یہ قبل مسیح کا قصہ نہیں صرف چودہ سو برس پہلے کی بات ہے کہ مکہ کی پہاڑی پر چڑھ کر اللہ کے رسولۖ اہل مکہ سے مخاطب ہوتے ہیں اور سوال کرتے ہیں”’ کیا میں نے کبھی آپ سے جھوٹ بولا ؟جواب آتا ہے اے محمدۖ آپ نے کبھی جھوٹ نہیں بولا اور آپ جو کہیں گے سچ کہیں گے۔ یوںاللہ کے رسولۖ نے سب سے پہلے لوگوں سے اپنے بارے میں سچائی اور کردار کی گواہی لی اور پھر توحید کا پیغام دیا۔ سیرت رسولۖ کا یہ حوالہ اس لئے دے رہا ہوں کہ ہمارے اکثر دانشور اور مفکر انقلاب اور تبدیلی کی بات تو کرتے ہیں لیکن وہ بھول جاتے ہیں کہ انسانی سماج میں رہنمائی اور رہبری کے لئے شعلہ بیانی اور شخصی مقناطیسیت ایک حد تک معاون ہوسکتے ہیں

لیکن شخصیت کی یہ خوبیاں اس وقت خامیاں بن جاتی ہیں جب ڈھیلے کردار اور قول و فعل کے تضاد عوام کے سامنے آنے لگتے ہیں۔ لامحالہ ڈاکٹر طاہر القادری کی شعلہ بیانی اور منطق کے سامنے شائد ہی کوئی ٹھہر سکے۔وزیر داخلہ چوہدری نثار کے مطابق ڈاکٹر قادری کی تقریریں سن کر برسوں سے پختہ وفاداریاں بھی بدل لینے کو جی چاہتا ہے۔ جب وہ اپنے خطاب کے عروج پر ہوتے ہیں اور گریہ و زاری کی لہر اٹھاتے ہیں تو پتھر دل بھی موم ہوجاتے ہیں۔ بیبیاں دھاڑیں مار کر روتی ہیں اور آہنی سینوں کو بھی پسینے آنے لگتے ہیں۔ تقریر و تحریر کے محاذ کے فیلڈ مارشل قبلہ قادری صاحب کو بس یہی ایک فن آتا ہے اور ان کا خیال ہے کہ وہ اپنے اس فن کی بُنیاد پر ملک میں ایک بہت بڑی تبدیلی بلکہ انقلاب لے آئیں گے اور جمی جمائی حکومتوں کے تختے اُلٹ دیں گے۔”سٹیٹس کو” کوتوڑ دیں گے اور پسماندہ طبقات کو اٹھا کر ایوان اقتدار میں لے آئیں گے اورمقتدر طبقات کو پاتال میں پہنچا دیں گے۔ ان کی تنظیمی صلاحیتیں بھی قابل قدر ہیں۔ انقلابی کونسلوںکا تصور ہو یا اشتراکی جمہوریت کا نظریہ۔سب اپنی جگہ قابل غور پہلو ہیں لیکن جو شخص اس انقلاب کا دعوے دار ہے اس کا ذاتی کردار کیا ہے۔ یوں تو ڈاکٹر صاحب بار بار اس بات کا اعادہ کرتے ہیں کہ انہوں نے زندگی بھر جھوٹ نہیں بولا۔بلکہ اللہ اور رسولۖ کی عزت کی قسم کھا کر وہ اعلان کرتے ہیں کہ ”اگر میں جھوٹ بولوں تو خدا مجھے موت دے دے”۔ لیکن کیا کیا جائے جدید ٹیکنالوجی کا۔اب تو انسان کی سرگوشی بھی ریکارڈ ہوجاتی ہے۔ ایک ٹی وی چینل نے ڈاکٹر صاحب کے سامنے وہ کلپس چلائے ہیں جو ڈاکٹر طاہر القادری کو جھوٹا ثابت کرنے کے لئے کافی ہیں۔ جو شخص سرعام جھوٹ بول سکتا ہے وہ ہلچل تو پیدا کرسکتا ہے لیکن کو ئی تعمیری انقلاب اس کے مقدر میں نہیں ہوسکتا۔ انسانوں کی رہبری کا پہلا تقاضا سچ ہوتا ہے ۔ڈاکٹر صاحب کے معتقدین میں سے چھوٹے موٹے معاشی مفادات کے اسیر لوگ ہیں’ سیاسی طور پر اہمیت کے خواہشمند نوجوان ہیں یا ”بغض معاویہ” میں وقتی طور پر ساتھ کھڑے ہوجانے والے دوغلے کردار کے سیاسی پنڈت ہیں۔دھرنے دھرے رہ جائیں گے۔ڈی چوک پر کچی بستیوں کا نقشہ پیش کرنے والی قادری کالونی اُجڑ جائے گی اور لوگ اپنی حسرتوں کا ماتم کرتے ہوئے بے نیل ومرام یہاں سے لوٹ جائیں گے۔مصطفوی انقلاب کا نعرہ لگانے والوں کو باکردار قیادت کی ضرورت ہوتی ہے۔ جو بدقسمتی سے ڈاکٹر صاحب کے پاس نہیں ہے۔ کیا عمران خان اپنے کنٹینر پر کھڑے ہوکر لوگوں سے پوچھ سکتے ہیں ”اے اہل اسلام آباد کیا آپ میرے صاف اور شفاف کردار کی گواہی دیں گے؟”وہ ایسا ہرگز نہیں کرسکتے۔پھر وہ تبدیلی کیسے لاسکتے ہیں۔ وہ کسی ”فرعون” سے ”قطبی قبیلے” کو نجات کیسے دلا سکتے ہیں۔جب ان میں ”موسیٰ” والی کوئی صفت ہی نہیں تو پھر وہ اپنی مقناطیسی شخصیت سے آزاد لبرل دوشیزائوں کے دلوں میں ہلچل تو مچا سکتے ہیں ”فرعون” کو شکست نہیں دے سکتے۔ یہ نہیں کہ عمران اور قادری کے مدمقابل پارلیمان میں براجمان چہروں سے تقویٰ اور تدبر کی شعائیں پیدا ہوتی ہیں۔ انقلابی اور انصافی فلسفے مکمل طور پر ٹھیک ہیں لیکن ان فلسفوں کو دلوں میں اتارنے کے لئے جس شخصی کردار کی ضرورت ہے اس کا ماخذ اسوہ رسولۖ ہے۔ صالحیت مصنوعی طریقوں سے پیدا نہیں کی جاسکتی اس کے لئے افرادکار عمل کی سان پر اپنے قول و فعل کو کستے رہتے ہیں اور عوام ان سے غیر مشروط طور پر وابستہ ہوجاتے ہیں پھر انقلاب آجاتے ہیں۔امام خمینی اور مہاتیر محمد کو کنٹینروں ‘لائوڈسپیکروں ‘قوالوں اور گویّوں کی حاجت نہیں ہوتی۔ وہ دھیمے لہجے میں بات کرتے ہیں اور شاہوں کے محلات لرزنے لگتے ہیں۔

یہ ایک زمینی حقیقت ہے مگر اسی زمینی حقیقت کا اعتراف بھارت کے سابق وزیر خارجہ جسونت سنگھ نے تاریخ کا سچ کہہ کر کیا تو بغیر کوئی نوٹس دیئے بھارتی جنتا پارٹی نے جسونت سنگھ کو پارٹی سے ایسے نکال دیا جیسے مکھن میں سے بال۔ بھارتی ہندوﺅں کی تنگ نظری کھل کر سامنے آ گئی اور دو قومی نظریہ ایک بار پھر زندہ حقیقت بن کر سامنے آ گیا ہے۔ جسونت سنگھ نے ”بانی پاکستان قائد اعظم محمد علی جناح کو عظیم لیڈر جبکہ نہرو اور پیٹل کو تقسیم ہند کا ذمہ دار قرار دیا تھا اور کہا تھا کہ جناح ہندو مسلم اتحاد کے سفیر تھے جناح ولن نہیں، نہرو کی ہٹ دھرمی نے تقسیم کے بیج بوئے، جناح وفاقی نظام چاہتے تھے، گاندھی نے تسلیم کیا مگر نہرو نہیں مانے، جناح ایسی چیز وجود میں لائے جس کا کوئی وجود نہیں تھا، گاندھی نے بھی انہیں عظیم بھارتی کہا“۔ یہ تاریخ سچ اور حقیقی تاریخ لکھنے کے جرم میں جسونت سنگھ کو بی جے پی نے ہنومان سے راون کا درجہ دیدیا۔ جسونت سنگھ کا رونا کسی نے نہیں سنا کہ کتاب پڑھے بغیر ہی انہیں فارغ کردیا گیا۔ جسونت سنگھ کا کہنا ہے کہ اس طرح کے اقدام سے سوچ و بچار کا راستہ بند ہو جائے گا لیکن جسونت سنگھ بھی کتنے سیدھے سادہ ہیں انہیں یہ اندازہ اب ہو گیا ہوگا کہ مسلم دشمنی میں متعصب ہندو کچھ سننے دیکھنے اور سمجھنے کے لئے تیار نہیں ماسوائے ایک حقیقی نعرہ جو کبھی نقاب پہن کر دل میں اور کبھی نقاب اتار کر سرعام لگایا جاتا رہا ہے اور آج بھی ورون گاندھی کی زبان سے جاری و ساری ہے ”ہندوستان میں رہنا ہے تو رام رام کہنا ہے“۔
بہرحال جسونت سنگھ کی جانب سے بانی پاکستان قائد اعظم محمد علی جناح کے مداح سرائی پر کانگریس پارٹی کے ترجمان ابھیشک سنگھوی کا کہنا ہے کہ بھارتیہ جنتا پارٹی کو ”جناح سے محبت“ اور گاندھی اور جواہر لال نہرو سے نفرت“ کی بناءپر اپنا نام ”بھارتیہ جنتا پارٹی“ کے بجائے”بھارتیہ جناح پارٹی“ رکھ لینا چاہئے۔ ادھر دوسری جانب بی جے پی کی ”ہم نوالہ وہم پیالہ“شیوسینا کے سربراہ بال ٹھاکرے العمروف بالا ماما نے بھی شیوسینا کے ترجمان رسالے ”سامنا“ کے اداریے میں بھارتیہ جنتا پارٹی کو خوب ہی لتاڑا ہے اور لکھا ہے کہ ”جناح“ کو سیکولر اور ”ہندو مسلم اتحاد کی علامت“ قرار دینے سے جنگ آزادی ہند کے لاکھوں ”شہدا“ کی ارواح کو تکلیف پہنچی ہے جس پر جسونت سنگھ سے جواب طلبی کی جانی چاہئے۔ بی جے پی سے ناراض بالا ماما کا کہنا ہے کہ بانی پاکستان جناح کو ”سکولر“ کہنا ہماری اور دیش کی آزادی کے لئے جان دینے والوں کی توہین ہے۔ بال ٹھاکرے کا یہ بھی کہنا ہے کہ بھارتیہ جنتا پارٹی کے شری لال کرشن ایڈوانی جی جب 2005ءمیں پاکستان گئے تھے تو وہاں سے بھارت کے نظریہ آزادی پر ”ابہام“ پیدا کرکے لوٹے اور اب جسونت سنگھ نے ایڈوانی کے پیدا کردہ ابہام کو مزید ہوا دی اور ایک قدم آگے بڑھ کر ”جناح“ کو سیکولر اور ”ہندو مسلم اتحاد کا حامی“ قرار دیا ہے جبکہ ساتھ ہی گاندھی اور نہرو کو تقسیم کا ذمہ دار بھی ٹھہرایا ہے۔ بالا ماما کا کہنا ہے کہ اس بات میں کوئی شک نہیں ہے کہ اس سال کے لوک سبھا کے انتخابات میں بھارتیہ جنتا پارٹی کی بدترین شکست کا سبب ان کے رہنماﺅں کی جانب سے کی جانے والی یہی حماقتیں ہیں جو آج کل ایڈوانی ا ور آج جسونت سنگھ کررہے ہیں۔ بال ٹھاکرے نے آگے چل کر لکھا ہے کہ انہیں یہ کہنے میں کوئی شک نہیں کہ آج لال کرشن ایڈوانی اور جسونت سنگھ جیسے لوگوں کے باعث عام ہندوﺅں کا کوئی نظریہ یا منزل نہیں ہے۔ وہ حیران ہیں کہ تقسیم کے ذمہ دار اگر جواہر لال نہرو اور گاندھی جیسے لوگ تھے تو ان کے رہنماﺅں کا کیا مقام ہونا چاہئے؟ بال ٹھاکرے کا یہ بھی کہنا ہے کہ ایک شخص (قائد اعظم محمد علی جناح کی جانب سے اشارہ ہے) جس نے مسلمانوں کے لئے الگ ریاست کا مطالبہ کیا وہ کس طرح ”سیکولر“ قرار دیا جاسکتا ہے؟ بال ٹھاکرے نے اپنے ترجمان جریدے ”سامنا“ کے اداریے میں لال کرشن ایڈوانی کو مخاطب کرکے لکھا ہے کہ ”ایڈوانی سے استفسار کرتا ہوں کہ اگر جناح سیکولر تھے اور تقسیم کے ذمہ دار نہ تھے تو ایڈوانی جی آپ نے سندھ کیوں چھوڑا؟ رہتے وہیں پر سیکولر جناح کے ساتھ، کیوں آ گئے ہندوستان؟“۔ ان کا مزید کہنا کہ وہ ایک عرصے سے دیکھ اور برداشت کررہے ہیں کہ بھارتیہ جنتا پارٹی کے رہنماﺅں کی زبانیں پاکستان اور بانی پاکستان کی تعریف میں رطب اللسان ہیں اور ان کے درمیان ”جناح“ کی مدح سرائی کا ایک مقابلہ سا جاری ہے جس میں بھارتیہ جنتا پارٹی کے سارے رہنماء”جناح“ پر ”گل پاشی“ کرنے میں ایک دوسرے پر سبقت لے جانے کی کوشش کررہے ہیں۔ یہاں یہ بات واضح رہے کہ بھارتیہ جنتا پارٹی کے رہنماءلال کرشن ایڈوانی نے اپنے دورہ پاکستان کے موقع پر بانی پاکستان محمد علی جناح کو سیکولر کہا تھا اور تسلیم کیا تھا کہ ان کی کوششوں کو صحیح طور پر سمجھا نہیں گیا۔ ان کے اس بیان پر بھارت میں ایک طوفان سا کھڑا ہوگیا تھا جس کے بعد اب بی جے پی کے ایک اور رہنماءجسونت سنگھ کی جانب سے بانی پاکستان کے حوالے سے کی جانے والی تحقیق اور اس پر مبنی کتاب ”جناح، انڈیا، پارٹیشن، انڈی پینڈنس“ جسے ”روپا اینڈ کمپنی“ نے شائع کیا ہے، کے منظر عام پر آنے کے بعد بھارت میں ایک طوفان کھڑا ہوچکا ہے جبکہ کانگریس، شیو سینا، آر ایس ایس سمیت بی جے پی کی مخالف جماعتوں اور خود بی جے پی کے رہنماﺅں کی جانب سے جسونت سنگھ کی جانب سے اپنی کتاب میں قائد اعظم کے حوالے سے لکھے جانے والے ریمارکس پر انہیں تنقید اور طنز کا نشانہ بنانے کے ساتھ ساتھ دھمکایا بھی جارہا ہے۔ کتاب میں جسونت سنگھ کا کہنا ہے کہ تقسیم ہند کا اصل کردار جناح نہیں بلکہ ”جواہر لال نہرو“ تھا جس کی ہٹ دھرمی کے باعث تقسیم کا سانحہ رونما ہوا۔ جسونت سنگھ کے مطابق انہوں نے اپنی کتاب میں جو کچھ بھی لکھا ہے، سچ ہے۔ ان کی کتاب میں جھوٹ اور خیالی باتیں نہیں ہیں کیونکہ اس کام اور تحقیق کے لئے انہوں نے برطانیہ سمیت دنیا بھر کی لائبریریوں کی خاک چھانی ہے اور پانچ سال تک حقائق تلاش اور بعد ازاں اپنی کتاب میں جمع کئے ہیں۔ جنوری 1938ءمیں راجستھان میں پیدا ہونے والے جسونت سنگھ کا کہنا ہے کہ بانی پاکستان محمد علی جناح حقیقت میں سیکولر اور ہندو مسلم اتحاد کے داعی تھے جبکہ ہندوستانی رہنماﺅں نے ان کو منفی رویئے کا حامل شخص بنا کر پیش کیا۔ جسونت نے اپنی کتاب میں رقم کیا ہے کہ ”جناح“ نے 1945ءتک حتی الامکان کوشش کی کہ ہندوستان کے مسئلے کو حل کرنے کی کوشش کرتے رہیں لیکن ان کی نہرو اور گاندھی جیسے لوگوں کے سامنے ایک نہ چلی، کیوں کہ نہرو اس وقت تک ”تقسیم ہند“ کا ”اسکرپٹ“لکھ چکے تھے۔ جسونت سنگھ سے جب ایک معروف بھارتی الیکٹرونک نے استفسار کیاکہ آیا وہ ”جناح “ اور ”نہرو“ کے متعلق سابقہ موقف کو بھلا دیں گے؟ تو ان کا کہنا تھا کہ تاریخ اور سچ وہی ہے جو میں نے بیان کیا، بس ہمیں تاریخ کو درست رکھنے کی ضرورت ہے۔
دوسری جانب جسونت سنگھ کی تحقیقی کتاب کے مندرجات سے وہ اور ہزاروں دیگر سیکولر بھارتی تو شاید متفق ہوں لیکن ان کی کتاب کے مندرجات اور بانی پاکستان محمد علی جناح کے بارے دیئے جانے والے ان کے ریمارکس سے ناصرف کانگریس ”چراغ پا“ ہے بلکہ دیگر جماعتوں کے ساتھ ساتھ خود بھارتیہ جنتا پارٹی کے سرکردہ اور انتہاءپسند ہندو رہنماءبھی ناراض ہیں، بھارتیہ جنتا پارٹی کی خاتون رہنماءاور سابق ترجمان اور لوک سبھا میں ڈپٹی اپوزیشن لیڈر شریمتی ”سشما سوراج“ کا بھارتی میڈیا کے ساتھ بات چیت میں کہنا تھا کہ جسونت سنگھ نے اپنی کتاب میں بانی پاکستان ”جناح“ کے متعلق جو کچھ لکھا ہے وہ ان کا اپنا موقف تو ہوسکتا ہے لیکن بھارتیہ جنتا پارٹی کا موقف ہرگز نہیں۔

Click here to View Printed Statment

سولہ کروڑ لوگوں میں سے خطِ غربت سے نیچے ایڑیاں رگڑنے والے غریبوں کی تعداد کسی طرح بھی چھ کروڑ سے کم نہیں ہے۔ ہر وہ پاکستانی جو خود دو وقت کی روٹی کما نہیں سکتا وہ خطِ غربت سے نیچے ہی تصور کیا جائے گا۔ چھ کروڑ لوگوں کی حالت فقیروں اور مانگتوں جیسی ہے۔جو خوددار ہیں وہ تو خودکشی کو ترجیح دیتے ہیں۔

جو صابر ہیں وہ ایک وقت کے کھانے پر روح اور جسم کے رشتے کو بحال رکھتے ہیں اور جو بھوکے مر جانے کے خوف میں مبتلا رہتے ہیں وہ ادھار لیتے‘گردے بیچتے‘بچے فروخت کرتے‘عزتیں نیلام ہوتی دیکھتے اور بھکاریوں کی طرح ہاتھ پھیلاتے اور آنکھیں مضطرب کئے رہتے ہیں۔ حد یہ کہ پنجاب جسے غلے اور گہیوں کا گھر کہا جاتا تھا وہاں بھی آٹاخریدنا ناممکن ہوتا جارہا ہے۔اگر سستی روٹی کے متلاشیوں کا اندازہ لگانا ہو تو راولپنڈی سیٹلائٹ ٹاﺅن کے ایک علاقے میں چالو آٹومیٹک پلانٹ پر جا کر دیکھ لیجئے۔ مزدور‘ دیہاڑی دار‘خوانچہ فروش اور سفید پوش قطاروں میں لگے”من و سلویٰ“ کے منتظر رہتے ہیں۔اگر بازار سے پانچ روپے فی روٹی کے حساب سے گھر کے سربراہ کو چھ افراد کے لئے کھانا مہیا کرنا ہو تو مہینے کے لئے صرف آٹے کی مدمیں چار ہزار روپے درکار ہیں۔ آپ اپنے اردگرد خود دیکھ لیں کتنے گھروں میں تیس روز مسلسل چولہا جلتا ہے۔چنگیر روٹیوں کی گرمی سے آشنا ہوتی ہے اور ہانڈی اور چمچے کا ملاپ کب ہوتا ہے؟
یہ سچ ہے کہ غربت ختم نہیں ہوسکتی لیکن غربت اور امارات میں پائی جانے والی خلیج کو تو کم کیاجاسکتا ہے۔پنجاب کے وزیراعلیٰ جناب شہبازشریف نے ٹھیک کہا تھا کہ اگر دولت کی تقسیم مناسب انداز میںنہ کی گئی تو پھر نرم نہیںخونی انقلاب آئے گا۔ شائد وزیراعلیٰ پنجاب کو دلوںمیں ابلنے والے جذبات اور دماغوں میں پکنے والے خیالات کا احساس ہے اسی لئے وہ غرباءسے ہمدردی کا اظہار کرتے رہتے ہیں اور یہ کہنا مبالغہ نہ ہوگا کہ حکمران طبقے میں سے میاں شہبازشریف شائد واحد حکمران ہیں جنہوں نے بہرحال اپنے ذاتی پروگرام اور منشور میں غریبوں کی دلجوئی کا نکتہ بھی شامل کر رکھا ہے۔ سستے تندور ایک سسٹم کے تحت چلائے جارہے ہیں اور ان کی تعداد میں اضافہ بھی کیا جارہا ہے یہ صالح عمل اپنی نوعیت کی مثالی عوامی خدمت کہلائے گا۔
رمضان المبارک کی آمد آمد ہے اور جس طرح بکرے قصائی کے ہاتھ میں چمکتا چھرا دیکھ کر مذبح خانے میںپہنچنے سے پہلے خوفزدہ ہوجاتے ہیں‘یہی حالت مزید مہنگائی کے آثار دیکھ کر اس وقت سفید پوش پاکستانیوں کی ہے۔ جہاں تک غریب غرباءکا تعلق ہے تو وہ موت و حیات کی سرحد پر کھڑے ہیں ان کے پاس شائد اب کھونے کے لئے کچھ رہا ہی نہیں۔ رمضان المبارک کی آمد سے قبل جناب شہبازشریف کی طرف سے ”رمضان دستر خوان“ کا اعلان گویا مردوں میںنئی زندگی پھونکنے کے مترادف ہے۔ کیا منظر ہوگاجب ہر شہر کے چوک چوراہے میں سحری اور افطاری کے اوقات میں دسترخوان بچھے ہونگے اور مساکین اور غرباءوہاں عزت کے ساتھ بیٹھ کر کھانا کھا رہے ہوں گے۔ اگر یہ سیاسی حیلہ بھی ہے تو یقینا ایسی سیاست کے صدقے اور واری جانے کو جی چاہتا ہے۔
میرا گھر بحریہ ٹاﺅن راولپنڈی کے قریب ہے اور کئی بار بحریہ ٹاﺅن سے گزر کر ہی گلستان کالونی جاتا ہوں۔ گزشتہ چھ ماہ سے دیکھ رہا ہوں کہ شام کے وقت بحریہ ٹاﺅن کی انتظامیہ میز کرسیاں بچھا کر بوسیدہ حال لوگوں کو ان کرسیوں پر بٹھاتی ہے‘پھر خوشبوئیں چھوڑتے سالن اورگرما گرم چپاتیاں رکھی جاتی ہیں۔ یقین نہیں آتا کہ ملک ریاض حسین جیسے مصروف ترین لوگ خدمت خلق کےلئے اتنا وقت نکال لیتے ہیں۔ غریبوں‘مسافروں اور ناداروں کے لئے اس سے بہتر شائد ہی کوئی عمل ہو۔ سچ تو یہ ہے کہ غریبوں کے لئے دستر خوان بچھانے کا کلچر جناب ملک ریاض حسین نے ہی شروع کیا۔ کتنے ہی صاحب ثروت لوگ ہیں جو بحریہ ٹاﺅن والوں کے اس غریب پروری کے پروگرام میں خاموشی کیساتھ حصہ ڈال رہے ہیں۔ اس عمل کی ضرورت کی طرف خود قرآن راغب فرماتا ہے ۔ ارشاد باری تعالیٰ ہے ۔” مال کی محبت کے علی الرغم جو لوگ اپنے مال کو قرابت داروں‘ یتیموں ‘ غریبوں ‘مسافروں اور غلاموں پر خرچ کرتے ہیں وہ نیکی کی انتہا کو چھوتے ہیں“۔
دسترخوانوں کی روایت چل نکلی ہے ۔ اگر ہر کھاتا پیتا شخص اپنے کھانے کے ساتھ ایک نادار کے کھانے کا بندوبست کردے تو کم از کم اس ملک میں پیٹ کی بھوک ختم ہوجائے گی۔ کروڑوں پاکستانیوں کے نان و نفقہ کا بندوبست صرف ریاست کی ذمہ داری ہی نہیں بلکہ ہر صاحب ثروت شہری‘ہر منافع بخش ادارے اور کاروباری کارپوریشن کی بھی سماجی اور انسانی ذمہ داری ہے۔ چاروں صوبوں کے اندر اس طرح کے دسترخوان بچھنے چاہیں۔ اگر یہی کام منظم طریقے سے ملکی سطح پر رواج پاجائے تو ایک طرف جہاں غرباءکا بھلا ہوگا وہاں پاکستان کا امیج بھی بہت خوبصورت بن جائے گا۔ دنیا اتنا تو کہے گی کہ پاکستان اپنے شہریوں کو کم از کم دو وقت کی روٹی تو دے ہی سکتا ہے۔ ابھی دسترخوانوں کی تنگ دامنی آڑے آرہی ہے۔ کھاتے پیتے لوگو‘ حکمرانو! خدارا دسترخوانوں کو وسیع کرو!۔

لوگو ں نے ایک تصویر دیکھی۔ محترم میاں محمد نوازشریف تھری پیس سوٹ میں ملبوس ہزاروں ایکڑوں پر پھیلے اپنے رائے ونڈفارم کے سرسبز باغ میں برطانیہ کے وزیر خارجہ ملی بینڈ کے ہمراہ چہل قدمی فرما رہے تھے۔ایسی تصویر سیاست ہوتی ہے ۔ اندھیروں میں ڈوبی سولہ کروڑ عوام اپنے رہنماﺅںکی خوشحالیاں دیکھ کر شائد خوش ہوجاتے ہوں گے۔ حالانکہ جناب میاں صاحب چاہتے تو ملی بینڈ کو لکشمی چوک لے جاتے جہاں عذاب کی صورت میںنازل ہونے والی لوڈشیڈنگ سے گھبرائے ہوئے لاہوری دھوتیاں اٹھائے حکمرانوں کی غفلتوں کا ماتم کرتے دکھائی دیتے ہیں۔رائے ونڈ فارم میں سے ہی ایک دوسری تصویر سامنے آئی۔ جناب زرداری جو کہ صدر پاکستان بھی ہیں وہ جناب میاں نوازشریف کے ساتھ چار گھنٹے گزارتے ہیں۔میاں صاحب اپنے وسیع دسترخوان پر جناب زرداری کے لئے مغلئی بریانی کا اہتمام فرماتے ہیں اور صدرزرداری صاحب انہیں قالین کا تحفہ پیش کرتے ہیں۔ مشترکہ اعلامیہ میں لوڈشیڈنگ کا کہیں ذکر نہیں ہوتاکیونکہ یہ سیاست ہوتی ہے ۔اقتدار میں حصہ داری‘بندر بانٹ اور باری لینے دینے کے جھگڑے ہوتے ہیں۔

پنجاب بھر میں لوڈشیڈنگ کےخلاف پر تشدد مظاہرے جاری ہیں اورپیپلزپارٹی کے ذرائع کے مطابق رائے ونڈ والوں کی طرف سے ہی ایسے مظاہروں کی پشت پناہی کی جارہی ہے۔اگرچہ جناب زرداری اور میاں نوازشریف کی ملاقات کے بعد مسلم لیگ (ن) نے اپنے کارکنوں کو حکومت مخالف سرگرمیوں سے دور رہنے کی ہدایات جاری کردی تھیں لیکن پی پی والوں کو پورا یقین ہے کہ جس طرح لوڈشیڈنگ کارڈ کو انہوں نے (ن) لیگ کیساتھ مل کر (ق) لیگ حکومت کیخلاف استعمال کیا گیا تھا اسی طرح اب (ن) لیگ اسے پی پی کیخلاف استعمال کر رہی ہے۔
(ن) لیگ کی آجکل پانچویں گھی میں ہیں۔ وہ ایک طرف حکمران جماعت بھی ہے اور دوسری جانب حزب اختلاف بھی ۔ حزب اختلاف کی ذمہ داریاں نبھانے کے لئے جناب چوہدری نثار کی سربراہی میں ایک ڈیسک کام کر رہا ہے ۔جبکہ اقتدار کے مزے لولٹنے کے لئے پنجاب کا وسیع علاقہ ہاتھ میں ہے چونکہ میثاق جمہوریت کا احترام بھی ضروری ہے اس لئے (ن) لیگ کسی ماورائے جمہوریت اقدام کی حامی نہیں۔ جمہوری طریقے سے جناب زرداری کو وزیراعظم گیلانی کیخلاف بھڑکایا جارہا ہے اور جناب گیلانی کو بھرپور حمایت کی یقین دہانیاں بھی کرائی جارہی ہیں۔ گویا سیاسی حماقتیں جاری ہیں۔
کراچی کے حالات قابو سے باہر ہو کر ٹارگٹ کلنگ‘ بارش برد اور جلاﺅ گھیراﺅ کی حدیں بھی پھلانگ رہے ہیں۔جناب الطاف حسین لندن سے دن میں تین بار بیانات جاری فرماتے ہیں لیکن حد یہ ہے کہ ہر طرف پانی ہی پانی ہے۔بجلی نہیں ۔آب وبرق کا یہ انوکھا امتزاج پچاس شہریوں کی جانیں لے چکا ہے۔ ایم۔ کیو ۔ ایم حزب اقتدار کا حصہ ہے لیکن گاہے بگاہے حزب اقتدار کے مزے لوٹنے کے لئے پریس کانفرنسیں بھی فرماتی رہتی ہے۔ اعتماد جیسی جنس اب کراچی میں پائی ہی نہیں جاتی ۔ پی پی پی کو ایم۔ کیو ۔ ایم پر اعتماد نہیں اور نائن زیرو کی نظریں سندھ کے وزیر داخلہ کو خارج کرنے پر لگی ہوئی ہیں۔
صوبہ سرحد کی سیاست افواج پاکستان کی قربانیوں کے طفیل ایک بار سوات اور مالاکنڈ میں داخل ہوگئی ہے لیکن اے این پی کی بچی کھچی قیادت فنڈز بانٹنے بلکہ ایک اخباری اطلاع کے مطابق فنڈز خردبرد کرنے میں مصروف ہے۔ کسی کو توفیق ہی نہیں کہ وہ دیگر سیاسی قوتوں کو ساتھ ملا کر مولانا فضل اللہ کے ”لائیو“ خطبوں کا ہی مقابلہ کرسکے۔ اب کی بار اگر ان علاقوں سے سیاست فرار ہوئی تو پھر اسے ”ہوتی ہاﺅس“ میں بھی پناہ نہ مل پائے گی۔
وقت ایک بار پھر سے یہ ثابت کرنے جارہا ہے کہ پاکستان کی سیاست سراسر حماقت ہے اور اس حماقت کے نتیجے میں عوام کے اندر بغاوت کے آثار پوری طرح نمایاں ہیں۔
پولیس پارٹیوں پر حملے کرنے والے مظاہرین کا مطالبہ ” وزیراعظم نوازشریف“ نہیں صرف ”گوزرداری گو“ ہے۔ اس بغاوت سے وہی طاقتیں فائدہ اٹھا سکتی ہیں جن کو ”گڈگورننس“ اور نظم و ضبط برقرار رکھنے کا وسیع تجربہ ہے اور جنہوں نے ”طالبان“ جیسے خوف کی آنکھوں میں آنکھیںڈالی ہیں۔وہی لوڈشیڈنگ کے جن کو بھی بوتل میں بند کرسکتے ہیں۔ خدا خیر کرے!