ہمارے والدین ”کرپشن” کے لفظ سے واقف نہیں تھے۔ قیام پاکستان کے بعد رشوت ستانی کی اصطلاع عام ہوئی تھی۔ بعض بیوروکریٹس کے بارے میں مشہور تھا کہ وہ بہت بڑے رشوت خور ہیں۔ تقسیم کے وقت جھوٹے کلیم بنانے اور ان جعلی کاغذات کے عوض رشوت لے کر زمینیں اور جائیدادیں الاٹ کرنے والوں کا چرچا رہتا تھا۔ جب عدالتی نظام پھیل گیا تو بعض ججوں کے بارے میں بھی خبریں آنا شروع ہوئیں کہ فلاں جج رشوت خُور ہے۔ رشوت ستانی ایک ایسا الزام اور جُرم تھا کہ عام لوگ کسی راشی افسر کو دیکھ لیتے تو کُھلے عام بیزاری کا اظہار کرتے دکھائی دیتے تھے۔ بعض دفاتر کے اندر ”رشوت لینے اور دینے والے دونوں جہنمی ہیں” کی حدیث مبارکہ جلی حروف میں لکھی ہوئی تھی۔ رشوت خوری کیخلاف سماجی اور مذہبی جماعتیں مہمات بھی چلاتی تھیں۔ رشوت خور عہدیدار کے ساتھ کوئی معزز شہری اپنی بیٹی بیاھنے پر تیار نہیں ہوتا تھا۔ پولیس افسران کے خلاف رشوت کے مقدمات بننے شروع ہوئے

اور یہ لطیفہ بھی عام ہوا کہ ”رشوت لینے کے جُرم میں پکڑا جانے والا رشوت دے کر چھوٹ جاتا ہے”۔ اُردو اخبارات کے کالم نگار حکومتوں کو یہ کہہ کر جھنجھوڑتے تھے کہ ملک میں رشوت کا ”چلن ”عام ہوگیا ہے۔ دھیرے دھیرے رشوت ستانی ہمارے سماج اور مزاج کا حصہ بن گئی ہے۔انسداد رشوت ستانی کے محکمے بنائے گئے ۔ قانون میں تبدیلیاں لائی گئیں ۔ایوب خان کے دور میں کوٹے اور پرمٹ کا کلچر عام ہوا۔ معلوم ہوا ہے کہ رشوت تو بہت ہی معصوم سا گناہ ہے۔ پرمٹ حاصل کرنے والوں نے دن دُگنی رات چُگنی دولت سمیٹنا شروع کردی۔ بہت سے نو دو لیتے پیدا ہوگئے۔
جب رشوت خور کی اصطلاح بدعنوانی کے وسیع معنوں کا احاطہ کرنے سے قاصر ہوئی تو پھر ہم نے لفظ ”کرپٹ” مستعار لے لیا۔پہلے پہل کسی کو ”کرپٹ”کہتے ہوئے لہجہ دھیما اور محتاط ہوتا تھا۔
”کرپٹ” ہونے کا مطلب”اخلاقی” طور پر بدیانتی سمجھی جاتی تھی۔ کسی افسر کو ”کرپٹ” کہنے کا مقصد یہ تھا کہ یہ شخص انتہائی قسم کا شبابی کبابی ہے۔ پھر وقت بدل گیا اور جنرل یحییٰ خان اور ذوالفقار علی بھٹو کا دور آیا۔ اخلاقی بدیانتی اور شراب و شباب بڑے لوگوں کا معمول ٹھہرائے گئے۔ دائیں بازو کے دانشوروں نے ”پینے پلانے” اور ناپاک رشتوں کو ”ذاتی” فعل قرار دے دیا۔ ایک نئی فکری واردات کی گئی۔ بتایا گیا کہ اصل ”کرپشن” تو مالی کرپشن ہوتی ہے۔”مالی کرپشن” کا فلسفہ امریکہ’ یورپ اور روس کی مادر پدر آزاد تہذیب نے گھڑا تھا۔ فحاشی و عریانی”کرپشن” کی تعریف سے نکل گئی۔ بداخلاقی فیشن بن گیا اور مردوزن کے غیر اخلاقی اختلاط کو ”معمول” سمجھ لیا گیا۔ اسلامی معاشرے میں سب سے بدترین شخص ”زانی” سمجھا جاتا تھا۔ لیکن پاکستان کی کرکٹ ٹیم کے بعض کھلاڑیوں کو کُھلی چھوٹ مل گئی۔ بعد میں یہی کھلاڑی ہمارے قومی ہیرو بنے اور عورتوں کے ساتھ ان کے ناجائز تعلقات سے معاشرے نے نگاہیں پھیرے رکھیں۔ اسلام میں ”زانی” کی سزاسو دُرے ہیں۔ لیکن ”ہیروازم” کے اسیر عوام نے اس جُرم کو بھی ”ہیرو کی شان” سمجھ لیا۔ مسلم معاشروں میں کسی بدکار شخص کو نفرت اور حقارت کی نگاہ سے دیکھا جاتا تھا لیکن جب ہمارے ہیرو سیاستدان بن گئے تو ان کی تمام مبینہ اور کھلے عام بدکاریوں کو ماضی کی خطا سمجھ کر معاف کردیا گیا۔
ہمارے سماجی روّیے تیزی سے بدلنے لگے ہیں۔اس وقت ہم اُسے ”کرپٹ” کہتے ہیں جیسے یورپ ”کرپٹ” سمجھتا ہے۔ ہمارے نزدیک ”کرپشن”کی وہی تعریف معتبر ہے جو یورپی تہذیب میں معتبر ٹھہرتی ہے۔ آج پاکستان میں ہر بچہ’عورت اور مرد”کرپشن کرپشن ”کی گردان سُن رہا ہے۔نئی نسل کے ذہن میں بٹھایا جارہا ہے کہ ”کرپشن” کا مقصد آف شور کمپنی بنانا ہے۔مالی بدعنوانی اور بدکاری میں زمین آسمان کا فرق ہوتا ہے۔
قارئین! اب کسی کو کرپٹ کہنے سے اُس کے چہرے پر شرمندگی نمایاں نہیں ہوتی۔ کیونکہ وہ سمجھتا ہے کہ کہنے والا اُس کی ”بدکاری” کے بارے میں نہیں بلکہ ”مالی معاملات” کے حوالے سے کوئی الزام لگا رہا ہے ۔حالانکہ جو شخص اخلاقی بدعنوانی یا ”مورل کرپشن” کا مرتکب ہوگا وہی ہر طرح کی کرپشن کرسکتا ہے۔آپ کے نزدیک آج جتنے بڑے بڑے”کرپٹ” ہیں دراصل وہ پہلے اخلاقی طور پر بھی کبھی پاک صاف نہیں رہے۔ یہ ہونہیں سکتا کہ کوئی شخص اخلاقی طور پر دیانتدار ہو اور مالی طور پر بددیانت۔جو فرد اپنے اللہ کے ساتھ ایماندارانہ رویہ نہیں رکھتا وہ ریاست’عوام اور دُنیا کے ساتھ ایمانداری کا برتائو کیسے کرسکتا ہے۔اور آخر پہ یہ بھی عرض کرتا چلوں کہ’
جہاں قرآن مجید کا واضح حکم ہے کہ ایک دوسرے کا مال باطل طریقے سے نہ کھائو تو وہیں اللہ قتل اور زنا کو بڑے گناہ قرار دیتے ہوئے یہاں تک فرماتے ہیں کہ زنا کے قریب بھی مت جائو۔ہمیں قرآنی اصطلاحات اور احکامات کو سامنے رکھتے ہوئے آگے بڑھنے کا عہد کرنا چاہیے۔

سعودی عرب اور ایران کے درمیان مخاصمت آج کا نہیں برسوں پُرانا معاملہ ہے۔ کبھی یہ مخالفت کم ہوجاتی ہے اور کبھی عروج پر پہنچ جاتی ہے۔بدقسمتی سے آجکل دونوں ممالک ایک دوسرے کے خلاف تابڑ توڑ سفارتی اور سیاسی حملے کر رہے ہیں۔ جب بھی سعودی عرب اور ایران آپس میں ناراض ہوتے ہیں یا ان کی باہمی چپقلش خطرے کے نشان سے آگے بڑھتی ہے مسلم اُمہ کے ماتھے پر خوف کے پسینے تیرنے لگتے ہیں۔ چونکہ مسلم ممالک کے اندر شیعہ سنی جھگڑے ہوتے آئے ہیں اس لئے عام مسلمان ڈرنا شروع کر دیتا ہے کہ کہیں دو ملکوں اور حکومتوں کی باہمی رنجش مسلکی تفریق میں تبدیل نہ ہوجائے۔ باقی ممالک کا تو علم نہیں لیکن پاکستانی بہت سہمے ہوئے ہیں۔ اسی خوف کا اظہار حزب اختلاف کے تمام رہنماﺅں نے کیا ہے‘ اسی طرف جناب عمران خان نے توجہ دلائی ہے اور یہی خوف حکومت کو کسی واضح لائحہ عمل پر چلنے نہیں دے رہا۔ ہمارے ہاں یہ تصور پختہ ہوگیا ہے کہ ایران اہل تشیع کا نمائندہ ملک ہے اور سعودی عرب اہل سنت کا محافظ ہے۔ یہ ٹھیک ہے کہ ایران میں ایک ایسی مذہبی حکومت قائم ہے جو ایک مسلک کی پیروی کرنے والے علماءپر مشتمل ہے لیکن ایران نے سرکاری طور پر اپنی حکومت کو کبھی شیعہ حکومت قرار نہیں دیا اور سعودی عرب میں ایک خاندان کی حکومت قائم ہے لیکن اسے بھی کبھی وہابی حکومت قرار نہیںدیا گیا۔ایران والے خود کو ”اسلامی جمہوریہ ایران“ کہتے ہیں اور ان کے جھنڈے پر لفظ ”اللہ“ لکھا ہوا ہے۔جبکہ سعودی جھنڈے میں کلمہ طیبہ لکھا گیا ہے۔دونوں اپنی اپنی طرز حکمرانی کو ”اسلامی“ کہتے ہیں۔ جب سعودی عرب اور ایران اپنے ملکوں کو شیعہ اور سنی ممالک کے لیبل نہیں لگاتے تو پھر امت مسلمہ کے مذہبی اسکالز اور میڈیا پرسنز تقسیم کا یہ تاثر کہاں سے لیتے ہیں۔جو اصل معاملہ ہے وہ مشرق وسطیٰ کے وسائل پر زیادہ سے زیادہ اجارہ داری حاصل کرنے کا جھگڑا ہے۔شاہ ایران قطعاً مذہبی شخص نہیں تھے لیکن ان کے دور میں بھی سعودی عرب ‘ایران تنازعات کھڑے رہتے تھے اور تب ایران کو خطے میں امریکی پٹھو کہا جاتا تھا۔ سعودی عرب نے اس منظر نامے کو تبدیل کیا اور ستر کی دہائی میں انقلاب ایران نے امریکہ کو سعودی عرب کے قریب تر کردیا۔ حال ہی میں مغربی دُنیا کے ساتھ ہونے والے ایرانی معاہدے سے بہت ممکن ہے کہ چند سالوں کے اندر اندرایران ایک بار پھر امریکہ کا منظور نظر ملک بن جائے۔ آج کل روس بڑی تیزی کے ساتھ ایران کا ”دوست“ ملک ہوتا جارہا ہے ۔شام میں اثرورسوخ کے لئے لڑی جانے والی جنگ میں روس ایران کے ساتھ جبکہ امریکہ سعودی عرب کے ساتھ کھڑا ہے۔ بتایا جائے کہ کیا روس کوئی شیعہ ملک ہے یا امریکہ کوئی وہابی ملک ہے۔ پھر یہ شیعہ سنی کا جھگڑا کیسے ہو سکتا ہے۔ ملکوں کے اپنے مفادات ہوتے ہیں اور ان مفادات کو مسلکوں اور مذہبوں کے حوالے سے نہ سوچا جانا چاہیے نہ ہی ان بنیادوں پر تجزئے کئے جانے چاہیں۔
مختلف ممالک دنیا بھر میں اپنی لابیاں بناتے ہیں۔ پاکستان میں بھی اس طرح کی بہت سی لابیاں بنی ہوئی ہیں۔ وزارت داخلہ کی حالیہ رپورٹ کے مطابق کوئی تین سو کے لگ بھگ ایسے مدارس ہیں جن کو مشرق وسطیٰ سے فنڈنگ ہوتی ہے۔ سعودی عرب‘ قطر اور ایران سرفہرست ہیں۔ یہ مدارس بالواسطہ طور پر لابی کا کام کرتے ہیں۔ لیکن اگر ملکی قوانین مضبوط ہوں اور نیشنل ایکشن پروگرام پر ٹھیک طرح عمل ہورہا ہے تو پھر ایسی لابیاں اور گروہ غیر موثر ہوجاتے ہیں۔ پاکستان میں اس حوالے سے تیاری بھی ہے اور متعلقہ ادارے بھی چوکس ہیں۔ یہ تصور کرنا کہ شعبہ مسلک کا ہر فرد ایرانی حکومت کا خدانخواستہ ایجنٹ ہے بہت بڑی زیادتی ہے۔اور اسی طرح یہ خیال کر لینا کہ ہر مدرسہ سعودی عرب کے لئے کسی نرسری کا کام کر رہا ہے ایک لغو بات ہے۔یہ سب مسلمان پاکستانی ہیں۔ مُٹھی بھر لوگوں کی رائے اور رویے کو بنیاد بنا کر قومی وحدت پر کلہاڑے چلانے سے باز رہنا چاہیے۔حکومت کو موقع ملنا چاہیے کہ وہ ملکی مفادات سامنے رکھتے ہوئے اپنی خارجہ پالیسی کو تبدیل کرتی رہے۔

سعودی وزیر خارجہ کے بعد وزیر دفاع کا دورہ پاکستان بڑی اہمیت کا حامل ہے۔اس کی اہمیت کے حوالے سے گرما گرم بحثیں بپا ہیں اور ہوسکتا ہے کہ حکومت مخالفت قوتیں اس دورے کو بھی متنازع بنانے میں کامیاب ہوجائیں لیکن سعودی وزیر دفاع کی آرمی چیف اور وزیراعظم سے ملاقاتوں کے بعد جاری ہونے والے سرکاری بیانات کے بعد پاکستانیوں کی عمومی رائے سعودی عرب کے حوالے سے بہتر ہوئی ہے۔سعودی عرب نے تمام اُمور پر پاکستان کے مﺅقف کی تائید کا اعلان کرکے بہت سے خدشات دور کر دیئے ہیں۔خوش آئند اور اندر کی خبریں یہ ہیں کہ سعودی ایران تنازعات کو ٹھنڈا رکھنے پر سرزمین حجاز سے ٹھنڈی ہوا کا جھونکا آیا ہے۔ اور چند دنوں میں سفارتی رابطے موثر ہوتے دکھائی دیتے ہیں۔ پاکستان نے سعودی سربراہی میں بننے والے 34 ملکی اتحاد میں شمولیت کا واضح اعلان کردیا ہے اور سعودی سالمیت پر حملے کی صورت میں خود کو غیر جانبداری کے مخمصے سے نکال کر واضح پوزیشن لے لی ہے۔ اس اعلان کے بعد اسمبلی میں حکومت پر مشکل وقت ضرور آئے گا لیکن سعودی عرب کا ٹوٹا ہوا اعتماد بحال ہوگیا ہے اور پاکستان کو ”تحفے“ میں ملے ایک ارب ڈالر واپس نہیں کرنے پڑیں گے بلکہ مزید مشترکہ اقتصادی منصوبوں کی نوید بھی مل گئی ہے۔ یہ بھی بتایا جارہا ہے کہ پاکستان ایک بار پھر سعودی ایران اُلجھاﺅ کو سُلجھانے کے لئے ایرانی قیادت سے مذاکرات کرے گا۔
سفارت کاری کے حساب سے دیکھا جائے تو سعودی عرب کی قیادت تیز رو ثابت ہوئی ہے جبکہ ایرانی حکومت اس حوالے سے ہنوز”ردعمل“ کے اثرات سے باہر نہیں آپارہی۔ یہ دُنیا ”ناراض“ رہنے سے حامی نہیں بن سکتی۔ بات چیت کرنی پڑی ہے۔ سعودی عرب کے ساتھ تنازعات بہرحال بات چیت سے ہی حل ہوں گے۔اگر ایٹمی مسئلے پر امریکہ سے بات چیت کرکے اسے ایرانیوں نے حل کر لیا ہے تو پھر ایک مسلم مُلک سے ڈائیلاگ کیوں نہیں ہوسکتا۔ خصوصاً جب پاکستان جیسا ہمسایہ ملک موجود ہے اور اس کے حکمرانوں کے بارے میں معلوم ہے کہ وہ سعودی حکومت کے قریب ہیں تو پھر اس موقع سے فائدہ اٹھانا چاہیے۔کشیدگی کسی کے حق میں بہتر نہیں۔ایران اور سعودی عرب ایک دوسرے کے مدمقابل آسکتے ہیں لیکن پاکستان کے لئے دونوں ہی ”اپنے“ ہیں۔”اپنوں“ کو باہم دست وگریبان دیکھ کر ہر پاکستانی کا دل دکھتا ہے۔سعودی عرب نے پہل کردی۔ وہ اسلام آباد آئے۔ ان کی ہر طرح سے دلجوئی کی گئی۔انہوں نے بھی ”دھمکی“ کی بجائے ”برابری“ کی بنیاد پر بات کی۔ کدورتیں دُور ہوئیں‘ قربتیں بڑھیں۔ اب ایران کو بھی آگے آنا چاہیے۔ پاکستان کو ”حقیر“جان کر اسے نفرت کا نشانہ بنانے سے کیا حاصل ہوگا۔ ہم دونوں میں سے کسی کو چھوڑ نہیں سکتے۔ہماری اس ”مجبوری“ سے ایران کو بھی فائدہ اٹھانا چاہیے۔شُکر ادا کرنا چاہیے کہ کوئی مشترکہ دوست موجود ہے۔ اسے کسی ایک کیمپ میں دھکیلنا دانش مندی نہیں ہوگا۔ایرانی وزیرخارجہ کو فوری طور پر پاکستان کا دورہ کرنا چاہیے۔ پاکستان کے حوالے سے اپنے خدشات دور کرنے چاہیں۔جنداللہ کو غیر مﺅثر کرنے میں پاکستان نے بڑی تکلیفیں اٹھائی ہیں۔ لشکر جھنگوی کے حملوں کو روکنے کے لئے پاکستان کے سپاہی اور افسر شہید ہوئے ہیں۔ افواج پاکستان دہشت گرد گروہوں کو مٹانے کے لئے کونسی قربانی نہیں دے رہی؟ اب بھی ایران کو ہمارے خلوص پر یقین نہیں۔ کھلے دل سے آئیں ۔ پاکستانی قیادت کو قرآنی تعلیمات کے مطابق دونوں مسلم ممالک کے درمیان صُلح کروانے کا فریضہ نبھانا ہوگا۔ ملکوں کے مالی اور اقتصادی مسائل اپنی جگہ‘ ترجیحات اپنی جگہ لیکن قرآن ہمیں حُکم دیتا ہے کہ جب دو مسلمان گروہوں میں ناچاقی ہوجائے تو ان کے درمیان صلح کروا دو۔ ہم کسی فریق کو بزور قوت قائل نہیں کرسکتے۔ لیکن اپنے تعلقات استعمال کرتے ہوئے لگی ہوئی آگ کو ٹھنڈا کرنے کی سعی تو کرسکتے ہیں۔

کائنات کا دولہا انسان اللہ پروردگار عالم کی تخلیق کا بہترین شاہکار ہے۔ رب کائنات نے اسے نعمتوں کے اتنے انبار عطا فرما دیے کہ جنہیں دیکھ کر ذرا سا غور کرنے پر ہمیں اللہ نظر آنے لگتا ہے۔ اللہ خود اپنے کلام میں فرماتا ہے”تمہارے نفوس میں میری نشانیاں موجود ہیں تو کیا تم ان پر غور نہیں کرتے“۔
ہم اپنی ذات سے ذرا باہر نظر دوڑائیں تو سورج‘ چاند‘ ہوا‘ پانی ‘ستارے آسمان‘زمین اور جانور سب کے سب قدرت کی نشانیاں ہونے کے ساتھ ساتھ حضرت انسان کی ایسے خدمت میں جتے ہوئے ہیں جیسے ان کا ہم سے بہت بڑا کام پھنسا ہوا ہے۔ ان پر نگاہ دوڑا کر یوں محسوس ہوتا ہے کہ جیسے سورج چمکتا‘چاند دمکتا‘ستار روشن‘ سمندر موجزن‘ ہوائیں چلتی‘ پھول کھلتے‘پھل پکتے اور جانور سواری و غذا کے لئے پیدا ہی ہمارے لئے کئے گئے ہیں۔ احساس کچھ یوں ہوتا ہے کہ جیسے ہم آقا ہیں اور یہ ہمارے خدمت گزار حالانکہ اصل صورتحال اس کے برعکس ہے۔ ان سب سے پوچھیے کہ اگر انسان نہ ہو تو تمہاری صحت پر کیا اثر پڑے گا تو یہ سب کہیں گے ہماری بلا سے۔ مگر انسان ان کے بغیر ایک پل بھی زندہ نہیں رہ سکتا۔
غرض ساری کائنات اپنا کام مالک حقیقی کی مرضی کے عین مطابق کر رہی ہے مگر انسان ہے کہ ظالم بھولا ہوا ہے۔گھوڑے کو مالک صرف چارہ ہی ڈالتا ہے تو وہ اس کے بدلے اس کے لئے لڑ کر اپنی جان دے دیتا ہے۔ مگر انسان اپنے مالک کا بڑا ناشکرا ہے اور اس کی وجہ سورہ عادیات میں جو بتائی گئی وہ ہے مال سے بے پناہ محبت:
دنیا میں کسی ادارے کا مالک تیوری چڑھا لے تو ملازم فوراً ہاتھ باندھ کر کھڑا ہوجاتا ہے مگر کارخانہ قدرت کا حکم کئی بار جھنجوڑ چکا مگر ہم اس کی کوئی پرواہ نہیں کرتے۔آذان کی پکار تو ہمارے کانوں سے ٹکرا کر واپس چلی جاتی ہی رہی ہے لیکن اب تو ہم چھوٹے عذابوں کی ایک سیریز کو اپنی آنکھوں سے دیکھنے کے باوجود بھی راہ حق کی طرف جانے سے کترا رہے ہیں۔
وہ ہمیں بار بار اپنے کلام میں بتا چکا ہوں کہ میں نے یہ تمام کائنات تمہارے لئے مسخر کردی ہے مگر تم کو اپنے پیار کے لئے پیدا کیا ہے۔ وہ واضح طور پر آگاہ کرتا ہے کہ تمہاری تخلیق کا مقصد میری محبت اورمیری مخلوق سے پیار ہے۔
وہ خبردار کرتا ہے کہ اگر تم مجھ سے محبت نہیں کرو گے تو میں عنقریب تمہاری چھٹی کروا دوں گا اور تمہاری جگہ ایسی قوم پیدا کروں گا جو کہ مجھ سے محبت کرے گی اور میں ان سے محبت کروں گا۔
وہ کہتا ہے کہ میں تم سے رزق روزی نہیں مانگتا۔رزق رساں تو میں ہوں۔ اس لئے تمہاری روزی کا میں سامان کروں گا تم تو بس میری طرف پیار کی نگاہ اٹھا کر کبھی دیکھ ہی لیا کرو۔
وہ ہم کو بار بار اپنی نعمتوں کی یاددہانی کراتا ہے کہ شائد نگاہ ان کی طرف مبذول کرے تو نگاہ شکریہ اوپر بھی اٹھا لے۔مگر ہمارا حال تو یہ ہے کہ گائے نے اگر دودھ پلایا ہے تو ہم نے اسے ماتا بنا کر اسی کے آگے سر تسلیم دل خم دیا۔اللہ کو ہم سے گلا ہے کہ گوبر اور خون کے درمیان سے ظالمو تم کو خالص دودھ تو میں نے پلایا ہے اور تم نے ساقی پر نگاہ کرنے کے بجائے برتن کے آگے سر نیاز جھکا دیا۔ جبکہ گائے کو تو یہ خبر بھی نہیں کہ یہ سارا نظام کیسے چل رہا ہے۔ رب کا فرمان ہے کہ سورج اور چاند کو سجدہ کرنے والو اسے پہچانو جس کے ہاتھ میں ان کی رسی ہے۔
دنیا میں ماں جب بچے کو نہلا دھلا کر نئے کپڑے پہنا کر سامنے کھڑا کرتی ہے اور پوچھتی ہے کہ سب کچھ کس نے دیا ہے تو بچہ اگر صرف اتنا کہہ دے کہ ”ماں تو نے“ تو صرف اتنا کہنے پر ہی ہم نے کئی بار دیکھا ہے کہ وہ بچے کو درجنوں بوسے دیتی ہے۔ یہی حال مالک کا ہے جب بندہ نہا دھو کر آئینہ کے سامنے کھڑا ہو اور یہ کلمات ادا کرے کہ اللہ تیرا شکر ہے تو مجھے خوبصورت شکل عطا فرمائی۔ میری سیرت کو بھی خوبصورت بنا دے تو عرش سے آواز آتی ہے۔ ”بندے جا تیری اس خوبصورت بات پر میں نے تیرے پچھلے گناہ معاف کردیئے“۔ وہ فرماتا ہے کہ اگر نعمت کا شکر ادا کرو گے تو نعمتوں کی بارش کردوں گا اور ناشکری کرو گے تو میرا عذاب بہت سخت ہے۔
اللہ نے ہمیں مختلف انداز سے یاددھانیاں کروائی ہیں کہ شائد انسان اپنے محبوب حقیقی کی طرف نظر التفات کرلے۔وہ فرماتا ہے کہ جب تم ماں کے بطن سے گود مادر میں آئے تو کچھ نہیں جانتے تھے۔ یہ سمع و بصر اور دل ودماغ جس پر تم اتنا اتراتے ہو میں نے عطا فرمائے ۔ایک طرف تو ان نعمتوں کا تذکرہ کیا عام لوگوں کیلئے تو دوسری طرف میڈیکل سائنس کے ماہرین کو بتایا کہ تم نے آج یہ ثابت کیا ہے کہ انسان کو پہلے سماعت ملتی ہے بعد میں بصارت مگر رب العالمین نے چودہ سو سال قبل ہی یہ حقیقت اپنے نبی صلی اللہ علیہ وآلہ وسلم کی زبان سے جاری فرما دی تھی۔
وہ ہمارے کئی بھائیوں کو ان میں سے کچھ عطا نہیں بھی فرماتا۔شائد اس لئے کہ آنکھوں سے محروم کوئی شخص جب گلی گلی سے یہ پکارتا گزرے کہ” آنکھوں والو! آنکھیں بڑی نعمت ہیں“ تو ہمیں ان کے نعمت ہونے کا واقعتاً احساس ہوجائے آپ غور فرمائیں تو نوزائیدہ بچہ نہ بول سکتا ہے نہ رفع حاجت کرنے کے قابل ہوتا ہے۔غلاظت کے اس ڈھیر کے لئے دودھ کی نہروں کے علاوہ ماں کے دل میں اتنا پیار بھی ڈال دیا کہ وہ ساری غلاظتیں اپنے دامن میں لے لیتی اور بچے کو صاف ستھری جگہ ڈالتی۔میں تو اس کو اس طرح دیکھتا ہوں کہ دنیا میں جو ماں کا کردار ادا کر رہی ہے وہ ماں نہیں بلکہ دائی ہے اصل ماں (پالنے والی ذات) تو وہ ہے جس نے اس دائی کے دل میں اتنا پیار ڈالا ہوتا۔ سرکار صلی اللہ علیہ وسلم نے بھی اللہ کے پیار کو ماپنے کے لئے ماں کے پیار کا پیمانہ استعمال کیا۔ آپ کسی سفر پر جا رہے تھے کہ ناگہاں کسی عورت کا بچہ کھو گیا۔ وہ بڑی بے چینی کے عالم میں پاگلوں کی طرح اسے ڈھونڈتی پھر رہی تھی۔ کافی وقت بعد وہ اسے اچانک نظر آیا تو اس نے بچے کو اپنی بانہوں میں جکڑ کر اسے بے شمار بوسے دیے۔ ایسی کیفیت میں حضور صلی اللہ علیہ وآلہ وسلم نے صحابہ کو اس کی طرف اشارہ کرتے ہوئے فرمایا کہ دیکھو تمہارا رب تم سے اس ماں سے بھی ہزاروں گنا زیادہ پیار کرتا ہے جب قرآن فرماتا ہے کہ ماں باپ کے سامنے اف تک نہ کہو تو میں سوچتا ہوں کہ جب ہم اس ماں کے سامنے اف نہیں کہہ سکتے تو اس حقیقی ماں کے سامنے اف کیسے کہہ سکتے ہیں اور اس کے حکموں کو پا کر ان کی نافرمانی کرنے کی جسارت کیسے کرسکتے ہیں۔ میں انسان میں موجود اعضاءاور نظام کو دیکھ کر کبھی کبھی خیال کرتا ہوں کہ جانے وہ خود کتنا پیارا ہوگا جس کی تخلیق اتنی پیاری ہے۔
انسان کے اندر اور باہر کے ماحول میں یہ نشانیاں ہم سے کچھ کہتی ہیں ۔ گاڑی میں جانے والا مسافر اپنے دوست کو دیکھ کر جب رومال لہراتا ہے تو اس کی حرکت سے دیکھنے والے کو ایک نتیجہ نکالنا ہوتا ہے اگر کوئی رومال کی رنگت‘ اس کی دھاریوں‘ اس کے کپڑے کے معیار پر غور کرنے لگے تو زمانے والے اسے احمق کہیں گے۔دراصل اس طرح کرنے سے اس کا مقصد اس کی توجہ اپنی جانب مبذول کروانا ہوتا ہے۔
اگر کوئی مہمان کسی کے گھر کھانا کھانے کے وقت سب باتوں کو لاجک سمجھ جائے کہ بلب میں روشنی پاور ہاﺅس سے آرہی ہے۔ پھول جو گلدانوں میں سجائے گئے ہیں یہ اس طرح گلدانوںمیں نہیں اُگتے بلکہ باغ سے لائے گئے ہیں۔بادلوں کو دیکھ کر ان کا سارا فلسفہ بیان کردے۔ غرض ہر چیز کے بارے بڑی عقل مندی سے متاثر کن کرتا جائے۔ کھانے پر بھی بڑی سیرحاصل گفتگو کر ڈالے مگر کھانا کھانے کے بعد میزبان کا شکریہ ادا کیے بغیر چلائے تو کوئی شخص بھی ایسے شخص کو عقلمند نہیں کہے گا۔ عقل بہت بڑی چیز ہے اس کی بنیاد پر انسان اشرف المخلوقات کے درجہ پر فائز ہوا ہے مگر یہی عقل اگر کسی جسم سے نکال دی جائے تو وہ پاگل کہلائے گا۔ یاد رہے کہ عقل اگر وحی کی روشنی سے ہٹ کر فیصلے کرے گی تو یہ باولی کہلائے گی۔خدا کا فرمان بھی کچھ اسی طرح سے ہے کہ جب میرے بندے آسمانوں اور زمین کی تخلیقات میں غور کرتے ہیں تو نتیجہ بے فکر کے طور پر بے ساختہ یہ کہہ اٹھتے ہیں کہ اے رب تو نے یہ سب بے کار پیدا نہیں کیا۔ وہ کہتے ہیں کہ رب تو پاک ہے ہم کو آگ سے بچا کر اپنا دیددار نصیب فرما۔ بقول شاعر
تیری جنت کو یا رب کیا کروں
آرزو ہے تجھے دیکھا کروں

سچے رضاکار کو کسی تعریف یا تحسین کی ضرورت نہیں ہوتی۔ رضاکارانہ جذبہ انسانی تسکین اور روحانی تشفی کے ساتھ جُڑا ہوتا ہے۔ طمانیت قلب ہی سب سے بڑا صلہ ہوتاہے۔ ایک مسلمان خلق خدا کے کاموں میں اس لئے حصہ لیتا ہے تاکہ اللہ پاک کی رضا مندی اور قربت حاصل کرسکے۔ جہاں تک کسی فرد کی رضاکارانہ سرگرمیوں کے حوالے سے سماجی اور سماجی تنظیموں کی ضرورت ہوتی ہے تو اس کے لئے رضاکاروں کی عزت افزائی‘ تصدیق اور توثیق ضروری ہوتی ہے۔
پاکستان میں انسانی خدمت کے درجنوں ادارے موجود ہیں۔ سرکاری ‘ نیم سرکاری اورغیر سرکاری سب کی اپنی اپنی خدمات ہیں۔دُکھ اور درد کی گھڑی میں ہمدرد ی کے دو بول بھی بہت وقعت رکھتے ہیں۔ ہلال احمر پاکستان ان سب اداروں سے نمایاں مقام رکھتا ہے۔
ریڈکریسنٹ یعنی ہلال احمر ایک طرف قومی سطح کا ادارہ ہے تو دوسری طرف یہ ریڈکراس /ریڈکریسنٹ موومنٹ کا حصہ بھی ہے۔ ایک سو نوے ممالک میں ایسے قومی ادارے موجود ہیں۔ انسانی خدمت کی اس تحریک کا ہیڈکوارٹر جنیوا میں ہے۔ انٹرنیشنل کمیٹی آف ریڈکراس اور انٹرنیشنل فیڈریشن آف ریڈکراس/ریڈ کریسنٹ سوسائٹیز کے ملاپ سے یہ ایک تحریک بنتی ہے ۔ کسی ممبر مُلک میں کوئی قدرتی آفت آئے‘ دہشت گردی ہو یا جنگیں ہوں اس تحریک میں شامل تمام ادارے اور سوسائٹیاں مدد کو پہنچتی ہیں۔ لیکن اصل امتحان اس ملک کی ریڈکراس یا ریڈکریسنٹ کا ہوتا ہے۔

اگر قومی ریڈکریسنٹ کے فعال رضاکاروں کی صحیح تربیت ہو اور ہر ضلع اور ہر تحصیل میں ان کا نیٹ ورک موجود ہو تو تباہی کے نتیجے میں متوقع خطرات کو کم کیا جاسکتا ہے۔ پاکستان جغرافیائی طور پر ایسے خطے میں واقع ہے جہاں زلزلے اور سیلاب کا اندیشہ برقرار رہتا ہے۔ ایسے ملک میں ریڈکریسنٹ یا ہلال احمر کو بہت زیادہ فعال رہنے کی ضرورت ہوتی ہے۔ خصوصاً جب ملک میں وبائی امراض اور دہشت گردی کا خطرہ منڈلاتا رہے پھر ہلال احمر جیسے انسانی خدمت کے اداروں کی ذمہ داریاں مزید بڑھ جاتی ہیں۔
پاکستان ہلال احمر اپنے قیام سے ہی فعال دکھائی دیتی ہے۔ لیکن اس کے دائرہ کار کی محدویت نے اسے عوامی نہیں ہونے دیا۔ ادارے کی اہمیت کو سمجھتے ہوئے وزیراعظم پاکستان میاں محمد نوازشریف نے سیاسی دامن میں کھلنے والے خوبصورت پھول کو اس ادارے کے لئے مختص کردیا تھا۔ جواں ہمت اور جواں سال ڈاکٹر سعید الٰہی نے جونہی اس ادارے کی باگ ڈور سنبھالی تو ہلال احمر کے دائرہ کار میں اضافہ ہوتا دکھائی دیا۔ انہوں نے اس ادارے کو محض تباہی کے دوران خدمات سرانجام دینے تک محدود نہیں رہنے دیا بلکہ اسے ہمہ وقت متحرک رکھنے کا عظیم منصوبہ تشکیل دیا اور اس پر عمل شروع کردیا۔
عرصہ دراز سے رضاکاروں کی تعداد پانچ لاکھ تھی۔ ان میں سے اکثریت خاموش تھی اور ہیڈ آفس کی طرف سے ان کے ساتھ کوئی مربوط رابطہ نہیں تھا۔ڈاکٹر سعید الٰہی نے تین سالوں میں پچاس لاکھ نئے رضاکار بنانے کا ہدف طے کیا اور پہلے سال کے اندر سترہ لاکھ کی حد کو چُھو لیا۔ اس غرض کے لئے پنجا ب یونیورسٹی اور علامہ اقبال یونیورسٹی جیسی بڑی بڑی جامعات کے ساتھ معاہدے کئے گئے۔اور اب ان اداروں کے طلبہ و طالبات کی ٹریننگ کے پروگرام ترتیب دیئے جارہے ہیں۔عام سوچ سے ہٹ کر چیئرمین ہلال احمر نے مدرسوں کے طلباءو طالبات کو قافلہ انسانیت میں شامل کرنے کا جاندار پروگرام ترتیب دیا۔ تمام مسالک کے علماءکونیشنل ہیڈکوارٹر میں دعوت دی گئی اور ہلال احمر اور تنظیمات اتحاد مدارس کے مابین ”میثاق انسانیت“ کے عنوان سے معاہدہ طے پا گیا۔ ضلعی انتظامیہ کے تعاون سے پنجاب کے مختلف مدارس میں فرسٹ ایڈٹریننگ شروع کی جاچُکی ہے۔
اسلام آباد دارالحکومت میں بین الاقوامی معیار کی کوئی ایمرجنسی ایمبولینس سروس نہیں تھی۔ ہلال احمر نے جدید طرز کی یہ سروس شروع کی۔1030 کے ملانے پر سات سے دس منٹ میں یہ سروس فراہم ہوجاتی ہے۔ ہلال احمر نے 1122 سے بھی معاہدہ کر لیا ہے۔ جونہی اسلام آباد کے حوالے سے 1122 کو کوئی کال وصول ہوتی ہے ‘ہلال احمر کی ایمبولینس حرکت میں آجاتی ہیں۔ ایمبولینس میںفرسٹ ایڈ اور فوری طبی امداد کا سامان موجود ہوتا ہے۔ اس سروس کی افادیت کو ایوان صدر نے بھی سند عطا کی اور خود صدر پاکستان جناب ممنون حسین نے اس کا افتتاح فرمایا۔ ڈاکٹر سعید الٰہی ایسی سروس کو پورے مُلک میں شروع کرنا چاہتے ہیں۔ انہوں نے نیشنل ایمبولینس سروس کا ایک منصوبہ وزیراعظم پاکستان اور صدر پاکستان کی منظوری کے لئے بھجوا رکھا ہے۔ ایمبولینس کا مقصد محض زخمیوں اور لاشوں کی ہسپتال تک منتقلی نہیں بلکہ زخمی کو اٹھانے سے پہلے فوری طبی امداد فراہم کرکے جان بچانا بھی ہے۔ کہا جاتا ہے کہ مرحوم جنرل آصف نواز کا ڈرائیور اور بیوی نے اگر فرسٹ ایڈ کی معمولی سی تربیت بھی حاصل کی ہوتی تو جنرل صاحب کی جان بچائی جاسکتی تھی۔ جہاں ہر گھر میں فرسٹ ایڈ کی ضرورت ہے وہیں ایمبولینس پر موجود عملے کی تربیت بھی از حد ضروری ہے۔ایمبولینس کا ڈرائیور ایک ماہر فرسٹ ایڈ ر ہونا چاہیے۔ اس مقصد کو پورا کرنے کے لئے پاکستان میں آئرش تنظیم کے ملاپ سے پہلا ایمبولینس کالج بنایا گیا ہے۔ ہلال احمر کے نیشنل ہیڈکوارٹرز میں ماہرین کی زیرنگرانی چلنے والے اس کالج میں تربیت حاصل کرنے والے افراد نہ صرف پاکستان کے اندر قیمتی جانیں بچانے میں معاون ثابت ہوں گے بلکہ بیرون ممالک جا کر قیمتی زرمبادلہ بھی کما سکتے ہیں۔ کالج میں داخلے شروع ہیں اور معمولی فیس کے عوض غیر معمولی ہنر سے آراستگی کا اہتمام کردیا گیا ہے۔ڈاکٹر صاحب اس کالج کوکافی نہیں سمجھتے۔انہوںنے راقم کو بتایا کہ پاکستان میں ڈیزاسٹرز کے حوالے سے کوئی یونیورسٹی نہیں ہے۔ڈیزاسٹر یعنی قدرتی آفات یا انسان ساختہ تباہی سے نپٹنے کے لئے دُنیا میں نت نئی تحقیقات ہورہی ہیں ۔تعلیم وتربیت کے دس سے زائد مضامین پڑھائے جارہے ہیں۔ نقصانات کو کیسے کم کرنا ہے ‘فوری امداد کی رسائی کیسے ممکن بنانی ہے‘متاثرہ آبادیوں سے مکالمہ کیسے کرنا ہے۔حکومتی اور امدادی اداروں کے درمیان رابطہ کاری کیسے ہوگی۔ آباد کاری میں حائل مشکلات پر کیسے قابو پانا ہے۔ ڈونرز کو کس طرح اور کیسے شریک کرنا ہے۔ میڈیکل‘خوراک‘ رہائش کے انتظامات کیسے ہوں گے۔ خاندان سے بچھڑ جانے والوں کو کس طرح ڈھونڈ نکالنا ہے۔ٹرانسپیرنسی اور شفافیت کو کس طرح یقینی بنانا ہے۔ روزگار کے مواقع کس طرح بحال کرنے ہیں۔ نفسیاتی طور پر متاثر ہوجانے والے افراد کو کس طرح ہنسی مسکراتی زندگی لوٹانی ہے۔انفسٹرکچر کمیونیکیشن میں ٹیکنالوجی کا کیا رول ہوسکتا ہے۔غرض بیسیوں مضامین ہیں جو اس مجوزہ ریڈکریسنٹ ڈیسرایئریونیورسٹی میں پڑھائے جائیں گے۔
پڑھانے کی بات شروع ہوئی تو ایک اور اہم منصوبے کا ذکر بھی آگیا۔ڈاکٹر سعید الٰہی نے بتایا کہ انہوں نے حکومت کو تجویز دی ہے کہ سکولوں‘کالجوں اور یونیورسٹیوں میں ”ریڈکریسنٹ کورز“ کا اجراءکیا جائے۔ یہ ایک لحاظ سے نیشنل کیڈٹ کور (National Cadet Corps) کی طرز پر تربیتی پروگرام ہوگا۔ این سی سی کی بجائے آر سی سی کا مقصد ہر طالبعلم کو فرسٹ ایڈ کی ٹریننگ دینا ‘والنٹیئر اور بلڈ ڈونر بنانا ہے۔ ایسا پروگرام خود حکومت کے لئے بھی نیک نامی کا سبب بنے گا۔ یہ ایک صدقہ جاریہ ہوگا۔ ایک بار اگر ایسے پروگرام پر عمل شروع ہوگیا تو چند سالوں کے اندر پاکستان میں خون عطیہ کرنے والوں کی کمی رہے گی‘ نہ بوقت ضرورت تربیت یافتہ رضاکاروں کے لئے دیگر ممالک کی طرف دیکھنا پڑے گا اور نہ ہی آئے روز فوری طبی امداد نہ مل پانے کے سبب قیمتی جانوں کا ضیاع ہوگا۔ یہ ایک انقلابی منصوبہ ہے اور ہلال احمر کے چیئرمین اس منصوبے کو ہر حال میں شروع کروانا چاہتے ہیں۔
”آپ لوگ اس سلسلے میں ہماری مدد کریں‘ کالم لکھیں‘ حکومتی حلقوں میں اسے پروموٹ کریں۔پاکستان کی اس سے بڑی خدمت کوئی نہیں ہوگی“ ان کی آنکھوں میں ایک اشتیاق تھا اور وہ لب ولہجہ کے اعتبار سے پُراُمید دکھائی دے رہے تھے۔
گھنٹہ بھر کی اس بریفنگ کے دوران مختلف شعبہ ہائے زندگی کی کتنی شخصیات ان سے ملنے آئیں۔ سینئر ترین صحافی بھی دکھائی دیئے‘ سماجی رہنما بھی جلوہ گر تھے۔ وہاں جو بھی آیا اس کے اندر خدمت انسانیت کا موثر اور مجسم احساس بیدار ہوا۔ ڈاکٹر صاحب کی ہمہ گیر شخصیت نے ہلال احمر کو گمنامی سے نکال کر عوامی بنا دیا ہے۔ وہ رضاکاروں کی عزت افزائی کا بہتر سے بہتر راستہ نکالنتے رہے ہیں۔ انہوں نے کہا‘ڈاکٹر صاحب ہلال احمر کے پلیٹ فارم سے جو بھی دُکھی انسانیت کی خدمت کرنے کا عزم کرے گا وہ رضاکار نہیں کہلائے گا۔ ہم اس ادارے کا باقاعدہ سٹار بنائیں گے۔ وہ معاشرے کا ستارہ ہے۔ اس کا جذبہ اس قابل ہے کہ اسے ”سٹار“ کہا جائے“۔
ملاقات کے لئے آئے ایک سینئر کالم نگار کو ڈاکٹر سعید الٰہی نے اپنے ہاتھوں سے سنہری اور دمکتا ہوا سٹار لگایا اور ہلال احمر کے ستارے اور چاند دونوں جگمگاتے ہوئے دکھائی دیئے۔ ان چاند تاروں کی روشنی پھیل رہی ہے اور نفسانفسی کے اس عالم میں بھی ہلال احمر لوگوں کے غم بانٹنے‘ دکھ کم کرنے اور بے لوث خدمت کرنے کےلئے تصور‘ منصوبہ اور عمل کے مراحل تیزی سے طے کر رہی ہے۔
قارئیں! آپ بھی اس تحریک خدمت انسانیت کے دست و بازو بن کر‘ اور تَعاوَنُو عَلی البِروَالتقویٰ کی عملی تفسیر بن جائیں۔ڈاکٹر سعید الٰہی پُکار رہے ہیں‘
اب وقت ہے پیچ وخم دستار کو بدلو
اخلاق کو عادات کو اطوار کو بدلو
بدلو گے تو بچ جاﺅ گے تم قہر خدا سے
اڑجائیں گے یہ ریگ محل ورنہ ہوا سے
جو کچھ ضرورت سے زیادہ ہے لُٹادو
ٹل جاتی ہیں آفات غریبوں کی دُعا سے
حدیث قدسی ہے‘
”مخلوق اللہ کا کُنبہ ہے اور کوئی اللہ کے کنبہ کے ساتھ سب سے اچھا سلوک کرتا ہے وہ اللہ کو سب سے زیادہ پیارا ہے“۔

رینجرز کو داد دینی چاہیے کہ انہوں نے بڑے بڑے ڈاکوئوں کی پکڑ دھکڑ شروع کر رکھی ہے اور اگر تفتیش اور تحقیق میں مار نہ کھا گئے تو عدالتوں کے ذریعے عبرتناک سزائوں کی نوید ہے۔ سفید پوش ڈاکوئوں کو پکڑنا مشکل کام ہے۔ اس کے لئے آپ ناکہ نہیں لگا سکتے’ ریڈ نہیں کرسکتے’پولیس مقابلہ نہیں کیا جاسکتا۔ سیاسی رعب داب میں لپٹے اور عزت مآب کی قلغیاں سجائے ان قومی ڈاکوئوں کی تعداد بھی بہت ہے اور ان کے بنتے ٹوٹتے اتحاد وفاقی اداروں کو بعض اوقات بے بس کر دیتے ہیں۔ لیکن سپہ سالار اعظم جناب جنرل راحیل شریف کی کمٹمنٹ پر قربان جانے کو جی چاہتا ہے کہ وہ اس مشکل ترین مہم میں مسلسل کامیابیاں حاصل کر رہے ہیں۔ ہماری دلی دُعا ہے کہ وہ خوشامدیوں سے بچ بچا کر قومی بقاء کے اس صالح عمل کو منطقی انجام تک پہنچا سکیں اور وارداتیوں کی ریشہ دوانبوں سے محفوظ رہیں۔
میں معروف اور دیکھے بھالے ڈاکوئوں کا تذکرہ کرنا چاہتا ہوں۔اخبارات کے اندر کرائم کارنرز ایسی خبروں سے بھرے پڑے ہیں جن سے ظاہر ہوتا ہے کہ عام اور پرامن شہریوں کی عمر بھر کی جمع پونجی لوٹنے والے ڈاکو کس قدر نڈر اور سفاک ہیں۔ رات اڑھائی بجے کے لگ بھگ ٹی وی چینلز پر متواتر ٹکّر اور تازہ ترین خبریں چل رہی ہوتی ہیں۔

سندھ میں دو ڈاکو مارے گئے۔ ساہیوال میں لوگوں نے ڈاکو پکڑ کر پولیس کے حوالے کردیا’پنڈی کے بنی چوک میں پچاس لاکھ کا ڈاکہ پڑ گیا۔ میڈیا ٹائون میں صبح آٹھ بجے ایک گھر کو لوٹ لیا گیا۔ آئی ٹین فور میں ایک ریٹائرڈ بریگیڈیئر کے گھر سے پچپن لاکھ روپے لوٹ لئے گئے۔ نیلور میں ڈاکو ایک گھر میں گھس گئے’ اہل خانہ کو یرغمال بنایا اور زیورات لوٹ کر فرار ہوگئے وغیرہ۔ ایسی درجنوں خبریں روزانہ ٹی وی چینلز اور اخبارات کے ذریعے موصول ہوتی ہیں لیکن یہ خبر کہیں پڑھنے کو نہیں ملتی کہ ضلعی انتظامیہ یا آئی جی پولیس نے کوئی ایسا ہنگامی اجلاس طلب کیا ہو جس میں ان مسلح ڈاکوئوں کی گرفتاری کا کوئی منصوبہ شروع کیا گیا ہو۔
وفاقی دارالحکومت کے کئی تھانوں میںفون کی سہولت موجود نہیں۔ اگر رات کو اطلاع دینی ہو کہ ڈاکو واردات کے لئے کسی گلی میں گھس گئے ہیں تو رابطہ قائم کرتے کرتے مظلوم انسان لُٹ جاتا ہے۔ وہ ایک بے بس شکار کی طرح ڈاکوئوں کے رحم و کرم پر ہوتا ہے۔ شہری سوچتے رہتے ہیں کہ مال اور جان کے تحفظ کے لئے اب کس کو پکاریں۔ پولیس کی ٹیمیں پورے اسلام آباد میں پھیلی ہیں لیکن ان کی آنکھوں کے سامنے ڈاکو چہل قدمی کرتے گزر جاتے ہیں۔
جڑواں شہروں میں رپورٹ ہونے والی وارداتوں میں سرقہ بالجبر’اسلحہ کی نوک پر مال و متاع سے محرومی اور بعض اوقات بے بسی کی موت جیسے واقعات شامل ہیں۔ڈاکوئوں کے لشکر اتر آئے ہیں۔ پولیس کو ایف آئی آر درج کرانے جائیں تو وہ ڈاکے کی جگہ لفظ چوری لکھ کر ٹال دیتے ہیں۔ پولیس میں بہت نیک لوگ ہیں۔لیکن عوام ان کی نیک نیتی کا کیا کریں۔ وہ تو لٹ رہے ہیں۔ بچے اور بچیاں خوف میں مبتلا ہو کر ذہنی توازن کھو بیٹھتی ہیں۔ اپنے گھر میں ۔ہاں جسے جنت کہا جاتا ہے ‘ وہی گھر ڈرانے لگتا ہے۔ کسی نے جہیز کے لئے کچھ بچا رکھا ہے’کسی نے بچے کی فیس جمع کرانی ہے۔ کسی نے بوڑھاپے کے لئے چند ہزار روپے جمع کر رکھے ہیں ۔گھر سے محفوظ جگہ کونسی ہوگی۔ لیکن افسوس کہ آج کل گھر ہی محفوظ نہیں رہے۔
شہری سوال کرتے ہیں کہ آخر تھانے والے ان منہ زور درندوں کو پکڑتے کیوں نہیں۔ وزیر داخلہ کہاں چُھپے بیٹھے ہیں۔ شہر اقتدار کو اس عذاب سے نجات کون دلائے گا۔ سائبر کرائم سیل موجود ہے’ جگہ جگہ ناکے لگے ہیں۔شہر کے داخلی اور خارجی راستوں پر کیمرے نصب کئے گئے ہیں پھر بھی عوام غیر محفوظ ہیں۔ ہر گھر کے سروے ہوتے ہیں۔کریہ داروں کا آڈٹ ہوچکا۔ آخر یہ ڈاکو کہاں سے آتے ہیں۔ کیا آسمان سے نازل ہورہے ہیں یا زمین سے پھوٹ رہے ہیں۔ ان پر قابو پانا کتنا مشکل ہے۔؟
عوام میں عدم تحفظ کا احساس پڑھتا جارہا ہے۔ یہ بھی کہا جارہا ہے کہ ڈاکو انتہائی تربیت یافتہ ہیں۔کوئی قفل’ کوئی دیوار’ کوئی گیٹ ان کے سامنے ٹھہر نہیں سکتا۔ یہ دستانہ پوش ہوتے ہیں۔نقاب اوڑھے ہوتے ہیں۔ جوگر پہنے ہوئے ہوتے ہیں۔ اکثر پشتو بھی بولتے ہیں۔ ان کی دہشت سے لوگ راتوں کو جاگتے ہیں۔ یہ سب کب تک ہوگا۔ خدارا ہر کام فوج پر مت ڈالو۔ گلی محلے اور گھر میں قیامت ڈھانے والے ان ڈاکوئوں سے نجات دلائو تاکہ عوام آپ کو اپنا نجات دہندہ کہہ سکے۔ اور ڈاکوئوں کو بھی یاد دلانا ضروری ہے کہ وہ ظلم سے باز آجائیں ۔قرآن پاک میں ارشاد ہوتا ہے۔
”اے ایمان والو ‘ایک دوسرے کے مال کو باطل طریقے سے مت کھائو ”
فرمان رسول اللہ صلی اللہ علیہ وآلہ وسلم ہے کہ’
”تمہارا خون’تمہار امال اور تمہاری آبرو ایک دوسرے پر اسی طرح حرام ہیں کہ جس طرح آج کا دن ‘یہ مہینہ اور اس شہر (مکہ)کی حرمت قائم ہے”۔(خطبہ حجة الوداع)۔

بدلتے سماجی اور معاشی تقاضوں کی بدولت اب شہروں کی شناخت بھی تبدیل ہورہی ہے۔ گوجرانوالہ پہلوانوں کے شہر کے طور پر مشہور تھا لیکن اب اس شہرت میں تعلیمی اداروں نے بھی اپنا حصہ ڈالنا شروع کردیا ہے۔پنجاب یونیورسٹی کے کیمپس نے تعارف کی تبدیلی میں اہم کردار ادا کیا ہے۔ میڈیکل کالج نے تعلیمی فضاء ہی تبدیل کردی ہے۔ طالبات کے کالجز کی بڑھتی ہوئی تعداد اور استعداد سے ماحول میں علمی خوشبو رچ بس گئی ہے۔ ایک طرف سرکاری تعلیمی اداروں کی کارکردگی بہتر ہورہی ہے تو دوسری طرف والدین اور طلباء و طالبات کی سہولت کے لئے نت نئے تعلیمی ادارے کھولے جارہے ہیں۔وہ وقت دور نہیں جب گوجرانوالہ کو بھی کالجوں کا شہر قرار دیا جاسکے گا۔
شہر کے تعلیمی تعارف کا سہرا وہاں سے منتخب ہونے والے چند ممبران صوبائی و قومی اسمبلی کے سر جاتا ہے ۔ ان محدودے چند افراد کا ر نے واقعی عوامی نمائندگی کا حق ادا کردیا ہے ۔ لیکن یہ ناانصافی ہوگی اگر پنجاب کے علم دوست وزیر اعلیٰ شہبازشریف کا تذکرہ نہ کیا جائے۔ عوامی سہولیات کی فراہمی اور اجتماعی سماجی کاموں کے لئے میاں صاحب صوبہ کے عوامی نمائندگان کو اداروں کے قیام پر آمادہ کرتے رہتے ہیں۔
جناب عبدالرئوف مغل گوجرانوالہ سے ایم۔پی۔اے ہیں۔ انہوں نے اپنے حلقے میں فروغ تعلیم کے لیے انتھک کام کیا ہے ۔ حال ہی میں بچیوں کے لئے ایک عظیم الشان کالج بنوایا ہے۔ پانچ ستمبر کو اس کالج کی افتتاحی تقریب میں مجھے بھی مدعو کیا گیا تھا۔
نامور سیاسی شخصیت غلام دستگیر خان کی صدارت میں منعقدہ اس تقریب میں دنیا کی سات بلند ترین چوٹیاں سر کرنے والی پہلی پاکستانی کوہ پیما ثمینہ بیگ مہمان خصوصی تھیں۔ ان کے استاد اور بڑے بھائی مرزا علی بھی ہمراہ تھے۔ معروف کالم نگار بیگ راج بھی میرے ہمراہ تھے۔ انہیں خصوصی طور پر مدعو کیا گیا تھا۔ جناب عبدالرئوف مغل صاحب کے معتمد خاص اور نوجوانوں کے متحرک نمائندے جناب سفیان اکرام مغل صاحب نے اوور ہیڈ برج پر ہمارا استقبال کیا۔ پنڈال میں طالبات’اساتذہ اور والدین بڑی تعداد میں موجود تھے۔ڈگری کالج فار وومن (طارق آباد کھوکھرکی) کی پرنسپل صاحبہ نے سٹیج سیکرٹری کے فرائض سرانجام دئے ۔ وقت کی قلّت کے سبب مختصر تقاریر کا دور چلا۔ میں نے طالبات کو مخاطب کرتے ہوئے کہا”’تعلیم برائے تعلیم نہیں تعلیم برائے زندگی کے فلسفے کو اپنانا ہوگا۔ جب تک ہم اپنے مرکز و محور یعنی ذات گرامی رسولۖ سے پوری طرح جڑ نہیں جاتے ہماری تعلیم ہمیں فائدہ نہیں دے سکے گی اور جب تک پاکستان سے غیر مشروط محبت کی شمع روشن نہیں ہوتی دفاع پاکستان کا ہدف پورا نہیں ہوسکتا۔ پاکستان کا مطلب لاالہ اللہ ہے اور اس کا مقصد محمد رسول اللہ ہے۔ عظیم مائیں ہی عظیم قوم کی بنیاد رکھتی ہیں۔ یہ کالج آپ کے لئے مادر علمی ہے اور اس میں حصول علم آپ کے لئے عبادت ہے۔ شرم و حیاء آپ کی حفاظت کی ضمانت ہے۔ آپ چاہیں تو اسی کالج کو استحکام پاکستان کا مورچہ بنا سکتی ہیں”۔
جناب عبدالرئوف مغل صاحب نے وسیع و عریض کالج اور اس میں بننے والی عالیشان عمارت کی تکمیل کے مراحل میں حائل رکاوٹوں پر تفصیل سے روشنی ڈالی اور بتایا کہ اس جگہ پر قبضہ مافیا کی نظر تھیِ۔ وہ اس کو رہائشی منصوبے میں تبدیل کرنا چاہتے تھے لیکن وزیراعلیٰ کی ہدایت اور علاقے کے عوام کے بے مثال تعاون کے باعث یہاں کالج بن گیا ۔یہ کالج انشااللہ یونیورسٹی کا درجہ اختیار کرے گا ۔
محترم غلام دستگیر خان صاحب علالت کے باوجود گھنٹوں کی اس تقریب میں موجود رہے۔ اپنے صدارتی خطبے میں انہوں نے رئوف مغل صاحب کی جرات اور دور اندیشی کو خوب سراہا۔ انہوں نے اس مغل رہنما کو سر سید ثانی کا خطاب دیا ۔انہوں نے مسلم لیگ (ن) کی طرف سے عوامی سہولت کے متعدد منصوبوں پر روشنی ڈالی۔ ان کا انداز سادہ لیکن دلنشین تھا۔ لوگوں نے بڑے انہماک سے ان کی گفتگو سنی۔اہل علاقہ زندہ باد کے نعرے لگاتے رہے ۔
تقریب میں ثمینہ بیگ نے طالبات کو اپنی کوہ پیمائی کے حوالے سے حیران کردینے والے واقعات بتائے اور کہا کہ جس طرح محترمہ فاطمہ جناح نے اپنے عظیم بھائی قائداعظم کا ساتھ دے کر قیام پاکستان کو ممکن کر دکھایا اسی طرح اب پاکستان کی تعمیر و ترقی میں ہر بہن بھائی کو مل کر خدمت کرنا ہوگی۔بیگ راج بڑا جاندار خطاب کیا ۔
کالج کی افتتاحی تقریب کے اختتام پر کالج کے مختلف شعبہ جات دکھائے گئے’کالج کے ساتھ ملحقہ سرسید گرلز ہائی سکول کا دورہ کیا گیا۔ننھی طالبات نے مختلف سماجی موضوعات کو اپنی تخلیقی صلاحیتوں کے ذریعے اُجاگر کیا اور ان کے ہاتھوں کے بنے ہوئے سادہ مگر بامعنی شاہکار دکھائے۔ نظم و ضبط کے اعتبار سے یہ ایک مثالی سکول ہے ۔ واپسی پر جناب عبدالرئوف مغل نے اپنے گھر پر پر تکلف لنچ کا اہتمام کیا تھا۔ اپنائیت کی انتہا تھی۔ ان کے مہمان خانے میں بیٹھ کر اور ان کے بیٹوں سے بات چیت کرکے یہ اندازہ ہوا کہ آپس کے اتفاق اور احترام سے کس طرح ایک عام سا گھرانہ ترقی اور خوشحالی کی شاندار منازل طے کرسکتا ہے۔

ڈاکٹر سعید الٰہی رجل العمل ہیں۔ عمل کے آدمی ہیں۔ وہ جو سوچتے ہیں کر گزرتے ہیں ۔اور چونکہ موروثی طور پر پاکستانیت سے جڑے ہوئے ہیں اس لئے ان کی سوچ پاکستان سے باہر جاتی نہیں ہے۔ ان سے جو ایک بار ملتا ہے دوبارہ ملنے کی آرزو پالتا رہتا ہےِ۔ بناوٹ سے کوسوں دور ہیں۔ یہ دنیا دار العمل ہے اور وہ زندگی کے ہر لمحے میں ملک کے لئے کچھ کر نا چاہتے ہیں۔ منصوبے اور تصّورات ہاتھ باندھے حاضر رہتے ہیں۔ عام آدمی ایک وقت میں کسی ایک اشو کو سُلجھا رہا ہوتا ہے۔ڈاکٹر صاحب کے پاس ایک نہیں کئی دماغ ہیں۔ وہ بیک وقت درجنوں محاذوں پر ڈٹے ہوئے ہیں۔ ادھر مسئلہ پیدا ہوا اُدھر کھٹاکھٹ اس کے دو تین حل سامنے آگئے۔ان کے دفتر میں مغل دربار کا سا ماحول ہوتا ہے۔ کچھ نہ کچھ نیا ہورہا ہوتا ہے ۔ بیگ راج جیسے کئی رتن قلم کاغذ لئے ہدایات لے رہے ہوتے ہیں ۔ سیاست پر تجزیہ چل رہا ہے ‘ کسی دوست کی سفارش ہورہی ہے’ ٹی وی پروگرام ریکارڈ ہور ہا ہے’ سیمینار کی تیاری ہورہی ہے’گھریلو معاملات بھی طے ہو رہے ہیں۔ ملاقاتوں کا ایک سلسلہ جاری رہتا ہے۔ جب سے ہلال احمر کے چیئرمین بنے ہیں سٹاف کی دوڑیں لگی رہتی ہیں ۔ افسر شاہی معدوم ہوگئی ہے۔ کام ‘کام اور بس کام کا منظر دیکھنا ہو تو اس انتھک مسیحا کے ساتھ ہو لیجئے۔ آپ جسمانی اور دماغی طور پر تھک جائیں گے لیکن ڈاکٹر سعید الٰہی کو ہشاش بشاش پائیں گے۔ وہ کم خور ہیں۔ بہت کم سوتے ہیں۔ کام ہی ان کی ”انجوائے منٹ” ہے۔ہلال احمر فورم کا قیام ان کا تازہ قدم ہے۔ مصیبتوں میں گھرے اور تباہیوں سے متاثرہ لوگوں کے انسانی مسائل کو میڈیا’ متعلقہ اداروں اور حکومت تک پہنچانے کے لئے تشکیل دیئے گئے اس فورم کا پہلا اجلاس تھا۔ مجھے بھی مدعو کیا گیا تھا ۔ یہ ایک سیمینار تھا جس میں وزیرستان سے عارضی طور پر بے گھر ہوجانے والے لاکھوں پاکستانیوں کے حوالے سے درپیش مشکلات اور اقدامات پر بات کی گئی۔سرحدوں کے وفاقی وزیر محترم جنرل عبدالقادر بلوچ مہمان خصوصی تھے۔ مجھے اعزاز حاصل ہوا کہ تلاوت اور تشریح سے پروگرام کا آغاز کروں۔ انسانی خدمت کے حوالے سے آیات تلاوت کیں اور احادیث نبویۖ کی روشنی میں مختصر تشریح بھی پیش کی۔ جناب عبدالقادر بلوچ کا خطاب انتہائی پُرمغز تھا۔ انہوں نے کہا کہ وزیرستان اور خیبر ایجنسی سے بے گھر ہونے والے لوگ سب سے سچے اور پکے پاکستانی ہیں۔ ان کی حب الوطنی پر شک کرنا لاکھوں مائوں ‘ بہنوں اور بچوں کی لازوال قربانیوں کی توہین کے مترادف ہے۔ کون ہے جو اپنا گھر چھوڑنا چاہتا ہے۔ یہ لوگ عارضی طور پر بے گھرنہیں ہوئے۔ ان میں سے اکثر وہ ہیں جو دس دس سال سے اپنے گھر سے دُور کانٹوں بھری زندگی گذار رہے ہیں۔ عبدالقادر بلوچ کا کہنا تھا کہ ان کی مہمان نوازی میں بہت سی کوتاہیاں ہوئی ہیں۔ لیکن ان کی واپسی باعزت طور پر ہورہی ہے۔ پھر سے گھر آباد کرنے کے لئے پورے وسائل مہیا کئے جارہے ہیں۔ انہوں نے تجویز دی کہ نئے ادارے بنانے کی بجائے ہلال احمر جیسے اداروں پر انحصار کرنا چاہے۔ یہ ایسا قومی ادارہ ہے جس پر باہر کے لوگ بھی اعتماد کرتے ہیں اور اس کے پاس بہترین انفراسٹرکچر بھی موجود ہےِ۔ وفاقی وزیر نے یہ بات کہہ کر سب کو حیران کردیا ہے کہ ہلال احمر پہلے ایک مُردہ گھوڑا تھا اور ڈاکٹر سعید الٰہی نے اس مُردہ گھوڑے میں جان ڈال دی ہے۔ سیمینار میں ڈائریکٹر آپریشنز غلام محمد اعوان نے ہلال احمر کیطرف سے آئی ڈی پیز کے لئے مہیا کی گئی خدمات پر تفصیلی روشنی ڈالی۔ انہوں نے بے گھر ہونے والے افراد کے لئے ایک مربوط نظام وضع کرنے پر زور دیا۔ سرجن جنرل میجر جنرل آصف نے بھی ہلال احمر کے کام کی تعریف کی۔ فاٹا اور گلگت بلتستان ہلال احمر کے چیئرمین بھی مقررین میں شامل تھے۔
یہ ایک مختصر سیمینار تھا لیکن ہر مقرر نے اپنے طے شدہ وقت میں اہم اور معلوماتی باتیں کیں۔حاضرین کے کمنٹس نے پروگرام کو مزید دلچسپ بنا دیا تھا۔ معروف کالم نگار اور اسلامی دانشور جناب اوریا مقبول جان نے کہا کہ یہاں بہت سے فورم بنتے ہیں۔کچھ باہر کی فنڈنگ سے چلتے ہیں اور بعض سیاسی ایجنڈے کو پروان چڑھانے کے لئے سرگرم رہتے ہیں۔ ہلال احمر فورم خالصتاً انسانی اور قومی اشو پر سنجیدہ سوچ بچار کے لئے قائم کیا گیا ہےِ۔ ہمیں اپنی اپنی عصبتیوں کو بالائے طاق رکھ کر قومی مسائل کی نشاندہی اور ان کے حل کے لئے بحث و مباحثے کو رواج دینا چاہیے۔ امریکہ اس لئے حکمران بنا ہوا ہے کہ وہاں ہزاروںتھنک ٹینک ہیں جو ریسرچ کی بنیاد پر کام کرتے اور اپنی حکومتوں کو متواتر رہنمائی فراہم کرتے ہیں۔فورم میں کینیڈین ریڈکراس کے صدر نے بھی حصہ لیا۔ انہوں نے ہلال احمر فورم کے قیام کو خوب سراہا۔
ہلال احمر کے رضاکاروں اور سٹاف ممبران نے بڑی دلجمی کے ساتھ اس سیمینار میں حصہ لیا۔ قومی میڈیا کی بھرپور نمائندگی بھی موجود تھی۔مشران کی نمائندگی بھی دکھائی دے رہی تھی۔ تقریب کے اختتام پر وسیع لان میں چائے کا اہتمام کیا گیا تھا۔ یہ سیمینار محسنین پاکستان کے ساتھ یکجہتی کا ایک اعادہ تھا اور ان کی قربانیوں کو سامنے لانے کا اہتمام بھی ۔

شخصیات بہت اہم ہوتی ہیں۔افراد ہی قوموں کے مقدر سنوارتے اور بگاڑتے ہیں۔ فرد کو ملت کے مقدر کا ستارہ کہا گیا ہے۔رجال عظیم کسی ملت کے دامن میں سجے ہوئے وہ ہیرے اور جواہرات ہوتے ہیں جن کی تعداد سے قوموں کی توانائی کا اندازہ ہوتا ہے۔قحط الرجال کا مطلب ہی یہی ہے کہ قوم میں رہبری کے منصب پر فائز ہستیاں دُنیا میں نہ رہیں۔ مصلحین سے تہی دامن اقوام بے راہ روی اور گمراہی کا شکار ہوجاتی ہیں۔
قیام پاکستان سے قبل عظیم شخصیات کی ایک تسبیح موجود تھی۔دانے بکھرتے گئے اور قائداعظم کی جیب میں کھوٹے سکّے بچ گئے تھے۔ جو اصلی لوگ تھے وہ اُفتاد زمانہ کا شکار ہوگئے۔ گزشتہ ستر سالہ تاریخ میں ہمیں افراد کار دکھائی تو دیتے ہیں لیکن ان کی تعداد محض آٹے میں نمک کے برابر ہے۔ جنرل حمید گل مرحوم و مغفور ان محدوے چند لوگوں میں شامل ہیں جن کے وجود سے قوم کے اندر اُمید اور یقین کی شمعیں ٹمٹاتی رہی ہیں۔ جنرل صاحب اُن پاکستانیوں کے لئے ایک نفسیاتی سہارا تھے جو خودی اور خوداری کے اوصاف سے لیس ہو کر ملّی تعمیروترقی میں اپنا حصہ ڈالنا چاہتے ہیں۔ جنرل صاحب کی ریٹائرمنٹ کے بعد کی زندگی کا مطالعہ زیادہ مفید ہے کیونکہ وہ اپنی سوچ اور فکر کے اعتبار سے مکمل طور پر آزاد تھے۔ عہدے کے بندھن یا کسی سرکاری حیثیت کی نزاکتوں سے مبّرا جنرل حمید گل کا کردار روشن بھی ہے اور قابل تقلید بھی۔

ہمارا قومی مزاج یہ بن گیا ہے کہ جب کوئی عظیم شخصیت ہمارے درمیان رہتی ہے تو ہم اس کے نظریات کو اہمیت نہیں دیتے۔ جنرل صاحب ہر کسی کو پُکارتے رہے کہ آئیں اور پاکستان کو اس کی اصل اساس پر قائم رکھتے ہوئے آگے لے کر چلیں۔ انہوں نے ہر فورم پر پاکستان کو عظیم اسلامی ریاست بنانے کا تصور پیش کیا۔ سیکولر طبقے کی سازشوں کو بے نقاب کیا اور اسلام کی حقانیت اور اسلامی دنیا کی عظمت کے گُن گائے۔ کچھ نے ان کی آواز پر لبیک کہا ‘ بہت سوں نے ان کی بات کو سچ مانا لیکن وہ اقتدار کے سورج کی پوجاپاٹ میں ہی مصروف رہے۔ بعض سماجی اور سیاسی حلقے چند قدم ان کے ساتھ ضرور چلے لیکن راستے میں ہی تھک گئے۔ جنرل صاحب کبھی مایوس نہیں ہوئے۔ انہیں بڑے سے بڑے جلسوں میں سن لیں یا چھوٹی سی چھوٹی محفلوں میں دیکھ لیں’ ایک ہی نظریہ اور ایک ہی سوچ کے داعی تھے۔ وقت’ حکومت’ یا ماحول نے جنرل صاحب کو کبھی بھی متاثر نہیں کیا۔ وہ بی بی سی کو انٹرویو دے رہے ہوں یا کسی مقامی اخبار کے ساتھ بات جیت کر رہے ہوں اپنے بنیادی فلسفے سے سرمُو انحراف نہ پائیں گے۔
نسیم انور بیگ جنت نصیب کی میز پر جنرل صاحب سے اکثر ملاقات رہتی تھی۔ تھنکرز فورم میں بھی ان کے افکار سننے کو ملتے تھے۔میں نے جنرل صاحب کی زندگی میں ان کے حوالے سے کالم لکھے”’جنرل حمید گل امریکہ سے ڈرتے کیوں نہیں” اس تحریر پر انکل نسیم انور بیگ کی طرف سے بہت پذیرائی ملیِ۔ انکل نے اس کالم کی فوٹوکاپیاں تقسیم کرائیں۔ جنرل صاحب نے شکریے کا فون کیا۔ یونائیٹڈ انٹرنیشنل گروپ کے آفیسرز نے جنرل صاحب کے اعزاز میں عشایئے کا اہتمام کیا تھا۔ یہ عشائیہ ایک فکری نشست میں تبدیل ہوگیا۔ آفیسرز نے دنیائے اسلام سے لے کر پاکستان کے اس وقت کے حکمران پرویز مشرف تک ہر طرح کے سوالات کئے۔ جنرل صاحب نے کمال تحمل سے جوابات دیئے گئے۔انہوں نے عالمی معیشت پر بھی سیر حاصل گفتگو کی۔ وہ علامہ اقبال کے اشعار اور قرآنی آیات سے ایسے حوالے دیتے تھے کہ سامع انکار کر ہی نہیں سکتا تھا۔ مجھے تو وہ اقبال کے شاہین دکھائی دیئے۔حاضر وموجود سے بیزار کردینے والے امام برحق لگے۔انہوں نے اس محفل میں بھی ”نرم انقلاب” کے خدوخال بیان کئے تھےِ۔انہیں پاکستان کے عروج کے بارے میں لازوال قسم کا اعتماد تھا۔ وہ پاکستانی طالبان کو بھارت’اسرائیل اور امریکہ کی واردات سمجھتے تھے۔ وہ افغان قوم کی بہادری کے قائل تھے اور امریکیوں کی شکست کو یقینی سمجھتے تھے۔
آج جنرل صاحب ہمارے درمیان نہیں ہیں تو اس کا یہ مطلب نہیں کہ ان کا مشن وفات پا گیا ہے۔ انکل نسیم انور بیگ نے جب نظریہ پاکستان سنٹر کی بنیاد رکھی اور بعد ازاں مجھے اس کی صدارت کی ذمہ داری سونپی تو سرپرست اعلیٰ کے طور پرجنرل حمید گل کا نام لکھا۔یہ سنٹر آج بھی جنرل صاحب اور انکل بیگ کے نظریے۔نظریہ پاکستان یعنی نظریہ اسلام کی شمع روشن کئے ہوئے آگے بڑھ رہا ہے۔ جنرل صاحب کی روح سے میرا اور میرے ساتھیوں کا یہ عہد ہے کہ ہم حمید گُل مرحوم و مغفور کے مشن کو زندہ رکھیں گے اورقحط الرجال کے اس موسم میں ان کی یادوں اور باتوں سے قومی افکار کو تازہ کرتے رہیں گے۔ اور ثابت کریں گے کہ جسم کی موت کوئی موت نہیں ہوتی!
سانس تھم جانے سے اعلان نہیں مر جاتے
ہونٹ جم جانے سے فرمان نہیں مرجاتے

آرمی چیف نے بلاکم وکاست واضح کردیا ہے کہ پاک چین اقتصادی راہ داری ہر حال میں مکمل ہوگی۔ جنرل راحیل شریف نے بلوچستان کے دورے کے دوران پاکستان کے دشمنوں کو خبردار کیا ہے کہ پاکستان اس راہ داری کے مخالفین اور پاکستان کی اقتصادی ترقی کے دشمنوں کو پوری طرح پہچانتا ہے۔ سپہ سالار کے اس پُراعتمادلہجے کے بعد افواج پاکستان اور سول حکومت کی ترجیحات کے حوالے سے یک نگاہی کا تاثر مضبوط ہوگیا ہے۔آرمی چیف کے اس عزم کے ساتھ ہی کراچی اسٹاک ایکسچینج میں ریکارڈ تیزی آئی ہے۔میاں محمد نوازشریف نے پارلیمانی پارٹی کے حالیہ اجلاس میں مسلم لیگی ارکان اسمبلی اور وزراء و مشیران کے اہم ترین اجلاس سے خطاب کرتے ہوئے سپہ سالار کی بات کو دہرایا ہے۔ انہوںنے جوڈیشل کمیشن کے فیصلے کے حوالے سے پاکستان تحریک انصاف کو ”ڈی سیٹ” کرنے کے مطالبے کو غیر ضروری اور وقت کا ضیاع قرا ر دیا ہے اور واضح ہدایات کی ہیں کہ چھوٹے موٹے سیاسی تنازعات میں الجھنے کی بجائے اقتصادی راہ داری کے منصوبے پر عمل درآمد کو فوری اور یقینی بنایا جائے۔ ایک خبر یہ بھی ہے کہ میاں نوازشریف نے یہ طے کر لیا ہے کہ دو ہزار اٹھارہ تک بجلی کے پراجیکٹس ہر حال میں مکمل کرنے ہیں۔ باخبر حلقے یہ کہہ رہے ہیں اس مقصد کے حصول کے لئے پراجیکٹس پر عملاً کام شروع ہوگیا ہے۔
یوں تو پاکستان میں گذشتہ برس کاروں کی فروخت ریکارڈ رہی ہے۔ لیکن اس کا یہ مطلب ہرگز نہیں کہ پاکستان کے اندر غربت کی شرح میں کمی آئی ہے۔ پاکستانیوں کی کثیر تعداد بے روزگاری کے عذاب میں مبتلا ہے اور بے روزگاری ہی غربت کو جنم دیتی ہے۔ اقتصادی راہداری سے جڑے تمام منصوبوں میں تمام صوبوں کے لئے معاشی ترقی کے پہلو شامل ہیں۔ خدا کا شکر ہے کہ صوبائی حکومتوں نے اپنے تمام اختلافات تقریباً ختم کر لئے ہیں اور آگے آنے والے مسائل کو حل کرنے کے لئے پارلیمانی کمیٹی بھی بنا دی گئی ہے جو وقتاً فوقتاً اختلافی امور نمٹائے گی۔ایک بڑی ڈویلپمنٹ یہ ہوئی ہے کہ ایران کا یورپی ممالک سے جوہری اختلافات پر معاہدہ طے پا گیا ہے اور پاک ایران گیس پائپ لائن کی راہ ہموار ہوگئی۔ ایرانی حکومت کی طرف سے ایک دو روز میں اس حوالے سے ایک اعلیٰ سطحی وفد اسلام آباد کا دورہ کرنے والا ہے۔پاکستان نے سعودی یمن جھگڑے سے خود کو بچا کر رکھا جس سے ہمسایہ ملک ایران کے ساتھ تعلقات مزید بہتر ہونے کی توقعات کی جاسکتی ہیں۔ پاکستان کے وزیراعظم نے روس میں ایک کانفرنس کے دوران بھارتی وزیراعظم نریندر مودی سے بھارت کی شرائط پر ملاقات کی تھی۔ اگرچہ وزیراعظم کو اس پر اندرون ملک بڑی سُبکی اٹھانا پڑی لیکن بھارتی رویے سے اندازہ ہوتا ہے کہ وزیراعظم نے یہ سب جان بوجھ کر کیا تھا تاکہ بھارت کو کسی اشتعال انگیزی کا کوئی جواز نہ مل سکے۔ اس وقت بھارت ان ممالک کی فہرست میں سب سے نمایاں ہے جو پاکستان کو اقتصادی راہداری پر عمل درآمد سے روکنا چاہتے ہیں۔
قارئین ! میں پہلے بھی اس بات پر زور دیتا رہا ہوں کہ یہ وقت صبر’تدبر اور حکمت کا ہے۔مومنانہ فراست اسی کو کہتے ہیں کہ قوم کے عظیم تر مفاد میں دشمن کی وقتی اشتعال انگیزیوں سے درگزر کی جائے۔ بھارت جانتا ہے کہ پینتالیس ارب ڈالر کے اس منصوبے سے پاکستان کی رگوں میں معاشی خون پوری تیزی سے دوڑنے لگے گا اور ایک قریب المرگ معیشت کو ہوش آجائے گا۔ بھارت نے ہماری شاہ رگ کشمیر پر قبضہ کر رکھا ہے۔ قدرت نے جغرافیائی حیثیت سے فائدہ اٹھانے اور متبادل شاہ رگ تعمیر کرنے کا ایک سنہری موقع فراہم کردیا ہے۔
متبادل شاہ رگ کو کسی قبضہ اور کسی حملہ سے بچانا ہماری سب کی مشترکہ ذمہ داری ہے۔فوج ہو سیاست ہو۔عوام ہوں یاخواص۔اگرہم چاہتے ہیں کہ ہماری آئندہ نسلیں بے روزگاری اور بے حمیتی سے محفوظ رہیں تو اس شاہ رگ کے لئے ہمیں جہاں ایک طرف دن رات محنت کرنی ہے وہیں اس کی نگہداشت کا فریضہ بھی نبھانا ہے۔ چند مٹھی بھر شرپسند اور غیر ملکیوں کے ایجنٹ ترقی کے اس شاندار منصوبے کو ہم سے چھین نہ پائیں!

دہشت گردی اب کسی ایک مُلک یا قوم کا مسئلہ نہیں رہا۔ یہ ایک بین الاقوامی اشو بن چُکا ہے۔ پاکستان دہشت گردی کے عفریت سے بُری طرح متاثر ہوا ہے۔ افواج پاکستان کو دہشت گردوں کے خاتمے کا جو ٹاسک دیا گیا تھا وہ بڑی حد تک پورا ہوچکا ہے۔ فوجی نوعیت کی فتوحات قابل ذکر ہیں۔ضرب عضب کے تین اہداف مقرر کئے گئے تھے۔پہلا ہدف ان دہشت گرد گروہوں اور تنظیموں کے ٹھکانے ختم کرنے تھے جو اعلانیہ طور پر ریاست اور ملک کے خلاف برسرپیکار تھے۔ الحمد اللہ ہماری عسکری قوت نے ”ناقابل شکست ” سمجھے جانے والے ان گروہوں کا خاتمہ کردیا ہے۔ یہ بلوچستان کے علیحدگی پسند لشکر تھے یا اسلام کا نام استعمال کر کے اسلامی جمہوریہ پاکستان کو توڑنا چاہتے تھے دونوں قسم کے گروہ اپنے انجام کو پہنچ گئے ہیں۔ جو چند بچے ہیں وہ بھی فرار کی راہ اختیار کئے ہوئے ہیں۔ہمارے بہادر فوجی ان کی آخری پناہ گاہوں تک جاپہنچے ہیں۔دوسرا ہدف فرقہ وارانہ تنظیموں کی وارداتوں پر قابو پانا تھا۔مقام شکر ہے کہ ان کے وجود کو بھی نیست و نابود کردیا گیا ہے۔ اب ان کے اندر ہتھیار اٹھانے کی ہمت نہیں رہی اور ان کے ماسٹر مائنڈز کو مضبوط گرفت میں لیا جاچُکا ہے۔ مُلک میں ٹارگٹ کلنک کے اکا دُکا واقعات تو ہوتے ہیں لیکن ایسی انتہا پسند تنظیموں کا نیٹ ورک تباہ کردیا گیاہے۔ تیسرا اور اہم ترین ہدف دہشت گرد تنظیموں کی مالی معاونت اور معاون لوگوں کے گرد گھیرا تنگ کرنا تھا اس حوالے سے کراچی میں جو آپریشن ہورہا ہے اس کے ذریعے بڑے بڑے نامی گرامی لوگوں کو پکڑا جا چُکا ہے۔ چونکہ کرپشن انڈسٹری کے ذریعے ہی ان شدت پسند گروہوں کو مالی مدد فراہم کی جاتی تھی اس لئے مالی بدعنوانی کے ذرائع پر آہنی ہاتھ ڈالا گیا ہے ۔ قوم کو یقین ہے کہ کراچی میں آپریشن اپنے منطقی انجام تک پہنچ کر ہی ختم ہوگا۔
سوال یہ پیدا ہوتا ہے کہ کیا عسکری فتوحات دہشت گردانہ سوچ کو ختم کر پائیں گی۔ ایسا ہونا ممکن نہیں ہوتا۔ جب تک عمومی سوچ تبدیل نہیں ہوتی اور انتہا پسند مذہبی مفکرین کے ساتھ ڈائیلاگ نہیں ہوتا تب تک دہشت گردی کے مآخذ ختم نہیں ہوسکتے۔ طالبان فکر کے حامل گروہوں کو اس وقت بزور قوت دبادیا گیا ہے لیکن ان کے اندر کے دہشت گرد پر ہم فتح حاصل نہیں کرسکے۔ کہا جارہا ہے کہ بہت سے طالبان نے ”داعش” میں شمولیت اختیار کر لی ہے۔ داعش کی فکر ہرگز مقامی نہیں ہے۔یہ تنظیم کسی ردّعمل کے نتیجے میں سامنے نہیں آئی بلکہ اس کا ایک خاص فلسفہ ہے اور اس کے چاہنے والے امریکہ اور یورپ میں بکثرت موجود ہیںِ۔لیکن اس تنظیم نے پاکستان اور افغانستان جیسے غیر عرب ممالک میں بھی اپنے اثرات ظاہر کرنا شروع کردیئے ہیں۔ یہ ایک خالص نظریاتی جنگ ہے ۔”داعش” کی غیر انسانی کارروائیوں کو دیکھا جائے تو تاریخ اسلام بلکہ انسانی تاریخ میں ایسی بہیمانہ سرگرمیوں کی کوئی مثال نہیں ملتی۔ پاکستان نے دہشت گردی کے اس ابھرتے ہوئے خطرے سے نپٹنے کا کوئی بندوبست نہیں کیا۔یہ طالبان نہیں ہیں بلکہ طالبان سے دس گناہ خطرناک لوگ ہیں اور ان کے نزدیک ہم تمام پاکستانی واجب القتل ہیں۔
بوکو حرام کی کارروائیوں کی جھلک دیکھ کر انسان لرز اٹھتا ہے۔ اسی طرح داعش جس طرح قتل عام کرتی ہے اس سے بھی لرزہ طاری ہوجاتا ہے ۔ عالمی نیٹ ورک کی حامل اس تنظیم کو پاکستانی نوجوانوں کے ذہن متاثر کرنے کے لئے کسی مدرسے یا مسجد کی ضرورت نہیں۔سوشل میڈیا ان کا سب سے بڑا ہتھیار ہے۔ یورپ سے لڑکیاں ان داعشیوں کے ساتھ نکاح کے لئے شام اور عراق کا خطرناک سفر طے کرتی ہیں۔ یورپ کی آزاد زندگی ان کو روک نہیں سکتی۔یہ وہ حالات ہیں جن کا فکری انداز میں مقابلہ کیا جانا ضروری ہے۔سچ یہ ہے کہ ان کے فکری توڑ کے لئے کوئی کام نہیں ہوا۔ ادارہ منہاج القرآن نے کچھ کام کیا لیکن ڈاکٹر طاہر القادری دھرنا سیاست میں ایسے اُلجھے کہ پورا سال ضائع ہوگیا۔ شیخ الاسلام نے چھ سو صفحات پر مشتمل ایک فتویٰ تحریر کیا تھا جس میں امن کا ایک مکمل نصاب بھی دیا گیا تھا۔ کاش کہ اس نصاب کو ہر یونیورسٹی کالج اور سکول میں متعارف کروایا جاتا۔
اسے پاکستانی قوم کی خوش قسمتی کہیے کہ ڈاکٹر صاحب نے ہمت کرکے دوبارہ سے اس کام کو آگے بڑھانے کا اعلان کردیا ہے۔ڈاکٹر صاحب کے قریبی رفیق کار اور شعلہ بیان مقرر جناب عُمر ریاض عباسی نے گزشتہ روز مجھ سے رابطہ کیا اور مجھے 29جولائی کو ”دہشت گردی کے خلاف امن کے اسلامی نصاب” کی افتتاحی تقریب میں شرکت کی دعوت دی ہے۔ قبلہ ڈاکٹر طاہر القادری صاحب کی سیاست سے اختلاف کیا جاسکتا ہے لیکن ان کی قومی سوچ اور دینی فکر قابل غور ہوتی ہے۔ امن کے لئے اس نظریاتی جنگ میں ہر اس شخص کو ساتھ دینا چاہیے جو صرف پاکستان ہی نہیں بلکہ پوری دنیا میں امن کا خواہاں ہے۔ مسلم امت کو بغیر کسی تیاری کے ایک نہ ختم ہونے والی جنگ میں جھونک دیا گیا ہے جس کا انجام مسلمانوں کے لئے تباہی لا رہا ہے ۔امت مسلم کو اس عذاب سے نجات دلانے کے لئے ڈاکٹر صاحب کے اس صالح عمل میں ہماری قلمی کاوشیں حاضر رہیں گی۔ کیونکہ قرآن پاک کا حکم ہے ”نیکی اور پرہیزگاری کے کاموں میں ایک دوسرے سے تعاون کرو”۔

قارئین اکرام اور پیارے روزہ دار بہن بھائیو! چودہ صدیوں سے مسلم امہ ماہ صیام میں روزہ کی نعمت سے لطف اندوز ہورہی ہے۔ ہر سال رمضان المبارک میں ہم سحری سے افطاری تک روزہ رکھتے ہیں اور ہم سب کی کوشش ہوتی ہے کہ ہم قرآنی حکم اور اسوہ رسول ۖ کی روشنی میں اپنی اس عبادت کو جاری رکھیں ۔مجھے یقین ہے کہ آپ روزہ اور اس کی اہمیت اور اس کی برکات سے بخوبی آگاہ ہیں۔ چونکہ تذکیہ سے ایمانی تقویت حاصل ہوتی ہے اس لئے اللہ کی طرف سے عطا کی گئی اس خوبصورت عبادت کے مختلف پہلوئوں کا اس حوالے سے جائزہ لیں گے۔
یہاں میں یہ بھی واضح کردوں کہ تقویٰ کے حوالے سے مختلف تشریحات ہمارے سامنے ہیں۔ تقویٰ کسی مومن کی وہ دماغی حالت ہے جہاں انسان کے اندر ارادے کی ایسی قوت پیدا ہوجاتی ہے کہ وہ برائی سے دور بھاگتا ہے اور اچھائی کی طرف لپکتا ہے۔ ہم آج اس نشست میں یہ دیکھیں گے کہ تقویٰ کی منزل کے حصول میں روزہ کس طرح مدد کرتا ہے ۔صیاّم کا لفظی ترجمہ ٹھہرجانے کا ہے۔”رک جانے” کو صوم کہا جاتا ہے۔ اگر آپ چل رہے ہیں تو رک جائیں۔آپ کھا رہے ہیں تو رک جائیں۔آپ پی رہے ہیں تو رک جائیں’آپ سوچ رہے ہیں تو رُک جائیں’آپ سن رہے ہیں تو رُک جائیں ‘آپ دیکھ رہے ہیں تو رُک جائیں۔
روزہ آپ کو روک دیتا ہے۔اگر کوئی شخص بُرے کام کے ارادے سے چل رہا ہے تو روزے دار کو حکم ہے کہ وہ برائی کی طرف قدم نہ بڑھائے۔اگر کوئی کھا پی رہا ہے تو روزہ رکھنے کے بعد دن کے خاص وقت تک کھانا پینا نہیں ہے۔ اگر کسی کو نقصان پہنچانے کے لئے سوچ رہا ہے تو روزہ اسے ایسی سوچ ترک کرنے کی شرط لگاتا ہے۔اگر جھوٹ بول رہا ہے’واہیات بول رہا ہے ‘گالی دے رہا ہے تو روزہ کی حالت میں اسے ایسے بول بولنے سے روک دیا جاتا ہے۔ اگر وہ کوئی غیر شرعی باتیں سن رہا ہے تو روزہ دار کانوں کو بند کر لیتا ہے۔
غرض یہ کہ ہر اس کام سے روزہ انسان کو روک دیتا ہے جس سے اللہ ناراض ہوتے ہوں’ انسان کا دل دکھتا ہو’کسی کا حق مارا جاتا ہو’ شہوت اور ہوس کا راستہ کھلتا ہو۔
کیا روزہ کوئی تالا ہے ‘ کوئی زنجیر ہے ‘کوئی پردہ ہے۔ آخر کیا چیز ہے جو روزہ دار کو سب مکروہات’ مغلظات’جھوٹ فریب’ناجائز منافع خوری’ ذخیرہ اندوزی اور ہر طرح کے شیطانی اعمال اور سفلی جذبات سے رُوک لیتا ہے۔
حدیث نبویۖ ہے ‘ اللہ فرماتے ہیں”روزہ میرے لئے ہے اور میں ہی اس کا اجر دوں گا”۔
پھر ارشاد ہوتا ہے’
”اگر روزہ رکھنے سے روزہ دار کے اندر اللہ کا خوف بیدار نہیں ہوا تو اللہ کو روزہ دارکی بھوک ‘پیاس سے کوئی غرض نہیں”۔
ایک جگہ ارشاد ہوتا ہوا۔
”کتنے روزہ دار ہیں جن کو بھوک پیاس کے سوا کچھ حاصل نہیں ہوتا”۔
انسان جب یقین کر لیتا ہے کہ روزہ کا اجر اسے خالق کائنات اور رب العالمین نے دینا ہے تو پھر اس کے سامنے ”رُک ”جانے کا عمل بہت آسان ہوتا ہے۔ نماز کے لئے وہ وضو کرتا ہے۔ تین بار پانی منہ میں ڈالتا ہے ‘ چاہے تو گھونٹ اندر لے جائے۔دُنیا کی کوئی طاقت پتہ نہیں چلا سکتی کہ اس نے پانی پیا ہے یا نہیں۔لیکن یہ روزہ دار پیاسا رہتا ہے پانی کا قطرہ تک حلق سے نیچے نہیں آتا ۔ یہ ہے تقویٰ کی پہلی نشانی۔ اللہ کے ہونے’ اس کے دیکھنے اس کے حییّ القیوم ہونے پر پُختہ یقین ۔اور یہ عہد کہ پانی کا گھونٹ پینانہیں’خیانت نہیں کرنی۔ صرف اللہ کے لئے ‘ اللہ کے ہاں سے اجر پانے کے لئے۔ یوں سمجھ لیجئے کہ آپ نے اسلام آباد سے لاہور جانا ہے۔ جانے کے کئی طریقے ہیں۔پیدل’ بس’ٹرین۔سب ذریعے آپ کو منزل پر لے جائیں گے۔ لیکن اگر آپ ہوائی جہاز کے ذریعے جائیں تو چار گھنٹے کا سفر ایک گھنٹے میں طے ہوجائے گا۔ تمام عبادات کا مقصد تقویٰ کی منزل کا حصول ہی ہے۔ لیکن روزہ بڑی سرعت کے ساتھ آپ کو تقویٰ کی کیفیت سے بہرہ مند کر دیتا ہے۔ اسی لئے قرآن نے سورئہ بقرہ میں فرمایا ہے کہ روزے فرض کرنے کامقصد آپ کو تقویٰ کی منزل تک پہنچانا ہے۔ یہی وجہ ہے کہ قرون اولیٰ میں جب ماہ صیام کا چاند نظر آتا تھا تو مسلمان چھتوں پر چڑھ کر خوشی سے نعرے مارتے تھے اور استقبال رمضان کے لئے تیاریاں روزوں پر آجاتی تھیں۔ میری گزارش ہے کہ روزہ محض ثواب کے لئے نہیں’ یہ کوئی رسم نہیں ‘ یہ کلچر نہیں۔یہ ایک ریفریشنگ کورس ہے۔ یہ ایک ورکشاپ ہے’ ایک ٹریننگ سیشن ہے۔ صرف ایک ہی نیتّ کہ یا اللہ میں تیرے لئے روزہ رکھ رہا ہوں اور تو ہی اس کا اجر دینے والا ہے اوراجر کا بھی ابھی سے یقین کر لیجئے کہ۔اجر تقویٰ کی کرنسی کی صورت میں ملتا ہے۔اگر کوئی شخص ماہ صیّام میں تقویٰ کی صلاحیت پا گیا گویا اس نے متقیّ ہونے کی نعمت پا لی اور متقی ہونا وہ صلاحیت ہے جو انسان کو دنیاوی اور اخروی زندگی میں کامیابی دلانے کا خدائی نسخہ ہے۔
آپ سے اتنا کہنا ہے کہ ہم اور آپ اپنے آپ کو ابھی سے روک لیں۔غیبت سے روک لیں’ریاکاری سے روک لیں’ عناد’بغض اور حسد سے روک لیں’جھوٹ اور گالی گلوچ سے روک لیں’ شرم و حیا سے عاری مناظر دیکھنے سے روک لیں’کسی کی برائی’چغل خوری سے روک لیں۔ہم رک کر آگے بڑھیں اور شاہراہ تقویٰ کی طرف قدم بڑھائیں ۔ہر روزہ کیساتھ ‘ ہر تروایح کے ساتھ ‘ ہر افطاری اور سحری کیساتھ تقویٰ کی جانب ہمارا سفر تیز ہوجائے گا اور روز عید ہم اپنے اندر وہ قوت محسوس کریں گے جو ہمیں پورا سال خیر کے راستے پر چلنے میں مدد دے گی’ بہتر طرز زندگی میں معاون بنے گی’ ہم معاشی’معاشرتی’ انفرادی اور اجتماعی زندگیوں میں برکات سمیٹیں گے اور خوشیاں بانٹیں گے۔