قیامت خیز بارشوں نے ریلے کی شکل اختیار کی‘توقع نہ تھی کہ سیلابی ریلے آپس میں مل کر ”طوفان نوح“ بپا کریں گے۔ جانیں تو بچ گئیں لیکن چھت بہہ گئے۔چولہے برتن‘ کپڑے‘ بپھری لہروں نے اچٹ لئے۔گندم ‘اناج‘مرچ‘ مصالحہ سب کچھ ہی تو بہہ گیا۔بہت شور اٹھا۔بین الاقوامی امدادی ٹیمیں پہنچیں۔پاکستان کی ہر سیاسی اور سماجی تنظیم نے امداد کے لئے کیمپس لگائے۔ خوراک تقسیم کی گئی۔ٹینٹس فراہم کئے گئے۔ نقد رقوم بانٹی گئیں لیکن سارے امدادی کام ابھی ادھورے ہی تھے کہ موسم سرما آگیا۔
چار ماہ کوئی مدت نہیں ہوتی‘دعوے یہی تھے موسم سرما سے پہلے پہلے تمام سیلاب زدگان کو گرم کپڑے مل جائیں گے۔سردی سے بچانے کےلئے کمبل دستیاب ہوں گے۔برف باری اور بارشوں سے بچاﺅ کے لئے پکے گھر ہوں گے۔ لیکن ایسا نہیں ہوسکا۔ سیلاب زدگان کو بھوک سے ہی نجات نہیں دلائی جاسکی۔ کجا کہ انہیں پختہ گھروں کی ”عیاشی“ میسر آسکتی۔سردی سے مرنے سے پہلے شائد یہ لوگ بھوک سے مر جائیں۔
اقوام متحدہ کے ادارہ برائے خوراک نے تین ماہ پہلے خبردار کر دیا تھا کہ صوبہ خیبرپختونخواہ ‘پنجاب ‘سندھ اور بلوچستان میںمجموعی طور پر گیارہ ہیکٹر کے رقبہ پر کھڑی فصلیں تباہ ہوچکی ہیں‘بیس لاکھ کے لگ بھگ جانور مر گئے ہیں اور تیس لاکھ کی تعداد میں مرغیاں ضائع ہوگئی ہیں۔فصلوں کی تباہی اور سیلاب زدہ علاقوں میں دوبارہ کاشت نہ ہونے کے سبب قحط سالی کا منظر ہوگا۔اگر بروقت خوراک کا بندوبست نہ ہوا تو خوراک کی شدید قلت سے ہزاروںبچے اور بوڑھے موت کے منہ میں چلے جائیں گے‘جو مرنے سے بچ گئے وہ بھی ہڈیوں کے ڈھانچے بن جائیںگے۔اکتوبر میں پھر وارننگ دی گئی کہ جن ممالک نے امداد کا وعدہ کیا تھا وہ اپنے وعدوں کو ایفا کریں کیونکہ خوراک خریدنے کے لئے اس عالمی ادارے ورلڈ فوڈ پروگرام کے پاس رقم نہیں اور وقت تیزی سے گزر رہا ہے۔اکتوبر میں ہی سندھ حکومت کو سندھی علاقوں سے بے گھر ہو کر شہروں کا رخ کرنے والے لاکھوں پناہ گزینوں کی حالت زار اور خوراک کی روز بروز بڑھتی قلت کے حوالے سے مفصل بریفنگ دی گئی تھی۔ابھی پھر تازہ رپورٹ آئی ہے کہ کم از کم بیس لاکھ افراد ایسے ہیں جنہیں خوراک کی کمی کا شدید خطرہ ہے اور اگر اب بھی امدادی اداروں نے بروقت توجہ نہ دی تو نتائج توقع سے بھی بھیانک نکلیں گے۔
حیرت انگریز خبر یہ ہے کہ صوبہ پنجاب کے گوداموں میں پڑی گندم گل سڑ رہی ہے۔ گندم برآمد کرنے کی اجازت مانگی جارہی ہے۔ خراب ہونے والی ہزاروں بوریاں روزانہ گوداموں سے باہر پھینکوائی جارہی ہیں۔ اس گندم پر ہر روز لاکھوں روپے بینکوںکا سود بھی ادا کیا جارہا ہے۔ کیا سبب ہے کہ صوبائی یا مرکزی حکومت اقوام متحدہ کی اپیل پر کان نہیں دھرتی ۔باوجود یہ کہ ہم اپنے ہم وطنوں کے لئے روٹی بھی غیر ملکی اداروں سے مانگیں اور ان اداروں کے نخرے دیکھیں‘کیا بہتر نہیں کہ اپنے گھر میں پڑی گندم کو ان علاقوں کے مفلوک الحال لوگوں میں تقسیم کردیں۔ اطلاعات یہ ہیں کہ گندم کی آنے والی فصل ”بمپر کراپ“ ہوگی اور گزشتہ برس سے کہیںزیادہ گندم پیدا ہوگی۔ اگر تمام اندازے اور تخمینے اسی صورتحال کی طرف اشارہ کرتے ہیں تو پھر سرکاری سٹوروں میں بھری اس گندم کو صوبہ سندھ‘ بلوچستان اور خیبرپختونخواہ کے بے آسرا لوگوں میں خیرات کر دینے سے کون سی چیز مانع ہے۔
ہمارا میڈیا ہر نئی خبر کی دم پکڑ کر بے سمت دوڑتا ہے۔آجکل ”وکی لیکس“ کے انکشافات امریکہ اور برطانیہ کے اخبارات مسلسل شائع کرکے اپنی گرتی ہوئی سرکولیشن کو سہارا دے رہے ہیں اور ہمارے اخبارات اور ٹی وی چینلز بھی ان جھوٹے اماموں کے پیچھے آنکھیں بند کرکے سربسجود ہوچکے ہیں۔ انہیں خبر ہی نہیں کہ ان کے اردگرد کیا ہورہا ہے۔ گیس کا سلنڈر دو ہزار روپے کو پہنچ چکا ہے ‘پیازاسی روپے کلو ہوگئے ہیں لیکن ہمارے ذرائع ابلاغ کا بڑا حصہ ”روز روشن کی طرح عیاں حقیقتوں کو” انکشافات“ سمجھ کر اپنے قارئین اور ناظرین کے دل و دماغ میں کوٹ کوٹ کر بھر رہے ہیں ۔ ان کا کیمرہ سیلاب زدہ علاقوں کا رخ ہی نہیں کرتا‘ ان کا قلم پاکستان کے بیس لاکھ لوگوں کی بھوک کا تذکرہ ہی نہیں کرتا۔ آخر کوئی توازن‘کوئی انصاف۔ اس غریب عوام کو میڈیاسے توقع تھی کہ وہ ان کے مسائل کو لیکر اٹھے گااور کسی نتیجے پر پہنچنے سے پہلے چھوڑے گا نہیں۔”فالواپ“ کہاں گیا….؟ سیلاب زدگان کو ”وکی لیکس“ کے انکشافات سے کیا لینا۔ وہ سارے جانتے ہیں کہ ہمارے ہاں امریکہ کے کہنے پر ہی حکومتیںآتی اور جاتی ہیں۔ جب اتنی بڑی خبر سے ہم سب واقف ہیں تو پھر اس کی عامیانہ اور بازاری تفصیلات پڑھنے سے کیا ملے گا۔”وکی لیکس“ نے سیلاب زدگان کے حق میں تو کچھ بھی ”لیک“ نہیںکیا۔انہیں تو روٹی چاہیے‘ٹھٹھرتے بچوں کے لئے چھت چاہیے‘ یہ کیا ”وکی لیکس“ کھائیں گے اور انکشافات اوڑھیں گے؟

لوگو ں نے ایک تصویر دیکھی۔ محترم میاں محمد نوازشریف تھری پیس سوٹ میں ملبوس ہزاروں ایکڑوں پر پھیلے اپنے رائے ونڈفارم کے سرسبز باغ میں برطانیہ کے وزیر خارجہ ملی بینڈ کے ہمراہ چہل قدمی فرما رہے تھے۔ایسی تصویر سیاست ہوتی ہے ۔ اندھیروں میں ڈوبی سولہ کروڑ عوام اپنے رہنماﺅںکی خوشحالیاں دیکھ کر شائد خوش ہوجاتے ہوں گے۔ حالانکہ جناب میاں صاحب چاہتے تو ملی بینڈ کو لکشمی چوک لے جاتے جہاں عذاب کی صورت میںنازل ہونے والی لوڈشیڈنگ سے گھبرائے ہوئے لاہوری دھوتیاں اٹھائے حکمرانوں کی غفلتوں کا ماتم کرتے دکھائی دیتے ہیں۔رائے ونڈ فارم میں سے ہی ایک دوسری تصویر سامنے آئی۔ جناب زرداری جو کہ صدر پاکستان بھی ہیں وہ جناب میاں نوازشریف کے ساتھ چار گھنٹے گزارتے ہیں۔میاں صاحب اپنے وسیع دسترخوان پر جناب زرداری کے لئے مغلئی بریانی کا اہتمام فرماتے ہیں اور صدرزرداری صاحب انہیں قالین کا تحفہ پیش کرتے ہیں۔ مشترکہ اعلامیہ میں لوڈشیڈنگ کا کہیں ذکر نہیں ہوتاکیونکہ یہ سیاست ہوتی ہے ۔اقتدار میں حصہ داری‘بندر بانٹ اور باری لینے دینے کے جھگڑے ہوتے ہیں۔

پنجاب بھر میں لوڈشیڈنگ کےخلاف پر تشدد مظاہرے جاری ہیں اورپیپلزپارٹی کے ذرائع کے مطابق رائے ونڈ والوں کی طرف سے ہی ایسے مظاہروں کی پشت پناہی کی جارہی ہے۔اگرچہ جناب زرداری اور میاں نوازشریف کی ملاقات کے بعد مسلم لیگ (ن) نے اپنے کارکنوں کو حکومت مخالف سرگرمیوں سے دور رہنے کی ہدایات جاری کردی تھیں لیکن پی پی والوں کو پورا یقین ہے کہ جس طرح لوڈشیڈنگ کارڈ کو انہوں نے (ن) لیگ کیساتھ مل کر (ق) لیگ حکومت کیخلاف استعمال کیا گیا تھا اسی طرح اب (ن) لیگ اسے پی پی کیخلاف استعمال کر رہی ہے۔
(ن) لیگ کی آجکل پانچویں گھی میں ہیں۔ وہ ایک طرف حکمران جماعت بھی ہے اور دوسری جانب حزب اختلاف بھی ۔ حزب اختلاف کی ذمہ داریاں نبھانے کے لئے جناب چوہدری نثار کی سربراہی میں ایک ڈیسک کام کر رہا ہے ۔جبکہ اقتدار کے مزے لولٹنے کے لئے پنجاب کا وسیع علاقہ ہاتھ میں ہے چونکہ میثاق جمہوریت کا احترام بھی ضروری ہے اس لئے (ن) لیگ کسی ماورائے جمہوریت اقدام کی حامی نہیں۔ جمہوری طریقے سے جناب زرداری کو وزیراعظم گیلانی کیخلاف بھڑکایا جارہا ہے اور جناب گیلانی کو بھرپور حمایت کی یقین دہانیاں بھی کرائی جارہی ہیں۔ گویا سیاسی حماقتیں جاری ہیں۔
کراچی کے حالات قابو سے باہر ہو کر ٹارگٹ کلنگ‘ بارش برد اور جلاﺅ گھیراﺅ کی حدیں بھی پھلانگ رہے ہیں۔جناب الطاف حسین لندن سے دن میں تین بار بیانات جاری فرماتے ہیں لیکن حد یہ ہے کہ ہر طرف پانی ہی پانی ہے۔بجلی نہیں ۔آب وبرق کا یہ انوکھا امتزاج پچاس شہریوں کی جانیں لے چکا ہے۔ ایم۔ کیو ۔ ایم حزب اقتدار کا حصہ ہے لیکن گاہے بگاہے حزب اقتدار کے مزے لوٹنے کے لئے پریس کانفرنسیں بھی فرماتی رہتی ہے۔ اعتماد جیسی جنس اب کراچی میں پائی ہی نہیں جاتی ۔ پی پی پی کو ایم۔ کیو ۔ ایم پر اعتماد نہیں اور نائن زیرو کی نظریں سندھ کے وزیر داخلہ کو خارج کرنے پر لگی ہوئی ہیں۔
صوبہ سرحد کی سیاست افواج پاکستان کی قربانیوں کے طفیل ایک بار سوات اور مالاکنڈ میں داخل ہوگئی ہے لیکن اے این پی کی بچی کھچی قیادت فنڈز بانٹنے بلکہ ایک اخباری اطلاع کے مطابق فنڈز خردبرد کرنے میں مصروف ہے۔ کسی کو توفیق ہی نہیں کہ وہ دیگر سیاسی قوتوں کو ساتھ ملا کر مولانا فضل اللہ کے ”لائیو“ خطبوں کا ہی مقابلہ کرسکے۔ اب کی بار اگر ان علاقوں سے سیاست فرار ہوئی تو پھر اسے ”ہوتی ہاﺅس“ میں بھی پناہ نہ مل پائے گی۔
وقت ایک بار پھر سے یہ ثابت کرنے جارہا ہے کہ پاکستان کی سیاست سراسر حماقت ہے اور اس حماقت کے نتیجے میں عوام کے اندر بغاوت کے آثار پوری طرح نمایاں ہیں۔
پولیس پارٹیوں پر حملے کرنے والے مظاہرین کا مطالبہ ” وزیراعظم نوازشریف“ نہیں صرف ”گوزرداری گو“ ہے۔ اس بغاوت سے وہی طاقتیں فائدہ اٹھا سکتی ہیں جن کو ”گڈگورننس“ اور نظم و ضبط برقرار رکھنے کا وسیع تجربہ ہے اور جنہوں نے ”طالبان“ جیسے خوف کی آنکھوں میں آنکھیںڈالی ہیں۔وہی لوڈشیڈنگ کے جن کو بھی بوتل میں بند کرسکتے ہیں۔ خدا خیر کرے!

ابھی تک وہ اعدادوشمار سامنے نہیں آئے جن کی بنیاد پر معلوم ہوسکے کہ پاکستان نے آج تک جتنے ادارے اور صنعتیں پرائیویٹائز کئے ہیں ان سے کل کتنی رقم حاصل ہوئی ہے اور اس رقم سے کتنے غیر ملکی قرضے ادا ہوسکے ہیںلیکن سادہ اور عام فہم سی حقیقت یہ ہے کہ تمام ترنج کاریوں کے باوجود پاکستان کے بیرونی اور اندرونی قرضوں میںاضافہ ہی ہوا ہے

اور معاشی جان کنی کے عالم سے نکلنے کے لئے ایک بار پھر ہمیں آئی۔ایم ۔ایف کی دہلیز پر سر جھکانا پڑا ہے۔آپ کو پیسوں کی ضرورت ہو تو گھر کا سامان بیچ دیں۔ یہ ہے وہ معاشی تدبّر جس کے لئے ہماری حکومتیں بڑے بڑے معاشی ماہرین کی مہنگے داموں خدمات حاصل کرتی ہیں اور جب کسی ادارے کو ہم کوڑیوں کے مول فروخت کردیتے ہیں تو پھر کامیابی کے جشن مناتے ہیں۔
حکومت چاہتی ہے کہ وہ اپنی ذمہ داریوں کو نبھانے کی بجائے ذمہ داریوں سے چھٹکارا پائے۔ گڈگورننس کا یہ فارمولہ بڑا ہی انوکھا ہے۔ خصوصاً ترقی پذیر ممالک میں جہاں پر حکومت روزگار کے وسیع مواقع پیدا کرنے کے نعرے لگا کر وجود پاتی ہیں وہیں روزگار کے محفوظ ذرائع کا گلا گھونٹ دیا جاتا ہے۔ ”بہترین حکومت کم از حکومت ہے۔“ یہ فارمولا پاکستان جیسے مفلوک الحال ملکوں کے لئے بنا ہی نہیں۔ یہاں فری اکانومی جیسے سرمایہ دارانہ تصورات کے عمل دخل سے صرف اور صرف مہنگائی ‘بے روزگاری اور امیر اور غریب کے درمیان خلیج بڑھتی ہے۔ نج کاری فری اکانومی کا لازمی جزو ہے جس سے قومی نوعیت کی انتہائی حساس پیچیدگیاں ہی پیدا نہیں ہوتیں بلکہ عوام کا حکومت پر سے اعتماد بھی ختم ہوجاتا ہے۔
گو کہ سٹیل ملز کی نجکاری کے خلاف سپریم کورٹ آف پاکستان کے فیصلے کے بعد وقتی طور پر اندھا دھند نج کاری کے کلچر کو کافی دھچکا لگا تھا۔ لیکن نئی حکومت پھر سے اسی کلچر کے فروغ میں مصروف ہوگئی ہے۔ حالانکہ آج جوگروہ اور پارٹیاں حکمران اتحاد میں شامل ہیں‘وہ اسٹیل ملز کی پرائیویٹائزیشن کے خلاف سراپا احتجاج تھیں لیکن آج قادر پور گیس فیلڈ جیسے منافع بخش اداروں کو اونے پونے فروخت کرنے کی جلدی دکھائی دے رہی ہے۔ عوامی حلقوں اور رائے عام کے اداروں نے اس جلد بازی کا بروقت نوٹس لیا ہے اور وقتی طورپر وزیراعظم نے قادر پور گیس فیلڈ کا معاملہ رکوا دیا ہے۔ لیکن حقیقت یہ ہے کہ اس گیس فیلڈ کو فروخت کرنے کے تمام معاملات طے پاچکے ہیں۔پارلیمنٹ کی مصنوعی رکاوٹ کو ہٹانا صدارتی نظام میں زیادہ مشکل کام نہیں ہے۔
پاکستان اسٹیلز ملز کا معاملہ بھی لوگوں کی نگاہ میں رہنا چاہیے۔ آخرکیا سبب ہے کہ چھ ماہ قبل تک جو اسٹیلز ملز چھ ارب روپے کاسالانہ منافع پر دے رہی تھی وہ اچانک سات ارب روپے کا خسارہ دکھا رہی ہے اور سٹیٹ بینک آف پاکستان سے قرضہ لینا پڑا ہے؟ اس معاملے کی کھوج لگائی جانی چاہیے کہیں ایسا تو نہیں کہ منافع بخش اداروںکو بیچنے پر تنقید سے بچنے کے لئے اسٹیل ملز جیسے اداروںکو سفید ہاتھی ثابت کرنے کی پالیسی اپنائی جارہی ہو۔ ممکن ہے کہ آئندہ دو چار ماہ تک ایسے اعدادوشمار سامنے لائے جائیں جن سے ثابت ہو کہ قادر پور گیس فیلڈر بھی خسارے میں جارہی ہے۔ اس لئے خسارے والے یونٹوں سے چھٹکارا پانا ضروری قرار پائے۔
یہی پاکستان ہے جس میں بہت سے قومی ادارے اپنی بہترین صلاحیتوں کو بروئے کار لاتے ہوئے تمام تر بدترمالی حالات کے باوجود نہ صرف پاکستان کے قومی خزانے میں اربوں روپے کاسالانہ ٹیکس جمع کروا رہے ہیں بلکہ ہزاروں خاندانوں کے روزگار کا ذریعہ بھی بنے ہوئے ہیں۔ فوجی فرٹیلائزر کی ایک روشن مثال ہمارے سامنے ہے۔ کم از کم پچاس ہزار گھروں کے چولہا جلانے کا سہرا ایف ایف سی کی مینجمنٹ کے سرسجتا ہے۔ ایف ایف سی کے سیکرٹری بریگیڈیئر (ر) خالد کبریا کے مطابق سارک ممالک کی اکاﺅنٹس کمیٹی نے ایف ایف سی کو اکاﺅنٹس پریذنٹیشن پر بہترین ایوارڈ دیا ہے۔ایف ایف سی اوسطً پانچ ارب روپے سالانہ قومی خزانے میں ٹیکس کی مد میں جمع کراتی ہے۔اربوں روپے کے زرمبادلہ کی بچت علیحدہ ہوتی ہے۔ اسی طرح ہمارے درجنوں ایسے ادارے ہیں جن کو اگر اچھی مینجمنٹ میسر آجائے اور اہل اور فعال لوگ تعینات کردیئے جائیں تو انہیں منافع بخش بنا کر قومی ترقی کو ممکن بنایاجاسکتا ہے۔
یہ کیسا معاشی ویژن ہے کہ ہم اپنے قومی صنعتی اور کاروباری اداروں کو ٹھیک کرنے کی بجائے ان کو ناکارہ اور غیر منافع بخش ثابت کرنے پر تلے رہتے ہیں۔ کیا کچھ لوگوں یا وزارتوں کے کوئی ایسے ذاتی مفادات ہوتے ہیں کہ وہ ”غیر منافع بخش “ کا الزام لگا کر اداروں کو ”قتل“ کرتے جارہے ہیں ۔ یہ قومی نہیں ایک قبیع سوچ ہے۔ اسے قومی اثاثوں کی نجکاری کی بجائے کاروکاری ہی کہا جائے گا۔ آپ اپنی ذمہ داریاں نبھانے اور کچھ سنوارنے کی بجائے کسی صنعت یا ادارے پر ”کاری“ کا الزام لگائیں اور اشتہارات دیکر اسے ”نج کاری“ کی موت مار دیں!۔

Click here to View Printed Statment

Click here to View Printed Statement

کسی امر میں دو افراد کا اشتراک جو قوم و ملک ‘مذہب و ملت ‘پیشہ یا نظریاتی ہم آہنگی کی بنیاد پر استوار ہوتا ہے ان میں سب سے بڑھ کر وہ اشتراک ہے جس کی بنیاد رحم مادر ہے۔عربی زبان میں قرابت کا حق ادا کرنے کو وصل ‘رحم ملانا یعنی صلہ رحمی کہتے ہیں۔ یہ خالق کائنات کا پیدا کردہ اشتراک ہے جس کا توڑنا انسان کے بس میں نہیں۔ اسی لئے اس کے حقوق کی نگہداشت بھی انسانوں پر بہت زیادہ ضروری قرار دی گئی ہے۔

اس لئے قرآن پاک میں بارہ مقامات پر رشتہ داروں سے حسن سلوک ‘ان کی مالی امداد واعانت اور ان سے عفوو درگزر کی تلقین کی گئی ہے۔ اللہ کی نظر میں اس کی قدر اہمیت ہے کہ خدائے واحد کی عبادت اور والدین کے ساتھ حسن سلوک کے ساتھ رشتہ داروں سے حسنِ سلوک کی تاکید کی گئی ہے۔ اللہ تعالیٰ سورة النساءمیں فرماتے ہیں:
ترجمہ: ”اللہ کی بندگی کرو‘ اس کے ساتھ کسی کو شریک نہ کرو والدین اور رشتہ داروں کے ساتھ حسنِ سلوک کرو“۔
اور جو لوگ اس فطری تعلق کو توڑنے کی کوشش کرتے ہیں ‘ اللہ تعالیٰ نے انہیں فاسق کہا ہے اور اسے فساد فی الارض کے برابر گناہ قرار دیا ہے۔ فرمان الٰہی ہے:
ترجمہ :اور جن قریبی رشتہ داروں کو اللہ نے جوڑنے کا حکم دیا ہے‘ انہیں کاٹتے ہیں اور زمین پر فساد کرتے ہیں تو یہی لوگ نقصان اٹھانے والے ہیں۔“
رشتہ داروں کے ساتھ حسنِ سلوک سے پیش آنا ان پر کوئی احسان نہیں بلکہ یہ ان کا حق ہے اور مسلمانوں پر فرض قرار دیا گیا ہے۔ سورہ بنی اسرائیل کی آیت نمبر 26 میں جو فرمان باری تعالیٰ ہے:ترجمہ ”اور قرابت والے کو اس کا حق ادا کر“۔سورة البقرہ کی آیت نمبر 177 میں ارشاد باری تعالیٰ ہے۔ ترجمہ :” اللہ کی محبت میں اپنا مال قریبی رشتہ داروں کو دو۔“
غیر مسلم رشتہ داروں کے ساتھ رشتہ کی قرابت کے لحاظ سے حسنِ سلوک کرنا بھی سنت نبوی علیہ الصلوة والسلام ہے۔ آپ نے فرمایا:
ترجمہ :” غیر مسلم اقرباءکے ساتھ میرا خون کا رشتہ ہے‘ میں اس کو بھلائی کے ساتھ زندہ رکھوں گا۔“
مالی اعانت:
قرآن حکیم کا بغور مطالعہ کیا جائے تو اس میں دو لفظ بار بار زیر مطالعہ آتے ہیں۔ ایک اانفاق فی سبیل اللہ جس کے معنی خدا کی راہ میں خرچ کرنے کے ہیں یعنی خدا کی راہ میں دینا اور دوسرا حکیم قرآنِ مجید میں والدین کے ساتھ اہل قرابت پر بھی مال خرچ کرنے کا ہے۔
ترجمہ:”اے نبی کہہ دیجئے کہ جو کچھ تم مال میں سے خرچ کرتے ہو‘ وہ والدین اور رشتہ داروں پر خرچ کرو“۔(سورہ البقرہ 215)
عدل واحسان کے ساتھ اہل قرابت کی امداد کا بطور خاص حکم دیا گیا ہے ۔ فرمایا گیا ہے۔
ترجمہ : بے شک اللہ تعالیٰ نے عدل و احسان اور رشتہ داروں کو دینے کا حکم دیتا ہے“۔
کمال حسنِ سلوک:
بعض رشتہ داربغض وحسد کے باعث ہمیشہ شرانگیزی اور قطع رحمی پر آمادہ رہتے ہیں۔ ان کی زیادتی کو صبر و تحمل کے ساتھ برداشت کرنا چاہیے اور ان سے حسنِ سلوک سے پیش آنا چاہئے۔ سرکار دوعالم کا ارشاد ہے:
”کسی شخص کا کمال یہ نہیں کہ وہ بھلائی کا جواب بھلائی سے دے بلکہ کمال یہ ہے کہ رشتہ دار اور اس سے بدسلوکی کریں اور وہ ان سے حسنِ سلوک کرے۔“ (بخاری ‘کتاب البر)
عفودرگزر:
اگر کسی رشتہ دار سے کوئی قصور سرزد ہوجائے تو صاحب ثروت کے لئے یہ مناسب نہیں کہ وہ بطور سزا اس کی اعانت سے اپنا ہاتھ روک لیں جیسا کہ خلیفہ راشد حضرت ابوبکر صدیقؓ نے اپنے رشتہ دار مسطح بن اثاثہ کی مدد بند کردی تھی کیونکہ ام المومنین حضرت عائشہ صدیقہ ؓ پر تہمت لگانے والوں میں یہ بھی شریک تھا پھر جب یہ آیت اتری‘
”اور تم میں صاحب فضل اور دینوی وسعت والے لوگ اپنے رشتہ داروں اور مساکین کو دینے سے قسم نہ کھا بیٹھیں تو آپ نے اس کی امداد بحال کردی۔ امت مسلمہ کے اہل ثروت کو حکم ہے کہ ان کے مورال میں سوال کرنے والوں اور محروم رہ جانے والوں کا حق ہے۔“
” اور محروم رہ جانے والوں میں قرابت داروں کا حق فائق ہے اور ان کو دینے پر دہرا اجر ہے۔“ اس سلسلے میں فارسی مثل بھی ہے‘ اول خویش بعد درویش۔ جو ایک حدیث کا ترجمہ ہے ”یعنی خیرات اپنے گھر سے شروع کر۔“

اسلام والدین کے متعلقین کی بھی عزت کرنے کا حکم دیتا ہے
دنیا کا ہر مذہب اور تہذیب اس بات پر متفق ہے کہ والدین کے ساتھ حسن سلوک کرنا چاہئے ان کا ادب و احترام ملحوظ خاطر رکھنا چاہیے۔ اس بارے میں قرآن کی تعلیم سب سے زیادہ اہم اور اپنے ایک انفرادی سلوک کی حامل ہے۔ مثلاً جب کبھی اللہ تعالیٰ نے اپنی استطاعت وفرمانبرداری کی تعلیم دی ہے۔ ترجمہ ”اے بندو تم میرا (اللہ کا) شکر کرو اور اپنے والدین کا شکر ادا کرو تم تمام کو میری ہی طرف لوٹ کر جانا ہے۔“ (سورة لقمان14)

یاد رکھئے کہ جس طرح سے اللہ کے حقوق ہم پر فرض ہیں بالکل اسی طرح انسانوںکے حقوق بھی ہم پر فرض ہیں اور اتنے ہی اہم ہیں۔ انسانوں میں والدین کے حقوق بھی ہم پر فرض ہیں اور اتنے ہی اہم ہیں۔ انسانوں میں والدین کے حقوق سب سے زیادہ بڑھ کر ہیں۔ ماں باپ کے ساتھ حسن سلوک کرنے والوں کو جنت کی بشارت دی گئی ہے۔(ترجمہ)اور ہم نے انسان کو اپنے ماں باپ کے ساتھ حسن سلوک کرنے کا حکم دیا ہے اور اس کی ماں نے اسے تکلیف جھیل کر پیٹ میں رکھا اور تکلیف برداشت کرکے اسے جنم دیا اس کے حمل کا اور اس کے دودھ چھڑانے کا زمانہ تیس مہینے کا ہے۔ یہاں تک کہ جب وہ اپنی پختگی اور چالیس سال کی عمر کو پہنچا تو کہنے لگا اے میرے پروردگار! مجھے توفیق دے کہ میں تیری اس نعمت کا شکر بجالاﺅں جو تو نے مجھ پر اور میرے ماں باپ پر انعام کی ہے اور یہ کہ میں ایسے نیک عمل کروں جن سے تو خوش ہوجائے اور تو میری اولاد بھی صالح بنا۔ میں تیری طرف رجوع کرتا ہوں اور میں مسلمانوں میں سے ہوں۔ یہی وہ لوگ ہیں جن کے نیک اعمال کو ہم قبول فرما لیتے ہیں اور جن کے بداعمال سے درگزر کر لیتے ہیں (یہ) جنتی لوگوں میں سے ہیں۔اس سچے وعدے کے مطابق جو ان سے کیا جاتا تھا( سورة الحقاف 15-16) والدین سے نافرمانی کرنے والوں کے لئے گھاٹا ہی گھاٹا ہے (ترجمہ) “ اور جس نے اپنے ماں باپ سے کہا کہ تم سے میں تنگ آگیا ہوں تجھے خرابی ہو تو ایمان لے آ‘ بے شک اللہ کا وعدہ حق ہے‘وہ جواب دیتا ہے کہ یہ تو صرف اگلوں کے افسانے ہیں‘ یہ لوگ ہیں جن پر عذاب کا فیصلہ چسپاں ہوچکا ہے۔ اور جنوں اور انسانوں کی ان امتوں میں شامل ہوگئے ہیں جو ان سے پہلے گزر چکی ہیں‘ یقینا وہ تھے ہی گھاٹا اٹھانے والے۔“ (سورة الاحقاف 17-18) اللہ تعالیٰ کے رسول پاک نے بھی فرمایا۔ ترجمہ ”تم اپنی ماں کے ساتھ صلہ رحمی کرو تم اپنی ماں کے ساتھ نیک سلوک کرو‘ تم اپنی ماں کے ساتھ صلہ رحمی کرو پھر تم اپنے باپ کے ساتھ صلہ رحمی کرو‘ پھر تم اپنے قریبی رشتہ داروں کے ساتھ صلہ رحمی کرو۔ پھے اس کے بعد دور کے رشتہ داروں کے ساتھ صلہ رحمی کرو“۔ (مظہری)
ماں کے ساتھ اس طرح کے خاص حسن سلوک اور صلہ رحمی کا حکم اللہ تعالیٰ نے کئی وجوہات کی بناءپر دیا ۔1۔بچہ کو اپنے پیٹ میں رکھنے کی تکلیف اور پیدائش کے وقت کی تکلیف سہنے کی وجہ سے ۔2 بچہ پیدا ہونے سے پہلے اور بچہ پیدا ہونے کے بعد بچے کی پرورش ونشونما کے لئے اس کے بدن سے بچے کو غذا دی جاتی ہے۔3۔ ہر وقت بچہ کو اپنے کاندھوں پر لادے رہنا دن رات اس کی ضرورتوں کے پیچھے لگے رہنا۔4۔ ماں بچوں کو سکھاتی ہے اور انہیں تربیت دیتی ہے ‘نفسیات کے ماہرین کا کہنا ہے کہ بچپن کی تعلیم وتربیت کا اثر بچے کی آگے کی زندگی پڑتا ہے۔ دنیا کی تمام عظیم شخصیتیں اپنی عظیم ماﺅں کی وجہ سے عظیم کہلائیں۔واضح رہے کہ ماں کے احسانات بہت زیادہ ہیں ۔ اسی لئے اللہ تعالیٰ نے اس کے حقوق کواتنی اہمیت دی ہے لیکن افسوس کی بات ہے کہ کئی مائیں اللہ تعالیٰ کی دی ہوئی فوقیت اور اہمیت کا غلط استعمال کرتی ہے بہت ساری مائیں بچوں کو اپنے قبضے میں لے لیتی ہیں اور باپ کو بچوںکے معاملات میں اپاہج بنا دیتی ہیں یہاں تک کہ ایسی مائیں بچوں کو گھریلو معاملات میں باپ کا مخالف بنا دیتی ہیں۔ جس کی بناءپر اس گھر کا نظام درہم برہم ہو کر رہ جاتا ہے۔ ایسی مائیں اللہ کی دیگر ہدایات کو بھول کر ایسا کرتی ہیں(ترجمہ) ”مرد عورتوں پر حاکم ہیں اس وجہ سے کہ اللہ تعالیٰ نے ایک دوسرے پر فضیلت دی ہے اور اس وجہ سے کہ مردوں نے اپنے مال خرچ کئے ہیں‘ پس نیک عورتیں (ہوتی ہیں) اطاعت شعر(مردوں کی) غیرحاضری میں حفاظت کرنے والیاں“۔(سورة النساء34)
اللہ تعالیٰ نے قرآن پاک میں گھریلو زندگی کے متعلق سب سے زیادہ مفصل ہدایتیں دی ہیں۔ اتنی ہدایتیں زندگی کے دوسرے شعبے کے متعلق نہیں ملتیں۔ کیونکہ گھریلو سکون کی اہمیت او ر بقاءاللہ تعالیٰ کی نظر میں بہت اہم ہے۔ ایسی ماﺅں کا اسی طرح کا غیر اسلامی سلوک ان کے شوہروں کو انتہائی تکلیف میں مبتلا کردیتا ہے اور بہت مسائل پیدا کردیتا ہے ۔ اللہ تعالیٰ کی نظر میں ایسی ماﺅں کا اجر کم ہوجاتا ہے۔کیونکہ وہ خاوند کو اس کے مقام سے گرا کر اولاد کی مدد سے گھریلو سکون کو تباہ و برباد کرتی ہیںکئی ایسی مائیں اپنی زندگی کے آخری حصہ میں اپنی غلطیوں کو تسلیم کرلیتی ہیں جب وہ خود اپنے پیدا کئے ہوئے مسائل میں گھر کر پریشان ہوجاتی ہیں۔ لیکن پھر اس وقت نقصان کی تلافی انتہائی مشکل ہوجاتی ہے۔
حقیقت میں ہر بری چال کا نتیجہ اس چال کے چلنے والے پرہی وارد ہوجاتا ہے۔ (ترجمہ) ” کسی بھی بری چال کا نتیجہ اس چال کے چلنے والے ہی کومل کر رہتا ہے۔ (سورة الفاطر 43:) والدین کے ادب و احترام کے لئے مزید تفصیل دی گئی ہے۔“ (ترجمہ) اور تیر ا پروردگار صاف صاف حکم دے چکا ہے کہ تم اس کے سوا کسی اور کی عبادت نہ کرنا اور ماں باپ کے ساتھ احسان کرنا اگر تیری موجودگی میں ان سے ایک یا یہ دونوں بڑھاپے کو پہنچ جائیں تو ان کے آگے اف تک نہ کہنا ‘نہ انہیں ڈانٹ ڈپٹ کرنا بلکہ ان کے ساتھ ادب و احترام سے بات چیت کرنا اور عاجزی اور محبت کے ساتھ تواضح کا بازو پست رکھے رکھنا اور دعا کرتے رہنا کہ اے میرے پروردگار! ان پر ویسا ہی رحم کرو جیسا انہوں نے مجھے بچپن میں بالا۔ جو کچھ تمہارے دلوں میں ہے اسے تمہارا رب بخوبی جانتا ہے اگر تم نیک ہو تو وہ رجوع کرنے والوں کو بخشنے والا ہے“(سورة الاسرار 23-25)
ان آیات میں اللہ تعالیٰ نے اپنی اطاعت کے بعد دوبارہ والدین کے ادب و احترام کی بات کی ہے۔ ان آیات میں اللہ تعالیٰ نے ہمیں سمجھایا ہے کہ ہم بچپن میں کس طرح بے یارومددگار تھے اور والدین نے ہمیں پالا پوسا اور پروان چڑھایا‘ہمارے والدین ہماری ہر خواہش پورا کرتے تھے۔ مکمل خلوص اور محبت کے ساتھ اسی لئے اولاد پر فرض ہے کہ وہ والدین کا احترام کرے اور ان سے اچھا سلوک کرے۔ اگرچہ عمر کے تمام حصوں میں والدین کا ادب احترام کرنا چاہئے لیکن ان کی طرف زیادہ تر توجہ اس وقت ہونی چاہیے جب وہ بوڑھے ہوجائیں کیونکہ وہ بھی اسی طرح بے یارومددگار ہوجاتے ہیں جیسے ہم بچپن میں تھے‘ اللہ تعالیٰ نے ان آیات میںمندرجہ ذیل ہدایات ہمیں دی ہیں۔1۔والدین کو ان کی بے عزتی کے طور پر چھوٹے سے چھوٹا لفظ بھی نہیں کہنا چاہیے۔2۔ان کے سامنے چلا کر نہیں بولنا چاہیے۔3۔ انتہائی محبت بھرے لہجے اور ہمدردی کے انداز میں ان سے بات کرنی چاہیے۔4۔ والدین کے ساتھ ہر معاملہ انتہائی فرمانبرداری اور نرمی سے کرنا چاہئے۔ ان کے ساتھ رحمدل کا معاملہ ہونا چاہیے اور دل کی گہرائیوں سے یہ سب کچھ ہونا چاہئے محض دکھانے کے لئے روایتی انداز میںنہیں ہونا چاہیے۔5۔ ہمیں والدین کے لئے دعا کرنا چاہیے کہ میرے والدین پر رحم فرما کہ بالکل اسی طرح جس طرح وہ لوگ بچپن میں مجھ پر رحم وکرم کرتے تھے۔ یہ دعا ان کی موت کے بعد بھی کرتے رہنا چاہیے۔ کیونکہ اللہ تعالیٰ نے خود یہ دعا ہمیں سکھائی ہے۔ اور اس کی تلقین فرمائی ہے۔6 سورة الاسرارءکی آیت نمبر 25 میں اللہ تعالیٰ نے یہ بات بھی ہمارے دلاسے کے طور پر بیان کردی ہے کہ اگر کسی سے بھول چوک یا غلطی سے والدین کے متعلق کوئی نازیبا کلمات نکل جائیں۔جو لاپرواہی کی وجہ سے نہیںبلکہ سخت محنت کرتے ہوئے انجانے میں ہوجاتے تو اس پر اللہ تعالیٰ ہمیں سزا نہ دے گا۔ بشرطیکہ ہم خلوص دل سے توبہ کر لیں اور معافی مانگ لیں اورمعافی مانگ لیں۔ اللہ تعالیٰ ہمارے دلوں کی گہرائیوں سے بھی واقف ہے ۔ والدین کے احترام کے بارے میں بہت ساری احادیث بھی موجود ہیں۔ ایک مرتبہ ایک آدمی نے حضرت محمد سے پوچھا وہ کونسا عمل ہے جو اللہ تعالیٰ کو سب سے زیادہ پسند ہے ‘جواباً آپ نے فرمایا وقت مقررہ پر عبادت کرنا‘پوچھنے والے نے پوچھا اس کے بعد کون سا عمل؟ آپ نے فرمایا والدین کے ساتھ حسن سلوک (بخاری) ۔ حضرت عبداللہ بن عمرؓ روایت کرتے ہیں کہ ایک آدمی نے جہاد میں جانے کی اجازت چاہی تو آپ نے پوچھا کیا تمہارے والدین زندہ ہیں؟ اس نے کہا ہاں‘ آپ نے فرمایا کہ تمہارے والدین کی خدمت کرنا تمہارے لئے جہاد ہے۔(بخاری) یاد رکھئے یہ حکم اس وقت ہے جب والدین کی خدمت کرنے والا کوئی نہ ہو تو ان کو اکیلا بے سہارا چھوڑ کر نہیں جانا چاہئے ‘ اگر گھر میں دوسرے بھائی وغیرہ ہوں تب یہ حکم نہ ہوگا اور اگر جہاد فرض عین ہو تب بھی ہر مسلمان کو جہاد پر نکلنا فرض ہوگا۔ اسلام اس بات کی بھی تلقین کرتا ہے ہم اپنے والدین کے متعلقین کی بھی عزت کریں‘چاہے وہ والدین کے رشتہ دار ہوں یا والدین کے دوست۔ حضرت عبداللہ بن عمرؓ روایت کرتے ہیں کہ حضرت محمد نے کہا کہ اگر تم اپنے والدین کے دوستوں کا احترام کروگے تو یہ بلاواسطہ تمہارے والدین ہی کا احترام ہوگا۔(بخاری)۔

یقینا میاں صاحب نے یہ حقیقت پنجاب میں اپنی حکومت کے حوالے سے واضح کی ہوگی لیکن اصول کی بات یہ ہے ہم جو اپنے لئے پسند کرتے ہیں وہی اپنے بھائی کےلئے پسند کیوں نہیں کرتے۔ کیا یہ حقیقت نہیں ہے کہ اگر محترم نوازشریف ہم آہنگی اور سیاسی رواداری کا یہی مظاہرہ جناب آصف علی زرداری کے حق میں بھی کرتے اور جلدی میں اپنی جماعت کی طرف سے ایک متنازعہ ریٹائرڈ جج کو مقابلے پر نہ لاتے تو ملک کی سیاسی فضا میں جو مخالفانہ لہریں سر اٹھا رہی ہیں وہ پیدا ہونے سے پہلے ہی بے اثر ہوجاتیں۔ کیاں میاں صاحب کو علم نہیں ہے کہ پاکستان پیپلزپارٹی کا مینڈیٹ کیا ہے اور جناب آصف علی زرداری کی اس وقت وفاق میں اہمیت کیا ہے؟
یہ بات دہرانے کی نہیں کہ پی پی پی ہی پاکستان کی وہ واحد اکثریتی پارٹی ہے جسے پاکستان کے چاروں صوبوں میں موثر نمائندگی حاصل ہے۔ گویا یہ وہ واحد سیاسی پارٹی ہے جس کے سر پر صوبہ سندھ‘ بلوچستان‘سرحد اور پنجاب کے عوام نے اپنے ووٹوں سے وفاق پاکستان کا سہرا سجایا ہے۔ تمام سیاسی پارٹیوں اور گروہوں کو سچے دل کے ساتھ عوام کے اس فیصلے کو تسلیم کرتے ہوئے مرکز میں پی پی پی کو اقتدار سونپ دینا چاہیے تھا۔ میثاق جمہوریت میں یہی بنیادی نقطہ طے ہوا تھا۔ میاں محمد نوازشریف نے اس وقت تک سیاسی مفاہمت کا زبردست مظاہرہ کیا جب تک جنرل (ر) پرویز مشرف صدارت کے منصب پر قابض رہے۔ لیکن یہ افسوس کا پہلو ہے کہ جونہی پرویز مشرف منظر سے ہٹے ہیں جناب نوازشریف کا لہجہ تبدیل ہونا شروع ہوجاتا ہے۔ یوں لگتا ہے کہ جناب میاں نوازشریف نے اپنے بدترین دشمن کو گھر بھجوانے کے لئے جناب آصف علی زرداری کو استعمال کیا اور جونہی یہ غرض پوری ہوئی پھر زرداری کو ناقابل عمل وعدوں کی زنجیر میں باندھنا شروع کردیا اور آخری چال کے طور پر ”ڈیڈ لائن“ کا جھٹکا دے کر حکمران اتحاد سے علیحدگی اختیار کر لی۔ جہاں تک ججوں کی بحالی کا تعلق ہے تو یہ حقیقت ہے کہ معزول ججوں کی بحالی کا آئینی طریقہ کار طویل اور پیچیدہ ہے اور آئینی ماہرین سے مسلسل مشاورت کے بعد ہی سندھ اور پنجاب کے درجن بھر سے زائد جج بحال کئے جاسکے ہیں۔ قوی امکان ہے کہ جناب زرداری کے عہدہ صدارت سنبھالتے ہی باقی معزول جج صاحبان بھی بحال ہوجائیںگے۔
جناب میاں نوازشریف کو بروقت نہ سہی لیکن جلد ہی سیاسی ہم آہنگی اور عوامی مینڈیٹ کے احترام کا خیال آگیا ہے۔ ایسی سندر سوچ کے پیچھے یہ خوف عمل کارفرما دکھائی دیتا ہے کہ کہیں پنجاب میںمسلم لیگ (ن) کی حکومت کا بوریا بستر نہ لپیٹ دیا جائے اور میاں برادران جانتے ہیں کہ ایک بار اگر اقتدار ہاتھ سے نکل جائے تو پھر برسوں کی ریاضیت کے بعد ہی کوئی موقعہ ملتا ہے۔ میاں صاحب کو جناب زرداری کا یہ احسان کبھی نہیں بھلانا چاہیے کہ انہوں نے صدر مشرف کے ساتھ کوئی سودا بازی کرنے کی بجائے میاں نوازشریف کے بدترین دشمن کے گرد اس قدر گھیرا تنگ کیا کہ استعفیٰ کے سواکوئی چار ہ نہ رہا۔ آج اگر پی پی پی اور مشرف اکٹھے ہوتے تو میاں برادران کو شاید ایک بار پھر نااہلی‘جلاوطنی اور دربدری کے عمل سے گزرنا پڑتا۔سیاسی رواداری‘جمہوری سوچ اور عہد نبھانے کے لئے جناب آصف علی زرداری کا کردار تاریخ میں سنہری حروف سے لکھا جائے گا۔
سندھ اسمبلی‘بلوچستان اسمبلی اور سرحدا سمبلی میں جناب آصف علی زرداری کو صدر پاکستان بنانے کے لئے امنگیں جوان ہیں ۔ ایم۔ کیو ۔ایم نے آگے بڑھ کر جناب زرداری کو صدارت کے لئے نامزد کیا ہے ۔آج کے پاکستان کا یہی بڑا مسئلہ ہے کہ کوئی مرد اعتبار تو ایسا ہو جس پر بلوچ‘مہاجر‘ پٹھان اور پنجابی سب متفق ہوسکیں۔ اتفاق کا ایک منظر قیام پاکستان کے دنوں میں دکھائی دیتا تھا۔ ظاہر ہے جناب زرداری قائداعظمؒ یا قائد عوام تو نہیں بن سکتے لیکن ان کے نقش قدم پر چلنے کی صلاحیت ضرور رکھتے ہیں۔ یہی وہ صلاحیت ہے جس کا ادراک کرتے ہوئے چاروں اکائیوں کے کروڑوں عوام جناب زرداری کو قصرِ صدارت میں خدمات سرانجام دیتے دیکھنا چاہتے ہیں۔
اب بھی وقت ہے کہ جناب میاں محمد نوازشریف دل بڑا کریں۔ ناراض ہونے کی بجائے حقائق کو قبول کریں اور پنجاب کی طرف سے باقی تینوں صوبوں کے ساتھ ہم آواز ہوکر جناب زرداری کے حق میں اپنا امیدوار دستبردار کروا دیں۔ ہمیں احسان کا بدلہ احسان سے دینا چاہیے اور جس طرح (ن) لیگ کے راستے کے بھاری پتھر کو جناب زرداری نے اپنے عزم‘ حوصلے اور دانشمندی سے دور کیا ہے۔ اسی طرح جناب میاں نوازشریف جناب زرداری کے راستے کی کنکریاں اپنے ہاتھوں سے اٹھا کر دور پھینک دیں۔ حزب اختلاف میں رہنا پارلیمانی نظام کی شدید ضرورت ہوتی ہے۔ میاں صاحب کو حق ہے کہ وہ اپنے کسی نمائندے غالباً چوہدری نثار صاحب کو قائد حزب اختلاف نامزد کردیں۔ لیکن سیاسی رواداری اور برداشت کے تقاضے نبھانے کیلئے میدان کھلا پڑا ہے۔ اگر 80ءاور 90ءکی دہائی کی تلخ یادیں دہرانا نہیں چاہتے تو پھر کولیشن حکومت کو چلنے دیں۔ آخر باقی ممالک میں بھی تو حکمران اتحاد بنتے اور اپنی انتخابی مدت پوری کرتے ہیں۔

یہ صحیح ہے کہ قوموں کی زندگی میں ساٹھ ستر برس کا عرصہ کوئی اہمیت نہیں رکھتا لیکن یہ بات ملکوں کی تاریخ کے حوالے سے سچ معلوم نہیںہوتی۔ قوموں کا سفر ہرحال میں جاری رہتا ہے۔ ادھر ڈوبے ادھر نکلے کا عمل ہوتا رہتا ہے۔ لیکن ریاست ایسے ڈوبنے یا نکلنے کی متحمل نہیںہوسکتی۔ ایک بارکوئی ملک اگر دنیا کے نقشے پر ابھر آئے تو پھر اس کے مٹنے کا منظر بڑا ہی بھیانک ہوتا ہے۔

ڈیڑھ ارب مسلمان مختلف اسلامی اور غیر اسلامی ملکوں میں موجود ہیں۔ بحیثیت قوم ان کی زندگی میں اتار چڑھاﺅ آتے رہتے ہیں ان کی تعداد بھی بڑھتی رہتی ہے۔ ممکن ہے کہ رفتار زمانہ کے ساتھ ساتھ مسلمان انفرادی طور پر بھی ترقی کرتے رہیں۔ ارتقاءکا عمل جاری رہتا ہے اور انقلابات زمانہ اس عمل کی رفتار کو کم یا زیادہ تو کرسکتے ہیں روک نہیں سکتے۔ اصل مسئلہ ملکوں کی بقاءاور ترقی کا مسئلہ ہے پاکستان اپنی پیدائش کے پچیس برس بھی پورے نہ کرپایا تھا کہ دولخت ہوگیا۔ اب سابقہ مشرقی پاکستان بنگلہ دیش کے نام سے ایک نیا ملک بن چکا ہے۔ وہاں کے مسلمان ہوسکتا ہے پہلے سے بہت خوشحال ہوں لیکن پاکستان اب دنیا کا سب سے بڑا اسلامی ملک نہیں رہا۔ اس لئے پاکستان کی زندگی میں پچیس سالوں کی بڑی اہمیت ہے۔ جو ملک ساٹھ برس گزارنے کے بعد بھی خانہ جنگیوں میں گھرا ہوا ہو اس کے خلاف دشمن قوتوں کو پاکستان کے ٹوٹ جانے کی افواہیں پھیلانے کے لئے زیادہ ذہنی مشقت کی ضرورت نہیں رہتی۔
ہم نے اکسٹھواں یوم آزادی اس عالم میں منایا ہے کہ ہماری ریاست کے اہم ترین اداروں کے سربراہان بھی آپس میں ایک جگہ مل بیٹھ کر ”پاکستان زندہ باد“ کا نعرہ نہیں لگاسکے۔ ایوان صدر نے اپنے طورپر نغمہ سرائی کی محفل بپا کی اور وزیراعظم ہاﺅس نے اپنا ”یوم پاکستان“ منایا۔ افواج پاکستان کے سربراہ نے احتیاط برتی اور وہ سیاسی کشمکش سے دور اپنی پیشہ وارانہ ذمہ داری کو نبھاتے ہوئے کاکول اکیڈمی میں تشریف لے گئے۔ میں یہاں کسی ستون کے فیصلے کو غلط یا صحیح ثابت نہیں کرنا چاہتا صرف یہ سوال کہ جشن آزادی کے علیحدہ علیحدہ بندوبست سے دشمن ممالک کو کیا پیغام ملتا ہے‘ اہم ہے۔ آخر ہم اس قابل کیوںنہیں ہوسکے کہ کم از کم آزادی کے روز ہی ہم سب اکٹھے ہو کر بانی ء پاکستان کو خراج عقیدت پیش کرسکیں۔
داخلی صورتحال یہ ہے کہ فاٹا سے ہجرت کرکے آنے والے بے سہارا پاکستانی بہن بھائیوں کے لئے امداد کے اشتہارات شائع ہورہے ہیں اور بلوچستان میں آزادی کے روز ان قبائلی رہنماﺅں کو قتل کردیا گیا جو یوم پاکستان کی تقریب منعقد کرنا چاہتے تھے ۔فکری ہی نہیں جغرافیائی اعتبار سے بھی منتشر ملک کے ہر فرد کو سوچنا ہوگا کہ آخر ساٹھ برسوں میں ہم نے انفرادی اور اجتماعی طور پر ایسے کونسے جرائم کئے ہیں جن کی سزا ہمیں اس نہ ختم ہونے والی خانہ جنگی کی صورت میں مل رہی ہے اور ہم مستقبل میں کونسا ایسے صالح عمل کریں کہ کم از کم اپنے جغرافیے کو ہی بچا سکیں۔
ہمارے ایک ریٹائرڈ بریگیڈیئر دوست جناب خالد کبریا اپنے ملکی حالات کا دیگر ترقی پذیر ممالک سے موازانہ کرتے رہتے ہیں وہ برس ہار برس کے مشاہدے کے بعد اس نتیجے پر پہنچے ہیں کہ پاکستانی عوام دنیا کی بہترین قوم ہے لیکن ہماری لیڈر شپ دنیا کی ناکام ترین لیڈر شپ ہے۔ مجھے ذاتی طور پر اس نتیجہ سے اس حد تک اختلاف ہے کہ ہم انفرادی طور پر بھی ایسی گمراہیوں میں مبتلا ہوگئے ہیں جن کی وجہ سے ہماری اجتماعیت قابل فخر نہیں رہی کیونکہ لیڈر شپ بھی عوام کے اندر سے ہی ابھرتی ہے ۔
اگر ہم میں سے ہر شخص آئندہ کے یوم آزادی کو مثالی طور پر منانے کا عہد کرے اور پاکستان کی خاطرکوئی ایک اچھا عمل اپنا لے تو کوئی مشکل نہیں کہ ہم انتشار کی بجائے اتحاد اور مایوسی کی بجائے امید اور وطن بیزاری کی بجائے حب الوطنی کے تحفوں سے مزّین نہ ہوسکیں۔
خدا کی قدرت اور کس قدر ہم پر مہربان ہو کہ پاکستان کے خونی حالات کو دیکھنے اور سمجھنے کے باوجود جب سری نگر کے کشمیری مسلمان لاکھوں کی تعداد میں ”مظفرآباد چلو“ کے نعرے لگاتے گھروں سے باہر نکلتے ہیں تو ان کے ہاتھوں میں پاکستان کا سبز ہلالی پرچم ہوتا ہے۔ اس قدر اہم پاکستان کی ہمیں قدر وقیمت کا از سر نو اپنے اندر احساس پیدا کرنا چاہیے اور گولی سے تڑپتے کشمیری نوجوان سے پوچھنا چاہیے کہ آخر اسے پاکستان اپنی جان سے بھی کیوں عزیز تر ہے!
ملکوں کی تاریخ میں ہر لمحہ اہم ہوتا ہے۔چھوٹی سی غفلت بھی صدیوں پیچھے لے جاتی ہے۔غافل عوام ہوں یا حکمراں دونوں صورتوں میں ناقابل تلافی نقصان ہوتا ہے۔ جب نظریاتی سکول” رائز“ میں انگریزی پڑھنے والے بچوں کو سندھی زبان کی ابتدائی تعلیم شروع کی تو ایک مزدور اکرم نے مجھ سے پوچھا کہ ”سندھی پڑھنے سے میرے بچے کو کیا فائدہ ہوگا؟
” سندھی بہن بھائیوں سے قربت بڑھے گی اور یہ بچہ پورے پاکستان کا معزز شہری بن جائے گا“ میر اجواب تھا۔ ہر کسی کو کوئی نہ کوئی صالح عمل کرنا ہے ۔ پاکستان اپنے تمام تر داخلی خرابیوں کے باوجود تمام آزادی پسند قوموں کاآئیڈیل ہے ۔ یہ اس قدر قیمتی اور پیارا ملک ہے کہ بقول شاعر‘
گوشکستہ دل ہیں تیری تغافل شعاریاں
اس پر بھی مجھ کو تجھ سے محبت ہے کیا کروں