نااُمید ہونے کے لئے ہزاروں دلائل موجود ہیں۔ لیکن پُرامید رہنے کے لئے وجوہات تلاش کرنا پڑتی ہیں۔ پاکستان بیم ورجا کے اس دوراھے پر آگیا ہے کہ اب یہ ہمارے اوپر منحصر ہے کہ ہم پھر سے یاسیت میں ڈوب جائیں یا اپنے دماغ کو جھٹکا دیں اور امید کا ننھا سا دیا روشن کرکے آگے بڑھیں۔ یہ کہا نہیں جاسکتا کہ کب کوئی دہشتگرد کسی ہدف پر پہنچ کر خود کو اڑا دے اور میرا مﺅقف بھی ہوا میں اڑ جائے۔ لیکن ذرا ٹھہریئے۔ کیا یہ بہت بڑی اُمید افزاءبات نہیں ہے کہ گزشتہ تین ماہ کے اندر دہشت گردوں کا صفایا کرنے کے لئے عسکری اور سیاسی قوتوں نے کمال اتحاد اور یگانگت کا مظاہرہ کیا ہے۔سینکڑوں دہشت گرد پکڑے گئے ہزاروں انتہا پسندوں کے گرد گھیرا تنگ ہوا اور سپہ سالار اعظم اور ان کی ٹیم نے جس طرح افغانستان اور امریکہ کی حکومتوں کو دہشت گردی کے خلاف جنگ میں ان ممالک کی ذمہ داریوں کا احساس دلایا۔ یہ ہماری خارجہ پالیسی کے خلاف قابل فخر پہلو ہے ۔مشیر داخلہ نے بڑے اعتماد سے کہا ہے کہ سول اور ملٹری قیادت میں مکمل ہم آہنگی پائی جاتی ہے۔ استحکام پاکستان کیخلاف خطرے کی گھنٹی ہمیشہ سول ملٹری تعلقات میں دراڑ ہی رہی ہے۔اب یہ کہا جاسکتا ہے کہ پاکستان واضح سمت میں بڑی یکسوئی کیساتھ آگے بڑھ رہا ہے۔ ہمارے انتظامی اور امن وامان کے ذمہ دار اداروں ‘عسکری صلاحیت اور سیاسی سوجھ بوجھ میں بڑی تیزی کے ساتھ بہتری آئی ہے۔ اب عام آدمی پھر سے خوف کی چادر اتار کر احساس تحفظ سے سرشار ہورہا ہے۔

چنیوٹ کے نزدیک لوہے تانبے اور سونے کے ذخائر دریافت ہوئے ہیں۔ اگرچہ حزب اختلاف کے بعض رہنماﺅں نے مذاق اڑایا ہے ” کہ لوہار کو لوہا مل گیا“ اور چوہدری پرویز الٰہی صاحب نے بیان دیا کہ چنیوٹ کے ذخائر نندی پور پاور پراجیکٹ کی طرح ایک ” خواب“ ہی ثابت ہوگا ۔لیکن ملک کے نامور سائنسدانوں نے ان ذخائر کی دریافت کو حقیقت پر مبنی قرار دیا ہے۔ ان ذخائر کو پاکستان کیلئے تائید غیبی قرار دیا جارہا ہے۔ یہ بھی بتایا گیا ہے کہ تھرکول سے اس سال کے آخر میں بجلی کی پیداوار شروع ہوجائے گی۔
امید کی ایک بہت بڑی وجہ یہ ہے کہ جناب عمران خان نے اپنے صوبے میں تعمیری کاموں اور سیاسی تطہیر کے منصوبوں پر کام شروع کردیا ہے۔ بظاہر تو یہ بات غیر اہم سی لگتی ہے لیکن اگر خیبرپختونخواہ کی حکومت واقعتاً ایک ارب درخت لگا دیتی ہے تو آپ اندازہ لگا سکتے ہیں کہ دس سال کے اندر ماحول پر کتنے مثبت اثرات مرتب ہوں گے اور صوبہ کی معاشی حالت میں کس قدر بہتری آئے گی۔ صوبہ بلوچستان میں علیحدگی پسندوں کی تحریک فی الوقت دم توڑ چکی ہے۔ اور اس بات کو علیحدگی پسندوں کے حلقے بھی تسلیم کرتے ہیں۔ صوبہ کے وزیراعلیٰ نے اپنی سادہ طرز زندگی سے اپنے مخالفین کے منہ بند کردیئے ہیں اور وہاں کے بلدیاتی انتخابات کے نتیجے میں بننے والی شہری حکومتوں نے اپنے حلقوں میں کام شروع کردیا ہے۔ ابھی کل کی بات تھی کہ پاکستان کے اس صوبہ کے دارالحکومت کوئٹہ میں پاکستانی پرچم لہرانا یا یوم پاکستان منانا ایک مہیب خواب تھا۔لیکن اب نہ صرف وہاں کھلے عام یوم پاکستان منایا جاتا ہے بلکہ وہاں کے ہزاروں نوجوان افواج پاکستان میں کمیشن بھی حاصل کرچکے ہیں اور وہ دفاع وطن میں اپنی ذمہ داریاں نبھا رہے ہیں۔
کراچی میں بھتہ خوروں اور دہشت گردوں پر ہاتھ ڈالنا ایک دیوانے کا خیال دکھائی دیتا تھا۔ لیکن تمام تر سیاسی مخالفتوں‘دھمکیوں اور دھماکوں کے باوجود رینجرز اپنا کام کر رہے ہیں اور حال ہی میں کراچی کے اندر اعلیٰ سطحی اجلاس اس بات کی طرف واضح اشارہ ہے کہ وہاں ٹارگٹڈ آپریشن جاری رہے گا ۔”بندوق صرف ریاست کے پاس ہوگی“ یہ وہ منزل ہے جسے بالآخر پاکستان نے حاصل کرنا ہے اور یوں محسوس ہوتا ہے کہ مفاداتی گروہوں کی تھکاوٹ کا عمل شروع ہوگیا ہے ۔زیادہ تر روپوش ہوچکے ہیں جو بچے ہیں وہ یا تو مارے جارہے ہیں یا ابھی انہوں نے نئے بہروپ دھار لئے ہیں۔ اور قانون نافذ کرنے والے ”چیتے اور عقاب“ہر بہروپیئے کا چہرہ بے نقاب کرنے پر تیار بیٹھے ہیں۔
پنجاب میں دو ماہ قبل تک سٹریٹ کرائم انتہاﺅں کو چھو رہاتھا ۔گلی محلے میں دن دیہاڑے بندوق کی نوک پر عورتوں کے زیور چھینے جاتے تھے‘نقدی لوٹ لی جاتی تھی اور اغواءبرائے تاوان کی وارداتیں بھی زوروں پر تھیں۔ اب خبریں آرہی ہیں کہ ”سٹریٹ کرائم“ کے اس عذاب میں کمی آگئی ہے ۔پنجاب میں نو تعمیر شدہ قائداعظم سولر پارک نے کام شروع کردیا ہے۔ ملتان کا ایئرپورٹ بھی فعال ہوگیا ہے اور جنوبی پنجاب میں تعمیراتی اور روزگار پیدا کرنے والے منصوبے فائلوں سے نکل کر زمین پر شکل پانا شروع ہوگئے ہیں۔
ہمارے ایک وفاقی وزیر نے سعودی عرب کے حوالے سے ایک بے بنیاد بیان داغ دیا اور بعد میں اس بیان سے مکر گئے لیکن سچی بات یہ ہے کہ ان کے اس بیان کا حوالہ دے کر مخصوص لابی کے بعض کالم نویسوں ‘دانشوروں اور اینکروں نے آسمان سر پر اٹھا لیا تھا۔ یہ جانے بغیر کے پاکستان اور سعودی عرب کے تعلقات میں معمولی سے تلخی بھی نہ صرف پاکستان اور سعودی عرب کے لئے بلکہ پوری امت مسلمہ کے لئے خطرناک ہوگی۔ یہ تو قدرت نے فیصلہ دیا اور آج سعودی عرب شاہ سلیمان کی کمان میں ہے ۔آج کی سعودی حکومت پاکستان سے اتنی ہی محبت کرتی ہے جتنا کہ کوئی پاکستانی اپنے ملک سے محبت کرسکتا ہے ۔سعودی بادشاہ کی طرف سے پاکستان کے حکمرانوں کو اپنے ہاں بلانا اور بادشاہ کا ایئرپورٹ جا کر وزیراعظم پاکستان کا استقبال کرنا پاکستانیوں کے لئے بہت بڑی خوشخبری ہونا چاہیے۔ میرے پاس ایسی معلومات ہیں جن کی بنیاد پر میں کہہ سکتا ہوں کہ جلد ہی سعودی عرب کی طرف سے پاکستان میں بڑی سرمایہ کاری ہوگی اور سعودی عرب میں پاکستانیوں کے لئے ہمدردانہ ماحول پیدا ہوجائے گا۔عالمی امور میں ان دونوں ممالک کی باہمی مشاورت سے پاکستان کی اہمیت بڑھے گی۔
ایران کے ساتھ ”پائپ لائن “اور ”جند اللہ“ کے معاملات پر جو تلخیاں جنم پا رہی ہیں وہ بھی خوش اسلوبیوں میں تبدیل ہونے لگی ہیں اور جند اللہ کے سربراہ کی گرفتاری سے ایک بڑا ”بریک تھرو“ ہوا ہے ۔پاکستان کا ہمیشہ سے یہ موقف رہا ہے کہ ایٹمی مسئلہ پر ایران پر پابندیاں اسی معاملے کو بگاڑیں گی۔ یہ معاملہ بات چیت سے حل ہونا چاہیے۔ پاکستان کے اس موقف کی تائید ہورہی ہے ۔سعودی عرب نے بھی اپنے مﺅقف میں نرمی پیدا کر لی ہے اور اُمید یہی ہے کہ اپریل کے آخری ہفتے میں امریکہ کا ایران سے مجوزہ معاہدہ طے پاجائے گا اور پاکستان پر ایک برادر ہمسایہ ملک کی طرف سے شکوک وشبہات کا سلسلہ رک جائے گا۔
افغانستان میںکئی دیہائیوں کے بعد پاکستان کے مﺅقف کو سمجھنے والی حکومت برسراقتدارآئی ہے۔آج کا افغانستان اگر پاکستان دوست نہیں تو دشمن بھی نہیں ہے۔ خصوصاً دہشتگردانہ کارروائیوں کے حوالے سے کم از کم افغان صدر پوری طرح یکسو ہیں۔گوکہ وہاں ایک متوازن حکومت بھی چل رہی ہے جو پاکستان کی سابقہ پالیسیوں کے باعث اپنی سابقہ پالیسی پر کاربند ہے لیکن آرمی چیف کا کابل بار بار جانا خیروبرکت کا سبب بنے گا۔افغان طالبان کے حوالے سے بڑے مضبوط اور مثبت اشارے مل رہے ہیں ۔اگر مذاکرات ہوجاتے ہیں اور طالبان بھی حکومت میں کسی طور شامل ہوجاتے ہیں تو پھر افغانستان داخلی طور پر مستحکم ملک بن جائے گا اور پاکستان کو مغرب کی طرف سے درپیش مشکلات میں کمی آجائے گی۔
بھارتی سرکار کا بچپنا ابھی برقرار ہے۔ وہ جہاں اسلحہ کی دوڑ میں سرپٹ دوڑے جارہی ہے وہیں پاکستان مخالف کارروائیوں کو بھی ہوا دے رہی ہے۔ یہ پاکستان کے لئے ایک اعصابی حملہ ہے۔ اس حملے کا جواب بھی سفارتی سطح پر دیا جاسکتا ہے۔پاکستان نے اس محاذ پر کبھی بھی کوئی پیش رفت نہیں دکھائی۔ اور اب یہ آوازیں اٹھنا شروع ہوگئی ہیں کہ جس ملک کا کوئی مستقل وزیر خارجہ ہی نہ ہو اس کی وزارت خارجہ کیا کارکردگی دکھائے گی۔ پاکستان کے لئے آنے والے سال دو سال بڑے ہی قیمتی ہیں۔داخلی طور پر استحکام رہے گا۔آئی ڈی پیز واپس جارہے ہیں۔افغان مہاجرین کی واپسی کا عمل شروع ہے۔مذہبی طبقات کے ساتھ موافقت کی فضاءپیدا کرنے کی سر توڑ کوششیں ہورہی ہیں۔بجلی کی پیداوار‘ برآمدات میں اضافہ اور روزگار کی سکیمیں حکومت کی اولین ترجیح ہونی چاہیں۔پاکستان کی خوش بختی ہے کہ چین اس ملک میں بہت بڑی سرمایہ کاری کرنے جارہا ہے۔ بلوچستان کی ناعاقبت اندیش اسمبلی نے گوادر کاشغر روڈ کے معاملے میں بعض رکاوٹیں کھڑی کی ہیں۔لیکن میاں نوازشریف کی ایک صلاحیت کو دشمن بھی مانتے ہیں۔ وہ روٹھے ہوﺅں کو منانے کی خداداد صلاحیت سے مالا مال ہیں۔امید ہے کہ روٹ کے فروعی جھگڑے اس عظیم سرمایہ کاری کو روک نہیں پائےں گی۔
تُرکی پاکستان کا بلاشک وشبہ مخلص دوست ہے۔ تُرکی کے ترقیاتی تجربات سے پنجاب میں فائدہ اٹھایا جارہا ہے ۔بعض تجزیہ کار پاکستان اور تُرکی میں بڑھتی ہوئی قربتوں کیخلاف بھی شیطانی فلسفے سامنے لارہے ہیں۔اس وقت ترکوں پر شک کرنا پاکستان کے خلاف دشمنی کے مترادف ہوگا۔ حکومتی میڈیا منیجرز کی آزمائش ہے کہ وہ ایسے تمام میڈیائی حملہ آوروں سے ہوشیار رہیں اور انہیں ملاقات اور دلائل سے بے اثر کردیں۔
پاکستان کی قیمتی معدنیات کے بارے میں عالمی اداروں کی رپورٹس موجود ہیں۔پاکستان کے اسلحہ ساز ادارے کمال دکھا رہے ہیں۔ میزائل ٹیکنالوجی میں حیران کن ایجادات سامنے آرہی ہیں۔ قومی خزانے میں ہدف کے مطابق ڈالرز موجود ہیں۔زرمبادلہ کے ذخائر میں کمی کی بجائے اضافہ ہورہا ہے ۔روپے کی قیمت مستحکم ہے اور پٹرول کی قیمتوں میں کمی نے ملکی معیشت کو استحکام بخشا ہے ۔ عوامی ضرورت کی اشیاءکی قیمتوںمیں اگرچہ کوئی خاطر خواہ کمی تو نہیں ہوئی لیکن اضافہ بھی دیکھنے میں نہیں آیا۔ ایل۔ این۔ جی کی فراہمی سے ایندھن کی کمی پر قابو پانے میں مدد کی امید ہے۔
غرض تلاش کرنے سے ایسی ہزاروں نشانیاں موجود ہیں جن سے اُمید کا چراغ روشن ہورہا ہے۔ 23مارچ کو فوجی پریڈ ہمارے اس چراغ کو مزید روشن کردے گی۔

پٹرول بحران کے دوران تجزیہ نگاروں نے بحران کے اسباب بیان کرتے ہوئے کہا کہ حکومت کے اہم عہدوں پر میاں محمد نواز شریف نے اپنے رشتہ داروں کونواز رکھا ہے اس لئے وہ کسی ذمہ دار کو سزا نہیں دے سکتے۔ ایک مﺅقر انگریزی اخبار نے لکھا کہ امور مملکت تین شخصیات کے ہاتھوں میں ہیں۔ وفاقی وزیر خزانہ جناب اسحاق ڈار اور پنجاب کے وزیراعلیٰ جناب شبہاز شریف کلی طور پر بااختیار ہیں اور تیسرے ظاہر ہے خود میاں محمد نوازشریف ہیں۔ رپورٹ میں کہا گیا ہے کہ وزراءاپنی ماتحت وزارتوں میں صرف ”ربڑ سٹیمپ“ کا کام کرتے ہیں کیونکہ سیکرٹری اور ایم ڈی براہ راست مذکورہ شخصیات سے ہدایات لیتے ہیں۔ قومی امور میں اسحاق ڈار کو ویٹو کا حق ہے۔ باقی وزراءاسحاق ڈار کی ”نظر کرم“ کے منتظر رہتے ہیں۔ اخبارات میں بڑے بڑے عہدوں پر متمکن افراد کی فہرست بھی دے دی گئی ہے جو بالواسطہ یا بلاواسطہ طور پر شریف خاندان کے نمک خوار اور وفادار ہیں۔سوال اُٹھایا گیا ہے کہ جو افسران ریاست کی بجائے ایک خاندان کے وفادار ہوں وہ بحران سے کیسے نپٹ سکتے ہیں؟۔اگر یہ مان لیا جائے کہ اہم کلیدی عہدوں پر شریف خاندان کے نمک خوار بیٹھے ہیں تو پھر یہ کیسے نمک خوار ہیں جو میاں صاحب کے لئے آئے روز کوئی نہ کوئی بحران پیدا کرتے رہتے ہیں ۔ہونا تو یہ چاہیے کہ کسی قسم کا بحران پیدا ہی نہ ہو۔کُنبہ پروری ایک فطری عمل ہے۔ جہاں بادشاہت ہوتی ہے وہاں کُنبہ پروری بھی ہوتی ہے۔ نظام چاہے جمہوری ہو یا آمریت ہو۔ حکمران کا اصل امتحان یہ ہے کہ وہ اپنے اہل ترین قریبی لوگوں کو اقتدار میں شامل کرے نہ کہ نااہل رشتہ داروں کی فوج بھرتی کرلے۔پاکستانی جمہوریت میں پارٹی بھی ایک خاندان ہوتا ہے کیوں الیکشن کے لئے انہی لوگوں کو ٹکٹ ملتے ہیں جن کی وفاداری کسی بھی شک و شبہ سے بالاتر ہوتی ہے۔
پٹرول بحران کی تحقیق اور انکوائری سامنے آچکی ہے۔اوگرا پر ملبہ ڈال دیا گیا ہے۔ہوسکتا ہے کہ واقعتا اوگرا کے چیئرمین کی چالاکی ہو۔لیکن لوگوں کی زبان پر یہ جملہ عام ہوگیا ہے کہ پٹرول کے وزیر شاہد خاقان عباسی کی خاطر پٹرولیم سیکرٹری سمیت تین چار اعلیٰ افسران کی قربانی دی گئی ہے۔اسحاق ڈار صاحب نے پٹرول بحران کو سازش قرار دیا ہے۔ اس سازش کو وفاقی وزیر بجلی و دفاع جناب خواجہ آصف نے از خود بے نقاب کیا۔ انہوں نے اعتراف کیا کہ پٹرول بحران میں ان کی وزارت کا بھی حصہ ہے۔171 ارب روپے کی پی ایس او کو ادائیگی نہیں کی گئی جس کی وجہ سے بروقت پٹرول درآمد نہیں کیا جاسکا۔
رازدان حلقے یہ بتا رہے ہیں کہ وقتی طور پر ٹل جانے والا یہ بحران اب کسی نئی شکل میں سامنے آئے گا۔عملاً صورتحال یہ ہے کہ نوے فیصد ایم این اے اور ایم پی اے میاں صاحب کے طرز حکمرانی سے سخت نالاں ہیں۔حلقے کی ترقی کے لئے جو فنڈز درکارہیں وہ جاری نہیں کئے جارہے۔وزیروں کو اختیارات نہیں سونپے جارہے۔ریاض پیرزادہ نے اپنی ناراضگی کا خوب اظہار کیا ہے۔انہوں نے پاک سعودی برادرانہ تعلقات پر آہنی ضرب لگا دی ہے۔ بہت سے ایم۔این۔اے اور وزراءنجی محفلوں میں بڑے بڑے سکینڈلز طشت ازبام کرتے پائے گئے ہیں ۔نندی پور پاور پلانٹ اور پاک چین چالیس ارب ڈالر کے معاہدوں کے حوالے سے بڑے انکشافات ہونے والے ہیں۔حکومت نے بڑی کوشش کی کہ دہشت گردی کے خلاف جنگ میں مسلم لیگ (ن) کے پارٹی عہدیداران بھی میدان میں اُتریں اور رائے عامہ ہموار کریں لیکن ان کی اکثریت حکومتی اقدامات سے لاتعلق ہوگئی ہے۔ مریم نوازشریف کو یُوتھ پروگرام سے عمران خان کے دباﺅ پر ہٹا دیا گیا تھا۔تحریک انصاف کا دباﺅ بظاہر کم ہوگیا ہے لیکن نوازشریف کی پارٹی کے اندر ایک خطرناک بھونچال تیار ہورہا ہے۔ میاں نوازشریف کو وزراءکے ساتھ ملاقاتوں کے دوران اس بھونچال کے بارے میں قیمتی معلومات ملی ہیں۔ میاں صاحب کے سامنے پوری تصویر بڑی واضح ہے۔کیا وہ اپنے رشتہ داروں کے خوف یا احترام میں مبتلا رہیں گے یا گڈ گورننس کے تقاضوں کو پورا کرتے ہوئے اپنے نااہل ساتھیوں سے چھٹکارا پاسکیں گے۔ خاندانی سیاست میں پھول بھی ہیں اور کانٹے بھی ۔دیکھئے میاں صاحب کس کا انتخاب کرتے ہیں!

ہوسکتا ہے کہ نیت ٹھیک ہو۔لیکن اہلیت بہرحال نہیں ہے۔ حکمران قوم کو کوئی واضح جواب دینے کی بجائے ایک دوسرے پر الزامات لگا رہے ہیں۔ پٹرول بحران کے پیٹ سے بجلی بحران بھی باہر نکل آیا ہے۔ماہرین معیشت مشکل اصطلاحات کے ذریعے عوامی ذہنوں کو پراگندہ کر رہے ہیں۔پٹرول پمپوں پر عورتوں کے ہجوم‘ہاتھ میں بوتلیں ‘پہلو میں بچے۔ظلم کی ایک یہ شکل باقی رہ گئی تھی وہ تجربہ کاروں کے ہاتھوںدیکھنے کو مل گئی ہے۔پٹرول روٹی نہ سہی لیکن روٹی کمانے کا ذریعہ تو ہے۔پاکستان کے منظرنامے میں یہ نظارے بھی شامل ہوگئے کہ دولہا اپنی بارات گدھا گاڑیوں پر لےجاتے دیکھے گئے۔ شدید سردی کے عالم میں پٹرول کے انتظار میں کھلے آسمان تلے رات گزارنے کا تکلیف دہ تصور ہی رونگٹے کھڑا کردیتا ہے۔لیکن وزیر پٹرولیم‘ پی ایس او‘وزارت خزانہ سب کے سب وزیراعظم نوازشریف کی موجودگی میں ”میری ذمہ داری نہیں“ کی رٹ لگاتے سنائی دیئے۔ عوام فقیروں کی طرح خوار ہوتے رہے۔ اعصاب شل ہوگئے۔پاکستانیوں نے ایک بار پھر سوچنا شروع کردیا ہے کہ آیا یہ مُلک رہنے کے قابل بھی ہے یا نہیں۔ میڈیا پورے زور وشور سے چیخ رہا ہے۔حکمران جماعت کے وزراءشرمندگی محسوس کرتے ہیں۔ٹی وی پر آکر معذرت کرتے ہیں لیکن عوام کی تکالیف بڑھتی جارہی ہیں۔
وزیراعظم کے ترجمان جناب ڈاکٹر مصدق ملک بڑے ہی سمجھدار ‘ حوصلہ مند اورٹھنڈے مزاج کے شخص ہیں۔ایک معروف ٹی وی چینل کے پروڈیوسر رانا کاشف محمود نے راقم کو بھی اپنے پروگرام میں مدعو کیا ۔ میرا خیال تھا کہ ترجمان صاحب عُذر گناہ کی بجائے گناہ کا اقرار کرےں گے۔لیکن انہوں نے ناظرین کو معاشی جھمیلوں میں الجھانے کی کوشش کی۔مجھے پاکستان اکانومی واچ جیسا معتبر ادارہ چلاتے دس برس ہوچکے ہیں۔بڑے بڑے ماہرین اقتصادیات سے ملک کے معاشی نظام پر گفتگو ہوتی ہے۔میرا اپنی تعلیمی پس منظر اور تجربہ بھی معاشی شعبے سے متعلق ہے۔پاکستان کے نام نہاد اقتصادی ماہرین اقتصادی اصطلاحات‘ حقائق اور اشاریے بڑے دلکش انداز میں ترتیب دیتے ہیں۔لیکن عوام کو ان گورکھدھندوں سے کیا غرض ہے۔ غریب کے لئے چاند بھی روٹی کی شکل اختیار کر لیتا ہے۔میں نے عرض کی کہ حکمرانوں کی نیت ٹھیک نہیں اور جب نیت ٹھیک نہ ہو تو پھر اہلیت بھی کسی کام نہیں آتی۔ سیاسی اخلاق یہ نہیں کہ آپ لفظی ادب و آداب کا مظاہرہ کریں بلکہ اصل سیاسی آداب یہ ہیں کہ عوام کو تکلیف میں مبتلا کرنے والے افراد کو قرار واقعی سزا دی جائے اور وزارتوں کے سربراہ کو مثال قائم کرتے ہوئے اپنے عہدے سے اس وقت تک الگ ہوجانا چاہیے جب تک انکوائری میں اصل ذمہ داروں کا تعین نہیں ہوجاتا۔ محض جھوٹے بول کر وقت ٹالنے سے معاملات سُدھر نہیں سکتے۔بلکہ دھیرے دھیرے رہا سہا اعتماد بھی ختم ہوجاتا ۔ اور حکمران اور ان کے ترجمان منافق دکھائی دینے لگتے ہیں۔ حدیث مبارکہ میں منافق کی چار نشانیاں بتائی گئی ہیں۔جن میں سے تین یہ ہیں وہ جب بات کرے تو جھوٹ بولے‘ جب وعدہ کرے تو توڑ دے اور جب امانت رکھی جائے تو اس میں خیانت کرے۔ڈاکٹرمصدق ملک سے میں نے کہا کہ آپ بتا دیں کہ جن لوگوں میں یہ خامیاں پائی جائیں ان کے بارے میں لوگ کیا کہیں گے؟ اس پر ملک صاحب غصے میں آگئے اور کہنے لگے کہ آپ کو معیشت اور اقتصادیات کا علم ہی نہیں۔اور آپ قرآن اورا سلام کا سہارا لے کر موضوع سے ہٹ رہے ہیں۔
عرض کی کہ میں عوام کی معیشت کی بات کرتا ہوں کیونکہ حکمرانوں کی معیشت تو ہر سال بہتر ہوجاتی ہے ۔اسلام اور قرآن کی دی ہوئی ہدایات کی روشنی میں جو معاشی ذہن ترتیب پاتے ہیں وہی عوام الناس کی معیشت کو بہتر بنا سکتے ہیں۔اگر اللہ اور رسول کو نکال دیں تو باقی صرف لوٹ مار بچ جاتی ہے جو کہ جاری ہے۔آپ بتا دیں کہ پٹرول پمپوں پر ذلیل وخوار ہوتے عوام ایک دوسرے کو مرنے مارنے پر تُل گئے ہیں۔کیا ان کو اس ذہنی کیفیت تک پہنچانے والے دہشت گرد نہیں ہیں۔آپ تو سارے تجربہ کارلوگ ہیں اور یہ ظلم آپ کی تجربہ کاری کے سبب ہورہا ہے۔
ہلال احمر پاکستان کے چیئرمین ڈاکٹر سعید الٰہی ایک ٹی وی چینل پر پروگرام بھی کرتے ہیں ۔دوست ہیں اور محبت کرتے ہیں۔انہوں نے ”ڈی ایس این جی“ گاڑی بھجوا کر اسی موضوع پر لائیو کمنٹس لئے۔ میں نے عوام کی تشویش سے انہیں بھی آگاہ کردیا۔میرا مﺅقف ہے کہ پٹرول کے بحران نے حکومت کے گڈگورننس کے دعوﺅں کی قلعی کھول دی ہے۔ملک کے نصف سے زیادہ آبادی اور معیشت بحران سے بری طرح متاثر ہوئی ہے مگر حکومت اب بھی سنجیدہ نہیں۔

کسی بھی معاشرے اور تہذیب میں جب تک خیر کی قوتیں غالب رہتی ہیں معاشرے تباہ نہیں ہوتے ۔بداطمینانی نہیں پھیلتی اور انتشار گلی کوچوں میں ننگا نہیں ناچتا ۔ملک ،سلطنت اقتدار اور اختیار یہ وہ انعامات ہیں جو فطرت خوش ہوکر کسی قوم ،گروہ یا فرد کیلئے ممکن بنادیتی ہے ۔لیکن جہاں یہ انعامات ہیں وہیں آزمائش بھی ہوتی ہے ۔پاکستان ،ایک نیا ملک ،ایک انعام تھا لیکن ہم نے اپنے زندہ ضمیروں کو ہوس اور لالچ کے ہتھوڑے مارمارکر ادھموا کردیا اور آج یہی انعام ہمارے لئے بہت بڑی آزمائش بن چکا ہے ۔جب گھر کے باسیوں کو اپنے گھر کے درودیوار سے خوف آنے لگے تو اس سے بڑی آزمائش کیا ہوگی ۔دانشور اور غم خوار حلقے ہمیں کسی بڑے قومی حادثے سے بچانے کیلئے نت نئے فارمولے اور حل پیش کرتے ہیں ۔کوئی گڈ گورنس کی بات کرتا ہے ۔کسی کو صدارتی طرز حکومت میں مسائل حل ہوتے دکھائی دیتے ہیں ،کئی مغربی جمہوریت ہی کو کامل حل ثابت کرتے ہیں ۔کسی کا خیال ہے کہ سخت ترین قانون ہمیں شیطانی بیماریوں سے نجات دلاسکتا ہے ۔کسی کو تمام مسائل کی جڑ فوجی اقتدار دکھائی دے رہا ہے ۔کوئی اسلامی انقلاب کا جھنڈا لہرانے میں نجات کی امید لگائے بیٹھا ہے ۔غرض جتنے ذہن ہیں اتنے ہی فارمولے گردش کررہے ہیں ۔پاکستان اس وقت عملی طورپر تیسری دنیا کا چوتھے نمبر کا ملک ہے جس میں ہر تخریبی قوت ،ہر منفی جذبہ اور ہر شیطانی حربہ پوری طاقت اور قوت کیساتھ پھل پھول رہا ہے ۔شرکے مقابلے میں خیر دبکا بیٹھا ،منتظر فردا ہے ۔!وہ کونسا جذبہ ہے جو ہمیں جھوٹ بولنے سے روکے گا ۔جو ہمیں ذخیرہ اندوزی سے بازرکھ سکتا ہے ۔ہم کیوں ہوس پرستی چھوڑیں ۔کس کی خاطر بدعنوانی دھوکہ دہی ،بُغض وعناد سے باز رہیں ؟منافقت ترک کریں ؟ایک دوسرے کو روند ڈالنے کی روش ترک کرنے سے کیا حاصل ہوگا ؟۔ضمیر کو جگاڈالنے کا فائدہ کیا ہے ؟نت نئی فریب کاریاں کس کی خاطر چھوڑ دی جائیں ؟۔یہی وہ سوالات ہیں جو ہمیں بحیثیت قوم تذبذب میں مبتلا رکھتے ہیں اور ہم اپنی اس جنت نظیر سرزمین کو شیطانی جذبوں کے سبب جہنم زار بنارہے ہیں ۔کوئی قانون ۔کوئی ضابطہ ،کوئی اتھارٹی ،کوئی خوف اور کوئی شوق ہمیں اس وقت تک راہ راست پر نہیں لاسکتا جب تک ہم بحیثیت قوم اللہ تعالیٰ کی طرف سے زندگی کے آغاز اور انجام کے بارے میں ارشاد فرمائے گئے احکامات پر کامل یقین پیدا نہیں کرتے ۔ارشاد ہوتا ہے ۔
”اہل کتاب اور مشرکین میں سے جن لوگوں نے کفر کیا وہ یقیناجہنم کی آگ میں جائیں گے اور ہمیشہ رہیں گے۔ اللہ ان سے راضی اور وہ اپنے رب سے راضی ہوئے۔ یہ سب اس کےلئے ہے جس نے اپنے رب کا خوف کیا ہو“(البینہ)۔”پس جس نے ذرہ برابر نیکی کی ہوگی وہ اسے دیکھ لے گا اور جس نے ذرہ برابر برائی کی ہوگی وہ اسے دیکھ لے گا“(الزلزال)۔
جب مجھے یقین ہوگا کہ مجھے دنیا میں کئے گئے ہر عمل کا روز محشر حساب دینا ہے تو میں کسی سماجی قانون ،کسی داروغے کے نہ ہوتے ہوئے بھی خیر پر کار بند رہوں گا ۔جب مجھے یقین ہوگا کہ شیطانی قوتوں کے تابع کئے گئے افعال مجھے دہکتی آگ میں جلائیں گے تو مجھے میرے اندر کا انسان برائیوں سے روکے گا ۔جب مجھے یقین ہوگا کہ رزق حلال کمانے سے مجھے جنت ملے گی جس میں میرے وہم وگمان سے بھی کہیں زیادہ نعمتیں مختص ہوں گی تو پھر میں چند اضافی ٹکوں کے عوض کسی کا حق نہیں ماروں گا ۔زندگی بعد از موت ،جنت کا شوق اور دوزخ کا خوف ،اللہ کی دوستی میں پختہ یقین اور اعمال نامے کی خوبصورتی ،یہی وہ ایمان ہے یہی قرآنی تعلیمات ہیں جو ہر مذہب ،ہر عقیدے میں تھوڑی بہت تبدیلیوں کے ساتھ ایک جیسے ہیں ۔اگر آج کا پاکستانی اپنے اپنے عقیدے کے مطابق الہامی تعلیمات پر کاربند ہوجائے تو شر کے ہاتھوں مغلوب یہی سولہ کروڑ انسان خیر کی بہت بڑی قوت بن جائیں گے ۔جب تک اکائی سیدھی نہیں ہوتی ،اجتماعیت ٹیڑھی ہی رہے گی ۔اصلاح احوال کا واحد حل صالحیت میں ہے اور انسانی دل ودماغ زیادہ دیر تک صالح اعمال سے دور نہیں رہ سکتے ۔اس لئے میرا ایمان ہے کہ پاکستان کے تمام مسائل کا حل اب بھی ممکن ہے ۔شرط یہ ہے کہ ہرپاکستانی قرآن کی فطرتی تعلیمات سے جڑ جائے ۔اگر کوئی عیسائی ہے تو وہ حضرت عیسیؑ کی آفاتی ہدایات پر عمل کرکے کسی مذہب اور عقیدے نے جھوٹ کو نیکی قرار نہیں دیا ،ظلم کو جواز نہیں بخشا ،خیانت کو صلاحیت نہیں کہا ۔انسان دشمنی کو بہادری قرار نہیں دیا ۔کرپشن کو عزت کا موجب نہیں ٹھہرایا ۔ہم جان بوجھ کر اپنے ضمیر کو سلادیں اور قرآن وسنت سے دور ہوجائیں اور پھر ناکامیوں کا واویلا کریں تو اس سادگی پر شیطان بھی قہقے لگائے گا اور چیخ چیخ کر کہے گا ۔
حیرت ہوتی ہے مجھے اس حضرتِ انسان پر
اعمال بد تو خود کرے، لعنت کرے شیطان پر
اپنے مرکز سے اگر دور نکل جاﺅ گے
خواب ہو جاﺅ گے افسانوں میں ڈھل جاﺅ گے
اپنی مٹی پہ ہی چلنے کا سلیقہ سیکھو
سنگ مر مر پہ چلو گے تو پھسل جاﺅ گے
دے رہے ہیں جو لوگ تمہیں رفاقت کا فریب
ان کی تاریخ پڑھوگے تو دہل جاﺅ گے
تیز قدموں سے چلو اور تصادم سے بچو
بھیڑ میں سست چلو گے تو کچل جاﺅ گے

آپ اپنے گھر سے سکیورٹی آلارم کو ہٹا دیجئے یا اس کی تاریں کھینچ دیں تو پھر واردات کرنے والوں کو کوئی خطرہ نہیں رہتا ۔نہ آلارم بجے گا نہ آپ جاگیں گے ۔نہ اپنے مال واسباب کا تحفظ کرسکیں گے ۔نفسیاتی ماہرین کا کہنا ہے کہ انسان کو اگر مسلسل ایک ماہ تک کسی واقعہ پر ضمیر نہ جھنجھوڑے تو سمجھئے کہ انسان کا ضمیر سورہا ہے ۔یعنی الارم کا کنکشن کٹ گیا ہے ۔حقیقت یہ ہے کہ ضمیر کبھی نہیں سوتا ۔دراصل انسان اپنے کان بند کرلیتا ہے ۔طیش اور عیش انسانی دل ودماغ کی دوایسی حالتیں ہیں جن میں مبتلا ہوکر انسان اپنے جاگے ہوئے ضمیر کو بار بار سلانے کی پریکٹس کرتا ہے ۔شیطان کی جیت کا یہ عجب منظر ہوتا ہے ۔یہ وہ حالت ہوتی ہے کہ انسان خود اپنے آپ کو ماررہا ہوتا ہے ۔وہ اس قدر شقی القلب ہوجاتا ہے کہ اپنی زندگی کے سب سے بڑے محافظ یعنی ضمیر کو اپنے ہاتھوں سے بے بس کردیتا ہے ۔ایسی حالت سے نکلنے کیلئے ہی عقیدے اور ایمان کی ضرورت پڑتی ہے ۔خالق کائنات نے مردہ ضمیر انسانوں کو جگانے اور واپس فطرت کی طرف لوٹانے کیلئے اپنے پسندیدہ انسانوں یعنی پیغمبروں کے ذریعے زندگی کی گائیڈ بکس اتاری ہیں ۔ارشادرباّنی ہے ‘۔”اے نبی ﷺ ہم نے تم کو شہادت دینے والا ،بشارت دینے والا اور خبردار کردینے والا بناکر بھیجا ہے تاکہ اے لوگو تم اللہ اور اس کے رسول پر ایمان لاﺅ،اس کے رسول کا ساتھ دو اس کی تعظیم وتوقیر کرو اور صبح شام اللہ کی تسبیح کرو۔“(سورة فتح)مذہب ،دین اور ایمان یہ کوئی ایسی غیر ضروری یا نمائشی اشیاءنہیں ہیں جنہیں انسانی زندگی کو محض زیبا بنانے کیلئے اتارا گیا ہو ۔زندگی کی گاڑی کو کامیابی کی پٹڑی سے نہ اترنے دینا اور متعین وقت میں منزل تک پہنچا دینے کیلئے ضمیر کافی ہے لیکن چونکہ انسان اس آلارم کو جان بوجھ کر سلادیتا ہے اس لئے اسے واپس پٹڑی پر لانے کیلئے الہامی ہدایات کی ضرورت ہوتی ہے ۔جس طرح کار بنانے والے کو علم ہے کہ کار کا مینوئل کیا ہوگا ۔اسی طرح انسان کے خالق کو علم ہے کہ انسان کی کامیابی کیلئے کون کون سی حدود وقیود اور کس طرح کی احتیاطی تدابیر کی ضرورت ہوگی ۔خالق کائنات نے بڑی محنت ،انتہائی محبت اور بے پناہ چاہت کیساتھ وحی کے ذریعے ہر امت ہر گروہ کیلئے ہدایات نازل فرمادی ہیں ۔ارشاد رباّنی ہے
”یہ بڑی بابرکت کتاب ہے جو تمہاری طرف نازل کی گئی ہے تاکہ یہ لوگ اس کی آیات پر غور کریں اور عقل وفکر رکھنے والے اس سے سبق حاصل کریں۔“(سورة ص)”بے شک یہ قرآن اس راستے کی رہنمائی کرتا ہے جو بالکل سیدھا ہے اور ان ایمان والوں کو جو نیک اعمال کرتے ہیں اس بات کی بشارت دیتا ہے کہ ان کےلئے بہت بڑا اجر ہے اور جو لوگ آخرت پر ایمان نہیں رکھتے ہم نے ان کیلئے دردناک عذاب تیار کر رکھا ہے۔“(بنی اسرائیل)
”آپ صلی اللہ علیہ وآلہ وسلم تو صرف خبردار کرنے والے ہیں۔ہم نے آپ کو حق دے کر خوشخبری بنانے والا اور خبردار کرنے والا بنا کر بھیجا ہے اور کوئی امت ایسی نہیں ہوئی جس میں کوئی خبردار کرنے والے نہ گزرا ہو۔ اگر یہ لوگ آپ کو جھٹلا دیں تو جو لوگ ان سے پہلے ہو گزرے ہیں انہوں نے بھی جھٹلایا تھا ان کے پاس بھی ان کے پیغمبر معجزے اور صحیفے اور روشن کتابیں لے کر آئے تھے۔“(سورة فاطر)۔
”قریب ہے کہ (جہنم) غصے کے مارے پھٹ جائے جب کبھی اس میں کوئی گروہ ڈالا جائیگا اس سے جہنم کے داروغے پوچھیں گے کہ کیا تمہارے پاس کوئی خبردار کرنے والا نہیں آیا تھا؟ وہ جواب دیں گے کہ بے شک آیا تھا لیکن ہم نے اسے جھٹلایا اور ہم نے اللہ تعالیٰ نے کچھ بھی نازل نہیں کیا۔ تم بہت بڑی گمراہی میں ہو اور کہیں گے کہ اگر ہم سنتے ہوتے تو یا عقل رکھتے ہوتے تو دوزخیوں میں نہ ہوتے۔“

ایسا کبھی ہوا نہیں کہ دنیا سے شر مکمل طورپر ختم ہوگیا ہو۔انسان کے اندر شر کی قوتیں خیر کی طاقتوں سے ہمیشہ نبردآزما رہتی ہیں ۔آپ اسے حضرت انسان کی فطرت کہہ سکتے ہیں ۔ان شرانگیز طاقتوں کو آپ نیگیٹیو فورسز کا عنوان دے سکتے ہیں ۔قرآن انہیں شیطانی طاقتوں کا نام دیتا ہے ۔ہر منفی سوچ ،ہر تخریبی تصور ہر انسان دشمن منصوبہ ،ہرابلیسی حربہ چاہے اس کا محل وقوع انسان کی اپنی ذات ہو ،اس کا ماحول ہو،ملک ہویاسرزمین ہو ،شیطان ہی کی کارستانی قرار پائے گی۔ہوس لالچ،ظلم ،استبداد ،بدعنوانی ،بدامنی،بد عہدی ،بے وفائی ،دھوکہ دہی ،نوسر بازی ،بزدلی ،منافقت،ہیجان انگیزی ،خیانت،جھوٹ ،فراڈ ،بے ادبی ،فریب کاری ،بعض وعناد،انا پرستی ،چوری ،ڈاکہ زنی ،قتل وغارت اور وحشت وبربریت یہ تمام وہ بیماریاں ہیں جنہیں شیطان نے ایجاد کیا ہے اور وہ کمال ہوشیاری کیساتھ انسانی دل ودماغ میں ان کی پیوندکاری کرتا ہے اور انسان کو شرکے راستے پر ڈال دیتا ہے ۔تشکک اور بے یقینی ،مایوسی اور غفلت جیسے ہتھیاروں سے مسلح ہوکر شیطان جب حملہ آور ہوتا ہے تو بڑے بڑے پختہ عزم انسان ریت کا ڈھیر ہوجاتے ہیں ۔شیطان کا تصور ہر مذہب اور عقیدے کے پیروکاروں میں اپنے اپنے ناموں اور حوالوں سے موجود ہے ۔قرآن نے اس تصور کو بڑے بلیغ پیرائے میں بیان فرمایا ہے ۔”بے شک شیطان تمہارا کھلا دشمن ہے تم بھی اسے دشمن سمجھو“ حدیث نبوی ہے ‘
”شیطانی وسوسے تمہارے وجود میں خون کی طرح گردش کرتے ہیں “لیکن فطرت نے انسان کو شیطان کے مقابلے میں تنہاءنہیں چھوڑا ،یہ ہرگز نہیں کہ انسان شیطان کے مقابلے میں بے بس پیدا کیا گیا ہے ۔خالق نے انسان کو پیدا کرتے وقت پانچ چھ فٹ قد کے اس جسم کے اندر ہی وہ آلہ لگادیا ہے جو انسان کو قدم قدم پر آگاہ کرتا ہے کہ تم اب شیطانی قوت کے زیر اثر آرہے ہو۔جس طرح گاڑی اوورسپیڈ ہونے پر سرخ رنگ کی بتی اور آلارم بجنے شروع ہوجاتے ہیں اسی طرح انسان کے اندر ضمیر نام کا ایک آلارم بجنا شروع ہوجاتا ہے ۔غافل سے غافل انسان بھی یہ نہیں کہہ سکتا کہ اسے اچھائی اور برائی میں تمیز نہیں ہے ۔وہ جنگل میں رہتا ہو ۔یا بازاروں کے شورشرابے میں زندگی بسر کرتا ہو،حرف شناس ہویا ان پڑھ ۔رنگ ،نسل ،زبان اور عقیدے کی تفریق کے بغیر جوروح بھی لباس فطرت میں ڈھلی ہے اسے ضمیر کا آلہ لگاکر بھیجا گیا ہے ۔ارشاد ہوتا ہے ‘
”ہم نے انسان کو پیدا کیا اور جانتے ہیں اس کا نفس جن وسوسوں سے دو چار رہتا ہے ۔ہم تو اسکی رگ حیات (شاہ رگ )سے بھی قریب تر ہیں “
قرآن نے احسن تقویم کا ٹائٹل ہی انسان کو اسی لئے عطا کیا ہے کہ وہ واحد جاندار ہے جو اچھائی اور برائی میں تمیز کرسکتا ہے ۔ جس طرح شیطان منفی ہتھکنڈوں سے مسلح ہے اسی سطح انسان اپنے ضمیر کی زبردست طاقت سے مز ّین ہے ۔یہی وجہ ہے کہ ابتدائے آفرینش سے لیکر آج تک شر اور خیر باہم نبردآزما رہتے ہیں ۔ایسا کبھی ،کسی دور میں نہیں ہوا کہ شر غالب آجائے اور خیر کی قوت مفتوح ہوجائے ۔ایسا ہوتا تو انسانیت کا قافلہ بیچ راہ کے فنا ہوچکا ہوتا ۔آج ساڑھے چھ ارب انسانوں کا وجود اس بات کا ثبوت ہے کہ خیر کی طاقتیں مفقودنہیں بلکہ موجود ہیں ۔بقول اقبالؒ
ستیزہ کار رہا ہے ازل سے تا امروز
چراغ مصطفوی سے شرارِ بوا لہبی

معروف معنوں میں نظرء یہ پاکستان دو قومی نظرء یہ ہے جس کی بنیاد پر 1947ء میں ہندوستان کی تقسیم ہوئی اور پاکستان معرض وجود میں آگیا۔قائداعظمؒ انگریز سامراج اور ہندو اکثریت کو اپنی سالہا سال کی جدوجہد کے دوران یہ باور کراتے رہے کہ ہندوستان میں مسلمان اور ہندو دو قومیں ہیں جو تہذیبی‘مذہبی‘سیاسی اور تاریخی لحاظ سے بالکل مختلف ہیں ۔ہندوؤں نے مسلمانوں سے اپنی سدا بہار نفرت کے ذریعے بالآخر انگریزوں کو قائداعظمؒ کا مؤقف تسلیم کرنے پر آمادہ کردیا اور پاکستان کا قیام ممکن ہوگیا۔
دو قومی نظریہ نے ہی ثابت کیا کہ قومیں زبان‘رنگ اور نسل کے اعتبار سے ہی مختلف نہیں ہوتیں بلکہ مذہب کی بنیاد پر ان کی جداگانہ حیثیت قائم ہوتی ہے۔ اقبالؒ نے اسی طرف اشارہ کرتے ہوئے فرمایا تھا‘ قوم مذہب سے ہے مذہب جو نہیں تو کچھ بھی نہیں‘‘۔ہندوستان کے رہنے والوں کا رنگ ایک جیسا تھا‘ زبان ایک جیسی تھی اور شائد نسلی حوالے بھی ایک جیسے تھے۔ذات کے اعتبار سے ایک دوسرے کیساتھ جڑے ہوئے تھے لیکن مسلمان اللہ کے پیروکارجبکہ ہندوبت پرست۔ اگر تو اسلام کی جگہ کوئی اور مذہب ہوتا تو شائد معاملہ مختلف ہوتا لیکن اسلام کی تعلیمات مسلمانوں کو غیر مسلموں کی سماجی اور مذہبی برتری قبول کرنے سے روکتا ہے۔ یہ صحیح ہے کہ ہزار سال تک مسلمان اور ہندو مشترکہ طور پر اس خطے میں ز ندگی گذارتے رہے تھے لیکن یہ اسی صورت ممکن ہوا تھا کہ مسلمان اقلیت میں ہونے کے باوجود سیاسی اور مذہبی طور پر بالاتر تھے اور حکومت مسلمانوں کے پاس تھی۔ اسلام اپنے ماننے والوں کو اپنی ریاست قائم کرنے کا حکم دیتا ہے۔ یہ اسلام کا ہی سچاجذبہ تھا جس نے برصغیر کے مسلمانوں کو علیحدہ وطن کا مطالبہ کرنے پر اُبھارا۔ لہٰذا نظریہ پاکستان دراصل نظریہ اسلام ہی ہے۔
برصغیر میں اسلام کی اشاعت فتح مکہ کے فوری بعد سے ہی شروع ہوجاتی ہے۔ محمد بن قاسم کی آمد سے قبل بھی مسلمان مبلغین ہندوستان میں تبلیغ کی غرض سے آتے تھے اور ہندوستان کے باسی ان کی انسان دوستی سے متاثر ہو کر اسلام قبول کرتے رہے۔ ہندو مذہب کی تنگ نظری نے اسلام کی اشاعت میں کلیدی کردار ادا کیا ۔ بعد میں علماء کرام اور اولیاء اللہ نے بھی اسلام کی تبلیغ جاری رکھی۔
اسلام کی اشاعت اسلامی ا سکالرز اور مبلغین کی صحبت اور کردار کے مرہون منت رہی ہے ۔اچھامبلغ اچھا استاد ہی ہوتا ہے ۔ لیکن اُستاد اور مبلغ میں ایک باریک سافرق ہے۔مبلغ ہر سطح کے ذہنوں سے مخاطب ہوتا ہے لیکن اُستاد نئی نسلوں کے ذہن و قلب کو سنوارنے کا نازک فریضہ سرانجام دیتا ہے۔ اُستاد کو یہ اختیار ہے کہ وہ چاہے تو اپنے دائرہ کار میں آنے والے معصوم ذہنوں میں کانٹے بودے‘چاہے پھول اُگائے۔اُستاد چاہے تو انسانی ذہن کو الحاد سے آلود کردے یا خداپرستی سے آشنا کردے۔ یہ اُستاد ہی ہے جو عام سے انسان کو کامیابیوں کے اوج سریا تک پہنچاتا ہے۔
پاکستان میں یوں تو ماشاء اللہ ننانوے فیصد مسلمان ہیں اور یہ فرض بھی کر لیا جاتا ہے کہ چونکہ مسلمان ہیں اس لئے اسلام سے دوری ناممکن ہے اور جب تک اسلام سے جُڑے ہیں پاکستان سے جُڑے ہیں۔ لیکن کچھ تلخ حقائق اس معروضے کے خلاف جارہے ہیں۔ہمارے ہاں ایسے ادارے‘ سکول اور کالجز ہیں جہاں استاد نظریہ پاکستان کے خلاف تبلیغ کرتے ہیں۔ وہ اسلام بیزاری کے فلسفے کو آگے بڑھاتے ہیں۔ وہ قیام پاکستان کو غیر ضروری قرار دیتے ہیں۔ یہی وہ خطرہ ہے جس بھانپتے ہوئے لاہور اور اسلام آباد میں نظریہ پاکستان ٹرسٹ اور نظریہ پاکستان سنٹر کا قیام عمل میں لایا گیا۔محب وطن پاکستانی اپنے اساتذہ اکرام سے یہ توقع رکھتے ہیں کہ وہ اسلامی تعلیمات کو عام کرنے اور اسلامی تہذیب و آداب کو طلبہ و طالبات کے ذہنوں میں راسخ کرنے کے لئے اپنے سبجیکٹ کے ساتھ ساتھ نظریہ پاکستان کو اپنی ذمہ داری کے طور پر پڑھائیں گے۔بچوں کے دلوں میں خدا کی محبت اور اس کی ہی فرمانبرداری کے بیج بوئیں گے کیونکہ بقول شاعر‘
اللہ سے کرے دور تو تعلیم بھی فتنہ ‘املاک بھی اولاد بھی جاگیر بھی فتنہ
ناحق کے لئے اٹھے توشمشیر بھی فتنہ‘شمشیرہی کیا نعرہ تکبیربھی فتنہ
وہ طلباء و طالبات کو بار بار یہ احساس دلائیں گے کہ اگر دو قومی نظریہ نہ ہوتا تو پاکستان نہ ہوتا۔قائد نے ایک موقع پر فرمایا‘’’اگر ہم دنیا کو زیادہ محفوظ بنانا چاہتے ہیں تو ہمیں اصلاح کا کام افراد سے شروع کرنا پڑ ے گا‘‘۔ اگر پاکستان کوشورشوں سے بچانا ہے تو پھر اپنے قومی تشخص(اسلام) سے قربت اختیار کرنی ہوگی۔ملکوں اور قوموں کی مضبوط بنیادیں انسانی ذہنوں میں رکھی جاتی ہیں۔ یہ کٹھن کام ہے۔حالات ایسے ہیں کہ بچوں کی یکسوئی اور اعتماد ڈانواں ڈول ہوچکا ہے۔خود اساتذہ میڈیا سے متاثر ہورہے ہیں۔ یوں لگتا ہے کہ ہمارے پاؤں سے ہماری زمین کھینچی جارہی ہے۔ یہی وہ حالات ہیں جن میں استاد کا کردارابھرکر سامنے آتا ہے۔آپ توقع نہ کریں کہ اس فرض کے نبھانے سے آپ کو حکومت یا معاشرے کی طرف سے توصیفی الفاظ سننے کو ملیں گے۔لیکن یہ یاد رکھ لیں کہ اس کام کے کرنے سے آپ کے سٹوڈنٹس آگے بڑھیں گے۔ ان کے اندر ایک جذبہ بیدار ہوگا اور وہ کسی کاز کے ساتھ وہ منزلیں بھی طے کر لیں گے جو محض تعلیم برائے تعلیم کے ذریعے حاصل نہیں کرسکتے۔قائداعظمؒ نے فرمایا‘ معلم اور تعلیم کووطن سے محبت پیداکرنے کا ذریعہ ہونا چاہئے‘بقول شاعر‘
میں آدمی ہوں وطن کو نہ کس طرح چاہوں
عزیز رکھتی ہے چڑیا بھی کھونسلا اپنا

ایک بار پھر خطہ ء عراق وشام سے یہ خبریں آرہی ہیں کہ داعش نامی تنظیم اپنے مفتوحہ علاقوں میں مردوں کو قتل کر رہی ہے اور مال غنیمت کے طور پر ہاتھ لگنے والی عورتوں کو فروخت کیا جارہا ہے ۔ہوسکتا ہے کہ ایسی خبروں میں مغربی ذرائع ابلاغ کی طرف سے کچھ مبالغہ بھی ہو لیکن مختلف ذرائع دور جاہلیت والے اس فعل کی تصدیق کرچکے ہیں اور مذکورہ تنظیم کی طرف سے کوئی تردید تاحال سامنے نہیں آئی۔داعش یا دولت اسلامیہ کی طرف سے جاری ہونے والے ہر طرح کے بیانات شائع ہورہے ہیں اور سوشل میڈیا کسی کنٹرولنگ اتھارٹی کا پابند نہیں اس لئے عورتوں کی فروخت کے حوالے سے تواتر کے ساتھ شائع ہونے والی خبروں کی اگر تردید کی جاتی تو یقیناًوہ بھی کسی نہ کسی طرح منظر پر آجاتی۔پاکستان کے مذہبی حلقوں نے داعش کے ان افعال کو نہ صرف غیر اسلامی قرار دیا بلکہ غیر انسانی بھی کہا ہے۔ تصاویر بھی سامنے آئی ہیں او ان بدقسمت عورتوں کو قطار میں بٹھایا دکھایا گیا۔ یہ خبریں اور تصویریں دیکھ کر انسانی دماغوں پر ایک سناٹا سا چھا جاتا ہے کہ آج کے ترقی یافتہ دور اور اسلامی تعلیمات کے عام ہونے کے باوجود بھی یہ سب کچھ ممکن ہے؟ غیر ملکی دانشوروں کی متفقہ رائے بھی سامنے آئی ہے کہ عورت کے رہنے کے لئے اس دنیا پر بھارت سب سے نامناسب ملک ہے۔ یہ 2014ء ہے اور اب جا کر ہندوستان کے اندر عورت کے حق میں قوانین بننے کا عمل شروع ہوا ہے۔اس پربھی وہاں کے روایتی ہندو حلقے خوش نہیں ہیں۔پاکستان میں قوانین کے اعتبار سے عورتیں بہت بہتر پوزیشن میں ہیں۔ریاست پوری طاقت کے ساتھ ایسے مسلح گروہوں کے قلع قمع میں مصروف ہے جو عورت کو کسی لحاظ سے معاشرتی ترقی میں کوئی کردار ادا کرنے نہیں دینا چاہتے۔ملالہ یوسف زئی کا زخمی چہرہ بھی ایسی طاقتوں کے چہرے بے نقاب کر رہا ہے۔
امریکہ اور یورپ میں عورت کی خودمختاری کے نام پر ایک گھناؤنا کھیل کھیلا جارہا ہے۔پاؤں کے ناخن سے لے کر سر کے بالوں تک عورت کو ایک اشتہار بنا کر اس کی بااختیاری کا استحصال ہورہا ہے۔ ریپ کی بڑھتی وارداتوں کا نتیجہ ہے کہ مغرب کے کاروباری ادارے ایسے آلے تیار کر رہے ہیں کہ عورت خطرہ محسوس کرتے ہی اگربٹن دبا دے تو اس کی حفاظت کا بندوبست ہوجائے گا۔
یہ وہ چند تلخ حقائق ہیں جن کو سرسری انداز میں بیان کرنے کا مقصد یہ ہے کہ عورت کے حوالے سے اس وقت کوئی بھی ایسا معاشرہ موجود نہیں ہے جسے ہم مثالی کہہ سکیں۔
عورت کو اختیار اسی صورت مل سکتا ہے جب اس کے بارے میں مرد اور عورت دونوں کے اندرنسوانی احترام کا قوی احساس جڑ پکڑ سکے۔ عورت قابل احترام ہے اور بہت سے حوالوں کے اعتبار سے مرد کے برابر ہی نہیں بلکہ مرد سے بالاتربھی ہے۔
ہمارے ایک دوست جو ایک سیاسی مذہبی جماعت کے امیر ہیں انہوں نے بتایا کہ ان کے ہاں ایک بیٹی پیدا ہوئی اور پھر اٹھارہ برس تک کوئی اولاد نہیں ہوئی۔ وہ کہتے ہیں کہ انہوں نے اللہ کے حضورؐ گڑگڑا کر دُعا مانگی ’’بیٹا ہو یا نہ ہو تیری رضا ہے۔لیکن مجھے ایک اور بیٹی دے دو تاکہ میں جنت کا حقدار ہوسکوں‘‘۔ یہ ہے وہ احساس جسے قرآن اور اسوہ رسالت مآب صلی اللہ علیہ وآلہ وسلم نے مسلمانوں اور انسانوں کے اندر بیدار کرنے کی کوشش کی بلکہ واضع احکامات دیئے۔حدیث مبارک ہے کہ جس نے تین بیٹیوں کی اعلیٰ تعلیم وتربیت (اچھی پرورش) کی اس پر جنت واجب ہوگئی۔ آپ نے پڑھا ہوگا کہ اس پر بعض اصحابہؓ پریشان ہوئے اور پوچھا یا رسولؐ اللہ جس کی دو بیٹیاں ہوں گی کیا وہ جنت سے محروم رہ جائے گا ‘آپؐ نے فرمایا نہیں ’’جس نے دو بیٹیوں کی بھی اچھی طرح پرورش کی وہ بھی جنت کا مستحق ٹھہرا‘‘۔
اب اچھی طرح پرورش کا معانی بھی سمجھ لیجئے۔
رسول اللہ صلی اللہ علیہ وآلہ وسلم کا ارشاد ہے کہ علم کا حصول ہر مسلمان عورت اور ہر مسلمان مرد پر فرض ہے۔گویا عورت کو تعلیم دلوانا عین فرض ہے اور تربیت کا ایک حصہ ہے۔ اسی طرح فرمایا کہ صحت مند مومن کمزور مومن سے بہتر ہے۔یہاں مومن جمع کے صیغے میں استعمال ہوا ہے۔ لہٰذا بچوں اور عورتوں کی صحت پر خرچ کرنا بھی منشاء اسلام ہے ۔ اسلام عورت کے حوالے سے مردوں کے اندر یہ احساس پیدا کرنا چاہتا ہے کہ وہ تعلیم و تربیت کے لحاظ سے نہ صرف مردوں کے برابر ہیں بلکہ جنت بیٹیوں کے ذریعے ملے گی بیٹوں کے ذریعے نہیں ۔دیکھئے کس طرح اسلام نے عورت کو مرد پر بالادستی دے دی ہے۔ بیٹی کو رحمت قرار دینے کا مقصد بھی مردوں کی نفسیاتی بالادستی کو چیلنج کرنا تھا۔
حضرت خدیجہؓ کا اسلام کے حوالے سے شاندارکردار ذہن نشین رہنا چاہیے۔ آپؓ تجارت پیشہ تھیں‘آپ کے شوہر ؐ آپ سے کاروباری ہی نہیں سماجی اور تبلیغ اسلام کے حوالے سے مشاورت فرماتے تھے۔ اس سے ثابت ہوتا ہے کہ عقل و دانش کا تعلق صرف مرد سے نہیں۔ عورت بھی مشیر ہوسکتی ہے ‘ اسی طرح بے شمار اصحابیات کی معاشی‘ سماجی اور مذہبی سرگرمیوں سے تاریخ اسلام بھری پڑی ہے۔
حجاب اور پردے کے اعتبار سے بھی پہلے مردو کو حکم دیا گیا کہ وہ نگاہیں نیچی رکھے پھر عورت کو ستر ڈھانپنے کا حکم آیا ہے۔وراثت کے قوانین پڑھ کر یوں لگتا ہے کہ اسلام مرد کو کنگال اور عورت کو دولت مند دیکھنا چاہتا ہے۔ باپ کا حصہ بھی لے اور شوہر سے بھی معاشی فوائد سمیٹے۔گویا معاشی خودمختاری کی اسلام نے ایسی بنیاد رکھ دی کہ اس پر اگر سو فیصد عمل ہو تو شائد سارے مرد عورتوں کے مقروض ہوجائیں۔ چونکہ آپ لوگ تعلیم یافتہ ہیں اور عورتوں کے حوالے سے اسلام کی طرف سے دی جانے والی خودمختاری کے ہر پہلو سے آپ واقف ہیں اس لئے تفصیل حذف کر رہا ہوں۔آج اگر آپ نکاح نامہ کو غور سے پڑھیں تو اس میں واضح شق موجود ہے جس میں اگر لڑکی چاہے تو ’’عورت کو طلاق حق‘ والی شرط رکھ سکتی ہے۔ اگر مرد طلاق دے سکتا ہے تو عورت بھی خلع مانگ سکتی ہے۔
اصل مسئلہ کیا ہے۔اصل مسئلہ یہ ہے کہ اسلامی تعلیمات کو عام فہم کیا جائے اور قبائلی روایات اور عرب رسم و رواج کو جو لوگ اسلام بنا کر پیش کرتے ہیں ان کی اس جعل سازی کو بے نقاب کیا جائے۔ آئین پاکستان میں عورتوں کی وراثت سے انکار ‘دفتروں اور مارکیٹوں میں ان کو خوفزدہ کرنا یا ان کو معاشی دوڑ میں جنس کی بنیاد پر آگے بڑھنے سے روکنا سب قابل گرفت جرائم ہیں۔ ہمارے ہاں جہاں باقی قوانین پر کوئی عمل نہیں ہورہا ہے ایسے ہی عورتوں کے سماجی ‘معاشی تحفظ کے حوالے سے قوانین پر بھی عمل نہیں ہورہا۔لیکن پاکستان میں پھر بھی ایک عورت وزیراعظم بن سکتی ہے‘جج بن سکتی ہے‘ ڈی سی بن سکتی ہے‘سائنسدان بن سکتی ہے‘جرنیل بن سکتی ہے اور سب سے بڑھ کر یہ کہ وہ اینکر پرسن بن سکتی ہے۔
یہ ایک طویل سفر ہے۔پاکستان کی عورتوں نے بڑی تیزی سے یہ سفر طے کرنا ہے۔ بہت بڑی خوشخبری ہے کہ ہر امتحانی نتائج میں لڑکیاں شاندار کارکردگی دکھا رہی ہیں۔ اس کا صاف مطلب یہ ہے کہ پاکستان کا مستقبل جہالت نہیں روشنی میں آنکھ کھولے گا۔ ذرائع ابلاغ کا بہت بڑا کردار ہے اساتذہ کا انتہائی ذمہ دارانہ کردار ہے۔ دیہات کی عورت کو شہر کی عورت نے آگے بڑھانا ہے۔ اس ملک کو معاشی خودمختاری بھی عورت نے ہی دلانی ہے۔ سیاسی پارٹیوں کو چاہیے کہ وہ اسمبلی میں بھی مخصوص نشستوں پر ایسی خواتین کو آگے لائیں جو معاشرے کے اس بڑے حصے کی حقیقی ترجمانی کرسکیں۔معاشرے کا بناؤ اور بگاڑ اب عورت کے ہاتھ میں ہے۔ بیٹی رحمت ہے اور اس بکھرے‘کٹے پھٹے اور لڑتے جھگڑتے پاکستان کو اس رحمت سے بہت سی اُمیدیں ہیں۔

کائنات کا دولہا انسان اللہ پروردگار عالم کی تخلیق کا بہترین شاہکار ہے۔ رب کائنات نے اسے نعمتوں کے اتنے
انبار عطا فرما دیے کہ جنہیں دیکھ کر ذرا سا غور کرنے پر ہمیں اللہ نظر آنے لگتا ہے۔ اللہ خود اپنے کلام میں فرماتا ہے”تمہارے نفوس میں میری نشانیاں موجود ہیں تو کیا تم ان پر غور نہیں کرتے”۔
ہم اپنی ذات سے ذرا باہر نظر دوڑائیں تو سورج’ چاند’ ہوا’ پانی ‘ستارے آسمان’زمین اور جانور سب کے سب قدرت کی نشانیاں ہونے کے ساتھ ساتھ حضرت انسان کی ایسے خدمت میں جتے ہوئے ہیں جیسے ان کا ہم سے بہت بڑا کام پھنسا ہوا ہے۔ ان پر نگاہ دوڑا کر یوں محسوس ہوتا ہے کہ جیسے سورج چمکتا’چاند دمکتا’ستار روشن’ سمندر موجزن’ ہوائیں چلتی’ پھول کھلتے’پھل پکتے اور جانور سواری و غذا کے لئے پیدا ہی ہمارے لئے کئے گئے ہیں۔ احساس کچھ یوں ہوتا ہے کہ جیسے ہم آقا ہیں اور یہ ہمارے خدمت گزار حالانکہ اصل صورتحال اس کے برعکس ہے۔ ان سب سے پوچھیے کہ اگر انسان نہ ہو تو تمہاری صحت پر کیا اثر پڑے گا تو یہ سب کہیں گے ہماری بلا سے۔ مگر انسان ان کے بغیر ایک پل بھی زندہ نہیں رہ سکتا۔غرض ساری کائنات اپنا کام مالک حقیقی کی مرضی کے عین مطابق کر رہی ہے مگر انسان ہے کہ ظالم بھولا ہوا ہے۔
گھوڑے کو مالک صرف چارہ ہی ڈالتا ہے تو وہ اس کے بدلے اس کے لئے لڑ کر اپنی جان دے دیتا ہے۔ مگر انسان اپنے مالک کا بڑا ناشکرا ہے اور اس کی وجہ سورہ عادیات میں جو بتائی گئی وہ ہے مال سے بے پناہ محبت:
دنیا میں کسی ادارے کا مالک تیوری چڑھا لے تو ملازم فوراً ہاتھ باندھ کر کھڑا ہوجاتا ہے مگر کارخانہ قدرت کا حکم کئی بار جھنجوڑ چکا مگر ہم اس کی کوئی پرواہ نہیں کرتے۔آذان کی پکار تو ہمارے کانوں سے ٹکرا کر واپس چلی جاتی ہی رہی ہے لیکن اب تو ہم چھوٹے عذابوں کی ایک سیریز کو اپنی آنکھوں سے دیکھنے کے باوجود بھی راہ حق کی طرف جانے سے کترا رہے ہیں۔
وہ ہمیں بار بار اپنے کلام میں بتا چکا ہوں کہ میں نے یہ تمام کائنات تمہارے لئے مسخر کردی ہے مگر تم کو اپنے پیار کے لئے پیدا کیا ہے۔ وہ واضح طور پر آگاہ کرتا ہے کہ تمہاری تخلیق کا مقصد میری محبت اورمیری مخلوق سے پیار ہے۔
وہ خبردار کرتا ہے کہ اگر تم مجھ سے محبت نہیں کرو گے تو میں عنقریب تمہاری چھٹی کروا دوں گا اور تمہاری جگہ ایسی قوم پیدا کروں گا جو کہ مجھ سے محبت کرے گی اور میں ان سے محبت کروں گا۔
وہ کہتا ہے کہ میں تم سے رزق روزی نہیں مانگتا۔رزق رساں تو میں ہوں۔ اس لئے تمہاری روزی کا میں سامان کروں گا تم تو بس میری طرف پیار کی نگاہ اٹھا کر کبھی دیکھ ہی لیا کرو۔
وہ ہم کو بار بار اپنی نعمتوں کی یاددہانی کراتا ہے کہ شائد نگاہ ان کی طرف مبذول کرے تو نگاہ شکریہ اوپر بھی اٹھا لے۔مگر ہمارا حال تو یہ ہے کہ گائے نے اگر دودھ پلایا ہے تو ہم نے اسے ماتا بنا کر اسی کے آگے سر تسلیم دل خم دیا۔اللہ کو ہم سے گلا ہے کہ گوبر اور خون کے درمیان سے ظالمو تم کو خالص دودھ تو میں نے پلایا ہے اور تم نے ساقی پر نگاہ کرنے کے بجائے برتن کے آگے سر نیاز جھکا دیا۔ جبکہ گائے کو تو یہ خبر بھی نہیں کہ یہ سارا نظام کیسے چل رہا ہے۔ رب کا فرمان ہے کہ سورج اور چاند کو سجدہ کرنے والو اسے پہچانو جس کے ہاتھ میں ان کی رسی ہے۔
دنیا میں ماں جب بچے کو نہلا دھلا کر نئے کپڑے پہنا کر سامنے کھڑا کرتی ہے اور پوچھتی ہے کہ سب کچھ کس نے دیا ہے تو بچہ اگر صرف اتنا کہہ دے کہ ”ماں تو نے” تو صرف اتنا کہنے پر ہی ہم نے کئی بار دیکھا ہے کہ وہ بچے کو درجنوں بوسے دیتی ہے۔ یہی حال مالک کا ہے جب بندہ نہا دھو کر آئینہ کے سامنے کھڑا ہو اور یہ کلمات ادا کرے کہ اللہ تیرا شکر ہے تو مجھے خوبصورت شکل عطا فرمائی۔ میری سیرت کو بھی خوبصورت بنا دے تو عرش سے آواز آتی ہے۔ ”بندے جا تیری اس خوبصورت بات پر میں نے تیرے پچھلے گناہ معاف کردیئے”۔ وہ فرماتا ہے کہ اگر نعمت کا شکر ادا کرو گے تو نعمتوں کی بارش کردوں گا اور ناشکری کرو گے تو میرا عذاب بہت سخت ہے۔
اللہ نے ہمیں مختلف انداز سے یاددھانیاں کروائی ہیں کہ شائد انسان اپنے محبوب حقیقی کی طرف نظر التفات کرلے۔وہ فرماتا ہے کہ جب تم ماں کے بطن سے گود مادر میں آئے تو کچھ نہیں جانتے تھے۔ یہ سمع و بصر اور دل ودماغ جس پر تم اتنا اتراتے ہو میں نے عطا فرمائے ۔ایک طرف تو ان نعمتوں کا تذکرہ کیا عام لوگوں کیلئے تو دوسری طرف میڈیکل سائنس کے ماہرین کو بتایا کہ تم نے آج یہ ثابت کیا ہے کہ انسان کو پہلے سماعت ملتی ہے بعد میں بصارت مگر رب العالمین نے چودہ سو سال قبل ہی یہ حقیقت اپنے نبی صلی اللہ علیہ وآلہ وسلم کی زبان سے جاری فرما دی تھی۔
وہ ہمارے کئی بھائیوں کو ان میں سے کچھ عطا نہیں بھی فرماتا۔شائد اس لئے کہ آنکھوں سے محروم کوئی شخص جب گلی گلی سے یہ پکارتا گزرے کہ” آنکھوں والو! آنکھیں بڑی نعمت ہیں” تو ہمیں ان کے نعمت ہونے کا واقعتاً احساس ہوجائے آپ غور فرمائیں تو نوزائیدہ بچہ نہ بول سکتا ہے نہ رفع حاجت کرنے کے قابل ہوتا ہے۔غلاظت کے اس ڈھیر کے لئے دودھ کی نہروں کے علاوہ ماں کے دل میں اتنا پیار بھی ڈال دیا کہ وہ ساری غلاظتیں اپنے دامن میں لے لیتی اور بچے کو صاف ستھری جگہ ڈالتی۔میں تو اس کو اس طرح دیکھتا ہوں کہ دنیا میں جو ماں کا کردار ادا کر رہی ہے وہ ماں نہیں بلکہ دائی ہے اصل ماں (پالنے والی ذات) تو وہ ہے جس نے اس دائی کے دل میں اتنا پیار ڈالا ہوتا۔ سرکار صلی اللہ علیہ وسلم نے بھی اللہ کے پیار کو ماپنے کے لئے ماں کے پیار کا پیمانہ استعمال کیا۔ آپ کسی سفر پر جا رہے تھے کہ ناگہاں کسی عورت کا بچہ کھو گیا۔ وہ بڑی بے چینی کے عالم میں پاگلوں کی طرح اسے ڈھونڈتی پھر رہی تھی۔ کافی وقت بعد وہ اسے اچانک نظر آیا تو اس نے بچے کو اپنی بانہوں میں جکڑ کر اسے بے شمار بوسے دیے۔ ایسی کیفیت میں حضور صلی اللہ علیہ وآلہ وسلم نے صحابہ کو اس کی طرف اشارہ کرتے ہوئے فرمایا کہ دیکھو تمہارا رب تم سے اس ماں سے بھی ہزاروں گنا زیادہ پیار کرتا ہے جب قرآن فرماتا ہے کہ ماں باپ کے سامنے اف تک نہ کہو تو میں سوچتا ہوں کہ جب ہم اس ماں کے سامنے اف نہیں کہہ سکتے تو اس حقیقی ماں کے سامنے اف کیسے کہہ سکتے ہیں اور اس کے حکموں کو پا کر ان کی نافرمانی کرنے کی جسارت کیسے کرسکتے ہیں۔ میں انسان میں موجود اعضاء اور نظام کو دیکھ کر کبھی کبھی خیال کرتا ہوں کہ جانے وہ خود کتنا پیارا ہوگا جس کی تخلیق اتنی پیاری ہے۔
انسان کے اندر اور باہر کے ماحول میں یہ نشانیاں ہم سے کچھ کہتی ہیں ۔ گاڑی میں جانے والا مسافر اپنے دوست کو دیکھ کر جب رومال لہراتا ہے تو اس کی حرکت سے دیکھنے والے کو ایک نتیجہ نکالنا ہوتا ہے اگر کوئی رومال کی رنگت’ اس کی دھاریوں’ اس کے کپڑے کے معیار پر غور کرنے لگے تو زمانے والے اسے احمق کہیں گے۔دراصل اس طرح کرنے سے اس کا مقصد اس کی توجہ اپنی جانب مبذول کروانا ہوتا ہے۔
اگر کوئی مہمان کسی کے گھر کھانا کھانے کے وقت سب باتوں کو لاجک سمجھ جائے کہ بلب میں روشنی پاور ہائوس سے آرہی ہے۔ پھول جو گلدانوں میں سجائے گئے ہیں یہ اس طرح گلدانوںمیں نہیں اُگتے بلکہ باغ سے لائے گئے ہیں۔بادلوں کو دیکھ کر ان کا سارا فلسفہ بیان کردے۔ غرض ہر چیز کے بارے بڑی عقل مندی سے متاثر کن کرتا جائے۔ کھانے پر بھی بڑی سیرحاصل گفتگو کر ڈالے مگر کھانا کھانے کے بعد میزبان کا شکریہ ادا کیے بغیر چلائے تو کوئی شخص بھی ایسے شخص کو عقلمند نہیں کہے گا۔ عقل بہت بڑی چیز ہے اس کی بنیاد پر انسان اشرف المخلوقات کے درجہ پر فائز ہوا ہے مگر یہی عقل اگر کسی جسم سے نکال دی جائے تو وہ پاگل کہلائے گا۔ یاد رہے کہ عقل اگر وحی کی روشنی سے ہٹ کر فیصلے کرے گی تو یہ باولی کہلائے گی۔خدا کا فرمان بھی کچھ اسی طرح سے ہے کہ جب میرے بندے آسمانوں اور زمین کی تخلیقات میں غور کرتے ہیں تو نتیجہ بے فکر کے طور پر بے ساختہ یہ کہہ اٹھتے ہیں کہ اے رب تو نے یہ سب بے کار پیدا نہیں کیا۔ وہ کہتے ہیں کہ رب تو پاک ہے ہم کو آگ سے بچا کر اپنا دیددار نصیب فرما۔ بقول شاعر
تیری جنت کو یا رب کیا کروں
آرزو ہے تجھے دیکھا کروں

یہ قبل مسیح کا قصہ نہیں صرف چودہ سو برس پہلے کی بات ہے کہ مکہ کی پہاڑی پر چڑھ کر اللہ کے رسولۖ اہل مکہ سے مخاطب ہوتے ہیں اور سوال کرتے ہیں”’ کیا میں نے کبھی آپ سے جھوٹ بولا ؟جواب آتا ہے اے محمدۖ آپ نے کبھی جھوٹ نہیں بولا اور آپ جو کہیں گے سچ کہیں گے۔ یوںاللہ کے رسولۖ نے سب سے پہلے لوگوں سے اپنے بارے میں سچائی اور کردار کی گواہی لی اور پھر توحید کا پیغام دیا۔ سیرت رسولۖ کا یہ حوالہ اس لئے دے رہا ہوں کہ ہمارے اکثر دانشور اور مفکر انقلاب اور تبدیلی کی بات تو کرتے ہیں لیکن وہ بھول جاتے ہیں کہ انسانی سماج میں رہنمائی اور رہبری کے لئے شعلہ بیانی اور شخصی مقناطیسیت ایک حد تک معاون ہوسکتے ہیں

لیکن شخصیت کی یہ خوبیاں اس وقت خامیاں بن جاتی ہیں جب ڈھیلے کردار اور قول و فعل کے تضاد عوام کے سامنے آنے لگتے ہیں۔ لامحالہ ڈاکٹر طاہر القادری کی شعلہ بیانی اور منطق کے سامنے شائد ہی کوئی ٹھہر سکے۔وزیر داخلہ چوہدری نثار کے مطابق ڈاکٹر قادری کی تقریریں سن کر برسوں سے پختہ وفاداریاں بھی بدل لینے کو جی چاہتا ہے۔ جب وہ اپنے خطاب کے عروج پر ہوتے ہیں اور گریہ و زاری کی لہر اٹھاتے ہیں تو پتھر دل بھی موم ہوجاتے ہیں۔ بیبیاں دھاڑیں مار کر روتی ہیں اور آہنی سینوں کو بھی پسینے آنے لگتے ہیں۔ تقریر و تحریر کے محاذ کے فیلڈ مارشل قبلہ قادری صاحب کو بس یہی ایک فن آتا ہے اور ان کا خیال ہے کہ وہ اپنے اس فن کی بُنیاد پر ملک میں ایک بہت بڑی تبدیلی بلکہ انقلاب لے آئیں گے اور جمی جمائی حکومتوں کے تختے اُلٹ دیں گے۔”سٹیٹس کو” کوتوڑ دیں گے اور پسماندہ طبقات کو اٹھا کر ایوان اقتدار میں لے آئیں گے اورمقتدر طبقات کو پاتال میں پہنچا دیں گے۔ ان کی تنظیمی صلاحیتیں بھی قابل قدر ہیں۔ انقلابی کونسلوںکا تصور ہو یا اشتراکی جمہوریت کا نظریہ۔سب اپنی جگہ قابل غور پہلو ہیں لیکن جو شخص اس انقلاب کا دعوے دار ہے اس کا ذاتی کردار کیا ہے۔ یوں تو ڈاکٹر صاحب بار بار اس بات کا اعادہ کرتے ہیں کہ انہوں نے زندگی بھر جھوٹ نہیں بولا۔بلکہ اللہ اور رسولۖ کی عزت کی قسم کھا کر وہ اعلان کرتے ہیں کہ ”اگر میں جھوٹ بولوں تو خدا مجھے موت دے دے”۔ لیکن کیا کیا جائے جدید ٹیکنالوجی کا۔اب تو انسان کی سرگوشی بھی ریکارڈ ہوجاتی ہے۔ ایک ٹی وی چینل نے ڈاکٹر صاحب کے سامنے وہ کلپس چلائے ہیں جو ڈاکٹر طاہر القادری کو جھوٹا ثابت کرنے کے لئے کافی ہیں۔ جو شخص سرعام جھوٹ بول سکتا ہے وہ ہلچل تو پیدا کرسکتا ہے لیکن کو ئی تعمیری انقلاب اس کے مقدر میں نہیں ہوسکتا۔ انسانوں کی رہبری کا پہلا تقاضا سچ ہوتا ہے ۔ڈاکٹر صاحب کے معتقدین میں سے چھوٹے موٹے معاشی مفادات کے اسیر لوگ ہیں’ سیاسی طور پر اہمیت کے خواہشمند نوجوان ہیں یا ”بغض معاویہ” میں وقتی طور پر ساتھ کھڑے ہوجانے والے دوغلے کردار کے سیاسی پنڈت ہیں۔دھرنے دھرے رہ جائیں گے۔ڈی چوک پر کچی بستیوں کا نقشہ پیش کرنے والی قادری کالونی اُجڑ جائے گی اور لوگ اپنی حسرتوں کا ماتم کرتے ہوئے بے نیل ومرام یہاں سے لوٹ جائیں گے۔مصطفوی انقلاب کا نعرہ لگانے والوں کو باکردار قیادت کی ضرورت ہوتی ہے۔ جو بدقسمتی سے ڈاکٹر صاحب کے پاس نہیں ہے۔ کیا عمران خان اپنے کنٹینر پر کھڑے ہوکر لوگوں سے پوچھ سکتے ہیں ”اے اہل اسلام آباد کیا آپ میرے صاف اور شفاف کردار کی گواہی دیں گے؟”وہ ایسا ہرگز نہیں کرسکتے۔پھر وہ تبدیلی کیسے لاسکتے ہیں۔ وہ کسی ”فرعون” سے ”قطبی قبیلے” کو نجات کیسے دلا سکتے ہیں۔جب ان میں ”موسیٰ” والی کوئی صفت ہی نہیں تو پھر وہ اپنی مقناطیسی شخصیت سے آزاد لبرل دوشیزائوں کے دلوں میں ہلچل تو مچا سکتے ہیں ”فرعون” کو شکست نہیں دے سکتے۔ یہ نہیں کہ عمران اور قادری کے مدمقابل پارلیمان میں براجمان چہروں سے تقویٰ اور تدبر کی شعائیں پیدا ہوتی ہیں۔ انقلابی اور انصافی فلسفے مکمل طور پر ٹھیک ہیں لیکن ان فلسفوں کو دلوں میں اتارنے کے لئے جس شخصی کردار کی ضرورت ہے اس کا ماخذ اسوہ رسولۖ ہے۔ صالحیت مصنوعی طریقوں سے پیدا نہیں کی جاسکتی اس کے لئے افرادکار عمل کی سان پر اپنے قول و فعل کو کستے رہتے ہیں اور عوام ان سے غیر مشروط طور پر وابستہ ہوجاتے ہیں پھر انقلاب آجاتے ہیں۔امام خمینی اور مہاتیر محمد کو کنٹینروں ‘لائوڈسپیکروں ‘قوالوں اور گویّوں کی حاجت نہیں ہوتی۔ وہ دھیمے لہجے میں بات کرتے ہیں اور شاہوں کے محلات لرزنے لگتے ہیں۔

ابھی تک تسلی بخش وضاحت کا انتظار ہے۔حکومت پاکستان نے ”دوست ملک“ سے ملنے والے ڈیڑھ ارب ڈالر کے تحفے کے پیچھے کارفرما معاملے کو افشاءنہیں کیا۔قوم کو تسلی دی گئی ہے کہ ” ایران اور سعودی عرب سمیت تمام برادر ممالک سے متوازن تعلقات قائم کئے جائیں گے“۔ ڈالر کی بے قدری کے پیچھے محرکات میں سب سے بڑا محرک یہی ڈیڑھ ارب ڈالرز ہیں جو مبینہ طور پر سعودی حکومت نے وزیراعظم میاں محمد نوازشریف کی ذاتی درخواست پر مملکت اسلامیہ کو بطور تحفہ دیئے ہیں۔ ان میں سے نصف سے زائد قومی خزانے میں ”پاکستان ڈویلپمنٹ فنڈ“ کے عنوان سے منتقل ہوچکے ہیں اور باقی بھی عنقریب آنے والے ہیں۔اقتصادی تجزیہ کاروں کے مطابق اگر دوست ملک کی طرف سے کی جانے والی یہ مہربانی کسی وقت واپس لے لی گئی تو ڈالر پھر بے قابو ہو کر روپے کو روند ڈالے گا۔

ان تجزیہ کاروں کا خیال ہے کہ تھری جی سپکٹرم کی نیلامی سے متوقع رقم حاصل نہیں ہوسکے گی۔ جہاں تک بیرون ممالک پاکستانیوں کی طرف سے بھجوائی جانے والی بھاری رقوم ہیںتو یہ کوئی نیا معاملہ نہیں ہے۔ چین کی طرف سے 32ارب ڈالر کی سرمایہ کاری کا کوئی سیاسی فائدہ تو ہوسکتا ہے۔ لیکن یہ 32ارب ڈالر یکدم قومی خزانے میں نہیں آنے والے اس کے لئے سال ہا سال درکار ہوں گے اور ”کون جیتا ہے تیر ی ذلف کے سر ہونے تک والا معاملہ ہے“۔
حکومت کے بعض سیاسی مخالفین کسی دوسری حکومت سے کسی ”مالی تحفہ“ کو ریاست کے خلاف سازش قرار دے کر مہیب خدشات کا اظہار کر رہے ہیں۔ایک ذریعہ کے مطابق سٹاک مارکیٹ میں غیر ملکی بروکرز جلد ہی روپے کو پھر سے ایک سو دس تک لائیں گے کیونکہ وہ کسی صورت اپنی سرمایہ کاری کو ڈوبنے نہیں دیں گے۔
اگر سعودی عرب نے اتنی بڑی رقم تحفہ میں دے دی ہے تو پھر اس کے بدلے پاکستان کیا دے گا؟ یہ وہ سوال ہے جو ڈالر کے تذکرے کے ساتھ جڑا ہوا ہے۔ بعض مبصرین کا خیال ہے کہ پاکستان خلیج کی ریاستوں میں جاری”عرب بہار“ کا راستہ روکنے میں اپنی عسکری اور اسلحی مدد فراہم کرے گا۔ ایم کیو۔ایم کا خیال ہے کہ سنی شیعہ عالمی کشمکش میں پاکستان نے سعودی بلاک میں شرکت کا حتمی فیصلہ کر لیا ہے۔ اور اگر ایسا ہوا ہے تو پھر پاکستان ایک نئی خانہ جنگی میں مبتلا ہوجائے گا۔
راقم اس محفل میں موجود تھا جس میں چند کالم نگار اور سینئر صحافیوں کا وزیرپٹرولیم و قدرتی وسائل جناب شاہد خاقان عباسی کے ساتھ ”گپ شپ“ کا اہتمام کیا گیا تھا۔ یہ چار ماہ قبل کی بات ہے۔راقم نے پوچھا”کیا پاک ایران گیس پائپ لائن کو آگے بڑھانے کے خلاف امریکہ سمیت کسی بھی ملک کا آپ پر کوئی دباﺅ ہے“؟۔
شاہدخاقان صاحب کا جواب تھا‘
”ہرگز نہیں اور یہ منصوبہ ہر حال میںمکمل ہوگا“۔ان کا یہ بیان اخبارات میں شائع ہوا۔ بعد میں بھی ایک ماہ قبل تک وہ اس منصوبے کی تکمیل کے سب سے بڑے داعی دکھائی دیتے تھے۔ لیکن اچانک ایک روز جناب عباسی نے انکشاف کیا کہ ”امریکی پابندیوں کے سبب یہ منصوبہ تکمیل تک نہیں پہنچ سکتا“۔پھر اس پر مذیدگرہ لگائی۔” ایران نے حسب وعدہ پانچ سو ملین ڈالر مہیا نہیں کیے“۔ ادھر یہ بیانات چلے ادھر دوست ملک کی خیرسگالی کے چرچے بھی تیز ہوگئے۔ کیا ڈیڑھ ارب ڈالر پاک ایران پائپ لائن کے نعم البدل کے طور ملے ہیں؟۔ یہ راز بھی اب کوئی راز معلوم نہیں ہوتا۔ بہرحال یہ کاروبار کی دنیا ہے۔ پاکستان کو ڈالروں کی ضرورت ہے۔ڈالر شیعہ ہوتا ہے نہ وہابی۔ یہ تو ایک عالمی کرنسی ہے اور اس کی وافر فراہمی ہمارے روپے کی کمر سیدھی رکھ سکتی ہے۔ فی الحال یہ کام جناب اسحاق ڈار نے کر دکھایا ہے۔ آج ڈار آگے ہی آگے جارہا ہے اور ڈالر پیچھے پیچھے منتیں کر رہا ہے۔ جو وزیرخزانہ کو محض منشی کہتے تھے آج وہی انہیں ماہر اقتصادیات کے طور پر تسلیم کرنے پر مجبور ہیں۔یہی ”گڈگورننس“ ہوتی ہے۔

اچانک ہی پروگرام بن گیا۔عظمت اللہ دیرینہ دوست ہیں ۔اچھی انگریزی لکھنے والے صحافیوں میں شمار ہوتا ہے۔ قائداعظم یونیورسٹی کے ساتھی ہیں۔سماجی رابطوں کو نبھانے کا حوصلہ اور ہنر جانتے ہیں۔ معروف ٹی وی اینکر اور کالم نگار جناب اسرار کسانہ بھی اولڈ قائدین ہیں۔سابق انکم ٹیکس ڈپٹی کمشنر ہاورڈیونیورسٹی کے فارغ التحصیل اور قائداعظم یونیورسٹی کے ہونہار سٹوڈنٹ جناب حسن کامران بشیر بھی ہمراہ تھے۔اسرار کسانہ سے درخواست کی کہ گوجرخان جانے کی تمنا قلب و دماغ کو جکڑ رہی ہے۔ مصروفیات سے کون بچا ہوا ہے۔بہرحال کسانہ آمادہ ہوگئے کہ گوجرخان کے راز دان ہیں اور وہاں کی عقیدت ان کے لب ولہجہ پر حاوی رہتی ہے۔

پروفیسراحمد رفیق اختر کے بارے لوگوں سے سنا اور کالموں میں پڑھ رکھا تھا۔ اندھی عقیدت میں بہہ جانے کا ہرگز قائل نہیں ہوں۔عامل ‘نجومی’ قیافہ شناس’دست شناس ‘ستارہ شناس سب بجا لیکن جو بات قرآن کریم اور اسوہ رسول صلی اللہ علیہ وآلہ وسلم سے ثابت نہ ہو’اسے ماننے پر جی آمادہ ہی نہیں ہوتا۔پروفیسر صاحب کے پاس بھی اس لئے جانے کی خواہش جاگی تھی کہ ان کا تعارف ایک سچے دانشور’عالم باوصف اور بے غرض پروفیسر کے طور پر ذہن میں نقش تھا۔
بغیر ملے ‘کوئی معاملات کئے کسی شخصیت کے بارے میں جو امیج ہمارے ذہنوں پر بنتا ہے وہ اس وقت تک ادھورا رہتا ہے جب تک ملاقات اور معاملات والا مرحلہ طے نہیں ہوجاتا۔ ہم آجکل میڈیا کے بنائے ہوئے بت پوجتے ہیں۔ چاہے یہ بت صحافتی ہوں’سیاسی ہوں’ مذہبی و مسلکی ہوں یا علم ودانش کے حوالے سے ہوں۔ملاقات میرا شوق ہے۔ میںکبھی بھی مردم بیزار نہیں رہا۔ میں نے اپنے دماغ میں براجمان بہت سے بتوں کو پہلی ملاقات میں ہی ٹوٹتے اور بکھرتے دیکھا ہے۔ پروفیسر احمدرفیق اختر کو لوگ بے حد عقیدت کی نگاہ سے دیکھتے ہیں۔ بعض لوگوں نے انہیں کسی عامل یا قیافہ شناس کے طور پر اپنے ذہنوں میں بٹھا رکھا ہے۔پروفیسر صاحب سے ملاقات کرنے کا فائدہ یہ ہوا کہ ان کے بارے میں جو میرا تصور تھا وہ مزید مضبوط ہوا اور یہ پہلا موقع ہے کہ مجھے ”بت شکنی” کے مرحلے سے گذرنا نہیں پڑا۔
میں قرآن پاک کا ایک ادنیٰ سا طالب علم ہوں’اور اسی کے ذریعے میں ”بائی چوائس” مسلمان ہوا ہوں۔ اور پروفیسر صاحب کو میں قرآنی تعلیمات کے حوالے سے ہی جاننا چاہتا تھا۔ سچ یہ کہ تقریباً تین گھنٹے تک جناب پروفیسر صاحب سے مختلف موضوعات پر گفتگو ہوئی۔ ان میں علمی تکبر بالکل نہیں۔انہوں نے قرآنی فکر سے مرصع جوابات دیکر میری تشفی کی۔جہاں تک پروفیسر صاحب کی ”کرامات” یا ”علم غیب” کے بارے میں ضعیف العقیدہ گروہ کی طرف سے پھیلائی جانے والی باتیں ہیں وہ پروفیسر صاحب کی ذات پر محض بہتان ہے۔وہ شریعت محمدیۖ کے سچے پیروکار ہیں اور لوگوں کو راہ راست کی طرف دلنشین انداز میں رغبت دلانے کا فریضہ سرانجام دیتے ہیں۔ بجھے دلوں میں امید اور اللہ کی رحمت کے چراغ جلاتے ہیں۔حرص و ہوس کے بندوں کو تعلق باللہ کی راہ پر ڈالتے ہیں۔
ان کے ہاں اپنی اپنی ضرورتوں اور حاجتوں کے حوالے سے امرائ’ وزرائ’ عسکری عہدیداران اور عمال حکومت سب جاتے ہیں۔ وہ نہ تو پھونکیں مارتے ہیں ‘ نہ تعویز بانٹتے ہیں اور نہ ہی کندھے تھپکاتے ہیں۔ وہ سراسر خیر کے داعی ہیں اور نفرتوں کو مٹانے اور محبتیں بانٹنے کا درس دیتے ہیں۔ہم آج کل مسلک اور عقیدت کے نام پر جن بے شمار توہمات اور خرافات کا شکار ہوگئے ہیںپروفیسر رفیق ایسے ماحول میں ایک گوشہ عافیت ہیں اور ان سے ملاقات کرنے کے بعدان کی علمی’ عقلی اور دانشمندانہ گفتگو انسان کو بہتر طرز زندگی کی طرف لوٹ آنے کا ذریعہ بنتی ہے ۔ اشکالات’شکوک وشبہات اور تفکرات نے ہماری زندگیوں میں زہر گھول رکھا ہے’گوجرخان کے اس گوشے میں جانے سے ایک بار دل کا زنگ اتر جاتا ہے ۔ پروفیسر صاحب علم کا خزانہ ہیں۔قرآنی حوالوں سے رہبری کرتے ہیں۔ان کے پاس عقیدت میں اندھا ہو کر جانے کی بجائے دماغ کی آنکھیں کھلی رکھ کر کچھ سیکھنے کے لئے جانا چاہیے کہ ایسے لوگ کھلے دماغوں کو زیادہ پسند کرتے ہیں۔”ترجیح اول خدا کی ذات بن جائے تو انسان کامیاب ہوجاتا ہے”۔”جس کا اللہ پر یقین ہو اس پر جادو اثر نہیں کرتا”۔”رب سے زندہ تعلق کا ہونا تعلق بااللہ کی درست تشریح ہے” لوگوں کی خامیوں پر نہیں خوبیوں پر نظر رکھو”۔ایسے سینکڑوں جملے ہیں جن پر ایک پوری کتاب لکھی جاسکتی ہے۔ اصل بات علم کے ان موتیوں پر عمل ہے اور گوجرخان کے اس گوشے میں اسی کا اہتمام ہوتا ہے۔