اقبال نے کہا تھا، وہی جواں ہے قبیلے کی آنکھ کا تارا شباب جس کا ہے بے داغ، ضرب ہے کاری میں جب پہلی بار سردار یاسر الیاس خان سے ملا تو میرے ذہن میں اقبال کے اس شعر نے سرسراہٹ کی تھی۔سردار یاسر سے تفصیلی ملاقات چیمبر آف کامرس اینڈ انڈسٹری کے ہیڈ آفس میں ہوئی۔اس خوبصورت اور خوب سیرت نوجوان نے مغل وفد کا پر تپاک استقبال کیا۔سردار صاحب کو چیمبر کا الیکشن جیتنے پر جہلم سے جناب میاں نعیم بشیر،جناب ندیم ساجد کی سربراہی میں ممتاز مغل شخصیات پر مشتمل ایک نمائندہ وفد مبارکباد دینے آیا تھا۔اسلام آباد سے جناب بیگ راج اور حسنین عرفانی مغل بھی موجود تھے۔سردار یاسر کمیٹی روم میں وفد کے ارکان سے باری باری گلے ملے،تعارف حاصل کیا اور خیریت دریافت کی۔پھر انہوں نے اپنی انتخابی مہم کے حوالے سے دلچسپ باتیں بتائیں۔چیمبر کے الیکشن میں سردار صاحب نے سب سے زیادہ ووٹ لیے۔

انہوں نے اپنی کمپین روائتی طریقوں سے ہٹ کر جدید طرز پر ترتیب دی۔ ووٹروں تک پیغام پہنچانے کیلئے آئی ٹی کا زبردست استعمال کیا۔ تاجروں کو کھانے کھلا کر اپنا ہمدرد بنانے کی بجائے سردار یاسر نے اپنا پیغاموثر بنانے اور پیغام رسانی کے ذرائع کو برق رفتار بنانے پر توجہ مرکوز رکھی۔حکومت پنجاب کے معاون خصوصی محترم سردار تنویر الیاس خان کے چھوٹے بھائی سردار یاسر خان امریکی یونیورسٹی سے فارغ التحصیل ہیں۔وہ بات کرنے کا ڈھنگ جانتے ہیں۔بڑے سائنٹفک طریقے سے مخاطب کو اپنی طرف متوجہ کئے رکھتے ہیں۔اچھے سامع بھی ہیں۔تکبر اور بڑائی نہیں،طبعیت میں ادب آداب کا رنگ غالب رہتا ہے۔ کسی بھی چیمبر کے کم عمر ترین صدر ہیں۔وہ کسی حادثے کے نتیجے میں اس منصب تک نہیں پہنچے بلکہ وہ چیمبر کے معاملات کو بہتر کرنے کے ارادے سے الیکشن لڑے ہیں۔ان کے ذہن میں تاجر برادری اور ملک کی معاشی صورتحال کو سنوارنے کا باقاعدہ روڈ میپ ہے۔ان کے ویثرن سے متاثر ہوکر حکومت کی اقتصادی ٹیم سردار صاحب کی وزیراعظم سے ملاقات بھی کروا چکی ہے۔یہ نوجوان صدر آج کا نہیں آنے والے پچاس سال کی ضروریات کے بارے میں منصوبہ سازی کر ناچاہتے ہیں۔باقائدگی کے ساتھ دفتر آتے اور تاجروں کو درپیش مسائل کا حل نکالتے ہیں۔ان تمام باتوں سے ہٹ کر دونوں بھائیوں کی ایک خوبصورت بات یہ کہ وہ اپنی قوم اور قبیلے کو بڑا احترام دیتے ہیں۔”آج میرے اپنے خاندان کے لوگ مجھے مبارکباد دینے آئے ہیں،میں بہت خوش ہوں”سردار یاسر صاحب نے چیمبر کے زعما کو فخر سے بتایا۔پھر مغل برادری کی فلاحی سرگرمیوں کے بارے میں باتیں کرتے رہے۔گھنٹہ بھر کی میٹنگ ہوئی۔چائے،کافی،ونگز اور فروٹ کیک سے تواضع کی۔پھر فوٹو سیشن شروع ہوا۔سردار صاحب کی مصروفیات بھی بے پناہ ہیں لیکن جب تک ہم نے خود اجازت نہیں لی،قبیلے کی آنکھ کا یہ تارا وفد کے ارکان کیساتھ ہی جگمگاتا رہا،تصویریں بنواتا رہا،ہنستا مسکراتا رہا۔اپنائیت کا ایسا احساس کہ دل و دماغ سرشار ہوگئے۔جناب ندیم ساجد مغل مالائیں ساتھ لائے تھے۔گھوڑے کا قیمتی ماڈل تحفہ کے طور پر پیش کیا۔پنجاب بیکری کیطرف سے سردار صاحب کی تصویر والا لذیذ اور دیدہ زیب کیک بھی تھا۔ملاقات تقریب میں بدل گئی۔سردار تنویر الیاس خان ملکی معیشت کی بہتری کیلئے اوورسیز پاکستانیوں کو ملک میں سرمایہ کاری پر آمادہ کرتے رہتے ہیں۔وہ پنجاب انوسٹمنٹ بورڈ کے چیئرمین بھی ہیں۔ان کی قابل تجاویز پر پیش رفت بھی ہورہی ہے۔تارکین وطن کی جانب سے ملک کے اندر سرمایہ کاری میں خاطر خواہ اضافہ ہو چکا ہے۔ان کے چھوٹے بھائی اب چیمبر کے پلیٹ فارم سے انتہائی بنیادی کام کررہے ہیں۔یہ دونوں بھائی صرف اپنی مغل برادری ہی نہیں پوری پاکستانی اور کشمیری قوم کا فخر ہیں،یہ واقعی قوم کے سردار ہیں۔ ان کا کردار بے داغ ہے،یہ معیشت کا پہیہ چلانے میں ضرب کاری سے متصف ہیں۔ قبیلے کی آنکھ کا تارا ہونے کے تصور اقبال پر پورا اترتے ہیں۔

Click here to View Printed Statement

کائنات کا دولھا انسان اللہ پروردگار عالم کی تخلیق کا بہترین شاہکار ہے۔ رب کائنات نے اسے نعمتوں کے اتنے انبار عطا فرما دیے کہ جنہیں دیکھ کر ذرا سا غور کرنے پر ہمیں اللہ نظر آنے لگتا ہے۔ اللہ خود اپنے کلام میں فرماتا ہے”تمہارے نفوس میں میری نشانیاں موجود ہیں تو کیا تم ان پر غور نہیں کرتے“۔

ہم اپنی ذات سے ذرا باہر نظر دوڑائیں تو سورج‘ چاند‘ ہوا‘ پانی ‘ستارے آسمان‘زمین اور جانور سب کے سب قدرت کی نشانیاں ہونے کے ساتھ ساتھ حضرت انسان کی ایسے خدمت میں جتے ہوئے ہیں جیسے ان کا ہم سے بہت بڑا کام پھنسا ہوا ہے۔ ان پر نگاہ دوڑا کر یوں محسوس ہوتا ہے کہ جیسے سورج چمکتا‘چاند دمکتا‘ستار روشن‘ سمندر موجزن‘ ہوائیں چلتی‘ پھول کھلتے‘پھل پکتے اور جانور سواری و غذا کے لئے پیدا ہی ہمارے لئے کئے گئے ہیں۔ احساس کچھ یوں ہوتا ہے کہ جیسے ہم آقا ہیں اور یہ ہمارے خدمت گزار حالانکہ اصل صورتحال اس کے برعکس ہے۔ ان سب سے پوچھیے کہ اگر انسان نہ ہو تو تمہاری صحت پر کیا اثر پڑے گا تو یہ سب کہیں گے ہماری بلا سے۔ مگر انسان ان کے بغیر ایک پل بھی زندہ نہیں رہ سکتا۔
غرض ساری کائنات اپنا کام مالک حقیقی کی مرضی کے عین مطابق کر رہی ہے مگر انسان ہے کہ ظالم بھولا ہوا ہے۔
گھوڑے کو مالک صرف چارہ ہی ڈالتا ہے تو وہ اس کے بدلے اس کے لئے لڑ کر اپنی جان دے دیتا ہے۔ مگر انسان اپنے مالک کا بڑا ناشکرا ہے اور اس کی وجہ سورہ عادیات میں جو بتائی گئی وہ ہے مال سے بے پناہ محبت:
دنیا میں کسی ادارے کا مالک تیوری چڑھا لے تو ملازم فوراً ہاتھ باندھ کر کھڑا ہوجاتا ہے مگر کارخانہ قدرت کا حکم کئی بار جھنجوڑ چکا مگر ہم اس کی کوئی پرواہ نہیں کرتے۔آذان کی پکار تو ہمارے کانوں سے ٹکرا کر واپس چلی جاتی ہی رہی ہے لیکن اب تو ہم چھوٹے عذابوں کی ایک سیریز کو اپنی آنکھوں سے دیکھنے کے باوجود بھی راہ حق کی طرف جانے سے کترا رہے ہیں۔
وہ ہمیں بار بار اپنے کلام میں بتا چکا ہوں کہ میں نے یہ تمام کائنات تمہارے لئے مسخر کردی ہے مگر تم کو اپنے پیار کے لئے پیدا کیا ہے۔ وہ واضح طور پر آگاہ کرتا ہے کہ تمہاری تخلیق کا مقصد میری محبت اورمیری مخلوق سے پیار ہے۔
وہ خبردار کرتا ہے کہ اگر تم مجھ سے محبت نہیں کرو گے تو میں عنقریب تمہاری چھٹی کروا دوں گا اور تمہاری جگہ ایسی قوم پیدا کروں گا جو کہ مجھ سے محبت کرے گی اور میں ان سے محبت کروں گا۔
وہ کہتا ہے کہ میں تم سے رزق روزی نہیں مانگتا۔رزق رساں تو میں ہوں۔ اس لئے تمہاری روزی کا میں سامان کروں گا تم تو بس میری طرف پیار کی نگاہ اٹھا کر کبھی دیکھ ہی لیا کرو۔
وہ ہم کو بار بار اپنی نعمتوں کی یاددہانی کراتا ہے کہ شائد نگاہ ان کی طرف مبذول کرے تو نگاہ شکریہ اوپر بھی اٹھا لے۔مگر ہمارا حال تو یہ ہے کہ گائے نے اگر دودھ پلایا ہے تو ہم نے اسے ماتا بنا کر اسی کے آگے سر تسلیم دل خم دیا۔اللہ کو ہم سے گلا ہے کہ گوبر اور خون کے درمیان سے ظالمو تم کو خالص دودھ تو میں نے پلایا ہے اور تم نے ساقی پر نگاہ کرنے کے بجائے برتن کے آگے سر نیاز جھکا دیا۔ جبکہ گائے کو تو یہ خبر بھی نہیں کہ یہ سارا نظام کیسے چل رہا ہے۔ رب کا فرمان ہے کہ سورج اور چاند کو سجدہ کرنے والو اسے پہچانو جس کے ہاتھ میں ان کی رسی ہے۔
دنیا میں ماں جب بچے کو نہلا دھلا کر نئے کپڑے پہنا کر سامنے کھڑا کرتی ہے اور پوچھتی ہے کہ سب کچھ کس نے دیا ہے تو بچہ اگر صرف اتنا کہہ دے کہ ”ماں تو نے“ تو صرف اتنا کہنے پر ہی ہم نے کئی بار دیکھا ہے کہ وہ بچے کو درجنوں بوسے دیتی ہے۔ یہی حال مالک کا ہے جب بندہ نہا دھو کر آئینہ کے سامنے کھڑا ہو اور یہ کلمات ادا کرے کہ اللہ تیرا شکر ہے تو مجھے خوبصورت شکل عطا فرمائی۔ میری سیرت کو بھی خوبصورت بنا دے تو عرش سے آواز آتی ہے۔ ”بندے جا تیری اس خوبصورت بات پر میں نے تیرے پچھلے گناہ معاف کردیئے“۔ وہ فرماتا ہے کہ اگر نعمت کا شکر ادا کرو گے تو نعمتوں کی بارش کردوں گا اور ناشکری کرو گے تو میرا عذاب بہت سخت ہے۔
اللہ نے ہمیں مختلف انداز سے یاددھانیاں کروائی ہیں کہ شائد انسان اپنے محبوب حقیقی کی طرف نظر التفات کرلے۔وہ فرماتا ہے کہ جب تم ماں کے بطن سے گود مادر میں آئے تو کچھ نہیں جانتے تھے۔ یہ سمع و بصر اور دل ودماغ جس پر تم اتنا اتراتے ہو میں نے عطا فرمائے ۔ایک طرف تو ان نعمتوں کا تذکرہ کیا عام لوگوں کیلئے تو دوسری طرف میڈیکل سائنس کے ماہرین کو بتایا کہ تم نے آج یہ ثابت کیا ہے کہ انسان کو پہلے سماعت ملتی ہے بعد میں بصارت مگر رب العالمین نے چودہ سو سال قبل ہی یہ حقیقت اپنے نبی صلی اللہ علیہ وآلہ وسلم کی زبان سے جاری فرما دی تھی۔
وہ ہمارے کئی بھائیوں کو ان میں سے کچھ عطا نہیں بھی فرماتا۔شائد اس لئے کہ آنکھوں سے محروم کوئی شخص جب گلی گلی سے یہ پکارتا گزرے کہ” آنکھوں والو! آنکھیں بڑی نعمت ہیں“ تو ہمیں ان کے نعمت ہونے کا واقعتاً احساس ہوجائے آپ غور فرمائیں تو نوزائیدہ بچہ نہ بول سکتا ہے نہ رفع حاجت کرنے کے قابل ہوتا ہے۔غلاظت کے اس ڈھیر کے لئے دودھ کی نہروں کے علاوہ ماں کے دل میں اتنا پیار بھی ڈال دیا کہ وہ ساری غلاظتیں اپنے دامن میں لے لیتی اور بچے کو صاف ستھری جگہ ڈالتی۔میں تو اس کو اس طرح دیکھتا ہوں کہ دنیا میں جو ماں کا کردار ادا کر رہی ہے وہ ماں نہیں بلکہ دائی ہے اصل ماں (پالنے والی ذات) تو وہ ہے جس نے اس دائی کے دل میں اتنا پیار ڈالا ہوتا۔ سرکار صلی اللہ علیہ وسلم نے بھی اللہ کے پیار کو ماپنے کے لئے ماں کے پیار کا پیمانہ استعمال کیا۔ آپ کسی سفر پر جا رہے تھے کہ ناگہاں کسی عورت کا بچہ کھو گیا۔ وہ بڑی بے چینی کے عالم میں پاگلوں کی طرح اسے ڈھونڈتی پھر رہی تھی۔ کافی وقت بعد وہ اسے اچانک نظر آیا تو اس نے بچے کو اپنی بانہوں میں جکڑ کر اسے بے شمار بوسے دیے۔ ایسی کیفیت میں حضور صلی اللہ علیہ وآلہ وسلم نے صحابہ کو اس کی طرف اشارہ کرتے ہوئے فرمایا کہ دیکھو تمہارا رب تم سے اس ماں سے بھی ہزاروں گنا زیادہ پیار کرتا ہے جب قرآن فرماتا ہے کہ ماں باپ کے سامنے اف تک نہ کہو تو میں سوچتا ہوں کہ جب ہم اس ماں کے سامنے اف نہیں کہہ سکتے تو اس حقیقی ماں کے سامنے اف کیسے کہہ سکتے ہیں اور اس کے حکموں کو پا کر ان کی نافرمانی کرنے کی جسارت کیسے کرسکتے ہیں۔ میں انسان میں موجود اعضاءاور نظام کو دیکھ کر کبھی کبھی خیال کرتا ہوں کہ جانے وہ خود کتنا پیارا ہوگا جس کی تخلیق اتنی پیاری ہے۔
انسان کے اندر اور باہر کے ماحول میں یہ نشانیاں ہم سے کچھ کہتی ہیں ۔ گاڑی میں جانے والا مسافر اپنے دوست کو دیکھ کر جب رومال لہراتا ہے تو اس کی حرکت سے دیکھنے والے کو ایک نتیجہ نکالنا ہوتا ہے اگر کوئی رومال کی رنگت‘ اس کی دھاریوں‘ اس کے کپڑے کے معیار پر غور کرنے لگے تو زمانے والے اسے احمق کہیں گے۔دراصل اس طرح کرنے سے اس کا مقصد اس کی توجہ اپنی جانب مبذول کروانا ہوتا ہے۔
اگر کوئی مہمان کسی کے گھر کھانا کھانے کے وقت سب باتوں کو لاجک سمجھ جائے کہ بلب میں روشنی پاور ہاﺅس سے آرہی ہے۔ پھول جو گلدانوں میں سجائے گئے ہیں یہ اس طرح گلدانوںمیں نہیں اُگتے بلکہ باغ سے لائے گئے ہیں۔بادلوں کو دیکھ کر ان کا سارا فلسفہ بیان کردے۔ غرض ہر چیز کے بارے بڑی عقل مندی سے متاثر کن کرتا جائے۔ کھانے پر بھی بڑی سیرحاصل گفتگو کر ڈالے مگر کھانا کھانے کے بعد میزبان کا شکریہ ادا کیے بغیر چلائے تو کوئی شخص بھی ایسے شخص کو عقلمند نہیں کہے گا۔ عقل بہت بڑی چیز ہے اس کی بنیاد پر انسان اشرف المخلوقات کے درجہ پر فائز ہوا ہے مگر یہی عقل اگر کسی جسم سے نکال دی جائے تو وہ پاگل کہلائے گا۔ یاد رہے کہ عقل اگر وحی کی روشنی سے ہٹ کر فیصلے کرے گی تو یہ باولی کہلائے گی۔خدا کا فرمان بھی کچھ اسی طرح سے ہے کہ جب میرے بندے آسمانوں اور زمین کی تخلیقات میں غور کرتے ہیں تو نتیجہ بے فکر کے طور پر بے ساختہ یہ کہہ اٹھتے ہیں کہ اے رب تو نے یہ سب بے کار پیدا نہیں کیا۔ وہ کہتے ہیں کہ رب تو پاک ہے ہم کو آگ سے بچا کر اپنا دیددار نصیب فرما۔ بقول شاعر
تیری جنت کو یا رب کیا کروں
آرزو ہے تجھے دیکھا کروں

Click here to View Printed Statement

JANG LAHORE

ہر سال ماہ صیام میں منبرومحراب سے روزے کی فضیلتیں بیان کی جاتی ہیں اسلامی سکالرز انتہائی فصاحت وبلاغت کے ساتھ اس ماہ مقدس کے ساتھ وابستہ برکتوں’رحمتوں اور بخششوں کے تذکرے دہراتے ہیں۔نماز تراویح’نوافل ‘صدقہ اور خیرات کے طور طریقوں اور آداب و اسلوب کا موثر ذکر ہوتا ہے۔ہمارے اخبارات’رسائل اور ٹی وی چینلز خصوصی پروگرام اور اشاعت کا اہتمام کرتے ہیں۔ کوئی بھی صاحب شعور مسلمان پاکستانی یہ نہیں کہہ سکتا کہ اسے روزے کی اہمیت’افطار اور سحر کے طریقے اور رکوع و سجود کے انداز سے واقفیت نہیں ہے۔ لیکن کیا سبب ہے کہ ذرائع ابلاغ کے ذریعے پھیلائی جانے والی آگاہی کے باوجود معاشرے میں اس مقدس مہینے کے طفیل جو بہتری متوقع ہوتی ہے وہ وقوع پذیر نہیں ہوتی اور معاشرے میں اصلاح کی بجائے ہر سال پہلے سے زیادہ بگاڑ دکھائی دیتا ہے؟یوں تو حکومت بھی رحمتوں والے اس مہینے میں عوام الناس کی ہمدردیاں سمیٹنے کے لئے حکومتی سطح پر کئی اقدامات اٹھاتی ہے۔

مثلاً یوٹیلٹی سٹورز میں سینکڑوں اشیاء کی قیمتیں کم کردی گئی ہیں اسلام آباد’ لاہور اور کراچی میں خصوصی بازار سجائے جاتے ہیں تاکہ روزہ داروں اور عام آدمی کو سستی اشیائے خوردونوش بآسانی دستیاب ہوسکیں۔ رمضان پیکج کے نام پر بھی ہر بازار اور مارکیٹ میںبظاہر لوگوں کی سہولت کے لئے پرکشش سٹال سجائے جاتے ہیں لیکن پھر بھی ماہ رمضان میں مہنگائی کا جن پوری طرح بوتل سے باہر آکر صارفین کا منہ چڑانا شروع کردیتا ہے۔اس ماہ کے تقدس کا شعور بھی ہر شہری کو حاصل ہے۔مسجدیں نمازیوں سے بھری پڑی ہوتی ہیں ۔ تراویح کے دوران قرآن اور اس کی تفسیر کا اہتمام ہوتا ہے اور یوں لگتا ہے کہ ہر طرف نیکیوں کی برسات آگئی ہے لیکن عملاً لوٹ مار ہی ہوتی ہے’جھوٹ پر جھوٹ گھڑے جارہوتے ہیں اور ہمارے کردار اندر سے مزید کھوکھلے ہورہے ہوتے ہیں۔ آخر رمضان شریف کی برکتیں ہمارے حصے میں کیوںنہیں آتیں ۔غریب امیر کیوں نہیں ہوجاتا’مظلوم کو انصاف کیوں نہیں مل پاتا’ہم بحیثیت قوم ہر سال پہلے سے زیادہ مقروض کیوں ہوجاتے ہیں۔عالمی سطح پر پہلے سے زیادہ رسوائی ہمارے نصیب میں کیوں لکھ دی جاتی ہے؟یوں محسوس ہوتا ہے کہ ہمارے سماج میں مصنوعی رکھ رکھائو نے اسقدرجڑیں گاڑ لی ہیں کہ اب روزے جیسی عبادت کو بھی ہم نے ”انجوائے” کرنے کا کوئی ذریعہ بنا لیا ہے۔ہمارے ذرائع ابلاغ خصوصاً ہماری ٹی وی سکرین نے خالصتاً تذکیہ نفس کے لئے اور تعلق بااللہ کو از سر نو پروان چڑھانے کے لئے مختص روزے جیسی عبادت کو بھی اشتہارات کے ذریعے ایک ”سٹیٹس سمبل” بنا دیاہے۔ٹی وی چینلز نے ایسے سکالرز ”ہائر” کر لئے ہیں جو اپنی چکنی چپڑی باتوں سے ناظرین کا دل موہ لیتے ہیں۔اور پھر وہ ماہر مداری کی طرح لوگوں کوکسی پراڈکٹ کی طرف راغب کردیتے ہیں۔گویا روزے اور رمضان میں لوگوں کے مذہبی اور دینی رجحانات کا استحصال کرنے کا ایک نیا طریقہ ایجاد ہوگیا ہے اور یہی حالات ہمارے اخبارات کے بھی ہیں ۔کھانے پینے کی اشیائ’پہننے’ہاتھ منہ دھونے اور سجنے سجانے کے سامان کی جس قدر تشہیر ‘مارکیٹنگ اور سیل ماہ رمضان میں کی جاتی ہے شائد ہی کسی اور ماہ میں یہ کاروبار اس قدر عروج پاتا ہو۔ ٹی وی پروگرام اور اشتہارات نے اس عبادت کو ایک کلاس کے لئے خوشی اور غربت کی لکیر سے نیچے رہنے والوں کے لئے ایک آزمائش بنا ڈالا ہے۔یہی وجہ ہے کہ اس ماہ مقدس کی برکتیں بھی ہم سے روٹھ چکی ہیں۔ ”روزہ میرے لئے ہے اور اس کا اجر میں ہی دوں گا” اس حدیث مبارکہ کے بالکل برعکس اب روزہ اور اس سے زبردستی جوڑ دی جانے والی پرتعیش افطار و سحر نے اسے بھی شہرت’ بڑائی اور امارت کے اظہار کا ذریعہ بنا ڈالا ہے۔پیغمبر اسلام حضرت محمد صلی اللہ علیہ وآلہ وسلم نے ماہ صیام میںایسا کوئی عمل لازم نہیں فرمایا جس کی تشہیر آج کے پاکستانی معاشرے میں کی جارہی ہے۔اصراف سے منع فرمایا گیا۔سادگی پر زور دیا گیا مال کی قربانی کا حکم دیا۔ کان’آنکھ’ ہاتھ اور پائوں تک کے روزے کی بات کی لیکن یہاں تو ہر انسانی اعضا روزہ شکنی کرتا ہوا دکھایا جارہا ہے۔ پھر برکت کیسی؟میری استدعا ہے کہ کم از کم ماہ صیام میں ٹی وی سکرین کے ملفوف شیطانی ایجنڈے سے ضرور بچیں تاکہ تذکیہ نفس کی منزل آسان ہوسکے۔ کم از کم اپنے حصے کی افطاری کے برابر  رقم ایمانداری کے ساتھ اپنے ضرورت مند قرابت داروں’ ہمسائے ‘مسکین یا شہری پر ضرور خرچ کردیں۔ذاتی طور پر ہم یہی کرسکتے ہیں شائد اس سے برکتیںنازل ہوسکیں۔

یوسف رضا گیلانی کو یقین تھا کہ وہ’ آرمی چیف اور چیف جسٹس 2013ء میں ایک ساتھ فارغ ہوں گے۔ اس یقین کا اظہار انہوں نے بارہا سرعام بھی کیا اور اپنے پسندیدہ بلکہ پروردہ صحافیوں کے ساتھ خصوصی ملاقاتوں میں بھی کیا۔ لیکن منگل 19جون 2012ء کی سہ پہر نے ان کی وزارت عظمیٰ ان سے چھین لی۔ عدالت عظمیٰ نے بالآخر ایک خوبصورت وزیراعظم کو نااہل قرار دے دیا۔ ایک ایسا شخص جن کا لباس انتہائی قیمتی تھا’جس کی اہلیہ لندن سے مہنگا ترین پرس خریدنے  میں بازی لے گئی تھی۔ جس کے تین جوڑوں کی قیمت 30لاکھ روپے تھے اور جس نے غریب  ترین ملک کا جمہوری وزیراعظم ہوتے ہوئے بھی اپنے شاہانہ ٹھاٹھ باٹھ برقرار رکھے بلکہ مسند اقتدار پر جلوہ گر ہونے کے بعد اپنے پرشکوہ رہن سہن میں اضافہ کیا۔

اس یوسف رضا گیلانی کو رسو اہو کر بغیر جھنڈے والی گاڑی میں چپکے سے وزیراعظم ہائوس سے نکلتے دیکھا گیا۔یوسف رضا چاہتے تو ایک شخص سے وفاداری نبھانے کی بجائے ریاست کے ساتھ وفاداری کا اظہار کرتے۔ چور کو چور مان لیتے اور سوئس حکام کو خط لکھ کر انصاف کا بول بالا کرنے میں سپریم کورٹ کا ساتھ دیتے لیکن گیلانی نے زرداری سے وفا کی انتہا کردی اور ثابت کیا کہ وہ کم از کم وزارت عظمیٰ کے عہدے کے کبھی بھی اہل نہیں تھے۔ میں یہ سمجھنے سے قاصر ہوں کہ ایک شخص جس کی زندگی کا محو ر و مرکز صرف اس کی پارٹی کا سربراہ ہو وہ کس طرح اٹھارہ کروڑ لوگوں کی فلاح و بہبود کے بارے میں سنجیدہ ہوسکتا ہے۔ اور ایسے محدود نظر اور کسی شخصیت کے غلام کو جمہوری وزیراعظم کیونکر بنایاجاسکتا ہے۔یوسف رضا گیلانی نے اپنے دور اقتدار کے چار برس صرف اور صرف جناب زرداری’ان کے دوستوں اور اپنے خاندان کی خدمت کی ہے۔ ان کی پارٹی کے لوگ چیختے رہے کہ وزراء اور وزیراعظم ان کی بات تک نہیں سنتے۔محکموں کے سربراہ رپورٹیں دیتے رہے کہ جناب وزیراعظم میرٹ کا قتل عام نہ کریں ۔اداروں کو چلنے دیں۔ ہر جگہ موسیٰ گیلانی کا فون ہر ٹھیکے اور پروموشن پر صدارتی چٹ۔ اتنی کرپشن تو ابن بطوطہ نے بھی اس خطے میں نہیں دیکھی تھی جتنی ایک عام پاکستانی نے یوسف رضا گیلانی کے دور میں بھگتی ہے۔ (ن) لیگ جب دوسری بار برسراقتدار آئی تو اوورسیز پاکستان کے ایک وفاقی وزیر نے میاں صاحب کی قربت کے حصول کے لئے بیان داغا تھا ”ہم میاں صاحب کے کتے ہیں”۔مرحوم نے کروڑوں روپے کی کرپشن کی تھی ۔یہ لوگ جو اپنے بگ باس کے ”کتے” ہوتے ہیں یہ وفا دار بہت ہوتے ہیں لیکن مالک سے زیادہ مالک کے وفادار ہوجاتے ہیں ۔سچ یہ ہے کہ عوامی امنگوں کو پس پشت ڈال کر’عالمی اداروں کی تمام تر وارننگز کوبھلاکر ‘انصاف کے راستے میں پہاڑ کی طرح کھڑے ہوکر جناب یوسف رضا گیلانی نے جناب زرداری کی کتاب میں اپنا نام روش حروف سے لکھوا لیا ہے لیکن آنے والے پانچ برس ان کے لئے تھانہ’جیل’ کچہری اور ہسپتال کے اردگرد گھومتے دکھائی دیتے ہیں۔ہوسکتا ہے کہ وہ ملک ریاض کی طرح کچھ اینکرز کو اپنے پے رول  پر رکھ کر خود کو مظلوم اور غریبوں کا حامی ثابت کروالیںلیکن فی الحال وہ پھر چاہ یوسف میں جاگرے ہیں اور اس بار پاتال میں گرنے کا سبب برادران نہیں بلکہ ان کی منہ زور کنبہ پروری’تکبر اور ریا کاری ہے۔ وقت گزرے گا تو ان کی اخلاقی حیثیت پر بھی حرف آئیں گے اور ہوسکتا ہے کہ وہ ویڈیو بھی سوشل میڈیا پر آجائیں جن میں ”عزت سادات” ہی خا ک برد ہوجائے۔انہوں نے فاروق لغاری بننا پسند نہیں کیا۔فاروق خان لغاری تو پی پی پی سے نکل کر بھی زندہ  رہے اور ان کی ملت پارٹی نے بہرحال اقتدار کے ایوانوں میں خوب دستک دی’لیکن جناب گیلانی پی پی پی  میں رہتے ہوئے بھی اب کبھی اقتدار کے شبستانوں کا رخ نہ کرپائیں گے۔وہ بزعم خود انتہائی پاپولر وزیراعظم تھے۔ بقول ان کے انہوں نے کارکنوں اور غریب طبقہ کے لئے مثالی اقدامات اٹھائے۔ لیکن جب 19جون کی سہ پہر سپریم کورٹ میں فیصلہ سنایا جارہا تھا تو اٹارنی جنرل اور ان کے باحوصلہ وکیل بھی فیصلہ سننے کے لئے موجود  نہ تھے۔انہوں نے اپنے سیاسی مستقبل کے لئے سرائیکی صوبے کا شوشہ چھوڑا تھا ‘خیال کیا جارہا تھا کہ جنوبی پنجاب یہ فیصلہ سن کر جناب گیلانی کے حق میں سڑکوں پر نکل آئے گا لیکن حد تو یہ ہے کہ ملتان میں ان کے حق میں ایک جلوس بھی نہ نکل سکا۔ نہ کوئی آنکھ پرنم ہوئی نہ کسی جیالی نے ماتم کیا۔ فاعتبرویااْولی الصبار!

دولت کی چمک سے بچنا محال ہوجاتا ہے۔ جو لوگ دام پھینک کر وفاداریاں خریدنے کا دھندہ کرتے ہیں ان کو یقین کامل ہوتا ہے کہ ہر انسان کی ایک قیمت ہوتی ہے۔کامیاب بیوپاری وہ ہوتے ہیں جو بندے کے ماتھے اور آنکھوں سے بھانپ لیتے ہیں کہ ان کے مخاطب کی قیمت کیا ہوگی۔ رشوت لینا اگر ایک فن ہے تو رشوت دینا بہت بڑا فن ہے۔ہرکوئی صاحب ثروت رشوت دینے کی صلاحیت نہیں رکھتا۔ اس کار شیطانی کے لئے مہارت درکار ہوتی ہے ۔

ایک کلرک سے بہتر کوئی نہیں جانتا کہ کس طرح رشوت لی اور دی جاتی ہے فائل کو ”پہیے” اور کیس کو ”انجن” لگانے کا راز کلرک بادشاہ ہی جانتا ہے۔کلرک سے کھرب پتی بننے والے ملک ریاض نے رشوت ستانی کی ابتدائی ٹریننگ دوران کلرکی حاصل کی۔پھر انہوں نے اپنی خوش قسمتی کی فائل کو ایسے پہیے لگائے کہ وہ پانچویں گیئر میں دوڑتی چلی گئی۔ بحریہ ٹائون کے پراجیکٹ ملک صاحب کے لئے دولت کا بحر بیکراں ثابت ہوئے ۔ملک صاحب نے بہت سے سچ بولے اور ان سچائیوں میں سب سے بڑی سچائی یہ کہ انہوں نے اپنے ہر جائز اور ناجائز منصوبے کی تکمیل کے لئے موثر ترین لوگوں کی بولی لگائی اور انہیں خرید کر اپنے ”حرام کدے” میں شامل کر لیا۔یہ نہیں کہ مملکت خدادا میں رشوت’سفارش دھونس اور دھاندلی کو جناب ملک صاحب نے متعارف کرایا۔ ایسا نہیں۔ انہیں اتنا بڑا اعزاز نہیں دیا جاسکتا۔ اس کام کا آغاز قائداعظم  کے ساتھیوں نے خود ہی کر دیا تھا۔جھوٹے کلیم بنانے اور ان کلیم کے مقابلے میں جائیدادیں الاٹ کروانے کے بدلے رشوت’شراب اور شباب کا چلن قیام پاکستان کے ساتھ ہی عام ہوگیا تھا۔لیکن ملک صاحب کے میدان سے اترنے سے پہلے ملک کے مقدس اداروں کے بارے میں کھلے عام شخصیت فروشی کا تاثر مشکوک تھا۔ شک تو تھا کہ  محدودے چند لوگ ایسے ہوسکتے ہیں جو چھپ چھپا کر کچھ مراعات یا سہولتوں کے بدلے کسی تاجر یا کاروباری شخص کو ناجائز فائدہ پہنچاتے ہوں لیکن یقین نہیں تھا جناب ملک ریاض نے اس شک کو یقین  میں بدل دیا۔انہوں نے ”انسانی وسائل” کی خریداری میں فوج’عدلیہ ‘صحافی ‘علماء اور دانشور۔ کسی کی تفریق نہیں رکھی۔ سب کو ان کی منہ مانگی قیمت ادا کی اور ان سے من چاہے فوائد حاصل کئے۔ہمارے سپہ سالار اعظم انتہائی ایماندار اور سچے سپاہی ہیں انہیں بدنام کرنے کے لئے ان کے کسی بھائی کے بارے میں افواہیں بھی پھیل چکی ہیں کہ وہ بھی ملک صاحب سے ”مستفید” ہوتے رہے ہیں اور ملک صاحب نے ان کے بارے میں بھی ایک فائل تیار کر رکھی ہے خدا نہ کرے کہ ایسا ہو۔لیکن اگر ملک صاحب منصف اعلیٰ کے لخت جگر کو اپنے بچھائے ہوئے جال میں پھنسا سکتے ہیں تو فوجی تو بڑے سیدھے سادھے سے لوگ ہوتے ہیں اور پراپرٹی ڈیلنگ ان کا پسندیدہ مشغلہ ہوتا ہے ۔بازار مصر میں دولت پیغمبر خرید لیتی ہے تو پاکستانی منڈی میں چیف جسٹس کا بیٹا آخر خریدا کیوں نہیں جاسکتا۔ ملک ریاض کرپشن کے بادشاہ ہیں ان کے جادو کے آگے ہر کوئی بلی بن جاتا ہے۔ ملک صاحب کا اصل جرم یہ ہے کہ انہوں نے جناب زرداری سے بھی کاروبار کر لیا۔ہوسکتا ہے کہ جناب زرداری نے نگران وزیراعظم بنانے کا خواب دکھا کر اور جزوقتی اختیارات دے کر اربوں روپے کا چونا لگا دیا ہو۔ ملک صاحب کو دینے کے لئے جناب زرداری کے پاس کچھ نہ تھا انہوںنے تھپکی دی اور ملک صاحب نے عدالتی شیر کے منہ میں بازو دے دیا۔جناب زرداری مطمئن کہ ایک تیر سے دو شکار ہوگئے۔چیف جسٹس کو اپنے بیٹے کو کٹہرے میں کھڑا کرنا پڑا اور ملک ریاض ایسے پھنسے کہ اب وہ بحریہ ٹائون کے روح رواں کم اورہارے ہوئے جواری زیادہ  دکھائی دیتے ہیں۔گیم الٹ گئی۔ملک ریاض سلطانہ ڈاکو کا درجہ بھی نہ پاسکے اب وہ محض بے بسی کی صورت بنے دھکا دینے والے کو ترسائی نگاہوں سے دیکھتے ہیںسنا ہے کہ اب جناب زرداری ان کا فون تک نہیں سنتے۔ کہاں وہ دن تھے کہ ملک صاحب کے اشارہ ابرو پر حکومتی مشینری دوڑیں لگا دیتی تھی اور اب وہ اپنا وکیل ڈھونڈتے پھر رہے ہیں لیکن ان کی وکالت پر کوئی تیار نہیں۔چیف جسٹس نے اچھا کیا کہ اپنے بیٹے کے خلاف سوموٹو ایکشن لیا اور فیصلہ آنے تک اسے اور اپنے گھر سے نکال دیا۔امکان ہے کہ بحریہ ٹائون کے پلاٹوں کی گرتی قیمت کو روکنے کے لئے ملک ریاض کے بیٹے علی ریاض اپنے باپ کو بے دخل کردیں ۔ان کی اہلیہ ملک ریاض سے علیحدگی اختیار کرسکتی ہے۔کریمنالوجی کے طالبعلوں کا خیال ہے کہ ملک ریاض کو حفاظتی تحویل میں لے لینا چاہے۔کیونکہ جب لوٹ کھسوٹ اور قتل اغواء کے سینکڑوں کیس کھلیں گے اور ملک صاحب ایک ایک دن میں کئی کئی پیشیاں بھگتیں  گے اور جب ان کا سایہ بھی ان کا ساتھ چھوڑ دے گا تو وہ خدانخواستہ کہیں خودکشی نہ کر لیں۔ ایک جرنیل ایسا کرچکے ہیں اس لئے انہیں ایسے بدتر انجام سے بچایا جانا ضروری ہے اور جناب صدر پرانی دوستی نبھاتے ہوئے ملک صاحب کی مصروفیات کے لئے ایک ”کرپشن ڈویلپمنٹ اکیڈمی” کے قیام کا اعلان فرمادیں اور جناب ملک صاحب کو اس اکیڈمی کا سربراہ بنا دیں ملک صاحب اپنے منظور نظراینکرز کو ٹیچرز رکھ لیں تاکہ آنے والی نسلوں کو بتا سکیں کہ رشوت دینے کے صحیح انداز کیا ہوتے ہیں۔ بہرحال جو بھی فیصلہ ہو ملک صاحب کے لئے یہی نعرہ ہے کہ” رشوت کے رنگ ۔ملک صاحب کے سنگ!”

میں پنجاب حکومت کا خیرخواہ ہوں ‘ مشیر نہیں۔ویسے بھی میاں محمد شہبازشریف کے اردگرد نو نہیں ننانوے کے قریب رتن ہیں جو ہر روز دلکش اشتہار ڈیزائن کرواتے ہیں۔خادم اعلیٰ پنجاب کے ”خادمین“ کی تعداد ہی نہیں استعداد بھی قابلِ رشک ہے۔”لیپ ٹاپ سے قوم کی تقدیر بدل جائے گی“ جیسی خوشخبریاں گھڑنے والے اور ”دانش“ سکولوں کے جال سندھ تک پھیلا دینے کے دعوﺅں کے پیچھے کارفرما علم و عرفان کی کیا حد ہوگی!آج کل میاں محمد شہبازشریف فیڈرل کا ستروثانی کے طور پر سرمایہ داروں کیخلاف جس روانی کے ساتھ تقاریر فرماتے ہیں اور سلاست کے ساتھ اشعار گنگناتے ہیں اس سے اندازہ ہوتا ہے

کہ پاکستان میں انقلاب کے اصل نقیب عمران خان نہیں بلکہ میاں برادران ہیں۔یہ الگ بات کہ گذشتہ چار برسوں میں نہ میاں برادران کی دولت میں کمی آئی نہ ہی ان کے ہمرکاب”انقلابیوں“ کی تجوریاں ہلکی ہوئیں۔پنجاب کا غریب مزید غریب ہوگیا اور خوشحالیاں صرف اور صرف اخبارات میں تواتر کے ساتھ شائع ہونے والے رنگین اشتہاروں میں رہ گئیں۔پنجاب مسلم لیگ (ن) کے ”بلامقابلہ“ صدر منتخب ہونے پر مبارکباد کے بعد عرض ہے کہ شہرت کی بلندیوں کو چھوتی پنجاب حکومت کبھی کبھی ناموری کے آسمان سے نیچے بھی اتر آیا کرے اور لمحہ بھر دیکھ لیا کرے کہ کہیں پائے اقتدار کے نیچے کوئی مقدس حوالہ کوئی چاند‘کوئی ستارہ تلملا ہی نہ رہا ہو۔معاملہ کچھ زیادہ سنگین نہیں ہے۔آپ کہہ سکتے ہیں کہ کیا ہوا اگر اسلام آباد‘راولپنڈی اور مری میں واقع پنجاب ہاﺅسز کے اندر ایسے ٹشو پیپرز استعمال کئے جارہے ہیں جن پر حکومت پنجاب کا سبز رنگ کا مونوگرام چھپا ہوا ہے۔بے شمار سرکاری اور پرائیویٹ ادارے ہیں جو کمپنی کی مشہوری کے لئے ٹشو پیپرز پر پراڈکٹ کا عکس چھاپ دیتے ہیں اور یہ ٹشو پیپرز کھانے کی ٹیبل پر گلاسوں کے اندر سجا دیئے جاتے ہیں۔آخر اس سے کیا فرق پڑتا ہے۔اصل میں میرے نزدیک بھی ٹشو پیپر پر کس کمپنی کا ”لوگو“ چھاپ دینا کوئی معیوب بات نہیں ہے لیکن کیا کیا جائے کہ راقم کو مری پنجاب ہاﺅس میں جانے کا اتفاق ہوا اور میں نے پنجاب حکومت والے مونوگرام والے ٹشو پیپرز کا ”ناجائز“ استعمال ہوتے دیکھا تو دل میں ایک کسک سی اٹھی۔ کاش کہ جناب وزیراعلیٰ اخبار میں ایک اشتہاری مہم چلائیں”ٹشو پیپر کے استعمال کا صحیح طریقہ۔ خادم اعلیٰ پنجاب ہر کس وناکس کو آگاہ فرماتے ہیں کہ ان ٹشو پیپرز کو منہ پر مارنے کے علاوہ کہیں اور استعمال نہ کیا جائے۔ ورنہ خادم اعلیٰ ایسے گستاخوں کو موقع پر خود سزا دیں گے“۔ایک بڑے صاحب نے کھانا کھانے کے بعد اس ٹشو پیپرز سے اپنے ہاتھ صاف کئے۔اچانک ان کی نگاہ اپنے قیمتی جوتوں پر پڑی تو انہیں ان جوتوں کی چمک ماند پڑتی دکھائی دی۔ انہوں نے فٹا فٹ دوسرا ٹشو پیپر اٹھایا اور اپنے بوٹوں کو چمکانے لگے۔ اگر اسے مبالغہ نہ سمجھ لیا جائے تو حقیقت یہ کہ میں نے انہی ٹشو پیپرز کو واش روم میں بھی دیکھا۔پنجاب ہاﺅس کے رہائشی کمروں میں نہیں جاسکا لیکن غالب امکان یہی ہے کہ وہاں رہائش پذیر مہمان اور ان کے خاص مہمان ان ٹشو پیپرز کے جا بے جا استعمال سے ضرور لطف اندوز ہوتے ہوں گے۔پنجاب حکومت کے مونو گرام میں پانچ دریا دکھائے گئے ہیں۔گندم کی بالیاں بنائی گئی ہیں اور اوپر ہمارا قومی نشان چاند اور ستارہ نمایاں کئے گئے ہیں۔پاکستان کا پورا نام ”اسلامی جمہوریہ پاکستان“ ہے۔ اس کے نشان کا تقدس ایسے ہی ہے جیسے ہمارے قومی جھنڈے کا تقدس ہے۔ اگر کوئی بدبخت ہمارے قومی جھنڈے سے جوتے صاف کرے‘ یا خدانخواستہ اسے ٹائلٹ میں استعمال کرے تو محب وطن ہونے کے حوالے سے ہم اسے گستاخ پاکستان قرار دیں گے اور ایسی قبیح حرکت کرنے والے کی پہلے خود دھلائی کریں گے پھر آئین پاکستان کے تحت اس پر غداری کا مقدمہ قائم کرکے اسے سنگین ترین سزا بھی دلوائیں گے۔ہماری پاکستانیت کا یہ کم از کم تقاضا ہوگا۔آپ بتایئے کہ حکومت پنجاب کو ہم کیا کہیں ؟ فیصلہ قارئین پر چھوڑتے ہیں۔البتہ مفت مشورے کے طور پر جناب شہبازشریف سے التماس ہے کہ وہ ان ٹشو پیپرز کے استعمال کو فوری طور پر روک دیں۔ اگر یہی حرکت کسی دشمن ملک نے کی ہوتی تو ہم آسمان سر پر اٹھا لیتے۔ کاش کہ ہمارے وزیراعلیٰ شہرت کی بلندیوں سے تھوڑی دیر نیچے اتر کر اپنے صوبے کو یوں بے آبرو ہونے سے بچا لیں۔

جب سے امریکی کانگریس کی کمیٹی میں بلوچستان کے اندر انسانی حقوق پر ”تشویش“ بھری بحث ہوئی ہے پاکستان کے محب وطن حلقوں میں ایک سراسمیگی سی پھیل گئی ہے۔سقوط ڈھاکہ کے ڈسے ہوئے پاکستانی خوفزدہ ہیںکہ پاکستان کے سقوط کی اب ایک اور عالمی سازش ترتیب پا رہی ہے اور اب کی بار شائد اس گھناﺅنی سازش کا مرکز و محور ماسکو کی بجائے واشنگٹن ہے۔امریکی کانگریس کمیٹی میں پاکستان کے کسی علاقے کے بارے میں باقاعدہ بحث ہونا اس لحاظ سے شرمناک ہے

کہ ہماری وزارت خارجہ اور اس کے ماتحت سفارتکار اسے رکوانے میں بری طرح ناکام ہوئے لیکن اس ناکامی کے پیچھے سلالہ چیک پوسٹ پر امریکی حملہ‘ اس کے نتیجے میں سڑک کے ذریعے تاحال نیٹو سپلائی کی بندش پاک امریکہ تعلقات کی نوعیت کا پارلیمانی کمیٹی کو اختیار دینا اور امریکی ”جاسوسوں“ کو واپس بھجوانے کا ردعمل بھی ہے۔ محض یہ کہہ دینا کہ وہاں بھارتی لابی امریکی کانگریس میں پوری طرح نفوذ کر گئی ہے آدھا سچ ہے۔آج کل بھارت اور امریکہ کی گاڑھی چھنتی ہے اور ہم امریکہ کے ساتھ برابری کی سطح کے تعلقات کا نقشہ بنا رہے ہیں۔پاکستان ایران سے گیس لینے پر بضد ہے جبکہ بھارت نے ایران سے تیل میں کمی کوسعودی عرب کے ذریعے پورا کر لیا ہے اور امریکہ کو خوش رکھا ہے۔عالمی سیاست میں ہم اب امریکی بلاک سے دور ہٹ رہے ہیں اور ایسے عالم میں امریکہ والے ہماری بلائیں نہیں لیں گے اور شائد اسی دوری میں ہی ہمارا بھی فائدہ ہے۔مجھے یقین ہے کہ امریکیوں نے بلوچستان کو ڈسکس کرنے کے ساتھ ساتھ اس اشو کے ذریعے پاکستان کے بازو مروڑنے کی حکمت عملی بھی طے کر لی ہوگی۔یہ ممکن ہے کہ یہ اشو سرکتا ہوا اقوام متحدہ تک بھی پہنچ جائے۔کیا اس تمام ممکنہ سنگین صورتحال کے سبب بلوچستان پاکستان سے الگ ہوجائے گا؟ میری سوچی سمجھی رائے یہ ہے کہ بلوچستان کا پاکستان سے الگ ہونا سیاسی‘ جغرافیائی اورآبادی کے لحاظ سے ناممکن بلکہ مکمل طور پر ناممکن ہے۔ آج کے پاکستان اور ستر کی دھائی والے مارشلائی ملک میں زمین آسمان کا فرق ہے۔”امریکہ پاکستان کے اندرونی معاملات میں مداخلت نہ کرے ورنہ ہم امریکی معاملات میں مداخلت کریں گے“ ۔دفتر خارجہ کی طرف سے اس مفہوم کے بیانات کا تصور ماضی میں کیا ہی نہیں جاسکتا تھا۔ حکومت کی ناکامیاں اپنی جگہ لیکن پاکستانی ریاست پے در پے ناکامیوں سے نکلتے‘بچتے بچاتے بڑی حد تک اس خطے کا ایک طاقتور ملک بن چکی ہے۔عوامی شعور کی سطح‘مضبوط سول سوسائٹی‘سن بلوغت کو چھوتی ہوئی سیاسی جماعتیں اور خود احتسابی کے عمل پر آمادہ ہوجانے والے آزاد میڈیا اور مضبوط اعصاب کی حامل عدلیہ کے ہوتے ہوئے کسی ”انہونی“ کی گنجائش نہ ہونے کے برابر رہ گئی ہے۔مٹھی بھر بلوچ ایسے ہیں جو غیر ملکی آقاﺅں کی طرف سے ملنے والے وظیفے‘بارود اور خیالات سے مسلح ہو کر ”آزادی“ کے نعرے لگاتے ہیں۔بنگلہ دیش میں عوام کی اکثریت نے شیخ مجیب الرحمن کو ووٹ دیئے تھے لیکن بلوچستان کی کثیر تعداد نے علیحدگی کی بات کرنے والوں کو رد کردیا ہے۔ کئی بار رد کیا ہے اور بری طرح شکست دی ہے۔ تجزیہ نگار”بلوچستان جارہا ہے“ کے حق میں دلائل دیتے وقت آبادی کی اکثریت کو کیوں نظرانداز کردیتے ہیں۔اصل توجہ جس پہلو پر مرکوز کرنی چاہیے تھی وہ آرمی چیف جناب اشفاق پرویز کیانی کے ”تنگ آمد بجنگ آمد“ والے انکشافات ہیں۔ ہم نے فیشن بنا لیا ہے کہ اپنی ہر ناکامی کو فوج کے کھاتے میں ڈال کر خود کو بری الذمہ قرار دے دیتے ہیں۔دشمن تو فوج کو گالی دیتا ہی رہے گا دوستوں کو کیا ہوگا۔کیا ”ویلنٹائن ڈے“ کی طرح یہ بھی کوئی سپانسرڈ فیشن ہے جسے ہمارے نام نہاد ”لبرل“ اور ”موڈریٹ“ لوگوں نے ہرحال میں اپنانا ہے۔ جن ”آزادی پسندوں“ کو سنٹرل ایشیاءسے اسلحہ آرہا ہے‘ افغانستان کی سرزمین سے بھارتی آشیرآباد مل رہی ہے اور وہ اس ملک کو کچوکے لگانے کی جسارت کر رہے ہیں انہیں محض”احساس محرومی“ کی گنجائش دے کر قابل معافی سمجھنا اور ”مظلوم“ سمجھنا زمینی حقائق کو جھٹلانے کے سوا کچھ نہیں۔اگر آپ اتنے ہی ان کے خیرخواہ ہیں تو ان کرائے کے آزادی پسندوں کو مشورہ دیں کہ کم از کم اپنے لوگوں پر ہی ہتھیار نہ اٹھائیں۔ بلوچستان تو کہیں نہیں جارہا البتہ یہ لوگ وہ اپنے فرار کی تیاری کرلیں کہ امریکہ ان کی مدد کو نہیں پہنچے گا اور بھارت کو ”آزاد بلوچستان“ سے پہلے کشمیر سمیت سات ”آزاد ریاستیں“ بنانا ہوں گی۔

افسوس صد افسوس! محراب و منبرنے اخلاق سنوارنے کے عظیم مقصد کو پورا کرنا تھا وہ اقتدار کی سیاست گریوں میں ایسے الجھے کہ اپنے فرض کو بھی بھول گئے۔ وہاں اب خوئے دلنوازی کے پھول نہیں نفرت اور حقارت کے کانٹے اگتے ہیں۔ جبہ و دستار جسے اقوال حسنہ کا محافظ بننا تھا وہ فرقہ واریت اور خود نمائی کے نشان بن گئے۔ خانقاہیں اہل نظر سے خالی ہوئیں اور ہوس پرست بہروپیوں نے مسندِارشاد پر قبضہ جمالیا۔مذہبی جماعتیں مذہبی سے سیاسی بنیں اور قوم کے اخلاق و اقدار کو مادر پدر آزاد خیال درندوں کے حوالے کردیا جنہوں نے دانشوری‘آرٹ ‘گلیمر اور شوبز کے پردے میں امت رسول ہاشمی کے دل و دماغ کو جاہلانہ اور حیواناتی خیالات سے داغ دار کردیا ہے

۔شرفِ انسانی کی ساری حدیں توڑ دی ہیں اور ہمارے اسلامی معاشرتی نظام کی چولیں ہل کر رہ گئی ہیں۔سیاست ہی سیاست‘اقتدار کی جنگ‘سیٹوں کی بندربانٹ‘ریفارمر کوئی نہیں‘سب لیڈر ہی لیڈر۔باریش اور بے ریش سب ایک ہوئے۔ قد آدم تصاویر سے شہر و بیابان سجا دیئے گئے لیکن اپنے چاہنے والوں کے دل میں اخلاقی قدریں اجاگر کرنے کی کوشش نہیں کی۔ فحاشی و عریانی۔ اگر کسی نوجوان کے سامنے اس لفظ کودہرائیں تو وہ کہے گا چھوڑیں جی یہ مولویوں والی باتیں نہ کریں۔ اب دور بدل گیا۔ اب آگے چلیں !کبھی جماعت اسلامی انسداد فحاشی مہم چلایا کرتی تھی اب وہ بھی روشن خیال نوسربازوں کے پروپیگنڈہ سے دبک کر بیٹھ گئی ہے۔ اب کوئی ہے ہی نہیں جو ٹی وی سکرین‘ کمپیوٹرسکرین‘ موبائیل سکرین اور سائن بورڈ کے ذریعے اس قوم کو اخلاق باختگی کی دلدل میں دھکیلنے والے نفسیاتی مجرموں کو نکیل ڈال سکے۔ ان کے قلم اور کیمرے توڑ سکے اور لوگوں کو آگاہ کرسکے کہ انہوںنے کس طرح اپنے بچوں کوجنسی نظریات سے محفوظ رکھنا ہے۔انہیں کون بتائے کہ نعرے لگانے سے نہیں بلکہ ملک میں بسنے والوں کی تعمیر اور تربیت سے قومیں ترقی پاتی ہیں۔ تعمیر معاشرہ تعمیر افراد کے ذریعے ہی ممکن ہے۔ جب میڈیا پوری طرح افراد کی تخریب اور بربادی پر جتا ہوا ہے تو پھر آپ کے اقتدار میں آجانے سے کون سا انقلاب آجائے گا۔ میڈیا صرف نیوز چینلز اور اخبارات کا نام نہیں سب سے موثر میڈیا وہ ہے جو شام ڈھلتے ڈرامے کے نام پر ہمارے گھروں میں گھس آتا ہے۔ سماجی مسائل‘مرد اور عورت کے تعلقات اور بچوں اور والدین کے درمیان روابطہ۔ بظاہر ان موضوعات پر بننے والے ان ڈراموں کے ذریعے ہمارے ذہنوں میں کیا ڈالا جارہا ہے۔ ایک شوہر جانتا ہے کہ اس کی بیوی کے کسی آشنا کے ساتھ تعلقات ہیں ۔ وہ بیوی کو سمجھاتا ہے لیکن اس کی بیوی ان ناجائز تعلقات کو ختم نہیں کرتی۔شوہر یہ سب کچھ برداشت کرتا رہتا ہے پھر کسی ایک واقعہ سے بیوی کا دماغ تبدیل ہوتا ہے اور وہ پھر سے اپنے شوہر کی وفادار ہوجاتی ہے اور یوں شوہر اور بیوی ہنسی خوشی رہنا شروع کردیتے ہیں۔ معصوم ذہنوں میں سوال اٹھتا ہے کہ ایسے جوڑے کے ہاں ہونے والے بچے کا اصلی باپ کون ہے؟ میں یہ فرضی بات نہیں بتا رہا۔ ایک ٹی وی چینل پر چلنے والے انتہائی ہائی فائی کلچر ڈرامے کی کہانی ہے۔ بتائیں اس ڈرامے کو کس نے اور کیوں سنسر نہیں کیا۔ کیا ہمارے کسی گھر میں کوئی شوہر یہ برداشت کرتا ہے؟۔ اسی طرح ایک اور ڈرامے کی کہانی ہے کہ ایک بیوی یہ جانتے ہوئے کہ اس کے شوہر کے دوسری عورت کے ساتھ ناجائز مراسم ہیں کوئی احتجاج نہیں کرتی بلکہ ردعمل کے طور پر خود بھی آوارہ ہوجاتی ہے۔اور چار پانچ برس کے بعد پھر وہ ہنسی خوشی رہنا شروع کردیتے ہیں۔کس طرح ناپاک رشتوں کو عام سی بات ثابت کرنے کی کوشش کی جارہی ہے۔دوسری جانب عورت کے حقوق کے نام پر معمولی سا اختلاف ہونے پر لڑکی طلاق لے لیتی ہے۔ اور ہمارے ڈراموں نے طلاق کو محض ایک کاغذ کا ٹکڑا ثابت کردیا ہے۔ اس کو رکھو یا پھاڑ دو۔ ایسے ایسے ڈرامے چل رہے ہیں جن میں ہیرو بڑے اسٹائل سے شراب پی رہا ہے اور شراب کی بوتل‘ اس پر لگے لیبل کو کیمرہ فوکس کرکے دکھاتا ہے۔یوں محسوس ہوتا ہے کہ اب ہمارے ڈراموں کے ذریعے شراب کی مارکیٹنگ بھی جاری ہے۔ کہاں پاکستانی ڈراموں میں سگریٹ پینے کے مناظر دکھائے جانے پر پابندی تھی کہاں اب شراب کا نشنہ چڑھایا جارہا ہے۔انٹرنیٹ کے ننگے پن کو کیا روکیں گے‘ ہم تو ریاست کے زیر کنٹرول ان شوبز چینلز کو لگام نہیں دے سکتے۔ کوئی پریشر گروپ‘کوئی آواز کوئی مصلح آگے بڑھے اور سماج کو ذہنی اور قلبی طورپر دیوالیہ ہونے سے بچالے! علمائے کرام اور مذہبی رہنماﺅں کو اپنے حقیقی منصب کو نہیں چھوڑنا چاہیے۔ ہمارے پیارے نبی نے ارشاد فرمایا کہ ”مجھے اخلاق سنوارنے کے لئے بھیجا گیا ہے“۔مصلحین کہاں کھو گئے قوم کے اخلاق و اقدار پر حملہ ہوچکا ہے!

Click here to View Printed Statements

آج انسانیت مجموعی طور پر انتشار کا شکار ہے ۔تمام تر ترقی ‘خوشحالی تعلیم اور علم کے باوجود ساڑھے چھ ارب انسان ایک دوسرے کو نیچا دکھانے اور اس کرہ ارض کو نہ ختم ہونے والے فتنوں میں مبتلا کردینے کی کوشش میں مصروف ہیں۔کوئی ایسا خطہ نہیں جو جنگ و جدل سے پاک ہو۔ جہاں انسان انسان کو کاٹ نہ رہا ہو۔ جہاں آدم آدم کو لوٹ نہ رہا ہو امیر غریب کو کھائے جارہا ہے۔

باوسیلہ دنیا بے وسیلہ بستیوں کو اجاڑ رہی ہے۔تقابل کا فلسفہ اپنے تمام تر منفی معنوں کے ساتھ نسل انسانی کی تباہ کاریوں میں کارفرما ہے۔ کچھ معلوم نہیں کب زیر زمین چھپے ہوئے ایٹم بم‘ سمندر میں تیرتی ہوئی نیو کلیائی آب دوزیں ‘تابکاری مواد اٹھائے فضاءمیں قلانچیں بھرتے طیارے اور خلا میں ہچکولے لیتے مصنوعی سیارے اچانک کسی مہم جو ذہن کی چھوٹی سی غلطی سے اس قافلہ انسانیت کو آگ لگا دیں اور احسن تقویم کے فارمولے پر پیدا کردہ انسان اپنی ہی بدتد بیری اور بدنیتی کے سبب اپنے گھر کو جلا کر خاکستر کردے۔ انسانیت کو بچانے کی آج جس قدر ضرورت ہے۔ شاہد اس سے پہلے کبھی بھی نہ تھی۔ مختلف یورپی دانشور اور انسانی حقوق کے چیمپئن خود ساختہ تھیوری اور محض انسانی ذہن سے پھوٹنے والی احتیاطوں کو ملحوظ خاطر رکھ کر انسانیت کے قافلے کو بچانے کی کوشش میں مصروف ہیں لیکن تمام تر خلوص نیت کے باوجود مغربی انسان دوست ادارے اور حلقے محض اندھیروں میں ٹامک ٹوئیاں مار رہے ہیں ان کی حالت یہ ہے کہ فلسفی کو بحث کے اندر خدا ملتا نہیںڈور کو سلجھا رہا ہے اور سرا ملتا نہیںاُلجھی ہوئی ڈور کا سرا ڈھونڈنے کے لئے انہیں ہر طرح کے تعصبات سے بالاتر ہو کر صرف اور صرف سچ کو تلاش کرنا ہوگا۔ مجھے یقین ہے کہ اگر انہوں نے مذہب ‘زبان ‘علاقے ‘رنگ نسل‘ Status اور دنیاوی طبقاتی تقسیم کی عینک اتار کر حق کی تلاش کو نکلیں گے تو پھر انسانیت کے عظیم محسن دنیا جہاں کے لئے رحمت للعالمین اور صرف مسلمانوں کے لئے نہیں بلکہ بنی نوع انسان کے غم گسار آخری پیغمبر خاتم النبین حضرت محمدﷺ کی تعلیمات تک ضرور پہنچ جائیں گے۔اگر ہم ماہ محرم الحرام میں کوئی ایسی کتاب ترتیب دے سکیں ۔ کوئی ایسی قلم بنا سکیں جس میں رسول پاک ﷺ کی تعلیمات کا بھرپور تاثر ملتا ہو اور وہ یورپ اور امریکہ کے لوگوں کو دکھائی جائیں تو میں دعویٰ سے کہتا ہوں کہ جو ذہن گستاخی پر اتر آئے ہیں وہی ذہن آپ ﷺ کے حق میں اس طرح سرنگوں ہوجائیں گے جس طرح حضرت عمرؓ تلوار حمائل کئے درنبوت پر جھک گئے تھے۔ قافلہ انسانیت کو درپیش جان لیوا حادثوں سے بچانے کا صرف ایک ہی راستہ ہے کہ ہم بحیثیت مسلمان اسوءرسول پر عمل کریں اور غیر مسلموں کو ڈرانے اور خوفزدہ کرنے کے بجائے یا ان سے مرعوب ہونے اور دور ہونے کے بجائے انہیں تعلیمات نبوی سادہ اور آسان سے لفظوں میں سمجھا سکیں۔ دنیا میں مختلف شخصیات علم و کمال‘دولت و جمال اور قوت واقتدار لے کر آتی رہی ہیں مگر ہم حضور انور کو سب سے زیادہ اہمیت دیتے ہیں۔اس کی ایک وجہ تو ہماری جناب رسول اللہ سے محبت و عقیدت اور ہمارا ان کے ساتھ رشتہ ایمان میں بندھا ہونا ہے تو دوسری وجہ یہ بھی ہے کہ جو آپ نے انسانیت کو عطا کیا ہے وہ آپ سے پہلے یا بعد میں کسی نے نہیں دیا۔دنیا کی دوسری شخصیات کو دیکھیں تو سکندر‘رستم و دیگر نامور کمانڈرز جاہ و جلال دکھا کر چلے گئے‘ کارل مارکس اورلینن جیسے لوگ نظریاتی نعرے دے کر جہاں فانی سے کوچ کر گئے۔غرض کوئی علمی موشگافیاں دکھا کر چلا گیا کسی نے غلط نظریات میں الجھا کر اسے کمال تصور کیا۔ کسی نے انسانیت کو خاک وخون میں تڑپانے سے لطف حاصل کیا مگر حضور کے انقلاب سے انسانیت کو رہنمائی‘ امن ‘ہدایت و نور ملا ہے۔اور آپ کے ارشادات آج کے مہذب انسان کے لئے بھی اسی طرح مفید اور حیات بخش ہیں۔ جس طرح 1500 سال قبل کے انسان کے لئے تھے۔ ان کی روشنی اور تابانی میں ذرا فرق نہیں آیا۔اخلاق کی جھلک‘ کردار کی بلندی‘ امانت ‘دیانت اور انسانیت کے لئے پیار جہاں بھی ہے وہ حضور صلی اللہ علیہ وسلم کا دیا ہوا ہے۔ آپ کی بتائی ہوئی باتیں آج بھی بڑے بڑے سائنس دان پڑھتے ان سے ہدایت و رہنمائی حاصل کرتے اور قلب سلیم رکھنے والے آپ کے آخری نبی ہونے کی شہادت دیتے ہیں۔ اسلام کے دیئے ہوئے معاشی‘ معاشرتی ‘سیاسی عدل اور خاندانی نظاموں کا جو بھی حصہ جانے انجانے میںکہیں بھی نافذ ہے دنیا اس کی برکات حاصل ہورہی ہیںاور مجموعی طور پر معاشرے ‘نظام اور اسلام کی بخشی ہوئی اچھائیوں کے طفیل ہی ترقی کر رہے ہیں۔ کئی معاشرے صرف سچ کی بنیاد پر آگے بڑھ رہے ہیں‘ بعض ممالک صرف محنت کی بنیاد پر دنیا میں نام پیدا کرچکے ہیں۔جاپان انسانی حقوق کی بناءپر پہچان بنا چکا ہے۔اسی طرح معاشرے سے لے کر فرد تک اسلامی تعلیمات کی برکات پھیلتی ہیں۔حضور انور ﷺ سے قبل افریقہ اور یورپ میں غلام بنانے کے بھیانک مناظر دیکھنے میں آئے ہیں ۔تاریخ گواہ ہے کہ کچھ لوگوں کو دہشت جمانے کی غرض سے بے دردی سے ہلاک کردیا جاتا اور باقیوں کو غلام بنا لیا جاتا تھا اور غلامی کی بھی اس حد تک گری ہوئی مثالیں ان لوگوں نے قائم کیں کہ اپنے معزز مہمانوں کے سامنے شراب و شباب سرو کرنے کے بعد ان کے ہاتھوں میں تیر دے دیئے جاتے ۔ غلاموں کو سامنے کونے میں بٹھا دیا جاتا اور تیر غلام پر برسائے جاتے۔ جوں جوں غلام تڑپتا تو مہمان محظوظ ہوتےِ جبکہ سرور کائنات نے زید بن حارثہ سے ایسا سلوک کیا کہ وہ اپنے والد اور چچا کے ساتھ جانے سے انکاری ہوگئے اور حضور سے چمٹ گئے۔ اس پر تاریخ گواہ ہے کہ نبوت سے پہلے دور میں حضور زید کو کعبے میں لے گئے اور اعلان کیا کہ آج سے زید کو زید بن محمد کہا جائے۔قرآن پاک کے نزول کی اولین سورتوں میں سورہ بلد میں ”گردنیں آزاد کرو“ کی واضح ایک آیت موجود ہے جبکہ آگے چل کر غلامی کے ادارے کو تدریج کے ساتھ مکمل طور پر اسلام نے ختم کردیا۔ میں تو سمجھتا ہوں کہ اصل روشنی اسلام ہی کے پاس ہے یہ مغرب کے پاس جو روشنی ہے وہ اس قسم کی روشنی ہے جو چور اور ڈکیت کے ہاتھ میں ہوتی ہے۔ وہ اس لائٹ سے اپنے گھر کا راستہ نہیں ڈھونڈ رہا ہوتا مگر دوسرے کے گھر اور دوسرے کے مال کی طرف ہدایت و رہنمائی لے رہا ہوتا ہے۔ روشنی وہی ہوتی ہے جو انسان کو انسانیت کا سبق دے۔ ڈیزی کٹر پھینکنے کے بعد بسکٹوں کے ڈبے پھینکنے سے خداوند کبھی خوش نہیں ہوتا۔حضورﷺ کی تعلیمات پر نگاہ دوڑائی جائے تو حیرانگی ہوتی ہے کہ جو بات آج ہم لمبی لمبی تقاریر میں نہیں کہہ پاتے آپ نے چند جملوں میں کہہ ڈالیں۔ مکہ سے مدینہ تشریف لانے پر آپ نے جو خطبہ ارشاد فرمایا جو ایک منٹ سے کم وقت کا تھا اور خطبہ حجة الوداع کے موقع پر آخری تاریخی خطبہ بھی مکمل لکھ لیا گیا اور اس کا وقت بھی دس منٹ سے زائد نہیں ہے۔آیئے آپﷺ کی انسان کے حوالے سے فرمائے گئے ارشادات کا جائزہ لیتے ہیں‘میرا یہ آج بھی دعویٰ ہے کہ جو لوگ پیغمبر اسلام کے حوالہ سے نفرت انگیز تحریریں لکھتے ‘ توہین آمیز کارٹون بناتے اوردل آزار فلمیں دکھاتے ہیں ۔ ان تک محسن انسانیت کی تعلیمات حقیقی طور پر پہنچ ہی نہیں سکیں۔اس موقع پر میں آپ کے مدینے داخل ہونے والے خطبے پر کچھ عرض کرنا چاہوں گا۔آپ نے فرمایا”سلام کو عام کرو“ اور باہم کھانے کھلایا کرو ‘صلہ رحمی کیا کرو‘رات کے اس پہر نماز پڑھا کرو جب لوگ سو رہے ہوں۔ تم جنت میں سلامتی کے ساتھ داخل ہوجاﺅ گے۔سلام ایک دعا ہے یعنی تم پر سلامتی ہو۔ اس کی تفصیل میں حضورﷺ نے دوسرے موقع پر فرمایا کہ مسلمان وہ ہے جس کی زبان اور ہاتھ سے دوسرے مسلمان محفوظ رہیں۔مزید برآں لفظ مسلمان کو بھی اپنی ایک حدیث میں واضح کردیا کہ جو کوئی ہماری طرح نماز پڑھے اور ہمارے قبلے کی پیروی کرے وہ مسلمان ہے۔ آپ ﷺ یہاں تک مسلمانوں کے لئے رﺅف و رحیم ہیں کہ آخری خطبے میں آپ نے یہ بھی واضح کردیا کہ مسلمان کی جان و مال ‘عزت اور آبرو دوسرے مسلمان پر حرام ہے اور میرے غیر مسلم بھائیوں کو یہ جان کر خوشی ہوگی کہ حدیث قدسی میں حضور نے ہمیں آگاہ کیا کہ اللہ تعالیٰ فرماتا ہے۔”لوگ میرا کنبہ ہیں“ اور قرآن میں آیا کہ جو کوئی ایک انسان کی جان بچائے گا اس نے گویا پوری انسانیت کی جان بچائی۔ آپ کے ارشاد کے دوسرے حصے میں فرمایا گیا کہ آپس میں کھانے کھلایا کرو۔ ہمیں معلوم ہے کہ درندے ‘حیوان اور انسان میں فرق یہ ہے کہ درندہ شکار مار کر چیڑپھاڑ کرتا ہے۔ اپنا پیٹ بھرتا اور باقی کو وہیں پھینک دیتا ہے۔ حیوان کو جو دیا جائے وہ اسے کھا لیتا اور باقی پر گندگی کر دیتا ہے جبکہ انسان اپنا کھانے کے بعد باقی اپنے بھائیوں کو دے دیتا ہے۔ حضورﷺ کی تعلیمات اس سے بھی ایک درجہ آگے ہیں۔آپﷺ نے ایسے لوگ تیار کردیئے جنہیں میدان کار زار میں بھی کچھ پینے کو ملا ہے تو اسے اگلے زخمی بھائی کی طرف بڑھانے کا اشارہ کیا۔ گویا اسلام پہلے دوسرے بھائی کو کھلا کر پھر خود کھانے کا درس دیتا ہے حضور کے ارشادات کے مطابق اگر کسی کا پڑوسی بھی بھوکا سویا ہوا ہو اور ہم نے پیٹ بھر کر کھانا کھایا ہو تو نہ صرف ہمارا یہ لقمہ حرام بن جائے گا بلکہ اس سے بڑھ کر ایسے شخص کا حضور پر کوئی ایمان نہ ہونے کا سر ٹیفکیٹ بھی سرکار نے جاری فرما دیا ہے۔صبح تہجد کی نماز سے انسان کے دل میں نرمی پیدا ہوتی ہے ۔ خدا کی محبت اور اس کے بندوں سے پیار بڑھتا ہے۔ سورہ مزمل کے مطابق ایسا کرنے سے نفس پر ضرب کاری لگتی ہے تکبر وغرور جاتا رہتا ہے۔ انسان کے منہ سے اچھی اور پیاری بات نکلتی ہے۔ دعوت دینے کے آداب سمجھ میں آتے ہیں‘ بقول اقبالعطار ہورومی ہو رازی ہو غزالی ہوکچھ ہاتھ نہیں آتا ہے آہ سحر گا میںیہ عمل انسان کے اندر برداشت اور حوصلہ بھی پیدا کرتا ہے جیسا کہ حضور پر ایک مشرکہ بوڑھی کوڑا پھینکتی تھی جب چند دن اس نے ایسا نہ کیا تو معلوم ہوا کہ وہ بیمار پڑگئی ہے ۔ اس دن سرکار اس کے گھر اس کی عیادت کرنے تشریف لے گئے۔ہمیں بڑی واضح ہدایات ہیں کہ ”تم میں سے بہتر وہ ہے جو لوگوں کے لئے نفع بخش ہو“ انسانوں کے درمیان برابری کا درس آخری خطبہ میں جس شان سے دیا گیا ہے وہ اس بات سے عیاں ہے کہ UN کے آئینی چارٹر کی شقیں اس خطبہ رسول سے لی گئی ہیں۔اسی طرح پوری شرح صدر کے ساتھ یہ بات کہی جاسکتی ہے کہ اگر کسی فرد‘تنظیم یا ملک کا مقصد انسانیت کی فلاح قرار پایا ہے تو اسے اپنے اس مقصد میں کامیاب ہونے کے لئے اسوہ رسول ہی اپنا لائحہ عمل قرار دینا ہوگا۔ جس قدر آپ کے طریقہ کار‘فرمودات اور طرز ِ حیات پر عمل ہوگا اسی قدر انسانی فلاح کی منزل قریب تر ہوگی۔ اقبالؒ نے اسی راز کو ایک مصرے میں یوں بیان کیا تھا‘دہر میں اسم محمد سے اجالا کردےاور میں قرآن مجید کی اس آیت پر اپنی تحریر کا خاتمہ کروں گا ”اگر تم اللہ سے محبت کرتے ہو تو میری (رسولﷺ اللہ کی) اتباع کرو اللہ تم سے محبت کرے گا“۔

پاکستانی قوم ایک بار پھر مایوسی کی اندھیری کوٹھڑی میں بند ہوگئی ہے۔ سوال اب یہ رہا ہی نہیں کہ سوئٹزر لینڈ کے بینکوں میں رکھا لوٹ مار کا پیسہ واپس آئے گا یا نہیں‘ اس سے کہیں خطرناک سوالات سانپ بن کر عوام کو ڈس رہے ہیں۔عام آدمی اگر گاڑی کا ویل کپ چوری کرے تو کئی کئی برس جیل میں گلتا سڑتا رہتا ہے۔ دیہاتوں میں اگر چوری چھپے کماد کی فصل سے کوئی گنا توڑلے تو تھانے میں ہی اس کا ٹرائل شروع ہوجاتا ہے۔جیب کترے عبرتناک انجام کو پہنچ جاتے ہیں۔ لیکن اس ملک میں انصاف کا یہ کیسا نظام رائج ہے

کہ ایک شخص پر اربوں روپے لوٹنے کے الزامات لگے‘اس نے کبھی ان پیسوںکی موجودگی سے انکار بھی نہیں کیا‘سوئٹزرلینڈ کے جج نے سزا بھی سنائی لیکن پاکستان کی عدالتیں‘تحقیقاتی ادارے اور منی لانڈرنگ کے ماہرین مل کر بھی اس شخص کیخلاف کچھ ثابت نہ کرسکے اور الٹا وہی شخص ”پاکستانی نیلسن منڈیلا“ بن کر مملکت پاکستان کے سب سے اعلیٰ عہدے پر فائر ہوگیا۔این آر او کے تحت تمام مقدمات سے بری ہونے والے اسی شخص کو انصاف کے واسطے دینے والے میاں محمد نوازشریف نے اپنا بھائی قرار دیا۔تمام مقدمات کو ”سیاسی“ کہہ کر میثاق جمہوریت پر مہر لگائی۔ اسی ”کرپٹ“ کو صدر بنوایا‘اسی ”کرپٹ“ کے ساتھ معاہدے کئے۔این۔آر۔او جیسے شرمناک معاہدے کرانے والا امریکہ ہے‘ جو خود کو انسانی حقوق اور ٹرانسپئرنسی کا سب سے بڑا چیمپن قرار دیتا ہے۔کیا دوغلے چہرے ہیں‘کونڈلیزا رائس ہی ”کلموہی“ نہیں یہاں تو ہر کسی نے مفادات کی سیاہی میں چہرے چھپا رکھے ہیں۔اندازہ کیجیئے کہ واجد شمس الحسن نے اپنی نگرانی میں سوئٹزرلینڈ کی عدالت سے جناب زرداری کیخلاف ثبوتوں کا تمام ریکارڈر اٹھایا اور اسے کہیں غائب کرا دیا۔ عدالت عظمیٰ نے ابھی صدارتی استثنیٰ کا فیصلہ نہیں کیا لیکن ماتحت احتساب عدالتوں نے شاہ سے زیادہ شاہ کا وفادار ہونے کا ثبوت دیتے ہوئے جناب زرداری اور ان کے ساتھ شریک ملزمان کیخلاف تمام مقدمات داخل دفتر کر دیئے ہیں۔کیا نظام ہے انصاف کا!۔دو برس بیت گئے این آر او کیخلاف سترہ رکنی بینچ نے فیصلہ دیا اور واضح احکامات لکھے کہ زرداری کیخلاف بیرون اور اندرون ممالک تمام مقدمات کھولے جائیں اور سوئس حکام کو خط لکھا جائے کہ ملک قیوم کے کہنے پر جو مقدمہ بند کیا گیا تھا وہ غلط اقدام تھا۔ ملک قیوم بیماری دل کا بہانہ بنا کر باہر بھاگ گیا۔سیکرٹری قانون ایک ہفتہ کی چھٹی پر گیا اور بیمار ہوگیا۔ خود صدر زرداری بیماری کے بہانے باہر بھاگے اور چند ضمانتیں حاصل کرنے کے بعد واپس تشریف لائے۔ ملزم زرداری نے سوئس حکام کو خط لکھنے سے صاف انکار کردیا۔ اور ہماری سپریم کورٹ مکمل طور پر بے بس دکھائی دی۔ بڑی ہمت کرکے توہین عدالت کا نوٹس جاری کیا۔وزیراعظم اس طرح بازو لہراتے اپنے حواریوں کے ہمراہ سپریم کورٹ سے جلوہ گر ہوئے گویا کشمیر فتح کر لیا ہے۔ شرم نہ حیا۔ اعتزاز احسن نے اپنے ہر اعزاز کی خود نفی کر ڈالی۔ یہ بھی کمال کا نظام انصاف ہے جہاں وکیل کی صرف فیس ہوتی ہے‘ اس کا ضمیر کوئی نہیں ہوتا۔ وہ فیس کی خاطر اپنے ضمیر کا کسی وقت بھی سوئچ آف کرسکتا ہے۔ جس نظام میں وکیل بے ضمیر ہوں‘ جج بے بس ہوں اور عدالتیں وقت گزاری کو ہی انصاف سمجھ لیں وہاں عام آدمی مایوسی کی کوٹھڑی میں بند ہوکر نہیں بیٹھے گا تو اور کیا کرے گا؟پیپلزپارٹی کبھی غریبوں کی جماعت ہوا کرتی تھی۔ غریب کے پاس غربت ہوتی ہے اقدار کی قلت ہی رہتی ہے لیکن آج کی پی پی پی دولت مندوں زرداریوں کی ملکیتی پارٹی ہے۔پوری پارٹی‘ کابینہ‘ وزیراعظم اور حکومت صرف ایک شخص کی غلام ہیں۔دو اڑھائی سال تو خط لکھنے اور نہ لکھنے کے چکر میں گزر گئے ہیں‘ باقی عرصہ خط لکھنے کے وعدہ پر گزر جائے گا۔ پارٹی جب سمجھے گی کہ اب مدت پوری ہونے والی ہے‘ تجوریاں بھری جاچکی ہیں‘ ایک دن سیاسی شہادت سر پر سجا کر نئے انتخابات کے لئے نکل کھڑی ہوگی۔ سیاست شائد نام ہی اس بدمعاشی کا ہے۔لوگ کہاں جائیں‘ تحریک انصاف والوں نے بھی ”سٹیٹس کو“ کا حصہ ہی بننا ہے۔ورنہ 19جنوری کو لاکھوں نوجوان شاہراہ دستور پر کیوں نہ لائے گئے۔ عدالت کو علم ہوتا کہ عوام فوری انصاف چاہتے ہیں ۔ وزیراعظم کو ہتھ کڑیاں لگی ہوتیں لیکن یہاں ریاست کے تمام ادارے‘ سیاست کے سب ستارے اور ذرائع ابلاغ کے تمام دھارے صرف اور صرف اس نظام کو بچا رہے ہیں۔وہ نظام جو بڑے لوگوں کا خدمتگار اور غریب آدمی کا قاتل بن چکا ہے۔پیپلزپارٹی مبارک باد کی مستحق ہے کہ اس نے انتہائی چابکدستی کیساتھ عدالتوں کو چکما دیا ہے۔سال گزارنا تو کوئی مسئلہ ہی نہیں۔ ایسے پرفریب نظام عدل سے تو ملاں محمد عمر کا شرعی نظام لاکھ درجے بہتر تھا۔بے ضمیر وکیل تھے نہ مصلحت پسند انہ عدل۔پیپلزپارٹی عدالت عظمیٰ کے کٹہرے میں کھڑی ہے اور عدالت عظمیٰ عوام کے کٹہرے میں آگئی ہے۔دیکھیے کون کس کو انصاف دیتا ہے!!!

ہماری قومی سیاست دو حصوں میں تقسیم ہوچکی ہے۔ بظاہر سیاستدانوں کا ایک گروہ حزب اقتدار اور دوسرا حذب مخالف ہے لیکن اصل تقسیم کے خدوخال کچھ اور ہیں۔ایک طرف جناب آصف علی زرداری اور ان کے ساتھی ہیں اور دوسری جانب عوام‘ فوج اور عدلیہ ہے۔عوام اپنے دکھوں اور مصیبتوں کے تابوت کندھوں پر اٹھائے ہر روز ماتم کناں رہتے ہےں۔عوام کو تازہ ترین لاش ملی ہے۔آرزوتھی کہ سی این جی مہنگی نہ ہو لیکن اس خواہش کا دن دیہاڑے قتل ہوگیا۔ سی این جی مالکان‘ ٹرانسپورٹرز اور حکومت تینوں جیت گئے۔ عوام ہار گئے۔

جس مہنگائی کے باعث عورتیںبچے اور بوڑھے سڑکوں پر نکلے تھے اور جس چودہ فیصد اضافے کا بہانہ بنا کر سی این جی والوں نے عوام سے ساتھ کھڑا ہوجانے کی اپیل کی تھی‘ وہ مہنگائی جوں کی توں رہی۔ عوام کی آنکھوں میں دھول جھونکنے کے لئے ستر پیسے فی کلو کمی کردی گئی۔ایسا سنگین مذاق اور مذاق کے خالقان پر خدا کی لعنت ہو۔ ویگن والوں نے کرائے بڑھا دیئے اور سارا بوجھ غریب کی جیب بلکہ جان پر آن پڑا۔ اب نہ احتجاج ہے نہ ناراضگی کمانے والے خوب کما رہے ہیں۔کاش کہ سی این جی سٹیشن پر کام کرنے والے عملہ کی تنخواہ ہی بڑھ پاتی۔وہ بیچارے خواہ مخواہ گلے پھاڑتے رہے۔ لوگوں کی گاڑیوں پر پتھر پھینکتے رہے۔دھوکہ ہی دھوکہ ہے۔جھوٹ ہی جھوٹ ہے۔امیر پھر امیر تر ہوا اور غریب غربت کی دلدل میں مزید دھنس گیا۔لوگ پوچھتے ہیں کہ پاکستان میں انتہاءکی طبقاتی تفریق کے باوجود خونی انقلاب کیوں نہیں آتا۔ یہ سوال ہی غلط ہے۔کیونکہ خون تو ہر طرف بہہ رہا ہے۔اس خون کو سنبھالنے والے ”انقلابی“ نہیں ہیں۔خون ضائع جارہا ہے۔دوسرا سبب یہ کہ پاکستان کے لوگوں نے ابھی تک امید کا دامن ہاتھ سے چھوڑا نہیں۔انہیں ملک کے قومی اداروں خصوصاً عدلیہ اور فوج پر اب بھی امید ہے کہ وہ کوئی نہ کوئی ایسی راہ نکالنے میں کامیاب ہوجائیں گے جس سے قدرے بہتر لوگوں کی حکومت وجود میں آسکے۔ خواب فروش بھی بہت ہوشیار ہیں۔کوئی نہ کوئی سہانا خواب پاکستانی عوام کے دل و دماغ کو اسیر ضرور کر لیتا ہے۔آج کل عمران خان ایک ”مسیحا“ کے طور پرخواب بن کر ہماری لاتعلق ہوتی ہوئی نئی کی آنکھوں میں سما رہے ہیں۔ انہیں یقین دلایا گیا ہے کہ تحریک انصاف برسراقتدار آکر تمام تر سماجی ‘معاشی اور سیاسی ناانصافیوں کا قلع قمع کردے گی۔وہ امید کی ڈوری سے بندھے ہیں اور آئندہ انتخابات تک اس ڈوری کو تھامے رکھیںگے۔بات امید کی ہے تو ایک اور امیدپیدا ہوگئی ہے۔شدید ترین دباﺅ کا ایک اثر مرتب ہوگیا ہے۔ گھیراﺅ اور ہانکے نے جناب زرداری کو مجبور کردیا ہے اور انہوں نے میاں محمد نوازشریف کے ”ریسکیو پلان“ کو تسلیم کر لیا ہے۔فوری انتخابات پر بالآخر کام شروع ہوگیا ہے۔ گو کہ سانپ کے ڈسے عوام رسی سے بھی خوفزدہ ہوتے ہیں اور انہیں یہ شدید خطرہ ہے کہ فروری میں سینٹ الیکشن میں اکثریت حاصل کرنے کے بعد جناب زرداری قومی اسمبلی کے انتخابات کے انعقاد سے منحرف ہوجائیں گے‘ لیکن ایک دروازہ کھلا ہے ‘ تازہ ہوا کا ایک جھونکا آیا تو ہے۔!میرے دفتر میں کام کرنے والا اسسٹنٹ دانش خوش ہے کہ زرداری جارہا ہے۔”نہیں سرجی‘سینٹ وینٹ کو چھوڑیںالیکشن ہونے دیں پھر دیکھیں کہ زرداری کہیں نظر ہی نہیں آئے گا۔سرجی‘ زرداری ٹولے سے نجات کے دن قریب آرہے ہیں“ جب سے گیس اور پٹرول مہنگا ہوا ہے دانش بھی اس حکومت کی مخالفت میں سینہ پھلا پھلا کر تقریریں کرتا پھرتا ہے۔عہد حاضر کے دور اندیش تجزیہ کار محترم نسیم انور بیگ کہتے ہیں کہ تیسری دنیا کے ممالک میں پانچ سالہ حکومت چل ہی نہیں سکتی۔قومی اسمبلی کی معیاد چار برس سے زیادہ نہیں ہونی چاہیے۔ پاکستان کی سیاسی تاریخ نے بھی یہی ثابت کیا ہے۔موجودہ وزیراعظم سب وزرائے عظام پر سبقت لے گئے ہیں‘لیکن اپنی مدت کو پورا کرنے کی ضد میں اس وزیراعظم نے عوام کوتھکا دیا ہے۔ایسی حکمرانی اور انداز حکمرانی سے تو بہتر ہے کہ چار سال بعد عزت کے ساتھ گھر چلے جاتے اور نئے انتخابات کرا دیتے۔ہوسکتا ہے کہ بار بار انتخابات کرانے سے واقعتاً بہتر لوگ برسراقتدار آجائیں اور پاکستان کے لئے کسی حقیقی نجات کی راہ نکل آئے!!

علم نہیں کہ اب کی بار پیپلزپارٹی کو مظلوم بننے کا موقع ملتا ہے یا نہیں لیکن خلق خدا کی زبان پر ایک ہی جملہ ہے”زرداری کب جارہا ہے“۔نااہلیوں اور بدنیتوں سے بوجھل ملکی فضاءمیں پروان چڑھنے والے عوامی غیض و غضب نے انڈے بچے دینے شروع کردیئے ہیں۔اگر ”سٹیٹس کو“ کا مخالف کوئی حقیقی عوامی لیڈر ہوتا تو وہ بیروزگاروں کی فوج کی کمان سنبھال لیتا ۔کراچی سے پشاور تک ہر چوک چوراہے پر اس کا پرہجوم استقبال ہوتا۔لیکن بظاہر وہ تمام لیڈرجو انقلاب کا نعرہ لگاتے ہیں

حقیقت میں وہ بھی اس گلے سڑے نظام کے محافظ ہیں اور کوئی ایسا انقلاب برپا نہیں ہونے دینا چاہتے جس سے اس ملک کا غریب امیر ہوجائے اور امیر تر ہوتا اشرافیہ فٹ پاتھوں پر آجائے۔انقلاب کا نعرہ لگانا آسان اور اس کو برداشت کرنا بہت مشکل ہوتا ہے۔میرے جاننے والے حکمران جماعت کے ایک ایم این اے نے کہا کہ ڈاکٹر صاحب خدا کا شکر ہے کہ یہ ڈنڈا بردار مظاہرین ہمارے گھروں میں نہیں گھس رہے ورنہ ایسی تباہی آئے گی کہ فوج بھی ہمیں ان بھوکوں سے نہیں بچا سکے گی۔میں نے پوچھاجناب کی سیاسی بصیرت اب کیا کہتی ہے‘کہنے لگے کہ سچ یہ ہے کہ ہمیں اب انتخابات کا بگل بجا دینا چاہیے ورنہ عوام ہمارا باجا بجا دیں گے۔وزیراعظم گیلانی کا کمال یہ ہے کہ وہ ”جمہوری دکانداری“ بند نہیں ہونے دینا چاہتے۔انہیں ہر طرف اچھا ہی اچھا دکھائی دے رہا ہے۔انہوںنے عوامی غصے کو بھی جمہوری مخالف قوتوں کی کارستانی قرار دے کر آنکھیں موند لی ہیں۔پنجاب کی پارٹی کو انہوں نے ایک بہت بڑی ریلی کرنے کا ٹارگٹ دیا ہے۔جناب گیلانی نے پنجاب کے عہدیداروں کو ممنوعہ بور کے اسلحہ لائسنس دینے کا لالچ دیا ہے اور ایم۔این ۔اے کے ترقیاتی فنڈز سے بھی حصہ دینے کا وعدہ کر لیا ہے۔ ان انعامات اور نوازشات کے عوض پارٹی کو ہدایت کی گئی ہے کہ وہ عمران خان اور نوازشریف کے اثرات کو زائل کرنے کے لئے لاہور میں ایک بہت بڑا شو کریں۔جناب آصف علی زرداری مرد بحران ہونے کے باوجود بحرانوں پر قابو نہیں پاسکے اور اپنے اردگرد ان لوگوں کو جمع کر لیا ہے جن کی وجہ شہرت صرف اور صرف کرپشن رہی ہے۔پیپلزپارٹی کے دامن میں جیالے تو بہت ہیں لیکن اہل اور ایماندار لوگوں کی شائد نسل ختم ہوگئی ہے۔بعض اوقات یوں محسوس ہوتا ہے کہ گیلانی حکومت کسی کو عہدہ بخشنے سے پہلے اچھی طرح چھان بین کر لیتی ہے کہ عہدے پر براجمان کئے جانے والے شخص پر کم از کم ایمانداری کا کوئی الزام نہ آتا ہو۔ اس احتیاط کا نتیجہ نکلنا شروع ہوگیا ہے۔بجلی‘ گیس اور پٹرول کے بحران سے نجات کی کوئی صورت دکھائی نہیں دیتی۔وقتی طور پر جھک جانے سے شائد حکومت کو سکھ کے کچھ سانس میسر آجائیں لیکن مستقل حل کوئی نہیں۔کوئی ایک وزیر‘کوئی مشیر‘خود وزیراعظم بھی اس پوزیشن میں نہیں کہ لوگوں کا اعتمادبحال کرسکیں۔توانائی کی ترسیل اور طریقہ تقسیم کے جائزہ سے اندازہ لگایا جاسکتا ہے کہ وقفے وقفے سے عوام سڑکوں پر آتے رہیں گے اور اگر تھک ہا رکر لوگ بیٹھ بھی گئے تو بھی ہر زبان سے بددعائیں ہی نکلیں گی‘ہمدردی کے دوبول۔خواب ہی رہیں گے ۔چاہے آئندہ الیکشن میں بلال بھٹو اور آصفہ بھٹو ماتمی لباس پہن کر اپنی شہید ماںاور نانا کے نام پر ووٹ کیلئے منتیں ہی کیوں نہ کریں‘غیرجانبدار حلقے اس خیال کے حامی ہیںکہ عوام کی اکثریت اب اس عفریت زدہ ماحول کو پھر سے قابض نہیں ہونے دے گی۔البتہ پروپیگنڈا اپنی طاقت رکھتا ہے اور ہونی انہونی ہوسکتی ہے!جناب زرداری کہاں کہاں سے بچیں گے۔ایک بار گھبرا کر دبئی چلے گئے تھے۔اب کی بار گئے تو شائد واپس نہ آسکیں اورنہ گئے تو شائد برسوں جانہ سکیں۔میمو کیس کسی نہ کسی کے گلے میں حمائل ہونے والا ہے اور حکومت اپنی ہی فوج کے خلاف کوئی واردات کرنے کے منصوبے بنا رہی ہے تاکہ مظلوم بن سکے۔”مظلومیت“ کا سیاسی ڈرامہ لکھا جارہا ہے۔کردار ترتیب دیئے جارہے ہیں۔ عاصمہ جہانگیر اس مشن پر کمر بستہ ہو چکی ہیں۔لیکن کیا کیا جائے کہ اب کی بار عدالت انصاف کا ترازو پوری قوت سے تھامے ہوئے ہے ‘نہ مارشل لاءلگے گا نہ میمو ٹلے گا۔ سوئس بینک کے حکام کو خط لکھا تو بھی کرپشن ثابت ہوجائے گی نہ لکھا تو بھی چوری ثابت ہوجائے گی۔گھیرا تنگ ہورہا ہے اور فرار کی راہیںمسدود!