سعودی عرب اور ایران کے درمیان مخاصمت آج کا نہیں برسوں پُرانا معاملہ ہے۔ کبھی یہ مخالفت کم ہوجاتی ہے اور کبھی عروج پر پہنچ جاتی ہے۔بدقسمتی سے آجکل دونوں ممالک ایک دوسرے کے خلاف تابڑ توڑ سفارتی اور سیاسی حملے کر رہے ہیں۔ جب بھی سعودی عرب اور ایران آپس میں ناراض ہوتے ہیں یا ان کی باہمی چپقلش خطرے کے نشان سے آگے بڑھتی ہے مسلم اُمہ کے ماتھے پر خوف کے پسینے تیرنے لگتے ہیں۔ چونکہ مسلم ممالک کے اندر شیعہ سنی جھگڑے ہوتے آئے ہیں اس لئے عام مسلمان ڈرنا شروع کر دیتا ہے کہ کہیں دو ملکوں اور حکومتوں کی باہمی رنجش مسلکی تفریق میں تبدیل نہ ہوجائے۔ باقی ممالک کا تو علم نہیں لیکن پاکستانی بہت سہمے ہوئے ہیں۔ اسی خوف کا اظہار حزب اختلاف کے تمام رہنماﺅں نے کیا ہے‘ اسی طرف جناب عمران خان نے توجہ دلائی ہے اور یہی خوف حکومت کو کسی واضح لائحہ عمل پر چلنے نہیں دے رہا۔ ہمارے ہاں یہ تصور پختہ ہوگیا ہے کہ ایران اہل تشیع کا نمائندہ ملک ہے اور سعودی عرب اہل سنت کا محافظ ہے۔ یہ ٹھیک ہے کہ ایران میں ایک ایسی مذہبی حکومت قائم ہے جو ایک مسلک کی پیروی کرنے والے علماءپر مشتمل ہے لیکن ایران نے سرکاری طور پر اپنی حکومت کو کبھی شیعہ حکومت قرار نہیں دیا اور سعودی عرب میں ایک خاندان کی حکومت قائم ہے لیکن اسے بھی کبھی وہابی حکومت قرار نہیںدیا گیا۔ایران والے خود کو ”اسلامی جمہوریہ ایران“ کہتے ہیں اور ان کے جھنڈے پر لفظ ”اللہ“ لکھا ہوا ہے۔جبکہ سعودی جھنڈے میں کلمہ طیبہ لکھا گیا ہے۔دونوں اپنی اپنی طرز حکمرانی کو ”اسلامی“ کہتے ہیں۔ جب سعودی عرب اور ایران اپنے ملکوں کو شیعہ اور سنی ممالک کے لیبل نہیں لگاتے تو پھر امت مسلمہ کے مذہبی اسکالز اور میڈیا پرسنز تقسیم کا یہ تاثر کہاں سے لیتے ہیں۔جو اصل معاملہ ہے وہ مشرق وسطیٰ کے وسائل پر زیادہ سے زیادہ اجارہ داری حاصل کرنے کا جھگڑا ہے۔شاہ ایران قطعاً مذہبی شخص نہیں تھے لیکن ان کے دور میں بھی سعودی عرب ‘ایران تنازعات کھڑے رہتے تھے اور تب ایران کو خطے میں امریکی پٹھو کہا جاتا تھا۔ سعودی عرب نے اس منظر نامے کو تبدیل کیا اور ستر کی دہائی میں انقلاب ایران نے امریکہ کو سعودی عرب کے قریب تر کردیا۔ حال ہی میں مغربی دُنیا کے ساتھ ہونے والے ایرانی معاہدے سے بہت ممکن ہے کہ چند سالوں کے اندر اندرایران ایک بار پھر امریکہ کا منظور نظر ملک بن جائے۔ آج کل روس بڑی تیزی کے ساتھ ایران کا ”دوست“ ملک ہوتا جارہا ہے ۔شام میں اثرورسوخ کے لئے لڑی جانے والی جنگ میں روس ایران کے ساتھ جبکہ امریکہ سعودی عرب کے ساتھ کھڑا ہے۔ بتایا جائے کہ کیا روس کوئی شیعہ ملک ہے یا امریکہ کوئی وہابی ملک ہے۔ پھر یہ شیعہ سنی کا جھگڑا کیسے ہو سکتا ہے۔ ملکوں کے اپنے مفادات ہوتے ہیں اور ان مفادات کو مسلکوں اور مذہبوں کے حوالے سے نہ سوچا جانا چاہیے نہ ہی ان بنیادوں پر تجزئے کئے جانے چاہیں۔
مختلف ممالک دنیا بھر میں اپنی لابیاں بناتے ہیں۔ پاکستان میں بھی اس طرح کی بہت سی لابیاں بنی ہوئی ہیں۔ وزارت داخلہ کی حالیہ رپورٹ کے مطابق کوئی تین سو کے لگ بھگ ایسے مدارس ہیں جن کو مشرق وسطیٰ سے فنڈنگ ہوتی ہے۔ سعودی عرب‘ قطر اور ایران سرفہرست ہیں۔ یہ مدارس بالواسطہ طور پر لابی کا کام کرتے ہیں۔ لیکن اگر ملکی قوانین مضبوط ہوں اور نیشنل ایکشن پروگرام پر ٹھیک طرح عمل ہورہا ہے تو پھر ایسی لابیاں اور گروہ غیر موثر ہوجاتے ہیں۔ پاکستان میں اس حوالے سے تیاری بھی ہے اور متعلقہ ادارے بھی چوکس ہیں۔ یہ تصور کرنا کہ شعبہ مسلک کا ہر فرد ایرانی حکومت کا خدانخواستہ ایجنٹ ہے بہت بڑی زیادتی ہے۔اور اسی طرح یہ خیال کر لینا کہ ہر مدرسہ سعودی عرب کے لئے کسی نرسری کا کام کر رہا ہے ایک لغو بات ہے۔یہ سب مسلمان پاکستانی ہیں۔ مُٹھی بھر لوگوں کی رائے اور رویے کو بنیاد بنا کر قومی وحدت پر کلہاڑے چلانے سے باز رہنا چاہیے۔حکومت کو موقع ملنا چاہیے کہ وہ ملکی مفادات سامنے رکھتے ہوئے اپنی خارجہ پالیسی کو تبدیل کرتی رہے۔

قارئین اکرام اور پیارے روزہ دار بہن بھائیو! چودہ صدیوں سے مسلم امہ ماہ صیام میں روزہ کی نعمت سے لطف اندوز ہورہی ہے۔ ہر سال رمضان المبارک میں ہم سحری سے افطاری تک روزہ رکھتے ہیں اور ہم سب کی کوشش ہوتی ہے کہ ہم قرآنی حکم اور اسوہ رسول ۖ کی روشنی میں اپنی اس عبادت کو جاری رکھیں ۔مجھے یقین ہے کہ آپ روزہ اور اس کی اہمیت اور اس کی برکات سے بخوبی آگاہ ہیں۔ چونکہ تذکیہ سے ایمانی تقویت حاصل ہوتی ہے اس لئے اللہ کی طرف سے عطا کی گئی اس خوبصورت عبادت کے مختلف پہلوئوں کا اس حوالے سے جائزہ لیں گے۔
یہاں میں یہ بھی واضح کردوں کہ تقویٰ کے حوالے سے مختلف تشریحات ہمارے سامنے ہیں۔ تقویٰ کسی مومن کی وہ دماغی حالت ہے جہاں انسان کے اندر ارادے کی ایسی قوت پیدا ہوجاتی ہے کہ وہ برائی سے دور بھاگتا ہے اور اچھائی کی طرف لپکتا ہے۔ ہم آج اس نشست میں یہ دیکھیں گے کہ تقویٰ کی منزل کے حصول میں روزہ کس طرح مدد کرتا ہے ۔صیاّم کا لفظی ترجمہ ٹھہرجانے کا ہے۔”رک جانے” کو صوم کہا جاتا ہے۔ اگر آپ چل رہے ہیں تو رک جائیں۔آپ کھا رہے ہیں تو رک جائیں۔آپ پی رہے ہیں تو رک جائیں’آپ سوچ رہے ہیں تو رُک جائیں’آپ سن رہے ہیں تو رُک جائیں ‘آپ دیکھ رہے ہیں تو رُک جائیں۔
روزہ آپ کو روک دیتا ہے۔اگر کوئی شخص بُرے کام کے ارادے سے چل رہا ہے تو روزے دار کو حکم ہے کہ وہ برائی کی طرف قدم نہ بڑھائے۔اگر کوئی کھا پی رہا ہے تو روزہ رکھنے کے بعد دن کے خاص وقت تک کھانا پینا نہیں ہے۔ اگر کسی کو نقصان پہنچانے کے لئے سوچ رہا ہے تو روزہ اسے ایسی سوچ ترک کرنے کی شرط لگاتا ہے۔اگر جھوٹ بول رہا ہے’واہیات بول رہا ہے ‘گالی دے رہا ہے تو روزہ کی حالت میں اسے ایسے بول بولنے سے روک دیا جاتا ہے۔ اگر وہ کوئی غیر شرعی باتیں سن رہا ہے تو روزہ دار کانوں کو بند کر لیتا ہے۔
غرض یہ کہ ہر اس کام سے روزہ انسان کو روک دیتا ہے جس سے اللہ ناراض ہوتے ہوں’ انسان کا دل دکھتا ہو’کسی کا حق مارا جاتا ہو’ شہوت اور ہوس کا راستہ کھلتا ہو۔
کیا روزہ کوئی تالا ہے ‘ کوئی زنجیر ہے ‘کوئی پردہ ہے۔ آخر کیا چیز ہے جو روزہ دار کو سب مکروہات’ مغلظات’جھوٹ فریب’ناجائز منافع خوری’ ذخیرہ اندوزی اور ہر طرح کے شیطانی اعمال اور سفلی جذبات سے رُوک لیتا ہے۔
حدیث نبویۖ ہے ‘ اللہ فرماتے ہیں”روزہ میرے لئے ہے اور میں ہی اس کا اجر دوں گا”۔
پھر ارشاد ہوتا ہے’
”اگر روزہ رکھنے سے روزہ دار کے اندر اللہ کا خوف بیدار نہیں ہوا تو اللہ کو روزہ دارکی بھوک ‘پیاس سے کوئی غرض نہیں”۔
ایک جگہ ارشاد ہوتا ہوا۔
”کتنے روزہ دار ہیں جن کو بھوک پیاس کے سوا کچھ حاصل نہیں ہوتا”۔
انسان جب یقین کر لیتا ہے کہ روزہ کا اجر اسے خالق کائنات اور رب العالمین نے دینا ہے تو پھر اس کے سامنے ”رُک ”جانے کا عمل بہت آسان ہوتا ہے۔ نماز کے لئے وہ وضو کرتا ہے۔ تین بار پانی منہ میں ڈالتا ہے ‘ چاہے تو گھونٹ اندر لے جائے۔دُنیا کی کوئی طاقت پتہ نہیں چلا سکتی کہ اس نے پانی پیا ہے یا نہیں۔لیکن یہ روزہ دار پیاسا رہتا ہے پانی کا قطرہ تک حلق سے نیچے نہیں آتا ۔ یہ ہے تقویٰ کی پہلی نشانی۔ اللہ کے ہونے’ اس کے دیکھنے اس کے حییّ القیوم ہونے پر پُختہ یقین ۔اور یہ عہد کہ پانی کا گھونٹ پینانہیں’خیانت نہیں کرنی۔ صرف اللہ کے لئے ‘ اللہ کے ہاں سے اجر پانے کے لئے۔ یوں سمجھ لیجئے کہ آپ نے اسلام آباد سے لاہور جانا ہے۔ جانے کے کئی طریقے ہیں۔پیدل’ بس’ٹرین۔سب ذریعے آپ کو منزل پر لے جائیں گے۔ لیکن اگر آپ ہوائی جہاز کے ذریعے جائیں تو چار گھنٹے کا سفر ایک گھنٹے میں طے ہوجائے گا۔ تمام عبادات کا مقصد تقویٰ کی منزل کا حصول ہی ہے۔ لیکن روزہ بڑی سرعت کے ساتھ آپ کو تقویٰ کی کیفیت سے بہرہ مند کر دیتا ہے۔ اسی لئے قرآن نے سورئہ بقرہ میں فرمایا ہے کہ روزے فرض کرنے کامقصد آپ کو تقویٰ کی منزل تک پہنچانا ہے۔ یہی وجہ ہے کہ قرون اولیٰ میں جب ماہ صیام کا چاند نظر آتا تھا تو مسلمان چھتوں پر چڑھ کر خوشی سے نعرے مارتے تھے اور استقبال رمضان کے لئے تیاریاں روزوں پر آجاتی تھیں۔ میری گزارش ہے کہ روزہ محض ثواب کے لئے نہیں’ یہ کوئی رسم نہیں ‘ یہ کلچر نہیں۔یہ ایک ریفریشنگ کورس ہے۔ یہ ایک ورکشاپ ہے’ ایک ٹریننگ سیشن ہے۔ صرف ایک ہی نیتّ کہ یا اللہ میں تیرے لئے روزہ رکھ رہا ہوں اور تو ہی اس کا اجر دینے والا ہے اوراجر کا بھی ابھی سے یقین کر لیجئے کہ۔اجر تقویٰ کی کرنسی کی صورت میں ملتا ہے۔اگر کوئی شخص ماہ صیّام میں تقویٰ کی صلاحیت پا گیا گویا اس نے متقیّ ہونے کی نعمت پا لی اور متقی ہونا وہ صلاحیت ہے جو انسان کو دنیاوی اور اخروی زندگی میں کامیابی دلانے کا خدائی نسخہ ہے۔
آپ سے اتنا کہنا ہے کہ ہم اور آپ اپنے آپ کو ابھی سے روک لیں۔غیبت سے روک لیں’ریاکاری سے روک لیں’ عناد’بغض اور حسد سے روک لیں’جھوٹ اور گالی گلوچ سے روک لیں’ شرم و حیا سے عاری مناظر دیکھنے سے روک لیں’کسی کی برائی’چغل خوری سے روک لیں۔ہم رک کر آگے بڑھیں اور شاہراہ تقویٰ کی طرف قدم بڑھائیں ۔ہر روزہ کیساتھ ‘ ہر تروایح کے ساتھ ‘ ہر افطاری اور سحری کیساتھ تقویٰ کی جانب ہمارا سفر تیز ہوجائے گا اور روز عید ہم اپنے اندر وہ قوت محسوس کریں گے جو ہمیں پورا سال خیر کے راستے پر چلنے میں مدد دے گی’ بہتر طرز زندگی میں معاون بنے گی’ ہم معاشی’معاشرتی’ انفرادی اور اجتماعی زندگیوں میں برکات سمیٹیں گے اور خوشیاں بانٹیں گے۔

ضد کا کوئی علاج نہیں۔محض احتجاجی سیاست کی بُنیاد پر قد بڑھانے ہوں تو یہ مُلک اس طرز سیاست کے لئے بہت ہی زرخیز ہے۔لیکن اگر واقعتا مقصد کاروباری ترقی اور ذہنی و سماجی سکون ہے تو پھر یہ فلسفہ میری سمجھ سے بالاتر ہے کہ رات آٹھ بجے مارکیٹیں بند کرنے سے بزنس کمیونٹی تباہ ہوجائے گی۔ دنیا بھر کے اوقات کار کے ماہرین اس بات پر متفق ہیں کہ روزانہ آٹھ گھنٹے کا کام ایک نارمل لائف اسٹائل کے لئے بہترین ٹائم ٹیبل ہے۔ مزدور اور کارکن کے بنیادی حقوق بھی یہی طے ہوئے ہیں کہ آٹھ گھنٹے سے زیادہ کام نہ لیا جائے ۔پاکستان ایسے خوش نصیب ملکوں میں شمار ہوتا ہے جہاں اوقات نماز کی پابندی ہماری عمومی زندگی کا حصہ ہے۔ نماز فجر کے لئے اٹھنا انتہائی افضل عمل ہے۔دنیا میں بل گیٹس جیسے کامیاب افراد کی زندگی میں سحر خیزی اور جلد سو جانے کو بنیادی وصف قرار دیا گیا ہے ۔ ہمارے والدین نے ہمیں یہی سکھایا تھا کہ نماز فجر ادا کریں ۔صبح کی سیر کریں’ناشتہ کریں اور کام پر لگ جائیں۔ جب تک ہم اسی قدرتی نظام الاوقات پر عمل پیرا رہے تب تک صحت مند زندگی کے لطف اٹھاتے رہے اور جوں ہی ہم نے دوپہر تک سونے اور رات 2بجے تک جاگنے کے غیر فطری رویے اپنانا شروع کئے چہروں کی رونق عنقا ہوگئی۔ رت جگوں کی مار پڑنے لگی اور روشنیوں کی چکا چوند میں کاروبار جاری رکھنے سے سماجی اور طبی مسائل جنم لینے لگے۔
بجلی بحران گذشتہ پندرہ بیس برسوں میں شدید ہوا۔ لیکن سچ یہ ہے کہ ہمارے ہاں رات کو کاروبار جاری رکھنے اور مارکیٹیں اور بازار کُھلے رکھنے کی لت کراچی سے یہاں آئی۔اور دیکھے ہی دیکھتے ہمارے دیہات بھی اس عذاب میں گرفتار ہوگئے۔اب یہ عادت بد اس قدر پُختہ ہوگئی ہے کہ اگر اسلام آباد میں مارکیٹیں رات آٹھ بجے اور شادی ہال رات دس بجے بند کرنے کا فیصلہ ہوا ہے تو ہمارے مزاج گرامی اس فیصلے کو کسی دشمن طاقت کا حملہ تصور کررہے ہیں۔یہ کہا جارہا ہے کہ یہ تاجروں کے پیٹ پر لات ماری جارہی ہے۔ ان کے بچوں کو بھوکا رکھنے کی کوشش کی جارہی ہے۔
اگر یہ فیصلہ گاہکوں اور شہریوں کے لئے کسی پریشانی کا سبب ہوتا تو پھر شہریوں کی طرف سے کوئی احتجاج ہونا چاہیے تھا۔لیکن ایسا کوئی مظاہرہ دیکھنے میں نہیں آیا۔ دکانداروں کی طرف سے کہا جارہا ہے کہ اسلام آباد کے شہری نکلتے ہی رات کوہیں۔ اگر آٹھ بجے دکانیںبند ہوجائیں گی تو لوگ خریداری کیسے کریں گے۔ ہوسکتا ہے کہ وقتی طور پر شہریوں کی عادت بدلنے میں کچھ وقت لگے۔لیکن شہریوں کے لئے اسلام آباد میں ہفتہ اتوار کی دو روزہ چھٹی ہوتی ہے۔ وہ ہفتہ کے دن بھرپور خریداری کرسکتے ہیں۔
ایک دکاندار اگر صبح دس بجے بھی دکان کھولے تو رات آٹھ بجے تک بہت وقت ہوتا ہے۔ جس نے کسی ہنگامی صورتحال میں کچھ خریدنا یا بیچنا ہے اسے کوئی دقت نہیں ہوگی۔
آخر دنیا میں دیگر ترقی یافتہ ممالک بھی ہیں۔ وہاں کاروبار ہوتے ہی دن کی روشنی میں ہیں۔چین’ جاپان’امریکہ اور سعودی عرب۔ وہاں نہ کسی کا کاروبار رکتا ہے نہ کسی کے پیٹ پر لات پڑتی ہے۔ یہ انوکھی منطق صرف اور صرف پاکستان میں ہی پیش کی جاتی ہے۔
یہ اللہ پاک کا حکم ہے ۔اوقات کی خدائی تقسیم ہے کہ دن کوکاروبار کرو اور رات تمہارے آرام کے لئے بنائی گئی ۔ ہر دور کا اسلامی تمدن گواہی دیتا ہے کہ مسلمانوں نے وقت کی اسی خدائی تقسیم پر عمل کیا ہے۔ اقبال نے تو آداب سحرگاہی کو دانائی و بینائی کی بنیاد بتایا ہے۔جو رات گئے تک بھائو تائو کرتے ہیں اور مصنوعی روشنیوں میں ناقص مال فروخت کریں انہیں سحر گاہی کا مزا کیسے آئے گا۔
حکومت کو کوئی کمزوری نہیں دکھانی چاہیے۔ لیکن محض حکم دے دینے سے معاملات سلجھ نہیں سکتے۔ تاجروں کے نمائندوں کو پہلے اعتماد میں لینا چاہیے۔ انہیں قائل کرنا چاہیے۔اور پولیس گردی سے تاجروں کو بچانا چاہیے۔مارکیٹیں ہرحال میں آٹھ بجے بند ہونی چاہیں۔ اسے محض بجلی کی کمی سے نہیں جوڑنا چاہیے۔ اسے اسلامی تعلیمات کے ساتھ منسلک کرنا چاہیے۔ ایک اچھے مسلمان کی طرح ہمیں فطرتی اوقات کار اپنانے چاہیں۔
تاجر بھائیوں سے بھی اپیل ہے کہ وہ حکومتی فیصلے کو اپنی ہار جیت کا مسئلہ نہ بنائیں۔ دو چار ماہ کے بعد یہی فیصلہ ان کے لئے رحمت بن جائے گا۔وہ گھر والوں کو وقت دے سکیں گے۔ بچوں کے ساتھ ہنس کھیل سکیں گے۔بوڑھے والدین کی خدمت کرسکیں گے اور صحت جیسی نعمت سے لطف اندوز ہوسکیںگے۔کاروبار میں ترقی رات کو جاگنے سے مشروط نہیں بلکہ ایمانداری’جائز منافع اور کوالٹی سے مشروط ہوتی ہے۔اور گاہک اور دکاندار دن کی روشنی میں ان شرائط کا بہتر تحفظ کرسکتے ہیں۔
اخباری مالکان اور ٹی وی چینلز کو بھی سوچنا چاہیے کہ رات بھر نشتریات جاری رکھنے اور خبریں بنانے سے کونسی بہتری آگئی ہیں۔میڈیا ورکرز کی اکثریت معدے کی بیماریوں میں مبتلا ہورہی ہے ۔ غیر فطری اوقات کار کے نتیجے میں بننے والی خبریں اور رپورٹیں تعمیری کی بجائے تخریبی زیادہ ہوتی ہیں۔ جاگنے اور جگانے کے اس مریضانہ کلچر کو خیرباد کہنا ہوگا کہ اللہ نے دن کام اور رات آرام کے لئے بنائی ہے۔

Click here to View Printed Statement

پہلے رمضان کو سٹوروں پر’پھل فروشوں کے پاس اور دُکانوں پر بے پناہ رش نظر آیا۔ ہر شخص زیادہ سے زیادہ سامان خوردونوش خریدنے میںجُتا ہوا تھا۔ جس کو ایک تھیلے آٹے کی ضرورت تھی اس کی کوشش تھی کہ وہ پورا یوٹیلٹی سٹور ہی اٹھا کر لے جائے۔جسے روزہ افطار کرنے کے لئے چند کھجوریں دکار تھیں وہ بھی کلو سے کم نہیں لے رہا تھا۔ٹماٹر کے بغیر بھی ہنڈیا چڑھائی جاسکتی ہے لیکن ہر خریدار ٹماٹروں کو یوں للچائی ہوئی نظرو سے گھور رہا تھا گویا اسے زندگی بھر یہ سوغات میسر نہ آسکے گی۔ہر کوئی رمضان کے پورے مہینے کی خریداری کر لینا چاہتا تھا۔ غریب اور امیر کے درمیان صرف قوت خرید کا فرق دیکھا ہے باقی ذخیرہ اندوزانہ طرز فکر میں ذرہ برابر فرق محسوس نہیں ہوا۔ماہ صیام کے بارے میں قرآن پاک میں جو حکم ہوتا ہے

وہ تمام اصحاب علم بار بار پڑھتے اور سنتے ہیں لیکن شائد سمجھتے بہت کم ہیں۔ روزہ کا سب سے اول و آخر مُدعا یہی ہے کہ انسان کے اندر تقویٰ آجائے۔ تقویٰ بہت معنی خیز لفظ ہے ‘لیکن جو چند مفہوم میری حقیر سی دانست میں محفوظ ہیں وہ یہی ہیں کہ ایک شخص (مومن) اگر اپنی خواہشات پر قابو نہیں پاسکتا یعنی وہ اپنی لذات کو ضبط کے بندھن میں باندھنے سے قاصر ہے اور صبر کا دامن تھام نہیں سکتا تو وہ متقی ہرگز نہیں بن سکتا۔زیادہ سے زیادہ خریداری اور غیر ضروری خریداری فضول خرچی کے زمرے میں آتی ہے۔یوں محسوس ہوتا ہے کہ روزہ دار کو یقین نہیں کہ کل بھی آنا ہے اور یہ زمین ہر وقت خوراک اگلتی ہے اور گزشتہ گیارہ ماہ سے وہ انتہائی نارمل طریقے سے روزانہ کی خریداری کرتے رہے ہیں۔اشیاء بھی یہیں ہیں ‘دکاندار بھی یہی ہیںاور آپ ہم سب یہیں ہیں پھر آخر کیا سبب ہے کہ رمضان کا چاند نظر آتے ہی ہمارے دل ودماغ پر ایمرجنسی سی نافذ ہوجاتی ہے ۔ہمارے اندر صبر اور ضبط آنے کی بجائے ”جلدی” اور ”جلدبازی”خریداری اور بسیار خریداری کی ہوس جاگ اٹھتی ہے۔ہماری اسی نفسیات کا ذخیرہ اندوز گروہ فائدہ اٹھاتے ہیں اور وہ کھانے پینے کی اشیاء ذخیرہ کرکے رمضان شروع ہوتے ہی کئی گنا زیادہ قیمتوں پر اشیائے ضروریہ فروخت کردیتے ہیں۔ہم اپی غیر ضروری ایمرجنسی کے ذریعے دراصل معاشرے کے ان ناسوروں کے لئے لوٹ مار کے ذرائع اور راستے پیدا کرتے ہیں۔اگر چینی نہیںمل رہی تو صبر کر لیں چین ضروری ہے۔چینی ضروری نہیں۔یقین جانیں اگر ہم مہنگی چیزوں کو چند روز کے لئے نہ خریدیں تو قیمتیں زمین پر آلگیں گی لیکن ہم چونکہ تقویٰ کے حقیقی معنوں سے بہت دور ہوتے ہیں اس لئے اپنی معمولی لذتوں کو روک نہیں سکتے۔رمضان پورا مہینہ رہے گا۔ اگر ہم کسی لمحے روزے کے بنیادی تقاضے صبر اور ضبط کا مظاہرہ کرسکیں  تو یہ اس معاشرے’ اس ملک اور خود اس ماہ مقدس پر بڑا احسان ہوگا۔آج کے کالم میں روزے کے حوالے سے چند دیگر اہم نکات بھی پیش خدمت ہیں۔روزے دار کو پانچ باتیں بار بار اپنے ذہن میں دھراتے رہنا چاہیں ۔یہ کہ وہ اللہ پروردگار عالم کا بندہ ہے’اسے اللہ کی جناب میں ایک دن جوابدہی کے لئے پیش ہونا ہے’ عبادت میں محبت کے ساتھ رسول اللہ صلی اللہ علیہ وآلہ وسلم کی اطاعت اس پر لازم ہے’اسے دنیا کی اس امتحان گاہ میں صبر سے کام لینا چاہئے’جس طرح اس نے اللہ کے حکم پر حلال اشیاء مخصوص اوقات کے لئے اپنے اوپر حرام کر لی ہیں اسی طرح ساری زندگی اللہ کے ہر حکم کے سامنے فرمانبردار بن کر رہے گا۔یہ ماہ مقدس واقعتاً انسان کی روحانی اور جسمانی ”اوور ہالنگ” کا شاندار موقع ہے۔ اصل ضرورت اس بات کی ہے کہ  روزہ دار کے ہاتھ’ پائوں’ زبان’ دل اور دماغ سے دوسرے لوگ نقصان نہ اٹھائیں بلکہ اس ماہ میں  معاشرہ مجموعی طور پر ”رفاعی معاشرے” کا روپ دھارلے!۔

Click here to View Printed Statement

سستی روٹی کی سکیم چلانے والوں نے ایک سو اسی درجے کی ”کلٹی” ماری اور روٹی کی موجودہ قیمتوں پر بھی ایک فیصد جی ایس ٹی کا نفاذ کر ڈالا۔یہ تو بھلا ہو آزاد عدلیہ کا کہ جناب چیف جسٹس نے عوام کے ساتھ یہ ہاتھ ہونے نہیں دیا اور یوں غریب آدمی کی دال ‘روٹی ‘ آلو پیاز’مرچ ‘برف اور باردانہ آئی ایم ایف کی دستبرد سے بچ گئے ورنہ میاں محمد نوازشریف کے قرابت دار ماہرین اقتصادیات نے تو”خونی انقلاب” کی بنیاد رکھ دی تھی۔اس میں کیا شک ہے کہ ملک کے اقتصادی حالات کسی طرح کنٹرول میں نہیں آرہے۔ آئی ایم ایف کڑی شرائط کا تقاضا کرتا ہے اور عوام کے بدن سے مزید خون نچوڑنے کے مختلف طریقے آزمانے پر آمادہ کرتا ہے۔قومی خزانہ ”بڑے حاجی صاحب” اور ان کے وزراء اعظم اور نوسرباز دوست پہلے ہی خالی کرکے جاچکے ہیں۔پاور پلانٹس بجلی پیدا کرنے کے لئے پانچ سو ارب روپے مانگ رہے ہیں

اور ہمارے وزیر خزانہ نے ساٹھ دنوں کے اندریہ رقم مہیا کرنے کا وعدہ بھی کر رکھا ہے۔یہ پانچ سو ارب روپے کہاں سے آئیںگے ۔بڑا آسان نسخہ ہے ۔پوری قوم روزانہ دو روٹیاں بھی کھائے تو ہر روز 36کروڑ روٹی پکتی ہے یا بکتی ہے۔ اس طرح اگر جی ایس ٹی کے نفاذ سے روٹی ایک روپے مہنگی کردی جائے تو حکومت کے خیال میں اسے روزانہ 36کروڑ روپے صرف روٹی کی مد میں وصول ہوسکتے ہیں۔خوردونوش کی باقی اشیاء اور ادویات پر ٹیکس لگا دیں تو بھی کروڑوں نہیں اربوں روپے روزانہ نچوڑے جاسکتے ہیں۔حکومت جب منصوبے بناتی ہے تو زمینی حقائق بھول جاتی ہے۔پہلے غیر رجسٹرڈ پٹرول پمپوں کو تو کنٹرول کر لیں صرف اسی ایک عمل سے اتنے پیسے مل جائیں گے جتنے ضروریات زندگی کی عمومی اشیاء پر ٹیکس کے نفاذ سے متوقع ہوسکتے ہیں۔امیروں سے لے کر غریبوں کو دینے کے دعوے کرنے والے انقلابی اور جذباتی قائدین کو دال روٹی پر ٹیکس لگانے سے پہلے سوچ لینا چاہیے تھا کہ اس سے حاصل حصول تو کچھ نہ ہوگا۔ غریب کا لقمہ چھن جائے گا اور حکمرانوں کے نصیب میں محض بددعائیں آئیں گی۔عوام کو توقع تھی اور ہمارا اپنا بھی یہی خیال تھا کہ مسلم لی گ(ن) کی حکومت مہنگائی کے مارے عوام کو کم از کم مزید نہیں ماریں گے اور کوئی ایسی منصوبہ سازی فرمائیں گے کہ جس سے عام آدمی کے لئے کچھ آسانیاں پیدا ہوسکیں۔ایک خام خیالی یہ بھی تھی کی میاں صاحب آتے ہی بیرون ملک اپنے اثاثوں کو وطن واپس لانے کا اعلان کریں گے اور قومی خزانے میں ایک معقول رقم جمع کراکے ایک نیا”ٹرینڈ” سیٹ کریں گے۔اگر نئے ٹیکس لگا کر ہی معاشی مشکلات سے نکلنا ہے تو اس کے لئے اقتصادی ماہرین کی کیا ضرورت ہے۔چولہا ٹیکس لگا دیں’ ہوا کھانے پر ٹیکس لگا دیں’ فٹ پاتھ پر چلنے کا ٹیکس لگا دیں’شہروں میں ٹائلٹس کو حکومتی تحویل میں لے کر ریٹس بڑھا دیںَ اگر آئی ایم  ایف کے ”تیر بہدف”مشورے ہی آزمانے ہیں تو پھر ”خوددار اور خودمختار ملت” کے نعرے لگانے کا فائدہ کیا ہے۔تنقید تو ہوگی۔ جب کام ہی ایسے ہوں گے جس سے رہی سہی قوت خرید بھی دم توڑ جائے تو ظاہر یہ تعریف نہیں ہوسکتی۔آج کے کالم میں حکومت کو ایک مشورہ بھی دینا ضروری سمجھتا ہوں۔پاکستان میں بیچارے عوام اپنی معمولی آمدنیوں کا کثیر حصہ علاج معالجے پر خرچ کردیتے ہیں۔پاکستان میں ایلوپیتھی علاج نہ صرف مہنگا ہے بلکہ ایلوپیتھی ادویات کھانے سے ہزارہا۔پیچیدگیاں بھی پیدا ہورہی ہیں۔جرمنی کے بعد اب انڈیا اور امریکہ کے اندر متبادل ادویہ کا طریقہ علاج متعارف ہوچکا ہے اور ہومیوپیتھی طریقہ علاج کی طرف رجحان بڑھ رہا ہے ۔یہ ادویات انتہائی سستی’ معیاری اور غیر مضر ہیں۔حکومت کو چاہیے کہ وہ اس طریقہ علاج کی سرپرستی کرے۔ہومیوپیتھک کالجوںکے نصاب اور انتظام کو سرکاری میڈیکل کالجوں کی طرح ”ریگولٹ” کرنے اور ہومیوپیتھک ادویات کی اندرون ملک تیاری کے راستے ہموار کرے۔عوام کے اندر بھی شعور اجاگر کرنے کے لئے اشتہارات دیئے جائیں۔اس طرح ایک کثیر زرمبادلہ بھی بچے گا’ عوام کو سستا علاج مہیا ہوگا اور ایک صحت مند پاکستان ابھرے گا۔سستی روٹی اور سستا علاج ہی خوشحال پاکستان کی ضمانت ہے۔

Click here to View Printed Statement

بڑے دِل گُردے کی بات ہے۔دہشتگردی نے کتنے گھر اُجاڑ دیئے۔کوئی مقام ایسا نہیں جہاں خون نہ بہایا گیا ہو۔خون بہانے والے کھل کر کھیلے اور آئندہ بھی شائد وہ غارت گری کی اسی راہ پر چلتے رہیں۔کوئی بھی ایسی سیاسی پارٹی نہیں جس کے جسد کو بموں اور گولیوں نے چھلنی نہ کیا ہو۔کوئی بڑی سیاسی شخصیت ایسی نہیں جسے بالواسطہ یا بلاواسطہ طور پر خوف میں مبتلا نہ کیاگیا ہو۔عام پاکستانی جلسے جلوس میں جانے سے پہلے کئی بار سوچتا رہا کہ وہ واپس آئے گا بھی یا نہیں۔انتخابات کی گہماگہمی اوربموں کی پوچھاڑ ساتھ ساتھ چلتی رہی۔بمبار ہارے نہ ہی عوام نے حوصلہ چھوڑا۔اتنے بڑے خطرات مُول لیکر اس انتخابی نظام میں لوگ آخر کیوں حصہ دار بنے۔

موت سامنے تھی پھر بھی جوشیلے نعرے’ پسینہ چھوڑتے ہاتھوں میں جھنڈے اور برتری حاصل کرنے کے لئے ڈنڈے لہراتے رہے۔جنون اور قارون سب کیوں جُتے رہے۔ماضی میں کسی بھی انتخاب میں ایسی شدید سیاسی تقسیم اور تھکا دینے والی سیاسی سرگرمیاں دیکھنے کو نہیں ملتیں۔یہ جانتے ہوئے بھی کہ جمہوریت نے سوائے مایوسیوں کے ہمیں کچھ نہیں دیا۔کرپشن’لوٹ مار اور خانہ جنگیاں۔یہ سب جمہوریت کا ہی تحفہ ہے۔ اس کے باوجود قوم نے مزید جمہوریت کو ہی اپنی منزل تصور کیا۔ ایسے حالات میں جبکہ ایک طرف شیخ الاسلام ڈاکٹر طاہر القادری نے ”کرپٹ نظام” سے لڑنا ہوگا۔ گیارہ مئی کو ”دھرنا ہوگا” کی پورے پاکستان میں وال چاکنگ کرائی۔ ایس ایم ایس اور فیس بُک کے ذریعے ووٹ نہ ڈالنے پر لوگوں کو آمادہ کیا۔دھرنے دیئے ‘لوگ پھر بھی ووٹ کی پرچی کو خوشحالی کا چیک سمجھ کر سنبھالتے رہے۔آخری نتیجہ جو بھی ہو ایک نتیجہ بہرحال برآمد ہوچُکا کہ پاکستانی عوام کی اکثریت جمہوریت کے علاوہ کسی اور نظام کی طرف راغب نہیں ہوسکی۔ طالبان کا ”امارت اسلامی” کا فلسفہ بھی پوری شدت کے ساتھ سامنے آیا اور آرہا ہے۔حزب التحریر کے لوگوں نے اپنے طور پر ”خلافت” کی طرف مراجعت پر بھرپور مہم چلائی اور چلا رکھی ہے۔لیکن ایک عام پاکستانی کو سمجھ نہیں آتی کہ پُرامن انتقال اقتدار کا دوسرا کونسا طریقہ ہوسکتاہے۔ہمیں قوم کی نفسیات کا تجزیہ کرتے وقت یہ بات بھی ذہن میں رکھنی چاہئے کہ اسلام کی طرف سے دیا جانے والا ”امرھم شوریٰ بینھم” کی تشریح بھی ووٹ یا رائے دیہی کے ذریعے ہی ممکن ہے۔ یہ صحیح ہے کہ پاکستان کے ستر فیصد نوجوان شرعی نظام کے حامی ہیں لیکن ان کے سامنے شرعی نظام کے نفاذ کا ذریعہ پارلیمان کے علاوہ کوئی نہیں۔حکمران چُننے کا اختیار ایک ایسا حق ہے جو صرف اور صرف ووٹ کے ذریعے ہی مل سکتا ہے۔ اور یہی حق لینے اور آزمانے کی خاطر پاکستانی قوم نے زخم برداشت کئے۔ لاشیں اٹھائیں ‘اغواء کی وارداتیں ہوئیں اور بالآخر پولنگ سٹیشنوں پر پہنچ گئے۔سچ یہ کہ لوگ خون کے دریا عبور کرکے پولنگ بُوتھ تک پہنچے۔جیتنے والی پارٹیوں کو حکومتیں بناتے وقت یہ ذہن میں رکھنا ہوگا کہ اگر اب کی بار بھی محض باری لینے کی نفسیات حاوی رہی اورعام آدمی کی زندگی میں کوئی مثبت تبدیلی نہ آسکی تو پھر غیر جمہوری فلسفے کو پروان چڑھنے سے دنیا کی کوئی طاقت روک نہ سکے گی۔اگر شیر اور بلے کا تکبرّکسی مضبوط اور مفید اتحاد کی راہ میں رکاوٹ بنا تو یہ قوم نہ شریف برادران کو معاف کرے گی اور نہ ہی اپنے قومی ہیرو سے مزید ہمدردی کرسکے گی۔دونوں پارٹیوں نے انتخابی مہم کے دوران تقریباً ایک جیسے پروگرام دیئے’ایک جیسے وعدے کئے۔(ن) لیگ کے پاس حکمرانی کا وسیع تجربہ ہے اور اس پارٹی نے واقعتا بڑے بڑے منصوبے مکمل کئے ہیں۔لیکن تحریک انصاف کے پاس ایک پُرجوش فورس ہے۔ اگر واقعتا یہ پارٹیاں نیا پاکستان بنانا چاہتی ہیں تو پھر ان کی آپس کی مخاصمت اس مُلک کو پھر سے اندھیروں میںدھکیل دے گی۔ یہ قوم بڑی حوصلہ مند ہے لیکن ذاتی مفادات کے تابع سیاسی قلابازیوں کو کبھی برداشت نہ کر پائے گی۔ووٹ اور اس نظام سے ہمیشہ کے لئے لاتعلق ہوجائے گی۔

Click here to View Printed Statement

ہمیںپی پی حکومت کا مشکور ہونا چاہیے کہ بانی پاکستان محمد علی جناح کی سالگرہ سرکاری طور پر منانے کا اہتمام ہوا ہے۔
گزشتہ 65 برسوں میں ہم نے اتنے قائد بنا لئے ہیں کہ اپنے اصل قائد کو بھول ہی گئے ہیں۔ بلکہ آمریتوں کے ادوار میں جان بوجھ کر قائداعظم کی سالگرہ اور برسیوں پر خاموشی اختیار کی گئی۔ پرویز مشرف کے دور میں آمریت کے کاسہّ لیس اورشاہ سے زیادہ شاہ کے وفاداروںنے پاکستان کے کرنسی نوٹوں سے بانی پاکستان کی تصویر ہٹا کر جنرل پرویز کی تصویر لگانے کا پورا منصوبہ بنالیا تھا۔ نمونے کے طور پر ایسے نوٹ تیار بھی ہوگئے تھے۔آج بھی قائداعظم کی ذات اور ان کے افکار کو متنازعہ بنانے کا ٹھیکہ لنڈا بازار کے دانشوروں کو دے دیا گیا ہے۔ ایسی ایسی بولیاں سنائی گئیں کہ کان پھٹنے کو آگئے ہیں۔ یوں محسوس ہوتا ہے کہ مسلمانان ہند نے یہ ملک مسلمانوں کے لئے نہیں بلکہ چند امریکی غلاموں کی ناجائز خواہشوں کی بارآوری کیلئے بنایا تھا۔
”پاکستان کا مطلب کیا لاالٰہ اللہ” والے نعرے کا تمسخر اڑایا جارہا ہے۔ اسلام کا حوالہ مٹانے کی ہر کوشش کی جارہی ہے۔ ایک گروپ نے امریکیوں کے اشارے پر ”اسلامی جمہوریہ پاکستان” میں سے اسلام کا لفظ حذف کرنے کی رٹ لگانا شروع کررکھی ہے۔ ان حالات کو دیکھتے ہوئے ہمارے دوست کالم نگار بیگ راج نے کہیں لکھ دیا ہے ”اگر آج قائداعظم زندہ ہوتے…” تو بگرام ایئربیس پر امریکیوں کی قید میں ہوتے”

قائداعظم کی تقاریر کے حوالے سے بیسیوں تقاریر کو ایک طرف رکھ کر کسی ایک تصویر کو اس کے سیاق و سباق سے کاٹ کر پیش کیا جاتا ہے اور ثابت کیا جاتا ہے کہ قائداعظم اس ملک کو ایک سیکولر یا بے دین ریاست بنانا چاہتے تھے۔راقم نے راولپنڈی میں قائم ایک معتبر تھنک ٹینک” تھنکرز فورم” میں ایسے ہی پھیلائے گئے تاثر کے خلاف دستاویزی ثبوتوں کا حوالہ دیکر عرض کی تھی کہ مانا کہ یہ پاکستان اسلام کیلئے نہیںمسلمانوں کے لئے بنایا گیا تھا۔ اگر یہ حقیقت سب تسلیم کرتے ہیں تو کوئی مسلمان بتائے کہ اس کا مذہب اور دین کیا ہے؟ ظاہر ہے اسلام ہے۔ پھر یہ ہٹ دھرمی کیسی؟ اسلام اور مسلمان لازم و ملزوم ہیں۔ اسلام کے بغیر مسلمان نہیں اور جو مسلمان ہے وہ اسلام کے بغیر مسلمان رہ نہیںسکتا۔
فکرو نظر کی ان بحثوں سے بچنے کا ایک راستہ یہ ہے کہ ہم یقین کر لیں کہ قائداعظم اس مملکت خداداد کو اسلام کے فلاحی نظام سے مزین کرنا چاہتے تھے ان کی منزل اسلامی فلاحی ریاست کا قیام تھا۔ اصل سوال یہ ہے کہ کیا ہم نے بحیثیت قوم’بحیثیت مسلمان اور بحیثیت انسان اپنے اس وطن کو حقیقی فلاحی ریاست بنانے کے لئے کوئی تگ و دو کی ہے۔”اسلامی” تو بڑی دور کی منزل ہے ‘ اس کی پہلی سیڑھی تو ایک فلاحی ریاست ہے جو قرآن و سنت کے لازوال اصولوں پر قائم ہو۔ کیا ہمسائے کے حقوق سے لیکر دولت کی منصفانہ تقسیم اور اختیارات کے عوامی حق تک کوئی پیش رفت ہوئی ہے۔
ہمیں آج پھر ایک بار سوچنا ہے کہ ہماری منزل کیا ہے اور منزل کا تعین بانی پاکستان نے ایک بار نہیں باربار’ہر تقریر اور ہر میٹنگ میں کیا تھا۔ ہمیںان سارے افکار کو منظر پر لانا ہے جن کو سن کر سمجھ کر ہمارے دل و دماغ اس وطن کو اسلامی فلاحی مملکت بنانے پر آمادہ ہوتے ہیں۔ ہمیں اسلام کا معاشی نظام ترتیب دینا ہے۔رسول پاک صلی اللہ علیہ وآلہ وسلم والا مدینہ نہ سہی کم از کم اس ماڈل کو نگاہوں میں رکھ کر آگے بڑھنا ہے۔ ہماری اس منزل کے حصول میں جہاں سے روشنی ملے لینی ہے’ جو مددگار ثابت ہو اس سے فکری مدد لینی ہے۔قائداعظم کو رول ماڈل کے طور پر عوام کے سامنے پیش کرنا ہے۔یہ ثابت کرنے کی بجائے کہ ہماری حکومت جو کام کر رہی ہے وہی قائداعظم چاہتے تھے۔قائداعظم کے ویژن کو بالا وبرتر رکھنا ہے۔نہ ملاں کا فساد اس ملک کو آگے لے جاسکتا ہے نہ ہی مغرب زدہ افکار اسے سنوار سکتے ہیں امت رسول ۖہاشمی کو قرآن و سنت کی روشنی میں ہی آگے بڑھایا جاسکتا ہے۔
میں قارئین کے ساتھ قائداعظم کی واحد تمناشیئرکرناچاہتا ہوں جس سے قائد کا وژن اور فلسفہ پاکستانیوں کے سامنے آئے گا’قائداعظم نے فرمایا:
”مسلمانو! میں نے دنیا کو بہت دیکھا۔ دولت’شہرت اور عیش وعشرت کے بہت لطف اٹھائے۔ اب میری زندگی کی واحد تمنا یہ ہے کہ مسلمانوں کو آزاد اور سربلند دیکھوں۔ میںچاہتا ہوں کہ جب مروں تو یہ یقین اور اطمینان لے کر مروں کہ میرا ضمیر اور میرا خدا گواہی دے رہا ہو کہ جناح نے اسلام سے خیانت اور غداری نہیں کی اور مسلمانوں کی آزادی ‘ تنظیم اور مدافعت میں اپنا فرض ادا کردیا۔میں آپ سے اس کی داد اور شہادت کا طلب گار نہیں ہوں۔ میں یہ چاہتا ہوں کہ مرتے دم میرا اپنا دل’میرا اپنا ایمان’ میرا اپنا ضمیر گواہی دے کہ جناح! تم نے واقعی مدافعتِ اسلام کا حق ادا کردیا۔جناح تم مسلمانوں کی تنظیم’اتحاد اور حمایت کا فرض بجالائے۔ میرا خدا یہ کہے کہ بے شک تم مسلمان پیدا ہوئے اور کفر کی طاقتوں کے غلبے میں علمِ اسلام کو سربلند رکھتے ہوئے مسلمان مرے”۔

”بعض حلقوں کا خیال ہے کہ جناب ڈاکٹر طاہر القادری کی طرف سے انتخاب سے پہلے اصلاحات کی مہنگی ترین مہم میں تیس کروڑ روپے سے زائد خرچ کی جانے والی بھاری رقم جناب آصف علی زرداری کی وساطت سے ملی ہے۔اگر ایسا ہے تو ہم صدر پاکستان سے دست بستہ عرض کریں گے کہ وہ جناب ڈاکٹر طاہر القادری صاحب پر مذید سرمایہ کاری کرنے  سے پہلے جناب میاں محمد نوازشریف سے ان کے بارے میں ضرور پوچھ لیں۔ ڈاکٹر صاحب کے بارے میں ان کے بعض دیرینہ دوستوں کا خیال ہے کہ شیخ الاسلام کی جسامت دھوکہ دیتی ہے۔ہاتھی کے دانت کھانے کے اور اور دکھانے کے اور ہوتے ہیں۔محترم قادری صاحب بہت کچھ کھا جانے کے بعد بھی اڈکار نہیں لیتے اور ان کی خوش خوراکی کا عالم یہ ہے کہ وہ نہ نہ کرتے دسترخوان کے دستر خوان خالی کر جاتے ہیں۔یہ چھ سات برس پہلے کی بات ہے

کہ ڈاکٹر موصوف راولپنڈی میں ہمارے دوست جناب ناصر مغل صاحب کے گھر جلوہ افروز ہوئے۔ ڈاکٹر صاحب کو کمر کا درد بھی ہوتا ہے اور اس دردپر قابو پانے کے لئے وہ ایک گدی کا سہارا لیتے ہیں۔یہ گدی رکھنے اور اٹھانے کے لئے خصوصی ملازم بھی ان کے ہمراہ تھا۔ گاڑی میں ڈرائیور کے علاوہ ان کے دو گن مین بھی چاک و چوبند دکھائی دے رہے تھے۔ ناصر مغل سابق طالب علم رہنما ہیں اور عظیم المرتبت لوگوں کے لئے دستر خوان بچھاتے رہتے ہیں۔ انہوںنے اپنی نیت کی خوبصورتی کی طرح اس دعوت کا اہتمام بھی انتہائی خوبصورتی سے کیا تھا۔ راقم کو نوالے گننے کی عادت نہیں لیکن درجن بھر ڈشیں دیکھنے کے بعد شمار کرنے کو جی چاہا۔ حیرت ہوتی ہے کہ ڈاکٹر صاحب جیسے سمارٹ اور سڈول جسم والے عالم دین نے کم خوراکی کے مسلسل دعووں کے باوجود تقریباً ہر ڈش سے جی بھر کر کھایا۔ ہوسکتا ہے کہ ان کی خوش خوراکی کا سبب میزبان کا اصرار ہو۔ جب سویٹ ڈشیں پیش کی جانے لگیں تو ڈاکٹر صاحب نے از راہ تکلف فرمایا” اتنی ڈشیں ایک غریب آدمی کو کہاں میسر آتی ہیں۔ میں نہیں کھائوں گا” راقم سے رہا نہ گیا اور  ازراہ تفنن عرض کی جہاں اٹھارہ ڈشیں آپ کھا گئے وہاںچار یہ بھی کھا لیں۔عرض کرنے کا مدعا و مقصد یہ ہے کہ جناب آصف علی زرداری جو کہ سیاست میں ایک ماہر سرمایہ کارثابت ہوئے ہیں وہ ایسی غلطی کر ہی نہیں سکتے۔ لیکن اگر ان کے خیرخواہوں یعنی ملک ریاض وغیرہ نے زرداری اقتدار کی طوالت کے لئے ڈیڑھ دو ارب روپے لٹانے کا فیصلہ کر لیا ہے تو ہم ان کے لئے صرف دعائے خیر ہی کرسکتے ہیں۔انتخابی اصلاحات کے مطالبے کی تفصیلات بھی دھیرے دھیرے سامنے آرہی ہیں۔مثلاً ایم۔کیو۔ایم جو کہ جناب قادری کو سب سے زیادہ سپورٹ کر رہی ہے اس کے نزدیک سب سے بڑی انتخابی اصلاح یہ ہے کہ سیکرٹری الیکشن کمیشن کو فوری طور پر تبدیل کردیاجائے۔ ابھی دس اور چودہ جنوری بہت دور ہیں۔ اصلاح کی پٹاری سے اسی طرح کے انڈے بچے مزید نکلنے کا امکان ہے۔جہاں تک جناب قادری کے اعلان کردہ ملین مارچ کا تعلق ہے تو مارچ جنوری کے بعد آتا ہے۔ اس لئے جناب حافظ سعید صاحب نے جناب قادری کو مشورہ دیا کہ وہ اس قدر تیز رفتاری نہ دکھائیں’ جنوری میں مارچ نہیں ہوا کرتا۔ بعض سازشی گروہ یہ افواہ بھی پھیلا رہے ہیں کہ جناب قادری خود نہیں آئے بلکہ بھیجے گئے ہیں ۔ بعض کا خیال ہے کہ بلائے گئے ہیں۔بلانے والے کون ہیں کوئی حتمی جواب نہیں ہے۔ جہاں تک جی۔ایچ۔کیو والوں کا تعلق ہے تو وہ ”نادرا” کے دفتر میں الیکشن کمیشن کے چیف کو مل چکے ہیں۔ اور چیف آف الیکشن کمیشن کو آرمی چیف نے یقین دہانی کرادی ہے کہ وقت مقررہ پر انتخابات کرانے کے لئے فوج بھرپور تعاون کرے گی۔ جب سے قادری صاحب کو اس ملاقات کا علم ہوا ہے وہ بار بار وضاحتیں کرنے لگے ہیں کہ ”میرا ایجنڈا الیکشن ملتوی کرانا نہیں”۔حالانکہ مینار پاکستان میں اذان کو نظرانداز کرتے ہوئے انہوں نے یہی فرمایا تھا کہ آئین میں نوے دنوں میں الیکشن کرانے کی کوئی پابندی نہیں۔ میرا ذاتی سا خیال ہے کہ کور کمانڈرز کی کوئی ایک کانفرنس اور آئین کا ساتھ نبھانے کا فوجی اعلان جناب قادری صاحب کو جی ٹی روڈ یا موٹروے پر چڑھنے سے روکنے کے لئے کافی ہوگا۔قارئین ! میں قادری صاحب کی خطابت کا دل سے قائل ہوں اور مجھے ان کی کینڈین شہری ہونے پر بھی کوئی اعتراض نہیں۔ بلکہ میرے جیسے مداح تو چاہتے ہیں کہ وہ کینیڈا کے بعد آسٹریلیا’ امریکہ’ جاپان اور لندن کی شہریت بھی لے لیں اور وہاں کے کافروں کو اپنے افکار سے محظوظ فرماتے رہیں۔ جو لوگ کہتے ہیں کہ قادری صاحب سیاسی اسٹیج پر ایک مہمان اداکار کے طور پر تھوڑے وقت کے لئے اپنے جوہر دکھانے آئے ہیںو ہ ان کی پرفارمنس کو انجوائے کریں اور یہ جان لیں کہ جناب قادری آئندہ کے انتخابات  میں بارگیننگ کی بہترین پوزیشن میں ہوں گے۔

راتوں رات تبدیلی نہیں آسکتی۔ سالوں سال بھی تبدیلی شائد نہ آسکتی ہو، لیکن یہ تو نصف صدی پر محیط المیوں اور قومی سانحوں کا دلخراش سلسلہ ہے جو ختم ہونے کا نام ہی نہیں لیتا۔ فوج اور سیاستدان۔ سیاستدان اور فوج۔ دونوںایک دوسرے کیلئے میدان سجاتے رہے ہیں’ ایک دوسرے کیلئے جواز پیدا کرتے رہے ہیں۔ لیکن اب کی بار سیاستدان خاصے ہوشیار دکھائی دے رہے ہیں۔ جناب ڈاکٹر علامہّ طاہر القادری صاحب ” سیاست نہیں ریاست بچائو”کا نعرہ لے کر میدان میں اترے ہیں اور وہ ریاست بچانے کیلئے اُسی طاقت کو بُلا رہے ہیں

جس قوّت کو انہوں نے نوازشریف کے اقتدار کے آخری دنوں میںآواز دی تھی اور جنرل پرویز مشرف کا استقبال کیا تھا۔ جناب طاہرالقادری اب کی بار کامیاب نہیں ہونگے کیونکہ اب وزیراعظم ہائوس میں انتہائی دھیمے مزاج کے جناب راجہ پرویز اشرف  اور ایوانِ صدر میں پارٹی کے دُوربین صدر آصف علی زرداری ہیں اور ریاست بچانے والی قوّت کی باگ ڈور ہمارے انتہائی جمہوری مزاج رکھنے والے جنرل کیانی کے ہاتھ میں ہے’ جنہیں اشتعال دلانے کیلئے ان کے بھائی کے حوالے سے کرپشن کی کئی کہانیاں منظر عام پر لائی جا رہی ہیں۔لیکن اب نہ 1999ئ کا نوازشریف ہے اور نہ ہی ” دہلی کا بانکا” پرویز مشرف ۔(ن) لیگ اور پی پی پی پھونک پھونک کر قدم رکھ رہے ہیں اور وہ کوئی ایسی پوزیشن اختیار نہیں کرتے جہاں ایک دوسرے کے ذاتی مفادات پر زد پڑنے کا اندیشہ پیدا ہوتا ہو۔ وفاقی وزیر مذہبی امُور جناب سید خورشید شاہ نے اس صورتحال پر کمال کا تبصرہ صادر فرمایا ”میں نہیں چاہتا کہ میری داڑھی پرنوازشریف کاہاتھ ہو”اور نوازشریف کا میری داڑھی پر” مقصد یہ ہے کہ پی پی پی اور (ن) لیگ کی لڑائی ”انتخابی” ہو گی ”ذاتی ” نہیں ہو گی۔ اصغر خان کیس کے فیصلے پر عملدرآمد روک دینا اس بات کی دلیل ہے کہ اسیّ کی دہائی دھرائی نہیں جائے گی۔میاں نواز شریف نے اپنے برادر خورد میاں شہباز شریف کو جناب آصف علی زرداری کی شان میں ” بدتہذیبی” کرنے پر اُنہیں میٹھی سی جھاڑ بھی پلائی ہے اور اس کے نتیجہ میں میاں شہباز شریف اب جناب زرداری کو براہِ راست چور، ٹھگ، ڈاکو اور لٹیرا کہنے کے بجائے بلواسطہ طور پر غصہّ اُگلتے ہیں۔ میاں محمد نواز شریف کا مؤقف ہے کہ موجودہ حکومت اگر پانچ برس پورے کر رہی ہے تو اس کی تکمیل میں حکومت کی کارگردگی نہیں بلکہ (ن) لیگ کا صبر کارگرہے۔ میاں برادران نے خود پر فرینڈلی اپوزیشن ہونے کا الزام سہا ہے لیکن سیاسی مخاصمت کو ”ہلکی پھلکی موسیقی” تک محدود رکھا ہے۔ پی پی پی کی گورنمنٹ تمام تر نا اہلیوں کے باوجود گزشتہ پانچ برس سے عوام پر مسلّط ہے۔ جناب عمران خان جب میاں نواز شریف کو برابر کا مجرم قرار دیتے ہیں تو اسی نکتے کو بنیاد بناتے ہیں۔ ”ن لیگ نے اسمبلیوںسے استعفیٰ نہ دیکر عوام کو دھوکا دیا ہے”۔ ”نہیں جی۔ یہ دونوں چور ہیں۔ ایک دوسرے کے خلاف کبھی نہیں لڑیں گے” عمران خان اپنے سیاسی نظریئے اور تجزیئے کا اظہار کرتے رہتے ہیں۔اب کی بار تقریباََ تمام سیاسی و دینی جماعتوں نے فوج کی آمد کے کِسی امکان کو خوش آمدید کہنے سے انکار کر رکھا ہے۔ جماعت اسلامی بھی مقرّرہ وقت پر انتخابات ہی چاہتی ہے۔ انتقالِ اقتدار میں ”ٹرپل ون” کا کوئی کردار اس جماعت کو پسند نہیں ۔ مارشل لآ کی ”بی ٹیم” کا طعنہ اب تقریباََ ختم ہو چُکا ہے۔ اے این پی کی امریکہ سے انتہائی قربتوں کے بعد اب جماعت اسلامی کے زعماء سے امریکی ایجنٹ ہونے کا لیبل بھی اُتر چُکا ہے ۔ جماعت اسلامی ‘ ملی یکجہتی کونسل اور تحریکِ دفاعِ پاکستان میں شامل تمام جماعتوں نے فوج کی باری کے بارے میں سوچنا ترک کر رکھا ہے۔ اب کہیں سے کوئی  ”مٹ جائے گی مخلوق تو انصاف کرو گے” جیسی صدا سنائی نہیں دیتی۔  فوج کے خلاف میڈیا ٹرائل اور عدالتی جارحیت اسقدر مؤثر ہے کہ جی ایچ کیو دفاعی پوزیشن میں آچکا ہے۔حالانکہ مارشل لآ کا جواز اس مُلک میں ہمیشہ سے رہتا ہے اور آج کل لوُٹ مار، مہنگائی، خانہ جنگی اور بغاوتیں اسقدر زوروں پر ہیں کہ جواز مزید جائز ہو گیا ہے۔ اگر کبھی ٹی وی سکرین پر اچانک ”عزیز ہم وطنو” کی آواز سنائی دے تو عوام اس آواز کو دِل و جان سے سُنیں گے۔ایسی کوئی آوازسنائی نہ دے اور صرف ”وزیراعظم نوازشریف” کا نعرہ لگے’ مسلم لیگ (ن) اس مقصد کیلئے جناب آصف علی زرداری کے ہر زردارانہ اقدام کو استقامت کے ساتھ برداشت کرتے جا رہی ہے۔ ایک دوسرے کے شکریے جاری ہیں تاکہ کوئی شکِر اقتدار کی بُلبُل کو اُچک کر نہ لے جائے اور کہیں ایسا نہ ہو کہ میاں برادران اور جناب آصف علی زرداری اٹک قلعہ کے کسی ایک ہی سیل میں قید ہو جائیں۔

امریکی پالیسی سازوں کو خوش ہونا چاہے کہ انہوں نے ٹھیک کر دینے کے جو فارمولے پاکستان پر آزمائے ہیں وہ پوری طرح کارآمد ثابت ہوئے ہیں اور نتجتاََ یہ ملک اب دُنیا کا ساتواں بدعنوان اور غیر محفوظ مُلک بن چُکا ہے ۔ مالی طور پر غریب ترین، انتظامی طور پر کرپٹ ترین، عدلیہ ناکام ، انتظامیہ بے جان کم از کم اب یہ ایسا مُلک نہیں رہا  جہاں سکون سے سویا جا سکتا ہو، جہاں رشوت دئیے بغیر بچہ سکول داخل کرایا جا سکتاہو۔ غیر محفوظ اس قدر کی جھاڑیاں بھی دہشت گرد دکھائی دیتی ہیں۔ ہر طرف خون ہے، خوف ہے، بھکاری ہیں، بھوک ہے۔ قدم قدم پر نا انصافی ہے، انا رکی ہے، خانہ جنگی ہے اور جنگی مزاج ہے!نائن الیون کو ٹوئن ٹاورزاڑانے والوں میں ایک بھی پاکستانی نہیںتھا لیکن 2002ء کے بعد سے اب تک ہر پاکستانی کو نفسیاتی ، مالی اور ثقافتی طور پر اذیتناک سزادی گئی ہے اور دی جا رہی ہے۔ پہلے والے زخم مند مل ہونے کا نام نہیں لیتے اور اَب یہی امریکہ پاکستانی قوم کو”تعلیم یافتہ” بنانے پر تُل گیا ہے۔ یوایس ایڈ اب ایسی قوم کو تعلیم کی اہمیت سے آگاہ کرنے جا رہی ہے جس کا آغاز ہی ”اقرائ” سے ہوا تھا ۔ دس برس بیت گئے ،بجلی ناپید ، گیس غائب، روزگار روٹھ گئے خُدا جانے امریکی ڈالرز جاتے کہاں ہیں۔ سو ڈالر آتا ہے اور ڈیڑھ سو ڈالرز نچوڑ لئے جاتے ہیں۔ جب امریکہ جیسا مُلک دوست ہو تو پھر دشمن کی ضرورت ہی کیا ہے۔

سیاست نے ہر طرح کی تابعداری کی۔ جب کسی ملک پر کرپٹ ترین لوگوں کو مسلط کرنے کیلئے امریکی پالیسی ساز ادارے اور کارندے اپنے سیاسی اور معاشی اثر ورسوخ کو استعمال کرتے ہیں اور ہر طرح کی بد عنوانی کی پیٹھ ٹھونکتے ہیں تو پھر یہ طعنہ کہ پاکستان ساتواں بدعنوان ترین ملک بن گیا ہے، ایک سنگین مذاق اور رستے زخموں پر کالا نمک چھڑکنے کے مترادف ہے۔ امریکہ کو مبارک ہو کہ وہ پاکستان کو پستی کے جس مقام پر لانا چاہتا تھا، وہاں پہنچ گیا ہے اور آگے بھی جہاں گرانا چاہیں وہاں گرنے پر تیار ہے۔ میں کوئی جھوٹی امید دلانا نہیں چاہتا صرف قرآن حکیم میں بیان کی گئی وارننگ کو دھرانا چاہتا ہوں سورة بنی اسرائیل آیت نمبر16اور 17میں قوموں کی ہلاکت کا طریقہ کار بڑا کھول کر  بیان کر دیا گیا ہے۔ حکمران ہر طرح کے فسق و فجور اور فواحش میں مبتلا ہو جاتے ہیں اور آج کی حکمران کلاس اپنے گریبان میںجھانکے اور سوچے کہ وہ کونسی بُرائی ہے جس کی سرپرستی اس کے ہاتھوں نہیں ہو رہی۔ مالی بدعنوانی ۔ اخلاقی بدعنوانی ، ذہنی بدعنوانی، سماجی بد عنوانی بد عنوانیوں کے عنوان ختم ہو جائیں گے لیکن حکمران طبقات کی حرص وہوس ختم ہونے کا نام نہیں لیتی ۔ امریکہ جیسے شیطانی ممالک کو پاکستان کو پاتال میں گِرانے پرزیادہ  طاقت لگانے کی ضرورت ہی نہیں۔ اُس کا ویزالاٹری ہی کافی تھا لیکن ناحق اُس نے ڈرونز اور بلیک ووٹر کا سہارا لیا۔حکمران ہی نہیں ‘ہم سب بھی ماتحت اور افسر، اجر اورآجیر، ووٹر اور لیڈر، صحافت اور سیاست ہم خود کس قدر خود غرض ہو چُکے ہیں ظُلم ہر طرف ظُلم عید پر ظُلم ، رمضان میں ظُلم ، محرم میں ظُلم دُکاندار لوٹتا ہے، ویگن والا، ٹیکسی والا ، سوزوکی والا چھینتا ہے۔ ہم ووٹ بیچتے ہیں، رائے فروخت کرتے ہیں۔ پھر ایسی قوم جو بحیثیت مجموعی ظالم ہو چُکی ہو اُس کے بارے میں قرآن نے جگہ جگہ تنبیہ فرمائی ہے۔ ہم ہر روز ببول کے کانٹے بوتے ہیں اور ہر شام ان سے مالٹے اُتارنے کی کوشش کرتے ہیں ایسا ہو نہیں سکتا جو بوتے ہیں وہی کاٹنا ہے۔ امریکہ ہمارا دُشمن ہے اور اس پر طرفہ یہ کہ ہم خود بھی اپنے ساتھ دُشمنوں والا رویہ روارکھے ہوئے ہیں!یا دکھیئے اے صاحبان شعور، جب تک ہم واپس اپنی بنیادوں کی طرف نہیں لوٹ آتے، ہمارے زوال کی رفتار کم نہ ہو پائے گی ۔فطرت افراد سے اغماض تو کر لیتی ہےکرتی نہیں ملت کے گناہوں کو کبھی معافواشنگٹن میں قائم امریکی ادارے  ورلڈ جسٹس پروجیکٹ نے سال 2012ء کی فہرست میں97ممالک میںسے پاکستان کو ساتواں کرپٹ ترین اور انتہائی غیر محفوظ ملک قرار دے کر صرف نتیجے کا اعلان کیا ہے۔ امریکہ کو خوش ہو چاہیے کہ رزلٹ توقع سے بڑھ کر آیا ہے۔ اور یہ صرف امریکہ کا کمال نہیں ہم نے امریکہ سے بڑھ کر اپنی پستی کی طرف دوڑ لگا ئی ہے اورمہیب کھائی کے کنارے پر پہنچ گئے ہیں۔ ہمیں اس کھائی میں گرنے سے کوئی نہیں روک سکتا صرف توبہ ہاں  صرف توبہ!!

پاک بھارت دوستی کی اس قدر دھول اڑائی جارہی ہے کہ دوست دشمن کا چہرہ  پہچاننا مشکل ہوگیا ہے۔سرکاری ٹی وی پر بھی بھارتی اشتہارات دیکھنے کو مل رہے ہیں۔کترینہ کیف اور سیف ہمارے ٹی وی چینلز کے اندر خون بن کر دوڑ رہے ہیں۔ یوں محسوس ہوتا ہے کہ ہماری سوچ اور عقل کے سارے دھارے اب سرحد پار سے پھوٹتے ہیں اور ہم یہاں بیٹھے انہی لفظوںاورانہی استعاروں کی مالا جپتے اور ان کے اشاروں پر ناچتے ہیں۔ہمارا مقبول ترین سلوگن اب ”نچ لے” بن چکا ہے۔ملی غیرت اور قومی حمیت جیسے الفاظ لکھنے اور بولنے پر دْشنام طرازیوں کے پے در پے وار سہنے پڑ رہے ہیں۔”چھڈوجی پاگل جے” یہ ہے بھارت نواز دانشوروں کی وہ پھبتی جو ”امن کی آشا” اور ”مفادات کی فحاشہ” پر تنقید کرنے پر کسی جاتی ہے۔امن کس کو نہیں چاہیے؟پاکستانیوں کو امن کی جس قدر ضرورت ہے شائد دنیا کی کسی اور قوم کو ہو۔ جہاں ہرروز خون بہتا ہو’لاشے گرتے ہوں’ روحیں تڑپتی ہوں اور بے یقینی ایمان شکنی کی حدیں چھونے لگے وہاں امن کی خواہش کون نہیں کرے گا۔ہمسایوں کے ساتھ پْرامن رہنا ہمسایوں سے زیادہ ہماری ضرورت ہے۔لیکن کیا لفظ امن امن کی گردان کرنے سے امن قائم ہوجاتا ہے؟ آزمودہ قول ہے کہ ظلم اور امن ایک جگہ اکٹھے نہیں ہوسکتے۔ظلم رہے اور امن بھی ہو یہ ناممکنات میں سے ہے۔مظلوم وقتی طور پر ظلم کے سامنے دب سکتا ہے۔

لیکن وہ ظلم کو ہضم نہیں کرسکتا۔بھارتی وزیر خارجہ مسٹرکرشنا کی آمد کے موقع پر حکمران ٹولے کی باچھیں کھل رہی تھیں اور وہ آسان ویزا جیسی بے معنی لایعنی تجاویز پر جھوم جھوم کر ہلکان ہورہے تھے۔ ہمارے ٹی وی چینلز اور ان کے اینکرزپاک بھارت بہتر تعلقات کی اس لمحاتی صورتحال کو ترستی نگاہوں اور للچائے ہوئے لہجوں کے ساتھ قوم کے دل و دماغ میں اتارنے کی کوشش کر رہے تھے۔ ایک ٹی وی چینل”سروں کی جنگ” چھیڑ رہا ہے۔ اور پاکستان اور بھارت کے گویوں کے مقابلوں کو قومی سطح کی ہاراور جیت کا درجہ دے رہے ہیں۔ کہاں کشمیر کی آزادی کے لئے ہزار سال تک جنگ کرنے والے اور کہاں اب اداکاروں’فنکاروں’گلوکاروں اور غیرت فروش جتھوں کی پرفارمنس اور ادائوں کو قومی بقا کی جنگ قرار دینے والے بونے سیاستدان!!!کرشنا آئے ‘مینار پاکستان گئے’خوش ہوئے اور واپس چلے گئے۔ کیا فرق پڑے گا۔ کیا دہلی نے پاکستانی دریائوں پر ڈیم بنانے بند کردیئے ہیں؟ کیا سرکریک کی چوٹی مل گئی ہے اور کیا کشمیر سے فوجیں واپس چلی گئی ہیں کیا فرق پڑا ہے۔ تجارت ‘تجارت ایک اخبار نے لکھا ہے کہ بالآخر پاکستان نے بھارت کی یہ نصحیت قبول کر لی ہے کہ کشمیر چھوڑ کر تجارت کرو۔ماضی کو بھول کر مستقبل کے بارے میں بات کرو۔ اس سے بڑی ناکامی کیا ہوگی؟ لوگ کہتے ہیں کہ پاکستان نے کشمیر کے لئے تین جنگین لڑی ہیں اور آدھا ملک گنوایاہے۔ہم پوچھتے ہیں کہ اگر پاکستان نے یہ تین جنگیں نہ لڑی ہوتیں تو کیا ضمانت تھی کہ  یہ ملک آج صفحہ ہستی پر موجود بھی ہوتا؟ کیا بھارت یہ ضمانت فراہم کرتا کہ ”پاکستان کے معصوم لوگو! تم نے ہندوستان کو تقسیم کرکے بڑا کارنامہ سرانجام دیا ہے اور ہم ا س پر خوش ہو کر تمہارے وجود کے تحفظ کا عہد کرتے ہیں”۔ مجھے پورا یقین ہے کہ اگر بھارت تقسیم ہند کے فارمولے پر عملدرآمد کرتا تو آج ہم دونوں ملک پرامن ہمسایوں کی طرح رہ رہے ہوتے۔لیکن جب ایک جابر نے میری  شہ رگ پائوں سے دبا رکھی ہے تو میں کس طرح امن سے بیٹھا رہوں گا۔مجھے یہ سمجھانا کہ دیکھو امن سے پڑے رہو اور آہستہ آہستہ موت کی طرف لپکتے جائو۔ظلم کی انتہائی صورت ہے۔مولانا فضل الرحمن نے بالکل ٹھیک نشاندہی کی ہے کہ مسئلہ کشمیر ہی  تمام مسائل کی ماں ہے۔آپ مسئلہ کشمیر حل کردیں باقی کے تمام مسائل خود بخود حل ہوجائیں گے۔ ہمارے سارے دانشور بھارتی لابیوں کے دلائل کے اسیر ہوتے جارہے ہیں۔ وہ مولانا کے پرمغز بیان پر دھیان دیں اور ٹماٹرپیاز کی تجارت کے دھوکے میں نہ آئیں ۔ ضروری نہیں کہ ہم ابھی جنگ ہی کریں ‘ لیکن مسئلہ کو زندہ رہنے دیں ‘ظلم کو ظلم کہتے رہیں۔حالات اگر آج بھارت کے حق میں ہیں تو کل پاکستان کے حق میں بھی جاسکتے ہیں۔!

کالاباغ ڈیم کی مخالفت تکینکی نہیں بلکہ سیاسی بنیادوں پر کی جا رہی ہے جس میں بھارت کی سازشوں کابھی ہاتھ ہے۔ دیامیر بھاشا ڈیم کی تعمیر کیلے ورلڈ بینک اور آئی ایم ایف کی جانب سے قرض دینے سے انکار کے بعد کالاباغ ڈیم توانائی کے بحران کا واحد حل ہے جس کے لئے عالمی ادارے قرض دینے کو تیار ہیں۔ اے این پی کی قیادت اب پنجاب دشمنی چھوڑ دے ۔خیبر پختون خواہ کے باشعور عوام اے این پی کی قیادت پر کالا باغ ڈیم کی تعمیر کے لئے دبائو بڑھائیں تاکہ ملک کے علاوہ ان کی آنے والی نسلیں خوشحال ہو سکیں۔ اس سلسلہ میں پشاور اور دیگر علاقوں سے آواز اٹھانے کی ضرورت ہے۔اس ڈیم کی تعمیر سے پنجاب میں آباد لاکھوں پشتون بھائیوں کا بھی بھلا ہو گا۔خیبر پختونخواہ اور سندھ کالاباغ ڈیم بننے سے نہیں بلکہ نہ بننے سے بنجر ہو جائیں گے۔بھاشا ڈیم سے کوئی نہر نہیں نکل سکے گی جبکہ کالا باغ ڈیم سے نہروں کا جال بچھ جائے گا۔ کالاباغ ڈیم سے غریب عوام کی ستر لاکھ ایکڑ بنجراراضی کو پانی ملے گا جس سے لاکھوں زندگیوں میں انقلاب آئے گا جبکہ 3800میگا واٹ بجلی الگ بنے گی جس سے توانائی کا بحران حل کرنے میں مدد ملے گی۔موجودہ حکومت نے اس مسئلے پر پارلیمنٹ میں بحث کرنے ،اسے حل کرنے یا متبادل ڈھونڈنے کے بجائے سرد خانے میں ڈال کر قومی جرم کا ارتکاب کیا ہے جس کی وجہ سے پاکستان کو 36 ارب ڈالر کا نقصان ہوا، غربت بڑھ گئی اور معیشت اس حال کو پہنچ گئی ہے کہ عوام ملک کے مستقبل کے بارے میں مایوس ہو گئے ہیں۔سیاستدان بھارت کے ہاتھوں میں کھیل کر پاکستان کو تباہ کرنے کی سازش کا حصہ نہ بنیں۔مزید کسی تعطل کی گنجائش نہیں۔کالاباغ ڈیم ناگزیر ہوچکا ہے!پانی کو زحمت سے بننے سے روکنے کا واحد ذریعہ ڈیم ہوتے ہیں ۔ یہ کوئی راکٹ سائنس نہیں جس کو سمجھا نا مشکل ہو ڈیم نہیں ہوں گے تو بارشوں کا پانی بستیوں کی بستیاں اجاڑتا سمندر میں جاگرے گا۔ نہ صرف یہ کہ توانائی کا سستا ترین  ذریعہ سمندر برد ہورہا ہے بلکہ تھرپارکر جیسے خشک سالی کا شکار علاقے پانی کی بوند بوند کو ترس رہے ہیں ۔بھارت کی طرف سے درجن سے زائد میگاڈیم بنائے جاچکے ہیں جبکہ چھوٹے چھوٹے ڈیموں کا شمار ممکن نہیں۔ پاکستان میں کالاباغ کے مقام پر ڈیم کا منصوبہ عالمی مالیاتی اور تحقیقاتی اداروں کی فزیبلٹی رپورٹس کے بعد شروع کیا گیا تھا۔ ورلڈ بینک اس ڈیم کے لئے فنڈز فراہم کرنے پر تب بھی آمادہ تھا اور آج بھی ہے۔ ضیاء الحق مرحوم اس ڈیم کی تکمیل چاہتے تھے لیکن اس وقت کے گورنر فضل الحق کی صوبائی سیاست رکاوٹ بن گئی اور انہوں نے ڈیم کی تعمیر کو رکوا دیا۔ جنرل پرویز مشرف اپنے ابتدائی دور میں یہ ڈیم تعمیر کرنے کے لئے مخلص دکھائی دیتے تھے لیکن چوہدری برادران کی ”احتیاط” نے معاملہ لٹکا دیا۔ پرویز مشرف نے اقتدار چھوڑنے سے پہلے رائے عامہ ہموار کرنے کی سرتوڑ کوشش کی لیکن پنجاب مخالف قوتیں بپھر چکی تھیں ۔پرویز مشرف نے متبادل کے طور پر بھاشا ڈیم کی تعمیر کا اعلان کیا۔ اس ڈیم کا کئی بار افتتاح ہوچکا لیکن تعمیر شروع نہیں ہوسکی۔ گزشتہ دنوں آئی۔ایم۔ایف اور ورلڈ بینک نے اس کی فنڈنگ سے صا ف انکار کردیا ہے۔خدا کا شکر ہے کہ امسال محکمہ موسمیات کی پیشن گوئیاں  بڑی حد تک جھوٹ نکلیں ۔نیشنل ڈیزاسٹر مینجمنٹ اتھارٹی کی جان میں جان آئی اور وقتی طور پر ملک سیلاب کی متوقع تباہ کاریوں  سے محفوظ ہے۔ ملک کے بعض حصوں میں بارشوں کا سلسلہ اس طرح برقرار ہے کہ پنجاب کے بعض اضلاع کی رابطہ سڑکیں بہہ چکی ہیں ۔ متعدد بستیاں پانی کی نذر ہوچکی ہیں اور اگر بھارت نے مقبوضہ کشمیر سے نکلنے والے دریائوں کا پانی چھوڑ دیا تو پھر راوی اور چناب کے اردگرد مزید تباہی ہوگی۔ سیلاب کا خدشہ اب بھی برقرار ہے۔ سندھ کے کچے کے علاقے میں گزشتہ سیلابی پانی ابھی تک دلدل کا نظارہ پیش کر رہا ہے جبکہ سندھ کے تھرپارکر ضلع میں قحط سالی کے سبب سینکڑوں خاندان ہجرت کرچکے ہیں اور دربدری کا یہ سلسلہ بدستور جاری ہے ۔خیبر پختونخواہ کا نوشہرہ شہر ایک بار پھر متاثر ہوچکا ہے اور بارشی پانی پانچ سو گھروں میں گھس کر ہزاروں لوگوں کی زندگی ویران کرچکا ہے ۔فصلوں کی تباہی اور جانوں کا ضیاع الگ ہوا۔ یہ منظرنامہ معمول کی بارشوں کے سبب ہے ۔ اگر بارشیں  توقع کے مطابق گزشتہ برسوں سے بیس فیصد زیادہ ہوتیں تو انسانی المیوں کی کیسی کیسی دلدوزداستانیں رقم ہوتیں۔ ہلال احمر جیسے ادارے 2010ء کے سیلاب متاثرین کی بحالی سے ابھی فارغ نہیں ہوپائے۔خاکم بدہن خیبرپختونخواہ پنجاب اور سندھ پھر سیلاب کی زد میں ہوتے تو کون ہماری مدد کو آتا  ہم کس کو پکارتے اور کون سے عالمی امدادی ادارے ہم پر اعتبار کرتے!