ہماری قومی سیاست دو حصوں میں تقسیم ہوچکی ہے۔ بظاہر سیاستدانوں کا ایک گروہ حزب اقتدار اور دوسرا حذب مخالف ہے لیکن اصل تقسیم کے خدوخال کچھ اور ہیں۔ایک طرف جناب آصف علی زرداری اور ان کے ساتھی ہیں اور دوسری جانب عوام‘ فوج اور عدلیہ ہے۔عوام اپنے دکھوں اور مصیبتوں کے تابوت کندھوں پر اٹھائے ہر روز ماتم کناں رہتے ہےں۔عوام کو تازہ ترین لاش ملی ہے۔آرزوتھی کہ سی این جی مہنگی نہ ہو لیکن اس خواہش کا دن دیہاڑے قتل ہوگیا۔ سی این جی مالکان‘ ٹرانسپورٹرز اور حکومت تینوں جیت گئے۔ عوام ہار گئے۔

جس مہنگائی کے باعث عورتیںبچے اور بوڑھے سڑکوں پر نکلے تھے اور جس چودہ فیصد اضافے کا بہانہ بنا کر سی این جی والوں نے عوام سے ساتھ کھڑا ہوجانے کی اپیل کی تھی‘ وہ مہنگائی جوں کی توں رہی۔ عوام کی آنکھوں میں دھول جھونکنے کے لئے ستر پیسے فی کلو کمی کردی گئی۔ایسا سنگین مذاق اور مذاق کے خالقان پر خدا کی لعنت ہو۔ ویگن والوں نے کرائے بڑھا دیئے اور سارا بوجھ غریب کی جیب بلکہ جان پر آن پڑا۔ اب نہ احتجاج ہے نہ ناراضگی کمانے والے خوب کما رہے ہیں۔کاش کہ سی این جی سٹیشن پر کام کرنے والے عملہ کی تنخواہ ہی بڑھ پاتی۔وہ بیچارے خواہ مخواہ گلے پھاڑتے رہے۔ لوگوں کی گاڑیوں پر پتھر پھینکتے رہے۔دھوکہ ہی دھوکہ ہے۔جھوٹ ہی جھوٹ ہے۔امیر پھر امیر تر ہوا اور غریب غربت کی دلدل میں مزید دھنس گیا۔لوگ پوچھتے ہیں کہ پاکستان میں انتہاءکی طبقاتی تفریق کے باوجود خونی انقلاب کیوں نہیں آتا۔ یہ سوال ہی غلط ہے۔کیونکہ خون تو ہر طرف بہہ رہا ہے۔اس خون کو سنبھالنے والے ”انقلابی“ نہیں ہیں۔خون ضائع جارہا ہے۔دوسرا سبب یہ کہ پاکستان کے لوگوں نے ابھی تک امید کا دامن ہاتھ سے چھوڑا نہیں۔انہیں ملک کے قومی اداروں خصوصاً عدلیہ اور فوج پر اب بھی امید ہے کہ وہ کوئی نہ کوئی ایسی راہ نکالنے میں کامیاب ہوجائیں گے جس سے قدرے بہتر لوگوں کی حکومت وجود میں آسکے۔ خواب فروش بھی بہت ہوشیار ہیں۔کوئی نہ کوئی سہانا خواب پاکستانی عوام کے دل و دماغ کو اسیر ضرور کر لیتا ہے۔آج کل عمران خان ایک ”مسیحا“ کے طور پرخواب بن کر ہماری لاتعلق ہوتی ہوئی نئی کی آنکھوں میں سما رہے ہیں۔ انہیں یقین دلایا گیا ہے کہ تحریک انصاف برسراقتدار آکر تمام تر سماجی ‘معاشی اور سیاسی ناانصافیوں کا قلع قمع کردے گی۔وہ امید کی ڈوری سے بندھے ہیں اور آئندہ انتخابات تک اس ڈوری کو تھامے رکھیںگے۔بات امید کی ہے تو ایک اور امیدپیدا ہوگئی ہے۔شدید ترین دباﺅ کا ایک اثر مرتب ہوگیا ہے۔ گھیراﺅ اور ہانکے نے جناب زرداری کو مجبور کردیا ہے اور انہوں نے میاں محمد نوازشریف کے ”ریسکیو پلان“ کو تسلیم کر لیا ہے۔فوری انتخابات پر بالآخر کام شروع ہوگیا ہے۔ گو کہ سانپ کے ڈسے عوام رسی سے بھی خوفزدہ ہوتے ہیں اور انہیں یہ شدید خطرہ ہے کہ فروری میں سینٹ الیکشن میں اکثریت حاصل کرنے کے بعد جناب زرداری قومی اسمبلی کے انتخابات کے انعقاد سے منحرف ہوجائیں گے‘ لیکن ایک دروازہ کھلا ہے ‘ تازہ ہوا کا ایک جھونکا آیا تو ہے۔!میرے دفتر میں کام کرنے والا اسسٹنٹ دانش خوش ہے کہ زرداری جارہا ہے۔”نہیں سرجی‘سینٹ وینٹ کو چھوڑیںالیکشن ہونے دیں پھر دیکھیں کہ زرداری کہیں نظر ہی نہیں آئے گا۔سرجی‘ زرداری ٹولے سے نجات کے دن قریب آرہے ہیں“ جب سے گیس اور پٹرول مہنگا ہوا ہے دانش بھی اس حکومت کی مخالفت میں سینہ پھلا پھلا کر تقریریں کرتا پھرتا ہے۔عہد حاضر کے دور اندیش تجزیہ کار محترم نسیم انور بیگ کہتے ہیں کہ تیسری دنیا کے ممالک میں پانچ سالہ حکومت چل ہی نہیں سکتی۔قومی اسمبلی کی معیاد چار برس سے زیادہ نہیں ہونی چاہیے۔ پاکستان کی سیاسی تاریخ نے بھی یہی ثابت کیا ہے۔موجودہ وزیراعظم سب وزرائے عظام پر سبقت لے گئے ہیں‘لیکن اپنی مدت کو پورا کرنے کی ضد میں اس وزیراعظم نے عوام کوتھکا دیا ہے۔ایسی حکمرانی اور انداز حکمرانی سے تو بہتر ہے کہ چار سال بعد عزت کے ساتھ گھر چلے جاتے اور نئے انتخابات کرا دیتے۔ہوسکتا ہے کہ بار بار انتخابات کرانے سے واقعتاً بہتر لوگ برسراقتدار آجائیں اور پاکستان کے لئے کسی حقیقی نجات کی راہ نکل آئے!!

علم نہیں کہ اب کی بار پیپلزپارٹی کو مظلوم بننے کا موقع ملتا ہے یا نہیں لیکن خلق خدا کی زبان پر ایک ہی جملہ ہے”زرداری کب جارہا ہے“۔نااہلیوں اور بدنیتوں سے بوجھل ملکی فضاءمیں پروان چڑھنے والے عوامی غیض و غضب نے انڈے بچے دینے شروع کردیئے ہیں۔اگر ”سٹیٹس کو“ کا مخالف کوئی حقیقی عوامی لیڈر ہوتا تو وہ بیروزگاروں کی فوج کی کمان سنبھال لیتا ۔کراچی سے پشاور تک ہر چوک چوراہے پر اس کا پرہجوم استقبال ہوتا۔لیکن بظاہر وہ تمام لیڈرجو انقلاب کا نعرہ لگاتے ہیں

حقیقت میں وہ بھی اس گلے سڑے نظام کے محافظ ہیں اور کوئی ایسا انقلاب برپا نہیں ہونے دینا چاہتے جس سے اس ملک کا غریب امیر ہوجائے اور امیر تر ہوتا اشرافیہ فٹ پاتھوں پر آجائے۔انقلاب کا نعرہ لگانا آسان اور اس کو برداشت کرنا بہت مشکل ہوتا ہے۔میرے جاننے والے حکمران جماعت کے ایک ایم این اے نے کہا کہ ڈاکٹر صاحب خدا کا شکر ہے کہ یہ ڈنڈا بردار مظاہرین ہمارے گھروں میں نہیں گھس رہے ورنہ ایسی تباہی آئے گی کہ فوج بھی ہمیں ان بھوکوں سے نہیں بچا سکے گی۔میں نے پوچھاجناب کی سیاسی بصیرت اب کیا کہتی ہے‘کہنے لگے کہ سچ یہ ہے کہ ہمیں اب انتخابات کا بگل بجا دینا چاہیے ورنہ عوام ہمارا باجا بجا دیں گے۔وزیراعظم گیلانی کا کمال یہ ہے کہ وہ ”جمہوری دکانداری“ بند نہیں ہونے دینا چاہتے۔انہیں ہر طرف اچھا ہی اچھا دکھائی دے رہا ہے۔انہوںنے عوامی غصے کو بھی جمہوری مخالف قوتوں کی کارستانی قرار دے کر آنکھیں موند لی ہیں۔پنجاب کی پارٹی کو انہوں نے ایک بہت بڑی ریلی کرنے کا ٹارگٹ دیا ہے۔جناب گیلانی نے پنجاب کے عہدیداروں کو ممنوعہ بور کے اسلحہ لائسنس دینے کا لالچ دیا ہے اور ایم۔این ۔اے کے ترقیاتی فنڈز سے بھی حصہ دینے کا وعدہ کر لیا ہے۔ ان انعامات اور نوازشات کے عوض پارٹی کو ہدایت کی گئی ہے کہ وہ عمران خان اور نوازشریف کے اثرات کو زائل کرنے کے لئے لاہور میں ایک بہت بڑا شو کریں۔جناب آصف علی زرداری مرد بحران ہونے کے باوجود بحرانوں پر قابو نہیں پاسکے اور اپنے اردگرد ان لوگوں کو جمع کر لیا ہے جن کی وجہ شہرت صرف اور صرف کرپشن رہی ہے۔پیپلزپارٹی کے دامن میں جیالے تو بہت ہیں لیکن اہل اور ایماندار لوگوں کی شائد نسل ختم ہوگئی ہے۔بعض اوقات یوں محسوس ہوتا ہے کہ گیلانی حکومت کسی کو عہدہ بخشنے سے پہلے اچھی طرح چھان بین کر لیتی ہے کہ عہدے پر براجمان کئے جانے والے شخص پر کم از کم ایمانداری کا کوئی الزام نہ آتا ہو۔ اس احتیاط کا نتیجہ نکلنا شروع ہوگیا ہے۔بجلی‘ گیس اور پٹرول کے بحران سے نجات کی کوئی صورت دکھائی نہیں دیتی۔وقتی طور پر جھک جانے سے شائد حکومت کو سکھ کے کچھ سانس میسر آجائیں لیکن مستقل حل کوئی نہیں۔کوئی ایک وزیر‘کوئی مشیر‘خود وزیراعظم بھی اس پوزیشن میں نہیں کہ لوگوں کا اعتمادبحال کرسکیں۔توانائی کی ترسیل اور طریقہ تقسیم کے جائزہ سے اندازہ لگایا جاسکتا ہے کہ وقفے وقفے سے عوام سڑکوں پر آتے رہیں گے اور اگر تھک ہا رکر لوگ بیٹھ بھی گئے تو بھی ہر زبان سے بددعائیں ہی نکلیں گی‘ہمدردی کے دوبول۔خواب ہی رہیں گے ۔چاہے آئندہ الیکشن میں بلال بھٹو اور آصفہ بھٹو ماتمی لباس پہن کر اپنی شہید ماںاور نانا کے نام پر ووٹ کیلئے منتیں ہی کیوں نہ کریں‘غیرجانبدار حلقے اس خیال کے حامی ہیںکہ عوام کی اکثریت اب اس عفریت زدہ ماحول کو پھر سے قابض نہیں ہونے دے گی۔البتہ پروپیگنڈا اپنی طاقت رکھتا ہے اور ہونی انہونی ہوسکتی ہے!جناب زرداری کہاں کہاں سے بچیں گے۔ایک بار گھبرا کر دبئی چلے گئے تھے۔اب کی بار گئے تو شائد واپس نہ آسکیں اورنہ گئے تو شائد برسوں جانہ سکیں۔میمو کیس کسی نہ کسی کے گلے میں حمائل ہونے والا ہے اور حکومت اپنی ہی فوج کے خلاف کوئی واردات کرنے کے منصوبے بنا رہی ہے تاکہ مظلوم بن سکے۔”مظلومیت“ کا سیاسی ڈرامہ لکھا جارہا ہے۔کردار ترتیب دیئے جارہے ہیں۔ عاصمہ جہانگیر اس مشن پر کمر بستہ ہو چکی ہیں۔لیکن کیا کیا جائے کہ اب کی بار عدالت انصاف کا ترازو پوری قوت سے تھامے ہوئے ہے ‘نہ مارشل لاءلگے گا نہ میمو ٹلے گا۔ سوئس بینک کے حکام کو خط لکھا تو بھی کرپشن ثابت ہوجائے گی نہ لکھا تو بھی چوری ثابت ہوجائے گی۔گھیرا تنگ ہورہا ہے اور فرار کی راہیںمسدود!

مارتے کیوںہو۔غریبوں کو کیوں مارتے ہو؟۔ ان بے آواز لوگوں نے آپ کا کیا بگاڑا ہے۔کون سی بغاوت کی ہے۔کب آپ کے گریبان چاک کئے ہیں۔انہیں بھوک ستاتی ہے تو رو لیتے ہیں۔آپ کو کبھی نہیں ستاتے۔مرنے پر تیار رہتے ہیں۔اجتماعی خودکشیاں کر لیتے ہیں۔ خودسوزیاں کرتے ہیں۔کسی اور ملک کے غرباءنے کبھی ایسا شریفانہ طرز عمل اختیار نہیں کیا۔ باقی دنیا کے غریب ایوانوں کی اینٹ سے اینٹ بجا دیتے ہیں۔تخت و تاراج کو اچھالتے رہتے ہیں۔میرے وطن کے افلاک زدگان تو پتھر بھی ایک دوسرے کو مارتے ہیں۔

ایک دوسرے کا راستہ روک لیتے ہیں۔ایک دوسرے سے الجھ کر وقت کو دھکا دیتے رہتے ہیں۔یہ تو وہ لوگ ہیں جو صرف یہ چاہتے ہیں کہ جوتے مارنے والوں کی تعداد میں اضافہ کردیا جائے۔جوتے کھانے سے انہیں کبھی انکار کی جرات نہیں ہوئی۔اگر مصر جیسا ملک ہوتا تو تحریراسکوائر پر پڑاﺅ ڈالتے اور کسی صدر کو مسند اقتدار سے گھسیٹ کر سکون لیتے۔شام کی گلیوں میں خون بہا دیتے اور تہران کے شاہ کو دربدر کر دیتے۔لیکن یہ تو بیچارے اسقدر جمہوریت پسند ہیں کہ جمہوری دیوتاﺅں کو پوچتے رہتے ہیں۔اہل اقتدار کے ”واری وٹے“ اور ”وٹے سٹے“ کے کھیل میں زرخرید غلاموں کی طرح مشقت کاٹتے ہیں۔سرکس کے سدھائے ہوئے جانوروں کی طرح قطاروں میں کھڑے ہوجاتے ہیں۔ ایک ہاتھ میں پرچیاں تھامے دھوپ اور سردی میں دل میں کسی نئے وزیراعظم کی تصویر سجائے”ٹکاٹک“ ووٹ ڈالتے جاتے ہیں۔قطاروں کے عادی ہوگئے ہیں۔بجلی نہیں لیکن بل دینے کے لئے پورا پورا دن قطار بنا کر کھڑے ہوجاتے ہیں۔ان کا سارا غصہ قطار توڑنے والے پر اترتا ہے۔انہوںنے کبھی نہیں سوچا کہ بل کی رقم حاصل کرنا خود واپڈا والوں کی ضرورت ہے‘لیکن یہ کیسے شریف عوام ہیں کہ ہونا تو یہ چاہیے کہ اس جرمانہ نما بل کو حاصل کرنے کے لئے ادارے ان کی دہلیز پر جائیں اور خوشامد کرکے رقم حاصل کریں‘الٹا بیچارے یہ صارفین جو کہ صارف کم اور مصروف زیادہ ہیں۔ بل ہاتھوں میں تھامے بینک والوں کی منتیں کر رہے ہوتے ہیں کہ خدارا جلد از جلد یہ جرمانہ وصول کر لیں کہ کہیں دیر ہوجانے سے مزید جرمانے نہ پڑ جائیں!کبھی صرف بل ادائیگیوں کے لئے لائن میں کھڑا کیا جاتا تھا۔پھر حکمران طبقے نے عوام کی بے بسی کو مزید ”انجوائے“ کرنے کے لئے اب گیس اور پٹرول کے حصول کے لئے بھی انہیں قطاروں میں کھڑا کرنے کی راہ نکالی۔گیس نہیں ہے لیکن میلوں لمبی قطاریںصبح سے شام تک۔ اب کوئی یہ نہیں پوچھتا کہ گیس مہنگی کیوں کی‘گیس کہاں چھپا دی گئی‘ سی این جی کو کس کا پیٹ بھرنے کے لئے سٹور کر لیا گیا۔عوام کو یہ سوچنے کی جرات ہی کہاں ہے۔ وہ تو اب اس مہنگی گیس کے لئے صرف قطاروں میں کھڑے ہوگئے ہیں۔ ان کا سارا زور اس پر ہے کہ کوئی قطار نہ توڑ دے۔توانائی کا بحران کیسے پیدا کیا جاتا ہے‘ اس فن میں ہمارے حکمران مافیا کے ماہرین کمال مہارت رکھتے ہیں۔سچ یہ ہے کہ وہ ایسے حالات پیدا کرکے لطف اندوز ہوتے ہیں۔ جو اقتدار میں ہیں وہ سی این جی اور گیس کے مسئلہ کو مسئلہ تسلیم کرنے پر تیار نہیں۔جو باہر بیٹھے ہیں ان کا عوام سے وعدہ ہے کہ جب وہ اقتدار میںآئیں گے تو یہ مسئلہ چٹکی بجا کر حل کردیں گے۔ اقتدار سے دور ہر سیاسی گروہ اور لیڈر کے پاس توانائی بحران کا ایک حل ہے‘فارمولا ہے لیکن انہوں نے یہ فارمولے ابھی چھپا کر رکھ لئے ہیں۔ ڈار صاحب کے پاس بھی فارمولا ہے‘عمران خان کے پاس بھی ایک گیدڑسنگھی ہے‘حد یہ کہ جناب سید منور حسن صاحب کے پاس بھی کلید ہے۔لیکن یہ سب ”راز“ ہے۔انہیں اقتدار میں آنے دیں پھر وہ یہ فارمولہ‘یہ گیدڑ سنگھی‘ یہ کلید کام میں لائیں گے اور ”کھل جا سم سم“ ہر طرف گیس ہی گیس ہوگی‘بجلی ہوگی لیکن لینے والے نہیں ہوں گے۔پٹرول تو درختوں سے نچڑے گا۔ یہ ملک ان کے دور اقتدار میں ایشیائی ٹائیگر بن جائے گا۔عوام پھر تیار ہیں۔طبقہ اشرافیہ کے دوسرے گروہ کو باری دینے کےلئے اپنے کندھے پیش کرنے کے لئے تیار ہیں۔سڑکیں بلاک کردی ہیں۔اپنے جیسے مڈل کلاسیوں کی گاڑیاں جلائی جارہی ہیں۔کوئی نہیں سوچتا کہ انہی شہروں میں سارے ایم۔ این۔ اے‘ وزیر‘وزیراعظم اور صدر ۔سب کے گھر ہیں۔ان گھروں کا گھیراﺅ کوئی نہیں کرے گا۔کیونکہ اس ملک کے عوام سات ارب انسانوں میں سب سے انوکھے لوگ ہیں۔یہ ہر دکھ اور ہر غم کے علاج کے طور پر اپنے وجود کو جلا کر ‘ اپنے گلے میں پھندے ڈال کر اپنی راہوں کو بند کرکے مطمن ہوتے ہیں۔قصر شاہی کی طرف بڑھنا ان کی ترجیحات میں آتا ہی نہیں!ایسے لوگوں کو کیوں مارتے ہو۔فوج کی طرف دیکھنا گناہ کبیر قرار دیاجاچکا ہے۔شائد فوج والوں کو بھی عوام کے حالات سے کوئی تعلق نہیں رہا۔ یہ صرف حسرت بھری نگاہوں سے آپ کی طرف ۔اے اہل جمہوریت صرف آپ کی طرف۔ دیکھتے ہیں۔انہیں اپنی طرف دیکھنے پر اس قدر مارتے کیوں ہو؟