حکومت معلق ہی رہتی ہے۔ یہ صوبہ ہی ایسا ہے جس میں مستحکم حکومتیں اور مستحسن فیصلے کم ہی دیکھنے میں آئے ہیں۔ تحریک انصاف کی اس اُدھوری حکومت کے بارے میں بھی خدشات پائے جاتے ہیں۔بڑے ہی ابتدائی دور سے گزر رہی ہے۔ جو لوگ ابھی سے کامیابی اور ناکامی کے حوالے سے فیصلے صادر کر رہے ہیں انہیں تجزیاتی انصاف سے کام لینا چاہیے۔صوبائی حکومت کو ”ناکام” قرار دینے سے پہلے اس صوبہ کی حالت زار کو بھی مدنظر رکھنا چاہیے۔ ابتری کو سامنے رکھ کر ہی بہتری کا اندازہ  لگایا جانا چاہیے۔راقم کو کبھی بھی بہت زیادہ توقعات نہیں رہیں ۔ہمارے ہاں جمہوریت ہو یا آمریت چونکہ افراد کی حیثیت اہم ہوتی ہے اس لئے جہاں فرد باصلاحیت ہوا’ وہاں نتائج بہترہوگئے اور جہاں افراد کرپٹ ہوں یا نااہل تو پوری جماعت ملکر بھی ملک کو دلدل سے باہر نہیں نکال سکتی۔ جماعتوں کی کارکردگی ان کی لیڈر شپ سے مترشح ہوتی ہے۔تحریک انصاف ایک نئی سیاسی جماعت ہے

بلکہ پاکستانی قوم نے ایک نیا تجربہ کیا ہے۔عمران خان کی طلسماتی شخصیت نوجوانوں کے دل و دماغ پر ایسی چھائی کہ آج بھی  خان صاحب کی ہر دلعزیزی میں فرق نہیں آسکا۔مجھے بھی ان کی شخصیت سے کئی اختلافات ہیں’لیکن اس ملک کا مستقبل ان کے ساتھ وابستہ ہوچکا ہے۔اور آنے والی اسمبلیوں میں بھی ان کا وجود مٹایا نہ جاسکے گا۔ خان صاحب کو ذاتی طور پر حکمرانی کا کوئی تجربہ نہیں ہے لیکن ان کے ذاتی خیالات انتہائی شفاف اور پاکیزہ ہیں۔ ان کے دل میں جو ہوتا ہے وہی ان کی زبان پر بھی آتا ہے۔جس طرح انہوں نے ڈرونز کا معاملہ عالمی سطح پر اٹھایا اور جس دلیل اور دلیری کے ساتھ انہوں نے مغرب کو اس ظلم کا احساس دلایا ہے’یہ ایک عمل ہی ان کی حب الوطنی’ انسان دوستی اور اسلام پسندی کے لئے بہت بڑی دلیل ہے۔”میرے گھر امریکی سفیر آئے۔میں نے ملازم سے کہا کہ سفیر نے آنا ہے کوئی بسکٹ وغیرہ لے آنا۔وہ دکان سے عام سے  بسکٹ لے آئے۔ چائے پر امریکی سفیر نے خود شاپر سے  بسکٹ نکال کر کھائے”۔میں نے ایک ٹی وی پر جب عمران خان کی یہ گفتگو سنی تو مجھے ان کی خودداری کا اعتراف کرنا پڑا۔ اگر کوئی اور ہوتا تو وہ ”ہٹو بچو” ‘ہائی ٹی ‘ ہائے بائے” کے وہ اہتمام کرتا کہ امریکی سفیر ‘سفیرکی بجائے وائسرائے دکھائی دیتے۔خیبرپختونخواہ کے وزیراعلیٰ جناب پرویز خٹک سے میرا تعارف نہیں تھا۔ان کے دیرینہ دوست محمد طارق نے مجھ سے ان کی شخصیت کے بارے میں ایسی محبت بھری گفتگو کی کہ مجھے جناب خٹک سے ملاقات کا اشتیاق پیدا ہوا اور جناب جاوید بدر صاحب کی رابطہ کاری کے نتیجے میں یہ تفصیلی ملاقات ہوگئی۔پرویز خٹک لباس ہی نہیں لب و لہجہ کے اعتبار سے بھی انتہائی سادہ مگر پختہ عزم کا نمونہ ہیں۔ انہوں نے لگی لپٹی رکھے بغیر جہاں اپنے اپنے صوبے کے مسائل کا احاطہ کیا وہیں اپنے خوابوں ‘منصوبوں اور کارروائیوں پر بھی روشنی ڈالی۔ ان کا کہنا تھا کہ احتساب کمیشن کے دائرہ اختیار میں اضافہ کردیاگیا ہے۔یہ کمیشن اداروں کے سربراہوں پر ہاتھ ڈال سکے گا۔انہوں نے کہا کہ یہ بااختیار کمیشن ہوگا اور اسمبلی سے بل پاس ہونے کے بعد روبہ عمل ہوگا اور چیف منسٹر تک کو گرفتار کرسکے گا۔انہوںنے کہا کہ پٹواری کانظام بھی بہتر بنایا جارہا ہے۔ا ب پٹواری سے رشوت نہ لینے کا حلف لیا جائے گا اور زمین کا ریکارڈ کمپیوٹرائزڈ  ہوگا۔ وزیراعلیٰ نے کہا کہ صوبہ کا سب سے بڑا چیلنج تعلیم ہے۔اس سلسلے میں بیرون اور اندرون ملک مخیر حضرات نے اربوں روپے کے عطیات کی پیشکش کی ہے اور ہم اس سلسلے میں ایک جامع منصوبہ بناچکے ہیں۔ہم یکساں نصاب تعلیم کے لئے پہلی کلاس سے ہی انگریزی لازمی ہوجائے گی۔اساتذہ کے تبادلے ختم کردیں گے اور جس سکول میں ٹیچر بھرتی ہوگا اسی سے ریٹائرڈ ہوگا۔تعلیم میٹرک تک مفت ہوگی’امیر اور غریب کا فرق ختم ہوجائے گا۔انہوں نے کہا کہ  امن وامان کا مسئلہ طالبان سے جُڑا ہوا ہے اور اگر علمائے کرام آگے بڑھیں تو طالبان سے مذاکرات کو کامیاب بنایاجاسکتا ہے۔انہوں نے کہا کہ دہشتگرد کارروائیاں کرکے فاٹا میں روپوش ہوجاتا ہیں جس سے انہیں پکڑنا ناممکن ہوجاتا ہے۔پرویزخٹک نے کہا کہ تھانوں کے اندر کیمرے نصب کئے جارہے ہیں اور پولیس کی ٹریننگ کا پلان بنا لیا گیا ہے۔جناب پرویز خٹک کے خیالات میں یکسوئی تھی۔وہ عمران خان کی شخصیت کو اپنے لئے فکری توانائی کا سبب قرار دیتے ہیں۔صوبے کے عوام کی حالت بدل دینے کا جذبے سے سرشار ہیں۔میرا ذاتی خیال یہی ہے کہ اس وقت وہ تمام قوتیں جو صوبہ خیبرپختونخواہ کے خیرخواہ ہونے کا دعویٰ کرتے ہیں انہیں تحریک انصاف کی حکومت کا غیر مشروط ساتھ دینا چاہیے۔ محض سیاسی اختلافات اور حکومت ہتھیانے کے لئے پروپیگنڈہ مہم چلانے کا نقصان صرف عوام الناس کو ہوگا۔

Click here to View Printed Statement

کائنات کا دولھا انسان اللہ پروردگار عالم کی تخلیق کا بہترین شاہکار ہے۔ رب کائنات نے اسے نعمتوں کے اتنے انبار عطا فرما دیے کہ جنہیں دیکھ کر ذرا سا غور کرنے پر ہمیں اللہ نظر آنے لگتا ہے۔ اللہ خود اپنے کلام میں فرماتا ہے”تمہارے نفوس میں میری نشانیاں موجود ہیں تو کیا تم ان پر غور نہیں کرتے“۔

ہم اپنی ذات سے ذرا باہر نظر دوڑائیں تو سورج‘ چاند‘ ہوا‘ پانی ‘ستارے آسمان‘زمین اور جانور سب کے سب قدرت کی نشانیاں ہونے کے ساتھ ساتھ حضرت انسان کی ایسے خدمت میں جتے ہوئے ہیں جیسے ان کا ہم سے بہت بڑا کام پھنسا ہوا ہے۔ ان پر نگاہ دوڑا کر یوں محسوس ہوتا ہے کہ جیسے سورج چمکتا‘چاند دمکتا‘ستار روشن‘ سمندر موجزن‘ ہوائیں چلتی‘ پھول کھلتے‘پھل پکتے اور جانور سواری و غذا کے لئے پیدا ہی ہمارے لئے کئے گئے ہیں۔ احساس کچھ یوں ہوتا ہے کہ جیسے ہم آقا ہیں اور یہ ہمارے خدمت گزار حالانکہ اصل صورتحال اس کے برعکس ہے۔ ان سب سے پوچھیے کہ اگر انسان نہ ہو تو تمہاری صحت پر کیا اثر پڑے گا تو یہ سب کہیں گے ہماری بلا سے۔ مگر انسان ان کے بغیر ایک پل بھی زندہ نہیں رہ سکتا۔
غرض ساری کائنات اپنا کام مالک حقیقی کی مرضی کے عین مطابق کر رہی ہے مگر انسان ہے کہ ظالم بھولا ہوا ہے۔
گھوڑے کو مالک صرف چارہ ہی ڈالتا ہے تو وہ اس کے بدلے اس کے لئے لڑ کر اپنی جان دے دیتا ہے۔ مگر انسان اپنے مالک کا بڑا ناشکرا ہے اور اس کی وجہ سورہ عادیات میں جو بتائی گئی وہ ہے مال سے بے پناہ محبت:
دنیا میں کسی ادارے کا مالک تیوری چڑھا لے تو ملازم فوراً ہاتھ باندھ کر کھڑا ہوجاتا ہے مگر کارخانہ قدرت کا حکم کئی بار جھنجوڑ چکا مگر ہم اس کی کوئی پرواہ نہیں کرتے۔آذان کی پکار تو ہمارے کانوں سے ٹکرا کر واپس چلی جاتی ہی رہی ہے لیکن اب تو ہم چھوٹے عذابوں کی ایک سیریز کو اپنی آنکھوں سے دیکھنے کے باوجود بھی راہ حق کی طرف جانے سے کترا رہے ہیں۔
وہ ہمیں بار بار اپنے کلام میں بتا چکا ہوں کہ میں نے یہ تمام کائنات تمہارے لئے مسخر کردی ہے مگر تم کو اپنے پیار کے لئے پیدا کیا ہے۔ وہ واضح طور پر آگاہ کرتا ہے کہ تمہاری تخلیق کا مقصد میری محبت اورمیری مخلوق سے پیار ہے۔
وہ خبردار کرتا ہے کہ اگر تم مجھ سے محبت نہیں کرو گے تو میں عنقریب تمہاری چھٹی کروا دوں گا اور تمہاری جگہ ایسی قوم پیدا کروں گا جو کہ مجھ سے محبت کرے گی اور میں ان سے محبت کروں گا۔
وہ کہتا ہے کہ میں تم سے رزق روزی نہیں مانگتا۔رزق رساں تو میں ہوں۔ اس لئے تمہاری روزی کا میں سامان کروں گا تم تو بس میری طرف پیار کی نگاہ اٹھا کر کبھی دیکھ ہی لیا کرو۔
وہ ہم کو بار بار اپنی نعمتوں کی یاددہانی کراتا ہے کہ شائد نگاہ ان کی طرف مبذول کرے تو نگاہ شکریہ اوپر بھی اٹھا لے۔مگر ہمارا حال تو یہ ہے کہ گائے نے اگر دودھ پلایا ہے تو ہم نے اسے ماتا بنا کر اسی کے آگے سر تسلیم دل خم دیا۔اللہ کو ہم سے گلا ہے کہ گوبر اور خون کے درمیان سے ظالمو تم کو خالص دودھ تو میں نے پلایا ہے اور تم نے ساقی پر نگاہ کرنے کے بجائے برتن کے آگے سر نیاز جھکا دیا۔ جبکہ گائے کو تو یہ خبر بھی نہیں کہ یہ سارا نظام کیسے چل رہا ہے۔ رب کا فرمان ہے کہ سورج اور چاند کو سجدہ کرنے والو اسے پہچانو جس کے ہاتھ میں ان کی رسی ہے۔
دنیا میں ماں جب بچے کو نہلا دھلا کر نئے کپڑے پہنا کر سامنے کھڑا کرتی ہے اور پوچھتی ہے کہ سب کچھ کس نے دیا ہے تو بچہ اگر صرف اتنا کہہ دے کہ ”ماں تو نے“ تو صرف اتنا کہنے پر ہی ہم نے کئی بار دیکھا ہے کہ وہ بچے کو درجنوں بوسے دیتی ہے۔ یہی حال مالک کا ہے جب بندہ نہا دھو کر آئینہ کے سامنے کھڑا ہو اور یہ کلمات ادا کرے کہ اللہ تیرا شکر ہے تو مجھے خوبصورت شکل عطا فرمائی۔ میری سیرت کو بھی خوبصورت بنا دے تو عرش سے آواز آتی ہے۔ ”بندے جا تیری اس خوبصورت بات پر میں نے تیرے پچھلے گناہ معاف کردیئے“۔ وہ فرماتا ہے کہ اگر نعمت کا شکر ادا کرو گے تو نعمتوں کی بارش کردوں گا اور ناشکری کرو گے تو میرا عذاب بہت سخت ہے۔
اللہ نے ہمیں مختلف انداز سے یاددھانیاں کروائی ہیں کہ شائد انسان اپنے محبوب حقیقی کی طرف نظر التفات کرلے۔وہ فرماتا ہے کہ جب تم ماں کے بطن سے گود مادر میں آئے تو کچھ نہیں جانتے تھے۔ یہ سمع و بصر اور دل ودماغ جس پر تم اتنا اتراتے ہو میں نے عطا فرمائے ۔ایک طرف تو ان نعمتوں کا تذکرہ کیا عام لوگوں کیلئے تو دوسری طرف میڈیکل سائنس کے ماہرین کو بتایا کہ تم نے آج یہ ثابت کیا ہے کہ انسان کو پہلے سماعت ملتی ہے بعد میں بصارت مگر رب العالمین نے چودہ سو سال قبل ہی یہ حقیقت اپنے نبی صلی اللہ علیہ وآلہ وسلم کی زبان سے جاری فرما دی تھی۔
وہ ہمارے کئی بھائیوں کو ان میں سے کچھ عطا نہیں بھی فرماتا۔شائد اس لئے کہ آنکھوں سے محروم کوئی شخص جب گلی گلی سے یہ پکارتا گزرے کہ” آنکھوں والو! آنکھیں بڑی نعمت ہیں“ تو ہمیں ان کے نعمت ہونے کا واقعتاً احساس ہوجائے آپ غور فرمائیں تو نوزائیدہ بچہ نہ بول سکتا ہے نہ رفع حاجت کرنے کے قابل ہوتا ہے۔غلاظت کے اس ڈھیر کے لئے دودھ کی نہروں کے علاوہ ماں کے دل میں اتنا پیار بھی ڈال دیا کہ وہ ساری غلاظتیں اپنے دامن میں لے لیتی اور بچے کو صاف ستھری جگہ ڈالتی۔میں تو اس کو اس طرح دیکھتا ہوں کہ دنیا میں جو ماں کا کردار ادا کر رہی ہے وہ ماں نہیں بلکہ دائی ہے اصل ماں (پالنے والی ذات) تو وہ ہے جس نے اس دائی کے دل میں اتنا پیار ڈالا ہوتا۔ سرکار صلی اللہ علیہ وسلم نے بھی اللہ کے پیار کو ماپنے کے لئے ماں کے پیار کا پیمانہ استعمال کیا۔ آپ کسی سفر پر جا رہے تھے کہ ناگہاں کسی عورت کا بچہ کھو گیا۔ وہ بڑی بے چینی کے عالم میں پاگلوں کی طرح اسے ڈھونڈتی پھر رہی تھی۔ کافی وقت بعد وہ اسے اچانک نظر آیا تو اس نے بچے کو اپنی بانہوں میں جکڑ کر اسے بے شمار بوسے دیے۔ ایسی کیفیت میں حضور صلی اللہ علیہ وآلہ وسلم نے صحابہ کو اس کی طرف اشارہ کرتے ہوئے فرمایا کہ دیکھو تمہارا رب تم سے اس ماں سے بھی ہزاروں گنا زیادہ پیار کرتا ہے جب قرآن فرماتا ہے کہ ماں باپ کے سامنے اف تک نہ کہو تو میں سوچتا ہوں کہ جب ہم اس ماں کے سامنے اف نہیں کہہ سکتے تو اس حقیقی ماں کے سامنے اف کیسے کہہ سکتے ہیں اور اس کے حکموں کو پا کر ان کی نافرمانی کرنے کی جسارت کیسے کرسکتے ہیں۔ میں انسان میں موجود اعضاءاور نظام کو دیکھ کر کبھی کبھی خیال کرتا ہوں کہ جانے وہ خود کتنا پیارا ہوگا جس کی تخلیق اتنی پیاری ہے۔
انسان کے اندر اور باہر کے ماحول میں یہ نشانیاں ہم سے کچھ کہتی ہیں ۔ گاڑی میں جانے والا مسافر اپنے دوست کو دیکھ کر جب رومال لہراتا ہے تو اس کی حرکت سے دیکھنے والے کو ایک نتیجہ نکالنا ہوتا ہے اگر کوئی رومال کی رنگت‘ اس کی دھاریوں‘ اس کے کپڑے کے معیار پر غور کرنے لگے تو زمانے والے اسے احمق کہیں گے۔دراصل اس طرح کرنے سے اس کا مقصد اس کی توجہ اپنی جانب مبذول کروانا ہوتا ہے۔
اگر کوئی مہمان کسی کے گھر کھانا کھانے کے وقت سب باتوں کو لاجک سمجھ جائے کہ بلب میں روشنی پاور ہاﺅس سے آرہی ہے۔ پھول جو گلدانوں میں سجائے گئے ہیں یہ اس طرح گلدانوںمیں نہیں اُگتے بلکہ باغ سے لائے گئے ہیں۔بادلوں کو دیکھ کر ان کا سارا فلسفہ بیان کردے۔ غرض ہر چیز کے بارے بڑی عقل مندی سے متاثر کن کرتا جائے۔ کھانے پر بھی بڑی سیرحاصل گفتگو کر ڈالے مگر کھانا کھانے کے بعد میزبان کا شکریہ ادا کیے بغیر چلائے تو کوئی شخص بھی ایسے شخص کو عقلمند نہیں کہے گا۔ عقل بہت بڑی چیز ہے اس کی بنیاد پر انسان اشرف المخلوقات کے درجہ پر فائز ہوا ہے مگر یہی عقل اگر کسی جسم سے نکال دی جائے تو وہ پاگل کہلائے گا۔ یاد رہے کہ عقل اگر وحی کی روشنی سے ہٹ کر فیصلے کرے گی تو یہ باولی کہلائے گی۔خدا کا فرمان بھی کچھ اسی طرح سے ہے کہ جب میرے بندے آسمانوں اور زمین کی تخلیقات میں غور کرتے ہیں تو نتیجہ بے فکر کے طور پر بے ساختہ یہ کہہ اٹھتے ہیں کہ اے رب تو نے یہ سب بے کار پیدا نہیں کیا۔ وہ کہتے ہیں کہ رب تو پاک ہے ہم کو آگ سے بچا کر اپنا دیددار نصیب فرما۔ بقول شاعر
تیری جنت کو یا رب کیا کروں
آرزو ہے تجھے دیکھا کروں

ان لوگوں سے پیشگی معذرت جنہوں نے جمہوریت کو مذہب کا درجہ دے رکھا ہے۔مغربی جمہوریت کے شاہکار سامنے آنا شروع ہوگئے ہیں۔یورپی ممالک میں اب شہریوں کی فلاح و بہبود کے بجائے ہم جنس پرستوں کے شیطانی حقوق ایشو بن چکے ہیں۔امریکہ کی ایک ریاست میں ”چکلے” چلانے والے ایک بدکار کو گورنر بنایا گیا ہے۔ یہی نہیں امریکی حکومت خصوصاً صدر ابامہ مجبور ہے کہ وہ طاقتور حزب اختلاف  کے دبائو کے سامنے سرنڈر کرجائے اور جنگ بندی کی خواہش کو ترک کرکے نئی جنگوں کی گنجائش پیدا کرے تاکہ امریکی اسلحہ ساز اور آئل کمپنیوں کا بزنس چلتا رہے۔خود پاکستان کے اندر جمہوریت کے پردے میں جو لوٹ مار ہورہی ہے اس کے تذکروں سے اخبارات بھرے پڑے ہیں۔’

‘ہنگ پارلیمنٹ اور کولیشن گورنمنٹ” نے اس ملک کے غریب آدمی کے ساتھ جو کھیل کھیلا ہے اس کا نتیجہ یہ نکلا ہے کہ خطِ غربت سے نیچے سرک جانے والوںکی تعداد لاتعداد ہوتی جارہی ہے ۔مغربی جمہوریت نے اہلیت کی بجائے اکثریت کی بنیاد پر فیصلے کرنے ہیں اور اکثریت کو ورغلانے اور سدھانے کے لئے طاقتور میڈیا جیسے ہتھیار موجود ہیں۔آج کی نشست میں دنیا کی سب سے بڑی جمہوریت کا کچھ تذکرہ کرنا ہے۔ ہمارے اسٹیٹ ٹیلی ویژن سمیت تمام ٹی وی چینلز پر اشتہارات اور ناچ گانے  کے پروگراموں میں دکھائی دینے والا وہی ملک بھارت ہے جس کے بارے میں 2006ء میں سچرکمیٹی نے رپورٹ دی کہ کس طرح مسلمانوں کی زندگی اجیرن کردی گئی ہے۔شاہ رخ خان نے بھارتی دہشتگردوں کی دہائی دی اور وہاں کے وزیر داخلہ نے بے جی پی کا پول کھولا۔بھارتی خواتین کی چیخ و پکار سنیں تو آج کو معلوم ہوجائے گا کہ دنیا کی سب سے بڑی جمہوریت  میں عورتوں کے ساتھ کیا سلوک ہورہا ہے۔ 2008ء میں ممبئی اور دہلی میں پرائیویٹ کلینک چلانے والے ڈاکٹروں کے حوالے سے ایک رپورٹ شائع ہوئی جس میں بتایا گیا تھا کہ ہر تین سیکنڈ بعد ایک بچی کو قتل کردیا جاتا ہے۔قتل کا طریقہ یہ کہ ڈاکٹر بچی کی پیدائش سے پہلے ہی ماں کے پیٹ میں  ہی اسے مار دیتے ہیں اور اگر نومولود اس دنیا میں آجائے  تو بعض سفاک ڈاکٹر والدین کی رضامندی سے اس معصوم حوازادی کو تیزاب کے ڈرم میں ڈال دیتے ہیں۔ والدین پر خوف طاری ہے کہ ان کی بچی جوان ہو کر نہ صرف ان پر معاشی بوجھ بنے گی بلکہ  اس کی عزت بھی محفوظ نہیں ہوگی اور ان کے لئے زندگی بھر کا ایک روگ بن جائے گا۔ بھارتی سیاستدان پارلیمنٹ کے اندر عورتوں پر آوازے کستے ہیں اور غلیظ قسم کے القابات سے نوازتے ہیں۔شاہ رخ خان نے ایک مضمون میں اپنے احساسات کیا لکھے کہ اس کے بچوں کو قتل کرنے کی دھمکیاں ملنا شروع ہوگئیں۔ اب وہ بیچارہ محض مسلمان ہونے کی بنیاد پر ”شوسینا” کے جذبہ انتقام کا نشانہ بن رہا ہے اور ان کو خوش کرنے کے لئے طرح طرح کی تاویلیں پیش کر رہا ہے۔پاکستان کی ہاکی ٹیم نے بھارت کا کیا بگاڑا تھا۔ ان کو کھیلے بغیر واپس بھجوا دیا کہ جمہوریت کا تقاضا تھا کہ ہندودہشتگرد تنظیم خوش رہے اور تنگ نظر ہندوئوں  کے ووٹ حاصل کئے جاسکیں۔بھارتی وزیر داخلہ نے ثبوتوں کے ساتھ یہ راز فاش کیا کہ بھارت میں دہشتگردانہ کارروائیاں ہندو انتہا پسندوں کا ”اپنا کارنامہ” ہے لیکن وہ دہشتگردی کے ہر واقعہ کی ذمہ داری مسلمانوں پر ڈال دیتے ہیں۔ ہمارے میڈیا مداری کس تواتر کے ساتھ کشمیری مجاہدین کو رگڑا دیتے ہیں ۔جہاد کشمیر کو کس قدر حقارت اور ناگواری سے بیان کرتے ہیں اور کس ڈھٹائی کے ساتھ بھارت کو مظلوم اور مظلوموں کو ظالم ثابت کرنے پر ادھارکھائے رہتے ہیں۔ لیکن نصف صدی کے سب سے بڑے سچ کو سن کر ‘پڑھ کر اور جان کر بھی بھارت کے خلاف نہ کوئی زبان کھلی نہ ہی ”میڈیا ٹرائل” ہوا۔”امن کی آشا” نے آزادی صحافت کے کان میں کیا پھونکا ؟ مجرم ذہنیت کی بھارتی جماعتوں اور گروہوں کو خود بھارتی وزیر بے نقاب کرتا ہے لیکن پاکستانی میڈیا پھر سے نقاب ڈال دیتا ہے!ہر ٹی وی سکرین پر بھارتی ڈرامے’ بھارتی ناچ’ بھارتی اشتہارات ‘جی چاہتا ہے پتھر مار کر سکرین توڑ دیں لیکن پیمرا کی غیرت جاگتی ہے نہ اسلامی نظریاتی کونسل جیسے اداروں کو توفیق ہوتی ہے ‘ دنیا کی سب سے بڑی جمہوریت کو سرخی پائوڈر لگا کر ہمارے دل و دماغ میں ”رول ماڈل” کے طور پر پیش کیا جارہا ہے۔انشاء اللہ وہ وقت دور نہیں جو ان  نقالوں اور طبلچیوں کی گردنیں سچے پاکستانیوں کی گرفت میں ہوں گی۔

ضمنی انتخابات میں مسلم لیگ (ن) نے کلین سویپ کیا ہے ۔عموماً ووٹرز ان انتخابات سے دور رہتے ہیں کیونکہ منتخب ہونے والے کا عرصہ اقتدار ایک سال یا چند ماہ کا ہوتا ہے’جیتنے والے کو بھی چند ہزار ووٹ پڑتے ہیں اور ہارنے والا بھی کچھ زیادہ  دل گرفتہ نہیں ہوتا۔ لیکن دسمبر کے ضمنی انتخابات میں جیتنے اور ہارنے والے دونوںجنرل الیکشنز جیسے انتخابی معرکے سے دوچار ہوئے۔ انتخابی حلقوں کے اندر جوش و خروش بھی بھرپورتھا۔گویا فریقین نے پورا پورا زور لگایا اور ووٹروں کو پولنگ بوتھ تک پہنچانے کے تمام تر جتن بھی کئے۔مسلم لیگ(ن) کے ہاتھوں شکست سے دوچار ہونے والی (ق) لیگ اور پی پی پی کو یقیناً اپنے ووٹ بینک کے دیوالیہ ہونے کا اندازہ ہوگیا ہوگا۔اب وہ کس طرح اس ووٹ بینک کو ووٹوں سے بھرتے ہیں اس کے لئے ان کے پاس وقت بہت کم رہ گیا ہے۔پی پی پی کا خیال ہے کہ محترمہ بے نظیر بھٹو کی برسی پر وہ اپنے کارکنوں کو جذباتی حوالے سے متحرک کرلے گی اور جب بلاول بھٹو زرداری ملکی سیاست میں حصہ لینے کا باقاعدہ اعلان کریں گے تو جناب زرداری سے نالاں نظریاتی گروپ بی بی شہید کے لخت جگر سے بغلگیر ہو کر روئے گا اور یوں پارٹی کا وقتی انتشار کل وقتی اتحاد ویگانگت میں بدل جائے گا۔ہوسکتا ہے کہ پی پی پی کی یہ سیاسی چال کارگر ثابت ہو۔اگر بلاول بھٹو زرداری کسی ضمنی الیکشن میں جیت کر قومی اسمبلی میں آتے ہیں اور چار چھ ماہ کی نیٹ پریکٹس کرتے ہیں تو یہ ان کے لئے بہتر آغاز ہوگا۔ یہ بھی ممکن ہے کہ پبلک کنزپشن کے لئے جناب بلاول بھٹو کے پوسٹرز پر ان کا مختصر نام ”بلاول بھٹو” ہی لکھا جائے اور لفظ زرداری سے وابستہ اکتاہٹوں سے چھٹکارا پانے کی راہ نکل آئے۔بہرحال آئندہ انتخابات میں کسی غیر متوقع شکست سے بچنے کے لئے پی پی پی کے میڈیا مینجرز اور امیج بلڈرز ابھی سے پلاننگ کرچکے ہیں اور اس پلاننگ کی حتمی منظوری جناب زرداری ہی دیں گے۔وہ قصر صدارت میں رہتے ہوئے کوئی نہ کوئی ”چمتکار” کرنے کی صلاحیت رکھتے ہیں۔جہاں تک مسلم لیگ (ق) کی کارکردگی کا تعلق ہے تو یہ پی پی پی  کی کارکردگی سے جڑی ہوئی ہے۔موجودہ صورتحال ایسی ہے کہ جناب پرویز الٰہی ڈپٹی پرائم منسٹر ہوتے ہوئے اپنے گھر سے بھی جیت نہیں پائے۔ شہبازشریف حکومت پر کرپشن کے متواتر الزامات کے باوجود وہ مسلم لیگ (ن) کے حامیوں کے دلوں میں شکوک پیدا نہیں کرپائے۔یوں محسوس ہوتا ہے کہ شہباز شریف کا گراف اور ہیڈ برجوں کی طرح بلند تر ہورہا ہے اور (ق) لیگ انڈر پاس میں کہیں گم ہوگئی ہے۔چوہدی پرویز الٰہی مونس الٰہی کو بھی لانچ نہیں کرسکے حالانکہ بلاول کے ساتھ ساتھ مونس الٰہی کو بھی اچھا آغاز مل سکتا ہے۔تحریک انصاف نے اپنے ٹکٹ پر کوئی امیدوار کھڑا نہیں کیا تھا۔لیکن قومی اسمبلی کے تین چار امیدوار تحریک انصاف کے رہنمائوں کے قریبی عزیز اور بھائی بند تھے۔عمران خان کے پوٹریٹ کے سائے میں کھڑے ہو کر ان امیدواروں نے خان صاحب کے نظریے کو آگے بڑھانے کے عہد کئے تھے اور الیکشن جیتنے کے لئے روپیہ پانی کی طرح بہایا۔افسوس کہ تحریک انصاف کے یہ حمایت یافتگان بری طرح ہارے۔ تحریک انصاف کے دماغوں کا تجزیہ یہ کہ ضمنی الیکشن سے ثابت ہوا کہ تحریک انصاف نے پی پی پی اور (ق) لیگ کا صفایا کردیا ہے اور آئندہ کے جنرل الیکشنز میں مقابلہ صرف اور صرف مسلم لیگ (ن) سے ہوگا۔عمران خان کو ”کپتان وزیراعظم بن کر رہے گا” کے سپنے دکھانے والے دانشور اب طرح طرح کی توجیہات تراشنے میں مصروف ہیں۔لیکن سچ یہی ہے کہ مقابلہ جنرل پرویز مشرف سے مستفید ہونے والوں اور اس کا غضب سہنے والوں کے درمیان ہوگا۔عمران خان آج بھی جنرل پرویز مشرف کی ”گڈبک” میں ہیں اور عمران خان کو جنرل پرویز مشرف کے عہد میں ہر طرح کا ” فری ہینڈ” دیا گیا تھا۔(ن) لیگ کے رہنمامیاں محمد نوازشریف نے پی پی پی کو پانچ برس پورے کرنے دیئے اور اس طرح اس حکومت کو عوام کی نگاہوں میں کرپٹ اور نااہل ثابت ہونے کا خوب وقت دیا گیا۔ یہ صبر کی سیاست کہلاتی ہے۔ پی پی پی کو اب کی بار سیاسی طور پر شہید ہونے کاموقع نہیں مل سکا۔ عدلیہ سے محاذ آرائی کے دنوں میں امکانات تھے کہ جناب زرداری بھی عدلیہ کے ہاتھوں”شہید” ہوجاتے لیکن کبھی آرمی چیف’ کبھی نوازشریف آگے بڑھے اور معاملے کو رفع دفع کروا دیا۔جناب زرداری اس چال کو بھانپ نہیں سکے اور ”پانچ سال پورے کرنے ”اور  ”جمہوریت  بہترین انتقام” کا فلسفہ بگھارنے کے بعد اب عوامی بیزاری اور غصہ کے پہاڑ کے نیچے آنے والے ہیں۔پنجاب کو سنبھالنے کے لئے انہوں نے جناب منظور وٹو کو میدان میں اتارا ہے لیکن وہ ہر میدان میں ہارتے دکھائی دے رہے ہیں۔پی پی پی کے کارکن انتظار کرتے ہیں کہ کب منظور وٹو کا کوئی استقبالی جلسہ ہو اور وہ گلے میں روٹیوں کے ہار ڈال کر جلسے کا انتظام درہم برہم کردیں۔سندھ میں جناب خورشید شاہ معاملات سنبھالنے میں سرگرم ہیں۔ایم۔کیو۔ایم ابھی پی پی پی کے ساتھ اکٹھی ہے۔لیکن نئے بلدیاتی نظام کے خوف نے سندھی قوم پرستوں کو پی پی پی کے لئے نیا خطرہ بنا دیا ہے۔میاں نوازشریف نے کالاباغ ڈیم پر قوم پرستوں کے موقف کی تائید کرکے سندھ کی سیاست میں جڑیں مضبوط کر لی ہیں۔خیبرپختونخواہ میں اے۔این۔پی پر کرپشن کے اتنے الزامات ہیں کہ وہ انتخابی مہم میں شائد انہی الزامات کی صفائی پیش کرتی نظر آتی ہے۔میاں نوازشریف کی باری ہے۔امکانات ہیں کہ میاں صاحب ایک بار پھر وزیراعظم ہائوس میں نہاری اور پائے سے لطف اندوز ہوں گے۔ ان کے برسراقتدار آنے سے عوام کو کیا ملے گا؟ راقم پیشین گوئی کرنے سے قاصر ہے۔اگر مالشیوں سے نجات پائی تو شائد میاں صاحب اقتدار میں اگر 1999ء والے ”بلنڈرز” کرنے سے بچے رہیں۔

پی پی پی سندھ کے معتوب رہنما ڈاکٹر ذوالفقار  مرزا نے قرآن کی قسم کھائی اور بار بار کہا کہ رحمن ملک سب سے بڑا جھوٹا ہے۔ وزیر داخلہ  کی دروغ گوئی کے بارے میں بلوچ رہنمائوں نے بھی بار بار شکایتیں کی ہیں۔کراچی والوں نے بھی ناراضگی اور غصے کے عالم میں وزیر داخلہ کو کئی بار جھوٹا ثابت کیا ہے۔اے این پی کے رہنمائوں نے بھی ایسے ہی القابات سے نوازا ہے۔ خدا جانے جناب رحمن ملک کے پاس کونسا جن ہے کہ وہ ہر واقعہ’ ہر حادثہ کی جذیات پر نہ صرف یہ کہ مکمل طور پرعبور رکھتے ہیں بلکہ آنے والے حادثات اور خودکش حملوں کی پیشگی اطلاعات بھی فراہم کر دیتے ہیں۔ شائد یہی ”دروغ گوئی” کا فن انہیں جناب گیلانی اور زرداری کے مزید قریب کردیتا ہے

اور وہ ہر گزرتے دن پہلے سے کہیں زیادہ بااختیار ہوکر سامنے کھڑے ہوتے اور عوام کے  سمع و بصر پر اپنے ”سیکرٹ انفارمیشن” کے ہتھوڑے برساتے دکھائی دیتے ہیں۔سانحہ کورال میں بھوجا ایئرلائن کے طیارے کو حادثہ پیش آیا اور  ایک سو ستائیس زندہ انسان جل کر کوئلہ  ہوگئے۔ہونا تو یہ چاہیے تھا کہ بھوجا ایئر لائن کے مالکان جان بحق ہونے والوں سے فی الفور اظہار افسوس کرتے’ ان کے لواحقین کے لئے معاوضے کی رقم کا اعلان کرتے اور آئندہ کے لئے  اس وقت تک اپنبی فلائٹس بند کردیتے جب تک ان کے طیارے مکمل طور پر فٹ نہ ہوجاتے۔ لیکن اس حادثے میں سانحہ یہ ہوا کہ بھوجا ایئرلائن والوں کو سامنے آنے کی ضرورت ہی پیش نہ آئی’ ان کے ”رکھوالوں” نے واقعات اور تحقیقات کے ایسے تانے بانے بنے کہ انسانی المیہ کو سیاسی جھگڑے میں تبدیل کردیا گیا۔ لواحقین جوتے’ دوپٹے’ اور فراکیں پہچان کرکے اپنے اپنے پیاروں کی گٹھڑیاں اٹھا کر لے گئے’پی آئی اے والوں نے راکھ کی ان پوٹلیوں تک کے کرائے وصول کر لئے اورحکومت نے تحقیقات کیلئے ایک جوڈیشل کمیشن بنا ڈالا جو حقیقت میں بقول وزیراعلیٰ پنجاب جوڈیشل کم اور کمیشن زیادہ ہے۔ یہ کمیشن بننے سے پہلے ہی متنازعہ ہوگیا کہ اس کا مقصد ہی معاملے کو الجھانا تھا۔وزیراعظم پاکستان جناب گیلانی جن کے دامن میں کرپشن کے کانٹوں کے سوا کچھ نہیں رہا ایک اور الزام اپنے سر لینے میں کامیاب ہوگئے کہ پیپلزپارٹی ایسے الزامات کو اپنے لئے اعزازسمجھتی ہے۔بھوجا ایئرلائنز  کے طیارے کو حادثہ کس طرح پیش آیا اس کے بارے میں کوئی غیر جانبدار تحقیق کبھی نہ ہوپائے گی۔ بلیک باکس بیرون ملک جاچکا۔ کونسی انفارمیشن منظر پر لانی ہے کس کو چھپانا ہے یہ کام ایف آئی اے کا معمولی ہرکارہ بھی سرانجام دے سکتا ہے۔ جوڈیشل کمیشن کب تک اس طیارے کے ساتھ پیش ہونے والے معاملہ کی چھان بین کرتا رہے گا کچھ کہا نہیں جاسکتا۔ جب کوئی جوڈیشل کمیشن بنتا ہے  تو اس کی سب سے زیادہ خوشی کمیشن کے سربراہ اور کمیشن کے ممبران کے گھر والوں کو ہوتی ہے۔ ایک سال تو گزارنا کوئی مشکل کام نہیں۔سال سے قبل ہی اس حکومت کو چلے جانا ہے۔ بعد میں کون پوچھے گا کہ طیارے کے انجن میں موسم نے آگ لگائی تھی یا طیارہ کرپشن کے پر لگا کر اڑایا گیا تھا۔ سال گزرنے کے بعد بات آئی گئی ہوجاتی ہے۔غم’مایوسی میں ڈھل جاتا ہے اور زخم بھرنے شروع ہوجاتے ہیں۔ ابھی تک  اسلام آباد والے طیارہ حادثے  کے متاثرین معاوضے  کے لئے ٹکریں مارتے پھر رہے ہیں’ سانحہ کورال  تو خراب موسم کے دوران پیش آیا۔شاہین ایئرلائنزاورایئربلیو کے دو طیارے حادثے کے اگلے روز حادثے سے بال بال بچے اور ان کے ہنگامی لینڈنگ کا سبب آئل ٹینک میں سوراخ اور ٹائر پھٹنا تھا۔یہی بوسیدہ حالت بھوجا ایئرلائن والے طیارے کی ہوگی۔جب بھاری رشوت لے کر پرائیویٹ ایئرلائنز کو لائسنس اور فٹ نیس سرٹیفکیٹ جاری کئے جارہے ہوں تو پھر ہوائی مسافروں کی ہر آہ ہوا میں ہی تحلیل ہوجاتی ہے۔کوئی اور ملک ہوتا اور عوام بااختیار ہوتے تو جلی ہوئی لاشوں کو  جلوس کی صورت میں زرداری ہائوس کے سامنے بچھا دیا جاتا اور جب تک اس حادثے کے تمام ذمہ داروں کو شاہراہ دستور پر پھانسی نہ دی  جاتی لاشوں کو خاک برد نہ کیا جاتا ۔لیکن یہاں کی کرپٹ حکومت کو فرینڈلی اپوزیشن نے عوامی غصے اورغم سے ہر بار بچایا ہے۔طیارہ حادثے پر بھی یہی سیاسی نوراکشتیاں جاری ہیں’لواحقین اپنے پیاروں کی یاد میں سسکیاں بھرتے’آنسو بہاتے اور سینہ کوبی کرتے کرتے نڈھال ہوچکے لیکن رحمن ملک  جیسے وزراء جھوٹ پر جھوٹ بولے جارہے ہیں'(ن) لیگ عوام کے سامنے آنکھ مچولی کا شغل فرما رہی ہے اور جلتی لاشوں پر سیاسی بھنگڑے ڈالے جارہے ہیں۔