Click here to View Printed Statement

ملال یہ ہے کہ ملالہ بیٹی نے یو این کے اجلاس میں جو پُرتاثیر تقریر کی اس میں امریکی ڈرون حملوں’عافیہ صدیقی بہن پر عدالتی تشدد اور افغانستان پر امریکی یلغار کے حوالے سے اشارہ تک نہیں کیا۔ بچے معصوم ہوتے ہیں اور نئی زندگی پانے کے بعد اور بھی معصوم لگتے ہیں۔معصومیت کا تقاضا تو یہ ہے کہ ہر برائی کو برائی ہی سمجھا جائے۔یہ نہیں ہوسکتا کہ طالبان تو ہر برائی کی علامت قرار دیئے جائیں اور امریکہ کو ہر اچھائی کا حوالہ ثابت کیا جائے۔ پاکستان کی بار بار کی اپیلوں کو جس طرح امریکہ نے رد کرتے ہوئے ڈرونز کے ذریعے معصوم ملالائوں کو موت کے گھاٹ اتار دیا

اس پرانہی کے قوم قبیلوں سے تعلق رکھنے والی لڑکی نے کوئی آہ و بکا کی نہ اس کا دل دُکھا اور نہ اس کی آنکھ روئی۔طالبان کے ہاتھوں شدید زخمی ہونے سے قبل بھی ملالہ نے ڈرونز حملوں کے خلاف کبھی کچھ لکھا نہ بولا۔ ان کے والد صاحب حالات پر گہری نگاہ رکھنے والے شخص ہیں ۔انہوں نے عالمی طاقت کا ساتھ دیا اور اپنی بیٹی کی معصومیت کو بھی اس آگ میں جھونک دیا۔ ملالہ کو امریکی آشیرباد پر برطانیہ نے خوب اٹھایا اور اسے عالمی سطح پر بچیوں کی تعلیم کے لئے تگ و دو کرنے والی ”ہستی” بنا کر پیش کردیا گیا۔امریکی یلغار کیخلاف ہتھیار اٹھانے والوں کے خلاف اس سے زیادہ کارگر حملہ نہیں ہوسکتا۔ اسے حکمت عملی کہتے ہیں اور اس حکمت عملی سے طالبان آج بھی کوسوں دور ہیں۔ وہ صرف مرنا اور مارنا جانتے ہیں۔زندگی بخش کر کیاکیا حاصل ہوسکتا ہے اس فلسفے سے طالبانی نظریات تہی دامن ہیں۔”علم ہر مومن (مرد و عورت) پر فرض ہے”۔یہ ایک متفقہ علیہ حدیث ہے۔حال ہی میں ترکی کے علماء نے اس حدیث کی تشریح بھی کردی ہے اور قرار دیا ہے کہ علم سے مراد دینی اور دنیاوی دونوںعلوم ہیں کیونکہ اسلام  دنیا اور دین میں تفریق نہیں کرتا۔جنگ بدر میں قیدیوں کی رہائی کے لئے ایک شرط یہ بھی رکھی گئی تھی کہ جو قیدی مسلمانوں کو پڑھنا لکھنا سکھائیں گے انہیں رہا کردیا جائے گا۔مشرک اور دشمن قیدیوں نے مسلمانوں کو دین تھوڑا ہی سکھانا پڑھانا تھا بلکہ اس وقت کا دنیاوی علم ہی پڑھانا اور اسی کے بارے میں لکھنا سکھانا تھا۔ اس سے بھی یہ بات واضح ہوجاتی ہے کہ ”علم” کو مخصوص معنوں تک محدود نہیں کیاجاسکتا۔ آپ صلی اللہ علیہ وآلہ وسلم کی حدیث ہے کہ ”علم حاصل کرو چاہے تمہیں چین جانا پڑے”۔ مکی یا مدنی دور سے لے کر آج تک چین کبھی بھی کوئی اسلامی مملکت نہیں رہا کہ مسلمانوں کو علم کے حصول کے لئے چین کا حوالہ دیا جاتا۔ چین میں علم حاصل کرنے کا مقصد دنیاوی تعلیم ہی تھا۔ ایک طالبان رہنما کا کھلا خط پڑھنے کے بعد احساس ہوا کہ طالبانی سوچ” علم” کے حوالے سے وہیں اٹکی ہوئی ہے جہاں سے دیوبند اور علی گڑھ کے درمیان چپقلش شروع ہوئی تھی۔1857ء میں یہی بعث جاری تھی۔طالبان لیڈر نے ملالہ کو مدرسے میں تعلیم حاصل کرنے کی ترغیب دے کر مدرسے اور سکول کی جنگ کو پھر سے تازہ کردیا ہے۔یوں محسوس ہوتا ہے کہ طالبان رہنمائوں نے سرکاری سکولوں کانصاب نہیں پڑھا۔ اگر کوئی بچی اچھے نمبروں سے میٹرک یا ایف اے پاس کرلے تووہ اچھی خاصی حافظہ اور معلمہ بن جاتی ہے۔آیات و حدیث کا ایک ذخیرہ اسے ازبر ہوجاتا ہے اور دین اسلام کے ارکان اور ان کی تشریح سے بھی وہ بخوبی واقف ہوجاتی ہے۔قرآنی  احکامات سمجھ جاتی ہے بلکہ والدین کو سمجھا سکتی ہے۔ ہونا تو یہ چاہیے تھا کہ ہمارے مدرسے اپنے ہاں سائنس’میتھ’ بائیو’کمپیوٹر’سائنس اور اعلیٰ تیکنیکی ڈگریوں تک کی تعلیم کے راستے ہموار کرتے لیکن اہل سکول نے یہ کارنامہ انجام دیا کہ انہوںنے اپنے ہاں مدرسے سے کہیں بہتر دین کا ادراک پیدا کرنے والے نصاب شامل کرلئے۔ اس لئے ملالہ کو مدرسے کی تعلیم کی شائد ضرورت نہیں اصل مسئلہ یہ ہے  کہ مدرسوں میں سکولوں ‘کالجوں اور یونیورسٹیوں کی سائنسی اور تیکنیکی تعلیم کو رائج کیا جائے۔خط لکھنے والے طالبان رہنما خود بھی انگریزی بولتے اور بلاگنگ کرتے رہے ہیں۔ وہ یہ کام کریں تو اچھا ہے اور اگر کوئی اور یہی کام کرے تو برا ہے۔اصل مسئلہ مدرسے یا سکول کا نہیں اصل معاملہ سوچ کا ہے۔سوچ نہ بندوقوں سے بدلی جاسکتی ہے نہ ڈرونز سے۔ سوچ تو سوچ ہی سے تبدیل ہوتی ہے۔علی گڑھ یونیورسٹی سے فارغ ہونے والے ابتدائی طلبہ دیوبند مدرسہ میں جا کر پڑھایا کرتے تھے۔پھر یہ سلسلہ رک گیا اور ہمارے معاشرے میں تعلیم کے دو متضاد دھارے بن گئے۔پاکستان بنا تو ان دھاروں کو آپس میں ملانے کی کوششیں شروع ہوئیں۔ مدرسہ تو اپنی محدود سوچ سے باہر نہ آسکا البتہ سرکاری سکول اسلامیات سے روشناس ہوتے چلے گئے۔بچوں کے لئے ہمارے سرکاری سکولوں میں پڑھایا جانے والے نصاب دین اور دنیا کے خوبصورت توازن سے مزین ہے۔کاش کہ اب مدرسہ اور سکول کی یہ جنگ ختم ہوجائے اور نہ کسی ملالہ کو گولی مارنی پڑے اور نہ کوئی معصوم ملالہ غاصب قوتوں کہ آلہ کار بنے۔

Click here to View Printed Statement

JANG LAHORE IQRA PAGE

NAWA-I-WAQT KARACHI MILLI EDITION

آج انسانیت مجموعی طور پر انتشار کا شکار ہے ۔تمام تر ترقی ‘خوشحالی تعلیم اور علم کے باوجود ساڑھے چھ ارب انسان ایک دوسرے کو نیچا دکھانے اور اس کرہ ارض کو نہ ختم ہونے والے فتنوں میں مبتلا کردینے کی کوشش میں مصروف ہیں۔کوئی ایسا خطہ نہیں جو جنگ و جدل سے پاک ہو۔ جہاں انسان انسان کو کاٹ نہ رہا ہو۔ جہاں آدم آدم کو لوٹ نہ رہا ہو امیر غریب کو کھائے جارہا ہے۔ باوسیلہ دنیا بے وسیلہ بستیوں کو اجاڑ رہی ہے۔تقابل کا فلسفہ اپنے تمام تر منفی معنوں کے ساتھ نسل انسانی کی تباہ کاریوں میں کارفرما ہے۔ کچھ معلوم نہیں کب زیر زمین چھپے ہوئے ایٹم بم‘ سمندر میں تیرتی ہوئی نیو کلیائی آب دوزیں ‘تابکاری مواد اٹھائے فضاءمیں قلانچیں بھرتے طیارے اور خلا میں ہچکولے لیتے مصنوعی سیارے اچانک کسی مہم جو ذہن کی چھوٹی سی غلطی سے اس قافلہ انسانیت کو آگ لگا دیں اور احسن تقویم کے فارمولے پر پیدا کردہ انسان اپنی ہی بدتد بیری اور بدنیتی کے سبب اپنے گھر کو جلا کر خاکستر کردے۔ انسانیت کو بچانے کی آج جس قدر ضرورت ہے۔ شاہد اس سے پہلے کبھی بھی نہ تھی۔ مختلف یورپی دانشور اور انسانی حقوق کے چیمپئن خود ساختہ تھیوری اور محض انسانی ذہن سے پھوٹنے والی احتیاطوں کو ملحوظ خاطر رکھ کر انسانیت کے قافلے کو بچانے کی کوشش میں مصروف ہیں لیکن تمام تر خلوص نیت کے باوجود مغربی انسان دوست ادارے اور حلقے محض اندھیروں میں ٹامک ٹوئیاں مار رہے ہیں ان کی حالت یہ ہے کہ

فلسفی کو بحث کے اندر خدا ملتا نہیں
ڈور کو سلجھا رہا ہے اور سرا ملتا نہیں
اُلجھی ہوئی ڈور کا سرا ڈھونڈنے کے لئے انہیں ہر طرح کے تعصبات سے بالاتر ہو کر صرف اور صرف سچ کو تلاش کرنا ہوگا۔ مجھے یقین ہے کہ اگر انہوں نے مذہب ‘زبان ‘علاقے ‘رنگ نسل ‘ Status اور دنیاوی طبقاتی تقسیم کی عینک اتار کر حق کی تلاش کو نکلیں گے تو پھر انسانیت کے عظیم محسن دنیا جہاں کے لئے رحمت للعالمین اور صرف مسلمانوں کے لئے نہیں بلکہ بنی نوع انسان کے غم گسار آخری پیغمبر خاتم النبین حضرت محمدﷺ کی تعلیمات تک ضرور پہنچ جائیں گے۔
اگر ہم ماہ ربیع الاول میں کوئی ایسی کتاب ترتیب دے سکیں ۔ کوئی ایسی قلم بنا سکیں جس میں رسول پاک ﷺ کی تعلیمات کا بھرپور تاثر ملتا ہو اور وہ یورپ اور امریکہ کے لوگوں کو دکھائی جائیں تو میں دعویٰ سے کہتا ہوں کہ جو ذہن گستاخی پر اتر آئے ہیں وہی ذہن آپ ﷺ کے حق میں اس طرح سرنگوں ہوجائیں گے جس طرح حضرت عمرؓ تلوار حمائل کئے درنبوت پر جھک گئے تھے۔
قافلہ انسانیت کو درپیش جان لیوا حادثوں سے بچانے کا صرف ایک ہی راستہ ہے کہ ہم بحیثیت مسلمان اسوءرسول پر عمل کریں اور غیر مسلموں کو ڈرانے اور خوفزدہ کرنے کے بجائے یا ان سے مرعوب ہونے اور دور ہونے کے بجائے انہیں تعلیمات نبوی سادہ اور آسان سے لفظوں میں سمجھا سکیں۔ دنیا میں مختلف شخصیات علم و کمال‘دولت و جمال اور قوت واقتدار لے کر آتی رہی ہیں مگر ہم حضور انور کو سب سے زیادہ اہمیت دیتے ہیں۔اس کی ایک وجہ تو ہماری جناب رسول اللہ سے محبت و عقیدت اور ہمارا ان کے ساتھ رشتہ ایمان میں بندھا ہونا ہے تو دوسری وجہ یہ بھی ہے کہ جو آپ نے انسانیت کو عطا کیا ہے وہ آپ سے پہلے یا بعد میں کسی نے نہیں دیا۔
دنیا کی دوسری شخصیات کو دیکھیں تو سکندر‘رستم و دیگر نامور کمانڈرز جاہ و جلال دکھا کر چلے گئے‘ کارل مارکس اورلینن جیسے لوگ نظریاتی نعرے دے کر جہاں فانی سے کوچ کر گئے۔
غرض کوئی علمی موشگافیاں دکھا کر چلا گیا کسی نے غلط نظریات میں الجھا کر اسے کمال تصور کیا۔ کسی نے انسانیت کو خاک وخون میں تڑپانے سے لطف حاصل کیا مگر حضور کے انقلاب سے انسانیت کو رہنمائی‘ امن ‘ہدایت و نور ملا ہے۔
اور آپ کے ارشادات آج کے مہذب انسان کے لئے بھی اسی طرح مفید اور حیات بخش ہیں۔ جس طرح 1500 سال قبل کے انسان کے لئے تھے۔ ان کی روشنی اور تابانی میں ذرا فرق نہیں آیا۔اخلاق کی جھلک‘ کردار کی بلندی‘ امانت ‘دیانت اور انسانیت کے لئے پیار جہاں بھی ہے وہ حضور صلی اللہ علیہ وسلم کا دیا ہوا ہے۔ آپ کی بتائی ہوئی باتیں آج بھی بڑے بڑے سائنس دان پڑھتے ان سے ہدایت و رہنمائی حاصل کرتے اور قلب سلیم رکھنے والے آپ کے آخری نبی ہونے کی شہادت دیتے ہیں۔
اسلام کے دیئے ہوئے معاشی‘ معاشرتی ‘سیاسی عدل اور خاندانی نظاموں کا جو بھی حصہ جانے انجانے میںکہیں بھی نافذ ہے دنیا اس کی برکات حاصل ہورہی ہیںاور مجموعی طور پر معاشرے ‘نظام اور اسلام کی بخشی ہوئی اچھائیوں کے طفیل ہی ترقی کر رہے ہیں۔ کئی معاشرے صرف سچ کی بنیاد پر آگے بڑھ رہے ہیں‘ بعض ممالک صرف محنت کی بنیاد پر دنیا میں نام پیدا کرچکے ہیں۔
جاپان انسانی حقوق کی بناءپر پہچان بنا چکا ہے۔اسی طرح معاشرے سے لے کر فرد تک اسلامی تعلیمات کی برکات پھیلتی ہیں۔
حضور انور ﷺ سے قبل افریقہ اور یورپ میں غلام بنانے کے بھیانک مناظر دیکھنے میں آئے ہیں ۔تاریخ گواہ ہے کہ کچھ لوگوں کو دہشت جمانے کی غرض سے بے دردی سے ہلاک کردیا جاتا اور باقیوں کو غلام بنا لیا جاتا تھا اور غلامی کی بھی اس حد تک گری ہوئی مثالیں ان لوگوں نے قائم کیں کہ اپنے معزز مہمانوں کے سامنے شراب و شباب سرو کرنے کے بعد ان کے ہاتھوں میں تیر دے دیئے جاتے ۔ غلاموں کو سامنے کونے میں بٹھا دیا جاتا اور تیر غلام پر برسائے جاتے۔ جوں جوں غلام تڑپتا تو مہمان محظوظ ہوتےِ جبکہ سرور کائنات نے زید بن حارثہ سے ایسا سلوک کیا کہ وہ اپنے والد اور چچا کے ساتھ جانے سے انکاری ہوگئے اور حضور سے چمٹ گئے۔ اس پر تاریخ گواہ ہے کہ نبوت سے پہلے دور میں حضور زید کو کعبے میں لے گئے اور اعلان کیا کہ آج سے زید کو زید بن محمد کہا جائے۔
قرآن پاک کے نزول کی اولین سورتوں میں سورہ بلد میں ”گردنیں آزاد کرو“ کی واضح ایک آیت موجود ہے جبکہ آگے چل کر غلامی کے ادارے کو تدریج کے ساتھ مکمل طور پر اسلام نے ختم کردیا۔
میں تو سمجھتا ہوں کہ اصل روشنی اسلام ہی کے پاس ہے یہ مغرب کے پاس جو روشنی ہے وہ اس قسم کی روشنی ہے جو چور اور ڈکیت کے ہاتھ میں ہوتی ہے۔ وہ اس لائٹ سے اپنے گھر کا راستہ نہیں ڈھونڈ رہا ہوتا مگر دوسرے کے گھر اور دوسرے کے مال کی طرف ہدایت و رہنمائی لے رہا ہوتا ہے۔ روشنی وہی ہوتی ہے جو انسان کو انسانیت کا سبق دے۔ ڈیزی کٹر پھینکنے کے بعد بسکٹوں کے ڈبے پھینکنے سے خداوند کبھی خوش نہیں ہوتا۔
حضورﷺ کی تعلیمات پر نگاہ دوڑائی جائے تو حیرانگی ہوتی ہے کہ جو بات آج ہم لمبی لمبی تقاریر میں نہیں کہہ پاتے آپ نے چند جملوں میں کہہ ڈالیں۔ مکہ سے مدینہ تشریف لانے پر آپ نے جو خطبہ ارشاد فرمایا جو ایک منٹ سے کم وقت کا تھا اور خطبہ حجة الوداع کے موقع پر آخری تاریخی خطبہ بھی مکمل لکھ لیا گیا اور اس کا وقت بھی دس منٹ سے زائد نہیں ہے۔
آیئے آپﷺ کی انسان کے حوالے سے فرمائے گئے ارشادات کا جائزہ لیتے ہیں‘میرا یہ آج بھی دعویٰ ہے کہ جو لوگ پیغمبر اسلام کے حوالہ سے نفرت انگیز تحریریں لکھتے ‘ توہین آمیز کارٹون بناتے اوردل آزار فلمیں دکھاتے ہیں ۔ ان تک محسن انسانیت کی تعلیمات حقیقی طور پر پہنچ ہی نہیں سکیں۔
اس موقع پر میں آپ کے مدینے داخل ہونے والے خطبے پر کچھ عرض کرنا چاہوں گا۔
آپ نے فرمایا”سلام کو عام کرو“ اور باہم کھانے کھلایا کرو ‘صلہ رحمی کیا کرو‘رات کے اس پہر نماز پڑھا کرو جب لوگ سو رہے ہوں۔ تم جنت میں سلامتی کے ساتھ داخل ہوجاﺅ گے۔
سلام ایک دعا ہے یعنی تم پر سلامتی ہو۔ اس کی تفصیل میں حضورﷺ نے دوسرے موقع پر فرمایا کہ مسلمان وہ ہے جس کی زبان اور ہاتھ سے دوسرے مسلمان محفوظ رہیں۔
مزید برآں لفظ مسلمان کو بھی اپنی ایک حدیث میں واضح کردیا کہ جو کوئی ہماری طرح نماز پڑھے اور ہمارے قبلے کی پیروی کرے وہ مسلمان ہے۔ آپ ﷺ یہاں تک مسلمانوں کے لئے رﺅف و رحیم ہیں کہ آخری خطبے میں آپ نے یہ بھی واضح کردیا کہ مسلمان کی جان و مال ‘عزت اور آبرو دوسرے مسلمان پر حرام ہے اور میرے غیر مسلم بھائیوں کو یہ جان کر خوشی ہوگی کہ حدیث قدسی میں حضور نے ہمیں آگاہ کیا کہ اللہ تعالیٰ فرماتا ہے۔
”لوگ میرا کنبہ ہیں“ اور قرآن میں آیا کہ جو کوئی ایک انسان کی جان بچائے گا اس نے گویا پوری انسانیت کی جان بچائی۔ آپ کے ارشاد کے دوسرے حصے میں فرمایا گیا کہ آپس میں کھانے کھلایا کرو۔ ہمیں معلوم ہے کہ درندے ‘حیوان اور انسان میں فرق یہ ہے کہ درندہ شکار مار کر چیڑپھاڑ کرتا ہے۔ اپنا پیٹ بھرتا اور باقی کو وہیں پھینک دیتا ہے۔ حیوان کو جو دیا جائے وہ اسے کھا لیتا اور باقی پر گندگی کر دیتا ہے جبکہ انسان اپنا کھانے کے بعد باقی اپنے بھائیوں کو دے دیتا ہے۔ حضورﷺ کی تعلیمات اس سے بھی ایک درجہ آگے ہیں۔آپﷺ نے ایسے لوگ تیار کردیئے جنہیں میدان کار زار میں بھی کچھ پینے کو ملا ہے تو اسے اگلے زخمی بھائی کی طرف بڑھانے کا اشارہ کیا۔ گویا اسلام پہلے دوسرے بھائی کو کھلا کر پھر خود کھانے کا درس دیتا ہے حضور کے ارشادات کے مطابق اگر کسی کا پڑوسی بھی بھوکا سویا ہوا ہو اور ہم نے پیٹ بھر کر کھانا کھایا ہو تو نہ صرف ہمارا یہ لقمہ حرام بن جائے گا بلکہ اس سے بڑھ کر ایسے شخص کا حضور پر کوئی ایمان نہ ہونے کا سر ٹیفکیٹ بھی سرکار نے جاری فرما دیا ہے۔
صبح تہجد کی نماز سے انسان کے دل میں نرمی پیدا ہوتی ہے ۔ خدا کی محبت اور اس کے بندوں سے پیار بڑھتا ہے۔ سورہ مزمل کے مطابق ایسا کرنے سے نفس پر ضرب کاری لگتی ہے تکبر وغرور جاتا رہتا ہے۔ انسان کے منہ سے اچھی اور پیاری بات نکلتی ہے۔ دعوت دینے کے آداب سمجھ میں آتے ہیں‘ بقول اقبال
عطار ہورومی ہو رازی ہو غزالی ہو
کچھ ہاتھ نہیں آتا ہے آہ سحر گا میں
یہ عمل انسان کے اندر برداشت اور حوصلہ بھی پیدا کرتا ہے جیسا کہ حضور پر ایک مشرکہ بوڑھی کوڑا پھینکتی تھی جب چند دن اس نے ایسا نہ کیا تو معلوم ہوا کہ وہ بیمار پڑگئی ہے ۔ اس دن سرکار اس کے گھر اس کی عیادت کرنے تشریف لے گئے۔ہمیں بڑی واضح ہدایات ہیں کہ ”تم میں سے بہتر وہ ہے جو لوگوں کے لئے نفع بخش ہو“ انسانوں کے درمیان برابری کا درس آخری خطبہ میں جس شان سے دیا گیا ہے وہ اس بات سے عیاں ہے کہ UN کے آئینی چارٹر کی شقیں اس خطبہ رسول سے لی گئی ہیں۔اسی طرح پوری شرح صدر کے ساتھ یہ بات کہی جاسکتی ہے کہ اگر کسی فرد‘تنظیم یا ملک کا مقصد انسانیت کی فلاح قرار پایا ہے تو اسے اپنے اس مقصد میں کامیاب ہونے کے لئے اسوہ رسول ہی اپنا لائحہ عمل قرار دینا ہوگا۔ جس قدر آپ کے طریقہ کار‘فرمودات اور طرز ِ حیات پر عمل ہوگا اسی قدر انسانی فلاح کی منزل قریب تر ہوگی۔ اقبالؒ نے اسی راز کو ایک مصرے میں یوں بیان کیا تھا ‘
دہر میں اسم محمد سے اجالا کردے
اور میں قرآن مجید کی اس آیت پر اپنی تحریر کا خاتمہ کروں گا ”اگر تم اللہ سے محبت کرتے ہو تو میری (رسولﷺ اللہ کی) اتباع کرو اللہ تم سے محبت کرے گا“۔

راتوں رات تبدیلی نہیں آسکتی۔ سالوں سال بھی تبدیلی شائد نہ آسکتی ہو، لیکن یہ تو نصف صدی پر محیط المیوں اور قومی سانحوں کا دلخراش سلسلہ ہے جو ختم ہونے کا نام ہی نہیں لیتا۔ فوج اور سیاستدان۔ سیاستدان اور فوج۔ دونوںایک دوسرے کیلئے میدان سجاتے رہے ہیں’ ایک دوسرے کیلئے جواز پیدا کرتے رہے ہیں۔ لیکن اب کی بار سیاستدان خاصے ہوشیار دکھائی دے رہے ہیں۔ جناب ڈاکٹر علامہّ طاہر القادری صاحب ” سیاست نہیں ریاست بچائو”کا نعرہ لے کر میدان میں اترے ہیں اور وہ ریاست بچانے کیلئے اُسی طاقت کو بُلا رہے ہیں

جس قوّت کو انہوں نے نوازشریف کے اقتدار کے آخری دنوں میںآواز دی تھی اور جنرل پرویز مشرف کا استقبال کیا تھا۔ جناب طاہرالقادری اب کی بار کامیاب نہیں ہونگے کیونکہ اب وزیراعظم ہائوس میں انتہائی دھیمے مزاج کے جناب راجہ پرویز اشرف  اور ایوانِ صدر میں پارٹی کے دُوربین صدر آصف علی زرداری ہیں اور ریاست بچانے والی قوّت کی باگ ڈور ہمارے انتہائی جمہوری مزاج رکھنے والے جنرل کیانی کے ہاتھ میں ہے’ جنہیں اشتعال دلانے کیلئے ان کے بھائی کے حوالے سے کرپشن کی کئی کہانیاں منظر عام پر لائی جا رہی ہیں۔لیکن اب نہ 1999ئ کا نوازشریف ہے اور نہ ہی ” دہلی کا بانکا” پرویز مشرف ۔(ن) لیگ اور پی پی پی پھونک پھونک کر قدم رکھ رہے ہیں اور وہ کوئی ایسی پوزیشن اختیار نہیں کرتے جہاں ایک دوسرے کے ذاتی مفادات پر زد پڑنے کا اندیشہ پیدا ہوتا ہو۔ وفاقی وزیر مذہبی امُور جناب سید خورشید شاہ نے اس صورتحال پر کمال کا تبصرہ صادر فرمایا ”میں نہیں چاہتا کہ میری داڑھی پرنوازشریف کاہاتھ ہو”اور نوازشریف کا میری داڑھی پر” مقصد یہ ہے کہ پی پی پی اور (ن) لیگ کی لڑائی ”انتخابی” ہو گی ”ذاتی ” نہیں ہو گی۔ اصغر خان کیس کے فیصلے پر عملدرآمد روک دینا اس بات کی دلیل ہے کہ اسیّ کی دہائی دھرائی نہیں جائے گی۔میاں نواز شریف نے اپنے برادر خورد میاں شہباز شریف کو جناب آصف علی زرداری کی شان میں ” بدتہذیبی” کرنے پر اُنہیں میٹھی سی جھاڑ بھی پلائی ہے اور اس کے نتیجہ میں میاں شہباز شریف اب جناب زرداری کو براہِ راست چور، ٹھگ، ڈاکو اور لٹیرا کہنے کے بجائے بلواسطہ طور پر غصہّ اُگلتے ہیں۔ میاں محمد نواز شریف کا مؤقف ہے کہ موجودہ حکومت اگر پانچ برس پورے کر رہی ہے تو اس کی تکمیل میں حکومت کی کارگردگی نہیں بلکہ (ن) لیگ کا صبر کارگرہے۔ میاں برادران نے خود پر فرینڈلی اپوزیشن ہونے کا الزام سہا ہے لیکن سیاسی مخاصمت کو ”ہلکی پھلکی موسیقی” تک محدود رکھا ہے۔ پی پی پی کی گورنمنٹ تمام تر نا اہلیوں کے باوجود گزشتہ پانچ برس سے عوام پر مسلّط ہے۔ جناب عمران خان جب میاں نواز شریف کو برابر کا مجرم قرار دیتے ہیں تو اسی نکتے کو بنیاد بناتے ہیں۔ ”ن لیگ نے اسمبلیوںسے استعفیٰ نہ دیکر عوام کو دھوکا دیا ہے”۔ ”نہیں جی۔ یہ دونوں چور ہیں۔ ایک دوسرے کے خلاف کبھی نہیں لڑیں گے” عمران خان اپنے سیاسی نظریئے اور تجزیئے کا اظہار کرتے رہتے ہیں۔اب کی بار تقریباََ تمام سیاسی و دینی جماعتوں نے فوج کی آمد کے کِسی امکان کو خوش آمدید کہنے سے انکار کر رکھا ہے۔ جماعت اسلامی بھی مقرّرہ وقت پر انتخابات ہی چاہتی ہے۔ انتقالِ اقتدار میں ”ٹرپل ون” کا کوئی کردار اس جماعت کو پسند نہیں ۔ مارشل لآ کی ”بی ٹیم” کا طعنہ اب تقریباََ ختم ہو چُکا ہے۔ اے این پی کی امریکہ سے انتہائی قربتوں کے بعد اب جماعت اسلامی کے زعماء سے امریکی ایجنٹ ہونے کا لیبل بھی اُتر چُکا ہے ۔ جماعت اسلامی ‘ ملی یکجہتی کونسل اور تحریکِ دفاعِ پاکستان میں شامل تمام جماعتوں نے فوج کی باری کے بارے میں سوچنا ترک کر رکھا ہے۔ اب کہیں سے کوئی  ”مٹ جائے گی مخلوق تو انصاف کرو گے” جیسی صدا سنائی نہیں دیتی۔  فوج کے خلاف میڈیا ٹرائل اور عدالتی جارحیت اسقدر مؤثر ہے کہ جی ایچ کیو دفاعی پوزیشن میں آچکا ہے۔حالانکہ مارشل لآ کا جواز اس مُلک میں ہمیشہ سے رہتا ہے اور آج کل لوُٹ مار، مہنگائی، خانہ جنگی اور بغاوتیں اسقدر زوروں پر ہیں کہ جواز مزید جائز ہو گیا ہے۔ اگر کبھی ٹی وی سکرین پر اچانک ”عزیز ہم وطنو” کی آواز سنائی دے تو عوام اس آواز کو دِل و جان سے سُنیں گے۔ایسی کوئی آوازسنائی نہ دے اور صرف ”وزیراعظم نوازشریف” کا نعرہ لگے’ مسلم لیگ (ن) اس مقصد کیلئے جناب آصف علی زرداری کے ہر زردارانہ اقدام کو استقامت کے ساتھ برداشت کرتے جا رہی ہے۔ ایک دوسرے کے شکریے جاری ہیں تاکہ کوئی شکِر اقتدار کی بُلبُل کو اُچک کر نہ لے جائے اور کہیں ایسا نہ ہو کہ میاں برادران اور جناب آصف علی زرداری اٹک قلعہ کے کسی ایک ہی سیل میں قید ہو جائیں۔

ذاتی مفادات کیلئے بااثر لوگ کس طرح قومی اداروں کو تباہ کرتے ہیں اس کی تازہ جھلک انجمن ہلال احمر پاکستان (پاکستان ریڈکریسنٹ سوسائٹی)کے نیشنل ہیڈکوارٹرز کے اندر ملازمین کے ایک گروپ کی طرف سے ہفتوںجاری  رہنے والی سیاسی ہلڑ بازی ہے ۔اسلام آباد کے سیکٹر ایچ ایٹ میں علامہ اقبال اوپن یونیورسٹی کے کارنر میں انسانی خدمت کے اس عظیم ادارے کا ہیڈ آفس واقع ہے۔2005ء کے زلزلہ کے دوران اس ادارے نے لوگوں کو امدادی سامان پہنچانے اور گرے ہوئے سکول و کالج بنانے میں عالمی شہرت حاصل کی تھی اور اس ادارے کی خدمات کو اخبارات میںسراہا بھی گیا تھا۔آئی ڈی پیز اور سیلاب زدگان کے لئے بھی یہ ادارہ پیش پیش رہا تھا ‘ اس لئے نیشنل ہیڈکوارٹرز میں ہڑتال اور احتجاج کا سن کر میں ہکا بکا رہ گیا۔

جستجو کی کہ معاملہ کیا ہے اور انسانی ہمدردی کے لئے کام کرنے والے آفیسرز کو ہڑتال کا حق کس نے دیا ہے۔مجھے ذرائع سے معلوم ہوا ہے کہ سعید احمد قریشی سابق سیکرٹری جنرل فنانس کے بعد ایوان صدر کی طرف سے ڈاکٹر بشارت جذبی کو اس ادارے کا چیئرمین بنایا گیا لیکن سابق سینیٹر نیلوفربختیار اس فیصلے پر خوش نہ تھیں اور انہوں نے آفیسرز کے ایک گروہ سے ملی بھگت کرکے علیل جذبی کو استعفیٰ دینے پر مجبور کردیا اور خود بغیر کسی صدارتی نوٹیفیکیشن کے چار برس تک خودساختہ چیئرپرسن کے طور پر براجمان رہیں۔””ایگزیکٹو کمیٹی کو قابو میں رکھنے کے لئے نیلوفر نے ملازمین کے نام پر یونین بنوائی اور اس یونین کو فنڈز فراہم کئے اور مسلسل پیٹھ ٹھونکتی رہیں۔ گو کہ ہلال احمر کے چیئرمین کے لئے کوئی تنخواہ نہیں ہوتی لیکن نیلوفر نے گاڑیوں اور آئے روز بیرون ممالک دوروں کی مد میں تنخواہ سے کہیں زیادہ مراعات سمیٹیں۔ انہوں نے اس ادارے کے لئے ہونے والی پرنٹنگ کے بجٹ کو غیر ضروری طور پر بڑھا کر اپنے خاوند کو کام دلوایا اور ایڈورٹائزنگ ایجنسی کو کام دینے کی یہ شرط رکھی کہ پرنٹنگ ان کے شوہر کے پریس سے ہی کرائی جائے گی اور بل ایڈورٹائزنگ ایجنسی کے نام کاٹے جائیں گے۔یہی نہیں بلکہ وہ اپنی ذاتی این جی او ”برداشت” اور ہلال احمر کی بیک وقت سربراہی کرتی رہیں۔ ان کے ہر دورے میں ہلال احمر کے ساتھ ساتھ ”برداشت” کے لئے فنڈ اکٹھا کرنے کی مہم بھی شامل تھی۔ اخراجات اور انفراسٹرکچر ہلال احمر کا استعمال ہوتا رہا اور وہ درپردہ اپنی این جی او کو مضبوط کرتی رہیں۔کنسٹرکشن ڈیپارٹمنٹ کے ذریعے دیئے گئے ٹھیکوں میں کرپشن کی حوصلہ افزائی جاری رہی اور مالی گھپلوں کی بازگشت بھی سنائی دیتی رہی۔اس دوران وہ صدر اور وزیراعظم سے اپنے لئے ہلال احمر کے چیئرمین کے نوٹیفکیشن  کے لئے بھی مسلسل رابطے میں رہیں لیکن ان کی شنوائی نہ ہوسکی۔محترمہ شیریں رحمان کو چیئرپرسن بنا دیا گیا۔ لیکن وہ جلد ہی امریکہ میں سفیر نامزد ہوگئیں۔شیریں رحمان کو نیلوفر صاحبہ کی ”مفاداتی طبیعت” کا پوری طرح علم تھا۔ کہا جاتا ہے کہ انہوں نے امریکہ جانے سے قبل صدر کو تحریری سفارش کی کہ قانون و ضوابطہ کے پابند اور کسی ایماندار آدمی کو یہاں کی ذمہ داری دی جائے ورنہ حکومت کے لئے اس ادارے کے حوالے سے کسی بھی وقت کوئی بڑا سکینڈل سامنے آسکتا ہے۔صدر پاکستان نے ہلال احمر کی ایگزیکٹو کمیٹی کے سب سے سینئر ممبر میجر(ر)جنرل نواز خان کو حسب دستور اور اٹھارہویں آئینی ترمیم کی روشنی میں آفیشٹننگ چیئرمین بنانے کی سفارش کی جس کے بعد پرائم منسٹر ہائوس نے ضروری کارروائی کے بعد منسٹری آف ریگولیشنز کے ذریعے جنرل صاحب کو تاحکم ثانی چیئرمین بنا دیا۔ اس اچانک اور غیر متوقہ فیصلے نے نیلوفر اور ان کے منظور نظرملازمین کومشتعل کردیا۔ اور یوں مفاداتی ٹولے نے نہ صرف یہ کہ اس اپائنٹمنٹ کو اسلام آباد ہائیکورٹ میں چیلنج کردیا بلکہ ہلال احمر کے اندرہڑتال کے لئے ملازمین کو ورغلانے اورہراساں کرنے کا سلسلہ شروع کردیا۔”جنرل (ر) نواز کی ایمانداری اور اصول پرستی سے یہ لوگ خوفزدہ ہیں۔ ان کے اللے تللے بند ہوچکے ہیں اور مستقبل میں مفادات پورے ہوتے دکھائی نہیں دے رہے۔ جنرل صاحب نے اعلان کر رکھا ہے کہ وہ اس قومی ادارے کو مفاداتی ٹولے سے نجات دلا کر اعلیٰ ترین انسانی خدمت کے کاموں کیلئے پھر سے متحرک کردیں گے۔ لیکن نیلوفر کی سربراہی میں مفاداتی ٹولہ نت نئی سازشیں تیار کرتا اور ادارے کے ماحول’ساکھ اور اس کی کارکردگی کو تباہ کرنے کے منصوبے بنا رہا ہے۔”ہلال احمر کی سابق ڈپٹی ڈائریکٹر نے بتایا۔ ذرائع کے پاس نیلوفربختیار کے خلاف نہ ختم ہونے والا مواد موجود ہے ۔ ہوسکتا ہے کہ شیخ صاحب نے مبالغہ آرائی بھی کی ہو لیکن نیلوفربختیار صاحبہ کے خاص الخاص آدمی انجینئر گوہر علی شاہ نے نوائے وقت کی لیڈی رپورٹر کو  ایک انٹرویو دیتے ہوئے جنرل (ر) نواز پر الزام لگایا کہ وہ آرمی اور ہلال احمر سے جعلی دستاویزات کی بنیاد پر بیک وقت تنخواہیں وصول کر رہے ہیں۔یہ بات عقل کے اندھوں کو بھی معلوم ہے کہ برسوں پہلے ریٹائرڈ ہونے والے جنرل کوآرمی ابھی تک تنخواہ کیوں دے گی اور ہلال احمر میں چیئرمین کو سرے سے کوئی تنخواہ ملتی ہی نہیں۔ اس ایک خبر سے اندازہ ہوتا ہے کہ یہ مفاداتی ٹولہ ہلال احمر کے وسائل پر پھر سے قابض ہونے کے لئے کیا کیا بہتان گھڑ سکتا ہے۔ اس ملک کے اہم ترین قومی اداروں کو چند لوگوں کے ذاتی مفادات نے ہی تباہ کردیا ہے یہ تو خالص انسانی خدمت کا ادارہ ہے ۔خدارا اس کو تو بخش دیجیے۔ کوئی ادارہ تو رہنے دیجئے جو مصیبت کی گھڑی میں اس قوم کے کام آسکے!!

یوسف رضا گیلانی کو یقین تھا کہ وہ’ آرمی چیف اور چیف جسٹس 2013ء میں ایک ساتھ فارغ ہوں گے۔ اس یقین کا اظہار انہوں نے بارہا سرعام بھی کیا اور اپنے پسندیدہ بلکہ پروردہ صحافیوں کے ساتھ خصوصی ملاقاتوں میں بھی کیا۔ لیکن منگل 19جون 2012ء کی سہ پہر نے ان کی وزارت عظمیٰ ان سے چھین لی۔ عدالت عظمیٰ نے بالآخر ایک خوبصورت وزیراعظم کو نااہل قرار دے دیا۔ ایک ایسا شخص جن کا لباس انتہائی قیمتی تھا’جس کی اہلیہ لندن سے مہنگا ترین پرس خریدنے  میں بازی لے گئی تھی۔ جس کے تین جوڑوں کی قیمت 30لاکھ روپے تھے اور جس نے غریب  ترین ملک کا جمہوری وزیراعظم ہوتے ہوئے بھی اپنے شاہانہ ٹھاٹھ باٹھ برقرار رکھے بلکہ مسند اقتدار پر جلوہ گر ہونے کے بعد اپنے پرشکوہ رہن سہن میں اضافہ کیا۔

اس یوسف رضا گیلانی کو رسو اہو کر بغیر جھنڈے والی گاڑی میں چپکے سے وزیراعظم ہائوس سے نکلتے دیکھا گیا۔یوسف رضا چاہتے تو ایک شخص سے وفاداری نبھانے کی بجائے ریاست کے ساتھ وفاداری کا اظہار کرتے۔ چور کو چور مان لیتے اور سوئس حکام کو خط لکھ کر انصاف کا بول بالا کرنے میں سپریم کورٹ کا ساتھ دیتے لیکن گیلانی نے زرداری سے وفا کی انتہا کردی اور ثابت کیا کہ وہ کم از کم وزارت عظمیٰ کے عہدے کے کبھی بھی اہل نہیں تھے۔ میں یہ سمجھنے سے قاصر ہوں کہ ایک شخص جس کی زندگی کا محو ر و مرکز صرف اس کی پارٹی کا سربراہ ہو وہ کس طرح اٹھارہ کروڑ لوگوں کی فلاح و بہبود کے بارے میں سنجیدہ ہوسکتا ہے۔ اور ایسے محدود نظر اور کسی شخصیت کے غلام کو جمہوری وزیراعظم کیونکر بنایاجاسکتا ہے۔یوسف رضا گیلانی نے اپنے دور اقتدار کے چار برس صرف اور صرف جناب زرداری’ان کے دوستوں اور اپنے خاندان کی خدمت کی ہے۔ ان کی پارٹی کے لوگ چیختے رہے کہ وزراء اور وزیراعظم ان کی بات تک نہیں سنتے۔محکموں کے سربراہ رپورٹیں دیتے رہے کہ جناب وزیراعظم میرٹ کا قتل عام نہ کریں ۔اداروں کو چلنے دیں۔ ہر جگہ موسیٰ گیلانی کا فون ہر ٹھیکے اور پروموشن پر صدارتی چٹ۔ اتنی کرپشن تو ابن بطوطہ نے بھی اس خطے میں نہیں دیکھی تھی جتنی ایک عام پاکستانی نے یوسف رضا گیلانی کے دور میں بھگتی ہے۔ (ن) لیگ جب دوسری بار برسراقتدار آئی تو اوورسیز پاکستان کے ایک وفاقی وزیر نے میاں صاحب کی قربت کے حصول کے لئے بیان داغا تھا ”ہم میاں صاحب کے کتے ہیں”۔مرحوم نے کروڑوں روپے کی کرپشن کی تھی ۔یہ لوگ جو اپنے بگ باس کے ”کتے” ہوتے ہیں یہ وفا دار بہت ہوتے ہیں لیکن مالک سے زیادہ مالک کے وفادار ہوجاتے ہیں ۔سچ یہ ہے کہ عوامی امنگوں کو پس پشت ڈال کر’عالمی اداروں کی تمام تر وارننگز کوبھلاکر ‘انصاف کے راستے میں پہاڑ کی طرح کھڑے ہوکر جناب یوسف رضا گیلانی نے جناب زرداری کی کتاب میں اپنا نام روش حروف سے لکھوا لیا ہے لیکن آنے والے پانچ برس ان کے لئے تھانہ’جیل’ کچہری اور ہسپتال کے اردگرد گھومتے دکھائی دیتے ہیں۔ہوسکتا ہے کہ وہ ملک ریاض کی طرح کچھ اینکرز کو اپنے پے رول  پر رکھ کر خود کو مظلوم اور غریبوں کا حامی ثابت کروالیںلیکن فی الحال وہ پھر چاہ یوسف میں جاگرے ہیں اور اس بار پاتال میں گرنے کا سبب برادران نہیں بلکہ ان کی منہ زور کنبہ پروری’تکبر اور ریا کاری ہے۔ وقت گزرے گا تو ان کی اخلاقی حیثیت پر بھی حرف آئیں گے اور ہوسکتا ہے کہ وہ ویڈیو بھی سوشل میڈیا پر آجائیں جن میں ”عزت سادات” ہی خا ک برد ہوجائے۔انہوں نے فاروق لغاری بننا پسند نہیں کیا۔فاروق خان لغاری تو پی پی پی سے نکل کر بھی زندہ  رہے اور ان کی ملت پارٹی نے بہرحال اقتدار کے ایوانوں میں خوب دستک دی’لیکن جناب گیلانی پی پی پی  میں رہتے ہوئے بھی اب کبھی اقتدار کے شبستانوں کا رخ نہ کرپائیں گے۔وہ بزعم خود انتہائی پاپولر وزیراعظم تھے۔ بقول ان کے انہوں نے کارکنوں اور غریب طبقہ کے لئے مثالی اقدامات اٹھائے۔ لیکن جب 19جون کی سہ پہر سپریم کورٹ میں فیصلہ سنایا جارہا تھا تو اٹارنی جنرل اور ان کے باحوصلہ وکیل بھی فیصلہ سننے کے لئے موجود  نہ تھے۔انہوں نے اپنے سیاسی مستقبل کے لئے سرائیکی صوبے کا شوشہ چھوڑا تھا ‘خیال کیا جارہا تھا کہ جنوبی پنجاب یہ فیصلہ سن کر جناب گیلانی کے حق میں سڑکوں پر نکل آئے گا لیکن حد تو یہ ہے کہ ملتان میں ان کے حق میں ایک جلوس بھی نہ نکل سکا۔ نہ کوئی آنکھ پرنم ہوئی نہ کسی جیالی نے ماتم کیا۔ فاعتبرویااْولی الصبار!

اندازہ تھا کہ امریکی یہی کریں گے۔پاکستان کو ”باغیانہ“سوچ کی سزا ضرور دیں گے۔ جوں جوں پاکستان اقتصادی میدان میں ایران کے قریب ہورہا ہے۔امریکی غصے میں اضافہ ہوتا جارہا ہے۔ امریکی قیادت اہل پاکستان کو سنگین نتائج سے آگاہ کر رہی ہے۔لیکن یہ آگاہی زبانی سے کہیں آگے چلی گئی ہے۔ پاکستان کو معاشی خودمختاری کے خواب دیکھنے پر اندرونی خلفشار کا شکار کرنے کے منصوبے پر بڑی تیز رفتاری کے ساتھ عملدرآمد شروع کردیا گیا ہے۔

یوں محسوس ہوتا کہ ہے امریکیوں نے پاکستان کے اندر اپنے سدھائے ہوئے کتوں کے پٹے کھول دیئے ہیں اور وہ پورے ملک میں پھیل کر انسانوں کو کاٹ رہے ہیں۔بلوچستان کو باقی صوبوں نے اپنے حصے کے وسائل قربان کرکے آبادی کے مطابق بننے والے حصے سے دوگنا حصہ دے دیا ہے ۔آغاز حقوق بلوچستان کے سلسلے میں بلوچ قوم پرست رہنماﺅں پر قائم مقدمات پر بھی ختم کردیئے ہیں‘لیکن ”آزادی“ کے نام پر متحرک غارت گراب قوم پرست قیادتوں کے کنٹرول میں بھی نہیں ہیں۔ ان کی ڈوریاں اور رسیاں کسی اور کے ہاتھ میں ہیں۔بلوچستان کے اندر ایف سی اہلکاروں ‘پنجابیوں‘پٹھانوں ‘سندھیوں اور پختونوں کی ٹارگٹ کلنگ جاری ہے۔ بوری بند لاشیں روز گرتی ہیں اور حقائق سے پتہ چلتا ہے کہ ان لاشوں میں اکثریت ان بلوچوں کی ہے جو محب وطن ہیں۔ لیکن اس خون ناحق کا ملبہ بھی فوج پر ڈالا جارہا ہے۔ قرائن یہی کہتے ہیں کہ بلوچستان کے امن کو تباہ کرنے والے شرپسند کسی کے کہنے سننے میں نہیں ہیں۔ ہدف یہ کہ حالات اس قدر مخدوش ہوجائیں کہ پاکستان ایران سے آنے والی گیس پائپ لائن کو بلوچستان سے گزار ہی نہ سکے۔جند اللہ نام کی تنظیم بھی متحرک ہوگئی ہے۔ کوہستان میں جس طرح بسوں سے اتار کر ایک مسلک کے لوگوں کو گولیوں سے بھون ڈالا گیا ہے۔ اس کا کیا مقصد ہوسکتا ہے؟ یہی کہ شیعہ سنی فسادات کا ایک سلسلہ شروع کردیا جائے اور اس کا دائرہ کار اس قدر پھیلا دیا جائے کہ گلگت بلتستان سے گزر کر چین داخل ہونے والی شاہراہ قراقرم بند ہوجائے۔ جب سے چین نے پاکستانی تاجروں کو پاکستانی کرنسی میں تجارت کرنے کی سہولت دی ہے تب سے سنکیانگ صوبے کو ملانے والے علاقوں میں گڑبڑ کا منصوبہ بنا دیا گیا ہے۔حالیہ کشیدگی امریکی ایجنٹوں کی بہت بڑی کامیابی ہے۔چین کو جھٹکا دینے اور پاک چین دوستی میں دراڑیں ڈالنے کا پھر سے سلسلہ شروع ہوگیا ہے۔ گزشتہ دنوں چین کی ایک خاتون کو ”طالبان“ کے ایک گروہ نے قتل کردیا ہے۔ دعویٰ کیا گیا ہے کہ یہ کارروائی سنکیانگ صوبہ میں مسلمانوں کے قتل کا بدلہ لینے کے لئے کی گئی چینی کارکنوں اور انجینئرز پر پہلے بھی بہت حملے کروائے گئے۔ اب بھی بہت سے پراجیکٹس ایسے ہیں جو ادھورے پڑے ہیں کیونکہ چینی لوگوں کی جان کو ہروقت خطرہ لاحق رہتا ہے۔ بہرحال ”طالبان“ کے برانڈ نیم کے تحت ایسے گروہ پھر سے متحرک کرا دیئے گئے ہیں تاکہ پاک ایران گیس منصوبے کے حوالے سے چین پاکستان کی حمایت سے باز آجائے۔امریکیوں نے کراچی کے حالات بگڑانے کا بھی یقیناً کوئی خوفناک منصوبہ بنا رکھا ہے۔ وقتی خاموشی کے پیچھے کوئی طوفان ضرور چھپا ہے۔ پاکستان پر امریکی دباﺅ کونسی خطرناک حدوں کو چھوئے گا‘آنے والے چار پانچ مہینوں میں واضح ہوجائے گا۔ پاکستان بیرونی دباﺅ کو اسی صورت برداشت کرسکے گا۔ اگر اندرونی صورتحال کو قابو رکھ سکے۔ یوں تو اپنا پیارا وطن اپنی پیدائش سے ہی خطرناک صورتحال میں گھیرا ہوا ہے لیکن اب جبکہ امریکی دباﺅ مسترد کرکے تاریخ میں شائد پہلی بار اپنی خارجی اور اقتصادی ترجیحات خود طے کرنے کا فیصلہ کر رہا ہے تو ملک میں موجود بلیک واٹرز اور مختلف روپ دھارے اس کے نیٹ ورکس ملک کو عدم استحکام سے دوچار کرنے پر تل گئے ہیں۔ کیا ہماری قومی قیادتیں اس دوہری جنگ کو لڑنے کی صلاحیت رکھتی ہیں؟ یہی وہ سوال ہے جوہر پاکستانی کو پریشان کر رہا ہے۔ مقتدر طبقہ کی پرتعیش زندگی اور عوام کی بدترحالت۔ ہمارے حکمران ایران سے توانائی کے خواہاں ہیں۔کاش کہ یہ ایرانی قیادت کے کردار کی توانائی سے بھی مستفید ہوسکیں اور ان جیسی سادہ زندگیاں گذارنے کے عادی ہوجائیں تاکہ امریکہ دھمکانہ سکے اور قوم اپنے حکمران کےساتھ یکجان دو قالب ہو کر امریکی ایجنٹوں کو منہ توڑ جواب دے سکے۔

جب سے امریکی کانگریس کی کمیٹی میں بلوچستان کے اندر انسانی حقوق پر ”تشویش“ بھری بحث ہوئی ہے پاکستان کے محب وطن حلقوں میں ایک سراسمیگی سی پھیل گئی ہے۔سقوط ڈھاکہ کے ڈسے ہوئے پاکستانی خوفزدہ ہیںکہ پاکستان کے سقوط کی اب ایک اور عالمی سازش ترتیب پا رہی ہے اور اب کی بار شائد اس گھناﺅنی سازش کا مرکز و محور ماسکو کی بجائے واشنگٹن ہے۔امریکی کانگریس کمیٹی میں پاکستان کے کسی علاقے کے بارے میں باقاعدہ بحث ہونا اس لحاظ سے شرمناک ہے

کہ ہماری وزارت خارجہ اور اس کے ماتحت سفارتکار اسے رکوانے میں بری طرح ناکام ہوئے لیکن اس ناکامی کے پیچھے سلالہ چیک پوسٹ پر امریکی حملہ‘ اس کے نتیجے میں سڑک کے ذریعے تاحال نیٹو سپلائی کی بندش پاک امریکہ تعلقات کی نوعیت کا پارلیمانی کمیٹی کو اختیار دینا اور امریکی ”جاسوسوں“ کو واپس بھجوانے کا ردعمل بھی ہے۔ محض یہ کہہ دینا کہ وہاں بھارتی لابی امریکی کانگریس میں پوری طرح نفوذ کر گئی ہے آدھا سچ ہے۔آج کل بھارت اور امریکہ کی گاڑھی چھنتی ہے اور ہم امریکہ کے ساتھ برابری کی سطح کے تعلقات کا نقشہ بنا رہے ہیں۔پاکستان ایران سے گیس لینے پر بضد ہے جبکہ بھارت نے ایران سے تیل میں کمی کوسعودی عرب کے ذریعے پورا کر لیا ہے اور امریکہ کو خوش رکھا ہے۔عالمی سیاست میں ہم اب امریکی بلاک سے دور ہٹ رہے ہیں اور ایسے عالم میں امریکہ والے ہماری بلائیں نہیں لیں گے اور شائد اسی دوری میں ہی ہمارا بھی فائدہ ہے۔مجھے یقین ہے کہ امریکیوں نے بلوچستان کو ڈسکس کرنے کے ساتھ ساتھ اس اشو کے ذریعے پاکستان کے بازو مروڑنے کی حکمت عملی بھی طے کر لی ہوگی۔یہ ممکن ہے کہ یہ اشو سرکتا ہوا اقوام متحدہ تک بھی پہنچ جائے۔کیا اس تمام ممکنہ سنگین صورتحال کے سبب بلوچستان پاکستان سے الگ ہوجائے گا؟ میری سوچی سمجھی رائے یہ ہے کہ بلوچستان کا پاکستان سے الگ ہونا سیاسی‘ جغرافیائی اورآبادی کے لحاظ سے ناممکن بلکہ مکمل طور پر ناممکن ہے۔ آج کے پاکستان اور ستر کی دھائی والے مارشلائی ملک میں زمین آسمان کا فرق ہے۔”امریکہ پاکستان کے اندرونی معاملات میں مداخلت نہ کرے ورنہ ہم امریکی معاملات میں مداخلت کریں گے“ ۔دفتر خارجہ کی طرف سے اس مفہوم کے بیانات کا تصور ماضی میں کیا ہی نہیں جاسکتا تھا۔ حکومت کی ناکامیاں اپنی جگہ لیکن پاکستانی ریاست پے در پے ناکامیوں سے نکلتے‘بچتے بچاتے بڑی حد تک اس خطے کا ایک طاقتور ملک بن چکی ہے۔عوامی شعور کی سطح‘مضبوط سول سوسائٹی‘سن بلوغت کو چھوتی ہوئی سیاسی جماعتیں اور خود احتسابی کے عمل پر آمادہ ہوجانے والے آزاد میڈیا اور مضبوط اعصاب کی حامل عدلیہ کے ہوتے ہوئے کسی ”انہونی“ کی گنجائش نہ ہونے کے برابر رہ گئی ہے۔مٹھی بھر بلوچ ایسے ہیں جو غیر ملکی آقاﺅں کی طرف سے ملنے والے وظیفے‘بارود اور خیالات سے مسلح ہو کر ”آزادی“ کے نعرے لگاتے ہیں۔بنگلہ دیش میں عوام کی اکثریت نے شیخ مجیب الرحمن کو ووٹ دیئے تھے لیکن بلوچستان کی کثیر تعداد نے علیحدگی کی بات کرنے والوں کو رد کردیا ہے۔ کئی بار رد کیا ہے اور بری طرح شکست دی ہے۔ تجزیہ نگار”بلوچستان جارہا ہے“ کے حق میں دلائل دیتے وقت آبادی کی اکثریت کو کیوں نظرانداز کردیتے ہیں۔اصل توجہ جس پہلو پر مرکوز کرنی چاہیے تھی وہ آرمی چیف جناب اشفاق پرویز کیانی کے ”تنگ آمد بجنگ آمد“ والے انکشافات ہیں۔ ہم نے فیشن بنا لیا ہے کہ اپنی ہر ناکامی کو فوج کے کھاتے میں ڈال کر خود کو بری الذمہ قرار دے دیتے ہیں۔دشمن تو فوج کو گالی دیتا ہی رہے گا دوستوں کو کیا ہوگا۔کیا ”ویلنٹائن ڈے“ کی طرح یہ بھی کوئی سپانسرڈ فیشن ہے جسے ہمارے نام نہاد ”لبرل“ اور ”موڈریٹ“ لوگوں نے ہرحال میں اپنانا ہے۔ جن ”آزادی پسندوں“ کو سنٹرل ایشیاءسے اسلحہ آرہا ہے‘ افغانستان کی سرزمین سے بھارتی آشیرآباد مل رہی ہے اور وہ اس ملک کو کچوکے لگانے کی جسارت کر رہے ہیں انہیں محض”احساس محرومی“ کی گنجائش دے کر قابل معافی سمجھنا اور ”مظلوم“ سمجھنا زمینی حقائق کو جھٹلانے کے سوا کچھ نہیں۔اگر آپ اتنے ہی ان کے خیرخواہ ہیں تو ان کرائے کے آزادی پسندوں کو مشورہ دیں کہ کم از کم اپنے لوگوں پر ہی ہتھیار نہ اٹھائیں۔ بلوچستان تو کہیں نہیں جارہا البتہ یہ لوگ وہ اپنے فرار کی تیاری کرلیں کہ امریکہ ان کی مدد کو نہیں پہنچے گا اور بھارت کو ”آزاد بلوچستان“ سے پہلے کشمیر سمیت سات ”آزاد ریاستیں“ بنانا ہوں گی۔

مضبوط خاندان ہی مضبوط معاشرے کا ضامن ہوتا ہے ۔یورپی تہذیب کو سب سے زیادہ دکھ اپنے خاندانی نظام کے معدوم ہوجانے کا ہی ہے۔ امریکی اور برطانوی دانشوروں نے اسلامی تہذیب میں خاندان کے تصور اور تصویر کو ہمیشہ رشک کی نگاہوں سے دیکھا اور کوشش کی کہ اپنے ہاں مقیم مسلمانوں کے ذریعے اپنے شہریوں کے اندر بھی اس نظام کی ترویج کرسکیں۔ برطانیہ میں پہلی مسلمان خاتون وزیر محترمہ سعیدہ وارثی جب اپنے عہدے پر فائز ہوئیں تو ان کی پارٹی کے رہبر نے کہا کہ وہ چاہتے ہیں

کہ برطانوی شہری سعیدہ وارثی کے ذریعے اسلام کے خاندانی کو اپنالیں۔محترمہ سعید وارثی نے حال ہی میں ایک پاکستانی ٹی وی چینل کو تفصیلی انٹرویو دیا۔ سوال تھا کہ آپ برطانیہ میں رہتے ہوئے پاکستانی لباس پہنتی ہیں‘اپنے خاندان کے ساتھ رہتی ہیں اور شعائرا سلام کی پابندی کرتی ہیں آپ کو عجیب نہیں لگتا؟۔ویسے تو اس سوال کے پیچھے ہی مغرب زدہ ذہنیت کار فرما ہے۔لیکن سعیدہ وارثی نے بغیر کسی لگی لپٹی کے بتایا کہ انہیں پاکستانی ہونے‘ مسلمان ہونے اور خاندان سے جڑے رہنے میں فخر محسوس ہوتا ہے اور ان کی دیکھا دیکھی ان کی قریبی برطانوی خواتین نے بھی باپردہ لباس پہننا شروع کردیا ہے۔سابق صدر بش سمیت متعدد امریکی صدور نے جب بھی ماہ صیام اور افطار کے حوالے سے مسلمان کمیونٹی کی طرف سے منعقدہ پروگراموں میں شرکت کی تو ان کی تقاریر میں اہم نکتہ اسلام کے شاندار خاندانی نظام کی تعریف تھا۔حیرت ہوتی ہے کہ پاکستان میں اس خاندانی نظام کے تاروپود بکھیرنے کی سرتوڑ کوششیں کی جارہی ہیں اور ان کی کوششوں میں اس وقت سرکاری ٹیلی ویژن کے بھی کئی ڈرامے اور پروگرام شامل ہیں۔جہاں تک پرائیویٹ ٹی وی شوز اور ڈراموں کا تعلق ہے تو یوں لگتا ہے کہ ان چینلز کے مالکان نے طے کر لیا ہے کہ اس قوم کو ہر حال میں اپنے خاندان سے بیزار کرنا ہے‘طلاق کو معمول کا کام ثابت کرنا ہے اور میاں بیوی کے مقدس رشتے کی اہمیت ختم کرکے ناپاک اور ناجائز رشتوں کو پرکشش بنانا ہے۔ایسے تمام ڈرامہ نگار‘ہدایت کار‘اداکار اور اشتہاری گروہ جو اسلام کے دیئے ہوئے مقدس رشتوں کی توہین کر رہے ہیں یہ یا تو کسی اسلام دشمن لابی کے پالتو کتے ہیں یا ان کی ولدیت مشکوک ہے۔ یہ ہماری نوجوان نسل کے ذہنوں میں وہ زہر گھول رہے ہیں جو صرف کسی دشمن کی چال ہوسکتی ہے کوئی اپنا خیرخواہ‘انسانیت دوست‘روشن سوچ رکھنے والا ایسے بے ہودہ مناظر‘ایسے لچر جملے اور ایسے قاتل نظریات کو فروغ نہیں دے سکتا جن سے خاندان بکھرجائیں‘اولاد کے اندر والدین کے خلاف بغاوت پیدا ہوجائے اورمیاں بیوی ہوتے ہوئے کسی اور مرد اور عورت کے ساتھ آفیئرز کو معمولی سا معاملہ سمجھا جاسکے!یوں تو اس ملک میں وزیراعظم سے لیکر پی ٹی وی کے ایم ڈی تک ہر کوئی نظریہ پاکستان کے تحفظ کی رٹ لگا رہا ہے لیکن حقیقت میں نظریہ پاکستان کی جڑیں کاٹی جارہی ہیں۔ ”گڈمیڈیا سوسائٹی“ کے صدر اور ہمعصر کالم نگار بیگ راج نے مجھے بتایا کہ ان کی سوسائٹی نے پاکستانی چینلز پر دکھائے جانے والے ڈراموں اور بھارتی چینلز پر چلنے والے ڈراموں کے درمیان مماثلت کے حوالے سے گھریلو خواتین سے ایک سوالنامہ پر کروایا ہے۔ لیکن اس سروے کے نتائج اس لئے روک لئے کہ پاکستانی خواتین کی ایک کثیر تعداد اب پاکستانی ڈراموں کی بجائے انڈین ڈرامے دیکھ رہی ہے۔ اور اس تبدیلی کی بڑی وجہ یہ بتائی گئی ہے کہ بھارتی ڈرامے خاندان کے ساتھ بیٹھ کر دیکھنا ممکن ہورہا ہے لیکن پاکستانی ڈراموں میں ایسے مناظر جملے اور کہانی ہوتی ہے کہ بیٹی‘ بہو‘ یا بیٹے کی موجودگی میں انہیں دیکھنا محال ہوجاتا ہے اور بار بار چینل تبدیل کرنا پڑتا ہے۔پیمرا کہاں ہے؟ کیا پیمرا کی ذمہ داری صرف نیو زچینلز کو حکومت کے حق میں رام کرنے کے لئے ان کی مشکیں کسنا ہے؟ ہمارے سماجی اثاثوں اور مقدس رشتوں پر حملہ آور ہونے والے میڈیائی ڈاکوﺅں کو کھلی چھٹی دے دی گئی ہے۔میں والدین سے اور گھر کے سربراہ خواہ مرد ہے یا عورت سے دست بستہ التماس کروں گا کہ خدارا اپنے بچوں کو ڈراموں اور شوز کی شکل میں ہونے والی دماغی جارحیت اور نظریاتی یلغار سے کسی نہ کسی طرح محفوظ کر و۔آنے والی نسلوں کو بے اعتبار ہونے سے بچالو۔ اپنے گھر کی حفاظت کرو! قرآن کا حکم ہے۔”اللہ تم کو حکم کرتا ہے عدل‘احسان اور قرابت داروں سے حسن سلوک کا اور منع کرتا ہے تم کو فحاشی ‘منکرات اور سرکشی سے“۔

علم نہیں کہ اب کی بار پیپلزپارٹی کو مظلوم بننے کا موقع ملتا ہے یا نہیں لیکن خلق خدا کی زبان پر ایک ہی جملہ ہے”زرداری کب جارہا ہے“۔نااہلیوں اور بدنیتوں سے بوجھل ملکی فضاءمیں پروان چڑھنے والے عوامی غیض و غضب نے انڈے بچے دینے شروع کردیئے ہیں۔اگر ”سٹیٹس کو“ کا مخالف کوئی حقیقی عوامی لیڈر ہوتا تو وہ بیروزگاروں کی فوج کی کمان سنبھال لیتا ۔کراچی سے پشاور تک ہر چوک چوراہے پر اس کا پرہجوم استقبال ہوتا۔لیکن بظاہر وہ تمام لیڈرجو انقلاب کا نعرہ لگاتے ہیں

حقیقت میں وہ بھی اس گلے سڑے نظام کے محافظ ہیں اور کوئی ایسا انقلاب برپا نہیں ہونے دینا چاہتے جس سے اس ملک کا غریب امیر ہوجائے اور امیر تر ہوتا اشرافیہ فٹ پاتھوں پر آجائے۔انقلاب کا نعرہ لگانا آسان اور اس کو برداشت کرنا بہت مشکل ہوتا ہے۔میرے جاننے والے حکمران جماعت کے ایک ایم این اے نے کہا کہ ڈاکٹر صاحب خدا کا شکر ہے کہ یہ ڈنڈا بردار مظاہرین ہمارے گھروں میں نہیں گھس رہے ورنہ ایسی تباہی آئے گی کہ فوج بھی ہمیں ان بھوکوں سے نہیں بچا سکے گی۔میں نے پوچھاجناب کی سیاسی بصیرت اب کیا کہتی ہے‘کہنے لگے کہ سچ یہ ہے کہ ہمیں اب انتخابات کا بگل بجا دینا چاہیے ورنہ عوام ہمارا باجا بجا دیں گے۔وزیراعظم گیلانی کا کمال یہ ہے کہ وہ ”جمہوری دکانداری“ بند نہیں ہونے دینا چاہتے۔انہیں ہر طرف اچھا ہی اچھا دکھائی دے رہا ہے۔انہوںنے عوامی غصے کو بھی جمہوری مخالف قوتوں کی کارستانی قرار دے کر آنکھیں موند لی ہیں۔پنجاب کی پارٹی کو انہوں نے ایک بہت بڑی ریلی کرنے کا ٹارگٹ دیا ہے۔جناب گیلانی نے پنجاب کے عہدیداروں کو ممنوعہ بور کے اسلحہ لائسنس دینے کا لالچ دیا ہے اور ایم۔این ۔اے کے ترقیاتی فنڈز سے بھی حصہ دینے کا وعدہ کر لیا ہے۔ ان انعامات اور نوازشات کے عوض پارٹی کو ہدایت کی گئی ہے کہ وہ عمران خان اور نوازشریف کے اثرات کو زائل کرنے کے لئے لاہور میں ایک بہت بڑا شو کریں۔جناب آصف علی زرداری مرد بحران ہونے کے باوجود بحرانوں پر قابو نہیں پاسکے اور اپنے اردگرد ان لوگوں کو جمع کر لیا ہے جن کی وجہ شہرت صرف اور صرف کرپشن رہی ہے۔پیپلزپارٹی کے دامن میں جیالے تو بہت ہیں لیکن اہل اور ایماندار لوگوں کی شائد نسل ختم ہوگئی ہے۔بعض اوقات یوں محسوس ہوتا ہے کہ گیلانی حکومت کسی کو عہدہ بخشنے سے پہلے اچھی طرح چھان بین کر لیتی ہے کہ عہدے پر براجمان کئے جانے والے شخص پر کم از کم ایمانداری کا کوئی الزام نہ آتا ہو۔ اس احتیاط کا نتیجہ نکلنا شروع ہوگیا ہے۔بجلی‘ گیس اور پٹرول کے بحران سے نجات کی کوئی صورت دکھائی نہیں دیتی۔وقتی طور پر جھک جانے سے شائد حکومت کو سکھ کے کچھ سانس میسر آجائیں لیکن مستقل حل کوئی نہیں۔کوئی ایک وزیر‘کوئی مشیر‘خود وزیراعظم بھی اس پوزیشن میں نہیں کہ لوگوں کا اعتمادبحال کرسکیں۔توانائی کی ترسیل اور طریقہ تقسیم کے جائزہ سے اندازہ لگایا جاسکتا ہے کہ وقفے وقفے سے عوام سڑکوں پر آتے رہیں گے اور اگر تھک ہا رکر لوگ بیٹھ بھی گئے تو بھی ہر زبان سے بددعائیں ہی نکلیں گی‘ہمدردی کے دوبول۔خواب ہی رہیں گے ۔چاہے آئندہ الیکشن میں بلال بھٹو اور آصفہ بھٹو ماتمی لباس پہن کر اپنی شہید ماںاور نانا کے نام پر ووٹ کیلئے منتیں ہی کیوں نہ کریں‘غیرجانبدار حلقے اس خیال کے حامی ہیںکہ عوام کی اکثریت اب اس عفریت زدہ ماحول کو پھر سے قابض نہیں ہونے دے گی۔البتہ پروپیگنڈا اپنی طاقت رکھتا ہے اور ہونی انہونی ہوسکتی ہے!جناب زرداری کہاں کہاں سے بچیں گے۔ایک بار گھبرا کر دبئی چلے گئے تھے۔اب کی بار گئے تو شائد واپس نہ آسکیں اورنہ گئے تو شائد برسوں جانہ سکیں۔میمو کیس کسی نہ کسی کے گلے میں حمائل ہونے والا ہے اور حکومت اپنی ہی فوج کے خلاف کوئی واردات کرنے کے منصوبے بنا رہی ہے تاکہ مظلوم بن سکے۔”مظلومیت“ کا سیاسی ڈرامہ لکھا جارہا ہے۔کردار ترتیب دیئے جارہے ہیں۔ عاصمہ جہانگیر اس مشن پر کمر بستہ ہو چکی ہیں۔لیکن کیا کیا جائے کہ اب کی بار عدالت انصاف کا ترازو پوری قوت سے تھامے ہوئے ہے ‘نہ مارشل لاءلگے گا نہ میمو ٹلے گا۔ سوئس بینک کے حکام کو خط لکھا تو بھی کرپشن ثابت ہوجائے گی نہ لکھا تو بھی چوری ثابت ہوجائے گی۔گھیرا تنگ ہورہا ہے اور فرار کی راہیںمسدود!

سکول میں پڑھایا جاتا تھا کہ پہلے تولوپھر بولو۔ ماسٹر جی اس محاورے کی تشریح اس طرح کرتے تھے کہ ”بچو اپنے منہ سے لفظ نکالنے سے پہلے اچھی طرح سوچ لو کہ ان لفظوں کا مخاطب پر کیا اثر پڑے گا۔ اگر آپ کی زبان سے نکلے ہوئے الفاظ الزام‘ بہتان‘شرارت اور شہوت پر مبنی ہیں تو پھر ان کو زبان سے باہر مت آنے دینا کیوں کہ ان کی ادائیگی سے تہذیب شرمندہ ہوگی‘خدا اور اس کے رسول ناراض ہوں گے۔“ یہ سبق ماضی میںکوئی اہمیت رکھتا تھا۔سخت کلامی‘بدزبانی اور توتکار کو غیر مہذب اورگنوار شخص کی پہچان قرار دیا جاتا تھا۔

شائستگی‘دھیما لہجہ اور شستہ انداز اپنانے پر زور دیا جاتا تھا۔ غیبت‘چغل خوری‘افواہ سازی‘بہتان بازی جیسے عوامل کو مکروہ اور انسانیت سے گرا ہوا فعل سمجھا جاتا تھا۔ خصوصاً عمر میں بڑے آدمی کا ادب تو گویا فرض عین تھا‘ اس میں کوتاہی کا مرتکب گھر‘ محلے اور سماج میں ”بدتمیز“ کے لقب سے نوازا جاتا تھا۔نظریاتی اور مسلکی اختلافات تو ایک معمولی بات تھی‘ اگر بڑے بڑے سیاسی اختلافات بھی ہوجاتے تو پھر بھی زبان ادب اور آداب کے دائرے سے نکالنا عیب ہی قرار دیا جاتا تھا۔اس تمہید کے پیچھے ایک تشویش کارفرما ہے۔دل دکھتا ہے جب سیاسی جلسوں اور ٹی وی مناظروں میں انتہائی بازاری زبان بولی جاتی ہے اور اس پر دل خون کے آنسو روتا ہے کہ سامعین حاضرین اور ناظرین اس بازاری پن پر بھی اپنے اپنے لیڈر اور نمائندے کو دادو تحسین سے نواز رہے ہوتے ہیں۔ہمارے ہاں بدزبانی کی راہ کھولنے میں ٹی وی اینکرز نے عمل انگیز کا کام کیا ہے۔الاماشاءاللہ جب پروگرام کی کامیابی کا معیار میز پڑے گلاس توڑنے‘ایک دوسرے کیخلاف دشنام بکنے‘ گلے پھاڑ پھاڑ کر اپنے دروغ کو سچ ثابت کرنے جیسے ”فارمیٹ“ پر ہو تو پھر ظاہر ہے ہر رات ٹی وی سٹوڈیوز سے اخلاقیات کا جنازہ اٹھے گا اور تہذیب وتمدن صحافت‘دانش اور خبر کے دامن سے لپٹ کر ماتم ہی کریں گے۔حیرت ہوتی ہے کہ بظاہر بڑے معتبر قسم کے ترجمان‘ فرفر انگریزی بولنے والے اور دستاویزی ثبوت کے پلندے اٹھائے محققین ٹی وی ٹاک شوز میں ‘سرکسی جانوروں کی طرح اینکرز پرسن کی گرفت میں ہوتے ہیں اور ان کی انگشت پر ناچتے دکھائی دیتے ہیں۔ ادھر کسی خاتون اینکر نے آنکھوں کے اشارے سے اکسایا ادھر رگیں پھولنے لگیں‘کلائیاں چڑھائی گئیں ‘منہ سے جھاگ بہنے لگی اور مخالف کیخلاف وہ باﺅلہ پن اگلنا شروع کردیتے ہیں۔سیاسی جلسوں کا حال بھی عجیب ہے۔ مسلم لیگ (ن) اور پی پی پی کے پاس تو خیر پہلے سے ایسی ٹولیاں تیار ہیں۔جو”مﺅقف“ کے نام پر ایسی ایسی ”واحیات“ اور لغویات اگلتے ہیں کہ ان کی دماغی حالت پر شک کرنا پڑتا ہے۔محض اپنے ”قائد“ کو خوش کرنے اور مخالف کو لتاڑنے کیلئے بدکلامی کا سہارا لیتے لیتے شرف انسانیت سے ہی نیچے گرجاتے ہیں۔ترجمان اور بھونکا ہونے میں کوئی فرق تو ہونا چاہیے۔عمران خان جو کہ تبدیلی کا نعرہ لگا کر میدان میں آئے ہیں وہ وزیراعظم بن کر کوئی تبدیلی لائیں گے یا نہیں فی الحال ان کے لب و لہجے اور روایتی سیاسی رہنماﺅں کے انداز تکلم میں کوئی فرق نہیں۔شریف برادران کو ”ڈینگی برادران“ کہنا اور ”چورچور“ کہنے سے عمران خان اپنے سیاسی نابالغ پن کا ثبوت ہی نہیں دے رہے لگتا ہے ”اقبال فہمی“ نے بھی ان کی سوچ اور انداز فکر میں کوئی تبدیلی پیدا نہیں کی۔ انہیں اپنے طرز کلام اور لب ولہجے سے ایک بدلا ہوا شخص دکھائی دینا چاہیے لیکن وہ بھی عمل اور ردعمل کے روایتی فلسفے کا شکار ہوچکے ہیں۔مجھے عمران خان اور(ن) لیگ کے جناب رانا ثناءاللہ اور پی پی کے جناب عابدی عوامی مسلم لیگ کے شیخ رشید احمد اور ایم کیو ایم کے جناب وسیم اختر میں کوئی فرق دکھائی نہیں دیتا۔عمران خان شائدذوالفقار مرزا کی”لسانی بدکاریوں“ سے کچھ زیادہ ہی متاثر ہوگئے ہیں۔سچی بات گالی دیئے بغیر بھی کہی جاسکتی ہے۔مﺅقف گلا پھاڑنے سے سچا نہیں ہوجاتا۔وقتی طور پر کسی محفل‘جلسہ میں گالی گلوچ کے ذریعے اپنے مخاطبین کو متاثر کیا جاسکتا ہے‘مجمع لوٹا جاسکتا ہے لیکن مسیحائی کا کام نہیں ہوسکتا۔نوح انسانی کی تقدیر بدلنے والے عظیم رہنماﺅں نے اپنے بدترین دشمنوں کو بھی کبھی گالی نہیں دی۔ محسن انسانیت حضرت محمد صلی اللہ علیہ وسلم کا اسوہ حسنہ ہمارے لئے واحد روشنی کا ذریعہ ہونا چاہیے۔ اور پاکستان کے سیاستدانوں کو جو ماشاءاللہ مجھ سے اچھے مسلمان ہیں کم از کم اپنے قول کو ہی اسی روشنی میں سنوار لینا چاہیے۔اپنے افعال کو اسوہ رسول کے مطابق ڈھالنا تو بڑے نصیب کی بات ہے۔اگر ہمارے سیاستدانوں نے ان بدکلامیوں کو نہ چھوڑا تو آنے والی نسلیں مزید بدتہذیبی کا شکار ہوجائیں اور مہذب قوم ہونے کے ہمارے سارے دعوے فراڈ اور جھوٹ ثابت ہوں گے۔دنیا والے کہہ اٹھیں گے‘حیرت ہوتی ہے مجھے اس سیاستدان پربدکلامی خود کرے لعنت کرے شیطان پر

Click here to View Printed Statements

زندگی لیتے رہنے کا نام نہیں لوٹانے کا نام بھی ہے۔ جو فرد اپنے اردگرد کے ماحول اور معاشرے سے فائدہ اٹھا کر مسلسل اپنے دامن کو بھرتا رہتا ہے اور بدلے میں کچھ دیتا نہیں ہے وہ ایسے ہی جیسے نقب زنی کا ارتکاب کر رہا ہو۔ اسلام نے انسانی رویہ میں تبدیلی لانے کےلئے قرآن حکیم کے اندر بار بار لوٹانے پر زوردیا ہے۔مساکین‘یتیم‘بیوائیں بے سہارا لوگ‘ہمسائے حتیٰ کہ مسافر تک کے حقوق کا احاطہ کیا گیا ہے۔ رویہ کی یہی وہ تبدیلی ہے جو ایک مسلمان معاشرے کو مثالی بناتی ہے۔ زکوٰة‘خیرات اور صدقات کے حوالے سے اسلام نے مخیرافراد کو اللہ تعالیٰ کے ساتھ ایک جوائنٹ اکاﺅنٹ کھولنے کی ترغیب دی ہے۔ معاشرے کے گرے ہوئے لوگوںکی مالی امداد کو قرآن ایک منافع بخش کاروبار قرار دیتا ہے۔آپ ایک روپیہ راہ خدا میں خرچ کریں اور وہ خرچ کیا گیا روپیہ گندم کی بالیوں کی طرح ایک سے دو اور دو سے چار ہوتا بڑھتا اورپھیلتا ہی چلا جاتا ہے۔خیرات کرنے سے صرف آخرت میں کئی گنا زیادہ ”منافع“ ہی نہ ہوگا بلکہ ہم نے عملی زندگی میں بھی دیکھا کہ مخیر اور سخی لوگوں کے کاروبار پھلتے پھولتے رہتے ہیں۔ دراصل جب ہم اپنے عزیز واقارب‘ہمسایوں اور محلے تک کے نادار لوگوں کو مالی طور پر مستحکم کرتے ہیں تو پوری بستی میں ایک سکون ‘اعتماد اور بھائی چارے کی فضاءپھیل جاتی ہے اور یہی فضاءتجارت اور کاروبار کے فروغ کا سبب بنتی ہے۔ جس معاشرے میں بھوکوں کی تعداد میں اضافہ ہوجائے وہاں امیروں کی تعداد میں کمی ہونا شروع ہوجاتی ہے۔دنیا میں کسی کنجوس ملک‘ معاشرے یا فرد نے کبھی ترقی نہیں کی۔ وسائل کو نقب لگانے والے اور بدلے میں مٹھی بند رکھنے والے لوگ دنیاوی زندگی میں بھی بے ثمر رہتے ہیں اور اخروی زندگی میں ان کے لئے خدائے عزوجل نے کوئی انعام نہیں رکھا۔اس تمہید کے بعد میں عرض کرنا چاہتا ہوں کہ پاکستانی معاشرے میں دولت کی کمی ہے نہ ہی بھوک کی کمی۔ امارت اور غ±ربت کی اس خلیج کا احساس عیدین جیسے مذہبی تہواروں پر زیادہ سنگین ہوتا ہے۔ کیا سبب ہے کہ بظاہر اس ملک کے مخیرحضرات خیرات بھی کرتے ہیں ‘صدقات بھی دیتے ہیں لیکن غریبوں کی تعداد میں روز بروز اضافہ ہی ہورہا ہے ؟تفصیل میں جائے بغیر عرض ہے کہ ہمارے معاشرے میں نمائش نے غیرضروری اہمیت اختیار کر لی ہے ہم معمولی خیرات دینے کے لئے بھی بڑی بڑی تصویریں بنوانے‘اجتماعات منعقد کرنے اور ضرورتمندوں کو ممنون احسان ٹھہرانے میں مشغول رہتے ہیں۔ اس نمائشی عمل نے ہماری سخاوت میں برکت رہنے نہیں دی۔ اس عید کے موقعہ پر عہد کرنے کی ضرورت ہے کہ آپ اپنی پسند اورناپسند کو ایک طرف رکھ کر اپنی معلومات کو از سر نو تازہ کیجئے۔ پھر ایک فہرست مرتب کرکے دیکھیئے کون زیادہ مستحق ہے اور کس کی ضرورتیں کم ہیں۔ اور جب ان بنیادی امور کا تعین ہوجائے تو پھر بڑی خاموشی کے ساتھ کسی قابل بھروسہ فرد کا انتخاب کرکے اس کے ہاتھ رقم‘ جنس یا کپڑے یا خوراک ضرورتمندوں تک پہنچا دیجئے اور قابل بھروسہ شخص ضرورتمند کو یہ نہ بتائے کہ یہ فلاں صاحب نے ”زکوٰة‘فطرانہ یا خیرات کے پیسے بھجوائے ہیں“ بلکہ ”عیدی“کہہ دے‘شائد اس سے ضرورتمند کی عزتِ نفس بچ سکے۔اسی طرح صاحبانِ حیثیت کو چاہیے کہ وہ اپنے محلے کی سطح پر کمیٹیاں بنائیں اور انہیں ”کمیٹی برائے باہمی بہبود“ کا نام دیں۔ ایسی کمیٹی ہر مسجد کی سطح پر قائم کی جاسکتی ہے۔ اس کمیٹی میں ریٹائرڈ افسران‘اساتذہ یا کاروباری حضرات کو رکھا جاسکتا ہے ۔ ہر عید پر یہ کمیٹی رقم ‘کپڑے‘کھانے اکٹھے کرے اور محلے کے رضا کاروں کے ذریعے پہلے سے تعین شدہ ضرورتوں کو پورا کرے۔اس طرح لینے اور دینے والے ہاتھ ایک دوسرے سے بے خبر رہیں گے اور معاشرے میں بہتری کی نئی راہیں کھلیں گی۔ہمیں اپنے محبوب ترین پیغمبر آخر الزمان کے اسوہ حسنہ کو عید کے روز ایک بار ضرور پڑھنا چاہیے اور اپنے گھر والوں کو بھی پڑھانا چاہیے۔ آپ صلی اللہ علیہ وسلم کا ارشاد ہے کہ عید کے روز اگر آپ کے پاس دینے کے لئے کچھ بھی نہیں تو کم از کم اپنا شفقت بھرا ہاتھ ہی کسی یتیم یا بے سہارا بچے کے سرپر رکھیے‘ہاتھ کے نیچے جتنے بال آئیں گے اتنی نیکیاں آپ کے حق میں لکھ دی جائیں گی۔میرا یہ دعویٰ ہے کہ پاکستان میں صاحب ثروت لوگوں کی کوئی کمی نہیں۔ اگر ہم دل بڑا کرکے دبئی‘انگلینڈ اور سوئٹزرلینڈ کے بینکوں میں رکھی گئی بھاری رقوم کی نسبت سے خیرات اور صدقات کا تعین کریں تو کوئی وجہ نہیں کہ ہر ضرورت مند کومستقل بنیادوں پر نہ صرف معقول مالی معاونت ملے گی بلکہ ایسے ادارے بھی چلتے رہیں گے جن کی وساطت سے بیکار اور بے روزگار لوگوں کو خود اپنے پاﺅں پر کھڑا ہونے کا حوصلہ ملے گا۔ میں دولت بانٹنے کا نہیں غربت بانٹنے کی طرف توجہ دلا رہا ہوں۔ اگر ہم پرسکون رہنا چاہتے ہیں اور گداگری کی دہشتگردی سے بچنا چاہتے ہیں اور اپنی تجارت اور کاروبار میں اضافہ چاہتے ہیں تو پھر سمندر سے قطرے مت بانٹیے‘خیرات کے پیمانوں کو معقول بنایئے تاکہ عید سب کیلئے خوشیوں کا ذریعہ بن سکے!۔