پچیس برس سے اسلام آباد کے دیہی علاقے میں متوسط اور غریب گھرانوں کے بچوں کی تعلیم و تربیت میں مصروف ڈاکٹر نعیم غنی سے جب بھی ملاقات ہوتی ہے وہ بے سکول بچوں کی دردناک کہانی سناتے ہیں۔”جوبچے کسی مدرسے یا سکول میں پڑھ رہے ہیں حکومت کی ساری توجہ ان کی طرف ہوتی ہے لیکن وہ اڑھائی کروڑ بچے جن کے لئے نہ سکول ہے نہ اُستاد وہ اسی معاشرے کا حصہ ہیں۔اُن کے بارے میں کسی کو فکر ہی نہیں”۔”حکومتوں کی اپنی ترجیحات ہوتی ہیں جس ملک میں تعلیم کا بجٹ ہی دو فیصد سے آگے نہ بڑھا ہو اُس مُلک میں دانش سکول ایک مذاق ہی لگتا ہے”۔
”تعلیم عام کرنا اور ہر بچے کو سکول میں داخل کرنا آئینی تقاضا ہے لیکن شائد آئی ایم ایف کا دبائو ہے کہ صحت اور تعلیم پر سرکاری خزانے سے رقم نہ لگائی جائے اور اسے پرائیوٹائزڈ ہی رہنے دیا جائے”۔
سُلطانہ فائونڈیشن کے اس زیرک چیئرمین کے پاس ٹھوس اعدادوشمار ہیں’دلائل ہیں اور درد دل بھی ہے۔ وہ ہر فورم پر بے سکول بچوں کا مقدمہ لڑتے ہیں۔اُن کی پریشانی کی بازگشت ایک سرکاری رپورٹ میں بھی سنائی دی ہے۔ وفاقی وزارت تعلیم اور تعلیمی منصوبہ بندی کی اکیڈمی ”ایپام” کی رپورٹ بہ عنوان ”پاکستان ایجوکیشن سٹیٹسٹکس” میں اعتراف کیا گیا ہے کہ پاکستان کے پانچ سے سولہ سال کی عمر کے تقریباً نصف بچے سکول میں نہیں پڑھتے اور سکول سے باہر بچوں میں لڑکوں کے مقابلے میں لڑکیوں کی تعداد کہیں زیادہ ہے۔پاکستان میں پانچ سے سولہ سال تک کے بچوںکی تعداد تقریباً پانچ کروڑ کے لگ بھگ ہے۔ اس طرح اڑھائی کروڑ بچے سکول سے باہر ہیں اور بغیر کسی تعلیم کے جوان ہورہے ہیں۔ رپورٹ میں اُن بچوں کا بھی ذکر ہے جو سکول میں داخل ہوئے لیکن انہوں نے پانچویں کلاس کے بعد سکول چھوڑ دیا۔ یہ بات بھی سامنے آئی ہے کہ پاکستان میں اسی فیصد سکول پرائمری سطح کے ہیں اور اُن میں سے تیس فیصد ایسے سکول ہیں جن میں صرف ایک استاد دستیاب ہے۔نصاب ‘ تعلیمی معیار اور اساتذہ کی پریشان کن صورتحال بھی سامنے لائی گئی ہے۔
اس رپورٹ پر تبصرہ کرتے ہوئے وفاقی وزیر تعلیم وتربیت جناب بلیغ الرحمان نے آئیں بائیں شائیں کرنے کے بعد ارشاد فرمایا ہے کہ یہ اتنی بڑی تعداد میں بچوں کا سکول سے باہر رہنا باعث ندامت ہے۔
بلیغ الرحمن اچھے وزیر ہیں کم از کم انہوں نے حقائق تسلیم کر لئے ہیں اور اپنی ندامت کا اظہار بھی کردیا ہے۔
حال ہی میں وزیراعظم پاکستان اپنی نورِ نظر محترمہ مریم نواز اور اپنے کار خاص جناب ڈاکٹر طارق فضل چوہدری کے ہمراہ وفاقی دارالحکومت کے کسی سرکاری سکول میں جلوہ گر تھے۔ وہاں انہوں نے ایک ماہر اتالیق کا رول اپناتے ہوئے ”معصوم” بچوں سے سوالات کئے’ ان کے ساتھ وقت گذارا اور سکول کی سہولیات بہتر بنانے پر احکامات جاری فرمائے۔ جب سے تعلیم کے پھیلائو کے لئے محترمہ مریم نواز صاحبہ کو امریکہ سے کروڑوں ڈالر ملے ہیں تب سے اسلام آباد کے سرکاری سکولوں میں پرائم منسٹر کی آمد کے سلسلے میں بھی چل نکلے ہیں۔ ایک رپورٹ میں بتایا گیا ہے کہ فیڈرل سکولوں میں ایسے بدقسمت سکول کثرت میں موجود ہیں جہاں بچیوں کے لئے ٹائلٹ کی سہولت دستیاب نہیں’ ایسے کالج موجود ہیں جہاں سٹاف نہیں ۔جب وزیراعظم کا دورہ ہوتا ہے تو سکول کی چمک دمک دیدنی ہوجاتی ہے۔ لیکن جونہی دورہ ختم ہوتا ہے پھر وہی اُجڑی بستیاں اور ٹوٹے بنچ نمودار ہوجاتے ہیں۔ ایک طرف میاں شہبازشریف کے بند ہوتے ہوئے دانش سکول ہیں اور دوسری طرف امید کی رسی سے بندھے وفاقی سکول ہیں۔ یوں محسوس ہوتا ہے کہ حکومت صرف درشنی اقدامات پر یقین رکھتی ہے۔ جب سکول جانے والے اڑھائی کروڑ بچوں کی حالت سُدھر نہیں پارہی تو جوبچے سکول سے واقف ہی نہیں اُن کے لئے کون پریشان ہوگا!
سُلطانہ فائونڈیشن نے اپنے یوسف صراف سنٹر کے ذریعے موقعہ سکولوں کا جال پھیلایا ہے۔ یہ بے سکول بچوں کو سکول میں لانے کی بجائے اُن کے گھروں ‘کارخانوں’دُکانوں اور کچی بستیوں کے اندر اُن کی تعلیم وتربیت کا قابل عمل منصوبہ ہے۔ فائونڈیشن نے ان بچوں کی عمر’ ذہنی قابلیت اور فراغت کو سامنے رکھ کر مخصوص نصاب ترتیب دیئے ہیں۔
”ہم نے ایک ماڈل دے دیا ہے۔ اس ماڈل کو جگہ جگہ دھرایا جائے تو چند سالوں میں اڑھائی کروڑ بچوں کو سکول میں داخل کئے بغیر تعلیم سے بہرہ مند کیا جاسکتا ہے”۔
ڈاکٹر صاحب نے ایک ملاقات میں ”موقعہ” سکولو ںپر روشنی ڈالتے ہوئے بتایا۔ یہ ایک انقلابی منصوبہ ہے۔چھوٹے پیمانے پر اسلام آباد میں عمل درآمد جاری ہے۔مخیر حضرات ایسے سکولوں کو گود لے رہے ہیں۔ یہ تحریک آگے بڑھ رہی ہے۔ اگر وزیر تعلیم شرمندہ ہونے کی بجائے ڈاکٹر نعیم غنی جیسے لوگوں سے مل لیں تومستقل شرمندگی سے قوم کو بچایا جاسکتا ہے۔

ایک بداندیش کالم نگار نے ”پانچ لاکھ خودکش” کے عنوان سے کالم لکھ کر قبائلی عوام کے جذبہ حب الوطنی کو مشکوک ٹھہرایا ہے۔دانشوروں کا المیہ ہی یہی ہے کہ وہ ان جانے خوف پھیلا کر سامنے کی خوبصورت حقیقتوں کا مذاق اڑانے میں ہی کمال قلم و علم ڈھونڈتے ہیں۔ کیا یہ بات روز روشن کی طرح عیاں نہیں ہے کہ شمالی وزیرستان میں ایک خاص فلسفہ کے حامل مسلح گروہ اپنی امارت قائم کرکے پاکستان کو تاخت و تاراج کرنے کی جانب بڑھتے چلے آرہے تھے۔ محب وطن قبائلی لوگ شروع شروع میں مزاحمت کرتے رہے اوروہاں مقامی رہائشیوں اور غیر ملکی جنگجوئوں کے درمیان خونی جھڑپیں بھی ہوتی رہیں لیکن جب ریاست اپنے لوگوں کا تحفظ نہ کرسکی اور وہاں کی سول انتظامیہ بھی خوفزدہ ہوکر ان خارجی عناصر کو راستہ دینے لگی تومقامی عوام خاموش ہوگئے۔ہمارے بعض دینی حلقے بھی جہاد کے نام پر گمراہ ہوئے ۔

امارات اسلامیہ افغانستان’امارت اسلامیہ ازبکستان ‘چین اور نہ جانے کہاں کہاں کی خیالی اسلامی ریاستوں کے ہیڈکوارٹرز یہاں سرگرم تھے لیکن ظلم کب تک جاری رہ سکتا ہے۔جب یہ لوگ اپنے ایجنڈے پر آگے بڑھے اور انہوں نے ریاست کے معاشی اور دفاعی اہداف کو تواترکے ساتھ نشانہ بنانا شروع کردیا تو پھر ایک ہی سوال تھا۔ملک انہیں دنیا ہے یا اس کی حفاظت کرنی ہے۔فیصلہ ہوگیا۔آپریشن کی حکمت عملی طے ہوگئی۔جراحی کے سارے عمل کو صرف اوپر کے چند فیصلہ سازوں تک محدود رکھنا ہی بہترین حکمت عملی ہوتی ہے۔ایسا ہی ہوا اور دشمنان قوم اور عوام کو اچانک آلیا گیا۔تحریک انصاف کی قیادت کو سوچنا چاہیے کہ آپریشن کا اعلان دہشت گردوں کو بھاگنے اور محفوظ مقامات پر منتقل ہونے کا موقع دینے کے مترادف ہوتا۔ جب گھیرا مکمل کر لیا گیا تو اب ضرورت تھی کہ سول آبادی کو بچایا جائے۔ فوجی حکمت عملی کی سب سے خوبصورتی ہی یہی کہ وہاں کی آبادی کا مکمل طور پر انخلاء ہوچکا ہے۔جو وہاں ہیں وہ صرف لڑنے والے گروہ ہیں۔ متحارب گروہوں کا خاتمہ لمحہ وار جاری ہے اور قرائن بتا رہے ہیںکہ بیس کروڑ پاکستانیوں کو خوفزدہ کرنے والے بیس دنوں میں ہی دم دبا کر بھاگ رہے ہیں۔درجنوں پکڑے گئے ہیں اور سینکڑوں ہلاک ہوچکے ہیں اور اس وقت تک ہلاک ہوتے رہیں گے جب تک یہ فتنہ ختم نہیں ہوجاتا۔
شمالی وزیرستان کے لوگوں نے اگر خودکش بمبار بننے کا فیصلہ کرنا ہوتا تو وہ بنوں کی طرف ہجرت نہ کرتے’افغانستان چلے جاتے۔ اب تو وہ اسی ہزار جو افغانستان چلے گئے تھے اور جن کو افغان حکومت نے اپنا ایجنٹ بنانے کے لئے ایک ایک لاکھ روپے بھی دیئے تھے وہ بھی واپس آرہے ہیں۔قبائلی عوام غریب ضرور ہیں لیکن وہ ہمارے دانشوروں کی طرح سودے بازیاں نہیں کرتے۔پاکستان کے ساتھ ہمیشہ کھڑے تھے’کھڑے ہیں اور کھڑے رہیں گے۔اس لئے کہ جتنی وہ اس ملک سے محبت کرتے ہیں اتنا یہ ملک بھی ان سے محبت کرتا ہے۔
دس لاکھ سے زائد ہمارے یہ محسنین ‘بنوں’کوہاٹ’کراچی’ لاہور اور راولپنڈی اسلام آباد میں مقیم ہیں۔ان کی رجسٹریشن ہی سب سے بڑا مسئلہ تھا کیونکہ شفاف طریقے سے ہر گھر تک امداد پہنچانا ایک چینلج ہوتا ہے۔دوہری رجسٹریشن کی شکایات بھی موجود تھیں۔جب تک رجسٹریشن نہ ہوتی امدادی ادارے کوئی بھی قابل ذکر دادرسی نہ کرپاتے۔اب حکومت کی طرف اضافی عید پیکج کا بھی اعلان کردیا گیا ہے۔ خیراتی اور امدادی اداروں کی طرف سے روزانہ ٹنوں کے حساب سے خوراک اور راشن پہنچ رہا ہے اور یہاں ہلال احمر جیسے ادارے انتہائی منظم اور مربوط انداز میں اپنے حصے کی امدادی سرگرمیوں میں مصروف ہیں۔پینے کے صاف پانی کی فراہمی بھی ایک اہم ضرورت ہے۔ بھلا ہو ہلال احمر کے چیئرمین جناب ڈاکٹر سعید الٰہی کا کہ انہوں نے بیس ہزار لٹر یومیہ کی پیداواری صلاحیت کا واٹر فلٹر پلانٹ لگا دیاہے۔متاثرین ٹھنڈا اور صاف پانی پیتے ہیں اور اس کا اہتمام کرنے والوں کو دعائیں دیتے ہیں۔
کہنے کا مقصد یہ کہ متاثرین کی دلجوئی اس لئے نہیں کہ یہ لوگ کہیں مخالف ہو کر خودکش حملہ آور نہ بن جائیں بلکہ اس لئے کہ یہ لوگ واقعتاً ہمارے محسن ہیں۔انہیں آئی ڈی پیز مت لکھو۔یہ محسنین پاکستان ہیں۔یہ کبھی خودکش بمبار نہیں بن سکتے۔بہت جلد باعزت واپسی اور بحالی کے منصوبے پر کام شروع ہونے والا ہے۔

 مظفر آباد کی ہردلعزیز شخصیت اور مغل قوم کے عظیم فرزند عارف مغل حکومت آزادکشمیر میں مشیر برائے وزارت اطلاعات و نشریات ہیں ۔گزشتہ دنوں انہوں نے اپنی بیٹی کی شادی پر مدعو کیا۔ ہمدم دیرنہ عظمت اللہ اور معروف صحافی اسد عباس بھی ہمراہ تھے۔ آجکل نظریہ پاکستان کی ترویج کے لئے کمر بستہ ہوں اوراللہ تعالیٰ کی کرم نوازی سے اس خدمت کے لئے بہتر سے بہتر مواقع میسر آرہے ہیں ۔ میں کیا اور میری ہستی کیا۔ ارادہ نیک ہو تو اسباب پیدا ہوہی جاتے ہیں۔عظمت اللہ نے بتایا کہ ان کے کلاس فیلو اور قائداعطم یونیورسٹی میں راقم کے ہاسٹل فیلوجناب فیاض علی عباسی آج کل پرنسپل سیکرٹری ٹو پرائم منسٹر کے عہدے پر فائز ہیں اور ان سے بھی ملنا ضروری ہے۔ باتوں باتوں میں یہ طے پایا کہ ممکن ہو تو فیاض عباسی صاحب کی وساطت سے وزیراعظم چوہدری عبدالمجید سے بھی ملاقات ہوجائے اور ان کو نظریہ پاکستان کے حوالے سے لٹریچر دیا جائے اور التماس کی جائے کہ پاکستان کے اساسی نظریہ سے آگاہی کے لئے تعلیمی اداروں میں خصوصی سرگرمیاں شروع کرائی جائیں۔

ملاقات طے پاگئی ۔ جناب وزیراعظم نے بڑی خندہ پیشانی سے ہمیں وزیراعظم ہائوس میں خوش آمدید کہا۔ چوہدری صاحب سے گفتگو شروع ہوئی۔ جب راقم نے قرآنی آیات اور علامہ اقبال کے اشعار کی روشنی میں ”نظریہ پاکستان اور نظریہ اسلام” کی وضاحت کی تو وزیراعظم نے نہ صرف اس کی تائید کی بلکہ انہوں نے اہم نکات پر دلائل دیئے۔مجھے یہ جان کر حیرانی ہوئی کہ ڈیل ڈول سے بظاہر سادہ دکھائی دینے والا شخص اندر سے کتنا گہرا اور سماجی اور سیاسی مسائل پر کس قدر مضبوط گرفت رکھتا ہے۔ پندرہ منٹ والی ملاقات اڑھائی گھنٹے تک جاری رہی۔ میں نے جناب ڈاکٹر مجید نظامی اور انکل نسیم انور بیگ (مرحوم) کی حوصلہ افزائی سے قائم ہونے والے نظریہ پاکستان سنٹر کی سرگرمیوں سے آگاہ کیا۔ مستقبل کے حوالے سے اپنے ارادوں اور منصوبوں سے آگاہ کیا اور تعلیمی اداروں میں طلبہ و طالبات کے دلوں میں اس نظریے کے ساتھ وابستگی پیدا کرنے کے لئے کی گئی کوششوں اور کاوشوں کا تفصیلی تذکرہ کیا۔جناب وزیراعظم نے بڑے انہماک سے گفتگو سنی اور پھر انہوں نے بتایا کہ وہ بھی یہی چاہتے ہیں کہ تعلیمی اداروں میں محض انگریزی پر ہی زور نہ دیا جائے بلکہ بچوں کے ذہنوں میں آغاز سے ہی پاکستان’ نظریہ پاکستان اور قرآن کے بارے میں فہم و ادراک پیدا کردیا جائے۔ وزیراعظم کا کہنا تھا کہ ہمیں اپنے بچوں کو اسلامی تعلیم دینی چاہیے تاکہ وہ ڈاکٹر اور انجینئر بن کر اس مٹی ‘اس تہذیب اور اسلامی اقدار سے جڑے رہیں۔”ان گائیڈڈ میزائل” تیار نہیں کرنے بلکہ سچے اور اچھے شہری ہی ہمارے اتحاد ‘یکجہتی اور ترقی کے ضامن ہوسکتے ہیں۔ان کا کہنا تھا کہ وہ یکساں نصاب متعارف کروانے کے لئے سرگرم عمل ہیں ۔انہوں نے کہا کہ نظریہ پاکستان سنٹر کو اس نصاب میں نظریاتی پہلوئوں کے حوالے سے تجاویز دینی چاہیں۔
وزیراعظم آزادکشمیر سے تفصیلی ملاقات کے دوران کشمیر کے مسائل اور پاکستانی حکومت کے طرز حکمرانی پر بھی بات ہوئی۔ چوہدری عبدالمجید کا کہنا تھا کہ کشمیریوں کے مسائل کے حوالے سے حکومت پاکستان کے حکام پوری طرح تعاون نہیں کرتے۔ وعدے تو بہت ہوچکے ہیں لیکن ان وعدوں کی تکمیل بڑا ہی پیچیدہ عمل ہے۔انہوں نے محترمہ بے نظیر بھٹو کو بار بار یاد کیا اور مرحومہ کی بے حد تعریف بھی کی۔انہوں نے کہا کہ میاں نواز شریف پاکستان کی آخری امید ہیں کیونکہ ان کے اندر کام کرنے کی صلاحیت موجود ہے۔اور ان کی عوام الناس میں following بھی موجود ہے۔انہوں نے کہا کہ سابقہ زرداری دور میں بھی بہت سی ایسی پالیسیاں دی گئی ہیں جن کے دوررس نتائج نکلیں گے۔ اور جن کے فوائد سے آنے والی حکومتیں اور عوام فائدہ اٹھائیں گے۔ ان کے مطابق جمہوریت کا تسلسل لازمی ہے۔اسی سے ترقی اور خوشحالی کے دروازے کھلیں گے۔وزیراعظم نے یہ بھی کہا کہ اگر میاں صاحب بھی اس ملک کو صحیح ڈگر پر نہ ڈال سکے تو پھر منزل بہت دور چلی جائے گی۔چوہدری صاحب نے مسئلہ کشمیر کے حوالے سے بھی اپنا موقف دھرایا اور انہوںنے کشمیر کے اندر توانائی کے لئے چھوٹے ڈیموں کی تعمیر کی بات کی۔ وہ منگلا ڈیم اپ رائزنگ کے حوالے سے لوگوں کی شکایات کا بھی ذکر کرتے رہے۔
وضح دار شخصیت رکھنے والے وزیراعظم نے بہترین تواضع کرنے کے بعد مجھے اپنی گاڑی میں بیٹھایا اور ہم عارف مغل صاحب کے ہاں شادی میں پہنچے۔ وزیراعظم نے وزراء سے میراا تعارف کروایا اورشادی کے اختتام پر انہوں نے بڑی چاہت سے دوبارہ آنے کی دعوت دی اور خود بھی اسلام آباد میں آکر تفصیلی ملاقات کا وعدہ کیا۔
ملاقات کے بعد احساس ہوا کہ چوہدری صاحب ایک ایسے وزیراعظم ہیں جن کا دل اپنے لوگوں کے لئے دھڑکتا ہے۔ وہ ہر شعبہ میں بہتری پیدا کرنے کے لئے ایک تڑپ رکھتے ہیں اور اس غرض کے لئے وہ اپنے سیاسی حریفوں تک سے بھی مشاورت کرتے ہیں۔
شادی سے فارغ ہوئے توہم فیاض عباسی کے ہمراہ وزیر تعلیم میاں عبدالوحید کے ہاں ان کی تیمارداری کے لئے گئے۔چوہدری محمد رشید’ وزیرتعمیرات عامہ و مواصلات اور سردار جاوید ایوب وزیر جنگلات سے بھی تفصیلی ملاقاتیں ہوئیں سکالرز کالج میں نظریہ پاکستان کے حوالے سے طلبہ و طالبات کے لئے ایک Motivational لیکچر دیااور سکالرز کلب کے افتتاح کے لئے بھی خاکسار کو عزت ملی ۔مظفرآباد آمد سے لے کر رخصتی تک شہد جیسے میٹھے انسان نصیر مغل کی محبتیں ہر دم ہمارے شامل حال رہیں۔ دل ان کے تحریری شکریے پر مجبور ہے۔

حکومت اپنے دکھوں کا مداوا نہیںکرپا رہی شہریوں کے دکھوں کا درماں کیسے کرے گی۔ڈبل شاہ سکینڈل کے بعد مفتیان کا مضاربہ سکینڈل سامنے آچکا ہے۔یہاں تو ہر طرف نسیان کے مریض دکھائی دیتے ہیں۔ماضی قریب کو بھول جاتے ہیں۔جن احباب نے مفتیان کو زیادہ منافع کے لئے بھاری رقوم فراہم کیں انہوں نے ڈبل شاہ کے انجام کو سامنے نہیں رکھا ورنہ وہ ایسی غلطی نہ کرتے۔چونکہ ہم بھول جانے کے عادی ہیں۔ اس لئے ایسے سکینڈل آئندہ بھی منظر عام پر آتے رہیں گے۔دوسری بڑی وجہ حد سے بڑھا ہوا لالچ بھی ہے۔ہمارے بینکوں نے منافع کی ایک شرح طے کر رکھی ہے۔انوسٹمنٹ پر اس سے ڈبل یا ٹرپل منافع کا تصور ممکن نہیں ہے لیکن جب کوئی شخص یا گروہ آپ کو بینک کی نسبت تین چار گنا زیادہ منافع دینے کی حامی بھرے تو طبعاً آپ اس کی طرف مائل ضرور ہوجائیں گے۔

مضاربہ سکینڈل میںتیسرا پہلو اعتماد اور اعتقاد کا ہے۔کوئی بھی مسلمان چاہے وہ کتنا ہی ان پڑھ یا سادہ لوح کیوں نہ ہو وہ یقین رکھتا ہے کہ سود لینا اور دینا حرام عوامل ہیں۔لہٰذا وہ بینکوں میں منافع پر پیسہ رکھنا اوراس کا سود کھانے سے حتی الوسع کتراتے ہیں۔ہمارے کاروباری حلقوں میں بہت سی تعداد ایسے لوگوں کی ہے جنہوں نے مجبوراً کوئی ایک بینک اکاﺅنٹ کھول رکھا ہے۔ باقی بہت سا کاروبار وہ بینک سے بالا بالا سر انجام دیتے ہیں۔پاکستان کے اندر بینکوں کے لٹنے اور دیوالیہ ہونے کے ایسے واقعات بھی ہیں کہ لوگ بینکوں کے کرنٹ اکاﺅنٹ میں بھی اپنی جمع پونجی رکھتے ہوئے ڈرتے ہیں۔ اسلامی بینکنگ نے مسلمان کھاتہ داروں کے اندر کچھ اعتماد پیدا کیا ہے لیکن ابھی بھی دولت کا بہت بڑا حصہ لوگوں نے غیر روایتی طریقوں سے محفوظ کر رکھا ہے ۔جہاں تک اعتماد کا تعلق ہے تو سچ یہ ہے کہ لوگوں کو ”ڈبل شاہ“ پر اندھا اعتماد تھا اور آج بھی بہت سے لوگ ”شاہ صاحب“ کو بے قصور سمجھتے ہیں۔”شاہ صاحب“ کی بیٹی آخری وقت تک دہائی دیتی رہی کہ ”شاہ صاحب کو رہا کردیں اور کاروبار کرنے دیں‘ سب کے پیسے منافع سمیت واپس آجائیں گے“۔ڈبل شاہ کے ”متاثرین“ جنہیں نیب اور میڈیا نے متاثرین قرار دیا تھا وہ نیب کے دفاتر کے آج بھی چکر کاٹتے ہیں لیکن بڑے کھاتے داروں کو رقوم واپس نہیں مل سکیں۔ڈبل شاہ اور ان کی فیملی کو ”چپ“ کروا دیا گیا ہے اور ”نیب“ نے اپنی اعلیٰ کارکردگی کے تاج میں ایک اور پر لگانے کا اعزاز حاصل کر لیا ہے۔دنیا کے کسی ملک میں ایسا ممکن نہیں کہ کوئی بینک اپنے تمام کھاتہ داروں کو بیک وقت رقوم واپس کرسکے۔ کیونکہ بینک آپ کا پیسہ لے کر کہیں لگاتا ہے اور جب تک وہ ڈیل میچور نہ ہو رقم کی واپسی مشکل ہوتی ہے۔بینک آپ کا پیسہ مجھے اور میرا پیسہ کہیں اور دے رہا ہوتا ہے۔پاکستان میں کسی نے خبر اڑا دی تھی کہ الفلاح بینک دیوالیہ ہوگیا ہے۔ہم نے دیکھا کہ کس طرح کھاتہ داروں کی دوڑیں لگیں اور ہر برانچ پر ”کھڑکی توڑ“ قسم کا رش تھا۔ مذکورہ بینک کو اپنے دوسرے بینکوں سے رقم منتقل کروا کے کھاتہ داروں کے منہ بند کرنے پڑے۔اگر مضاربہ کمپنیوں نے اپنے بھرپور اعتماد کی بنیاد پر لوگوں سے رقوم لی ہیں اور کمپنیاں بروقت منافع دے رہی تھیں تو آخر کیا ہوا کہ اچانک مفتیان کی پکڑ دھکڑ شروع ہوئی اور کھاتہ داروں کے منہ میں ”فراڈ“ کے الفاظ ڈال دیئے گئے۔ سوال یہ ہے کہ مفتیان کا موقف سامنے کیوں نہیں آنے دیا گیا۔ ان کا جو موقف سامنے آیا وہ پولیس اور نیب کی حراست کے دوران آیا۔مضاربہ متاثرین بے بس ہیں ان کی کھربوں روپے کی رقم ڈوب گئی ہے۔انہیں منافع مل رہا تھا۔ وہ مطمئن تھے بلکہ بہت خوش تھے۔ ان کے سامنے بڑی بڑی بلڈنگز دکھائی دے رہی تھیں۔بڑے بڑے سٹورز کھل رہے تھے۔ہوسکتا ہے کہ بیرون ممالک بھی کوئی بزنس کیا جارہا ہو۔مضاربہ بزنس کے خلاف سب سے بڑی دلیل یہ دی جاتی ہے کہ اتنا منافع ممکن ہی نہیں۔مجھے نیشنل بینک کے سابق عہدیدار نے بتایا کہ اگر بنکنگ سسٹم میں بینکوں کے کرائے‘تنخواہیں ‘کمیشن اور آپریشنل اخراجات ختم کردیئے جائیں تو خالص منافع مضاربہ سکینڈل میں بیان کردہ منافع کے قریب قریب ہی ہوجائے گا۔مضاربہ سکینڈل سے نیب کو کتنا کمیشن ملے گا ؟جو رقم وصول کی جارہی ہے اسے کس بینک میں رکھا جارہا ہے؟اس رقم پر سود کی رقم کس کی جیب میں جاتی ہے۔مفتیان کو پریس میں اپنا مﺅقف بیان کرنے کا موقع کیوں نہیں دیا گیا؟ پرائیویٹ مضاربہ کمپنیوں کو کس خطرے کے پیش نظر پھلنے پھولنے نہیںدیا جارہا؟ کیا مفتیان کیخلاف یہ سکینڈل بینکنگ سیکٹر‘میڈیا اور نیب کی کوئی مشترکہ سازش ہے؟۔یہ وہ سوالات ہیں جن کے جواب دیئے جانے چاہیں تاکہ سچ اور جھوٹ سامنے آسکے۔اسلامی نظریاتی کونسل کو اس سکینڈل کی از خود تحقیق کرنی چاہیے اور علماءکو اپنی آراءدینی چاہیں ۔کہیں سود خوروںنے اسلامی مضاربہ کے راستے روکنے کا کوئی منصوبہ ہی نہ بنا لیا ہوا!۔

Click here to View Printed Statement

بھارت میں عورت ذات پر حملوں کی خبریں سُن سُن کر کان پک گئے تھے۔ہرصاحب دل اور ضمیر جب عصمت دری کی خبریں سنتا ہے تو خون کے آنسو روتا ہے۔ آدمیت جہاں ہے وہ شیطانیت کیخلاف آواز بلند کرتی ہے۔ حیوانوں کے غول کسی حوا زادی کی عصمت کی چادر بمبئی میں تار تار کریں یا کسی معصوم دوشیزہ پر انگلینڈ میں حملہ ہوجائے خون کھولتا اور دل مجرموں کو سرعام پھانسی لگتے دیکھنا چاہتا ہے۔اسلام نے تو درندوں کے معاشرے میں عورت کو تقدس کی چادر اوڑھانے کا انقلابی کارنامہ سرانجام دیا اور آج جب کہ ایمان کا درجہ قرون اولیٰ والا نہیں پھر بھی عورت کیخلاف ہر جرم اور زیادتی کو بحیثیت مجموعی مسلمان نفرت اور حقارت سے دیکھتے ہےں۔

مسلمان معاشروں میں سوائے چند مادرپدر آزاد خواتین اور ان کے دم قدم سے دندناتی ہوئی این جی اوز عورت کو حجاب‘شرم اور تقدس سے محروم کرنا چاہتی ہیں لیکن پوری امت اس بات پر متفق ہے کہ عورت ماں ‘ بہن‘ بیٹی‘بہو اور بیوی کے روپ میں مردوں کی نسبت کہیں زیادہ بارعب‘بااختیار اور قابل احترام ہستی ہے۔ ان مقدس رشتوں کو کوئی شیطان یا انسان کے روپ میں چھپا حیوان اگر روندنا چاہے تو اسلام نے ایسے ناسوروں کیلئے دنیا میں سخت ترین سزائیں رکھی ہیں اور قیامت میں ان کے لئے دہکتی ہوئی آگ ہے۔ہم مطمئن تھے کہ کم از کم پاکستان میںسوائے اکا دُکا واقعات کے معاشرہ عورت کے احترام کا غماض ہے۔بھارت میں چونکہ ریاست اور مذہب دونوں اس معاملے میں بہت کاہل ہیں اس لئے وہاں پے در پے ایسے واقعات کی سمجھ آسکتی ہے لیکن پاکستان میں اس طرح کے خوفناک اور مہیب مناظر سمجھ سے بالاتر ہیں۔ایک ایسا ملک جس میں ہر وقت اللہ‘ رسول کا نام لیا جاتا ہو‘ہر وقت قرآن کی تلاوت ہورہی ہوتی ہے اور عورت کے حقوق پر عمدہ قوانین موجود ہیں وہاں درندگی اور شیطنیت کا کھیل کیوں کر جاری ہے۔ننھی بچی کی چیخیںپاکستانیوں کے دل و دماغ میں آج بھی کچوکے لگا رہی ہیں ۔تصور کرکے ہی دماغ پھٹنے لگتا ہے۔ہر صاحب اولاد سمجھتا ہے جیسے اس کی وہ اپنی بیٹی ہے۔اسلام جہاں ایسے قبیح جرائم میں ملوث درندوں کو شدید ترین سزاﺅں کا حکم دیتا ہے وہاں وہ جرائم کی تشہیر کو بھی روکتا ہے۔ لیکن جب سے پاکستانی معاشرہ آزاد میڈیا کے ہاتھوں یرغمال بنا ہے ‘ دہرے عذاب نے گھیر لیا ہے۔ ہمارے ٹی وی چینلز نے اس پانچ سالہ معصومہ کو بھی نہیں بخشا۔ اس کے بدنصیب والدین کی تصویریں ‘اس نیم بے ہوش بچی کی تصویریں ‘ اس واقعہ کو جس طرح نمک مرچ لگا کر ‘ اس کی جزئیات کو ہماری آنکھوں میں اتارا ہے اسی سے یوں لگتا ہے کہ ہمارا اجتماعی شعور ہی گمراہ ہوگیا ہے۔ننھی مجروحہ سب کی بچی ہے۔اخبارات نے اپنی سرکولیشن بڑھانے کے لئے نہ صرف یہ کہ فرنٹ پیج پر اس غریب کی تصاویر شائع کیں بلکہ اسی سے ملتے جلتے حادثات کو ڈھونڈ ڈھونڈ کر نمایاں کیا۔ یہ کیسی لذت صحافت ہے جو شیطانوں کو گلیمرائز کرتی ہے۔یہ ٹی وی کیمرے‘یہ فوٹوگرافر‘یہ کرائم رپورٹرز کیا انہوں نے خدا کو جان نہیں دینی۔اگر ان کی سٹوری نہیں اٹھے گی تو کیا ہوگا‘یہ دنیا سے تو نہیں اٹھائے جارہے۔اللہ نہ کرے کل اپنی کوئی عزیزہ کسی شیطان کے ہتھے چڑھ جائے‘یا کوئی بدنصیب رشتہ دارعورت کسی دھندے میں پکڑی جائے تو کیا یہ سب کچھ ہوگا جو ایک غیرت مند خاندان کے ساتھ کیا گیا ہے۔وہ بچی جوان ہوگی تو اس کے پاس سوائے خودکشی کے کون سا راستہ چھوڑا گیا ہے۔خاکم بدہن! لمحہ بہ لمحہ رپورٹنگ نے مجرموںکو پولیس اور قانون نافذ کرنے والے اداروں کے ہر اقدام اور موومنٹ سے آگاہ رکھا۔ وہ یقیناً ٹی وی دیکھ کر اپنی پوزیشنیں تبدیل کرتے رہے ہوں گے۔عام ناظرین یہ سوچنے پر مجبور ہیں کہ آج کا ہمارا آزاد میڈیا مجرموں کے ساتھ ہے یا مظلوموں کاساتھی۔ ہر جرم ٹی وی سکرین پر دکھایا نہیں جاسکتا۔ امریکہ یورپ اور مبینہ مہذب ممالک میں ایسے جرائم کو اندر کے صفحات پر لے جاتے ہیں اور ایسی خبریں بچوں کے سونے کے بعدنشر کی جاتی ہیں۔لیکن یہاں تو بریکنگ نیوز کی دوڑ نے ہر اخلاقی حد پھلانگ دی ہے ۔سول سوسائٹی میں اگر کچھ بھی شرم ہے تو وہ اس منہ زور اور حیوانی قسم کے میڈیا کیخلاف صف آراءہوجائے ورنہ یہ ہر گھر میں گھس کر خوف اور دہشت پھیلا دے گا۔ لوگ اپنے بچوں سے اخبار چھپاتے پھرتے اور خبرناموں کے سوئچ تبدیل کرتے تھک گئے ہیں ۔کوئی ہے جو اس خوش رہنے والی قوم کو میڈیائی درندوں سے نجات دلائے۔اگر اپر دیر کی شہادتوں کی خبریں نہ آتیں تو ہم آج بھی اپنی بیٹی کے ساتھ ہونے والی درندگی کے مناظر دیکھ رہے ہوتے۔درندوں کو سزا ملنی چاہیے اور انہیں چیرپھاڑ کر رکھ دینا چاہیے۔ لیکن درندگی کے پروموٹرز کا بھی ہاتھ روکنا ضروری ہوگیا ہے۔اللہ پاک کا حکم ہے‘”نیکی اور پرہیز گاری کے کامو ں میں تعاون کرو اور برائی اور گناہ کے کاموں میں تعاون نہ کرو“

اللہ پاک نے قرآن حکیم میں تمام انسانوں اور خصوصاً مسلمانوں کو اپنے روزمرہ کے معاملات باہمی مشاورت سے چلانے کا حکم دیا ہے ۔باہمی مشاورت دراصل جمہوریت کی روح ہے اور ووٹ اور الیکشن مشاورت کے عمل کو ممکن بنانے کا ایک طریقہ ہے۔ جمہوری حکومتوں پر لازم ہے کہ وہ منتخب ہونے کے بعد بھی ریاست کے معاملات وسیع تر مشاورت کے ذریعے طے کرتی رہیں‘جہاں مشاورت کا عمل ختم ہوا وہیں سے جمہوری آمریت نے سراٹھاناشروع کردیا۔مشاورت کا دائرہ کار صرف سرکاری امور تک محدود نہیں رہنا چاہئے۔بلکہ گلی محلے کے مسائل کے حل تک وسیع ہونا چاہیے۔ کسی بھی شہری کو دو طرح کے مسائل سے واسطہ پڑتا ہے۔

ایک کا تعلق تو ریاست اور اس کی پالیسیوں اور قوانین سے ہے اور دوسرا اس کی شہری زندگی اور اس سے متعلقہ امور سے ہے۔ صوبائی اور قومی پارلیمان کا کام قانون سازی کرنا ہے۔ اگر وہ ایسے قوانین بنائیں جن پر عمل درآمد سے عام شہری کی زندگی میں خوشحالی آئے اور احساس تحفظ ابھرے تو ہم ایسے قوانین کو فلاحی قوانین کہتے ہیں۔ہر وہ قانون جو انسان کے بنیادی حقوق کا تحفظ کرے وہ دراصل ”ہیومنٹرین لا“ کہلائے گا۔ اور جو جمہوری حکومت ایسے قوانین کا اجراءکرے اسے انسانی حقوق کی محافظ حکومت کہنا چاہیے۔اسلام کی تعلیمات اور آئین پاکستان میں قرارداد مقاصد کی روشنی میں انسانی حقوق کے خدوخال واضح کردیئے گئے ہیں۔ ہمیں یاد رکھنا چاہے کہ مسلمانوںکے انسانی حقوق بعض حدود کے اندر ہیں۔ ہم جنس پرستی اور دیگر حیوانی اور شہوانی خواہشات کو انسانی حقوق کے نام پر قبول نہیں کرسکتے۔ بہرحال قوانین کا دائرہ پارلیمان کے اختیار میں آتا ہے۔شہری حقوق بھی دراصل انسانی حقوق ہی ہیں۔ صاف پانی کی فراہمی ‘سڑکوں کی کشادگی‘ذرائع آمدورفت کی فراوانی‘ تعلیم اور صحت کے لئے سہولتیں اور سیوریج اور صفائی کے تمام معاملات بنیادی انسانی حقوق سے ہی منسلک ہیں۔لیکن یہ ایسے معاملات ہیں جن کے لئے شہریوں کو پارلیمنٹ اور ممبران پارلیمنٹ کے دروازے پر دستک دینے کی حاجت نہیں ہونی چاہیے۔ ایک گلی کے لوگ آپس میں مشاورت کرکے الیکشن کے ذریعے اپنے نمائندے منتخب کرکے اپنے ”سوک اشوز“کو حل کرسکتے ہیں۔پھر محلے کی سطح پر اور پھر قصبہ اور شہری کی بنیاد پر ایک نیٹ ورک بنایا جاسکتا ہے۔ اسی سوچ کو ”مقامی حکومتوں“ کے عنوان کے تحت عملی جامہ پہنایا جاتا ہے۔پاکستان میں بدقسمتی سے مقامی حکومتوں کا کبھی بھی کوئی موثر نظام نافذ نہیں ہوسکا۔سیاسی پارٹیوں کی ضد ہوتی ہے کہ گلی محلے کی حکومتوں میں بھی انہی کے نمائندے آگے آئیں۔ آمریت کے دور میں غیر سیاسی بنیادوں پر مقامی حکومتیں بنائی جاتی ہیں۔ یوں عوام کے مسائل کے حل کے وقت پارٹی پالیٹکس اور آمریت کا اثرورسوخ حاوی رہتا ہے۔ترقی یافتہ قوموں نے مقامی حکومتوں کے نظام کو بڑی کامیابی کے ساتھ آگے بڑھایا ہے اور شہر کے میئر کی ذمہ داری ہے کہ وہ شہریوں کے مسائل کو مشاورت سے حل کرے‘اس کے لئے اسے مرکزی حکومت کی طرف نہ دیکھنا پڑتا ہے نہ ہی اسے مالی معاونت کی ضرورت ہوتی ہے۔پولیس بھی میئر کے تابع ہوتی ہے اور یوں امن وامان کا مسئلہ بھی نہیں بگڑتا۔سپریم کورٹ کی طرف سے مقامی حکومتوں کے انتخابات کا حکم آچکا ہے۔ بعض صوبوں نے اس پر کام بھی شروع کردیا ہے۔ توقع یہی ہے کہ بہت جلد یہ مرحلہ طے ہوجائے گا۔لیکن ضرورت اس امر کی ہے کہ منتخب میئر‘یا کونسل چیئرمین پارٹی پالٹیکس سے بالاتر رہیں۔جہاں پارٹی آتی ہے وہیں نفاق شروع ہوتا ہے‘جمہوری سوچ کا گلہ دبا دیا جاتا ہے اور شہریوں کے شہری اور انسانی حقوق غصب ہونا شروع ہوجاتے ہیں ۔متنازعہ مقامی حکومتیں صرف تنازعات پیدا کریں گی اور عوام ان حکومتوں کے معرض وجود میں آجانے کے بعد بھی بے مقام ہی رہیں گے۔

Click here to View Printed Statement

سیاستدانوں نے قومی اسمبلی اور سینٹ کے اجلاسوں میںدل کھول کر ایک دوسرے کی دُرگت بنائی ہے۔تنگ آمد بجنگ آمد کے مصداق وزیر داخلہ نے اپوزیشن کو جواب آں غزل جو سنائی تو ذرائع ابلاغ بھی عش عش کر اٹھے۔ سکندر بمقالہ زمرد کے نت نئے پہلو سامنے آچکے ہیں جن میں سے بعض دلچسپ’کچھ حسرتناک اور چند عبرتناک بھی ہیں۔ اس واقعہ سے کون کیا سیکھتا ہے۔ یہ اپنے اپنے ظرف کی بات ہے۔بہرحال عوام جو کہ تماشبین ثابت ہوئے۔ پولیس جو کہ نااہل ثابت ہوئی ‘میڈیا جو کہ غیر ذمہ دارثابت ہوا اور حکمران جو کہ متذبذب ثابت ہوئے۔ اگر چاہیں تو اپنی اپنی حدود میں رہ کر خود احتسابی کا عمل مکمل کرسکتے ہیں اور یوں ہم آنے والے اس نوعیت کے حادثوں میں مناسب ردعمل کے اظہار کا سلیقہ سیکھ سکتے ہیں ۔

لیکن اگر مقصد ایک دوسرے کو نیچا دکھانا اور پوائنٹ سکورنگ ہو تو پھر سکندر آئندہ بھی یوں ہی آتے رہیں گے اور زمردخان بھی ایسے ہی پیدا ہوتے رہیں گے۔سکندر شو سے متعلقہ تمام اداروں اورافراد کے منہ میں زبان ہے اور وہ بڑے دھڑلے کے ساتھ اپنا اپنا مئوقف لوگوں تک پہنچا رہے ہیں لیکن اس شو کے اصل فریق جس کی کھچائی کے لئے ہر کوئی ادھارکھائے بیٹھا ہے’اس کی کوئی سنتا ہے نہ ہی سننے دیتا ہے۔اگر پولیس کو سٹن گن چلانا نہیں آتی تو اس پر تضحیک آمیز انداز میں قہقے لگانے کا کیا جواز ہے؟ کیا یہ حقیقت نہیں کہ ہماری پولیس کو حکومت مخالف پارٹیوں کو دبانے اور جلسہ گاہوں کی رونقیں بڑھانے کے لئے بھرتی کیا جاتا ہے۔ کس دور میں کب کسی نے اس پولیس سے کہا ہے کہ آپ کا فرض جدید کرائم کے خلاف کارروائی کرنا ہے۔ آپ پولیس کی تمام اکیڈمیوںکا ریکارڈ نکلوا کر دیکھ لیجئے۔ وہاں ”سٹن گن” کا ذکر تک نہیں ہوگا۔ جب پولیس کو ”سکندر شو” جیسے واقعات سے نپٹنے کی کوئی ٹریننگ ہی نہیں دی گئی تو پھر پولیس پر قہقے لگانے سے پہلے خود اپنی سوچ ‘مزاج اورسیاسی ترجیحات پر بے رحم قہقہ لگایئے۔آپ کیکر کے درخت سے آم حاصل کرنا چاہتے ہیں تو یہ آپ حکمران طبقے کا دماغی فتور ہے پولیس کا قصور نہیں۔اگر بعض پولیس افسران نے جناب زمرد خان کو سکندر تک پہنچنے کا موقع فراہم کیا ہے تو اس کے پیچھے بھی پولیس کی نفسیات میں بھرتی سے لے کر پروموشن تک شخصی اور سیاسی تعلقات کی اہمیت کارفرما ہے۔ پولیس کو عوام کے جان و مال کے تحفظ کی بجائے مختلف شخصیات کی چاپلوسی کی راہ کس نے دکھلائی ہے۔پولیس کو کس نے حکومتی اثر سے پاک رکھنے کی کوشش کی ہے۔سب حکمران اپنے اپنے گریبانوں میں جھانکیں۔انشاء اللہ مایوسی ہوگی۔پولیس سے یہ توقع کرنا کہ وہ ”آئی ٹی ایکسپرٹ” کے طور پر بھی کام کریں گے’ بالکل عبث ہے ۔ جس ایس ایچ او کو عام کمپیوٹر چلانا نہیں آتا وہ القاعدہ کے نیٹ ورک میں کیسے گھس جائے گا۔ آن لائن ایف آئی آر کے پروگرام کا حشر یہ ہورہا ہے کہ سینئر پولیس افسران اپنے ”ڈیکسٹاپ” کھول کر آن لائن ڈیٹا دیکھنے کی بجائے ہر وقت پرنٹ حاصل کررہے ہوتے ہیں۔مجھے کینٹ کے ایک تھانے میں ایک سال قبل کسی مظلوم کے ساتھ جانے کا اتفاق ہوا۔وہاں ایک سائل محرر صاحب کو اے ٹی ایم کارڈ چرائے جانے کی شکایت کر رہے تھے اور جناب محرر باربار پوچھتے تھے”ایس کارڈ نال کی کردے او”۔جہاں آئی ٹی سے واقفیت کا یہ عالم ہو وہاں جدید طرز کے کرائم کو یہ پولیس تو کنٹرول نہیں کرسکتی۔ پولیس کی جدید خطوط پر تربیت کے بڑے دعوے سامنے آئے لیکن عملاً معاملہ جوں کا توں ہے۔پولیس پرگرجنے اور برسنے سے پہلے ان کی تربیت کا مناسب بندوبست کیجئے۔ ان کے مالی معاملات کو باعزت بنایئے۔ ان کے ڈیوٹی اوقات کو انسانی حدود میں لایئے اور پھر ان سے نتائج کی توقع  کیجئے۔ اور کچھ بھی نہ کریں تو کم از کم پولیس والوں کا مئوقف تو ضرور سن لیا کریں ۔یکطرفہ رگڑا مزید شرمندگیوں کو جنم دے سکتا ہے۔ پولیس سے نفرت نہیں۔پولیس کی عزت کیجئے اس سے آپ کی اپنی عزت میں اضافہ ہوگا۔

Click here to View Printed Statement

خون ہی خون ہے۔ دو چار دن کے وقفے کے بعد پاکستانی سوچنے لگتے ہیں کہ شائد قاتلوں اور دہشتگردوں کو رحم سا آگیا ہے۔ ایک موہوم سی اُمید پیدا ہونے لگتی ہے لیکن اُمید کی ڈوری کا سرا پوری طرح تھام نہیں پاتے کہ پھر کسی چوک’ کسی چوراہے پر انسانی جسم کے خون میں لتھڑے ہوئے ٹکڑے ملتے ہیں۔ کوئی جلی لاش کسی ایمبولینس میں رکھی جارہی ہوتی ہے۔ بم دھماکہ’ریموٹ کنٹرول دھماکہ’ خودکش دھماکہ’ ٹارگٹ کلنگ’ بوری بند لاش’ اغوائ’ ہماری سماعتوں میں خوف ہی خوف بھر جاتا ہے۔ ایک پوری فضاء سوگوار ہوجاتی ہے۔صف ماتم لپیٹنے کی فرصت ہی نہیں رہتی۔ہر انسان کش کارروائی کی ذمہ داری قبول کرنے والے ببانگ دہل اخبارات اور ٹی وی والوں کو فون پر بتاتے ہیں کہ جیتے جاگتے انسانوں کو چیتھڑوں میں تبدیل کرنے کا کارنامہ فلاں گروپ نے سرانجام دیا ہے۔ عورتیں’بچے’بوڑھے’ شیعہ’سنی’ مسلم’ غیر مسلم ۔کوئی بھی تو محفوظ نہیں ہے۔وردی اور شیروانی ‘امیر  اور غریب سب ہی قتل گاہوں میں سربریدہ پڑے ہیں۔ بڑے بڑے دل گردے والے ٹی وی پر مقتولوں کی چلنے والی فوٹیج دیکھ نہیں پاتے۔ آگ اور خون کا یہ گھنائونا کھیل کب ختم ہوگا؟

یہی وہ سوال ہے جو شعور اور لاشعور میں سماء گیا ہے۔ پوری قوم نفسیاتی مریض بن گئی ہے۔اُمید تھی کہ جناب میاں محمد نوازشریف کی شرافت کی بدولت شائد خون بہانے والوں کو شرم آجائے۔نہ ڈرون گرانے والوں کو شرم آئی اور نہ ہی بے گناہ پاکستانیوں کو بارود سے اڑانے والوں کو احساس ہوا۔ پاکستان کے لئے دونوں قوتیں’ دونوں نظریات’دونوں گروہ  بے رحم قاتل ثابت ہورہے ہیں۔طالبان کے ہمدرد بھی ان کی درندگی کی بھینٹ چڑھ گئے۔جناب عمران خان کی حق گوئی اور امریکی جنگ کی شدید ترین مخالفت بھی طالبان نامی گروہ کو غارت گری سے باز نہ رکھ سکی۔عام پاکستانی یہ سوچنے میں حق بجانب ہے کہ کیا یہ ملک زندگی اور سرمائے کے لئے محفوظ بھی ہے یا نہیں۔جہاں اوسطً روزانہ دو درجن سے زائد لوگ قتل کردیئے جائیں اور یہ عمل گزشتہ بارہ برس سے متواتر چل رہا ہو اور پچاس ہزار سے زائد انسان اس آگ میں جل چکے ہوں اور یہ ” قتل عام” کہیں تھمنے کا نام نہ لیتا ہو’وہاں زندگی کیسی اور خوشحالی کا تصور کیسا؟۔اگر یہ خانہ جنگی ہے توخانہ کس کا تباہ ہورہا ہے؟ ہمارے عسکری  اور سیاسی آکابرین آج تک سائے کا تعاقب کررہے ہیں۔آخر کوئی تدبیر کاگرکیوں نہیں ہوتی۔یہ قوم کس کے ہاتھ پہ لہو تلاش کرے۔ امریکی محفوظ ہیں ‘برطانوی محفوظ ہیں’عشرت کدے محفوظ ہیں’ بے حیائی کو پھلانگتے فیشن شو ہر روز منعقد ہوتے ہیں۔سودخور یہاں ہیں ‘اسمگلرز یہاں ہیں’ذخیرہ اندوز کھلے عام دھندہ کر رہے ہیں معاشرہ  کے سارے مجرم آزاد ہیں۔زندگی کی رعنائیوں سے پوری طرح لطف اندوز ہورہے ہیں ۔طالبان انہیں کچھ نہیں کہتے وہ جب مارتے ہیں تو ملک کے محافظوں کو مارتے ہیں۔پاکستان کی تنصیبات پر حملہ کرتے ہیں ۔پاکستان کے دوست ملک کو ٹارگٹ کرتے ہیں ۔شیعہ سنی فساد کو بھڑکاتے ہیں۔آخر ان کا ایجنڈا کیا ہے؟ حکومت ان کے اصل روپ سے پردہ چاک کیوں نہیں کرتی اور اگر وہ ریاست سے زیادہ طاقتور ہیں تو ہر روز مرنے کی بجائے عوام کو سچ بتا دیا جائے ۔دعوے اور جھوٹے وعدے پہلے رحمان ملک کیا کرتے تھے اور اب شائد یہ ناخوشگوار فریضہ جناب چوہدری نثار کو ادا کرنا پڑ رہا ہے۔اگر یہ گروہ فتنہ ساز ہیں اور ہم سب حق پر ہیں تو پھر اعلان جنگ کیوں نہیں ہوتا۔خدارا پاکستان کو قتل گاہ بنانے والوں کے خلاف اعلان جنگ کریں اور فتنہ  سازوں کو واصل جہنم کرکے واپس لوٹیں۔ لیکن پہلے یہ بتا دیں کہ یہ واقعتاً پاکستانی ہیں جو گمراہ  ہوگئے ہیں یا دشمن ممالک کے کارندے ہیں؟ کوئی تو بات کریں جس سے ہمارے آنسو تھم جائیں!۔

Click here to View Printed Statement

بے پناہ اور اکثر اوقات غیر ضروری معلومات تک بہ آسانی رسائی نے ہر بالغ پاکستانی کو مستقل ناقد بنا دیا ہے ۔ جس کو دیکھو جہاں دیکھو تنقید ہی تنقید ہورہی ہے۔ اس تنقیدی فضا کا نقصان بہت ہورہا ہے۔ اور وہ نقصان یہ کہ آج کا کوئی بھی بالغ پاکستانی کسی پر کسی طرح کا اعتماد کرنے کو تیار نہیں بلکہ اس کی ذہنی کیفیت ایسی ہوگئی ہے کہ خود فرد کو اپنے کئے ہوئے عمل پر بھی اعتماد نہیں رہا۔
بداعتمادی نئے نئے طرزکے رَدِعمل سامنے لارہی ہے۔ہم نے جن کو ووٹ دیئے ہمیں ان کی صلاحیتوں پر اعتماد نہیں ۔ ہم نے جن کیخلاف ووٹ ڈالا ان کی مخالفت پر شک ہے۔ بے یقینی ایسے پھیلی ہے کہ اللہ تعالیٰ کی اس سب سے عظیم مخلوق کی’’ By Default‘‘ قسم کی خوبیوں پر بھی یقین نہیں رہا۔آگ جلاتی ہے اس کا یقین ہے‘پانی بہاتا ہے اس پر بھی یقین ہے‘مٹی اگاتی ہے اس کا بھی یقین ہے لیکن انسان بہتری لاسکتا ہے‘بگڑے معاملات سنوار سکتا ہے‘اصلاح احوال کرسکتا ہے

‘تعمیروترقی کی طرف گامزن ہوسکتا ہے۔اس کا ہمیں یقین نہیں۔ ہم اس قدر بے صبرے ہیں کہ دودھ کو دہی بننے میں جتنا وقت درکار ہوتا ہے اتنے وقت کے لئے بھی صبر نہیں کرسکتے۔ ہم چاہتے ہیں کہ ہر روز کوئی مجعزہ دیکھیں ‘کوئی مداری ہو اور ریت سے جلیبی نکال کر دکھادے‘ہتھیلی پر سرسوں جما دے اور منہ کھلے تو بجلی نکلنی شروع ہو۔ درختوں پر انرجی کے بڑے بڑے گولے جھولنے لگیں۔ہم ایسے بے صبر ہیں کہ ہمارے صبر اور شکر کا پیمانہ ہر وقت لبریزرہتا ہے۔ہم ہر وقت تحریک چلانے‘ دھرنا دینے اور مظاہرہ کرنے پر کمربستہ رہتے ہیں۔ہمارا سب سے مرغوب قومی مشغلہ مظاہرے کرنا ہے۔چھوٹا مظاہرہ‘درمیانہ مظاہرہ‘بڑا مظاہرہ۔اسلامی طرز کا مظاہرہ‘برگرز کا مادرپدرآزاد مظاہرہ۔آپ کو کسی اخبار میں اشتہار دینے کی ضرورت نہیں آپ صرف چند ٹی وی رپورٹرز کو ایس ایم ایس کریں کہ اس وقت لالکڑتی میں بجلی کی لوڈشیڈنگ کے خلاف مظاہرہ ہورہا ہے۔ بس اس ایس ایم ایس کی ضرورت ہے۔رپورٹرز کیمرہ مین اور ان کی گاڑیاں 1122 سے بھی پہلے پہنچیں گی وہ آپ کو خود گائیڈ کریں گے۔’’یہاں ایک زبردست ہجوم ہے‘ٹریفک جام ہے‘ لوگ نڈھال ہیں۔بچے اور عورتیں بھی شریک ہیں۔گزشتہ اٹھارہ گھنٹے سے بجلی نہیں آئی۔ایک قیامت کا سامان ہے۔‘‘اور خدا جانے کیا کیا فارمولہ رپورٹنگ ہوتی ہے۔ اچانک ایک چھوٹا سا مظاہرہ ایک بہت بڑے جلوس میں تبدیل ہوجائے گا۔ٹائروں کو لگی ہوئی آگ گاڑیوں کو لپیٹ میں لے لے گی۔محکمہ کے دفاتر پر پتھراؤ ہوگا۔پکڑ دھکڑ ہوگی لیکن بجلی پھر بھی نہیں ہوگی کہ بجلی اگر مظاہروں سے آتی ہوتی تو گزشتہ پانچ برسوں میں ضرور آجاتی۔تبدیلی کے خواہشمندوں نے نئے نئے چوزوں کی طرح میدان سیاست میں دانا چُگنا شروع کیا تو انہیں بھی اپنی سیاسی ترتیب کا بہترین طریقہ مظاہرے اور دھرنے ہی محسوس ہوئے۔یہاں دھرنا وہاں دھرنا۔یہ کام تو پہلے ہی ہورہا تھا۔تبدیلی کس بات کی؟
ذرائع ابلاغ کا کام تعلیم بھی ہوتا ہے۔کیا قوم کو بتایا نہیں جاسکتا کہ بجلی کے بحران کا بنیادی سبب کیا ہے۔لوگوں کو کیوں نہیں بتایا جاتا کہ ایک آدمی کے لئے تیار کی گئی روٹی کو جب سو آدمی کھانے کی کوششیں کریں گے تو سب بھوکے ہی سوئیں گے۔کوئی نیا ڈیم بنا‘کوئی نئے ایٹمی بجلی گھر لگے‘کوئی سولر انرجی کوئی کوئلے سے توانائی۔کالاباغ ڈیم کا نام لینا گویا منہ کالا کرانے کے مترادف ہے۔جب حقائق یہ ہیں تو بے صبری کیسی‘بداعتمادی کیسی۔آپ نے سوچ سمجھ کر ووٹ دیئے۔ایک پارٹی کو بھاری اکثریت سے مرکز میں پہنچایا۔اب انہیں اقتدار سنھبالنے دیں۔انہوں نے آپ سے وعدے کئے ہیں اور بجلی بحران کے خاتمے کا ایک مکمل منصوبہ پیش کیا۔اسے دیکھ پڑھ کرآپ نے ووٹ دیئے۔تھوڑا سا صبر کرلیں ۔ اس قدر بے اعتمادی کیوں کہ آپ کسی کو کام ہی نہ کرنے دیں اور سیاسی مچھندروں کے ہتھے چڑھ کر خود کو مزید تھکاڈالیں۔ اگر آپ نے لیڈر چنے ہیں تو اپنے لیڈروں پر اعتماد کرنا بھی سیکھیں۔محض ٹی وی چینلز والوں کی رپورٹوں کے لئے خود کو ایندھن کے طور پر مت پیش کریں!۔

Click here to View Printed Statement

ایسا بزدل نکلا۔کمانڈو ایسے ہوتے ہیں؟میرے بہت سے قومی بھائی کمانڈو ہیں۔ایس جی کمانڈوز۔کیا چیتے کی پھرتی ہوتی ہے ان میں۔آنکھوں سے شعلے اگلتے ہیں۔دشمن پر جھپٹتے اور بے بس کردیتے ہیں۔وہ موت کا تعاقب کرتے ہیں۔پاکستانی فوج کے کمانڈو کا نام سن کر موت خوفزدہ ہوجاتی ہے۔ہماری بہادر مسلح فوج اپنے کمانڈو کو ایسے تربیتی ماحول سے گزارتی ہے کہ جسم ہی نہیں ذہن بھی لوہا بن جاتے ہیں۔انہیں مستقبل کے خوف ڈرا نہیں سکتے۔وہ واقعتاً کسی سے نہیں ڈرتے۔پاکستانی کمانڈوز کی تربیت اسلامی تعلیمات کے مطابق کی جاتی ہے۔وہ کسی بے گناہ کا قتل نہیں کرتے۔کسی بچے کسی عورت کی جان نہیںلیتے۔وہ کسی مظلوم مہمان کو گرفتار کرکے دشمنوں کے آگے بیچتے نہیں۔وہ اپنے قومی وقار پر حرف نہیں آنے دیتے۔

وہ پہاڑوں پر ہیبت طاری کرتے ہیں اور اپنوں کے ساتھ ریشم کی طرح نرم روی اختیار کرتے ہیں۔کمانڈو ہونا ذلت نہیں اعزاز کا حوالہ ہوتا ہے۔کمانڈو روتے نہیں’ ہرحال میں مسکراتے رہتے ہیں۔اصلی کمانڈوسچا مسلمان اور پکا پاکستانی ہوتا ہے۔ڈالرز’ڈونرز اور ڈارلنگز ان کے ارادوں کو متزلزل نہیںکرسکتے۔وہ صوم وصلوٰة کے پابند ہوتے اور اعلیٰ انسانی اصولوں کے لئے ہتھیار اور ہاتھ اٹھاتے ہیں۔وہ اقتدار سے کوسوں دور رہتے ہیں۔انہیں انگریزی میں ”ان سنگ” ہیروز اور اردو میں ”خاموش مجاہدین” کے لقب سے تاریخ میں یاد رکھا جاتا ہے۔یہ کیسا کمانڈو ہے جو موت کے خوف سے بھاگتا پھرتا ہے۔جو سگار’کافی اور ”مشروب” کو اپنا سہارا بناتا اور اللہ کی عبادت سے گریزاں رہتا ہے۔کیا اس کی زندگی کا مقصد اب بونس کے چند سال مزید زندہ رہنا اور اپنے پرتعیش لائف اسٹائل کو انجوائے کرنا رہ گیا ہے۔اگر ایسا خواب بھی دیکھا ہے تو پھر یہ بزدلانہ حرکتیں کیوں ہیں۔اگر وہ عدالتوں سے نہیں ڈرتا تو پھر فرار کے راستے پر گامزن کیوں ہے۔سلوٹ مارنا شائدا س کی عادت ہے۔وہ پولیس کی حفاظت میں اور بہادر کمانڈوز کے حصار میں بھی خود کو غیر محفوظ سمجھتا ہے۔ اس نے مجسٹریٹ کے سامنے جا کر جس قدر حواس باختہ ہونے کا مظاہرہ کیا’ساتھیوں کو بھی شرما دیا۔یہ کیسا عقاب نکلا جو گدِھّوں کی طرح ایک عدالتی پتھر سے ہی بھاگ کھڑا ہوا۔مشرف نے اس ملک اور اس کے باسیوں کے ساتھ جو کیا’ پاک وطن کو خونخوار امریکیوں کے آگے ڈال دیا کیا وہ کم جرم ہے۔لیکن فیصلے عدالتوں نے کرنے ہیں۔اس کی پھیلائی ہوئی جدید روشن خیالی نے ماں باپ کو مجبور کردیا کہ وہ اپنی بچیوں کو نیم برہنہ کرکے کالجوں کے فن فیئر پروگراموں میں بھجوائیں کہ آمر مطلق یہی کلچر چاہتے تھے۔کتنے فوجی افسران کومینٹل ٹارچر کیا گیا صرف اس لئے کہ ان کی داڑھی کا سائز ڈیڑھ انچ سے زیادہ تھا اور وہ نماز پنجگانہ ادا کیا کرتے تھے۔ کس کس جرم کی بات کریں۔ آئین توڑنا ریاست سے بغاوت ہے ‘لیکن کسی کے ایمان کا مذاق اڑانا اور اس کے نماز روضے پر اس کی ترقی کے راستے مسدود کردینا انسانیت سے بغاوت ہے۔قدم قدم پر انسانی جذبوں کی توہین کرنے والے اس کوتاہ قامت  سیاہ رو شخص نے انسانوں کو شکار کیا اور امریکی بمباری سے بچ کر پاکستان کی حدود میں پناہ کے لئے آنے والوں کو گولیوں سے ٹھنڈا کردیا۔آج چند روز کے ”ہائوس اریسٹ” سے گھبرا گیا ہے۔قصوروار پرویز مشرف کے وکیل قصوری نے رو کر لوگوں کو بتایا کہ اس کا مئوکل اپنی ماں کی یاد میں ہلکان ہورہا ہے اور راتوں کو اٹھ اٹھ کر ”ہائے ماںہائے ماں”پکارتا رہتا ہے۔مائیں سب کو یاد آتی ہیں۔مسنگ پرسنز کی بھی مائیں ہیں جو رورو کر اپنی بینائی کھوچکی ہیں۔لیکن افسوس کہ آج کے حکمران کمزور قسم کے نگران ہیں۔چونکہ مشرف نے حوالہ اپنی بیمار ماں کا دے دیا ہے۔اس لئے ماں کی خاطر اس بزدل کو عیادت کے لئے جانے دیا جائے۔

Click here to View Printed Statement

وہ کس قدرمتکبر تھا’ خود اسے بھی اپنے تکبر کی حدود کا علم نہیں تھا۔اس کے منہ سے نکلا ہوا ہر لفظ قانون بن جاتا تھا۔ اس کے اشارہ ابرو سے مملکت میں ہلچل مچ جاتی تھی۔ وہ دن کے وقت طاقتور اور رات کے عالم میں انتہائی طاقتور ہوجاتا تھا۔سگار’کافی اور گلاس اس کا شوق تھے’ساغرومینا اس کے سامنے دست بستہ رہتے تھے۔ اس نے ریفرنڈم کرایا تو رجسٹرڈ ووٹوں سے بھی کہیں زیادہ ووٹ اس کے حق میں پڑتے تھے۔اس نے روشن خیالی کے نام پر ہر اچھے اور صالح خیال کا گلا گھونٹا۔

وہ کسی سے نہیں ڈرتا تھا۔ حتی کہ اسے کعبہ کی چھت پر چڑھنے سے بھی ڈرنہ لگا۔اسے سید زادہ ہونے کا دعویٰ تھا لیکن وہ لال مسجد میں محصور بچیوں پر دہکتے بارود کے گولے پھینکتا رہا لیکن اسے ڈر نہیں آیا۔ اس نے اپنے ہر مخالف کو تھرڈ ڈگری ٹریٹمنٹ کے ذریعے بے بس کرکے رکھ دیا تھا۔وہ اور اس کے ساتھ شامل جتھہ اس ملک کے سیاہ و سفید کا مالک بنا’ جی بھر کے لوٹتا رہا۔چیف جسٹس پر ہاتھ ڈالا’محسن پاکستان کو رسوا کیا۔ اس نے یہ ملک امریکیوں کے ہاتھوں گروی رکھا اور اپنے شب وروز جگماتا رہا۔12اکتوبر 1999ء کو اس نے پوری فوج کی طاقت کو اپنی ذات میںسمیٹا اور ایک منتخب وزیراعظم کو ہتھ کڑیاں لگاکر اٹک قلعہ میں مچھروں کے رحم و کرم پر چھوڑ دیا۔ وہ چالیں چلنے کا ماہر تھا اور بالآخر اپنی اسی مہارت کے ہاتھوں مات کھا کر قصر صدارت سے نکالا گیا۔ اس نے پوری قوم کا سودا کیا تھا اور اس کے بدلے اسے ڈھیروں ڈالر مل گئے تھے۔وہ بیرون ممالک عالمی وی آئی پی کے طور پر سفرکرتا اور امریکی دائرہ اثر میں آنے والے ممالک اس کو عظمت اور تکریم کے ساتھ اپنے ہاںمہمان بناتے رہے۔اس کی زندگی میں رونقیں اور رعنایاںجلوہ گر تھیں۔لیکن اسے کسی پل چین نہیں آرہا تھا۔اللہ تعالیٰ نے اس شاطر  شخص کے دل میں پھر سے مملکت اسلامیہ کا آمر مطلق بننے کی خواہش پیدا کردی۔ اس کو اس  کا ماضی ستانے لگا۔ وہ ایک بار پھر اقتدار کی مسند پر بیٹھنے کی آرزو لئے پاکستان آگیا۔ اور اٹھارہ کروڑ دکھے دلوں پر نمک پاشی کرنے لگا۔ اس نے ٹوئٹر اور فیس بک پر سراب آسارائے کو اپنی ہر دلعزیزی سمجھا اور دھوکے میں آگیا۔اس کا خیال تھا کہ وہ اسلام آباد ایئرپورٹ اترے گا تو عوام کا ٹھاٹھیں مارتا سمندر اس کے استقبال کے لئے نکل آئے گا۔یہ سچ کہ زرداری ٹولے نے عوام کی زندگیاں اجیرن کردی تھیں اور بہت سے لوگ موازنے کے طور پر مشرف کے دور حکومت کو شک کا فائدہ دے رہے تھے۔ لیکن پاکستانی قوم اس قدر بالغ النظر ہوچکی ہے کہ انہوں نے ہر برائی سے برآت کا اعلان  کر رکھا ہے۔انہوں نے مشرف کی ”ملک بچائو”مہم میں حصہ بننے کی بجائے اس قومی مجرم کو کیفرکردار تک پہنچانے کی آرزو جوان کی اور مشرف کو سیاسی طور پر تنہا کردیا۔وہ پارٹی کے ٹکٹ بانٹنا چاہتا تھا لیکن ٹکٹ لینے والا کوئی نہ تھا۔وہ جلسے کرنا چاہتا تھا لیکن موت کا خوف اسے باہر نکلنے نہ دیتا تھا۔ الیکشن ٹریبونل نے اسے نااہل قرار دے دیا اور سیاسی طور پر اس کا چیپٹر ہمیشہ کے لئے بندہوگیا۔پاکستان کی عدلیہ نے معجزے کر دکھائے۔ایک ایک جج افتخار چوہدری بن گیا اور پرویز مشرف کی ضمانت منسوخ کرتے وقت نہ کسی جج کے ماتھے پر پسینہ آیا نہ فیصلہ لکھتے وقت ہاتھ کپکپائے۔عبوری حکومت جو کہ اپنے اختیارات کے لحاظ سے انتہائی کمزور ہوتی ہے اس نے جب پاکستانی قوم کی اجتماعی سوچ کو بھانپ لیا تو وہ طاقتور ہوگئی اور عدلیہ کے فیصلوں پر عملدرآمد کا عہد کیا۔ابھی جنرل (ر) پرویز مشرف کے خلاف صرف ایک کیس کے حوالے سے کارروائی آگے بڑھی ہے۔مقدمات کی ایک طویل فہرست ہے اور جوں جوں وقت گزرے گا کارروائیاں بھی سخت تر ہوتی جائیں گی۔وہ شخص جو ”خدا” ہونے کا دعوے دار تھا آج اس کے طاقتور ترین مددگار بھی بے بس دکھائی دے رہے ہیں۔بلکہ ملک کے مقتدر حلقے قانون کی بالادستی کو تسلیم کرتے ہوئے دکھائی دے رہے ہیں۔کروڑوں روپے سے تعمیر شدہ فارم ہائوس اسی شہر میں موجود ہے لیکن اس کے مکین کو اس میںرہنا نصیب نہیں ۔ اس کی جائے پناہ پولیس لائینز ہے۔اور وہ بھی ایک ملزم بلکہ مجرم کی حیثیت سے ۔وہ سگار اب بھی پیتا ہوگا’شائد اسے ساغر و مینا بھی میسر ہوں لیکن اب اس کی راتوں کا سرور ہوا ہوچکا اسے رہ رہ کر اٹک قلعہ یاد آتا ہوگا۔ وہ خواب میں ڈر جاتا ہوگا۔ اس کا مستقبل قانون اور آئین کے باغی کی سزا سے جڑ گیا ہے۔اس نے اپنی تقدیر کو خود گلے لگا لیا ہے۔وہ کسی سے نہیں ڈرتا اور اس کا یہی تکبر اسے پاکستان کھینچ لایا ہے۔ جب سانپ کی موت آتی ہے تو وہ راستے پر آجاتا ہے۔اور راستے پر عدلیہ انصاف کا ترازوتھامے مجرموں کو سزا سنانے کے لئے مستعد کھڑی ہے!۔

Click here to View Printed Statement

”شوگر سے شوگر نہیں ہوتی۔انسانی جسم میں ایک خاص حد تک ہی شوگر جذب ہوسکتی ہے۔ اس قدرتی حد سے بڑھیں گے تو انسانی نظام ہضم خود بخودا کتاہٹ محسوس کرنے لگے گا۔ یہ محض ڈاکٹروں کا پراپیگنڈہ ہے کہ چینی کھانے سے شوگر کی بیماری لاحق ہوجاتی ہے۔ اس بیماری کے اسباب کچھ اور ہیں لیکن عوام کو بیوقوف بنانے کے لئے یہ سستاسا نسخہ گھڑلیا گیا ہے”۔
ملاقات شروع ہی ہوئی تھی کہ سکندر خان اپنے دبنگ لہجے میں شوگر انڈسٹری کو نقصان پہنچانے والے سرکاری اور غیر سرکاری اقدامات کا احاطہ کرنے لگے۔آل پاکستان شوگر ایسوسی ایشن کے سابق صدر اورخیبرپختونخواہ چیمبر آف کامرس اینڈ انڈسٹری کے سابق چیئرمین سکندر خان معروف صنعت کار گھرانے کے چشم وچراغ ہیں۔ انہوں نے پاکستان کے صنعت کاروں کے اندر حکمرانوں کے سامنے بات کرنے کا حوصلہ پیدا کیا ہے اور وہ قومی سطح کے متعدد فورموں پر صنعت کاروں کے مسائل اور پریشانیوں سے پالیسی ساز اداروں کے سربراہوں کو آگاہ کرتے رہتے ہیں۔

”ایک صنعت کار کے لئے بہت آسان ہے کہ وہ اپنے اثاثے سمیٹے اور باہر بھاگ جائے یا رقم بینک میں رکھ کر منافع کھائے۔ نہ لیبر کے جھنجھٹ نہ ایف بی آر اور دوسرے اداروں کی قہرمانیاں۔ اس ملک میں صنعت لگانا جان جوکھوں میں ڈالنے کے مترادف ہے۔ دنیا بھر میں ان لوگوں کو قدر کی نگاہ سے دیکھا جاتا ہے جو اپنا سرمایہ لگا کر روزگار کے لئے مواقع پیدا کرتے ہیں۔ پاکستان واحد ملک ہے جہاں روزگار دینے والے صنعت کاروں کو گالی دی جاتی ہے۔ سرکاری ادارے چھوڑیں عام آدمی کے ذہن میں میڈیا نے ایسا تاثر پیدا کردیا ہے کہ گویا یہ صنعت کار چور ہیں اور دونوں ہاتھوں سے ملکی وسائل کو لوٹ رہے ہیں”۔
سکندر خان کا دل دکھا ہوا تھا وہ بار بار مجھ سے پوچھتے تھے’
”ڈاکٹر صاحب آپ بتائیں کہ صنعت کار کہاں جائیں ۔مجھ سے کہا گیا کہ ٹیکس سے بچنے کے لئے ”چائے پانی” کا بندوبست کرو۔ میں نے صاف انکار کردیا اور کہاکہ جو بھی جائز ٹیکس بنے گا جمع کرائوں گا آپ لوگوں کو کچھ نہیں دوں گا۔ مجھ پر سو گنا زیادہ ٹیکس لگادیا گیا۔میں نے کیس کیا’عدالت میں گیا’ عرصہ دراز ہواکیس لڑ رہا ہوں’ جھکا نہیں ہوں اور نہ ہی جھکوں گا۔ میں نے طے کیا کہ اسی ملک میں رہوں گا اور حق کی آواز بلند کرتا رہوںگا”
سکندر خان کے والد گوجرانوالہ کے پٹھان ہیں۔ یعنی پٹھان ہیں لیکن گوجرانوالہ میںرہے۔والدہ ایرانی نژاد ہیں۔فارسی مادری زبان ہے۔کراچی میں بچپن گذرا۔ خاندان کے ہارون فیملی کے ساتھ قریبی تعلقات تھے۔فیض احمد فیض عبداللہ ہارون کے گھر آتے تو شعروسخن کی نشستیں جمتی تھیں۔ سکندر بھی ان محفلوںمیں تواتر کے ساتھ شریک ہوتے۔ خالصتاً انگریزی تعلیم میں پروان چڑھنے والے اس نوجوان کو فیض احمد فیض کا انداز ایسا بھایا کہ خود بھی مشق سخن شروع کردی۔ان کے پاس اپنے غیر مطبوعہ کلام کا ایک ذخیرہ جمع ہوگیا ہے۔فرقہ وارانہ دہشت گردی کے بطن سے جنم لینے والے اعصاب شکن احساسات نے سکندر کی سوچ اور بیان پر گہرے اثرات مرتب کئے ہیں۔ خوشحالی اور خوش نصیبی کے باوجود صنعت کار سکندر کو ملکی صورتحال لہو رلاتی ہے۔ وہ اپنے جذبات پر قابو نہیں رکھ پاتے۔ اور اپنے اندر کے سکندر کو شعروں کی صورت میں قرطاس پر رقم کردیتے ہیں۔ ان کے کلام کی اکثر تلمیحات اور استعارے فیض احمدفیض سے مستعارلئے ہوئے معلوم ہوتے ہیں۔ خیبرپختونخواہ کے عظیم سیاسی خاندان کے وارث ہیں’لیکن عملی سیاست سے کوسوں دور ہیں۔انگریزی ‘فارسی’ اردو اور پشتو پر عبور حاصل ہے۔
”ڈاکٹر صاحب آپ اکانومی واچ کے پلیٹ فارم سے ملکی معیشت کی بہتری کے لئے جہاد کر رہے ہیں ۔آپ اس ملک کے صنعت کار کو بجلی’ گیس نہیں دے سکتے اعتماد ہی دلوا دیں۔ یہ بجلی بھی پیدا کریں گے’ بے رزوگاری ختم کریں گے اور معیشت کے پہیے کو پھر سے رواں دواں کریں گے”۔
سکندر خان انتہائی متحرک اور کامیاب شخص ہیں۔خدا نے انہیں جس قدر مالی کامیابیوں سے نوازا اسی قدر انہیں انسان پروری اور غریب پرسی کا حوصلہ بھی دیا ہے۔
جناح سپر اسلام آباد میں اپنے دفتر میں بیٹھے وہ اپنی زندگی کا خاکہ بیان کر رہے تھے۔ سورج کی شعائیں ان کے دمکتے چہرے پر پڑ رہی تھیں۔ انہوں نے ملازم کو آواز دی۔ ملازم دوڑا ہوا اندر آیا۔ سکندر خان نے انتہائی دھیمے لہجے میں اس بزرگ ملازم کو کہا” بابا جی ذرا کھڑکی بند کردیجئے”۔ انکساری سکندر خان کی شخصیت میں ایک نگینے کی ماننددمکتی ہے۔
”میرے نانا مجھے زبردستی بس میں سوار کردیتے تھے حالانکہ گاڑیوں کی کمی نہ تھی۔وہ صرف اس لئے کہ میں عام آدمی کے ساتھ سفر کے دوران لوگوں کی مشکلات کا ادراک کرسکوں”
اپنے دوست ملک اظہر اور بیگ راج کے ہمراہ سکندر خان کے دفتر سے باہر آئے ۔ہم تینوں کو ایک ہی تشویش تھی کہ اگر سکندر خان جیسے سچے اور محب وطن صنعت کاروں نے بھی تنگ آکر یہ ملک چھوڑ دیا تو ہماری معیشت کا کیا بنے گا؟