بدلتے سماجی اور معاشی تقاضوں کی بدولت اب شہروں کی شناخت بھی تبدیل ہورہی ہے۔ گوجرانوالہ پہلوانوں کے شہر کے طور پر مشہور تھا لیکن اب اس شہرت میں تعلیمی اداروں نے بھی اپنا حصہ ڈالنا شروع کردیا ہے۔پنجاب یونیورسٹی کے کیمپس نے تعارف کی تبدیلی میں اہم کردار ادا کیا ہے۔ میڈیکل کالج نے تعلیمی فضاء ہی تبدیل کردی ہے۔ طالبات کے کالجز کی بڑھتی ہوئی تعداد اور استعداد سے ماحول میں علمی خوشبو رچ بس گئی ہے۔ ایک طرف سرکاری تعلیمی اداروں کی کارکردگی بہتر ہورہی ہے تو دوسری طرف والدین اور طلباء و طالبات کی سہولت کے لئے نت نئے تعلیمی ادارے کھولے جارہے ہیں۔وہ وقت دور نہیں جب گوجرانوالہ کو بھی کالجوں کا شہر قرار دیا جاسکے گا۔
شہر کے تعلیمی تعارف کا سہرا وہاں سے منتخب ہونے والے چند ممبران صوبائی و قومی اسمبلی کے سر جاتا ہے ۔ ان محدودے چند افراد کا ر نے واقعی عوامی نمائندگی کا حق ادا کردیا ہے ۔ لیکن یہ ناانصافی ہوگی اگر پنجاب کے علم دوست وزیر اعلیٰ شہبازشریف کا تذکرہ نہ کیا جائے۔ عوامی سہولیات کی فراہمی اور اجتماعی سماجی کاموں کے لئے میاں صاحب صوبہ کے عوامی نمائندگان کو اداروں کے قیام پر آمادہ کرتے رہتے ہیں۔
جناب عبدالرئوف مغل گوجرانوالہ سے ایم۔پی۔اے ہیں۔ انہوں نے اپنے حلقے میں فروغ تعلیم کے لیے انتھک کام کیا ہے ۔ حال ہی میں بچیوں کے لئے ایک عظیم الشان کالج بنوایا ہے۔ پانچ ستمبر کو اس کالج کی افتتاحی تقریب میں مجھے بھی مدعو کیا گیا تھا۔
نامور سیاسی شخصیت غلام دستگیر خان کی صدارت میں منعقدہ اس تقریب میں دنیا کی سات بلند ترین چوٹیاں سر کرنے والی پہلی پاکستانی کوہ پیما ثمینہ بیگ مہمان خصوصی تھیں۔ ان کے استاد اور بڑے بھائی مرزا علی بھی ہمراہ تھے۔ معروف کالم نگار بیگ راج بھی میرے ہمراہ تھے۔ انہیں خصوصی طور پر مدعو کیا گیا تھا۔ جناب عبدالرئوف مغل صاحب کے معتمد خاص اور نوجوانوں کے متحرک نمائندے جناب سفیان اکرام مغل صاحب نے اوور ہیڈ برج پر ہمارا استقبال کیا۔ پنڈال میں طالبات’اساتذہ اور والدین بڑی تعداد میں موجود تھے۔ڈگری کالج فار وومن (طارق آباد کھوکھرکی) کی پرنسپل صاحبہ نے سٹیج سیکرٹری کے فرائض سرانجام دئے ۔ وقت کی قلّت کے سبب مختصر تقاریر کا دور چلا۔ میں نے طالبات کو مخاطب کرتے ہوئے کہا”’تعلیم برائے تعلیم نہیں تعلیم برائے زندگی کے فلسفے کو اپنانا ہوگا۔ جب تک ہم اپنے مرکز و محور یعنی ذات گرامی رسولۖ سے پوری طرح جڑ نہیں جاتے ہماری تعلیم ہمیں فائدہ نہیں دے سکے گی اور جب تک پاکستان سے غیر مشروط محبت کی شمع روشن نہیں ہوتی دفاع پاکستان کا ہدف پورا نہیں ہوسکتا۔ پاکستان کا مطلب لاالہ اللہ ہے اور اس کا مقصد محمد رسول اللہ ہے۔ عظیم مائیں ہی عظیم قوم کی بنیاد رکھتی ہیں۔ یہ کالج آپ کے لئے مادر علمی ہے اور اس میں حصول علم آپ کے لئے عبادت ہے۔ شرم و حیاء آپ کی حفاظت کی ضمانت ہے۔ آپ چاہیں تو اسی کالج کو استحکام پاکستان کا مورچہ بنا سکتی ہیں”۔
جناب عبدالرئوف مغل صاحب نے وسیع و عریض کالج اور اس میں بننے والی عالیشان عمارت کی تکمیل کے مراحل میں حائل رکاوٹوں پر تفصیل سے روشنی ڈالی اور بتایا کہ اس جگہ پر قبضہ مافیا کی نظر تھیِ۔ وہ اس کو رہائشی منصوبے میں تبدیل کرنا چاہتے تھے لیکن وزیراعلیٰ کی ہدایت اور علاقے کے عوام کے بے مثال تعاون کے باعث یہاں کالج بن گیا ۔یہ کالج انشااللہ یونیورسٹی کا درجہ اختیار کرے گا ۔
محترم غلام دستگیر خان صاحب علالت کے باوجود گھنٹوں کی اس تقریب میں موجود رہے۔ اپنے صدارتی خطبے میں انہوں نے رئوف مغل صاحب کی جرات اور دور اندیشی کو خوب سراہا۔ انہوں نے اس مغل رہنما کو سر سید ثانی کا خطاب دیا ۔انہوں نے مسلم لیگ (ن) کی طرف سے عوامی سہولت کے متعدد منصوبوں پر روشنی ڈالی۔ ان کا انداز سادہ لیکن دلنشین تھا۔ لوگوں نے بڑے انہماک سے ان کی گفتگو سنی۔اہل علاقہ زندہ باد کے نعرے لگاتے رہے ۔
تقریب میں ثمینہ بیگ نے طالبات کو اپنی کوہ پیمائی کے حوالے سے حیران کردینے والے واقعات بتائے اور کہا کہ جس طرح محترمہ فاطمہ جناح نے اپنے عظیم بھائی قائداعظم کا ساتھ دے کر قیام پاکستان کو ممکن کر دکھایا اسی طرح اب پاکستان کی تعمیر و ترقی میں ہر بہن بھائی کو مل کر خدمت کرنا ہوگی۔بیگ راج بڑا جاندار خطاب کیا ۔
کالج کی افتتاحی تقریب کے اختتام پر کالج کے مختلف شعبہ جات دکھائے گئے’کالج کے ساتھ ملحقہ سرسید گرلز ہائی سکول کا دورہ کیا گیا۔ننھی طالبات نے مختلف سماجی موضوعات کو اپنی تخلیقی صلاحیتوں کے ذریعے اُجاگر کیا اور ان کے ہاتھوں کے بنے ہوئے سادہ مگر بامعنی شاہکار دکھائے۔ نظم و ضبط کے اعتبار سے یہ ایک مثالی سکول ہے ۔ واپسی پر جناب عبدالرئوف مغل نے اپنے گھر پر پر تکلف لنچ کا اہتمام کیا تھا۔ اپنائیت کی انتہا تھی۔ ان کے مہمان خانے میں بیٹھ کر اور ان کے بیٹوں سے بات چیت کرکے یہ اندازہ ہوا کہ آپس کے اتفاق اور احترام سے کس طرح ایک عام سا گھرانہ ترقی اور خوشحالی کی شاندار منازل طے کرسکتا ہے۔

شخصیات بہت اہم ہوتی ہیں۔افراد ہی قوموں کے مقدر سنوارتے اور بگاڑتے ہیں۔ فرد کو ملت کے مقدر کا ستارہ کہا گیا ہے۔رجال عظیم کسی ملت کے دامن میں سجے ہوئے وہ ہیرے اور جواہرات ہوتے ہیں جن کی تعداد سے قوموں کی توانائی کا اندازہ ہوتا ہے۔قحط الرجال کا مطلب ہی یہی ہے کہ قوم میں رہبری کے منصب پر فائز ہستیاں دُنیا میں نہ رہیں۔ مصلحین سے تہی دامن اقوام بے راہ روی اور گمراہی کا شکار ہوجاتی ہیں۔
قیام پاکستان سے قبل عظیم شخصیات کی ایک تسبیح موجود تھی۔دانے بکھرتے گئے اور قائداعظم کی جیب میں کھوٹے سکّے بچ گئے تھے۔ جو اصلی لوگ تھے وہ اُفتاد زمانہ کا شکار ہوگئے۔ گزشتہ ستر سالہ تاریخ میں ہمیں افراد کار دکھائی تو دیتے ہیں لیکن ان کی تعداد محض آٹے میں نمک کے برابر ہے۔ جنرل حمید گل مرحوم و مغفور ان محدوے چند لوگوں میں شامل ہیں جن کے وجود سے قوم کے اندر اُمید اور یقین کی شمعیں ٹمٹاتی رہی ہیں۔ جنرل صاحب اُن پاکستانیوں کے لئے ایک نفسیاتی سہارا تھے جو خودی اور خوداری کے اوصاف سے لیس ہو کر ملّی تعمیروترقی میں اپنا حصہ ڈالنا چاہتے ہیں۔ جنرل صاحب کی ریٹائرمنٹ کے بعد کی زندگی کا مطالعہ زیادہ مفید ہے کیونکہ وہ اپنی سوچ اور فکر کے اعتبار سے مکمل طور پر آزاد تھے۔ عہدے کے بندھن یا کسی سرکاری حیثیت کی نزاکتوں سے مبّرا جنرل حمید گل کا کردار روشن بھی ہے اور قابل تقلید بھی۔

ہمارا قومی مزاج یہ بن گیا ہے کہ جب کوئی عظیم شخصیت ہمارے درمیان رہتی ہے تو ہم اس کے نظریات کو اہمیت نہیں دیتے۔ جنرل صاحب ہر کسی کو پُکارتے رہے کہ آئیں اور پاکستان کو اس کی اصل اساس پر قائم رکھتے ہوئے آگے لے کر چلیں۔ انہوں نے ہر فورم پر پاکستان کو عظیم اسلامی ریاست بنانے کا تصور پیش کیا۔ سیکولر طبقے کی سازشوں کو بے نقاب کیا اور اسلام کی حقانیت اور اسلامی دنیا کی عظمت کے گُن گائے۔ کچھ نے ان کی آواز پر لبیک کہا ‘ بہت سوں نے ان کی بات کو سچ مانا لیکن وہ اقتدار کے سورج کی پوجاپاٹ میں ہی مصروف رہے۔ بعض سماجی اور سیاسی حلقے چند قدم ان کے ساتھ ضرور چلے لیکن راستے میں ہی تھک گئے۔ جنرل صاحب کبھی مایوس نہیں ہوئے۔ انہیں بڑے سے بڑے جلسوں میں سن لیں یا چھوٹی سی چھوٹی محفلوں میں دیکھ لیں’ ایک ہی نظریہ اور ایک ہی سوچ کے داعی تھے۔ وقت’ حکومت’ یا ماحول نے جنرل صاحب کو کبھی بھی متاثر نہیں کیا۔ وہ بی بی سی کو انٹرویو دے رہے ہوں یا کسی مقامی اخبار کے ساتھ بات جیت کر رہے ہوں اپنے بنیادی فلسفے سے سرمُو انحراف نہ پائیں گے۔
نسیم انور بیگ جنت نصیب کی میز پر جنرل صاحب سے اکثر ملاقات رہتی تھی۔ تھنکرز فورم میں بھی ان کے افکار سننے کو ملتے تھے۔میں نے جنرل صاحب کی زندگی میں ان کے حوالے سے کالم لکھے”’جنرل حمید گل امریکہ سے ڈرتے کیوں نہیں” اس تحریر پر انکل نسیم انور بیگ کی طرف سے بہت پذیرائی ملیِ۔ انکل نے اس کالم کی فوٹوکاپیاں تقسیم کرائیں۔ جنرل صاحب نے شکریے کا فون کیا۔ یونائیٹڈ انٹرنیشنل گروپ کے آفیسرز نے جنرل صاحب کے اعزاز میں عشایئے کا اہتمام کیا تھا۔ یہ عشائیہ ایک فکری نشست میں تبدیل ہوگیا۔ آفیسرز نے دنیائے اسلام سے لے کر پاکستان کے اس وقت کے حکمران پرویز مشرف تک ہر طرح کے سوالات کئے۔ جنرل صاحب نے کمال تحمل سے جوابات دیئے گئے۔انہوں نے عالمی معیشت پر بھی سیر حاصل گفتگو کی۔ وہ علامہ اقبال کے اشعار اور قرآنی آیات سے ایسے حوالے دیتے تھے کہ سامع انکار کر ہی نہیں سکتا تھا۔ مجھے تو وہ اقبال کے شاہین دکھائی دیئے۔حاضر وموجود سے بیزار کردینے والے امام برحق لگے۔انہوں نے اس محفل میں بھی ”نرم انقلاب” کے خدوخال بیان کئے تھےِ۔انہیں پاکستان کے عروج کے بارے میں لازوال قسم کا اعتماد تھا۔ وہ پاکستانی طالبان کو بھارت’اسرائیل اور امریکہ کی واردات سمجھتے تھے۔ وہ افغان قوم کی بہادری کے قائل تھے اور امریکیوں کی شکست کو یقینی سمجھتے تھے۔
آج جنرل صاحب ہمارے درمیان نہیں ہیں تو اس کا یہ مطلب نہیں کہ ان کا مشن وفات پا گیا ہے۔ انکل نسیم انور بیگ نے جب نظریہ پاکستان سنٹر کی بنیاد رکھی اور بعد ازاں مجھے اس کی صدارت کی ذمہ داری سونپی تو سرپرست اعلیٰ کے طور پرجنرل حمید گل کا نام لکھا۔یہ سنٹر آج بھی جنرل صاحب اور انکل بیگ کے نظریے۔نظریہ پاکستان یعنی نظریہ اسلام کی شمع روشن کئے ہوئے آگے بڑھ رہا ہے۔ جنرل صاحب کی روح سے میرا اور میرے ساتھیوں کا یہ عہد ہے کہ ہم حمید گُل مرحوم و مغفور کے مشن کو زندہ رکھیں گے اورقحط الرجال کے اس موسم میں ان کی یادوں اور باتوں سے قومی افکار کو تازہ کرتے رہیں گے۔ اور ثابت کریں گے کہ جسم کی موت کوئی موت نہیں ہوتی!
سانس تھم جانے سے اعلان نہیں مر جاتے
ہونٹ جم جانے سے فرمان نہیں مرجاتے

بی بی سی کی رپورٹ آنے کے بعد خیال کیا جارہا تھا کہ وزارت داخلہ حرکت میں آئے گی اور ایم کیو ایم کے متحرک رہنمائوں کے گھروں پر چھاپے پڑیں گے’ دفاتر سیل ہوں گے اور الطاف حسین صاحب کو برطانیہ سے طلب کیا جائے گا۔ ”ایگزیکٹ” کے معاملے میں چوہدری نثار علی خان نے جو سرعت دکھائی تھی’ اس سے یہی توقع تھی ۔ نیو یارک ٹائمز اور بی بی سی کا” تقدس” تقریباً ایک جیسا ہے تو ردعمل بھی برابر کا ہونا چاہیے۔ لیکن چوہدری صاحب اس کے برخلاف بارہ گھنٹے تک خاموش رہے ‘ وزیر دفاع نے بین السطور گفتگو کی اور قومی اسمبلی میں طعنہ دیا کہ ایم ۔ کیو ۔ ایم کی ”لوڈشیڈنگ ” ہونے والی ہے۔ وزیراعظم میاں محمد نوازشریف کو کہیں سے فون آیا ہوگا انہوں نے چوہدری نثار کو بی بی سی کی رپورٹ کے حوالے سے تحقیقات کرنے کا حکم دیا ہے ۔ چوہدری صاحب نے تحقیقات کے اس کام کو طول دینے کے لئے برطانیہ سے معلومات حاصل کرنے کی راہ ڈھونڈی ہے۔ خط جائے گا’ کب جائے گا’ پھر جواب آئے گا۔بی بی سی والے حکومت پاکستان کو ثبوت فراہم کریں گے یا ٹال دیں گے۔ ابلتا پانی ہے اور اس میں ٹھنڈی مدھانی ہے۔ وزارت داخلہ اسے گھماتی رہے گی۔ہلکا پُھلکا شور اُٹھے گا اور پھر میڈیا کو کوئی بڑی خبر مل جائے گی۔ جس طرح ایم۔ کیو۔ ایم کے خلاف بی بی سی کی رپورٹ نے ملک میں جاری لوڈشیڈنگ کے سبب جاری حملوں سے مسلم لیگ (ن) کو نجات دلائی ہے اسی طرح کوئی بڑی خبر ایم۔ کیو ۔ ایم کو موجودہ صورتحال سے نکال دے گی۔1990ء سے لے کر آج تک ایم۔کیو۔ایم کے خلاف وطن سے غداری کے متعدد الزامات لگائے گئے لیکن ثابت کچھ نہ ہوسکا الٹا متحدہ کے ووٹ بنک میں اضافہ ہوا۔ مارچ میں نائن زیرو پر چھاپہ مارا گیا ‘چیختے چنگھاڑے ثبوت ملے۔ قاتل پکڑے گئے ۔غیر ملکی اسلحہ برآمد ہوا ۔لیکن اسی حلقے میں جب الیکشن ہوا تو پی ٹی آئی الیکشن ہار گئی۔
بی بی سی کی ایک رپورٹ پہلے بھی چل چکی ہے الطاف حسین کی لائیو تقاریر ریکارڈ پر ہیں جن کی بنیاد پر ماہرین قانون کہہ چکے ہیں کہ اشتعال اور خون خرابے کے مقدمات بن سکتے ہیں۔ ایک بھاری بھر کم فائل جناب عمران خان صاحب بھی برطانوی پولیس کو فراہم کرچکے ہیں۔ ذوالفقار مرزا مستند ثبوت دے چکے ہیں۔آخر وہ کونسی طاقت ہے جو ریاست پاکستان کو ایم۔ کیو ۔ایم کے خلاف کوئی مقدمہ دائر نہیں کرنے دیتی۔ رائو انور اور صورت مرزا کے بیانات کے بعد کونسا ثبوت چاہیے؟
دو ہی صورتیں ہوسکتی ہیں ۔ یا تو ایمِ۔کیو۔ایم کے بقول انہیں غریب اور مڈل کلاس عوام کے حقوق کی جنگ لڑنے کی سزا دی جارہی ہے یا پھر کوئی خفیہ ہاتھ ہیں جو ایم۔کیوِ۔ایم کو زندہ رکھنا چاہتے ہیں۔ یہ اندرونی ہاتھ ہیں یا بیرونی۔ یہ بھی ایک راز ہے۔
بی بی سی کا ادارہ اپنی رپورٹ پر قائم ہے لیکن الطاف حسین نے اس رپورٹ کو بالکل جھوٹ قرار دیا ہے۔ انہوں نے اپنے پرجوش کارکنوں سے جذباتی خطاب کیا ہے ۔ ان کا یہ جملہ بہت ہی کاٹ دار ہے ”جب ضرورت ہوتی ہے تو ایم۔کیو۔ ایم محب وطن اور جب کام نکل جاتا ہے تو غدار”۔ کیا یہ حقیقت نہیں کہ مسلم لیگ (ن) اور پی پی پی نے اپنے سیاسی مفادات کے لئے متحدہ کے ساتھ اتحاد بنائے ہیں۔ متحدہ کے لوگ اسمبلیوں اور قائمہ کمیٹیوں میں موجود ہیں۔ متحدہ کے خلاف جتنے ثبوت آرہے ہیں۔ وہ کسی سول یا وفاقی ادارے کی طرف سے مہیا نہیں کئے گئے۔ رینجرز کی تحویل میں آنے والے مجرموں کی زبانی سامنے آئے ہیں ۔ان ثبوتوں کو عدالت لے جانے میں کیا چیز مانع ہے۔
عوام یہ توقع کرتے ہیں کہ اور ان کی یہ توقع بجا بھی ہے کہ آئیں بائیں شائیں کرنے کی بجائے آپریشن ضرب عضب کو اس کے منطقی انجام تک پہنچنے دیںِ۔ غیر ملکی اطلاعاتی اداروں کی رپورٹوں کو بنیاد بنا کر اگر تحقیقات ہونی ہیں تو پھر بی بی سی کی رپورٹ پر بھی ٹھوس ردعمل کی ضرورت ہےِ۔ تحقیقات کے لئے خط لکھنے جیسے وقت گذاری کے اقدامات سے پتہ چلے گا کہ آپ رینجرز کی پیٹھ میں چھرا گھونپنے کا ارادہ رکھتے ہیں۔ایسا تاثر تقویت پا رہا ہے ۔ سندھ حکومت سے وابستہ کرپٹ لوگوں کو خاموشی سے باہر جانے دیا جارہا ہےِ۔(ن) لیگ کو یاد رکھنا چاہیے کہ فوج نے ہی اسے دھرنے سے بچایا ہے۔ایسا نہ ہو کہ اب کی بار یہ سہارا بھی کام نہ آسکے اس لئے تحقیقات کروائیں ‘انتظار نہیں !!

سونامی پوے ملک میں سرگرداں ہے۔فیصل آباد کے دھوبی گھاٹ میں تعداد زیادہ نہ سہی لیکن عمران خان کی گھن گھرج جوں کی توں ہے۔ پنجاب کے وزیرقانون رانا ثناء اللہ جگت بازی کے ماہر ہیں انہوں نے لطیف پیرائے میں جلسے کی کم تعداد پر تبصرہ کرتے ہوئے کہہ دیا” اب عمران نہ گھر کے رہے نہ گھاٹ کے” خدا کرے کہ نوجوان نسل کو اس محاوراتی جگت کا مکمل ادراک حاصل نہ ہو ورنہ لطافت کثافت میں بدل جائے گی اور تحریک انصاف کا سوشل میڈیا بریگیڈرانا ثناء اللہ صاحب کو حسب سابق آڑے ہاتھوں لیں گے۔

عمران خان صاحب نے چاروں طرف جنگ چھیڑ رکھی ہے ۔انہوں نے جیو ٹی وی نیٹ ورک اور جنگ گروپ کو (ن) لیگ کا دوسرا پی ٹی وی قرار دیا ہے۔جیو کی ٹی وی سکرین پر جناب خان صاحب کو ایسے اینکرز کے ساتھ بریکیٹ کردیا گیا ہے کہ صرف یہ تصویر بار بار چلانے پر ہی تحریک انصاف کے کارکنوں کا بلڈ پریشر بلندیوں کو چھونے لگتا ہے۔جیو اور جنگ نے افواج پاکستان اور آئی ایس آئی سے معافی مانگ کر اپنے ”دشمنوں” کی تعداد کو کم کرنے کی حکمت عملی اپنائی ہے۔ عمران خان کو تیزی سے تبدیل ہوتی صورتحال میں کوئی نہ کوئی ”یوٹرن”لینا ہوگا۔ ورنہ اسٹیبلشمنٹ’ جنگ گروپ اور (ن) لیگ قومی امور پر ایک ”صفحے ”پر آجائیں گے اور عمران بھائی کا سونامی پتھروں سے سر ٹکراتا رہ جائے گا۔(ق) لیگ افواج پاکستان کے احترام میں دہری ہوئی جارہی ہے ۔ لیکن وہ کبھی بھی جیو گروپ کے خلاف عمران خان کی مہم کا حصہ نہیں بنے گی۔ جیو کی معافی کا قصہ بھی عجیب ہے۔ عوام کا خیال ہے کہ اونٹ پہاڑ کے نیچے آیا تو ہے ورنہ کہاں جیو اور کہاں معافی نامے!تصور بھی نہیں کیا جاسکتا تھا۔ اصل میں جیو کے اینکرز اور میرشکیل الرحمن کی نفسیاتی حدود میں زمین آسمان کا فرق ہے۔میر صاحب سرتاپا کاروباری شخصیت ہیں۔ انہیں کاروباری مفادات کے لئے ہزار بار معافی مانگنی پڑے مانگ لیتے ہیں۔ اینکرز کی اپنی انا ہوتی ہے۔ ان کے شائد معاشی مفادات ٹی وی چینل کی طرف سے ملنے والے وظیفوں کے علاوہ بھی کہیں سے پورے ہوتے ہیں۔ باخبر حلقے بتاتے ہیں کہ میر صاحب تو 20اپریل کو ہی معافی مانگنے پر بضد تھے لیکن ”جیونیٹ نے بغاوت کی دھمکی دے دی تھی اس لئے معافی ذرا سی لیٹ ہوگئی۔ اب جب کہ ہفتہ دس دن میں معافی تلافی والا مرحلہ بھی گذر جائے گا تو پھر عمران صاحب کا کیا بنے گا؟ میں تو سوچتا ہوں تو لزر جاتا ہوں کہ سونامی نسل کو منہ چھپانے کی جگہ نہیں ملے گی اور شائد ہی کوئی ٹی وی چینل تحریک انصاف کا ساتھ دے پائے گا۔
اپنے خوف کی وجوہات میں سے کچھ وجوہات زمینی حقائق سے بھی جڑی ہوئی ہیں۔ جناب شیخ رشید صاحب کا خیال تھا کہ راولپنڈی اسلام آباد میں میٹروبس چلنے کے بعد (ن) لیگ یہاں سے کبھی ایک سیٹ بھی نہیں لے سکے گی۔ یہ خیال لاہور میٹروبس منصوبے کے آغاز میں بھی پیش کیا گیا تھا ۔لیکن 11مئی 2013ء کو لوگوں نے اسی میٹروبس کے سبب ہی (ن) لیگ کو ووٹ ڈالے۔ ان گجروں نے بھی ووٹ ڈال دیئے جنہیں شہر میں دودھ پہنچانے کا سستا ترین ذریعہ مل گیا تھا۔میٹروبس راولپنڈی کے خلاف بھی کوئی عوامی ردعمل سامنے نہیں آیا۔جہاں جہاں کھدائی ہورہی ہے وہاں لوگ وقتی وطر پر تنگ ہیں۔ لیکن حکومت نے انہیں ”ڈسٹ ماسک” دے دیئے ہیں کہ فی الحال وہ اڑتی دھول سے بچیں اور جب دھول بیٹھ جائے گی تو پھر جڑواں شہر کسی یورپی شہر کا نقشہ پیش کر رہے ہوں گے اور جناب شیخ رشید کسی پل پر چہل قدمی کرتے سگار پی رہے ہوں گے۔
میٹروٹرین منصوبے کے اعلان نے لاہوریوں کے اندر ایک احساس تفاخر پیدا کردیا ہے۔ ان کا لاہور’ لندن’ نیویارک’ٹوکیو جیسا ہوجائے گا۔ ان کے گھروں کی قیمتوں میں اضافہ ہوجائے گا۔ ان کا اسٹیٹس بین الاقوامی نوعیت کا ہوجائے گا۔ جنگلہ بس کا طعنہ مارنے والے ابھی تک میٹروٹرین کے حوالے سے کوئی پھبتی مارکیٹ نہیں کرسکے۔عمران خان کا سونامی شدید غصے میں ہے ۔وہ پارلیمنٹ کے سامنے ”پھینٹی ” کھانے کے بعد پنجاب اسمبلی کے سامنے ”دادشجاعت” دینے کی تیاریاں کر رہا ہے ۔لیکن میٹروٹرین شروع ہوچکی ہے اوراس کے ساتھ ٹکرانے کے صرف دو نتیجے نکل سکتے ہیں ۔ٹرین کو پٹڑی سے اتار دیں یا ٹرین کے نیچے آکر ۔!!

 مظفر آباد کی ہردلعزیز شخصیت اور مغل قوم کے عظیم فرزند عارف مغل حکومت آزادکشمیر میں مشیر برائے وزارت اطلاعات و نشریات ہیں ۔گزشتہ دنوں انہوں نے اپنی بیٹی کی شادی پر مدعو کیا۔ ہمدم دیرنہ عظمت اللہ اور معروف صحافی اسد عباس بھی ہمراہ تھے۔ آجکل نظریہ پاکستان کی ترویج کے لئے کمر بستہ ہوں اوراللہ تعالیٰ کی کرم نوازی سے اس خدمت کے لئے بہتر سے بہتر مواقع میسر آرہے ہیں ۔ میں کیا اور میری ہستی کیا۔ ارادہ نیک ہو تو اسباب پیدا ہوہی جاتے ہیں۔عظمت اللہ نے بتایا کہ ان کے کلاس فیلو اور قائداعطم یونیورسٹی میں راقم کے ہاسٹل فیلوجناب فیاض علی عباسی آج کل پرنسپل سیکرٹری ٹو پرائم منسٹر کے عہدے پر فائز ہیں اور ان سے بھی ملنا ضروری ہے۔ باتوں باتوں میں یہ طے پایا کہ ممکن ہو تو فیاض عباسی صاحب کی وساطت سے وزیراعظم چوہدری عبدالمجید سے بھی ملاقات ہوجائے اور ان کو نظریہ پاکستان کے حوالے سے لٹریچر دیا جائے اور التماس کی جائے کہ پاکستان کے اساسی نظریہ سے آگاہی کے لئے تعلیمی اداروں میں خصوصی سرگرمیاں شروع کرائی جائیں۔

ملاقات طے پاگئی ۔ جناب وزیراعظم نے بڑی خندہ پیشانی سے ہمیں وزیراعظم ہائوس میں خوش آمدید کہا۔ چوہدری صاحب سے گفتگو شروع ہوئی۔ جب راقم نے قرآنی آیات اور علامہ اقبال کے اشعار کی روشنی میں ”نظریہ پاکستان اور نظریہ اسلام” کی وضاحت کی تو وزیراعظم نے نہ صرف اس کی تائید کی بلکہ انہوں نے اہم نکات پر دلائل دیئے۔مجھے یہ جان کر حیرانی ہوئی کہ ڈیل ڈول سے بظاہر سادہ دکھائی دینے والا شخص اندر سے کتنا گہرا اور سماجی اور سیاسی مسائل پر کس قدر مضبوط گرفت رکھتا ہے۔ پندرہ منٹ والی ملاقات اڑھائی گھنٹے تک جاری رہی۔ میں نے جناب ڈاکٹر مجید نظامی اور انکل نسیم انور بیگ (مرحوم) کی حوصلہ افزائی سے قائم ہونے والے نظریہ پاکستان سنٹر کی سرگرمیوں سے آگاہ کیا۔ مستقبل کے حوالے سے اپنے ارادوں اور منصوبوں سے آگاہ کیا اور تعلیمی اداروں میں طلبہ و طالبات کے دلوں میں اس نظریے کے ساتھ وابستگی پیدا کرنے کے لئے کی گئی کوششوں اور کاوشوں کا تفصیلی تذکرہ کیا۔جناب وزیراعظم نے بڑے انہماک سے گفتگو سنی اور پھر انہوں نے بتایا کہ وہ بھی یہی چاہتے ہیں کہ تعلیمی اداروں میں محض انگریزی پر ہی زور نہ دیا جائے بلکہ بچوں کے ذہنوں میں آغاز سے ہی پاکستان’ نظریہ پاکستان اور قرآن کے بارے میں فہم و ادراک پیدا کردیا جائے۔ وزیراعظم کا کہنا تھا کہ ہمیں اپنے بچوں کو اسلامی تعلیم دینی چاہیے تاکہ وہ ڈاکٹر اور انجینئر بن کر اس مٹی ‘اس تہذیب اور اسلامی اقدار سے جڑے رہیں۔”ان گائیڈڈ میزائل” تیار نہیں کرنے بلکہ سچے اور اچھے شہری ہی ہمارے اتحاد ‘یکجہتی اور ترقی کے ضامن ہوسکتے ہیں۔ان کا کہنا تھا کہ وہ یکساں نصاب متعارف کروانے کے لئے سرگرم عمل ہیں ۔انہوں نے کہا کہ نظریہ پاکستان سنٹر کو اس نصاب میں نظریاتی پہلوئوں کے حوالے سے تجاویز دینی چاہیں۔
وزیراعظم آزادکشمیر سے تفصیلی ملاقات کے دوران کشمیر کے مسائل اور پاکستانی حکومت کے طرز حکمرانی پر بھی بات ہوئی۔ چوہدری عبدالمجید کا کہنا تھا کہ کشمیریوں کے مسائل کے حوالے سے حکومت پاکستان کے حکام پوری طرح تعاون نہیں کرتے۔ وعدے تو بہت ہوچکے ہیں لیکن ان وعدوں کی تکمیل بڑا ہی پیچیدہ عمل ہے۔انہوں نے محترمہ بے نظیر بھٹو کو بار بار یاد کیا اور مرحومہ کی بے حد تعریف بھی کی۔انہوں نے کہا کہ میاں نواز شریف پاکستان کی آخری امید ہیں کیونکہ ان کے اندر کام کرنے کی صلاحیت موجود ہے۔اور ان کی عوام الناس میں following بھی موجود ہے۔انہوں نے کہا کہ سابقہ زرداری دور میں بھی بہت سی ایسی پالیسیاں دی گئی ہیں جن کے دوررس نتائج نکلیں گے۔ اور جن کے فوائد سے آنے والی حکومتیں اور عوام فائدہ اٹھائیں گے۔ ان کے مطابق جمہوریت کا تسلسل لازمی ہے۔اسی سے ترقی اور خوشحالی کے دروازے کھلیں گے۔وزیراعظم نے یہ بھی کہا کہ اگر میاں صاحب بھی اس ملک کو صحیح ڈگر پر نہ ڈال سکے تو پھر منزل بہت دور چلی جائے گی۔چوہدری صاحب نے مسئلہ کشمیر کے حوالے سے بھی اپنا موقف دھرایا اور انہوںنے کشمیر کے اندر توانائی کے لئے چھوٹے ڈیموں کی تعمیر کی بات کی۔ وہ منگلا ڈیم اپ رائزنگ کے حوالے سے لوگوں کی شکایات کا بھی ذکر کرتے رہے۔
وضح دار شخصیت رکھنے والے وزیراعظم نے بہترین تواضع کرنے کے بعد مجھے اپنی گاڑی میں بیٹھایا اور ہم عارف مغل صاحب کے ہاں شادی میں پہنچے۔ وزیراعظم نے وزراء سے میراا تعارف کروایا اورشادی کے اختتام پر انہوں نے بڑی چاہت سے دوبارہ آنے کی دعوت دی اور خود بھی اسلام آباد میں آکر تفصیلی ملاقات کا وعدہ کیا۔
ملاقات کے بعد احساس ہوا کہ چوہدری صاحب ایک ایسے وزیراعظم ہیں جن کا دل اپنے لوگوں کے لئے دھڑکتا ہے۔ وہ ہر شعبہ میں بہتری پیدا کرنے کے لئے ایک تڑپ رکھتے ہیں اور اس غرض کے لئے وہ اپنے سیاسی حریفوں تک سے بھی مشاورت کرتے ہیں۔
شادی سے فارغ ہوئے توہم فیاض عباسی کے ہمراہ وزیر تعلیم میاں عبدالوحید کے ہاں ان کی تیمارداری کے لئے گئے۔چوہدری محمد رشید’ وزیرتعمیرات عامہ و مواصلات اور سردار جاوید ایوب وزیر جنگلات سے بھی تفصیلی ملاقاتیں ہوئیں سکالرز کالج میں نظریہ پاکستان کے حوالے سے طلبہ و طالبات کے لئے ایک Motivational لیکچر دیااور سکالرز کلب کے افتتاح کے لئے بھی خاکسار کو عزت ملی ۔مظفرآباد آمد سے لے کر رخصتی تک شہد جیسے میٹھے انسان نصیر مغل کی محبتیں ہر دم ہمارے شامل حال رہیں۔ دل ان کے تحریری شکریے پر مجبور ہے۔

پاکستانی قوم کو لوٹنے والوں کی متنوع قسمیں اور متعدد شکلیں ہیں۔کسی نے ڈبل شاہ بن کر لوٹا اور کچھ نے ڈبل شاہ کو بھی لوٹ لیا۔بعض مضاربہ کمپنیوں کے نام پر جبہ و دستار میں ظاہر ہوئے اور پھر کھربوں کی لوٹ مار میں سے کروڑوں دے دلا کر چھوٹ گئے۔عوام ہاتھوں میں سادہ کاغذوں پر لکھی مبہوم سی تحریریں لئے نیب کے دفتروں کا چکر لگاتے ہیں اور پھر قسمت کو کوستے واپس گھر آجاتے ہیں۔جو وارداتیں صرف فلموں میں دیکھی جاتی تھیں وہ آئے روز ہماری زندگی میں رونما ہورہی ہیں۔ ریاستی ادارے اپنی اپنی تنخواہیں اور مراعات کو یقینی بنانے کی حد تک بہت مستعد ہیں۔لوگوں کی جمع پونجیوں کے ساتھ کیا ہوتا ہے کسی کو فکر ہے نہ کہیں ذکر۔اخبارات میں خبریں شائع ہوتی ہیں۔چند روز شوروغوغا ہوتا ہے اور پھر کوئی نیا سکینڈل پہلے والے سکینڈل کو زیر زمین کردیتا ہے۔

پھر بھی ذرائع ابلاغ کا شکریہ کہ نفسیاتی حد تک دل کا غبار نکالنے کا سامان تو ہوہی جاتا ہے۔ لیکن لٹیروں کا ایک گروہ ایسا بھی ہے جو انتہائی صفائی سے سروس چارجز اور جرمانے کے نام پر ہر نیک اکائونٹ ہولڈر کی جمع پونجی’تنخواہ اور اثاثے کو چوہوں کی طرح کترتے رہتے ہیں۔ اکثر کھاتے داروں کو علم ہی نہیں ہوتا کہ بینک میں پڑی ان کی رقم کے ساتھ کیا ہورہا ہے۔
راقم نے ایک اسلامی بینک سے گاڑی فنانس کروائی اور یہی میری سب سے بڑی خطا تھی کہ میں نے بینک کے ساتھ یہ تعلق قائم کیا۔ بینک کے نمائندوں نے میرے دفتر آکر بریفنگ دی۔اطمینان دلایا اور بتایا کہ دراصل بینک کو کوئی فائدہ ہی نہیں یہ تو کنزیومر کی سہولت کے لئے بینک نے ایک سروس دی ہوئی ہے۔ میں نے بھی کیکولیٹر پر حساب کتاب لگایا اور سوچا کہ یکمشت کل رقم دینے کی بجائے دھیرے دھیرے قسطیں دیتا رہوں گا اور یوں پانچ سال بعد گاڑی اپنی ہوجائے گی۔پہلے تو ٹیکس کے نام پر ہی ”ٹوکا” چلا جس کا پہلے سے بتایا نہیں گیا تھا۔ پھر ٹریکر اور انشورنس کی لازمی بلکہ بینک کی طرف سے ہی متعین کردہ کمپنیوں کے ذریعے معاملات طے کرنے کی پابندی نے ہی جیب پر ڈاکہ ڈالا۔ اور جب گاڑی دے دی گئی تو متعلقہ بینک اور اس کے افسر کسی طرح کی تحریری معلومات دینے سے گریزاں دکھائی دیئے۔ ایک روز شام کے وقت پیرسوہاوہ کی طرف ہوا خوری کے لئے نکلا۔چڑھائی کے وسط میں جا کر گاڑی بند۔بیوی بچے ساتھ’دو گھنٹے تک تگ و دو کرتا رہا۔اندازہ ہوا کہ ٹریکر کے ذریعے گاڑی بند کردی گئی ہے۔بچے پریشان’بینک کے درجن بھر لوگوں کو فون کرنے پر گاڑی اسٹارٹ ہوئی۔ حالانکہ راقم نے ملتان’لاہور’سوات’مری اور اسلام آباد کی حدود میں گاڑی چلانے کی پیشگی اطلاع بھی کررکھی ہے۔منال تو اسلام آباد کی حدود میں ہی ہے ۔گاڑی چوری ہونے کے خدشے کے بہانے بینک والے کس قدر پریشان کرتے ہیں اس کا اندازہ ان تمام لوگوں کو ہے جو بدقسمتی سے کار فنانسنگ کے ہتھے چڑھے ہیں۔اگر خدانخواستہ یہ گاڑی کسی اجاڑ جگہ بند کردی جاتی اور کوئی جانی یا مالی نقصان ہو جاتا تو اس کا ذمہ دار کون ہوتا؟۔
آپ ایک بار اپنے بینک اکائونٹ کی ماہانہ شیٹ نکال کر دیکھیں۔اگر آپ نے اے ٹی ایم کارڈ رکھا ہوا ہے اور آپ اسے استعمال کرتے ہیں تو یقین جانیئے کہ آپ ہر بار استعمال کرنے پر کافی روپے بینک کو دے چکے ہوں گے۔ لاکھ روپے نکلوائیں تو سمجھ آجائے گی۔پاکستان میں یہ طرفہ تماشہ ہے کہ آپ کی بینک میں رکھی رقم بڑھنے کی بجائے خودبخود کم ہوتی جائے گی ۔ہمارے ایک دوست نے ایک روز ایک بینک کے اے ٹی ایم سے کیش نکلوانے کے لئے کارڈ ڈالا۔ مشین کی ہدایات کے مطابق عمل کیا۔ رقم باہر آنے کا انتظار کیا۔ رقم تو نہ آئی البتہ کارڈ اور سلپ باہر آئے۔ سلپ پر نکلوائی جانے والی رقم درج تھی۔سخت تشویش کے عالم میں بینک منیجر کے پاس حاضری دی۔ جواب ملا کہ آپ نے سلپ غور سے نہیں پڑی۔آپ کی ٹرانسیکشن ہوئی پھر ریورس ہوگئی۔ عرض کی کہ میرے پیسے تو نہیں کٹیں گے۔جواب تھا’ٹرانزیکشن ہونے اور واپس ہونے پر اے ٹی ایم چارجز کے سوا کچھ نہیںکٹے گا۔یعنی کہ پچاس ساٹھ روپے نکل گئے۔لوٹنے کے کیسا مہذب طریقہ ہے۔!
اگر آپ نے کریڈٹ کارڈ حاصل کرنے کی غلطی کر لی ہے تو کم از کم اسے استعمال کرنے کی غلطی نہ کیجئے گا۔پرائیویٹ کمپنی میں اعلیٰ ملازمت پر فائز ہمارے ایک دوسرے کریڈٹ کارڈ استعمال کرتے ہیں۔مجھے انہوںنے اپنا بل دکھایا۔بل بھیجنے والے بینک نے کمال فن کی انتہا کردی۔بل پر ندرہ ہزار 9پیسے لکھا گیا تھا۔
اب آجکل 9پیسے ہوتے ہی نہیں۔کوئی بینک ہی پیسے والی کرنسی دکھادے تو مان جائیں گے۔لیکن یہ واردات کا انوکھا طریقہ ہے۔ دوست نے پندرہ ہزار روپے جمع کرا دیئے لیکن نو پیسوں کو اہمیت نہیں دی کیونکہ مل ہی نہیں رہے تھے۔ لیکن دوست کو علم نہیں تھا کہ وہ لٹیروں کی کس قسم سے پالا پڑا ہے۔ دوسرے بل کے ساتھ 9پیسے جمع نہ کرانے پر اٹھائیس سو روپے جرمانہ ڈالا گیا تھا۔خدا جانے کتنے لوگ ہیں جو کریڈٹ کارڈ استعمال کرتے ہیں اوراسی طرح ہر ماہ لٹنے رہتے ہیں۔
حکومت نے بینکوں کو کیا نکیل ڈالنی ہے۔بینک تو ہیں ہی حکمرانوں اور ان کے رشتہ داروں کے۔سال ہا سال سے بینکوں کی وارداتیں سہنے کے بعد میں اس نتیجے پر پہنچا ہوں کہ خدارا بینک سے کوئی کاروبار مت کرنا اور کم از کم ان سے کریڈٹ یا قرضہ مت لینا اور یہی مشورہ مجھے ملک بھر کے بے روزگار نوجوانوں کو ہے ۔اگر ایک بار پھنسو گے تو پھر تمہاری جوانی بڑھاپے میں ڈھل جائے گی۔لٹیرے تمہاری جان نہیں چھوڑیں گے۔!

کیا چرچے تھے۔قوم کو خوشخبری دی گئی تھی کہ جناب آصف علی زرداری نے امریکہ کی آنکھوں میں ایسی آنکھیں ڈالی ہیں کہ سپر پاور شرمندگی سے ”گونگی” ہوگئی ہے۔ ایران کے ساتھ گیس کی فراہمی کے معاہدے پر تہران میں دستخط کئے گئے اور پیپلزپارٹی نے اپنے انتخابی منشور میں اپنے سب سے بڑے کارنامے کے طور پر اسے درج کیا۔ لوگوں نے ووٹ کیوں نہ ڈالے اس پرلوگوں کو ہی موردالزام ٹھہرانا چاہیے کہ اتنے بڑے”کارنامے” کے بعد گیس کو ترستی عوام کے پاس تیر پر مہر لگانے کے سوا کوئی آپشن نہیں ہونا چاہیے تھا’ لیکن بیلٹ باکس خالی نکلے اور بقول اعتزاز احسن پی پی پی کا ”مینڈیٹ”چرا لیا گیا۔ عوام کے تحت الشور میں موجود تھا کہ انتخابات کی آمد سے چند مہینے پہلے حکومتیں جو ”کارنامے”سرانجام دیتی ہیں وہ صرف درشنی ہوتے ہیں۔

حقیقت سے ان کا دور کا تعلق بھی نہیں ہوتا۔ معاہدہ کرنے سے پہلے اور بعد میں کبھی نہیں بتایا گیا کہ اس کے لئے مطلوبہ رقم کہاں سے آئے گی اور امریکی پابندیوں سے امریکی قرضوں کی دلدل میں پھنسے پاکستان جیسے ملک کو کیسے چھوٹ ملے گی۔معاہدے میں صرف یہی نہیں بلکہ پاکستان کے ہاتھ پائوں باندھنے کا بھی اہتمام کیا گیا ۔ اگر پاکستان اپنے حصے کی پائپ لائن مقررہ مدت تک تعمیر نہ کرپایا تو روزانہ کے حساب سے لاکھوں ڈالر جرمانہ بھی ادا کرے گا۔ یوں اب دو ہزار چودہ سر پر ہے۔ ایران نے پہلے پانچ سو ملین ڈالرکا جھانسہ دیا اور پھر صرف انکار کردیا کہ جناب ہمارے پاس تو ڈالر ہیں ہی نہیں۔آپ کو کہاں سے دیں۔پاکستان کی اپنی حالت سب کے سامنے ہے۔اب جہاں آئی ایم ایف کے قرضے اتارنے کے لئے آئی ایم ایف سے ہی مزید قرضے لئے جارہے ہیں وہاں جرمانے ادا کرنے کے لئے مزید قرضہ لینا ہوگا۔ نہ امریکی پابندیاں ہٹنے والی ہیں نہ ہی ایران سے گیس آنے والی ہے۔ بلکہ آنے والے مہینے اور سال پاک ایران تعلقات میں مزید رخنے پیدا کرسکتے ہیں۔
سعودی عرب نے ایران اور شام کے خلاف کھلا اعلان جنگ کردیا ہے۔ ایسی صورت میں پاکستان کو توازن برقرار رکھنے کے لئے تنی ہوئی رسی پر ڈانس کرنا پڑے گا۔عربوں کو ناراض نہیں کیا جاسکتا۔ ایران کو خوش رکھنا جوئے شیر لانے کے مترادف ہے۔تعاون کے ہر دو طرف سے تقاضے بڑھیں گے۔ کوئی ہماری شلوار کھینچے گا اور کوئی پگڑی اتارے گا۔ دوستوں کے ہاتھوں ہی دشمنیوں میں گھرنے کا موسم قریب آپہنچا ہے۔
ہوائی منصوبے ان کے اشتہار چلانے اور ٹی وی مذاکرے کرنے کرانے کے ہم ماہر ہوچکے ہیں۔گیس بھی غریب کی چادر کی طرح ہوگئی ہے۔ سی این جی سیکٹر کو گیس دیں تو پھر گھروں کے چولہے بند ہوجاتے ہیں۔چولہے جلائیں تو پہیہ رک جاتا ہے۔صنعتوں کو گیس نہ ملے تو مزدور اور صنعتکار بیکار اور اگر صنعتکار کا خیال رکھیں تو پھر چھوٹے صوبوں کے حقوق ”غصب” ہوجاتے ہیں۔
ملازمین اور عوام قدرے سستے سفر سے بھی محروم کردیئے گئے ہیں۔سوزوکی اور ٹیکسی والے روزانہ مظاہرے کرتے ہیں۔تنخواہ سے بچوں کا پیٹ پالیں یا پٹرول پر چلنے والی گاڑیوں کے بھاری کرائے ادا کریں ۔ گھر سے نکلنا محال اور گھر بیٹھیں تو زندگی بدحال ۔جائیں تو آخر کہاں جائیں۔
پٹرولیم کی وزارت نے ”خوشخبری” سنائی ہے کہ اب ایران سے گیس درآمد کرنا مشکل ہوگیا ہے۔یہی وزارت تھی جس نے عباسیہ انداز میں سینہ پھلا کر متعدد مرتبہ یقین دلایا تھا کہ پاک ایران گیس معاہدے پر ہرحال میں عمل ہوگا اور اب یہی وزارت جھاگ کی طرح بیٹھ گئی ہے۔یہی نہیں یہ حکم بھی سنا دیا ہے کہ ملکی گیس کا ذخیرہ صرف سولہ برس مزید چلے گا اور سی این جی سیکٹر کو گیس صرف اسی صورت ملے گی جب ایل این جی کی درآمد شروع ہوگی۔سنا ہے قطر نے یہ مہنگی گیس بیچنے پر آمادگی ظاہر کردی ہے۔اس گیس کی درآمد کا انحصار بھی ہماری عدلیہ پر ہے۔ اگر اس عالمی معاہدے کو ہماری مقامی عدالتوں نے ”خلاف قانون” قراردے دیا تو پھر گیس نہیں ملے گی۔آنے والے موسم سرما میں عوام کیا تاپیں گے؟ کچھ کہا نہیں جاسکتا۔ ہوسکتا ہے ملک کے بچے کھچے جنگلات کو پھونکنا پڑے۔ بہتر ہے کہ آج ہی درخت اگانے کا پروگرام شروع کرا دیں۔اس کے لئے جناب احسن اقبال کی خدمات حاصل کرنی چاہیں۔ ورنہ پاک ایران گیس معاہدے میں گیس کوئی نہیں صرف شوں شاں ہی ہے۔

میڈیائی فضاءمیں طالبان ‘مذاکرات‘ شہید‘نیٹو سپلائی ڈرون ‘جہاد اور امن جیسے عنوانات چھائے ہوئے ہیں۔خدا نہ کرے محرم الحرام کے ماہ میں کوئی سانحہ پیش آئے‘ اگر ایسا ہوا تو پھر لاشیں‘ خون اور آگ کے نظارے بھی ٹی وی سکرینوں پر چھا جائیں گے۔یہ بھی ممکن ہے کہ حکومت طالبان مذاکرات کے لئے کوئی ٹیم تشکیل پائے اور ہمارے اینکرپرسنز پورا مہینہ اسی پانی میں مدھانی ڈال کر بیٹھے رہیں۔ غرض یہ کہ ذرائع ابلاغ جنہیں عوام کا ترجمان ہونے کا دعویٰ ہے وہ چند مخصوص واقعات‘لوگوں اور گروہوں کے لئے ہی وقف رہے۔حکومت ایسے حالات میں بڑی مطمئن رہتی ہے۔اور بڑی خاموشی سے مہنگائی کے جن کے ہاتھ پاﺅں کھول دیتی ہے۔آئی۔ ایم۔ایف جیسے اداروں سے مذاکرات کامیاب ہوجاتے ہیں اور غریب کو مارنے کے تمام تیر بہدف نسخے بھی آزما لئے جاتے ہیں

۔اللہ جانے امریکہ کو حکیم اللہ محسود سے کوئی دشمنی تھی یا پاکستان کے عوام سے۔اچھا خاصا مہنگائی کے خلاف شورشرابا شروع ہوا تھا۔تحریک انصاف نے (چاہے بلدیاتی انتخابات میں بہتر نتائج کے لئے ہی سہی ‘مہنگائی کے خلاف تحریک چلانے کا اعلان تو کر ہی دیا تھا۔امید تھی کہ عوامی غیض وغضب کے مبینہ خوف سے شائد پٹرول اڑتالیس پیسے کی بجائے چار پانچ روپے سستا ہوجاتا لیکن امریکی ڈرون نے اس ملک کے عوام سے کونسا بدلہ لیا کہ راتوں رات فضاءہی بدل گئی۔غریب اپنی ترجمانی کے خواب ہی دیکھتے رہ گئے اور مہنگائی کی جگہ ”شہادت“ نے لے لی۔جوں ہی ذخیرہ اندوزوں اور ان کے سرپرست محکموں‘ افسروں اور باوسیلہ لوگوں نے ذرائع ابلاغ اور تحریک انصاف کو عوامی مسئلہ کی طرف سے غافل پایا‘مہنگائی کے میزائل برسانا شروع کردیئے۔پاکستان میں گراں فروشی اور عوام دشمنی کے ایسے ”ہنی مون پیریڈز“ سال میں کئی بار آتے ہیں‘بلکہ جب سے نون لیگ کی پژ مُردہ حکومت نے معاملات کو چھوا ہے‘مہنگائی ‘فحاشی کی طرح پھیلتی جارہی ہے اورفحاشی مہنگائی کی طرح اچھل کود کر رہی ہے۔خیال تھا اور میرا خیال نہیں عام آدمی کا خیال تھا کہ بے وقعت روپے کے ساتھ گوشت کا تصور ہی ختم کردینا چاہیے اور عید بقر کے علاوہ پورا سال ”ہندو“ بن جانا چاہیے۔اگر ایسا کریں گے تو چلیں دال ساگ ہی سہی‘پیٹ تو بھرتا ہی رہے گا۔لیکن مرض بڑھتا گیا جوں جوں دُعا کی کے مصداق یہ خواب بھی جوئے شیر لانے والا خواب ثابت ہوا۔دو تین دنوں میں مرچ‘ساگ اورپیاز ‘مرغی سے مہنگے کردیئے گئے۔روٹی نے آٹھ روپے سے چھلانگ لگائی اور دس تک جاپہنچی اور یہاں بھی رکی نہیں۔ مانسہرہ میں پندرہ روپے کی فروخت ہوئی اور روٹی کی یہ دوڑ جاری ہے۔غریب نے سوچا ہو گا کہ دو ٹماٹر لے کر چٹنی ہی بنا لیں گے لیکن ٹماٹر ایک سو ساٹھ سے لے کر دو سو روپے تک چلاگیا اور یوں چٹنی پیاز کا ”شاہانہ طرز ضیافت“ بھی صرف امراءکے لئے مختص ہوگیا۔”کیلا پچاس روپے درجن‘ ایک سوروپے کے دو درجن لے جاﺅ“ اتوار بازار میں ریڑھی بان کو یہ آواز لگاتے سن کر ہمارے ایک دوست اس کے قریب گئے اور ہاتھ باندھ کر اس سے کہا” ذرا آہستہ بولو۔ اگر حکومت کو پتہ چل گیا تو یہ بھی ہماری پہنچ سے دور چلا جائے گا“۔ بہرحال آجکل کیلا سستا ہے اور ہوسکتا ہے کہ جناب شہباز شریف لاہوریوں کو ہدایت کردیں کہ دال روٹی اور مرغ چھوڑو اور تین وقت کیلے کھایا کرو۔ آپ میاں برادران سے کچھ بھی توقع کرسکتے ہیں۔ڈرونز گرانے ہیںیا نہیں۔یہ جہادیوں اور فسادیوں کا معاملہ ہے۔امریکہ خود بھی بہت بڑا فسادی ملک ہے۔یہ اوپر والے طبقات اور تخت پاکستان پر قبضہ کے خواہش مندوں کے کھیل ہیں۔غریب آدمی کو اس جنگ سے صرف ”خوف“ ہی ملنا ہے۔ڈرون گرائیں یا نہ گرائیں‘لیکن ٹماٹر ضرور گرالیں۔

یہ سچ ہے کہ ہمسائے ماںجائے ہوتے ہیں۔ہمسایوں کے حقوق کا اسلامی تعلیمات میں شاندار تذکرہ ہے۔ اگر آپ پیٹ بھر کر سوئیں اور آپ کا ہمسایہ بھوکا رہے تویہ صورتحال پیغمبراسلام محسن انسانیت کو ہرگز پسند نہیں ہے۔ایسے مسلمانوں کو صاحب ایمان ہونے کی سند ہی نصیب نہیں ہوتی۔ لیکن یہ ضروری نہیں کہ آپ ہمسایوں کے حقوق پورے کرتے رہیں اور ہمسایہ بھی آپ کے حقوق کا احترام کرے۔ہمسایوں کے حوالے سے تمام تعلیمات اسلامی معاشرے کی خصوصیات ہیں۔ہمسایوں کے حقوق کے فارمولے کو ملکوں اور قوموں پر منطبق نہیں کیا جاسکتا۔اگر ایسا ہوتا تو ریاست مدینہ کیخلاف جنگ کرنے والے سارے گروہ اور قومیںہمسایہ ہی تھیں۔جہاں حق اور باطل اور خیر اور شر کی تفریق لازم ہو وہاں ہمسایوں کے حقوق کو حوالہ کے طور پر پیش کرنا اسوہ رسول سے انحراف ہوگا۔

جب بعض دانشور اور سیاستدان پاکستان کو ہمسایوں کے حقوق کا حوالہ دے کر بھارت سے دوستی کرنے کا شوق پیدا کرتے ہیں تو وہ دراصل زمینی حقائق کو یکسر بھلا دیتے ہیں۔ ہندو اور مسلمان آج سے نہیں صدیوں سے ایک دوسرے کے مخالف‘دشمن‘ بلکہ ضد رہے ہیں۔مسلمانوں نے ہندوستان پر اپنی قوت اور طاقت کے ذریعے حکمرانی کی ہے ۔ہندوﺅں کے لئے یہ ایک تلخ حقیقت ہے جسے شائد مسلمان بھلا دیں لیکن ہندو کبھی بھلا نہیں پائیں گے۔مذہبی اعتبار سے مسلمانوں کے خلاف نفرت ہندو عقیدہ ہے جسے ہندو چھوڑنے کے لئے ہرگز تیار نہیں ہیں۔ ان کی اس تنگ نظری کے مظاہرے ہزار سالہ تاریخ میں بار بار ہوئے ہیں۔
قیام پاکستان دراصل انہی تاریخی حقائق کا ایک اظہار ہے۔قائداعظمؒ نے مجبور ہو کر علیحدہ مملکت کا آپشن قبول کیا تھا۔ پاکستان اور بھارت کی تین جنگیں بھی بھارتی تنگ نظری کا ہی ثبوت ہیں۔ آج بھی کشمیر میں ہندوفوجیں مسلمانوں پر ظلم کے پہاڑ توڑ رہی ہیں۔ غیر جانبدار سروے رپورٹوں میں بار بار انکشافات ہورہے ہیں کہ بھارت کے اندر مسلمانوں کو ہر شعبہ حیات میں رگیدا جارہا ہے۔حال ہی میںبھارت میں مسلمانوں پرپھر قیامت توڑی گئی ہے۔اتنے واقعات اور حادثات ہیں کہ صفحات کے صفحات لکھے اور بھرے جاسکتے ہیں۔لیکن ہمارے وزیراعظم جناب میاں محمد نوازشریف بار بار دھراتے ہیں کہ انہیں بھارت کے ساتھ دوستی کے لئے مینڈیٹ دیا گیا ہے۔حالانکہ حقیقت یہ ہے کہ میاں نوازشریف کو بھارت نواز آصف علی زرداری اور ان کے کرپٹ ٹولے سے نجات کے لئے لوگوں نے ووٹ دیئے تھے۔ اگر انہیں یقین نہیں آتا تو الیکشن مہم کے دوران شائع ہونے والے اپنے اشتہارات کو ایک بار پھر پڑھ لیں۔
عام پاکستانی کی سمجھ سے بالاتر ہے کہ اگر بھارت کے ساتھ دوستی ہوجائے گی تو اس سے مسئلہ کشمیر کیسے حل ہوجائے گا۔ محض امن برائے امن تو کسی خوشحالی کی ضمانت نہیں ہوتا۔ دنیا میں بے شمار ممالک ہیں جو باہم امن سے رہ رہے ہیں اور ان کا کسی ملک کے ساتھ کوئی جھگڑا بھی نہیں لیکن پھر بھی بھوک سے مر رہے ہیں۔جنگ نہیں ہونی چاہیے لیکن کوئی دشمن آپ کی گردن پر پاﺅں رکھے بیٹھا ہے اور آپ آہ و بکا بھی نہ کریں کہ کہیں امن کی فضاءخراب نہ ہوجائے۔ بھارت نے ہماری شہ رگ پرقبضہ تو کیا ہی تھا اب کابل میں بیٹھ کرپراکسی وار بھی لڑ رہا ہے۔ ہمیں سب سے پہلے اپنی شہ رگ آزاد کرانے کی جدوجہد کرنی چاہیے۔ ایسا نہ ہو کہ امن کی خواہش میں دشمن ہمارا گلا ہی دبا دے۔
میاں نوازشریف کو کون سمجھائے کہ وہ بھارت سے ہمسائیگی کی حد تک ہی محدود رہیں دوستی کے فریب میں نہ آئیں۔ترکی میں جا کر بھی بھارت سے دوستی کے لئے تڑپ ایک ذلت ہے۔ صحافت کی دنیا سے کوئی بھی آواز اس خود فریبی اور رسوائی کے خلاف نہیں اٹھتی۔ہاتھی کے پاﺅں میں سب کے پاﺅں ۔صرف ایک شخص ہے جو بھارتی آبی جارحیت اورعلاقائی بالادستی کیخلاف پہاڑ کی طرح ڈٹا ہوا ہے۔ یہ کوئی اور نہیں نظریہ پاکستان ٹرسٹ کے چیئرمین ڈاکٹر مجید نظامی ہیں جو میاں صاحب کی ہر لغزش پر گرفت کرنے اور ان کی یکطرفہ بھارت دوستی کوپاکستان کی سلامتی کے خلاف عمل قراردیتے ہیں۔ اللہ ڈاکٹر صاحب کا سایہ اس قوم پر سلامت رکھے!

قارئین اکرام! میں آپ سے دست بستہ پہلے تو معافی مانگتا ہوں۔میں نے مسلم لیگ (ن) کے انتخابی نعروں اور وعدوں سے متاثر ہو کر ”خوشخبریاں آنے لگیں“ کے عنوان سے کالم لکھا اور اپنے طور پر یقین کر لیا تھا کہ اب عوام الناس کی معاشی حالت بہتر ہوجائے گی۔لیکن گزشتہ دنوں کے پے در پے ایسے حکومتی اقدامات سامنے آئے ہیں کہ مجھے اپنے لکھے ہوئے لفظوں پر شرمندگی ہورہی ہے اور میں ایک بار پھر سے ”حقیقت پسندی“ کی پرخار وادیوں میں الجھ گیا ہوں۔پنجاب فورم نے حکومت سے مطالبہ کیا ہے کہ بھارت کی طرز پر پاکستان میں بھی غرباءکے لئے فوڈ سیکورٹی بل پارلیمنٹ میں لایا جائے اور غریبوں کے لئے سستی دال روٹی کا قانون بنا دیا جائے۔ میں نے اخبارات میں شائع ہونے والی یہ خبر پڑھی تو مجھے سخت افسوس ہوا۔آج پاکستان کے اقتصادی حالات اس نہج پر پہنچ گئے ہیں

کہ روٹی جیسی عام خوراک بھی عام پاکستانیوں کی دسترس سے باہر ہوگئی ہے۔کبھی یہی پنجاب تھا جو پورے متحدہ ہندوستان کو خوراک فراہم کرتا تھا اور پاکستان بننے سے لے کر دو چار ماہ قبل تک کم از کم روٹی کی قیمتیں کنٹرول میں تھیں ۔لیکن آخر یہ کونسی معاشی مہارت ہے جس کے نتیجے میں روٹی کی قیمت ہی کنٹرول میں نہیں آرہی۔زمین اپنی‘ پانی اپنا‘ کھاد کے کارخانے اپنے‘کھاد کے لئے استعمال ہونے والی گیس اپنی‘تندور ٹیکنالوجی اپنی‘ تندورچی اپنے‘ گندم کو آٹے میں تبدیل کرنے والی ملیں بھی پاکستان میں ہی بنتی ہیں۔آخر کیا وجوہات ہیں کہ ہماری اپنی روٹی بھی ہمارا ساتھ نبھانے پر تیار نہیں۔روٹی کا سرکاری طور پر طے کیا گیا وزن ایک سو بیس گرام ہے۔ اور شریف برادران کی حکومت سے قبل یہ روٹی چار یا پانچ روپے میں مل جاتی تھی۔ اب روٹی کا وزن ستر گرام کردیا گیا ہے لیکن قیمت آٹھ روپے تک پہنچ گئی ہے۔خیبرپختونخواہ میں بیس روپے تک روٹی فروخت ہورہی ہے۔آخر کونسی آفت آگئی ہے کہ موجودہ حکومت کے معاشی ماہرین پاکستانیوں کی بنیادی خوراک کو بھی چھین رہے ہیں ۔یہ بات سمجھانے کی ضرورت نہیں کہ سات افراد پر مشتمل کنبہ اگر فی کس روزانہ چار روٹیاں کھاتا ہے تو روزانہ کی کتنی رقم صرف روٹی پر خرچ ہوگی اور ماہانہ ایک کنبے کو چھ ہزار یا دس ہزار روپے میں کس طرح روح اور جسم کا رشتہ برقرار رکھنے کا سلیقہ آئے گا۔ورلڈ بینک اور ورلڈ فوڈ پروگرام نے اپنے تازہ سروے میں انکشاف کیا ہے کہ پاکستان کی ساٹھ فیصد آبادی پہلے ہی کم خوراکی کا شکار ہے۔ صوبہ سندھ‘بلوچستان اور خیبرپختونخواہ میں خوراک کی بدترین صورتحال ہے۔ان صوبوں کے دیہی علاقوں میں مفلوک الحال عوام کو دور سے دیکھیں‘ لگتا ہے ایتھوپیا میں آگئے ہیں۔ایک زرعی ملک کی یہ حالت ہے کہ ماﺅں کو اپنے حصے کی روٹی اپنے بچوں کو دینا پڑ رہی ہے تاکہ بچوں کو کم از کم پیٹ بھر کر کھانا میسر آسکے۔جنوبی پنجاب کے حالات بھی بھوک زدہ ہیں۔ اب جو مہنگائی کا ایک تازہ طوفان ہماری بستیوں میں آیا ہے۔ تو اس کا نتیجہ بھوک سے اموات کی صورت میں نکل رہا ہے۔ سفیدپوش تو بجلی اور گیس کے بل ادا کرتے کرتے ”پھانک“ ہونے والے ہیں‘لیکن جھونپڑیوں اور کچے گھروں میں زندگی گزارنے والے اپنی ہاتھوں سے بوئی جانے والی گندم کی بالیوں کو چھونہیں سکیں گے کہ روٹی کی قیمت بڑھتے بڑھتے امریکہ جتنی ہوجائے گی۔ آمدن صفر اور خوراک کی قیمت نیویارک جیسی! یہ کیسا معاشی انقلاب ہے!وزیرخزانہ جناب اسحاق ڈار صاحب بھی گندم کی روٹی کھا کر ہی بڑے ہوئے اور ایک بار پھر وزیرخزانہ بن گئے۔انہوں نے قوم کو خوشخبری دی ہے کہ ڈالروں کی بارش شروع ہوگئی ہے۔ بین الاقوامی مالیاتی اداروں کو پاکستان کی معاشی اصلاحات پر اعتماد آگیا ہے۔ ڈار صاحب کی ہر خوشخبری عوام کے لئے نیا ڈر لے کر آتی ہے۔دنیا بھر میں خوراک‘ بجلی اور گیس کی فراہمی پر حکومتیں سبسڈی دیتی ہیں ورنہ حکومتوں کی ضرورت ہی کیا رہ جاتی ہے۔لیکن ہمارے وزیر خزانہ ”سبسڈی“ والی لعنت سے قوم کو نجات دلانا چاہتے ہیں اور آئی ایم ایف کے منافع کو یقینی بنانے کے لئے دال روٹی کی قیمت بڑھائے جارہے ہیں۔جو غریبوں کے منہ سے نوالے چھینتے ہیں وہ ڈار نہیں صرف ڈر ہوتے ہیں اور ڈر اور خوف قوموں کو اٹھاتا نہیں بلکہ نفسیاتی اور جسمانی طور پر بیمار کر دیتا ہے۔ بیس کروڑ افراد میں سے اٹھارہ کروڑ بھوکے پاکستانیوں کا بوجھ ڈار صاحب کے کندھوں پر ہے!

اللہ پاک نے قرآن حکیم میں تمام انسانوں اور خصوصاً مسلمانوں کو اپنے روزمرہ کے معاملات باہمی مشاورت سے چلانے کا حکم دیا ہے ۔باہمی مشاورت دراصل جمہوریت کی روح ہے اور ووٹ اور الیکشن مشاورت کے عمل کو ممکن بنانے کا ایک طریقہ ہے۔ جمہوری حکومتوں پر لازم ہے کہ وہ منتخب ہونے کے بعد بھی ریاست کے معاملات وسیع تر مشاورت کے ذریعے طے کرتی رہیں‘جہاں مشاورت کا عمل ختم ہوا وہیں سے جمہوری آمریت نے سراٹھاناشروع کردیا۔مشاورت کا دائرہ کار صرف سرکاری امور تک محدود نہیں رہنا چاہئے۔بلکہ گلی محلے کے مسائل کے حل تک وسیع ہونا چاہیے۔ کسی بھی شہری کو دو طرح کے مسائل سے واسطہ پڑتا ہے۔

ایک کا تعلق تو ریاست اور اس کی پالیسیوں اور قوانین سے ہے اور دوسرا اس کی شہری زندگی اور اس سے متعلقہ امور سے ہے۔ صوبائی اور قومی پارلیمان کا کام قانون سازی کرنا ہے۔ اگر وہ ایسے قوانین بنائیں جن پر عمل درآمد سے عام شہری کی زندگی میں خوشحالی آئے اور احساس تحفظ ابھرے تو ہم ایسے قوانین کو فلاحی قوانین کہتے ہیں۔ہر وہ قانون جو انسان کے بنیادی حقوق کا تحفظ کرے وہ دراصل ”ہیومنٹرین لا“ کہلائے گا۔ اور جو جمہوری حکومت ایسے قوانین کا اجراءکرے اسے انسانی حقوق کی محافظ حکومت کہنا چاہیے۔اسلام کی تعلیمات اور آئین پاکستان میں قرارداد مقاصد کی روشنی میں انسانی حقوق کے خدوخال واضح کردیئے گئے ہیں۔ ہمیں یاد رکھنا چاہے کہ مسلمانوںکے انسانی حقوق بعض حدود کے اندر ہیں۔ ہم جنس پرستی اور دیگر حیوانی اور شہوانی خواہشات کو انسانی حقوق کے نام پر قبول نہیں کرسکتے۔ بہرحال قوانین کا دائرہ پارلیمان کے اختیار میں آتا ہے۔شہری حقوق بھی دراصل انسانی حقوق ہی ہیں۔ صاف پانی کی فراہمی ‘سڑکوں کی کشادگی‘ذرائع آمدورفت کی فراوانی‘ تعلیم اور صحت کے لئے سہولتیں اور سیوریج اور صفائی کے تمام معاملات بنیادی انسانی حقوق سے ہی منسلک ہیں۔لیکن یہ ایسے معاملات ہیں جن کے لئے شہریوں کو پارلیمنٹ اور ممبران پارلیمنٹ کے دروازے پر دستک دینے کی حاجت نہیں ہونی چاہیے۔ ایک گلی کے لوگ آپس میں مشاورت کرکے الیکشن کے ذریعے اپنے نمائندے منتخب کرکے اپنے ”سوک اشوز“کو حل کرسکتے ہیں۔پھر محلے کی سطح پر اور پھر قصبہ اور شہری کی بنیاد پر ایک نیٹ ورک بنایا جاسکتا ہے۔ اسی سوچ کو ”مقامی حکومتوں“ کے عنوان کے تحت عملی جامہ پہنایا جاتا ہے۔پاکستان میں بدقسمتی سے مقامی حکومتوں کا کبھی بھی کوئی موثر نظام نافذ نہیں ہوسکا۔سیاسی پارٹیوں کی ضد ہوتی ہے کہ گلی محلے کی حکومتوں میں بھی انہی کے نمائندے آگے آئیں۔ آمریت کے دور میں غیر سیاسی بنیادوں پر مقامی حکومتیں بنائی جاتی ہیں۔ یوں عوام کے مسائل کے حل کے وقت پارٹی پالیٹکس اور آمریت کا اثرورسوخ حاوی رہتا ہے۔ترقی یافتہ قوموں نے مقامی حکومتوں کے نظام کو بڑی کامیابی کے ساتھ آگے بڑھایا ہے اور شہر کے میئر کی ذمہ داری ہے کہ وہ شہریوں کے مسائل کو مشاورت سے حل کرے‘اس کے لئے اسے مرکزی حکومت کی طرف نہ دیکھنا پڑتا ہے نہ ہی اسے مالی معاونت کی ضرورت ہوتی ہے۔پولیس بھی میئر کے تابع ہوتی ہے اور یوں امن وامان کا مسئلہ بھی نہیں بگڑتا۔سپریم کورٹ کی طرف سے مقامی حکومتوں کے انتخابات کا حکم آچکا ہے۔ بعض صوبوں نے اس پر کام بھی شروع کردیا ہے۔ توقع یہی ہے کہ بہت جلد یہ مرحلہ طے ہوجائے گا۔لیکن ضرورت اس امر کی ہے کہ منتخب میئر‘یا کونسل چیئرمین پارٹی پالٹیکس سے بالاتر رہیں۔جہاں پارٹی آتی ہے وہیں نفاق شروع ہوتا ہے‘جمہوری سوچ کا گلہ دبا دیا جاتا ہے اور شہریوں کے شہری اور انسانی حقوق غصب ہونا شروع ہوجاتے ہیں ۔متنازعہ مقامی حکومتیں صرف تنازعات پیدا کریں گی اور عوام ان حکومتوں کے معرض وجود میں آجانے کے بعد بھی بے مقام ہی رہیں گے۔

Click here to View Printed Statement

ملال یہ ہے کہ ملالہ بیٹی نے یو این کے اجلاس میں جو پُرتاثیر تقریر کی اس میں امریکی ڈرون حملوں’عافیہ صدیقی بہن پر عدالتی تشدد اور افغانستان پر امریکی یلغار کے حوالے سے اشارہ تک نہیں کیا۔ بچے معصوم ہوتے ہیں اور نئی زندگی پانے کے بعد اور بھی معصوم لگتے ہیں۔معصومیت کا تقاضا تو یہ ہے کہ ہر برائی کو برائی ہی سمجھا جائے۔یہ نہیں ہوسکتا کہ طالبان تو ہر برائی کی علامت قرار دیئے جائیں اور امریکہ کو ہر اچھائی کا حوالہ ثابت کیا جائے۔ پاکستان کی بار بار کی اپیلوں کو جس طرح امریکہ نے رد کرتے ہوئے ڈرونز کے ذریعے معصوم ملالائوں کو موت کے گھاٹ اتار دیا

اس پرانہی کے قوم قبیلوں سے تعلق رکھنے والی لڑکی نے کوئی آہ و بکا کی نہ اس کا دل دُکھا اور نہ اس کی آنکھ روئی۔طالبان کے ہاتھوں شدید زخمی ہونے سے قبل بھی ملالہ نے ڈرونز حملوں کے خلاف کبھی کچھ لکھا نہ بولا۔ ان کے والد صاحب حالات پر گہری نگاہ رکھنے والے شخص ہیں ۔انہوں نے عالمی طاقت کا ساتھ دیا اور اپنی بیٹی کی معصومیت کو بھی اس آگ میں جھونک دیا۔ ملالہ کو امریکی آشیرباد پر برطانیہ نے خوب اٹھایا اور اسے عالمی سطح پر بچیوں کی تعلیم کے لئے تگ و دو کرنے والی ”ہستی” بنا کر پیش کردیا گیا۔امریکی یلغار کیخلاف ہتھیار اٹھانے والوں کے خلاف اس سے زیادہ کارگر حملہ نہیں ہوسکتا۔ اسے حکمت عملی کہتے ہیں اور اس حکمت عملی سے طالبان آج بھی کوسوں دور ہیں۔ وہ صرف مرنا اور مارنا جانتے ہیں۔زندگی بخش کر کیاکیا حاصل ہوسکتا ہے اس فلسفے سے طالبانی نظریات تہی دامن ہیں۔”علم ہر مومن (مرد و عورت) پر فرض ہے”۔یہ ایک متفقہ علیہ حدیث ہے۔حال ہی میں ترکی کے علماء نے اس حدیث کی تشریح بھی کردی ہے اور قرار دیا ہے کہ علم سے مراد دینی اور دنیاوی دونوںعلوم ہیں کیونکہ اسلام  دنیا اور دین میں تفریق نہیں کرتا۔جنگ بدر میں قیدیوں کی رہائی کے لئے ایک شرط یہ بھی رکھی گئی تھی کہ جو قیدی مسلمانوں کو پڑھنا لکھنا سکھائیں گے انہیں رہا کردیا جائے گا۔مشرک اور دشمن قیدیوں نے مسلمانوں کو دین تھوڑا ہی سکھانا پڑھانا تھا بلکہ اس وقت کا دنیاوی علم ہی پڑھانا اور اسی کے بارے میں لکھنا سکھانا تھا۔ اس سے بھی یہ بات واضح ہوجاتی ہے کہ ”علم” کو مخصوص معنوں تک محدود نہیں کیاجاسکتا۔ آپ صلی اللہ علیہ وآلہ وسلم کی حدیث ہے کہ ”علم حاصل کرو چاہے تمہیں چین جانا پڑے”۔ مکی یا مدنی دور سے لے کر آج تک چین کبھی بھی کوئی اسلامی مملکت نہیں رہا کہ مسلمانوں کو علم کے حصول کے لئے چین کا حوالہ دیا جاتا۔ چین میں علم حاصل کرنے کا مقصد دنیاوی تعلیم ہی تھا۔ ایک طالبان رہنما کا کھلا خط پڑھنے کے بعد احساس ہوا کہ طالبانی سوچ” علم” کے حوالے سے وہیں اٹکی ہوئی ہے جہاں سے دیوبند اور علی گڑھ کے درمیان چپقلش شروع ہوئی تھی۔1857ء میں یہی بعث جاری تھی۔طالبان لیڈر نے ملالہ کو مدرسے میں تعلیم حاصل کرنے کی ترغیب دے کر مدرسے اور سکول کی جنگ کو پھر سے تازہ کردیا ہے۔یوں محسوس ہوتا ہے کہ طالبان رہنمائوں نے سرکاری سکولوں کانصاب نہیں پڑھا۔ اگر کوئی بچی اچھے نمبروں سے میٹرک یا ایف اے پاس کرلے تووہ اچھی خاصی حافظہ اور معلمہ بن جاتی ہے۔آیات و حدیث کا ایک ذخیرہ اسے ازبر ہوجاتا ہے اور دین اسلام کے ارکان اور ان کی تشریح سے بھی وہ بخوبی واقف ہوجاتی ہے۔قرآنی  احکامات سمجھ جاتی ہے بلکہ والدین کو سمجھا سکتی ہے۔ ہونا تو یہ چاہیے تھا کہ ہمارے مدرسے اپنے ہاں سائنس’میتھ’ بائیو’کمپیوٹر’سائنس اور اعلیٰ تیکنیکی ڈگریوں تک کی تعلیم کے راستے ہموار کرتے لیکن اہل سکول نے یہ کارنامہ انجام دیا کہ انہوںنے اپنے ہاں مدرسے سے کہیں بہتر دین کا ادراک پیدا کرنے والے نصاب شامل کرلئے۔ اس لئے ملالہ کو مدرسے کی تعلیم کی شائد ضرورت نہیں اصل مسئلہ یہ ہے  کہ مدرسوں میں سکولوں ‘کالجوں اور یونیورسٹیوں کی سائنسی اور تیکنیکی تعلیم کو رائج کیا جائے۔خط لکھنے والے طالبان رہنما خود بھی انگریزی بولتے اور بلاگنگ کرتے رہے ہیں۔ وہ یہ کام کریں تو اچھا ہے اور اگر کوئی اور یہی کام کرے تو برا ہے۔اصل مسئلہ مدرسے یا سکول کا نہیں اصل معاملہ سوچ کا ہے۔سوچ نہ بندوقوں سے بدلی جاسکتی ہے نہ ڈرونز سے۔ سوچ تو سوچ ہی سے تبدیل ہوتی ہے۔علی گڑھ یونیورسٹی سے فارغ ہونے والے ابتدائی طلبہ دیوبند مدرسہ میں جا کر پڑھایا کرتے تھے۔پھر یہ سلسلہ رک گیا اور ہمارے معاشرے میں تعلیم کے دو متضاد دھارے بن گئے۔پاکستان بنا تو ان دھاروں کو آپس میں ملانے کی کوششیں شروع ہوئیں۔ مدرسہ تو اپنی محدود سوچ سے باہر نہ آسکا البتہ سرکاری سکول اسلامیات سے روشناس ہوتے چلے گئے۔بچوں کے لئے ہمارے سرکاری سکولوں میں پڑھایا جانے والے نصاب دین اور دنیا کے خوبصورت توازن سے مزین ہے۔کاش کہ اب مدرسہ اور سکول کی یہ جنگ ختم ہوجائے اور نہ کسی ملالہ کو گولی مارنی پڑے اور نہ کوئی معصوم ملالہ غاصب قوتوں کہ آلہ کار بنے۔