اگر آپ بیرون ملک رہتے ہیں اور پاکستان کے بارے میں آنے والی خبروں اور تبصروں پر نگاہ رکھتے ہیں تو آپ کو دو طرح کی صورتحال سے واسطہ پڑے گا۔پہلی صورتحال تو یہ ہے کہ پاکستان میں اوپر سے لے کر نیچے تک کرپشن ہے ‘چور بازاری ہے ‘رشوت اور اقرباپروری ہے اور اداراتی بگاڑ زوروں پر ہے۔ یہ صورتحال کوئی مصنوعی نہیں ہے۔جہاں نیب جیسا ادارہ سپریم کورٹ میں پچاس میگا کرپشن سکینڈل کی فہرست جمع کروائے اور بتایا جائے کہ ساڑھے چار سو ارب روپے کی مالی بدعنوانی ہوئی ہے اور بدعنوانیوں میں سابق وزراء اعظم تک کے لوگ شامل ہیں پھر خبر آئے کہ کراچی میں سالانہ 2سو تیس ارب روپے کا بھتہ وصول ہوتا ہے اور اس بھتہ خوری کے ڈانڈے بلاول ہائوس سے ملتے ہیں۔ پھر انکشاف ہوا اور وہ انکشاف بھی غیر ملکی میڈیا میں ہو کہ کراچی کی ایک ہر دلعزیز سیاسی پارٹی کے سرکردہ لوگوں کے بھارت کے ساتھ تعلقات ہیں اور وہ ”را” سے مالی مدد وصول کرتے رہے ہیں۔ پھر خبر آئے کہ صوبہ کے پی کے ایک وزیر کو اس لئے گرفتارکر لیا گیا ہے کہ اس نے قیمتی پتھر کی فروخت میں اربوں روپے کا غبن کیا ہے۔ جب پتہ چلے کہ سندھ میں بیسیوں ہسپتال ہیں جن میں دل کے امراض کی تشخیص کرنے والی مشینیں عرصہ دراز سے بند پڑی ہیں ‘1122 کی ایمبولینس گاڑیوں کو کھڑے کھڑے زنگ لگ گیا ہے۔ خبر آئے کہ پاکستان میٹروبس سروس برسات کی پہلی بارش بھی برداشت نہیں کرسکی اور اس کا ٹریک جگہ جگہ سے قابل مرمت ہوچکا ہے۔ غرض پڑھتے جائیں سوچتے جائیں’ آپ کے ذہن میں ایک ہی نقشہ ابھرے گا کہ وطن عزیز کو کرپٹ مافیا نے اپنے چنگل میں لے لیا ہے اور اس شرمندہ کر دینے والی صورتحال کے ہوتے ہوئے ہم دنیا میں سر اٹھا کر نہیں چل سکتے۔دنیا ہماری عزت کرنے پر آمادہ نہیں۔ اس کے برعکس خبروں کا ایک دوسرا حصہ ہے جس سے امید کے پہلو جھلکتے ہیں۔ پاکستان کی سیاسی اور عسکری قیادت نے مل کر ملک کو دہشت گردی سے پاک کرنے کا جو فیصلہ کیا تھا اس پر بڑے جذبے اور حوصلے سے عملدرآمد جاری ہے اور اب ہماری بہادر مسلح افواج دہشت گردوں کے آخری ٹھکانوں کی طرف بڑھ رہے ہیں۔شوال سے بھی آگے پہنچ کر ان کے خاتمے کا اعلان کرنے والے ہیں۔شہروں کے اندر ضرب عضب کا دوسرا مرحلہ بھی شروع ہے۔ جنوبی پنجاب سے دہشت گردوں کے سرپرستوں اور کارندوں کو چن چن کر اٹھایا گیا ہے اور ان کے مالی معاونت کاروں کی تلاش جاری ہے۔ کراچی کے اندر دہشت گرد گروہوں تک پہنچنے والی رقوم کے تعاقب میں جاتے ہوئے سیاسی پارٹیوں کے ملوث انتہائی بااثر لوگوں کوبھی دھر لیا گیا ہے اور اس سلسلے میں بعض رکاوٹوں کے باوجود پیپلزپارٹی کے چیئرمین بلاول بھٹو نے مکمل اور غیر مشروط تعاون کا یقین دلایا ہے ۔ ایم کیو ایم بظاہر اس آپریشن کے خلاف ہے اور وہ احتجاج کی دھمکیاں بھی دے رہی ہے لیکن اسی جماعت کے سنجیدہ لوگ رینجرز سے تعاون کر رہے ہیں اور کراچی میں کسی قسم کی گڑبڑ کا اندیشہ نہیں رہا۔ کراچی کے شہریوں کو ایک حوصلہ ملا ہے اور ٹارگٹ کلنگ میں بڑی حد تک کمی آچکی ہے بلکہ ایک لحاظ سے ختم ہوچکی ہے ۔کراچی میں بجلی کی طویل لوڈشیڈنگ کے باوجود اب سڑکیں بلاک نہیں ہوتیں’بسوں کو نہیں جلایا جاتا اور کاروبار بند نہیں ہوتے۔ امن وامان مکمل طور پر بحال ہوچکا ہے۔ ایم۔ کیو ۔ ایم کے لوگ محب وطن ہونے کی قسمیں کھا رہے ہیں اور ”را” کو ملک دشمن ایجنسی قرار دے رہے ہیںِ۔
یہ تصویر کا دوسرا رخ ہے ۔ پاکستان قومی وقار کی بحالی کی جدوجہد میں دوراہے پر آکر کھڑا ہوگیا ہے۔اب یہ ملکی سیاسی جماعتوں پر انحصار ہے کہ وہ چاہیں تو فوج کے تعاون سے پاکستان کے چہرے پر لگے کرپشن کے داغ کو ہمیشہ کے لئے مٹا سکتے ہیں۔وہ نیب کی طرف سے اپنے اوپر لگائے گئے کرپشن کے الزامات کو عدالتوں کے ذریعے صاف کروائیں۔ یہ ان کی طرف سے انفرادی اور اجتماعی نیکی کے زمرے میں آئے گا۔ اگر سیاستدان تعاون کریں اور عہد کر لیں کہ انہوں نے ماضی کی کوتاہیوں پر توبہ کرنی ہے اور قومی وقار کو بحال کرنے کے لئے ہر قربانی دینی ہے تو پھر کوئی وجہ نہیں پاکستانی معاشرے سے کرپشن’ غبن’ لوٹ مار کا خاتمہ نہ ہوسکے۔ یہ اس ملک اور قوم کے ساتھ ہی نہیں اپنے ساتھ بھی بڑی نیکی ہے۔قرآن کا حکم ہے’
”نیکی اور پرہیزگاری کے کاموں میں ایک دوسرے سے تعاون کرو”

پاک بھارت دوستی کی اس قدر دھول اڑائی جارہی ہے کہ دوست دشمن کا چہرہ  پہچاننا مشکل ہوگیا ہے۔سرکاری ٹی وی پر بھی بھارتی اشتہارات دیکھنے کو مل رہے ہیں۔کترینہ کیف اور سیف ہمارے ٹی وی چینلز کے اندر خون بن کر دوڑ رہے ہیں۔ یوں محسوس ہوتا ہے کہ ہماری سوچ اور عقل کے سارے دھارے اب سرحد پار سے پھوٹتے ہیں اور ہم یہاں بیٹھے انہی لفظوںاورانہی استعاروں کی مالا جپتے اور ان کے اشاروں پر ناچتے ہیں۔ہمارا مقبول ترین سلوگن اب ”نچ لے” بن چکا ہے۔ملی غیرت اور قومی حمیت جیسے الفاظ لکھنے اور بولنے پر دْشنام طرازیوں کے پے در پے وار سہنے پڑ رہے ہیں۔”چھڈوجی پاگل جے” یہ ہے بھارت نواز دانشوروں کی وہ پھبتی جو ”امن کی آشا” اور ”مفادات کی فحاشہ” پر تنقید کرنے پر کسی جاتی ہے۔امن کس کو نہیں چاہیے؟پاکستانیوں کو امن کی جس قدر ضرورت ہے شائد دنیا کی کسی اور قوم کو ہو۔ جہاں ہرروز خون بہتا ہو’لاشے گرتے ہوں’ روحیں تڑپتی ہوں اور بے یقینی ایمان شکنی کی حدیں چھونے لگے وہاں امن کی خواہش کون نہیں کرے گا۔ہمسایوں کے ساتھ پْرامن رہنا ہمسایوں سے زیادہ ہماری ضرورت ہے۔لیکن کیا لفظ امن امن کی گردان کرنے سے امن قائم ہوجاتا ہے؟ آزمودہ قول ہے کہ ظلم اور امن ایک جگہ اکٹھے نہیں ہوسکتے۔ظلم رہے اور امن بھی ہو یہ ناممکنات میں سے ہے۔مظلوم وقتی طور پر ظلم کے سامنے دب سکتا ہے۔

لیکن وہ ظلم کو ہضم نہیں کرسکتا۔بھارتی وزیر خارجہ مسٹرکرشنا کی آمد کے موقع پر حکمران ٹولے کی باچھیں کھل رہی تھیں اور وہ آسان ویزا جیسی بے معنی لایعنی تجاویز پر جھوم جھوم کر ہلکان ہورہے تھے۔ ہمارے ٹی وی چینلز اور ان کے اینکرزپاک بھارت بہتر تعلقات کی اس لمحاتی صورتحال کو ترستی نگاہوں اور للچائے ہوئے لہجوں کے ساتھ قوم کے دل و دماغ میں اتارنے کی کوشش کر رہے تھے۔ ایک ٹی وی چینل”سروں کی جنگ” چھیڑ رہا ہے۔ اور پاکستان اور بھارت کے گویوں کے مقابلوں کو قومی سطح کی ہاراور جیت کا درجہ دے رہے ہیں۔ کہاں کشمیر کی آزادی کے لئے ہزار سال تک جنگ کرنے والے اور کہاں اب اداکاروں’فنکاروں’گلوکاروں اور غیرت فروش جتھوں کی پرفارمنس اور ادائوں کو قومی بقا کی جنگ قرار دینے والے بونے سیاستدان!!!کرشنا آئے ‘مینار پاکستان گئے’خوش ہوئے اور واپس چلے گئے۔ کیا فرق پڑے گا۔ کیا دہلی نے پاکستانی دریائوں پر ڈیم بنانے بند کردیئے ہیں؟ کیا سرکریک کی چوٹی مل گئی ہے اور کیا کشمیر سے فوجیں واپس چلی گئی ہیں کیا فرق پڑا ہے۔ تجارت ‘تجارت ایک اخبار نے لکھا ہے کہ بالآخر پاکستان نے بھارت کی یہ نصحیت قبول کر لی ہے کہ کشمیر چھوڑ کر تجارت کرو۔ماضی کو بھول کر مستقبل کے بارے میں بات کرو۔ اس سے بڑی ناکامی کیا ہوگی؟ لوگ کہتے ہیں کہ پاکستان نے کشمیر کے لئے تین جنگین لڑی ہیں اور آدھا ملک گنوایاہے۔ہم پوچھتے ہیں کہ اگر پاکستان نے یہ تین جنگیں نہ لڑی ہوتیں تو کیا ضمانت تھی کہ  یہ ملک آج صفحہ ہستی پر موجود بھی ہوتا؟ کیا بھارت یہ ضمانت فراہم کرتا کہ ”پاکستان کے معصوم لوگو! تم نے ہندوستان کو تقسیم کرکے بڑا کارنامہ سرانجام دیا ہے اور ہم ا س پر خوش ہو کر تمہارے وجود کے تحفظ کا عہد کرتے ہیں”۔ مجھے پورا یقین ہے کہ اگر بھارت تقسیم ہند کے فارمولے پر عملدرآمد کرتا تو آج ہم دونوں ملک پرامن ہمسایوں کی طرح رہ رہے ہوتے۔لیکن جب ایک جابر نے میری  شہ رگ پائوں سے دبا رکھی ہے تو میں کس طرح امن سے بیٹھا رہوں گا۔مجھے یہ سمجھانا کہ دیکھو امن سے پڑے رہو اور آہستہ آہستہ موت کی طرف لپکتے جائو۔ظلم کی انتہائی صورت ہے۔مولانا فضل الرحمن نے بالکل ٹھیک نشاندہی کی ہے کہ مسئلہ کشمیر ہی  تمام مسائل کی ماں ہے۔آپ مسئلہ کشمیر حل کردیں باقی کے تمام مسائل خود بخود حل ہوجائیں گے۔ ہمارے سارے دانشور بھارتی لابیوں کے دلائل کے اسیر ہوتے جارہے ہیں۔ وہ مولانا کے پرمغز بیان پر دھیان دیں اور ٹماٹرپیاز کی تجارت کے دھوکے میں نہ آئیں ۔ ضروری نہیں کہ ہم ابھی جنگ ہی کریں ‘ لیکن مسئلہ کو زندہ رہنے دیں ‘ظلم کو ظلم کہتے رہیں۔حالات اگر آج بھارت کے حق میں ہیں تو کل پاکستان کے حق میں بھی جاسکتے ہیں۔!

کہا جاتا ہے کہ اگر مواقع اور اہلیت باہم مل جائیں تو پھر کامیابی یقینی ہوجاتی ہے۔ ہم اپنے اردگرد اس فارمولے کو بنیاد بنا کر جائزہ لیں تو ہمیں احساس ہوگا کہ ہر سماج اور معاشرے میں ایسے افراد کی بے شمار تعداد ہے جن میں صلاحیت ہے لیکن موقع نہیں ملتا اور کئی ایسے افراد ہیں جن کے پاس مواقع تو موجود ہیں لیکن ان میں صلاحیت نہیں ہے جس کے باعث وہ معاشرے کے ناکام یا ناکارہ افراد کہلاتے ہیں۔ مواقع پیدا کرنا تاکہ اہل افراد ان مواقع سے فائدہ اٹھا کر کامیابیاں حاصل کریں اور معاشرہ مجموعی طور پر متحرک ہوسکے ایک اہم ترین سماجی ذمہ داری ہے۔ اسی طرح بے صلاحیت افراد کی ایسے خطوط پر تربیت کرنا کہ ان کے اندر چھپی ہوئی صلاحیتوں کو اجاگر کیا جاسکے۔یہ بھی برابر کی اہم سماجی ذمہ داری ہے۔

ہم یہ کہہ سکتے ہیں کہ صلاحیت اپنے لئے مواقع پیدا کرلیتی ہے اور مواقع اپنے لئے باصلاحیت لوگ تلاش کر لیتے ہیں۔تعلیم وتربیت اور علم و ہنر دراصل اسی مقصد کے لئے ہوتے ہیں تاکہ افرادی قوت کی تعمیر ہوسکے۔کسی بھی فلاحی ریاست کی ذمہ داری ہوتی ہے کہ وہ ایک طرف افراد کی تعمیروترقی کا نظام وضع کریں اور دوسری طرف صنعت و تجارت اور خدمات کا ایسا سسٹم تیار کریں کہ پیداواری سرگرمیاں عروج پاسکیں۔دنیا میںفلاحی ریاستیں ایسا ہی کرتی ہیں لیکن پاکستان جو کہ کسی لحاظ سے فلاحی’ جمہوری اور اسلامی ریاست نہیں بن سکا اس کے زیرسایہ پروان چڑھنے والے معاشرے اورافراد کی حالت زار بگڑتی چلی جاتی ہے۔ایسے معاشروں میں بیروزگاری تمام حدیں پھلانگ جاتی ہے۔ غرباء اور ضرورتمندوں کی فوج ظفر موج پیدا ہوتی ہے ۔پھر اپاہج’ بیوائیں’مساکین اور بیماروں کو سنبھالنے والا کوئی نہیں ہوتا۔ اور جب غربت حد سے بڑھ جائے تو غریبوں میںردّعمل سر اٹھانا شروع کردیتا ہے اور یہی ردّعمل خانہ جنگی ‘دہشتگردی اور بغاوت کی شکل اختیار کر لیتا ہے۔خریداروں کی تعداد گھٹتی جاتی ہے اور چھیننے اور مانگنے والوں کے جتھے تیار ہونا شروع ہوتے ہیں جن کے وجود کے سبب بنے بنائے معاشرے اجڑ جاتے ہیں اور اس ویرانی کا سب سے زیادہ نقصان سرمایہ کاری کرنے والے اداروں کو ہوتا ہے۔انہیں اپنے کارخانے بند ہوتے دکھائی دیتے ہیں۔یہی وہ خوف ہے جس کے تحت بڑے بڑے کاروباری اداروں اور کارپوریٹ مراکز کو اپنے اردگرد کے لوگوں کی صلاحیت بڑھانے اور ان کے لئے پیداواری مواقع پیدا کرنے کے لئے منصوبے بنائے اور اس اہتمام کو کارپوریٹ سوشل رسپانسبلٹی (سی ایس آر) کا نام دیا۔آج دنیا کی تمام ملٹی نیشنل کمپنیاں سماجی ذمہ داریاں نبھانے کے لئے بجٹ مخصوص کرتی ہیں بلکہ بعض بین الاقوامی انتظامی اداروں کی طرف سے اس بجٹ کی تخصیص لازمی قرار دے دی گئی ہے اور اسے قانون بنا دیا گیا ہے۔یوں ملٹی نیشنل کمپنیاں چاہتے نہ چاہتے ہوئے بھی اس مد میں کچھ نہ کچھ خرچ کرتی اور اپنے سالانہ اعدادوشمار میں اس کا بڑھ چڑھ کر ذکر بھی کرتی ہیں۔اسلام نے سماجی ذمہ داریوں کی ادائیگی کو مسلمان کا مقصد حیات قرار دیاہے۔اسلام کے معاشی نظام کا  بنیادی مقصد ہی معاشرے کے ناکام افراد کی کفالت کرنا اورعامة الناس کی صلاحیتوں کو اجاگر کرنے کمائی کے مواقع پیدا کرنے ذریعہ بنایا ہے۔صدقات’خیرات اور صدقہ جاریہ کے سارے تصورات ہی اس لئے دیئے گئے کہ معاشرے میں کوئی غریب نہ رہے اور بنیادی ضرورتیں ریاست کے ہر فرد کو ملیں۔اسوہ حسنہ سے ہمیں پتہ چلتا ہے کہ حضرت محمد صلی اللہ علیہ وآلہ وسلم لوگوں کو کارآمد شہری بنانے کے لئے کس طرح ترغیب دیتے تھے۔”ایک بار مسجد نبویۖمیں ایک شخص حاضر ہوا اور عرض کی کہ بھوکا ہوں اور روزگار بھی نہیں ہے۔آپ صلی اللہ علیہ وآلہ وسلم نے اس شخص سے کہا کہ کیا تیرے پاس کوئی اثاثہ ہے جس کے جواب میں اس شخص نے کہا کہ میرے پاس ایک لوہے کا پیالہ ہے جس سے میں پانی پیتا ہوں آپۖ نے فرمایا کہ پیالہ لے آئو۔ پھر آپ ۖنے اصحابہ اکرام سے فرمایا کہ کوئی ہے جو اس پیالے کو خریدلے۔ ایک صحابی نے کہا کہ میں ایک درہم میںخریدتا ہوں۔آپۖ نے فرمایا کہ پیالہ مہنگا ہے اس کے زیادہ دام کون لگائے گا۔پھر ایک اصحابی آگے بڑھے اور کہا کہ میں اس کے دو درہم دیتا ہوں۔آپۖ نے دو درہم اس بے روزگار شخص کو دیے اور فرمایاکہ ایک درہم کا کلہاڑا خریدو اور ایک درہم کی ایک رسی اور تھوڑی خوراک لے لو اور جنگل میںچلے جائواورلکڑیاں کاٹ کر شہر میں بیچو’وہ شخص پندرہ روز بعد آپۖ کی محفل میں حاضر ہوا اور مسکراتے ہوئے بولا”حضورۖ میںخوشحال ہورہا ہوں”۔اس مشہور واقعہ سے پتہ چلتا ہے کہ اصل کام یہ نہیں کہ آپ کسی بھوکے کو بار بار کھانا کھلاتے رہیں لیکن بلکہ سماجی خدمت یہ ہے کہ آپ اس بھوکے کو روٹی کمانے کا ڈھنگ سکھا دیں اور اس مقصد کے لئے اگر آپ کمیونٹی کو بھی ساتھ شامل کر لیں تو پھر تعمیر افراد سے آگے بڑھ کر تعمیر معاشرہ کا مرحلہ طے ہوسکتا ہے۔قرآن حکیم نے آغاز میں ہی ارشاد فرمایا کہ ”یہ وہ کتاب ہے جس میں کوئی شک نہیں اور ہدایت ہے ان متقی لوگوں کیلئے جو غیب پر ایمان لائے’جنہوں نے صلوٰة قائم کی اور اس رزق سے (انسانوں کی ترقی اور خوشحالی) کے لئے خرچ کرتے ہیں جو ہم نے ان کو دیا”۔اس کا واضح مطلب یہ ہے کہ متقی لوگ وہی ہیں جو تعمیر افراد اور تعمیر معاشرہ کی سماجی ذمہ داری پوری کرنے کے لئے اپنے مال سے خرچ کرتے ہیں۔”یدع الیتیم” کی ہدایت کا مفہوم بھی یہی ہے کہ ایسے نمازیوں کے لئے ہلاکت ہے جو یتیموں کو کھانا کھانے پر ابھارتے نہیںترغیب نہیں دیتے’یعنی ایسا انتظام نہیں کرتے کہ جس کے ذریعے یتیم(جن کی رہنمائی کرنے کے لئے باپ کا سایہ نہیں رہا) تعلیم وترتیب حاصل کرے اور معاشرے کا کارآمد فرد بن جائے۔ ایسی احادیث مبارکہ اور آیات قرآنی کا ایک ذخیرہ موجودہے جس سے سماجی ذمہ داریوں کا واضح انداز میںتعین بھی ہوتا ہے اور ان ذمہ داریوں کو احسن طریقے سے پورا کرنے کا سلیقہ بھی ملتا ہے۔یورپ نے غرباء کے خوف اور خریداروں کی قوت خرید ختم ہونے کے خوف سے یا یوں کہے کہ اپنی پراڈکٹ کے خریداروں کو زندہ رکھنے کے لئے سماجی ذمہ داریوں کا احساس کیا ہے۔بنیاد جو بھی ہو بیسویں صدی کے آغاز پر اس کا احساس جاگ جانا ایک خوش آئند پہلو ہے۔ورنہ سترہویں اور اٹھارویںصدی میں تو کاروباری لوگ انتہائی سفاک تھے۔ وہ اپنے کارکنوں کو بیگار کاٹنے پر مجبور کرتے تھے ‘غریبوں کو غلام بناتے تھے اور سماج کی ہر ضرورت کو پس پشت ڈال کر محض اپنی تجوریاں بھرتے جاتے تھے۔ انسانیت نے بہ حیثیت مجموعی اس ضرورت کو محسوس کر لیا ہے کہ نفع کمانے کے ساتھ ساتھ ان بستیوں میں غربت’ افلاس’جہالت اور بے ہنری کو بھی ختم کرنا چاہیے جہاں ان کے بڑے بڑے پلانٹ منافع بخش لگے ہیں اور مٹی کو سونا بنا کر بیچ رہے ہیں۔پاکستان میںیوں تو انفرادی طور پر کاروباری حضرات صدقہ و خیرات میں کسی سے پیچھے نہیں لیکن کاروباری ادارے کے طور پرسماجی ذمہ داریاں نبھانے کا رجحان جڑ نہیںپکڑ رہا ۔البتہ بعض اداروں نے پہل کی ہے حال ہی میں فوجی فرٹیلائزرنے سندھ کے سیلاب زدہ علاقوں میں  انجمن ہلال احمر پاکستان کے ساتھ ملکر اڑھائی سو گھر بنائے ہیں اور ان گھروںکی تعمیر کے تمام مراحل میں وہاں کے مقامی افراد کو مشاورت میں شامل کیا گیا۔ یہ ایک بہتر انداز ہے ۔ورنہ آسان کام یہ تھا کہ بے گھر لوگوں میں رقم بانٹ دی جاتی اور کم محنت اور کم وقت میں یہ سماجی ذمہ داری پوری ہونے کا اعلان ہوجاتا۔اصل مسئلہ یہ نہیں کہ ملٹی نیشنل کمپنیاں یا کاروباری ادارے محض منافع کے دو فیصد یا تین فیصد کے برابر رقم ضرورت مندوں میں بانٹ کر فارغ ہوجائیں اصل ذمہ داری کا تقاضا یہ ہے کہ کارپوریٹ سیکٹر اپنے سالانہ منصوبوں میں ”سی ایس آر” کے لئے بھی باقاعدہ اور طویل المدتی منصوبہ بندی کرے اور اس کے لئے الگ سے ٹیم ہائیر کرے اور اپنی کارکردگی رپورٹ میں سماجی منصوبوں کی کامیابی یا ناکامی کو بھی نمایاں طور پر سامنے لائے۔پی ایس او جیسی کمپنیاں اب اس طرف خصوصی توجہ دے رہی ہیں’ تعلیم’ صحت ماحولیات اور ہنرمندی کے حوالے سے اب کچھ کام شروع ہوا ہے۔دوا ساز کمپنیوں نے بھی سماجی بہتری کے منصوبے شروع کردیئے ہیں اور صوبہ سندھ اور بلوچستان کے دور دراز اور پسماندہ ترین علاقوں میں تعلیم وتربیت کے مراکز اور روزگار کے مواقع مہیا کئے جارہے ہیں ۔جو سیکٹر سماجی ذمہ داریوں کو نبھانے میں سب سے پیچھے ہے وہ سروسز کا سیکٹر ہے۔پاکستان میں بینکس’انشورنس سیکٹر منافع میں جارہا ہے لیکن ان کے مالکان ابھی ”سی ایس آر” کی طرف راغب نہیں ہورہے۔البتہ ”یوآئی جی ”گروپ نے آغاز کردیا ہے’یونائیٹڈ انٹرنیشنل گروپ کے چیئرمین نے ذاتی دلچسپی لے کر راولپنڈی میں تعلیم اور صحت کے منصوبے شروع کردیئے بعض بینکوں نے ماحولیات کی بہتری کے لئے اقدام اٹھائے ہیں۔ ‘ بعض میڈیا گروپس بھی اس قدر دولت کمارہے ہیں کہ وہ اور کچھ نہیں تو سماجی خدمات سرانجام دینے والے اداروں کو اپنی سکرین پر ٹائم دے سکتے ہیں لیکن بدقسمتی سے ایسا ہو نہیں پا رہا۔پاکستان میں اس وقت کم و بیش اڑھائی سو ملٹی نیشنل کام کر رہی ہیں ۔حکومت کو چاہیے کہ وہ کارپوریٹ اداروں کو سی ایس آربجٹ کے حوالے سے پابند بنائے اور سی بی آر کو چاہیے کہ وہ اپنا ٹیکس لیتے وقت اس وقت تک این او سی جاری نہ کرے جب تک کہ سی ایس آر کے تحت چلنے والے منصوبوں کی مکمل چھان بین نہ کرلے۔محض ٹیکس چھوٹ کے لئے بھرے گئے جعلی گوشواروں سے سماج کے ضرورت مند لوگوں کی حق تلفی ہوتی ہے۔یہ خیال کیا جاتاہے کہ اگر پاکستان میں موجود ملٹی نیشنل کمپنیاں اور مقامی کاروباری ادارے صرف پانچ برس تک سی ایس آر بجٹ کو پوری دلجمعی کے ساتھ سماجی بہتری کے منصوبوں پر خرچ کریں تو پاکستان میں نہ صرف غربت کی شرح آدھی رہ جائے گی بلکہ معاشرتی مزاج میں ناقابل یقین مثبت تبدیلی بھی رونما ہوگی۔ملٹی نیشنل کمپنیوں کا معاملہ الگ ہے لیکن بطور مسلمان پاکستان کے بڑے بڑے کاروباری گروپ اس کارخیر میں منظم انداز میں حصہ لیں۔انفرادی صدقہ و خیرات سے سماجی ذمہ داری کا وسیع مقصد حاصل نہیں ہوسکے گا۔غربت ‘بے روزگاری اور معاشرتی بے چینی ختم نہ ہوسکے گی۔اللہ اور اس کے رسول صلی اللہ علیہ وآلہ وسلم نے غربت کے خاتمے اور افراد کی تعمیروتربیت کے لئے مال خرچ کرنے پر جس قدر زور دیا ہے اس کا اندازہ درج ذیل آیت مقدسہ کے ترجمہ سے واضح ہوتا ہے۔”جو کوئی جزا کے دن (مال کی محبت میں گرفتار رہنے کے جرم میں) مجرم بن کر آگیا وہ چاہے گا کہ اس دن کے عذاب سے بچنے کے لئے اپنے بیٹوں کو’اپنی بیوی کو’اپنے بھائی کو اور اپنے خاندان کو جو اسے پناہ دیتا رہا اور روئے زمین کے ہر شخص کو فدیے میں دے دے’پھر اپنے آپ کو اس سے چھڑا لئے(جواب ملے گا) ہرگز نہیں وہ آگ کی لپیٹ ہے چمڑی ادھیڑتی۔ ہر اس شخص کو پکارتی ہوئی جس نے پیٹھ پھیری اور منہ موڑا اور مال جمع کیا اور  سینت سینت کر رکھا”۔قرآن مجید میں اس حوالے سے ایک دوسری جگہ ارشاد ہے ”کیا ہم نے اس کو دو آنکھیں نہیں دیں ( کہ حقائق کو دیکھتا)اور زبان اور دو ہونٹ نہیں دیئے(کہ  بھلائی کی ترغیب دیتا)اور دونوں راستے نہیں سمجھائے(کہ اچھے اور برے کو سمجھتا)؟ مگر وہ گھاٹی پر نہیں چڑھا اور تم کیا سمجھے کہ وہ گھاٹی کیا ہے (یہی کہ) گردن چھڑائی جائے۔ یا بھوک کے دن کسی قرابت مندو یتیم یا کسی خاک آلود مسکین کو کھانا کھلا یا جائے۔پھر آدمی ان میں سے ہو جو ایمان لائے اورجنہوں نے  اس پر ثابت قدمی کی اور دوسروں سے ہمدردی کی نصیحت کی”۔میں تمام دولت مندوں اور منافع بخش اداروں اور ان کے مالکان سے التماس کرتا ہوں کہ وہ غریبوں کی بجائے غربت سے نفرت کریں اور غربت سے نفرت کا بہترین طریقہ یہ ہے کہ غریب کی تعلیم و تربیت اور روزگار کے لئے منظم و مربوط انداز میں تحریک چلائی جائے۔ ملک بھر میں ایسے رفاعی منصوبے شروع کئے جائیں جن کے ذریعے غرباء کی عزت نفس بھی بحال رہے’وہ کسی شخص کے آگے ہاتھ پھیلانے کی ہزیمت سے بچ جائیں اور سماج کے کارآمد افراد بن کر ملک کی اجتماعی ترقی میں حصہ ڈال سکیں تاکہ ہمارا سماج بھی روشن سماج ہو یہاں کا غریب بھی مہذب اور تہذیب یافتہ نظر آئے کیونکہ’ نورسرمایہ سے ہے روئے تمدن کی جلاہم جہاںرہتے ہیں وہاں تہذیب نہیں پل سکتی مفلسی حس لطافت کو مٹا دیتی ہےبھوک آداب کے سانچوں میں نہیںڈھل سکتی

JANG LAHORE

ایسا کبھی ہوا نہیں کہ دنیا سے شر مکمل طورپر ختم ہوگیا ہو۔انسان کے اندر شر کی قوتیں خیر کی طاقتوں سے ہمیشہ نبردآزما رہتی ہیں ۔آپ اسے حضرت انسان کی فطرت کہہ سکتے ہیں ۔ان شرانگیز طاقتوں کو آپ نیگیٹیو فورسز کا عنوان دے سکتے ہیں ۔قرآن انہیں شیطانی طاقتوں کا نام دیتا ہے ۔ہر منفی سوچ ،ہر تخریبی تصور ہر انسان دشمن منصوبہ ،ہرابلیسی حربہ چاہے اس کا محل وقوع انسان کی اپنی ذات ہو ،اس کا ماحول ہو،ملک ہویاسرزمین ہو

،شیطان ہی کی کارستانی قرار پائے گی۔ہوس ،لالچ،ظلم ،استبداد ،بدعنوانی ، بدامنی،بد عہدی ،دھوکہ دہی ،نوسر بازی ،بزدلی ،منافقت،ہیجان انگیزی ،خیانت، جھوٹ ، فراڈ ،بے ادبی ،فریب کاری ،بعض وعناد،انا پرستی ،چوری ،ڈاکہ زنی ،قتل وغارت اور وحشت وبربریت یہ تمام وہ بیماریاں ہیں جنہیں شیطان نے ایجاد کیا ہے اور وہ کمال ہوشیاری کیساتھ انسانی دل ودماغ میں ان کی پیوندکاری کرتا ہے اور انسان کو شرکے راستے پر ڈال دیتا ہے ۔تشکک اور بے یقینی ،مایوسی اور غفلت جیسے ہتھیاروں سے مسلح ہوکر شیطان جب حملہ آور ہوتا ہے تو بڑے بڑے پختہ عزم انسان ریت کا ڈھیر ہوجاتے ہیں ۔شیطان کا تصور ہر مذہب اور عقیدے کے پیروکاروں میں اپنے اپنے ناموں اور حوالوں سے موجود ہے ۔قرآن نے اس تصور کو بڑے بلیغ پیرائے میں بیان فرمایا ہے ۔

”شیطان نے کہا میں بھی اب تیری سیدھی راہ پر (چلنے والے )انسانوں کی گھات میں لگارہوں گا۔آگے اور پیچھے دائیں اور بائیں ہر طرف سے انہیں گھیروں گا اور توان میں سے اکثر کو شکر گزار نہ پائے گا۔“(سورة اعراف)

حدیث نبوی ہے :۔

”شیطانی وسوسے تمہارے وجود میں خون کی طرح گردش کرتے ہیں “

فطرت نے انسان کو شیطان کے مقابلے میں تنہاءنہیں چھوڑا ۔یہ ہرگز نہیں کہ انسان شیطان کے مقابلے میں بے بس پیدا کیا گیا ہے ۔خالق نے انسان کو پیدا کرتے وقت پانچ چھ فٹ قد کے اس جسم کے اندر ہی وہ آلہ لگادیا ہے جو انسان کو قدم قدم پر آگاہ کرتا ہے کہ تم اب شیطانی قوت کے زیر اثر آرہے ہو۔جس طرح گاڑی اوورسپیڈ ہونے پر سرخ رنگ کی بتی اور آلارم بجنا شروع ہوجاتے ہیں اسی طرح انسان کے اندر ضمیر نام کا ایک آلارم بجنا شروع ہوجاتا ہے ۔غافل سے غافل انسان بھی یہ نہیں کہہ سکتا کہ اسے اچھائی اور برائی میں تمیز نہیں ہے ۔وہ جنگل میں رہتا ہو ۔یا بازاروں کے شورشرابے میں زندگی بسر کرتا ہو،حرف شناس ہویا ان پڑھ ۔رنگ ،نسل ،زبان اور عقیدے کی تفریق کے بغیر جوروح بھی لباس فطرت میں ڈھلی ہے اسے ضمیر کا آلہ لگاکر بھیجا گیا ہے ۔

ارشاد ہوتا ہے ۔

اور گواہ ہے وہ نفس انسانی (ضمیر) اور اسکی ذات جسے ہم نے ہموار کیا۔پھر اس کی بدی اور پرہیز گاری اس پر الہام کردی۔یقینا فلاح پاگیا جس نے نفس کا تزکیہ کیا اور نامراد ہوا وہ جس نے اسے دبادیا۔(سورة شمس)

قرآن نے احسن تقویم کا ٹائٹل ہی انسان کو اسی لئے عطا کیا ہے کہ وہ واحد جاندار ہے جو اچھائی اور برائی میں تمیز کرسکتا ہے ۔ جس طرح شیطان منفی ہتھکنڈوں سے مسلح ہے اسی طرح انسان اپنے ضمیر کی زبردست طاقت سے مز ّین ہے ۔یہی وجہ ہے کہ ابتدائے آفرینش سے لیکر آج تک شر اور خیر باہم نبردآزما رہتے ہیں ۔ایسا کبھی ،کسی دور میں نہیں ہوا کہ شر غالب آجائے اور خیر کی قوت مفتوح ہوجائے ۔ایسا ہوتا تو انسانیت کا قافلہ بیچ راہ کے فنا ہوچکا ہوتا ۔آج ساڑھے چھ ارب انسانوں کا وجود اس بات کا ثبوت ہے کہ خیر کی طاقتیں مفقودنہیں بلکہ موجود ہیں ۔

بقول اقبالؒ:۔

ستیزہ کار رہا ہے ازل سے تا امروز

چراغ مُصطفوی سے شرارِ بوالہبی

سوئے ہوئے ضمیر کو الہامی کتب ہی جگاسکتی ہیں

آپ اپنے گھر سے سکیورٹی آلارم کو ہٹا دیجئے یا اس کی تاریں کھینچ دیں تو پھر واردات کرنے والوں کو کوئی خطرہ نہیں رہتا ۔نہ آلارم بجے گا نہ آپ جاگیں گے ۔نہ اپنے مال واسباب کا تحفظ کرسکیں گے ۔نفسیاتی ماہرین کا کہنا ہے کہ انسان کو اگر مسلسل ایک ماہ تک کسی واقعہ پر ضمیر نہ جھنجھوڑے تو سمجھئے کہ انسان کا ضمیر سورہا ہے ۔یعنی الارم کا کنکشن کٹ گیا ہے ۔حقیقت یہ ہے کہ ضمیر کبھی نہیں سوتا ۔دراصل انسان اپنے کان بند کرلیتا ہے ۔طیش اور عیش انسانی دل ودماغ کی دوایسی حالتیں ہیں جن میں مبتلا ہوکر انسان اپنے جاگے ہوئے ضمیر کو بار بار سلانے کی پریکٹس کرتا ہے ۔شیطان کی جیت کا یہ عجب منظر ہوتا ہے ۔یہ وہ حالت ہوتی ہے کہ انسان خود اپنے آپ کو ماررہا ہوتا ہے ۔وہ اس قدر شقی القلب ہوجاتا ہے کہ اپنی زندگی کے سب سے بڑے محافظ یعنی ضمیر کو اپنے ہاتھوں سے بے بس کردیتا ہے ۔ایسی حالت سے نکلنے کیلئے ہی عقیدے اور ایمان کی ضرورت پڑتی ہے ۔خالق کائنات نے مردہ ضمیر انسانوں کو جگانے اور واپس فطرت کی طرف لوٹانے کیلئے اپنے پسندیدہ انسانوں یعنی پیغمبروں کے ذریعے زندگی کی گائیڈ بکس اتاری ہیں ۔!

ارشادرباّنی ہے :۔

”اے نبی ﷺ ہم نے تم کو شہادت دینے والا ،بشارت دینے والا اور خبردار کردینے والا بناکر بھیجا ہے تاکہ اے لوگو تم اللہ اور اس کے رسول پر ایمان لاﺅ،اس کے رسول کا ساتھ دو اس کی تعظیم وتوقیر کرو اور صبح شام اللہ کی تسبیح کرو۔“(سورة فتح)

مذہب ،دین اور ایمان یہ کوئی ایسی غیر ضروری یا نمائشی اشیاءنہیں ہیں جنہیں انسانی زندگی کو محض زیبا بنانے کیلئے اتارا گیا ہو ۔زندگی کی گاڑی کو کامیابی کی پٹڑی سے نہ اترنے دینا اور متعین وقت میں منزل تک پہنچا دینے کیلئے ضمیر کافی ہے لیکن چونکہ انسان اس آلارم کو جان بوجھ کر سلادیتا ہے اس لئے اسے واپس پٹڑی پر لانے کیلئے الہامی ہدایات کی ضرورت ہوتی ہے ۔جس طرح کار بنانے والے کو علم ہے کہ کار کا مینوئل کیا ہوگا ۔اسی طرح انسان کے خالق کو علم ہے کہ انسان کی کامیابی کیلئے کون کون سی حدود وقیود اور کس طرح کی احتیاطی تدابیر کی ضرورت ہوگی ۔خالق کائنات نے بڑی محنت ،انتہائی محبت اور بے پناہ چاہت کیساتھ وحی کے ذریعے ہر امت ہر گروہ کیلئے ہدایات نازل فرمادی ہیں ۔

ارشاد رباّنی ہے ۔

”یہ بڑی بابرکت کتاب ہے جو تمہاری طرف نازل کی گئی ہے تاکہ یہ لوگ اس کی آیات پر غور کریں اور عقل وفکر رکھنے والے اس سے سبق حاصل کریں۔“(سورة ص)

انسانیت کا اہم مسئلہ

انسانیت کے سارے مسائل کی جڑ الہامی تعلیمات سے دوری ہے ۔الہامی تعلیمات سے گریز نے ہی آج کے انسان کو شیطانی قوتوں کے آگے بے بس بناکر رکھ دیا ہے ۔ سائنس اور سائنسی طرز فکر کا سب سے بڑا نقصان یہ ہے کہ اس نے انسانی ذہنوں کو شک میں مبتلا کردیا ہے ۔جب تک کسی معاملے میں انسان خود تجربات کرکے کسی نتیجے تک نہ پہنے وہ معاملے کی صداقت اور حقانیت کو تسلیم کرنے پر آمادہ ہی نہیں ہوتا ۔انسانی ذہنوں نے وحی اور الہام کو بھی سائنس کی کسوٹی پر پرکھنے کی کوشش کی ہے انسانی ذہن محسوسات تک محدود بنایا گیا ہے ۔اس لئے وہ اللہ ،رسولﷺ اور کتاب اللہ ،جیسے الہامی حقائق کو مشکوک نگاہوں سے دیکھتا ہے ۔جب کہ الہامی ہدایات کا تقاضا یہی ہے کہ ان کی حقانیت میںرتی برابر شک نہ کیا جائے ۔خواہشات اور تعصبات میں پڑے بغیر اس کے ذریعے تعقل ،تفکر اور تذکر کیا جائے ۔اس برترکلام ہی نہیں اپنی زندگیوں میں حکم کا درجہ دیا جائے ۔اس سے ہدایت پاکر اس پر عمل کرنے کا ارادہ اور اس کے تقاضے جب سمجھ میں آجائیں تو چند لمحات ضائع کیے بغیر اس کے سامنے سرنگوں کردیا جائے۔

گو کہ اب مابعد طبیعات کے علم پر بھی بہت کام ہورہا ہے اور امید رکھنی چاہیے کہ انسانیت اپنی اجتماعی فطرتی بصیرت کے ذریعے اپنے خالق حقیقی کو جلد پہچان لے گی اور الہامی کتابوں اور ان کے ذریعے پہنچنے والی کائناتی سچائیوں پر بحیثیت مجموعی ایمان لے آئے گی لیکن قافلہ انسانی ہنوز شبہات کے اندھیروں میں غلطاں وپیچاںہے ۔بظاہر انسان نے ستاروں پر کمندیں ڈال لی ہیں ،سورچ کی روشنی کو گرفتار کرلیا ہے ،کائنات کے ظواہر کو ایک ”مٹھی “میں سمو دیا ہے ،کمپیوٹر سے آگے نینو ٹیکنالوجی کی طرف بڑھ رہا ہے ۔لیکن اس سب علم ودانش ،تحقیق اور تخلیق کے باوجود لائف مینوئل (الہامی ہدایات)کی سچائی پر ڈگمگاتا ایمان اسے تسخیر کائنات کیلئے یکسوئی مہیا نہیں کررہا ہے ۔اور احسن تقوم کا جو اعزاز فاطر ارض وسما نے عطاءفرمایا ہے انسان ابھی اس اعزاز سے پوری طرح لطف اندوز نہیں ہوپارہا ۔قافلہ انسانیت کا سب سے بڑا مسئلہ یہ ہے کہ شک وشہبات نے اجتماعی ضمیر مردہ کردیا ہے اور الہامی تعلیمات سے دوری کی وجہ سے اس کے ضمیر کو جگانے والے تمام ذرائع بے اثر ہورہے ہیں ۔آج کی ہر ترقی ایک نئی الجھن کی نشاندہی کرتی ہے ۔ہر ایجاد کسی نئی تباہی کا پیش خیمہ بن رہی ہے ۔!محبان انسانیت کو آگے بڑھ کر رہنمائی کرنی چاہیے اور الہامی قوائد وضوابط کی تشہیر کرکے تیز رفتار گاڑی کو نیکی اور راست روی کی پٹڑی سے سرکنے نہیں دینا چاہیے ۔ورنہ طیش اور عیش ،یاسیت اور جہالت کی شیطانی قوتیں اس خوبصورت زمین کو جہنم بنادیں گی۔!

(بقول علامہ اقبال)

ڈھونڈنے والا ستاروں کی گزرگاہوں کا

اپنے افکار کی دنیا میں سفر کرنہ سکا

جس نے سورج کی شعاعوں کو گرفتار کیا

زندگی کی شب تاریک سحر کرنہ سکا

پاکستان میں خیر کی قوتیں مغلوب کیوں؟

کسی بھی معاشرے اور تہذیب میں جب تک خیر کی قوتیں غالب رہتی ہیں معاشرے تباہ نہیں ہوتے ۔بداطمینانی نہیں پھیلتی اور انتشار گلی کوچوں میں ننگا نہیں ناچتا ۔ملک ،سلطنت اقتدار اور اختیار یہ وہ انعامات ہیں جو فطرت خوش ہوکر کسی قوم ،گروہ یا فرد کیلئے ممکن بنادیتی ہے ۔لیکن جہاں یہ انعامات ہیں وہیں آزمائش بھی ہوتی ہے ۔پاکستان ،ایک نیا ملک ،ایک انعام تھا لیکن ہم نے اپنے زندہ ضمیروں کو ہوس اور لالچ کے ہتھوڑے مارمارکر ادھموا کردیا اور آج یہی انعام ہمارے لئے بہت بڑی آزمائش بن چکا ہے ۔جب گھر کے باسیوں کو اپنے گھر کے درودیوار سے خوف آنے لگے تو اس سے بڑی آزمائش کیا ہوگی ۔دانشور اور غم خوار حلقے ہمیں کسی بڑے قومی حادثے سے بچانے کیلئے نت نئے فارمولے اور حل پیش کرتے ہیں ۔کوئی گڈ گورنس کی بات کرتا ہے ۔کسی کو صدارتی طرز حکومت میں مسائل حل ہوتے دکھائی دیتے ہیں ،کئی مغربی جمہوریت ہی کو کامل حل ثابت کرتے ہیں ۔کسی کا خیال ہے کہ سخت ترین قانون ہمیں شیطانی بیماریوں سے نجات دلاسکتا ہے ۔کسی کو تمام مسائل کی جڑ فوجی اقتدار دکھائی دے رہا ہے ۔کوئی اسلامی انقلاب کا جھنڈا لہرانے میں نجات کی امید لگائے بیٹھا ہے ۔غرض جتنے ذہن ہیں اتنے ہی فارمولے گردش کررہے ہیں ۔پاکستان اس وقت عملی طورپر تیسری دنیا کا چوتھے نمبر کا ملک ہے جس میں ہر تخریبی قوت ،ہر منفی جذبہ اور ہر شیطانی حربہ پوری طاقت اور قوت کیساتھ پھل پھول رہا ہے ۔شرکے مقابلے میں خیر دبکا بیٹھا ،منتظر فردا ہے ۔!

وہ کونسا جذبہ ہے جو ہمیں جھوٹ بولنے سے روکے گا ۔جو ہمیں ذخیرہ اندوزی سے بازرکھ سکتا ہے ۔ہم کیوں ہوس پرستی چھوڑیں ۔کس کی خاطر بدعنوانی دھوکہ دہی ،بُغض وعناد سے باز رہیں ؟منافقت ترک کریں ؟ایک دوسرے کو روند ڈالنے کی روش ترک کرنے سے کیا حاصل ہوگا ؟۔ضمیر کو جگاڈالنے کا فائدہ کیا ہے ؟نت نئی فریب کاریاں کس کی خاطر چھوڑ دی جائیں ؟۔یہی وہ سوالات ہیں جو ہمیں بحیثیت قوم تذبذب میں مبتلا رکھتے ہیں اور ہم اپنی اس جنت نظیر سرزمین کو شیطانی جذبوں کے سبب جہنم زار بنارہے ہیں ۔کوئی قانون ۔کوئی ضابطہ ،کوئی اتھارٹی ،کوئی خوف اور کوئی شوق ہمیں اس وقت تک راہ راست پر نہیں لاسکتا جب تک ہم بحیثیت قوم اللہ تعالیٰ کی طرف سے زندگی کے آغاز اور انجام کے بارے میں ارشاد فرمائے گئے احکامات پر کامل یقین پیدا نہیں کرتے ۔

ارشاد ہوتا ہے ۔

”اہل کتاب اورمشرکین میں سے جن لوگوں نے کفر کیا وہ یقینا جہنم کی آگ میں جائیں گے اور ہمیشہ وہاں رہیں گے ۔یہ لوگ بدترین خلائق ہیں ۔اور یقینا جو لوگ ایمان لائے اور نیک عمل کیے وہ بہترین خلائق ہیں ۔ان کی جزاءان کے رب کے ہاں دائمی قیام کی جنتیں ہیں جہاں وہ ہمیشہ ہمیش رہیں گے ۔اللہ ان سے راضی اور وہ اپنے رب سے راضی ہوئے ۔یہ سب اس کیلئے ہے جس نے اپنے رب کا خوف کیا ہو۔(البینہ )

جب مجھے یقین ہوگا کہ مجھے دنیا میں کئے گئے ہر عمل کا روز محشر حساب دینا ہے تو میں کسی سماجی قانون ،کسی داروغے کے نہ ہوتے ہوئے بھی خیر پر کار بند رہوں گا ۔جب مجھے یقین ہوگا کہ شیطانی قوتوں کے تابع کئے گئے افعال مجھے دہکتی آگ میں جلائیں گے تو مجھے میرے اندر کا انسان برائیوں سے روکے گا ۔جب مجھے یقین ہوگا کہ رزق حلال کمانے سے مجھے جنت ملے گی جس میں میرے وہم وگمان سے بھی کہیں زیادہ نعمتیں مختص ہوں گی تو پھر میں چند اضافی ٹکوں کے عوض کسی کا حق نہیں ماروں گا ۔زندگی بعد از موت ،جنت کا شوق اور دوزخ کا خوف ،اللہ کی دوستی میں پختہ یقین اور اعمال نامے کی خوبصورتی ،یہی وہ ایمان ہے یہی قرآنی تعلیمات ہیں جو ہر مذہب ،ہر عقیدے میں تھوڑی بہت تبدیلیوں کے ساتھ ایک جیسے ہیں ۔اگر آج کا پاکستانی اپنے اپنے عقیدے کے مطابق الہامی تعلیمات پر کاربند ہوجائے تو شر کے ہاتھوں مغلوب یہی سولہ کروڑ انسان خیر کی بہت بڑی قوت بن جائیں گے ۔جب تک اکائی سیدھی نہیں ہوتی ،اجتماعیت ٹیڑھی ہی رہے گی ۔اصلاح احوال کا واحد حل صالحیت میں ہے اور انسانی دل ودماغ زیادہ دیر تک صالح اعمال سے دور نہیں رہ سکتے ۔اس لئے میرا ایمان ہے کہ پاکستان کے تمام مسائل کا حل اب بھی ممکن ہے ۔شرط یہ ہے کہ ہرپاکستانی قرآن کی فطرتی تعلیمات سے جڑ جائے ۔اگر کوئی عیسائی ہے تو وہ حضرت عیسیؑ کی آفاتی ہدایات پر عمل کرکے کسی مذہب اور عقیدے نے جھوٹ کو نیکی قرار نہیں دیا ،ظلم کو جواز نہیں بخشا ،خیانت کو صلاحیت نہیں کہا ۔انسان دشمنی کو بہادری قرار نہیں دیا ۔کرپشن کو عزت کا موجب نہیں ٹھہرایا ۔

ہمیں اپنے حیوانی ،عقلی، روحانی اوراخلاقی وجود کا تذکیہ قرآن مجید کی تعلیمات کے ذریعے کرنا ہوگا ۔یہی کردار سازی کا بہترین ذریعہ ہے ۔کیونکہ کردار سازی اس وقت تک ہو ہی نہیں سکتی جب تک انسان کے اندر ایمان کا بیج نہ ہو۔ ضمیر اور الہامی تعلیمات کی خوراک دے کر ایمان کا پودا ہرا بھرا کیا جاسکتا ہے ۔یہی انسانی عروج کی اساس ہے۔

مکالے کے آخر میں پاکستانی بہن بھائیوں کو قرآن یعنی انسانی ہدایت کے مرکز سے جڑے رہنے کی ترغیب دلارہا ہوں ۔بقول شاعر:۔

اپنے مرکز سے اگر دور نکل جاﺅ گے

خواب ہو جاﺅ گے افسانوں میں ڈھل جاﺅ گے

اپنی مٹی پہ ہی چلنے کا سلیقہ سیکھو

سنگ مر مر پہ چلو گے تو پھسل جاﺅ گے

دے رہے ہیں جو لوگ تمہیں رفاقت کا فریب

ان کی تاریخ پڑھوگے تو دہل جاﺅ گے

علم نہیں کہ اب کی بار پیپلزپارٹی کو مظلوم بننے کا موقع ملتا ہے یا نہیں لیکن خلق خدا کی زبان پر ایک ہی جملہ ہے”زرداری کب جارہا ہے“۔نااہلیوں اور بدنیتوں سے بوجھل ملکی فضاءمیں پروان چڑھنے والے عوامی غیض و غضب نے انڈے بچے دینے شروع کردیئے ہیں۔اگر ”سٹیٹس کو“ کا مخالف کوئی حقیقی عوامی لیڈر ہوتا تو وہ بیروزگاروں کی فوج کی کمان سنبھال لیتا ۔کراچی سے پشاور تک ہر چوک چوراہے پر اس کا پرہجوم استقبال ہوتا۔لیکن بظاہر وہ تمام لیڈرجو انقلاب کا نعرہ لگاتے ہیں

حقیقت میں وہ بھی اس گلے سڑے نظام کے محافظ ہیں اور کوئی ایسا انقلاب برپا نہیں ہونے دینا چاہتے جس سے اس ملک کا غریب امیر ہوجائے اور امیر تر ہوتا اشرافیہ فٹ پاتھوں پر آجائے۔انقلاب کا نعرہ لگانا آسان اور اس کو برداشت کرنا بہت مشکل ہوتا ہے۔میرے جاننے والے حکمران جماعت کے ایک ایم این اے نے کہا کہ ڈاکٹر صاحب خدا کا شکر ہے کہ یہ ڈنڈا بردار مظاہرین ہمارے گھروں میں نہیں گھس رہے ورنہ ایسی تباہی آئے گی کہ فوج بھی ہمیں ان بھوکوں سے نہیں بچا سکے گی۔میں نے پوچھاجناب کی سیاسی بصیرت اب کیا کہتی ہے‘کہنے لگے کہ سچ یہ ہے کہ ہمیں اب انتخابات کا بگل بجا دینا چاہیے ورنہ عوام ہمارا باجا بجا دیں گے۔وزیراعظم گیلانی کا کمال یہ ہے کہ وہ ”جمہوری دکانداری“ بند نہیں ہونے دینا چاہتے۔انہیں ہر طرف اچھا ہی اچھا دکھائی دے رہا ہے۔انہوںنے عوامی غصے کو بھی جمہوری مخالف قوتوں کی کارستانی قرار دے کر آنکھیں موند لی ہیں۔پنجاب کی پارٹی کو انہوں نے ایک بہت بڑی ریلی کرنے کا ٹارگٹ دیا ہے۔جناب گیلانی نے پنجاب کے عہدیداروں کو ممنوعہ بور کے اسلحہ لائسنس دینے کا لالچ دیا ہے اور ایم۔این ۔اے کے ترقیاتی فنڈز سے بھی حصہ دینے کا وعدہ کر لیا ہے۔ ان انعامات اور نوازشات کے عوض پارٹی کو ہدایت کی گئی ہے کہ وہ عمران خان اور نوازشریف کے اثرات کو زائل کرنے کے لئے لاہور میں ایک بہت بڑا شو کریں۔جناب آصف علی زرداری مرد بحران ہونے کے باوجود بحرانوں پر قابو نہیں پاسکے اور اپنے اردگرد ان لوگوں کو جمع کر لیا ہے جن کی وجہ شہرت صرف اور صرف کرپشن رہی ہے۔پیپلزپارٹی کے دامن میں جیالے تو بہت ہیں لیکن اہل اور ایماندار لوگوں کی شائد نسل ختم ہوگئی ہے۔بعض اوقات یوں محسوس ہوتا ہے کہ گیلانی حکومت کسی کو عہدہ بخشنے سے پہلے اچھی طرح چھان بین کر لیتی ہے کہ عہدے پر براجمان کئے جانے والے شخص پر کم از کم ایمانداری کا کوئی الزام نہ آتا ہو۔ اس احتیاط کا نتیجہ نکلنا شروع ہوگیا ہے۔بجلی‘ گیس اور پٹرول کے بحران سے نجات کی کوئی صورت دکھائی نہیں دیتی۔وقتی طور پر جھک جانے سے شائد حکومت کو سکھ کے کچھ سانس میسر آجائیں لیکن مستقل حل کوئی نہیں۔کوئی ایک وزیر‘کوئی مشیر‘خود وزیراعظم بھی اس پوزیشن میں نہیں کہ لوگوں کا اعتمادبحال کرسکیں۔توانائی کی ترسیل اور طریقہ تقسیم کے جائزہ سے اندازہ لگایا جاسکتا ہے کہ وقفے وقفے سے عوام سڑکوں پر آتے رہیں گے اور اگر تھک ہا رکر لوگ بیٹھ بھی گئے تو بھی ہر زبان سے بددعائیں ہی نکلیں گی‘ہمدردی کے دوبول۔خواب ہی رہیں گے ۔چاہے آئندہ الیکشن میں بلال بھٹو اور آصفہ بھٹو ماتمی لباس پہن کر اپنی شہید ماںاور نانا کے نام پر ووٹ کیلئے منتیں ہی کیوں نہ کریں‘غیرجانبدار حلقے اس خیال کے حامی ہیںکہ عوام کی اکثریت اب اس عفریت زدہ ماحول کو پھر سے قابض نہیں ہونے دے گی۔البتہ پروپیگنڈا اپنی طاقت رکھتا ہے اور ہونی انہونی ہوسکتی ہے!جناب زرداری کہاں کہاں سے بچیں گے۔ایک بار گھبرا کر دبئی چلے گئے تھے۔اب کی بار گئے تو شائد واپس نہ آسکیں اورنہ گئے تو شائد برسوں جانہ سکیں۔میمو کیس کسی نہ کسی کے گلے میں حمائل ہونے والا ہے اور حکومت اپنی ہی فوج کے خلاف کوئی واردات کرنے کے منصوبے بنا رہی ہے تاکہ مظلوم بن سکے۔”مظلومیت“ کا سیاسی ڈرامہ لکھا جارہا ہے۔کردار ترتیب دیئے جارہے ہیں۔ عاصمہ جہانگیر اس مشن پر کمر بستہ ہو چکی ہیں۔لیکن کیا کیا جائے کہ اب کی بار عدالت انصاف کا ترازو پوری قوت سے تھامے ہوئے ہے ‘نہ مارشل لاءلگے گا نہ میمو ٹلے گا۔ سوئس بینک کے حکام کو خط لکھا تو بھی کرپشن ثابت ہوجائے گی نہ لکھا تو بھی چوری ثابت ہوجائے گی۔گھیرا تنگ ہورہا ہے اور فرار کی راہیںمسدود!

میں عمران خان کا حامی تھا اب نہیں رہا۔عمران نے انقلاب کا نعرہ لگایا۔”چور چوروں کا احتساب نہیں کرسکتے“”روایتی سیاست اور گھسے پٹے سیاستدان اس ملک کی تقدیر کیا بدلیں گے“۔”تحریک انصاف بالکل نئی ٹیم لے کر آئے گی“۔” اس نظام کو جڑ سے اکھاڑ پھینکے گے“ یہ سیاسی عہد و پیماں تھے جن کے سحر میں میرے جیسے بہت سے محب وطن اسیر ہوئے‘ عمران خان کی صورت میں ہمیں ایک مسیحا نظر آنے لگا۔ میں اور میرے ساتھیوں نے عمران کی ذات سے جڑی بہت سی منفی حقیقتوں‘کہانیوں اور تبصروں کو توجہ نہیں دی اور نئے پاکستان کی تعمیر کیلئے تبدیلی کے اس نشان کو دل ودماغ میں سجا لیا۔مجھے ذاتی طور پر پہلا دھچکا اس وقت لگا جب عمران خان نے پیپلزپارٹی کی قیادت سے روٹھ کر آنے والے شاہ محمود قریشی کو نہ صرف یہ کہ پارٹی میں شامل کیا بلکہ انہیں وائس چیئرمین بھی بنا ڈالا۔شاہ محمود قریشی جاگیردار ہیں یا نہیں لیکن حقیقت یہ ہے کہ وہ ایک گدی نشین ہیں

اور ہر سال اپنے ہزاروں مریدین کا ذہنی اور مذہبی استحصال کرتے ہیں۔ غریب غرباءسے ہر سال کروڑوں روپے وصول کرتے ہیں۔ان کی سیاسی اہمیت کی بنیاد بھی موروثیت ہے صرف اس کی شکل پیری مریدی ہے۔ ان کے ووٹروں کا ان سے ایک استحصالی رشتہ ہے۔عمران خان تو علامہ اقبالؒ کے فلسفے کو لیکر چلنے کا دعویٰ کر رہے تھے پھر کیا ہوا کہ عقیدت مندوں سے نیازیں اکٹھی کرنے والے اس قریشی پیر کو اپنی انقلابی جماعت کا وائس چیئرمین مقرر کر لیا۔ اگر شاہ محمود قریشی اور زرداری کے ٹولے کے درمیان ریمنڈ ڈیوس کے ایشو پر اختلاف نہ ہوتا اور اگر جناب گیلانی کی جگہ جناب قریشی کو وزیراعظم کی باری دے دی جاتی تو آج بھی اس شاہ کے منہ سے اپنے بادشاہ کے لئے پھول جھڑ رہے ہوتے اور یہی شاہ محمود قریشی ‘عمران خان اور تحریک انصاف کے کیخلاف شعلے اگل رہے ہوتے۔ذاتی مفادات کے سبب اپنی سابق پارٹی سے روٹھ جانے والے سیاستدان کو عمران خان نے کلین چٹ دے کر اپنے ساتھ شامل کر لیا ۔جعلی ڈگری والوں اور نیب زدگان کی پوری ٹیم اکٹھی کر لی۔ہاشمی سمیت یہ ساری وہ ٹیم ہے جو خود انتہا کی متکبر ہے‘عام آدمی کے ساتھ ہاتھ ملا کر دس بار دھوتے ہیں۔عمران نے اپنے نظریے کے باعث اپنے ساتھ ملنے والوں سے پہلی ناانصافی کی اور یوں یہ سلسلہ ایسا چلا کہ رکنے کا اب نام ہی نہیں لیتا۔سیاستدانوں کا ”دکھی گروپ“ اپنے لئے سکھ ڈھونڈنے تحریک انصاف میں شریک ہوچکا ہے۔عمران خان اس ”فیاضی“ کا جو ا ب دینے کی بجائے ”فرشتے تو ملیں گے نہیں“ کہہ کر نظریاتی کارکنوںکو ٹھنڈا کرنے کی کوشش کر رہے ہیں۔اگر آپ کے پاس ”فرشتے“ نہیں تو پھر باقی پارٹیوں کو ”شیطان“ ہونے کے طعنے کیوں دیتے رہے۔عمران خان نے دوسرا بڑا دھچکا ایم کیو ایم کی طرف دوستی کا ہاتھ بڑھا کر دیا۔ہم جب متحدہ قومی موومنٹ کے حق میں لکھ رہے تھے تو عمران کے حامی حلقے ہمیں ایسا کرنے سے روکتے تھے۔عمران خان جناب الطاف حسین کیخلاف لندن میں ثبوت لئے پھرتے رہے۔انہیں ماہ مئی والا خون خرابہ نہیں بھولتا تھا۔ لیکن اچانک ایسا کیا انقلاب آیا کہ ایم۔کیو ۔ایم ایک حقیقت لگنے لگی اور اب وہ نائن زیرو جانے کیلئے بیتاب نظر آتے ہیں۔آخر یہ دوغلا پن اور دھوکہ دہی کس کے حکم پر ہے۔اگر ایم کیو ایم حقیقت ہے جو کہ ہے‘تو پھر (ن) لیگ‘ پی پی پی اور دیگر سیاسی و مذہبی جماعتیں بھی حقیقتیں ہیں۔ تحریک انصاف نے اگر مفاہمت اور مصالحت کی سیاست کر نی ہے تو اس ملک کے معصوم نوجوان کب تک ”خان جی“کا جھریوں بھرا چہرہ دیکھتے رہیں گے ۔اورساٹھ سالہ ہیرو کو لوگ کیوں پوجیں گے؟جنون گروپ کب تک نئی نسل کو مجنوں بنائے رکھے گا؟لوگوں کو سب کچھ یاد آرہا ہے۔عمران خان کے اپنے بچے اپنے ننھیال میں پل رہے ہیں۔ ان کے رگ و پے میں یہودی رزق سرایت کر رہا ہے۔ عمران خان کو اسلامی ریاست کا ماڈل بھی انگلینڈ ہی دکھائی دیتا ہے۔ ان کو اچانک امریکی مظالم بھی بھول گئے ہیں۔ان کی حریت فکر کا دائرہ دھیرے دھیرے سمٹتا جارہا ہے۔وہ امریکیوں سے زیادہ اب ان کی مدد کرنے اور انہیں باعزت واپسی کا راستہ دینے کے فارمولے کو پروموٹ کرتے دکھائی دیتے ہیں۔ عمران خان نے لاہور میں جلسہ کرنے سے قبل واشنگٹن میں کن کن امو رپر امریکی عہدیداروں کو اعتماد میں لیا کسی کو خبر نہیں۔شاہ محمود قریشی کو بھی امریکہ بلایا گیا تھا۔ پھر معاملات طے پا گئے۔عمران کی تلخ زبان امریکہ کے حق میں شیریں ہوگئی۔عمران یعنی ہمارا خان بھی”حقیقت پسند“ ہوگیا۔یہ جان کر تیسرا بڑا دھچکا لگا کہ تحریک انصاف کی پروجیکشن اور لابنگ کیلئے پاکستان کے سب سے بڑے امریکہ نواز میڈیا گروپ کے ساتھ باقاعدہ ڈیل طے پا گئی ہے۔عمران خان کن ہاتھوں میں پھنستے جارہے ہیں؟ ان کو کس نے یرغمال بنانا شروع کردیا ہے؟ افسوس کہ عمران نے اپنے لاکھوں چاہنے والوں کے اعتماد اور پیار کیساتھ روایتی کھلواڑ شروع کردیا ہے۔تحریک انصاف معاشرے کو انصاف دینے کی بجائے ناانصافیوں کی آماجگاہ بن گئیہے۔

کہا جاتا ہے کہ دور جاہلیت میں عورت اللہ تعالیٰ کی مظلوم مخلوق تھی۔معاشرے میں اسے سخت حقارت کی نظر سے دیکھا جاتا تھا۔طرح طرح کے توہمات اس کی ذات کے ساتھ وابستہ کئے جاتے تھے۔گھروں میں باندیوں سے بدترسلوک اس کا مقدر تھاسوسائٹی میں رائے مشورے اور تنقید واحتساب کا حق اسے قطعاً نہ تھا۔ بیویوں کی تعداد پر کوئی پابندی عائد نہ تھی۔وراثت میں بھی اس کا کوئی حصہ نہ تھا۔زندگی کے کسی شعبے میں بھی اس کی شہادت قابل قبول نہ تھی۔حد تو یہ ہے کہ پیدا ہوتے ہی عورت کو زندہ قبر میں گاڑھ دیا جاتا تھا۔

آج کا دور دور جاہلیت نہیں بلکہ دور تہذیب وترقی کہلاتا ہے۔یہ اندھیروں کا نہیں روشنیوں کا زمانہ ہے۔ حقوق کی پامالی نہیں بلکہ حقوق کی تحصیل و بحالی آج کا موضوع بحث ہے‘غلامی کا دور ختم ہوا‘اب آزادی کا زمانہ ہے۔عورت اب ملکی انتخابات میں حصہ لے سکتی ہے‘ووٹ دے سکتی ہے‘اعلیٰ سے اعلیٰ تعلیم حاصل کرسکتی ہے‘چھوٹے سے چھوٹے دفتر سے لے کر بڑے سے بڑے کارخانوں اور فیکٹریوں تک کے دروازے اس کے لئے کھلے ہیں۔شہادت ‘رائے مشورہ‘تنقید‘احتساب اور وراثت کے تمام حقوق اسے آج آئینی طور پر حاصل ہیں۔کھیل کود کے میدان میں بھی اسے اپنے جوہر دکھانے کی آزادی حاصل ہے۔ یہاں تک کہ بعض ملکوں کی سربراہی بھی اسے عملاً حاصل ہے‘ لیکن افسوس مجموعی طور پر عورت جتنی مظلوم کل تھی اتنی ہی آج بھی ہے۔ اس کے لئے دور جاہلیت ابھی مکمل طور پر ختم نہیں ہوا۔آج کی آزادی کئی غلامیوں کو اپنے جلو میں لے آئی ہے۔اس وقت بھی اس کے حقوق بحال کم اور ماپال زیادہ کئے جارہے ہیں۔آخرت سے بے خوف والدین کل بھی اپنی بیٹیوں کو جائیداد میں شرعی حصے سے محروم رکھتے تھے اور آج بھی محروم رکھتے ہیں۔پہلے کی طرح آج کل بھی اس کی پیدائش پر ناخوشی کا اظہار کیا جاتا ہے اور سب سے بڑا ظلم اس دور میں جو پر روا رکھا جاتا ہے وہ ہے اس کی تجارت کے فروغ کے لئے بے دریغ استعمال۔میری نظر میں یہ ظلم ایک ایسا ظلم ہے کہ جس نے موجودہ زمانے کی نام نہاد آزادیوں‘مراعات‘حقوق ہمدردیوں کو قطعاً بے معنی بنا کر رکھ دیا ہے۔جب میں کسی دکان پر شوگرل یا شاپ گرل کو جوتے یا کپڑے بیچتے ہوئے دیکھتا ہوں تو اس کی مظلومی پر آبدیدہ ہوجاتا ہوں۔یہ عورت کے جسمانی حسن اور اس کی نسوانی کشش کا کھلا استحصال ہے۔یہ عہدہ اسے اس اخلاقی بنیاد پر نہیں ملتا کہ وہ بیروزگار ہے یا معاشی طور پر بے یارومددگار ہے یا یہی سہی کہ تعلیم اس عہدہ سے متعلق ہے بلکہ محض اس تجارتی بناءپر ملتا ہے کہ اس کی موجودگی گاہکوں کی کشش کا باعث بنے گی اور اس طرح مالکان کی دکان چمکے گی۔عورت کا وہ مقدس جسم کہ جو سوائے شوہر کے کسی دوسرے شخص کے سامنے بے لباس نہیں کیاجاسکتا اور جس کو چھونے کی یہاں تک حرمت ہے کہ عورت اپنے جسم کو چھونے والے یا چھونے کی کوشش کرنے والے مرد کو قانوناً ہلاک کرسکتی ہے۔آج اسے بلاتامل فلمی سکرین پر نیم برہنہ کیا جارہا ہے اور محض چند سکوں کا لالچ دے کر اس سے وہ تمام کردار کروائے جارہے ہیں جو عورت عام حالات میں کبھی برداشت نہیں کرسکتی ناقص کہانی‘بے کیف مکالموں‘گھسی پٹی موسیقی اور بے روح منظر نامے جیسے عیوب پر عورت کے جسم کا پردہ ڈالاجارہا ہے‘ فلم میں جو کچھ عورت آج کرتی ہے وہ اس کی زندگی کا سب سے بڑا المیہ اور اس کی حیات کی سب سے بڑی غلامی ہے۔آج نئی تہذیب کے جدید تقاضوں نے عورت کی نیم برہنہ تصویر کو ہر بوتل‘ڈبے‘پیکٹ‘اخبار ‘رسالہ اور کتاب کے اوراق پر ناگزیر بنا دیا ہے۔یہ عورت کی نسائیت اور اس کی عظمت کے تقدس کی ہر طرح کھلی پامالی ہے‘صنعت کار خواہ سائیکل‘سکوٹر اور کار سے متعلق ہو یا اس کا تعلق ادویات‘جفت سازی اور پان بیڑی سگریٹ فروخت کرنے والے ادارے سے ہو وہ اپنی صنعت اور تجارت کے لئے عورت کے نیم برہنہ جسم کو استعمال کرنا اپنے لئے فرض تصور کرتا ہے۔اگر پنسل ‘دوات‘کاپی وغیرہ عمدہ کوالٹی کی ہے تو اس پرکسی عمدہ نوجوان حسین وجمیل خاتون کی تصویر طبع ہونا ضروری ہے۔یہ سب کچھ عورت کی تذلیل اور اس کی سخت توہین ہے۔عورت کے معاشرتی کردار میں تقدس اور پاکیزگی کو ملحوظ رکھا جائے۔ اس کا جسم تجارتی مقاصد کی خاطر تخلیق نہیں کیا گیاہے۔قدرت نے عورت میں شرم و حیا کے احساسات مٹنے اور مٹانے کے لئے نہیں پیدا فرمائے بلکہ قدرت نے ان کی تخلیق کے ذریعہ عورت کی عفت مابی کا سامان فراہم کیا ہے جو روزی کا لالچ دے کر عورت کو اس کی فطری شرم وحیا سے محروم کرتا ہے یا اس کی شان سے گرے ہوئے امور کی انجام دہی کے لئے بروئے کار لاتا ہے ‘وہ عورت کا سب سے بڑا دشمن ہے ‘ اسے جلد یا بدیرمٹنا ہی چاہئے اورا س کی جگہ ایک صالح اور عورت دوست معاشرے قائم ہونا چاہیے۔عورت ماں ‘بہن‘بیٹی ‘ بہو اور بیوی کی حیثیت سے جس احترام کا حق رکھتی ہے ”میل ڈامیننٹ“معاشرے کو وہ حق اسے دینا ہوگا ورنہ ہماری اگلی نسل ہمیں معاف نہیں کرے گی۔

بوڑھے پنشنر نے پنشن نہ ملنے کیخلاف احتجاجاً جان دے دی تو حکمرانوں کو پنشن دینے کاخیال آیا۔ وہ مفلوک الحال جو گلے میں پھندے اور منہ میں خشک روٹیاں لٹکائے ماتم کر رہے تھے اور ان کی کہیں شنوائی نہ تھی انہیں بینکوں کے باہر کرسیوں پر بٹھا کر پنشن کی رقم فراہم کردی گئی۔احتجاج کرنے والوں کو سبق ملا کہ اس نظام حکومت میں موت سے ہمکنار ہو کر ہی کوئی آواز ایوان اقتدار تک پہنچائی جاسکتی ہے۔سندھ کے 32سالہ نوجوان راجا خان رند نے پارلیمنٹ ہاﺅس کے سامنے خودسوزی کی۔تنگدستی کیخلاف اس کا احتجاج خودسوزی پر ختم ہوا۔

لاش اٹھی توحکمرانوں کو خیال آیا کہ سیاسی مخالفین اس جنازے کو استعمال کریں گے لہٰذا اسی وقت حکومتی حکمت عملی حرکت میں آئی۔ سید خورشید شاہ نے سوختہ شخص کے بھائی اور باپ کو ایئر ٹکٹ فراہم کئے۔تجہیز وتکفین کا خرچہ دیا اور بیوہ اور بچوں کی داد رسی کا اعلان کر ڈالا۔ سندھ کے ہر نوجوان کو یہ پیغام ملا کہ اپنے بچوں کو دو وقت کی روٹی دینے کے لئے پارلیمنٹ ہاﺅس کے سامنے خودسوزی ہی موثر راستہ ہے۔یہ کیسا سیاسی اور عوامی کلچر ہے کہ انتہائی جائز مطالبہ منوانے کے لئے بھی مینار پاکستان سے چھلانگ لگانی پڑتی ہے‘واپڈا کے دفاتر توڑنے پڑتے ہیں‘ایجوکیشنل بورڈ کا ریکارڈ جلانا پڑتا ہے۔ اپنی جان لینی پڑتی ہے۔ گھیراﺅ اور جلاﺅ اب اس سماج کا عمومی رویہ بن گیا ہے۔ احتجاج احتجاج۔ احتجاجی طریقہ کار اس قدر معروف اور مقبول ہوا ہے کہ ہر شخص ‘ہر کمیونٹی ‘ ہر ادارہ سال کے بارہ ماہ احتجاجی صورتحال سے دوچار رہتا ہے۔ آج کا پاکستانی چاہے اس کا تعلق کسی مسلک‘صوبے‘زبان ‘پیشہ اور کاروبار سے ہو وہ ہر وقت اور ہرلمحہ احتجاج پر تیار ہے بلکہ مجبور ہے۔حکمران طبقہ بھی جان بوجھ کر سویا رہتا ہے اور معاملات کو اس وقت تک ٹالتا رہتا ہے جب تک بات چیت تہذیب اور دلیل کے دائرے سے نکل کر احتجاج اور انتقام تک نہیں پہنچ جاتی۔اگرکوئی ٹی وی چینل دکھا سکے تو دیکھا جاسکتا ہے کہ پاکستان میں کوئی ایک روز شائد عید کا روز بھی ایسا نہ ہو جس دن پاکستان کے کسی نہ کسی حصے میں احتجاج نہ ہورہا ہو۔لوگوں کو سڑکوں پر لانا شائد اب سب سے آسان کام رہ گیا ہے۔حکمران طبقہ کے کرتوتوں میں ایک کرتوت یہ بھی ہے کہ وہ ایک دوسرے کو نیچا دکھانے کے لئے عوام کو سڑکوں پر آنے کی دعوت دیتے ہیں اور چونکہ عوام کے پاس کرنے کو کچھ ہے ہی نہیں‘وہ بھی وقت گزاری اور تماش بینی کے لئے ان کے جلسے جلوسوں کو رونق بخشتے ہیں۔ جلسوں کا سب سے بڑا فائدہ یہ ہے کہ بے روزگاروں کی عزت اور توقیر بڑھ جاتی ہے۔مختلف لیڈر اور پارٹیاں بے روزگاروں تک پہنچتی ہیں اور انہیں اپنا ”کارکن“ بننے پر آمادہ کرتی ہیں۔ کسی بے روزگار سے پوچھ لیں وہ کسی نہ کسی سیاسی جتھے کا کارکن ضرور ہوگا۔آپ کہہ سکتے ہیں کہ احتجاجی سیاست نے اس ملک کے کروڑوں بے روزگاروں اور بھوکوں کو جز وقتی مصروفیت ضرور دے دی ہے۔ نفری پوری کرنے کے لئے سروں کی ضرورت ہوتی ہے اور پاکستان میں انسانوں کی کمی نہیں۔ ماشاءاللہ ہر روز ہزاروں نہیں لاکھوں پیدا ہوتے ہیں۔خدا خیرے کرے!تحریک انصاف نے گوجرانوالہ میں بے روزگار نوجوانوں کا جم غفیر اکٹھا کیا تو ہر طرف خوف و ہراس پھیل گیا۔ ن لیگ کو اپنے گڑھ میں گڑبڑ دکھائی دی اور اب (ن) لیگ ”گو زرداری گو“ کی تحریک شروع کرچکی ہے جو کہ بہرحال احتجاجی ہے۔میاں نوازشریف نے ٹرکوں پر امدادی سامان سجایا اور سندھ کے ڈبکیاں کھاتے ہاری ان کے استقبال کو ٹوٹ پڑے۔ پیپلزپارٹی کو فکر لاحق ہوئی۔ موت اور زندگی اللہ کے ہاتھ میں لیکن ”مادرجمہوریت“ کی موت نے جناب زرداری اور ان کی پارٹی کو بہرحال سکھ کے چند دن عطا کردیئے۔کسی نے سچ کہا کہ”ماواں ٹھنڈیاں چھاواں“۔(ق) لیگ والوں نے عدالت سے بری ہونے والے اپنے نوجوان رہنما کا اتنا بڑا استقبال کیا کہ جلسہ پنجاب حکومت کیخلاف احتجاج کا بہت بڑا مظاہرہ ہوگیا۔احتجاج‘جلسہ‘ جلوس‘ریلی‘ دھرنا اور مارچ کے لئے پاکستان کی زمین انتہائی زرخیز ہے۔چلچلاتی دھوپ ہو یا جاڑے کی ٹھنڈ۔ کوئی موسمی رکاوٹ احتجاج کا راستہ روک نہیں سکتی۔ دلوں میں نفرت‘اکتاہٹ اور انتقام کی سلگتی آگ پر حکمرانوں کی کرپشن‘نااہلی اور بدعنوانی تیل انڈیلتی رہتی ہے۔آج کل تو موسم ویسے ہی مہربان ہے۔ خوبصورت دھوپ میں جسم گرمانے کو خواہ مخواہ جی چاہ رہا ہوتا ہے۔اب بھی اگر میاں برادران لاکھوں لوگوں کو سڑکوں پر نہ لا سکیں تواس کا مطلب ہوگا کہ عوام کوئی نیا تماشا دیکھناچاہتے ہیں ویسے جناب زرداری نے تو ہر وہ اقدام اٹھا دیا جس نے لوگوں کو اس نظام سے متنفر کردیا ہے۔

ہمیںپی پی حکومت کا مشکور ہونا چاہیے کہ بانی پاکستان محمد علی جناح کی سالگرہ سرکاری طور پر منانے کا اہتمام ہوا ہے۔گزرے برسوں میں ہم نے اتنے قائد بنا لئے ہیں کہ اپنے اصل قائد کو بھول ہی گئے ہیں۔ بلکہ آمریتوں کے ادوار میں جان بوجھ کر قائداعظمؒ کی سالگرہ اور برسیوں پر خاموشی اختیار کی گئی۔ پرویز مشرف کے دور میں آمریت کاسہّ لیس اورشاہ سے زیادہ شاہ کے وفاداروںنے پاکستان کے کرنسی نوٹوں سے بانی پاکستان کی تصویر ہٹا کر جنرل پرویز کی تصویر لگانے کا پورا منصوبہ بنالیا تھا۔ نمونے کے طور پر ایسے نوٹ تیار بھی ہوگئے تھے۔میں نہیں سمجھتا کہ سابق وزیراعظم جناب میر ظفر اللہ خان جمالی نے کسی غلط بیانی سے کام لیا ہو۔

اگرجمالی صاحب کے پاس تصویر کی تبدیلی کی تجویز لانے والوں کو سخت ردعمل کاسامنا نہ کرنا پڑتا تو یہ ظلم بھی ہوچکا ہوتا۔جو شخص راتوں رات ایک امریکی عہدیدار کے فون پر پورے ملک کو امریکی عذاب سے دوچار کرسکتا ہے اور جس نے ”جدید روشن خیالی“کو”مذہب بنا کر ہماری نسلوں کے ذہنوں کو پراگندہ کرنے کی کوشش کی وہ تاریخ میں اپنا نام بنانے کے سفلی جذبے سے مدہوش ہو کرکرنسی نوٹوں پر اپنی تصویر لگانے کاحکم صادر کردیتا۔اس دور میں قائداعظم  کی ذات اور ان کے افکار کو متنازعہ بنانے کا ٹھیکہ لنڈا بازار کے دانشوروں کو دے دیا گیا تھا۔ ایسی ایسی بولیاں سنائی گئیں کہ کان پھٹنے کو آگئے تھے۔ یوں محسوس ہوتا تھا کہ مسلمانان ہند نے یہ ملک مسلمانوں کے لئے نہیں بلکہ چند امریکی غلاموں کی ناجائز خواہشوں کی بارآوری کیلئے بنایا تھا۔
”پاکستان کا مطلب کیا لاالٰہ اللہ“ والے نعرے کا تمسخر اڑایا گیا۔ اسلام کا حوالہ مٹانے کی ہر کوشش کی گئی ایک گروپ نے امریکیوں کے اشارے پر ”اسلامی جمہوریہ پاکستان“ میں سے اسلام کا لفظ حذف کرنے کی رٹ لگانا شروع کردی۔ ان حالات کو دیکھتے ہوئے ہمارے دوست کالم نگار بیگ راج نے کہیں لکھ دیا تھا ”اگر آج قائداعظم زندہ ہوتے….” تو بگرام ایئربیس پر امریکیوں کی قید میں ہوتے“
قائداعظم  کی تقاریر کے حوالے سے بیسیوں تقاریر کو ایک طرف رکھ کر کسی ایک تصویر کو اس کے سیاق و سباق سے کاٹ کر پیش کیا جاتا ہے اور ثابت کیا جاتا ہے کہ قائداعظم  اس ملک کو ایک سیکولر یا بے دین ریاست بنانا چاہتے تھے۔راقم نے راولپنڈی میں قائم ایک معتبر تھنک ٹینک“ تھنکرز فورم“ میں ایسے ہی پھیلائے گئے تاثر کے خلاف دستاویزی ثبوتوں کا حوالہ دیکر عرض کی تھی کہ مانا کہ یہ پاکستان اسلام کیلئے نہیںمسلمانوں کے لئے بنایا گیا تھا۔ اگر یہ حقیقت سب تسلیم کرتے ہیں تو کوئی مسلمان بتائے کہ اس کا مذہب اور دین کیا ہے؟ ظاہر ہے اسلام ہے۔ پھر یہ ہٹ دھرمی کیسی؟ اسلام اور مسلمان لازم و ملزوم ہیں۔ اسلام کے بغیر مسلمان نہیں اور جو مسلمان ہے وہ اسلام کے بغیر مسلمان رہ نہیںسکتا۔
فکرو نظر کی ان بحثوں سے بچنے کا ایک راستہ یہ ہے کہ ہم یقین کر لیں کہ قائداعظم  اس مملکت خداداد کو اسلام کے فلاحی نظام سے مزین کرنا چاہتے تھے ان کی منزل اسلامی فلاحی ریاست کا قیام تھا۔ اصل سوال یہ ہے کہ کیا ہم نے بحیثیت قوم‘بحیثیت مسلمان اور بحیثیت انسان اپنے اس وطن کو حقیقی فلاحی ریاست بنانے کے لئے کوئی تگ و دو کی ہے۔”اسلامی“ تو بڑی دور کی منزل ہے ‘ اس کی پہلی سیڑھی تو ایک فلاحی ریاست ہے جو قرآن و سنت کے لازوال اصولوں پر قائم ہو۔ کیا ہمسائے کے حقوق سے لیکر دولت کی منصفانہ تقسیم اور اختیارات کے عوامی حق تک کوئی پیش رفت ہوئی ہے۔
ہمیں آج پھر ایک بار سوچنا ہے کہ ہماری منزل کیا ہے اور منزل کا تعین بانی پاکستان نے ایک بار نہیں باربار‘ہر تقریر اور ہر میٹنگ میں کیا تھا۔ ہمیںان سارے افکار کو منظر پر لانا ہے جن کو سن کر سمجھ کر ہمارے دل و دماغ اس وطن کو اسلامی فلاحی مملکت بنانے پر آمادہ ہوتے ہیں۔ ہمیں اسلام کا معاشی نظام ترتیب دینا ہے۔رسول پاک صلی اللہ علیہ وآلہ وسلم والا مدینہ نہ سہی کم از کم اس ماڈل کو نگاہوں میں رکھ کر آگے بڑھنا ہے۔ ہماری اس منزل کے حصول میں جہاں سے روشنی ملے لینی ہے‘ جو مددگار ثابت ہو اس سے فکری مدد لینی ہے۔قائداعظم  کو رول ماڈل کے طور پر عوام کے سامنے پیش کرنا ہے۔یہ ثابت کرنے کی بجائے کہ ہماری حکومت جو کام کر رہی ہے وہی قائداعظم  چاہتے تھے۔قائداعظم  کے ویژن کو بالا وبرتر رکھنا ہے۔نہ ملاں کا فساد اس ملک کو آگے لے جاسکتا ہے نہ ہی مغرب زدہ افکار اسے سنوار سکتے ہیں ۔امت رسول ہاشمی کو قرآن و سنت کی روشنی میں ہی آگے بڑھایا جاسکتا ہے۔

قیامت خیز بارشوں نے ریلے کی شکل اختیار کی‘توقع نہ تھی کہ سیلابی ریلے آپس میں مل کر ”طوفان نوح“ بپا کریں گے۔ جانیں تو بچ گئیں لیکن چھت بہہ گئے۔چولہے برتن‘ کپڑے‘ بپھری لہروں نے اچٹ لئے۔گندم ‘اناج‘مرچ‘ مصالحہ سب کچھ ہی تو بہہ گیا۔بہت شور اٹھا۔بین الاقوامی امدادی ٹیمیں پہنچیں۔پاکستان کی ہر سیاسی اور سماجی تنظیم نے امداد کے لئے کیمپس لگائے۔ خوراک تقسیم کی گئی۔ٹینٹس فراہم کئے گئے۔ نقد رقوم بانٹی گئیں لیکن سارے امدادی کام ابھی ادھورے ہی تھے کہ موسم سرما آگیا۔
چار ماہ کوئی مدت نہیں ہوتی‘دعوے یہی تھے موسم سرما سے پہلے پہلے تمام سیلاب زدگان کو گرم کپڑے مل جائیں گے۔سردی سے بچانے کےلئے کمبل دستیاب ہوں گے۔برف باری اور بارشوں سے بچاﺅ کے لئے پکے گھر ہوں گے۔ لیکن ایسا نہیں ہوسکا۔ سیلاب زدگان کو بھوک سے ہی نجات نہیں دلائی جاسکی۔ کجا کہ انہیں پختہ گھروں کی ”عیاشی“ میسر آسکتی۔سردی سے مرنے سے پہلے شائد یہ لوگ بھوک سے مر جائیں۔
اقوام متحدہ کے ادارہ برائے خوراک نے تین ماہ پہلے خبردار کر دیا تھا کہ صوبہ خیبرپختونخواہ ‘پنجاب ‘سندھ اور بلوچستان میںمجموعی طور پر گیارہ ہیکٹر کے رقبہ پر کھڑی فصلیں تباہ ہوچکی ہیں‘بیس لاکھ کے لگ بھگ جانور مر گئے ہیں اور تیس لاکھ کی تعداد میں مرغیاں ضائع ہوگئی ہیں۔فصلوں کی تباہی اور سیلاب زدہ علاقوں میں دوبارہ کاشت نہ ہونے کے سبب قحط سالی کا منظر ہوگا۔اگر بروقت خوراک کا بندوبست نہ ہوا تو خوراک کی شدید قلت سے ہزاروںبچے اور بوڑھے موت کے منہ میں چلے جائیں گے‘جو مرنے سے بچ گئے وہ بھی ہڈیوں کے ڈھانچے بن جائیںگے۔اکتوبر میں پھر وارننگ دی گئی کہ جن ممالک نے امداد کا وعدہ کیا تھا وہ اپنے وعدوں کو ایفا کریں کیونکہ خوراک خریدنے کے لئے اس عالمی ادارے ورلڈ فوڈ پروگرام کے پاس رقم نہیں اور وقت تیزی سے گزر رہا ہے۔اکتوبر میں ہی سندھ حکومت کو سندھی علاقوں سے بے گھر ہو کر شہروں کا رخ کرنے والے لاکھوں پناہ گزینوں کی حالت زار اور خوراک کی روز بروز بڑھتی قلت کے حوالے سے مفصل بریفنگ دی گئی تھی۔ابھی پھر تازہ رپورٹ آئی ہے کہ کم از کم بیس لاکھ افراد ایسے ہیں جنہیں خوراک کی کمی کا شدید خطرہ ہے اور اگر اب بھی امدادی اداروں نے بروقت توجہ نہ دی تو نتائج توقع سے بھی بھیانک نکلیں گے۔
حیرت انگریز خبر یہ ہے کہ صوبہ پنجاب کے گوداموں میں پڑی گندم گل سڑ رہی ہے۔ گندم برآمد کرنے کی اجازت مانگی جارہی ہے۔ خراب ہونے والی ہزاروں بوریاں روزانہ گوداموں سے باہر پھینکوائی جارہی ہیں۔ اس گندم پر ہر روز لاکھوں روپے بینکوںکا سود بھی ادا کیا جارہا ہے۔ کیا سبب ہے کہ صوبائی یا مرکزی حکومت اقوام متحدہ کی اپیل پر کان نہیں دھرتی ۔باوجود یہ کہ ہم اپنے ہم وطنوں کے لئے روٹی بھی غیر ملکی اداروں سے مانگیں اور ان اداروں کے نخرے دیکھیں‘کیا بہتر نہیں کہ اپنے گھر میں پڑی گندم کو ان علاقوں کے مفلوک الحال لوگوں میں تقسیم کردیں۔ اطلاعات یہ ہیں کہ گندم کی آنے والی فصل ”بمپر کراپ“ ہوگی اور گزشتہ برس سے کہیںزیادہ گندم پیدا ہوگی۔ اگر تمام اندازے اور تخمینے اسی صورتحال کی طرف اشارہ کرتے ہیں تو پھر سرکاری سٹوروں میں بھری اس گندم کو صوبہ سندھ‘ بلوچستان اور خیبرپختونخواہ کے بے آسرا لوگوں میں خیرات کر دینے سے کون سی چیز مانع ہے۔
ہمارا میڈیا ہر نئی خبر کی دم پکڑ کر بے سمت دوڑتا ہے۔آجکل ”وکی لیکس“ کے انکشافات امریکہ اور برطانیہ کے اخبارات مسلسل شائع کرکے اپنی گرتی ہوئی سرکولیشن کو سہارا دے رہے ہیں اور ہمارے اخبارات اور ٹی وی چینلز بھی ان جھوٹے اماموں کے پیچھے آنکھیں بند کرکے سربسجود ہوچکے ہیں۔ انہیں خبر ہی نہیں کہ ان کے اردگرد کیا ہورہا ہے۔ گیس کا سلنڈر دو ہزار روپے کو پہنچ چکا ہے ‘پیازاسی روپے کلو ہوگئے ہیں لیکن ہمارے ذرائع ابلاغ کا بڑا حصہ ”روز روشن کی طرح عیاں حقیقتوں کو” انکشافات“ سمجھ کر اپنے قارئین اور ناظرین کے دل و دماغ میں کوٹ کوٹ کر بھر رہے ہیں ۔ ان کا کیمرہ سیلاب زدہ علاقوں کا رخ ہی نہیں کرتا‘ ان کا قلم پاکستان کے بیس لاکھ لوگوں کی بھوک کا تذکرہ ہی نہیں کرتا۔ آخر کوئی توازن‘کوئی انصاف۔ اس غریب عوام کو میڈیاسے توقع تھی کہ وہ ان کے مسائل کو لیکر اٹھے گااور کسی نتیجے پر پہنچنے سے پہلے چھوڑے گا نہیں۔”فالواپ“ کہاں گیا….؟ سیلاب زدگان کو ”وکی لیکس“ کے انکشافات سے کیا لینا۔ وہ سارے جانتے ہیں کہ ہمارے ہاں امریکہ کے کہنے پر ہی حکومتیںآتی اور جاتی ہیں۔ جب اتنی بڑی خبر سے ہم سب واقف ہیں تو پھر اس کی عامیانہ اور بازاری تفصیلات پڑھنے سے کیا ملے گا۔”وکی لیکس“ نے سیلاب زدگان کے حق میں تو کچھ بھی ”لیک“ نہیںکیا۔انہیں تو روٹی چاہیے‘ٹھٹھرتے بچوں کے لئے چھت چاہیے‘ یہ کیا ”وکی لیکس“ کھائیں گے اور انکشافات اوڑھیں گے؟

وہ بھی عجیب لوگ ہیں۔ایسے ماحول میں جب ہر بااثر شخص لُوٹنے کی دھن میں مصروف ہے وہ لوٹانے کی فکر میں مبتلا ہیں۔اس زندگی اور اس ملک نے لوگوں کو بہت کچھ دیا ‘اکثر نہیں لیکن ہر شہر اور ہر علاقے میںایسے صالح اعمال پاکستانی موجود ہیں جو اپنی کامیابیوں میں اپنے وطن کے لوگوں کو بھی شریک سمجھتے ہیں اور کچھ نہ کچھ واپس لوٹانے کاکوئی نہ کوئی راستہ نکال لیتے ہیں۔

وہ بھی ایسے ہی لوگ ہیں۔چند نیک خیال احباب جنہوں نے بیس برس قبل ملکر سوچا اور المعرفہ ویلفیئر ٹرسٹ کے نام سے ایک فلاحی ادارے کی بنیاد رکھی۔نسلیں سنوارنے کا عہد کیا۔ واہ کینٹ‘ٹیکسلا اور اردگرد کے دیہاتی علاقوں کے بچوں اور بچیوں کے لئے تعلیم وتربیت کا بہترین ماحول فراہم کرنے کا فیصلہ کیا۔امریکہ کی یونیورسٹی انڈیانا سے پی ایچ ڈی کی ڈگری حاصل کرنے والے پروفیسر ڈاکٹر سجاد الرحمن ٹرسٹ کی سرپرستی میں پیش پیش ہیں۔اس کارخیر میں ایم بی بی ایس ڈاکٹر حافظ عطاءالرحمن ہمہ وقت ذمہ داریاں ادا کررہے ہیں ان کی معاونت کے لئے پروفیسر مظہر اکبر‘ جناب ضیاءالرحمن اور جناب مصباح السلام جیسے اصحاب دانش ہمرکاب رہتے ہیں۔ہمارے دوست اور قائداعظم یونیورسٹی میں ہمارے یونیورسٹی فیلو سینئر صحافی جناب عظمت اللہ اس کاروان فلاح و بہبود کے تیز رو مسافر ہیں۔عظمت اللہ ملک کے معتبر انگریزی اخبار بزنس ریکارڈ سے تادیروابستہ رہے‘حال ہی میں کراچی سے شائع ہونے والے اخبار کے بیوروچیف تھے۔انگریزی لکھنے میں کمال مہارت رکھتے ہیں۔انسانی سرمائے کی ترقی کے اس صبر آزما کام میں ایسے جتے ہیں کہ صحافت کے نشے کو بھی بھول گئے۔مجھے یقین ہے کہ اگر عظمت بھائی میدانِ صحافت سے فرار اختیار نہ کرتے تو آج ملک کے چند نامور صحافیوں میں شمار ہوتے۔ لیکن شائد انہیں کچھ لئے بغیر بہت کچھ لوٹانے میں لطف آتا ہے۔
واہ اسلامک سکول آف ایکسیلنس (وائز) جو کبھی ساٹھ بچوں کی تعلیم و تربیت سے شروع ہوا تھا۔آج وہاں آٹھ سو بچے بچیاں زیور دانش سے بہرہ مند ہورہی ہیں۔ پینتیس ہزار مربع فٹ پر پھیلی وائز سکول کی اپنی بلڈنگ ہے۔سائنس کی جدید طرز کی لیبارٹریز ہیں۔ سکول کے ہر طالب علم پر لازم ہے کہ وہ تکمیل امتحانات پر قرآن کو تجوید کے ساتھ پڑھنا سیکھے اور قرآن عربی کا بنیادی نصاب بھی لازمی ہے۔ اعلیٰ تعلیم یافتہ اساتذہ ہیں اورساٹھ خواتین ٹیچرز ہیں۔ٹیکسلا اور واہ کے جڑواں شہروں میں شائد یہ اکیلا ہی پرائیویٹ سکول ہے جو اساتذہ کو سب سے زیادہ مشاہرہ دیتا ہے ۔اس سکول کے مثالی تعلیمی ماحول اور اینگلو اسلامی کلچر سے متاثر ہو کر ہی میں نے راولپنڈی اسلامک سکول آف ایکسیلنس (رائز) کے نام سے فلاحی سکول قائم کیا تھا جو الحمداللہ اب کامیابی سے آگے بڑھ رہاہے۔
چند روز قبل ”وائز“ کی سالانہ تقریب تقسیم انعامات میں مجھے بھی مدعو کیا گیا تھا۔آٹھ سو سٹوڈنٹس اور ان کے والدین….ایک منظم و مربوط قسم کا اجتماع جہاں اہل دانش کی موجودگی نے ایک کھلے گلستان کے رنگ بھر دیئے تھے۔ بچوں کے سامنے تقریر کرنا ہمیشہ ایک مشکل مرحلہ رہا ہے کم از کم بچوں کے لئے بہت ہی مشکل مرحلہ ہوتا ہے ‘پاکستان کے سابق سیکرٹری خارجہ جناب اکرم ذکی کو مہارت ہے کہ وہ بچوں کے ساتھ بچے ہوجاتے ہیں۔ ہمارے وطن کی عظیم فوج کے سابق جنرل جناب لیفٹیننٹ جنرل (ر)امجد شعیب صاحب نے دفاع وطن کے حوالے سے انہی یادداشتوں کو تازہ کیا۔میںنے پاکستان اور نظریہ پاکستان کے حوالے سے گفتگو کی اور بچوں کو بتایا کہ یہ ملک کیوں ضروری تھا اور ہندوستان اور مسلمان کیوں دو علیحدہ قومیں تھیں‘ ہیں اور رہیں گی۔آخر پر پاکستان کے حوالے سے نعرے لگوائے۔میرا ایمان ہے کہ‘
میں آدمی ہوں وطن کو نہ کس طرح چاہوں
عزیز رکھتی ہے چڑیا بھی گھونسلا اپنا
جبلتوں سے قوی تر ہیں جادوداں جذبے
مفادِ قوم میں تو سر بھی دے کٹا اپنا
سچ یہ ہے کہ المعرفہ ویلفیئر ٹرسٹ نے وائز سکول کی شکل میں اہل علاقہ کو ایک تحفہ دیا ہے اور ان تمام احباب کے لئے عمل کی ایک راہ متعین کی ہے جو محض حالات کو کوستے رہتے ہیں اور آگے بڑھ کر حالات کو سدھارنے کی کوئی کوشش نہیں کرتے!