توانائی بحران کے حوالے سے اب کوئی دوسری رائے نہیں رہی۔ مشرف دور  کے آخری برسوں تک یہ سوچ جاری رہی کہ ملک میں بجلی اورگیس کی وافر مقدار موجود ہے اگر لائن لاسز اور چوری پر قابو پا لیا جائے تو کوئی وجہ نہیں کہ ہم توانائی کی ضرورتوں کو پہلے سے موجود ذرائع کے ذریعے پورا کرسکتے ہیں۔ لیکن آج چار برس مزید گذرنے کے بعد یہ خوش فہمی بھی دور ہوگئی ہے۔بجلی چوروں کو لگام دینے کی بجائے آج کل ان کے ناز اٹھائے جارہے ہیں۔کراچی میں کنڈا سسٹم کوئی ختم نہیں کراسکتا۔ جنوبی پنجاب  کے بعض حصوں میں بھی بجلی چوری کا رجحان تیزی سے پھیل رہا ہے۔ سندھ کے اکثر دیہی علاقوں میں سال میں ایک بار بجلی کا بل آتا ہے جو ہزار دو ہزار سے زیادہ نہیں ہوتا۔ بڑے بڑے سرکاری ادارے’وزیراعظم ہائوس ‘ ایوان صدر سب بجلی کے بلوں کے نادہندہ ہیں۔بجلی کے صارفین کا چالیس فیصد حصہ باقی ماندہ ساٹھ فیصد کا بھی بل ادا کرتا ہے۔

لائن لاسز کو بھی کنٹرول نہیں کیا جاسکا۔ 20فیصد تک بڑھ جانے والے لائن لاسز کو کس طرح قابو کیا جاسکتا۔ اس بارے آج تک کوئی قابل عمل حل پیش ہی نہیں کیا جاسکا۔لہٰذا اب یہ محض ایک خوش کن خیال رہ گیا ہے کہ ملک کے اندر بجلی کی پہلے سے موجود پیداواری صلاحیت کی بنیاد پر انرجی بحران پر قابو پایا جاسکتا ہے۔ جس شرح کے ساتھ آبادی میں اضافہ ہورہا ہے اس حساب سے سپلائی اور ڈیمانڈ کا فرق چار ہزار میگاواٹ سے بڑھ کر آٹھ ہزار ہوگیا ہے اور بہت ممکن ہے کہ آئندہ برس اس کو مزید ضرب لگے اور یہ فرق دس بارہ ہزار میگاواٹ کو چھولے ۔گیس کا عالم بھی نرالا ہے مرض بڑھتا گیا جوں جوں دوا کی۔ یوں تو حال ہی میںصوبہ پختونخواہ کے ایک سیاستدان نے خوشخبری دی ہے کہ صوبے کے اندر گیس کے نئے ذخائر دریافت ہوئے ہیں لیکن ذخائر کی پہلے بھی شائد کمی نہیں ہے۔ اصل مسئلہ  ان ذخائر سے فائدہ اٹھانا ہے۔ صوبہ خیبرپختونخواہ میں حکمران جماعت کی دور اندیشی کا ماتم کیا جانا چاہیے۔ محض ایک سیاسی نعرے اورضد کے سبب وہ کالا باغ ڈیم کو مردہ گھوڑا قرار دیتے ہیں۔ حالانکہ ملکی اور بین الاقوامی تحقیقی ادارے بار بار یہ باور کراچکے کہ اس ڈیم کی تعمیر سے معمولی نقصان کے بدلے خیبرپختونخواہ کو غیر معمولی نفع ہوسکتا ہے۔ لیکن میں نہ مانوں والی ضد ہے اور اٹھارہویں ترمیم میں صوبائی خودمختاری کے حوالے سے صوبوں کو اختیار دیا گیا ہے کہ وہ اپنے طور پر توانائی کے ذرائع پیدا کرسکتے ہیں۔ لیکن پنجاب حکومت جو لوڈشیڈنگ کیخلاف مینار پاکستان میں ٹینٹ کیبنٹ اجلاس کر رہی ہے’اس حکومت نے صوبے پنجاب میں بننے والے مجوزہ کالاباغ ڈیم کے لئے اس سال بجٹ میں صرف دس لاکھ روپے رکھے ہیں۔جب سنجیدگی کا یہ عالم ہو تو پھر  بجلی بحران پر کیونکر قابوپایا جاسکتا ہے!جہاں تک سندھ کے ضلع تھرپارکر میں پائے جانے والے کوئلے کے ذخائر کے حوالے سے جاری ہونے والے اعدادوشمار کا تعلق ہے تو ان میں ہوسکتا ہے مبالغہ آمیزی کا عنصر بھی شامل ہو۔لیکن حقیقت یہ ہے کہ اس ملک کے نامور سیاستدان ڈاکٹر ثمرمبارک اور ان کی ٹیم نے کوئلے کوزیر زمین جلانے اور اس سے گیس اور بجلی پیدا کرنے کا جو بیڑا اٹھایا تھا وہ اس میں تمام تر مالی صورتحال’دفتری رکاوٹوں اور حاسدوں کی پیدا کردہ مشکلات کے باوجود بڑی حد تک سرخرو ہوچکے ہیں اور دسمبر 2011ء میں ہی انہوں نے تھرکول  کے ایک بلاک میں انڈرگرائونڈ گیسی فیکیشن کا تجربہ کامیاب کر دکھایا تھا۔ یہ الگ بات ہے کہ آئل مافیا اور پرائیویٹ پاور ہائوسز نے ان کی اس کامیابی کو متنازعہ بنانے کی کوشش کی مگر ذرائع ابلاغ میں ان لوگوں کی ایسی دھلائی ہوئی کہ وہ وقتی طور پر دبک کر بیٹھ گئے ہیں۔تھرکول پراجیکٹ میں بہت بڑی رکاوٹ اس پراجیکٹ کی ملکیت بھی تھی۔ اب یہ طے ہوچکا ہے کہ یہ پراجیکٹ کلی طور پر سندھ حکومت کی ملکیت ہوگا اور وفاقی حکومت  اس کے لئے سرمایہ فراہم کرے گی۔سندھ کے بجٹ 2012-13ء میں اس پراجیکٹ کی ترقی اور تکمیل کے لئے ساڑھے تیرہ ارب روپے رکھے گئے ہیں اور حالیہ دورہ  چین کے دوران صدر آصف علی زرداری  اور ان کی ٹیم نے ایک چینی فرم کو پھر سے آمادہ کر لیا ہے کہ وہ تھرکول پراجیکٹ میں حصہ لے گی۔تھرکول پراجیکٹ میں پہلے ہی بہت دیرہوچکی ہے اور اس دیر کی سب سے بڑی وجہ سرمایہ کاری کا فقدان ہے ۔سرمایہ کاروں کا معاملہ یہ ہے کہ وہ اصل فیلڈ پر پہنچ ہی نہیں پاتے اور نہ وہ پائیلٹ پراجیکٹ کو دیکھ پاتے ہیں۔ انفراسٹرکچر نہ ہونے کے برابر ہے بلکہ سرے سے ہے ہی نہیں۔اب اگر سندھ حکومت ایک سال کے اندر اندر کراچی کے ساحل سے تھر تک بہتر سڑک تعمیر کر لیتی ہے پھر تھرکول فیلڈ تک سڑک نکالنا ایک کام ہے۔ اسی طرح واٹرکیریئر سسٹم ترتیب دینا ہے۔انفراسٹرکچر جس قدر جلد مکمل ہوگا اسی قدر پراجیکٹ میں سرمایہ کاروں کی دلچسپی بڑھے گی۔پاکستان کی توانائی کی  ضروریات اور خودانحصاری کی کنجی تھر کے صحرا میں مدفون ہے جسے مرکزی اور صوبائی حکومتیں نظرانداز کر رہی تھیں جو عوام کو بہتر مستقبل سے محروم کرنے کے مترادف ہے بھارت نے راجستھان سے کوئلہ نکالنا شروع کردیا ہے مگر پاکستان میں صرف کاغذی کارروائی کی جارہی ہے تھرکے کوئلے کے ذخائر قوم کے لئے زندگی اور موت کا مسئلہ ہے  جسے نظرانداز کرنے کا آپشن ہے ہی نہیں فنڈز کی کمی’ افسر شاہی کی سازشوں’ بین الاقوامی اداروں کی عدم دلچسپی سمیت تمام معاملات فوری طور پر حل کرنا ہوں گے۔ بیوروکریسی نے ورلڈ بینک کے لئے بنائی گئی توانائی کے ذرائع کی رپورٹ میں تھرکاذکرنہ کرکے قومی جرم کیا ہے۔پاکستان کے پڑوسی ممالک بھی ان ذخائر کو اپنی ضروریات پوری کرنے کے لئے استعمال کرسکتے ہیں جس کے لئے انہیں سرمایہ کاری کرنا ہوگی۔ ہمارے پاس سعودی عرب کے تیل کے ذخائر سے تقریباً تین گنا زیادہ توانائی موجود ہے جسے استعمال کرنا وقت کا تقاضہ ہے جو پاکستان کو آٹھ سو سال تک پچاس ہزار میگاواٹ بجلی فراہم کرسکتا ہے حکومت وقت ضائع کئے بغیر تمام کاغذی کارروائی مکمل کرے’ سارے علاقہ کا سروے کیا جائے’کوئلہ کی قیمت کا تعین کرے’ پانی ‘بجلی’سڑک’ ریلوے’ ایئرپورٹ فضلہ کو ٹھکانے لگانے اور مناسب سیکورٹی کا انتظام کرے تو کوئی وجہ نہیں کہ تین سال کے اندر لوڈشیڈنگ کے عذاب سے نجات مل جائے اور ہمارے سرمایہ کار بنگلہ دیش بھاگنے اور عوام سڑکوں پر ٹائر جلانے کی بجائے ملکی اور قومی ترقی میں پھر سے جت جائیں۔

جہاں روزانہ لاشیں گرتی ہوں‘خون بہتا ہو‘گولیاں سنسنا تی ہوں‘آگ بھڑکتی ہو اور آرزوئیں جلتی ہوں ‘وہاں کے رہنے والے کس ذہنی کرب سے گزرتے ہوں گے اس کا اندازہ لاہور اورا سلام آباد میں بیٹھنے والوں کو بمشکل ہی ہوگا۔مائیں اپنے بچوں کو امام ضامن باندھ کر باہر نکالتی ہیں کہ کہیں رقص کرتی موت ان کے لختِ جگر نور نظر کو اچک کر نہ لے جائے۔قاتل کے نزدیک کوئی تفریق نہیں۔عورت‘مرد‘بچہ‘بوڑھا‘مالک‘مزدور‘پٹھان‘مہاجر‘پنجابی‘ بنگالی سب گولی کے سامنے بے بس ۔کسی کی کوئی حیثیت ہی نہیں رہی۔عالم اور جاہل‘ہوش مند اور بے ہوش سب ایک ہی خوف میں مبتلا ہوگئے ہیں۔اچانک گولی پار ہوجانے کا خوف۔کٹی پہاڑی پر سرکٹے‘کورنگی میں لہورنگ بکھرا‘لیاری میں خون کے بیوپاری دھاڑے‘دھوبی گھاٹ میں گھات لگی‘شیرشاہ میں شاہ بھی کٹے‘شیر بھی ڈھیر ہوئے۔کون سا علاقہ‘کونسا گوشہ ہے جہاں انسانی خون کی بدبو نہیں سونگھی جاسکتی۔ قاتل کون‘مقتول کون۔مرنے اور مارنے والے سب کراچی کے ہیں۔سب مسلمان بھی ہیں اور سب روزے دار بھی ہیں۔گولی کہاں سے آئی کراچی کے کسی محلے سے‘گولی کہاں گئی کراچی کے دوسرے محلے میں۔ مارنے والے ”انقلاب“ کے نعرے لگاتے ہیں‘مرنے والوں کے جنازے پڑھانے والے”انقلاب“ کے نعرے لگاتے ہیں۔کہا گیا کوئی خفیہ ہاتھ ہے۔کوئی غیر ملکی طاقت ہے لیکن زمینی حقائق بالکل مختلف نکلے ہیں۔سب کچھ اندرونی ہے۔ٹریگر پر آئی ہوئی انگلی‘کندھے پر رکھی ہوئی بندوق‘کندھا اور وہ سینہ جس میں اس گولی نے اتر جانا ہے۔سب یہیں کا ہے‘سب اردو بولتے ہیں‘سب پاکستانی ہیں‘سب منی پاکستان کے باسی ہیں۔امن ریلیاں ہوچکیں‘نائن زیرو‘بلاول ہاﺅس‘گورنر ہاﺅس‘وزیراعلیٰ ہاﺅس سمیت کونسا مقام ہے جہاں کراچی کو پرامن بنانے کے عہد و پیماں نہیں باندھے گئے۔لیکن درد بڑھتا گیا جوں جوں دوا کی۔آخر کونسا آسیب ہے‘کونسا دیو ہے جو ہمارے پیارے کراچی‘غریب پرور کراچی‘پہلے دارالحکومت‘ چمنیوں کے شہر کراچی کو پھر سے دبوچ لیتا ہے۔پھر خونخواروں کے پٹے کھول دیتا ہے!!کبھی بھارت کے شہر ممبئی میں ظلم کی ایسی ہی رات طاری رہتی تھی۔وہاں کی پولیس کو بااختیار اور باصلاحیت بنایا گیا اور ممبئی بہت حد تک پرامن ہوگیا۔آج ممبئی اس خطے کا معاشی مرکز بن چکا ہے۔لیکن کراچی جس نے سب پر کرم کیا آج خود رحم کی بھیک مانگ رہا ہے۔شہری محصور‘کاروبارمسدود!یہ کیسی سیاست ہے جو اپنے ماننے والوں کو خوف دیتی ہے۔خون آشام شامیں اور لہو بار صبحیں دیتی ہے۔انسان ہی زندہ نہیں رہیں گے تو حکمرانی قبرستانوں پر کروگے؟جناب آصف علی زرداری نے تمام تر قومی سطح کی مصروفیات ترک کرکے کئی روز کراچی میں لگی آگ بجھانے کی تدبیریں کیں۔رحمان ملک لپکتی آگ میں کود جانے والا وزیرداخلہ متحرک ومتفکر پھر رہا ہے۔ برق رفتاری کے ساتھ کراچی کے دورے کئے‘رات بھر جاگ کر شہر کے حساس علاقوں کی صورتحال کا مشاہدہ کیا۔مسلح گروہوں اور قاتل گینگ تک پہنچ جانے کے انکشافات بھی کئے لیکن قتل گاہیں جوں کی توں سجی ہیں۔فیصل رضا عابدی فعال ہیں لیکن کراچی میں ہونے والی قتل وغارت گری پر انتہائی مغموم۔کراچی پردکھ اور غم کی چادر تنی ہے اور سمندر کی وسعتیں بھی اس الم کو سنبھال نہیں پا رہیں۔باوسیلہ لوگ کراچی کو خیرآباد کہہ کر پنجاب اور اندرون سندھ کا رخ کر رہے ہیں۔ راقم خود بھی تواتر کے ساتھ اس بدنصیب شہر میں جاتا رہتا ہے۔خوشحال لوگ یا تو بیرون ملک جاتے ہیں یا انہوں نے اندرون ملک کوئی پناہ گاہ تلاش کر لی ہے۔اگراہل اقتدارگروہ قتل وغارت کو روکنے کو اپنا مذہبی اور دینی فریضہ بھی سمجھ لیں تو شائد ان کے اعمال میں برکت پڑ جائے۔ماہ صیام میں یہ مسئلہ باآسانی حل ہوسکتا ہے بشرطیکہ اس خون خرابے سے وابستہ ہر انسان اپنے قلب میں جھانکے اور قرآن و احادیث پر مبنی درج ذیل نکات پر عمل پیرا ہوجائے‘اللہ تعالیٰ فرماتے ہیں‘جس نے ایک مسلمان کو جان بوجھ کر قتل کیا۔ اس کی سزا جہنم ہے۔ہمیشہ ہمیشہ وہاں رہے گا۔اللہ کا غضب اس پر بھڑکے گا۔اللہ ایسے شخص پر لعنت فرمائیں گے اور اس کے لئے دردناک عذاب تیار کر رکھا گیا ہے۔(القرآن)اور خطبہ وداع میں حضور نے ایک مسلمان کی جان‘ مال ‘عزت و آبرو کو دوسرے مسلمان کیلئے حرام قرار دیا تھا۔

رجوع کرلینے پر کتنا خرچہ آتا ہے؟ زندگی تو گزر رہی ہے۔اس کے تمام لوازمات بھی کسی نہ کسی طور پر پورے ہورہے ہیں۔آخر انسان کو کبھی رک کر تھوڑی دیر ٹھہر کر اپنی منزل کا تعین کر لینا چاہیے۔اپنے سفر اور زادہ راہ کا جائزہ لے لینا چاہیے۔اگر کسی معاشرے کے افراد سدھر جائیں تو معاشرے کو سدھرنے سے کون روک سکتا ہے۔غریب آدمی سے اعلیٰ انسانی اخلاقیات کا تقاضا عبث ہے۔اسے تو شائد مجبوری ہو جھوٹ بولنے کی‘کام چوری کی۔ غیبت‘حسد اور بدکلامی ان لوگوں کامسئلہ ہی نہیں جنہیں پیٹ کا دوزخ بھرنے کے لئے اسی دنیاوی جہنم سے ایندھن اکٹھا کرنا ہے۔میں اور آپ جنہیں قدرت نے خطہ غربت کے قریب جانے سے روک رکھا ہے حالانکہ بہت سے ”متوسطین“ غریب ہونے کے مستحق ہیں۔اللہ نے ہمیں رذیل ہونے سے بچا رکھا ہے۔ورنہ جس ملک کے اندر دولت کی تقسیم انسانیت کی توہین بر مبنی فارمولے پر ہوتی ہو وہاں سفید پوشی کے چونچلے زیادہ دیرپا نہیں ہوا کرتے۔ ہم تو اعلیٰ اخلاقیات ‘انسانی اوصاف اور اسلامی اطوار بہ آسانی اپنا سکتے ہیں۔دنیا بھر کے ماہرین سماجیات اس بات پر متفق ہیں کہ مذہب‘ معاشرہ اور ریاست کے ارتقاءکا دارومدار مڈل کلاس طبقہ پر ہوتا ہے۔ پاکستان کے مڈل کلاسیوں کو اپنی اس پہچان سے دور بھاگنے کی بجائے اس کو اپنا فخر بنانا چاہیے۔ اُمراءجو معاشرے کا صرف اشاریہ ایک فیصد بھی نہیں ہیں انہیں اخلاقیات سے کوئی غرض وغائت نہیں ہوتی ۔ پاکستان کے بیس فیصدمتوسط طبقے کو ہی معاشرتی اقدار کا تحفظ کرنا ہے۔عمومی ہمہ ہمی میں اخلاقیات فرائض اور حقوق کا تصور ذہن کے بند دریچوں کے پیچھے دبکا رہنا ہے۔لیکن ماہ صیام ایک ایسا بابرکت مہینہ ہے کہ اگر کوئی شخص صرف نیت باندھ لے تو پھر اس ماہ مقدس میں پیدا ہونے والے ماحول کے سبب اعلیٰ اخلاقی اور انسانی قدروں کے احیاءکے لئے بہت آسانیاں پیدا ہوجاتی ہیں۔ منافع خور‘ذخیرہ اندوز اور ملاوٹیے روزہ داروں کے جذبہ عبادت کا خوب استحصال کرتے ہیں۔لیکن کیا ہم‘ہم پر اس لئے زور ہے کہ مذکورہ بالا گروہوں میں سے کسی نہ کسی کا بالواسطہ یا بلا واسطہ تعلق ہمارے ساتھ بھی جڑا ہوا ہے۔ اس لئے کہہ رہا ہوں کہ اگر ہم اس ماہ مقدس میں یہ فیصلہ کر لیں کہ ان ذخیرہ اندوزوں ‘گراں فروشوں اور ملاوٹیوں کو ان کے عمل بد سے روکنا ہے اور ان کو احسن انداز میں سچی بات سمجھانی ہے تو روزے کا ایک مقصد ”جھوٹ سے اجتناب“ پورا ہوجائے گا۔خود جھوٹ نہ بولنا ایک انتہائی صالح عمل ہے لیکن معاشرتی فلاح کا تقاضا ہے کہ ہم ان تمام گروہوں کو جھوٹ بولنے سے روکیں جن کے جھوٹ سے دیگر انسانوں کی معاشی‘معاشرتی اور سماجی حالت متاثر ہوتی ہے ۔اگر متوسط طبقے کا روزہ دار اپنی افطاری پر روزانہ ایک سو روپے خرچ کرتا ہے تو وہ اس روپے میں سے صرف پچیس روپے بچا کر کسی غریب آدمی کو اپنے ساتھ افطار میں شامل کرلے یا پورے مہینے کا حساب لگا کر اپنے ہمسائے میں کسی ضرورت مند کو رقم دے دے۔ اگر ہم بیس فیصد متوسطین (امیر اور غریب کے درمیان سماجی پل کا کردار ادا کرنے والے شہری)ایسے ایثار کا مظاہرہ کریں تو یقینا اُمراءکو بھی کچھ احساس ہوگا۔اور اس طرح کم از کم رمضان کے مہینے میں پاکستان کا کوئی ایسا شہری نہیں ہوگا جو محض غربت کی وجہ سے ہمارے جیسا کھانا نہ کھا سکے۔ اس طرح یہ مہینہ صرف خوشحال لوگوں کے لئے ہی نہیں غریب غرباءکے لئے بھی رحمتوں کا مہینہ ہی ثابت ہوگا۔کاروباری لوگوں کی کثیر تعداد عمرہ ادا کرنے جائے گی۔لاکھوں پاکستانی آخری عشرہ کعبة اللہ اور روضئہ رسول کے سائے تلے گزارتے ہیں۔بہت رقم درکار ہوتی ہے۔ اگر ہم میں سے وہ لوگ جنہوں نے گزشتہ برس عمرہ کر لیا ہے وہ یہ عہد کریں کہ اس بار عمرہ کا خرچہ بچا کر کسی ضرورت مند کو دینا ہے تاکہ اس کی بیٹی کا جہیز بن جائے یا اس کے بچے کی فیس جمع ہوجائے یا اس کے گھر آئندہ چھ ماہ کا راشن ہو‘یا ایسا کوئی ادارہ مضبوط ہو جو لوگوں کے لئے روزگار کا بندوبست کرے تو میرے قلیل دینی اور قرآنی علم کی رو سے ایسے متمول شخص سے اللہ اور اس کے رسول یقینی طور پر راضی ہوجائیں گے۔ ہمارے ٹی وی اینکرز بھی روزہ دار ہوتے ہیں۔ ان سے گزارش ہے کہ وہ کم از کم اس ماہ میں جھوٹ بولیں نہ بولنے دیں۔جائز کو جائز کہیں چاہے وہ جائز کسی سیاسی پارٹی سے منسلک ہو۔رمضان کے مہینے میں معاشرتی فلاح اور نجات کا عہد کرنا چاہیے۔ ہم سے ہر فرد کو اپنے حصے کے فلاحی مشن پر نکل کھڑا ہونا چاہیے۔ ہر طرف سے صدائے حیی علی الفلاح آرہی ہے۔!!

Which also mentions

Moonis Elahi, PML(Q), Mian Nawaz Sharif, Chaudhry Shujaaat Hussain, Majid Nizami

Click here to View Printed Statements

بالآخر میاں محمد نوازشریف نے اپنے اصولوں کو قربان کر ہی دیا۔مخالفین کہتے ہیں کہ ایم۔کیو۔ایم کی واحد خوبی یہ ہے کہ اس جماعت نے جنرل (ر) پرویز مشرف کے اقتدار کی مضبوطی اور طوالت کیلئے برسوں اپنے کندھے پیش کئے رکھے۔یہ وہی جماعت ہے جسے سابق صدر اپنی”عوامی طاقت“ قرار دیتے تھے۔مجھے یہاں ایم۔کیو۔ایم کی کمزوریاں شمار کرنا مقصود نہیں۔حیرت میں ڈوبا ہوں کہ کس طرح میاں نوازشریف اور جناب الطاف حسین باہم شیروشکر ہوتے جارہے ہیں۔کون کس کو دھوکہ دے رہا ہے اس بارے کوئی حتمی رائے قائم نہیں کی جاسکتی ۔ایک دوسرے کے ماضی کو بھول جانے کے عہدوپیماں باندھے جارہے ہیں۔رائے ونڈ اورنائن زیرو کے درمیان فاصلے مٹتے جارہے ہیں۔میرے نظریاتی قائد محترم مجید نظامی نے انتہائی خلوص کے ساتھ سمجھانے کی کوشش کی کہ چوہدری خاندان مسلم لیگ کی پہچان ہے‘اسے دور مت کریں اور تمام اختلافات بھلا کر مسلم لیگ کو ایک کرلیں۔لیکن سیاسی تکبر سے اکڑی ہوئی سوچ مسلم لیگ کے اتحاد میں حائل ہوجاتی ہے۔”جنہوں نے مشرف کی آمریت کا ساتھ دیا ان کو ساتھ لےکر نہیں چل سکتا“۔ایک ہی جواب دیا جاتا ہے۔
اصول شائد صرف کتابوں میں لکھنے اور تقریروں میں بولنے کیلئے ہوتے ہیں۔ پی پی پی نے آزادکشمیر الیکشن کا معرکہ سر کیا اور اس فتح مندی میں چوہدری برادران کا اہم کردار ہے۔شکست کو قبول کرنے کے بجائے میاں برادران نے اس پارٹی کے ساتھ ہاتھ ملایا جس کے بارے میں الزامات بھی خود(ن) لیگ کی فیکٹری میں ہی تیار ہورہے تھے۔ہمیں علم نہیں کہ (ن) لیگ اور ایم کیو ایم کے اتحاد کی بیل منڈھے چڑھے گی یا نہیں لیکن ابتدائی میل ملاقات سے یہ واضح ہوگیا کہ (ن) لیگ کی ساری سیاسی اصول پسندیاں فقط اور فقط چوہدری برادران سے مخاصمت پر مبنی ہیں۔ابھی تک میاں صاحب کے ذہن میں ”گجرات کے چوہدریوں سے انتقام“کی آگ کے آلاﺅ اٹھ رہے ہیں۔ انتقام کی آگ میں چوہدری خاندان پر تو کڑا وقت آیا ہی ہوا ہے خود (ن) لیگ بھی اپنے قیمتی کارکنوں سے ہاتھ دھونے کے قریب ہے۔ جاوید ہاشمی ابھی تک اپنے دل و دماغ میں پڑ جانے والی گرہ کو کھول نہیں پائے اور ان کے ہمنواﺅں کی تعداد میں روز بروز اضافہ ہوتا جارہا ہے۔شیر علی بھی احترام کے پنجرے سے باہر آگئے ہیں۔بغاوت نہ بھی سہی لیکن قائد (ن) لیگ کے رویے اور سیاسی فیصلوں کیخلاف بے زاری بڑھتی جارہی ہے۔
چوہدری شجاعت حسین اور ان کے خاندان نے اپنے عظیم فرزند مونس الٰہی کو انگلینڈ سے بلوایا اور مونس نے خود گرفتاری دے دی۔ اگر دال میں کچھ بھی کالا ہوتا یا دل میں کوئی چوری ہوتی تو جناب شہباز شریف کی حکومت میں چوہدری برادران اتنا بڑا ”رسک“ نہ لیتے۔سچ یہ ہے کہ شریف برادران کو قطعاً توقع نہیں تھی کہ چوہدری مونس الٰہی اس جرات کے ساتھ عدالت کا سامنا کر پائیں گے لیکن نہ صرف یہ کہ مونس الٰہی پابند سلاسل ہوئے بلکہ انہوں نے پیشیوں سے بچنے کے لئے بھی کبھی کوئی حیلہ بہانہ نہیں گھڑا۔ وہ تو خود ”فردجرم“ کے لئے پکارتے رہے۔
تحقیقات ہوئیں۔تمام ریکارڈ اور گواہ پیش ہوئے اور تمام گواہوں نے چوہدری مونس الٰہی کی بے گناہی کی قسم کھائی۔اگر تھوڑا سا دامن بھی داغدار ہوتا تو کوئی ایک گواہ ہی ”سچ“ بول دیتا کہ آج ایسے کسی گواہ کے تحفظ کیلئے پنجاب حکومت مکمل طور پر تیار بلکہ منتظر بیٹھی ہے۔ مونس الٰہی کے وکلا کہتے ہیں کہ یہ پاکستان کی عدالتی تاریخ کا واحد کیس ہے جس میں ملزم کیخلاف کوئی ثبوت نہیں‘ گواہ منحرف ہوگئے لیکن عدالت ضمانت تک لینے کو تیار نہیں اور جب میرٹ پر فیصلے کا تقاضا زور پکڑ گیا تو کیس سننے سے ہی انکار کر دیا گیا۔
چوہدری شجاعت حسین نے صورتحال پر بڑا معنی خیز تبصرہ کیا ہے۔”اصل میں نوازشریف کے ایجنڈے پر کام ہورہا ہے۔ظفر قریشی کو محض قربانی کا بکرا بنایا جارہا ہے“۔
نوازشریف نے میثاق جمہوریت کے وقت اعلان کیا تھا کہ ان کے دور میں بے نظیر اور آصف علی زرداری کیخلاف قائم کئے گئے تمام مقدمات سیاسی بنیادوں پر بنائے گئے تھے۔ماہرین کہتے ہیں کہ مونس الٰہی کا کیس بھی سیاسی نوعیت کاہے۔ ایسے حالات میںچوہدری مونس الٰہی کو مزید بہادری کا مظاہرہ کرنا ہوگا۔سیاسی نوعیت کے مقدمات طویل ضرور ہوتے ہیں لیکن پاکستانی جیلوں میں جی داری کیساتھ جبر سہنے والے ”مردان حر“صدر پاکستان بن جاتے ہیں اور مچھروں سے ڈرنے والے مخالفین کے طعنوں کی زد پر رہتے ہیں۔اس لئے مونس الٰہی گھبرانا نہیں!

کبھی پاکستان کی ترقی کی رفتار دنیا بھر میں سب سے زیادہ تھی۔ 1960ءکے عشرے میں پاکستان کے ماہرین اقتصادیات نے سب کو ورطہ حیرت میں ڈال دیا تھا۔ساﺅتھ کوریانے بغیر کسی جھجھک کے پاکستان کے اقتصادی ماڈل کی نقل تیار کی اور اپنے ملک کو پاکستانی قدموں پر قدم رکھ کر چلانا شروع کردیا۔متاثر ہونے کی بھی حد ہوتی ہے۔ سئیول شہر کوبھی کراچی کی طرز پر بسایا گیا ۔وہ جوہمیںماڈل سمجھ کر ہمارے پیچھے چلے تھے وہ آگے بڑھتے گئے اور ہم روز بروز پیچھے کی طرف سرکتے گئے۔ آج ہم کہاں اور ساﺅتھ کوریا کہاں کھڑا ہے! کوئی تقابل ہی نہیں کوئی موزانہ زیب نہیں دیتا۔آج ہماری ترقی کی رفتار2.2 فیصد پر آکر ایسے رکی گویابریکیں لگ گئیں۔ ہزار دھکے مارو لیکن زمین جنبد نہ جنبد گل محمد

سودی نظام سے وابستہ معیشت سے جڑی اس دنیا کی ترقی میں بہت بڑا کردار بینکوں‘ بنکاری اور بینکاروں کا رہا ہے۔ اقتصادی ماہرین سرجوڑ کر ملکی معیشت کی بہتری کیلئے منصوبہ سازی کرتے ہیں اور بینک ان منصوبوں میں سرمایہ کاری کرکے ترقی کے پہیے کو حرکت میں لاتے ہیں۔ امریکہ‘ چین ‘جاپان اور بھارت۔یہ بینکاری نظام ہی ہے جس پر ان ممالک کی ترقی و عروج کا دارومدار ہے ۔چین کے بینک سرمایہ کارانہ سوچ کے حامل ہیں اور بہت سی امریکی کمپنیوں کو سرمایہ فراہم کر رہے ہیں۔ ایسے ممالک جن کے پاس پیسہ نہیں وہاں چینی بینک اور کمپنیاں مل کر پراجیکٹس مکمل کر رہے ہیں اور ان پراجیکٹس سے خاطر خواہ منافع کما رہے ہیں۔

پاکستان میں گزشتہ برسوں میں بینکاری سسٹم نے بہت ترقی کی ہے۔بینکوں کی عمارتوں کے شیشتوں کے سائز اور رنگ ہی نہیں بدلے انداز اور اطوار بھی تبدیل ہوگئے۔ ہر سال بھاری منافع کمانے والے ان بینکوں نے لوگوں کو منافع دینے کی بجائے ان کو ”کنزیومر ازم“ کی طرف راغب کرکے مال کمایا ہے۔ کریڈٹ کارڈز‘ کاروں پر قرضہ جات‘مکانوں کے لئے قرضے‘غرض ان بینکوں نے کسی ترقیاتی منصوبے میںشراکت داری کرنے کی بجائے صرف اور صرف اکاﺅنٹ ہولڈرز کو سہولیات کی فراہمی کے بدلے کھاتہ داروں کی رقوم سے ہی پیسے کاٹے ہیں۔اگر یہ کہا جائے کہ پاکستان میں بینکنگ نظام”کماﺅ“ کی بجائے”کھاﺅ“ بن گیا ہے تو مبالغہ نہ ہوگا۔

بنگلہ دیش میں ڈاکٹر محمد یونس بھی ایک بینکار ہی تھے۔انہوں نے میگا کی بجائے مائیکروفنانسنگ کا ایسا نظام وضع کیا کہ آج بنگلہ دیش میں شراکت داری کے ذریعے منافع کمانے کی ایک دوڑ لگی ہے۔معیشت کا پہیہ پوری رفتار سے چل رہا ہے۔ہمارے ہاں ایسا کیوں نہیں ہوا۔آخر ہمارے بینکار اور اقتصادی ماہرین مل کر ایسا پروگرام کیوں ترتیب نہیں دے سکے ۔ سروسز کے بدلے پیسہ کمانے کا رجحان بینکوں کے وجود پر کیا اثرات ڈالے گا؟ ایسے ہی سوالات لئے میں نے اپنی تنظیم ”پاکستان اکانومی واچ“ کے وائس پریذیڈنٹ عظمت اللہ کے ہمراہ گزشتہ دنوں کراچی کے معروف بینکاروں سے ملاقاتیں کیں۔

”بینکوں میں ڈاﺅن سائزنگ کا عمل شروع ہوچکا ہے۔ادغام یعنی ”مرجر“ کے رجحان نے بھی جنم لیا ہے۔ظاہر ہے یہ صورتحال بینکنگ سسٹم کیلئے کوئی نیک شگون نہیں ہے۔ ایسے منفی اشارات کا بنیادی سبب بینکوں کی موجودہ پالیسی ہے۔آج کل کم و بیش تمام بینکس قرضے فراہم کرنے میں جتے ہوئے ہیں۔حکومت اور حکومتی اداروں کو ”لوننگ“ ہورہی ہے یا کنزیومر ازم کو فروغ دیا جارہا ہے۔بینکوں کا اصل کام ترقیاتی منصوبوں کیلئے سرمایہ کی فراہمی ہوتا ہے۔اسی سے نظام بینکاری پر اعتماد بڑھتا ہے اور منافع میں مسلسل اضافہ ہوتا ہے۔سروسز اور لون کی فراہمی کے بعد سرمایہ ساکت ہوجاتا ہے۔‘ملک ترقی کرتا ہے نہ سماجی طور پر معاشرہ آگے بڑھتا ہے“سمٹ بینک کے چیف ایگزیکٹو جناب حسین لوائی نے بڑے ججے تلے انداز میں اصل مرض کی طرف نشاندہی کی۔ جناب حسین لوائی صرف بینکار ہی نہیں معیشت دان بھی ہیں۔ قومی سطح کے ایسے بینکار ہیں جنہوں نے متعدد ڈوبتے ہوئے بینکوں کو سنبھالا اور انہیں قومی ترقی میں حصہ ڈالنے کے قابل بنایا۔

اسلامی بینکاری کے ماہر اور بینک اسلامی کے چیف ایگزیکٹو آفیسر حسن عزیز بالگرامی تجزیہ اور تبصرہ سے گریزاں دکھائی دیئے لیکن انہوں نے راقم کو یقین دلایا کہ ملک میںاسلامی بینکاری کا مستقبل روشن ہے اور عام لوگوں میں سرمایہ کاروں کا اعتماد بحال کرنے میں ان کا بینک کامیابیاںحاصل کر رہا ہے۔

دبئی اسلامک بینک کے فنانشنل کنٹرولر گیون گون سالوز سے بھی ملاقات ہوئی۔ خوش مزاج اور ملنسار بینکار ہیں۔ ان کے خیالات کا حاصل بھی یہی ہے کہ ملکی معیشت کی بہتری کیلئے اب بینکاروں کو شراکت داری کے منصوبوں میں سرمایہ کاری کی طرف توجہ کرنا چاہیے۔غیر ضروری اخراجات کم کرنے چاہیں اور کھاتہ داروں کو سہولتوں کی فراہمی آسان اور سستی کرنی چاہیے۔

یہ ایک المیہ ہوگا اگر منافع کی بلندیوں کو چھولینے کے بعد ہمارے بینک ایسی منصوبہ بندی نہ کرسکیں جس سے زوال کو ٹالا جاسکے۔قومی ترقی کو اگر بینکاری کا ہدف قرار دے کر آگے بڑھا جائے ‘متحرک اور تعلیم یافتہ نوجوانوں کو چھوٹے چھوٹے کاروبار شروع کرانے کے لئے سرمایہ فراہم کیا جائے تو کوئی وجہ نہیں کہ پاکستان ایک بار پھر ساٹھ والی دہائی کو دہرانہ سکے!

لوڈشیڈنگ کی طوالت بڑھتی جارہی ہے۔ بل ہےں بجلی نہیں اور جب بجلی کی بجائے بلبلا دینے والے بل موصول ہوتے ہیں تو بغاوت کرنے کو دل مجبور ہوجاتے ہیں۔ پھر ”لیسکو“ ہو یا ”آئیسکو“ مضبوط گیٹ بھی ٹوٹ گرتے ہیں‘ پولیس بے بس ہوجاتی ہے اور غضبناک نفرتوں کے سامنے کوئی دلیل ٹھہر نہیں پاتی۔

آبادی کی رفتار تیز تر ہے۔ بجلی کی پیداوار کے جو منصوبے چھ کروڑ صارفین کو سامنے رکھ کر بنائے گئے تھے وہ اٹھارہ کروڑ لوگوںکی ضروریات کیسے پوری کرسکتے ہیں؟ حکمرانوںنے سنجیدگی سے اس مسئلہ کی طرف توجہ ہی نہیں کی۔ جن مقتدر طبقات نے توانائی کے بحران پر قابو پانے کی پلاننگ کرنا تھی ان کے ہاں بجلی جاتی ہی نہیں۔ ان کے ایئرکنڈیشنڈ چلتے رہتے ہیں۔دیوہیکل جنریٹر چوبیس گھنٹے سٹینڈ بائی پوزیشن میں موجود ہیں۔ ادھر واپڈا والوں نے سوئچ آف کیا ادھر ڈیزل اور پٹرول پھونکنے والے جنریٹر بجلی اگلنا شروع کردیتے ہیں۔ بڑے لوگ صرف اتنا پوچھتے ہیں”جنریٹر سے ہے یا واپڈا سے؟ اور بس! یہ ہے ان کی کل پریشانی۔ باقی پریشانیاں صرف عوام اورفیکٹری مزدوروں کے حصے میں آتی ہیں۔ملک پہلے ہی قرضوں پر چل رہا ہے۔ صنعت وحرفت کا پہیہ چلے نہ چلے‘حکمرانوں کا پہیہ رکتا ہی نہیں!

تمام رکاوٹوں اور حوصلہ شکنیوں کے باوجود بعض ادارے اور افراد اپنے طور پر قومی خدمت کے منصوبوں کو کامیاب کر گزرتے ہیں۔پاکستان میں حکومتیں ناکام اور انفرادی طور پر کام کرنے والے پاکستانی اور ان کے ماتحت چلنے والے ادارے بڑے بڑے کارہائے نمایاں انجام دے رہے ہیں۔ یہ الگ بات کہ ذرائع ابلاغ کو ایسے تعمیری کاموں کی تشہیر کرنے کی فرصت ہی نہیں۔ یہ اصحاب یقین خود بھی پبلسٹی کی بیماری سے کوسوں دور ہیں اور بڑی خاموشی کے ساتھ کام میں مگن رہتے ہیں۔

فوجی فرٹیلائزر کمپنی یعنی ایف ایف سی اور توانائی کے متبادل ذرائع کی ترقی کیلئے کام کرنے والا بورڈ یعنی اے ای ڈی بی دو ایسے ادارے ہیں جن میں سے اوّل الذکر پرائیویٹ سیکٹر کا انتہائی معتبر نام ہے۔ موخرّالذکرسرکاری ادارہ ہے لیکن سرکاری کلچر سے ہٹ کر عمل اور نتیجہ پر یقین رکھنے والے کارکنوں کا مرکز ہے۔ ایف ایف سی کے بارے میں قارئین کو شائد علم نہ ہو کہ یہ ادارہ ہر سال قومی خزانے میں اربوں روپے کا ٹیکس جمع کراتا ہے ۔سمگلنگ کو روکنا تو حکومت کا کام ہے لیکن یہ ایف ایف سی ہی ہے جو ہمارے کھیت کھلیانوں کی ہریالی کو برقرار رکھتی ہے اور تمام دباﺅ برداشت کرتے ہوئے کھاد کی ضروریات پورا کرتی ہے۔ میرے دوست کالم نگار بیگ راج کہتے ہیں جب پاکستان کے ناکام صنعتی اداروں کے حالات پڑھ کر مایوس ہونے لگیں تو ایک بار ایف ایف سی کی سالانہ رپورٹ ضرور پڑھ لیا کریں یا ان کے کسی یونٹ کا دورہ کر لیا کریںانشاءاللہ پاکستان کے بارے میں پائی جانے والی مایوسی بڑی حد تک کم ہوجائے گی۔

ایف ایف سی اور اے ای ڈی بی نے باہمی اشتراک سے ناممکن کو ممکن کر دکھایا ہے۔پاکستان میںہوا سے بجلی پیدا کرنا انتہائی آسان کام ہے۔چاروں صوبوں میں ایسے ”ونڈ کوریڈوز“ہیں جہاںونڈٹربائین لگائے جائیں تو کامیابی کا تناسب سو فیصد ہوگا۔پاکستان میں سرمایہ کاری کے حالات سازگار ہیں لیکن اپنوں اور بیگانوں کا پروپیگنڈا غیر ملکی سرمایہ کاروں کو یہاں کا رخ کرنے نہیں دیتا جبکہ ہمارے سرکاری ادارے ہر وقت اس کوشش اور کھوج میں لگے رہتے ہیں کہ کسی نہ کسی طرح توانائی کے منصوبے غیر ملکی سرمایہ کاری یا قرضوں کے ذریعے ہی چلائے جائیں کہ ایسی سرمایہ کاری میں ”کک بیکس“ کے امکانات بڑھ جاتے ہیں۔ونڈ پاور پراجیکٹس متبادل توانائی کاآسان ذریعہ ہے لیکن خود حکومت بھی ایسے کسی منصوبے میں سرمایہ کاری نہیں کرپائی۔ متبادل انرجی بورڈ کے حکام خاموشی کے ساتھ کام کرتے رہے ۔انہوں نے آج سے چار سال قبل ایف ایف سی کو آمادہ کر لیا کہ وہ قومی نوعیت کے اس پروگرام میں پہل کریں۔بورڈ اس تمام عرصہ میں تنقید کے نشتر سہتا رہا۔ لیکن عارف علاﺅ الدین اور ان کی ٹیم نے اعصاب شکن ماحول میں بھی ہمت نہیں ہاری۔ آخر کار سرمایہ کاری کے تمام مراحل طے ہوئے اور ایف ایف سی نے ونڈ پراجیکٹ کے تمام تقاضے پورے کردیئے‘اے ای ڈی بی نے اس پراجیکٹ کے لئے گارنٹی فراہم کردی اور یوں 22جون کو ایک سو چھتیس ملین ڈالر کے اس منصوبے پر عملدرآمد کے معاہدے پر دستخط ہوگئے۔ اب یقین سے کہا جاسکتا ہے کہ تقریباً ایک سال بعد صوبہ سندھ کے ضلع ٹھٹھہ میںجھمپیر کے مقام پر ہوا کے ذریعے بجلی کی پیداوار شروع ہوجائے گی۔

جناب سید نوید قمر کی وزارت نے دیر نہیں لگائی۔جوں ہی انہیں اطلاع ملی کہ ایف ایف سی نے تمام شرائط پوری کردی ہیں ‘سید نوید قمر تمام مصروفیات چھوڑ کر متبادل توانائی کے ہیڈ آفس گئے اور دستخطوں کی تقریب میں شریک ہوئے۔ نوید قمر کیلئے یہ منصوبہ کسی نوید سے کم نہیں۔انہیں امید ہے کہ ایف ایف سی کے آنے کے بعد اب پاکستان کا پرائیویٹ سیکٹر آگے بڑھے گا اور کم از کم ایک ہزار میگا واٹ کے ونڈ پاور کے دیگر پراجیکٹ کے لئے بھی پرائیویٹ سیکٹر ہی سرمایہ فراہم کرد ے گا۔

نیپرا‘ نارڈیکس اور ڈیسکان سب مبارک باد کے مستحق ہیں اور سب سے بڑی مبارک ایف ایف سی کے ایم ڈی جناب جنرل (ر) عارف حیات صاحب کیلئے کہ انہوں نے قومی مفاد میں سرمایہ کاری کا فیصلہ کرکے اعتماد سازی کی فضاءکو بحال کردیا ہے۔ اب ہوا سے بجلی پیدا ہوگی اور بجلی سے ہوا۔ پنکھے چلیں گے اور ٹھٹھہ اور اردگرد کے لوگ موسم گرما کی حدّت کومات دے سکیں گے۔

قارئین سے التماس ہے کہ وہ سیاسی رہنماﺅں کی ایک دوسرے کے خلاف لسانی ”بدکاریوں“ سے خوفزدہ نہ ہوں۔کسی قسم کا کوئی سیاسی بھونچال آرہا ہے نہ ہی کوئی ”انقلاب“ دروازے پر کھڑا بے چین ہورہاہے۔گرمی اور حبس کے اس موسم میں سیاسی اکھاڑے کو غنیمت سمجھ کر جگت بازیوں اور جملہ آزمایوں سے صرف لطف اندوز ہونے کا سلیقہ سیکھیں تو انشاءاللہ فشار خون مستحکم رہے گا اور شوگر بھی کنٹرول میں رہے گی۔اگر اس لفظی جنگ کو اصلی سمجھ لیا جائے تو پھر کمزور دل حضرات کو لوڈشیڈنگ کے ساتھ ساتھ قومی غم کے جھٹکے بھی لگنے شروع ہوجائیں گے اور یوں شدت الم کے دورے پڑنے کا خطرہ رہے گا۔

اس نفسیاتی پیش بندی کے بعد راقم کوآج کل بڑا مزہ آرہا ہے۔لطف اندوزی کے جو اسباب پہلے جناب رانا ثناءاللہ اور جناب بابر اعوان کے درمیان جاری ابلاغی جھڑپوں کے ذریعے میسر تھے اب خدا کے فضل سے باقاعدہ ابلاغی جنگ شروع ہوگئی ہے اور اس میں ایک طرف محترم میاں محمد نوازشریف پورے لاﺅ لشکر کے ساتھ میدان میں اترے ہوئے ہیں اور مقابلہ کے لئے ہمارے صدر جناب آصف علی زرداری آستینیں چڑھا کر حملہ آور ہوچکے ہیں۔
انتخابی سیاست کے اس موسم میں دلچسپی کا پہلو یہ ہے کہ ملکی مسائل اور ان کے حل کے قابل عمل منصوبے دینے کی بجائے اس بار ”پروآرمی“ اور ”اینٹی آرمی“ کا نعرہ سرچڑھ کر بول رہا ہے۔ جس طرح ہماری سمجھ سے یہ بالاتر ہے کہ پیپلزپارٹی فوج کی وکیل اور ایجنسیوں کی محافظ کیسے بن گئی اسی طرح یہ امر بھی کم از کم عوام کے لئے ناقابل فہم ہے کہ میاں محمد نوازشریف اور ان کے دست و بازو افواج پاکستان اور آئی ایس آئی کے پیچھے ہاتھ دھو کر کیوں پڑے ہیں۔ فوج کے بارے میں کبھی پی پی پی یہ الزام لگایا کرتی تھی کہ یہ پنجاب کی فوج ہے لیکن اب تختِ لاہور والے خود ہی فوج کوآڑے ہاتھوں لے رہے ہیں۔اگر دس لاکھ فوج ہے تو اس کا سادہ سا مطلب یہ ہے کہ دس لاکھ خاندان اس قومی ادارے سے براہ راست وابستہ ہیں اور اگر رشتہ دار اور دوست احباب ملا لئے جائیں تو پنجاب کا شاہد ہی کوئی قابل ذکر گھرانہ ہو جس کو فوج سے ہمدردی نہ ہو۔ جرنیل بھی فوج میں براہ راست بھرتی نہیں ہوتے وہ بھی لیفٹین سے ترقی کرتے کرتے جرنیل بن جاتے ہیں۔اس لئے جرنیلوں کی ٹھکائی کا اثر بھی تمام ان افسروں پر پڑتاہے جنہوں نے آج نہیں تو کل جنرل بنناہے۔ہمیں سمجھ نہیں آئی کہ آخر میاںنوازشریف بغیر جرنیلوں کے کوئی فوج بنانا چاہتے ہیں۔ایسی فوج بھی دنیا کی واحد فوج ہوگی!
جناب آصف علی زرداری اور ان کی پارٹی ہمیشہ”اینٹی فوج“ رہی ہے۔ قدرت کا کرشمہ کہ افواج پاکستان کے دفاع میں جناب زرداری شمشیر بکف ہوچکے ہیں۔ فوج بیچاری پریشان ہے کہ وہ کسے اپنا اور کس کو بیگانہ سمجھے۔کور کمانڈروں اورآرمی چیف کا اس بار قصور یہ ہے کہ انہوں نے موجودہ ”جمہوری سسٹم“ کو بچانے کا عہد کر رکھا ہے اور اس عہد کا اعادہ وہ بار بار کرتے ہیں بلکہ رات کی تاریکی میں ملنے کے لئے آنے والے وزیراعلیٰ پنجاب کے سامنے بھی چیف آف آرمی سٹاف نے ایسے ہی کسی اعادے کا اظہار فرما دیا ہوگا۔ اب چوہدری نثار‘جاوید ہاشمی‘خواجہ سعد رفیق سب پاک فوج کےخلاف ایسی ایسی جذباتی تقریریں کر رہے ہیں گو یافوج دشمن ملک سے آئی ہے اور ان معصوم سیاستدانوں کا اس فوج سے کبھی کوئی رابطہ ہی نہیں رہا!۔
جنرل (ر) پرویزمشرف نے میاں نوازشریف کا تختہ کیا الٹا کہ (ن) لیگ کا فلسفہ سیاست ہی الٹ گیا۔”امن کی آشا“ صرف ایک اخباری ادارے کا ہی کاروبار نہیں رہا جناب میاںنوازشریف کی سیاست کا محورومرکز بھی یہی سہانا خواب ہے۔کشمیر میں الیکشن جیتنا چاہتے ہیں اور نعرہ یہ کہ وہ تحریک آزادی کشمیر کی پرامن حمایت تک خود کو محدود رکھیں گے۔بھارتی مظالم بھی اب پھول بتائے جارہے ہیں۔
پاکستان اور پاکستانیوں کو یہ ہدایت امریکہ نے فرمائی تھی اور اسی ہدایات کی روشنی میں ہم نے کشمیری مجاہدین کو ”دہشتگرد“ تسلیم کر لیا تھا۔اسی ہدایت کی روشنی میں میاںمحمد نوازشریف نے اس غیر ملکی خاتون صحافی کو غیر مشروط محبتوں کا پیغام دیا تھا جس نے اجمل قصاب کے قصبے کا چکرلگا کر پاکستان کو عالمی سطح پر مجرم ٹھہرانے میں پہل کی تھی۔
کیا میاں نوازشریف بھی امریکی ”ڈکٹیشن “ پر ہی چل رہے ہیں؟ ۔حالانکہ آصف علی زرداری اس کام میں ایک خاص شہرت رکھتے ہیں لیکن انہوں نے میاں نوازشریف کو مولوی نوازشریف کہا ہے اور پوچھا ہے کہ ”آپ اور ’ملاّں عمر کی سوچ میں کیا فرق ہے؟ ۔ ہمارے خیال میں یہ میاں صاحب پر بے بنیاد الزام ہے عوام جانتے ہیں کہ میاں صاحب بھی امریکی عہدیداروں سے اسی تواتر کے ساتھ ملتے رہے ہیں جس ترتیب کے ساتھ حکمرانوں نے ملاقاتیں کی ہیں ۔ میاںصاحب کا کمال یہ ہے کہ وہ امریکہ کیخلاف اعلان بغاوت کرنے کی بجائے فوج کے خلاف نعرہ زن ہیں۔ حالانکہ مسٹر زرداری ہوں یا مولوی نوازشریف دونوں کا قبلہ و کعبہ امریکہ ہی ہے۔صرف انداز اور الفاظ کا فرق ہے ۔دونوں طالبان اقتدار ہیں۔ایک امریکہ کو یہاں رکھنا چاہتا ہے تاکہ ”دہشتگردی“ کا قلع قمع ہوجائے دوسرا امریکہ کو یہاں سے باعزت نکالنا چاہتا ہے تاکہ ”دہشتگردوں“کیلئے ”دہشتگردی“ کا جواز ختم ہوجائے۔ دونوں امریکہ کے ہمدرد بن کر سیاست کرنا چاہتے ہیں۔
خوشخبری یہ ہے کہ میاں محمد شہبازشریف نے بیرون ملک سرمایہ کاری ختم کرنے کا اعلان کردیا ہے اور اپنے پورے ”تین کروڑ“ روپے واپس لانے کا فیصلہ کر لیا ہے۔ خدا خیر کرے اتنی ڈھیر ساری رقم اگر برطانیہ کے بینکوں سے نکلے گی اور پاکستان میںآئے گی تو ہم خود کفالت میں کس قدر آگے جاچکے ہوں گے۔ محو حیرت ہوں کہ دنیا کیا سے کیا ہوجائے گی!!!

Click here to View Printed Statements

کریڈٹ دیا جانا چاہیے۔ذاتی پسند وناپسند کی بنیاد پر کسی پارٹی یا شخص کے اچھے اقدام کو ناقابل ذکر ٹھہرا دینا دانشمندانہ بخیلی کہلائے گی۔افسوس کے ذرائع ابلاغ کے غالب حصے نے چوہدری شجاعت کے قومی نوعیت کے فیصلوں پر مسلسل بخیلی بلکہ بعض اوقات کمینگی کا مظاہرہ کیا ہے۔مفادات کس کے نہیں ہوتے؟۔سیاست کا مقصد ہی اقتدار تک پہنچنا اور اپنے سیاسی فلسفے کے مطابق مملکت کے معاملات کو چلانا ہوتا ہے۔اگر چوہدری برادران نے پی پی پی کے ساتھ اتحاد کیا ہے اور حکومت کا حصہ بن گئے ہیں تو انہوں نے ایسا کونسا جرم کیا ہے جس سے باقی ”فرشتہ سیرت“سیاسی پارٹیاں مبّرا ہیں۔محرومین اقتدار کا پرابلم بھی اقتدار ہے اسی لئے وہ اہل اقتدار کیخلاف ”ذاتی مفادات“ کا ڈھنڈورا پیٹتے تھکتے نہیں۔ذاتی اور قومی مفادات بھی عجیب گورکھ دھندا بنا دیئے گئے ہیں۔”ذاتی مفادات“ ایک ایسی اصطلاع ہے جو ایوان اقتدار سے باہر بیٹھے امیدوارانِ اقتدار پر بھی پوری طرح ”فٹ“آسکتی ہے اور ”قومی مفادات“ ایک ایسا رویہّ ہے جو اقتدار میں رہتے ہوئے بھی اپنایا جاسکتا ہے۔سارا معاملہ نیتوّں کا ہے۔ٹی وی پروگراموںمیں کھپ ڈالنے سے نیتوں کے فتور دور نہیں کئے جاسکتے!آج یہ راز کھل کر عیاں ہوگیا کہ پرویز مشرف کے دور میں اہم ترین قومی امورپر فیصلہ کرتے وقت مسلم لیگ قائداعظم کی قیادت نے مشرف کو ذاتی ایجنڈے کی خاطر قومی مفادات کا سودا کرنے سے بار بار روکا تھا۔ پرویز مشرف کو اگر کسی کا خوف تھا تو وہ چوہدری برادران تھے۔چوہدری شجاعت اپنے مخصوص پنجابی انداز میںمشرف کی پالیسیوںکیخلاف قوم کی ترجمانی کردیا کرتے تھے۔ جب پرویز مشرف بھارت سے جنگ میں پہل نہ کرنے کا اعلان کر رہے تھے تو چوہدری شجاعت حسین نے ببانگ دہل کہہ دیا تھا”یہ ایٹم بم ہم نے شب برات پر چلانے کے لئے نہیں رکھا ہوا“ اس ایک بیان سے بھارت کو آج تک ”سرجیکل سٹرائک“ کی جرات نہیں ہوئی۔ یہ بھی حقیقت ہے کہ ڈاکٹر عبدالقدیر خان کو امریکہ کے حوالے کرنے کا فیصلہ ہوچکا تھا۔ خود ڈاکٹر صاحب نے بتادیا ہے کہ ان کو امریکہ بھجوانے کے لئے سی۔130 طیارہ چکلالہ ایئر بیس پر تیار کھڑا تھا۔ جناب وزیراعظم جمالی نے اس آرڈر پر دستخط نہیں کئے اور ظاہر ہے کہ جناب جمالی نے دستخط نہ کرنے سے پہلے چوہدری برادران سے سیاسی قوت حاصل کی ہوگی۔بعض پس پردہ معاملات ایسے ہیں جن پر خود چوہدری برادران محض قومی مفادات کی خاطر آج بھی لب کشائی نہیں کرتے۔ یہ ان کی بڑائی ہے۔چوہدری پرویز الٰہی اور چوہدری شجاعت حسین کی تربیت چوہدری ظہور الٰہی مرحوم نے ایسی ہی ٹھوس بنیادوں پر کی تھی۔
اس میں کیا شک ہے کہ چوہدری پرویز الٰہی کے دور حکومت میں پنجاب نے ترقی و خوشحالی کی نئی منازل طے کی تھیں۔آج جب ریسکیو 1122 کی برق رفتار ایمبولینسز آفت اور مصیبت میں گھرے پاکستانیوں کے لئے رحمت بن کر نمودار ہوتی ہیں تو چوہدری پرویز الٰہی کے انداز حکمرانی اورعوام دوستی کا تاثر مزید پختہ ہوجاتا ہے۔پنجاب کا وہ کون سا کھیت اور کھلیان ہے جہاں پکی سڑک نہیں پہنچی‘ وہ کون سی حویلی اور بیٹھک ہے جہاں بجلی نہیں جگمگائی‘دور دراز کے دیہاتوں تک گیس کے پائپ بچھا دیئے گئے۔پنجاب کے جن دیہاتوں میں بارش کے بعد گلیاں جوہڑوں کی شکل اختیار کر لیتی تھیں آج کھیت مزدور سے لیکر بابو تک ہر کوئی اپنی گلیوں سے گزر کر خشک پاﺅں لئے اپنے گھر کے کچے آنگن تک پہنچ جاتا ہے۔
پاکستان پر ریمنڈ ڈیوس کی رہائی کی تاریخ سے لیکر آج تک نت نئے حملے ہورہے ہیں۔اسامہ بن لادن کی مبینہ ہلاکت کے بعد امریکہ نے اس مملکت خدادا کی مشکیں کسنا شروع کردی تھیں۔ بہت ممکن تھا کہ پی پی پی کی حکومت تنہائی کا شکار ہو کر امریکہ کے سامنے مکمل طور پر سرنڈر کر جاتی اور آئی ایس آئی‘آرمی یا کسی اور قومی ادارے کو بہت سا نقصان پہنچ جاتا۔یہ بھی ممکن تھا کہ حکومت اکثریت سے محروم ہوتی اور پارلیمنٹ اور جمہوریت کا ایک بار پھر بوریابستر لپیٹ دیا جاتا۔ ٹھیک اس وقت جب پاکستان مخالف لابیاں اس انتظار میں تھیں کہ عددی کمتری کا شکارگیلانی حکومت پر ضرب کاری لگا دی جائے اور حکومت اور معاشرہ کو کسی نئے بحران کا شکارکردیا جائے گا‘چوہدری برادران نے تمام تر طعنوں اور تبصروں سے بالاتر ہو کر حکومت میں شمولیت کا فیصلہ کیا۔دو مئی کو پاکستان خارجی اور عسکری لحاظ سے انتہائی کمزور تھا اور اندرون ملک اور بیرون ملک ذرائع ابلاغ پاکستان کو ناکام ریاست کے طور پر پینٹ کر رہے تھے۔ اس وقت چوہدری برادران کے بظاہر”نان پاپولر“ فیصلے نے پاکستان کو کسی مزید سیاسی بحران سے دوچار ہونے سے بچا لیا۔ نفسیاتی طور پر ٹوٹا اور بکھرا ہوا پاکستان سیاسی اورجمہوری طور پر مستحکم دکھائی دیا۔
بجٹ 2011ءپیش ہوچکا ہے اور ایک سچ یہ بھی ہے کہ ملازمین کی تنخواہوں میں پندرہ فیصد اضافے کا فیصلہ چوہدری برادران کے سیاسی دباﺅ پر ہی کیا گیا ہے۔ بجٹ عوام دوست ہے یا نہیں لیکن یہ کہا جاسکتا ہے کہ اس بجٹ کے اندر کم ازکم عوام دشمنی والا کوئی تاثر سامنے نہیں آیا۔ لوگوںنے بہت باتیں بنائیں کہ (ق) لیگ اور پی پی پی کا اتحاد دراصل چوہدری مونس الٰہی کو بچانے کے لئے سیاسی سودا بازی ہے۔چوہدری مونس الٰہی آج بھی عدالتوںمیں پیشیاں بھگت رہے ہیں۔سیاسی طور پر بنائے گئے اس سکینڈل کا فیصلہ پنجاب کی عدالتوںمیں زیر سماعت ہے اور فیصلہ میرٹ پر ہونا ہے۔ قرائن بتاتے ہیں کہ مونس کا دامن صاف تھا اور رہے گا۔
سیاسی لحاظ سے آج کا مستحکم پاکستان دراصل چوہدری برادران کی سیاسی بصیرت کے مرہون منت ہے۔اس سیاسی استحکام کو چوہدریوں کے نام سے منسوب کیا جانا چاہیے۔

تنقید برائے تنقید نہیں۔حقیقت یہ ہے کہ پنجاب کے وزیراعلیٰ میاں محمد شہباز شریف نے آئندہ امریکی امداد نہ لینے کا اعلان کرکے صرف صوبہ پنجاب ہی نہیں بلکہ پورے پاکستان کے غیور عوام کے دلوں کی ترجمانی کردی ہے۔ہوسکتا ہے کہ ”سستی روٹی سکیم“ اور ”دانش سکولوں“ کے قیام کی طرح جناب شہباز شریف کا یہ اعلان بھی محض اپنے بکھرتے ہوئے ووٹ بینک کو متحد رکھنے کی کوشش ہو لیکن نتیجہ جو بھی نکلے پاکستان کی سیاسی تاریخ میں غیر ملکی امداد سے چھٹکارے کا یہ تصور اس قدر خوش آئند ہے کہ شریف برادران کی داد و تحسین کئے بغیر رہا نہیں جاسکتا۔ یوں تو ”قرض اتارو ملک سنوارو مہم“ بھی معاشی خودمختاری کے حصول کی خواہش کے تابع ایک کوشش تھی لیکن تمام ترغیبات کے باوجود بھی قرض اتارنے کے لئے رقم جمع نہ ہوسکی اور جو رقم جمع ہوئی وہ شائد اس قابل بھی نہیں تھی کہ اس کا ذکر کوئی حوالہ بن سکتا۔اگر صرف صوبہ پنجاب ہی غیر ملکی امداد کی ضرورت سے ماوراءہوجائے تو سمجھیں کہ پاکستان کے ساٹھ فیصد عوام خود دار کہلانے کے مستحق ضرور پائیں گے۔پنجاب حکومت کے میر منشی اب کس طرح کا بجٹ بنائیں گے اور اپنے خساروں کو کیسے پورا کریں گے‘ یہ آنے والے دنوں میں واضح ہوجائے گا۔ہم ہر روز قومی خودمختاری کی تسبیح پڑھتے ہیں اور امریکیوں سے پرزور مطالبے ہوتے ہیں کہ وہ ہماری قومی خودمختاری کا احترام کرےں لیکن آگے سے جواب ڈرون حملوں کی صورت میں دیا جاتا ہے۔ امریکی کانگریس میں بعض سینٹر تو اس قدر منہ پھٹ ہیں کہ وہ ہمارے اس مطالبے کا سرعام مذاق اڑاتے ہیں۔آج کل امریکی حلقوں‘اخبارات اور دانش کدوں میں پاکستان اور پاکستان کی عسکری اور سیاسی قیادتوں کے خوب لتے ّ لئے جارہے ہیں۔”جب ہم ڈالرز دے رہے ہیں تو پھر یہ قومی خودمختاری کہاں سے آگئی؟“ اکثر امریکیوں کا یہی جواب ہے۔پاکستان کے اپنے اقتصادی اعدادوشمار سے واضح ہوتا ہے کہ پاکستان نے امریکی جنگ میں اب تک 70ارب ڈالرز کا نقصان اٹھایا ہے جبکہ پاکستان کو فوجی اور ترقیاتی مد میں صرف بیس ارب ڈالرز ملے ہیں۔چالیس ہزار پاکستانیوں کی زندگیوں کا خون بہا طے کیا جائے تو معلوم ہوگا کہ ستر نہیں ایک سو ستر ارب ڈالرز کا مالی نقصان اور کھربوں ڈالر کی جگ ہنسائی حصے میں آئی ہے۔
میں نے بڑے بڑے اقتصادی ماہرین سے یہ سوال پوچھا ہے کہ پاکستان کس طرح ایک خودمختار اور آزاد ملک بن سکتا ہے۔ سب کا متفقہ جواب یہ ہے کہ آپ آج امریکی امداد لینا بند کردیں‘کل سے خودمختاری واپس مل جائے گی۔ لیکن مقام افسوس یہ ہے کہ ہمارے عسکری اور سیاسی قائدین امریکی امداد کی بندش کا سوچ کر ہی کپکپانے لگتے ہیں ۔ وہ تمام تر قومی غیرت اور ملی حمیت کو طاق نسیاں پر رکھ کر دست بستہ ہیلری کلنٹن کے حضور گڑگڑانے لگتے ہیں۔گزشتہ پچاس برسوں میں ملنے والی امریکی امداد کا تجزیہ کیاجائے تو یہ خوفناک حقیقت سامنے آئے گی کہ امداد کا ستر فیصد حصہ فوجی مقاصد اور تیس فیصد حصہ سیاسی مقاصد کے لئے استعمال ہوا ہے۔اسلحہ خریدا گیا اور ایسی تمام خریداریوں میں کمیشن مافیا پروان چڑھا ہے۔عوامی بہبود کے نام پر بھی جو امداد ملی وہ چند گھرانوں میں بانٹ لی گئی یا پھر سیاسی رشوت کے طور پر خرچ ہوگئی۔آج بھی کیری لوگر بل کے تحت ملنے میں امداد کا ایک کثیر حصہ بینظیر انکم سپورٹ پروگرام کے تحت ریوڑیوں کی صورت میں بانٹا جارہا ہے۔ نہ کسی بے روزگار کو روزگار ملا اور نہ ہی کوئی گھرانہ معاشی طور پر خودانحصاری کی منزل کوپا سکا۔ خیرات دست بدست بانٹی جائے یا کریڈٹ کارڈ کے ذریعے دی جائے کبھی بھی مانگنے والوں کی قسمت بدل نہیں سکی البتہ پروپیگنڈا کے طور پر وقتی فوائد ضرور مل جایا کرتے ہیں۔
میاں شہبازشریف کے اس معاشی تجزئے سے مکمل اتفاق ہے کہ غیر ملکی امداد صرف اشرافیہ کے کام آئی ہے عام آدمی کی حالت کبھی نہیں بدل سکی۔خود امریکی تجزیہ کاروں کے نزدیک امریکی امداد نے پاکستان کے معاشی استحکام میں دو فیصد بھی بہتری پیدا نہیں کی۔ایسی صورتحال میںپنجاب حکومت کا یہ نعرہ بہرحال تازہ ہوا کا جھونکا ہے اور اس اعلان کی اصل زد امریکی چالبازیوں پر پڑتی ہے۔امریکی اپنی تمام تر کوششوں کے باوجود ننانوے فیصد پاکستانیوں کی نفرت میں کمی نہیں کرسکے۔پنجاب حکومت کے اس اعلان نے عوام کو امریکی امداد کے بند ہونے کے مبینہ خطرناک نتائج سے بالاتر کردیا ہے۔اگر یہ رسم چل نکلی تو بہت ممکن ہے کہ باقی صوبوں میںیہ سوچ باقاعدہ عوامی مطالبہ بن کرسامنے آئے کہ امریکی امداد لینا بند کرو ورنہ ہم ووٹ نہیں دیں گے۔اگر پنجاب بغیر امداد کے زندہ رہ سکتا ہے تو پھردوسرے صوبوں کے غیور لوگ اور ہزارے آخر خودمختاری اور عزت والی زندگی کیوں نہیں گزار سکتے؟
میاں شہبازشریف اپنے اس اعلان کے حق میں رائے عامہ کو ہموار کرنے کے لئے گرما گرم تقاریر فرما رہے ہیں۔میاں چنوں میں ایک جلسہ سے خطاب کے دوران انہوں نے جنگ خندق کے حوالے سے اپنے اعلان کو تقویت دی ہے۔”حکومت پیٹ پر تین پتھر باندھے گی آپ صرف ایک باندھیں اور اپنے ملک کو غیر ملکی حملوں سے بچائیں“۔اگر چھوٹے اور بڑے میاںصاحبان علامتی طورپر ہی سہی اپنے حفاظتی سکواڈ اور اپنے روزمرّہ کے اخراجات میں 25فیصد کمی کردیں تو لوگ شائد بجلی اور گیس کے مطالبے سے ہی دستبردار ہوجائیں۔ جنگ خندق کے موقع پر ہمارے پیارے رسول نے اپنے پیٹ پر واقعتا پتھر باندھ رکھے تھے۔اس لئے اصحابہ اکرامؓ بھوک کی حالت میں بھی حفاظتی خندق کھودنے میں کامیاب ہوگئے۔ آج بھی ہمارے لیڈر اگر واقعتا خود مثال بنیں تو کوئی وجہ نہیں کہ ہم اپنی قومی خودمختاری اور ملی غیرت کے مضبوط ارادوں کی حفاظتی خندق کھودنے میں کامیاب ہوجائیں‘ اقبال نے سچ فرمایا‘
اے طائر لاہوتی‘اس رزق سے موت اچھی
جس رزق سے آتی ہو پرواز میں کوتاہی

بعض اوقات پانی جنگلی گھاس کے اندر سے گزر رہا ہوتا ہے اور دیکھنے والا محسوس کرتا ہے کہ پانی ٹھہرا ہوا ہے‘چل نہیں رہا۔یہی آب رواں جب سامنے کھڑی چٹانوں اور رکاوٹوں سے ٹکراتا ہے تو پھر شور اٹھتا ہے۔بڑے بڑے پتھر تیز بہاﺅ کا شکار ہوجاتے ہیں۔ رکاوٹیں سرنگوں ہوتی جاتی ہیں اور پانی تباہی مچاتا بڑھتا چلا جاتا ہے۔پاکستانی معاشرے کی یہی صورتحال ہے۔آزاد عدلیہ‘آزاد میڈیا‘آزاد پارلیمنٹ اور منظم افواج کے ہوتے ہوئے کوئی تصور ہی نہیںکرسکتا کہ اس دھرتی پر کوئی انقلاب آسکتا ہے‘کوئی عوامی سیلاب سب کچھ تباہ کرسکتا ہے ۔لیکن عوام کے غم اور غصے ‘مایوسی اور بے بسی‘بے اختیاری اور لاچاری۔سب اندر ہی اندر ایک طوفان کی شکل اختیار کرتے جارہے ہیں۔آزاد عدلیہ ایک آخری امید‘لیکن عوام کو کوئی ریلیف ملتا دکھائی نہیںدیتا۔میڈیا آزاد تر‘لیکن سوائے غصے سے بھرے غبارے میں سے ہوا نکالنے‘پنکچر لگا کر پھر ہوا بھرنے اور پھر سوئی مار دینے کے کوئی نتیجہ سامنے نہیں آرہا۔ ہر ”انفارمیشن“ پہلے سے طے شدہ ایجنڈے کے تحت سامنے آتی ہے۔ پروگرام ”ہٹ“ اور بریکنگ نیوز“ کی دوڑ اشوز کو نان اشوز اور رائی کو پہاڑ بنانے کے لئے لگائی جارہی ہے۔منتخب پارلیمنٹ عوام کی نمائندگی کی دعویدار ہے لیکن عوام کو اس جمہوریت کے نتیجے میں بھی مسائل ہی مسائل ملے ہیں۔حکومت اور یہ نظام محض اپنی مدت پوری کرنے کو ہی اپنی اور عوام کی کامیابی تصور کر رہے ہیں لیکن عام آدمی ان ایوانوں کو اب نفرت اور بیزاری کی نگاہ سے دیکھتا ہے۔ دل سے پوچھتا ہے اس نظام کا حاصل کیا ہے۔ افواج پاکستان دفاع وطن کی ذمہ داریوں میں مصروف ہیں اور فوجی اقتدار کے نتیجے میں مسلط ہونے والی امریکی جنگ سے نجات کی کوشش کررہی ہیں۔ کوئی بھی تو نہیں جو بجلی لا دے‘چولہے جلا دے ‘ روزگار دلا دے‘عزتوں کو محفوط بنائے‘عصمتوں کی پاسداری کرے۔!
سلطان بشیر الدین محمود سے تفصیلی نشست ہوئی۔ وہ اٹامک انرجی کمیشن کے ڈی جی رہے۔انہوںنے ”امہ تعمیر نو“ کے پلیٹ فارم پر حکومت پاکستان کی رضامندی اور حوصلہ افزائی سے ملاں محمد عمر کی حکومت کے دوران افغانستان کی تعمیر نو کی بنیادیں رکھی تھیں۔ وہ اور ان کی ٹیم کے معزز اور معتبر ارکان تواتر کے ساتھ افغانستان جاتے رہے اور روسی قبضے کے دوران تباہ ہوجانے والے انفراسٹرکچر کو بحال کرنے کے منصوبے بناتے رہے۔ مسلسل مطالعے اور طویل مشاہدے کے سبب وہ بڑے جچے تلے انداز میںپاکستانی معاشرے کے اندر متوقع تبدیلیوں کا تجزیہ کرتے ہیں۔سلطان بشیر الدین محمود کہہ رہے تھے‘
”پاکستان میں صرف غریب ہی نہیں امیر آدمی بھی تنگ بیٹھا ہے۔ غریب اس لئے بے زار ہے کہ اسے روٹی میسر نہیں اور امیر اس لئے کہ اس کے گھر کا ایئرکنڈیشنز نہیں چل رہا۔ بے بسی کی اس حالت کو ہم سب ابھی تک برداشت کرتے آئے ہیں لیکن اب ہمارا نوجوان طبقہ ہماری ”برداشت“ کی اس عادت سے تنگ آچکا ہے۔ وہ اب برداشت کرنے پر تیار نہیں۔ نوجوانوں کے عدم برداشت کو محسوس کرنا ہوتو انٹرنیٹ پر مختلف بلاگز کو پڑھنا ضروری ہے۔نوجوان نسل اب اخبارات اور ٹیلی ویژن کے ذریعے اپنے جذبات اور احساسات کا اظہار نہیں کرتے بلکہ وہ انٹرنیٹ کے ذریعے اپنے رابطے بڑھاتے اور کسی انجانی منزل کی طرف نکل کھڑے ہونے کا اظہارکرتے ہیں۔
امیر اور غریب‘پنجابی‘پٹھان ‘سندھی‘بلوچ‘سرائیکی‘ہزاروی‘ مہاجر اور بہاولپوری یہ سب گروہ اور طبقے اپنے اپنے دکھ لے کے نکلیںگے اور ایک لاوے کی شکل اختیار کر جائیں گے ۔اس لاوے کو مولوی سنبھال نہیں پائے گا کیونکہ نئی نسل مولوی سے واقف نہیں اور اس کے پیچھے چلنا بھی نہیں چاہتی۔شائد سوشلسٹ گروہ اس بے چینی سے فائدہ اٹھائیں یا شائد مسلم سکالرز مولوی کی جگہ لے سکیں۔ کچھ کہا نہیںجاسکتا“۔
جناب سلطان بشیرالدین ایک سائنسدان بھی ہیں اور قرآن کے طالب علم بھی۔ان کے تجزئے کو پرکھنا ہو تو اسلام آباد سے نکل کر ہمیں اصلی پاکستان میں کچھ وقت گزارتا چاہیے۔خدا نہ کرے کہ نوجوان نسل اور مایوسی میں گھرے عوام کا غم اور غصہ کسی لاوے کی شکل اختیار کرے اور جاگیردار طبقہ‘یا کوئی اور بالاتر گروہ اس لاوے کو اپنے حق میں استعمال کرلے۔ہمارے دانشوروں کو ابھی سے گہرا مطالعہ کرکے کوئی مثبت اور بہتر راہ تجویز کرنی چاہیے۔ہمارے موجودہ رہبر اور ناخدا اپنی بقاءکے لئے اس قدر مصروف ہیں کہ انہیں متوقع طوفانوں کا احساس ہی نہیںرہا‘انہیں کون سمجھائے کہ‘
عکس ٹھہرے ہوئے پانی میں ہے طوفانوں کا
ناخدا سے یہ کہو کہ وہ لب ساحل نہ رہے

ماضی میں جھانکنا انسان کی فطرت ہے۔نہ چاہتے ہوئے بھی انسانی سوچ ماضی کے جھروکے سے جھانکنے لگتی ہے۔ دس برس ہونے کو آئے ہیں امریکہ نے نائن الیون کے حادثے کا بدلہ لینے کے لئے روسیوں کے ہاتھوں پہلے سے ہی تباہ حال افغانستان پر ڈیزی کٹر بموںکی بوچھاڑ کر دی تھی۔آج امریکی سفیر پورے یقین سے اعلان کر رہا ہے کہ امریکہ افغانستان سے واپس جانے کے لئے نہیں آیا۔ پھر کس لئے آیا؟ یہ وہ سوال ہے جس کے ہزاروں جواب ہیں۔”نائن الیون“ بپا کرنے والے کون تھے‘یہ سارا نزلہ طالبان کی ”اسلامی حکومت “پر کیوں گرا؟۔ایسے سوالوں کے جوابات دیتے ہوئے لوگوں نے کتابیں لکھی ہیں۔ جب تک مورخ تاریخ قلم بند کرتے رہیں گے‘افغانستان پر امریکی قبضہ کی وجوہات پر بحث ہوتی رہے گی۔
افغانستان جیسے قبائلی معاشرے میں ”امارات اسلامی“ کے قیام کا تجربہ کیسا رہا‘اس سوال کا جواب لینے کے لئے مجھے محترم سلطان بشیر محمود جیسے نیوٹرل اور بے غرض تجزیہ کار سے بہتر گواہ دکھائی نہیں دیتا۔ یہ پاکستان کے وہ نیوکلیئر سائنسدان ہیں جنہوں نے ٹیکنالوجی اور تعلیم کی بنیاد پر ملت اسلامیہ کی نشاة ثانیہ کا ایک خواب دیکھا۔ خوش قسمتی سے ان دنوں لاہور‘اسلام آباد اور کابل میں چند احباب”امہ تعمیر نو“ کے نام سے ایک ادارہ قائم کرچکے تھے لہٰذا جناب سلطان محمود اور ان کے دوستوں کے حلقہ نے اس مشن کے لئے خود کو وقف کردیا۔ ان کے اس مشن سے اسلام آباد اور کابل کے سفارتخانے آگاہ رہتے تھے اور تعمیراتی تعلیمی اور صنعتی منصوبوں کی تکمیل کے لئے دونوں ممالک کی حکومتیں بھی انتہائی معاون تھیں۔
”ہم نے افغانستان میں اڑھائی برس تک کام کیا۔ملا محمد عمر کی حکومت بڑا تعاون کرتی تھی۔کرپشن ہرگز نہیں تھی۔ احکامات پر عملدرآمد منٹوں میں ہوتا تھا۔ ہم نے قندھار انڈسٹریل ایریا میں آٹا مل لگائی ‘ماچس فیکٹری کے لئے اسباب مہیاکئے۔ تعمیر شروع ہوگئی تھی۔انگور کا باغ لگانے کے لئے حکومت افغانستان نے ہمیں بارہ ہزار ایکڑ اراضی آلاٹ کردی تھی۔کسی وزیر یا کسی افسر نے کبھی کوئی رشوت‘تحفہ یا مراعات طلب نہیں کیں۔ہم حیران ہوتے تھے کہ یہ معاشرہ اچانک اس قدر شفاف اور دیانتدار کیسے ہوگیا ہے۔ہم نے کئی بار رات کو سفر کئے‘افغانستان کی حدود کے اندر کبھی کوئی حادثہ پیش نہیں آیا۔ بے خطر آیا جایا کرتے تھے“
”طالبان تحریک نے لوگوں کے اندر عجیب جذبہ بھر دیا تھا۔ وہ پڑھے لکھے نہیں تھے‘ڈگریاں نہیں لی تھیں۔ مدرسوں سے نکلنے والے مولوی تھے۔ لیکن ان کے اندر (Honesty of Purpose) یعنی مقصد کے ساتھ اخلاص بہت تھا۔لہٰذا جو کام کسی انجینئر یا ایم ڈی کے ہاتھوں ہونا تھا وہ کام عام مولوی بہتر انداز میں سرانجام دے رہا تھا۔ ہمیں کابل کے قریب ایک ہائیڈرو پاور ہاﺅس کا معائنہ کرایاگیا۔ہم اس پاور ہاوئس کے جنرل منیجر سے ملے۔یہ کسی مدرسے سے فارغ التحصیل مولوی تھے۔ہم نے پوچھا کہ یہ تو پاورہاﺅس ہے اور خالص ٹیکنیکل کام ہے آپ اسے کس طرح سنبھال لیتے ہیں۔مولوی صاحب کا جواب تھا کہ میںکوئی انجینئر نہیں ہوں۔ میں اس پاور ہاﺅس پر مامور ہوں۔میں روزانہ صبح آجاتا ہوں۔ایک ایک آدمی کے پاس جاکر اس کی ضرورت پوچھتا ہوں اور وقت مقررہ میں جیسے بھی ہو اس کی وہ تیکنیکی ضرورت پوری کروا دیتا ہوں۔“
”ہمیں ایک بہت بڑی مسجد میں لے جایا گیا۔مسجد روسی حملوں کے سبب جگہ جگہ سے خستہ تھی۔ اس مسجد میں سینکڑوں بچیاں پڑھ رہی تھیں۔ ریاضی تھی‘عربی تھی اور سکول کی دیگر کتابیں پڑھائی جارہی تھیں۔ ہمیں مہتمم نے بتایا کہ ہم نے تین گھنٹے بچیوں کی تعلیم کے لئے مختص کرنے کا حکم دیا ہے۔ چونکہ ہمارے پاس پڑھانے والے اساتذہ ہی نہیں اس لئے ابھی ابتدائی کلاسوں کا اجراءکیا ہے۔ مسجد میں پڑھانے کا سبب یہ ہے کہ ہمارے بچوں کے لئے سکول نہیں تو بچیوںکے لئے کہاں سے لائیں۔ ہم نے چار لاکھ کتابیں مفت فراہم کرنے کا پروگرام بنایا تاکہ تعلیم کا دائرہ وسیع ہوسکے“
”میں یہ نہیں کہوں گا کہ طالبان کی حکومت مکمل اسلامی ماڈل تھی۔میرا اندازہ ہے کہ یہ ستر فیصد اسلامی اور تیس فیصد قبائلی تھی۔ذرائع ابلاغ نے ستر فیصد کا ”بلیک آﺅٹ“ کیا اور 30فیصد کو ”فلیش“ کیا۔امریکی حملے کا ایک بڑا سبب یہ ہوسکتا ہے کہ افغانستان میں یہ ستر فیصد اسلامی حکمرانی پاکستان سمیت دوسرے مسلم ممالک میں تازہ ہوا کا جھونکا ثابت ہوئی۔مسلم عوام توقع کرنے لگے تھے کہ ان کے ہاں کا فرسودہ نظام بھی بدل جائے گا اور ان کے ہاں بھی ”امارات اسلامی“ جیسا تجربہ ہوگا۔ یہ بات امریکہ کے لئے سب سے بڑی پریشانی تھی۔ایران کا انقلاب بھی امریکہ کے لئے ناقابل برداشت تھا۔لیکن یہ شیعہ مسلمانوں تک محدود تھا۔ افغانستان میںاگر طالبان کی حکومت چلنے دی جاتی تو پھر یہ ”سنی انقلاب“ پورے عالم اسلام میں پھیل جاتا۔ اور یہ بات امریکہ کے لئے قطعاً قابل برداشت نہیں ہوسکتی تھی“
”پاکستان میں مسلمان سب ہیں لیکن اسلام پسند بہت کم تعداد میں ہیں۔مولوی اور اسلام کے علمبردار پاکستانی معاشرے میں اپنا اعتبار کھوچکے ہیں۔یہاں کے طالبان نظریاتی نہیںفسادی گروہ بن چکے ہیں۔ان کے نظریے کو عوام کی تائید حاصل نہیں ہوسکی۔پاکستان میں روزگار‘انصاف اور اختیار سے محروم عوام کو کسی نظریے سے کوئی غرض نہیں رہی“جناب سلطان محمود بشیر کے مشاہدات سن کر دل نے چاہا‘دوڑ پیچھے کی طرف اے گردش ایام تو!

وزارت خارجہ کی خاتون ترجمان نے کرکٹ ڈپلومیسی کو کامیاب قرار دیتے ہوئے یہ یقین بھی ظاہر کردیا کہ پاکستان اور بھارت اپنے مسائل خود حل کرسکتے ہیں کسی تیسرے فریق کی ضرورت نہیں۔آپ قارئین کو یاد ہوگاکہ سابق صدر جنرل پرویز کی حکومت نے آگرہ میں بے آبرو ہونے سے پہلے تواتر اور تسلسل کے ساتھ یہی خوشخبری سنائی تھی کہ اب پاکستان اور بھارت خود اس قابل ہوگئے ہیںکہ کشمیرسمیت تمام معاملات خود ہی حل کرلیں گے امریکہ یا کسی اور ملک کی طرف سے ثالثی کی قطعاً ضرورت نہیں ہے۔آگرہ میں جب بھارت عین وقت پر تمام عہدوپیمان بھول کر تحریر شدہ متفقہ مسودے سے مکر گیا تو کمانڈو صدر مایوسی کے عالم میں ہاتھ ملتے دکھائی دیئے اور پھر موہالی میں ادھموا ہونے تک ہم امریکہ ‘برطانیہ اور چین سمیت ہر ملک کو پکارتے رہے کہ وہ مسئلہ کشمیر حل کرانے میں ثالثی کی ذمہ داری پوری کریں۔
پاکستانی قوم کے لئے یہ حیرت ناک خبر ہے کہ حکومت پاکستان ایک بار پھر پرویز مشرف والے اس یقین کے ساتھ سرشار ہوگئی ہے کہ اب پاکستان اور بھارت اپنے مسائل خود حل کرسکتے ہیں۔ آخر موہالی میں میچ ہارنے کے علاوہ ایسا کونسا چمتکار ہوا ہے کہ مسئلہ کشمیر جیسے عالمی تنازعہ پر بھارت ایک بار پھر قابل اعتبار ہوگیا ہے؟ منموہن سنگھ‘سونیا گاندھی اور راہول گاندھی نے ایسا کونسا جادو کردیا ہے کہ ہمارے وزیراعظم سید یوسف رضا گیلانی کوبھی بھارتی قیادت کے منہ سے پھول جھڑتے دکھائی دیئے۔وزیراعظم کے لب و لہجہ سے خوشی یوں جھڑتی ہے گویا بھارتی قیادت نے کشمیر ان کی جھولی میں ڈال دیا ہے اور اب بس چند دنوں کی بات ہے جب ہماری قومی قیادت سرینگر کی ڈل جھیل میں کشتیاں چلا رہی ہوگی۔ تقسیم ہند کا ادھورا عمل آنکھ جھپکنے میں مکمل ہوجائے گا!
تفصیلات شائع ہوئی ہیں کہ منموہن نے جناب گیلانی کی طرف سے پاکستان کے دورے کی دعوت قبول کر لی ہے۔یہ بھی طے ہوا ہے کہ اب دونوں ممالک کے تجارت کے سیکرٹریز آپس میں ملیں گے۔1971ءکے کچھ قیدی بھی چھوڑ دیئے جائیں گے اور پاکستان کی قید میں سزائے موت کا ایک قیدی بھی شائد رہا کردیا جائے گا۔ہماری خاتون وزیر اطلاعات ونشریات نے دعویٰ کیا ہے کہ بھارت کو احساس ہوگیا ہے کہ معاملات صرف مذاکرات سے ہی حل کئے جاسکتے ہیں۔ہمارے حکمران خوشی سے بغلیں بجا رہے ہیں اور اس اظہار مسرت کے پیچھے یہ رازبھی بتایا جارہا ہے کہ بھارت نے بمبئی حملوں کے ملزموں کی حوالگی کا مطالبہ ترک کر دیا ہے۔ پاکستانی حکمرانوں کو سکھ کا سانس ملا ہے۔بتایا جارہا ہے کہ بھارت کی شہہ پر امریکہ کے بمبئی حملوں میں ہلاکت شدگان کے لواحقین کی طرف سے درج کرائے گئے مقدمے کی پیروی ختم ہوجائے گی اور یوں آئی ایس آئی کے سربراہ کسی ممکنہ گرفتاری سے بچ جائیں گے۔افواہ ہے کہ ان”انعامات “کی خاطر ہی ہماری قومی ٹیم نے سیمی فائنل میں چار کیچ چھوڑے اور ٹیسٹ میچ والی بیٹنگ کی تھی۔ مزید یہ افواہ بھی ہے کہ خطے میں بھارت کی بالادستی کو تسلیم کرلیا گیا ہے۔ موہالی کے گراﺅنڈ میں شکست کے بدلے ہی چندی گڑھ میں ہونے والے مذاکرات ”کامیاب“ہوئے۔
پنجاب کے وزیراعلیٰ نے پاکستانی کرکٹ ٹیم کی اس ”شاندار“کارکردگی پر نہ صرف یہ کہ استقبال کیا بلکہ ہر کھلاڑی کو پانچ پانچ لاکھ روپے بھی دیئے۔ وزیراعظم ہاﺅس میں ”قومی مفاد“ کا مظاہرہ کرنے والی اس بہادر ٹیم کو چائے پلائی جائے گی۔ ٹیم کے کپتان شاہد آفریدی کو قوم سے معافی مانگنے سے منع کردیا گیا ۔انہیں تھپکی دی جارہی ہے کہ انہوں نے بہت بڑا ”کارنامہ“ سرانجام دیا ہے اور ان کے حیرت انگیز کھیل نے دو ملکوں کو آپس میں پھر سے ملادیا ہے۔یہ پہلی بار ہے کہ بھارت سے ذلت آمیز شکست کے باوجود قومی ٹیم کو پھولوں اور نوٹوں کے ہار پہنائے جارہے ہیں۔مصباح الحق سے کسی نے نہیں پوچھا کہ اس نے ”ون ڈے“کو ”ٹیسٹ میچ“ کیوں بنایا۔کسی نے کیچ چھوڑنے والوں کا محاسبہ نہیں کیا۔قوم کوپہلے کرکٹ کا بخار چڑھایا گیااور اب تپتے جسم پر برف ملی جارہی ہے۔
یہ بھی پہلی بار ہواکہ بھارتی اخبارات نے پاکستانی ٹیم کو بدترین شکست کے باوجود بہترین الفاظ میں خراج تحسین پیش کیا۔”وہ شکست کھاگئے لیکن ان کے سر فخر سے بلند ہیں“ ایسے ایسے ذومعنی جملے لکھے گئے کہ اپنی دانشمندی بھی ششدر کھڑی ہے۔
کھیل ہی کھیل میں پس پردہ طاقت نے پاکستانی حکومت کو بھارتی حاشیہ نشیبی پر بالآخر آمادہ کر لیا ہے اور مسئلہ کشمیر کامثلہ کرنے کی تیاریاں مکمل ہوگئی ہیں۔کشمیر کو ایک طرف رکھ کر خطے میں امریکی مفادات کے تحفظ کی خاطر آگے بڑھنے اور بڑھتے ہی چلے جانے کا ٹاسک دے دیا گیا ہے اب کشمیری اور ان کے رہنما ہزار قربانیاں دیتے رہیں۔ ان کے جواں سال بچے اس پاکستان کی خاطر کٹتے اور مرتے رہیں اور کشمیریوں کی زندگی جہنم بنی رہے ہم بھارت کے ساتھ تجارت کو بڑھائیں گے۔”دہشتگردی“ کیخلاف جنگ میں اکٹھے چلیں گے۔ سید علی گیلانی کی آواز صدا بصحرا ہی رہے گی۔کھیل ہی کھیل میں ہم نے ایک بار پھر کشمیر کو کھیل تماشہ بنا دیا ہے !یہ ہے ہماری قومی خودمختاری اور کشمیر سے محبت کا ایک اور مظاہرہ!