تعلیمی بجٹ میںاضافہ تو اب محض ایک سہانا سپناہی رہ گیا ہے جو ہرسیاسی پارٹی کے منشور میں خوبصورت خطاطی کا لباس پہنے چھوئی موئی بنا بیٹھا ہے۔برسراقتدار آنے کے بعد جب وزیر تعلیم بجٹ کی اس مد پر لب کشائی کرنا چاہتا ہے تو اس کے ہونٹ خشک ہوجاتے اور ماتھے پر شرمندگی کے پسینے پھوٹنے لگتے ہیں۔ٹاٹ سکولوں پر بیٹھنے والے جب بڑے عہدوں پر پہنچ کر اپنے سکول جاتے بچوں کی ٹائیاں درست کر رہے ہوتے ہیں تو بھول جاتے ہیں

کہ ان کے پیروکار”ٹاٹیئنز “ کو اب سرے سے سکول ہی مسیر نہیںہیں۔سلطانہ فاﺅنڈیشن کی طرف سے سامنے آنے والی تحقیق سے پتہ چلتا ہے کہ ہمارے ملک کے چھ کروڑ بچے ایسے ہیں جو سکول جانے کی عمر تو رکھتے ہیںلیکن ان کے لئے سکول ہیں نہ اساتذہ‘ٹاٹ تو ان کے لئے عیاشی ہوگی! ستم ظریفی دیکھئے کہ قیام پاکستان کے بعد افسر شاہی کے مزے لوٹنے والوں کی اکثریت کا تعلق دیہی علاقوں سے تھا اور وہ سب ماسٹر کے ”ہدایت اللہ“ کی وساطت سے ہی سدھائے گئے تھے اور ان کا سارا رعب و دبدبہ ٹاٹ سکولوں کے مرہون منت تھا لیکن جب انہوں نے اختیارات کے گھوڑے کی باگ ڈور سنبھالی تو اس قدر سرپٹ دوڑے کہ ان کو دیہات بھی بھول گئے‘پسماندگیاںبھی ذہنوں سے محو ہوگئیں اور ”دو دونے چار“ کے رٹے بھی طاق نسیاں پر رکھے گئے۔ بابوﺅں کی اس فوج ظفر موج نے گزشتہ ساٹھ برسوں تک اس ملک کی تعلیمی پالیسیاں وضع کرنے میں ٹنوں کے حساب سے کاغذ ضائع کئے اور اربوں روپے کی سٹیشنری پھونک ڈالی لیکن غریبوں کے سکول پہلے سے بھی بدحال ہوگئے۔
ٹاٹ سکولوں کا سب سے بڑا فائدہ یہ تھا کہ وہاںایک ہی صف میں ”محمود وایاز“ بیٹھ کر پڑھا کرتے تھے۔نمبردار کا بچہ اور بشیرے موچی کا ”منڈا“ ساتھ ساتھ نہ سہی لیکن ایک ماسٹر جی سے سبق تو لیتے تھے۔ اب تو انسانی حقوق اسقدر ”یکساں “ ہوگئے ہیں کہ غریب کا بچہ امیروں کے مہنگے ترین تعلیمی اداروں میں صرف جھاڑو دے سکتا ہے وہاں بیٹھ کر علم حاصل نہیں کرسکتا۔پنجاب کے وزیراعلیٰ کو غریب پروری کا ہمیشہ دعویٰ رہا ہے۔ دانش سکول سسٹم اسی طرف ایک قدم بتایا جارہا ہے۔خبریں بنانے اور تصویریں چھپوانے کے لئے ایسے اقدامات تیر بہدف نسخے ہوتے ہیں۔ایک سکول جس میں ساڑھے تین سو بچے پڑھتے ہیں اس پر ساڑھے تیرہ کروڑ روپے لگا دیئے گئے ۔پنجاب کے باقی لاکھوں پرائمری سکولوں کا کیا بنے گا؟ یہ سوچنے کے لئے شائد حکمرانوں کے پاس فرصت نہیں یا ایسا سوچنے سے خبر بن نہیں پاتی ۔ سکول سے محروم بچوںکا کوئی درماں کرنا تو دور کی بات جو سرکاری سکولوں میںخاک پھانکتے ہیں ان کی حالت زار پر کسی کو رونا آتا ہے نہ ہی کسی ”سخت گیر“ وزیراعلیٰ کا دل پسیچتا ہے۔سرکاری کالجوں کامعیار تعلیم بلند کرنے کے بہت دعوے کئے جارہے ہیں اور اس کی خاطر ہر کالج کے لئے بورڈ آف گورنرز کے قیام کا حکم دیا جاچکا ہے جس کے خلاف طلبہ اور اساتذہ سراپا احتجاج بنے رہے ہیں۔ہوسکتا ہے کہ یہ حکم نامہ واپس ہوجائے یا چند ترامیم کے ذریعے لاگو ہوجائے۔ اساتذہ کو اعتراض ہے کہ ایسے بندوبست سے ان کی ”آزادی“ چھین لی جائے گی اور ان کی ترقی اور تنزل کے فیصلے یہ خود مختار بورڈز کریںگے۔ طلبہ کو ڈر ہے کہ فیسوںمیں اضافہ ہوگا اور اس طرح وہ کاغذ کی جو ڈگری حاصل کر لیا کرتے تھے اس سے بھی محروم ہوجائیں گے۔راقم خود ایک پرائیویٹ سکول چلاتا ہے۔ راولپنڈی اسلامک سکول آف ایکسیلینس(رائز) کے نام سے میں نے یہ ادارہ راولپنڈی کینٹ کے پسماندہ علاقے میں قائم کر رکھا ہے۔ معروف دانشور جناب نسیم انور بیگ اور نظریہ پاکستان کے اکابرین کی اخلاقی مدد حاصل ہے۔ایک بچے کی معیاری تعلیم پر کم از کم ایک ہزار روپے ماہانہ کا خرچہ اٹھتا ہے۔ بچے کے والدین سے اوسطاً چار سو روپے وصول ہوتے ہیں باقی میں اور میرا خاندان اپنے ذاتی وسائل سے کسی نہ کسی طرح پورے کر رہا ہے ۔لیکن قارئین ! آپ حیران ہوں گے کہ بچوں کے والدین یہ رقم دینے سے بھی قاصر ہوتے ہیں اور ہر روز کوئی ماں‘ کوئی باپ اس غرض سے دستک دیتا ہے کہ اس بار ان کی آمدن معمولی رہی اس لئے فیس ادا نہیں کرسکتے۔ اللہ کا کرم ہے کہ میں نے تعلیم وتربیت کا یہ ادارہ کسی کاروباری مقصد کے لئے نہیں بنایا۔آپ سوچیں کہ کاروباری تعلیمی ادارے کیا ایسے بچوں کو قبول کریں گے جو فیس نہ دے سکتے ہوں؟ یہی وہ مسئلہ ہے جس کے سبب مڈل کلاسیوں کے بچے سرکاری سکولوں میں جانے پر مجبور ہیں اور وہاں جانے کا مطلب یہ ہے کہ یہ کروڑوں بچے بڑے ہو کر ڈگریاں لے کر بھی مارکیٹ کا مقابلہ نہیں کرپاتے کہ ان کا تعلیمی نصاب‘ اساتذہ کی اہلیت اور تعلیمی ماحول انہیں اپر کلاس سے کوسوں پیچھے پھینک دیتاہے۔
ضرورت تو یہی تھی کہ حکومت اور حکمران ٹولے اپنے غیر ضروری اخراجات بند کرتے‘تعلیم کو پرائیویٹ ہونے سے بچاتے اورریاست کے سارے وسائل سرکاری تعلیمی اداروں کی بہتری کے لئے جھونک دیتے لیکن ایسانہیں کیا گیا اور اب پنجاب کے رحم دل وزیر اعلیٰ نے بھی سرکاری کالجوں کو خود مختاری دینے کا فیصلہ فرما دیا ہے۔ خودمختاری کا سادہ سا مطلب یہ ہے کہ معیار تعلیم کی بلندی کےلئے جو اضافی اخراجات اٹھیں گے وہ حکومت تو مہیاکرنے سے ماضی کی طرح قاصر ہی رہے گی۔ عملاً یہ ہوگا کہ بورڈ فیصلہ کرے گا کہ وسائل پیدا کرنے کے لئے بھاری فیسیں وصول کی جائیں اور دوچار سال کے بعد بھاری فیسیں دے سکنے والے طلبہ و طالبات ان کالجوں میںنظر آئیں گے باقی کے ”ٹاٹیئنز“ گلیوں میں آوارہ پھریں گے یا پھر ردعمل کا شکار ہو کردہشتگردی کی وارداتوں میں ایندھن کا کام دیں گے۔خود بھی جلیں گے اور روٹس‘بیکن ہاﺅس‘سٹی‘فروبلزوالوں کو بھی جلا کر راکھ کردیں گے۔ خاص تعلیم جب عام نہیں ہوگی تو پھر عام لوگ خاص طرح کی نفسیات کا شکار ہوجائیں گے امن اور خوشحالی روٹھی ہی رہے گی!۔

پاکستان کو ورثے میں وسائل کم اور مسائل بہت زیادہ ملے ہیں۔ تقسیم ہند کے فارمولے پر مکمل عملدرآمد نہ ہونے سے مملکت پاکستان کو معرض وجود میں آتے ہی رکاوٹوں اور مشکلات نے گھیر لیا۔ ہندوروایتی کی بدطنیتی کا اظہار تو اسی وقت ہوگیا تھا جب انتہائی عجلت میں تقسیم کا اعلان کردیا گیا۔ یہ باتیں اب دہرانے کی نہیں کہ پاکستان کو متحدہ ہندوستان کے اثاثوں سے طے شدہ حصہ بھی نہ دیا گیا۔ پھر مہاجرین کا قافلہ در قافلہ نہ رکنے والا ایسا سلسلہ شروع ہوا کہ ”سرمنڈاتے ہی اولے پڑے“ والی صورتحال پیدا ہوگئی۔
مالی تنگدستی‘حکمرانی کے شعبہ میں ناتجربہ کاری اور سازش کے تحت بھارت کا کشمیر پر قبضہ اور قبضے کے خلاف 1948ءمیں جنگ آزادی کشمیر…. یہ وہ بنیادی حقیقتیں ہیں جنہیں ذہن میں رکھ کر ہم پاکستانی مسائل کا احاطہ کرسکتے ہیں۔

بھارت کے رہنماﺅں کی طرف سے آغاز ہی میں پروپیگنڈا شروع کردیا گیا کہ یہ ملک چند دنوں کا کھیل تماشہ ہے اور اس کی معاشی صورتحال ایسی ہے کہ پاکستان اپنی موت آپ مر جائے گا بھارتی قیادت کو یقین تھا کہ ملک بن تو گیا ہے لیکن ایک روز گھٹنوں کے بل گر کر دوبارہ ہندوستان سے الحاق کرلے گا۔ اس منفی پروپیگنڈہ نے پاکستانیوں کے دل میںہندوستان کی طرف سے نہ ختم ہونے والے خدشات کابیج بو دیا تھا۔آزادی کشمیر کی جنگ نے پاکستان کے لوگوںکے اندرنہ صرف یہ کہ اپنے تحفظ کے لئے ایک مضبوط فوج کی ضرورت محسوس کرنا شروع کردی بلکہ ہر وقت یہ خطرہ بھی منڈلانے لگا کہ بھارت کسی بھی وقت پاکستان پر یلغارکردے گا۔ یہی وہ خوف ہے جس نے ہماری معاشی پالیسی کی ترتیب میں بنیادی کردار ادا کیا۔ پہلے قومی بجٹ میں ہی دفاعی بجٹ کے مقابلے میں تعلیم‘ صحت اور ترقیاتی کاموں کیلئے مختص کیا گیا بجٹ ہاتھی کے منہ میں زیرہ تھا۔ اپنی عوام نے قیام پاکستان کے بعد پاکستانی حکومتوں سے بہتر طرز زندگی کی جو توقعات وابستہ کر لی تھیں وہ پوری ہونا محال تھا۔ وقت گزرنے کے ساتھ ساتھ فوجی اخراجات بڑھتے گئے اور ان بڑھتے ہوئے اخراجات کو قرضے لے کر پورا کیا جانے لگا۔ قائداعظمؒ کی غیر متنازعہ اور قدآور قیادت ایسی تھی کہ لوگ ہر طرح کی قربانی دینے پر بخوشی آمادہ رہے لیکن جوں ہی قائد رخصت ہوئے تو عوام الناس کے اندر بھوک اور غربت کی دلدل سے نکلنے کی شدید آرزو ابھری۔کیا یہ حقیقت نہیںہے کہ شہید ملت لیاقت علی خان کے دور حکومت میں کراچی کی سڑکوں پر حقوق کے حصول کیلئے ایسے ہی مظاہرے شروع ہوئے جیسے کبھی انگریزوں کیخلاف آزادی کا حق لینے کے لئے کئے جاتے تھے۔ ہماری سوچ نے احتجاج کی شکل اختیار کرنا شروع کردی تھی۔ حق لینے کے لئے احتجاج ‘ قیمتوں میں اضافہ کیخلاف احتجاج‘بے روزگاری کیخلاف احتجاج۔یہ رویہ پروان چڑھتا رہا۔ ہماری افواج اپنے سے دس گنا بڑے بھارت کا مقابلہ کرنے کے لئے جدید امریکی اسلحہ سے لیس ہوتی رہیں ‘ فوج کی تعداد اور استعداد بڑھانے کے لئے ہر حکومت اور ہر حکمران نے خزانے کے منہ کھولے اور خزانہ خالی ہونے کی صورت میں امریکہ سے مزید امداد اور قرضے لینے کا کلچر پروان چڑھاتے رہے۔ سچ یہ ہے کہ قیام پاکستان سے لیکر آج تک حکومتی مشینری‘سیاسی جماعتوں اور فوجی آمریتوں کے ذہنوں پر بھارت کی برابری‘ بھارت کا خوف‘بھارت کی اجارہ داری ختم کرنے کا کچھ ایسا جنون طاری رہا کہ کسی دور حکمرانی میں بھی ”گڈگورنس“ سستا اور فوری انصاف‘مددگار پولیس‘ خدمتگار بیوروکریسی‘دولت کی منصفانہ تقسیم اور تعلیم اور صحت کی فراہمی کبھی ترجیح بن پائی ہی نہیں ۔ جب خوشحالیاں مسلسل روٹھی رہیں اور معمولی حق کے لئے بھی جلاﺅ گھراﺅ اور ہڑتال کی راہیں ہی اختیار کرنا پڑیں تو پھر تعمیر وطن کی طرف کون گامزن ہوتا۔ہر کوئی راتوں رات اپنے حالات سنوارنے میں لگ گیا۔جس کے نتیجے میں سفارش‘رشوت‘دھونس اور دھاندلی جیسی بیماریاں عام ہونا شروع ہوئیں۔
غیر ملکی قرضوں نے ہمیںمقروض ہونے کا احساس دلایا اور ہماری نفسیات میں ایک اور خوف بیٹھ گیا۔ ایک سوال نے سر اٹھانا شروع کیا۔ یہ قرضہ عوام نے نہیں لیا‘عوام پر نہیں لگا‘پھر کدھر گیا؟ اس سوال نے حکمران طبقہ اور عوام کو ایک دوسرے سے کوسوں دور کردیا۔
پہلے مارشل لاءنے عوام کے ذہن میں یہ گرہ ڈال دی کہ انہوں نے جس پاکستان کے لئے قربانی دی تھی اس کی حکمرانی میں ان کا کوئی حصہ ہی نہیں۔ کاش کہ ایوب خان اور محترمہ فاطمہ جناحؒ صدارتی انتخابات میں آمنے سامنے نہ آئے ہوتے۔فاطمہ جناحؒ کےخلاف ایوبی حکومت کے غیر مہذب ہتھکنڈوں نے پاکستانی عوام کے اندر ایک اور منفی احساس کو جنم دیا۔”یہ پاکستان اب قائداعظمؒ والا پاکستان نہیں رہا۔ جس ملک میں قائداعظمؒ کی ہمشیرہ کو صدارت کا الیکشن ہرانے کے لئے بدترین دھاندلی ہو سکتی ہے وہ اب امریکی غلاموں کا ملک بن گیا ہے“1965ءجنگ کے ہیرو جناب اصغر خان ابھی حیات ہیں۔ وہ یہ بات کئی بار آن ریکارڈ کہہ چکے ہیں کہ 6ستمبر 1965ءکی جنگ بھارت نے نہیں پاکستان نے شروع کی تھی۔ یہ جنگ ایوب خان کو فیلڈ مارشل بنانے کا ایک راستہ تھا۔ ہم آج جسے جیت کہتے ہیں‘ حقائق بلکہ اسے جیت ماننے پر تیار نہیں۔ بھارت نے کمال ہوشیاری سے اقوام متحدہ کے ذریعے اس جنگ کو رکوا دیا کیونکہ وہ اپنی معاشی ترقی کیلئے آگے بڑھنا چاہتا تھا۔پاکستان کو 1965ءکی جنگ میں کس قدر مالی نقصان ہوا اور امریکہ کی مداخلت کس حد تک بڑھ گئی تھی ان حقائق پر کتابیں بھری پڑی ہیں۔ لیکن صرف اتنی حقیقت ہی ذہن نشین کر لیجئے کہ 1971ءتک ہمارے پاس اتنے پیسے بھی نہیں بچے تھے کہ مشرقی پاکستان کے دفاع کےلئے بھارت کے مقابلے پر کوئی موثر دفاعی بندوبست ہی کرپاتے۔
1971ءکی شکست فاش اور شرمناک سقوط ڈھاکہ نے بھارت کے اس پروپیگنڈہ کو سچ ثابت کردیا کہ یہ ملک برقرار نہیں رہ سکے گا بھارت بڑی دھوم دھام سے اپنی سلور جوبلی منا رہا تھا اور ہم شکست خوردہ ہو کر اپنے زخم چاٹ رہے تھے۔آدھا ملک چلے جانے کے بعد عوام الناس ہی نہیں خود افواج پاکستان کے اندر خوف کے ساتھ ساتھ غصہ بھی شامل ہوگیا۔ فوج کے اندر یہ دھن کہ 1971ءکی شکست کا بدلہ لینا ہے اور عوام الناس کے اندر مذہبی قیادتوں کا ہندوﺅں کےخلاف جہاد کا علم بلند کرنے کا عزم۔ یہ ہیں وہ دو جذبے جنہوں نے ہماری قومی سوچ کو بالغ کردیا اور اسی انتقام بر مبنی سوچ کے تحت ہی ہم نے ایٹم بم بنایا ہے۔ میزائل چھوڑے ہیں۔پرائیویٹ جہادی تنظیمیں بنی ہیں۔ ہماری اسی سوچ سے فائدہ اٹھا کرامریکہ نے ہمیںروس کے خلاف افغانستان کے اندر جہاد کی راہ پر ڈالا اور ہمارے اوپر احسانات کے نام پر قرضوں کا بوجھ لاددیا۔ مدد اور اور ایڈ کے نام پر قومی خود مختاری کو ہم سے چھین لیا۔آج بھی ہمارا تعلیمی بجٹ دو فیصد سے زیادہ نہیں‘ہمارا صحت کا بجٹ ایک فیصد سے زیادہ نہیں۔امریکہ اس قابل ہوگیا ہے کہ وہ اپنی مرضی کے مطابق حکومت اور نظام حکومت میں تبدیلیاں لاتا ہے ۔مالی کرپشن ‘ بدترین گورنس‘سفاک پولیس‘اور آمرانہ ذہنیت رکھنے والے جرنیل‘ حتی کہ مادرپدر آزاد میڈیا۔ یہ سب وہ کڑوے پھل ہیں جو ہمیں تعمیروطن کی راہ سے ہٹنے کے نتیجے میں ملے ہیں۔ بھارت نے ہمیں انتقام کی اس دلدل میں دھکیلا اور ہم اس میں دھنستے چلے گئے۔ دنیا نے دل کھول کر مہنگے داموں ہمیں اپنا اسلحہ بیچا۔ آج ہمارے پاس اسلحہ کے انبار ہیں لیکن ضرورت کے لئے اناج نہیں‘بہترین فوج ہے لیکن سرحدیں غیر محفوظ ہیں‘ہم پر کرپٹ ترین حکمران مسلط ہیں اور ہمارے پاس کوئی متبادل قیادت نہیں۔ ہمارے انتہائی حساس ادارے کے سربراہ کو امریکی عدالت نے طلب کر رکھا ہے۔جنرل پرویز مشرف نے بھارت سے انتقام لینے کے لئے ہی کارگل کا معرکہ بپا کیا اور پھر پاکستان کو ہمیشہ کے لئے امریکہ کی غیر مشروط غلامی میں دے ڈالا۔ تعلیم‘ صحت ‘زراعت انڈسٹری‘امن وامان‘صوبائی ہم آہنگی یہ سب مسائل تو تب حل ہوسکیں گے جب ہمیں اپنے قومی فیصلے خود کرنے کی آزادی حاصل ہوگی۔اگست 1947ءمیں برطانیہ کے غلام تھے۔اگست 2010ءمیں امریکہ کے غلام ہیں۔ غلام قوم کو اسی حکمت و دانائی سے ایک بار پھر آزادی حاصل کرنی ہے جس طرح قائداعظمؒ نے ہندو اور انگریز جیسے مشترکہ دشمن سے بغیر گولی چلائے آزادی حاصل کی تھی۔
سب سے بڑا مسئلہ وسائل کی کمی ہو لیکن میرے نزدیک سب سے بڑا مسئلہ آج ”پہچان“ کا مسئلہ ہے قیام پاکستان کے وقت ہم سب مسلمان تھے‘سب پاکستانی تھے۔ہماری ذاتی شناختیں مٹ گئی تھیں۔ ہم پٹھان‘پنجابی‘سندھی‘بلوچی اور بنگالی کے محدود خول توڑ کر ایک نئی شناخت لے کر ابھرے تھے۔ ہم سب کا نام پاکستانی تھا۔ تحریک پاکستان کے جذبے کو تعمیر پاکستان کے جذبے سے جوڑنا تھا جو نہ ہوسکا۔آج ہم پھر اپنے محدود خول اور حوالوں میں الجھ گئے ہیں۔ایک بار پھر بکھر گئے ہیں۔
آج آپ کسی بوڑھے‘نوجوان‘ پڑھے لکھے یا ان پڑھ سے پوچھیں”کیا آپ کو یقین ہے کہ پاکستان سو سال بعد بھی قائم رہے گا؟“اکثریت آپ کو نفی میں جواب دے گی بلکہ پڑھے لکھے لوگ کہیں گے کہ دس سال کا علم نہیں آپ سو سال کی بات کرتے ہیں۔ قیام پاکستان کے وقت ہر زبان سے ایک یقین لپکتا تھا”بن کے رہے گا پاکستان“ لے کر رہیں گے پاکستان“دنیا میں واحد پاکستانی قوم ہے جسے اپنے ملک کے قائم رہنے پر یقین نہیں ورنہ برما جیسے ملک کے باشندے بھی یقین رکھتے ہیں کہ جب تک یہ کرہ ارضی ہے ان کا ملک موجود رہے گا۔ اس بے یقینی کو نعروں سے یقین میں نہیں بدلا جاسکتا۔ دانشوروںکو آگے بڑھنا ہے اپنے لئے نہ سہی سترہ کروڑ لوگوں کے گھر کو بچانے اور ضرب کھاتی ان کی آنے والی نسلوں کی اس جائے پناہ کو بچائے رکھنے کی خاطر اپنی نجی گفتگو اور اپنی تنظیمیں سرگرمیوں سے اپنے اردگرد کے لوگوں کو یقین دلانا ہے کہ جغرافیہ اگر سکڑ سکتا ہے تو پھیل بھی سکتا ہے۔پاکستان بنا ہی قائم رہنے کے لئے ہے۔پاکستان کے حالات امریکہ کے ابتدائی ڈیڑھ دو سو سالوں سے بہت ہی بہتر ہیں۔ امریکہ بھی دو حصوں میں تقسیم ہوا تھا‘ وہاں بھی خانہ جنگیاں ہوتی رہی ہیں۔آج بھی لاطینی امریکہ کے تمام ممالک یو ایس اے کے دشمن ہیں۔ اور کسی وقت بھی امریکہ کو وجود کے شدید خطرات لاحق ہوسکتے ہیں۔
مختلف مسالک کے ماننے والوں نے تحریک پاکستان کے دوران ایک خدا‘ایک رسول‘ایک کتاب کے نعرے پر تحریک چلائی تھی۔پاکستان مخالف رجحانات رکھنے والے علماءقیام پاکستان کے بعد تمام مسالک کے ساھ ملکر بانی پاکستان سے تعمیر وطن کے عہدو پیمان باندھے تھے۔شاہراہ تعمیروترقی پر چل نہ سکے تو پگڈنڈیوں پر ڈگمگانے لگ پڑے۔ آج مرنے مارنے کی ساری صلاحیتیں غیروں کے لئے وقف کردینے والوں کو کوئی آکر راہ راست نہیں دکھائے گا۔ اگر اسلام کے آفاقی اصولوں پر یہ مسالک اور ان سے وابستہ گروہ یکجہتی کی راہ پر واپس نہیںآئیں گے تو ان کے حصے میں عوام بیزاری او رخون خرابے کے سوا کچھ نہیں آئے گا۔ جس طرح یورپ میںعیسائیوں کے فرقوں نے آپس میںلڑلڑ کر اپنی طاقت کو ہی زائل کر لیا تھااسی طرح یہاں آپس میں برسرپیکار مسلکی گروہوں کا انجام بھی اجتماعی خودکشی کی صورت میں نکلے گا۔اخلاق سنوارنے والے ناصحین اور علماءجب جسموں کی کانٹ چھانٹ پر لگ جائیں گے تو ان کے اپنے جسم لوہے کے تھوڑ ہی بنے ہوئے ہیں ؟ انہیں ایک بار پھر قرآن اور اسوہ رسول کی تعلیم حاصل کرنا ہوگی۔
اب قائداعظمؒ نہیں آئیں گے۔کوئی مسیحا نہیں اترے گا۔مجھے اور آپ کو‘خود اپنے طور پر اس وطن کے مسائل کا ادراک اور ا س کے حل کی تگ و تاز کرنا ہوگی۔اگر ہم سمجھتے ہیں کہ یہ ملک ہماری ضرورت ہے تو پھر اس کے نکھار میں اپنا حصہ ڈالئے ورنہ یہ ملک چھوڑ کر کسی دوسرے جزیرے کا قصد کیجئے! سچے دل سے اپنے دل کو ٹٹول کر دیکھئے تو پاکستان کے مسائل کا حل آپ کے سامنے ہے!!
جہاں میں اہل ایماںصورت خورشید جیتے ہیں
ادھر ڈوبنے ادھر نکلے‘ادھر ڈوبے ادھر نکلے

یہ کیسی بدنصیبی ہے کہ تاریخ انسانی کا بدترین سیلاب بھی پاکستانی سیاستدانوں کو متحد نہیںکرسکا۔ یہ کیسی مٹی کے بنے ہوئےلاجز خالی ہوجانے چاہیں تھے ۔ اپنے حلقوں میں جا کر ہمدردی کے دو بول ہی بول دیتے۔ لوگ ان سے کھانے کوسونے کے نوالے اور رہنے کو محل تھوڑا ہی مانگ رہے ہیں۔بھوکے ہیںان کی بھوک بانٹ لو‘کھلے آسمان تلے ان کی بے بسی میں حصے دار بن جاﺅ۔ کسی ڈوبتے بوڑھے کی طرف کوئی ہوا بھری ٹیوب پھینک کر اسے بچالو‘ ملیریا سے تڑپتے کسی معصوم کی پیشانی پرشفقت بھرا ہاتھ ہی رکھ دو۔

لیکن یہ کیسے عوامی نمائندے ہیں جو اپنی بڑی بڑی کوٹھیوں میں مرغن افطاریاں اڑانے میں مشغول ہیں۔ ان کی ایک ماہ کی تنخواہیں کاٹی گئیں اور ہر پارٹی کے رکن نے جا کر وزیراعظم سے شکوے کئے ”سائیں یہ تو ظلم ہوا“۔ وزیراعظم اور صدر اپنے وزراءاور مشیروں کو دھکے دے کر نکالتے ہیں کہ سیلاب زدہ علاقوں میں جاﺅ لیکن یہ عجیب مخلوق ہیں کہ راستے سے ہی بھاگ آتے ہیں۔ جو بہت متحرک ہیں وہ بھی زیادہ سے زیادہ کسی بند پر تھوڑی دیر ٹھہر کر تصویر بنواتے اور ثبوت کے طور پر یہ تصویر وزیراعظم کے پرسنل سٹاف کو پہنچا کر مطمئن ہوجاتے ہیں کہ ڈیوٹی ادا ہوگئی۔ چند ایک تین یا چار ایم این اے اور ایم پی اے کو چھوڑ کر باقی سب ہاتھ پہ ہاتھ دھر ے محومنتظرفردا بیٹھے ہیں۔”فوج ہے نا“ یہ ہے وہ مختصر سا جواب جو ہمارے سیاستدانوں کے لبوں پر اٹھکیلیاں کرتا سنائی دیتا ہے۔
افواج پاکستان کا کردار بلاشبہ قابل تعریف ہے۔اس بے رحم سیلاب سے لوگوں کے مال و جان کو بچانے کےلئے آرمی‘نیوی اور ایئرفورس کمال سرعت کے ساتھ تیز پانیوں میں اتری ہوئی ہے لیکن ہماری سیاسی قیادتوں کو احساس نہیں کہ افواج پاکستان کا بہت بڑا آپریشنل حصہ مختلف فوجی مہمات میں پھنسا ہوا ہے۔ مشرقی سرحدوں سے مکمل طور پر فوج کو واپس بلایا نہیںجاسکتا اور مغربی سرحدوں سے امریکہ اور طالبان ہمیں ہٹنے نہیں دے رہے۔ ایک طرف دو کروڑ سے زائد پاکستانی زندگی کی سانسیں بحال رکھنے کی کشمکش میںمبتلا ہیں اور دوسری جانب امریکی محکمہ خارجہ کی جانب سے ”ڈومور“ کی رٹ برقرار ہے۔ عالمی مالیاتی ادارے سوائے زبانی جمع خرچ کے کچھ کرنے پر تیار نہیں”کرپشن“ کا بہانہ بنا کر مٹھی بھینچ لی ہے۔ جو کرپشن گزشتہ اڑھائی برس میں امریکیوں کو دکھائی نہیں دی وہ سیلاب میں اچانک نقاب اتار کر سامنے آگئی ہے۔ یو ایس ایڈ والے بھی اپنی مدد کو ”شفافیت“ سے مشروط کر رہے ہیں جبکہ اس وقت تو ہر صاحب ثروت کو لوٹانے کی دوڑ میں سبقت لے جانے کی کوشش کرنی چاہیے کیونکہ یہ وقت امتحان ہے۔سیلاب زدگان کیلئے صبر کا امتحان اور باقیوں کے لئے شکر کا۔ بقول شاعر
اب وقت ہے پیچ وخم دستار کو بدلو
اخلاق کو عادات کو اطوار کو بدلو
بدلو گے تو بچ جاﺅ گے تم قہر خدا سے
اڑ جائیں گے یہ ریگ محل ورنہ ہوا سے
جو کچھ بھی ضرورت سے زیادہ ہے لٹا دو
ٹل جاتی ہیں آفات غریبوں کی دعا ہے
افغانستان میں خود مالی کرپشن کے عالمی ریکارڈ کرنے والے امریکی اداروں کو شرم تک نہیں آتی۔ ہمارے سیاستدان بغلیں بجا رہے ہیں ”واہ جی واہ۔زرداری کی وجہ سے امداد نہیں مل رہی۔دنیا کو اعتبارہی نہیں“۔ پھرکس پر اعتبار ہے؟نوازشریف کے قرض اتارو ملک سنوارو پروگرام پر اعتبار ہے ؟ ایم کیو ایم کے مبینہ بھتہ خوروں پر اعتبار ہے؟ جمائما خان سے رقم ہتھیا کر سینکڑوں ایکڑ اراضی پر فارم ہاﺅس بنا لینے والے شخص پراعتبار ہے؟ ڈیزل چوری کرنے والے مولاﺅں پر اعتماد ہے؟کس پر اعتبار ہے؟
افسوس کہ یہ وقت باہمی انتشار کا نہیں اتحاد و یکجہتی کاہے۔ تصور کریں اس بدنصیب باپ کا جس کا گھر سیلاب میں بہہ گیا ہے اور وہ اپنی جوان بیٹیوں کو ہجوم سے چھپاتا پھرتا ہے لیکن چھت ہے نہ دیوار۔خوراک کے لئے ٹرک کے پیچھے بھاگ رہا ہے‘ صاف پانی کی بوندوں کو نگاہیں ترس گئیں‘بیٹی کے پاس بدلنے کو کپڑے تک نہیں‘ حبس بدبو اور بے یقینی…. سیاستدانو! خدارا اپنی کچھاروں سے باہر نکلو‘ بڑے بڑے محلات میں ان پردہ دار گھرانوں کو چند دن مہمان ہی رکھ لو۔ یا ان کے ملیا میٹ ہوجانے والے دیہاتوں اور شہروں کے قریب ٹینٹ ویلج‘کوئی سایہ ‘کوئی سائبان ‘کچھ تو کرو۔ فوج کو پھنسانے کی کوشش کرو گے تو خود بھی گردنوں تک دھنس جاﺅ گے۔ فوج کو پکارنے اور دھتکارنے والے دونوں گروہ انجانے میں اپنی سیاسی موت کو دعوت دے رہے ہیں۔اب کی بار فوج آئی تو نائن زیرو بچے گا نہ رائے ونڈ کا محل‘منصورہ محفوظ رہے گا نہ بلاول ہاﺅس۔ فضل الرحمن کا جبہ ہوگا نہ سرخ پوش پختون…. بس فوج ہوگی اور صرف فوج!
ہمارے ٹی وی اینکر اپنی بچگانہ حرکتوں اور طفلانہ شرارتوں سے ابھی تک باز نہیں آرہے۔وہ الطاف حسین کے بیان کو لیکر چائے کی پیالی میں طوفان اٹھا رہے ہیں اور سیاستدان جنہیں اپنے عقل وشعور پر بہت ناز ہے وہ سدھائے ہوئے شکار کی طرح ان پروگراموں میںشریک ہورہے ہیں۔ہونا تو یہ چاہیے تھا کہ سیلاب زدگان کی مدد کے لئے ایک اجتماعی شعور پیدا کیا جاتا۔قوم کے اندر خودی اور خودداری کی روح پھونکی جاتی لیکن عملاً سیلاب زدگان کی مظلومیت اور حکومت کی غیر مقبولیت کو ایک دوسرے سے گتھم گھتا کراکے ٹی وی چینلز روزانہ تماشا لگاتے ہیں۔ میر میراثی اور پیشہ ور نوحہ خواں سورج ڈھلتے ہی ٹی وی سکرینوں پر قابض ہو کر قوم کے مورال کو سیلاب میں بہانے کی واردات کرتے ہیں….!
تمہارے اندر انتشار ہے لیکن سیلاب زدگان یکسو ہیں کہ جب انہیں مدد کی ضرورت ہے اس وقت میڈیا اور سیاستدان ان کی عزتیں اچھالنے اور بربادیاں”انجوائے“ کرنے میں مشغول ہیں۔!سنو‘سنو قرآن کی آواز سنو۔ اللہ تعالیٰ نے آپ جیسے انسانوںپر اپنے احسانات گنوانے کے بعد فرمایا ہے‘”تم لوگ گھاٹی عبور نہیں کرسکے اور گھاٹی کیا ہے‘ نجات دلانا اور قحط کے دنوں میںقرابت دار یتیم ‘خاک گزیدہ محتاج کو کھانا کھلانا“۔

روزہ کھلنے میں ابھی چالیس منٹ باقی ہیں لیکن مسجد نبوی کے ہر حصے میں نمازی افطار کی تیاریوں میں مصروف ہیں۔ ہر شخص اپنے ساتھ کچھ نہ کچھ افطاری لا رہا ہے جسے دروازوں پر کھڑے ہوئے دربان چیک کرتے ہیں۔کھجوریں‘قہوہ‘جوس کے ڈبے اندر لانے کی اجازت ہے۔سموسوں اور پکوڑوں کی ممانعت ہے۔ یہ پابندی اس لئے عائد ہے کہ مسجد میں گندگی نہ پھیلے۔ تھرموس میں اگر قہوہ ہے تو آپ اسے لے جاسکتے ہیں لیکن دودھ والی چائے پر دربان اعتراض کرتے ہیں۔

لوگ صفوں پر پتلی پلاسٹک بچھا لیتے ہیں تاکہ کھانے پینے کی چیزوں سے قالین خراب نہ ہوں۔ میں مسجد نبوی کے ایک دروازے پر کھڑا یہ منظر دیکھ رہا ہوں۔ اس دوران میری نظر اچانک مسجد نبوی کے باہر کے فرش کی طرف اٹھتی ہے تو کیا دیکھتا ہوں کہ جنت البقیع قبرستان والے حصے میں جو دکانیں ہیں ان کے دکاندار پلاسٹک کے بڑے بڑے رول کھول کر اسے سنگ مرمر کے فرش پر بچھا رہے ہیں بالکل ایسا ہی منظر ہے جیسے گھریلو دعوتوں میں ہوتا ہے کہ لوگ سفید چاندنی پر دسترخوان والا کپڑا پھیلا دیتے ہیں تاکہ سفید چاندنی پر کوئی داغ نہ پڑے۔ادھر پلاسٹ بچھی ادھر ایک صاحب ان پر کھجوروں کے پیکٹ ترتیب سے رکھنے لگے ایک دوسرے صاحب آئے انہوں نے پلاسٹک پر ایک ایک روٹی رکھنی شروع کردی۔ سامنے والی دکان سے ایک صاحب کئی کارٹن ایک ہاتھ گاڑی میں لے کر آئے اور انہوں نے ہر روٹی کے ساتھ دہی کا ایک ڈبہ رکھنا شروع کردیا۔ دوسری طرف پلاسٹک بچھانے والے باہر کے مختلف حصوں میں اپنا کام کر رہے ہیں۔ مسجد نبوی کے باہر کھڑا حیران ہورہا ہوں کہ افطاری کا اہتمام تو ہورہا ہے لیکن روزہ دار کہاں ہیں۔ کیا دیکھتا ہوں کہ لوگ مختلف اطراف سے آنے لگے اور فرش پر بچھے ہوئے دسترخوانوں پر بیٹھنا شروع کردیا۔ ایک جانب کا حصہ خواتین نے سنبھال لیا ہے ۔ جیسے جیسے افطاری کا وقت قریب آرہا ہے لوگ بھی دسترخوانوں پر بیٹھتے جارہے ہیں۔مختلف لوگ تھیلوں میں‘ڈبوں میں اور ٹوکریوں میں کھانے پینے کی مختلف چیزیں لے کر آرہے ہیں اور روزہ داروں کے سامنے رکھتے جارہے ہیں ۔ یہ وہ حضرات ہیں جو ثواب کی خاطر روزہ داروں کو فی سبیل اللہ افطاری پیش کررہے ہیں۔ میں خاموش کھڑا لوگوں کے اس ایمانی جذبے کو دیکھ رہا ہوں کہ کتنے خوش قسمت ہیں یہ لوگ مسجد نبوی میں روزہ کھولنے والوں کی خدمت کر رہے ہیں۔ میں یہ سوچ ہی رہا تھا کہ ایک صاحب نے میرے ہاتھ میں کھجوروں کے دو چھوٹے پیکٹ اور جوس کا ایک ڈبہ تھما دیا۔ میںنے کچھ کہنا چاہا تو وہ افطار افطار کرتے ہوئے آگے بڑھ گئے۔ روزہ کھلنے میں اب صرف دس منٹ باقی رہ گئے ہیں میرا ارادہ مسجد کے اندر روزہ کھولنے کا تھا لیکن باہر کا منظر اخوت‘ بھائی چارہ سخاوت اور اسلامی اقدار کا ایسا روح پرور نظارہ پیش کررہا تھا کہ میں نے بھی باہر بچھی ہوئی پلاسٹک پر عوامی انداز میں روزہ افطار کرنے کا فیصلہ کیا۔قریب ہی بچھی ہوئی پلاسٹک پر میں بیٹھا ہی تھا کہ سامنے والی صفوں پر ایک ہنگامہ برپا ہوگیا جسے دیکھ کر میں اپنی سنجیدگی برقرار نہ رکھ سکا اور بے اختیار ہنسی چھوٹ گئی۔ ہوا یہ کہ کوئی صاحب جوس کے ٹین والے ڈبے کئی کارٹنز میں لے کر آئے اور لوگوں میں بانٹنے کی بجائے انہوں نے یہ کارٹنز ایک خالی جگہ پر رکھ دیئے تاکہ لوگ اپنی خود پسند کے جوس کا ڈبہ اٹھا لیں۔ ان کا فیصلہ تو مناسب تھا لیکن لوگ ان ڈبوں پر اس طرح جھپٹے کہ دیکھتے ہی دیکھتے ان ڈبوں کے حصول کے لئے جم غفیر جمع ہوگیا اور ایسی چھینا چھپٹی ہوئی کہ تو یہ ہی بھلی۔ کسی کے ہاتھ ایک ڈبہ آیا اور کوئی دو دو لے کر چلتا بنا۔ تین منٹ کے بعد ایک صاحب شربت کی بھری ہوئی بالٹی لے کر آئے اور کاغذ کے گلاسوں میں شربت بانٹنا شروع کردیا۔ غرض روزہ افطار سے دو تین منٹ پہلے تک افطاری بانٹنے کا سلسلہ جاری رہا۔ جو لوگ باہر روزہ کھولنے کی بجائے اندر مسجد میں جارہا تھے کہ انہیں صفوں میں بیٹھے ہوئے افراد چاہے وہ عرب ہوں ‘ایرانی ہوں‘سوڈانی ہوں‘یمنی ہوں‘ پاکستانی یا بھارتی ہوں بڑی محبت سے آواز دے کر اپنے پاس روزہ کھولنے کی دعوت دے رہے تھے۔ اس قسم کے ایمانی مناظر خانہ کعبہ میں بھی دیکھنے میں آتے ہیں۔افطاری کی چیکنگ کا یہاں بھی وہی نظام ہے جو مسجد نبوی میں ہے۔موذن کی آواز کے ساتھ ہی گولے بھی چھوڑے جاتے ہیں۔ اذان کے بعد تقریباً پندرہ منٹ کا وقفہ دیا جاتا ہے۔ میں نے اندازہ لگایا ہے کہ اس وقفہ میں روزہ دار افطاری کے ساتھ ساتھ اگر کھانا بھی کھانا چاہیں تو آسانی سے کھا سکتے ہیں۔ سب سے حیرت انگیز چیز میں نے مسجد نبوی اور حرم شریف میں یہ دیکھتی کہ لاکھوں افراد افطاری کے بعد ان ہی پندرہ منٹ میں صفوں کی صفائی بھی کر لیتے ہیں صفوں پر بچھی ہوئی پلاسٹک میں بچی ہوئی چیزیں لپیٹ کر قریبی پڑے ہوئے ڈرمز میں ڈال دیتے ہیں یا اپنے پاس رکھ لیتے ہیں تاکہ نماز کے بعد باہر جاتے ہوئے ان چیزوں کو ڈرمز میںڈال دیں۔ صفائی کا عمل روزہ داروں اور خدمت پر مامور افراد کی جانب سے اس تیز رفتاری کے ساتھ ہوتا ہے کہ یہ محسوس ہی نہیں ہوتا کہ یہاں کچھ دیر پہلے لاکھوں افراد کھا پی رہے تھے۔میں نے اس بات پر بہت غور کیا کہ اگر عام حالات میں کسی دعوت میں صرف ایک ہزار افراد کے کھانے کے بعد صفائی کا عمل شروع کیا جائے تو مکمل صفائی کے لئے کافی وقت درکار ہوگا مگر یہ اللہ کی برکتیں ہیں کہ اذان اور نماز کے وقت کے وقفہ میں صرف پندرہ منٹ کے اندر مکمل صفائی کردی جاتی ہے۔روزہ افطار کرنے کے مناظر جہاں اسلامی روایات کی عکاسی کرتے ہیں وہاں ہمیں زندگی میں ڈسپلن ‘ بھائی چارہ اور محبت کا درس بھی دیتے ہیں گو ہمارے ہاں بھی یہ عمل جاری ہے لیکن ہمارے ہاں افطاری بھیجنے کا رواج مساجد میں ہے اور وہ بھی زیادہ تر جمعرات اورجمعہ کے روز افطاری بھیجی جاتی ہے۔کاش ہم بھی مسجد نبوی اور حرم شریف میں رائج اسلامی اقدار کو اپنے معاشرہ میں عام کریں اور مساجد میں افطاری بھیجنے کے ساتھ ساتھ اپنی گلی محلے اور علاقے کے غریب غربا افراد تک افطاری پہنچانے کی عادت کو اپنا کر لوگوں کی دعائیں بھی لیں اور ثواب دارین بھی حاصل کریں۔

مغرب میں مشرق کی بیٹی سعیدہ وارثی اگر کھوکھلی شخصیت کی مالک ہوتیں تو اپنے ماضی کے سارے حوالے بھول بھال کر یورپ کے رنگ میں رنگی جاچکی ہوتیں۔ نہ انہیں پاکستان یاد ہوتا نہ وہ پاکستانی خواتین کی فلاح و بہبود کیلئے ”سویرا فاﺅنڈیشن“ کی بنیاد رکھتیں نہ وہ گوجرخوان کی ثناءخواں بنتی اور نہ ہی بیول کے ببول انہیں یاد رہتے۔
سعیدہ تو پیدا ہی برطانیہ میں ہوئیں۔ وہ پیدائشی طور پر برطانوی ہیں۔ ان کی تعلیم وتربیت اور پرورش و پر داخت بھی یورپ کے مرکز و محور میں ہوتی رہی۔ ہمارے پاکستانی نوجوان یہاں پیدا ہوتے ہیں ۔بیس بائیس برس کی بہاریں لوٹتے ہیں اور جب انہیں یورپ کا ویزا ملتا ہے اور وہاں روشن دنوں کی تلاش میں سرگرداں ہوتے ہیں تو اپنا آپ ہی بھول جاتے ہیں۔

صفدر حسین ایک مزدور تھے ایسے پڑھے لکھے بھی نہیں تھے۔کسی شہر سے تعلق نہیں بلکہ گوجرخان کے ایک دیہات میں جوان ہوئے۔ رعنائیاں اور رونقیں نصیب میں نہیں تھیں۔غربت اور افلاس نے جب دھاوا بولا تو ”روشن دنوں“ کی تلاش میں برطانیہ جاپہنچے۔ یہ بات بھی خود سعیدہ وارثی نے بتائی۔ بغیر کسی شرمندگی کے بتائی۔ اپنے ماضی کے کسی باب کو چھپایا نہیں۔ صفدر حسین کی بیٹی ایک مزدور کی بیٹی ہونے پر فخرکا اظہار کرتے ہوئے بتاتی ہیں کہ ان کے والد نے ایک مل میں مزدوری کرنا شروع کردی۔ مزدوری کا یہ عمل کئی برسوں پر محیط ہے ۔صفدر حسین کا حسن یہ کہ انہوں نے اپنی بیٹیوں کو اپنے ماضی سے جوڑے رکھا۔ اولاد کو ”مغرب زدہ“ نہیں ہونے دیا۔ برطانوی معاشرے کی اچھائیوں کو اپنانے کی ترغیب دی اور برائیوں سے بچنے کا حوصلہ بخشا۔ حافظ قرآن سعیدہ اپنی پانچ بہنوں کے ساتھ مغرب کے اندر مشرق کی بیٹی بن کر آگے بڑھتی رہی۔
سعیدہ کی سعادت مندی کہ انہوں نے چالیس برس بعد برطانیہ کی حکمران پارٹی کی چیئرپرسن شپ اور حکومت میں وزارت کا عہدہ پانے کے بعد سرکاری حیثیت میں اپنے پہلے دورہ کے لئے بھی پاکستان کو ہی منتخب کیا۔ وہ شلوار قمیض میںملبوس عام پاکستانی خواتین کی طرح دکھائی دیں۔”میرا یہ پاکستانی لباس یورپ میں فیشن بن جائے گا“ انہیں اپنی وضع قطع پر کس قدر فخر ہے!
ہمارے ڈرامہ نگار اور پروڈیوسرز جدیدیت کے نام پر تنگ جینز پہنے ہوئے شرم و حیا سے عاری اداکاراﺅں کی منڈی سجاتے ہیں۔پاکستانی ڈرامے دیکھ کر یوں محسوس ہوتا ہے کہ پورا پاکستان ننگا ہو چکا ہے ۔انہیں سعیدہ وارثی جیسی بیٹی دکھائی نہیں دیتی۔ٹی وی میڈیا صرف عورت کی ”نسوانیت“ مارکیٹ کرنے میںمصروف ہے۔ مشرق نے سعیدہ جیسی بیٹیاں بھی پیدا کی ہیں۔ ان کی سوچ اور ان کا لباس آخر غالب کلچر کیوں نہیں بن پارہا۔ محترمہ بے نظیر بھٹو شہید نے عوامی سیاست میں آنے کے بعد اپنے سر سے کبھی چادر نہیں اتاری تھی ۔آخر وہ بھی تو آکسفورڈ کی پڑھی ہوئی اور امیر ترین حکمران کی بیٹی تھیں۔قائداعظمؒ کی بہن مادر ملتّ نے کب دوپٹہ اتارا تھا؟ افسوس کہ خودی اور خودداری کے احساس کو ہمارے دماغوں سے زبردستی کھرچا جارہا ہے۔
سعیدہ وارثی نے اپنے گاﺅں میں اپنے لوگوںکے درمیان جاکر بڑی خوبصورت باتیں کیں۔”پاکستان میں ایک مثبت اور انقلابی تبدیلی لانا ناممکن نہیں اگر پاکستان کے حکمران اور عوام اسلامی احکامات اور تعلیمات کی روشنی میں تمام فیصلے کریں تو تبدیلی جلد ہی ممکن ہوسکتی ہے۔ اگر میں مسلسل محنت اور جدوجہد سے اس مقام پر پہنچ سکتی ہوں تو پھر دوسرے پاکستانی یہ سب کچھ کیوںنہی کرسکتے۔“
مجھے ذاتی طور پر سعیدہ وارثی پر فخر ہے کہ میرا تعلق بھی گوجرخان سے ہے ۔ میں نے سعیدہ کے گھر جا کر وہاں ان کے عزیز واقارب کے خیالات براہ راست سنے۔ ایک قومی اخبار ان خیالات اور تاثرات کو رنگین ایڈیشن میں شائع کرچکا ہے۔سچ یہ ہے کہ گوجر خان ہی نہیں پوری پاکستانی قوم نے سعیدہ وارثی سے اچھی امیدیں وابستہ کر رکھی ہیں۔
سعیدہ وارثی کی سعادت مندی کی یہ انتہا ہے کہ انہوں نے خود آگے بڑھ کر پاکستان کے حوالے سے بعض ذمہ داریاں اپنے سر لے لی ہیں۔ ”میرے علاقے کے لوگ مجھ سے بہت توقعات رکھتے ہیں۔ میری ذمہ داری ہے کہ میں پاکستان اور برطانیہ کو قریب تر لاﺅں“۔برطانیہ جیسے ملک میں بھارتی لابی بہت مضبوط ہے اور کشمیر کے معاملے پر دس برس قبل تک برطانیہ کا موقف پاکستان کے موقف سے قریب تر تھا لیکن اب برطانیہ کے پالیسی ساز اداروں میں بھارتی لابی نے اپنے رنگ جمانے شروع کردیئے ہیں۔ پاکستان کی خوش نصیبی کہ اسے سعیدہ وارثی جیسی سفارتکار مل رہی ہیں۔ اب انگلینڈ میں اسلام آباد کی خوبصورت آواز سنائی دےتی رہے گی!

بعض سیاسی حلقے سپہ سالار جنرل پرویز کیانی کی مدت ملازمت میں توسیع کو ”متنازعہ“ بنانے کی معصومانہ کوششوں میں مصروف ہیں۔ مسلم لیگ (ن) کے قائد میاں محمد نوازشریف نے جنرل (ر)مشرف کی طرف سے ہونے والے برے سلوک کا غصہ بھی جنر ل کیانی کے بارے میں کئے گئے فیصلہ کو تنقید کا نشانہ بنا کر ٹھنڈا کیا ہے حالانکہ نہ سارے جرنیل مشرف کی سوچ کے حامل ہوتے ہیں اور نہ ہی سارے وزرائے اعظم جناب میاں محمد نوازشریف کی طرح جلد باز اورمختار کُل بننے کے جنون میں مبتلا ہوتے ہیں ۔

نہ یہ 1998ءہے اور نہ ہی کارگل جیسا کوئی ناکام آپریشن ہوا ہے۔ زمینی حقائق بالکل مختلف ہیں اور وہ حقائق یہ ہیں کہ افواج پاکستان گزشتہ سولہ ماہ سے اپنے ہی وطن میں دشمن کی طرف سے مسلط کی گئی پراکسی وار میں الجھی ہوئی ہے ۔ سوات میں جس طرح ہماری بہادر مسلح افواج نے آپریشن راہ راست میں دشمن کا صفایا کیا ہے اس پر خود امریکی اور بھارتی حلقے انگشت بدنداں ہیں۔ مشرف کی طالع آزمائی نے افواج پاکستان کے امیج کو اندرون اور بیرون ملک اس قدر داغ دار کردیا تھا کہ عام پاکستانی شہری کے چہرے پر فوج کا نام سنتے ہی نفرت کی لکیریں ابھر آتی تھیں۔کور کمانڈرز پرکروڑ کمانڈرز کی پھبتی زبان زدعام ہوچکی تھی اور پاکستانی افواج کو فائٹنگ آرمی کی بجائے گورننگ آرمی کا طعنہ دیا جارہا تھا۔ یہ جنرل کیانی کی پیشہ وارانہ سوچ ہی تھی جس نے فوج کے اندر ایک نئی روح پھونکی‘ سپاہی کا اعتماد بحال کیا اور افواج پاکستان دنیا کی بہترین‘منظم اور فاتح فوج بن کر سامنے آئی۔دشمن کے پھیلائے ہوئے بارودی جال کی ہر کڑی کو اپنی جانوں کے نذرانے دے کر فوج نے کاٹا اور پاکستانیوں کو ”یرغمالیوں“ کے چنگل سے نکال کر آزاد کردیا۔ آج حالت یہ ہے کہ دشمن کے اکاّ دکاّ خودکش حملہ آور چھپ چھپا کر وارداتیں تو کرتے ہیں لیکن باقاعدہ فورس کا وجود نہیںرہا۔ اور ایسے مجروح ہوئے ہیں کہ پاکستان کی جغرافیائی حدود کے اندر اپنی آزاد ریاست قائم کرنے کے دعوے کرنے والے اب افغانستان کے غاروں میں جا چھپے ہیں۔دہلی والے پریشان ہیں کہ کابل کے ذریعے انہوں نے پاکستان کو توڑنے کے جو منصوبے بنائے تھے وہ سب کے سب افواج پاکستان کے حوصلوں کے سامنے خواب و خیال ہو کر رہ گئے ۔آپریشن راہ راست کے بعد راہ نجات آپریشن بھی زوروں پر ہے۔شمالی وزیرستان دشمن سے خالی کرایا جاچکا ہے اور چند روز بعد محسود قبائل واپس اپنے گھروں کا رخ کر رہے ہیں ۔خدا سے امید یہی ہے کہ پاکستان کو پاک آرمی ہر طرح کی سازشوں سے نجات دلا کر ہی دم لے گی۔
جنرل کیانی کو ملازمت میں توسیع دینے کے پیچھے حکمرانوںکی کیا نیت ہے اس بارے کچھ نہیں کہا جاسکتا لیکن حقائق سے یہ احساس ابھرتا ہے کہ جناب کیانی کی طرف سے اپنی مدت ملازمت کی توسیع کے حوالے سے کبھی کسی دلچسپی کا اظہار سامنے نہیں آیا۔جب آئی۔ایس ۔آئی کے ڈی جی کو ان کے عہدے پر برقرار رکھنے کا فیصلہ ہوا تھا تو ہمارے کچھ دوستوں نے بتایا تھا کہ اس فیصلے سے قومی اور عسکری پالیسیوں کے تسلسل میں مدد ملے گی اور یہ کہ جنرل کیانی کی فراغت کے بعد آئی ۔ایس۔آئی آنے والے نئے چیف کو بہتر طور پر مشاورت دے سکے گی۔ یہ بات میرے ذاتی علم میں ہے کہ افواج پاکستان کے شعبہ تعلقات عامہ سے قربت رکھنے والے بعض دانشوروں اور کالم نگاروں کی طرف سے ایسے مضامین چھپے جن میں چیف آف آرمی سٹاف کی مدت ملازمت میں توسیع کی نظریے کی مخالفت کی گئی تھی۔
ملکوں کی اپنی ضرورتیں ہوتی ہیں۔جوں جوں وقت گزر رہا ہے۔امریکہ‘ بھارت اور کابل کی طرف سے جنرل کیانی کی مدت ملازمت میں توسیع کے حوالے سے پیدا ہونے والی ”تشویش“ بھی سامنے آرہی ہے ۔مجھے خدشہ ہے کہ پاکستان کا گھیراﺅ کئے ہوئے ان طاقتوں کے زرخرید بعض اخبار نویس اور سیاست دان آنے والے دنوں میں چیف آف آرمی سٹاف کے خلاف مزید زہر اگلیں گے اور ان کی کوشش ہوگی کہ منفی پروپیگنڈا سے متاثر ہو کر جنرل کیانی خود ہی کوئی فیصلہ کر لیں۔
جنرل کیانی نے کابل میں صدر کرزئی کے ساتھ اور اسلام آباد میں امریکیوں کے ساتھ جتنی ملاقاتیں کی ہیں۔ ان میں یہ باور کرایا ہے کہ افواج پاکستان کے اہداف کسی غیر ملکی طاقت کے مفادات کے طابع نہیں ہوسکتے۔ کہاں آپریشن کرنا ہے اور کس طرح کرنا ہے اس کا فیصلہ پاکستانی مفادات کے تحت ہی کیا جائے گا۔ اس پر امریکی حلقے سٹ پٹائے ہوئے دکھائی دیتے ہیں۔دوسری تکلیف دہ بات بھارتی حلقوں کے لئے ہے اور وہ ےہ کہ سپہ سالار نے اپنی قومی قیادت کے ساتھ مشاورت کے بعد امریکیوں پر واضح کردیا ہے کہ پاکستان جنوبی ایشیاءمیں بھارت کی بالادستی کے امریکی منصوبے کو قطعاً قبول نہیں کرتا اور تیسرا معاملہ بعد از امریکہ افغانستان کے معاملات ہیں۔یہ جنرل کیانی ہی ہیں جنہوں نے کھل کر کہا ہے کہ دہشتگرد پاکستان سے افغانستان نہیں بلکہ افغانستان سے پاکستان میں داخل ہوتے ہیں اور یہ کہ افغانستان کے معاملات کو سدھارنے کے لئے بھارت نہیں پاکستان کا کردار لازمی اور لازوال ہوگا۔ پاک چین ایٹمی تعاون کے معاملے پر بھی حکومت اور کیانی کا موقف امریکہ اور بھارت کے لئے بہت تکلیف دہ بنا ہوا ہے۔ یہ وہ حقائق ہیں جن کے سبب حکومت پاکستان نے جنرل کیانی کو ہی چیف کے عہدے پر برقرار رکھنے کا فیصلہ کیا ہے۔نیا آرمی چیف نہ لانے کا مطلب ہی یہ ہے کہ پاکستان اس وقت کوئی ایسا خطرہ مول نہیں لے سکتا جس سے اس کے مفادات کو گزند پہنچ سکتی ہو!

یہ ملاقاتیں بھی عجیب ہیں۔جب میل ملاپ کے سارے راستے بند ہوں اور فریقین کوماضی مرحوم کی محبتیں ڈسنے لگیں تو پھر کونسا طریقہ نکالاجائے کہ شریفانہ طرز سیاست پر حرف بھی نہ آئے اور ملاقات کا سبب بھی پیدا ہوجائے۔ اس کی زندہ اور تازہ ترین مثال کالا باغ ڈیم کے اشو پر سینٹ کے اندر مسلم لیگ (ن) اور (ق) کے ارکان کا یک زبان ہونا ہے ایک ایسا اشو جسے خود مسلم لیگ (ن) اور(ق) نے”وسیع تر قومی مفاد“ میںدفنا دیا تھا‘قومی وحدت کو ڈیم پر قربان نہ کرنے کا اعلان بھی کیا تھا‘متبادل

ڈیمز بنانے کے آپشنز دے کر اپنے ووٹروں کومطمئن کردیا تھا اب اچانک سیاسی گورکنوں نے اس مردہ ایشو کے استخوان کو وقت کے قبرستان سے کھود کر نکالا جھاڑ پونچھ کر قومی ضرورت کی طشتری میں سجایا اور سینٹ کے بجٹ اجلاس میں اس کو اپنی مسیحائی سے زندہ کردیا۔آج ہم ایک بار پھر یہ خوشخبری سن رہے ہیں کہ کالا باغ ڈیم بنے گااور (ن) اور (ق) لیگ ملکر اس کارخیر کو سرانجام دیں گی۔ایک بار پھر پتہ چلا کہ ڈیم کے حق میں بولنے والے غدار ہیں اور اس کی مخالفت کرنے والے انتہائی محب وطن ہیں۔پھر معلوم ہوا کہ اے۔این۔پی نے اقتدار کے ایوانوں کو یرغمال بنا رکھا ہے اور پھر انکشاف ہوا ہے کہ پی پی پی ‘اے این پی ‘ایم کیو ایم‘سندھی قوم پرست‘بلوچ قوم پرست سب اس کالے‘کلموہے ڈیم کے خلاف لاشیں گرانے پر آمادہ ہیں اور مسلم لیگ(ن) اور (ق) پنجاب کی آواز بن کر ایوانوں میں گونج رہی ہے!
نواز لیگ کا ایک سیاسی پرابلم ہے۔نواز لیگ اپنے اوپر لگے ”فرینڈلی اپوزیشن“ والے لیبل کو دھونا چاہتی ہے۔میثاق جمہوریت کے ”ٹرکل ڈاﺅن ایفیکٹ“ کے ذریعے جناب نوازشریف کی جلا وطنی ختم ہوئی‘نااہلیت اہلیت میںبدلی اورجناب شہبازشریف پنجاب کے وزیراعلیٰ ہیں۔اٹھارہویں ترمیم نے دونوں بھائیوںکو مسلم لیگ (ن)کا تاحیات رہبر اور ان کی اولاد کو ولی عہدوں کا درجہ دے دیا۔ آئندہ مکمل بھاری مینڈیٹ کی توقع ہے۔”وزیراعظم نوازشریف“ کے نعرے کانوں میں رس گھولتے اور روح کو بے چین رکھتے ہیں۔ کھیل بچا کر رکھنا ہے اس لئے موجودہ حکومت کے خلاف ”عوام“ کو سڑکوں پر نہیں لانا۔ لیکن ایسا بھی نہ ہوکہ ”فرینڈلی“ ایک طعنہ بن جائے اور آئندہ الیکشن میں ووٹ بینک پنجاب بینک کی طرح دیوالیہ ہوجائے اس لئے کوئی ایسا ایشو کھڑا کیا جائے جس کے ذریعے کم از کم پنجاب کا ووٹر بددل نہ ہو۔ اس غرض کے لئے کالا باغ ڈیم ایک مفید ایشو ہو سکتا ہے۔
مسلم لیگیوں کے اتحاد کے لئے بعض حلقے دباﺅ بڑھا رہے ہیں۔آئندہ انتخابات میں پی پی پی کا صفایا کرنا ہے اس غرض کےلئے تمام مسلم لیگیوں کو متحد ہوجانا چاہیے۔ایک فکر پروان چڑھ رہی ہے۔میاں برادران چوہدری برادران کے علاوہ باقی ماندہ مسافروں کو کسی نہ کسی طور ایڈجسٹ کرنے پر آمادہ ہیں لیکن چوہدری برادران چاہتے ہیں کہ سینٹ سے فارغ ہوجانے کے بعد آئندہ کے سیٹ اپ میںان کے راستے کھلے رہیں۔چوہدری پرویز الٰہی مسلم لیگ (ن) کے خلاف ”اعدادوشمار“ جاری کرتے رہتے ہیںتاکہ سودا ایسا ہو کہ پلڑا (ن) لیگ کی طرف بالکل ہی نہ جھک جائے۔چوہدریوں کو علم ہے کہ آنے والے مارچ کے بعد انہیںپیدل مارچ کرکے گجرات جانا پڑے گا اس لئے کالا باغ ڈیم کے ایشو پر (ن) لیگ کی ہمنوائی کی جائے۔ شائد رائے ونڈ والوں کے دل نرم ہوجائیں اور سینہ چاکان چمن سے سینہ چاکوں کا ملاپ ہوجائے!
جانتے ہیں(ن) والے بھی اور (ق) والے بھی کہ کالاباغ ڈیم نہیں بنے گا چاہے اس کا نام عبدالغفار خان ڈیم بھی رکھوا دیا جائے توبھی نہیں بن سکتا۔ جنرل پرویزمشرف کا شکریہ ادا کرنا چاہیے کہ انہوں نے ڈیم نہیںبنایاورنہ ڈکٹیٹر کے ایک حکم سے ڈیم بن سکتا تھالیکن بعض ایشو وراثت میں آتے ہیں اور آئندہ آنے والوں کے لئے جوں کے توں چھوڑ دیئے جاتے ہیں۔مشرف نے اپنے اقتدار کے آٹھ برسوں میں اس ایشو کو دوبار استعمال کیا۔ میاں برادران بھی اب اسے دوسری مرتبہ استعمال کر رہے ہیں۔آخر استعمال کی چیز ہے!
آج کی سیاست ایکبار پھر ڈیم کے ڈھنڈورے پیٹ رہی ہے ۔(ن) اور (ق) شرمندہ شرمندہ ایک دوسرے کے قریب آرہے ہیں ۔ڈیم کنارے ملاقاتیں حسین لگتی ہیں۔دیکھئے معانقے کب ہوتے ہیں!

پاک ایران تعلقات کو سرد مہری کا شکار کرنے کےلئے ہمارے ہاں بعض اوقات سپانسرڈ قسم کی خبریں اچھالی جاتی ہیں لیکن ہفتہ بھر ایران میںرہ کر اور وہاں کے لوگوں سے مل کر دل انتہائی مطمئن ہوا ہے کہ اہل ایران نہ صرف یہ کہ پاکستان کے بارے میں بے پناہ محبت رکھتے ہیں بلکہ اس محبت کے اظہار کا کوئی موقع ہاتھ سے جانے نہیں دیتے۔ انقلاب ایران سے قبل بھی ایرانی اور پاکستانی اقوام میں بھائی چارے کی فضا ہی تھی لیکن اسلامی انقلاب کے بعد دونوں ملکوں کے درمیان ”اسلامی جمہوریہ“ کے لفظ نے معنوی اعتبار سے قربت کو فروغ دیا ہے اور علامہ اقبالؒ کی فارسی شاعری کے حوالے نے ایرانی اور پاکستانی بہن بھائیوں کو قلبی طور پر بھی یک جان دو قالب بنا ڈالا ہے۔

ایران میں ایک فروٹ شاپ پر رُکا اور تربوز کا بھاﺅ پوچھا۔ ریٹ ہزاروں تمن تھا‘ میں نے اقبال کا فارسی شعر پڑھ کر اپنا تعارف کرایا تو دُکاندار اپنی نشست سے اٹھا ‘مصافحہ کیا اور جواباً اقبال لاہوری کے چند اشعار سنائے اور تربوز کی خریداری پر پورے پانچ سو تمن کی رعایت دیدی۔
یہ ایک سرکاری قسم کا دورہ تھا۔ پاکستان رائٹرز یونٹی کا صدر ہونے کی حیثیت سے اپنے گروپ کا میں سربراہ بھی تھا۔ اسلام آباد میں ایران کے ہردلعزیز سفیر جناب ماشاءاللہ شاکری سے ایران کے حوالے سے گاہے بگاہے گفتگو ہوتی رہتی ہے۔ لیکن ایران جا کر وہاں کے حالات کو دیکھنے کا اشتیاق تھا۔رہبر انقلاب جناب امام خمینیؒ کی برسی کے حوالے سے ایران میں ہونے والی تقریبات کے سلسلے میں دنیا بھر سے مندوبین کو تہران بلایا گیا تھا۔پاکستان سے بھی تمام بڑے شہروں سے اہل قلم و قرطاس کی نمائندگی موجود تھی۔ اسلام آباد سفارتخانے کی طرف سے نہایت سرعت کے ساتھ ہمارے سفر کے تقاضے پورے کئے گئے ۔ ہمیںکراچی سے تہران جانا تھا۔ تہران ایئرپورٹ پر اترتے ہی ہمیں ”معزز مہمان“ کا پروٹوکول مل چکا تھا۔ایئرپورٹ کے باہر ہمارے ناموں کی تختیاں لئے ایران کے مستعد افسران استقبال کے لئے کھڑے تھے۔
رہائش گاہ پہنچنے کے بعد ہمیں آنے والے چار دنوں کی تقریبات کا شیڈول دے دیاگیا۔ گھومنے پھرنے کے لئے کافی وقت تھا اور بڑی بات یہ کہ بھارت یا کسی اور ملک کی طرح آزادی سے گھومنے پر کوئی پابندی یا ہدایت بھی نہیں تھی۔ خفیہ ایجنسیوں کی طرف سے بھی کسی قسم کے ”گائیڈ“ مسلط نہیں تھے۔ اس لئے سامان وغیرہ رکھنے کے بعد تہران دیکھنے نکل کھڑے ہوئے۔تہران کی سڑکوں پر مرد و زن کی چہل پہل تھی۔ عورتیںاسلامی پردے میںاپنی اپنی منزل کی جانب رواں دواں تھیں۔مجال ہے کہ کوئی بھی لفنگا ان کو دیکھ کرگھورے‘ سیٹی بجائے یا آواز کسے۔ نوجوان لڑکیاں اورکالج کی طالبات بغیر کسی خوف و خطر بڑی خوداعتمادی کے ساتھ اپنے روزمرہ کے معمولات سرانجام دیتی دکھائی دیں۔ اسلام آباد اور لاہور کے برعکس تہران کی سڑکوں اور فٹ پاتھوں پر خواتین کی موجودگی سے کسی قسم کی شہوت یا شیطانی ہوس کا تصور سر ہی نہیں اٹھاتا۔میرے نزدیک یہ تبدیلی اسلام اور انقلاب کا سب سے ثمر ہے جو کسی خوش نصیب معاشرے کو نصیب ہوسکتاہے۔
ہمارے ساتھ انڈیا سے آئے ہوئے مسلمان بھی تھے۔ ان لوگوں سے غیر رسمی گفتگو میں تلخی پیدا ہوگئی۔انہوں نے اپنی دلیل اور منطق کی تان اس پر توڑی کہ دنیا بھر میں ہونے والی دہشتگردی کا مرکز پاکستان ہے اور اس مرکز کوآئی ایس آئی چلا رہی ہے ۔بھارتی مسلمانوں کی ایسی سوچ ہرگز نہیں۔یہ ”را“ کے سدھائے ہوئے لوگ ہوںگے۔ میں نے ان سے سوال کیا کہ کیا کشمیریوں کی عزت و آبرو سے کھلینے اور بے گناہ کشمیریوں کے قتل کرنے میں بھارتی افواج بھی آئی ایس آئی سے ہی ہدایات لیتی ہیں؟کیا گجرات میںمسلمانوں کا قتل عام آئی۔ایس۔آئی نے کرایا تھا اور کیا بابری مسجد کا انہدام ہماری گزارش پر کیا گیا تھا؟ ابھی میں نے چند سوال ہی کئے تھے کہ وہ ناک بھوں چڑھاتے محفل سے اٹھ کر چلے گئے۔
کشمیر کی بات چلی تو ہمارے اپنے پاکستانی دانشور اقبال حیدر بھارت کی بولی بولتے نظر آئے۔”چھوڑیں جی۔کشمیر کے لئے اور کتنے لاکھ لوگوں کی قربانی دینی ہے۔آگے چلیں“۔ مجھ سے رہا نہ گیا اور عرض کی کہ آپ تو جمہوریت پسند ہیں۔ہمارے انکل نسیم انور بیگ فرماتے ہیں کہ مسئلہ کشمیر کا ایک آسان سا حل ہے کہ کشمیریوں سے پوچھ لیا جائے کہ وہ ہندوستان کے ساتھ الحاق کرنا چاہتے ہیں یا پاکستان کے ساتھ ملنا چاہتے ہیں۔یہ ایک خالص جمہوری‘ انسانی اور اخلاقی سا مطالبہ ہے اسے مان لینے میں آخر حرج کیا ہے اور آپ اس قدر خفا کیوںہیں؟
ایک عظیم الشان سیمینار بھی تھا۔اسلامک کلچر اینڈ ریلیشنز آرگنائزیشن کے صدر اور مردِ مجاہد ایرانی صدر جناب احمدی نژاد کے مشیر ڈاکٹر مہدی مصطفوی کی طرف سے دعوت تھی۔ جگہ جگہ مرگ بر امریکہ‘مرگ بر اسرائیل کے بینرز اور نعرے درج تھے۔جب ایک مقرر کی تقریر کے بعد یہ نعرے لگے تو میں نے بھی نعرے لگوانے شروع کردیئے۔“مرگ برامریکہ‘مرگ براسرائیل ‘مرگ بر انڈیا“ایرانی اور پاکستانی احباب نے بڑے زور سے ”مرگ بر انڈیا ‘ کہا اور یہوں بھارت سے آنے والا وفد کھسیانا ہو کر رہ گیا۔
مشہد گئے۔روضہ امام رضا ؒپر حاضری دی ‘ایران کی معاشی صورتحال کا بغور جائزہ لیا۔ اس ہفتہ بھر سفر کے دوران ایک احساس پختہ ہوگیا کہ ایرانی قوم پر امریکی پابندیوں کاکوئی منفی اثر مرتب ہونا محال ہے۔ ایسی کوئی دوسری خوددار قوم شائد اس وقت کرہ اراض پر ناپید ہو۔ خودداری ہی اہل ایران کی قومی پہچا ن ہے۔
پاکستان اور ایران کی قربتوں کا اس امر سے اندازہ لگایا جاسکتا ہے کہ تمام تر بیرونی دباﺅ کے باوجود پاکستان نے گیس معاہدہ کر ڈالا اور تمام تر خطرات کے باوجود ایرانیوں نے گیس پائپ لائن بچھانی شروع کردی ہے۔پاک ایران تعلقات میں رخنہ ڈالنے والوںکی امیدوں پر ایک بار پھر پانی پھر گیا!

اپر کلاس دانشوروں کے ہاں نظریات اور عقائد کو عمومی طور پر تنگ نظری سے تعبیر کیا جاتا ہے۔ آجکل تو فیشن بن گیا ہے کہ جوں ہی کسی نے خدا ‘رسول اور قرآن کے حوالے سے ملکی معاملات میں کوئی دلیل لانے کی کوشش کی وہیں اسے مذہبی انتہا پسندی کا لیبل لگا کر ناقابل سماعت قرار دے دیا جاتا ہے۔ قیام پاکستان کی وجوہات بھی نئی نئی گھڑنے کی کوشش کی گئی ہے۔جنرل (ر) پرویز مشرف کے دور میں ان لوگوں کو کھل کھیلنے کا خوب موقعہ دیا گیا جو دو قومی نظریے کی بجائے پاکستان کے قیام کو معاشی سبب قرار دیتے ہیں۔ لنڈا بازار کے ایسے دانشور بھی ہمارے قلب و ذہن پر کوڑے برساتے رہے جو پاکستان کو برطانیہ اور امریکہ کی سازش کا نتیجہ قرار دیتے ہیں۔ ہم نے تو ایسے ایسے اجنبیوں کو ٹی وی سکرین پر گھنٹوں مغز خوری کرتے سنا جو تقسیم ہند کو حادثہ قرار دے کر تحریک قیام پاکستان کا سرے سے انکار کردیتے ہیں۔پاک بھارت ایک ہوجانے کے فوائد کا نقشہ کھینچنے والے چہرے ہنوز ہمارے پردہ بصارت پر پرچھائیاں بکھیرتے ہیں۔شائد پاکستان وہ واحد بدقسمت ملک ہے جس کے نام نہاد پڑھے لکھے لوگ پینسٹھ برس گزرنے کے بعدبھی اس کے وجود کے اسباب پر قوم کو الجھائے ہوئے ہیں۔ کوئی اس مملکت اسلامیہ کو سیکولر بنانے پر تلا بیٹھا ہے اور کسی نے اسے ناکام ریاست ثابت کرنے کے لئے ادھار کھایا ہوا ہے۔ سرحد پار کے نامی گرامی بھارتی دانشور تو پاکستان کو ایک حقیقت تسلیم کرتے ہیں لیکن ہمارے اپنے دانشور دو قومی نظریے کا ذکر کرتے ہوئے شرمندگی میں ڈوب جاتے ہیں۔
خیال یہی تھا کہ سابق عسکری معززین کی محفل میں نظریہ پاکستان کا حوالہ بے زاری کا سبب بنے گا کہ مشرف دور کی روشن خیالی کا سب سے بڑا ہدف ہمارا یہی عظیم عسکری ادارہ تھا۔ تھنکرز فورم کے اجلاسوں میں جانے کا اتفاق ہوتا رہتا ہے اور فورم والوں کی مہربانی کہ مجھ جیسے سویلین کو اپنی ممبر شپ سے نواز رکھا ہے۔ یہاں سابق چیف آف آرمی سٹاف اور ضرب مومن جیسی شہر آفاق فوجی مشقوں کے خالق جناب جنرل (ر) اسلم بیگ جیسے حقیقی دانشمند تشریف لاتے ہیں۔ آئی ایس آئی کے سابق سربراہ اور امریکیوں کے سامنے پاکستانی مفادات کا بھرپور طریقے سے مقدمہ لڑنے والے شیرجرنیل‘ جنرل (ر) اسد درانی اس فورم کے چیئرمین رہے اور آجکل پاکستان کے اندر گڈ گورنس کے کلچر کو فروغ دینے کے لئے عدلیہ کی خودمختاری کے فکری مددگار ہیں۔فورم کے موجودہ چیئرمین سابق ایئرمارشل کلیم سعادت کا وجود سعید اس فورم میں ہونے والے بحث مباحثے کو سنجیدگی بخشتا رہتا ہے۔ کرنل (ر) بختیار حکیم ایک ادبی شخصیت ہیں اور مخلص استاد بھی۔ وہ اس فورم کے روح رواں اور سیکرٹری جنرل ہیں۔ جنرل (ر) ایس ایچ زیدی جیسی نابغہ روزگار شخصیت بھی فورم کے اجلاسوں کو رونق بخشی ہے۔ ایئرمارشل مسعود اختر‘ بریگیڈیئر نور ‘کرنل ریاض جعفری‘ نیوکلیئر سائنسدان سلطان بشیر محمود جیسے احباب اس فورم میں خاص مقام رکھتے ہیں۔ دانشمندی اور دور اندیشی کا یہ حسین گلدستہ ہر ماہ ایک بار سجتا ہے۔ یہاں قومی اور بین الاقوامی امور کو بڑی باریک بینی سے دیکھا جاتا ہے اورفورم اپنے ممبران کے خیالات و افکار کو تازہ بہ تازہ رکھتا ہے۔ اگر یہاں ہونے والی بحثوں کو سمیٹ اور سنوار کر کتابی شکل دی جائے تو اہل اقتدار اور اہل سیاست کے لئے قابل عمل مشاورت کی باقاعدہ دستاویز بن جائے۔
گزشتہ اجلاس تھنکرز فورم پاکستان کا تیسرا سالانہ اجلاس تھا جس میں ممبران کے علاوہ بھی احباب نے شرکت کی۔ فورم کی خوبصورت روایت یہ ہے کہ تمام شرکاءکو بولنے کا موقع دیا جاتا ہے۔ میں نے خصوصی دعوت پر آئے ہوئے اپنے دوست کالم نگار بیگ راج کا تعارف کرایا اور بتایا کہ وہ نظریہ پاکستان ٹرسٹ اسلام آباد چیپٹر کے سیکرٹری جنرل ہیں۔ اس پر شریک محفل ایک سابق آئی جی پولیس نے رائے دی کہ ہماری قوم ابھی تک نظریوں کے چکر میں پڑی ہے۔ اور عمل کی بات کوئی نہیں کرتا۔ اس پر میں نے نظریہ پاکستان ٹرسٹ کے اشتراک سے بنائے گئے اپنے نظریاتی سکول کا حوالہ دیا اور معززممبران کو دورے کی دعوت دی ۔جسے کرنل بختیار حکیم نے بخوشی قبول کیا اور ذاتی حیثیت میں ہر ماہ دو گھنٹے کا وقت دینے کا وعدہ کیا۔دیگر ممبران نے بھی نظریاتی پاکستان کے حوالے سے اپنے مختصر لیکن مثبت کمنٹس دیئے اور آخر پر جناب کلیم سعادت نے ان بکھرے ہوئی آراءکو یکجا کرتے ہوئے پورے ہاﺅس کی طرف سے اعلان کیا کہ ”نظریہ پاکستان ہی قیام پاکستان کی صحیح بنیاد ہے اور نظریہ پاکستان غلط نہیں ہمارے اعمال اس نظریے سے مطابقت نہیں رکھتے“۔ نہ صرف یہ کہ عسکری کلاس کے دانشوروں کے اس فورم میںنظریہ پاکستان کی زوردار بازگشت سنائی دی بلکہ طے ہوا کہ فورم کے آئندہ اجلاس میں بحث کا موضوع ہی نظریہ پاکستان ہوگا اور اس موضوع پر جناب سلطان بشیر محمود لیکچر دیں گے جبکہ راقم کو بطور پینل ایکسپرٹ شرکت کا حکم دیا گیا ہے۔

اگر جسونت سنگھ یہ حقیقت قبول نہ بھی کرتے تو بھی پاکستان کے لازوال وجود پر قطعاً فرق نہ پڑتا۔ یہ اس صالح فکر بھارتی رہنما کی اندر کی سچائی ہے کہ انہوںنے نہ صرف اپنی مشہور تصنیف میں اس حقیقت کو تسلیم کیا بلکہ پاکستان میں اپنی کتاب کی مارکیٹنگ کے دوران رسمی اور غیر رسمی گفتگو میں بھی اعادہ کرتے رہے۔ اسلام آباد کلب میں بھارت کے سابق وزیرخارجہ اور آج کل ہندو انتہا پسندوں کی نفرتوں کے ہدف اس سلجھے ہوئے دانشور سے مجھے ملاقات کا موقعہ ملا۔

جسونت سنگھ بڑی محبت سے ملے اور رائٹرز یونٹی کے حوالے سے اچھے جذبات کا اظہار بھی کیا۔ یہ ان کی بڑائی ہے ۔جتنا پیار انہوں نے قائداعظمؒ محمد علی جناح کی تعریف میں چند جملے لکھ کر کمایا ہے اگر قیام پاکستان کے جواز کو بھی کھلے دل و دماغ سے تسلیم کر لیتے تو پاکستانی ان کے حق میں جلوس نکالتے اور ان کے استقبال کے لئے اسلام آباد ایئرپورٹ پر پہنچ جاتے۔بہرحال سرحد پار سے ان چند جملوں کو بھی ٹھنڈی ہوا کاجھونکا تصور کرنا چاہیے اور امید رکھنی چاہیے کہ بی جے پی کے دیگر رہنما تقسیم ہند کے ادھورے عمل کی تکمیل کرتے ہوئے کشمیریوں کو اقوام متحدہ کی قراردادوں کے مطابق رائے شماری کا حق دینے میں روایتی ہٹ دھرمی ترک کردیںگے۔ یہی واحد حل ہے ۔اسی طرح ہم بھارت کو پرامن ہمسائے کے طور پر دیکھ سکیں گے۔
پاک بھارت دوستی کے راگ الاپنے اور امن کی آشا کا واویلا کرنے والوں کو چند حقیقتیں اپنے پیش نظر رکھنی چاہیں۔امریکہ میںایٹمی ہتھیاروں کے حوالے سے ہونے والی سنتالیس ممالک کی عالمی کانفرنس کے موقعہ پر بھارتی لابی نے پاکستان کے ایٹمی اثاثے غیر محفوظ ثابت کرنے پر ایڑی چوٹی کا زور لگایا۔ اگر یقین نہ آئے تو ان دنوں کے بھارتی اخبارات‘امریکی اخبارات اور اسرائیلی اخبارات کا مطالعہ کرکے دیکھ لیجئے۔ چونکہ پاکستان لاالہ اللہ کے فلسفے پر وجود میں آیا تھا اس لئے پہلے کی طرح اس بار بھی تائید غیبی آئی اور وزیراعظم کی سربراہی میں جانے والے پاکستانی وفد کو غیر متوقع طور پر کامیابی ملی۔ کم از کم ایک بار ہی سہی دنیا کی طاقتوں نے پاکستان کے ایٹمی اثاثوں کو محفوظ تسلیم کر لیا اور امریکی صدر بارک اوبامہ نے بھارتی لابی کی طرف سے تیار کئے گئے صحافیوں کے سامنے پاکستان کی بھرپور وکالت کر ڈالی ۔ بھارتی وفد اور بھارتی وزیراعظم من موہن سنگھ صدر اوبامہ کا منہ تکتے رہ گئے اور ”رام رام“ کرتے امریکہ سے واپس چلے گئے ۔ امریکہ کے اپنے مفادات نے وہاں کے مقتدر حلقوں کو مجبور کردیا کہ وہ دنیا کو بتائیں کہ ”پاکستان ایک حقیقت ہے“ اور حقیقتوں کو جس قدر جلد تسلیم کر لیا جائے اسی قدر معاملات جلدی سلجھائے جاسکتے ہیں۔
بھارت کے عوام تو خود ہندو انتہا پسندوںکے ہاتھوں یرغمال بنے ہوئے ہیں۔ ورنہ ثانیہ مرزا اور شعیب ملک کی شادی کو اس قدر انا کا مسئلہ نہ بنایا جاتا۔ پل بھر میں ایف آئی آر کاٹ کر پاسپورٹ ضبط کر لیا گیا۔شعیب ملک کو تھانے بلایا گیا اورتھانہ تھانہ ہوتا ہے کوئی فائیو سٹار ہوٹل نہیں۔پاکستانیوں نے بحیثیت مجموعی شعیب ملک کے شادی کے فیصلے پر کسی ناراضگی کا اظہار نہیں کیا بلکہ مختلف شہروں میں شادی کی علامتی تقریبات منائیں۔ پورے بھارت میںکسی ایک جگہ پر بھی اس شادی پر خوشی کا اظہار نہیںہوا۔شیوسینا کے کارکنوں سے لے کر کانگریس اور بی جے پی کے رہنماﺅں تک کسی ایک کو توفیق نہیں ہوئی کہ وہ شعیب ملک کو لفظی مبارکباد ہی دے دیں۔ پاکستان کی حکومت نے گو جلد بازی کا مظاہرہ کیا لیکن فردوس عاشق اعوان اس شادی میں شرکت کے لئے خود تشریف لے گئیں اور بجلی کو ترستی پاکستانی قوم کی طرف سے پچیس تولے سونے کا تاج اپنی ”بہو“ کے سر سجا کر آئیں۔ بھارتیوں کو پھر بھی شرم نہیں آئی۔ وہ جوابی طور پر شعیب ملک کو ایک جوڑا کپڑے دے سکتے تھے لیکن ان کے اندر کی میل اور دلوں کی کدورتیں دور ہوں تو پھربات بنے اور ہمسائیگی کا تاثر قائم ہوسکے ۔دوستی تو دور کی باتیں ہیں جو صرف سازشی زبانوں پر سجتی ہیں۔پاکستانیوں کے خلاف آج بھی بھارت کے اندر نفرت کا یہ عالم ہے کہ ثانیہ بیچاری کو فوراً وضاحت کرنا پڑی کہ ”میںنے پاکستانی سے شادی کی ہے پاکستان کی بہو نہیں“۔حالانکہ اس کا سب سے بڑا اعزاز یہی تھا کہ اسے پورا پاکستان اپنی بہو کا درجہ دینا چاہتا ہے لیکن ہندو انتہا پسندوں کے خوف نے اسے اس مقدس رشتے سے دور رہنے پر مجبور کردیاہے ۔ہر سال دلہن کے منہ سے یہ لفظ بھی نکل سکتے تھے کہ ”میں نے ایک مسلمان سے شادی کی ہے لیکن لفظ ”پاکستانی“ کا ادا ہوجانا اس حقیقت کو آشکار کرتا ہے کہ ہندوستان کے مسلمان کسی نہ کسی صورت میں پاکستان کی حقیقت سے عشق ضرور کرتے ہیں۔
ہاں ۔ پاکستان ایک حقیقت ہے اور اس حقیقت کو دل و جان سے تسلیم کرنے کا نام ہی دور اندیشی ہے۔پاکستان کے چند نام نہاد دانشور جو پاکستان اور بھارت کو ایک کرنا چاہتے ہیں انہیں بھی تسلیم کرنا ہوگا کہ پاکستان بذات خود ایک حقیقت ہے اور اس حقیقت کو مٹانے کی تمام کوششیں ناکام ہوجائیں گی۔ یہ کوئی مشرقی اور مغربی جرمنی نہیں جو ایک ہوجائیں نہ ہی شمالی اور جنوبی کوریا ہے جن کے ایک ہوجانے کی خواہش پالی جائے۔ وہ بھارت ہے اور یہ پاکستان ۔سچ صرف یہی ہے بھارت انصاف کرے تو ہمسایوں کی طرح رہا جاسکتا ہے۔ ایک نہیں ہوا جاسکتا ہے!

کسی سچے پاکستانی کے بارے میں یہ تصور بھی نہیں کیا جاسکتا کہ وہ دانستہ طور پر کسی ایسے ادارے‘تحریک یا پروپیگنڈے کا حصہ بنے گا جس کا فائدہ بالواسطہ یا بلاواسطہ طور پر پاکستان کے ازلی دشمن بھارت کو پہنچ سکتا ہو۔ اگر کچھ پاکستانی نما لوگ جان بوجھ کر ایسی سرگرمیوں میں ملوث ہےں تو پھر ان کو ”را“ کا ایجنٹ کہنے میں کوئی ہچکچاہٹ نہیں ہونی چاہیے۔ افواج پاکستان‘آئی ایس آئی اور دیگر حساس اداروں پر بے جا تنقید پر مبنی جوتبصرے یا کالم شائع ہوتے ہیں

ان کے اکثر لکھنے والے انتہائی محب وطن ہیں البتہ ان کے اندر صحافتی عمل پذیری اس قدر بدرجہ اتم پائی جاتی ہے کہ اصلاح کے جذبے سے سرشار تحریرمیں بھی بعض اوقات بھارتی مفادات کو تقویت بخشنے والے نکات ہوتے ہیں ۔بعض اوقات ہمارے لکھاری اور دانشور اپنی تحریر اور گفتگو کو ”انکشافات“ کی چاشنی چڑھانے کے لئے ایسے بے بنیاد ”سچ“ بھی بول جاتے ہیں جو سرحد پار کئے جانے والے پاکستان مخالف پروپیگنڈے کی ضرورتوں کو پورا کردیتے ہیں۔

آجکل پاکستانی پریس کا ایک بڑا حصہ آئی ایس آئی کے سربراہ کی مدت ملازمت میں توسیع کو اپنا موضوع بنائے ہوئے ہے۔ فاضل لکھاریوں اور تبصرہ نگاروں کو اعتراض ہے کہ مدت ملازمت میں توسیع سے ”ملٹری اسٹیبلشمنٹ“ کے طاقتور ہونے کا اندیشہ پیدا ہوا ہے اورفوج کے اندر اپنے من پسند کے فیصلے کرنے کی روش جڑ پکڑ رہی ہے۔

اگرآپ آج کل بھارتی نیوز چینلز پر ان کے دفاعی اور سیاسی تجزیہ نگاروں کی گفتگو سن رہے ہوں تو حیرت ہوتی ہے کہ آئی ایس آئی کے سربراہ کی مدت ملازمت میں توسیع پر اسی انداز ‘ لہجے اور دلیل کے ساتھ تبصرے ہوتے ہیں جو انداز پاکستانی ‘ انگریزی روزناموں اور بعض ”اصول پسند“ کالم نگاروں کا ہے۔ بھارت میں عمومی طور پر آئی ایس آئی کے خلاف زہر تو اگلا ہی جاتا ہے ‘لیکن موجودہ سربراہ کے خلاف بھارتی حلقوںکا غصہ دےدنی ہوتا ہے۔ کچھ سمجھ نہیں آتی کہ آخر آجکل آئی ایس آئی بھارت کے لئے اس قدر تکلیف دہ کیوں ثابت ہورہی ہے۔؟

دو تین واقعات ایسے ہوئے ہیں جن سے بھارت کی پاکستان دشمنی بر مبنی منصوبوں کا بھرکس نکل گیا ہے۔ سوات کے اندر افواج پاکستان کو جس طرح حیرت انگیز کامیابیاں ملی ہیں اس کی توقع امریکہ‘ نیٹو فورسز اور بھارت کو ہرگز نہ تھی۔ اتنے قلیل وقت میںاتنے بڑے علاقے کو فسادیوں سے صاف کرانا اور پُرامن اور باعزت طریقے سے پچیس لاکھ لوگوں کو دوبارہ آباد کرانا وہ کارنامہ ہے جس پر بڑے بڑے عسکری اور سیاسی بزرجمہر ششدر ہیں۔سوات اور مالاکنڈ کے اندر وہاں کے رہائشیوں کی پاک فوج کے لئے والہانہ محبت بھارت کے لئے ایسا ہی حملہ ہے۔جیسے اس کا تھپڑ اسی کے منہ پر مار دیا گیا ہو۔ عام طالبانوںکو شائد علم ہی نہیں تھا کہ ان کے ہاتھوں میں جدید ترین اسلحہ کس کے پیسے سے خریدا گیا تھا۔ انہیں شائد ”را“ اور ”راما“ جیسے ناموں سے بھی واقفیت نہ ہوبہت کم جانی نقصان کےساتھ پاک فوج نے ایک لحاظ سے سوات اور مالاکنڈ کو پھر سے آزاد کرایا ہے۔ اور اس تمام کامیابی میں حکومت پاکستان افواج پاکستان اور خصوصاً آئی ایس آئی کی شاندار پلاننگ کا بڑا عمل دخل رہا ہے۔ بھارتی ذرائع ابلاغ اگرچہ نفرت سے ہی سہی لیکن اس شا ندار کامیابی کا زوردار طریقے سے اظہارکرتے ہیں اور سچ یہ ہے کہ آرمی چیف اور ڈی جی آئی ایس آئی کی سوچ میں مکمل ہم آہنگی بھارت کے لئے بہت تکلیف دہ ثابت ہورہی ہے۔

اداروں کے سربراہوں کی کوئی دائمی حیثیت نہیں ہوتی اور نہ ہی ہونی چاہیے۔ کوئی شخص کسی قومی پالیسی کے تسلسل کے لئے ناگزیر نہیں ہوتا۔لیکن کیا کیاجائے کہ اس ماہ کے آخرمیں امریکہ کے ساتھ سٹرٹیجک اشتراک پر مذاکرات ہوتے جارہے ہیں ۔آئی ایس آئی امریکیوں کو پاکستان کو بھوٹان نہ سمجھنے پر بڑی مہارت سے قائل کرچکے ہیں۔ جنرل کیانی کی لیڈر شپ امریکیوں کو یہ حقیقت سمجھانے میں کامیاب ہوئے کہ پاکستان اپنی سرزمین پر کسی غیر ملکی فوج کی طرف سے کوئی کارروائی برداشت نہیں کرے گا۔ افغانستان میں بھارت نہیں پاکستان کے سب سے زیادہ مفادات ہیں اور یہ کہ مسئلہ افغانستان کے حل میں پاکستان ہی کوئی کلیدی رول ادا کرسکتا ہے۔ یہ کہ پاکستان کا نیو کلیئر سسٹم پاکستانی ہاتھوں میں مکمل طور پر محفوظ ہے اور امریکہ پاکستان کو باقاعدہ ایٹمی طاقت تسلیم کرے۔یہ ہیں وہ معاملات جن پر پاکستان نے امریکہ کو تحریری اور ٹھوس اقدامات کرنے پر آمادہ کرنا ہے اور اس مہم کی ذمہ داری آئی ایس آئی کے سر پر ہوگی۔اگر ایسے نازک موقعہ پر ڈی جی کی تبدیل ہوتی توشائد پاکستان کا مقدمہ کمزور ہوجاتا۔ امریکہ کی یاری بھی کوئی قابل فخر عمل نہیں لیکن کم از کم بھارت سے یاری نبھانے کی سوچ بھی تبدیل کرنے کی ضرورت ہے۔!