خدا خدا کر کے ڈی جی آئی ایس آئی کی تعیناتی کا نوٹیفیکیشن جاری ہوا اور 20 نومبر کو یہ عمل اب تکمیل کو پہنچ جائے گا۔اس غیر ضروری تاخیر کی ضرورت ہی نہیں تھی۔عسکری اور سول حلقے متفق ہیں کہ ہمیں کم از کم عسکری ڈسپلن کیساتھ چھیڑ چھاڑ نہیں کرنا چاہیے۔یہ کوئی پنجاب پولیس نہیں کہ اپنی من مانی سے جسے چاہیں ہٹا دیں اور جسے چاہیں لگا دیں۔یہ کمانڈ اینڈ کنٹرول کا نازک معاملہ ہے۔اہم اور کلیدی تعیناتیوں کو طے شدہ میرٹ پر سرانجام دیا جاتا ہے۔یہی ڈسپلن کی خوبصورتی ہے۔ اسی لیے پاک فوج دنیا کی منظم ترین افواج میں شمار یوتی ہے ۔

یہاں آرمی چیف کیلئے جو نام بھجوائے جاتے ہیں وہ بھی سخت میرٹ پر کسے ہوئے ہوتے ہیں۔ لیکن افسوس کہ سیاستدان آرمی چیف جیسے غیر متنازع منصب کو بھی اپنی سیاسی خواہشوں اور وقتی فائدوں کی بھینٹ چڑھاتے ہیں اور اکثر اوقات اپنے ہی لگائے یوئے سپہ سالار کو اپنا مخالف سمجھنے لگتے ہیں۔سیاستدان بھول جاتے ہیں کہ جرنیل بھی اسی دھرتی کے بیٹے ہیں ۔وہ بھی سچے پاکستانی ہیں اور بگڑتے ملکی معاملات کے حوالے سے ان کا بھی دل کڑھتا ہے۔فوج کو سیاست میں حصہ لینے کا کوئی حق نہیں لیکن پاکستانی ہونے کے ناتے پاکستانی امور کے بارے سوچنے،بات کرنے کا حق کوئی کسی پاکستانی سے چھین نہیں سکتا۔ یہ دو قومی نظریے کی بنیاد پر قائم ہونے والا ایک نظریاتی ملک ہے۔اس کے ساتھ رشتہ ایمان کا رشتہ ہے۔
تدبیر کی غلطی اگر سیاستدان کر سکتا ہے تو عسکری قیادت بھی خطا سے مبرا نہیں۔لیکن جہاں تک اداراتی نظم و ضبط کا تعلق ہے وہ ہمیشہ برقرار رہتا ہے۔آرمی چیف ہی بہتر جانتا ہے کہ کس جرنیل کو کونسی ذمہ داری دینی ہے۔لیکن اگر آئی ایس آئی کے سربراہ کیلئے وزیراعظم نے انٹرویو کرنے ہیں تو پھر عسکری لوگ لامحالہ وزیراعظم ہاؤس کیطرف دیکھا کریں گے۔انہیں اداراتی ڈسپلن کا پابند ہونا خواہ مخواہ کا بوجھ محسوس ہونے لگے گا۔ایسی بے معنی سیاسی مداخلت ہمیں تباہی کیطرف لے جائے گی۔پرائم ایجینسی کسی ملک کی پہلی دفاعی لائن ہوتی ہے۔اس لائن کو کسی حوالے سے بھی اپنی وفاداریاں کسی پارٹی یا شخصیت سے وابستہ نہیں کرنی چاہیں۔پہلے ہی ایک سیاسی پارٹی اس حوالے سے ناخوشگوار رد عمل کا کھلے عام اظہار کر رہی ہے۔کیا وزیراعظم کے طرز عمل سے ہمارا یہ اہم ترین ادارہ سیاسی کشمکش کا مستقل شکار نہیں ہوجائے گا۔
آئی ایس آئی کے سربراہ کی تعیناتی کا نوٹیفیکیشن ہم سب نے پڑھا اور بطور پاکستانی اسے پڑھ کر میرا سر شرم سے جھکا ہوا ہے۔آخر طے شدہ اصولوں اور روشن روایات سے ہٹ کر اس تمام ایکسرسائز کا فائدہ کیا ہوا؟ تعیناتی کرنے کے بعد ایک ماہ تک چارج نہ لینے کا مقصد کیا تھا؟ ایک غیر یقینی کی کیفیت۔ ایسی کیفیت میں خدا نخواستہ کسی وقت جنگ شروع ہو جائے تو فیصلے کرنے میں کتنی الجھنیں حائل ہو سکتی ہیں۔میں نے کچھ عرصہ ایک عسکری ڈسپلن میں گزارا ہے۔میں وزیراعظم کے اس فیصلے سے عسکری حلقوں میں پیدا ہونے والی تشویش کو سمجھ سکتا ہوں۔سمری میں بتایا گیا ہے کہ تجویز کئے گئے جرنیلوں سے وزیراعظم نے انٹرویو بھی کئے ۔کیا اس سے وزیراعظم آفس کے طاقتور ہونے کا تاثر قائم ہوگیا ہے؟
ایسا کچھ بھی نہیں ہوا۔ ریاستی اداروں کو کمزور کر کے حکومتیں کمزور ہوتی ہیں،مضبوط کبھی نہیں ہوتیں۔الٹا حکومت اور فوج کے ایک صفحہ پر ہونے کا تاثر بھی ختم ہوگیا۔اگر غیر جانبدار ہو کر ڈی جی آئی ایس آئی کی تعیناتی کے حوالے سے وزیراعظم کے فیصلے کا جائزہ لیا جائے تو صرف ایک نتیجہ نکلتا ہے۔شخصی انا۔تکبر۔انانیت۔
اللہ پاک ہمیں اس بیماری سے بچائے۔یہ تباہی کا طرز عمل ہے۔قران نے تکبر کو تباہی کا راستہ قرار دیا ہے اسوہ ء رسول ہمیں انانیت پسندی اور کبر سے دور رہنے کی راہ دکھاتا ہے۔”میں میں” کی تکرار قومی معاملات میں زہر قاتل ثابت ہوتی ہے۔سرائیکی کی کہاوت ہے،
“زیر بن زبر نہ بن،کتھے پیش نہ پئے جاوی”
حکمران حدیث مبارکہ کو یاد رکھیں،
رسول اللہ(ص) نے فرمایا, “کوئی انسان جس کے دل میں رائی کے دانے کے برابر ایمان ہے آگ میں داخل نہ ہو گا اور کوئی انسان جس کے دل میں رائی کے دانے کے برابر تکبر ہے جنت میں داخل نہ ہو گا “(صحیح مسلم)

آنکھوں کے سرطان سے صحت مند ہونے والے بچے خوش نصیب کہ انہیں چیک اپ اور سرجری کی مفت سہولت ملی لیکن کیموتھراپی اور ریڈی ایشن وغیرہ دیگر ہسپتالوں سے پیسے دے کر کرانا پڑے۔شائد گھر کی ہر خوشی بچے پر قربان کر دی ہو۔سرجری کے بعد بھی مسلسل چیک اپ کیلئے مہنگے ترین ٹیسٹ کراتے رہنا ہونگے۔اتنے پیسے غریب والدین کہاں سے لاتے ہونگے ؟
میں گزشتہ بائیس برس سے متبادل ادویہ اور ہومیوپیتھی طریقہ علاج کے ذریعے اب تک ہزاروں لوگوں کا مفت علاج کر چکا ہوں۔اپنے گھر کا ایک پورشن میں نے فری کیمپ کیلئے وقف کر رکھا ہے۔ کلینک بھی یہیں کرتا ہوں۔مجھے علم ہے کہ کتنے سفید پوش لوگ بھی ہومیوپیتھی کی قدرے سستی ادویات کے پیسے بھی نہیں دے سکتے۔ کینسر کے ٹیسٹوں پر تو بھاری رقم لگتی ہے۔
الشفاء ٹرسٹ کی بڑی ہمت ہے کہ یہاں گزشتہ تیس برس سے 70فیصد سے زائد مریضوں کا مفت علاج ہوتا ہے اور فری اور آن پیمنٹ مریضوں کے علاج میں کوئی فرق روا نہیں رکھا جاتا۔
میں سوچ رہا تھا کہ اگر آنکھوں کے سرطان والے بچوں کی فری سرجری کیساتھ ایم آر آئی،کیمو اور ریڈی ایشن وغیرہ کی مفت سہولت بھی الشفاء ٹرسٹ ہی مہیا کردے تو کتنی آنکھیں اور زندگیاں بچ جائیں گی۔
بچپن میں آئی کینسر کی آگاہی کے حوالے سے الشفاء ٹرسٹ آئی ہسپتال راولپنڈی میں نئے تعمیر شدہ ایشیا کے سب سے بڑے چلڈرن آئی ہسپتال کے وسیع اور جدید طرز کے آڈیٹوریم میں 29ستمبر کو ایک سیمینار منعقد کیا گیا۔سیمینار میں الشفاء کے ڈاکٹروں،اسٹاف ممبران اور سٹوڈنٹس کے علاوہ پروفیشنلز، پالیسی سازوں، پبلک ہیلتھ ماہرین، وزارت صحت اور عالمی ادارہ صحت کے عہدیداروں نے بھی شرکت کی۔
مجھے بھی شرکت کی دعوت دی گئی تھی۔ٹرسٹ کے چیف ایگزیکٹو اور انتہائی انسان دوست شخصیت بریگیڈیئر رضوان اصغر سے پرانی یاد اللہ ہے۔میرے گھر واقع گلستان کالونی میں ایک بار فری آئی کیمپ بھی لگ چکا ہے اور ہر تین ماہ بعد بڑا آئی کیمپ لگانے کا پروگرام طے پا چکا ہے۔بریگیڈئیر صاحب میرے ساتھ والی نشست پر تشریف فرما تھے اور دھیمی آواز میں سیمینار کے مقاصد بھی بتا رہے تھے۔
“کاش کہ پاکستان کے گھر گھر یہ پیغام پہنچ جائے کہ آنکھ میں کینسر کی علاماتِ کیا ہوتی ہیں اور یہ بھی آگہی پھیل جائے کہ اس کینسر کا علاج الشفاء آئی ہسپتال میں ہورہا ہے اور کاش کہ غریب مریضوں کو کینسر کے ٹیسٹوں کیلئے دیگر جگہوں پر دھکے نہ کھانے پڑیں۔”
میں یہی سوچ رہا تھا کہ ٹرسٹ کے صدر میجر جنرل رحمت خان روسٹم پر تشریف لائے۔جنرل صاحب ملنسار،شفیق اور مخیر شخص ہیں۔ان کا انداز مقرر والا نہیں۔لیکن وہ ٹھہرے ہوئے انداز میں بات کرتے اور مخاطب کے دل پر دستک دیتے ہیں۔کہنے لگے،
“دیکھئے آپ لوگ اس لحاظ سے خاص مہمان ہیں کہ اس جدید طرز پر بنائے گئے آڈیٹوریم میں بیٹھنے والے آپ ہی پہلے سامعین ہیں۔بچوں میں آئی کینسر کی تشخیص سے لیکر علاج تک پیچیدہ اور حساس معاملہ ہے۔بعض مریضوں اور لواحقین کی حالت دیکھی نہیں جاسکتی۔یہاں ہر روز ایسی کہانیاں ہیں کہ مفت علاج تو ہوگیا لیکن واپس جانے کا کرایہ نہیں ہوتا۔اللہ جزا دے ان لوگوں کو جو عطیات دیتے ہیں اور ہم ضرورت مند مریضوں کی خدمت کرنے میں مصروف ہیں۔
کینسر زدہ بچوں کے حوالے سے ہم نے فیصلہ کیا ہے کہ مستحق مریضوں کو اب ایک ہی چھت کے نیچے ہر سہولت ملے گی۔یہیں کیمو تھراپی ہو گی،ریڈی ایشن کا سسٹم ہو گا،سائیکو ٹریٹمنٹ ہوگا۔اس کیلئے بورڈ نے ایک مکمل آئی کینسر سنٹر قائم کرنے کی منظوری دے دی ہے۔
`ڈاکٹر طیب افغانی کی نگرانی میں یہ سنٹر کام کریگا ۔جب تک ہم ضروری مشینری خرید کر انسٹال نہیں کرتے، کیمو تھراپی وغیرہ کی سہولت باہر سے حاصل کریں گے۔غریب مریضوں کے اخراجات ٹرسٹ اٹھائے گا۔ٹیسٹ اور تھراپی کیلئے کہاں جانا ہے یہ بھی الشفاء بندوبست کریگا۔کسی کو ناامید واپس نہیں بھیجیں گے۔فی الحال کیموتھراپی کے اخراجات میں اور میرے ایک دوست برداشت کریں گے۔پہلے ہمارے پاس آئی کینسر کلینک ہے اب ایک باقاعدہ سنٹر بن جائے گا اور یہ پاکستان میں آئی کینسر کے علاج کا پہلا مکمل ادارہ ہوگا”
ہال تالیوں سے گونج اٹھا ،میرے دل سے الشفاء،اس کے سربراہ اور ٹیم کے لیے دعا نکلی۔ تھینک یو الشفاء !

راقم نے آئی جی سندھ کے اغواء کے حوالے سے چند روز قبل “سندھ پولیس کو سیلوٹ”کے عنوان سے کالم لکھا تھا جسے آئی جی مشتاق مہر صاحب نے پڑھا اور شکریہ کا پیغام بھی بھیجا۔میرا خیال ہے کہ پولیس کلچر میں یہ ایک انوکھا واقعہ تھا کہ اپنے سربراہ کی عزت کی خاطر اور پولیس کے مورال کو بلند رکھنے کیلئے افسران نے احتجاجا رخصت پر جانے کا فیصلہ کیا۔ہمارے ہاں پولیس کے بارے میں عمومی تصور یہ ہے کہ چھوٹے افسروں اور سپاہیوں کی حوصلہ شکنی ہوتی ہے وہ اگر کوئی کارنامہ سر انجام دے بھی دیں تو مقامی ایس ایچ او کریڈٹ اپنے نام کرتا ہے۔اور انعام وغیرہ کے معاملے میں اعلی افسران ہی حقدار ٹھہرائے جاتے ہیں۔حال ہی میں ہم ایسا منظر پنجاب میں دیکھ چکے ہیں۔

سانحہ موٹر وے لاہور میں مجرم کی گرفتاری پر رکھا گیا انعام اعلی پولیس افسران میں تنازعہ کا سبب بنا رہا۔لیکن سندھ پولیس نے اپنے ڈیپارٹمنٹ کے حوالے سے منفی تائثر کو نہ صرف زائل کیا بلکہ انتہائی شاندار مثال قائم کی۔اے ایس آئی محمد بخش نے کسی انعام کے لالچ میں مظلوم ماں کی مدد نہیں کی تھی،نہ ہی اس جونئیر پولیس افسر کی بیٹی نے کسی شہرت کی وجہ سے خود کو خطرے میں ڈالا تھا۔اس متوسط طبقہ کے گھرانے نے جب بدنصیب عورت کی داستان سنی تو خالص انسانی ہمدردی کے جذبے سے سرشار ہوکر سماج کے ظالم درندوں کو پکڑنے اور مظلوم ماں کی معصوم بیٹی کو بازیاب کرانے کا منصوبہ بنایا۔محمد بخش نے ساری کہانی بیان کی۔اس نے بتایا کہ اس کی بہادر بیٹی نے گرفتاری کا ذریعہ بننے کیلئے خود کو جب رضاکارانہ طور پر پیش کیا تو شفقت پدری آڑے آئی اور وہ آبدیدہ ہوگیا۔پھر بیٹی نے تسلی دی”ابا مجھ پر بھروسہ رکھو،میں اسے گریبان سے پکڑ لوں گی،آپ پستول گھر میں رکھ دیں،آپ جذباتی ہو کر خون کردیں گے اور ہم مصیبت میں پڑ جائیں گے”یہ کوئی آسان مرحلہ نہ تھا۔مجرم کچھ بھی کرسکتا تھا۔لیکن جونہی اس درندے نے نقاب ہٹانے کو کہا،بہادر بیٹی نے لپک کر اسے گریبان سے پکڑ لیا،اتنی دیر میں گھات میں کھڑے اے ایس آئی اور سفید کپڑوں میں ملبوس دیگر پولیس اہلکاروں نے اس درندے کو دبوچ لیا۔پھر جسطرح مظلوم عورت کی زخمی اور بیہوش بیٹی پانچ سالہ علیشا کو عقوبت خانے سے تلاش کیا گیا سب ایک ڈرامائی منظر لگتا ہے۔لیکن سندھ کے شہر کشمور میں پیش آنے والا یہ ایک حقیقی واقعہ ہے۔محمد بخش کی جرآت اور فرض شناسی کا جب چرچہ ہوا اور مایوسیوں کے مارے سماج کو امید اور یقین سے مزین ایک خبر سننے کو ملی تو ہر طرف سے دادو تحسین وصول ہو نا شروع ہوئی۔وزیر اعظم پاکستان نے اے ایس آئی محمد بخش سے فون پر بات کی،سندھ کے اس پولیس افسر کو قومی ہیرو قرار دیا۔محمد بخش نے بتایا،”میرے ایس ایچ او نے سب سے پہلے مجھے شاباش دی،ساتھیوں نے مجھے تھپکیاں دیں اورسندھ حکومت نے دس لاکھ روپے نقد انعام کا اعلان کیا اوربہادر بیٹی کے تعلیمی اخراجات اٹھانے کا اعلان کیا”لیکن آئی جی مشتاق مہر نے اپنے قابل فخر افسر پر کمال شفقت فرمائی۔سنٹرل پولیس آفس کراچی میں محمد بخش اور اس کی فیملی کا پرتپاک استقبال کیا۔اس عظیم باپ،بیٹی اور بیوی کو شاہی بگھی پر بٹھایا گیا،پھولوں کی پتیاں نچھاور کی گئیں، مہمان خصوصی محمد بخش کو مالائیں پہنائی گئیں۔پولیس بینڈ نے سلامی دی اور استقبالی چبوترے پر آئی جی نے اس چھوٹے سے او رغریب سے اے ایس ائی کو گلے لگایا۔ پولیس ڈیپارٹمنٹ کیطرف سے بیس لاکھ روپے کا اعلان کیا۔اور ستارہ شجاعت دینے کی سفارش کی جبکہ بیٹی کیلئے ستارہ امتیاز کی سفارش کی۔سندھ پولیس نے دوسری بار اعلی کردار کی مثال پیش کی۔پہلے اپنے آئی جی کیلئے اتحاد اور یکجہتی کا مظاہرہ کیا اور اب اپنے ایک اے ایس آئی کی حوصلہ افزائی کیلئے دل فرش راہ کردیا۔پولیس کے بارے میں منفی رویوں کو تبدیل کرنے کا بہترین موقع فراہم کیا ہے۔ہمیں نیکی کے کاموں میں تعاون کرنے کا حکم ملاہے۔اسی حکم کو بجا لاتے ہوئے اپنے دل سے،سندھ پولیس کو ایک اور سیلوٹ پیش کرتا ہوں۔

انسان کے چار وجود ہیںیعنی حیوانی ، عقلی، روحانی اور اخلاقی وجود۔ان کا تذکیہ ہی ہماری اصل کامیابی ہے۔ اخلاقی وجودسے ہی کاروباری اخلاقیات تشکیل پاتی ہیں۔قرآن پاک میں ایسی بیشمار آیات ہیں جن میںاخلاقی قدروں پر عمل نہ کرے والوں کو تنبیہ کی گئی ہے۔ایک جگہ ارشاد ہوتا ہے کہ تم ناپ تول کر لیتے وقت پورا لیتے ہو اور دیتے وقت کم تولتے ہو۔کیا تم روز آخرت پر یقین نہیں رکھتے۔اس عظیم دن پر کہ جس دن لوگ رب العلمین کے سامنے کھڑے ہوں گے ۔انشورنس میں بھی ہم ایک وعدہ بیچتے ہیں اور کلیم ہمارا پروڈکٹ ہوتا ہے اگر ہم اپنا کیا ہوا وعدہ پورا نہیں کرتے تو دراصل ہم بھی کم تولنے والوں میں شمار ہونگے۔دنیا کا کوئی کاروبار بھی ایمانداری کے بغیر نہیں چل سکتا۔جہاں ایمانداری نہیں ہوتی وہاں اعتماد نہیں ہوتا اور جہاں اعتماد نہیں ہوتا وہاں کاروباری لین دین نہیں ہوسکتا۔دھوکہ دہی سے وقتی فائدہ اٹھایا جا سکتا ہے لیکن تادیر نقصان مقدر بن جاتا ہے۔انشورنس سیکٹر کی ساری عمارت ہی اعتماد اور اعتبار کی اینٹوں سے جڑی ہے۔

آپ لمحہ بھر کیلئے سوچیے کہ کہ انشورنس کے بانی اداروں اور کمپنیوں کو اپنا اعتماد جمانے کیلئے کتنی مشکلات آئی ہونگی،کتنے خسارے برداشت کرنے پڑے ہونگے اور کتنی بار اپنی پراڈکٹس اور سروسز کو اپ ڈیٹ کرنا پڑا ہوگا۔میں یہاں کاروباری ایمانداری کی بات کررہا ہوں۔جھوٹ سے اجتناب۔جھوٹ کاروباری اعتماد کا سب سے بڑا قاتل ہے۔ڈائریکٹر سے لیکر کارکن تک اور مالک سے لیکر پروڈیوسر تک سب کوایک دوسرے کیساتھ سچ بولنا چاہیے۔آپس میں بھی سچ بولنا ٹیم میں باہمی اعتماد کو فروغ دیتا ہے۔آپ کلائنٹس سے کیا شرائط طے کر رہے ہیں،کیا پیشکش کی ہے،کلائنٹس کا حقیقی اسٹیٹس کیا ہے؟ڈیل کی جزیات کیا طے کی ہیں،یہ سچ سچ بتایا جانا ضروری ہے۔کم ازکم آپ اور کلائنٹس کے درمیان ہونے والی ڈیل کا متعلقہ باس کو علم ہونا چاہیے۔تاکہ کمپنی کو خسارے کا کم سے کم احتمال ہو۔اسی طرح مالک یا ڈائریکٹرز کو چاہیے کہ وہ ہر ڈیل کو اپنی ذاتی ڈیل سمجھیں اور کسی نقصان کی صورت میں سارا ملبہ کسی ایک آفیسر پر مت ڈالیں۔ ہمارے ہاں دو بڑے مسائل ہیں جن کے سبب اعتماد کی فضا کو دھچکا لگتا ہے اور کاروبار پھلتا پھولتا نہیں۔ایک معاملہ یہ کہ جونہی کوئی ڈیل فائنل ہونے کے قریب ہوتی ہے،کوئی دوسرا ایجنٹ کم ریٹس پر اس ڈیل کو اچک لیتا ہے۔بعض اوقات توافسران خود ایسی حوصلہ شکن کارروائیوں میں شریک ہوجاتے ہیں۔ایسے ماحول میں ایک طرف محنتی کارکنوں کے دل ٹوٹ جاتے ہیں اور وہ بھی منفی سوچ پر چل پڑتے ہیںتو دوسری طرف ریٹ کم کر دینے سے ادراے کا پریمئیم کم ہو جاتا اور انڈسٹری بدنام ہو تی ہیں اور بزنس ٹارگٹس ادھورے رہ جاتے ہیں۔بلکہ کمپنی کا خسارہ بھی بڑھ جاتا ہے۔دوسرا بڑا مسئلہ کلیم کلیرنس اور پیمنٹ کا ہے۔ہمیں ذہن میں رکھنا چاہیے کہ انشورنس بزنس کوئی کیش اینڈ کیری سٹور نہیں بلکہ ہائی رسک بیسڈ اور ہائیلی ان پریڈکٹ ایبل کاروبار ہے۔ہم رسک ریڈکشن کی تمام پیش بندیوں کے بعد بھی یقین سے نہیں کہہ سکتے کہ اب اس ڈیل کے نتیجے میں کوئی کلیم نہیں آئے گا۔کلیم تو دینا ہی ہوتا ہے لیکن بعض انشورنس کمپنیاں پالیسی کے طور پر کلائنٹس کو تنگ کرتی ہیں۔افسران کی کوشش ہوتی ہے کہ کلیم کو اتنا لٹکا کہ کلائنٹس مایوس ہوکر اپنی رقم کو بھول جائیںبعض سرویرز بھی اس میں اپنا کردار ادا کرتے ہے۔ملکی قوانین کے باوجود ایسے اعتماد شکن اقدامات متواتر ہو تے ہیں جس کے سبب پاکستان میں انشورنس کے بزنس کے بارے میں عمومی رائے یہ ہے کہ یہاں سب فراڈ ہوتا ہے جو کہ سچ نہیں۔اس پرسیپشن کی بنیاد پر ہی یہ سیکٹر پھل پھول نہیں سکا۔ورنہ پاکستان جیسے ترقی پزیر ملک میں انشورنس بزنس پھیلنے کا وسیع پوٹینشل موجود ہے۔ انشورنس سیکٹر پاکستان کا حصہ نہ ہونے کے برابر ہے۔جہاں بنکوں کا دبا آتا ہے یا کوئی قانونی ضرورت ہوتی ہے وہاں تو لوگ انشورنس کرواتے ہیں ورنہ ان کے گھر تباہ ہوجاتے ہیں ،گاڑیاں تباہ ہو جاتی ہیں لیکن وہ انشورنس کیطرف نہیں آتے۔اس کی وجہ آگہی میں کمی ہے۔ہم ایف پی سی سی آئی کی سٹنڈنگ کمیٹی کے پلیٹ فارم سے ایک پبلک اوئیر نیس کمپین بھی چلانا چاہتے ہیں۔ہمارہ ماننا ہے کہ رسک کور سب کیلئے اور بیمہ ایمانداری کے ساتھ۔”میرے ان ابتدائی کلمات کے بعد سیمینار کے باقی مقررین نے بھی اپنے اپنے انداز میں فئرنس پریکٹسز پر روشنی ڈالی۔خاص طور پر شکریہ کے مستحق جناب ڈاکٹر محمد خاور جمیل جو فیڈرل انشورنس محتسب کے اہم ترین منصب پر فائز ہیں۔ڈاکٹر صاحب فیڈرل سیکرٹری رہے،انہوں نے 36 برس تک وفاقی اور صوبائی سطح پر خدمات سر انجام دیں ہیں۔میں ان کا بے حد شکر گزار ہوں۔ ہمارے چیف گیسٹ تھے اور اہم ترین مقرر بھی۔جناب شازیب علی ہمارے مہمان اعزازتھے۔وہ ایس ای سی پی کے کمشنر ہیں اور انہوں نے مذکورہ موضوع پر انتہائی قیمتی آرآء سے نوازا۔جناب شبیر اے گلامالی آئی اے پی کے چئیرمن بھی ہمارے مہمان خاص تھے۔جناب مبشر نعیم صدیقی فیڈرل محتسب انشورنس سیکریٹریٹ کے ڈائریکٹر جنرل ہیں،خاص طور پر حصہ لے رہے تھے۔میاں زاہد حسین معروف شخصیت ہیں۔ سابق صوبائی وزیر ہیں اور وائس چیئرمین ہیں بزنس پینل ایف پی سی سی آئی کے۔ہمارے سرپرست ہیں۔UTSکے مخدوم تاشیریوسف۔الفلاح انشورنس کے CEOجناب عبدالحی مغل اور IAPکے ریجنل ہیڈ محمد ہشام بھی موجودہیں ۔ہمارے سیمینار کے موڈریٹر جناب طارق حسین ایس ای سی پی کے سابق ڈائریکٹر ہیں۔ان کا وسیع تجربہ ہے۔سیمینار کے اختتام پر میں نے سب احباب کا شکریہ ادا کیا اور بتایا کہ اس سیمینار میں سامنے آنے والی تجاویز کو میڈیا کے ذریعے خبر کی صورت میں شائع کیا جائے گا۔لیکن اس کے ساتھ ساتھ اہم نکات بر مبنی رپورٹ کو متعلقہ لوگوں اور اداروں تک بھی پہنچائیں گے تاکہ انشورنس سیکٹر کی بہتری میں اپنا باقاعدہ حصہ ڈال سکیں۔

کالم شروع کرنے سے پہلے چند احادیث پیش خدمت ہیں۔حضرت ابوسعید خدری رضی اللہ تعالی عنہ سے مروی ہے کہ رسول اللہ صلی اللہ علیہ وسلم نے فرمایا: جس شخص کی تین بیٹیاں ہوں یا تین بہنیں ہوں اور وہ ان کے ساتھ احسان اور سلوک کا معاملہ کرے، ان کے ساتھ اچھا برتاو کرے، تو اس کی بدولت وہ جنت میں داخل ہوگا (ترمذی) حضرت ابوہریرہ رضی اللہ تعالی عنہ سے روایت ہے کہ حضور اقدس صلی اللہ علیہ وسلم نے فرمایا: جس شخص کی تین بیٹیاں یا تین بہنیں ہوں اور اس کو ان بیٹیوں یا بہنوں کی پرورش کا سابقہ پیش آئے اور وہ اللہ تعالی کی رضا کے لئے ان کی پرورش کرے اور ان کو تہذیب و ادب سکھائے اور ان کے کھلانے پلانے اور دیگر ضروریات کے انتظام کی تکلیف پر صبر کرے تو اللہ تعالی اس کے اس عمل کی وجہ سے اس کو جنت میں داخل کرے گا۔کسی نے سوال کیا: اگر دو بیٹیاں ہوں تو؟۔ آپۖ نے فرمایا: دو بیٹیوں کا بھی یہی حکم ہے۔

پھر کسی نے سوال کیا: اگر کسی کی ایک بیٹی ہو تو کیا وہ اس ثواب عظیم سے محروم رہے گا؟۔ آپۖ نے فرمایا: جو شخص ایک بیٹی کی اس طرح پرورش کرے گا، اس کے لئے بھی جنت ہے۔ (اتحاف الساد المتقین) میں نے اپنی دوسری بیٹی بھی رخصت کردی۔میں نے اس بیٹی کی بھی شفقت پدری کے جذبے کے تحت اور اسلامی احکامات کی روح کے مطابق بہترین پرورش کی ہے۔اپنی حیثیت کے مطابق لائف اسٹائل فراہم کیا۔بیٹی کو سوفٹ وئیر انجینئرنگ کے بعد ڈیٹا سائنس میں ایم فل کروایا اور اضافی طور پر ہومیو پیتھی کا ڈاکٹر بھی بنایا۔بیٹی کی رضامندی سے اس کا رشتہ طے کیا۔جائیداد سے اس کا شرعی حق مختص کیا اور اپنے وسائل کے مطابق اس کی رخصتی کی تقریب کا اہتمام کیا۔یوں اپنی پیاری بیٹی فاطمہ صدف کو بھی رخصت کردیا۔تقریب سادہ رکھی لیکن اپنے مہمانوں کی خاطر داری میں کسر نہیں رہنے دی۔یہ بھی اللہ کی توفیق سے ممکن ہوا۔میں گزشتہ 25برس سے راولپنڈی/اسلام آباد کے سماجی کاروباری وسیاسی حلقوں میں اٹھنا بیٹھتا ہوں اور ہر شعبے سے تعلق رکھنے والے احباب سے ایک قربت پیدا ہوگئی ہے۔ان احباب نے بڑی مہربانی کی اور کورونا کے ڈر کے باوجود بڑی تعداد میں تشریف لائے۔ہر کسی نے بیٹی کیلئے دعا دی اور مجھے عزت بخشی۔ جو نہ آسکے انہوں نے فون پر معذرت کی۔ہماری مغل برادری کے سرپنچ پنجاب سر مایہ کاری بورڈ کے چیئرمین اور سنٹورس کے چیف ایگزیکٹو محترم سردار تنویر الیاس خان اور مغل برادری کی ملک بھر سے نامور شخصیات جلوہ افروز تھیں۔جہلم سے خاص طور پر جناب میاں نعیم بشیر حاجی عمران اسلم مغل اور جناب ندیم ساجد مغل اپنے دوستوں کے ہمراہ شریک ہوئے۔فیصل آباد سے مہمان آئے۔بدین سے ڈاکٹر ذوالفقار مرزا صاحب کے خصوصی نمائندے جناب منیر مرزادوستوں کے ہمراہ خصوصی طور پر تشریف لائے۔کشمیر سے جنید مغل مانسہرہ سے جناب شفیق مغل بھی موجود تھے۔معروف کالم نگار جناب مظہر برلاس اور عبدلودود قریشی بھی وقت نکال کر آئے۔اکبر مغل،شفیق مغل،ناصر مغل، کامران مغل،سردار صدیق خان ،بیگ راج اور ارشد مغل سب تھے۔اپنا بینک کے چیئر مین جناب میاں شاہد نے اپنی انتہائی مصروف زندگی سے وقت نکالا۔وہ کافی دیر ہمارے ساتھ موجود رہے۔یو آئی سی کی پوری ٹیم اس اہم ترین تقریب کی رونقیں بڑھا رہی تھی۔لاھورسے مشتاق ورائچ اور ایڈیشنل سیکرٹری پیٹرولیم چوہدری ایوب میرے یونیورسٹی فیلوز کے ہمراہ تشریف لائیں ۔ڈاکٹر اعظم، ڈاکٹر نعیم مغل، ڈاکٹر جاوید قریشی، ڈاکٹر اعجاز نسیم، اے ایس پی چوہدری الفت اور پنڈی چیمبر کے سابق صدر عامر اقبال راجہ نے بھی شرکت کی۔ حاضر سروس بیوروکریٹ،ریٹائرڈ جرنیل صاحبان،صحافی دوست اور کارپوریٹ سیکٹر کے دوست بھی نمایاں تھے جنرل فیض علی چشتی، جنرل اسددرانی، جنرل آصف دریز، بریگیڈئر اسلم، بریگیڈئر تصدق، کرنل بختیار حکیم، سیشن جج ارشد محمود، ڈی جی این سی آر ڈی اسرار احمد، ڈاکٹر امتیاز گوندل ، سی ڈی اے کے ڈائریکٹر ریونیو میاں طارق لطیف اور ناصر مغل نے بھی مہربانی فرمائی۔جس جس کو دعوت ملی وہ ٹریفک جام کی مشکلات کے باوجود تشریف لائے لیکن ایک سستی مجھ سے ہوئی۔میں گزارش کرونگا کہ محترم والدین اس سستی سے بچیں۔ہم وقت بچانے کیلئے آجکل وٹس ایپ پر ہی دعوت نامے بھیج دیتے ہیں۔میرے خیال میں بیٹی کی رخصتی کی دعوت پورے اہتمام سے دی جانی چاہیے۔میرا احساس یہ ہے کہ چاہے سادہ سا کارڈ ہو،دعوت نامہ مہمان کے پاس ضرور پہنچنا چاہیے۔شہر کے رہنے والوں کو بھی بائی ہینڈ یا بذریعہ ڈاک دعوت نامہ دینا بیٹی کی رخصتی کو یادگار بنا دیتا ہے۔کامسیٹ یونیورسٹی کے سامنے پاکستان بینکوئٹ ہال میں تقریبا پانچ سو مہمانوں کی میزبانی کرکے اطمینان ہوا۔کھانا لذیز تھا،انتطامات خوبصورت تھے اور سروس تیز رفتار تھی۔پارکنگ وسیع اور انتظامیہ ہمدرد پائی۔الحمدللہ ! میری بیٹی کو سینکڑوں دوستوں نے اپنی دعاں میں رخصت کیا۔احادیث نبوی میں دی بشارت کا میں حقدار ہو گیا۔یہ میری اور میرے اہل خانہ کی خوش نصیبی ہے۔مجھے پختہ یقین ہے کہ بیٹیوں کی خدمت سے اللہ راضی ہوتا ہے۔ بیٹیوں کی پیدائش پر چہرہ سیاہ کرنے والو۔بیٹیاں اللہ کی رحمت ہوتی ہیں۔