خیبرپختونخواہ کے گورنر جناب اقبال ظفر جھگڑایوم ہلال احمر کی تقریب کے مہمان خصوصی تھے۔ وہ اسٹیج پر خطاب کے لئے آئے۔ اُن کی تقریر کا پہلا حصہ انگریزی میں تھا کیونکہ تقریب میں غیر ملکی مہمانوں کی بھی اچھی خاصی تعداد موجود تھی۔ دوسرا حصہ اُردو میں تھا۔جھگڑا صاحب کے بارے میں میرا خیال تھا کہ اُن کی انگریزی میری طرح واجبی سی ہوگی۔ لیکن اُنہوں نے اس غیر ملکی زبان میں انتہائی شستہ لہجہ اختیار کیا اور ماہر مقرر کی طرح انگریزی سمجھنے والے مہمانوں کو خوب متاثر کیا۔
اُردو میں بھی کمال مہارت رکھتے ہیں۔ مسلم لیگ (ن) کو دیر سے سہی لیکن جھگڑا جیسے باصلاحیت شخص کو ذمہ داری سونپنے کا بہتر خیال آیا ہے۔ کاش کہ دوسرے شعبوں میں بھی ایسے سچے لوگوں کو آگے آنے کا موقع دیا جائے۔ جناب اقبال ظفر نے بتایا کہ ڈاکٹر سعید الٰہی سے اُن کی ملاقات اکتوبر 2005ء کے زلزلے کے دوران آزادکشمیر میں ہوئی تھی جہاں ڈاکٹر صاحب سب کچھ چھوڑ چھاڑ کر زخمی متاثرین کی طبی امداد میں دن رات مصروف تھے۔ اُن کے اندر کے مسیحا کو انہوں نے آزادکشمیر میں پہچانا۔ گورنر صاحب نے کہا کہ انسانی خدمت کے جذبے سے سرشار سعید الٰہی کو وہ سیلوٹ کرتے ہیں۔
جناب گورنر نے جب اپنی ہتھیلی کو اپنی پیشانی کی طرف سیلوٹ کے انداز میں حرکت دی تو ہال تالیوں سے گونج اٹھا اور صف اول میں بیٹھے معززین رشک بھری نگاہوں سے ڈاکٹر سعید الٰہی کی طرف دیکھنے لگے۔
ڈاکٹر سعید الٰہی سے میرا رابطہ ہلال احمر فورم کے کنوینئر اور معروف کالم نگار جناب بیگ راج کے ذریعے ہوا۔ انہوں نے مجھے ذہنی طور پر آمادہ کیا کہ انسانی خدمت کے اس قومی ادارے کے ساتھ کسی نہ کسی طور پر وابستگی ضروری ہے۔ڈاکٹر سعید الٰہی سے پہلی ملاقات کے بعد ملنے کا اشتیاق برقرار رہتا ہے۔انہوں نے میری قرآن فہمی اور کردار سازی پر مبنی تقاریراور تحریروں کے احوال جانے تو مجھے ہلال احمر پاکستان کا ”موٹیویشنل سپیکر“ کا اعزاز بخش دیا۔ گزشتہ ایک برس سے میں ڈاکٹر سعید الٰہی اور اُن کے ادارے ہلال احمر پاکستان سے جڑا ہوا ہوں اور گاہے بگاہے اس تحریک کی سرگرمیوں میں شامل رہتا ہوں۔
ڈاکٹر صاحب ہمہ وقت متحرک رہنے والی شخصیت ہیں۔ وہ روایتی طور طریقوں سے ہٹ کر ہلال احمر کو قوم کا ادارہ بنانے کی سعئی سعید کر رہے ہیں۔ سینکڑوں نہیں ہزاروں معززین کو اس ادارے کا ”سٹار“ بنا چُکے ہیں۔ وہ لوگوں کو عزّت دینے پر یقین رکھتے ہیں۔یہی وجہ ہے کہ لوگ اُن کے قریب تر ہوجاتے ہیں۔ اُن کا تعلق حکمران جماعت سے ہے لیکن ہلال احمر کے چیئرمین کے طور پر انہوں نے سیاسی تفریق کو بالکل ختم کر رکھا ہے۔ اُن کے چاہنے والوں کی فہرست طویل ہے اور اس فہرست میں تمام پارٹیوں کے لوگ شامل ہیں۔
اُن کے آفس میں ہر وقت لوگوں کا تانتا بندھا رہتا ہے۔ وہ سب کی سنتے ہیں۔ وہ ہر دوست اور واقف کار کو ہلال احمر کے لئے کام کرنے پر اُبھارتے ہیں۔”آپ یہاں تشریف لائے ہیں۔ اس ادارے کو آپ کی معاونت چاہیے۔یہ پیسے کی صورت میں بھی قبول ہے اور وقت کی صورت میں بھی منظور ہے“ وہ ہلال احمر کے نیٹ ورک کو پورے مُلک میں پھیلانا چاہتے ہیں۔ حال ہی میں انہوں نے ہر ضلعی سطح پر اعزازی صدور بنانے کا پروگرام ترتیب دیا ہے۔ ایسے صاحبان حیثیت کو تلاش کیا جارہا ہے جو خدمت خلق کا جذبہ رکھتے ہوں‘جن کا اپنا دفتر ہو‘جو اپنی جیب سے خرچ کر سکیں وہ اعزازی صدر بن جائیں گے۔ اُن کے ذمہ ضلع بھر سے والنٹیرز تیار کرنا‘ بلڈ کیمپس کا انعقاد کروانا اوربوقت ضرورت ہنگامی امدادی سرگرمیوں کو سرانجام دینا ہوگا۔
جناب ظفر اقبال جھگڑا نے گیارہ برس قبل جس شخص کو آزاد کشمیر کے کھنڈروں میں تباہ حال انسانوں کے زخموں پر مرہم رکھتے دیکھا تھا‘ وہ آج اپنی پوری قوم کو قدرتی آفتوں سے نمٹنے کے لئے تیار کر رہا ہے۔ بیگ راج نے ہلال احمر کے چیئرمین کی ایک تصویر پر کیپشن لکھا تھا”شانِ مسیحائی۔ڈاکٹر سعید الٰہی“ میرے خیال میں اس جُملے سے ڈاکٹر صاحب کی پوری شخصیت عیاں ہوجاتی ہے۔

نفرت کا کاروبار کرنے والوں کی دنیا میں کبھی بھی کمی نہیں رہی۔ تعصب اور تحقیر کے خمیر سے بنے ہوئے امریکی صدارت کے لئے ریپلکن پارٹی سے تعلق رکھنے والے ممکنہ امیدوار ڈونلڈ ٹرمپ اپنی نفرت انگیز سوچ کے سبب وقتی طور پر اپنے حریف ریپلکن امیدواروں پر سبقت لے گئے ہیں۔انہوں نے اسلام‘ مسلمانوں حتی کہ عیسائیوں کے خلاف مسلسل بدزبانی کے ریکارڈ توڑ دیئے ہیں۔ اُن کی سوچ کو معتدل امریکی حلقے شیطانی سوچ قرار دے چُکے ہیں۔ اُن کے الفاظ کو غلیظ الفاظ سے تعبیر کیا گیا ہے۔ امریکی صدر اُوبامہ نے اپنی رائے کا برملا اظہار کرتے ہوئے کہا ہے کہ ڈونلڈ ٹرمپ جیسا شخص امریکہ کا صدر نہیں ہوسکتا۔ اس شخص نے امریکہ کا امیج تباہ کردیا ہے اور اگر یہ صدر بننے میں کامیاب ہوگیا تو دُنیا میں امریکہ کی رہی سہی ساکھ بھی تباہ ہوجائے گی۔
ڈونلڈ ٹرمپ نے چند روز پہلے پاکستان کے غدار شکیل آفریدی کے حوالے سے بھی ایک ”تڑی“ لگائی تھی۔ اس منہ پھٹ امریکی صدارتی امیدوار نے کہا تھا کہ وہ برسراقتدار آکر پاکستان کو حُکم دے گا کہ آفریدی کو ہمارے حوالے کردو اور پاکستان کو ایسا ہی کرنا پڑے گا کیونکہ پاکستان امریکی امداد پر پل رہا ہے۔
خیال تھا کہ پاکستان کی حکومت اس بے عزتی پر بھی خاموش رہے گی اور وزارت خارجہ بھی آئیں بائیں شائیں کرکے چُپ سادھ لے گی لیکن توقعات کے برخلاف وزیرداخلہ چوہدری نثار نے ٹرمپ کی ایسی ٹھکائی اور دھلائی کی کہ سانحہ ایبٹ آباد سے دُکھے ہوئے دلوں کے اندر زندگی کی حرارت محسوس ہونے لگی۔چوہدری نثار نے سیدھے لفظوں میں ڈونلڈ ٹرمپ کو بتایا کہ پاکستان امریکہ کی کالونی نہیں ہے۔ٹرمپ کو بات کرنے کا سلیقہ سیکھنا چاہیے۔ اگر وہ امریکی صدر بن بھی گئے تو شکیل آفریدی کی رہائی کا فیصلہ پاکستانی عدالتیں کریں گی نہ کہ امریکی صدر۔چوہدری نثار نے امریکی امداد کو ”مونگ پھلی“ کہہ کر امریکیوں کو کھری کھری سنا ڈالیں۔ وزیر داخلہ کے اس بیان پر قوم کے اندر ایک وقتی خود اعتمادی پیدا ہوئی۔ شکر ہے ہماری وزارت خارجہ جسے ”فارن منسٹری“ کی بجائے ”فارنر منسٹری“ کی پھبتی سہنا پڑتی ہے اُس نے وزیر داخلہ کے جاندار بیان کی کاٹ کو کم کرنے کی کوشش نہیں کی۔
امریکی کانگریس میں بھارتی لابی انتہائی مﺅثر ہے۔امریکی کانگریس نے پاکستان کو ملنے والی امداد روک دی ہے اور خصوصاً پاکستان کو آٹھ ایف سولہ طیارے بیچنے کا وعدہ کیا تھا اسے بھی تعطل کی بھینٹ چڑھا دیا ہے۔پاکستان سے کہا گیا ہے کہ طیاروں کو خریدنا ہے تو پوری کی پوری رقم اد کرو۔ پاکستان کی دفاعی ضروریات خصوصاً دہشت گردی کے خلاف جنگ کے لئے امریکیوں نے خود ان طیاروں کی فراہمی کو ضروری قرار دیا تھا۔ اسی احساس کے تحت ہی طیاروں کی ستر فیصد رقم امریکہ نے قرض کے طور پر فراہم کرنا تھی۔ بھارتی لابی نے اپنا کام دکھا دیا ہے۔ ڈونلڈ ٹرمپ اس لابی کے سربراہ بن کر سامنے آئے ہیں۔
پاکستان نے اس لابی کو بے اثر کرنے کے لئے ترپ کا پتہ پھینکا۔پاکستان نے امریکیوں کو بتا دیا کہ وہ یہ طیارے چین یا روس سے حاصل کرے گا۔ اس اعلان کے بعد امریکی حکومت کے ماتھے پر پسینے پھوٹنے لگے ہیں۔ وزارت خارجہ کے ترجمان جان کربی نے بہ صد اصرار یہ کیا کہ وہ پاکستان کے ساتھ تعلقات میں سردمہری کا تصور بھی نہیں کرسکتے۔ انہوں نے بار بار یہ بات دہرائی کہ امریکہ ہر حال میں پاکستان کے ساتھ تعلقات معمول پر رکھنا چاہتا ہے۔
پاک امریکہ تعلقات تیزی کے ساتھ نیا رخ اختیار کر رہے ہیں۔امریکی عوام کو سوچنا ہوگا کہ اگر بھارتی لابی کی سازش کا شکار ہو کر انہوں نے ڈونلڈ ٹرمپ جیسے کسی فتنہ پرور اور نفرت فروش شخص کو اپنا صدر بنا ڈالا تو دنیا میں ایک نہیں دو مودی ملکر خانہ جنگیاں شروع کرا دیںگے۔پاکستان تو پہلے ہی حالت جنگ میں ہے‘امریکہ بھی اس آگ سے بچ نہ سکے گا۔

انفاق فی سبیل اللہ سے مراد ضرورت مندوں‘ یتیموں اور بے سہارا لوگوں پر اللہ تعالیٰ کی خوشنودی کو مدنظر رکھتے ہوئے مال خرچ کرنا ہے۔قرآن حکیم میں متعدد مقامات پر مسلمانوں کو انفاق فی سبیل اللہ کا حکم دیا ہے کہ جو مال تمہاری چند روزہ زندگی میں تمہیں نصیب ہوا ہے اور جسے تم چھوڑ کر جانے والے ہو اسے اللہ تعالیٰ کے راستے میں خرچ کرکے آخرت کا سامان تیار کرو۔سورة الحدید میں ارشاد باری تعالیٰ ہے‘
”اللہ اور اس کے رسول صلی اللہ علیہ وآلہ وسلم پر ایمان لاﺅ اور اس (مال و دولت) میں سے خرچ کرو جس میں اس نے تمہیں اپنا نائب(امین) بنایا ہے“۔
اللہ کی رضا کے لئے ضرورتمندوں کی ضروریات کو پوراکرنا اور اس کے دیئے ہوئے مال سے خرچ کرنا انفاق فی سبیل اللہ کہلاتا ہے۔
خرچ کرنے کا انداز مختلف ہوسکتا ہے۔ ظاہری اور باطنی طور پر انفاق کرنے کا حکم ہےِ۔یہاں ایک باریک نکتہ سامنے آتا ہے کہ ظاہری طور پر انفاق کرنے یا انفاق کو ظاہر کرنے کی بھی کچھ شرائط ہیں۔آپ اگر ایک ہسپتال بنوا رہے ہیں تو یہ ظاہری انفاق ہے ۔اس سے کسی ضرورت مند کی عزت نفس مجروح ہونے کا اندیشہ نہیں ہے ۔ ایسے کسی فلاحی اور رفاعی پراجیکٹ کے حوالے سے اگر تشہیر کا پہلو نکل رہا ہے تو اس میں کوئی مضائقہ نہیں۔ لیکن اگر کسی بیوہ یا یتیم کی مدد ہورہی ہے اور کسی طرح کا امدادی سامان تقسیم کرنا ہو تو پھر فوٹو سیشن بہت ہی معیوب لگتا ہے۔ اسلامی معاشروں میں صدیوں سے ضرورتمندوں کی ضرورتیں پوری ہوتی رہی ہیں اور اکثر مخیر لوگ چُھپ چُھپا کر یہ مدد کر رہے ہوتے ہیں۔ ”لینے والے کو دینے والے ہاتھ کا پتہ نہ چلے“ اس احتیاط کا پورا پورا خیال رکھا جاتا ہے لیکن جب سے این جی اوز سامنے آئی ہیں اور نمائش کا کلچر فروغ پایا ہے تب سے ضرورت مندوں ‘ بیواﺅں اور یتیموں کو تشہیر کا سستا ذریعہ بنا لیا گیا ہے۔اخبارات دیکھیں‘ چینلز کے سامنے بیٹھ جائیں ہر طرف ایسی تصویروں اور رپورٹوں کی بھرمار ہوتی ہے۔آٹے کا تھیلہ دیتے وقت تصویر ‘گھی کا ڈبہ دیتے وقت تصویر‘ رقم کا لفافہ دیتے وقت تصویر۔غرض مقصد اپنی تصویر بنوانا اور ذاتی تشہیر کرنا ہے نہ کہ ضرورتمندوں کی دادرسی کرنا ہے۔ عزت نفس قدم قدم پر مجروح کی جاتی ہے۔ یہی وجہ ہے کہ سفید پوش ضرورت مند اپنی ضرورت کا اظہار ہی نہیں کرپاتے مبادا کے خیرات کرنے والے ہاتھ کیمرے لے کر گھروں میں گھس آئیں۔ روتی بچیوں کی تصویریں بنائیں اور بھوک سے نڈھال ماں کے بیانات ریکارڈ کریں۔
سب سے ظلم اس وقت ہوتا ہے جب ضرورت مندوں کی طرف سے مخیرخواتین و حضرات یا ادروں کا شکریہ ادا کیا جارہا ہوتا ہے۔ اسلام میں خیرات کے پیچھے صرف ایک ہی جذبہ کارفرما ہونا چاہیے اور وہ فقط اللہ تعالیٰ کی رضا اور خوشنودی ہے۔ جب مقصد اللہ کی رضا ہو تو پھر تشہیر کی ضرورت نہیں رہتی۔ وہ تو انسان کی شہ رگ سے بھی قریب تر ہے۔ اور وہ دلوں کے بھید جانتا اور نیتوں کو بھانپ لیتا ہے۔
جب میڈیا ایک کلچر کو فروغ دے رہا ہو تو بہت مشکل ہے کہ اس تصویری اور تشہیری عذاب سے معاشرے کو نجات دلائی جاسکے۔لیکن اب بھی ایسے صالح افراد اور نیک تنظیمیں موجود ہیں جو ضرورت مندوں کی ضرورتیں تو پورا کرتی ہیں لیکن ضرورت مندوں کا تماشا نہیں لگاتیں۔
ایک ایسا ہی قابل تقلید اور مظاہرہ پھالیہ میں منعقدہ مغل ویلفیئر کنونشن میں دیکھنے کو ملا۔ تنظیم مغلیہ پھالیہ کی دعوت پر مجھے بھی بلایا گیا تھا۔ ایک بڑے پنڈال کے عقب میں جہیز کا سامان‘ سلائی مشینیں اور بجلی کے پنکھے طویل قطار میں سجائے گئے تھے۔ بتایا گیا تھا کہ یہ سامان ضرورت مندوں میں تقسیم کیا جائے گا اور ضرورت مندوں میں زیادہ تر غریب اور بیوا خواتین شامل تھیں۔ کنونشن کے منتظمین نے مستحق افراد کی عزت نفس کا خیال رکھتے ہوئے یہ اہتمام کیا کہ اپنی سکروٹنی کمیٹی کے ذریعے ضرورت مندوں کا تعین پہلے سے کر لیا تھا۔ ان کی فہرست تیار تھی اور کیا چیز کس کو دینی ہے یہ بھی طے تھا۔ لیکن تنظیم کے سیکرٹری انفارمیشن مرزا قیصر فاروق نے بتایا کہ سامان کی تقسیم کی تصاویر نہیں بنیں گی۔ بلکہ فہرست میں درج نام بھی ظاہر نہیں کئے جائیں گے تاکہ کسی ضرورتمند کا دل نہ دُکھے۔
مجھے یقین ہے کہ تنظیم مغلیہ کے اس قدام سے لوگوں کے دلوں میں خیرات کرنے کا جذبہ مزید بڑھا ہوگا۔ اور جو شہرت تصویر کے ذریعے حاصل ہونی تھی اس سے کہیں زیادہ نیک نامی ملی ہے۔ اللہ سے دُعا ہے کہ ہمیں ظاہری نمائش سے بچائے تاکہ ہمیں انفاق فی سبیل اللہ کے حقیقی مقاصد حاصل ہوسکیں۔

پنجاب میں بھی دہشت گردوں کے خلاف آپریشن شروع ہو چُکا ہے۔ سانحہ اقبال پارک نے حکمرانوں کو جگا دیا ہے۔ یہ بھی کہا جاسکتا ہے کہ آپریشن کے لئے شائد کسی خونی المیے کا انتظار کیا جارہا تھا۔ ذرائع ابلاغ اور حزب اختلاف کی طرف سے بار بار یہ سوال اُٹھایا جارہا تھا کہ آخر پنجاب میں دہشت گردوں کیخلاف رینجرز کا آپریشن کیوں نہیں ہورہا۔ یہ الزامات بھی تواتر سے لگے اور لگ رہے ہیں کہ پنجاب حکومت میں بعض وزراء دہشت گرد گروپوں کے حامی ہیں اور وہ اس آپریشن کی راہ میں ہر باررُ کاوٹ بن جاتے ہیں۔ بعض حلقوں کا یہ بھی خیال ہے کہ پنجاب میں آپریشن کرنے کا ردعمل بہت ہی شدید ہونے کا اندیشہ تھا۔ اس لئے حکومت اسے پولیس اور دیگر اداروں کی کارروائیوں تک محدود رکھنا چاہتی تھی۔ ایک رپورٹ کے مطابق پنجاب میں دو سو کے لگ بھگ ایسے مدرسے پائے جاتے ہیں جن کو بیرونی ممالک سے فنڈنگ ہوتی ہے اور انہی مدرسوں میں دہشت گرد پناہ لیتے اور آگ اور خون کا کھیل کھیلنے کی منصوبہ بندی کرتے ہیں۔حکومت پنجاب کا مئوقف ہے کہ گذشتہ ایک برس میں مختلف کارروائیوں میں سینکڑوں دہشت گردوں کو پکڑا گیا ہے اور اس پکڑ دھکڑ کے سبب دہشت گردی کے ممکنہ بیسیوں حملوں کو پیشگی روک لیا گیا ہے۔
”را” کے اعلیٰ سطح کے جاسوس کی کوئٹہ سے گرفتاری عمل میں آئی ہے اور جاسوس کے مبینہ انکشافات نے پاکستانی سیکورٹی اداروں کو نئی تشویش میں مبتلا کردیا ہے۔ ایرانی صدر کے حالیہ دورہ کے دوران ہمارے سپہ سالار نے ایرانی وفد پر واضح کردیا ہے کہ اُن کے ساحلی شہر چاہ بہار میں ”را” کی پاکستان مخالف سرگرمیاں ”بہار” دکھا رہی ہیں۔ ایک قانونی ریفرنس بجھوانے کی تیاری ہورہی ہے۔ کہا جارہا ہے کہ ”را” کو ایرانی شہر سے ہر سہولت دستیاب ہورہی ہے اور پاکستان میں کوئی پانچ ہزار کے لگ بھگ جاسوس اور تخریب کارداخل ہُوچکے ہیں جو مختلف طریقوں سے بلوچستان اور پورے پاکستان میں دل دہلا دینے والی کارروائیاں کر رہے ہیں۔ یہ ضروری نہیں کہ ”چاہ بہار” میں میسر سہولتوں کے پیچھے ایرانی حکومت کی کوئی آشیرباد بھی موجود ہو۔ حکومت پاکستان ایران سے مطالبہ کر رہی ہے کہ وہ چاہ بہار میں ”را” کے سہولت کاروں کے خلاف کارروائی کرے۔ایرانی حکومت کے آئندہ کے اقدامات سے بہت کچھ واضح ہوجائے گا۔ مذہبی طبقہ کی طرف سے سانحہ اقبال پارک میں ”را” کے ملوث ہونے کا موقف سامنے آیا ہے۔ طالبان کے احرار گروپ نے اس حملے کی ذمہ داری قبول کی ہے۔
یہ یاد رہنا چاہیے کہ طالبان سے وابستہ بعض گروہوں نے پاکستان کو ”دارالکفر”قرار دے رکھا ہے۔ اُن کے فسادی خیالات کسی سے پوشیدہ نہیں ہیں۔ بہت سے مدرسوں کے اندر اسی سوچ کے حامل خطیب موجود ہیں اور وہ امریکہ کے ساتھ ساتھ حکومت’ پاک فوج اور پولیس بلکہ پاکستانی عوام کے خلاف قتل کے فتوے دیتے رہتے ہیں۔لال مسجد کے خطیب کچھ عرصہ سے بوجوہ خاموش ہیں لیکن اُن کے اردگرد وہی گروہ ہے جو فوج پر کھلے عام حملے کرنے کی وکالت کرتا ہے۔ بہت سے شدت پسند گروہ خود کو ”داعش” سے وابستہ کرچُکے ہیں۔ تباہ کن حملوں کی تربیت اور برین واشنگ کے لئے سینکڑوں پاکستانی عراق اور شام جا چُکے ہیں۔ داعش نے دنیائے اسلام میں پھیلے شدت پسندوں کو ایک مرکز فراہم کردیا ہے۔ اس لئے یہ کہا جاسکتا ہے کہ ”احرار” وغیرہ اب محض مقامی گروہ نہیں رہے۔یہ سب ایک بین الاقوامی نیٹ ورک سے جڑے ہیں اور ایک دوسرے کو فنی’ مال اور نظریاتی مدد فراہم کر رہے ہیں۔
پاکستان کی تمام سیاسی اور عسکری قیادت نے پشاور سکول پر حملہ کے بعد بڑی عرق ریزی کیساتھ ایک نیشنل ایکشن پروگرام بنایا تھا۔ افسوس کیساتھ کہنا پڑتا ہے کہ اُس ایکشن پر کوئی عمل نہیں ہوسکا۔ خصوصاً شدت پسند انہ نظریات اور فسادی ذہنیت کے خلاف کسی قسم کا کوئی جامع پروگرام شروع نہیں ہوسکا۔ یہ طالبان ہوں یا کوئی اور گروپ کے لوگ۔ اپنی ہر کارروائی کے لئے کوئی نہ کوئی مذہبی جواز ڈھونڈ لیتے ہیں۔ سادہ لوح لوگ اسلام اور پیغمبر اسلام صلی اللہ علیہ وآلہ وسلم سے اپنی محبت کے سب ان گروہوں کے چُنگل میں گرفتار ہوجاتے ہیں۔”نفاذ شریعت” کا مطالبہ ان فسادیوں کی ڈھال بن جاتا ہے۔ کون سا مسلمان ہے جو شریعت کے خلاف بات کرے گا؟ لیکن اگر شریعت کے نفاذ کے لئے فساد برپا کرنا ہے تو پھر یہ اسلام کی کوئی خدمت نہیں ہوسکتی۔اس وقت استحکام پاکستان اول ترجیح ہونی چاہیے۔ اور اس استحکام کے لئے جہاں ایک طرف قدم قدم پر پھیلی اخلاقی’ معاشی’ عدالتی اور سماجی ناانصافیوں کا بتدریج خاتمہ ضروری ہے وہیں فسادی ذہنیت پر کاری ضرب لگانے کا وقت آگیا ہے۔ پنجاب میں فوج کا آپریشن ضرور کامیاب ہوگا۔لیکن دیر پا امن کے لئے مخصوص ذہنی جھتوں کو ‘
”الفتنة اشد من القتل” کی طرف مائل کرنا ہوگا۔

عافیہ صدیقی کی واپسی ممکن نہیں۔حکومت پاکستان نے اسلام آباد ہائیکورٹ کو بتایا کہ چونکہ پاکستان کا امریکہ کے ساتھ قیدیوں کی حوالگی کا کوئی معاہدہ نہیں اس لئے ڈاکٹر عافیہ صدیقی کو پاکستان لانا ممکن نہیں ہے۔ڈپٹی اٹارنی جنرل راجہ خالد محمود نے ہائیکورٹ کے جسٹس انوارالحق قریشی کو ڈاکٹر عافیہ صدیقی کی حوالگی کے لئے کئے گئے اقدامات سے آگاہ کیا اور مئوقف اختیار کیا کہ موجودہ حالات میں ڈاکٹر عافیہ کو پاکستان لانا ناممکن ہے۔عدالت نے سماعت دو ہفتوں کے لئے ملتوی کردی۔حکومتی مئوقف پاکستان کے محب وطن اور انصاف پسند حلقوں پر بجلی بن کر گرا ہے۔مسلم لیگ (ن) نے اپنے انتخابی منشور میں وعدہ کیا تھا کہ وہ برسراقتدار آکر پاکستان کی بیٹی عافیہ کو پاکستان واپس لانے کی بھرپور کوشش کرے گی۔

وزیر داخلہ نے ڈاکٹر عافیہ کے اہل خانہ سے ملاقاتیں کیں اور انہیں یقین بھی دلاتے رہے ۔ لیکن عدالت میں حکومت کے بیان نے واپسی کی تمام اُمیدوں پر پانی پھیر دیا ہے۔ڈاکٹر صاحبہ 2003ء میں لاپتہ ہوئی تھیں۔ یہ جنرل پرویز مشرف کا عروج تھا ۔ کہا جاتا ہے کہ جنرل صاحب نے ہی ڈاکٹر صاحبہ کو امریکہ کے حوالے کیا تھا اور اس کا راستہ یہ نکالا تھا کہ پہلے انہیں کابل میں بھیجا گیا اور وہاں سے امریکی انہیں اپنے ساتھ لے گئے۔ وہاں مقدمہ چلا اور انہیں یکطرفہ طور پر سزا سنا دی گئی۔اسلام کی بیٹی پرامریکی قید میںاس قدر تشدد کیا گیا کہ اُن کا ذہنی توازن بھی ٹھیک نہ رہا۔ اُن کے بچوں اور دیگر اہل خانہ کو آج تک ناقابل بیان اذیت سے گذرنا پڑ رہا ہے۔ جماعت اسلامی نے ڈاکٹر عافیہ کی رہائی کے لئے تحریک چلائی اور اب بھی وہ ان کی رہائی کا مطالبہ کرتی رہتی ہے۔
حکومت کے دو ٹوک مئوقف کے بعد بہت سے سوالات پھر سے اُٹھنے شروع ہوگئے ہیں۔پاکستان نے امریکہ کے متعدد مطلوب پاکستانیوں کو بغیر کسی معاہدے کے حوالے کردیا ہے۔ لوگوںکو یاد ہے کہ کس طرح ایمل کانسی کو امریکی اُٹھا کر لے گئے اور حوالے کرنے والے پاکستان کے حکمران ہی تھے۔ ریمنڈڈیوس کو تو خود مسلم لیگی حکومت نے ہی امریکہ کے حوالے کیا اور مقتولین کے ورثاء کا کچھ علم نہیں کہ اُنہیں زمین نگل گئی یا آسمان لے اڑا۔ پرویز مشرف نے تو انتہا کردی تھی۔ درجنوں پاکستانیوں کو دن دیہاڑے اٹھا کر امریکی ”کتوں” کے آگے ڈال دیا گیا۔ افغانستان کے طالبان سفیر کو بھی بخشا نہیں گیا تھا۔ ذہن سوال کرتے ہیں کہ آخر ہماری خودمختاری کہاں گئی۔ امریکہ کا مطلوب شخص حوالے کرنا ہو تو کوئی قانون درکار نہیں ہے۔ عدلیہ مقننہ اور پولیس سب چُپ سادھ لیتے ہیں۔مقتدر حلقے بھی خاموش دکھائی دیتے ہیں لیکن جب کسی پاکستانی کو واپس لانے کا معاملہ ہو تو قانون رُکاوٹ بن جاتا ہے۔ قانون بھی عجیب ہے۔قادری کی سزائے موت عمر قید میں تبدیل نہیں ہوسکتی’دیت کا معاملہ بھی طے نہیں ہوسکتا لیکن ریمڈڈیوس کی رہائی اور حوالگی کے لئے ہر سہولت اور قانونی گنجائش سینہ کھول کر سامنے آجاتی ہے۔
ہم یہ بھی مانتے ہیں کہ امریکہ دُنیا کا بدمعاش ترین ملک ہے۔اُس کی طاقت کا سکہ چلتا ہے۔ اس کی ایک فون کال پر ہم ڈھیر ہوجاتے ہیں۔ وہ پاکستانی حدود میں گھس کر اُسامہ کمپائونڈ پر حملہ کرسکتا ہے۔ ہم چند روز مصنوعی ناراضگی کے علاوہ کچھ بھی کر نہیں پاتے۔ غربت ایک بہت بڑی کمزوری ہوتی ہے۔کمزور ملکوں کا کوئی حق خودمختاری نہیں ہوتا۔ لیکن ہم عوام کی آنکھوں میں دھول کیوں جھونکتے ہیں۔ میاں نوازشریف تیسری بار وزیراعظم بنے ہیں۔ وہ تاریخ پاکستان کے طاقتور ترین وزیراعظم ہیں۔وہ اس قدر دین دار اور سچے عاشق رسولۖ ہیں کہ گھنٹوں چوکڑی مار کر روضہ رسولۖ پر بیٹھے دکھائی دیتے ہیں۔ اُن کی نیت پر شک نہیں ان کی سیاست پر اعتراض ہے۔اگر امریکہ ڈاکٹر عافیہ صدیقی کو واپس کرنے پر تیار نہیں تو کم از کم قانون کے پیچھے مت چُھپیں۔ اس دروغ گوئی کا عدالت میں فائدہ تو اٹھایا جاسکتا ہے لیکن عوام کی عدالت میں یہ ایک بھونڈا مذاق ہے۔ لوگ سوال کرتے ہیں کہ اگر حوالگی کا معاہدہ ہی رُکاوٹ ہے تو یہ معاہدہ کرنے میں کونسا عمل مانع ہے۔ معاہدہ کر لیجئے۔ڈاکٹر صاحبہ کی رہائی کے بعد معاہدہ توڑ دیجئے۔آئین شکن پرویز مشرف کو باہر بھجوایا جاسکتا ہے تو ڈاکٹر عافیہ کو واپس لانے کے لئے قانون سازی بھی ہوسکتی ہے۔
کوئی شرمین چنائے نہیں جو ڈاکٹر عافیہ کی زندگی پر فلم بنائے۔ ایسی فلم نہیں بن سکتی۔ کیونکہ اس کو آسکرایوارڈ نہیں ملے گا بلکہ اس پر پابندی لگ جائے گی۔ میاں صاحب کے سیاسی گناہ کم ہوسکتے ہیں۔ راستہ سامنے ہے۔ غربت کی موت بھی بہت تکلیف دہ ہوتی ہے لیکن بے غیرتی اور بے حمیتی کی موت تاریخ بن جاتی ہے۔!

دل دہلا دینے والی تصویریں سامنے پڑی ہیں۔ گاندھی کے پیروکار اس قدر سنگدل ہوجائیں گے۔ یہ کوئی ہندو مسلم فسادات کی تصویر نہیں۔ ایک طے شدہ منصوبے کے مطابق دو مسلمانوں کو موت کے گھاٹ اتارنے کا بھیانک منظر ہے۔ تصویر میں دو نوجوان دکھائی دے رہے ہیں۔ اُن کے گلے میں کسے ہوئے پھندے ہیں۔ اُن کے لٹکتے ہوئے دھڑ ہیں۔آنکھیں باہر کو آگئی ہیں۔ وہ درختوں پر لٹکے ہوئے ہیں۔ ان کا اصلی جُرم یہ ہے کہ مسلمان ہیں۔ہندو انتہا پسندوں نے ان پر الزام لگایا ہے کہ انہوں نے گائے خریدی ہے۔ جھاڑ کھنڈ کی سرکار’ پولیس’ عدلیہ’ سماج سب کے سب ایک ہی طرح کی ذہنیت یعنی مودی ذہنیت کا شکار ہیں۔ کسی نے نہیں روکا’کوئی آگے نہیں آیا۔ کسی نے مسلمانوں کا مئوقف سننے کی زحمت نہیںکی۔مائیں روتی رہیں’ بہنیں منتیں کرتی رہیں’ بچے بلبلاتے رہے۔ لیکن ظالم اور سفاک ہندوئوں نے جنگلوں میں لے جا کر ان مسلمانوں کو شہید کردیا۔ یہ کوئی ایک واقعہ نہیں ہے۔ ہر روز یہی سفاکیت ہے۔ بھارتی ادارے رپورٹیں دے چُکے ہیں کہ کس طرح بھارتی مسلمانوں کی نسل کشی کی جارہی ہے۔

مذہب کی تبدیلی تو اب پرانا قصہ ہوگیا اب تو جان کی حفاظت بھی نہیں ہورہی۔ ہندو جتھے جب چاہتے ہیں کسی مسلمان گھر پر حملہ آور ہوتے ہیں ۔ عزت’آبرو’مال سب اُن کے رحم و کرم پر ہے۔مسلمانوں کا مسلمہ قاتل حکومت کر رہا ہے۔ اُس نے جگہ جگہ ”گجرات” بنا دیا ہے۔ شیوسینا اور بی جے پی ایک سکے کے دو رُخ ہیں۔ اویسی برادران چیخ چیخ کر دُنیا کو بتانے کی کوشش کر رہے ہیں کہ بھارت مسلمانوں کے لئے دوسرا میانمر بن گیا ہے۔ انسانیت کے دعویداروں کے کان اور آنکھیں بند ہیں۔جتنی بڑی جمہوریت ہے اتنی بڑی بے حسیّ ہے۔ کبھی کشمیری طلبہ کو یونیورسٹیوں سے خارج کیا جاتا ہے۔ کبھی گائو کے نام پر قتل گاہ سجائی جاتی ہے۔ نریندر مودی صوفی ازم کے جلسوں میں امن کا درس دیتا ہے اور عین اسی وقت اس کی آشیرباد میں پلنے والے ہندو بھیڑئے بے گناہ مسلمانوں کا قتل کردیتے ہیں۔ کوئی نہیں بولتا۔ اکثریت کے جن کے سامنے سب بے بس دکھائی دیتے ہیں۔ انسانی حقوق کی تنظیمیں بھارت میں مسلمانوں اور اقلیتوں کے ساتھ انسانیت سوز پر خاموش رہی ہیں۔مظلوم مسلمانوں کے قتل کے پے در پے چھ خونی واقعات صرف ایک ہفتے میں ریاست جھاڑ کھنڈ میں رُونما ہوچکے ہیں۔نیو یارک ٹائمز کی رپورٹیں پڑھ لیں۔ کہیں بھینس چوری کا الزام ہے’ کہیں گائے کی اسمگلنگ کا ڈھونگ رچایا گیا ہے۔ کہیں گائے کا گوشت پکانے کا ڈرامہ ہے۔ کوئی نہ کوئی بہانہ بنا کر کسی نہ کسی مسلمان کو موت کے گھاٹ اُتار دیا جاتا ہے۔ دہلی سرکار کا کام انتہا پسندوں کو کسی قسم کی سزا سے بچاتے رہنا اور پولیس اور قانون نافذ کرنے والے اداروں کے ذریعے پناہ دینا ہے۔ بظاہر بھارت ایک سیکولر ملک ہے اور مذہبی منافرت اُس کے آئین اور قانون میں حرام ہے۔لیکن عملاً پوری ریاستی مشینری مسلمانوں کے خلاف ایک غیر اعلانیہ جارحیت پر کمربستہ ہے۔ چوبیس کروڑ بھارتی مسلمان سوچتے رہتے ہیں کہ وہ اس جہنم سے باہر کیسے آئیں۔
ہماری حالت عجیب ہے۔ہماری حکومت بھارت میںہونے والے ان مظالم کی مذمت کرنے سے بھی قاصر ہے۔ ہم نے سندھ کے چند لاکھ ہندوئوں کو خوش کرنے کے لئے پورے سندھ میں عام تعطیل کا اعلان کردیا ہے۔ہم اس قدر خوف زدہ اور بھارت زدہ ہیں کہ مذمت کے دو لفظ بھی ادا نہیں کرپاتے۔ بلاول بھٹو کا شکریہ انہوں نے کم از کم مذمت کی ہے۔لیکن پاکستان کا صدر’ وزیراعظم’ وزیر مذہبی اُمور’وزیرخارجہ یہ سب لوگ کہاں سو رہے ہیں۔کم از کم انسانی حقوق کی چادر اُوڑھ کر ہی احتجاج کردیجئے۔ کیا اب ہم اس قابل بھی نہیں رہے کہ بھارتی مسلمانوں کے لئے کسی عالمی فورم پر آواز ہی اٹھا سکیں۔
کہا جاتا ہے کہ اگر حکومتی سطح پر کوئی بیان دیا گیا تو ہندو اکثریت مسلمان اقلیت کا جینا دوبھر کردے گی۔ آپ نے امن کی آشا کا راگ آلاپ لیا۔ بے شرموں کی طرح کرکٹ میچ دیکھنے کلکتہ چلے گئے۔ آپ 23 مارچ سرکاری سطح پر منا رہے ہیں۔ یوم پاکستان کی بنیاد کا پتہ ہے؟۔ یہ امن کی آشا نہیں’ دو قومی نظریہ ہے۔ یہ مُلک مسلمان قوم کے لئے بنا تھا۔ بھارت میں رہ جانے والے مسلمانوں نے ہی تحریک پاکستان چلائی تھی۔ حکمرانی کے مزے لُوٹنے والو اپنی بُنیاد کو بچانے کی فکر کرو۔ مظلوم اقوام کا ساتھ دینا آئین پاکستان میں درج ہے۔ بھارتی مسلمانوں کو مسلمان نہ سہی انسان سمجھ کر ہی اُن کے حق میں آواز اٹھا دو!قرآن پڑھو۔ یہ حکم ربی ّہے’
”تمہیں کیا ہوگیا ہے کہ اُن لوگوں کی مدد کو نہیں پہنچتے جنہیں کمزور پا کر دبا لیاگیا ہے۔”

انسان نے جب بھی فطرت کے خلاف قدم اٹھایا ہے ‘ہمیشہ لڑکھڑایا ہے۔میڈیکل سائنس نے اس قدر ترقی کر لی ہے کہ اب دو ماہ قبل رحمِ مادر میں جھانک کر پتہ لگایا جاسکتا ہے کہ دُنیا میں آنے والا نیا مہمان بیٹا ہے یا بیٹی؟ اس سائنسی سہولت نے انسانوں کے لئے نئی پیچیدگیاں پیدا کردی ہیں۔ معاشی اور سماجی دبائو سے متاثر ماں باپ خطرناک حد تک غیر فطری عمل کے گذرتے ہیں۔ یورپ اور امریکہ میں بیٹی یا بیٹے کے حوالے سے کچھ زیادہ فکر مندی نہیں پائی جاتی اس لئے ان معاشروں میں الٹراسائونڈ کو بیٹیاں مارنے کے لئے استعمال نہیں کیا جاتا لیکن غریب ملکوں میں یہ سہولت ایک عذاب بن گئی ہے۔ ہمسایہ مُلک بھارت میں ایسے کلینک کُھلے ہیں جو بیٹیوں کو رحم مادر سے باہر آنے سے پہلے ہی قتل کردیتے ہیں۔یونیسف کی چونکا دینے والی رپورٹ میں بتایا گیا ہے کہ بھارت کے اندر ہر سال پانچ لاکھ بچیوں کو قتل کردیا جاتا ہے۔ نومولود بچیوں کو مارنے کے دل دہلا دینے والے طریقے نکالے گئے ہیں۔جنس ٹیسٹ کا کلچر عام ہے اور گلی محلے میں اسقاط حمل کے کلینک اس گھنائونے کاروبار میں جُتے ہوئے ہیں۔ بھارت میںجہیز کا خوف بھی بچیوں کو مارنے کا بڑا سبب ہے۔آج کے بھارت میں مرد اور عورت کا فطری توازن بگڑ گیا ہے اور ایک ہزار مردوں کے مقابلے میں 900 عورتیں ہیں۔ اس بگاڑ کا نتیجہ یہ نکلا ہے کہ بھارت کے بعض علاقوں میں کنوارے مردوں کی تعداد ایک المیہ بن چُکی ہے ۔ ایسے ایسے واقعات رونما ہورہے ہیں کہ انسانیت سہم کر رہ گئی ہے ۔ عورت کو مجبور کیا جاتا ہے کہ وہ اس کے دوسرے بھائیوں سے بھی جنسی تعلقات قائم کرے۔ بعض دیہاتوں میں تین تین مرد ایک عورت سے شادی کرتے ہیں۔ اولاد پر لڑائیاں ہوتی اور قتل ہوجاتے ہیں۔فطرت کے خلاف جنگ کرنے کا یہ ایک بھیانک اور خوفناک نتیجہ ہے۔
حال ہی میں چین کے حوالے سے ایک رپورٹ سامنے آئی ہے۔ ”گنجے درخت” کے عنوان سے شائع ہونے والی اس رپورٹ میں بتایا گیا ہے کہ ”ون چائلڈ” پالیسی کے خطرناک نتائج سامنے آرہے ہیں۔چونکہ ایک ہی بچہ پیدا کرنا ہے اس لئے وہ بیٹا ہی ہونا چاہیے۔ لہٰذا اسقاط حمل کا رواج عام ہے۔ لڑکیوں کی تعداد کم ہوگئی ہے۔ ایسے علاقوں کی نشاندہی کی گئی ہے کہ ایک کمیونٹی میں بیس مردوں کے لئے ایک دلہن دستیاب ہے۔دلہن کی قیمت بیس ہزار ڈالر تک پہنچ چکی ہے ۔ جن غریب چینیوں کے پاس بیس ہزار ڈالر نہیں وہ عمر بھر شادی نہیں کرسکتے۔ لڑکیوں کے والدین امیر شوہر کی تلاش کے لئے بیٹیوں کو شہر بھجوا دیتے ہیں۔ پیچھے رہ جانے والے مرد عمر بھر کنوارے پھرتے ہیں۔ اُن کی شادی نہیں ہوتی اور اولاد کا تصور ہی نہیں ہوسکتا۔ اسی لئے ایسے مردوں کو ”گنجے درخت” کہا جاتا ہے۔ کہ ان کی شاخوں پر پتے ہی نہیں اگتے۔ چین کے اندر لاکھوں ایسے مرد ہیں جو ”ہرے بھرے” نہیں ہوپائے اور بوڑھے ہوگئے۔
چینیوں نے غیر فطری پابندیاں لگا کر اپنے معاشرے میں نر اور مادہ کی تعداد کے درمیان ضروری توازن توڑ دیا ہے۔”گنجے درخت” انتہائی مایوسی کی حالت میں مختلف جرائم اختیار کرچُکے ہیں۔اکثر منشیات کے عادی ہوچکے ہیں۔
خدا کا شکر ہے کہ اللہ پاک نے ہمیں اپنی ہدایت کی روشنی سے منور فرمایا۔ بیٹی کو رحمت قرار دے کر ہمارے دلوں میں بیٹی کی عظمت کا تصّور اُجاگر کردیا۔بیٹیوں کی تعلیم وتربیت کرنے پر جنت کی بشارت سنائی اور رحمت العالمین حضرت محمد صلی اللہ علیہ وآلہ وسلم کے اسوہ حسنہ کے ذریعے بیٹی کی بڑائی کو چار چاند لگا دیئے۔مسلم معاشروں میں آج بھی عمومی طور پر بیٹی سے بے حّد پیار کیا جاتا ہے۔ یہ سب اسلامی تعلیمات کا اثر ہے۔
قرآن عظیم میں ارشاد ہوتا ہے کہ اللہ ہے جو تمہیں بیٹیاں بھی عطا کرتا ہے اور بیٹے بھی۔تم رزق کے خوف سے ان کا قتل مت کرو۔
الٹراسائونڈ کی سہولت اپنی جگہ لیکن کسی بھی سائنسی سہولت کو خلاف فطرت عوامل کے لئے استعمال نہیں ہونا چاہیے۔ پاکستان میں مردوں اور عورتوں کے درمیان تعداد کے اعتبار سے ایک خوبصورت توازن موجود ہے۔ یہ تاثر غلط ہے کہ پاکستان میں عورتیں اکاون فیصد ہوچُکی ہیں۔ ہرگز ایسا نہیں ہے۔اگر ہو بھی تو رحمت میں ہی اضافہ ہوگا۔بہت سے مغربی ممالک میں عورتوں کی تعداد زیادہ ہے۔لیکن وہاں عورت کی تعلیم وتربیت اور اُس کے روزگار کے ذرائع اس قدر وافر ہیں کہ انہیں کسی معاشی یا سماجی پریشانی کا سامنا نہیں ہے۔
عورت کو بااختیار بنایئے’ اُس کا احترام کرنا سیکھیے ۔بیٹا یا بیٹی ۔اس کا فیصلہ اللہ پر چھوڑ دیں کہ وہ فاطرالسموات والعرض ہے!!

پچیس برس سے اسلام آباد کے دیہی علاقے میں متوسط اور غریب گھرانوں کے بچوں کی تعلیم و تربیت میں مصروف ڈاکٹر نعیم غنی سے جب بھی ملاقات ہوتی ہے وہ بے سکول بچوں کی دردناک کہانی سناتے ہیں۔”جوبچے کسی مدرسے یا سکول میں پڑھ رہے ہیں حکومت کی ساری توجہ ان کی طرف ہوتی ہے لیکن وہ اڑھائی کروڑ بچے جن کے لئے نہ سکول ہے نہ اُستاد وہ اسی معاشرے کا حصہ ہیں۔اُن کے بارے میں کسی کو فکر ہی نہیں”۔”حکومتوں کی اپنی ترجیحات ہوتی ہیں جس ملک میں تعلیم کا بجٹ ہی دو فیصد سے آگے نہ بڑھا ہو اُس مُلک میں دانش سکول ایک مذاق ہی لگتا ہے”۔
”تعلیم عام کرنا اور ہر بچے کو سکول میں داخل کرنا آئینی تقاضا ہے لیکن شائد آئی ایم ایف کا دبائو ہے کہ صحت اور تعلیم پر سرکاری خزانے سے رقم نہ لگائی جائے اور اسے پرائیوٹائزڈ ہی رہنے دیا جائے”۔
سُلطانہ فائونڈیشن کے اس زیرک چیئرمین کے پاس ٹھوس اعدادوشمار ہیں’دلائل ہیں اور درد دل بھی ہے۔ وہ ہر فورم پر بے سکول بچوں کا مقدمہ لڑتے ہیں۔اُن کی پریشانی کی بازگشت ایک سرکاری رپورٹ میں بھی سنائی دی ہے۔ وفاقی وزارت تعلیم اور تعلیمی منصوبہ بندی کی اکیڈمی ”ایپام” کی رپورٹ بہ عنوان ”پاکستان ایجوکیشن سٹیٹسٹکس” میں اعتراف کیا گیا ہے کہ پاکستان کے پانچ سے سولہ سال کی عمر کے تقریباً نصف بچے سکول میں نہیں پڑھتے اور سکول سے باہر بچوں میں لڑکوں کے مقابلے میں لڑکیوں کی تعداد کہیں زیادہ ہے۔پاکستان میں پانچ سے سولہ سال تک کے بچوںکی تعداد تقریباً پانچ کروڑ کے لگ بھگ ہے۔ اس طرح اڑھائی کروڑ بچے سکول سے باہر ہیں اور بغیر کسی تعلیم کے جوان ہورہے ہیں۔ رپورٹ میں اُن بچوں کا بھی ذکر ہے جو سکول میں داخل ہوئے لیکن انہوں نے پانچویں کلاس کے بعد سکول چھوڑ دیا۔ یہ بات بھی سامنے آئی ہے کہ پاکستان میں اسی فیصد سکول پرائمری سطح کے ہیں اور اُن میں سے تیس فیصد ایسے سکول ہیں جن میں صرف ایک استاد دستیاب ہے۔نصاب ‘ تعلیمی معیار اور اساتذہ کی پریشان کن صورتحال بھی سامنے لائی گئی ہے۔
اس رپورٹ پر تبصرہ کرتے ہوئے وفاقی وزیر تعلیم وتربیت جناب بلیغ الرحمان نے آئیں بائیں شائیں کرنے کے بعد ارشاد فرمایا ہے کہ یہ اتنی بڑی تعداد میں بچوں کا سکول سے باہر رہنا باعث ندامت ہے۔
بلیغ الرحمن اچھے وزیر ہیں کم از کم انہوں نے حقائق تسلیم کر لئے ہیں اور اپنی ندامت کا اظہار بھی کردیا ہے۔
حال ہی میں وزیراعظم پاکستان اپنی نورِ نظر محترمہ مریم نواز اور اپنے کار خاص جناب ڈاکٹر طارق فضل چوہدری کے ہمراہ وفاقی دارالحکومت کے کسی سرکاری سکول میں جلوہ گر تھے۔ وہاں انہوں نے ایک ماہر اتالیق کا رول اپناتے ہوئے ”معصوم” بچوں سے سوالات کئے’ ان کے ساتھ وقت گذارا اور سکول کی سہولیات بہتر بنانے پر احکامات جاری فرمائے۔ جب سے تعلیم کے پھیلائو کے لئے محترمہ مریم نواز صاحبہ کو امریکہ سے کروڑوں ڈالر ملے ہیں تب سے اسلام آباد کے سرکاری سکولوں میں پرائم منسٹر کی آمد کے سلسلے میں بھی چل نکلے ہیں۔ ایک رپورٹ میں بتایا گیا ہے کہ فیڈرل سکولوں میں ایسے بدقسمت سکول کثرت میں موجود ہیں جہاں بچیوں کے لئے ٹائلٹ کی سہولت دستیاب نہیں’ ایسے کالج موجود ہیں جہاں سٹاف نہیں ۔جب وزیراعظم کا دورہ ہوتا ہے تو سکول کی چمک دمک دیدنی ہوجاتی ہے۔ لیکن جونہی دورہ ختم ہوتا ہے پھر وہی اُجڑی بستیاں اور ٹوٹے بنچ نمودار ہوجاتے ہیں۔ ایک طرف میاں شہبازشریف کے بند ہوتے ہوئے دانش سکول ہیں اور دوسری طرف امید کی رسی سے بندھے وفاقی سکول ہیں۔ یوں محسوس ہوتا ہے کہ حکومت صرف درشنی اقدامات پر یقین رکھتی ہے۔ جب سکول جانے والے اڑھائی کروڑ بچوں کی حالت سُدھر نہیں پارہی تو جوبچے سکول سے واقف ہی نہیں اُن کے لئے کون پریشان ہوگا!
سُلطانہ فائونڈیشن نے اپنے یوسف صراف سنٹر کے ذریعے موقعہ سکولوں کا جال پھیلایا ہے۔ یہ بے سکول بچوں کو سکول میں لانے کی بجائے اُن کے گھروں ‘کارخانوں’دُکانوں اور کچی بستیوں کے اندر اُن کی تعلیم وتربیت کا قابل عمل منصوبہ ہے۔ فائونڈیشن نے ان بچوں کی عمر’ ذہنی قابلیت اور فراغت کو سامنے رکھ کر مخصوص نصاب ترتیب دیئے ہیں۔
”ہم نے ایک ماڈل دے دیا ہے۔ اس ماڈل کو جگہ جگہ دھرایا جائے تو چند سالوں میں اڑھائی کروڑ بچوں کو سکول میں داخل کئے بغیر تعلیم سے بہرہ مند کیا جاسکتا ہے”۔
ڈاکٹر صاحب نے ایک ملاقات میں ”موقعہ” سکولو ںپر روشنی ڈالتے ہوئے بتایا۔ یہ ایک انقلابی منصوبہ ہے۔چھوٹے پیمانے پر اسلام آباد میں عمل درآمد جاری ہے۔مخیر حضرات ایسے سکولوں کو گود لے رہے ہیں۔ یہ تحریک آگے بڑھ رہی ہے۔ اگر وزیر تعلیم شرمندہ ہونے کی بجائے ڈاکٹر نعیم غنی جیسے لوگوں سے مل لیں تومستقل شرمندگی سے قوم کو بچایا جاسکتا ہے۔

ہریانہ کے جاٹوں نے احساس محرومی کا شکار ہو کر دہلی کو جانے والی پانی کی نہر بند کردی’پٹریاں اُکھاڑ پھینکی’ عمارتوں کو نذر آتش کردیا۔ فوج بھی پُرتشدد مظاہروں کوروک نہیں پائی۔جاٹ برادری کی احتجاجی تحریک میں 20 سے زائد لوگ ہلاک ہوئے’ سینکڑوں زخمی ہوئے لیکن مرکزی حکومت مظاہرین کو پُرامن رہنے کی تلقین کرتی رہی۔ مذاکرات کامیاب ہوئے یا ناکام حقیقت یہ ہے کہ بھارت کے پاس اپنے کسانوں کو دینے کے لئے کچھ بھی نہیں ہے۔ جاٹ تھک ہار کر بیٹھ جائیں گے۔ مودی سرکار کا شائننگ انڈیا فی الحال بُجھا ہوا ملک ہے جس میں جمہوریت تو بہت ہے لیکن عوام کی حالت زار روز بروز بگڑتی جارہی ہے۔ احساس محرومی پھیلتا جارہا ہے اور خطہ غربت سے رہنے والوں کی تعداد روز بروز بڑھ رہی ہے۔ ڈیڑھ ارب کی آبادی میں ایک ارب وہ انسان ہیں جن کو ضروری غذا دستیاب نہیں ہے۔ ساٹھ کروڑ وہ ہیں جن کے پاس ٹائلٹ کی سہولت نہیں ہے۔آخر شائننگ انڈیا کا سارا پیسہ کہاں جارہا ہے؟
چین کے ایک ملٹری تھنک ٹینک کی حالیہ رپورٹ میں بتایا گیا ہے کہ سال 2015ء میں بھارت دوسرا بڑا ملک ہے جس نے سب سے زیادہ اسلحہ خریدا ہے۔ جبکہ پاکستان نے اسلحہ کی درآمد پر نسبتاً کم رقم خرچ کی ہے۔ پاکستان اسلحہ کے خریداروں کی فہرست میں نویں سے دسویں نمبر پر آگیا ہے لیکن بھارت نے اسلحہ کی ریکارڈ خرید کی ہے۔
اسٹاک ہوم انٹرنیشنل پیس ریسرچ انسٹی ٹیوٹ (سپرئی) نے بتایا ہے کہ بھارت نے کم و بیش 2015ء میں بھی اتنا ہی اسلحہ خریدا ہے جتنا 2014ء میں خرید کر اول نمبر حاصل کیا تھا۔ تین ہزار ملین ڈالر۔ اس کو بھارتی روپے سے ضرب دیں تو کھربوں روپے بنتے ہیں۔ روس’ امریکہ اور اسرائیل سے خریدے ہوئے اسلحہ کے انبار لگا چُکا ہے لیکن عالمی سطح پر کسی قسم کی پریشانی کا اظہار تک نہیں کیا گیا۔
پاکستان کو امریکہ نے آٹھ ایف سولہ طیارے بیچنے کی منظوری دی تو بھارت میں واویلا مچ گیا۔ امریکی سفیر کو دفتر خارجہ طلب کرکے احتجاج کیا گیا۔ دُنیا بھر میں بھارتی لابی نے امریکی صدر پر دبائو ڈالا اور فیصلہ منسوخ کرنے کا مطالبہ کیا۔ حالانکہ صدر اُوبامہ نے جس سمری کی منظوری دی اُس میں صاف لکھا ہے کہ پاکستان دہشت گردی کے خلاف جنگ میں فرنٹ لائن اسٹیٹ ہے اور سرحدوں کی نگرانی کے لئے اس کی ایئرپاور مضبوط ہونا ضروری ہے۔ لیکن بھارت نے آج بھی احتجاج جاری رکھا ہوا ہے اور وہ پاکستان کے اسلحہ کی ضرورتوں کو کسی طور پورا ہونے نہیں دینا چاہتا۔
آخر بھارت کو کس سے خطرہ ہے۔ وہ پاکستان کے مقابلے میں کئی گنا زیادہ امریکہ کی ”مہربانیاں” سمیٹ رہا ہے۔ ایٹمی معاہدہ کر چُکا ہے اور امریکہ سے جدید ترین اسلحہ خرید رہا ہے۔ چین کے ساتھ اس کے سرحدی تنازعات سردخانے میں جاچکے ہیں اور مخاصمت کی جگہ تجارت نے لے لی ہے۔ اربوں ڈالر سالانہ کے کاروباری اور تجارتی معاہدے ہو چکے ہیں۔ پھر بھارت کو کس سے خطرہ ہے۔ کیا بھارت اپنے دفاع کے لئے اسلحہ خرید رہا ہے؟۔ ہرگز نہیں۔ پاکستان نے عزت’ غیرت سب دائو پر لگا کر پٹھان کوٹ کے ملزمان کے خلاف گوجرانوالہ میں ایف آئی آر درج کی ہے ۔ بھارتی وزیر دفاع اس پر مطمئن نہیں۔مودی کا یہ اعتراف کہ سقوط ڈھاکہ کے لئے بھارت نے مکتی باہمی کا ساتھ دیا تھا’ ان کے ارادوں اور ناپاک عزائم کو سمجھنے کے لئے کافی ہے۔ بھارت کے وزراء بار بار پاکستان کو سبق سکھانے کے لئے ”ہوم ورک” پر زُور دے چکے ہیں۔ یہ اسی ”ہوم ورک” کی ایک جھلک ہے کہ بھارت اپنے ہمسائے اور دس گنا چھوٹے ملک پر جارحیت کی تیاریاں کر رہا ہے ۔ اسے اس سے غرض نہیں کہ جاٹ برادری کے حقوق پورے ہوتے ہیں یا نہیں’ اسے انتہا پسندوں کی خواہش کو پورا کرنا اور پاکستان سے اپنی ازلی دُشمنی کو پروان چڑھانا ہے۔ دُنیا کس قدر خود غرض ہے کہ جنوبی ایشیاء میں سب سے بڑا ملک اسلحے کے انبار لگا رہا ہے اور کوئی پوچھنے والا نہیں۔

وزیراعظم میاں محمد نوازشریف عملاً پھٹ پڑے ہیں۔ نیب نے احتساب کا دائرہ وسیع کرتے ہوئے پنجاب حکومت کی طرف پنجے بڑھائے تو چیخیں نکل گئی ہیں۔ ایف آئی اے میں بھرتیوں کا سکینڈل’ رائے ونڈ روڈ کی تعمیر کا معمہ’گرین لائن ٹرین کا مُدّا اور پاک قطر ایل این جی معاہدے کا پھڈا۔اور پندرہ افسران کی گردن کے گرد پھندا۔ کیا کیا راز سامنے آرہے ہیں۔دو تہائی اکثریت والی حکومت کے وزیراعظم نے بھری محفل میں اپنی بے بسی کا رونا رویا۔ کہا کہ وہ نیب کے چیئرمین کو متعدد مرتبہ کہہ چکے ہیں کہ بیوروکریٹس کو حراساں نہ کیا جائے لیکن چوہدری قمر الزمان نے کوئی عمل درآمد نہیں کیا۔وزیراعظم نے یہ بھی بتا دیا کہ اگر چوہدری صاحب نے اپنے ”کارندوں” کو تنگ کرنے سے نہ روکا تو پھر حکومت قانونی بندوبست کرے گی۔ پنجاب کے وزیر قانون نے وزیراعظم کے مئوقف کی تائید کرتے ہوئے کہا ہے کہ بغیر کسی ثبوت کے کسی شخص کو نوے روز حراست میں رکھنا اور پھر اسے چھوڑ دینا انتہائی تکلیف دہ ہے۔ انہوں نے یہ بھی فرمایا ہے کہ نیب کو محض اس لئے کارروائی کی اجازت نہیں دی جاسکتی کہ پنجاب کو دوسرے صوبوں کے برابردکھایا جائے۔باخبر حلقوں کا کہنا ہے کہ پنجاب کے وزیر تعلیم نے بھی نیب کے خلاف کافی ”رون پٹن” کیا ہے۔اسی لئے وزیراعظم نے بہاولپور میں اس ایشو کوعوامی سطح پر اُٹھایا ہے۔
خیبرپختونخواہ حکومت نے نیب آرڈیننس میں من مانی ترامیم کروا لی ہیں۔اس ترمیم کے خلاف احتجاج کرتے ہوئے نیب کے صوبائی سربراہ جنرل حامد نے استعفیٰ دے دیا ہے۔انہوں نے مختلف ٹی وی پروگراموں میں الزام عائد کیا ہے کہ وزیراعلیٰ خٹک بھی کرپشن میں ملوث ہیں۔بہرحال اٹھارویں ترمیم کی ڈھال کی صورت میں جناب خٹک نے خود کو بچا لیا ہے۔ باقی صوبے بھی اپنے بچائو کے لئے ہاتھ پائوں مار رہے ہیں۔
صوبہ سندھ تو شروع دن سے ہی نیب کی ”وارداتوں” کے خلاف سراپا احتجاج ہے۔ جناب زرداری تو میاں نوازشریف کو متعدد بار میٹھی میٹھی دھمکیاں دے چُکے ہیں بلکہ خبردار بھی کرچکے ہیں۔ سندھ حکومت نے ایک آئینی ترمیم کے بعد بڑی حدّ تک اپنا تحفظ کر لیا ہے۔ ایف آئی اے کی گرفت ڈھیلی کرنے کی راہیں تلاش کی جارہی ہیں۔ ڈاکٹر عاصم کے حوالے سے زرداری صاحب کُھل کر سامنے آگئے ہیں۔
منظرکچھ اس طرح کا سامنے آرہا ہے کہ اگر چوہدری قمر الزمان وزیراعظم کی دھمکی سے مرعوب نہیں ہوتے تو پھر قومی اسمبلی میں آئینی ترمیم لائی جائے گی۔ یہ بھی ہوسکتا ہے کہ صدر مملکت اپنے پاکیزہ ہاتھوں سے کوئی صدارتی آرڈیننس جاری کردیں۔
تحریک انصاف بظاہر ایسی کسی ترمیم یا آرڈیننس کی مخالفت کرے گی لیکن عملاً کوئی رُکاوٹ نہیں ڈال سکے گی۔ ایم کیو ایم بھی شور تو مچائے گی لیکن نیب کو کنٹرول کرنے کے لئے ترمیم پاس ہونے دے گی۔پیپلزپارٹی کو اور کیا چاہیے۔ کرپشن کا ”تاج” تو اسی پارٹی کے سرسجایا گیا ہے۔ اُسے میاں صاحب نے خود یہ سنہری موقع فراہم کردیا ہے ۔ زرداری جس عذاب کی دہائی دے رہے تھے میاں صاحب نے اس کی گواہی دے دی ہے۔
ایک سوال اُبھرتا ہے اور بار بار ابھرتا ہے کہ آخر نیب کے چیئرمین اس قدر بہادر اور طاقتور کیسے ہوگئے ہیں۔اُن کے اندر اتنی بڑی قوت کہاں سے آگئی ہے کہ انہوں نے بڑے بڑے بیوروکریٹ کو خوفزدہ کردیا ہے۔انہوں نے حکومت وقت وہ بھی نواز شہباز کی حکومت سے پنجہ آزمائی شروع کردی ہے۔وہ ایماندار افسر کے طور پر مشہور ہیں۔ تمام پارٹیوں نے متفقہ طور پر انہیں نیب کے منصب اعلیٰ پر فائز کیا تھا وہ وزارت دفاع میں ڈیفنس سیکرٹری کے عہدے پر خدمات انجام دے چُکے ہیں۔ وہ ایک ریٹائرڈ میجر ہیں اور اکیسویں گریڈ کے بیوروکریٹ۔ وزارت دفاع کے سیکرٹری کی سیٹ جی ایچ کیو کی رضامندی کے بغیر حاصل نہیں کی جاسکتی۔کہیں ایسا تو نہیں کہ انہیں ”جی ایچ کیو” سے ہدایات لینے کی عادت ہی پڑ گئی ہو۔حکومت کو اصل صورتحال کا علم ہوگا۔ وزیراعظم نے یوں ہی عوام کے سامنے نیب کا ٹرائل نہیں کیا۔ یہ دھمکی صرف چوہدری قمر الزمان کو نہیں’ اشارہ کسی اور طرف بھی ہوسکتا ہے۔

بندے گننا کتنا مُشکل ہوگیا ہے۔اٹھارہ سال پہلے گنے تھے۔ تب ہم بارہ کروڑ تھے۔ اب کتنے ہیں کچھ حتمی تعداد معلوم نہیں۔ حکومت کہتی ہے کہ اگر فوج سیکورٹی کے لئے دستیاب ہوئی تو اپنے لوگوں کی گنتی کر لیں گے۔شائد مارچ میں حسب وعدہ یہ کارنامہ سرانجام پاجائے۔ سیکیورٹی کی کیا ضرورت ہے۔ کیا ایسے پاکستانی بھی ہیں جو کسی گنتی اور شمار میں آنا ہی نہیں چاہتے۔ یہ کوئی پولیو مہم تو نہیں اس شماریات کی کسی مسلک’مذہب’ علاقے یا زبان سے بھی کوئی ضد نہیں ہے۔ پھر بھی خطروں کی کئی گھنٹیاں بجتے دکھائی دے رہی ہیں۔صوبوں میں آبادی کی تعداد کا معاملہ ہوگا۔ کسی کمیونٹی کو شائد گنتی ناگوار گزرے۔ لیکن جب تک لوگ گنے نہیں جائیں گے ان کی فلاح وبہبود کے لئے منصوبہ بندی کیسے ہوسکے گی۔
ہر گھر کو علم ہے کہ گھر کے افراد کتنے ہیں۔ گھر کے سربراہ کو تعلیم ‘ صحت’ خوراک اور رہائش کے لئے کتنے افراد کا بندوبست کرنا ہے۔ اخراجات کہاں سے آئیں گے ۔ بچت کہاں سے کرنی ہے۔ ماہانہ’ سالانہ اور زندگی بھر کے معاملات طے ہوتے ہیں۔ اگر ایک گھر کو اپنے افراد کا علم ہے تو پاکستان کی ریاست کو بھی اپنے عوام کی تعداد اور استعداد کا علم ہونا چاہیے۔ بغیر تعداد کے تعین کے اگر گھر کے لئے روٹیاں خریدی نہیں جاسکتیں تو ملک کیسے چلایا جاسکتا ہے۔ تُکاّ بندی پر منصوبہ بندی کی بنیاد نہیں رکھی جاسکتی۔ لیکن یہ دنیا کا عجیب و غریب ملک ہے جو اپنے افراد کو گننے سے ہچکچاتا رہتا ہے۔ شائد آبادی کے بم کے خوف نے انہیں اس کے قریب جانے سے روک رکھا ہے۔
ماہرین شماریات”نادرا” وغیرہ کے ڈیٹا کو ناکافی سمجھتے ہیں۔ پاکستان میں کروڑوں لوگ اب بھی ایسے ہیں جو شناختی کارڈ حاصل ہی نہیں کرنا چاہتے۔ شائد ان کی ضرورت نہیں ہے۔ بچے’ عورتیں اور بوڑھے بھی ہیں جن کا کسی سرکاری کھاتے میں اندراج ہی نہیں ہوا۔ اڑھائی کروڑ تو وہ بچے بھی ہیں جو کسی سکول یامدرسے میں گئے ہی نہیں۔ انہیں جنم پرچی یا نادرا کے برتھ سرٹیفکیٹ کی ضرورت ہی محسوس نہیں ہوئیِ۔ کراچی میں لاکھوں لوگ ایسے ہیں جن کے پاس پاکستان کا شناختی کارڈ نہیں لیکن وہ یہاں برسوں سے رہ رہے ہیں۔ کوئٹہ میں ہزاروں افراد ایسے ہیں جنہیں افغانستان کی حکومت اپنا شہری تسلیم کرنے پر تیار نہیں اور پاکستان انہیں شہریت دینا نہیں چاہتا۔ جب مردم شماری ہوگی تو غیر قانونی ”پاکستانیوں” کی تعداد بھی کھل کر سامنے آجائے گی۔ صوبوں میں آبادی کا تناسب اور اضافہ بھی سامنے آئے گا۔ عورتوں کی تعداد کا پتہ چلے گا۔بوڑھوں کو بھی شمار کر لیا جائے گا۔ بچوں کی گنتی ہوگی۔
سوال یہ بھی اہم ہے کہ مردم شماری کرتے وقت جو فارم پر کئے جائیں گے ان میں کون کونسی معلومات پوچھی جائیں گی۔ ایسی معلومات جن سے قومی وحدت کو نقصان پہنچنے کا اندیشہ ہو انہیں سامنے ہی نہیں آنا چاہیے۔ مسلکی اور لسانی حوالوں سے اعدادوشمار کی ضرورت ہی نہیں۔غریب اور امیر کی تعداد گنی جاسکتی ہے۔ ضرورت مندوں کا اندازہ لگانا ضروری ہے۔ برادریوں اور قبیلوں کا اندراج قطعاً بے معنی ہوگا۔
ارادے کی پختگی کی ضرورت ہے۔ کام مشکل ضرور ہے لیکن نا ممکن نہیں ہے ۔مردم شماری پر اربوں روپے خرچ ضرور ہوں گے لیکن وسائل کی تقسیم اور وفاق کی مضبوطی کے لئے یہ کام ضروری ہوگیا ہے۔بتایا گیا ہے کہ اس غرض کے لئے بجٹ میں جو رقم مختص کی گئی ہے وہ ناکافی ہے۔وزیراعظم پاکستان نے اپنے ابتدائی خطاب میں مردم شماری کرانے کا اعلان کیا تھا۔ حکومت پہلے بھی بہت مشکل منصوبوں پر عمل پیرا ہے۔ترقیاتی منصوبے اپنی جگہ لیکن جن کے لئے آپ یہ منصوبے بناتے ہیں ان کی تعداد تو معلوم کر لیں۔ ایسا نہ ہو کہ آپ کے سنگ وخشت کے یہ منصوبے عوام کو خوشحالی دینے کی بجائے بدحالی سے دوچار کردیں۔ عوام کی ضرورت کوئی اور ہو اور آپ کسی اور سمت میں اخراجات کر رہے ہوں۔ آبادی کو اسی وقت کنٹرول کیا جاسکتا ہے جب ان کو شمار کر لیا جائے۔ اس لئے پہلی فرصت میں مردو زن کو شمار کر لو!