپنے لئے جمع کر لیں گے اور اگر نااہل ہوئے تو جمع کی ہوئی دولت اجاڑ دیں گے۔ اس لئے دولت اکٹھی کرنے کا کوئی فائدہ نہیں۔دوسری بات جس سے لوگ وزیر بننا چاہتے ہیں وہ ہے کہ وزیر کے اختیارات لے کر لوگوں کے کام کرائے جاسکیں  تو اس ملک کی بیوروکریسی ایسی ہے کہ یہاں دیواروں سے ٹکریںمارتے رہیں’ لوگوں کے کام نہیں ہوسکتے۔رشوت کے بغیر یہاں  ایک نالی نہیں بنوائی جاسکتی۔ اس لئے میں نے وزارت کی پیشکش شکریے کے ساتھ واپس کردی۔کراچی کے حالات کے بارے پختون رہنما کا کہنا تھا کہ سپریم کورٹ نے اس حوالے سے تاریخی اقدامات کی نشاندہی کر دی ہے۔پولیس کو غیر سیاسی کیا جائے۔آپریشن کراس دی بورڈ” کیا جائے۔شہر کو اسلح سے پاک کیا جائے اور نئے سرے سے انتخابی حلقہ بندیاں کی جائیں۔ اگر یہ چار اقدامات خلوص نیت سے اٹھائے جائیں تو کراچی چھ ماہ کے اندر امن کا گہوارہ بن سکتا ہے۔اقتصادی بہتری کے حوالے سے شاہی سید نے بڑے کھرے انداز میں تبصرہ کرتے ہوئے کہا کہ جب ملک میں امن ہی نہیں ہے تو پھر خوشحالی کیسی۔جس ملک میں اس کے اپنے کاروباری اور سرمایہ کار گروپ بیرون ملک بھاگ رہے ہوں وہاں باہر سے آکر لوگ کیوں سرمایہ کاری کریں گے۔ میری مثال سامنے ہے ۔ میں نے اپنے بیٹوں کو خود دبئی میں کاروبار بنا دیئے ہیں۔ یہاں تو وہی لوگ کاروبار کریں گے اور سرمایہ  لگائیں گے جنہوں نے بیوروکریسی کے ساتھ ملکر ڈاکے ڈالنے اور راتوں رات منافع جمع کرنا ہے۔کاروبار تو ایک درخت کی مانند ہوتا ہے جو نسل در نسل بڑھتا ہے۔پاکستان میں ایسی فضاء ہی نہیں کہ ایسے درخت جڑیں پکڑ سکیں۔ جو لوگ اس کے باوجود یہاں سرمایہ کاری کر رہے ہیں  وہ یا تو مجبور ہیں یا پھر ولی اللہ ہیں۔پاکستان کی وفاداری کے سوال پر اے این پی کے رہنما نے دو ٹوک جواب دیا کہ ان کے رہنما باچا خان نے پاکستان کی مخالفت ضرور کی تھی لیکن ان کی مخالفت کی وجہ یہ تھی کہ کمزور پاکستان کی بجائے مضبوط پاکستان بنایا جائے۔ جب وہ اسمبلی میں آگئے تو پھر مخالفت کا طعنہ دینا صرف جماعت اسلامی والوں کا ہی وطیرہ ہوسکتا ہے۔یہ پاکستان ہے تو ہم ہیں۔پاکستان کے علاوہ ہمارا کوئی اور وطن نہیں۔ہم نے روس کے خلاف جہاد کو امریکہ کی جنگ کہا اور یہ سچ ثابت ہوا۔ آج ڈرون کے خلاف مظاہرے ہوتے ہیں۔ضرور ہونے چاہیں ۔لیکن آسمانی ڈرون کے ساتھ ساتھ زمینی ڈرون کا خاتمہ بھی ضروری ہے۔ڈاکٹر صاحب… سب سے زیادہ قربانیاں میری پارٹی نے دی ہیں۔ لیکن پنجاب کا کون سا ضلع ہے۔ جہاں لاشیں نہیں پہنچیں۔ طالب کون ہے اور کون غیر طالب ۔یہ تو ہمارے ادارے ہی بہتر بتا سکتے ہیں۔ اگر نیت میں اخلاص ہو تو پھر طالبان کے ساتھ مذاکرات بھی کامیاب ہوسکتے ہیں۔شاہی سید سے بیگ راج نے پنجاب کے خلاف مبینہ نفرت کے بارے میں سوال کیا تو شاہی سید نے کہا کہ پنجاب بڑے بھائی کی طرح ہے۔ ہم پختون بڑے بھائی کو والد کی طرح سمجھتے ہیں۔پنجاب کو چاہیے کہ وہ شفیق والد کی طرح ڈانٹے ڈپٹے بھی لیکن شاباش بھی دیا کرے۔جناب شاہی سید سے ملاقات کے دوران ایم کیو ایم کے حوالے سے ان کے شکوے گلے بھی سنے۔بعض باتیں ایسی ہیں کہ ان کا بیان کرنا شائد ”فساد فی سبیل اللہ” کے زمرے میں آتا ہے اس لئے انہیں پیش قارئین نہیں کیا جاسکتا۔ البتہ ان کے اس تجزیے پر غور ضروری ہے کہ مسلم لیگ (ن) اور پی پی پی دونوں ہی الطاف حسین  کو ناراض کرنا نہیں چاہتے۔ وہ ایم کیو ایم کی عوامی قوت (جسے شاہی سید  ٹھپہ مافیا کی کرشمہ سازی  زیادہ اور حق پرست عوام کی کارگزاری کم سمجھتے ہیں)کو ایک بندوق کے طور پر ایک دوسرے پر تانے رکھنا چاہتے ہیں۔ گوکہ آجکل کراچی میں ٹارگٹ کلنگ کی وارداتیں کم ہوگئی ہیں ‘لیکن حکومت’ایم کیو ایم’ پی پی پی اور دیگر مذہبی وسیاسی جماعتوں کو اس بات پر یکسو ہوجانا چاہیے کہ مجرم’مجرم ہوتا ہے۔اسے سیاسی لبادہ اوڑھا کر سیاسی قوت حاصل نہیں کی جاسکتی۔

بچے اللہ کے پھول  ہوتے ہیں۔پھول اور خوشبو کا چولی دامن کا ساتھ ہے۔جہاں پھول ہوں وہاں خوشبو ضرور ہوتی ہے۔ اگر بچوں کے دل و دماغ میں اسلام اور پاکستان کا نظریہ بو دیا جائے تو ان کی زندگیوں میںہمیشہ اس نظریہ کی خوشبو آتی رہے گی۔ جتنا نظریہ پختہ اسی قدر خوشبو کا اثر دیرپا اور جس قدر بچوں کی تعداد زیادہ اسی قدر خوشبو کا پھیلائو وسیع۔ اگر نظریاتی خوشبو چہار سو پھیل جائے توپھر سیکولرازم اور بھارت بوچا کی بدبو کو کہاں جگہ ملے گی۔ اور اگر ملے گی بھی تو ان محدود ذہنوں  میں مقید ہوجائے گی جن ذہنوں کے اندر کردار’ غیرت’ یوم آخرت اور انصاف پسندی کی کوئی اہمیت ہے ہی نہیں ۔

یہ ”امن کی آشا” کے ایسے اسیر ہیں جو ایم ایم عالم جیسے قومی ہیرو کو ٹی وی سکرین پر زیروبنانے کی کوشش کرتے ہیں اور بال ٹھاکرے کی چتا سے اپنے قلب و نظر کو بھی جلا ڈالتے ہیں۔نظریہ پاکستان ‘یعنی نظریہ اسلام ‘ دو قومی نظریہ کا خوبصورت نام۔ اس نظریہ کو باطل ثابت کرنے کے لئے امریکنائزڈ دانشوروں اور بھارتی نواز قیافہ شناسوں نے بہت حملے کئے۔ لیکن ایک طرف اس صدی کا بیٹا’ سالاراعظم محترم مجید نظامی اور ان کے ساتھی کھڑے ہیں اوردوسری طرف ڈالرزاورڈرونز کی موسلادھار بارش ۔ پھر بھی نظریاتی محسنوں کا یہ قبیلہ جیت گیا اور فرزندان مال و متاع کی فوج ہار گئی۔آج گلی گلی اور محلے محلے میں نظریہ پاکستان کی گونج سنائی دے رہی ہے۔ بچوں کی توتلی زبانوں پر پاکستان کا مطلب کیا۔لاالہ الا للہ’پاکستان زندہ باد’اسلام زندہ باد کے نعرے تتلا رہے ہیں۔ جو لوگ کہتے تھے کہ نظریہ پاکستان مجید نظامی اور ان کے عمر رسیدہ ساتھیوں کی زندگی تک محدودرہے گا ان اسیران نفس کو آگاہ کیا جاتا ہے کہ ”جنریشن گیپ”کا فلسفہ دم توڑ گیا۔ نئی نسل نے محترم جناب چیئرمین کی انگلی تھام لی ہے۔ اب انتقال خون کی طرح نظریہ بھی منتقل ہوچکا ہے۔خوشبو کو پھیلنے سے اب کوئی روک نہ  سکے گا۔محترم نسیم انور بیگ جنت نصیب کے حکم پر میں بھی نظریہ پاکستان ٹرسٹ کے کے نظریاتی قافلے میں ایک جھنڈا بردار کے طور پر شامل ہوا تھا۔راولپنڈی اسلامک سکول آف ایکسی لینس (رائز) کو دراصل پانچ برس قبل نظریہ پاکستان کے ایک مورچے کے طور پر شروع کیا تھا۔ الحمد للہ’ احباب کی حوصلہ افزائی سے پانچ برس بعد گلستان کالونی میں نظریاتی گلشن پوری طرح بہار دے رہا ہے۔یوم قراراداد پاکستان کی مناسبت سے اس سکول کی بنیاد رکھی گئی تھی اور ہر سال یوم قرارداد کی نسبت سے سالانہ تقریب تقسیم اور ایک نظریاتی محفل کا انعقاد ہوتا ہے۔ 21مارچ کو وسیع گرائونڈ میںایسی ہی تقریب منعقد ہوئی۔ اس بار بھی حسب سابق بہت سے مہربانوں کی آمد نے جہاں بچوں کا حوصلہ بڑھایا وہیں میری ہمت بھی بندھائی۔تشریف لانے والوں میں باکردار سیاستدان سابق وفاقی وزیر جناب ڈاکٹر غلام حسین صاحب اپنی پیرانہ سالی کے باوجود بھرپور طور پر شریک رہے ۔ڈاکٹرصاحب جوشیلے مقرر ہیں۔انہوں نے سیاست میں کردارکی اہمیت پر روشنی ڈالی۔”حالات کی نہیں ذہنوں کی پسماندگی قوموں کو لے ڈوبتی ہے۔ میں نے دنیا بھر کے ممالک کی خاک چھانی ہے ۔پاکستان جیسا خوبصورت کوئی او ر ملک ہو ہی نہیں سکتا۔جس ملک میںڈاکٹر مرتضیٰ مغل جیسے صالح افراد فکرفردا کے احساس سے مزین ہو کر نئی نسلوں کو سنوارنے کے مشن پر گامزن ہوجائیں اور پسماندہ علاقوں کے بچوں کے اخلاق سنوارنے اور کردار تعمیر کرنے کیلئے نظریاتی تعلیمی ادارے قائم کردیں اس ملک کو نہ نظریاتی محاذ پر شکست ہوسکتی ہے اور نہ ہی جغرافیائی دفاع کمزور ہو سکتا ہے۔آج کا پاکستان ایک ایٹمی پاکستان ‘آج کا پاکستان دنیا کی تین ارب آبادی کا ہمسایہ ملک ہے۔دنیا کی بلند ترین چوٹیاں اس ملک میں ہیں۔گہرے سمندر اس کی ملکیت ہیں۔اصل مسئلہ صرف اور صرف حکومت اور حکمرانوں کے کردار کا ہے۔آپ باکردار نمائندے سامنے لائیں۔یہ ملک صرف پانچ سال میں دنیا کے پہلے پانچ ملکوں میں شمار ہونے لگے گا”جنرل (ر) مسعود کیانی دلوں کی مسیحائی کرتے اور سادہ لفظوں میں اپنی بات دلوں میں اتارنے کی مہارت رکھتے ہیں۔بچوں کے والدین کو مخاطب کرتے ہوئے کہہ رہے تھے”’جسمانی صحت اچھے ذہن کے لئے ضروری ہوتی ہے۔آپ کا فرض ہے کہ آپ بچوں کے دانتوں کی صفائی کا خیال رکھیں’ان کی خوراک کو متناسب بنائیں۔دودھ اور فروٹ کا استعمال بڑھائیں تاکہ انہیں ہارٹ کی بیماریوں سے نجات ملتی رہے۔ سگریٹ نوشی بچوں کی صحت کے لئے انتہائی مضر ہے اور یہ راز ہم سب جانتے ہیں’لیکن میں ان پیارے بچوں سے کہوں گا کہ وہ اگر والد یا بڑے بھائی کو سگریٹ پیتے دیکھیں تو ان سے چھین کر بجھا دیا کریں۔”عظیم پاکستانی اور فکروعمل کے پیکر محترم حمید گل صاحب بوجہ صحت تشریف نہ لاسکے لیکن نوجوانوں میں انتہائی مقبول اور متحرک ان کے صاحبزادے عبداللہ گل تشریف لائے۔عبداللہ گل کا کہنا تھا”’نوجوان ہی اب اس ملک کے روشن مستقبل کے ضامن ہیں۔نوجوانوں کے اندر اقبال کے افکار کی بنیاد پر تحریک پیدا کرنے کی ضرورت ہے۔اس طرح کے نظریاتی سکول ہی دراصل اقبال کے شاہین بناتے ہیں”۔تیکھے انداز فکر کے حامل کالم نگار جناب بیگ راج نے بچوں سے سوال کیا کہ پاکستان کا نقشہ کس پرندے کی مانند ہے تو ایک بچی نے جواب دیا ”عقاب” بیگ راج نے بچوں کو عقاب اور گدھ کی خصوصیات میں فرق سمجھاتے ہوئے کہا”’عقاب اپنا شکار خود کرتا ہے جبکہ گدھ مردار کھاتی ہے’عقاب اونچی پرواز کرتا ہے جس سے اس کی دور تلک دیکھنے کی صلاحیت بڑھ جاتی ہے جبکہ گدھ نچلی پرواز پر رہتی ہے اور اس کی نگاہ زمین پر مرنے والے جانوروں کو ڈھونڈتی رہتی ہے۔عقاب بہادر ہوتا ہے جبکہ گدھ کو چھوٹا سا پتھر مار کر بھگایا جاسکتا ہے۔عقاب درختوں پر گھونسلے بنانے کی بجائے پہاڑوں کی بلندیوں پر بسیرا کرتا ہے جبکہ گدھیں غول کی صورت میں بوڑھے درختوں پر پڑی رہتی ہیں۔بچو!پاکستان کے نقشے کی شکل عقاب کی طرح ہے اور آپ اس عقاب کے پر ‘پنجے اور چونچیں ہیں۔اس پاکستانی عقاب کو اوپر اٹھانا ہے۔دشمن سے ڈرنا نہیں بلکہ اسے خوفزدہ رکھنا ہے۔ پاکستان کو امریکی امداد یا بھارتی تجارت کے مردار نہیں کھانے دینے بلکہ دور بینی کے ساتھ اسے معاشی اور نظریاتی اٹھان دینی ہے۔”رائز” سکول میں سے تربیت پانی ہے اور عقابوں کی طرح زندگی کے مختلف شعبوں میں اونچا سے اڑنا ہے”۔تقریب کے اختتام پر بچوں کے لئے انعامات کا سلسلہ شروع ہوا۔ تمام مہمان اپنا وقت نکال کرآئے’اپنی گاڑیوں پر آئے اور بڑی محبت کے ساتھ سکول میں پھلنے پھولنے والے ان نظریاتی پھولوں کو نکھارنے میں مصروف رہے۔مجھے یقین ہے کہ مجھ سے کہیں زیادہ اہل اور صاحبان ثروت احباب موجود ہیں اور کچھ کرنے کی تڑپ بھی رکھتے ہیں۔ میرا انہیں مشورہ ہے کہ وہ بھی تعلیم وتربیت کی کوئی نہ کوئی سہولت شروع کریںجہاں عام لوگوں کے بچے خاص لوگوں کے لیول کی تعلیم حاصل کریں اور بڑے ہو کر نظریاتی پاکستان کی مضبوطی میں اپنا حصہ ڈالیں۔

کسی کی گردن میں بھی تکبر کا سریا ہوسکتا ہے۔ ہمارے بزرگ دانشور مرحوم نسیم انور بیگ فرمایا کرتے تھے کہ تکبر ایک ایسی بیماری ہے جو گردن کو پیچھے سے آلیتی ہے اور انسان بوقت ضرورت بھی گردن نیچے نہیں کرپاتا۔ پاکستان کے صحافیوں کا مجموعی مزاج بڑی حد تک ”برخودارانہ” ہے۔سچ بولتے’ لکھتے اور دکھاتے وقت پوسٹمارٹم تو ہوتا ہے لیکن پھر بھی جمع کا صیغہ استعمال کرکے ذاتی پسند و ناپسند کو ”اشو” اور بعض اوقات ”قومی اشو” کا لیبل لگا دیتے ہیں۔ اس سے انفرادی حملہ بھی اجتماعی قبولیت کی سند حاصل کرلیتا ہے۔ یہ سلیقے کی بات ہے اور پاکستان میں استاد صحافی بہرحال اس سلیقے سے مسلح رہتے ہیں۔پاکستانی صحافت کو مصری صحافت سے بہت بہتر قرار دیا جاسکتا ہے۔

مصرمیں حسنی مبارک کی جبری رخصتی کے بعد اخوان المسلمون کے حمایت یافتہ شخص محمدمرسی نے اقتدار سنبھالا تو حسنی مبارک کے دور کے درباری صحافیوں نے صحافتی اخلاقیات کی تمام حدیں توڑ دیں۔انہوں نے اپنی ذاتی پسند وناپسند کو کسی قسم کے ملکی یا بین الاقوامی اشوز کا لبادہ اوڑھائے بغیر ایسے ایسے حملے کئے کہ خود ان کے مداح بھی چیخ اٹھے کہ ”مرسی کو مت مار’و’مصر کے انتہائی معروف ٹی وی چینل ”فراعین” کے اینکر توفیق عکاشہ نے اپنے پروگرام ”سب فرعون” میں محمد مرسی پر انتہائی مہلک حملہ کیا۔توفیق عکاشہ نے جوش انتقام میں کہا”’مرسی دھوکہ باز ہے ‘ جھوٹا ہے ‘ کاش کہ کوئی نوجوان اٹھے اوراسے قتل کردے اور اگر کسی اور نے ایسا نہ کیا تو میں خود مرسی کو قتل کروں گا” توفیق عکاشہ کے یہ الفاظ یو ٹیوب پر موجود ہیں اور دنیا بھر کے ٹی وی چینلز نے اس کے یہ آتشیں مکالمے بار بار دھرائے ۔عکاشہ کے اس بیان پر خود صحافیوں کی تنظیم نے عکاشہ کا نوٹس لیا اور اس کے پروگراموں پر پابندی لگا دی۔ عدالت نے ایک درخواست گزار کی درخواست پر عکاشہ کو جیل میں ڈالا اور مقدمہ زیر سماعت ہے۔مصر کے ایک اورصحافی جو حسنی مبارک کے جتھے میں شامل تھے ان کا مصر کے اندر کئی ایکڑ پرمحیط ایک محل ہے۔ جب پولیس نے شہریوں کی شکایت پر اس محل پر چھاپہ مارا تو صبری نخنوخ کے محل سے غنڈوں کے علاوہ اسلحہ اور خونخوار جانور برآمد ہوئے۔ موصوف صحافی نے اپنے محل میں ٹارچر سیل کھول رکھا تھا جہاں حسنی مبارک کے مخالف صحافیوں کو اذیتیں دی جاتی تھیں۔ جب چھاپہ مارا گیا تو سیکولر صحافیوں کی ٹیم بھی موقع پر موجود تھی۔ وہ یہ سب کچھ دیکھ کر ششدر  رہے گئے ۔عیسائی تنظیم نے اس صحافی کی گرفتاری پر بہت غل مچایا اور اپنی ویب سائٹس کے ذریعے مرسی کو بدنام کرنے کے لئے ایڑی چوٹی کا زور لگا دیا۔ صحافیوں کے روپ میں چھپے چند غنڈوں کی گرفتاری کیخلاف محمد مرسی کے مخالف غیر مسلم گروہوں نے اکا دکا مظاہرے کئے گئے جن کی تصاویر امریکی اخبارات میں بہ اہتمام شائع کی گئیں تاکہ مصر اور امریکہ کے تعلقات کسی بہتری کی بجائے ابتری کی طرف دھکیلے جائیں اور نوزائیدہ جمہوری حکومت کو معاشی طور پر اندھیروں میں دھکیل دیا جائے۔پاکستان کے ایک موقر روزنامے کے وفاقی دارالحکومت میں بیٹھے ریذیڈنٹ ایڈیٹر نے بھی غیر ملکی میڈیا میں  کوئی ایک آدھی ایسی تصویر دیکھ لی اور بیٹھے بٹھائے یہ رائے قائم کر لی کہ محمد مرسی اور اخوان المسلمون صحافیوں کے ساتھ وہی ظلم کر رہے ہیں جو حسنی مبارک کے دور میں جاری رہتا تھا۔ وہ مقامی مدیر ہونے کے ساتھ ساتھ اس اخبار میں کالم بھی تحریر فرماتے ہیں۔ ان کے ہر کالم پر تحقیق کا گمان ہوتا ہے۔بہرحال انہوں نے اخوان المسلمون کو آڑے ہاتھوں لیا۔ اور نظریاتی تعلق کی بنیاد پر جماعت اسلامی کو بھی رگڑ ا دیا۔ ”تعاقب ” کرتے کرتے وہ بہت دور نکل گئے اور توفیق عکاشہ جیسا فیصلہ سنادیا۔ انہوں نے کالم ”مصر کے نئے فرعون” میں صدر  محمد مرسی اور ان کی حلیف جماعت پرایسے وار کئے کہ پڑھنے والے  بھی اوسان کھو بیٹھے۔آخر مرسی نے ایسا کونسا جرم کیا ہے کہ عوام کے اکثریتی ووٹوں سے جیتنے والے صدر پر فرعون کا لیبل لگا  دیا گیا ہے۔ ریٹنگ کی دوڑ میں صرف اینکرز ہی نہیں کالم نگار بھی ”کچھ انوکھا” کرنے پر مجبور ہوگئے ہیں۔اچھے خاصے محقق اور متوازن رائے رکھنے والے لکھاری بھی محض اخبار کے مالک اور اپنے بڑے ایڈیٹر کو خوش کرنے کے لئے ایسے ایسے جھوٹ تخلیق کرنے لگے ہیں کہ سچ منہ چھپاتا پھر رہا ہے۔آپ اگر انہیں کہیں کہ حضور رحم کریں اور اپنی رائے کو فیصلہ مت بنائیں تو ان کی گردن کا سریا حائل ہوجاتا ہے۔ وہ رجوع کرنا چاہتے ہیں لیکن تکبر کی بیماری انہیں ایساکرنے نہیں دیتی۔ ایسے فرعون صفت صحافیوں کی صحت مندی کے لئے صرف دعا ہی کی جاسکتی ہے۔

پاک بھارت دوستی کی اس قدر دھول اڑائی جارہی ہے کہ دوست دشمن کا چہرہ  پہچاننا مشکل ہوگیا ہے۔سرکاری ٹی وی پر بھی بھارتی اشتہارات دیکھنے کو مل رہے ہیں۔کترینہ کیف اور سیف ہمارے ٹی وی چینلز کے اندر خون بن کر دوڑ رہے ہیں۔ یوں محسوس ہوتا ہے کہ ہماری سوچ اور عقل کے سارے دھارے اب سرحد پار سے پھوٹتے ہیں اور ہم یہاں بیٹھے انہی لفظوںاورانہی استعاروں کی مالا جپتے اور ان کے اشاروں پر ناچتے ہیں۔ہمارا مقبول ترین سلوگن اب ”نچ لے” بن چکا ہے۔ملی غیرت اور قومی حمیت جیسے الفاظ لکھنے اور بولنے پر دْشنام طرازیوں کے پے در پے وار سہنے پڑ رہے ہیں۔”چھڈوجی پاگل جے” یہ ہے بھارت نواز دانشوروں کی وہ پھبتی جو ”امن کی آشا” اور ”مفادات کی فحاشہ” پر تنقید کرنے پر کسی جاتی ہے۔امن کس کو نہیں چاہیے؟پاکستانیوں کو امن کی جس قدر ضرورت ہے شائد دنیا کی کسی اور قوم کو ہو۔ جہاں ہرروز خون بہتا ہو’لاشے گرتے ہوں’ روحیں تڑپتی ہوں اور بے یقینی ایمان شکنی کی حدیں چھونے لگے وہاں امن کی خواہش کون نہیں کرے گا۔ہمسایوں کے ساتھ پْرامن رہنا ہمسایوں سے زیادہ ہماری ضرورت ہے۔لیکن کیا لفظ امن امن کی گردان کرنے سے امن قائم ہوجاتا ہے؟ آزمودہ قول ہے کہ ظلم اور امن ایک جگہ اکٹھے نہیں ہوسکتے۔ظلم رہے اور امن بھی ہو یہ ناممکنات میں سے ہے۔مظلوم وقتی طور پر ظلم کے سامنے دب سکتا ہے۔

لیکن وہ ظلم کو ہضم نہیں کرسکتا۔بھارتی وزیر خارجہ مسٹرکرشنا کی آمد کے موقع پر حکمران ٹولے کی باچھیں کھل رہی تھیں اور وہ آسان ویزا جیسی بے معنی لایعنی تجاویز پر جھوم جھوم کر ہلکان ہورہے تھے۔ ہمارے ٹی وی چینلز اور ان کے اینکرزپاک بھارت بہتر تعلقات کی اس لمحاتی صورتحال کو ترستی نگاہوں اور للچائے ہوئے لہجوں کے ساتھ قوم کے دل و دماغ میں اتارنے کی کوشش کر رہے تھے۔ ایک ٹی وی چینل”سروں کی جنگ” چھیڑ رہا ہے۔ اور پاکستان اور بھارت کے گویوں کے مقابلوں کو قومی سطح کی ہاراور جیت کا درجہ دے رہے ہیں۔ کہاں کشمیر کی آزادی کے لئے ہزار سال تک جنگ کرنے والے اور کہاں اب اداکاروں’فنکاروں’گلوکاروں اور غیرت فروش جتھوں کی پرفارمنس اور ادائوں کو قومی بقا کی جنگ قرار دینے والے بونے سیاستدان!!!کرشنا آئے ‘مینار پاکستان گئے’خوش ہوئے اور واپس چلے گئے۔ کیا فرق پڑے گا۔ کیا دہلی نے پاکستانی دریائوں پر ڈیم بنانے بند کردیئے ہیں؟ کیا سرکریک کی چوٹی مل گئی ہے اور کیا کشمیر سے فوجیں واپس چلی گئی ہیں کیا فرق پڑا ہے۔ تجارت ‘تجارت ایک اخبار نے لکھا ہے کہ بالآخر پاکستان نے بھارت کی یہ نصحیت قبول کر لی ہے کہ کشمیر چھوڑ کر تجارت کرو۔ماضی کو بھول کر مستقبل کے بارے میں بات کرو۔ اس سے بڑی ناکامی کیا ہوگی؟ لوگ کہتے ہیں کہ پاکستان نے کشمیر کے لئے تین جنگین لڑی ہیں اور آدھا ملک گنوایاہے۔ہم پوچھتے ہیں کہ اگر پاکستان نے یہ تین جنگیں نہ لڑی ہوتیں تو کیا ضمانت تھی کہ  یہ ملک آج صفحہ ہستی پر موجود بھی ہوتا؟ کیا بھارت یہ ضمانت فراہم کرتا کہ ”پاکستان کے معصوم لوگو! تم نے ہندوستان کو تقسیم کرکے بڑا کارنامہ سرانجام دیا ہے اور ہم ا س پر خوش ہو کر تمہارے وجود کے تحفظ کا عہد کرتے ہیں”۔ مجھے پورا یقین ہے کہ اگر بھارت تقسیم ہند کے فارمولے پر عملدرآمد کرتا تو آج ہم دونوں ملک پرامن ہمسایوں کی طرح رہ رہے ہوتے۔لیکن جب ایک جابر نے میری  شہ رگ پائوں سے دبا رکھی ہے تو میں کس طرح امن سے بیٹھا رہوں گا۔مجھے یہ سمجھانا کہ دیکھو امن سے پڑے رہو اور آہستہ آہستہ موت کی طرف لپکتے جائو۔ظلم کی انتہائی صورت ہے۔مولانا فضل الرحمن نے بالکل ٹھیک نشاندہی کی ہے کہ مسئلہ کشمیر ہی  تمام مسائل کی ماں ہے۔آپ مسئلہ کشمیر حل کردیں باقی کے تمام مسائل خود بخود حل ہوجائیں گے۔ ہمارے سارے دانشور بھارتی لابیوں کے دلائل کے اسیر ہوتے جارہے ہیں۔ وہ مولانا کے پرمغز بیان پر دھیان دیں اور ٹماٹرپیاز کی تجارت کے دھوکے میں نہ آئیں ۔ ضروری نہیں کہ ہم ابھی جنگ ہی کریں ‘ لیکن مسئلہ کو زندہ رہنے دیں ‘ظلم کو ظلم کہتے رہیں۔حالات اگر آج بھارت کے حق میں ہیں تو کل پاکستان کے حق میں بھی جاسکتے ہیں۔!

حضرت ابوبکر صدیق کے بارے میں خصوصی تحریر
حضرت ابوبکرصدیق جب خلیفہ منتخب ہوئے تو صبح اٹھ کر تجارت کے لئے کپڑے لے کر بازار کی طرف روانہ ہوئے’ راستے میں حضرت عمر اور حضرت ابو عبیدہ ملے اور دریافت کرنے لگے کہ کدھر کا قصد ہے؟ حضرت ابوبکر نے فرمایا:بازار جا رہا ہوں’ ان دونوں نے فرمایا کہ آپ پر تو دربارخلافت کا بار ہے’بازار میں کیا کریں گے؟آپ نے فرمایا:پھر اپنے متعلقین کی پرورش کہاں سے کروں گا؟ انہوں نے کہا کہ آپ تشریف لے چلیں’ ہم آپ کا وظیفہ مقرر کردیں گے’آپ ان دونوں صحابہ کرام کے ساتھ تشریف لائے تو ان حضرات نے مشورے کے بعد آپ کا معمولی خرچ کا وظیفہ مقرر کردیا’جیسا قبل از خلافت اپنے مال سے خرچ کرتے تھے اور سفر حج کے لئے سواری مقرر کردی اور دو چادریں عطا کردیں کہ جب ایک پرانی ہوجائے تو دوسری لے لیں۔

خلافت کے بعد پہلا خطبہ ارشاد فرماتے ہوئے خلیفہ اول نے فرمایا :”اے لوگو! میں اللہ کی قسم کھا کر کہتا ہوں کہ میں نے دن ہو یا رات کبھی امار ت کی ہوس نہیں کی ‘ نہ میرا  اس طرف میلان تھا’ میں نے خفیہ یا علانیہ کبھی اللہ سے یہ دعا نہیں کہ کہ وہ مجھے امارت بخشے لیکن مجھے اس بات کا یقینا اندیشہ تھا کہ کہیں(اس نازک موقع پر) کوئی فتنہ پیدا نہ ہوجائے’حقیقت میں مجھ پر بڑی ذمہ داری ڈال دی گئی ہے جس سے عہدہ برآ ہونا اللہ کی توفیق و تائید کے بغیر میری ملاقات سے باہر ہے ‘ میں چاہتا تھا کہ آج میری جگہ پر انسانوں میں سے طاقت ورترین انسان ہوتا’ اب اس میں کوئی شک نہیں کہ مجھے تمہارا امیر منتخب کر لیا گیا ہے ‘ اگر میں ٹھیک چلوں تو میری مدد کرنا’اگر میں غلط چلوں تو مجھے درست کردینا’ سچائی ایک امانت ہے اور جھوٹ خیانت’تم میں کمزور میرے نزدیک طاقت ور وگا’ تاوقت یہ کہ میں توفیق الٰہی سے اس کے حقوق نہ ادا کردوں اور تم میں سے طاقت ور میرے نزدیک کمزور ہوگا حتیٰ کہ توفیق الٰہی سے میں اس سے وہ کچھ وصول نہ کرلوں جو اس کے ذمے واجب الادا ہے ‘کسی قوم نے راہ خد میں جہاد ترک نہیں کیا مگر یہ کہ اللہ نے اسے ذلیل کردیا ‘اور جو قوم بے حیائی اور بدکاری کے افعال کی مرتکب ہوتی ہے وہ یقینا عذاب الٰہی کی مستحق ہوتی ہے جب تک میں اللہ تعالیٰ اور اس کے رسول صلی اللہ علیہ وآلہ وسلم کی اطاعت کروں تم بھی میری اطاعت کرو’اگر میں اللہ اور اس کے رسول صلی اللہ علیہ وآلہ وسلم ک کی نافرمانی کروں تو تم پر میری اطاعت لازم نہیں”۔آپ کا نامی اسم گرامی عبداللہ’کنیت ابوبکر’لقب صدیق وعتیق اور والدگرامی کا اسم مبارک ابوقحافہ عثمان اور والدہ محترمہ کا نام سلمیٰ ام الخیر تھا۔ آپ کانسبی تعلق قریش کی ایک شاخ بنوتمیم سے ہے۔آپ کی حیات مطہرہ میں کچھ خصائص ایسے نظر آتے ہیں کہ جو پوری ملت میں آپ کو امتیازی حیثیت بخشتے ہیں۔
آپ کی صحابیت’صدیقیت’عتیقیت اور ابوبکر آپ کی کنیت’پھر آپ کے صدق وصفاء ‘توکل و رضا’آپ کی سخاوت و ایثار پھر حضور انورۖ کا قرب ومعیت ہر ہر صفت کو قرآن حکیم نے خصوصی طور پر بیان کی ہے۔
امام فخرالدین رازی رحمتہ اللہ علیہ رقم طراز ہیں:”اللہ تعالیٰ نے سیدنا ابوبکرصدیق رضی اللہ عنہ کا وصف بایں طور پر بیان فرمایا ہے کہ آپ صاحب رسول ہیں۔ اللہ تعالیٰ کا آپ کو صاحب رسول (لصاحبہ) کہنا آپ کی کمال فضیلت پر دلالت کرتا ہے۔
چونکہ سیدنا ابوبکرصدیق کی حضورۖ کے ساتھ قربت ومعیت کی کیفیت بھی ایک خاص نوعیت کی تھی جسے الفاظ میں بیان کرنا مشکل ہی نہیں تقریباً ناممکن ہے۔یہ قرآن مجید فرقان حمید کا اعجاز ہی تو ہے کہ جس نے دو لفظوں میں قرب و معیت کی ساری حدوں کو ذات صدیق اکبر میں سمو دیا ہے اور اس انداز سے بیان کیا ہے کہ اس سے زیادہ کا تصور بھی محال ہے۔چنانچہ ارشاد فرمایا”جب غار میں دو تھے ان میں سے ہر ایک دو میں سے دوسرا تھا”۔
جب سرور کونین صلی اللہ علیہ وآلہ وسلم نے اعلان نبوت فرمایا تو سیدنا صدیق اکبر بغرض تجارت یمن گئے ہوئے تھے جب آپ وہاں سے واپس لوٹے تو سرداران قریش ابوجہل’عتبہ اور شیبہ انہیں ملنے کے لئے آئے اور دوران گفتگو تازہ خبر کے طور پر آپ کو بتایا کہ ابو طالب کے یتیم بچے محمد عبداللہ نے نبی ہونے کا دعویٰ کردیا ہے ہم تمہاری واپسی کے منتظر تھے تاکہ اس کی روک تھام کا کوئی پروگرام مرتب کیا جاسکے۔یہ سن کر یوں معلوم ہوا کہ گویا یہ اڑتیس سالہ نوجوان اس خوشخبری کا پہلے ہی سے منتظر تھا۔اپنے محبوب دوست کو ملنے کے لئے اس کے دل میں آتش اشتیاق بھڑک اٹھی سرداران قریس کو رخصت کیا خود بارگاہ رسالتۖ میں حاضر ہو کرکلمہ شہادت پڑھا اور دولت اسلام سے بہرہ ور ہوگیا۔نبی پاک ۖ نے ایک موقع پر خود فرمایا میں نے جس شخص کے سامنے اسلام پیش کیا اس میں ایک قسم کی جھجک اور تردور فکر ضرور پائی سوائے ابوبکر کے کہ جس وقت میں نے ان کی سامنے اسلام پیش کیا انہوںنے بے جھجک اسے قبول کر لیا۔ اس طرح آزاد مردوں میں اسلام قبول کرنے کی اولیت آپ کو نصیب ہوئی۔
مکہ سے مدینہ کا سفر ہر طرح سے پرخطر اور کٹھن تھا۔دوران سفر پہلا مرحلہ غارثور میں قیام تھا سیدنا صدیق اکبر نے آپ کو اپنے کندھوں پر سوار کیا اور پہاڑی کی چوٹی پر لے گئے اور غار کو اندر جا کر صاف کیا۔ اس پرخطر جگہ پر صرف اور صرف سیدنا صدیق اکبر کو صحبت سرکارۖ کے انمول لمحات میسر آئے اسی لئے رہتی دنیا تک قرآن گواہ بن کر مسلمانوں کو آپ کی شان کا بتاتا رہے گا۔ ان ساعتوں کی عظمت کے سبب ہی تو آقائے دو جہاں ۖ نے حضرت عائشہ کے استفسار پر بتایا کہ حضرت عمر کی نیکیاں آسمان کے ستاروں سے بھی زیادہ ہیں اور حضرت ابوبکر کی غار ثور کی ایک رات کی نیکیاں حضرت عمر کی ساری زندگی کی نیکیوں سے بھاری ہیں۔
نبی پاکۖ کے مدینہ تشریف آوری پر فرزندان توحید کھنچے چلے آئے اور ایک مرکز پر جمع ہونے لگے۔ نبی پاکۖ نے تعمیر مسجد کا حکم فرمایا اس سلسلہ میں مدینہ کے دو یتیم بچوں کی زیر ملکیت زمین پسند فرمائی گئی جسے اگرچہ وہ اور ان کے لواحقین بلاقیمت دینے پرمصر تھے تاہم رحمت عالم صلی اللہ علیہ وآلہ وسلم نے یتیموں کا مال بلاقیمت لینا پسند نہیں فرمایا اور اس کی قیمت ادا کرنے کا شرف سیدنا صدیق اکبر کو بخش دیا گیا۔ چونکہ قرآن نے آپ کو ”ثانی اثینن” کہا تو یہ بے موقع و بے محل نہ کہا۔واقعی آپ حضورۖ کے ایسے ثانی تھے کہ جب تاجدار انبیائۖ نے اعلان نبوت فرمایا اور لوگوں کو دین اسلام کی نصرت و حمایت کی طرف بلایا تو سب سے پہلے اس دعوت پر لبیک کہنے والے سیدنا ابوبکر رضی اللہ عنہ ہی تھے۔پھر سفر ہویا حضر’امن ہو یا جنگ’محب و محبوب پہ ہمیشہ ”ثانی اثنین ”کا ہی جلوہ ونظر آرہا ہے۔کل قیامت کے دن سب سے پہلے قبر سے حضرت محمد عربیۖ اٹھیں گے۔”ثانی اثنین کے جلوے حوض کوثر سے ہوتے ہوئے دارالخلد میں داخل ہوجائیں گے جیسا کہ حضرت عبداللہ بن عمر رضی اللہ عنہ روای ہیں”رسول اللہۖ نے سیدنا ابوبکرصدیق اکبر رضی اللہ عنہ سے فرمایا کہ آپ غار میں بھی میرے ساتھی ہیں اور حوض کوثر پر بھی آپ میرے ساتھ ہی ہوں گے”۔
سیدنا ابوبکرصدیق عشق مصطفیۖ میں وہ مقام رکھتے ہیں کہ اولین وآخرین میں کوئی بھی اس مقام تک نہ پہنچ سکا۔یہ صرف زبانی دعویٰ ہی نہیں بلکہ اس بات پر خود محبوب دو جہاںۖ کی طرف سے مہر تصدیق ثبت ہے۔چنانچہ حضرت انس رضی اللہ عنہ راوی ہیں کہ خود شمع مصطفویۖ نے پروانہ شمع مصطفویۖ کے بارے میں حضرت حسان رضی اللہ عنہ سے پوچھا اے حسان کیا آپ نے میرے ابوبکر رضی اللہ عنہ کی شان میں کوئی اشعار کہے ہیں۔عرض کی ہاں آقا!
حضورۖ نے فرمایا ذرا کہو میں بھی تو سنوں۔
چنانچہ حضرت حسان رضی اللہ عنہ نے یہ اشعار کہے
وَثَانِی اثنَینِ فِی الغَارِ المْنِیفِ وَقَدْ
طَافَ العَدبِہ اذ صَاعِدْنِ الجَبَلا
وَکَانَ حْب رَسْولِاللہِ قَد عَلِمْوا
مِنَ البَرِیةِ لَم یَعدِلْ بِہ رَجْلاَ
”سیدنا ابوبکرصدیق مقدس غار ثور میں آپۖ کے ثانی اثنین تھے جبکہ دشمن پہاڑ کی چوٹی پر پہنچ کر اس غار کے اردگرد گھوم رہے تھے۔دنیا جانتی ہے کہ  عالم انسانیت میں کوئی بھی عاشق محبت رسولۖ میں آپ کے ہم پلہ نہ ہوسکا۔”
حضرت ابوجعفر سے روایت ہے کہ ابوبکرصدیق رسول پاکۖ کے وزیر تھے تمام امور میں آپ سے ان سے مشورہ فرمایا کرتے تھے۔ابوبکر ہی اسلام میں ثانی’غار میں ثانی’ بدر کی جنگ  کے روز خیمہ میں ثانی اور قبرمیں ثانی ہیں سرور کائنات صلی اللہ علیہ وآلہ وسلم کسی کو آپ پر ترجیح نہ دیتے تھے۔مردوں میں سب سے پہلے اسلام بھی آپ نے مصحف رکھا۔قرآن مید کو سب سے پہلے جمع بھی آپ نے کرایا سب سے پہلا شخص جس نے کفار قریش کے ساتھ نبی پاکۖ کی حمایت میں جنگ لڑی  اور ضربات شدید برداشت کیں وہ بھی حضرت ابوبکر ہیں۔اسلام میں سب سے پہلے مسجد بھی آپ نے بنائی سرکار دوعالم ۖ کی حیات میں جس کو سب سے پہلے حج کی امامت کا شرف حاصل ہوا وہ بھی آپ ہی ہیں۔آپ سب سے پہلے خلیفہ راشد ہیں اور سب سے پہلے شخص ہیں جو اس لقب سے پکارے گئے۔آپ وہ سب سے پہلے خلیفہ ہیں جن کو اپنے والد کی زندگی میں خلافت ملی اور آپ سب سے پہلے خلیفہ ہیں جس کا نفقہ رعایا نے مقرر کیا۔ سب سے پہلے بیت المال آپ نے قائم فرمایا سب سے پہلے آپ نے جہاد اور استنباط احکام کے اصول اربعہ مقرر فرمائے۔ سب سے پہلے دوزخ سے نجات کی خوشخبری بنی کریم صلی اللہ علیہ وآلہ وسلم نے آپ ہی کو دی اور آپ کو عتیق کے لقب سے مشرف  فرمایا۔آپ ہی سب سے پہلے وہ شخص ہیں جن کو بارگاہ رسالت سے کوئی لقب عطا ہوا۔22جمادی الآخر کو آپ کا وصال مبارک ہوا۔

مجھے”میڈیا ایتھکس” کے عنوان سے ہی اختلاف ہے’ کیونکہ کسی پراڈکٹ کی کوئی اخلاقی یا غیر اخلاقی قدریں نہیں ہوتیں ‘اقدار کا تعلق اس پراڈکٹ کے خالق کے قلب وذہن سے ہوتا ہے۔ اس لئے آج کے سیمینار کا موضوع اگر ”اہل صحافت کی اخلاقی قدریں” یعنی ”جرنلسٹک ایتھکس” ہوتا تو یہ زیادہ موزوں اور عام فہم ہوتا۔میڈیا نے کس طرح فروغ پایا اور اس کی تدریجی تاریخ کیا ہے میں اس لاحاصل بحث میں الجھ کر اپنا اور آپ کاوقت ضائع نہیں کروں گا۔میرے آپ اور اس سماج کے لئے اہم یہ ہے کہ آج ”میڈیا” کس بلا کا نام ہے اور اس کے متاثرین کی حالت زار کیا ہے۔کبھی ہمارے سماجی رویوں سے ظاہر ہوتا  تھا کہ ہر شریف آدمی پولیس سے خوفزدہ  ہے۔

پھر اخبارات نے جب اپنی اثر پذیری دکھانا شروع کی تو شریف اور ایماندار لوگوں نے قدرے سکھ کا سانس لیا اور وہ کسی اخبار کے نمائندے کو اپنی بپتا سناتے کہ کس طرح انہیں پولیس تنگ کر رہی ہے ۔ ایک سنگل کالمی خبر شائع ہوتی اور پولیس سہم جاتی ‘ اس طرح شریف شہری کے سر سے وقتی طور پر پولیس گردی کا عذاب ٹل جایا کرتا تھا۔ تب معاشرے میں یہ احساس ابھرا کہ پولیس صحافیوں سے بہت ڈرتی ہے اور شریف لوگوں کو صحافت کی صورت میں ایک سہارا مل گیا ہے۔دیکھتے ہی دیکھتے زرد صحافت کا چلن عام ہوا ۔ پھر جہاں ظلم ہوتا وہاں ضرور کوئی نہ کوئی صحافی بھی ملوث ہوتے پایا گیا۔ پولیس اور صحافت دونوں نے آپس میں ورکنگ ریلیشن شپ قائم کر لی۔ میڈیا اس قدر ترقی کرتا گیا کہ حرف مطبوعہ غیر موثر اور بولا گیا جملہ موثر ہوگیا قلم’ قرطاس پیچھے رہ گئے اور کیمرہ اور سکرین آگے آگئے۔ گزشتہ ایک دیہائی میں پچاس کے لگ بھگ ٹی وی چینلزابھرے ہیں اور ہر  چینل 24گھنٹے اپنی نشریات جاری رکھتا ہے۔ اخبار نے ہر روز چھپنا ہوتا ہے لیکن ٹی وی چینلز ہر گھنٹے بعد نیوز بلٹن دیتا ہے اور وقفے وقفے سے ”بریکنگ نیوز” کا تڑکا بھی جاری رہتا ہے۔آج جس میڈیا سے میرا اور آپ کا واسطہ ہے اس سے پولیس ڈرتی ہے یا نہیں لیکن سچ یہ ہے کہ شریف لوگ بہت زیادہ خوفزدہ ہورہے ہیں۔صحافت کبھی مقدس پیشہ بلکہ پیغمبرانہ پیشہ ہوتا تھا۔ پھر یہ کاروبار بن گیا اور اب یہ باقاعدہ ”مقتدر” حیثیت اختیار کرچکا ہے۔ بڑے بڑے میڈیا گروپس معرض وجود میں آچکے ہیں۔اب یہ کاروبار کارپوریٹ بزنس کی شکل میں آگے بڑھ چکا ہے اور اس سے بڑھ کر اب حکومتیں گرانے’ بنانے’وزیر ہٹانے’نئی پارٹیاں آگے لانے’ کرپشن کے راز افشا کرنے’کرپشن چھپانے سے لے کر انسانی ذہنوں کو کسی پراڈکٹ کی خریداری پرآمادہ کرنے ‘کسی نظریہ کو قبول کرنے’ دوستوں کو دشمن بنا دینے اور دشمنوں کو دوست قبول کرنے پر آمادہ کرتا اور اپنی ان خدمات کے عوض بے پناہ مالی مفادات حاصل کرتا ہے۔معاف کیجئے اگر میں یہ کہوں کہ بڑے بڑے کاروباری گروپوں نے اپنے جائز ناجائز کاروبار اور کاروباری مفادات کے تحفظ کیلئے ٹی وی اور اخبار کو اپنی ڈھال بنا لیا ہے۔ جس طرح سیمنٹ اور شوگر بنانے والوں نے اپنی ایسوسی ایشن بنا لی ہیں’ اسی طرح میڈیا گروپس نے اپنے جتھے بنا لئے ہیں۔ان جتھوں کا کام حکومتوں سے سودے بازی کرکے زیادہ سے زیادہ مالی فوائد حاصل کرنا ہے۔آج ناظرین اور قارئین کے ذہنوں میں انفارمیشن کے نام پر جو کچرا بھرا جارہا ہے اس ملغوبے کا انتخاب دس بارہ انسانوں کے مفادات کے تابع  ہوتاہے۔ کارکن’ صحافی ‘کالم نگار ‘اینکرپرسن اورکیمرہ مین ‘یہ تو محض کٹھ پتلیاں رہ گئی ہیں۔میڈیا مالکان جس طرح چاہیں انہیں استعمال کریں اور جب چاہیں استعمال کرکے ٹشو پیپرز کی طرح پھینک دیں۔ جس طرح فلم انڈسٹری میں اداکارائیں اور اداکار بک ہوتے ہیں اسی طرح میڈیا سے وابستہ دانشوران رات کی تاریکیوں میں ”ہائر”ہوتے ہیں۔بھائو تائو’ کس کا میڈیا ٹرائل کرنا ہے ‘کسی کی کس سے ملاقات کرانی ہے ‘ کس کو آگے بڑھانا ہے۔ یہ سب معاملات ”انڈرورلڈ” کے معاہدوں کی طرح طے پاتے ہیں۔ہمیں قبول کرلینا چاہئے کہ میڈیا اب ایک باقاعدہ انڈسٹری بن چکی ہے ایک ایسی انڈسٹری جو ٹیکس تو نہیں دیتی لیکن منافع بہت کماتی ہے۔ جس کی بلیک میلنگ پاور کے سامنے کئی ”مَلک” اور کئی ”مْلک” عاجز ہیں۔میڈیا کا کوئی توڑ نہیں میڈیا کا علاج مزید میڈیا ہے۔ جس طرح پاور مزید پاور کا تقاضا کرتی ہے۔میڈیا انڈسٹری ہے اور انفارمیشن اس کی پراڈکٹ ہے۔ جس طرح صارف اورخریدار کا یہ حق ہے کہ وہ برگر کی کوالٹی دیکھ کر  پیسے دیتا ہے اسی طرح صارفین جو کہ ناظرین اور قارئین ہیں ان کا بھی یہ حق ہے کہ وہ انفارمیشن کی کوالٹی یعنی کریڈیبلٹی کا تقاضا کریں لیکن یہ واحد پراڈکٹ ہے جس کے خریداروں کو حق خریداری سے بھی محروم کردیاگیا ہے۔ انفارمیشن کے نام پرڈس انفارمیشن’ مس انفارمیشن ‘ایکسس انفارمیشن’ اینگلڈ انفارمیشن’ ٹارٹڈ انفارمیشن اور خدا جانے کون کون سی ٹریٹمنٹ سے گذاری گئی انفارمیشن ہمارے کانوں میں’ ذہنوں میں ٹھونسی جاتی ہے اور ہم مجبور ہیں کہ جو بھی چینل لگائیں کسی نہ کسی طرح ہمارے دل و دماغ مجروح ضرور ہوتا ہے۔پہلے عرض کرچکا ہوں کہ اخلاقیات کا دائرہ اگر کھینچنا ہے تو پھر جیتے جاگتے انسانوں کو مخاطب کیجئے’صحافیوں یعنی کارکن صحافیوں کے ضمیر کو جھنجھوڑئے’اگرچہ میں پہلے بتا چکا ہوں کہ مالکان کے مفادات کے سامنے بڑے بڑے سورما قسم کے اینکر پرسن اور کالم نگار بے بس ہیں اور جب وہ سوچتے ہیں کہ وہ مالکان کے لئے عوام کے ذہنوں میں جھوٹ بھر رہے ہیں تو پھر بہتی گنگا میں خود بھی ہاتھ دھونے کو جی چاہتا ہے پھر بھی یہی وہ کارکن ہیں جن کو آپ اقدار اور اخلاقیات کا واسطہ دے سکتے ہیں۔ورنہ پرتشدد مناظر’ناپاک رشتوں پر مبنی ڈائیلاگ’ملک وقوم کے خلاف زیر آلودہ انکشافات اور کرپشن کو ختم کرنے کی بجائے کرپشن کو کلچر بنانے والے ٹاک شوز سے جان چھڑانا ممکن ہی نہیں رہے گا۔میڈیا بہت ترقی کر گیا لیکن اس ترقی کا فائدہ کس کو ہوا۔کیا ہمارے سماج میں کرائم ریٹ میں کوئی کمی واقع ہوئی؟ کیا ملک کے اندر قاتلوں کی تعداد کم ہوئی؟ کیا عام اخلاقی اقدار پر عملدرآمد میں تیزی آئی؟ کیا طلاق کی شرح میں کمی ہوئی؟ کیا عورتوں اور بچوں کے خلاف جرائم کی نوعیت اور اکثریت میں کمی ہوئی۔کیا جمہوریت کی تطہیر ہوگئی ‘ کیا گڈ گورننس کا چلن عام ہوا’ کیا مذہبی ہم آہنگی’تشدد’ دہشتگردی آخر کوئی ایک پہلو جس کو میڈیا نے صحیح کیا ہو۔ کوئی بھی نہیں کیوں کہ میڈیا کی بنیاد بہتری نہیں ابتری ہے۔ کتے انسان کو کاٹیں تو ان کے نزدیک خبر نہیں’ انسان کتے کو کاٹے تو جلی حروف میں خبر ہے۔ جس پیشے کی بنیاد ہی شر ہے اس سے خیر کی توقع ہوہی نہیں سکتی۔ صحافت لفظ صحفیہ سے نکلا اور صحیفہ کا لفظ آتے ہی تقدس اور حرمت کا تاثر ابھرتا ہے۔اب خدارا یا تو لفظ صحافت متروک تصور کیا جائے اور اس کی جگہ لفظ میڈیا ہی پر اکتفا کیا جائے ورنہ لفظوں اور اصطلاحوں کا تضاد  ہمیںمزید الجھائو کی طرف لے جائے گا۔آخری امید اس شعبہ اور پیشہ سے وابستہ افراد ہیں اور ان افراد کے لئے اطلاع پہنچانے’نیکی کی تشہیر کرنے اور الزام’ بہتان اور ابہام کے بارے میں قرآنی احکامات بڑے واضح ہیں۔میرا یقین ہے کہ اگر میڈیا سے وابستہ لوگ انسان’مسلمان اورپاکستانی کی حیثیت سے اپنی ذمہ داریوں کو ترجیح دیں اور پیشہ وارانہ ضرورتوں کے خود ساختہ پنجرے سے باہر آجائیں تو یہی کاروبار اس سے وابستہ لوگ معزز اور محسن کہلائیں گے۔ عام انسانوں اور خصوصاً مسلمانوں کو قرآن حکیم میں حکم دیا گیا ہے کہ جب کوئی افواہ یا بات سنو تو پہلے اس کی تحقیق کرلیا کرو۔ گمان مت کرو کہ بعض گمان گناہ کے قریب لے جاتے ہیں۔ انتہائی شاندار حکم میں مزید فرمایا گیا”جب بھی بات کرو تو اچھی بھلائی والی بات کرو””ایک دوسرے کی کھوج میں مت رہو”بہتان اور غیبت پر تو انتہائی سخت تنبیہہ فرمائی گئی۔ عرض کرنے کا مقصد یہ ہے کہ ایک صحافی’اینکرپرسن اور کالم نگار کے لئے سب سے پہلے انسان’ مسلمان اور پاکستانی کی حیثیت سے بعض ذمہ داریاں عائد ہوتی ہیں اگر یہ ذمہ داریاں پوری کرنے کی ہمت پیدا ہوجائے تو پھر” میڈیا ایتھکس” کے حوالے سے ابھرنے والی ضرورتیں خود بخود پوری ہوجائیں گی۔میں واضح کرتا چلوں کہ تمام میڈیا پرسنز ایسے نہیں ہیں’ ایسے صاحب کردار کالم نگار اور اینکرپرسنز موجود ہیں جو آج بھی ”لشکر یزید” میں ہیں لیکن وہ اپنی انسانی’ اسلامی اور پاکستانی ذمہ داریاں پوری قوت سے نبھا رہے ہیں۔معاشرہ ان کی استقامت کو سلام پیش کرتا ہے۔ان کی تعداد بہت تھوڑی ہے۔ اور آج آرگنائزیشن فار ورلڈ پیس کے اکابرین خصوصاً عابد علی عابد اور ہمارے بہت ہی قریبی دوست جناب شیخ نثار حسین اور علی عباس مبارکباد کے مستحق ہیں کہ انہوں نے بپھرے ہوئے میڈیا کے لئے ایتھکس کی حدیں تلاش کرنے کے لئے کم از کم اس محفل کا اہتمام تو کیا ہے۔ہمارا غیر مشروط تعاون ان کے ساتھ رہے گا کہ قرآن کا حکم ہےترجمہ:نیکی اور بھلائی میں ایک دوسرے سے تعاون کرو اور گناہ اور برائی میں تعاون مت کرو(القرآن)

دولت کی چمک سے بچنا محال ہوجاتا ہے۔ جو لوگ دام پھینک کر وفاداریاں خریدنے کا دھندہ کرتے ہیں ان کو یقین کامل ہوتا ہے کہ ہر انسان کی ایک قیمت ہوتی ہے۔کامیاب بیوپاری وہ ہوتے ہیں جو بندے کے ماتھے اور آنکھوں سے بھانپ لیتے ہیں کہ ان کے مخاطب کی قیمت کیا ہوگی۔ رشوت لینا اگر ایک فن ہے تو رشوت دینا بہت بڑا فن ہے۔ہرکوئی صاحب ثروت رشوت دینے کی صلاحیت نہیں رکھتا۔ اس کار شیطانی کے لئے مہارت درکار ہوتی ہے ۔

ایک کلرک سے بہتر کوئی نہیں جانتا کہ کس طرح رشوت لی اور دی جاتی ہے فائل کو ”پہیے” اور کیس کو ”انجن” لگانے کا راز کلرک بادشاہ ہی جانتا ہے۔کلرک سے کھرب پتی بننے والے ملک ریاض نے رشوت ستانی کی ابتدائی ٹریننگ دوران کلرکی حاصل کی۔پھر انہوں نے اپنی خوش قسمتی کی فائل کو ایسے پہیے لگائے کہ وہ پانچویں گیئر میں دوڑتی چلی گئی۔ بحریہ ٹائون کے پراجیکٹ ملک صاحب کے لئے دولت کا بحر بیکراں ثابت ہوئے ۔ملک صاحب نے بہت سے سچ بولے اور ان سچائیوں میں سب سے بڑی سچائی یہ کہ انہوں نے اپنے ہر جائز اور ناجائز منصوبے کی تکمیل کے لئے موثر ترین لوگوں کی بولی لگائی اور انہیں خرید کر اپنے ”حرام کدے” میں شامل کر لیا۔یہ نہیں کہ مملکت خدادا میں رشوت’سفارش دھونس اور دھاندلی کو جناب ملک صاحب نے متعارف کرایا۔ ایسا نہیں۔ انہیں اتنا بڑا اعزاز نہیں دیا جاسکتا۔ اس کام کا آغاز قائداعظم  کے ساتھیوں نے خود ہی کر دیا تھا۔جھوٹے کلیم بنانے اور ان کلیم کے مقابلے میں جائیدادیں الاٹ کروانے کے بدلے رشوت’شراب اور شباب کا چلن قیام پاکستان کے ساتھ ہی عام ہوگیا تھا۔لیکن ملک صاحب کے میدان سے اترنے سے پہلے ملک کے مقدس اداروں کے بارے میں کھلے عام شخصیت فروشی کا تاثر مشکوک تھا۔ شک تو تھا کہ  محدودے چند لوگ ایسے ہوسکتے ہیں جو چھپ چھپا کر کچھ مراعات یا سہولتوں کے بدلے کسی تاجر یا کاروباری شخص کو ناجائز فائدہ پہنچاتے ہوں لیکن یقین نہیں تھا جناب ملک ریاض نے اس شک کو یقین  میں بدل دیا۔انہوں نے ”انسانی وسائل” کی خریداری میں فوج’عدلیہ ‘صحافی ‘علماء اور دانشور۔ کسی کی تفریق نہیں رکھی۔ سب کو ان کی منہ مانگی قیمت ادا کی اور ان سے من چاہے فوائد حاصل کئے۔ہمارے سپہ سالار اعظم انتہائی ایماندار اور سچے سپاہی ہیں انہیں بدنام کرنے کے لئے ان کے کسی بھائی کے بارے میں افواہیں بھی پھیل چکی ہیں کہ وہ بھی ملک صاحب سے ”مستفید” ہوتے رہے ہیں اور ملک صاحب نے ان کے بارے میں بھی ایک فائل تیار کر رکھی ہے خدا نہ کرے کہ ایسا ہو۔لیکن اگر ملک صاحب منصف اعلیٰ کے لخت جگر کو اپنے بچھائے ہوئے جال میں پھنسا سکتے ہیں تو فوجی تو بڑے سیدھے سادھے سے لوگ ہوتے ہیں اور پراپرٹی ڈیلنگ ان کا پسندیدہ مشغلہ ہوتا ہے ۔بازار مصر میں دولت پیغمبر خرید لیتی ہے تو پاکستانی منڈی میں چیف جسٹس کا بیٹا آخر خریدا کیوں نہیں جاسکتا۔ ملک ریاض کرپشن کے بادشاہ ہیں ان کے جادو کے آگے ہر کوئی بلی بن جاتا ہے۔ ملک صاحب کا اصل جرم یہ ہے کہ انہوں نے جناب زرداری سے بھی کاروبار کر لیا۔ہوسکتا ہے کہ جناب زرداری نے نگران وزیراعظم بنانے کا خواب دکھا کر اور جزوقتی اختیارات دے کر اربوں روپے کا چونا لگا دیا ہو۔ ملک صاحب کو دینے کے لئے جناب زرداری کے پاس کچھ نہ تھا انہوںنے تھپکی دی اور ملک صاحب نے عدالتی شیر کے منہ میں بازو دے دیا۔جناب زرداری مطمئن کہ ایک تیر سے دو شکار ہوگئے۔چیف جسٹس کو اپنے بیٹے کو کٹہرے میں کھڑا کرنا پڑا اور ملک ریاض ایسے پھنسے کہ اب وہ بحریہ ٹائون کے روح رواں کم اورہارے ہوئے جواری زیادہ  دکھائی دیتے ہیں۔گیم الٹ گئی۔ملک ریاض سلطانہ ڈاکو کا درجہ بھی نہ پاسکے اب وہ محض بے بسی کی صورت بنے دھکا دینے والے کو ترسائی نگاہوں سے دیکھتے ہیںسنا ہے کہ اب جناب زرداری ان کا فون تک نہیں سنتے۔ کہاں وہ دن تھے کہ ملک صاحب کے اشارہ ابرو پر حکومتی مشینری دوڑیں لگا دیتی تھی اور اب وہ اپنا وکیل ڈھونڈتے پھر رہے ہیں لیکن ان کی وکالت پر کوئی تیار نہیں۔چیف جسٹس نے اچھا کیا کہ اپنے بیٹے کے خلاف سوموٹو ایکشن لیا اور فیصلہ آنے تک اسے اور اپنے گھر سے نکال دیا۔امکان ہے کہ بحریہ ٹائون کے پلاٹوں کی گرتی قیمت کو روکنے کے لئے ملک ریاض کے بیٹے علی ریاض اپنے باپ کو بے دخل کردیں ۔ان کی اہلیہ ملک ریاض سے علیحدگی اختیار کرسکتی ہے۔کریمنالوجی کے طالبعلوں کا خیال ہے کہ ملک ریاض کو حفاظتی تحویل میں لے لینا چاہے۔کیونکہ جب لوٹ کھسوٹ اور قتل اغواء کے سینکڑوں کیس کھلیں گے اور ملک صاحب ایک ایک دن میں کئی کئی پیشیاں بھگتیں  گے اور جب ان کا سایہ بھی ان کا ساتھ چھوڑ دے گا تو وہ خدانخواستہ کہیں خودکشی نہ کر لیں۔ ایک جرنیل ایسا کرچکے ہیں اس لئے انہیں ایسے بدتر انجام سے بچایا جانا ضروری ہے اور جناب صدر پرانی دوستی نبھاتے ہوئے ملک صاحب کی مصروفیات کے لئے ایک ”کرپشن ڈویلپمنٹ اکیڈمی” کے قیام کا اعلان فرمادیں اور جناب ملک صاحب کو اس اکیڈمی کا سربراہ بنا دیں ملک صاحب اپنے منظور نظراینکرز کو ٹیچرز رکھ لیں تاکہ آنے والی نسلوں کو بتا سکیں کہ رشوت دینے کے صحیح انداز کیا ہوتے ہیں۔ بہرحال جو بھی فیصلہ ہو ملک صاحب کے لئے یہی نعرہ ہے کہ” رشوت کے رنگ ۔ملک صاحب کے سنگ!”

توانائی بحران کے حوالے سے اب کوئی دوسری رائے نہیں رہی۔ مشرف دور  کے آخری برسوں تک یہ سوچ جاری رہی کہ ملک میں بجلی اورگیس کی وافر مقدار موجود ہے اگر لائن لاسز اور چوری پر قابو پا لیا جائے تو کوئی وجہ نہیں کہ ہم توانائی کی ضرورتوں کو پہلے سے موجود ذرائع کے ذریعے پورا کرسکتے ہیں۔ لیکن آج چار برس مزید گذرنے کے بعد یہ خوش فہمی بھی دور ہوگئی ہے۔بجلی چوروں کو لگام دینے کی بجائے آج کل ان کے ناز اٹھائے جارہے ہیں۔کراچی میں کنڈا سسٹم کوئی ختم نہیں کراسکتا۔ جنوبی پنجاب  کے بعض حصوں میں بھی بجلی چوری کا رجحان تیزی سے پھیل رہا ہے۔ سندھ کے اکثر دیہی علاقوں میں سال میں ایک بار بجلی کا بل آتا ہے جو ہزار دو ہزار سے زیادہ نہیں ہوتا۔ بڑے بڑے سرکاری ادارے’وزیراعظم ہائوس ‘ ایوان صدر سب بجلی کے بلوں کے نادہندہ ہیں۔بجلی کے صارفین کا چالیس فیصد حصہ باقی ماندہ ساٹھ فیصد کا بھی بل ادا کرتا ہے۔

لائن لاسز کو بھی کنٹرول نہیں کیا جاسکا۔ 20فیصد تک بڑھ جانے والے لائن لاسز کو کس طرح قابو کیا جاسکتا۔ اس بارے آج تک کوئی قابل عمل حل پیش ہی نہیں کیا جاسکا۔لہٰذا اب یہ محض ایک خوش کن خیال رہ گیا ہے کہ ملک کے اندر بجلی کی پہلے سے موجود پیداواری صلاحیت کی بنیاد پر انرجی بحران پر قابو پایا جاسکتا ہے۔ جس شرح کے ساتھ آبادی میں اضافہ ہورہا ہے اس حساب سے سپلائی اور ڈیمانڈ کا فرق چار ہزار میگاواٹ سے بڑھ کر آٹھ ہزار ہوگیا ہے اور بہت ممکن ہے کہ آئندہ برس اس کو مزید ضرب لگے اور یہ فرق دس بارہ ہزار میگاواٹ کو چھولے ۔گیس کا عالم بھی نرالا ہے مرض بڑھتا گیا جوں جوں دوا کی۔ یوں تو حال ہی میںصوبہ پختونخواہ کے ایک سیاستدان نے خوشخبری دی ہے کہ صوبے کے اندر گیس کے نئے ذخائر دریافت ہوئے ہیں لیکن ذخائر کی پہلے بھی شائد کمی نہیں ہے۔ اصل مسئلہ  ان ذخائر سے فائدہ اٹھانا ہے۔ صوبہ خیبرپختونخواہ میں حکمران جماعت کی دور اندیشی کا ماتم کیا جانا چاہیے۔ محض ایک سیاسی نعرے اورضد کے سبب وہ کالا باغ ڈیم کو مردہ گھوڑا قرار دیتے ہیں۔ حالانکہ ملکی اور بین الاقوامی تحقیقی ادارے بار بار یہ باور کراچکے کہ اس ڈیم کی تعمیر سے معمولی نقصان کے بدلے خیبرپختونخواہ کو غیر معمولی نفع ہوسکتا ہے۔ لیکن میں نہ مانوں والی ضد ہے اور اٹھارہویں ترمیم میں صوبائی خودمختاری کے حوالے سے صوبوں کو اختیار دیا گیا ہے کہ وہ اپنے طور پر توانائی کے ذرائع پیدا کرسکتے ہیں۔ لیکن پنجاب حکومت جو لوڈشیڈنگ کیخلاف مینار پاکستان میں ٹینٹ کیبنٹ اجلاس کر رہی ہے’اس حکومت نے صوبے پنجاب میں بننے والے مجوزہ کالاباغ ڈیم کے لئے اس سال بجٹ میں صرف دس لاکھ روپے رکھے ہیں۔جب سنجیدگی کا یہ عالم ہو تو پھر  بجلی بحران پر کیونکر قابوپایا جاسکتا ہے!جہاں تک سندھ کے ضلع تھرپارکر میں پائے جانے والے کوئلے کے ذخائر کے حوالے سے جاری ہونے والے اعدادوشمار کا تعلق ہے تو ان میں ہوسکتا ہے مبالغہ آمیزی کا عنصر بھی شامل ہو۔لیکن حقیقت یہ ہے کہ اس ملک کے نامور سیاستدان ڈاکٹر ثمرمبارک اور ان کی ٹیم نے کوئلے کوزیر زمین جلانے اور اس سے گیس اور بجلی پیدا کرنے کا جو بیڑا اٹھایا تھا وہ اس میں تمام تر مالی صورتحال’دفتری رکاوٹوں اور حاسدوں کی پیدا کردہ مشکلات کے باوجود بڑی حد تک سرخرو ہوچکے ہیں اور دسمبر 2011ء میں ہی انہوں نے تھرکول  کے ایک بلاک میں انڈرگرائونڈ گیسی فیکیشن کا تجربہ کامیاب کر دکھایا تھا۔ یہ الگ بات ہے کہ آئل مافیا اور پرائیویٹ پاور ہائوسز نے ان کی اس کامیابی کو متنازعہ بنانے کی کوشش کی مگر ذرائع ابلاغ میں ان لوگوں کی ایسی دھلائی ہوئی کہ وہ وقتی طور پر دبک کر بیٹھ گئے ہیں۔تھرکول پراجیکٹ میں بہت بڑی رکاوٹ اس پراجیکٹ کی ملکیت بھی تھی۔ اب یہ طے ہوچکا ہے کہ یہ پراجیکٹ کلی طور پر سندھ حکومت کی ملکیت ہوگا اور وفاقی حکومت  اس کے لئے سرمایہ فراہم کرے گی۔سندھ کے بجٹ 2012-13ء میں اس پراجیکٹ کی ترقی اور تکمیل کے لئے ساڑھے تیرہ ارب روپے رکھے گئے ہیں اور حالیہ دورہ  چین کے دوران صدر آصف علی زرداری  اور ان کی ٹیم نے ایک چینی فرم کو پھر سے آمادہ کر لیا ہے کہ وہ تھرکول پراجیکٹ میں حصہ لے گی۔تھرکول پراجیکٹ میں پہلے ہی بہت دیرہوچکی ہے اور اس دیر کی سب سے بڑی وجہ سرمایہ کاری کا فقدان ہے ۔سرمایہ کاروں کا معاملہ یہ ہے کہ وہ اصل فیلڈ پر پہنچ ہی نہیں پاتے اور نہ وہ پائیلٹ پراجیکٹ کو دیکھ پاتے ہیں۔ انفراسٹرکچر نہ ہونے کے برابر ہے بلکہ سرے سے ہے ہی نہیں۔اب اگر سندھ حکومت ایک سال کے اندر اندر کراچی کے ساحل سے تھر تک بہتر سڑک تعمیر کر لیتی ہے پھر تھرکول فیلڈ تک سڑک نکالنا ایک کام ہے۔ اسی طرح واٹرکیریئر سسٹم ترتیب دینا ہے۔انفراسٹرکچر جس قدر جلد مکمل ہوگا اسی قدر پراجیکٹ میں سرمایہ کاروں کی دلچسپی بڑھے گی۔پاکستان کی توانائی کی  ضروریات اور خودانحصاری کی کنجی تھر کے صحرا میں مدفون ہے جسے مرکزی اور صوبائی حکومتیں نظرانداز کر رہی تھیں جو عوام کو بہتر مستقبل سے محروم کرنے کے مترادف ہے بھارت نے راجستھان سے کوئلہ نکالنا شروع کردیا ہے مگر پاکستان میں صرف کاغذی کارروائی کی جارہی ہے تھرکے کوئلے کے ذخائر قوم کے لئے زندگی اور موت کا مسئلہ ہے  جسے نظرانداز کرنے کا آپشن ہے ہی نہیں فنڈز کی کمی’ افسر شاہی کی سازشوں’ بین الاقوامی اداروں کی عدم دلچسپی سمیت تمام معاملات فوری طور پر حل کرنا ہوں گے۔ بیوروکریسی نے ورلڈ بینک کے لئے بنائی گئی توانائی کے ذرائع کی رپورٹ میں تھرکاذکرنہ کرکے قومی جرم کیا ہے۔پاکستان کے پڑوسی ممالک بھی ان ذخائر کو اپنی ضروریات پوری کرنے کے لئے استعمال کرسکتے ہیں جس کے لئے انہیں سرمایہ کاری کرنا ہوگی۔ ہمارے پاس سعودی عرب کے تیل کے ذخائر سے تقریباً تین گنا زیادہ توانائی موجود ہے جسے استعمال کرنا وقت کا تقاضہ ہے جو پاکستان کو آٹھ سو سال تک پچاس ہزار میگاواٹ بجلی فراہم کرسکتا ہے حکومت وقت ضائع کئے بغیر تمام کاغذی کارروائی مکمل کرے’ سارے علاقہ کا سروے کیا جائے’کوئلہ کی قیمت کا تعین کرے’ پانی ‘بجلی’سڑک’ ریلوے’ ایئرپورٹ فضلہ کو ٹھکانے لگانے اور مناسب سیکورٹی کا انتظام کرے تو کوئی وجہ نہیں کہ تین سال کے اندر لوڈشیڈنگ کے عذاب سے نجات مل جائے اور ہمارے سرمایہ کار بنگلہ دیش بھاگنے اور عوام سڑکوں پر ٹائر جلانے کی بجائے ملکی اور قومی ترقی میں پھر سے جت جائیں۔

یہ پہلی بار تو نہیں ہوا کہ افواج پاکستان پر ایسی آزمائش آئی ہو۔ دو ہزار پانچ کے زلزلے کے دوران ہمارے بہادر فوجیوں نے لازوال قربانی دی۔آفات ارضی وسماوی کے سامنے کون دم مار سکتا ہے۔ آپ فوجوں کی تاریخ پڑھیں’لاکھوں فوجی ہیضے سے مر گئے’ملیریا سے جتھے کے جھتے موت کی آغوش میں چلے گئے۔ آندھیاں آئیں اور توپ وتفننگ تک اڑا لے گئیں’ بگولے آئے’آتش فشاں پھٹے’ سونامی ٹکرائے’ فوجی غیر فوجی سب کچھ بہہ گیا۔پہاڑ سرکے اور قافلوں کے قافلے دب گئے۔آخر ایسی کونسی انوکھی بات ہوئی ‘کونسا مافوق الفطرت سانحہ اور حادثہ ہوا کہ  دفاع وطن کے بنیادی ذمہ داری سے ہی فرار کی راہ ڈھونڈی جارہی ہے۔

اگر سیاچین میں برفانی تودہ گرنے کا سانحہ رونما ہوا ہوتا تو پھر بھی سیاچین سے فوجیں واپس بلانے کا واویلا کیا جارہا ہوتا؟ کسی کو اس جانب ہوش ہی نہیں تھا’نہ سیاچین کا محاذ مہنگا ترین محاذ تھا’ نہ فوجیں واپس بلانے کی تجویزیں تھیں۔ سب نارمل تھا۔ جس کا مطلب یہ ہے کہ ہمارے قومی رہنمائوں کی بصیرت سیاچین کی جانب سے قطعاً غافل تھی۔ہم نہیں جانتے کہ لیزر شعاعوں کے ذریعے برفانی تودے کو فوجی قافلے پر گرایا گیا ہے۔ یا یہ آفت قدرتی طور پر آئی ہے۔ صورتحال جو بھی ہو مصیبت کی اس گھڑی میں ہر پاکستانی ان تمام  خاندانوں کے ساتھ اظہار ہمدردی کر رہا ہے جن کے افراد اس تودے تلے دبے ہیں ۔ صحرا یا سمندر میں کسی بحری یا ہوائی جہاز کا غرق ہوجانا یا کسی طیارے کا فضاء میں پھٹنا اور سب کچھ ہوا میں تحلیل ہوجانا۔ ایسے حادثات کا شکار ہونے والے زندگی میں واپس بمشکل ہی آتے ہیں۔پاکستانی قوم کو بھی صبر کے ساتھ یہ حقیقت قبول کر لینی چاہیے کہ سانحہ گیری سیکٹر کا شکار ہونے والے فوجی اور سویلین خالق حقیقی سے جاملے’ان کے بلندی درجات کے لئے دعا ہونی چاہیے اور موسموں کی تبدیلی کا انتظار کرنا چاہیے کہ کب فطرت مہربان ہو اور شہداء کی لاشیں اگل دے۔ مسلمانوں کو حکم ہے کہ بڑے سے بڑے نقصان پر ”اناللہ وان علیہ راجعون” پڑھ لیا کریں۔وہ تو ویسے بھی نہ صرف شہید ہیں اور زندہ ہیں بلکہ ان کے بارے میں قرآن میں ارشاد ہے”قِیلَ الَد’خل الجَنَة”اسلام آباد کی پہاڑیوں سے طیارہ ٹکرا گیا تھا۔ تمام لوگ جاں بحق ہوئے۔ کیا اس کے بعد طیارے اڑا نابند کرادیئے گئے ۔ زلزلہ کے بعد کیا یہ فیصلہ ہوگیا کہ اب فالٹ لائن ایریاز کے قریب فوج تعینات نہیں کی جائے گی۔ کیافوجی بحری جہازوں کے ڈوب جانے کے بعد بحریہ کو خشکی کی فوج میں بدل دیا جاتا ہے۔ ہمارے کتنے جواں پائیلٹ دوران تربیت ہر سال شہید ہوجاتے ہیں۔ کس قدر ان کی تعلیم وتربیت پر پیسہ خرچ آتا ہےِ۔ کتنا مہنگا ہے ایئرفورس کا شعبہ’کیا کریں بھارت کو خوش کرنے کے لئے اپنی ایئرفورس ختم کردیں۔دہشتگردی کی امریکی جنگ میں گیارہ ہزار فوجی جاں بحق ہوچکے۔ کتنی مہنگی جنگ ہے یہ ۔ کیا اس محاذ سے واپسی کا فیصلہ ہوگیا؟مسئلہ یکطرفہ یا دو طرفہ انخلاء کا نہیں ہے مسئلہ دفاع وطن کا ہے۔سیاچین پر گھاس نہیں اگتی لیکن پورے پاکستان میں جو کچھ اگتا ہے اس کے لئے پانی کے چشمے سیاچین سے ہی پھوٹتے ہیں۔دریائے سندھ اور دریائے جہلم کا ماخذ سیاچین کے گلیشئرز ہیں۔ آپ اپنی فوجیں سیاچین سے یکطرفہ بلائیں یا دو طرفہ اپنے پانیوں کی حفاظت کہاں سے کریں گے۔ امریکی ضمانتیں اور بین الاقوامی عدالتیں بھارت کو دریائے چناب اور جہلم پر اٹھارہ ڈیم بنانے سے نہیں روک سکے۔ آپ کے پاس کیا گارنٹی ہے کہ آپ کے پیچھے آجانے کے بعد بھارت کارگل کا ”بدلہ” چکانے کے لئے آپ کے ناردرن ایریاز آپ سے کاٹ کر رکھ دے۔شاہراہ قراقرم پر قبضہ کر لے اور آپ پھر بھاگ کر امریکی صدر کے آگے دست بستہ کھڑے ہوں اورآپ کی کمزوری پر عالمی طاقتیں قہقے لگا رہی ہوں۔خدا جانے میاں محمد نوازشریف  کو بھارت پر اس قدر اعتماد کیوں ہونے لگا ہے۔محض جنرل (ر) پرویز مشرف اور حکمران فوجی جرنیلوں کی مخالفت میں وہ پاکستان کے ازلی دشمن کی جھولی میں پکے ہوئے پھل کی طرح کیوںگر گئے ہیں۔خدا اس ملک کی حفاظت کرے! میاں محمد نوازشریف اگر واقعتاً چاہتے ہوں کہ پاکستان کو ”مہنگے ترین” محاذ کے اخراجات سے نجات ملے تو اس بات کا کوئی مناسب فورم ہوگا۔ دفاعی نوعیت اور حساس قومی امور پر یوں سرعام گلفشانی کرنے کا مقصد دشمن  کے موقف کو مضبوط بنانے کے مترادف ہے۔ ایک واجپائی کو لاہور بلا لیا اور آج تک یہی سمجھ رہے ہیں کہ بس جی بھارت رام ہوگیا۔ کیا سوچ رہے ہیں اور یہ کیسا انداز فکر ہے میاں صاحب کا؟مقبوضہ کشمیر میں سات لاکھ بھارتی فوج ہر روز نیا ظلم ڈھاتی ہے۔آپ بھارت سے مطالبہ کریں کہ کشمیر سے فوج واپس بلائے تو ہم بھی سیاچین سے دوطرفہ واپسی پر بات کریں گے۔ دفاع وطن کے لئے فوج پر اٹھنے والے اخراجات بہت کھٹکتے ہیں لیکن اپنے شاہانہ طرز زندگی اور بیرون ممالک پڑے کروڑوں ڈالرز کا جواز دے نہیں پاتے۔ خدارا محض شہ سرخیاں بنانے کے لئے وطن کے چہرے پر سیاہی مت ملیں۔اتنی بے چینی اچھی نہیں!

سپریم کورٹ کے انیس رکنی بینچ نے مسلم لیگ (ن) کے سربراہ جناب نوازشریف سمیت متعدد درخواست گذاروں کی طرف سے میمو سکینڈل کی انکوائری کے لئے دائر درخواستوں کی سماعت شروع کر رکھی ہے۔گوکہ سابق سفیر حسین حقانی نے عجلت میں استعفیٰ دے کر اس معاملے کو ٹھنڈا کرنے کی کوشش کی تھی اور حکومت نے قومی اسمبلی کی ایک کمیٹی کے ذریعے اس معاملے کی اپنے تئیں تحقیق کا بھی آغاز کر رکھا ہے لیکن اب یہ سکینڈل عدالتِ عظمیٰ کے سامنے ہے اور اس کیس کے دوران بڑے بڑے انکشافات ہونے والے ہیں۔

نیٹو کے حملے نے جہاں پاکستان کی خودمختاری اور امریکہ اور اتحادی فوجوں کے خبث باطن سے پردہ چاک کردیا ہے وہاں حکومت کی طرف سے پہلی بار قومی امنگوں کے مطابق مﺅقف اختیار کرنے پر جناب زرداری‘وزیراعظم اور ان کی ٹیم کیخلاف اٹھنے والے سیاسی طوفانوں کو وقتی طور پر روک بھی دیا ہے۔ لیکن قیاس کیا جاتا ہے کہ حکومت بہت دیر تک نیٹو حملہ سے ملنے والے وقتی ریلیف کو انجوائے نہیں کرپائے گی۔23دسمبر تک معاملہ رفع دفع ہوجائے گا اور اتحادی افواج کیساتھ حکومت پھر سے معمول کے تعلقات بحال کرے گی۔شمسی ایئربیس گیارہ تاریخ تک خالی ہوجائے گی۔ملکی سالمیت کی کوئی تحریری یقین دہانی بھی ہوجائے گی اور مسئلہ افغانستان یعنی کابل بعد از امریکہ کے حوالے سے بھی پاکستانی مﺅقف کو کسی حد تک پذیرائی مل جائے گی۔ابامہ بھی مشروط قسم کی ”سوری“ کرلیں گے۔ بہر حال یہ طے ہے کہ دسمبر کی سردیوں میں نیٹو حملہ کے حوالے سے”ناراضگی“ کی آگ بڑی حد تک ٹھنڈی ہوجائے گی۔البتہ میمو کا معاملہ ایسا ہے کہ یہ موسمی اثرات سے متاثر نہیں ہوگا۔جوں جوں سردی بڑھے گی اس معاملہ کو آگ لگے گی اور حکمران قبیلہ کو سخت دباﺅ کا شکار ہونا پڑے گا۔میاںمحمد نوازشریف نے خود سپریم کورٹ کے حضور حاضر ہو کر ایسا سیاسی چھکا مار دیا ہے جس پر عمران خان اور ان کی پارٹی انگشت بدنداں ہے۔ خان صاحب کا سارا زور اب کراچی میں پچیس دسمبر کو اپنے مجوزہ جلسہ کی تعداد بڑھانے پر ہے۔پچیس دسمبر تک حالات کیا رخ اختیار کریں گے اس کا اندازہ شائد کپتان اور ان کی ٹیم کو ہرگز نہیں ہوپارہا۔فرض کیا کہ عدالت اس کیس کی سماعت کے دوران نوازشریف کی درخواست پر صدر پاکستان‘ وزیراعظم پاکستان‘ڈی جی آئی ایس آئی اور حسین حقانی کو حاضر ہونے کا حکم دیتی ہے تو پھر احاطہ عدالت ہی نہیں کمرہ عدالت میں وہ معرکہ آرائیاں شروع ہوں گی کہ عمران خان صاحب کے جلسہ کی اہمیت ایک دن کی شہہ سرخیوں سے زیادہ نہیں رہے گی۔پیپلزپارٹی نے پیش بینی کرتے ہوئے ذوالفقار علی بھٹو کے کیس کے حوالے سے چیف جسٹس افتخار محمد چوہدری کو خط لکھا تھا۔ عدالت نے صدر کے اس خط کو بہت عزت بخشی اور اس کیس کی سماعت بھی شروع ہوگئی۔گویا ذرائع ابلاغ کا زیادہ وقت جگہ اور سکرین اب عدالت عظمیٰ میں ہونے والی جرح‘سوال‘جواب تبصروں اور تصویروں کیلئے ہی مختص ہوجائے گی اور تحریک انصاف جو لاہور میں بڑا شو کرنے کے بعد سستا رہی ہے اسے مزید سستانا پڑے گا۔چیف جسٹس کے ابتدائی ریمارکس کے مطابق میمو لکھنے کا جرم ”سول اور کریمنل“ دونوں نوعیت کا ہے۔اگر یہ ثابت ہوجاتا ہے کہ حسین حقانی نے واقعتاً وزیراعظم‘یا صدر کی ہدایت یا خواہش پر ایسا کوئی میمو ڈکٹیٹ کر لیا ہے‘لکھا ہے کہ یا لکھا ہوا بجھوایا ہے یا ایسے کسی میمو کے لکھے جانے کی درپردہ حمایت کی ہے تو پھر آئین میں ایسے جرم کا ارتکاب کرنے والوں کے لئے بڑی سخت سزائیںد رج ہیں۔بہت ممکن ہے اور مخالفین کی کوشش بھی یہی ہوگی کہ قصر صدارت کو اس قدر قاصر کردیا جائے کہ حکومت کے پاس قبل از وقت اقتدار کو خیرباد کہنے کے سوا کوئی چارہ نہ رہے۔ عدالت کے کسی متوقع فیصلے سے بچنے کا یہی طریقہ ہوگا۔ بہت ممکن ہے کہ عدالت میں ذوالفقار علی بھٹو کے ریفرنس کا فیصلہ پیپلزپارٹی کی امنگوں کے مطابق ہوجائے اور میمو کا فیصلہ ان کی امنگوں کے بالکل برعکس ہو۔عدالت کی جانبداری کا ماتم نہیں ہوسکے گا اور اپنی فوج کیخلاف امریکہ کو خط لکھنے کے جرم کے لیبل سے بچنے کیلئے جناب زرداری چپکے سے ایوان صدر سے نکلیں گے اور نوڈیرو ہاﺅس پہنچ جائیں گے۔میمو کے معاملے میں معافی کی کوئی صورت دکھائی نہیں دیتی۔ غداری کا مقدمہ یا اقتدار سے علیحدگی دونوں سزاﺅں میں سے کسی ایک سزا کا انتخاب کرنا پڑے گا!!

پچکے گال‘پھولے پیٹ‘ زرد آنکھیں۔حدنگاہ تک پھیلی افلاس زدہ بستیاں‘مٹھی بھر سوکھے چاولوں کیلئے قطاروں میں لگے ننگے‘پیلے اور کالے انسان۔ پوری دنیا ایتھوپیا کے بھوکوں کا پیٹ بھرنے کی دعویدار لیکن بھوک ہر روز پھیلتی جارہی ہے۔قحط الرجال بھی قحط سالی بھی۔آنکھوں میں سہانے سپنوں کی جگہ ڈراﺅنے خواب۔سال ہا سال گزر جاتے ہیں پیٹ بھر کر کھانے کو معدے ترس گئے۔ہجرتوں کے مارے حسرتوں کے ستائے یہ استخوانی ڈھانچے ایڑیاں رگڑتے‘روزجیتے اور روزمرتے ہیں۔ ان کی حالت بدلی ہے نہ بدلے گی کہ ان کے اندر تبدیلی کے ہر خواہش مار دی گئی ہے۔

ان کے کرپٹ رہبروں اور رہنماﺅں نے کرپشن کے سوا اس ملک کو کچھ دیا ہی نہیں ہے۔ خانہ جنگیاں اور خانہ بدوشیاں جب سیاسی ایجنڈا ٹھہریں تو پھر آسمان مہربان کیوں ہو؟رپورٹ چھپی ہے کہ عالمی ادارے نے خوشحالی کا جو تازہ انڈیکس تیار کیا ہے اس میں پاکستان کو ایتھوپیا بننے کیلئے صرف ایک نمبر نیچے گرنا ہے۔اس وقت غربت کے عالمی معیار کے مطابق ایتھوپیا غریب ترین ممالک میں چھٹے نمبر پر ہے اور پاکستان ساتویں نمبر پر۔ عالمی ادارے نے کوئی جھوٹ نہیں بولا‘مبالغہ آمیزی بھی دکھائی نہیں دیتی۔آج سندھ کی صورتحال دیکھ لیں۔ایک کروڑ کے لگ بھگ لوگ جو پہلے ہی غربت اور تنگدستی کی چکی میں پس رہے تھے‘سیلابی بارشوں نے ان کی رہی سہی سکت بھی ختم کردی ہے۔ سندھ کے سیاسی رہنماﺅں نے ایک ماہ تک اس علاقے کا رخ ہی نہیں کیا اور جب حکمرانوں کو احتجاجی آہ و بکا نے گہری نیند سے جگایا تو یہ لوگ اپنی بڑی بڑی اورمہنگی گاڑیوں میں بیٹھے‘ناک پر رومال رکھے دور سے ان تعفن زدہ بستیوں کو دیکھنے چلے گئے۔ سوائے اخباری بیانات اور رنگیں تصویروں کے ان امراءنے کچھ نہیں کیا۔کیا ممتاز بھٹو کی دولت میں کوئی کمی آئی‘کیا جناب آصف علی زرداری نے اپنے ملکی اور غیر ملکی خزانوں سے کوئی رقم دی‘کیا غنویٰ بھٹو نے خیرات نکالی؟ نہ پیر آف پگاڑا ‘نہ مخدوم امین فہیم‘کسی وڈیرے کسی مخدوم ‘کسی جتوئی نے نہیں کہا کہ ان کی ”رعایا“ بھوک سے مر رہی ہے‘ بیماریوں سے نڈھال ہورہی ہے‘ ان کو ایک وقت کا کھانا ہی دے دیں۔ حکومت نے غیر ملکی امداد کی اپیلوں پر زور رکھا‘مخالفین نے حکومت پر تنقید کرنے کو ہی مسئلے کا حل سمجھا۔نمائشی ٹرک پہنچتے رہے‘بھوکوں کے ریوڑ ان پر ٹوٹتے رہے‘پولیس لاٹھی چارج کرتی رہی‘یہ ”پاکستانی ایتھوپین “زخمی ہو کر گرتے رہے۔آج وہاں پچکے ہوئے گالوں والے‘زرد زردآنکھوں والے ہزاروں نہیں لاکھوں بچے‘عورتیں اور بوڑھے ‘دھیرے دھیرے موت کی طرف بڑھ رہے ہیں۔سندھ ایتھوپیا کی دوسری تصویر بن چکا ہے۔پنجاب خصوصاً جنوبی پنجاب‘بلوچستان‘ صوبہ خیبرپختونخواہ‘گلگت بلتستان۔ آپ کبھی اس پاکستا ن کی سیر کو نکلیں‘شہروں سے دور‘کاروںکوٹھیوں سے ذرا فاصلے پر جا کردیکھیں قدم قدم پر ایتھوپا نظر آئے گا‘دولت ہوگی‘بلکہ دولت کے انبار ہوں گے لیکن ایتھوپین سیاستدانوں کی طرح چند گھرانوں کے مقفل خانوں میں بند ہے۔کروڑوں انسان جنہیں دو وقت کی روٹی میسر نہیں وہ ایک لاکھ امراءکے رحم و کرم پرآگئے ہیں۔ امیران شہر کی ہوس کہ وہ غرباءکے منہ کا آخری نوالہ بھی چھین لینا چاہتے ہیں۔پاکستان کو ایتھوپیا بنانے کیلئے بڑے پاپڑ بیلے گئے ہیں۔ اس زرعی ملک کو بھوک سے مارنے کے لئے مسلسل منصوبہ بندی کی گئی ہے۔پاکستان کے کم و بیش ہر دولت مند گھرانے نے دولت یہاں سے کمائی اور جب خوب کما لی تو اسے بیرون ملک اپنے بینک اکاﺅنٹس میں جمع کرا دیا۔ سینیٹر محمد علی درانی کی ایک درخواست پر سپریم کورٹ ایک کیس کی سماعت کر رہی ہے۔اڑھائی تین سو ارب ڈالرز وہ دولت ہے جو بیرون ملک بھجوائی گئی ہے۔چیف جسٹس آف پاکستان کیا کرسکتے ہیں۔دولت مندوں کی حکمرانی ہے۔اگر دولت واپس لانے کا فیصلہ صادر بھی کردیا جائے تو اس دولت کو واپس کون لائے گا۔ سوئٹزرلینڈ کے بینکوں میں کرپشن کی دولت پڑی ہے وہ تو واپس نہیں آسکی‘”جائز“طریقے سے باہر رکھی گئی دولت واپس کیسے آئے گی۔پاکستانیوں کے حصے کی دولت چوری چھپے گزشتہ پچاس برسوں سے باہر بھجوائی جارہی ہے اور پاکستان میں غربت پھیلتی جارہی ہے۔ملک ایتھوپیا بن گیا ہے۔جب تک یہ دولت باہر ہے‘غربت یہاں رہے گی۔کاش کہ نظام بدلے اور امراءکے بیوی بچوں کو اس وقت تک جیلوں میں ڈال دیا جائے جب تک وہ دولت واپس نہیں لاتے۔ عوام التجا ہی کرسکتے ہیں۔امیرو رحم کھاﺅ۔میرے ملک کو ایتھوپیا نہ بناﺅ!!

مینارپاکستان کے سائے تلے نوجوانوں کے جم غفیر کی توہین کسی صورت نہیں ہونی چاہیے۔ جو سیاسی تجزیہ نگار اور پارٹی ترجمان اس تاریخی جلسے کی تعداد اور استعداد کو کم کرنے کی کوشش کر رہے ہیں وہ خلق خدا کی آواز کو سننا ہی نہیں چاہتے۔ یہ ٹھیک کہ کسی ایک جلسہ سے انقلاب برپا نہیں ہوتے اور نہ ہی یہ اس بات کی ضمانت ہے کہ آئندہ الیکشن میں تحریک انصاف ہر حال میں جیت جائے گی لیکن یہ تو تسلیم کیا جانا ضروری ہے

کہ برسوں سے جاری گلے سڑے سیاسی نظام کے خلاف ہماری نسل نو نے بغاوت کا بگل بجا دیا ہے۔ ہم جنہیں برگر فیملی کے ممبران کہہ کر اپنی پاکیزہ نظروں سے گرا رہے تھے عمران نے ان”لفنٹروں“ کی نگاہوں نگاہوں میں بہرحال تبدیلی کے خواب سجا دیئے ہیں۔ بدلا ہوا خان جوہری تبدیلیوں کا نقیب بن کر سامنے آگیا ہے۔ٹوئٹر‘فیس بک اور یو ٹیوب نے جس طرح عرب ممالک کے اندر سوشل نیٹ ورکنگ کو آسان بنا دیا تھا‘مینار پاکستان کے سائے تلے جمع ہونے والوں نے بھی اسی آسان راستے کا فائدہ اٹھایا ہے۔انہوں نے ممبر و محراب سے شائد صدائے حق نہ سنی ہو لیکن اپنے کمپیوٹر اور موبائل کے ذریعے تحریک کے اثرات جذب کئے ہیں ۔ پاکستان کے ایک کونے سے دوسرے کونے تک رنگ‘نسل‘ مسلک اور قبیلے سے بالاتر ہو کر لوگ خصوصاً وہ اٹھارہ سالہ نوجوان جنہوں نے ابھی ابھی ووٹر ہونے کا حق حاصل کیا ہے وہ عمران خان کے ساتھ کھڑے ہوگئے ہیں۔پہلے بھی کئی بار کہہ چکا ہوں کہ تبدیلی کا سب سے بڑا محرک نوجوان ہی ہوتے ہیں اور خوشی سے یہ اثاثہ عمران کے ہاتھ لگ چکا ہے۔ راقم نے اپنے ایک کالم میں ایک تعلیمی ادارے میںلیکچر کا حوالہ دے کر بتایا تھا کہ آج کا نوجوان موجودہ سیاسی قیادتوں سے کسقدر نالاں ہے اور وہ عمران کو ”مسیحا“ کا درجہ کیوں دیتے ہیں۔حیرت ہوتی ہے کہ مسلم لیگ (ن) نے سیاسی نابالغ پن کا مظاہرہ کرتے ہوئے خواہ مخواہ عمران کی توپوں کا رخ اپنی طرف موڑ لیا۔ پیپلزپارٹی عقل مند نکلی اور انہوں نے بڑے سلیقے کیساتھ عمران کی مقبولیت کو(ن) لیگ کیخلاف استعمال کر ڈالاہے۔ گو کہ اب صورتحال بدل گئی ہے اور (ن) لیگ والوں کو ہوش آگیا ہے کہ کل کلاں عمران خان کے ساتھ اتحاد بھی ہوسکتا ہے۔ توقع یہی ہے کہ (ن) لیگ اور عمران خان ایک دوسرے کیخلاف انتقامی کارروائیوں سے باز رہیں گے۔ایسے اشارے ہیں کہ بعض شرپسند عناصر قتل‘جلاﺅ اور توڑ پھوڑ کی ایسی وارداتیں کریں گے جن کا مقصد میاں برادران اور تحریک انصاف کے سربراہ کو آپس میں لڑا دینا ہو۔ تحریک انصاف کے رہنماﺅں کو اس صورتحال کا بغور جائزہ لیتے رہنا چاہیے۔ کیونکہ عمران اور نوازشریف انیس بیس کے فرق سے ایک ہی سیاسی بات کر رہے ہیں۔کرپشن کیخلاف‘ نئے پاکستان کی تعمیر‘غیرت مند اور خودمختار ملک۔یہ ساری باتیں مشترک ہیں۔جہاں تک ذاتی دولت اور اثاثوں کا تعلق ہے تو دونوں ماشاءاللہ طبقہ امراءسے تعلق رکھتے ہیں۔فرق صرف یہ کہ میاں صاحب کا کچھ سرمایہ شاید بیرون ملک ہو جبکہ عمران خان کے تمام اثاثے پاکستان کے اندر ہیں۔ البتہ عمران خان کے بچوں کو اگرننھال کی طرف سے حصہ یا تحفہ ملتا ہے تو وہ ایک الگ معاملہ ہوگا۔عمران خان کا جلسہ سیاسی مخالفین کی نیندیں حرام کئے رکھے گا۔ چاہے بڑی سیاسی پارٹیاں اس سے بڑا شو بھی کر لیں لیکن یہ حقیقت ہے کہ عمران خان تیسرے آپشن کے طور پر میدان میں رہیںگے۔ میرا ذاتی تجزیہ ہے کہ اگر عمران خان نے اپنی ذات کو فیصلوں پر نہ ٹھونسا اور فیصلے اپنی پارٹی کے سینئر ارکان پر چھوڑے تو فیلڈ میں قدرے بہتر لوگ اتارے جاسکیں گے۔پاکستان میں قحط الرجال ہے۔عمران خان کو بھٹوثانی قرارنہیں دیا جاسکتا۔عمران بھٹو سے کہیں زیادہ مشکل حالات میں قسمت آزمائی کرنا چاہتا ہے۔ یہ ردعمل کا مرحلہ نہیں ہے بلکہ آگے بڑھ کر ایک نیا اور قابل عمل لائحہ عمل مرتب کرنے کا چیلنج ہے۔دلوں کو کچھ وقت کیلئے گرمایا جاسکتا ہے لیکن ذہنوں کو تادیر کسی تصور کیساتھ ہم آہنگ رکھنامشکل ترین عمل ہے۔عمران خان کے حامیوں سے گذارش کرنی ہے کہ وہ اپنے جلسہ کی دھاک کو اپنے لئے انعام سمجھیں نہ کہ اسے اپنی طاقت سمجھ کر کسی منفی سوچ میں مبتلا ہوجائیں۔ ابھی سفر طویل ہے۔ ابھی منزل کی طرف رخ ہوا ہے۔ تبدیلی کی خواہش کو کسی تحریری نعرے‘ کسی منشور کی شکل میں لانا ضروری ہے ورنہ جلسہ کی کامیابیاں تحلیل ہونے میںتھوڑا سا وقت لگتا ہے۔