سعودی وزیر خارجہ کے بعد وزیر دفاع کا دورہ پاکستان بڑی اہمیت کا حامل ہے۔اس کی اہمیت کے حوالے سے گرما گرم بحثیں بپا ہیں اور ہوسکتا ہے کہ حکومت مخالفت قوتیں اس دورے کو بھی متنازع بنانے میں کامیاب ہوجائیں لیکن سعودی وزیر دفاع کی آرمی چیف اور وزیراعظم سے ملاقاتوں کے بعد جاری ہونے والے سرکاری بیانات کے بعد پاکستانیوں کی عمومی رائے سعودی عرب کے حوالے سے بہتر ہوئی ہے۔سعودی عرب نے تمام اُمور پر پاکستان کے مﺅقف کی تائید کا اعلان کرکے بہت سے خدشات دور کر دیئے ہیں۔خوش آئند اور اندر کی خبریں یہ ہیں کہ سعودی ایران تنازعات کو ٹھنڈا رکھنے پر سرزمین حجاز سے ٹھنڈی ہوا کا جھونکا آیا ہے۔ اور چند دنوں میں سفارتی رابطے موثر ہوتے دکھائی دیتے ہیں۔ پاکستان نے سعودی سربراہی میں بننے والے 34 ملکی اتحاد میں شمولیت کا واضح اعلان کردیا ہے اور سعودی سالمیت پر حملے کی صورت میں خود کو غیر جانبداری کے مخمصے سے نکال کر واضح پوزیشن لے لی ہے۔ اس اعلان کے بعد اسمبلی میں حکومت پر مشکل وقت ضرور آئے گا لیکن سعودی عرب کا ٹوٹا ہوا اعتماد بحال ہوگیا ہے اور پاکستان کو ”تحفے“ میں ملے ایک ارب ڈالر واپس نہیں کرنے پڑیں گے بلکہ مزید مشترکہ اقتصادی منصوبوں کی نوید بھی مل گئی ہے۔ یہ بھی بتایا جارہا ہے کہ پاکستان ایک بار پھر سعودی ایران اُلجھاﺅ کو سُلجھانے کے لئے ایرانی قیادت سے مذاکرات کرے گا۔
سفارت کاری کے حساب سے دیکھا جائے تو سعودی عرب کی قیادت تیز رو ثابت ہوئی ہے جبکہ ایرانی حکومت اس حوالے سے ہنوز”ردعمل“ کے اثرات سے باہر نہیں آپارہی۔ یہ دُنیا ”ناراض“ رہنے سے حامی نہیں بن سکتی۔ بات چیت کرنی پڑی ہے۔ سعودی عرب کے ساتھ تنازعات بہرحال بات چیت سے ہی حل ہوں گے۔اگر ایٹمی مسئلے پر امریکہ سے بات چیت کرکے اسے ایرانیوں نے حل کر لیا ہے تو پھر ایک مسلم مُلک سے ڈائیلاگ کیوں نہیں ہوسکتا۔ خصوصاً جب پاکستان جیسا ہمسایہ ملک موجود ہے اور اس کے حکمرانوں کے بارے میں معلوم ہے کہ وہ سعودی حکومت کے قریب ہیں تو پھر اس موقع سے فائدہ اٹھانا چاہیے۔کشیدگی کسی کے حق میں بہتر نہیں۔ایران اور سعودی عرب ایک دوسرے کے مدمقابل آسکتے ہیں لیکن پاکستان کے لئے دونوں ہی ”اپنے“ ہیں۔”اپنوں“ کو باہم دست وگریبان دیکھ کر ہر پاکستانی کا دل دکھتا ہے۔سعودی عرب نے پہل کردی۔ وہ اسلام آباد آئے۔ ان کی ہر طرح سے دلجوئی کی گئی۔انہوں نے بھی ”دھمکی“ کی بجائے ”برابری“ کی بنیاد پر بات کی۔ کدورتیں دُور ہوئیں‘ قربتیں بڑھیں۔ اب ایران کو بھی آگے آنا چاہیے۔ پاکستان کو ”حقیر“جان کر اسے نفرت کا نشانہ بنانے سے کیا حاصل ہوگا۔ ہم دونوں میں سے کسی کو چھوڑ نہیں سکتے۔ہماری اس ”مجبوری“ سے ایران کو بھی فائدہ اٹھانا چاہیے۔شُکر ادا کرنا چاہیے کہ کوئی مشترکہ دوست موجود ہے۔ اسے کسی ایک کیمپ میں دھکیلنا دانش مندی نہیں ہوگا۔ایرانی وزیرخارجہ کو فوری طور پر پاکستان کا دورہ کرنا چاہیے۔ پاکستان کے حوالے سے اپنے خدشات دور کرنے چاہیں۔جنداللہ کو غیر مﺅثر کرنے میں پاکستان نے بڑی تکلیفیں اٹھائی ہیں۔ لشکر جھنگوی کے حملوں کو روکنے کے لئے پاکستان کے سپاہی اور افسر شہید ہوئے ہیں۔ افواج پاکستان دہشت گرد گروہوں کو مٹانے کے لئے کونسی قربانی نہیں دے رہی؟ اب بھی ایران کو ہمارے خلوص پر یقین نہیں۔ کھلے دل سے آئیں ۔ پاکستانی قیادت کو قرآنی تعلیمات کے مطابق دونوں مسلم ممالک کے درمیان صُلح کروانے کا فریضہ نبھانا ہوگا۔ ملکوں کے مالی اور اقتصادی مسائل اپنی جگہ‘ ترجیحات اپنی جگہ لیکن قرآن ہمیں حُکم دیتا ہے کہ جب دو مسلمان گروہوں میں ناچاقی ہوجائے تو ان کے درمیان صلح کروا دو۔ ہم کسی فریق کو بزور قوت قائل نہیں کرسکتے۔ لیکن اپنے تعلقات استعمال کرتے ہوئے لگی ہوئی آگ کو ٹھنڈا کرنے کی سعی تو کرسکتے ہیں۔

ڈاکٹر سعید الٰہی رجل العمل ہیں۔ عمل کے آدمی ہیں۔ وہ جو سوچتے ہیں کر گزرتے ہیں ۔اور چونکہ موروثی طور پر پاکستانیت سے جڑے ہوئے ہیں اس لئے ان کی سوچ پاکستان سے باہر جاتی نہیں ہے۔ ان سے جو ایک بار ملتا ہے دوبارہ ملنے کی آرزو پالتا رہتا ہےِ۔ بناوٹ سے کوسوں دور ہیں۔ یہ دنیا دار العمل ہے اور وہ زندگی کے ہر لمحے میں ملک کے لئے کچھ کر نا چاہتے ہیں۔ منصوبے اور تصّورات ہاتھ باندھے حاضر رہتے ہیں۔ عام آدمی ایک وقت میں کسی ایک اشو کو سُلجھا رہا ہوتا ہے۔ڈاکٹر صاحب کے پاس ایک نہیں کئی دماغ ہیں۔ وہ بیک وقت درجنوں محاذوں پر ڈٹے ہوئے ہیں۔ ادھر مسئلہ پیدا ہوا اُدھر کھٹاکھٹ اس کے دو تین حل سامنے آگئے۔ان کے دفتر میں مغل دربار کا سا ماحول ہوتا ہے۔ کچھ نہ کچھ نیا ہورہا ہوتا ہے ۔ بیگ راج جیسے کئی رتن قلم کاغذ لئے ہدایات لے رہے ہوتے ہیں ۔ سیاست پر تجزیہ چل رہا ہے ‘ کسی دوست کی سفارش ہورہی ہے’ ٹی وی پروگرام ریکارڈ ہور ہا ہے’ سیمینار کی تیاری ہورہی ہے’گھریلو معاملات بھی طے ہو رہے ہیں۔ ملاقاتوں کا ایک سلسلہ جاری رہتا ہے۔ جب سے ہلال احمر کے چیئرمین بنے ہیں سٹاف کی دوڑیں لگی رہتی ہیں ۔ افسر شاہی معدوم ہوگئی ہے۔ کام ‘کام اور بس کام کا منظر دیکھنا ہو تو اس انتھک مسیحا کے ساتھ ہو لیجئے۔ آپ جسمانی اور دماغی طور پر تھک جائیں گے لیکن ڈاکٹر سعید الٰہی کو ہشاش بشاش پائیں گے۔ وہ کم خور ہیں۔ بہت کم سوتے ہیں۔ کام ہی ان کی ”انجوائے منٹ” ہے۔ہلال احمر فورم کا قیام ان کا تازہ قدم ہے۔ مصیبتوں میں گھرے اور تباہیوں سے متاثرہ لوگوں کے انسانی مسائل کو میڈیا’ متعلقہ اداروں اور حکومت تک پہنچانے کے لئے تشکیل دیئے گئے اس فورم کا پہلا اجلاس تھا۔ مجھے بھی مدعو کیا گیا تھا ۔ یہ ایک سیمینار تھا جس میں وزیرستان سے عارضی طور پر بے گھر ہوجانے والے لاکھوں پاکستانیوں کے حوالے سے درپیش مشکلات اور اقدامات پر بات کی گئی۔سرحدوں کے وفاقی وزیر محترم جنرل عبدالقادر بلوچ مہمان خصوصی تھے۔ مجھے اعزاز حاصل ہوا کہ تلاوت اور تشریح سے پروگرام کا آغاز کروں۔ انسانی خدمت کے حوالے سے آیات تلاوت کیں اور احادیث نبویۖ کی روشنی میں مختصر تشریح بھی پیش کی۔ جناب عبدالقادر بلوچ کا خطاب انتہائی پُرمغز تھا۔ انہوں نے کہا کہ وزیرستان اور خیبر ایجنسی سے بے گھر ہونے والے لوگ سب سے سچے اور پکے پاکستانی ہیں۔ ان کی حب الوطنی پر شک کرنا لاکھوں مائوں ‘ بہنوں اور بچوں کی لازوال قربانیوں کی توہین کے مترادف ہے۔ کون ہے جو اپنا گھر چھوڑنا چاہتا ہے۔ یہ لوگ عارضی طور پر بے گھرنہیں ہوئے۔ ان میں سے اکثر وہ ہیں جو دس دس سال سے اپنے گھر سے دُور کانٹوں بھری زندگی گذار رہے ہیں۔ عبدالقادر بلوچ کا کہنا تھا کہ ان کی مہمان نوازی میں بہت سی کوتاہیاں ہوئی ہیں۔ لیکن ان کی واپسی باعزت طور پر ہورہی ہے۔ پھر سے گھر آباد کرنے کے لئے پورے وسائل مہیا کئے جارہے ہیں۔ انہوں نے تجویز دی کہ نئے ادارے بنانے کی بجائے ہلال احمر جیسے اداروں پر انحصار کرنا چاہے۔ یہ ایسا قومی ادارہ ہے جس پر باہر کے لوگ بھی اعتماد کرتے ہیں اور اس کے پاس بہترین انفراسٹرکچر بھی موجود ہےِ۔ وفاقی وزیر نے یہ بات کہہ کر سب کو حیران کردیا ہے کہ ہلال احمر پہلے ایک مُردہ گھوڑا تھا اور ڈاکٹر سعید الٰہی نے اس مُردہ گھوڑے میں جان ڈال دی ہے۔ سیمینار میں ڈائریکٹر آپریشنز غلام محمد اعوان نے ہلال احمر کیطرف سے آئی ڈی پیز کے لئے مہیا کی گئی خدمات پر تفصیلی روشنی ڈالی۔ انہوں نے بے گھر ہونے والے افراد کے لئے ایک مربوط نظام وضع کرنے پر زور دیا۔ سرجن جنرل میجر جنرل آصف نے بھی ہلال احمر کے کام کی تعریف کی۔ فاٹا اور گلگت بلتستان ہلال احمر کے چیئرمین بھی مقررین میں شامل تھے۔
یہ ایک مختصر سیمینار تھا لیکن ہر مقرر نے اپنے طے شدہ وقت میں اہم اور معلوماتی باتیں کیں۔حاضرین کے کمنٹس نے پروگرام کو مزید دلچسپ بنا دیا تھا۔ معروف کالم نگار اور اسلامی دانشور جناب اوریا مقبول جان نے کہا کہ یہاں بہت سے فورم بنتے ہیں۔کچھ باہر کی فنڈنگ سے چلتے ہیں اور بعض سیاسی ایجنڈے کو پروان چڑھانے کے لئے سرگرم رہتے ہیں۔ ہلال احمر فورم خالصتاً انسانی اور قومی اشو پر سنجیدہ سوچ بچار کے لئے قائم کیا گیا ہےِ۔ ہمیں اپنی اپنی عصبتیوں کو بالائے طاق رکھ کر قومی مسائل کی نشاندہی اور ان کے حل کے لئے بحث و مباحثے کو رواج دینا چاہیے۔ امریکہ اس لئے حکمران بنا ہوا ہے کہ وہاں ہزاروںتھنک ٹینک ہیں جو ریسرچ کی بنیاد پر کام کرتے اور اپنی حکومتوں کو متواتر رہنمائی فراہم کرتے ہیں۔فورم میں کینیڈین ریڈکراس کے صدر نے بھی حصہ لیا۔ انہوں نے ہلال احمر فورم کے قیام کو خوب سراہا۔
ہلال احمر کے رضاکاروں اور سٹاف ممبران نے بڑی دلجمی کے ساتھ اس سیمینار میں حصہ لیا۔ قومی میڈیا کی بھرپور نمائندگی بھی موجود تھی۔مشران کی نمائندگی بھی دکھائی دے رہی تھی۔ تقریب کے اختتام پر وسیع لان میں چائے کا اہتمام کیا گیا تھا۔ یہ سیمینار محسنین پاکستان کے ساتھ یکجہتی کا ایک اعادہ تھا اور ان کی قربانیوں کو سامنے لانے کا اہتمام بھی ۔

وجیہہ الدین احمد انتہائی منکسر المزاج ہیں۔ انہیں اپنے مشن سے عشق ہے۔ ان کا پورا خاندان ہی شائد ایسے مشنری مزاج کے افرادپر مشتمل ہے۔ربع صدی سے علم وحکمت کی تعلیم عام کرنے والے اس علمی گھرانے کو اپنے سربراہ مولوی ریاض الدین احمدمرحوم کی قومی سطح کی کاوشوں اور علمی نوعیت کی سرگرمیوں پر بہت فخر ہے اور وہ ان کاوشوں کو اپنی خاندانی تاریخ کا ایک سنہری باب تصورکرتے ہیں۔مولوی ریاض الدین احمد مرحوم کے سب سے چھوٹے بیٹے جناب وجیہہ الدین احمد سے کراچی کے علاقے ناظم آباد میں واقع جناح یونیورسٹی فار وومن کے وسیع وعریض کیمپس میں ملاقات ہوئی۔جناب وجیہہ الدین احمد گوناں گوں مصروفیات کے باوجود خوش مزاج شخص ہیں۔ٹھہرے ہوئے لہجے میں اپنا مدعابیان کرنے کے ماہر بھی ہیں۔

”میرے والد مولوی ریاض الدین احمد علی گڑھ یونیورسٹی کے فارغ التحصیل تھے۔ انہیں عورتوں کی تعلیم کے حوالے سے ہمیشہ فکردامن گیر رہتی تھی۔اس حوالے سے وہ اکثر کہا کرتے تھے’

”اگر ہم اپنے ملک پاکستان میں خواندگی کی شرح تیزی سے بڑھانا چاہتے ہیں تو ہمیں خواتین کی تعلیم کی طرف بھرپور توجہ دینی ہوگی۔ میری نظر میں ایک پڑھی لکھی ماں ایک پڑھے لکھے باپ سے زیادہ بہتر طور پر اپنے بچوں کو زیور تعلیم سے آراستہ کرسکتی ہے ۔ اس کو اس طور پربھی محسوس کرسکتے ہیں کہ اگر آپ بچوں سے سوال کریں کہ بڑے ہو کر کیا بنو گے؟ تو لڑکوں کا جواب زیادہ تر یہی ہوتا ہے کہ انجینئر بنیں گے’ ڈاکٹر بنیں گے یا پائلٹ بنیں گے لیکن لڑکیاں زیادہ تر یہی خواہش کرتی ہیں کہ وہ بڑی ہو کر ٹیچر بنیں گی۔ گو کہ ہماری آنے والی پوری نسل کسی نہ کسی طور پر جذبہ رکھتی ہے لیکن میں اپنی بیٹیوں کے جذبے کو سلام پیش کرتا ہوں جو صحیح معنوں میں ہماری آنئدہ نسلوں کی معمار ہیں”۔
مولوی ریاض الدین احمد نے اپنی اسی فکر کا ذکر قائداعظم سے بھی کیا۔آگرہ سے تعلق رکھنے والے اس خانوادے کے متحرک سپوت جناب الحاج مولوی ریاض الدین احمد تحریک قیام پاکستان میں پیش پیش رہے تھے۔آگرہ میں جب کبھی قائداعظمتشریف لاتے تو مولوی ریاض الدین کو بھی طلب فرماتے۔مولوی صاحب کے جذبے کو دیکھتے ہوئے قائداعظم نے فرمایا’
”پاکستان بن رہا ہے۔پہلے پاکستان کے بنانے میں دن رات ایک کردیجئے پھر خواتین کی تعلیم کے لئے میرے نام سے یونیورسٹی قائم کرنا”پاکستان بن گیا اور حسب وعدہ و جذبہ مولوی ریاض الدین احمدنے آگرہ چھوڑ کر 1948ء میں کراچی میں پہلے تعلیمی ادارے کی بنیاد رکھی۔ دیکھتے ہی دیکھتے تعلیم کی شمع فروزاں ہوتی گئی اور انجمن اسلامیہ سکول سمیت کئی تعلیمی ادارے کھل گئے۔1972ء میں بڑے بڑے تعلیمی ادارے قومیائے گئے اور جناب ریاض الدین احمد کے قائم کردہ اداروں کو بھی حکومت نے قبضہ میں لے لیا۔ لیکن 1984ء میں قومیائے گئے ادارے واپس مل گئے۔پھر زور وشور کے ساتھ یونیورسٹی کے قیام کاکام تیزی سے شروع ہوگیا”۔
1993ء میں سندھ اسمبلی نے جناح یونیورسٹی فار وومن کا چارٹر دے دیا۔حکیم سعید شہید قائمقام گورنر سندھ نے اس یونیورسٹی کا سنگ بنیاد رکھا اور یوں سرسید احمد کے ایک جانشین اورلیاقت علی خان کے مایہ ناز کارکن الحاج مولوی ریاض الدین احمد اور ان کے بیٹوں نے وہ عہد پورا کر دکھایا جو انہوں نے آگرہ میں قیام کے دوران قائداعطم کے ساتھ کیا تھا۔ وہ قائداعظم کے ادنیٰ سے سپاہی تھے جنہوں نے قائداعظم کے تمام ارشادات اور نصیحتوں پر عمل کرکے دکھا دیا۔نظم و ضبط’اتحاد’محنت ‘لگن’ایثار’قربانی ‘ہمت عزم وارادہ کا زندہ نمونہ تھے۔ معروف معلمہ محترمہ نورالصباح چغتائی نے ایک جگہ لکھاہے ‘
” ریاض الدین صاحب نہایت سادہ لباس پہنتے اور پرانی روایات اور رسم و رواج کو قدر کی نگاہ سے دیکھتے’ادارے میں داخل ہوتے ہی وہ ایک طائرانہ نگاہ استانیوں اور طالبات کے لباس پر ضرور ڈالتے اور اگر کوئی ٹیڈی یا قابل اعتراض لباس میں ہوتا تو اس کو وہیں ایک باپ کی طرح مشفقانہ انداز میں نصیحت کرتے اور کبھی سخت سست بھی کہہ دیتے۔ریاض الدین صاحب نہایت غریب پرور انسان تھے جب کوئی طالبہ ان کے پاس فیس معاف کروانے کے لئے درخواست لے جاتی وہ لازمی طور پر ہمدردی سے غور کرنے کے لئے مجھے لکھا کرتے۔انہوں نے کہہ رکھا تھا کہ ان بچیوں کی فیس پہلے معاف کی جائے جن کے سر پر باپ کا سایہ نہیں ہے اس کے بعد دوسری نادار طالبات کا خیال رکھا جائے یہی وجہ ہے کہ ہزاروں نادار اور یتیم بچیوں نے اس ادارے سے تعلیم پائی اور وہ بچیاں آج برسرروزگار ہو کر اپنے خاندان کی کفالت کر رہی ہیں۔”شاعر نے شائدایسی ہستیوں کے بارے میں کہا ہے’
ماناکہ اس زمین کو نہ گلزار کر سکے
کچھ خارکم ہوئے تو ہیں گذرے جدھر سے ہم
ملاقات دو گھنٹے تک جاری رہی۔ساڑھے دس ایکڑ پر پھیلی اس یونیورسٹی کے مختلف شعبہ جات کا دورہ بھی کرایا گیا۔ اس موقع پر علم و عرفان کا چلتا پھرتا نمونہ پروفیسر ڈاکٹر نسیم فاروقی (وائس چانسلر) بھی موجود تھے۔ چھ ہزار بچیاں اور تین ہزار لڑکے یہاں زیور تعلیم سے آراستہ ہوتے ہیں ۔انتہائی کم فیسوں میں جدید ترین طرز کی تعلیم کا حصول ایک بہترین صدقہ جاریہ ہے۔
جناب وجیہہ الدین احمد کی تجویز تھی کہ ڈاکٹر صاحب آئندہ جب آپ کراچی آئیں تو یونیورسٹی آڈیٹوریم میں آپ ایک مفصل لیکچر دیں۔میں اور میری علمی حیثیت کیا لیکن جی چاہتا ہے کہ دینی و دنیاوی تعلیم کے اس جیتے جاگتے شہر کے ساکنان کے ساتھ مل ضرور ملوں کہ قائداعظم کی اجازت پر ”جناح”لفظ کے ساتھ شروع ہونے والایہ تعلیمی ادارہ تحریک پاکستان کے دنوں کی یاد تازہ کرنے کا خوبصورت ذریعہ ہے۔

اچھی حکمرانی کا ایک تقاضا یہ بھی ہوتاہے کہ اچھے لوگوں کو اداروں کا سربراہ مقرر کیا جائے۔موجودہ حکومت کا دعویٰ ہے کہ وہ کرپشن اور نااہلی سے پاک افراد کو مختلف قومی اداروں کی ذمہ داریاں سونپ رہی ہے تاکہ ادارے مضبوط ہوں اور اپنی کارکردگی کی بنیاد پر حکومت کے لئے نیک نامی کا باعث بن سکیں۔ ایک سال گذر چکا ہے۔ درجن سے زائد قومی ادارے اب بھی ایسے ہیں جن کے سربراہان مقرر نہیں کئے جاسکے۔لیکن قابل اطمینان پہلو یہ ہے کہ جن لوگوں کو میاں محمد نوازشریف نے ذمہ داریاں سونپی ہیں وہ بڑی حد تک اہل اور ایماندار ثابت ہوئے ہیں ۔میرٹ کی یہی کڑی شرائط اور حد سے بڑھی ہوئی احتیاط دامن گیر ہوگی جس کے سبب حکومت کومناسب لوگ میسر نہیں آپارہے۔
ہلال احمر اس لحاظ سے ایک خوش قسمت ادارہ کہا جاسکتا ہے کہ اس کے حصے میں ڈاکٹر سعید الٰہی جیسی متحرک شخصیت آئی ہے۔ڈاکٹر صاحب سے میرا تعارف سرسری سا ہے لیکن جو کچھ اخبارات میں چھپا ہے اور ٹی وی پر دیکھا گیا ہے اس سے اندازہ کیا جاسکتا ہے کہ انسانی خدمت کے اس ادارے نے انگڑائی ضرور لی ہے۔مارچ 1948ء میں انجمن ہلال احمر پاکستان کے نام سے قائم ہونے والے اس فلاحی ادارے کے قائداعظم محمد علی جناح پہلے سربراہ تھے۔ ہمارے دوراندیش قائد نے عالمی ریڈکراس کے حصے کے طور پر ہلال احمر کی بنیاد رکھی اور اپنی افتتاحی تقریر میں ارشاد فرمایا کہ ہلال احمر قومی اور بین الاقوامی سطح پر آنے والی قدرتی آفات سے متاثرہ لوگوں کی مدد میں بھرپور حصہ لے گی۔اور پھر ایسا ہی ہوا ۔قیام پاکستان کے وقت کراچی اور لاہور میں مہاجرین کے کیمپ ہوں’ پاک بھارت جنگیں ہوں’سیلاب ہوں’ اکتوبر2005ء کا زلزلہ ہو’آواران کی بربادی ہو یا تھر کا قحط ۔ ادارے کے کارکنان اور رضاکاران سرخ جیکٹیں پہنے مصیبت زدہ پاکستانیوں کی مدد میں مصروف نظر آئے۔قرآن پاک کی آیت”’جس نے ایک انسان کی جان بچائی گویا اس نے تمام انسانیت کی جان بچائی” کو زندگی کا مقصد بنائے کم تر وسائل اور نامساعد حالات میں ان لوگوں نے اپنے فرض کی ادائیگی سے کوتاہی نہیں برتی۔حکومتیں تبدیل ہوتی رہیں’ نظام الٹتے رہے’شخصیات آتی اور جاتی رہیں لیکن ہلال احمر یا ریڈکریسنٹ انسانی خدمت کے کاموں سے پیچھے نہیں ہٹی۔مایوسی’ خوف’حرص اور ہوس۔ کوئی منفی جذبہ بھی اس کے رضاکاروں اور خدمت گذاروں کے مشن کی راہ میں حائل نہ ہوسکا۔
ہلال احمر پاکستان کے ترجمان اور معروف کالم نگارجناب بیگ راج نے گذشتہ دنوں ایوان صدر میں ہلال احمر فری ایمبولینس سروس 1030 کے افتتاح کے موقع پر بتایا کہ ”یہ ادارہ زیادہ تر قدرتی آفات کے حوالے سے امدادی سرگرمیوں تک محدود تھا لیکن ڈاکٹر سعید الٰہی کے آنے سے اس ادارے کے دائرہ کار میں وسعت پیدا ہوئی ہے۔معمول کے حالات میں پاکستان کے اندر انسانی ہمدردی کے کاموں کو بھی پروگرام کا حصہ بنا دیا گیا ہے۔صحت کے حوالے سے لوگوں کے اندر شعور کی بیداری’تعلیم سے محروم آبادیوں کے لئے ضروری تعلیم وتربیت’سڑک پار کرانا’ گندگی کے ڈھیر اٹھانا’مریضوں کی دیکھ بھال کرنا’کسی دھماکے’کسی دہشتگردی’کسی ہجرت اورکسی فرقت کی تکلیفوں’آزمائشوں اور مصیبتوں کو کم کرنے کے لئے ہلال احمر کے رضاکاروں کو ڈاکٹر صاحب ہر دم تیار دیکھنا چاہتے ہیں”۔ترجمان ہلال احمر کہہ رہے تھے ”ڈاکٹر سعید الٰہی پیشے کے اعتبار سے ڈاکٹر ہیں۔ انہیں صحت عامہ اور حفظان صحت کے حوالے سے انقلابی پروگرام بنانے اور پایہ تکمیل تک پہنچانے کا وسیع تجربہ ہے ۔ انہوں نے میاں شہبازشریف جیسے برق رفتار وزیراعلیٰ کی سربراہی میں ڈینگی مہم کو کامیابی سے چلایا ہے۔ وہ چوبیس میں سے اٹھارہ بیس گھنٹے کام کرنے کے عادی ہیں۔تکبر ان کو چھو کر نہیں گیا۔انکساری ‘ معاملہ فہمی اور خودداری انہیں وراثت میں ملی ہے۔ انہوں نے ہلال احمر کی ذمہ داریاں سنبھالنے کے بعد اپنے دفتر میں اپنا منشور ایک شعر کی صورت میں آویزاں کیا’
شکو ہء ظلمت شب سے تو کہیں بہتر تھا
اپنے حصے کی کوئی شمع جلاتے جاتے
اور سچ یہ ہے کہ وہ اپنے حصے کی شمع تو جلاتے ہی ہیں اپنے ساتھ چلنے والوں کی بجھی شمعیں بھی روشن کرنے کی فکر میں رہتے ہیں ۔ان کے ہمراہ تجربہ کار اور نظم و ضبط کی پابند ٹیم ہے۔ اور ان کے سامنے خدمت انسانیت کی کٹھن منزل ہے۔”
ترجمان ہلال احمر مجھے ڈاکٹر سعید الٰہی کی شخصیت کے بارے میں بریفنگ دے رہے تھے اور میں ہر آنے والے مہمان کو کھلے بازوئوں کے ساتھ خوش آمدید کہنے والے جواں سال مسیحا’ ڈاکٹر سعید الٰہی کوقحط الرجال کے اس عالم میں ایک غنیمت سمجھ رہا تھا۔اقبال کے شعر نے میرے کان میں سرگوشی کی ‘
افراد کے ہاتھوں میں ہے اقوام کی تقدیر
ہر فرد ہے ملتّ کے مقدر کا ستارہ
مجھے یقین ہوگیا کہ کم از کم دکھی انسانوں کی خدمت کے لئے میاں محمد نواز شریف کا انتخاب قابل تحسین ہے ۔

 مظفر آباد کی ہردلعزیز شخصیت اور مغل قوم کے عظیم فرزند عارف مغل حکومت آزادکشمیر میں مشیر برائے وزارت اطلاعات و نشریات ہیں ۔گزشتہ دنوں انہوں نے اپنی بیٹی کی شادی پر مدعو کیا۔ ہمدم دیرنہ عظمت اللہ اور معروف صحافی اسد عباس بھی ہمراہ تھے۔ آجکل نظریہ پاکستان کی ترویج کے لئے کمر بستہ ہوں اوراللہ تعالیٰ کی کرم نوازی سے اس خدمت کے لئے بہتر سے بہتر مواقع میسر آرہے ہیں ۔ میں کیا اور میری ہستی کیا۔ ارادہ نیک ہو تو اسباب پیدا ہوہی جاتے ہیں۔عظمت اللہ نے بتایا کہ ان کے کلاس فیلو اور قائداعطم یونیورسٹی میں راقم کے ہاسٹل فیلوجناب فیاض علی عباسی آج کل پرنسپل سیکرٹری ٹو پرائم منسٹر کے عہدے پر فائز ہیں اور ان سے بھی ملنا ضروری ہے۔ باتوں باتوں میں یہ طے پایا کہ ممکن ہو تو فیاض عباسی صاحب کی وساطت سے وزیراعظم چوہدری عبدالمجید سے بھی ملاقات ہوجائے اور ان کو نظریہ پاکستان کے حوالے سے لٹریچر دیا جائے اور التماس کی جائے کہ پاکستان کے اساسی نظریہ سے آگاہی کے لئے تعلیمی اداروں میں خصوصی سرگرمیاں شروع کرائی جائیں۔

ملاقات طے پاگئی ۔ جناب وزیراعظم نے بڑی خندہ پیشانی سے ہمیں وزیراعظم ہائوس میں خوش آمدید کہا۔ چوہدری صاحب سے گفتگو شروع ہوئی۔ جب راقم نے قرآنی آیات اور علامہ اقبال کے اشعار کی روشنی میں ”نظریہ پاکستان اور نظریہ اسلام” کی وضاحت کی تو وزیراعظم نے نہ صرف اس کی تائید کی بلکہ انہوں نے اہم نکات پر دلائل دیئے۔مجھے یہ جان کر حیرانی ہوئی کہ ڈیل ڈول سے بظاہر سادہ دکھائی دینے والا شخص اندر سے کتنا گہرا اور سماجی اور سیاسی مسائل پر کس قدر مضبوط گرفت رکھتا ہے۔ پندرہ منٹ والی ملاقات اڑھائی گھنٹے تک جاری رہی۔ میں نے جناب ڈاکٹر مجید نظامی اور انکل نسیم انور بیگ (مرحوم) کی حوصلہ افزائی سے قائم ہونے والے نظریہ پاکستان سنٹر کی سرگرمیوں سے آگاہ کیا۔ مستقبل کے حوالے سے اپنے ارادوں اور منصوبوں سے آگاہ کیا اور تعلیمی اداروں میں طلبہ و طالبات کے دلوں میں اس نظریے کے ساتھ وابستگی پیدا کرنے کے لئے کی گئی کوششوں اور کاوشوں کا تفصیلی تذکرہ کیا۔جناب وزیراعظم نے بڑے انہماک سے گفتگو سنی اور پھر انہوں نے بتایا کہ وہ بھی یہی چاہتے ہیں کہ تعلیمی اداروں میں محض انگریزی پر ہی زور نہ دیا جائے بلکہ بچوں کے ذہنوں میں آغاز سے ہی پاکستان’ نظریہ پاکستان اور قرآن کے بارے میں فہم و ادراک پیدا کردیا جائے۔ وزیراعظم کا کہنا تھا کہ ہمیں اپنے بچوں کو اسلامی تعلیم دینی چاہیے تاکہ وہ ڈاکٹر اور انجینئر بن کر اس مٹی ‘اس تہذیب اور اسلامی اقدار سے جڑے رہیں۔”ان گائیڈڈ میزائل” تیار نہیں کرنے بلکہ سچے اور اچھے شہری ہی ہمارے اتحاد ‘یکجہتی اور ترقی کے ضامن ہوسکتے ہیں۔ان کا کہنا تھا کہ وہ یکساں نصاب متعارف کروانے کے لئے سرگرم عمل ہیں ۔انہوں نے کہا کہ نظریہ پاکستان سنٹر کو اس نصاب میں نظریاتی پہلوئوں کے حوالے سے تجاویز دینی چاہیں۔
وزیراعظم آزادکشمیر سے تفصیلی ملاقات کے دوران کشمیر کے مسائل اور پاکستانی حکومت کے طرز حکمرانی پر بھی بات ہوئی۔ چوہدری عبدالمجید کا کہنا تھا کہ کشمیریوں کے مسائل کے حوالے سے حکومت پاکستان کے حکام پوری طرح تعاون نہیں کرتے۔ وعدے تو بہت ہوچکے ہیں لیکن ان وعدوں کی تکمیل بڑا ہی پیچیدہ عمل ہے۔انہوں نے محترمہ بے نظیر بھٹو کو بار بار یاد کیا اور مرحومہ کی بے حد تعریف بھی کی۔انہوں نے کہا کہ میاں نواز شریف پاکستان کی آخری امید ہیں کیونکہ ان کے اندر کام کرنے کی صلاحیت موجود ہے۔اور ان کی عوام الناس میں following بھی موجود ہے۔انہوں نے کہا کہ سابقہ زرداری دور میں بھی بہت سی ایسی پالیسیاں دی گئی ہیں جن کے دوررس نتائج نکلیں گے۔ اور جن کے فوائد سے آنے والی حکومتیں اور عوام فائدہ اٹھائیں گے۔ ان کے مطابق جمہوریت کا تسلسل لازمی ہے۔اسی سے ترقی اور خوشحالی کے دروازے کھلیں گے۔وزیراعظم نے یہ بھی کہا کہ اگر میاں صاحب بھی اس ملک کو صحیح ڈگر پر نہ ڈال سکے تو پھر منزل بہت دور چلی جائے گی۔چوہدری صاحب نے مسئلہ کشمیر کے حوالے سے بھی اپنا موقف دھرایا اور انہوںنے کشمیر کے اندر توانائی کے لئے چھوٹے ڈیموں کی تعمیر کی بات کی۔ وہ منگلا ڈیم اپ رائزنگ کے حوالے سے لوگوں کی شکایات کا بھی ذکر کرتے رہے۔
وضح دار شخصیت رکھنے والے وزیراعظم نے بہترین تواضع کرنے کے بعد مجھے اپنی گاڑی میں بیٹھایا اور ہم عارف مغل صاحب کے ہاں شادی میں پہنچے۔ وزیراعظم نے وزراء سے میراا تعارف کروایا اورشادی کے اختتام پر انہوں نے بڑی چاہت سے دوبارہ آنے کی دعوت دی اور خود بھی اسلام آباد میں آکر تفصیلی ملاقات کا وعدہ کیا۔
ملاقات کے بعد احساس ہوا کہ چوہدری صاحب ایک ایسے وزیراعظم ہیں جن کا دل اپنے لوگوں کے لئے دھڑکتا ہے۔ وہ ہر شعبہ میں بہتری پیدا کرنے کے لئے ایک تڑپ رکھتے ہیں اور اس غرض کے لئے وہ اپنے سیاسی حریفوں تک سے بھی مشاورت کرتے ہیں۔
شادی سے فارغ ہوئے توہم فیاض عباسی کے ہمراہ وزیر تعلیم میاں عبدالوحید کے ہاں ان کی تیمارداری کے لئے گئے۔چوہدری محمد رشید’ وزیرتعمیرات عامہ و مواصلات اور سردار جاوید ایوب وزیر جنگلات سے بھی تفصیلی ملاقاتیں ہوئیں سکالرز کالج میں نظریہ پاکستان کے حوالے سے طلبہ و طالبات کے لئے ایک Motivational لیکچر دیااور سکالرز کلب کے افتتاح کے لئے بھی خاکسار کو عزت ملی ۔مظفرآباد آمد سے لے کر رخصتی تک شہد جیسے میٹھے انسان نصیر مغل کی محبتیں ہر دم ہمارے شامل حال رہیں۔ دل ان کے تحریری شکریے پر مجبور ہے۔

یہ سچ ہے کہ ہمسائے ماںجائے ہوتے ہیں۔ہمسایوں کے حقوق کا اسلامی تعلیمات میں شاندار تذکرہ ہے۔ اگر آپ پیٹ بھر کر سوئیں اور آپ کا ہمسایہ بھوکا رہے تویہ صورتحال پیغمبراسلام محسن انسانیت کو ہرگز پسند نہیں ہے۔ایسے مسلمانوں کو صاحب ایمان ہونے کی سند ہی نصیب نہیں ہوتی۔ لیکن یہ ضروری نہیں کہ آپ ہمسایوں کے حقوق پورے کرتے رہیں اور ہمسایہ بھی آپ کے حقوق کا احترام کرے۔ہمسایوں کے حوالے سے تمام تعلیمات اسلامی معاشرے کی خصوصیات ہیں۔ہمسایوں کے حقوق کے فارمولے کو ملکوں اور قوموں پر منطبق نہیں کیا جاسکتا۔اگر ایسا ہوتا تو ریاست مدینہ کیخلاف جنگ کرنے والے سارے گروہ اور قومیںہمسایہ ہی تھیں۔جہاں حق اور باطل اور خیر اور شر کی تفریق لازم ہو وہاں ہمسایوں کے حقوق کو حوالہ کے طور پر پیش کرنا اسوہ رسول سے انحراف ہوگا۔

جب بعض دانشور اور سیاستدان پاکستان کو ہمسایوں کے حقوق کا حوالہ دے کر بھارت سے دوستی کرنے کا شوق پیدا کرتے ہیں تو وہ دراصل زمینی حقائق کو یکسر بھلا دیتے ہیں۔ ہندو اور مسلمان آج سے نہیں صدیوں سے ایک دوسرے کے مخالف‘دشمن‘ بلکہ ضد رہے ہیں۔مسلمانوں نے ہندوستان پر اپنی قوت اور طاقت کے ذریعے حکمرانی کی ہے ۔ہندوﺅں کے لئے یہ ایک تلخ حقیقت ہے جسے شائد مسلمان بھلا دیں لیکن ہندو کبھی بھلا نہیں پائیں گے۔مذہبی اعتبار سے مسلمانوں کے خلاف نفرت ہندو عقیدہ ہے جسے ہندو چھوڑنے کے لئے ہرگز تیار نہیں ہیں۔ ان کی اس تنگ نظری کے مظاہرے ہزار سالہ تاریخ میں بار بار ہوئے ہیں۔
قیام پاکستان دراصل انہی تاریخی حقائق کا ایک اظہار ہے۔قائداعظمؒ نے مجبور ہو کر علیحدہ مملکت کا آپشن قبول کیا تھا۔ پاکستان اور بھارت کی تین جنگیں بھی بھارتی تنگ نظری کا ہی ثبوت ہیں۔ آج بھی کشمیر میں ہندوفوجیں مسلمانوں پر ظلم کے پہاڑ توڑ رہی ہیں۔ غیر جانبدار سروے رپورٹوں میں بار بار انکشافات ہورہے ہیں کہ بھارت کے اندر مسلمانوں کو ہر شعبہ حیات میں رگیدا جارہا ہے۔حال ہی میںبھارت میں مسلمانوں پرپھر قیامت توڑی گئی ہے۔اتنے واقعات اور حادثات ہیں کہ صفحات کے صفحات لکھے اور بھرے جاسکتے ہیں۔لیکن ہمارے وزیراعظم جناب میاں محمد نوازشریف بار بار دھراتے ہیں کہ انہیں بھارت کے ساتھ دوستی کے لئے مینڈیٹ دیا گیا ہے۔حالانکہ حقیقت یہ ہے کہ میاں نوازشریف کو بھارت نواز آصف علی زرداری اور ان کے کرپٹ ٹولے سے نجات کے لئے لوگوں نے ووٹ دیئے تھے۔ اگر انہیں یقین نہیں آتا تو الیکشن مہم کے دوران شائع ہونے والے اپنے اشتہارات کو ایک بار پھر پڑھ لیں۔
عام پاکستانی کی سمجھ سے بالاتر ہے کہ اگر بھارت کے ساتھ دوستی ہوجائے گی تو اس سے مسئلہ کشمیر کیسے حل ہوجائے گا۔ محض امن برائے امن تو کسی خوشحالی کی ضمانت نہیں ہوتا۔ دنیا میں بے شمار ممالک ہیں جو باہم امن سے رہ رہے ہیں اور ان کا کسی ملک کے ساتھ کوئی جھگڑا بھی نہیں لیکن پھر بھی بھوک سے مر رہے ہیں۔جنگ نہیں ہونی چاہیے لیکن کوئی دشمن آپ کی گردن پر پاﺅں رکھے بیٹھا ہے اور آپ آہ و بکا بھی نہ کریں کہ کہیں امن کی فضاءخراب نہ ہوجائے۔ بھارت نے ہماری شہ رگ پرقبضہ تو کیا ہی تھا اب کابل میں بیٹھ کرپراکسی وار بھی لڑ رہا ہے۔ ہمیں سب سے پہلے اپنی شہ رگ آزاد کرانے کی جدوجہد کرنی چاہیے۔ ایسا نہ ہو کہ امن کی خواہش میں دشمن ہمارا گلا ہی دبا دے۔
میاں نوازشریف کو کون سمجھائے کہ وہ بھارت سے ہمسائیگی کی حد تک ہی محدود رہیں دوستی کے فریب میں نہ آئیں۔ترکی میں جا کر بھی بھارت سے دوستی کے لئے تڑپ ایک ذلت ہے۔ صحافت کی دنیا سے کوئی بھی آواز اس خود فریبی اور رسوائی کے خلاف نہیں اٹھتی۔ہاتھی کے پاﺅں میں سب کے پاﺅں ۔صرف ایک شخص ہے جو بھارتی آبی جارحیت اورعلاقائی بالادستی کیخلاف پہاڑ کی طرح ڈٹا ہوا ہے۔ یہ کوئی اور نہیں نظریہ پاکستان ٹرسٹ کے چیئرمین ڈاکٹر مجید نظامی ہیں جو میاں صاحب کی ہر لغزش پر گرفت کرنے اور ان کی یکطرفہ بھارت دوستی کوپاکستان کی سلامتی کے خلاف عمل قراردیتے ہیں۔ اللہ ڈاکٹر صاحب کا سایہ اس قوم پر سلامت رکھے!

قارئین اکرام! میں آپ سے دست بستہ پہلے تو معافی مانگتا ہوں۔میں نے مسلم لیگ (ن) کے انتخابی نعروں اور وعدوں سے متاثر ہو کر ”خوشخبریاں آنے لگیں“ کے عنوان سے کالم لکھا اور اپنے طور پر یقین کر لیا تھا کہ اب عوام الناس کی معاشی حالت بہتر ہوجائے گی۔لیکن گزشتہ دنوں کے پے در پے ایسے حکومتی اقدامات سامنے آئے ہیں کہ مجھے اپنے لکھے ہوئے لفظوں پر شرمندگی ہورہی ہے اور میں ایک بار پھر سے ”حقیقت پسندی“ کی پرخار وادیوں میں الجھ گیا ہوں۔پنجاب فورم نے حکومت سے مطالبہ کیا ہے کہ بھارت کی طرز پر پاکستان میں بھی غرباءکے لئے فوڈ سیکورٹی بل پارلیمنٹ میں لایا جائے اور غریبوں کے لئے سستی دال روٹی کا قانون بنا دیا جائے۔ میں نے اخبارات میں شائع ہونے والی یہ خبر پڑھی تو مجھے سخت افسوس ہوا۔آج پاکستان کے اقتصادی حالات اس نہج پر پہنچ گئے ہیں

کہ روٹی جیسی عام خوراک بھی عام پاکستانیوں کی دسترس سے باہر ہوگئی ہے۔کبھی یہی پنجاب تھا جو پورے متحدہ ہندوستان کو خوراک فراہم کرتا تھا اور پاکستان بننے سے لے کر دو چار ماہ قبل تک کم از کم روٹی کی قیمتیں کنٹرول میں تھیں ۔لیکن آخر یہ کونسی معاشی مہارت ہے جس کے نتیجے میں روٹی کی قیمت ہی کنٹرول میں نہیں آرہی۔زمین اپنی‘ پانی اپنا‘ کھاد کے کارخانے اپنے‘کھاد کے لئے استعمال ہونے والی گیس اپنی‘تندور ٹیکنالوجی اپنی‘ تندورچی اپنے‘ گندم کو آٹے میں تبدیل کرنے والی ملیں بھی پاکستان میں ہی بنتی ہیں۔آخر کیا وجوہات ہیں کہ ہماری اپنی روٹی بھی ہمارا ساتھ نبھانے پر تیار نہیں۔روٹی کا سرکاری طور پر طے کیا گیا وزن ایک سو بیس گرام ہے۔ اور شریف برادران کی حکومت سے قبل یہ روٹی چار یا پانچ روپے میں مل جاتی تھی۔ اب روٹی کا وزن ستر گرام کردیا گیا ہے لیکن قیمت آٹھ روپے تک پہنچ گئی ہے۔خیبرپختونخواہ میں بیس روپے تک روٹی فروخت ہورہی ہے۔آخر کونسی آفت آگئی ہے کہ موجودہ حکومت کے معاشی ماہرین پاکستانیوں کی بنیادی خوراک کو بھی چھین رہے ہیں ۔یہ بات سمجھانے کی ضرورت نہیں کہ سات افراد پر مشتمل کنبہ اگر فی کس روزانہ چار روٹیاں کھاتا ہے تو روزانہ کی کتنی رقم صرف روٹی پر خرچ ہوگی اور ماہانہ ایک کنبے کو چھ ہزار یا دس ہزار روپے میں کس طرح روح اور جسم کا رشتہ برقرار رکھنے کا سلیقہ آئے گا۔ورلڈ بینک اور ورلڈ فوڈ پروگرام نے اپنے تازہ سروے میں انکشاف کیا ہے کہ پاکستان کی ساٹھ فیصد آبادی پہلے ہی کم خوراکی کا شکار ہے۔ صوبہ سندھ‘بلوچستان اور خیبرپختونخواہ میں خوراک کی بدترین صورتحال ہے۔ان صوبوں کے دیہی علاقوں میں مفلوک الحال عوام کو دور سے دیکھیں‘ لگتا ہے ایتھوپیا میں آگئے ہیں۔ایک زرعی ملک کی یہ حالت ہے کہ ماﺅں کو اپنے حصے کی روٹی اپنے بچوں کو دینا پڑ رہی ہے تاکہ بچوں کو کم از کم پیٹ بھر کر کھانا میسر آسکے۔جنوبی پنجاب کے حالات بھی بھوک زدہ ہیں۔ اب جو مہنگائی کا ایک تازہ طوفان ہماری بستیوں میں آیا ہے۔ تو اس کا نتیجہ بھوک سے اموات کی صورت میں نکل رہا ہے۔ سفیدپوش تو بجلی اور گیس کے بل ادا کرتے کرتے ”پھانک“ ہونے والے ہیں‘لیکن جھونپڑیوں اور کچے گھروں میں زندگی گزارنے والے اپنی ہاتھوں سے بوئی جانے والی گندم کی بالیوں کو چھونہیں سکیں گے کہ روٹی کی قیمت بڑھتے بڑھتے امریکہ جتنی ہوجائے گی۔ آمدن صفر اور خوراک کی قیمت نیویارک جیسی! یہ کیسا معاشی انقلاب ہے!وزیرخزانہ جناب اسحاق ڈار صاحب بھی گندم کی روٹی کھا کر ہی بڑے ہوئے اور ایک بار پھر وزیرخزانہ بن گئے۔انہوں نے قوم کو خوشخبری دی ہے کہ ڈالروں کی بارش شروع ہوگئی ہے۔ بین الاقوامی مالیاتی اداروں کو پاکستان کی معاشی اصلاحات پر اعتماد آگیا ہے۔ ڈار صاحب کی ہر خوشخبری عوام کے لئے نیا ڈر لے کر آتی ہے۔دنیا بھر میں خوراک‘ بجلی اور گیس کی فراہمی پر حکومتیں سبسڈی دیتی ہیں ورنہ حکومتوں کی ضرورت ہی کیا رہ جاتی ہے۔لیکن ہمارے وزیر خزانہ ”سبسڈی“ والی لعنت سے قوم کو نجات دلانا چاہتے ہیں اور آئی ایم ایف کے منافع کو یقینی بنانے کے لئے دال روٹی کی قیمت بڑھائے جارہے ہیں۔جو غریبوں کے منہ سے نوالے چھینتے ہیں وہ ڈار نہیں صرف ڈر ہوتے ہیں اور ڈر اور خوف قوموں کو اٹھاتا نہیں بلکہ نفسیاتی اور جسمانی طور پر بیمار کر دیتا ہے۔ بیس کروڑ افراد میں سے اٹھارہ کروڑ بھوکے پاکستانیوں کا بوجھ ڈار صاحب کے کندھوں پر ہے!

اللہ پاک نے قرآن حکیم میں تمام انسانوں اور خصوصاً مسلمانوں کو اپنے روزمرہ کے معاملات باہمی مشاورت سے چلانے کا حکم دیا ہے ۔باہمی مشاورت دراصل جمہوریت کی روح ہے اور ووٹ اور الیکشن مشاورت کے عمل کو ممکن بنانے کا ایک طریقہ ہے۔ جمہوری حکومتوں پر لازم ہے کہ وہ منتخب ہونے کے بعد بھی ریاست کے معاملات وسیع تر مشاورت کے ذریعے طے کرتی رہیں‘جہاں مشاورت کا عمل ختم ہوا وہیں سے جمہوری آمریت نے سراٹھاناشروع کردیا۔مشاورت کا دائرہ کار صرف سرکاری امور تک محدود نہیں رہنا چاہئے۔بلکہ گلی محلے کے مسائل کے حل تک وسیع ہونا چاہیے۔ کسی بھی شہری کو دو طرح کے مسائل سے واسطہ پڑتا ہے۔

ایک کا تعلق تو ریاست اور اس کی پالیسیوں اور قوانین سے ہے اور دوسرا اس کی شہری زندگی اور اس سے متعلقہ امور سے ہے۔ صوبائی اور قومی پارلیمان کا کام قانون سازی کرنا ہے۔ اگر وہ ایسے قوانین بنائیں جن پر عمل درآمد سے عام شہری کی زندگی میں خوشحالی آئے اور احساس تحفظ ابھرے تو ہم ایسے قوانین کو فلاحی قوانین کہتے ہیں۔ہر وہ قانون جو انسان کے بنیادی حقوق کا تحفظ کرے وہ دراصل ”ہیومنٹرین لا“ کہلائے گا۔ اور جو جمہوری حکومت ایسے قوانین کا اجراءکرے اسے انسانی حقوق کی محافظ حکومت کہنا چاہیے۔اسلام کی تعلیمات اور آئین پاکستان میں قرارداد مقاصد کی روشنی میں انسانی حقوق کے خدوخال واضح کردیئے گئے ہیں۔ ہمیں یاد رکھنا چاہے کہ مسلمانوںکے انسانی حقوق بعض حدود کے اندر ہیں۔ ہم جنس پرستی اور دیگر حیوانی اور شہوانی خواہشات کو انسانی حقوق کے نام پر قبول نہیں کرسکتے۔ بہرحال قوانین کا دائرہ پارلیمان کے اختیار میں آتا ہے۔شہری حقوق بھی دراصل انسانی حقوق ہی ہیں۔ صاف پانی کی فراہمی ‘سڑکوں کی کشادگی‘ذرائع آمدورفت کی فراوانی‘ تعلیم اور صحت کے لئے سہولتیں اور سیوریج اور صفائی کے تمام معاملات بنیادی انسانی حقوق سے ہی منسلک ہیں۔لیکن یہ ایسے معاملات ہیں جن کے لئے شہریوں کو پارلیمنٹ اور ممبران پارلیمنٹ کے دروازے پر دستک دینے کی حاجت نہیں ہونی چاہیے۔ ایک گلی کے لوگ آپس میں مشاورت کرکے الیکشن کے ذریعے اپنے نمائندے منتخب کرکے اپنے ”سوک اشوز“کو حل کرسکتے ہیں۔پھر محلے کی سطح پر اور پھر قصبہ اور شہری کی بنیاد پر ایک نیٹ ورک بنایا جاسکتا ہے۔ اسی سوچ کو ”مقامی حکومتوں“ کے عنوان کے تحت عملی جامہ پہنایا جاتا ہے۔پاکستان میں بدقسمتی سے مقامی حکومتوں کا کبھی بھی کوئی موثر نظام نافذ نہیں ہوسکا۔سیاسی پارٹیوں کی ضد ہوتی ہے کہ گلی محلے کی حکومتوں میں بھی انہی کے نمائندے آگے آئیں۔ آمریت کے دور میں غیر سیاسی بنیادوں پر مقامی حکومتیں بنائی جاتی ہیں۔ یوں عوام کے مسائل کے حل کے وقت پارٹی پالیٹکس اور آمریت کا اثرورسوخ حاوی رہتا ہے۔ترقی یافتہ قوموں نے مقامی حکومتوں کے نظام کو بڑی کامیابی کے ساتھ آگے بڑھایا ہے اور شہر کے میئر کی ذمہ داری ہے کہ وہ شہریوں کے مسائل کو مشاورت سے حل کرے‘اس کے لئے اسے مرکزی حکومت کی طرف نہ دیکھنا پڑتا ہے نہ ہی اسے مالی معاونت کی ضرورت ہوتی ہے۔پولیس بھی میئر کے تابع ہوتی ہے اور یوں امن وامان کا مسئلہ بھی نہیں بگڑتا۔سپریم کورٹ کی طرف سے مقامی حکومتوں کے انتخابات کا حکم آچکا ہے۔ بعض صوبوں نے اس پر کام بھی شروع کردیا ہے۔ توقع یہی ہے کہ بہت جلد یہ مرحلہ طے ہوجائے گا۔لیکن ضرورت اس امر کی ہے کہ منتخب میئر‘یا کونسل چیئرمین پارٹی پالٹیکس سے بالاتر رہیں۔جہاں پارٹی آتی ہے وہیں نفاق شروع ہوتا ہے‘جمہوری سوچ کا گلہ دبا دیا جاتا ہے اور شہریوں کے شہری اور انسانی حقوق غصب ہونا شروع ہوجاتے ہیں ۔متنازعہ مقامی حکومتیں صرف تنازعات پیدا کریں گی اور عوام ان حکومتوں کے معرض وجود میں آجانے کے بعد بھی بے مقام ہی رہیں گے۔

Click here to View Printed Statement

سیاستدانوں نے قومی اسمبلی اور سینٹ کے اجلاسوں میںدل کھول کر ایک دوسرے کی دُرگت بنائی ہے۔تنگ آمد بجنگ آمد کے مصداق وزیر داخلہ نے اپوزیشن کو جواب آں غزل جو سنائی تو ذرائع ابلاغ بھی عش عش کر اٹھے۔ سکندر بمقالہ زمرد کے نت نئے پہلو سامنے آچکے ہیں جن میں سے بعض دلچسپ’کچھ حسرتناک اور چند عبرتناک بھی ہیں۔ اس واقعہ سے کون کیا سیکھتا ہے۔ یہ اپنے اپنے ظرف کی بات ہے۔بہرحال عوام جو کہ تماشبین ثابت ہوئے۔ پولیس جو کہ نااہل ثابت ہوئی ‘میڈیا جو کہ غیر ذمہ دارثابت ہوا اور حکمران جو کہ متذبذب ثابت ہوئے۔ اگر چاہیں تو اپنی اپنی حدود میں رہ کر خود احتسابی کا عمل مکمل کرسکتے ہیں اور یوں ہم آنے والے اس نوعیت کے حادثوں میں مناسب ردعمل کے اظہار کا سلیقہ سیکھ سکتے ہیں ۔

لیکن اگر مقصد ایک دوسرے کو نیچا دکھانا اور پوائنٹ سکورنگ ہو تو پھر سکندر آئندہ بھی یوں ہی آتے رہیں گے اور زمردخان بھی ایسے ہی پیدا ہوتے رہیں گے۔سکندر شو سے متعلقہ تمام اداروں اورافراد کے منہ میں زبان ہے اور وہ بڑے دھڑلے کے ساتھ اپنا اپنا مئوقف لوگوں تک پہنچا رہے ہیں لیکن اس شو کے اصل فریق جس کی کھچائی کے لئے ہر کوئی ادھارکھائے بیٹھا ہے’اس کی کوئی سنتا ہے نہ ہی سننے دیتا ہے۔اگر پولیس کو سٹن گن چلانا نہیں آتی تو اس پر تضحیک آمیز انداز میں قہقے لگانے کا کیا جواز ہے؟ کیا یہ حقیقت نہیں کہ ہماری پولیس کو حکومت مخالف پارٹیوں کو دبانے اور جلسہ گاہوں کی رونقیں بڑھانے کے لئے بھرتی کیا جاتا ہے۔ کس دور میں کب کسی نے اس پولیس سے کہا ہے کہ آپ کا فرض جدید کرائم کے خلاف کارروائی کرنا ہے۔ آپ پولیس کی تمام اکیڈمیوںکا ریکارڈ نکلوا کر دیکھ لیجئے۔ وہاں ”سٹن گن” کا ذکر تک نہیں ہوگا۔ جب پولیس کو ”سکندر شو” جیسے واقعات سے نپٹنے کی کوئی ٹریننگ ہی نہیں دی گئی تو پھر پولیس پر قہقے لگانے سے پہلے خود اپنی سوچ ‘مزاج اورسیاسی ترجیحات پر بے رحم قہقہ لگایئے۔آپ کیکر کے درخت سے آم حاصل کرنا چاہتے ہیں تو یہ آپ حکمران طبقے کا دماغی فتور ہے پولیس کا قصور نہیں۔اگر بعض پولیس افسران نے جناب زمرد خان کو سکندر تک پہنچنے کا موقع فراہم کیا ہے تو اس کے پیچھے بھی پولیس کی نفسیات میں بھرتی سے لے کر پروموشن تک شخصی اور سیاسی تعلقات کی اہمیت کارفرما ہے۔ پولیس کو عوام کے جان و مال کے تحفظ کی بجائے مختلف شخصیات کی چاپلوسی کی راہ کس نے دکھلائی ہے۔پولیس کو کس نے حکومتی اثر سے پاک رکھنے کی کوشش کی ہے۔سب حکمران اپنے اپنے گریبانوں میں جھانکیں۔انشاء اللہ مایوسی ہوگی۔پولیس سے یہ توقع کرنا کہ وہ ”آئی ٹی ایکسپرٹ” کے طور پر بھی کام کریں گے’ بالکل عبث ہے ۔ جس ایس ایچ او کو عام کمپیوٹر چلانا نہیں آتا وہ القاعدہ کے نیٹ ورک میں کیسے گھس جائے گا۔ آن لائن ایف آئی آر کے پروگرام کا حشر یہ ہورہا ہے کہ سینئر پولیس افسران اپنے ”ڈیکسٹاپ” کھول کر آن لائن ڈیٹا دیکھنے کی بجائے ہر وقت پرنٹ حاصل کررہے ہوتے ہیں۔مجھے کینٹ کے ایک تھانے میں ایک سال قبل کسی مظلوم کے ساتھ جانے کا اتفاق ہوا۔وہاں ایک سائل محرر صاحب کو اے ٹی ایم کارڈ چرائے جانے کی شکایت کر رہے تھے اور جناب محرر باربار پوچھتے تھے”ایس کارڈ نال کی کردے او”۔جہاں آئی ٹی سے واقفیت کا یہ عالم ہو وہاں جدید طرز کے کرائم کو یہ پولیس تو کنٹرول نہیں کرسکتی۔ پولیس کی جدید خطوط پر تربیت کے بڑے دعوے سامنے آئے لیکن عملاً معاملہ جوں کا توں ہے۔پولیس پرگرجنے اور برسنے سے پہلے ان کی تربیت کا مناسب بندوبست کیجئے۔ ان کے مالی معاملات کو باعزت بنایئے۔ ان کے ڈیوٹی اوقات کو انسانی حدود میں لایئے اور پھر ان سے نتائج کی توقع  کیجئے۔ اور کچھ بھی نہ کریں تو کم از کم پولیس والوں کا مئوقف تو ضرور سن لیا کریں ۔یکطرفہ رگڑا مزید شرمندگیوں کو جنم دے سکتا ہے۔ پولیس سے نفرت نہیں۔پولیس کی عزت کیجئے اس سے آپ کی اپنی عزت میں اضافہ ہوگا۔

Click here to View Printed Statement

جب اپنے وطن میں روٹی روزی کے ذرائع محدود اور بے روزگاری لامحدود ہوجائے تو پھر دیارِ غیر جا کر قسمت آزمائی کرنی چاہیے۔ ہجرت تجارت کی غرض سے ہو یا تعلیم کی غایت سے ہو۔ یہ ابن بطوطہ کا سفر ہو یا کولمبس کی سمندر پیمائی ہو’ہجرت کی کلفتیں اورمصیبتیں اپنی جگہ مگر اس کے نتیجے میں بہتری ضرور آتی ہے۔اپنے مالی حالات بہتر بنانے کے لئے ہم گائوں سے شہر اور شہر سے دوسرے شہر ہجرتیں کرتے ہیں۔اسی کے نتیجے میں نئی نئی آبادیاں جنم لیتی ہیں۔ایک دوسرے کی زبانیں سمجھتے ہیں’ایک دوسرے کے رہن سہن اپناتے اور ہنرمندی کو سیکھتے ہیں۔عربی کا محاورہ ہے ”سفر ایک زحمت ہے” لیکن یہ بھی حقیقت ہے کہ ”سفر وسیلہ ظفر” بھی ہوتا ہے ۔دونوں محاوروں کا مشترکہ مفہوم یہ کہ ہجرت جدائی اور سفر کی مشکلات اگر برداشت کر لی جائیں تو پھر کامیابی مل جاتی ہے۔رزق کی تلاش میں اس کرہ ارضی پر چلنے پھرنے کا قرآن نے باقاعدہ حکم بھی دیا ہے۔

ہجرت کوئی آسان کام نہیں ہے۔خصوصاً جب آپ رزق کی تلاش میں اپنے پیاروں کو امیدوں کے سہارے چھوڑ کر دیارغیر جابستے ہیں تو جدائی کا عذاب سہنا پڑتا ہے۔ہمارے ایک کروڑ کے لگ بھگ بھائی اور بیٹے جو ”تارکین وطن” کہلاتے ہیں بسلسلہ روزگار تارک وطن ہوچکے ہیں۔وہ یورپ’ امریکہ’جاپان اور گلف میں ہر طرح کی مزدوری کرتے اور خدمات انجام دیتے ہیں۔جو اٹھارہ بیس برس کی عمر میں وہاں پہنچے تھے واپسی کی خواہش پر وہیں بوڑھے ہوگئے۔ا ن کے بیٹے بھی وہیں ان کے پاس گئے اور اب وہ بھی بڑھاپے کو پہنچ رہے ہیں۔دونسلوں کو دیارِ غیر کی مٹی چاٹ چُکی ہے۔ ان پاکستانیوں میں سے اکثر جان پر کھیل کر یورپ پہنچے۔بعض تو راستے میں ہی گھائل کر دیئے گئے اور بعض عرصہ دراز تک روپوش رہے۔بیروزگاری ‘غربت اور مہنگائی کے ستائے ہوئے ہمارے گھبر و جوان ”تارک” ہونے کے لئے کیا کیا”تج”کر گئے۔آج پاکستان ان ممالک میں سرفہرست ہے جن کی افرادی قوت نے دنیا بھر میں اپنی محنت اور صلاحیت کا لوہا منوایا ہے۔ یہ سچ ہے کہ یہ لوگ پاکستان چھوڑکر گئے کہ بھوک ان کے تعاقب میں تھی۔لیکن جوں ہی انہیں پیٹ بھر کر کھانا ملا تو سب سے پہلے انہوں نے پیچھے کی طرف دیکھا۔ اپنی مزدوری’تنخواہ اور منافع سب کچھ پاکستان بھجوایا ہے اور آج ان کی بجھوائے جانے والی رقوم کا حجم ساڑھے تیرا ارب ڈالرز سالانہ تک جا پہنچا ہے۔گزشتہ دنوں سعودی عرب کے سرکاری ٹی وی ”الاقتصادیہ” کے نمائندے اور پاکستانی معیشت پر گہری نگاہ ر رکھنے والے حیطم ناصر اوورسیز پاکستانیوں کے حوالے سے انٹرویو کرنے میرے آفس تشریف لائے۔انہوں نے پوچھا”’اوورسیز پاکستانی جو رقومات بھجواتے ہیں ان کی پاکستانی معیشت کے لئے کیا اہمیت ہے”۔ میں نے ”الاقتصادیہ” کے نمائندے کوجواب دیا”’بیرون ممالک مقیم پاکستانیوں کی ترسیلاب زر کے طفیل ہی ہمارے زرمبادلہ کے ذخائر کو سانس لینے کا موقعہ مل رہا ہے۔اگر ساڑھے تیرہ ارب ڈالرز کے لگ بھگ ہر سال پاکستانی معیشت کو آکسیجن کا یہ ٹیکہ نہ لگتا تو ہم کب کے ڈیفالٹ کرچکے ہوتے۔اوورسیز پاکستانی بیرون ممالک سے ڈالرز’ریال اور درہم بھجواتے ہیں اور حکومت ان سے غیر ملکی کرنسی لے کر انہیں پاکستانی روپے دے دیتی ہے۔اس طرح ہمارے زرمبادلہ کا حجم پھول جاتا ہے”۔”الاقتصادیہ” کا اگلا سوال سعودی عرب میں پھنسے غیر قانونی پاکستانیوں کو تین ماہ کی اضافی مدت کے حوالے سے تھا۔جس کے جواب میں راقم نے کہا ”سعودی عرب کی حکومت نے پاکستان سے اپنی غیر مشروط محبت کا ثبوت دیا ہے۔ اب پاکستانیوں کو چاہیے کہ اگر ان کے کاغذات مکمل نہیں تو وہ رضاکارانہ طور پر واپس آجائیں۔میزبان ملک کے قوانین کا احترام بہرطور لازمی ہے۔”قارئین !یہ ایک ضمنی سا تذکرہ  آگیا ہے۔اصل بات یہ کہ جو پاکستانی رزق کی تلاش میں بیرون ملک ہجرت کر گئے ہیں  انہیں ”تارکین وطن” کہنا بہت بڑی زیادتی ہے۔پاکستان سے دور ہوتے بھی انہوں نے اس دھرتی کو ”ترک” نہیں کیا۔ وہ اپنی ساری بچتیں اور ساری محبتیں پاکستان پر نچھاور کر رہے ہیں۔ان کی اس عظمت کو ہمیں یاد رکھنا چاہیے۔جن ہاتھوں نے اپنے’اپنے گھر والوں اور اپنے ہم وطنوں کے لئے رزق اور خوشحالی کے لئے کام کیا’ ان ہاتھوں کو بوسہ دینا چاہیے۔

Click here to View Printed Statement

خون ہی خون ہے۔ دو چار دن کے وقفے کے بعد پاکستانی سوچنے لگتے ہیں کہ شائد قاتلوں اور دہشتگردوں کو رحم سا آگیا ہے۔ ایک موہوم سی اُمید پیدا ہونے لگتی ہے لیکن اُمید کی ڈوری کا سرا پوری طرح تھام نہیں پاتے کہ پھر کسی چوک’ کسی چوراہے پر انسانی جسم کے خون میں لتھڑے ہوئے ٹکڑے ملتے ہیں۔ کوئی جلی لاش کسی ایمبولینس میں رکھی جارہی ہوتی ہے۔ بم دھماکہ’ریموٹ کنٹرول دھماکہ’ خودکش دھماکہ’ ٹارگٹ کلنگ’ بوری بند لاش’ اغوائ’ ہماری سماعتوں میں خوف ہی خوف بھر جاتا ہے۔ ایک پوری فضاء سوگوار ہوجاتی ہے۔صف ماتم لپیٹنے کی فرصت ہی نہیں رہتی۔ہر انسان کش کارروائی کی ذمہ داری قبول کرنے والے ببانگ دہل اخبارات اور ٹی وی والوں کو فون پر بتاتے ہیں کہ جیتے جاگتے انسانوں کو چیتھڑوں میں تبدیل کرنے کا کارنامہ فلاں گروپ نے سرانجام دیا ہے۔ عورتیں’بچے’بوڑھے’ شیعہ’سنی’ مسلم’ غیر مسلم ۔کوئی بھی تو محفوظ نہیں ہے۔وردی اور شیروانی ‘امیر  اور غریب سب ہی قتل گاہوں میں سربریدہ پڑے ہیں۔ بڑے بڑے دل گردے والے ٹی وی پر مقتولوں کی چلنے والی فوٹیج دیکھ نہیں پاتے۔ آگ اور خون کا یہ گھنائونا کھیل کب ختم ہوگا؟

یہی وہ سوال ہے جو شعور اور لاشعور میں سماء گیا ہے۔ پوری قوم نفسیاتی مریض بن گئی ہے۔اُمید تھی کہ جناب میاں محمد نوازشریف کی شرافت کی بدولت شائد خون بہانے والوں کو شرم آجائے۔نہ ڈرون گرانے والوں کو شرم آئی اور نہ ہی بے گناہ پاکستانیوں کو بارود سے اڑانے والوں کو احساس ہوا۔ پاکستان کے لئے دونوں قوتیں’ دونوں نظریات’دونوں گروہ  بے رحم قاتل ثابت ہورہے ہیں۔طالبان کے ہمدرد بھی ان کی درندگی کی بھینٹ چڑھ گئے۔جناب عمران خان کی حق گوئی اور امریکی جنگ کی شدید ترین مخالفت بھی طالبان نامی گروہ کو غارت گری سے باز نہ رکھ سکی۔عام پاکستانی یہ سوچنے میں حق بجانب ہے کہ کیا یہ ملک زندگی اور سرمائے کے لئے محفوظ بھی ہے یا نہیں۔جہاں اوسطً روزانہ دو درجن سے زائد لوگ قتل کردیئے جائیں اور یہ عمل گزشتہ بارہ برس سے متواتر چل رہا ہو اور پچاس ہزار سے زائد انسان اس آگ میں جل چکے ہوں اور یہ ” قتل عام” کہیں تھمنے کا نام نہ لیتا ہو’وہاں زندگی کیسی اور خوشحالی کا تصور کیسا؟۔اگر یہ خانہ جنگی ہے توخانہ کس کا تباہ ہورہا ہے؟ ہمارے عسکری  اور سیاسی آکابرین آج تک سائے کا تعاقب کررہے ہیں۔آخر کوئی تدبیر کاگرکیوں نہیں ہوتی۔یہ قوم کس کے ہاتھ پہ لہو تلاش کرے۔ امریکی محفوظ ہیں ‘برطانوی محفوظ ہیں’عشرت کدے محفوظ ہیں’ بے حیائی کو پھلانگتے فیشن شو ہر روز منعقد ہوتے ہیں۔سودخور یہاں ہیں ‘اسمگلرز یہاں ہیں’ذخیرہ اندوز کھلے عام دھندہ کر رہے ہیں معاشرہ  کے سارے مجرم آزاد ہیں۔زندگی کی رعنائیوں سے پوری طرح لطف اندوز ہورہے ہیں ۔طالبان انہیں کچھ نہیں کہتے وہ جب مارتے ہیں تو ملک کے محافظوں کو مارتے ہیں۔پاکستان کی تنصیبات پر حملہ کرتے ہیں ۔پاکستان کے دوست ملک کو ٹارگٹ کرتے ہیں ۔شیعہ سنی فساد کو بھڑکاتے ہیں۔آخر ان کا ایجنڈا کیا ہے؟ حکومت ان کے اصل روپ سے پردہ چاک کیوں نہیں کرتی اور اگر وہ ریاست سے زیادہ طاقتور ہیں تو ہر روز مرنے کی بجائے عوام کو سچ بتا دیا جائے ۔دعوے اور جھوٹے وعدے پہلے رحمان ملک کیا کرتے تھے اور اب شائد یہ ناخوشگوار فریضہ جناب چوہدری نثار کو ادا کرنا پڑ رہا ہے۔اگر یہ گروہ فتنہ ساز ہیں اور ہم سب حق پر ہیں تو پھر اعلان جنگ کیوں نہیں ہوتا۔خدارا پاکستان کو قتل گاہ بنانے والوں کے خلاف اعلان جنگ کریں اور فتنہ  سازوں کو واصل جہنم کرکے واپس لوٹیں۔ لیکن پہلے یہ بتا دیں کہ یہ واقعتاً پاکستانی ہیں جو گمراہ  ہوگئے ہیں یا دشمن ممالک کے کارندے ہیں؟ کوئی تو بات کریں جس سے ہمارے آنسو تھم جائیں!۔

Click here to View Printed Statement

ابھی کچھ ہوا نہیں ہے۔لوڈشیڈنگ ہنوز زندگی چھین رہی ہے۔کرپشن کی منڈیوں میں ویسے ہی تیزی چل رہی ہے۔امن وامان بھی ایک خواب ہے۔خوف نے ہر طرف ڈیرے ڈالے ہوئے ہیں۔ابھی کچھ بھی بدلا نہیں ہے۔ابھی تو محض خیالات شکل پا رہے ہیں اور ارادے ترتیب لے رہے ہیں۔اچھی امید’نیک ارادے’توقعات اور ترجیحات۔عملاً نتائج ایک خواب ہیں۔لیکن کچھ مثبت اشارے آ رہے ہیں۔اندھیری غار کے آخر پر روشنی دکھائی دینی شروع ہوگئی ہے۔ایک یقین سا پیدا ہورہا ہے کہ پاکستانی قوم گھپ اندھیروں سے نکل سکتی ہے۔ہم دھیرے دھیرے روشنی کی طرف بڑھیں گے اور پھر ایک صبح ایک روشن صبح ہماری منتظرہوگی۔سٹاک مارکیٹ گزشتہ 65برسوںکے تمام ریکارڈ توڑتی ہوئی اوپر ہی اوپر جارہی ہے۔

اس کا سادہ سا مقصد یہ ہے کہ پاکستانیوں نے مالیاتی اور صنعتی اداروں کے حصص خریدنا شروع کردیئے ہیں۔ ان کے اندر یقین نے سر اٹھانا شروع کردیا ہے۔انہیں اعتماد ہے کہ ان کے لگائے گئے پیسے ڈوبیں گے نہیں۔ڈالر کے بارے افواہیں تھیں کہ وہ ایک سو دس روپے تک شوٹ کر جائے گا لیکن بے قابو ہوتے ہوئے روپے کو قرار سا آگیا ہے۔پاکستان کی توانائی کی ضرورتوں کو پورا کرنے کے لئے دوستوں نے نہ صرف یہ کہ تسلی دی ہے بلکہ عملی تعاون کی یقین دہانیاں کرانا بھی شروع کردی ہیں۔سعودی سفیر نے رائے ونڈ میں شریف برادران کے ساتھ ملاقات کرکے ڈیزل اور خام تیل کی سالانہ ضرورتوں کا تخمینہ لگوایا ہے اور خادم حرمین شریفین کی طرف سے پاکستان کے لئے پندرہ ارب ڈالر کے بیل آئوٹ پیکج کی تفصیلات بھی سامنے آنا شروع ہوچکی ہیں۔ایرانی سفیر نے بھی میاں محمد نوازشریف سے ملاقات کی ہے اور ذرائع کا کہنا ہے کہ گیس پائپ لائن کا منصوبہ ہر صورت مکمل ہو کر رہے گا۔یعنی 2014ء میں ایران سے پاکستان کے اندر گیس پہنچنا شروع ہوجائے گی۔چین کے وزیراعظم جناب لی کی چینگ نے اپنے دورہ پاکستان کے دوران جس وارفتگی کا اظہار کیا اور میاں محمد نوازشریف سے خصوصی اور تفصیلی ملاقات کی اس کے پاکستان کے اندر بڑے دیرپا اثرات مرتب ہوں گے۔ گوادر اور چین کے درمیان اقتصادی راہداری کے حوالے سے ایک تاریخی معاہدے پر دستخط بھی ہوچکے ہیں۔چشم تصور سے دیکھتا ہوں کہ گوادر سے سنکیانگ تک ریلوے لائن بچھائی جارہی ہے’ہزاروں میل طویل یہ لائن بچھائے جانے کے دوران شائد ہی پاکستان میں کوئی مزدوربے روزگار رہے گا۔سڑک بننی ہے بلکہ موٹروے بننی ہے۔پھر ہوائی پروازیں شروع ہونی ہیں۔یورپ’امریکہ’مشرق وسطیٰ’ایشیائ’سائوتھ ایشیا۔ان تمام خطوں کی چین اور سنٹرل ایشیاء کے ساتھ تجارت اسی اقتصادی راہداری کے ذریعے پروان چڑھنی ہے۔پاکستان کو صرف راہداری کی مد میں اربوں ڈالر سالانہ کی آمدن ہوگی۔اور خود پاکستان کے اندر بڑے بڑے صنعتی یونٹس لگیں گے اور یوں معیشت کا جام پہیہ جب پوری رفتار سے گھومے گا تو دنیا پاکستان کے بارے میں پکار اٹھے گی کہ یہی ہے ”ایشین ٹائیگر”۔ٹائیگر ووٹ کی پرچیوں سے نکل کر زندگی کی گہما گہمی میں قلانچیں بھرے گا ۔ہمارے وطن کی غربت کو نگل لے گا۔اب تو امریکہ نے بھی کہہ دیا کہ طالبان سے مذاکرات پر کوئی اعتراض نہیں اور نیویارک ٹائمز کی رپورٹ ہے کہ پاکستان کے اندر ڈرونزحملوں میں بڑی حد تک کمی آچکی ہے۔اگر میاں نوازشریف’عمران خان’جماعت اسلامی اور دیگر سیاسی پارٹیاں طالبان کو اعتماد میں لے لیتی ہیں اور پاکستان خانہ جنگی کی حالت سے باہر نکل آتا ہے اور پاکستان اور بھارت کے تعلقات بھی نارمل رہتے ہیں تو پھر افواج پاکستان کے ذریعے تعمیروترقی کے میگاپراجیکٹس میں فائدہ اٹھایا جاسکتا ہے۔سب سے مثبت اشارہ یہ کہ پاکستان کی سیاسی قیادتیں بڑی حد تک بالغ النظرہوچکی ہیں۔سیاسی کھیل کے اصول و ضوابط پر عمل کا عملی مظاہرہ بھی ہورہا ہے۔پرامن انتقال اقتدار کے باقی ماندہ مراحل بھی خوش اسلوبی سے طے ہونگے۔اپوزیشن بھی جاندار ہے اور پڑھے لکھے نوجوان تحریک انصاف کے جھنڈے تلے ملکی معاملات میں پوری طرح شامل ہوچکے ہیں۔جب قوم کا ہر ذی شعور فرد ملکی حالات سنوارنے میں براہ راست پابہ رکاب ہے تو پھر اندھیری غار سے نکلنے کا وقت آچکا ہے!